MNF, ZNP leh MPC party-te’n nakum Assembly inthlanpuiah Chakma Candidate an nei dawn lo

MNF President Pu Zoramthanga’n nakum Assembly inthlanpui neih turah tumah thawhpui lovin an mal din dawn tih a sawi.

Vawiina an party Hqrs. Office, Mizo Hnam Run-a an party chhung inkhawmah he thu hi sawiin Pu Zoramthanga chuan, BJP nena thawkho tur anga miin an sawi thin chu thudik lo a ni, a ti a. Kum 30 chhung deuhthaw party dang thawhpui tur leh lo thawhpuiin an lo buai ngar ngar tawh a, sorkar an siam pawhin siam loh pawhin engtik lai mahin tihfuh leh kaltluanpui a la awm thei lo a ti a. AMC-ah an maldin a, an chak tih a sawi a. Hei vang hian an party High Command-in a lo rel tluk tawh angin tumah an thawhpui dawn lo a, a malin an ding dawn tih a puang a.

Chakma Candidate an neih loh tur thu an puan pawh ‘BJP nen thawhho an tum vang’ a ni lo, a ti bawk.

Yoga chungchang pawh sawiin Pu Zoramthanga chuan, sorkar zirna in leh office-a tihluihnaa Yoga inzirtir chu tha an ti lova, MNF a sorkar chuan tihluihnain tumah a tihtir dawn lo, a ti a.

Bawngtalh khap te, tihluihnaa sakhaw dang inzirtirna tih te, Mizorama tihluihnaa Hindutva lakluh luih te leh Mizote sakhaw ni pawimawh bik, Chawlhni leh ni pawimawh dangte tibuai zawnga phai lam atanga ruahmanna awm thin te leh VIP lo kal tih te chu an remti ve dawn lova, a tawp thlengin an do dawn tih a sawi bawk.

Advertisements
Aside | Posted on by | Tagged , , , , | Leave a comment

Minister of State Dr. BD Chakma-a’n vawiin khan a banna a thehlut.

Minister of State Dr. BD Chakma-a’n vawiin khan a banna Chief Minister Pu Lal Thanhawla hnenah a thehlut.

Chief Minister hnena a banna lehkha a thehluhah hian Dr. BD Chakma hian, Mizoram state qouta-a MBBS zir tura Chakma zirlai 4, National Eligibility cum Entrance Test (NEET) 2017 an inziah tlin thu tarlangin, heng Chakma zirlaite hi Higher & Technical Education Dept. chuan July ni 20 khan ‘counselling’ tura koin ‘counselling’ neih zawh a nih hnu, hemi ni vek hian chhan engmah sawi awm lovin Higher & Technical Education Commissioner-in‘counselling’ neih tawh chu ‘cancel’-in, ‘counselling’ neih that leh tur, a ti a; ‘counselling’ neih leh hun tur hi Deptt.-in tun thlengin a la ruat leh lo, a ti a.

July ni 26-a Higher & Technical Edn. Minister Pu R. Romawia thuchhuah siamah MBBS quota chu Mizote tan chauh hauhsak a ni dawn tih chiang takin a lang nia sawiin Dr. BD Chakma chuan hei hi a tan pawm theih a ni lo, a ti a.

Mipui aiawha thlan tlin a nih avangin Minister of State a nih anga hma a laknaah state chhung mipui zawng zawngte chu hnam, sakhua leh rindan thliar hrang lova ang khata an rawng bawlsak vek chu a tih tur nia a ngaih avangin a hmalaknaah mi rilru a lo tina a nih chuan ngaihdam a dil a.

Hetiang hi thil awmdan a nih avangin Minister a nih zui zel chu a rem lo nia hriain a banna a thehlut tih Dr. BD Chakma chuan a lehkhaah a ziak a, a banna chu lo pawmsak turin Chief Minister a ngen a ni.

Aside | Posted on by | Tagged , | Leave a comment

BJP Mizoramin training nei: Sorkarna chan ngei inring

• BJP mizoram te’n 2018 inthlan ah sorkar inring.
• BJP sorkar hunah hnamdang lo lut ru te thawnkir ang.
• Bjp yen political training an nei.

BJP Mizoram Pradesh chuan an office, Upper Republic ah Mizorama District hruaitute leh Block hruaitu te tan ni hnih-awh Vistarak Programme an hmang.

He hun hmanpui tur hian BJP Central Office atangin National Joint General Secretary Pu Shiv Prakash, leh NE Coordinator Pu Sunder Pal te lokalin an hman pui a. He program in a tum ber chu nakum Mizoram assembly inthlan lo awm turah BJP in Sorkarna a chan theihna tura, Central lamin ruahmanna thar an siam inhrilhfiah leh inzirtira ni a. Central lamin ruahmanna an siam ang chuan Pollingbooth tinah Booth level committee an awm anga, chu committee chuan an booth chhunga voter awm zawng zawngte tlawh chhuakin, BJP lama vote an pek theih ngeina turin hna an thawk ang. Chung Booth Level committee te enkawla, kaihruai tur chuan Vistarak Full timeworker District tinah ruat an ni a. Anni hian hun pumin, inthlan hma zawng an enkawl dawn a ni.

Training pe tu Pu Shiv Prakash chuan, BJP chuan member vaibelchhe 11 a nei mek a, hna an thawh that avangin an pun mek zel thu sawiin, nakum MLA inthlanah pawh Mizoramah Sorkarna an chang ngei dawn a ni a ti.

Training kharna inkhawmah Pu Vanlalhmuaka, State General Secretary pawhin thu sawiin Citizenship Amendment Bill chungchanga Mizoram Sorkarin hma a lak duhloh avanga Central YMA-in NGO leh Party zawng zawng koh khawm a ngai hial chu thil pawi tak a ni a ti a.

Mizoramah BJP-in Sorkarna an chan hunah, dan lova Mizorama ramdang mi lo lut rute dapchhuakin, an thawn haw vek tur thu a sawi bawk.

Aside | Posted on by | Tagged , | Leave a comment

LUNGZARHTUM SELE KHAWCHHUNGAH A RAWN TLA LUT, A KAL KIAN THEIH NAN VAWMBUK UPA A TAWNGTAI

Kar kalta August ni 18, 2017 Zirtawpni khan Lungzarhtum Sele pachal chu Lungzartum (Tlangpui veng) khawchhung a bawng rual zingah a rawn inlar leh a, kawngpui kama mi bathlara an tui bua te rawn liakin rei tak a awm a ni. Sele hi chi te an pe a, tui ti takin a liak ve hluam hluam mai a. Khawchhunga a awm lai hian motor engmah kawngpuiah an tlan tlang ngam lo a ni.

Rei tak a awm hnuah pawh an hnawt kiang thei lawk lova, Vawmbuk kohhran upa pakhat chu a tawngtai ta ngawt mai a, Sele chu biain “hei miin an hlau si che a, kal kiang tawh rawh khai” a ti a, kawngpui atang chuan bawngrual te chu a insaseng pui ta niin an sawi.

Sele hian hmanni deuh khan Saiha pa Pu Matlana Maruti car hmalam kawngkhar a tauh pawp hawk tawh a, car khalhtu leh a neitu ni bawk Pu Matlana erawh vanneihthlak takin a him hlauh. Pu Matlana hian he Sele hi a car hian a lo tlan pel fo tawh thin a. Hemi ni hian kawngpuiah a tlat rei deuh avangin Saiha lampang side atangin RO Pu Muanpuia leh a thawhpui ten motor lian hmangin hnawh kian an tum a, Sele hi kawng sirah dingin a lo inhrosa a, a ke phiatin a hnar a phit dut dut mai a. Pu Matlana hian Lungzarhtum lam atangin Sele awmna lai kawng chu rawn paltlang a tum ve mek thung a. Sele kawngpuia awm chu a inhrosa tih hre lovin nidanga a tlan pelh thin anga tha taka pelh leh mai a tum a. Sele hian a car kawngkhar pawh hawnna hnuai chiahah a rawn pir kaw pawp mai niin an sawi. Hman deuh khan Sele hian Pickup pakhat chu a hnung lam a pir kang lawp tawh bawk a, Scooty a vawrh leng lawp tawh bawk. Bullet rider pakhat ban a pir thler hawk tawh bawk a. Tum khat chu kawng thlang lam atangin metal road kawngpui zuan kanin kawng chhak lamah hneh taka per kaiin a lim chho zek zek mai niin an sawi a. A in thazawh zia mak an tih thu Lungzarhtum khawtual mi ten an sawi.

He Sele hi a chang chuan ni li ni nga lai te a rawl bo vang vang thin a, bawng rual zingah bawk a rawn kir leh mai thin. Bawng rual a kalbo san changin Bawng neitu Pu Cheua te chuan an bawng hnute te pawh an sawr ve thei thin a, tunhma ang erawh chuan nitin an sawr thei ta lo a ni. Pu Cheua hi Sele hian a hre deuh tawh nia an hriat thu helai bialtu RO Pu Rinmuana (Muanpuia) chuan a sawi a, ” Tumkhat chu Pu Cheua hian a bawng rual ram tla chu hla deuh atangin a ko a, a bawng te chuan an rawn chhawn thuai a, chutih rual chuan Sele pawh chuan rawn chhawn vein Pu Cheua chu an rawn zui hlawm a, an huangah a hruai thleng vek hlawm a ni” a ti.

Tum khat chu Pu Cheua hian a bawngpui hnute a sawr a, Sele chu a piah lawkah a ding a, a rawn en vung vung mai a, Pu Cheua bawng hnute sawr lai chu a nupui leh a fapa rawlthar chuan an lo veng a, engtin mah a tibuai ta bik lo. Pu Cheua hian Sele a thunun theih nan Sele awm lai chuan a kawr ngai hlir ha tura thurawn an pek thu te RO Pu Muanpuia hian min hrilh bawk.

Helai chheh vel ramah hian khawchhunga rawn inlar thin Sele pachal aia lian leh chal zawk hi pakhat a awm niin sawi a ni a. Thla khat vel liamtaah khan Lungzarhtum atanga hla lo tak, Tuisumpui ram lamah he Sele pachal hniak tharlam tak mai hi hmuh a ni a, chumi ni chuan khawchhunga rawn inlar thin he Sele hian ram lam a pan ngam lo nge, nilengin khua leh a in bulhnaiah a tap nileng niin an sawi.

Tunhma lam khan Sele pui, a no hruai lai heng lai ramah hian an awm thin niin sawi a ni a. Tunhnaiah hengho hi hmuh an ni ngai ta lova, tute emaw kutpalh tawkin an thi ral tawh a ni mai awm mange tih chu mithenkhat rindan a ni. Lungzarhtum-a sele rawn tla lut thin, ni li ni nga a rawl bo vang vang chang hian heng sele pui leh a no te hi a zawng thin a nih an ring a, a hmuh zawh loh avangin Pu Cheua bawng rual bawk hi a rawn bel leh mai thin niah an ngai.

Tun thla tir lam khan Council lam hmalaknain he sele kawppui atan tiin Se nu pahnih Lungzarhtumah hian phurh thlen a ni a, pakhat zawk phei chu a rai lai a ni nghe nghe a. A huang te siamin chutah chuan khung tuma an khalh laiin kawngpuiah motor a rawn tlan a, Se nu pakhat zawk hian motor chu hlauin a tal phut-a a chhuak ta mai a, vawiin thleng hian he Sial hi khawdai ramhnuaiah a la awm a, an la man hleithei lo. Kar thar lamah hian man tumin buaipui leh an tum thu RO Pu Muanpuia chuan min hrilh bawk a ni.

Author : Vanneihthanga Vanchhawng

Aside | Posted on by | Tagged , | 1 Comment

MNF in furpui țan

MNF Party chuan Aug 18 zirtawp tuk khan Aizawl veng hrang hrang kawn lun laiah Furpui Campaign an nei a, Zemabawk, Ramhlun, Chanmari, New Market, Tennis Court, Thakthing, Khatla, Vaivakawn leh Ramrikawn-ah te hian hun hman a ni.

Khatla kawn Bazarah Pu K.Sangțhuama MLA chuan thusawiin sorkar tihdikloh sawisel ngawr ngawr an tum a nilova, sorkar a insiamțhat beiseiin an tih dik loh an sawi zawk țhin a, amaherawhchu vawiin thlenga insiamțhatna hmuh tur a awm loh avangin khawlaiah mipuite hriatpui tura puanzar a lo ngai ta a ni, a ti.

Pu K Sangthuama chuan kum 2008 atanga Congress Partyin NLUP a lo tlinpui tawh, cheng 2 pea cheng nuai khat dawng tura an inzawrhna chu installment in cheng sing hnih/khat te tein an sem leh si a, chhungkaw tana dinchanna khawpin an pe lo a ni a ti a.

CAG-in NLUP a hlawhchham a ni an ti a ti a. NLUP dawng zingah dawng veawm lo neinungsa – khawsathei tak tak mi 1400-in an dawng tel ve tih an hmuchhuak tih sawi bawkin India ram pum pawisa endiktu CAG report chu thudik tak a ni a, dawt anga sawi phet tum pawh sim ni se a ti.

Zemabawk kawnah Pu Lalruatkima MLA chuan thusawiin, Zoram kalsual tur vengtu tur MPF office hial Congress mi leh sain an kalchilh chu a pawi hle a ni a ti a, Chief Minister in an party mi ni lo chu eng atan mah a ti lo’ tih a sawi chuan Congress rilru puthmang a tichiang hle a ni a ti.

Pu Lalrinawma MLA pawhin Tennis Court tualah thusawiin,kawngchhia sorkarin tihngaihna a hre lo chu mak a tih thu a sawi a. Kum 2015 a Assembly House-a kawngpui siam țhat chungchanga resolution an put luh hnawl a nih tawh thu sawiin, tuna sorkar kal kal dan chuan kawngpui țhat ngaihna a awm lo va, kalphung thar a ngai a, chumi tur chuan MNF kan inbuatsaih mek a ni,” a ti.

Aside | Posted on by | Tagged , , | Leave a comment

Chakma chungchanga hmalatu tur core committee indin

Aug 19 inrinni khan Hnam Chhantu Pawl buatsaihin Mizoram chhunga dan lo a awm Chakma chungchangah inrawnkhawmna hun Hnam Chhantu Office, Upper Republic Aizawl-ah neih a ni.

He inrawnkhawmna hun Hnam Chhantu Pawl President PuR.Ramhmangaiha kaihhruaiah hian mithiam hrang hrangte’n thuziak an buatsaih chu sawiho a ni a, hmalak zui zel dan tur ngaihtuahtu tur Committee din a tul thu sawiho nghal a ni bawk.

Thusawitute zing a mi Central YMA President Pu Lalbiakzuala chuan, Vawiina Mizoram dinhmun hian naktuka a awm dan tur a hril dawn a. Politics-a ngaihdan inan lohnate hian hun lo kal zel tura Mizote an dinhmun dal lose” a ti a. Ram leh hnam a him loh chuan tumah kan him bik dawn a lo a ni” a ti.

He inrawnkhawmna ah hian Mizoram chhung leh pawn atangin mi 100 vel an kalkhawm a, thusawitu tam ber chuan Chakma chungchang bawhzui tur hian fimkhur taka hmalak a ngaih thu leh Dan anga kal a tul thu an sawi a. Chakma zawng zawng a pawng a taka huat ngawt a dik loh thu leh India khua leh tui dik tak Chakma te pawh hian Dan lova Mizoram rawn lut rute chu an ngaimawh ve em em a ni, an ti a. Chakma leh Bru chungchanga hmalak zel dan turah ‘nu phut’ lovin Dan hnuaiah fimkhur taka hmala turin Core Committee emaw din tha an tih thu an sawi a ni.

Aside | Posted on by | Tagged , | Leave a comment

UP REL CHESUAL-AH MI 23 THI, MI 70 CHUANGIN HLIAMTUAR

Nimin, Inrinni tlai lam khan Muzaffarnagar atanga 40Km a hla, Khatauli, Uttar Pradesh-ah Puri Haridwar Utkal Express rel a chesual a, hriat theih chinah mi 23 in nunna an chan a, midang 70 chuangin hliam an tuar.

Railways lamin an he rel chetsual chhan ni thei awm hrang hrang an zirchianna atangin he rel hi rel kawng enkawlna chhiat lutuk vang (maintenance failure) niin an sawi a, thuneitute chuan helaia relkawng enkawl leh cheithatna ah hian rel kawng a hnathawktute pawh an inhnamhnawih niin rel kawng thawmthatna ah hian dan pangngai ang lo a thawm niin an sawi a, rel chetsual lai hian rel tlanchak dan tur hrilh hriatna (speed resteiction warning) ang chi, Puanzar sen emaw signal warning engmah an dah lo a, hemi avang hian rel hi a chesual niin an sawi.

He rel chetsual lai tak hian helaiah hian Northern Railways engineering department a senior official pakhat awm remchan lai tak a ni nghe nghe.

He rel chesual hi darkar khata Km 106 a chakin a tlan a, niin official chuan a sawi a, helai relkawng thawmthat mekak hian rel tlan chak theih zawng limit hi 10-15kmph velniin a sawi bawk.Hetihlai hian railway official dang pakhat chuan he rel lu lehpindan 5 tena helai, an cheithatna lai hmun hi an tlanpelh hnu ah rel hi a chesual ta niin a sawi a, heti ang a rel kawng chiangkuang lovah chuan heti ang khawpa chak hian tlan theih a ni lo a ti.

Chetsualna hi nimin tlai lam dar 5:37 a thleng kha a ni a, rel pindan pakhat chu rel pindan dang chungah a tlan kai a, hetihlai hian pindan dang pakhat chuan a bul In a hnawl a, pindan dang pakhat chu college chhung a tlan lut bawk.

Uttar Pradesh Provincial Armed Constabulary (PAC) company 9, National Disaster Response Force (NDRF) team te leh Anti-Terrorism Squad (ATS) ten cheteualna hmun hi an thleng nghal a, ambulance 95 ambulances in thi leh hliam te damdawiin lamah an thiar nghal. NDRF mi leh sa 160 ten rel chetsualna a hliam tuar te bakah helai khua mi te tanpui tur hian a hmun an pan nghal a, NDRF base Ghaziabad atangin mithiam bik 40 rualin Ui fing (sniffer dog) te nen rel chetsualna ah hian an duty bawk a ni.

Railway minister Suresh Prabhu chuan amah ngeiin rel chetsualna hi a hmunah kalin thilawmdan a enfiah a, a tul ang a chhui turin thupek a chhuah nghal.

PM Modi pawhin he rel chetsualna hi pawi a ti takzet a ni tih sawiin, railway ministry leh state sorkar chu atanpuina leh chhawmdawlna tul ang ang buaipui nghalnturin a hriattir a, “Muzaffarnagar a Utkal Express chesual hi rilru takin pawi ka ti a, thi oeh hliam te leh an chhungte ka tawrhpui takzet a ni,” tiin hliam tuar te chu an dam leh thuak a duhsak thu Tweeter kaltlangin a sawi.

Author : Kiddy Vanchhawng

Aside | Posted on by | Tagged , | Leave a comment

ZAIPAWL TIHBAIAWM by Zonunsiama Ralte

Anthurium Festival-ah khan kan thianho a hman hman kan kal ve a. Tlai dar 5 dawnah Rulpuihlimah chaw ei turin kan phei a. Kan rin aia a lo hlat avangin a hla lo ti-a kal rawttu kan thianpa chu kan hau nak nak a. Chumi boruak zelah chuan zu in thukhawchang kan inhnial thinrim a, kan thian pakhat chuan Rulpuihlim atang ke ngatin ruahsur hnuaiah Aizawla haw a tum ta a.

A theih ang angin dan tum mah ila kan dang thei lova, ruahsur hnuaiah kein a kal ngat ngat a, a hnuah kan thian dangte`n bike-a an va um leh pawhin an va zawng hmu zo lova, beidawngin an rawn kir leh nghe nghe a ni. A va um tute pawh hi an rawn huh zawr hneh hle a. A hnuah kan thianpa pakhatin ka va um ang a, ka phur haw nghal mai ang a ti a, min hawsan ta ringawt a.

Kan chawhmeh tur ar puah chawp kan nih avangin dar 9:30 velah kan inpeihfel chauh a. Rulpuihlim kan chhuahsan leh chuan dar 10 a pel tawh. Ruahsur hnuaia tlan kan nih avang leh tiauchhum a zin nasat em avangin tlan chak a harsa hle a, kawng a nal nasat em avangin kan fimkhur hle bawk a. Festival liantham tak thleng e ti lo chuan Reiek khua kan va thlen chuan mi veivak hmuh tur pawh an lo awm tawh hauh lova, a rehin a lo reh thap tawh a ni.

Rilrua hmanhmawh ru tak mahse tlanchak ngam chuang si lovin Reiek khua chu kan tlan pel a. Ailawng kan pelh hnu phei chuan kawng a lo nal khawp mai a, ruah sur nen chhuna motor tamtakin an lo dai nal tawh kawng chiau zeta tlan chu a hahthlak kher mai. Ailawng leh Reiek inkar, tlawng hnaih tawh lam kan thlen khuan kawng lakah bike chu a rawn thi thut a, ka start a, a nung veleh mai a. Mahse kan thian dangte`n min rawn umphak chuan zial zuk paha chawlh nghal law law an rawn rawt a. Chu hmunah chuan kan chawl mai tak naa a boruak a rit khawp mai. Eng nge a chhan hriat si lohvin awm a nuam lova, eng thil emaw min uap khup tu awm ang mai hi a ni.

Meizial te kan han zuk zawh hnu chuan kan kal leh ta a. Tlawng kan hnaih tawh viau tihin kawng nal thui tak a lo awm a, a nal tih hresain tlan mah ila bike headlight eng thalo nen kan tleng palh ta nge nge a, kan intung tho leh kan tlan tan leh tur chu ka phone a rawn ri a. Ka han chhan chuan kan thiante titau haw ta leh amah um haw tute chu tlawng chhak lawipu ramah an bike chain chatin an lo la tangkhang reng a lo ni a. Min hawsanna a rei tawh si a, chutihlai chuan dar 12 a ri thuak tawh thung a, mak kan ti hle a, chaw an la ei ve lo bawk nen, an ril a tam hlein kan ring nghe nghe.

Kawng a nal em avangin fimkhur takin kan tlan leh a, tlawng kan zuk thlenthlak chuan mi tlemte ruang ngaihven niawm tak tlawngah chuan an lo awm a, a bak midang hmuh tur an awmlo. Kan tlan leh deuh a, kawnglaiah bus hi a lo chhia a, chutah pawh chuan a siamtu mi pahnih tih loh chu hmuh tur an lo awm lo bawk a. Thui fe kan tlan leh hnu, kan thiante chu an rawn fiamthu mai mai-a kan ngaih tawh hnuah kawngsira bike lo ding leh a bula mi pakhat lo mu nghat hi kan va hmu ta a.

Chu hmunah chuan kan ding nghal vat a. Kan thiante ngei chu an lo ni a. A thinrima zawk phei chu kawngsir thim chinah a lo thu a. An pahnih chuan an chau dun hle a, an huh hneh hle bawk a, an ril a tam em em bawk a. Aizawl thleng daih tawh tura kan ngaih laia chulaia engtia rei tak lo la awm thei nge an nih kan han zawh chuan an thil tawn chu an sawi ta a.

Khatia an haw ta kha kawng haiin Reiek lama kal lovin Lungdar lamah an lo va kal a lo ni a. Lungdarah chuan miin lo khawngaihin riak mai turin an lo ti a, mahse riah em chu an tlawmngai ve si a, Lungdar atang Reiek lam chu ruahsur hnuaiah an pan leh ta a. Reiek an thlen leh pawh chuan Reiek khua chu a lo reh thap tawh a. Hmanhmawh takin an tlan zel a, ka sawi tawh ang khan kawng a nal hle a ni ka tih tawh kha. Anni pawh chu tlawng thlen thlak hmain an chesual ta nge nge a. An tluk naah an bike chain a free a, insawh na lemlo mahse an berh hneh hle a, khawvawtin a hmeh chauh bakah an riltam chau tawh nen an tlukna hmunah chuan an chawl tawp a, hun rei tak chhung chu an bike chain free pawh chu an buaipui peihlo nghe nghe a ni.

Chutia an tlukna hmun ngai ngaia an chawlh lai chuan an thlang tlawng ruam lam atang chuan thawm hi an hre ta a. Eng nge a nih chiang takin la hre mai lo mah se zaipawl zai ri ni ngeiin an hria. Mak ti takin thawm chu an ngaithla reng a, tlawng ruam atang chuan a rawn ri chho a, a rawn ri hnai telh telh a ni tih an hre ta a. Chutia a rawn hnaih telh telh takah chuan rinhlelh ngaihna awm hauh lovin zaipawl zai ri a ni tih an chiang dun ta ngang mai. Hlauhnain a tuam a, an awmna leh an thawm hriat chu a diklo a ni tih an hria a, hmanhmawh takin an bike chain chu an siam a, inbiak pawh inbe ngam tawh lovin chu hmun chu an chhuahsan ta a ni.

An zaipawl thawm hriat chu a tawp mai lova, kawi hnih kawi thum an tlan thlengin an la hre pha niin an sawi. Eng hla nge an sak an hre lova, mahse mi tamtak zai rual thup thup ri a ni tih erawh an sawi huai ngam khawp mai.

Tichuan hlauthawng tak leh hmanhmawh takin an tlan zel a, tlawng an thlenthlak hnua an mi hmuhte bula hahchawlh nachang pawh hre lovin an tlan tlang zel a. Lawipui ramah an bike chain chuan a tlin ta lova, a chat ta a. Chu hmunah chuan keini ho chu min lo nghak ta ngawt ngawt mai a lo ni.

Hemi tum hian kan chau tlang hle a. Kawngpuiah kan mu tawp a, motor leh two wheeler-in vawihnih vawithum lai min rawn tlanpel a, kan chanchin min zawt hlawm lemlo nain mak erawh min ti viau hlawm niin kan hria. Rei vaklo kan mut chawlh hnuin kan thiante pahnih chu kan phur chhawng a, Aizawl lam kan pan leh ta a. Aizawl kan thlen chuan dar 1:30 a ri tawh.

Keini chuan thil danglam kan tawng ve lova, amaherawhchu thil pakhat chiang taka hriat kan nei ve a, tlawng chhaka kan chawlh lai boruak leh Lawipu rama kan chawlh lai boruak chu Hremhmun leh Vanram ang hlauhin a inanglo a ni.

Aside | Posted on by | Tagged , , | Leave a comment

KAWNPUI DAI by Hardy Chhakchhuak

Kawnpui dai thil thleng hi sawi a tam hle mai a, thu dik leh dawt pawh hriat a har hle awm e. Tam tak hi chu phuahchawp a nih ngei a rinawm a, chu tih rualin thu dik chu a awm ve tho pawh a rinawm. Tun a ka rawn sawi tur pawh hi thu dik nge dawt tih chu ka hre bik hauh lova, 2004 a magazine pakhat in a rawn chhuah a ni a. Tin kimchang tak pawn ka hre tawh lova ka hriat ang ang ka rawn tar lang dawn a ni. Tin a tawngtute hi ka dil hranpa lova mah se magazine a chhuak tawh a nih avangin an haw em lo tur ah ngai ila. A tawngtu angin kan sawi mai a nge.

Aizawl a mi truck khalh in ka awm a, motor neitu te hian insakna lam chi brick, balu, cement te an zawrh hlawm avangin silchar lamah load la in ka kal fo thin a. Aizawl atang hian hma tak ah kan chhuak a kan thil phurh tur te hmanhmawh takin kan load zung zung a kan han chhuah a kolasip kan han thlen chhouh leh hi chuan khua a thim tawh hle thin. Load lak hi chuan haw lam kan thil phurh te a lo rit ve nen a tlan chak theih thin loh a ni. He ka motor khalh lai hian handy-man tawng tlem tak Lianthanga, kum 18 mi hi ka nei a, ani nen hian in be tam lo mah ila kan inngeih viau zel a.

Tum khat chu kan pu ten balu an tlakchham avangin phur turin Baga lamah kan liam thla a. Baga kan thlen thlak chuan muangchang lovin kan load zung zung a kan zawh fel chuan Aizawl lam panin kan chhuak leh ta a. Haw lamah chuan kan phur a rih avangin kan tlan chak thei lova muangchangin kan tlan a. Kolasip kan thlen chuan zanriah ei a lo hun reng tawh mai a. Tichuan kolasip ah chuan chaw kan ei ta a. He mi zan a Aizawl ban kan la tum avangin muangchang lovin kan chhuak leh nghal mai a.

Tichuan Kawnpui kan thlen chuan chhungte in ah thingpui in in kan chawl zawk a. Kan in zo chu zan dar 9:30 a lo ri reng tawh mai a tichuan kan chhuak leh ta mai a. Thui kan tlan hma chuan thian hlui driver dangte nen kan in hmu hlauh mai a, kan in hmuh loh na a rei deuh tawh bawk a kan in ngai hlawm hle mai a. Tichuan thingpui dai kan in a kan in kawm khawm ta a. Titi a tui in kan hlim tlang hle mai a. Tichuan kan in zo, kan sawi tur tul zual kan sawi zo chu dar 12 a lo ri dawn reng mai tawh a. He tih chhung hian ka handy-man mut duh tak mai chu a lo mu bawrh bawrh mai a. Motor a ka luh chuan kaitho lem lo chuan motor ka start a kan chhuak ta a.

Chutia kan chhuak chu khaw pawn pawh kan lo hnaih ta a, kawngchhak lam atangin a kawng pakhat, metal road rawn pawhtu kawng atang chuan chhungkaw bawr zet mai hi an rawn chhuk a. Nau an pua a an kai bawk a. Tin a thenin arbawm te an khai bawk a. An zawn kan va thleng chu chuan ve dilin min lo phar a. A seat ah chuan in leng vek awm si lova a hnung balu chungah khan in duh leh thu ula ka ti a, awle an ti a an lawn ta a. Tichuan rei lo te ah chuan khaw chhung chu kan chhuah san ta a. Tichuan kan tlan zel a ka handy-man pawh chu a mu tui hle mai a. Chutia kan tlan lai chuan vawi leh khat ah motor light chu a rawn thim ta hmiah mai a. Chhun lam a check vek ka ni a, mak ka ti hle. Motor chu a din loh theih loh va ka ding ta a. Chutia kan ding chu kawngchhak lamah chuan in be nawk nawk thawm chu ka hre ta. Kan ngaithla chiang chu in ko/au thawm, Hmingi, Ziki, Thanga etc te pawh ka hre thei a. Kan ngaithla zel chu ‘min lo nghak rawh’ tih te leh an tawng dangte pawh ka hre thei a. Ka hlau tan ta viau mai a. Ka handy-man chu kan ko va a la mu tui em em mai a, a harh thei reng reng lo mai a. Motor hnuai ah lah chuan zawhte insual thawm ni awm tak chuan a ri bawrh bawrh mai a. Light check tur chuan motor atanga chhuah a ngai si. Huphurhawm tak hi a ni.

Chutihlai chuan ka handy-man chu a rawn harh ve mek bawk a. Thawm lah chu la awm in a hriat em em mai a. Ka handy-man rawn harh pawh chuan a hre thiam mai a, a harh nghal kawk kawk mai a. “He lai hi kawnpui dai an tih chu a ni lawm ni” a la rawn ti zui. Tichuan motor light a chhia check a ngai i chhuak ang tih leh chhuah ka rual nghal a. Kan han check chu a chhiat na lai awm reng reng kan hmu si lo. Motor hnuai ah lah chuan thawm a la ringin zawhte tap ang tak tak ten rap awm em em in ala ri reng mai si. A ngaihna hre lova kan awm reng lai chuan motor light chu eng em em hian rawn eng ta phut mai! Kan phu chiang lutuk chu kan eu dawr mai a. Tichuan motor a luh zai chu kan rel ta a. He tih lai hian kawngchhak lam ah chuan thawm rapthlak pui pui in a ri bawrh bawrh reng bawk a. Chutia kan lut tur chu ka mi phurh a hnunga chuang te chu kan en a, a tumah chu an lo awm tawh reng reng lo chu niin.

Tichuan motor ah kan han lut fel a kal kan han tum motor kan start chu a thlang kawng kawi a ka mi phurh te ngei inkai diah diah a an liam tur chiah chu motor light chuan a zu chhun fuh mai chuh! Ka thau ah mi man ta a namen lovin ka khur ta a. Tichuan kan kal ta a. Thui vak lo kan kal hnu chuan thil dik lo a awm ta tlat mai! Kan motor chuan kan in turn miah si lova ka kal tawh na lamah kan tlan let leh tlat! Kawnpui lam bawk ah kan let leh a ni. Mahse pawi ka ti tawh lo ka khur nasa em a. Tichuan kawnpui ah bawk chuan kan lut leh a motor ah kan riak ta a ni.

A tuk khaw var ah kan tho a ka handy-man hi a tawng tlem ve teh reng nen a sawi ve bawrh bawrh mai. Khua a var tawh bawk a hlauh pawh a zia tawh bawk a kan kal leh ta a. Zan lam a ka din na ah tak chuan ka ding leh a motor atang chuan kan chhuk a kan han en vel chu thlanlung ding hi a bulah chuan a lo awm a mitthi hming hi a lo in ziak țhap mai.

Aside | Posted on by | Tagged , | Leave a comment

NAZARETH ISUA MIZORAMAH A LO KAL by Apuia Tochhawng‎.

Zawlnei lar em em mai, Pi Mangi hi a awm a, Isua a lo kal dawn tia a puanlawk chu mi tam takin an nuihzatin an awihlo viau mai a.Isua chu a lo kal dawn ta lo emaw tih hnu-ah a rawn kal ta tak tak a, a hmel hmuh chakin Mizo mipui tam tak chu an inhawrkhawm luih luih mai a, Aizawl khawpui pawh tum dang aia nasa in traffic a jam nasa a, Motor chu kal thei loin a dinin a ding thup mai.

Chung hun lai chuan Vanapa Hall-ah zantin Crusade a awm a, hmeichhe pakhat a sermon thin a, a sermon zawh apiangin tihdam rawngbawlna a nei ziah thin a.

Zankhat chu Vanapa Hall-ah chuan Isua chu a kal ve thut mai a, chu nula in tihdam rawngbawlna hun a hman lai chuan, “Nang rin tlem nu, ka hmingin damna I puang thin a, mahse damloten an dam phah chuang si lo, Doctor te’n damlote damdawi an chawh I hnawlsak a, mahse i rawngbawlna atanga damna chang ta hi hmuh tur an va awm si lo em! Kal la, tun hnu-ah ti leh tawh ngai suh, amaherawhchu Antam mu fang ang rinna I neih erawh chuan damloten I rawngbawlna atangin damna an hmu ang,” a ti a.

Tin, Isua chu ka zui zel a, Lammualah chuan Mizoram Politician ten an lo dinchilh a. Pa pakhat a chala thil hnawihsen vung mai hian, “Isu, tunhma zawngin Pathian nung bia kan lo ni thin a, tha taka ram kaihhruai kan tum a, mahse mipui te an mawl em mai a, kaihhruai theih pawh anni lo. Kawng pawh tha taka siam kan tum a, mahse tlangram a nih avangin kawngpui tha neih a harsa a ni,” a lo ti nuah nuah a.
Isua chuan, “Dawhehpa, kei min ring ve lo leh ka chhandamna thu pawh la hre lo ten India rama Hill Station tam takah te khuan kawngpui tha em em mai an siam khu Ihmu ve nange? France ram thenkhata Nangni aia ram chhengchhia ah te khuan an kawngpui that zia I hmu ve lo em ni?
“He ram hi ka pek che u a ni a, Kei min hre ve ngai lotu in pi leh pute khan an phak ang tawkin anmahni aia tam daih sukte ho lakah he ram hi an lo humhalh a, anmahni aia silai nei tha sapho lakah pawh lu chhum ban chhum huamin he ram ka pek che u hi an lo humhalh asin, pasaltha huaisen kal hmasaten an thisenin he ram hi an lo humhalh tlat thin a, he ram ka pek che u leh mi huaisen kal hmasa ten an lo humhalh sa ah hian nangin kei min hre ngai lo Buddhist mite vulh len nan I hmang a, an hnena ka chhandamna chanchintha I hrilh duh vang erawh a ni si lo. Lal I duh vang ringawtin Chakma te hi I vulh zel a, thangtharten I thlanah chil an la chhak ang,” a tihkhum phiar phiar a.

Politician rualte chu zak takin an kalbo ta a.

Chanmari kawn a lo thleng phei a, Mizorama kohhran hruaitu lawk pui pui, Pastor te, Kohhran Upa rualte chuan an lo hmuak a, Chanmari kawnah chuan thingpui an lo lum khu vut vut mai a.Kohhran Upaten an lo biak hma hma chuan Isua chuan, “Ka rawngbawltu inhmuamup tak tak te u, ka thisena ka leia ka tlansa ten in hnena an nun harsatna an thlen ngamna turin in va awm ngai lo em!

“Kohhran inkhawm hun apianga in inkhawm te, zing tawngtai inkhawma in kal taimak zia te hi ka hai reng reng lo. Mahse Induh em emin khawlai in kal ngauh ngauh a, ka mite, thlarau bo, nulat tlangvalnaa tlu te, damdawi leh zungawlvei te tana biak inthlahrunawm khawpa in awm thin hian rawngbawlna awmzia in va hre lo tehlul em!

“Keiin tlawm takin ka zirtirte ke ka sil theih laiin Kohhran leh Kohhran in inngeih thei lo a, lungrual taka ka rawng in bawl za ho hi a va tlem tak em! Chapo takin kohhran dang aia in thurin a dikzia in sawi nasa a, Setana pawh amah leh amaha indo ngai lo asin.

“Nangni rin tlemte u, Kohhran pawl dang mita khanchhuk hmu thei si hian in Kohhranin tihtakzetin ka lam in lo hawi em tih hi in ngaihtuah leh ngai si lo. Eiruk chingte rawngbawlna chanvo pawimawh tak tak pek in hreh lo va, tihtakzetin ka rawng hi bawl za dial dial ula tiin ka lo tawngtai thin asin.

“Kohhran Upa zingah hnam dang vai hausa makpa atana neih in hreh si lo. Ka pa Pathianin, thuthlung hlui hun ata tawh a mi Israel te chu hnamdang nena inneih pawlh lo turin a tih ngun zia in chhiar ve vek si a, sum leh pai mahni hnam pawha chiang lo Upa thenkhat ka nei che u hi a zahthlak ka ti,” a ti phiar phiar mai a.

Ka muhil chu ka harh zawk mai a, ka mumanga Isua ka hmu ta mai chu mak ka ti em em mai a, chutia kan ram hruaitute leh Kohhran rawngbawltute a hau phiar phiar mai chu mak ka ti leh zual a. Mahse Chanchintha bu palia Isuan Pharisai leh lehkhaziaktute a dim loh zia te, Temple kawta englo zuartute a hnawh kian dan ka hrechhuak leh a, Isua hi pa rorum tak a ni tih ka hrechhuak leh ta a.

Aside | Posted on by | Tagged , , , | Leave a comment