Kohhran Upa term neih a va hun ta êm!

Vua leh vang ngah vang maia dam chhûnga kohhran upa ni mai tur, kohhran chawm kawnga tisa thila thei ve tak, thlarau chaw erawh amah lam lam fah ngai ka hmuh changte hian Pathian vangin ka thin a ur ţhin.

Officer lian tak, thawhlawm thawh tam kawnga ţhahnem tak, upa nihna lei tling, a kamchhuak erawh inhnangfakna tur reng reng awm si lo ka hmuh changte hian, anmahni la hremtu tur Pathian vangin upa ţhenkhat hi chu ka khawngaih lawk ţhin!

Zahthlak taka a upa nihna hlih ngai hial khawpa hmeichhiat mipatna kawnga insum thei lo upa, miin an hriat tak leh tuma’n an la hriat si loh kohhran upa ka hriatte avang hian UPA nihna hian term a neih a va hun ta em ka ti a ni!

Kohhran tam tak hi chu an Upa ţhenkhat vang hian nuih loh an har zo ta! Ofis lama a nihna kan hriatchian, mi dik pangngaiin kan thinhrik ngawih ngawih, a lawina kohhrana upa lo ni site avang hian kohhran lian ţhenkhat hi chu ngaihhlut an har ta a nih hi!

Upa nihna, Paula sawi ni pha hlawl lo tam ta lutuk avanga kohhran rorel dik lote hi kan hmu ta nual awm e! Hawh u, i harh teh ang u. Kohhran enkawltu hnaisailo, bang ngam rawh. Mi pangngai angin hun tiamah Pathianin a hrem ve ngawt lovang che.

“Mi tin an thiltih ang zela hremtu tur” i la hmachhawn ngei dawn tih hre reng ang che! Bang ngam loho banna hun kan siam a ngai ta e. Tling ngang lo kan thlak pawh a hun ta. Kohhran zahawmna kulhpui ni mekte chet dan ţhenkhat ka thinhrik phawt chuan Pathian pawi an sawi ngei tih ka chiang e.

Author : Lalremliana Pachuau

Advertisements
Aside | Posted on by | Tagged , , | Leave a comment

UNFINISHED BUSINESS OF SIX-DAY WAR by Fredy Lalrinmawia Renthlei

       Kum 1948 khan Britist kaihruaina leh UN rorelna chuan Palestine ram chu state pahnihin a thenhrang a, state pakhatah chuan Hitler-a hun laia Juda mi maktaduai 6-te an awm a, a dang state-ah chuan Palestine Arab mite an awm bawk a ni. Arab ram tam zawkte chuan UN rorel dan chu an duh lova, Israel-in zalenna a puan tum pawh khan Israel leh Arab tangrual sipaite chu nasa takin an indo va, chu indona chu The War of Independence tia koh a ni a, Arabic tawng erawh chuan AL Naqba tia koh a ni thung. Israel-in independence a puan tum khan Israel leh Arab-te chu nasa takin an indo a, Arab-ho an tlawm tak avangin mi tam tak chu chhak leh thlang chhim leh hmarah an tlanchhia a, an In leh Lo te pawh ui em em chungin an tlansan vek a ni. Indonaa Arab-ho an tlawm ta chu zahthlak an tiin an thin a na hle a.

Arabs ramte chuan nikhat khata Israel chunga phuba lak chu an tum lian ber a ni. Chu rilru avang chuan Arab hruaitute leh lalte pawh an awm hle hle thei lova, eng anga phuba lak tur nge ni ang tih chu an thupui ber a lo ni ta a ni. Heng dinhmun atang hian politic lama inlungrualna leh tanho dante ngaihtuahin a hnuah chuan Palestine Liberation Organization (PLO) tih chu Aigupta President Gamal Abdel Nasser-a kaltlangin a lo piang ta a, Ahmad Shukeirei-a chu an hruaitu atan an thlang nghal bawk a ni.

Aigupta President Nasser-a chuan Soviet hruaitute nena inlaichinna tha zawk siamin Soviet atanga tanpuina sum tam tak a dawng a, ral thuam pawh Soviet-in tam tak a pe bawk a ni. Hetianga hmathatna a neih avang hian Arab hruaitute pawh chawkphurin kum 1948-a an hmingchhiatna chu thai bo va, Israel chunga phuba lak chu tumin kum 1967 tantirh khan indona an buatsaih tan ta a.

Nasser-a chuan Soviet chauh rinchhan lovin Syria President Hafez al-Assad-a leh Jordan lal Hussain-a te pawh lamtang atana sawmin Israel ram ri chu a bei tan ta a. Indo tura Arab lam an chhet hmasat avangin Israel pawh a awm hle hle thei ta bik lova, Israel pa ber David Ben Gurion-a aiawihtu Labour Party-a Prime Minister Levi Eshkol-a pawhin 1967 May thla atang khan indo a nih tur thu chu Israel mipuite hnenah radio atangin a puang ta a. Israel sipaite an zam mai lohna turin Moshe Dayan-a chu Defence Minister atan rang takin a ruat nghal bawk a, indo tur chuan an inbuatsaih mup mup ta a ni.

Aigupta President Nasser-a pawh chuan indo chu pumpelh theih a ni tawh lo tih a hriatchian avangin May 16 khan Britist-France-Israeli ten kum 1956-a an lak Suez Canal-a UN sipai awmte pawh inthiarfihlim vek turin UN hruaitute a ngen a. May 22 khan Israel ten an lawngpui kalkawng atana an hman hmunpui ber Strait of Tiran leh Tuipuisen (The Red Sea) chhak lamte pawh a khar vek nghal a, chu hmunah chuan a sipai nuaikhat, indona motor 1000 leh indona tanks 1000 a chhawp bawk a, May thla tawp chiah khan, “ Arab ramten indo kan hman ta e,” tiin a puang ta a ni. 1967 June 5 khan indo chu tan a ni ta a.

Zing lam dar 7 chiah khan Isarel chu a chhe hmasa ta a ni. Israel-in a hmasa bera a tih chu Aigupta thlawhnakirawn (Egypt airfield) boom chhiat vek a ni a, a dawtah chuan an lawng chawlhhmun pawimawh zawng zawng tihchhiah vek a ni. Chhak lam atanga Aigupta tanpui tura lo kal Jordan siapite leh Golan Heights hmuna Syriaan sipaite pawh chawp leh chilhin Israel chuan a lo bei a, Ni rei lo te ah chuan Palestine rama Gaza Strip leh West Bank te a la a, Syria ram ri a Golan Heights te, East Jerusalem te leh Sinai Peninsula te pawh a la bawk a, an airfield-te leh lawngchawlh hmunte a chhiat vek tak avangin June 10 khan Arab-ho chu an tlawm ta der a ni.

Israel-in Ni rei lo te a Arab tangrualte a hneh ta chu khawvelin mak a ti a, mi tam tak chuan Israel CIA-te hnathawh dan leh an indo dante (strategy) te chu an chakna ber niin an sawi a ni. Israel-in Sinai Peninsula a lak chu Israel leh Aigupta-ten kum 1979-a remna thuthlung (Israel-Egypt Peace Treaty) an siam tak avangin Israel chuan Aigupta a pekir leh ta a, West Bank erawh chu Israel sipaite kuthnuaiah a awm thung a ni.

Indo a zawh fel hnu chuan kum 19 meuh thenhrana lo awm tawh Judaho hmun thianghlim ber Jerusalem khawipui chu Israelte kutah a awm ta a, an hnam histawria hmun pawimawh em em West Bank pawh tunah chuan Israel-te kuthnuaiah a awm fai ta vek a. Israel chuan Mipui Inawp Dan (Civilian Law) khauh takin a siam nghal a, Golan Heights leh East Jeruslem-a cheng Arab-ten Israel khua leh tui nihna (citizenship) an dil chuan Israel paw’n phal taka pe turin kawng zau takin a hawng nghal bawk a ni.

Hetianga Israel-in chawplehchilha mipui inawp dan a siam avang hian UN Security Council chuan Israel a dem nasa hle a. UN Security Council chuan Golan Heights leh East Jerusalem-te chu tuma luahtheih loh ram (“null” and “void”) tiin a dah a, hemi hmuna cheng reng rengte chu dan lo anga ram luahtu (occupied) tiin a puk bawk a ni. Israel leh Arabs te inkara remna a awm beiseiin UN Security Council chuan Danpui 242-ah, “Land for Peace” tiin dan a siam a, Israel ten dan lo anga an luah ramte pawh chhuahsan turin UN Security Council chuan Israel hnenah thu a pe a, mahse vawin thleng hian Israel chuan UN Dan siam chu a zawh duh chuang lo a ni. Indonaa an lak West Bank-a hmun khuar turin Labour Party sawrkar chuan rang takin thutlukna a siam ta a.

West Bank hi kum 1948 khan Jordan kut hnuaiah a awm a, mahse chu chu Britain chauhvin a pawmpui avangin PLO kutah a hlan leh vat a. West Bank-a awmte chu Arab, Palestine mite leh kum 1948 Arab-Israel indo tuma refugee-te an ni deuh ber. Kum 1967 Niruk Indona hnuah erawh chuan West Bank chu Israel sipaiten an awp ta a, kum 1993 thleng khan Israel sipaite enkawlna hnuaiah a awm a ni. Israel ten PLO atanga ngenna lehkha an lo pawmpui hnu erawh chuan Palestine mipui tamna khuate erawh chu Israel-in Palestine Authority (PA) te kutah thuneihna leh rorelna a hlan ta a, Israel sipaite chuan hmun tlem chuah an awp ta a ni. Palestine helhoten Israel an beih thin avangin Israel pawhin a sipai tam tak a dah belh zel bawk a, tunah hian Israel leh West Bank inthenna kulh bang sang tak an siam mek a ni.

Gaza Strip erawh chu Aigupta nena ram ri a ni thung a, kum 1948 atanga 1967 thleng khan Aigupta kut hnuaiah a awm a, kum 1967 atanga 2005 thleng khan Israel sipaite kut hnuaiah a awm bawk a. Kum 2005 khan Israel chuan Israel’s Unilateral Disengagement Plan dan a siam a, chu dan avang chuan Israel-in Gaza hmuna mipuite leh a sipai zawng zawngte a sawn vek a, mahse Gaza airspace leh lawng luh/chhuahna tuipuite erawh Israel kut hnuaiah a awm vek tho a ni. Gaza ram ri chungchangah Israel, European Unions (EU), Palestine Authority (PA), te leh Aigupta ten inremna thuthlung an siam a, EU chuan englai pawhin a enthla reng a ni.

Kum 2006 June thla khan Hamas Movement ten hnenna an rawn chan tak avangin ram ri chungchangah buaina nasa tak a chhuah leh a, Israel leh EU ten Hamas Movement an pawmpui loh avangin EU ten Israel kaltlanga kumtin tanpuina sum an pek thinte pawh Israel-in a chelhbet hmiah a, khawnvartui, gas leh electric a pek thinte pawh Israel-in a titawp hmiah bawk a, ram ri kaltlangna te lama a khar vek avangin Palestine refugee-te pawh nitin an pung zel a ni. Arab-ho thinrim chuan Khartoum-a Arab hruaitute rorelnaah Israel nena inremna thuthlung siam lo turin thu pawhchatna an siam ve nghal ta a.

Khartoum rorela an dan siam pawimawh em em te chu:-

1) Israel ram din a nih thu pawmpui loh

2) Israel nena inremna thuthlung siam loh

3) Israel nena inbiak loh te an ni.

Israel-in Arab leilunga a ram a din avangin heng leilungte hi Arab-te hnena a pekkkir leh hma chuan Israel-in buaina rapthlak tak a hmachhawn zel dawn a ni tih chu Israel pa ber David Ben Gurion-a pawh khan a lo hmu lawk sa vek a, a hnua Prime Minister hna rawn chelh leh tur Ariel Sharon-a te, Ehud Barak-a te leh Ehud Olmert-a te paw’n heng buaina hi an pumpelh dawn lo tih pawh a lo hmutlang sa vek a ni.

Israel-in a chakna hmanga a ram dinin hnehna la mah se la, thlirtu tam takte thinlunga zawhna lian tak chu, “Israel-te hnehna hian Israel leh Arab-ho inkarah remna a thlen tak tak thei ang em?” tih hi a ni. Israel-in Arab leilung chunga a ram a din avangin vawiin thleng hian Israel leh Arab-te inkarah remna tak tak a la awm thei chuang lova, Israel-ten an ram an din avanga lawmna mittui nen hnehna hla mawi an rem laiin an ram chhuhsak Palestine mipuite erawh lungngaihna mittui nen an kun tlawk tlawk thung a ni. Israel-in hetianga Palestine mipuite mittui tlakna a siam avang hian Israel ngei pawhin vawin thleng hian buaina leh harsatna a tawk mek zel a, kum 1987-ah indona a thleng a, kum 1990s-ah Israel hmun hrang hrangah boom a puak bawk a, kum 2000-a Camp David rorelna pawh khan kum 2008-a buiana tihtawp an tum target chu an thleng thei ta chuang lo a ni.

Israel leh Palestian-te inkara buaina chu vawiin thlenga khawvel hruaitute tiluhaitu ber a la ni a, inremna tura thusawihote pawh vawi tam tak an hmang tawh a, mahse vawiin thleng hian inremna chu an la nei thei chuang lo a ni. Israel leh Palestine-te buaina bul ber chu engnge ni ta a, enganga thulai rem tur nge ni ta ang tih pawh UN hruaitute leh histawrian mithiamten vawi duai lo an ngaihtuah tawh a.

Middle East chanchin chhuitute leh thlirtu tam takte chuan Israel leh Palestine-te inkara buaina bul ber nia an hmuh chu kum 40 chuang liam ta a an buaina bawk kha a ni a, he thubuai chinfel a nih hma chu vawiina Middle East buaina pawh hi chinfel theih a ni dawn lo tih chu an thutlukna a ni. Noble Peace Prize dawngtu (Israel mi) Elie Wiesel-a pawh khan, “Israel leh Palestian-ten kan ram kan din ve ve a, lungrual taka kan khawsak theih phawt chuan chu chu kan inkara buaina sukiangtu tur a ni dawn tih chu Israel leh Palestine-te hian kan hrechiang ve ve a ni, tiin a hriatrengna lehkhabu ah a ziak a ni.

(Ka lekhabu chhiar lai ami a nia , a ngaihnawm khawp mai..ka lo share ve tawp phone atanga type a nia hawrawp kim lo/diklo a awm chuan min ngaidam dawn nia–) FrEdy Lalrinmawia Renthlei.

Aside | Posted on by | Tagged , | 1 Comment

NEHRU LEH EDWINA

India a zalen dawn lai 1947-a British lal aiawha India awptu Viceroy hnuhnung ber kha Lord Louis “Dickie” Mountbatten-a niin, a nupui chu Edwina Mountbatten-i a ni a. He’ng hunlai hian an fatlum Pamela Mountbatten-i chu tleirawl fel tak kum 18 mi lai ni tawhin tun thlenga ti titam tak, a nu Edwina-i leh India a zalena prime minister hmasa ber ni zui ta pathlawi Nehru-ate inkar kha a hre chiang bertute zinga mi a ni.

Pamela-i hi India ramah kum hnih dawn awmin India zalen tur boruak inmung vel leh a hnua thil thleng tam tak mit ngeia hmu zuitute zinga mi a ni a. Naupang te mah ni se a pa zarah India ram mi ropui ber ber Mahatma Gandhi, Vallabhai Patel, C. Rajgopalachari leh midang tam takte hmaichhanah a kawmin chhawnchhaih pawh a hlawh hle țhin a, kum 90 dawn ni tawh mahse kum 70 liam taa thil thleng tam tak kha a la hre chiang em em a; “India Remembered” bu ziak tura mi duhawm berte zinga mi pawh a ni reng a ni.

“Panditji” tia a koh ngam hmaa, “Mamu” ti ngata a koh pu Nehru-a leh a nu inkar hi Pamela-i hian, “Mipat-hmeichhiatna tel lo inhmangaihna” tiin mi tam takin a bak awm anga an sawi fo ţhin pawh, “Mipat-hmeichhiatna tel lo inhmangaih tawnna thuk leh dik tak a awm thei tih hi mi tam takin an awih thei lo a, ka nu leh Panditji-a kha chuan chutiang chu an nei niin ka hria.” a ti.

A sawi chhunzawm zel a, “An pahnih khan mi khawhar (thei) tak ve ve an niin ka hria. Panditji-a khan nupui a sun a, a farnu lah chu foreign ramah a awm bo si a. A fanu lah a pasal (Nehru-a makpa) rawng a bawlsak a ngaih tawh bakah kha’ng hunlaia hmeichhe pawl hmalaknaahte khan a tel tam em em a, kha vang khan mal takin a nun a hmang ţhin. Chutihlaiin ka nu lah mize danglam tak nei a lo ni a, hun rei lote chhung chuan namen lohin an inkawmngeih ta a ni.

Brief Encounter film-a mi pahnih inngaina em em, inpumkhat tura a ngaihna awm si lo ang deuh kha an ni a. India ram kan chhuahsan hnu khan kum khatah vawi khat emaw vawi hnih emaw an la inhmu zui fo a, an inkar boruak pawh a sang zui hle zel a ni.” a ti.

August ni 15, 1947-a India a zalen hnu khan Pamela-i leh a nu hian India ram chu an la rawn tlawh fo a, Teen Murti, New Delhi-a Prime Minister chennaah sawrkar khualţha angin an thleng ziah ţhin a; a chang phei chuan prime minister zinvahnaahte chuan an zui ve bawk ţhin. Chutiang bawkin pu Nehru-a pawh hi UK a zin tawh phawt chuan Broadlands, Hampshire-a Mountbatten chhungkaw chennaah a thleng ziah ţhin.

Pamela-i chuan hetiang hian a sawi chhunzawm zel a, “A vanglai takin ka tawng niin ka hria a, vannei ka inti takzet a ni. Naupang tawh phawt chu a ngaina êm em a, a bula awm a khamawm ngai loh a, tumah a tilunghnur ngai hek lo. Thil engkim a hre vek emaw tih tur khawpa mi hre zau a nih avangin a ngainatawm em em a ni. A dam lai ni lo, a (a nu Edwina) thih hnu khan ka pa chuan Panditji nena an inkawmna, an lehkha inthawn tawnte chhiar turin min ti a. Dikk tak chuan eng emaw “tlêm te tak tak” chu a awm. An pahnih khan an inmamawh tawn a, amaherawhchu a (a pa) tana nuam lo tih lutukna tur erawh a ni lo.

image

Amah (pu Nehru-a) kha mi zahawm tak a ni a, ka pa ina ka nu chetsualpui tura ngaihtuah chu a tiha thil mawi lo tawpkhawk a ni ang. Ka pa thikthu chhe lo lutuk kha kan chhungkaw keh darh loh chhan pakhat a ni.” tiin Japan-ah khan Atom Bomb thlak lo pawh ni se a kaihhruainain an va tlawm tho ang tih tur khawpa pa ralrel thiam leh hrat khawkheng, hleitling, pianthiam leh hmelţha a pa Louis Mountbatten-a chu a fak hle nghe nghe a ni.

A fanu hming pawha India Hicks phuah ngat Pamela-i hian a nu nen khan India thlavang hi an hauh na hle a ni ang; Pakistan hnam pa Mohammed Ali Jinnah-a pawh kha ţawngkam dengkhawng tak takin an bei fo a, khawthlang incheina (coat suit) nen rawn lang fo ţhin mahse, “Mihring ngainat theih loh.” a ti thlawt a ni.

Author: Kima Sailo
*********::::::::::::::::::::::::::

Aside | Posted on by | Tagged , | Leave a comment

OLA Aizawlah Lo Lut Ta

Phai lamah chiah kan lo hriat thin OLA chuan Aizawl a lo lut ve ta a mipui tan a tangkai dawn khawp a hriatna ka nei . OLA chu phone atanga internet hmanga taxi kan book zung zung theihna tura duan (a tawi zawgin) ani mai.

 Phai lama zirlai awm te leh sumdawng etc ten an lo hmelhriat tawh angin a tangkai an ti hle a Mizoramah awm ve tawh se anlo tih thin chu official a Launch a ni tep a mahse taxi neitute leh driver lam te hian kan la hmelhriat vakloh thil anih vang nge OLA hnuaia in register hi kan ngam mailo deuh niin alang.

OLA ah chuan lo in register ve ta ila :
1. Eng hlawkna nge ka neih ang?
= Ola application kha I on hrim hrim chuan OLA tan I service tihna ania kar khatah darkar 50 I on tlin chuan cheng 4000 chuang I hlawh tawp thei, customer nei miahlo mahla company tana service I ni tlata I hlawh tho tho dawn tihna anih chu.

2. Keimahni thu in kan service thei tawh dawn lo em ni.
= service thei teh reng e, I thu thu ani mai, mahse mahni tulna a service lai chuan OLA app kha on loh a fuh achhan chu call I dawnga I kal hman siloh khan incentive (hlawh) lo lut tur kha a kiam ve thei.

3. An daih rei tak tak dawn emaw nile.
=Daih rei ang, phai ram khawpui 100 chuang fe ah an service renga Aizawl ah pawh service tha tak neih kha company duhthusam a ni , chuti maia tawp leh mai an phallo zawk.

Tichuan phai lam atangin mikhual te kan ngah ve tial tial a zoramah , OLA chu tlangnel taka an hman ngam tur alo nita a , local mite tan lah mahni thut hmun atanga book maitheih te alo nihnaah remchanna thar kan nei ve zel dawn ta e kan ram ngei ah.

Registration ti tura ngaite (taxi neitu tan):
1.document kimchang (felfai)
2. Bank passbook(phek hma lam Xerox)
3.PAN card

Aside | Posted on by | Tagged , , | Leave a comment

LUNG NATNA & A DAMDAWI -Dr. C. Lalrampana

    Khawvel huapah leh abikin Mizoramah Lungna vei  an tam hle. Nausen pianghlim lung tha lo saa piang thihpui ta an tam thei hle bawk.  Thangthar tleirawl/rawlthar leh puitling phanchang tawh pawh lung natna vei leh thih phah an tam thei hle thin. Tunhma lam aiin tun kum hnih khat kal ta atang khan hetiang natna vei hi an tam lehzual nia ngaih a ni.

Taksa peng dang zawng aia lung mak danglam em emna hi i ngaihtuah ngai em le?  Mihring a lo pian hma zawngin a nu lungphu ringin a hun a hmang a,  mihring nihphung pangngai a chan chhoh atangin a lungphu chuan hna thawk tanin a nihdan tur dik takin a phu char char a,  a phut loh hlek chuan mihring chu a buaizui nghal mai thin. A tawp/chawlh rei phei chuan mithi a nizui mai thin.

Bahlah hauh lova a thawh tur dik tak tluang taka a thawh chuan mihring dam chhung chu chhum lo chat lovin a hnukchah  hma zawng lung chu a phu reng ringawt mai tihna a ni. Kum 100 chuang damte lungphu chuan chawl lova a hna thawkin kum 100 chuang a phu char char tihna a ni a,  chuvangin,  taksa peng dang aiin a mak danglam takzet niin a lang.

Lungna (Heart disease ) hi ‘Cardiovascular disease’ tih a ni bawk.  Lung natna awm chhan ber chu thisen a dawn tur zat aia tlem a dawn vang a ni ber a, cholesterol san luat vangin thisen pechhawngtu arteries chu sawngin a lo zim a,  hei vang hian lunga thisen pek chhawnna artery atanga thisen infawkluh tur zat chu a pechhawng thei lova, lungin a mamawh ang tawk thisen a dawn loh avangin lung chuan a hnathawh tur a thawh theih loh avangin lung na a lo awm ta thin a ni.

Doctors (physicians ) rawn mumal lova antibiotics damdawi entir nan- nachhawkna etc. sang leh chak pui pui mahni ngaihdana lo ei ve chiam chiam chinte hi a tha lo hle a, nghawng tha lo (side effect) a neih avangin a bik takin lungin a tuar a,  chuvangin,  mi tam takin lung lama harsatna heart problem leh a hnuah lungna heart disease emaw,  lungphu chawl,  heart attack avanga thihna hial a lo awm thin a ni. Chuvangin,  mahni thua damdawi ei vak vak chin loh hi lung natna pumpelhna kawng tha tak pakhat a ni.

Lung natna hi tihdam a har hle a,  damdawia tihdam theih loh a nih tawh chinah phei chuan mihring chuan englaipawhin  seol thlan thim kotlang atangin Seol thlan khur thim chu a bih reng tihna a ni thei ang.

Zai a nih pawhin tih fuh hle loh chuan rei an daih meuh thin lo. Mi thenkhatte erawh computer chip chikhat “page maker’ vuahsak ngai an ni bawk thin.

LUNG NA VEI HRIAT THEIH DAN

  1. Taksa a chau ngawih ngawih thin,

2.  Awmah leh banahte a na chhuak thin,

  1. dar veilam leh khabe kualahte a na thin.
  2. Thawk a harsa a,  kut hmawr leh ke hmawr a vawt a,  lu a hai a,  khua sik seng seng thin,

  3. Ngaihtuahna a fim lova, thil hriat a chiang lo ruai thin.

  4. Lungphu a mumal lova,  phut zawk zawk a awl thin

7.  Engemaw thawm ri hlekah mangan a awl  hle thin.

Hetianga i awm a nih chuan daktawr pan vat thin ang che.

A DAMDAWI:

Lungna damdawi Pathian siamsa atanga kan hmuhtheihte zingah Vaimim (corn maize ) hi damdawi tha ber pawla ngaih a ni. Vaimim chhawn 30grams tui thianghlim liter 1-in chhum la,  a lumin emaw dah vawhin emaw zing tin emaw tlai tin rial no khat in thin la,  i lungnatna chu nasa takin a thunun thei ang.

Vaimim hi a kung leh a hnahte bakah a vaimim tak/fang chhumna tui pawh a tha tel vek thoa ngaih a ni nain a chhawn hi a chak tha bera ngaih a ni.

LUNG NA ATANA THA DANGTE

  1. Purun var: Nitin mum/mal/fang 7 tal rawtsawma a tui in thin a tha a, hei hian thisen kal vel a siam tha a,  lunga thisen inpekchhawnnaa puitu tha tak a nih theih avangin rawtsawm tui in kher lo pawhin chaw ei apianga hmeh thin pawh a tha tho bawk.
  • Hmazil : A hmin mu phoro dendip (powder) fhiante 1 tui thianghlim no 1 nen chawhpawlhin nitin zingah & tlaiah in thin a tha.

  • Hmarchapui:  Thak lo chi hmin tuah tawh a mu phoro rawt dip tui thianghlim nen pawlhin a chunga mi ang bawk khian in thin a tha.

  • Maitamtawk: Hei pawh hi a chunga mite ang bawk khian a hmin mu rawt dip tui nena chawhpawlh in thin a tha.

  • Parbawr: A par hlawm nitin a helin chaw ei apianga hmeh tel a tha..

  • Broccoli: Chaw ei apiangin a helin emaw chhum hminin emaw hmeh thin a tha.

  • Thei arlung hnah: A hnah chhum tui nitin zingah & tlaiah in thin a tha.

  • Fanghma: Chaw ei apiangin hmeh tel a tha a, nitin a hauva ei thin a tha bawk.

  • Khingte khi a taka tih theih deuh vek a ni a,  chhawr tangkai theih dan ngaihtuah thiam erawh a pawimawh hle.

    Aside | Posted on by | Tagged , | Leave a comment

    MIZO NULA CHHUANAWM: ALINERY LALNGILNEII LIANHLAWNG

    Mizofa te hi kan thlen chin leh kan tihtawh vekah chuan khawvel ram changkang leh hausa tak tak karah pawh mi chunga leng thei khawpa mithiam leh taima, Pathian tih leh mahni ram leh hnam hmangaihna thinlung pu hi kan nei nual awm e. Chung zinga kan nula chhuanawm leh hlawhtling chho mek, reilotea kan ram leh hnam la tihmingtha tur, tuna mi tam zawkin kan hriat loh, Sangau nula, Alinery Lalngilneii Lianhlawng hi i han bihchiang teh ang.

    Alinery hi Pu L. Hmunlal (L) leh Pi C. Lalengmawii te fa naupangber niin Sangau-a piang leh seilian a ni a. Tunah hian University of Sussex, United Kingdom-ah Msc. Master of Business Administration a zirmek a, Sussex University hi Development Studies-ah World number 1 ranking neilai a ni a, heta a zir dawn hian Development Studies tellin course 3 a apply a, a tling vek a, Social Entrepreneurship & Innovation, Leadership leh Development lam hi a tuina anih avangin hemi based deuh a course duan, MBA hi thlangin tunah hian London, United Kingdom ah a khawsa mek a ni.

    Alinery hi naupan lai atanga lehkha thiam thei tak a ni a, Pawl 1-9 (1996-2005) hi Sangau-ah kalin Primary Leaving Certificate, board exam-ah Lawngtlai District bikah top-10 ah a lang a, Pawl-5 a zir kum hian Sangau a Middle School awm tantirh ata record siamin subject tinah term leh final exam a mark hmusang ber a ni chho zat zat a, an headmaster-in Special Merit Scholarship a dil sak nghe nghe a, tin, Pawl Ruk a bawhkan tir a, mashe Pawl sarih anih hian a mit lamah harsatna a neih avangin sikul a kal tha thei meuh lo a, hemi bakah hi chuan Pawl 1 a tanga pawl 9 a zir chhung zawng hian an pawlah Pakhatna ni char char in, First division chunglamah zel a pass a ni.

    High School a luh tantirh, Pawl 8 a zir kum hian Sangau RD block hnuaia Talented exam buatsaih-ah Sangau RD block hnuaia High School awm zawng zawng, English leh Mizo medium-a kal te intihsiaknaah a thiam mi 3 thlanchhuah zingah a tel leh a, high school ka kal chhung hian scholarship a hmu a ni. Pawl sawm (2006-7) hi DM Higher Secondary School, Lunglei-ah kalin High School Board exam-ah an sikul a tang a ti tha ber niin Distinction-ah pass a, letter ka dawng nual bawk. Pawl 11&12 (2007-9) hi Govt. Mizo Higher Secondary School-ah kalin Science a la a, vanduaithlak takin Pawl 12 a zir kum hian a mit lamah harsatna a neih nasat deuh avangin a fail ve hlauh mai a, mahse hemi kum vek a Special Exam ah khan Mizoram pumah Parukna a ni leh ta tho a ni.

    Pawl 12 a pass hnu hian Asian University for Women (AUW), Chittagong, Bangladesh-a zir turin entrance exam-ah a inziak tling ve a, India ram quota, mi 6 thlan zingah telin full scholarship a hmu a ni.

    AUW hi Asia ram hrang hrang 20 vel atanga hmeichhia leadership potential neitha leh lehkhathiam rual thlanchhuahte kal khawmna hmun a ni a. Student tin te hi scholar tih niin a tamzawkte hian merit scholarship an hmu a, Alinery pawh hi Abbott Pharmacy, American Worldwide Healthcare Company scholars te zinga mi a ni a, anni hnen atang hian a zirna senso zawng zawng kum tin USD 12-15,000 (Rs 9-10 Lakhs) a hmu thin. Helaiah hian thil harsa ve tak a awm a, an scholarship maintain tur hian exam reng rengah 80% chunglam zel hmuh angai a, kum 5 chhung hian Pathian zarah 80% chunglamah zel semester tinah a pass thei a ni. An zirna hi American-style Liberal Arts based, Harvard Curriculum, ang a an zir avangin a an zir chhung hi kum 5 a ni (2010-2015) a ni.

    INTERNSHIP CONFERENCE LAMAH:

    Kumin March 11-21 inkarah khan International Development Youth Forum (IDYF), Tokyo, forum a tel tur in khawvel ram hrang hrang 60 aiawh tura diltu mi 3,000 chuang zingah thlanchhuah an ni a, chuta tang chuan paper present tur mi 6 thlan leh niin heta Paper present tur hian Professor nilai te, Lecturer leh PhD tilai te, government agency a hna sang tak thawk mek te karah thlanchhuah a ni leh a, amah chiah hi hmeichhia Paper Present tura thlan awmchhun a ni nghe nghe.

    Heng presenter te hian group hran theuh ho in forum topic ‘What is Development. What Are We Heading’ tih thupui hmangin corporate leh development tha taka a kal ho theihnan fundamental issues analyze na leh discussion topic thlanchhuah te atangin project solution an design a, an final presentation hi Japan International Corporation Agency (JICA), headquarters-ah Japan companies represent-te hmaah final presentation neiin, an group (ram 7 a tanga kalkhawm) chu a pumpuiah pakhatna an ni nghe nghe.

    Kumin January 8-24 chhung khan Asian-Pacific Youth Exchange (APYE), Bangkok, Thailand ah a tel leh a. He program hi United National Regional Headquarter-ah high level forum neih niin, UN Sustainable Development Goals 17 tharte zirhona neih niin Local Immersion/field work karkhat chhung an nei a, an group bik hi SDGs 12: Responsible Consumption and Production tih assigned an ni a, a teammate, Singapore, Papua New Guinea, Taiwan, China ami tenen online movement, Now For Future kalpui mekin an final project: Plastic kan hman leh siamchhuah nasat lutuk tihtlemna leh mimal carbon footprint tihtlemna lamah hma an la mek zel a ni

    Internship at Export-Import Bank of Korea (KEXIM), Seoul, South Korea from June-August 2014: An university atanga mi 3 thlanchhuah zingah telin KEXIM bank-ah hian Economic Development Co-operation Fund department-ah intern a han ti a. South Korea governance chungchang leh Official Development Aid (ODA), ramdang tanpui nana an loan pek leh development hna khawvel ram hrang hrang an thawhdan, an project cycle leh strategies te an han zirchiang a ni.

    Hengbakah hian India ramchhung leh Bangladesh-a a zirchhung hian conference leh forum-ah paper present leh delegates angin a tel nual bawk.

    EXTRACARRICULAR ACTIVITIES:

    Undergrad anih chhung hian an university a club hrang hrangah club hruaitu hna a chelh nual a, kum 2 chhung Residential Assistance cum House captain anih bakah University Magazine enkawl hna te, Environmental Club leh event host leh organizing team-ah a tel thin a, heng zinga nuam a tih ber chu kum tin Christmas Carol buatsaih thin hi a ni.

    October thla vel atangin Christian nilo te Carol hla zirtir leh Isua an hriat theihnan remchanga hmanga Sakhaw dang bia te nen a he hun hman hi a nuam a ti in, amahah hlawkna tam tak a chhar thar thin a, event a organize thin te zinga a thinlung khawih ber tu a ni thin.

    Tuna hian amah hi Wedu organization (It’s an organization investing in Women’s Leadership and Development) hnuaiah Rising Star a ni mek bawk.

    Sports leh Physical Fitness lam pawh a ngaipawimawhin nuam a tih zawng tak a ni a, AUW-a a kalchhung hian Karate bikah inthlurbingin Black Belt lai a ni.

    HNATHAWH MEK:

    Rising Star at Wedu Organization: He organization hi Women empowerment through mentorship pe tu an ni a, he organization hnuaiah hian kum 3-na a tan Rising Star a ni mek a, Oragnisation function dan ber hi one-on-one mentorship pek niin; entirnan: Amah hi mentee ka ni a, chuan mentor 1 a nei bawk a, thlakhatah vawi 2 inbia-in leadership lessons leh Smart goal setting an nei thin a ni. He organisation hnuaiah hian nikum April thla khan Wedu Rising Star Special Construction Project hnuia competition buatsaih a final award winning 2 te zingah ka tel a, he funding atang hian Sangau Blue Mountain Higher Secondary School-ah Library a sak sak a ni. BMHSS hi Sangau khawtlangin an din, School naupang harsa ve tak tak te kalkhawmna anih avangin Zirtirtu te hian thla 3-5 te hlawh la lo in an zirtir fo a, naupang thenkhat te hi Sangau leh a chhehvel a tanga lo kal, nitin zirna km 10-15pan te an ni thin. Funding hi construction atan deuh a tih anih avangin Lehkha bu leh bungrua Laptop, Projector etc te hi a hranin a buaipui reng a, tihlen chhoh zel a tum bawk a ni.

    Alinery chuan, ‘Thingtlang kilkhawr atangin harsa taka chawrchhuak ni mah ila kan thluak hi alo chhe bik em em lo a, resources leh opportunities kan neih phawt chuan sangtakah kan invawrh thei a ni tih hi chiang taka ka hriat avangin ka ram leh hnam, kan khawtlang tana ka tihtheih tha ber chu zirna siamthat/siamrem, a neilo zawk zirlaite tana ka theihtawp a resources pek leh chhawpchhuah a direction kawhhmuh hi a ni.’ a ti a. ‘Sangau khua foreign a zir hmasa ber, international conference a presentation pe hmasa ber etc. leh hnuhnungber nih hi ka duhlo a, an mamawh hmanrua kan pek/siam phawt chuan Mizo thalai te a tam zawk hi ram pawnah zirna tha nei turin an kal chhuak in an ti ve thei a ni tih hi ka chiang em em a ni’ tiin a expereiance a tangin hei hi chiang takin a hria a ni a ti bawk.

    Tun October 20-22 khan Barcelona, Spain-ah Labdoo annual conference 2017 hmangin invited speakers 5 te zingah telin a project leh a story te a han share a, Kum 2018-ah Germany ah Conference an nei leh ang. Tunah hian Alenery hi Labdoo.org-ah hian edovillage creator a ni a. Labdoo org hi Zero funding organization niin a main mission chu khawvel hmun hrang hranga zirlai te tan Education hi universal right anih theih nan a hnathawh a ni a. Laptop educational content pe chhuak a, semdarhtu an ni a. An hnuai atang hian an library tan laptop engemawzat a dawng tawh a, hei hi duhtawk lovin Mizoram school tamzawk tan dawn belh zel pawh a tum a ni.

    Hei mai bakah hian Alinery hi ‘Land Conflict Watch’ hnuaiah Field Researcher ani mek bawk a, he hna hi online journalism niin India ram chhunga Land conflict/rambuai Development in a hrintel te case chi hrang hrang zirchianna leh report thehluhna a ni. Rights and Resources Initiatives (Washington, US), based NGO hnuaia project niin website a report theh luh bakah conference/workshop te New Delhi-ah neih a ni thin bawk.

    Note: BMHSS a an library hi bultan chauh a ni a, Ram pawn lam a tangin lehkha bu-hard copy thawn a hautak em avangin lehkhabu, a hlui leh a thar pe duh tan amah hi biak pawh theih reng a ni. Zirlai naupang tamzawkte hian an tet te a tanga lehkha bu chhiartur an neih tam ngailoh avangin lehkhabu an ngaina em em lo a, reading culture enhance leh tur chuan lehkhabu chi hrang hrang: fiction, non-fiction etc a tha vek ani. Sangau RD block-hian Higher Secondary School a neihloh avangin Sangau khawtlangin an din leh tanpuina a kal mek Blue Mountain Higher Secondary school ah hian Sangau chauh nilo, a chhehvel Pangkhua, Thaltlang, Sentetfiang, Lungtian etc. atangin naupang te an kal khawm a, dinhmun harsa tak tak nihlawm mahse zirna an duhna leh an thahnem ngaihna hian board examah result tha tak an nei chho mek zel a ni.

    Author : Kiddy Vanchhawng

    Aside | Posted on by | Leave a comment

    THOSI HLO

    DDT( Dichlorodiphenyltrichloroethane ) Thosi Hlo kan tih mai (Dichlorodiphen
    yltrichloroethane) hi kum 1874 khan an lo hmuchhuak tawh a, kum tam a liam hnu-ah Swiss mithiam Paul Hermann chuan kum 1939 a hlo hnathawh dan (insecticidal action) chu hman theihin Rannung thahna hlo (Pesticide) atana hman a lo ni ta a ni.

    INDOPUI-2 lai daih tawh khan Malaria leh Typhus hlo atan Sipaite khan an hmang thin a, chumi hnu atang chuan Rannung laka thlai venna atan a hman chhumzawm a ni.

    Tunah US chuan hman khap a ni, a khapna chhan nia lang chu an NATIONAL BIRD (Bald eagle) leh sava thenkhat Rannung Rem hmabak (Endanger species) ho venhim an lo tum vang a ni..

    A hlo hnathawh dan (chemical action) mihring bikah lo sawi leh ila. A hlo hi kum 1950 chho atang khan Rannung thahna hlo ber ah hman alo ni tawh a,heng hunlai hian mihring tan a hlauhawmna anla hriatloh vang a ni.

    Rannung dang aia a hlo hnathawh dan (chemical action) thawh nep chhan ber chu mihring vun hian alo dang ve vang a ni.

    Mihringte hian DDT hi ei leh in atanga kan lak luh hian thau (fatty Organs) angin kan taksa ah hian a lo insiam a, Thalbe (thyroid),Adrenals leh Chi ah te a lo bet ve thin.

    Kan taksa ah hian 236mgDDT per Kg ang vel a awm chuan Thihna thlen thei tur khawpa Hlo hlauhawm a ni a, 6-10 mgPer Kg lek pawh kan taksa ah pai ta ila Luna, Luakchhuak leh taksa khur a siam nghal thei.

    zir chianna ah chuan Hnute cancer tam tak pawh hi DDT vang a ngaih a ni, hormone function a tibuai a Chi thlahna kawngah pawh Chinna (Potent) a thlen thei a ni.

    He ti khawpa Hlo hlauhawm a nih vang hian ram tam takah chuan hman khap (Banned) alo ni tawh a, kan ram Developing country ah hian khap ala ni ve lo thung. Hmun tam takah kan ram ngeiah pawh a tur/Hlo hlauhawmna hre silovin a tlawm avangin kan la hmang zel chu a nia mahse he tur hi food chain ah hian a kal zel a, food chain-a a kual hian a tur hi a chak telh telh (increasing conc) a ni.

    Mihringah Hriatna thazam ( Nerveous system a tibuai thei a, Sava ah chuan an tui kawr a ti pan a chu chuan an tui ti puitlin (mature) lovin Nungcha rem hlauhawm an lo nih phah thin.

    Ka ngaituah ka ngaihtuah a fimkhur a hun tawh tak meuh he Developing Country ah hian.

    Posted in Health and Lifestyle, Uncategorized | Tagged , | Leave a comment

    MIZO KRISTIAN CULTURE AH ZU KAN SENGLUH A NGAI

    Zu hian Mizo culture-ah hmun pawimawh tak a luah tlat a ni tih chu kan hre tlang theuh awm e.

    Kutni vangthla-ah zu hi chelek a ni thin a. Thangchhuah nikhuaah te, sechhun khuangchawiah te zu an chelek a. Ramchhuah hawnah ‘hah zu’ an zu leh a. Chhungkuaa inho chi ‘zufang’ thleng in kan nei thlap a ni. Kan nun peng hrang hrang ah zu hian hmun pawimawh a luah a, inthawina thleng in hmun pawimawh a chang phak a ni.

    Kristianna in min luhchhuah a, zu that loh thu kan inzirtir mek lai reng pawh hian mizo te nunah zu hian hmun pawimawh a luah tih chu hai rual lohvin a lang reng mai. Thingtlanpa chuan rim taka hna a thawh chuan ‘hah zu’ kan tih thin tunah erawh ‘sil damdawi’ kan tih tak hi kan la thlah theilo phawt chu a nih hi. Mizopa Zu induh miahlo hi an vang khawp mai.

    Kan Bible thuthlung hluiah pawh zu chungchang sawina hi vawi 141 zet a awm a, zep nak emaw, Judate chuan zu hi an chaw rinpui ber pakhat a ni. Inthawina thilhlan zingah leh sawma pakhat Lalpa hmaa eitur zinga tel pha a ni. Zu aia an dah chungnun chu ‘HMANGAIHNA‘ chauh a ni (Hlate Hla 1:24 adt.).

    Zu chu Pathian thilpek anga an ngaih avangin midangte chunga malsawmna thu-ah pawh “Pathian in buh leh zu leh hriak tam tak pe che rawh se,” an ti thin(Gen.27:28).
    Chhang leh zu tlakchham chu Pathian hremna anga ngaih a ni(Deut.28:39;Isa.16:10,24:9).

    Kan mizo kristian culture ah hian engvanga do leh duhlo em em nge kan nih tak mai le.! Kan sengluh thiam hi a hun ve tawh a ni lawm ni.

    Zu in mi kan hmu piangthar lo/vanram kailo tur list-a kan dah zung zung na te, tawngtai pui ngai tlat nia kan hriatna te pawh hi a ziaawm mahna.

    Thuthlung Tharah pawh hmun pawimawh ala chang phak tih a lang reng mai. Inneihna hmun ah pawh lawmpuitute ei tur an chhawp (welcome items) thin zinga mi a ni tih kan hria. Lal Isua ngei pawh khan zu kha a pawm ve tho a nih hmel. Kanaa-khuaa inneihnaa a tihpun pawh kha ‘A FIR, TUI PAWLH LOH’ ngat a nih ka ring.

    Paula pawhin Timothea hnenah, “Tui chauh in mi ni tawh suh la, i pum avangin Zu tlem tlem in thin ang che,” tiin a hrilh kha. Samari mi tha pawhin suamhmang tawktu hliamah zu a leih/hnawih tih kan hmu bawk(Lk.10:34).’

    Zu hi in sup sup ila, kan rawngbawltu te nen rui huai huai ang u’ kan ti lova. ‘A in mi chuan a inlo mi hmusit lovin, a inlo pawn a in te hmusit lovin inngeih tlang takin i awm tlang dial dial ang u,’ kan ti mai a ni.

    Kan sorkar te pawh hian ‘vaiho siam’ ngawt hi zuar lovin, hmanlai kan zu neih hrang hrang; Ṭin zu, Zupui, Rakzu leh Zufang te kha zuar ta zawk se, zu thalo avanga thihna thleng thin pawh a ziaawm ang a, phaia kan zu man tam tak kal ral tur ven nan pawh a va tha dawn em.

    A inlo thei tan erawh Zu hi in loh a him ber mai hmel e.

    Author : Lal Vulluaia Sailo

    Posted in Fifth Column | Tagged , , | Leave a comment

    A MANGANTHLÂK TEH ZAWNG A NIH HI! _ Rev Chuauthuama.

    Kumin chu Vànglaini buatsaih ‘Zoram Titi’-ah ka tel ve hman lo a. TV-ah an sawi ho dàn an rawn tihchhuah leh chu ngun takin ka lo ngaithla ve thung a. Tûnah chuan ‘Chakma chungchângah’ thil a lang fiah uar uar ta mai. Pu Lalduhmonan CADC lo pian chhuah dàn bul fûk taka a han sawi chuan mi țhenkhatin dàn loa din an tih ang chiah chu a ni bîk lo tih a lang fiah ta deuh. Mi țhenkhatin an sawi angin Chakma zawng zawng hi kan hnar thei tawh lo tih a chiang a. British hun lai khân Mizo ang chuan an ngai lo tih chu dik bawk mah se, tûnah erawh chuan Mizorama awm, India khua leh tuia chhiar loh theih loh an awm ta tlat si. Hênghote hi chu Mizoram ațanga nawr chhuah pawh tum ila kan thei tawh dâwn lo a ni ang. Dàn loa lo lût hnawh chhuah leh lo lût leh zêl tûr dan hi chu sawrkar chak tak kan neih chuan tih theih a ni ang.

    Thil pakhat lang chiang ta viau chu CADC-a hnathawk, a kipui chelhtu eng emaw zât chu Mizoram Chakma ni loin hmun dang ațanga lo kal an ni tih hi a ni. Tripura leh a chheh vêl hnaivai ațanga lo kalte chu eng emaw zâwng tak chuan hriat thiam theih deuh a la ni a. Amaherawhchu, eng emaw zât chu Arunachal Pradesh ațanga lo kal an ni tih hian rilru a khawih dàn a dang zar mai! Arunachal Pradesh-a Chakma-te khu kum 1964-a Mizoram kal tlanga Bangladesh refugee-te kha an ni a. Arunachal Pradesh-in anniho chu khua leh tui nihna pêk pawh an la duh miah lohte chuan Mizoramah nuamsa takin CADC hnuaiah hna an rawn thawk a. Anniho chu Mizoram tân hlîng lian tak an ni ringawt reng mai dâwn tihna a ni. Keini hi zawng duap kan kai leh țhin dâwn zawng a nih ber hi; kan sawrkar hotuten CADC-ah eng mah kan ti thei lo an ti leh pek ang chu!

    Hmân ni lawk khân Mizoram CM hian thil pakhat sawi dik fû a nei ve tlat mai! Chakma chungchâng a sawinaah khân ‘Mizote hi ramri hrûlah kan awm duh si lo’ a tih kha a dik ve tlat! Amaherawhchu, hei chen sawrkar an hruai tawh a, ramri hrûla awmna tlákin development an thlentîr si lo hi sawrkarna chelh tawhte zawng zawng thiam loh a ni. State kan nih hnûah kum 30 a liam tawh a; kum 30 chhûnga sawrkarna chelhtute kha MNF an ni emaw, Congress an ni emaw heti taka ram hmasâwnna lama hnûhma an nei chhe lutuk hi an thiam lo ve ve a ni. Mizoram dung leh vãng hi kum 30 chhûng khân sawrkarin kawngpui țha siamin inkal pawhtîr chek chuk sela. Mihring mamawh thil dang, kâwlphetha, tui, ei leh bàrah intodelhin min siam bawk sela. Mizoram khawi hmunah pawh awm a hrehawm lutuk lo ang.

    Amaherawhchu, sawrkar awm tawhte khân chutiang hmasâwnna chu min thlensak loh avàngin ramri hrûlah kan awm peih lo a, Aizâwl khawpuiah hian leng leh leng loin kan inêk beng a. Khàm leh kawr kam ram chhe bakbahai thlengin in hmunah Revenue Department-in an sem ral zo bawk a. Kawngpui leh kawngpui inkâr zingzum tak ngial pawh an zuah duh lo. Tlângram âwihtlân, leilung nghet bawk si lo chu lai chatin in rit leh lian pui pui kan sa a. Fûr ruahtui a tlák nasat deuh chuan kan in a chim chhe palh ang tih hlau hlawpin kan awm phah leh lawi si. Kan in sak dànah tui chhe paihna kan siam țha tâwk lo a; khawpui plan mûmal kan nei bawk hek lo a; kum tin leimin avàngin kan buai ta a nih hi. Kan la buai zêl dâwn chauh pawh a ni ang.

    Mizoram ramri hrûl tihhmasâwn hi eng sawrkar pawhin ngaih pawimawh hmasakah neih tawh sela. Chutianga an develop hnu pawha kan chêng duh lo a nih chuan sawrkar thiam loh ni loin mipui thiam loh a ni tawh ang. Tûnah hi chuan ramri hrûla awm hmun bêngbel tûr chuan inkal pawhna kawng awm țha si lo, mihring mamawh thil dang—kâwlphetha, tui, ei leh bàr lamah harsa bawk si, awm ngaihna a awm ngang lo. Ramri hrûl chu sawi loh, Aizâwl khawpui leh a chheh vêl leh National Highway thlengin kuminah phei chuan zin hleih theih loh khawpin kawng a chhe vêl vek si. Ruahtui tlâk tam kan chhuanlam a; kan thlang lawk Khasi ram, keini rama aia ruahtui tlák tamna ramah kawngpui a mâm hen hun lawi si. Èm ding thei pawh tah thiam lo Khasi pawh kan sawrkar hruaituten an tluk lo a nih ber hi! Kawng an siam hian fur khat pawh a daih lo. A siamtu Department hotu—engineer-te pawh hi dem loh theih an ni lo. An zirnaah chuan first class first/gold medalist an awm fur a; a taka an thawhnaah hian an first class hlei thei lo chu a nih ber hi!

    Kum 30 zet hetianga min lo chingtute hi engti angin nge kan ngaih? Nakkum 2018-ah MLA kan thlang leh dâwn a. Tute nge kan thlan ang? Tû party nge kan vote leh hlawm ang le? Mizote hi kan mak angreng khawp a, mahni party-ah hian an nghet țhâm hlawm a. Tûn hma Mizo Union vànglaia an fiamthu, “Uțawk pawh kan party chuan candidate se, ka vote ang” an tih ang deuh tak tak kha kan ni ta hlawm em maw ni tih mai tùr kan ni.

    Tlang takin, dimdâwihna nei lo leh a ruh lang thlîng baw hawkin sawi ta ila. MNF sawrkar kum 10 kan hrawn tawh a, ram ropui min thlen thei lo tih chu kan hre vek. Tûnah kum 10 deuhthâw Congress kan hrawn leh tawh a, ram hmasâwnna min thlensak thei bîk chuang lo. An hotu ber berte ṭawngkam an thiam hlei deuh tih mai chauh a ni! Kumin phei chu kawng chhe lutuk avànga SUMO/Bus service theih lohna a awm țeuh hi; chu chang a ni hlei nêm, hmun hrang hrangah YMA, khawtlâng leh kohhran thlengin kawng chhe siamin an hnatlâng luih luih mai a nih hi. Hetiang taka kawng chhe siama hnatlâng țhin hi ram dang awm ve tak maw? Sawrkar hotute lah hian an mualphonaah an ngai lo a nih hmèl si!

    Kum 2018 inthlan lo awm tûrah hian tute nge kan thlan ang? Rilruin âr bo a zawng. MNF lah an chêt dàn kan hre tawh a. Tûna an leadership hi an inthlák danglam fê a nih loh chuan rin ngam an ni tawh si lo. An hotu lawkten mipui rin an kai tawh lo a; ṭhangthar mi țha hruaitu atân vawrh chhuah tùr an nei thei ang em? Mi thar remhria, mi dik, sakhaw mi, a ngaihna hria, hna thawk tak tak thei tûr ‘hero’ atân vawrh chhuah tûr an neih loh chuan sawrkar siam leh thei pawh ni teh ta rêng se, eng teh-ual min thlen leh chuang lo ang.

    Congress-ho lah kum 9 kan hrawn leh chhûng hian an chêt dàn kan hria a. Ram hmasâwnna tak tak thlen tûrin an hruaitu rilruin a phâk lo a, an thawk thiam bawk hek lo. An dinchanna tûr chuan politics tlâwm (cheap politics) khelh chu an thiam thlâwt; ram tihmasâwn tûr erawh chuan beisei bo an ni. An hotupa ber pawhin “Keini zawng Zàrkawt tlangvâl, mi thiam lo kan ni a!” a ti fo a; mi thiam zâwkte kutah sawrkarna a hlân phal dèr si lo. Anni hi ‘cheap politics’ an thiam avàngin sawrkar an siam leh a nih pawhin ram hmasâwnna tak tak chu min thlen chuang lo ang. Anmahni an lian tual tual ang a; mipui erawh kan tê tual tual thung ang.

    Hetiang boruak kârah hian Third Front chak tak lo ding thei sela chuan a ziaawm deuh mai thei. Chutiang Third Front beisei tùr chu kan nei ang em? ‘Zoram thar’ tih angreng, mipui hìp tuma sakhuana nèna politics chawhpawlhteho lah hi ram hnukpui hruai tùra rin ngam chi an ni lo. Zoram Peoples Movement (ZPM) hi ințhui khâwm țha thei sela, thil duhawm tak a ni ang. Anni pawh hian ‘hero’ tûr an mamawh a ni. Mahni hmasialna nei loin tu ber emaw hi ‘hero’ ah chher thiam sela. Tûnah chuan mi tam takin thlìr berah an neih niin a lang. Amaherawhchu ‘hero’ an siam thiam loh chuan lehlamah party pahnih, nghet taka inphun tawhte inhungna țhiatsak hi thil harsa a nih hmêl hle.

    Mipui mawlh mai hi kan mak a nih hi. Mizoram siam țha tûr chuan mipuiin mawh kan phur nasa hle. Mipui hi kan rinawm a ngai; kan Kristianna hian kan nun a hneh thlâwt lo; kan rinawm phah lo. Inthlan hun a lo thleng leh mah ná ang a, ‘candidate-ten damlo kanna, ration lákna, ui sa man tùr’ tih angreng atân pawisa semin iptê-ah an rawn zen rek rek ang a, chêng sâng hnih khata lei mai mai theih an awm leh țeuh lo ang tih tu nge sawi thei? A zual zawpui vaihlenhlo tih ang maiin hmasâwnna thlen thei lo tûr sawrkar bawk thlan tlin leh mai a va hlauhawm tak êm! A manganthlák teh zawng a nih hi!

    Dated 21.10.2017

    Posted in Uncategorized | Leave a comment

    Aizawl khawpui hmun hrang hranga tuihawk luankawr leh kawngpui sira luankawr siamna tur project cheng vaibelchhe 57 senna tur kalpui

    Aizawl khawpui hmun hrang hranga tui hawk luankawr leh kawngpui sira luankawr siamna tur project cheng vaibelchhe 57 senna tur kalpui mek a ni.

    Sorkar thuchhuahin a tarlan danin Sorkar Laipuiin Atal Mission for Rejuvenation and Urban Transformation (AMRUT) a duan hmangin khawpui tih changtlunna leh hmasawnna hna hrang hrang kalpui mek a ni a.

    Hmasawnna kalpui zingah hian tuihawk luankawr siam hi ngaih pawimawh zinga tel a ni a. Aizawlah hian tuihawk luankawr a la ṭhat mumal loh avangin kum tin furah harsatna nasa tak mipuiin an tawk thin a, in leh lo tam takte a chhiain, nunna hialte chanphah te pawh an awm thin. Chumi pumpelh nan chuan cheng vaibelchhe 57 senna tur ruahmanna kalpui a ni a. Tunah hian Cheng nuai 238 leh sing 9 man thawh zawh tawh a ni a, a bak hi pawisa thlen leh huna thawh zawm tura ruahmansa vek a ni.

    AMRUT hian a tum ber chu khawpuia chengte khawsak alo awlsam a, khawpui hrisel leh changkang zawk siam ani. AMRUT chuan a hmasa berin khawpui a cheng mipuiten tui thianghlim herh haw mai theih an nei ngei tur a ni a. Ek leh thlite thianghlim taka sawngbawl tur a ni a tih bakah tui hawk luan kawr tha te pollution siam lo mipui veivahna him leh tha (Non Motorised Transport), in tawllenna hmun park leh greenspaces te, naupangte intih hlimna hmun nuam siam te a ngai pawimawh em a em a ni.

    Mizoram ah chuan UD&PA Department-in khawpui hmasawnna project hrang hrang state annual plan tha tak siam chhuakin hna chak taka thawh zui a ni. Aizawl tui pekna na tuidawt lian hlui tawh tak tak te siam that hna cheng vaibelchhe 20 dawn lai man chu chak taka thawh mek a nih thu sorkar thuchhuah chuan a sawi a. Aizawl khawpui tuia chawm tu pakhat Greater Aizawl Water Supply Scheme Phase I hi November 1988 atanga hman tan ani a, AMRUT hnuaiah tui pump chhohna lian ber a thar a thlak vek tur a ni. Tui thlitfimna in pawh siam that a ni a, duty room leh WT room zawng zawng a thara sak that leh vek niin nitina tui pump thin pawh litre nuai 80 velah a chhoh thuai beisei a ni.

    AMRUT hnuaiah hian Septic Tank tha tawk lo leh soak pit mumal loh vanga rimchhia tih reh tuma hmalak niin DRDO Scientist te hmuh chhuah Bio Digester Technology chu hman tangkai a nih thuai theihna’n chak takin hmalak mek a ni.
    (DIPR)

    Posted in Uncategorized | Leave a comment