Lamthai khuain Kawlphetha Neilo Rei

Tlabung Sub-division huamchhunga Lamthai khua, In 150 vel awmnaah thla khat leh ni 25 chuang kawlphetha an neih tawh loh avangin mipuiten harsatna an tawh phah nasa hle.

Tablabagh-II khawtlang hruaitute hnen atanga thu dawn danin, thla liam ta September ni 4 khan an khaw châwm tu Kv 110 transformer a chhia a, siamthat a nih loh avang leh, transformer thaa thlak a nih loh avangin ni 55 chhung vel power supply an hmu tawh lo a ni.

Transformer chhiat thu hi power and electricity department lamah hriattir ni tawh mah se, tun thlengin an harsatna sukiang tura hmalakna mumal a awm lo niin, Tablabagh Village Council-ten kan palai an hrilh a, hun rei tak an ên tawh loh avang hian kawng hrang hrangah harsatna an tawh phah a ni.

Advertisements
Aside | Posted on by | Tagged , | Leave a comment

INDIA SIPAI-TITI KHAWCHANG by Fredy Lalrinmawia Renthlei

Indian Army kan sawi hian khawmual sipai te kan sawina a ni a. Indian Army hi stading army a ni a, khawvela lian ber dawttu a ni a; 1,129,900 active troops leh 960,000 reserve troops a nei a ni.?

1 April, 1895 a din tan anga ngaih a ni.
Tunah hian Indian Army hian Infantry Modernization Programme , Futuristic Infantry Soldier As a System ( F-INSAS ) tih chu a kal pui mek bawk a ni.

Hetiang hi an inrel bawl dan chu a ni-

India sipai hi operational command paruk leh training command pakhatah an inthen a, chu chu Lt General senior ten an kaihhruai thin a. Command tin chuan GOC-IC (general officer Commanding in chief ) a nei theuh a ni.

Command tin hian Corp pahnih emaw, a aia tam emaw a nei theuh a, a pumpuiah Indian Army hian corp 13 a nei a,  Corp tin chu Lt General in an kaihruai leh theuh a ni. Corp tin hian Division 3-4 a nei theuh a, chung chu Major general ten an kaihhruai leh a ni.
Division pakhat hian Brigade 3-4 an nei leh theuh a. Tunah hian Indian army hian Division 37 an nei mek. Brigade khat hnuaiah hian Indo mi sipai 3000 leh a puitu chi hrang hrang an awm a. Brigade khat hian infantry battalion 3 vel a nei thin.

Brigae hi Brigadier in a command a. Battalion hian rifle company pali a nei a, Battalion hi Colonel-in a kaihhruai leh a. company hi Lt Colonel emaw, Major in emaw an kaihhruai a. Company pakhat hian Platoon pathum an nei leh a Platoon hi JCO-in an kaihhruai a, Platoon khat hian section 3 a nei leh a. Section khatah hian Mi 10 vel zel an awm a, chu chu Havildar-in an command ve thung a ni.

Heng kan sawi takah hian supporting Regiment neuh neuh, Damdawi lam te, signa lam te, Engineer lam te a la awm a. Chung chu chip chiarin sawi lo mai ila.
North East India hi Eastern Command hnuaiah kan awm a, a hmunui chu Kolkata a ni.

INDIA SIPAI LAL DAN INDAWT.

(Commissioned Officers)

Field Marshal
General
Lieutenant General
Major General
Brigadier
Colonel
Lieutenant Colonel
Major
Captain
Lieutenant

(Junior Commissioned Officers)

Subedar Major
Subedar
Naib Subedar

(Non Commissioned Officers)

Regimental Havildar Major
Regimental Quarter Master Havildar
Company Havildar Major

(Jawan/ Sepoy)

Company Quarter Master Havildar
Havildar
Naik
Lance Naik

Aside | Posted on by | Tagged , | Leave a comment

Chakma Vangin Arunachal-ah Lungawi Lo

Arunachal Pradesh Public Service Commission hnuaia exam tum zingah Chakma pali an tel avangin state huap zirlai pawl, AAPSU an lungawi lo hle.

APPSC hnuaia exam beih tum, Chakma 4 zinga 1 chu Scheduled Tribe angin a inziak a, 3 chu General Category-ah an inziak a, AAPSU chuan Chakma-te hi ram leilung fa an nih loh bakah ram khua leh tui an nih loh avangin an exam ve thei lo nia sawiin, dan bawhchhia niin an sawi.

Hemi chungchangah hian zirlaite chuan APPSC hnathawk-te an dem thu leh Chakma-te puitute hi hrem an phut thu pawh APPSC Chairman Tajom Talohon an hrilh tawh thu an sawi a, an tu leh fate tan an ram hi an humhalh zel tur thu leh Chakma leh Hajong hnamte chu a tawp thlenga dodal tura an inpeih thu pawh an sawi a ni.

Hemi chungchangah hian APPSC Chairman chuan thil dik lo a awm a nih chuan siam that thuai a nih tur thu, AAPSU hruaitute hi a hrilh a, a hriat chinah chuan Arunachal Pradesh-ah hian Chakma te hian Scheduled Tribe hminga APPSC exam an beih theih loh thu leh, General category-ah erawh chuan an tel thei nia a hriat thu te, tun tuma thil thleng pawh hi tihluih nia a hriat loh thute a sawi a, AAPSU General Secretary, Tabom Dai erawh chuan APPSC hian tun hma pawhin hetiang hian thil a lo tih tawh nia sawiin, tihpalh a nih pawhin, tihpalh thila Chakma-te exam tir chu engti kawng maha an pawm loh tur thute a sawi ve thung a ni.

Aside | Posted on by | Tagged , | Leave a comment

MIKHAIL KALASHNIKOVA AK47 SIAM CHHUAH CHHAN —A TAKA TIH by Fredy Lalrinmawia Renthlei

Senior Sergeant Mikhail Kalashnikov-a chu Khawvel Indopui pahnihna laia Inbeihna hmun pakhat, Bryansk-ah hliam a tuar a. A hliam tuar chung chuan, Ke-in Damdawi In a kal thleng thak a. Damdawi thiamna hmanga an enkawl hnuin, damna a lo chang chho leh ta a ni. Chutianga enkawlna a dawn lai chuan, a thil tawn tawhte chu a ngaihtuah let a. An sipaiten ralthuam an neih chhiat vanga an tawrhna te chuan a mah chu a vit ngut ngut a.

Ralthuam tha zawk chu neiin, an Rifle te chu lo tha ve deuh hlek se chu, German ho zawk chu an ching chau hrep thei dawn a. German sipaite silai chu a that fal zawk em avangin an han indo pawhin an ngam ta mang lo thin a ni.

Damdawi In Khuma mu reng chung chuan, an ram sipai hotute, an ram hruaitute, an ralthuam siamtute chu dem loin, amahin, silai tha zawk siam a tum ta a.”German ho umkir thei tur Rifle” chu siam a tum ta a ni.
1942  atangin Rifle chu a siam ta a. Hman theih tur taka a peih chu 1947-ah a ni a. Silaimu 7.62X39 mm hmangin, semi-automatic, Long stroke piston, Gas operated Rifle chu a siam chhuak ta a. 1949-ah Soviet Sipaiten an hmang tan ta a ni. 7.62X39 mm Kalashnikov Rifle tia hriat lar a ni ta a ni.

Mikhail Kalashnikov-a khan, American M1  Rifle leh German StG44 Rifle-a a tha lai lai lakhawmin AK-47 hi a siam chhuak ta a. A zang a, a hman a awl a, a him phian bawk avangin silai lar leh ngainat hlawh tak a ni chho ta zel a. Russia rawm pawhin, huasakna tam tak neih belh phahnan a hmang chho zui ta bawk a ni.

Ak-47 hi Metre 300 vela hla atanga mihring lu leh a kawng inkar kap nalh nalh thei tura tha tawk pangai ngaih a ni a. Silai kap thiam ber berte chuan, Metre 800 a hla atang kap se, bawk chunga an kahin mu kah chhuahah, mu khat tal chuan, an kap fuh thei turah an ngai a ni.

Mikhail Kalashnikov-a khan, a damlohna khumah khan, an ram hruaitute, an sipai hotute, an ralthuam siamtute kha, an rifle that tawklohnaah khan, dem vak vak se, a that leh zualna tura rawtna emaw, tha tawh tum miah lo se, Russia-in ralthuam lama an hmasawnna kha a tlai dawrh dawn tih a chiang reng a ni. Sawiselna lai tur a hriat chu, pawngpaw sawisel loin, a aia tha zawk siam tumin a dam ve leh a hun a hmang tan nghal a. Kalashnikov-a chuan, Rifle tha leh chhuanawm tak a siam thei ta zawk a ni.

image

Kan hnam te zingah hian, thil hi sawisel reng kan tum a, a lo that zawkna tur erawh chuan, mi dangin tha thawh se kan ti ni ber hian a hriat thin. A aia tha zawk tur sawi tur hre lo a, thil sawisel chiam chiam hi a sawt lo a. Mimal, chhungkua, Khawtlang, Kohhran leh ram angtea insiam that kan tum a, kan duh a nih chuan, sawiseltu ringawt nilo; Mahni hun, hmun, tha leh zung, sum leh paite seng huama a tha zawk nei thei tura tha thawhtu tur kan mamawh a.

Chutiang mi chu kan awm a ngai a, chutiang mi chu kan nih a ngai a ni. Mikhail Kalashnikov-a ang hian, a takin I ti ang u.

Aside | Posted on by | Leave a comment

TRUMP ADMIN-TEN US NUCLEAR ARSENAL 25% IN TIHPUN AN TUM !

November 1, 2017, US Congressional Budget Office (CBO) tarlan danin, President Donald Trump kaihhruai sorkar (Trump Admin) chuan US-in Nuclear ralthuam a neihte chu tihpun chhoh a tum a, hemi atana senso hi kum 2020’s atanga 2030’s inkarah chhovah US dollar tluklehdingawn sangkhat sawm pahnih ($ 1.2 trillion) a tling dawn niin an chhut. Hetianga nuclear ralthuam tih pun chiamna hi Reagan Admin hnu lama a vawikhatna tur a ni. Ruahman anga a pun chhoh chuan 25% a tling chho ang.

image

Obama Admin khan nuclear arsenal hi tihtlem duhin, US$ tluklehdingawn 400 dawn a tihniam thla a ni. President Barack Obama khan kum 2009 Aug thlaa Praque a tlawh tumin, nuclear neih kawnga intlansiakna tihtlem a duh tih sawiin, a hun laiin US leh Russia-in nuclear ralthuam an neih te chu 30% in an titlem dun hlek a ni.

Russia chuan a strategic nuclear waread hi 1550 ah a titla hniam a, mahse, kumin February thla khan US nen an inremna bawhchhiain Russia chuan Intermediate-Range Nuclear Force (INF) chu 1987 a an lo siam bawhchhiain, ground-launched cruise missile a bun thar a ni, an ti.

Trump Admin-ten US nuclear stockpiles modernization an kal pui tur hi thenkatin sawiselin an duh lo. Ruahman ang chuan sea-launched -cruise missile, warhead for ballistic missiles etc lamah a ni ang. Zirtawpni khan  US Vice President Mike Pence chuan, Minot Air Force Base, North Dakota state a B-52’s Strategic Bombers awmna leh Minuteman III Intercontinental Ballistic Missiles dahna hmun tlawhin, “US nuclear arsenal tam tham neih hi khawvela remna leh muanna atan a tul a ni” a lo ti tawh a ni. US nuclear arsenal dinhmun hi Nuclear Posture Review in a endik mek a, kuminah zawh hman beisei a ni.

Stephen Schwartz, Nuclear Analyst leh lehkhabu “Atomic Audit: The Cost and Consequences of US Nuclear Weapons Since 1940” tih ziaktu chuan, Reagan Admin hnua US nuclear stockpiles tih pun nasat ber tur hi a hautak hle dawn a ni, a ti.

Author : C.T. Lalrinawma

Aside | Posted on by | Tagged , , , | Leave a comment

NORTH KOREA NUCLEAR TEST-NA LEIVERH CHIMAH MI 200 VEL AN THIH RIN A NI

Nov 1, 2017,  North Korea in nuclear a enchhin hnuhnungber a neihna hmun, leiverh a chim a, he leiverh chim hian hnathawktu leh chhanchhuah hna thawktu mi 200 vel a chhilh a, an thih rin anih thu nimin Thawhlehni khan Japan news report chuan a tarlang.

image

He leiverh (tunnel), Punggye-ri ami hi kumin September ni 3 a North Korea in leihnuaia nuclear ralthuam a enchhin vawirukna leh lianber a neih hnu a chim kha niin North Korea mi pakhat, a hming taroan loh chuan a sawi tih TV Asahi chuan a tarlang.

He leiverh chim hian a tirah hnathawktu 100 vel a chhilh a, heng mite chhanchhuah tuma buaipuitu midang 100 vel bawk chu hna an thawh laiin a chhilh leh niin a tarlang bawk.

He chetsualna hi helaia nuclear ralthuam enchhin vang hi niin TV Asahi chuan tarlangin, mithiamten leihnuaia test hian tlang tichimin China ramsi hnaihah radiation pawh a ti putchhuak thei a ni tih hi an hrilh lawk tawh thin a ni.

Kum 2006 hnulama nuclear test lianber leh a vawi 6-na hian an tihpuahna hmun leh a bulhnai thui tak thlengin leimin a siam bawk niin a tuka satellite atanga thlalakah chuan a lang.

Test neih atanga minute reilote-ah hian 6.3-magnitude a na in lirnghing a siam a, a hnu minute reilote-ah 4.1 magnitude a na in a nghing leh bawk niin US Geological Survey chuan an sawi.

He bomb an enchhin hi North Korea chuan Hydrogen bomb, 120 kilotons, kum 1945 a Hiroshima khawpuia an thlak let 8 zet a lian niin a sawi.

North Korea hian heti ang chetsualna liantham hi a tawng khat hle a, a bik takin nuclear program lamah phei chuan al tawng ngailo a ni.

Lee Eugene, spokeswoman, South Korea’s unification ministry chuan: “He report chungchang hi hrilh kan ninna in keini chuan engmah kan hrelo,” a ti.

US President Donald Trump chuan NK hruaitupa, Kim Jong-Un nena tawngkam a nasa taka an inbeih mek karah kan hma karah hian North Korea tlawh a tum a ni.

• Kiddy Vanchhawng

Aside | Posted on by | Tagged , , | Leave a comment

INDOPUI PAKHATNA (28th July 1914– 11th Nov 1918) by Fredy Lalrinmawia Renthlei

Tunlaiin Pu Trump-a’n North Korea thil tih dan a ngaitheih loh a zarah indopui chhuak thut thei dinhmunah kan ding tih hi mitin ngaih dan a ni a, khawvelin kan ngaihvena, beng kan chhi thup reng a nih ber hi.
Mizopa ngaihtuahna atang phei chuan “An van inkap har tawh\ Indo se la a ni mai alawm” tih hi kan duh dan ber chu a ni mahin a hriata, chutih rual erawh chuan Indopui lo chhuak ta se, eng ang takin nge khawvelin a chhiatpui ang tih erawh Indopui hnu lama piang vek kan nih vang nge, kan dawn pha lo chauh pawh a ni lo, kan dawn thiam lo hrim hrim a ni.

A enga pawh chu nise, keini lo sawi ve phak rual a ni lo va, a inhua a te chu lo inhuain lo innghirngho ta mai mai se. Ka rawn sawi tum ber erawh Indopui-ah chuan eng nge thleng tih hi a ni. Khawvelin Indopui tum hnih a hmachhawn tawh a, a tum thumna hi lo thleng ta se, eng thil nge rawn thleng ang tih erawh a rawn thlen phawt loh chuan sawi theih ni hek lo le. Indopui hmasa ber, kum za lai liam tawh-ah khan khawvelin eng thil nge a tawna, eng thil nge thleng tih hi han bih ve reng reng teh ang.
—————-
• Indopui pakhatnaah khan sipai ram chhuak zawng zawng hmun thuma thena hmun hnih vel thi fai vek anga chhut a ni a, chung zinga a tam zawk chu silaimu vang ni lo, hri leng vanga thi an ni. Hri chuan Sipai leh sipai lo a thliar lo tih kan hriat vek kha. Sipai bakah mihring thih hnem dan tur zia chu.

• German chuan a hmasaberna ni turin Flamethrowers (Meialh phuh chuak thei Silai) a rawn hmang a, he flamethrowers hian 130ft zet a kap phak a ni.
• Indopui pakhatnaah hian a vawikhatna atan tun laia Tank kan tih ‘Little Willie’ ti a an koh chu hman tan a ni a, kum 1915 khan an siam a, mi pathum a chhungah chuang lengin darkar khata 4.8km a chakin a tlan thei a ni.

• Indopui chhung khan British ho khuan an Tank-te chu a nu-ah leh a pa-ah an then hranga, tank nu-te chuan Machine gun lian tha tawk tak an pai a, tank pa-te erawhin laipui an pai ve thung.

• Indona Silai ri leh laipui thawm chuan thawm nasa tak a chhuah renga, kum 1917 a Belgium a German ho awmna hmuna thil puak kha 220km a hla London atang pawhin a ri zu han hre pha a.

• Belgium ram, Messines bula dil ‘Pool of Peace’ an tih, 40ft zeta thuk khi kum 1917 a British in tons 45 zeta rit bomb an thlakna ina a tih khuar a nih khi.

• German fighter pilot Manfred Albrecht Freiherr Von Richthofen kha Indopui chhunga thlawhna kap tla hnem ber a ni a, thlawhna 80 ngawt a kap thla a ni. A thlawhna kah thlakna lamah a thih phah nghe nghe.

• Indopui pakhatna hun lai khan Ui hi an hmang tangkai hle a, ral hma tawnga awmte tan pawh thuthawntu leh thirhrui thawn nana an hman ber a ni.

• Tank hi a tirah tak chuan ‘Lei-lawng’ (Landship) tih a ni a. Amaherawh chu ralthuam dangte anga thuhruk ve zung zung theih ni hek lo, tui dahkhawlna zem (tank) lian tak tak phenah an thukru thina. Tichuan British ho chuan a code name a tan ‘Tank’ tih hi an lo hmang ta a ni.

• Khatih lai a U.S President ni lai Woodrow Wilson-a khan a term hnihna tur a chelh dawn mek a, chuta an au hla leh an intihtheihna ber chu “Ani hian Indona lak a ta min chhanhim” tih a ni. Mahse President office a luah atanga thla khatna lekah United States pawh chu Indopui-ah a zuang lut ve leh ta a ni.

• Indopui pakhatna lai khan U.S Army an pung nasa hle a. Congress in ‘Selective Service Act’ an passed a, tihluihna hmanga Sipai a intantirna ti pawhin a sawi theih ang. Indopui a zawh khan U.S sipai maktaduaih 2.7 zet chu tih luihna hmanga lak an ni a, a bak maktaduaih 1.3 te erawh ram tana inpe (Volunteer) an ni.

• U.S ram chhunga German mi awm tawh phawt chu rinhlelhna mitin an en veka, German lehkhabu zawng zawng an hal chhia a, German Shepherd dog pawh tam tak an thah mai bakah German leh American thlahpawlh pawh tih hlum an nei nual.

• Hri leng ‘Spanish Flu’ vangin sipai hmun thum a thena hmun khat zet an thi.
• Indopui pakhatna avanga U.S in sum an hman ral zat kha $ tluklehdingawn 30 zet a ni. A hunlai ngaihtuah chuan a tam vet vet viau ang.

• Indona avang khan Sipai ramtuileilo leh taksa hmelhem tam tak an awm a, a then chu an taksa tha lai hmun dang a mi hlepin an bel a, thenkhatte erawh a ngaihna thlawt a awm loh avangin dam chhunga hmaikawr vuah ngaite an awm a, Sipai thenkhatte phei chu an damchhungin dawmdawiinah an awm chawt mai a ni.

• Indopui pakhatna avang khan lal ram pali ngawt, Ottoman, Austro-Hungarian, German leh Russia te chu an tlu chhe vek.
• Indopui pakhatna hian hming dang a nei a, Great War, The World War, The War of the Nation leh War to End All Wars ti te a koh a ni.

• He indona hian kum 4 zet a awh a, khawvel tuipui zawng zawng leh khawmualpui zawng zawng he indona hian a hrut chhuak veka, indona tual zawl ber erawh Europe ram a ni.

• Indopui intan dan tak chu hetiang hi a ni. Serbian hel pawlin Austro-Hungarian lal thutthleng rochung tu Archduke Franz Ferdinand leh a nupui an kap hlum a, Austria-Hungarian chuan 28th July 1914 ah Serbia lakah indo a puan phah ta a ni. Russia leh France in Serbia an tanpuia, German-in Austria-Hungary a tanpui bawka. Tichuan boruak alh chho zelin ram dang dang a kang kai ta zel a, kum 4 zet indona, khawvel Indopui pakhatna chu a lo chhuak ta a ni.

• Russia chuan sipai maktaduaih 12 zet a tir chhuaka, hei hi indona a Sipai intirh chhuahna lian ber a ni nghe nghe. Amaherawh chu a sipai hmun li a thena hmun thum ngawt an thi a, a thenin hliam na tak an tuar a, chin hriat lova bo tam tak an awm bawk.

• United States tak hi chuan indo tawp hma kum khat leh a chanveah Indopui hi a zawm ve chauh.

• France ram khu he Indopuia hmelmate beih nana gas hmang hmasa ber an ni. 1914 August thla khan a vawi khat nan German lamah tear gas grenades hmasa ber an vawm lut a. 1915 January-ah German hovin Russian sipaite beih nan tear gas a hmang veleh a, mahse Russia ram boruak vawtah chuan he gas hi a nih tur ang ni zo lovin tuiril (liquid) ah a chang ta vek a ni. 1915 April thlaah German vek hian Poisonous Chlorine gas (gas tûr pai) hmasa ber an hmang tan.

• Indopui chhung hian German, France leh British te hian ral beih nan Gas an hmang nasa hle a, Sipai maktaduaih khat chuangin hipin an zinga mi 91,198 zetin an thihpui.

• Indo chhung hian gas tûr pai chi hrang 30 chuang hman a ni a, Sipaite chu an thawmhnaw zun khum a, hmai tuam nana hmang turin hrilh an ni hial. 1918 atang sipaite hman turin gas mask (hmaikawr) pek an ni.

• Indo lai khan American sipai ho ina ‘Hello Girls’ ti a an koh an awm a, heng hmeichho hian indona mualah an mite tan telephone operators hna an lo thawk char char a. Heng hmeichhiate hi a bik taka zirtir an nih bakah French tawng leh English nal taka zirtir an ni bawk. Kum 1979 khan U.S Army chuan ‘Hello Girls’ zinga la damte chu chawimawina medal bakah hamthatna tha tak tak a pe a ni.

• Indopui pakhatna a tel Sipai maktaduai chuangin natna chikhat ‘Shell Shock’ an tih mai chu an vei a, hei hi hun rei tak chhung hlau reng reng leh thlaphang reng reng a hun an hman vanga natna an vei a ni. An kawthalo a reh hlei thei lo va, an mu thei lo va, an tawng tawp hleithei lo va, a dar kar chuang chuang hi mahniin an phun mawlh mawlh zel mai a ni. Sipai thenkhat chu an dam chhuak leha, thenkhat erawh chuan an dam chhungin chu natna chu an vei thung.

• Mipui leh Sipai maktaduaih 35 zet enkawl ngaiin an awm a, chung zinga maktaduaih 15 te chu an thi a, a bak maktaduaih 20 te chu hliam na tak tuar an ni.

• 1914 Kristmas urlawk niah indo reng mai sipaite chuan lungrual leh inngaih takin Krismas urlawkni leh a tuk Krismas ni an hmang ho a, hei hi chu kan hriat vek a nih tho avangin sawi thui lovang. Hemi tuma thil thleng thinlung khawih tak erawh, khawvel History ah a chuang reng tawh ang.

• British nurse pakhat, chhuanawm zet mai a awm a, chu nu chu Edith Cavell-i a ni. Ani hian an ram sipai an ni emaw, hmelma sipaite pawh ni se tanpui ngai apiang a theih ang angin a lo tanpui a, German sipaite pawh ni se hliam tuar a hmuh chuan a kalsan ngai lo. Mahse a tanpui German Sipaite ngei mai chuan manin an tihlum ta a ni. He an thil tih avang hian German chuan khawvel pum dem rawn a hlawh phah ta hial renga.

• He Indopuiah hian history-ah nikhata British sipai thi an tam ber tum a thleng a, hemi ni hian British sipai 60,000 zet hliam tuar buaipui ngaiin an awm a, hemi tuma sipai thi zat hi indo chhunga U.S sipai leh an National guard thi zawng zawng belhkhawm ai pawhin an tam zawk.

• Indopui pakhatna a zawh hian khawvel economy a hma hruaitu British chu kumkhua a tan paihthlakin a lo awm ta a, a hma a ram hausa tak ni thin khan ba tam tak neiin hna hmu lo mi tam tak a siama, chu chuan hun rei tak chhung an ram a ti thuanawp nghe nghe.

• Indopui lai hian mipa ral ram chhuak an tam em avangin an thawh ai zawng zawng hmeichhiain an lo thawh angai ta a, heta tang chiah hian hmeichhia, mipa thawh ang thawk an lo tam phah ta reng a ni.

• Indopui pakhatna avang hian damdawi thiamna lamah nasa takin khawvelin hma a sawn phah a, hliam enkawl dan tha leh rang, ruh tliak enkawl dan leh in zai lam thlengin damdawi thiamnain hma a sawn phah hle. Chumai bakah thu leh hla lamah pawh khawvelin kan hmelhriat loh tur tha tha kan hmelhriat phahte pawh ti ila kan sawi sual lutuk lovang chu.
_____________________________
Duhtawk ta mai ila. Heng a chunga kan sawi bakah hian thil tam tak Indopui laia thleng leh Indopuiin a a hrin chhuah ngaihnawm tak tak sawi tur a la tam a, mahse heng kan sawi tak atang hian Indopui rapthlak zia leh nunna a heh ziate, ram tam takin tlukchhiat hlen nana an hman tak thute kan hria a, hriatna a pun belh phah ngei turah beisei ang.

Hei hi kum 100 liam ta a thil thleng a ni a, tun lai ralthuam leh Indopui pakhatna hunlai a an ralthuam neihte chu tehkhin rual a nih loh vei nen, a nghawng rapthlak zia erawh kan hria e. Tunah hian Indopui hmachhawn thei reng dinhmunah kan lo ding leh ta a. Indopui pakhatna hunlai kha chuan lal ram a tlu chhe hlen a, ram a keh darh a, tunah hian khawvel hian Indopui han hmachhawn leh vaih se chu ram chauh ni lo, ding chhuak tur awm tawh lovin khawvel hi a tlu chhe hlen ang tih hlauhawm tak a ni.

Aside | Posted on by | Tagged , , | Leave a comment

KUTHNATHAWKTUTE HNENAH TRACTOR SEM

Nimin khan Agriculture Minister Pu K.S Thanga chuan SMAM (Sub Mission on Agriculture Mechanisation) leh RKVY hnuaiah Mizorama loneitu intelkhawm (Farming Society) te tan hman tur Tructor 12 (Model – NDL 4010 39 Hp leh NDL 4710, 47 Hp) a vai liam.

Pu K.S Thanga chuan, SMUM leh RKVY scheme hnuaiah Custom Hiring Centre 58 din tawh tih sawiin, He scheme in a tum ber chu kuthnathawktuten hlawk zawk leh awlsam zawka hna an thawh hi a ni, a ti a, Link road Km 450 chuang laih zawh tawh a ni a, NEDP sum hmangin Mizoram pumah Agriculture Link road kawng thar (Fresh Link road) Km 400 laihna tur Rs. 2012 Lakh dah fel a ni tawh bakah, kawng laih tawh chei leh siam that nan cheng vaibelchhe 10 dah a ni bawk, a ti.

Minister chuan, State dang tam takah an hlawhchhampui SMUM leh RKVY scheme hi Mizoramah chuan kuthnathawktuten an chhawr tangkaiin an hlawhtlinpui hle hlawm a, state dang te nena he scheme thlirletna (Review meeting) ah pawh Mizoram chu he scheme-a hlawhtling ber pawla ngaih a ni. Khawl hman tangkaina leh repair-na kawngah pawh Mizoram chu fak a hlawh hle a. Hei vang hian Kuthnathawktute hnena Tractor an pek pawh hi sawrkarin zaa 95 tum sakin, kuthnathawktu (Society) te hian zaa 5 an tum thung dawn a ni, a ti a. Kuthnathawktute chuan an mamawh phuhru turin sawrkar a awm tih hriain, anni pawh an theihna kawngah chuan taima tak leh rinawm taka thawk tur te, an chhehvela kuthnathawktu dang te tan pawha malsawmna ni thei tur te in a ngen bawk.
Agriculture department hian kumin 2017 chhung hian kuthnathawktute tan tractor 14 a pe a chhuak tawh a. Kum hnih kal ta khan Tractor 58 an lo pe chhuak tawh bawk. Heng Tractor an pekchhuah te hian Rotivator, Trailer leh Paddy Reaper te a keng tawl vek bawk a ni.

Vawiina Tractor semchhuahna te chu :- SMAM scheme atangin
Aizawl district-ah Phuaibung Farmers Association,
Champhai District-ah Khuailui M.I Project Water Society, FMC Vaphai – Saikhumphai II, FMC Phaithlang zau – Hmunhmeltha, FMC Tuisen – Khawzawl, FMC Farkawn,
Mamit distrcit-ah Oil Palm Grower Association – Nalzawl,
Serchhip district-ah FMC Keitum, Mat ral WRC Society – Lungbu Zau, FMC E.Lungdar te a ni a.

RKVY scheme atangin Tuidam zau – Phullen, Agriculture Farmers Society _ Suangpuilawn, Serchhip District-ah FMC – Lungchhuan, Champhai district -ah WRC Farming Society – Sialhawk te tan pek chhuah a ni a.
Heng Society leh Association hnuaiah hian kuthnathawktu chhungkua 643 an awm a ni.

Aside | Posted on by | Tagged , | Leave a comment

HMARCHHAK STATE CAPITAL-AH REL LUHTIR VEK A NI DAWN : UNION MINISTER

Minister of State for Railways Rajen Gohain chuan hmarchhak state khawpui zawng zawngah rel luh tir vek a nih tur thu kar kalta Inrinni khan a sawi.

Railway minister Rajen Gohain chuan hmarchhak state pariat zing a, khawpui pahnih-ah rel a la lut lo tih sawiin, heng khawpuiahte hian rel a luh ngei theih nan sorkar laipui chuan ruahmanna a siam thu a sawi. He thu hi Tripura khawpui-a Agartala-Delhi Rajdhani Express service hmasaber a vailiamnaah sawiin, kum 2019 ral hmang ngeiin heng khawpuiahte hian rel luh tir a ni ang, a ti.

Rajen Gohain chuan hmarchhak hmasawnna chu Prime Minister Narendra Modi-a ngaihpawimawh ber pakhat a nih thu sawiin, hemi tihlawhtling tur hian ruahmanna hrang hrang pawh siam a ni, a ti. Kum 2019-ah chuan bungraw phur rel lian chite chuan hmarchhak khawpui zawng zawng an kalpawh thei tawh ang a, chu chuan hmasawnna duhawm tak a tlen dawn a ni. Infrastructure lamah hmasawnna hi hmasawnna ruhrel pawimawh ber a nih avangin ngaihpawimawh a ngai a, sorkar hmalaknate thlawp ṭhat a pawimawh a ni, a ti.

Agartala-a thuthar thehdarhtute a kawmnaah minister chuan, “Hmarchhak state capital-te pawh rel hmanga an inthunzawm vek a ngai a ni. Hemi tur hian ruahmanna pawh siam a ni a, Assam – Tripura – Arunachal Pradesh – Manipur khawpui Imphal-te chu kum 2022-ah chuan rel hmangin an inpawh vek thei tawh dawn a ni” a ti. Hetih rual hian mimal ram neitute avangin harsatna tam tak an tawk ṭhin tih sawiin, hei hian hnathawh a tikhaihlak nasa hle a ni. Sikkim leh Meghalaya-ahte pawh ram neituten harsatna an siam avang leh, zangnadawmna uchuak tak pek an phut avangin hna a khaih lak thu a sawi. Hetihrual hian Mizoram leh Nagaland-ahte chuan harsatna lian tham a awm loh thu sawiin, project pawh tluang taka kalpui a ni, a ti.

Hmarchhak state zingah Tripura-a Agartala chu railway map-ah kum 2008 khan telh a lo ni tawh a, Arunachal Pradesh khawpui Itanagar chu April 2014 khan telh a lo ni tawh bawk. Northeast Frontier Railways (NFR) chuan hmarchhak hmun hrang hrangah railway project kalpui a nih theihna turin hma an la, project  eng emaw zat kalpui a ni tawh a, kalpui mek leh kalpui mai tur eng emaw zat a awm bawk.

Aside | Posted on by | Tagged , , | Leave a comment

MIZORAM PRESBYTERIAN KOHHRAN BAN PAWIMAWH REV C LIANHMINGTHANGA KAN THEN TA – Vanneihthanga

Rev C Lianhmingthanga (71) hi Upa Vanlallawma (L) leh Pi Vanrumi (L) te fa 11 zinga a upa lam atanga chhiara 4na a ni a, an unau chu hengte hi an ni –

  1. C Vanlalzika (L)
  2. C Lalmawia (L)
  3. Mangchhuani
  4. C Lianhmingthanga (L)
  5. C Lalramthanga
  6. C Lalbiakdiki
  7. C Lalhmangaiha (L)
  8. C Laldina
  9. C thuamluaia (L)
  10. C Lalrintluangi
  11. Hrilthansanga te an ni.

Lalrinpuii Aizawl Bungkawn veng mi nen kum 1977-ah an innei a, fa pali an nei a, chungte chu –

  1. Lalhruaitluanga Chawngte
  2. John Lalchhuanawma
  3. Joel Lianrinzuala
  4. Lallawmsangi te an ni a, an chhungkuain an mahni In Mission Vengthlangah an cheng.

image

Rev Lianhmingthanga hi kum 1975-77 chhung khan Mission Veng Bial KȚP-ah Asst. Secretary niin, Kum 1975-76, 1978-ah te Mission Veng Bial KȚP Secretary a ni. Mission Veng Bial Zaipawl hmasa ber 1976-a din a nih khan Conductor hmasa ber 3 zingah Convener a ni nghal.

Rev C Lianhmingthanga hian Sorkar hna engemawchen a thawh hnuah Pathian tana a hun pum pek a duh avangin a sorkar hna thawh bansanin Pathianthu a zir a, kum 1981 khan Synod-in Pro Pastor atan a la a, Kohima bialah dah a ni. Kum 3 vel Kohima bial enkawltua a awm hnuah Dawrpui Vengthar-ah Pro Pastor hna a thawk leh a, hetah hian Pastor atan nemngheh a ni.

Kum 1985-ah Hnahlan bialtu Pastor niin kum 6 vel lai bial a vawng a, kum 1991 khan Lunglei Chanmari bial vawngtu ni chungin Administrative Charge a la bawk. Engemaw chen Lungleia a awm hnuah Aizawl lamah sawn phei niin Synod Revival Director-in a awm leh a ni.

Synod Revival Director rawngbawl hna hun engemawchen a chelh hnuin Lunglei lamah bawk sawn phei leh a ni a, Aizawl lamah SMTC Programme Director hna chelh lehin a pension thlengin he hna hi a thawk a ni.

Kum 2013 atang khan Aizawl Hospital Chaplain niin a thih ni thlengin he rawngbawl hna hi tlin takin a thawk. Hospital chaplain rawngbawl hna hi a ngaipawimawh em em thin a, damlote an thlarau dinhmun a ngaihsak a, a theih ang angin a counselling thin. Kein hospital a pan a, ke bawkin a hawng leh thin a ni.

Mizoram Presbyterian Kohhran ban pawimawh Rev C Lianhmingthanga hi thlarau mi, mi hlim thei leh kawm nuam, pa nelawm a ni a. Thisen sang leh zunthlum a neih chuan a ti buai ve thin viau naa damdawi nen in enkawlin a in control ve hram hram thin.

Zanin dar 12 vel khan a thaw a hah a, a chauin a chil phuan te a rawn tla ta mai a, rang taka Aizawl Hospital panpui a nih laiin November ni 1, 2017 (Nilaini) Zanlai dar 12:25 vel khan chatuan chawlhnaah min kal san ta a ni.

Rev C Lianhmingthanga ruang hi November ni 1, 2017 (Nilaini) chhun dar 12-ah an In Mission Vengthlangah thlahna hun hman zawh a nih hnuin chhun dar 1:30-ah Mission vengthlang Presbyterian Kohhran Biak In-ah vuina hun hman leh a ni ang.

Aside | Posted on by | Leave a comment