Republic tualthahna champha

Kum 2015 January ni 9 zana Pu Sangliansiama te chhungkua, Aizawl Republic Veng amite rawng taka Laltlanchhuaha’n a thah champha vawi 4-na vawiin hi a ni a,
Republic Veng mipui chu an rilru a na thar hle tih vawiin khan Jt Action Committee chuan thuchhuah siamin an sawi a, he tualthahna rapthlak tak hi an hrereng a; Republic Veng JAC in Laltlanchhuaha chungthu a thuchhuah a lo nei tawhah khan Republic Veng JAC chu a la ding nghet tlat a. A na thei ang bera a chungthu hi roreltute hian rel fel tawh turin an phut tlat tih an sawi a ni.

An thuchhuah hmasaah chuan, Pu Sangliansiama te chhungkaw tawrhna kha an theihnghilh tawh dawn lo a a. Hetiang thihna rapthlak lutuk ang hi tun hnuah Zoram khawi hmunah mah thleng tawh lo se an duh tak meuh an ti a, Republic veng JAC chuan rawng taka mi 5 lai mai that a, naupang rilru thianghlim tak mai pawh zuah lova hmelma ang maia diriam taka nghaisa tu Laltlanchhuaha chunga an thuchhuah tawh, “he tualthattu hi khaihlum ni rawh se” tihah hian Republic Veng Joint Action Committee (JAC) chu a la ding nghet tlat a. Laltlanchhuaha hi Republic Veng khua leh tui a nihna an hlih sak a, a thiin emaw, a nung chungin emaw Republic Veng khawtlangah lakluh an remti lo tih an sawi nawn leh a. He tualthahna rapthlak tak chungchangah dik taka rorel a nih theih nan daltu an awm chuan Republic Veng khawtlangin a tul angin a hmachhawn zel dawn tih an tarlang bawk.

Kan corr thudawn danin he tualthah thubuai chungchangah hian Court chuan thuhretu a ko zo deuh vek tawh a, prosecution evidence chu khar theih mai tawh tur a ni a, Tualthattua puh hi court chuan a ko zui tawh tura ngaih a ni.


REPUBLIC VENG JAC THUCHHUAK
Kum 2015 January ni 9 zana Pu Sangliansiama te chhungkua, Republic Veng amite rawng taka Laltlanchhuaha’n a thah champha vawi 4-na a lo thlen hian Republic Veng mipui chu kan rilru a na thar hle a, he tualthahna rapthlak tak hi kan hrereng a; Republic Veng JAC in Laltlanchhuaha chungthu a thuchhuah a lo nei tawhah khan Republic Veng JAC chu a la ding nghet tlat a. A na thei ang bera a chungthu hi roreltute hian rel fel tawh turin kan phut tlat a ni.

    sd/-          sd/-

Secretary, President
REPUBLIC VENG JOINT ACTION COMMITTEE

Aside | Posted on by | Leave a comment

Citizenship amendment bill passed

Union Home Minister Rajnath Singh-a chuan vawiin khan Lok Sabha-ah Opposition-te dodalna karah Citizenship (Amendment) Bill, 2019 a pharh.

He bill hian dan hmanlai Citizenship Act, 1955 siamtha in, dan lova thenawm ram Bangladesh, Afghanistan leh Pakistan atanga sakhaw hrang hrang vuantu lo lut, Hindu, Sikh, Buddhist, Jain, Parsi leh Christian te khua leh tui nih theihna a pe dawn a ni. He dan thar hnuaiah hian India khua leh tui ni tur chuan thla 12 liamta chhunga India rama khawsa leh kum 14 liamta chhunga kum 11 aia tam India rama awm tawhte tana khua leh tui nih theihna dan hman mek chu ti danglamin kum 11 hi kum 6-a tih tlem a ni dawn a ni.

Bill pu luttu Union Home Minister Rajnath Singh-a chuan thusawiin he bill hi Assam-in dodal viau mahse anmahni bil chauha siam a nilo a, state dangte tan pawh a pawimawh ve tho a ni a ti a. Ramchhung thlang lam ramri atanga lo pem, Rajasthan, Punjab leh Delhi vela khawsa te tan pawh he bill hi siam a ni a ti a. Assam-in kum rei tak chhung danloa lo pemlutte a buaipui tawh tih sawiin hei hi rampum huap pawha thil buaithlak tak a ni a, amaherawhchu National Register of Citizens (NRC) chu kalpui a ni a. NRC-ah hian inthliarhranna a awm dawn lo tih Pu Singh-a chuan a sawi a ni.

Assam Accord ti hlawhtling turin kawng tam taka hmalak a nih thu tarlangin Assamese-te nihna vawnghim turin High Level Committee din a nih thu a sawi a. Anni hian thla ruk chhungin an zirchianna report an thehlut dawn a ti bawk.

Vawiina bill pharh a nih hian Congress hruaitu Mallikarjun KHarge chuan House-a Select Committee hnena thlen a phut a. TMC hruaitu Saugata Roy pawhin a pawmpui thu a sawi. Hemi hnu hian bill an dodalna entirnan Congress leh TMC member-te hi house atangin an chhuak tau a ni.

India hmar chhak state dangte ang bawkin zirlai pawl buatsaihin vawiin khan Mizoram pumah darkar 11 bandh huaihawt a ni a, bandh hian thlawp a hlawh hle a, tlai dar 4 thleng pawn chhuak awm lovin mipuite an awm a ni.

India hmarchhak State 8-a zirlai pawl inzawmkhawm North East Students’ Organisation (N.E.S.O) chuan Indian Parliament-a The Citizenship Amendment Bill, 2016 pawm tumna awm mek chu hmarchhak State-in an pawm lova an dodal tih lantirna’n hmarchhak state zirlaite’n a rualin Total Bandh huaihawt an tum tih an lo puang tawh a. Hemi chungchanga MZP General Headquarters Emergent meeting chuan hmarchhak state dangte rualin MZP huaihawtin Total Bandh neih nise tiin a rel a ni.

MZP chuan Citizenship Amendment bill, 2016 hi Indian Parliament a pass a nih chuan Mizoram tan phei chuan a hlauhawm zual hle a ti a. Bangladesh atanga dan lova lo lut Chakma foreigner te’n awlsam takin India khua leh tui nihna an nei thei dawn a. Mizoramah pawh NGO Co-ordination committee kaihhruaina hnuaiah All Political party leh Joint NGO te’n duhlohna an lo lantir tawh bakah Memorandum in ang tlang thehluh a ni tawh thu MZP Gen Hqrts thuchhuah chuan a tarlang a. Citizenship Amendment bill, 2016 zirchiangtu tur a din Joint Parliamentary Committee on Citizenship Amendment bill, 2016 te Mizoram lo tlawh ve tura ngen anih hnu pawhin, North East State dangte a tlawh laiin, Mizoram chu a rawn tlawh ve duh lo tih an sawi bawk.

Citizenship Amendment Bill 2016 hi, NESO chuan a tir a\angin nasa takin a dodal a. He bill hian India danpui Right to equality a kalh mai bakah Sakhuana thlenga in duhsakna a nih thu leh he bill hi pass a nih chuan dan lo a lo pem lutte avangin North East State-te chu a tuar nasa ber tur an nih bakah Kristianna thlengin a nghawng dawn avangin, MZP chuan tukin dar 5 atanga tlai dar 4 thleng Mizoram pumah MZP hmalakna in Total Bandh a huaihawt a. MZP chuan he Total Bandh hi hnam thil leh sakhuana thlenga nghawng thei a ni tih hriaa lo thlawp vek turin Mizo mipuite an lo ngen tawh a ni.

Aside | Posted on by | Leave a comment

Sorkar hmasa kihhnawkah kan buai ve lo

Mizo National Front
General Headquarters
Mizoram : Aizawl

Press Release

Sorkar hmasa kihhnawkah kan buai ve lo a, mi dem hman kan ni ve lo, kan thawk char char dawn a ni’
Zoramthanga, Chief Minister

Vawiin ni 07.01.2018 (Thawhtan ni) hian Mizo Hnam Run Office chu kum 2019 atan a hawnna hun Mizo Hnam Runah hman a ni a. Martar-te sun nan minute khat ngawi renga dinna hun neih zawh hnuah lawmthusawi tawngtai rualna neih a ni.

Chief Minister Pu Zoramthanga, MNF President chuan kumthar thuchah sawiin, “Sorkar thar a kal tan a, ngaihtuah tur leh enghelh tur tam tak a awm. Kum 1998-a sorkarna siam hlim kha chuan Minister ruat tur chungchangah ka buai hle a. Tun tum chu a hahdam thlak takzet a, kan MLA zawng zawngten i tihdan ka pawm zel an ti thei vek a, Pathian remruat a niin a ropui takzet a a, kan mamawh tawk chiahin Pathianin MLA min pe a ni. Citizen Amenmend Bill chungchangah naktuk hian NESO-in Total Bandh a siam tur hi Hmarchhak zirlai leh MZP-te hi za a zain kan thlawp a ni. Hei hi chu a tir atanga MNF-in kan hnial leh tha kan tih loh kan dodal char char kha a ni. SEDP hi MNF chauh ta tur a ni lo a, mitin ta tur a ni a. Chutih rualin a pumpui tlang chhah leh ril phiar chu fatuin an ei pawhin mipuiin kan sawisel ngai loh kha” a ti.

Chief Minister chuan, “Kan sorkar hi neitu sorkarin a kal dawn a. Bamboo Development Project-ah chuan Board System-in kan kalpui dawn a. Link Road atan Board pui pakhat awmin Minister a Chair a ngai ang a, Vice Chairman-ah MLA dah ngaiin, party mi leh NGO te pawh dah tel an ngai dawn. AMC pawh sorkar hmasa khan baloon hampuar ve det det ang chauhin a kalpui a, tunah chuan mipuiin khi tah khi tah an tih turin a kal tawh ang. Sorkar system thar, thuneihna semzaina leh a tam thei ang berin kan intawm theih sorkar chi thar a piang dawn a ni. Kan inremna thuthlung leh India Danin thuneihna min pek angin Owner and Transfer of Land pawh uluk takin kan kalpui zel ang. Kan sorkar thar kal dan tur danglamna chu kan neih sa ringin, mipui let 3/4 chawm zo ram kan nei a. Lui ni se hman senloh kan nei a, ram ralmuang sakhaw khat bia, culture thuhmun, Pathian thlarauin harh tharna a pek ngun ber ram kan ni a, lei hnuaiah oil leh Gas tam tak kan nei bawk. He ram hi neitu thinlung puin kan enkawl ang a, Pathian leh kan ram tan titu kan ni a, Pathian dah hmasa berin a chanchintha hril chu kan hnapui ber tur a ni. ‘Missionary nuai khat kan tir chhuak ang’ tih ka sawi thin kha thenkhatin fiamthu thawh nan min hman sak a, tunah pawh sponsore leh sponsore loh sing thum vel an awm a, chhungtin sum lakluh a pun chuan nuai khat tirh chu harsa lo tak a ni ang. Kan sorkar tuk lawkah sorkar zu dawr kan titawp nghal vek a. A dang mimal ta chu Budget Session-ah legislate a ngai a ni. January, ni 14 thleng Dry Day kab puang a, a tul chuan thla khat dang pawh kan la puan chhunzawm zel thei. Kawngpui chhe zual kan thuam tha nghal a, a theih ang angin kan chhunzawm zel ang. Keini chu sorkar hmasa kihhnawkah kan buai ve lo a, mi dem hman kan ni ve lo, kan thawk char char dawn a ni” a ti bawk.

Pu R.Tlanghmingthanga, MNF Vice President pawhin, “Pu Zoramthanga kaihhruaina hnuaia sorkar thar lo piang hi mipui, kohhran hruaitu, kut hnathawktute, sorkar hnathawk leh party worker pawh kan lawm vek a, beiseina sang tak an neih thu min hrilh a ni. Sorkar thar hi MNF ta a ni bik lo a, mipui zawng zawng ta a ni a, MNF chu mawhphurhna latu chauh a ni. Kan hlo har Indian Nationalism-in a bawm khah luk tawhte thianfai a, Mizo Nationalism Spirit ti thar leh tura fatu Minister-te chet dan tur hi Hnam Run pawhin a enpui reng dawn a, he sorkar hi Zohnahthlak hmun danga awmte tan pawh chhenfakawm taka siam turin ka chah duh a ni. Minister-te hi an tih dikloh sawi mawi chawp pui ngaia awm lo turin ka chah duh bawk a, anmahni dawrtute chu inthlan laia lo beitu pawh ni se, an mamawh lo thlente tihsak zel turin ka chah duh bawk a ni” a ti bawk.

He inkhawm hi Pu K.Vanlalauva, National Core Committee Member-in a kaihuai a, Rev.Vanlalbela’n hunserh a hmang.

(R.LALHMANGAIHA)
Joint Secretary
Media & Publicity Dept.
Mizo National Front
Memo No.MNF/Media/2019/01/02
Dt.07.01.2019.

Aside | Posted on by | Leave a comment

Pu Chuauthuaman a fans te a ngen

NGENNA

Vànglaini (5.1.2019) leh facebook-a Mafaa chanchin ka ziah avànga amah ngainatuten chin tâwk awm mang lo khawpa min beihna chu fb leh WhatsApp-ah a chhuak nasa hle tih ka hria a; ka theih chen chenah thil awm dàn ka chhui ve zêl a. A ṭhenin vaivut min theh a, a ṭhenin lungtêin min vawm a, a ṭhenin rawra-in min vawm a, a ṭhenin lungtumin min dêng a, a ṭhen phei chuan lungpuia min delh hlumtîr tumin min lum khum bawk a. He thil aṭang hian thil lang chiang tak chu Mizote hian kan duh loh zâwngte sawi chhiat nân ṭawngkam ṭha lo kan lo va ngah tehlul êm tih hi a ni.

Min lainattu tam tak in awm tih ka hria a. Mi ṭhenkhat chuan thu dêngkhâwng hmanga chhàn lêt pawh in duh tih ka hria. Amaherawhchu, chutianga tih a ngai rêng rêng lo. Vànglaini-ah hian mitthi tawh chanchin hi Mafaa tiamin 5 lai ka lo ziak tawh a; tute mah kha huatna vànga ziak ka ni lo. Mafaa chanchin ka ziah pawh hian huatna avànga ziak ka ni lo; ka thinlung takah chuan khawvêla a châm rei ták loh avànga khawngaih ka ni. Kan dam chhûnga Krista zui luih hrâm hrâm hi kawng tinrêngah nuam vek bîk lo mah se, Kristian nun hlimna thurûk hi kan nei thei ṭhin a. Chutiang chang pha mang loa mi tam takin leiah an hun an hmang hi a pawi takzet a; thil ṭha lo
eng eng emaw bâwihah an tâng tlat si. Chuta ṭanga chhan chhuah chu kohhranhote tih tûr a ni a. Mahse kohhranin nasa taka hna a thawk chung pawha zâwm hlei thei lo an awm tlat hi a pawi a; an duhthlanna a nih avàngin barh luih theih an ni lo. Ringtu nun nawmna hmahruai, vàn thlen hmaa chan theih chang hlei thei loa an awm hi an khawngaihthlák êm êm a ni.

Thu kan ziah hian a thlarau kan chang a; kan mitthlaah hian lo lang a awm ṭhin. Chutiang deuh bawk chuan Mafaa chanchin ka ziah lai khân inhmu zing ta lo chu kan inhmuh chhun laia a awm dàn kha ka mitthlaah a lo lang uar uar a; amah huat vàng ni loin ka mitthla lo lang ang chu a nihna ang takin ka ziak a; tehkhin remchâng ni-a ka hriat nên ka tehkhin mai a ni. Amah huat vànga ziak ka ni lo. Amah hua ni ila, a thlarau awmna tûr ka rin dàn kha a dang daih ang. Eng pawh ni se, ka thu ziah avànga lungâwi loten an duhthâla min sawichhia a nihpawhin nuam an tih zâwng a nih phawt chuan ka tuar zêl ang. Patling tân tuang tihchhah a ngai tihna a ni. Mizote hian mên kan sawi ṭhin; min sawisêltute min sawisêlna zawng zawng hi mênah thlák ila, rilru dam takin a awm theih tih hi ka hre chiang a ni.He thil thleng avànga min lainattu in pung tual tual tih ka hriatin ka lâwm a. Facebook-a ‘Revd Chuauṭhuama Huang’-ah luh duh in la awm zêlte hi a làwmawm. Chutih laiin fb-a friends nih duh tân hmun a awm tawh lo a, a limit a thleng tawh tlat si. Tûnah hian Mi 500 vêlin friends nih duhin in intlar tih ka hria a; mahse tih theih ka nei tawh si lo. Member awm saten min chhuahsan a nih chuan tute emaw chu fb friends-ah in lo lût thei tûrah ngai ila. A tâwp berah chuan ka sawi tawh angin min lainat avàngin ka thlavàng hauhin tute mah bei lêt suh u. “Anni hi ngaidam rawh u; an thiltih awmzia hi an hre lo a ni.”

Author: Revd. Chuauṭhuama

Aside | Posted on by | Leave a comment

ZU A IN TIH MAI MAI, A HO!

Amah Pu Mafaa ngei pawhin a lo sawi tawh a, a ziak tawh bawk. ” Mi tu pawh mai hian chak lohna lâi, Achilles-a ke artui kan nei vek ” a tih thin kha!

Pu Chuauthuama hi ngaihsânna pakhat mah ka nei lo a, ka ngâinep hran chuang lo. ” Sakhaw lamah a tha zawngin hmang se chuan mi chung chuang tak a ni thei ang ” a ti duh lek fang a, Zoram mipuiin amah kan sûn zo hlim hlawt a, ama puala thu ziak ve lem si in a, Chawngkhum dân tlâng huat loh ‘ tih a zep tel hian Zoram khawvêla mi hlu Mafaa a ngaihnep zia a hmuh theih a, a hming bula Revd. in dah satliah Pu Chuauthuama mizia tur awm a lang ruak ruak in ka hria….

Ni e, Mafaa khán zu a in a, tlâng hriat a ni. Zu a in avânga Pu Chuauthuaman a lo dah hniam vel a nih pawhin, ngâisângtu tam tak kan la awm. A nih, Zu in lo, piangthar mi fel Pu Chuauthuama nge Mafaa i ngaihsân tiin poll buatsaih ila, Zu in Mi Mafaa hi a buk a rit fe zawk lo maw?

Amah Mafaa ngei pawhin a lo sawi thin kha a ni a, mi an zaithiam em em a emaw, thu leh hla an thiam em em a, a zai thiam, thu leh hla a van thiam em tih mai awm tak anih lâiin, an mimal nun kan kher kher thin. A ni chu a ler, Zu a heh si tih kher kha eng nge a tulna?

An sawi thin kha, Sangha lei tum chanchin! A uih nge uih lo a hnim kual a hnim kual a, ‘ Ka Pi, nang pawh kha hnim hnim che ila uih lâi a awm ve tho ang ‘ tih chhanna a dawng asin! Amah Mafaan Achilles-a ke artui a sawi chhen kha mawle!

Troy ‘ film hmuhnawm takah Brad Pitt-an hneh sawh takin Achilles a lem a rawn chang a. A huaisen, hneh lo a nei lo, hmeichhe hmêltha leh uaiin pawhin a tha a pawt muang eih lo, mahse a ke artui te kha a chak lohna leh a thih theihna awm chhun a ni!

Mafaa meuh pawhin a Achilles-a ke artui chu ZU a ni tih chu a in hre ve hlei hlui ngei ang le. Chutih rual chuan, ZU a in avânga eng nge a ngâihsân awm lohna awm chuang le?

Hun nei ila, khawvel mi ropui te hian chak lohna, tlin lohna an nei ve ani tih hi târlan a va châkawm em! Christopher Merlowe bon zia kan hria, a lehkhabu ziah ‘ Doctor Fautus ‘ pawh College lamah kan zir bel hlei hlui. Mahse Zu heh tak, Bar a Zu rui buaina siam ching, zu hmuna vih hlum a ni. Mahse miten a thu leh hla thiam zia leh ril zia an sawi pahin, a nikhua loh zia an târlang kher lo.

John F.Kennedy pawh nupui nei reng chunga midang kawp hreh lo a ni. A ropuina leh a chungchuanna an sawiin, John F.Kennedy chu America President ropui a ni an ti mai, Pa ler an ti kher kher lo, duh tawk phawt ang!

Naupangte ka nih atângin library hrik ka ni daih tawh. Mizo thu leh hla hi ka ching a, ka chip ve nual mai! Mahse Mafaa ang ema ngaihsân hi ka nei tlat lo nia mawle, Taite-a nen hian!

Pu Chuauthuama a thi anih chuan, a dung thulin tiang hian ka ziak ang! – ” Pu Chuauthuama leh kei, chawngkhum dân tlâng huat loh. Fam ta Pu Chuauthuama hi pastor ni si in mi fak hreh em em mai leh, an dam lái mai ni lo, an thih hnu thlenga mi diriam hreh lo khawpa mi chapo a ni. “

Eng pawh nise,

” Zu a in emaw in lo emaw pawh nise, a thi emaw a dam emaw pawh nise, Mafaa thu leh hla ka chhiar hi chuan he thu hi ka sawi fo thin ang. Mizo literature khawvêla arsi eng ber, a thih hnu pawh a dai tawh ngâi lo tur Mafaa hi tunge khum thei awm ang ni? ”

Rd Mawia Ralte

Aside | Posted on by | Leave a comment

1985-2017 CHHUNGA MIZORAM ATANGA UPSC EXAM KAN TLIN DAN

UPSC exam han tih mai hian, AIS leh Central Service atana UPSC in kum tin Combined Competitive Exam a buatsaih thin kan sawi na a ni a, chumi exama Mizoram atanga kan tlin dan chungchangah thahnem ngaih titi a tam ta hle mai. Indemna te, inhmuhsitna te, In nuih zatna te kan phuhchhuak nasa ta hle.

Mizoram bik atanga kan tlin dan heti hian i lo zir teh ang.

1985-1995

1985 ah Clement Liankunga IAS a tling a bak kan NIL.

1986 ah Lalramthanga Tochhawng IAAS a tling.

1987 ah Lalnunmawia Chuaungo IAS a tling a. Benjamina IDAS a tling.

1988 ah IAS pahnih Lalbiaktluanga leh Laima Chozah an tling a, John Thanglura Foreign Service a tling bawk.

1989 ah Lungmuana Lakher IAS a tling.

1990 ah Vanlalhuma foreign Service a tling. A bak NIL.

1991 ah Esther Lalruatkimi IRS a tling a. A bak NIL.

1992, 1993 NIL

1994 ah IRS pahnih Ann Kapthuama leh David Z Chingthu an tling a.

1995 ah David Lalrinsanga, IPS a tling.

1996-2006

1996 ah kan NIL thak a.

1997 ah Lalrinliana leh Robert Chongthu te IAS an tling a.

1998 ah Vanlalchhuangan IAAS a hmu.

1999 ah Joseph Lalrinsailova , IPS (Postal).

2000 NIL.

2001 ah Christina Z Chongthu leh R Lalvena IAS.

2002-Vanlaldina Fanai, ICAS

2003,2004 NIL.

2005-ah Muanpuii Saiawi, IFS

2006 ah Franklin Laltinkhuma, IAS, L. Beimopha IRS.

2007-2017

2007 ah Rintei Renthlei IRS,

2008 Saidingpuii IAS, Lalmalsawma leh Lalramsanga IRS
2009 ah Lalhmingmawia Ralte IRS,

2010-11 NIL,

2012 Lalrinpuii Hrahsel, IDES,
2013 Eric C Lawmpuia IRS,
2014 Grace Lalrindiki IAS, Malsawmtluanga, IRS, K Lalbiakchhunga, IDAS.

2015-17 NIL

1985-1995 chhungin UPSC examah mi 13 an tling a. Kum 2 NIL a awm thung.

1996-2006 chhungin mi 10 an tling a. NIL kum hi kum 3 a awm.

2007-2017 chhungin mi 10 an tling a. NIL kum hi kum 4 a awm thung a.

UPSC exama hian, 1996-2006 leh 2007 leh 2017 chhunga kan chet that dan hi a inang deuh reng tihna a ni.

1996-2006 chhungin IAS tling erawh an tam deuh zawk a. Mihring zat erawh chu a in ang.

2018 atang kum 10 bi thar kan tan a. 2018 chu NIL in kan tan a. 1996-2006 pawhin NIL in an kum 10 bi kha an tan ve tho bawk a ni.

1996-2006 chhung pawhin Miss emaw, IDOL emaw an thlan luai luai kan hre chuang lo a. 1996 ah MPS an la a..2004 ah an la leh a. 1998 ah MCS an la a. 2003- 2004 ah an la leh a. UPSC tling zat chu 10 an ni a. Kum 10 chhungin kum 3 Kan NIL tho.

2007-2017 chhungin 2008 ah MCS an la a. 2011-2017 thleng a zawn a lak a ni a. 2009 ah MPS an la a. 2011-2016 an la a. MFAS leh MIS an la ve nual bawk a. UPSC inziak tling 10 tho an ni a. NIl kum hi kum 4 a ni.

1985-1995 chhung hian direct MCS 51 an la a.
1996-2006 chhungin MCS 50 leh 2007-2017 chhungin MCS 86. 2007-2017 chhung hian MCS bik a pung a. Hei hi sawrkar hmalakna zau zela post pung zel vangin post a lo tam a. Hna zawng lai zat nena chhut phei chuan tun hma aiin MCS post hi a tam sawt e, a tih theih chuang bik hauh lo ang. MPS ah post a pun belh tlem deuh a. Post ruak hi direct leh Promotion quota a inzah bawk avangin direct lak an tlem zawk a, post ruah chhoh dan a zir a, lak ve zel a ni bawk a. A inel (incompete) a te nena chhut chuan tun hma kum 20, 30 kal ta ai khan hna hi a awlsam sawtin a hriat lem loh bawk.

Hemi chhutnaah hian IES leh IFS (Forest) chu a hrana exam buatsaih a nih avangin ka telh lo a. IES leh IFS(Forest) hi belhkhawmin 1985-2018 chhung hian paruk emaw chu kan tling awm e.

He’ng zawng zawng hi uluk takin chhut ila, UPSC kan tling tha thei ta lo kan tihte pawh hi a ni chiah em? 1985 hnu lama atanga chhutin 1985-1995 chhungin mi 13 an tling a. Chu chu, 1996-2006 mi 10, 2007-2017 mi 10, 1985-1995 chhung hian kan tha fal chuang hauh lo. 1985-2006 chhung hian, 2007-2017 hun chhung aiin distraction-a kan sawi ho leh kan chhuan lam zawng zawng hi an nei tlem daih zawk awm e.

1985-2018 (Kumin) chhungin UPSC ah mi 33 exam paltlanga hna thawk an awm a. Mizoram atangin. Chu chu chawhrualin kum khata pakhat zel tling ang chauh kan ni tihna a ni.

Eng hi nge kan mamawh a, eng hi nge kan tlakchham hi chu mahni theuh chhan atan dah ta ila. Tun hma aiin kan tha sawt lo a ni mai thei a, kan chhe sawt bik emawni le a tih theih. Kan chhe ta lutuk chuang lo a nia. Competition harsat chhoh zel dan te, mihring kan pun nasat zia te, India ram puma zirna lama kan kan a, a exam thei hrim hrim kan pun dan te leh zirna quality chhut a, mizo thalai tam zawkin kan zirna quality dawn ve phak te chhut phei chuan kan la chhe fal hauh loah ka ngai. Chu chu, tan lak loh tur kan tihna a ni lo.

Thenkhat duhdan phei hi chuan kal ila, hnam mak takah kan chhuak hialin ka ring. Nun kawng peng hrang hrangah buaipui hrang hrang nei kan awm ve bawk ang chu le.

Mizo thalai lehkhathiam tak tak Doctor ni duhte, Engineer ni duhte, Scientific Research lama kal duh zawk te, Academic Line awn ngar ngarte an awm ve bawk a. Miss tuipui tlat te, Modelling tui tlatte, Football pet duh tlatte, pawh an awm zel ang. Football pet duh tlatte pawh IAS tum tura fuih chiam kha a dik bik lo mai thei. Kan hnam hi a thang ve zel a, thil tam tak a mamawh a, a mamawhna zawn hrang hrangah hian mi tha ber ber kan neih zel hi a tul a ni. Sipai Officer te neih teuh te pawh a tha, Brig C Vankunga leh Brig T. Sailo te aia thleng sangte pawh kan neih hun a nghah hlelh awm. Army, Navy, Airforce a officer tha ber ber nei tura kan tan sauh sauhte hi a tul viau a ni. Medical Professiona Specialist leh Super Specialist turte, dan lam mi, Supreme Court Judge pawh la ni pha hial turte pawh kan mamawh ve vek a lawm.

India ram club tha ber bera Footballer pawimawh ber ber kan nei chho ta nawk a. High Court CJ hmanni ah kan neih chhun a pension a, Assam State Human Rights Commission Chairman atana ruat thar a ni a. High Court judge pahnih kan nei ve leh mek bawk. Nun kawng dang hrang hrangah kan thleng sang chho zel zawk a. Tunaia nun kawng peng hrang hranga quality neia thlen sak zel zawk hi kan tum tur ni awm tak a ni. Tunhnai kum 33 chhung uluk taka thlirin UPSC examah pawh hniam chhe lutuk kan ni lo, tun hnai kum 10 hi, Kan tha hauh lo a, kan in sawi anga chhia kan ni lo, kan danglam teh chiam chuang lo a, nun kawng peng dangah pawh hma kan sawn belh sauh sauh zawk a ni.

Tun hma aiin eizawnna kawng duhthlan tur a lo tam a. A thiam leh thei falte tan mahni talent leh nuam tihna bera kalna tur a lo awm ve ta a. Civil service career duh lemlo an awm ve teuh a ni.

Tunah hian theih tawp chhuaha tlin tuma inbuatsaiha, bei tauh tauh an awm reng a. Tun hnai kum 2-3 chhung pawha UPSC interview han thu zak zak pawh an awm ve a. An vannei ve ta rih lo a ni. Kum rei vakloah tlin thuih kum pawh kan nei ve leh mai ang. Chutiang bawkin, ro kum pawh a awm ve leh anga.

A sawi huaite sawi bawl bawl bak hi hmuh fiah a, thil chik ve deuh deuh hi a tha khawp mai. Hmasawn erawh kan ngai a, tan lak erawh chu kan ngai hrim hrim a, chu erawh pawm angai tho tho.

A tul leh pawimawh ber chu hnam ang chuan tan pawh i tang ang u. A fuih pawh i infuih ang u. Mahse, practical tak ni se, chutiang chuan inkaihhruai ila. Thawk rim ila, rinawm ila, dik ila. Kawng awlsam hi zawng fo lo ila.

Kan harh chu angai teh meuh mai a, hma pawh kan lak angai a. Awmze nei taka kan harsatna zir chian erawh ni thin sela. Chumi mil chuan kan thil tawn a piangah hmasawn tura beih zel zawk tur a ni.

Aside | Posted on by | Leave a comment

PURUNVAR (GARLIC) THAT NA THURUK

Zan a i mut theih loh chuan purunvar kha kheh la ti chuan i lukham hnuai ah dah rawh. I mut a ti tui in i taksa kham te a ti reh bawk ang. A tuk zing chu i tho tha ngawt anga i zawi na te pawh a reh ang.

I hritlang, khawsik, awmna leh thisen sang natna te pawh an zia awm phah dawn a ni. Ei chauh ni lo in kan mutna lukham hnuaia kan dah hian cancer neih theihna tamtak a lo dang a ni.

I hliam/ pan ah te i hnawih pawh in awlsam takin a dam thei a, tin i vun chhunga ser bo tir i duh chuan i ser ah tak khan purunvar lo hnawih ang che. Puruvar hi ei chauh ni loin kan lukham hnuai a kan dah hian kan tan tangkaina tamtak a nei dawn a ni.

Ref:Lunpin
News Lawrlhawm

Aside | Posted on by | Leave a comment

NORTH VANLAIPHAI MIBO RUANG HMUH A NI

7th January, 2019

N.Vanlaiphai mibo, Tv. Kaptluanga (30) chu ni 5 lai khawtlangin an zawn hnuah vawiin dar 10 vel khan a ruang hmuh a ni.

Kaptluanga ruang hi N Vanlaiphai Rahsi veng ram Hydel Complex ruam, Pu Chhandama dil thlang lengkir 50ft vela sang hnuaiah hmuh a ni.

A ruang hi a la chhe lo a. A khawng nasat loh dan ațangin leh a kut ke te siam rem a harsat loh avangin a thihna a la rei lutuk lo a nih an rin thu thudawnna chuan a sawi.

Thudawn danin Kaptluanga hi Lengkirah hian a tla a nih an ring. A hmui leh khabe vel bakah a nâk vel a sawh a niin a lang a, a zak thlar thlaah hliam awmin a bân a pilh deuh nuan bawk. A ringruh a tliak a ang viau bawk a, a kawng a sawh chhiain a rinawm bawk.

N.Vanlaiphai Police te a hmunah kalin thil tih țul ang angte buaipuiin an tifel a. Post mortem lovin a ruang hi an in panpui nghal a ni a. Dar 11:40 vel khan an in thlenpui a ni.

YMA hruaitute, khawtlang hruaitute leh mitthi chhungte inbiak angin a ruang hi vui nghal lovin zaninah tlaivarpui a ni ang a. Naktuk chawhma dar 11:00-ah vui a ni ang. Vawiin vek hian N Vanlaiphaiah mitthi dang a awm avang leh thlanmual thuhmuna phum tur an nih avangin zanin hian lumenpui țha zawka ngaih a ni.

Aside | Posted on by | Leave a comment

Pathian in tute nge a thlan??

Pathian tan i tling ve lo ah i in ngai a nih chuan hengte hi Pathian in a thlan te chu an ni.

1..Zu ruih hmang Nova
2..Tar lutuk tawh Abrahama
3..Dawt sawi hmang Jakoba
4..Dangawk Mosia
5..Mi dawizep Gideona
6..Hmeichhe thlemthluk theih Samsona
7..Naupang lutuk Jeremia Leh Timothea
8..Nawhchizuar Rahabi
9..Uire hmang leh Tualthattu Davida
10..Mahni intih hlum duh Eliza
11..Pathian tlanbosan tu Jona
12..Isua phatsantu Petera
13..Isua mutthluk san tu zirtir te
14..Pasal eng emaw zat nei tawh Samari hmeichhia
15..Patawi tak Jakaia
16..Kristian te nghaisatu Paula
17..Mithi tawh Lazara
18..Hmeithai Naomi

PATHIAN tan hian Chhuanlam a awm thei lo. Pathian hian i nihna leh I theihna piah lam ah a la hmang duh reng che a sin…..

Lalpa chu fak in awm rawh se

Aside | Posted on by | Leave a comment

Revd Chuauṭhuama Mafaa leh Kei tih kha

Revd Chuauṭhuama Mafaa leh Kei tih kha
-Laltholeha Chhakchhuak

January 4 zana kan ṭhianpa leh a nupui fanaute thlalak facebook-a kan comment-na lamah Marova Royte chuan Mafaa thlahna thu ziak ve tura min duh thu a rawn sawi a. Eng danga chhang lo chuan, “Mafaa hian a thih thu hi han ziak thei se a ngaihnawm ber dawn a nia aw…,” ti lam deuhin ka chhang a. Ka mu ta mai a.

Mafaa thi ta mai hi ka awmna Tlawng lui kam aṭang hian pawi ka lo ti ve hle a. Zep nak emaw ka chutih avang chuan amah thlahna thu ziak tur zawng chuan chhungril lama turtu ka nei lem lo. Chutia ka mu, zing ka han thawh hnu feah chuan facebook chu ka han en leh a. Revd Chuauṭhuaman Mafaa chungchang a ziah chu a lo intar a, chu thu ka han chhiar chuan min tina ta hle a, min vilh a, min vit a ni ber e! ‘An Lente chu kalsanin amah an zui ta a’ tih ang mai khan ka hna ṭul kalsanin he thu hi ziah a lo ṭul ta a ni ber mai.

Mafaa chungchang sawi thui ka tum lo. Mafaa chungchang thu kan Sakhaw hruaitu, arsi êk kai china ka ngaihin a sawi zui dan zawk hi sawi zui ve ka tum zawk tak chu a ni. Mafaa chhungten amah Mafaa avanga chala chil inhnawm sakah min lo ngaih sak lo se ka duh hle.

Revd Chuauṭhuama hian min hre hauh lo ang tih hriatna tak ka nei a. Kei erawh chuan ka hria a, mahse ka hriat dan chu benga hriatnain tih ang deuh khan a fek-fawkin ka hre lo. A hmuh pawh ka la hmu lo-hmaichhanah. A thuziak chu ka chhiar fo thung a. A kum sawmhnih sulhnu nen lam ka lo chhiar silawng tawh a, a thu leh hla han sukthlek pui dan aṭang chuan thil chhiar zau tak, mi nghet tak, thu duh tak i nih ve dawn roh hi, tiin amah ka ral puh mai ṭhin.

Hetia Mafaa, thlan khura zalh tawh, lei daia mu tawh, engmah sawi zui thei tawh lo Revd Chuauṭhuaman a han chilh zui hi a mak ka ti hle tih aṭangin thupuiah han zuang lut ta i la.

A thuziak tlangpui hnuaiah Revd Chuauṭhuama hian ‘chawngkhum dan tlang huat loh’ tiin, a thupui ziak turah zalenna a inpe chawp a, amah leh amah a intithlarau hruai zui nghal a! Chutia a tih hnu lawkah chuan Mafaa miin an uina chhan chu nula leh tlangval lawm zawnga thu chheh leh chei a thiam vang a nih a rin thu a rawn sawi a; a ka a ang chauhva Mafaa chungchang chu ‘Zu’ hmangin a han ṭan sak pek a! Chu pawh amah Mafaa lawina kohhran Pastor pakhat thusawi niawm tak a rawn sawi chhawn a la ni zui.

A thuhmahruai a zo a, a chil a lem chauh tihah Mafaa chungchang chu Zu bawkin a bual leh a. Zu loa a tlei rei loh thu anga ngaih theih leh zu avanga thi ta angin a rawn ṭawng mawih leh ta suah suah mai a.

A thuziah hlawm thumnaah chuan Mafaa kut chhuak thu leh hla a rawn sawi tawh ka rin nen Mafaa chu Zu sawi mawitu, Zu avanga amah hnial ṭawng ṭawngtu a nih thu a rawn sawi raw tui leh hle a. Zaikima lehkhabu ‘Vànawia Zirtîrna’ tlangzarh tuma Mafaa lan dan sawi nana ‘Sakuh thinrim ang mai’ tih a han hmang duh te; chu programme-a zu rui chunga rawn petek lut ang hiala a han umzui duh te hi mihring inzahlohna a kawk pha tlat. Pachhunga University College-in programme an siam tuma Mafaa a tel ve thu a ziahna lama ‘hmel phak deuh luai hian…’ a han ti leh hram te hi thu chuang mai mai, thu uchuak leh thu vuvuk mai mai a ni.

Mipuiin Mafaa kan hriat dan chu thu ziak thiam tak, chumi kawnga a kum rual puiten ‘ka u’ an tih tur khawpa thiamna nei mi a ni, tih hi a ni mai a. Mafaa hian fa eng zat nge a neih a, pawl eng zat nge a zir thlen a, khawi Kohhranah nge a lawi a, zu a in thin em, tih lam kan buaipui lo. A thu leh hla Zofaten kan rochun tur zawk thlir chuan kan hmanhlel a. Revd Chuauthuama thung chuan a thuziak han thlir hian Mafaa chu Zu bel bulah a nam thlu a, a chhir zui a, chu mai chu duhtawk lovin a chhip samah a thama Zu belah a chiah zui ni berin a lang. Heti anga Lei daia zal tawh, a pen a vilik thei tawh lo bawk a, ti niawm taka a han Zawhte sazu chhaih chiam mai hi chu Revd Chuauthuama hian Thlarau rah (insumtheihna) a chan thu a sawi kha a hmang zui ta bik lo a nih ber hi. Talk show-ah te chuan a thupuia zirin thu a inhmu lo fo reng a, kan inhial bap bap tur a ni mah a. A inhnial huna insum a, a hnialtu thih hnua vantlang hriata hetia thlarau rah pal darh zawnga amah berin tawtawrawt a rawn ham ta mai hi a mak a, a ri a bengchheng khawp mai. A patling thu lo a ni satliah lo va, a hmeithai thu mah mah!

Mafaa chu Literature tuala pa buan chak tak a ni. Chu chu Revd Chuauthuama pawh hian a hre reng a. Chuti lam sawi thui duh si lo va a thuziak tawp lam chena ‘vanramah chuan chawltui ningzu dawn tur a awm tawh lo a’ ti dawn dawna Mafaa thlarau a han ral sai zui te hi ‘Revd’ aw phawiah chuan a hruang-hrau mah mah a. ‘In tehna ngai bawkin an teh ang che u’ tih lai chang la chhuaka kan inthlir dawn a nih chuan Revd Chuauthuama hian thlarau bo eng zat nge Pathian hnenah a hruai tawh?’ tih zawhna a lo piang ve mai ang! Amaherawhchu, chuti anga teh let pawh a tul lo hial zawk.

Revd Chuauthuama hi tawngkam bungrua nei tha tak a ni mai thei a, chuti lama pa hausa a ni a nih pawhin, mitthi tawh vantlang hriata a bi tum a, mi mimal nun ram a zul zui hrep duhna lai tak hi a retheihna a ni lawi si awm e. Lu khuih pial puk zingah rilru hrisel lo tak pu a awm theih a; sam van kawk zawnga khuih(?) zingah mi tha tak a awm theih bawk a. Kawr dum leh sen kan hak velah hi chuan tehfung inpawt ngawt lo deuh i la a tha ang e.

Aside | Posted on by | 1 Comment