MAFAA LEH REVD CHUAUA BAWK HI

MAFAA LEH REVD CHUAUA BAWK HI
Apuia Tochhawng

England ram Prime Minister Winston Churchill kha zu in nasa em em mai a ni a, mahse Prime Minister a ni a, a chungchang an comment dan pawh Prime Minister ni ve si zu heh an ti ngai lo, zu a in nasat tehlul nen Prime Minister tha ber pawl a ni thei an ti daih thung.

Khawvela lehkhabu chul thei tawh lo tur Dr. Faustus ziak tu Christopher Marlowe pawh hian zu a in nasa khawp mai. Mahse English ho chuan a zu in nasat zia sawi ta lo chuan khatiang khawpa zu in nasa si kha William Shakespeare chher chhuaktu an ti daih nia!

Hellen Keller kha mitdel bengngawng a ni. Khawvel hmeichhe zinga ropui ber pawl zinga mi a ni a, a tlin lohna lam aiin a talent haichhuah sak kha hnampui ho en zawk a ni.

John F. Kennedy kha nula duh ve tak a ni a, mahse a chungchang mawi lo lai hi American ho hian an sawi ngai reng reng lo. President ropui ber te zinga mi ah an chhiar thin.

JF Laldailova khan Bible thlirna a ziak a, kan puithiam rual ten Jfa zu in mi mai mai an tih khum duh a!

Kan miril, zofate William Shakespeare ni awm fahrana mawi hi a boral a, a mitmu em pawh a keh hmaa heti tak maia a buan hneh loh zu han tih khum tak sak sak mai hi a va tul berrr lo em!

Central YMA Hall a lehkhabu tlangzarhnaa Mafaa thusawi rei deuh hlek kaihtawih tir a nih thu a sawi chhuak kher te kha enge a tulna?

Mafaa ngaisangtute hian kan hriatthiam loh em em chu Mizote society ah hian mitthi tawh hnu chu an chanchin chhe lai sawi hi kan hreh thin. Vuitu Pastor leh upa te pawh hian an ruang chungah mawi hnai takin an chungchang thu an sawi thin a ni ngai a, chuti a nih mek laia Mizoram chanchinbu lian bera Mafaa a vawithum hmuhnaa Mafaa chet chhiat dan a sawi chhuak fak duh te, a buan hneh loh zu a han ti duh mai leh a natna hi natna dang pawh nise zu vang a ni han tih mai te, vanramah chawltui ningzu a awm tawh lo ang tia Mafaa a thlah dan hi a va pastor tawngkam lo em aw!

Pu Chuaua hian Mafaa zu in hi a sawi chhuak malh malh viau mai hi a timing lo em em a, mitthi tawh hnu vawm nan chuan amah ngaisangtute tan hian a na lutuk!

Mafaa hian zu a in ve thin chunga mizote idol a ni thei hi a ropui a, mi pakhat ve tak zawng a ni ti tein han sawi lang ta zawk se chuan kan la ngaidam thei zawk mahna.

Aside | Posted on by | Leave a comment

Hill of crosses

HILL OF CROSSES † [Kros Phunna Tlang by Opeey-a Khiangte

Roman Catholic-ho hmun pawimawh tak leh thinlung kuai bertu hmun niin, Lithuania rama awm a ni a. an thinlung a hneh em em a, History-a hrehawm an tawrhna leh an chhungte lo tawrh nasatzia thlenga hriatchhuahtirtu a ni bawk.

Lithuania ram official name chu Republic of Lithuania tih a ni a, Northern Europe-a awm a ni a, Baltic states 3 zinga 1 a ni. Baltic Sea chhimchhak lama awm a ni a, chhak lamah Sweden leh Denmark a awm a. hmar lamah Latvia a ri bawk a, chhak leh chhimah Belarus a awm a, chhim lamah tho hian Polandt a awm a ni. Lithuania-ah hian, kum 2013-a chhut danin, mihring maktaduai 3 an awm a, a khawpui ber (capital) leh khawpui lian ber ni bawk chu Vilnius a ni. Lithuanians-ho hi Baltic mi an ni. official language an hman chu: Lithuanian leh Latvian a ni.

Hill of Crosses hi pilgrimage site a ni a,Lithuania hmar lama Siauliai khawpui atanga hmar lam 12 km vela awm a ni. Hetia tlangchhipa Cross (Kros) an dah vak chhan bul ber hi hriatchian a ni tawh lo va, mahse, Kum 1831-a helna a chhuah hnu khan, Cross hmasa ber berte chu former Jurgaičiai/Domantai hill fort-ah dah nia rin a ni. Kum za tel a liam hnuin, Cross chauh ni tawh lovin, Khenbeh lai lem, Lithuanian patriots te lem ker, Virgin Mary Lim leh milim (statue) tenau te te leh thi (rosaries) sangtel chu Catholic pilgrims-te’n an dah ta thin a ni. Cross awm zat chiah hi hriat a ni lo va, mahse, an chhut danin, Kum 1990 khan 55,000 vel a awm a. kum 2006 khan 100,000 lai a tling ta thung a ni.

Kum za tel a vei chuan, he hmun hi, harsatna leh hrehawmna nasa tak paltlanga Lithuanian Catholicism-in muanna a neih entirna a lo ni ta a. Kum 1795-a 3rd partition of the Polish–Lithuanian Commonwealth a nih hnuin, Lithuania chu Russian Lalram (Empire)-ah a bet ta a. Poles leh Lithuanians-ho chuan, kum 1831 leh 1863 inkar khan zalenna sualin, Russian thuneihna chu an beilet ve nasa hle naa, an hlawhchham leh ta a. Tichuan, Heng ram pahnihte helna hi “Hill of Cross” bul intanna a lo ni ta a ni: indonaa an chhungte ruang an hlawm theih tak si loh avangin, an chhungte ruang aiawhtu atan leh, an chhungte ram tana boraltate hriatreng nan Cross chu Tlang (hill fort) an han dah ta thin a ni.

Kum 1918-a Eastern Europe ram inrelbawlna hmasa (old political structure) a phel takah chuan, Lithuania chuan independence a puang leh ta a. Hetih lai hian, “Hill of Crosses” hi Lithuanians-ho chuan, Muanna dila tawngtaina, ram tana tawngtaina, Zalenna sual kawnga indonaa an chhungte fam tate tana tawngtaina hmunah an hmang chho tan ta a ni. Tun hnai mai khan, Kum 1944–1990 vela Russia-in Lithuania a awpbehna chhinchhiahna hmun atan hman a ni bawk. Lithuanians-ho hian an ram hlutzia, an sakhua hlutzia leh heritage hlutzia tichiangtu berah an hmang bawk. Soviets (Russians)-ho chuan vawi 3 lai Cross duh lovin, bulldozer-in an nawr chiam a. Mahse, a chuai thei tak tak lo va, an tuaithar leh ta zel a ni. He hmun bula awm Kulvė River-ah chuan Dam (Tuikhuah) siam tumna a awm tih thuthang a awm a. An siam tak tak a nih chuan, Dam hian he hmun hi a chimpil ang a titawp dawn tihna a ni. September 7, 1993 khan, Pope John Paul II chuan Hill of Crosses hi a tlawh a, Beiseina, muanna, hmangaihna, inpekna hmun tiin a puang a ni.

Kum 2000 khan, Franciscan hermitage pawh a bul lawkah siam a ni a ni. He tlang tuma ta bik a ni lo va, a duh apiangin, tha an tih ang takin Cross an han siam zel thei thin a ni.

Pope John Paul II hi a hming tak chu Karol Józef Wojtyła a ni a, Ni 18 May 1920 khan a lo piang a. Ni 2 April 2005 khan kum 85 mi niin a thi ta a ni. Roman Catholic priest, bishop, leh Cardinal te niin, a hnuah, Pope dinhmun a luah ve ta a. second Papal conclave of 1978 chuan Pope-ah an thlang a ni.

Thenkhat chuan Hill of Crosses-ah hian Cross 100 000 vel awmin an sawi a. Tourist-te’n an ngai pawimawh thin hle a, tlawh ngei an tum hram thin a, khawvel hmun hmingthang leh lungchhiatthlak tak hmun a ni a. 20th century vel daih tawh atang khan hriat a hlawh em em thin a ni. mi tam takin an tlawh thin a, inkhawm hunserh leh ruai hun hman nante an hmang thin bawk.

YouTube lama en duh te ta’n link..

(opeey1khiangte7@g‌mail.‌com)

★★★

Aside | Posted on by | Leave a comment

CAMBODIAN WEDDING CEREMONY A BONRA!!

Jan 6, 2019 Sunday, Phnom Penh City-Cambodia:

“Cambodian” ho kan tih hian mipui 15.5million a 86% chu Khmer hnam an ni a, tribal hnam 10 vel leh Chinese thlah pawlh sing 8 veo, Vietnamese nuai chuang fe, Cham muslim nuai 7 chuang an an ni. Tuna video a kan hmuh mek hi Khmer Tradition Wedding Ceremony a ni a, kei pawh Pastor Sueoy Lak te fapa nupui neihnaah Sunday hian min sawm angin ka tel pui ve a ni.

AN INNEIH DAN: Kristiante zingah pawh hmankhawsanga an pipute lo chin dan angin, an culture & tradition chu an la urhsun hle a, chaweinaah chuan zu/beer/cold drink etc chi hrang hrang an chhawp nasa hle thin. Tun hma chuan an inneihna hi Mizote angin ni 3 chhung a ni a, Mizoten “lawi that zan” tia zan 3naa inhruai ang chi kha niin alang. Tunah erawh chuan an inneih hi ni khat chauh a ni tawh a, mahse, zing dar 6am-10pm inkar a awh tlangpui thin.

Zingah mipa lam chhungten hmeichhe in lam chu tlar 2 a insiamin, inchei nalh em emin thei chi hrang hrang kuta ken tur kengin an pan a, monu in kawtah inchei vul chuka lo awmin, gate ah chuan mopa leh monu thlalak lo tarin, mopa leh a nupui turin min lo dawngsawng a, gate chu nalh taka cheiin a colorful hle tur niin, a ding leh veilamah chuan balhla rah bu tha tak, gold or silver color a chei chu a kung chawpin an lo phun/dah tur a ni.

An inneih tak tak hmain “inhualna” hun an nei a, an inhual atanga kum 1 chhungin an innei tlangpui a, an inhual tawh hnuin nupa ang deuh pawhin an khawsa thei tawh a, hmeichhe inah mipa chu an cheng zui tlangpui bawk.

Zing dar 6-zan 10pm chhungin an hnam incheina colorful zet zetin an inchei tur a ni a, chung thawmhnaw chu fashion store a mi hawhin, ni khatah vawi 6-10 inkar an inthlak bawk thin! An sawngbawl dan hi a hau takin mopa leh monuten an nu leh pate ve ve chu chhungkhatah an insiam tih entirnan an ke an sil sak a, mopa leh monu chu an sam chu inneih tirtupain peh an chhungten chep/cut in an chawhpawlh vel thin a, tin, holy-water an tih ang te theh thet thetin, an banrekah malsawmna (blessing) tiin hruisen lazaia siam chu an suih thin bawk.

Inneihna a tel tura sawmna card dawng tawhte chu an hming chhinchhiah vek niin, tlaia chawhlui kil zawhah invitation card ah chuan pawisa pekna tur envolope awm sain, chutah chuan hming ziakin kan hming chu chhinchhiah tir leh thlip thlep tur a ni. Hetianga ei leh in man ti mai ang, chhinchhiahtute hi an lo awm thlap zel thin! Tun anglaiah chuan village ah US$15-25 an inpe a, City ah erawh US$25-50-100 an inpek dan tlangpui a ni. Mo lawm tura sawm eitur an kilpui hi an ti ropui dangdai thei hle a, Lal Solomona chokaa chawhlui kil ang maiin, ei tur sa vel hi an siam chikim thawkhat viau. Mo lawmna chawei man/tanpuina atangin an senso US$7000-20,000 iniarte chu hmu let te leh hmu let lemlote pawh an awm niin an sawi. Mo lawmpuitute han an inneih senso tam tak hi an cover sak a ni ber awm e. A then chuan hlep neiin an sawi bawk!

Zan tlaia dinner kil turte chu Hollywood red-carpet inbuatsaih angin inchei nalh hle tur a ni a, naupang chhangchhe lutuk an awm ngai tawh lo. Mopa leh monu chuan gate ah khan lo dawngsawngin thilpek (gift) an lo pe zel a, chawei laiin mite chu chibai an buk kualin an kal kual thin a, chawei laiin zaithiam rawih (mi 5-10)velin live music nen min awi reng a! Dinner ei chu 9pm vela a zawh chuan zing lama thei chi hrang hrang an ken khawm kha a laiah dahin an insemin, a duh duhin ei theih a ni tawh thin bawk. A duh chu live-musc leh zai remin phai khai vawrin laichhuat chhirin zan an tum tawi ta thin a ni! Tlaiah hian Celeb ho ang maiin western ho lifestyle entawnin, evening gown rawn hain, ram lum, thlasik neilo, Dec-Jan thlaah pawh 30-32degree, Theihai rah leh par vul chiam thinna a nih avangin, an hmeichhate pawh sexy dress thei viau. Globalzation chuan mixed cultures chu loh theih lovin, keini Zofate ang maiin a zir luih tir nasa hle a ni. Danglam mek khawvel chuan MTV culture leh Gen X chu a thawt vir kual tir nasa hle. Hnam tin culture chu a chhem nghing luih luih a ni ber mai e.

Khmer culture ah han Hindunization hmuh tur a tam hle a, an hawrawp pawh Sankrit/Pali atanga lak niin, an tawng erawh Mon-Khmer, Austria-Asiatic Language Family niin, verb hmasa chut chi kha a ni. Hmeichhain aw tih nan “cha or ja” an ti a, mipain “bha” an ti daih! An hmeichhiate an “cha/ja” no nalh thei hle thin! Cambodia ah i lo kal chuan “Hospital Civil” ti chut ang che! Tichuan an hrethiam em em dawn che a ni, aw ka Unau. Ka hmangaih che-Knyom Srolanh nyah, Isua a hmangaih che-Preah Jesu Sroland nyah, Pathianin malsawm che rawh se-Preah Oung Protin Pou!, Ka lawm lutuk e-Orkun charan…

An inneih ni hian nasa thei ang berin pitar putar tel te pawh an inchei tur niin, make-up hi an uar thiam viau! Kan hmel hriat te pawh kan hai phah fo thin! An inneihna hautak ngaihtuahin, inthen leh mai mai erawh an awlsam phian lawi si. Kristiante zingah pawh kum zabi 9-11 inkara an Buddhist sakhua nena inzul (background of Buddhism)a, an culture angin inneih an uar hle a ni.

(Hei hi a tlangpui a ni e-CT. Lalrinawma)

Aside | Posted on by | Leave a comment

KHAWCHHAK LAMAH PU MAFAA SUNNA HUN HMANG

Prof. J. Khuma leh Academic lama a thian tha thenkhat, Pu Mafaa ngaisangtu, a suangtuahna bu zawla luang liamten, kan then tak H. Lalrinfela (Mafaa Hauhnar) an uizia lantirna leh sunna chu Tahan, Kalaymyo khawpuia Hotel changkangah January 5, 2019 (8:00pm-10:00pm) khan hman a ni.

He programah hian Sir Zuia’n Literature huanga Pu Mafaa danglam biknate sawiin an ngaihsanna zawn leh an hmelhriat dan theuh sawihova hun hman a ni a. Khawchhak lama ziak mi-a an chhuan em em, Prof. J.Khuma leh Lecturer Lalthuamliana-ten Pu Mafaa an uizia ziaka auchhuahpuiin hlahril mawi takte an chham chhuak bawk a ni.

Khawchhak lama a thuziak lo chhim phak leh a kamchhuak lo dawngsawng tawhtute chuan Pu Mafaa Hauhnar hi a bikna zawnah tu dang nen maha “versus” khin rual a ni lo tih leh a buan zawh loh thil nia an sawi rik lam aiin a buan chakna lam zawk — Zofate thuhla ril min hnutchhiahna leh, Kohhran lama a inhman leh hman loh lam ai pawhin Mizo Literature huanga min Kohharhna zawk hian hriatreng a la hlawh ang a, hun lo taka min kalsan ta mai erawh hi chu kan sunin kan ui tak zet a ni, tih an lantir.

Aside | Posted on by | Leave a comment

ISU KA THLA HMANGAIHTU

Pastor Charles Wesley-a hla
ISU KA THLA HMANGAIHTU
Jesus, Lover of my Soul

Chang innghahna
“Chutichuan, Lalpa chu hnehchhiahna tuarte tan kulhbing sang a lo ni ang a;
Mangan hunahte chuan kulhbing sang a lo ni ang,” Sam 9 : 9

He hla țha leh sak hlawh tak phuahtu hi Pathian thu sawitu lar tak Pastor Chales Wesley-a (1707 – 1788) phuah a ni a. Epwoth, Lincolnshire, England-a piang a ni. A chanchin chu post hmasa lamah te kan sawi tawh a, sawi tawh lo mai ila.

Hla thlük thum nei : He hla Isu, ka thla hmangaihtu tih hla hi thluk thum neia siam a ni a. Thluk 1-na Hollingside hi Dr. J.B. Dykes-a (1823 – 1876) siam a ni a, a hla thluk siam No. 28-naah tarlan a ni. A thluk pahnihna Aberystwyth erawh chu Dr J. Parry (1841 – 1903) siam a ni. A thluk pathumna Martin tia an vuah erawh chu Simron B. Marsh-a (1798 – 1875) siam a ni thung.

Hla lãr țan dan : He hla hi Charles Wesley-a’n a phuah zawhah a u John Wesley-a a pe a, ani erawh chuan “Hla lung tichhia,” tiin a lo hnawl a, Charles Wesley-a thih hnuah chauh he hla hi vantlang sak tura tihchhuah a ni.

Hla lo pian dan : He hla Charles Wesley-an a phuah dan an sawi chu United States of America-ah rawngbawlin an kal a, an rawngbawlna chu an hlawhchham hle a, kum 1736-ah England ramah an kir leh a. Chutia beidawng taka an kir lai chuan tuipuiah thli natakin a nuai a, an nunna pawh chân ngei turah an inngai hial a ni. He thlipui hi a na hle a, tuipui sava hlau pawh Charles Wesley-a lawng pindanah hian humhimna beiseiin a rawn thlawk lut tawp a ni an ti. Chutianga thi ngri tura an inngaih lai chuan a tawp a tawpah December 3, 1736 khan an lawng chuan vaukam a thleng ta hlawl mai a. Charles Wesley-a chuan, “Ka țhingțhi nghal rawk a, Pathian hnenah lawmthu sawiin ka țawngțai nghal a. ‘Ka thih hun ni thleng pawhin ka Lalpa, min hruai zel rawh’ tiin. Pathian kut avang liau liaua dam khaw chhuak thei kan nihzia ka hre chiang a, tichuan he hla hi ka phuah ta a ni,” tiin a chanchin a ziak a ni. He thil thleng hi Charles Wesley-a tan chuan thuchah ropui tak a ni. Savate chuan fing taka amah an rawn bel ang khan amah pawh a him theihna hmun chu Isua Krista a ni tih ngaihtuahin he hla ropuibtak hi a phuah ta a ni.

He hla sak vanga kahhlum pumpelh :

Kum 1881 nipui lai khan tlai khat chu Washington ațanga Potamac rawn zawhin țhianho hi meilawngah an chuang a, an zinga pakhat chu aw țha tak mai niin he hla “Isu, ka thla hmangaihtu” tih hla hi a sa a, chang hnihna a sak zawh chuan an meilawng lehlama mikhual pakhat chuan a rawn pan a, “Ka pu, min ngaidam la, tun hnai indo hnuhnung khan do pawlah i țang em?” tiin rawn zawt chawt mai a. Ani chuan, “Țang e, General Grant-a hovah khan ka tel asin ” a ti a. Mikhual chuan, “E, kei chhim lama țang zingah khan ka tel a, kum sawm leh pariat lai chu a lo liam ta der mai, tun thla, vawiin ni ang hun takah hian zan thla eng hnuaiah i bul lawkah khan ka awm a, nang chu duty-in i awm a, ka rifle-a kah hlum ngei che tumin ka veh che a, amaherawhchu, chutianga santiri-a i awm chu zawi te te hian, “Isu, ka thla hmangaihtu,” tih hla i sak ri hi ka hre thei a. Kahhlum che tuma ka silai hmeh perna ka hmeh dawn lai takin,

Cover my defenceless head
With the shadow of Thy wing

tih hla i sa a (Hei hi chang hnihna tawp tlar hnihna a ni a, Mizo țawnga lehlin nen hian a inzul chiah lo deuh a, a Sapțawng hian ka rawn dah ta mai a ni). Ka silai cheng chu ka hmet puak thei ta reng reng lo mai a ni. Kan inhnaih chilh bawk a, hmet puak thei ilang chuan ka vawi khat kahnaah che i thi chiang hle ang. Amaherawhchu, ka kut zungchal chu a zawi tak tlat si ah chuan in camp chu kan rawn bei ta lo a ni,” a ti a. Hla satu chuan, “Khami zan kha ka hre chiang khawp mai, in lam leh țhenrualte ka ngaihtuah a, Pathianin min veng ang tih ringin ka riltua hla awm, “Isu, ka thla hmangaihtu” tih kha ka sa ta a nih kha. Ka țawngțaina chu chhan a ni tih tunah chauh hian ka hre ta” a ti ani an ti.

Mizo țawnga letlingtu :

He hla hi hla țha leh lar tak, mangan leh lungaih laia ringtute Lalpa au va an inhnemna leh țawngțaina hla țha tak a ni. Isua chu hmangaih tur a nihzia leh a duhawmzia he hla hian a tilang hle a ni. He hla thiam leh mawi taka letlingtu chu Khianga (1888 – 1957) a ni.

Hla thu

  1. Isu, ka thla hmangaihtu,
    I hnenah min hruai zel rawh;
    Thlemna a lo hnaih laiin,
    Nangin min chawisang langin.
    Ka Chhandamtu, min hruai la,
    Chatuan hmunah min thlen la;
    Thlemnaah min humhimn rawh,
    Nangin ka thlarau nei rawh.
  2. Ka Chhandamtu ber i ni,
    Ka thlarau Tlantu i ni;
    Aw Isu, min kalsan suh,
    Min tungdingin min pui rawh.
    Nangmah chauh ring thei turin,
    Ka thih hun ni thleng pawhin;
    Ka Lalpa min hruai zel rawh,
    I vanram min thlentir rawh.

  3. Aw Isu, i hnenah chauh,
    Ka duh zawng zawng ka hmu ta;
    Chau leh tlute tungdingin,
    Mitdel damlo tidam la.
    Mi tak leh thianghlim i ni,
    Kei erawh bawlhhlawh ka ni;
    Sual tinrengin min bawm e,
    Nang khawngaihin i khat e.

  4. Ka sual bawlhhlawh khuh turin,
    I khawngaihna a tawk e;
    Tuikhur hlu chu luantir la,
    Chumi chuan min tleng fai rawh.
    Nang tuikhur hlu chu i ni,
    Ka duhtawk mi intir la;
    Ka thinlungah lo put la,
    Chatuan thlengin luang ang che./- bchhangte klsb vthr

Source : Kristian Hlabu Bihchianna
By V.L. Luaha Renthlei.
Synod Bookroom tinah zawrh a ni. A man Rs 400/-

Aside | Posted on by | Leave a comment

Mafaa (Fam) dah hniam tumtu nia lang Rev. Chuauṭhuama hi tu nge?

Mafaa (Fam) dah hniam tumtu nia lang Rev. Chuauṭhuama hi tu nge?
By C.Lalhruaitluanga
[Chhimkun lukawlh]

Ziaktu ropui tih ngam, ṭhangthar ziakmi ten inzir nana an hman hial, ziaktu huaisen, a nihna anga lang ngam, a kum phû loha a hnû hmá upa tak, amah Mafaa Hauhnar (Fam) puala Rev. Chuauṭhuama thu ziak ka lo chhiar a, he kan pastor hian, he thû a ziah lai hian zû a nih loh pawhin eng emaw tal a rui ni ngeiin ka hria.

Mafaa dam lai khan, thu inhmuh loh zeuh zeuh chu an nei ṭhin ngei mai, mi hrang, ngaihdàn hrang nei ve ve an ni miau a, an hmeichhe hmelṭha tihzâwng pawh a inang kher lo vang, mihring ve ve an ni miau a, thil nih dàn phung ve rêng a ni. Khati ang thuartham vel vàng nge? Amah aia Mafaa thû leh hlâ ṭhalaiin an lawm zâwk vàng hriat ni suh!? Chhâng lêt theitu awm tawh lo, mitthi tawhhnu heti anga a’n bei chiam ta mai hian, “Kan pastor Chuauṭhuama lo ropui lem lohzia a tilang chiang viau mai!”

Mafaa thu ziak, hla phuah te kha chhui lêt ila, literature-a tui, a inzirtirte tân phei chuan ‘zirtirh bû ṭha tak’ a ni deuh vek. Ngaihsàn loh theih a ni lo va, a thu ziak leh hlâ hmangin mi dang a tiphûr a, rahbi a tuksak ṭhin.

Kan Rev. Chuauṭhuama hi tu nge a nih ve le? A thu ziak hi a kalphung a dang tehchiam lo va, tu emaw khei fak fak te, ama ngaihdàn dik bera mi dang pawmtir tum te kha a ni deuh ber mai lo maw? Nger lam nei taka thu ziak ṭhin a nihzia lanna pakhat chu chhim lam miril Rev.F.Sangvêla thu ziak, ‘Revolution kan hmabâk’ tih thû a rawn tâwngpâwng thlasik ûm pàrpui aṭang khan a hriat reng. A ziak tam ve ta hrim hrim a, a hming a ri tam ve ta lo thei lo ni berin a lang.

Mafaa vawi thum a hmachhawn tawh thû a sawi a, a damlai khan a ngam ngang si lo va, a awm tâk loh hnu hian chawh tak rawh! tiin, a chilh zui ta tihna a ni ber a, pastor thu ziak atân chuan mak tak a ni, thim thil tihtheihna nena ṭang kawpa Pathian thû tlangaupui ṭhin a ni hial zâwk lo’ng maw? Vawi thum a hmachhawn chhûng lekin, ‘Zû rui’ buai reng anga a puh thlu dâwn dâwn ta mai te hi a nuihzatthlâk hauh loh!

Pu Chuauṭhuama thu ziak hian ṭhatna lai a nei, literature hlutna pawh a paw chhuak tam viau tho mai. Sawi nêp chi chu niin a lang lo, chutih rualin, patla khatah bûk dûn ta ila, a kum tam zâwk Pastor ai hian Mafaa hi a bûk a rit zâwk ngei ang. Literature chu ‘arts’ pakhat a nih angin, a chei mawi leh thuam ṭha peih apiangin chu arts chu hmuhnawm leh ngaihnawm kan ti ṭhin. A chei mawi leh thuam ṭhat kawngah hian Mafaa hi a taima a, lamtual khata lâm ṭheuh ṭheuhah pawh a ke chheh chu kan thlir rawn lo thei bik lo a ni.

Pu Chuauṭhuama hian ṭhangtharte chhui zui châk, ngaihnawm leh hmuhnawm an tih lam hawi zâwng kal khàn thlâk ngam zâwk se, mi dang chhiatna lai thur chhuah emaw, mahni ngaihdàn sahuai thingvawn tlut lovin mi dang ṭhatna lai paupui ngam ta zâwk se, tu’n ai hian a thu vuaithlâk hi a ṭiak ṭha deuh zâwk ngei ang.

Pu Chuauṭhuama nen hian kan inhre lem lo va, a thu ziak erawh ka chhiar ṭhin. Kan inhnaih ber ṭum chu VULMAWI AWARD 2016 Top 6-a kan hming a lanho ṭum kha a ni mai. Kei lah ta pek chu, an kianga ka lang ve kha ropui ka inti êm êm mai leh ta nghal a, heti ang a, Zoram khawvel nghawrnghingtu Mafaa, fak anga lang, a famkim lohna lai nia a hriat sawi vâwng tum deuh reuh sia a rawn râk ta chiam mai hi mak ka ti êm a, ziakmite zinga a tuihnâng lo berin heti ang hian ka’n ti ta ngawt a nih hi!

Amah Mafaa(Fam) ngaihdàn thianglimzia hi…….
Mi kan fak thei lo a nih pawh a, an hming hliauna sawi hrâm kan châk te, kan chawi sâng thei lo a nih pawh a, han hnuh hniam hrâm kan duh te, kan vulh lian thei lo a nih pawh a, han teitêt hrâm kan tum ṭhin te hi chu aw!

Kan mi sawiselte ai mahin keimahni nihna hi kan sawiselna hian a tichiang zawkin ka hria. Mi hming chirhdiaka ka hnuh berh apiang hian chirh kan kai berh tel ve zel tih hriat tur a lo ti dam dap mai zuk nia!

A tu zãwk hi nge rui?
(05.01.2019)

Aside | Posted on by | 1 Comment

MAFAA LEH KEI

MAFAA LEH KEI
(Chawngkhûm dàn tlâng huat loh)

Revd Chuauṭhuama’n Mafaa a hmuh dan.

Kum 2018 Pathianni zîngah chuan dâr 5-ah ka tho a; Puitling Sunday School zirlai awm tawh lo mah se, 1 &2 Chronicles bu pum pui kalhmang sawi tûrin ka inbuatsaih a. Dâr 7 rîk dâwnah chuan WhatsApp-ah Mafâa thih thu ka hmu ta nawlh mai a. Ka hminga WhatsApp group an siamahte pawh chuan “Zualko: Pu H. Lalrinfela (Mafaa), kum 43 chu tûkin zîng dâr 5 khân a boral a, a ruang hi vawiin (Sunday) chawhnu dâr 1-ah Tlângnuam thlànmualah vui a ni ang” tih an rawn târ lang a. WhatsApp group pakhat, Pastor-ho Titina-ah pawh an rawn târ lang a, a uiawm thu an sawi nak nak a, Pastor pakhat chuan, “Mafaa chu zû vànga thi ni mah se, a contribution enin a uiawm hle mai” a rawn ti nghe nghe a. WhatsApp group hrang hrangah pawh Mafaa ui thu an târ lang chuai chuai a. Thu ziah lama thawh hláwk tak, a bîkin nula leh tlangvâl, tleirãwl lam lawm hlawh zâwnga thu chheh leh chei thiam a nih avàngin ui a hlawh zual a ni ang._

Mafaa a kal ta. Mizo hian thih thu sawina ṭawngkam kan ngah khawp mai. Hmànlai zualko ṭawngkam lâr tak pakhat chu, ‘a tlin ta lo’ tih hi a ni. Mitthi sawina ṭawngkam kan neihte chu—thi, hnuk chat, awm ta lo, boral, fam, tlin ta lo, peih ta lo, kal ta, mual liam ta, Lalpa hnênah a châwl ta, kan ṭhen ta, etc. Mi ṭhenkhat chuan ‘boral’ tih hman hi an hreh thar vêl a; mahse ‘boral’ tih hi Mizoin mitthi kan sawina ṭawngkam langsàr ber pâwl a ni a; hman hreh chhan tûr a awm lo. Mafaa pawh a boral ta; a boral kan tih avàng hian a thlarau thlengin a boral kan tihna a ni lo. A thlarau chu a Lalpa hnênah a chàwl ta a ni. Mafaa kha a nunah chuan a famkim hauh lo tih chu tlâng hriat a ni; chak lohna a nei ve. Amah ngei pawhin a sawimawi ṭhin, a loa a awm hleih theih loh ZU kha a natna phèna thil awm lian tak a ni. A thih chhan tak chu natna dang pawh ni se, ZU a buan hneh loh avànga kha natna kha nei a ni ang.

Mafaa nèn hian vàntlâng hriatah inkalhna pahnih kan nei. Vawi khat chu Sângzêla Tlauin ‘talk show’ a buatsaihah ‘ZU’ chungchâng sawi tûr kan ni a; kei chu a khaipa ber pakhat ni tûra sàwm ka ni. Zu zawrh ṭhat leh ṭhat loh thu kan sawi a ni ber. Chmi ṭum chuan Mafaa chu mipui lama ṭhu, min hnialtu nghal tak kha a ni a. Zu zawrh a sawi mawi char char a; min rawn bei nasa khawp mai. A châng chuan mahni inthununna dah ṭhaa min beih dàn khing táwka han tih ve mai a chákawm a; mahse thlarau rah ‘insûmtheihna’ (Gal 5.23) kha ka chang tluan chhuak thei ta hrãm a ni. Khami ṭum kha Mafaa nên mi hmaa kan inhmuh hmasakna ber a ni. A thil sawi dàn kalhmang aṭangin a thluak chu a fing tih a hriat a; sakhaw lamah a ṭha zâwngin hmang se chuan mi chungchuang tak a ni thei ang.

Mafaa nèn kan inkalhna pakhat chu Lalpa Ṭawngṭaina tàwp lam ‘doxology’-a ‘ropùi’ tih chungchâng hi a ni. He thu hian sawi a hlawh viau mai a; ṭhangthar zîngah ‘ropùina’ ti an tam viau a. Kan naupan lai ata chanchinbûah zawhna a awm tawh ṭhin; chutih lai pawh chuan mi hmasate khân ‘ropùina’ ni loin ‘ropùi’ tih tûrin tiin an sawi ṭhin. Chutiang chuan tûn thleng hian kohhran chuan a la kalpui ngar ngar a. Kum 2001-a Synod Executive Committee remtihnaa Officers Meeting-in Lalpa Ṭawngṭaina leh Kohhran Thurin Sàwm folder-a chhut chhuah a siamah pawh khân ‘ropùi’ tih a ni a. Kristian Hla Bu leh Pathian Biak Inkhâwm Hruaina Bu (Revised & Enlarged, 2010) aṭang pawh khân ‘ropùi’ tih zêl a ni.

Hemi chungchânga amah kâwmtu pakhat hnênah Rev. Zaireman, “Tihdanglam in duh chuan kan thih hnûah in rawn tidanglam dâwn nia,” a tih kha ka hre chhuak leh ṭhin. He ‘ropùi’ tih hi abstract noun ‘ropùina’ nèn thil thuhmun a ni lo. Pathian ropùina chu a thil siamah a lang; chutih laiin Pathian zepui pakhat chu ‘ropùi’ hi a ni. Vàn te, arsi te, ni leh thla te, khawvêla thil awmte hi Pathian ropuina tilangtu an ni; Pathian zepui erawh chu ‘ropuina’ ni ngawt loin ‘ropùi’ hi a ni. He thûah hian Mafaa chuan kohhran kalpui dàn hnialin ‘ropuina’ tih duhin mual a liam ta a. Mafaa’n a hriat fuh táwk loh pakhat chu Lalpa Ṭawngṭaina hi hla thu (poetic words)-a dah tih hi a ni. Kristian Hla Bu-ah pawh hian ‘ropùi’ tih a tàwpa ‘na’ tel loa hman a awm nual. Ṭawngkam dang pawh ‘na’ telh àwm tak, ‘na’ tel loa hman a tam mai. Chuvàngin Lalpa Ṭawngṭaina doxology-a ‘ropùi’ tih hi ‘ropuina’ tih kher a ṭûl lo. Pathian zepui pakhat chu ‘ropùi’ hi a ni; a lam dànah ‘ropúi’ tia thlûk sâng loin ropùi’ ti-a thlûk hniam tùr, ‘ropùina’ tiha ‘pùi’ rîk ang hian lam tùr a ni.

Mipui hmaa Mafaa ka hmuh vawi thumna chiang bàng chu Central YMA Hall-a kan ṭhianpa Zaikima lehkhabu ‘Vànawia Zirtîrna’ tihho tlângzarh ṭum khân a ni. Khami ṭum khân Mizoram Chief Minister kha Chief Guest a ni nghe nghe a. Zaikima lehkhabu tlângzarh tûr kha bu khat aia tam a nih avàngin mi hrang hrangin a chanchin an sawi hmasa (preview) zêl a. Chumi ṭum chuan ruat a ni nge ka hre lo, Mafaa chu pawr angreng tak, sakuh thinrim ang maia sam ding deuh sung chung hian a lo ding chhuak ve a; ama tih dàn phung pângngaiin ṭawngkam thluaithlum kîkãwi takin a rawn chham chhuak a. A hmêl a\ang chuan amah thununtu eng emaw ‘in’ a nei tih a hriat khawp mai. A hmanhmawh lêm loh avàngin hun a la rei dâwn ta riau a; chuvàngin titâwi tûra hrilh a ni ta nghe nghe a. Kham lo takin a kai tàwi ta a ni ber.

Mipui hmaa Mafaa ka hmuh vawi lina chiang tak chu nikum November 1–2-a Pachhûnga University College (Mizo Department) & Rev. Zairema Memorial Society (ZMS)-in ‘RECONNECTING Rev. Dr ZAIREMA : AN IN-DEPTH STUDY OF HIS THEOLOGICAL AND PROSE WRITINGS’ a buatsaih ṭum khân a ni hnihnaah a lo lang ve hlawl a. Chumi ṭum chuan hmêl phak deuh luai hian Rev. Zairema a hmuh dàn a ziah chu a rawn chhiar ve a; mahse mi pakhatin minute 15 bák hun hman a rem loh avàngin kaih tàwitîr a ni leh ta a. Chumi ṭuma a thuziah chu a hnûah Vànglaini-ah a rawn chhuah leh ta a nih kha. A ngaihnawm dangdãi khawp mai. Rev. Zairema a ngaihsànzia a ziak thiam hle; a thu chheh dàn ngaina mi tân chuan chhiar nuam tak a ni ang.

Chu zawng chu Mafaa nèn mipui hmaa inhmachhawna kan inhmuh awm chhun a ni. Kei aia kum 29-a naupang záwk Mafaa nèn hian inhmuh tam vak ngaihna a awm lo. Ani chu Aizâwl chhim tàwp lama awm a ni a; kei lah Aizâwl hmàr tàwp lama awm ka ni daih a. Kan thil in duh zâwng a inang lo lehnghâl a; kan sawimawi duh zâwng ni se a hrang daih bawk si. Ani chuan a buan hneh loh ‘ZU’ a sawimawi char char a; kei erawh chuan Mizoram sawrkarin ‘ZU’ a zawrhtîr tirh, March 16, 2015 khân zu zawrh duh loin ka kawtah kâr khat chhûng puan dum ka zâr thung si. Tûna Mizoram sawrkarin an sawi lâwk ang ngeia sawrkar agency zu zawrh a han titâwp ringawt pawh hi kan lo lâwm tum hrang tawh a; sawrkar hmasain mi mal a zawrhtîr a tak taka an tihtâwp hun hi Tlumtêa thlîr takin kan lo thlîr a ni. Mizoram sawrkar hian a ti ṭha hle mai; a ni leh thla ral tam nghâk loa hmeithai siamna khâwl zu zawrh a titâwp ṭan ringawt pawh hi thâwk hawkna tham chu a ni hrim hrim. Kohhran leh NGOs tân lah làwmna tûr dik tak a ni bawk si.

Mafaa nèn hian kan thu ziah duh lam a hrang daih bawk a; kan ziah dàn kalhmang pawh chhim leh hmàr ang hlauh a ni. Mafaa chu Mary Mount (English Medium) School-a zir chhuak, St. Paul’s School-a HSLC zir zo, chumi hnûa Silchar piah daih Shillong-a College ṭha ber zînga pakhat St. Anthony’s College chhuak ngat a ni. A chanchin an ziah aṭangin English a thiam tih a hriat a; amah pawhin thiamah a inngai tih chu a thu ziah tam tak English-a chei màwi a chìn dàn aṭangin a hriat. Kei ve lah hmàr thimpui zângkhaw bungbut hnan an tih Bûkpui Middle School-a zir chhuak, Govt. Mizo High School-a zir chhunzawm, ram buai avànga Tezpur Jail rûn thima kum 3 chhum hmin, chumi hnûah Pachhûnga College (Evening Shift)-a chawṭhing ringa BA pass ve hlawl kha ka ni. Mahni tâwka English kan zirna ber lah Hmabu an tih “Ninga ni-ah tleirãwl chu a lo kal ta” (The youth came on Thursday) tih aṭanga inzir chawp kha ka ni. Govt. Mizo High School-a kan kal lai khân kan hotuten English-in an zirtîr ngai mang lo. Vawi khat chu English hman uar tûr tiin nu leh pate karna avàngin an han bei sasâwi ve bawk a; zirtîrtu zîngah kâr hnih chhûng English-a zirtîr peih an awm lo.

Mafaa ka ni lo! Vànglaini chanchinbu hi kum 2013 August thla aṭanga an tihlen dâwn khân thu ziak tûr (columnists) sàwm bîk an nei a; chûng zîngah chuan min rawn telh ve mial a. Kei chu Inrinni min chantîr a; a chhan pawh “Puitling Sunday School zirlaite khawih duh châng i nei thei a,” tiin min hrilh láwk diam a ni. A tîra an sàwm bîkte kha kan awm kim tawh loin ka hria. PL Liandinga leh Mafaa hi tlai khawhnûa mi dang hmun rawn luah tharte an ni. Mafaa hian ka hma chiah Zirtâwpni a chang kher lehnghâl a. Vawi khat Zirtàwpni-ah Mafaa thu ziah an rawn chhuah a; mahse ka thlalák an rawn dah zâwk tlat si. Kan thu ziah dàn kalhmang a dan bákah kan thupui ziah duh zâwng a hrang daih. Ka thlalák hnuaia Mafaa thuziah awm ta mai chu mi ṭhenkhatin, “Pu Chuaua pawh hian hetiang lam hi a lo ziak thiam ve tho a nih hi,” an tih phah a. Vawi khat mai pawh a ni ta lo; Mafaa thuziahah ka thlalák bawk chu an rawn dah nawn leh a; chumi ṭum chuan Vànglaini-a a dah sualtu ngei chuan ka hnênah thupha a rawn châwi nghe nghe a. Mafaa dungthûlin, “To err is human, to forgive is divine” ka ti mai.

Mafaa zawng Lalpa hnênah a chàwl ta. A hming ‘Lalrinfela’ a nih ang ngeiin a rin Lalpa chu a fel êm avàngin natna hrehawm tuar tawh lo tûrin a hnênah a lo seng ta. Chutah chuan ‘chawltui ningzû’ dàwn tùr a awm tawh lo a; an tih ber chu Lalpa fak a ni tawh mai. Mi ṭhenkhat chuan kohhranin zu zawrh a duh loh avàng hian zu in mite hi a en hrang a, vànram kai lo tûr zîngah a dah ta mai emaw an ti ṭhin. Ni teh suh e. Zu in mite hian an thinlung chhûngrilah Pathian rinna leh ngaihna tak an nei thei; Pathian bâwihah aiin zu bâwihah an tâng laklawh a, an tãl chhuak hlei thei lo mai a ni. Pathian an rinna chu a thlàwn lo ang. Mi ṭhenkhat chuan vànram kai tûr leh kai lo tûr hi an lo thliar zung zung ṭhin a; hmeichhe pakhat vànram leh hremhmun han fang tawn chhên nia insawi phei kha chuan mi fel tak tak hremhmuna a hmuh thu a sawi ṭhin a nih kha. An huat zâwngte chu vànram kai lo tûrah an ngai ngawt zêl. Chutiang chu a ni hauh lo ang. Hmangaihnaa khat Pathian chuan amah ring der der tawh phawt chu a hnênah a hruai vek zâwk ang. Kan kohhran Upa pakhat thusawi hi a dik a rinawm, “Khi lamah chuan rin aiin kan rual hak ang,” a ti. Ni e, khi lamah chuan rin aiin kan rual hak ang a, hmuh kan beisei vak lohte nên lungrual takin chatuanin tual kan lêng za tawh ang. Mafaa nên pawh zu chungchângah inhnial a ngai tawh lo ang a; zû tih mai mai te chu a rim a rã pawh hriat tùr a awm tawh lo ang. Pathian zepui pakhat chu ‘ropui’ a nihzia kan hmu tlâng tawh ang. Mafaa a kal ta, a thuziah tawhte tal hi nung zêl rawh se.

5.1.2019

Aside | Posted on by | Leave a comment

ZORAM KRISTIAN INKHAWM

ZORAM KRISTIAN INKHAWM ESSAY
(Pang lehlam atangin)
David Sailo on 4th January

KALKAWNG
“Lalpa ka lo kal, nangmah bel turin” tih rilru pu a Biak In pan kan tam lo hle. Kalkawngah atang chuan ‘I puan a nalh’, ‘I kawr hi tu thui nge’ tih vel leh ‘I nalh hle mai’ tih vel chu kan kalpui hlawm phawt a, thuamhnaw thar leh incheinaa buai ve phak lo te chuan chaw an ei tlai vang ni miah lovin mi kal rêm an chuh a, tlai khawhnu ah nalh lem lo takin an rawn kal ve phauh phauh hlawm a, naupang nei a an thawmhnaw mana in seng awlh awlh thei te chuan inkhawm kal tam lai an chuh bawk a.

Pa berin Suit leh Tie nalh tak a in bel a, nu berin puan, kawr Design danglam inbelin, Bag manto a khai a, naupang ho chuan an nu ten duh tawka an chei an in bel a, an han inzui chhuak chu pui tak a ni. Kan RO a, kan PUI bawk. “Chak lo leh sual berin, lokal mah ilangin” tih thinlungpu chu kan tlem ngawt ta ve ang.

BIAK IN CHHUNG THUT DÂN –
Kan thutna awm te te ah chuan thut hmun kan rem a, Upa leh puipate thutna tlar hmasa berah chuan Inkhawmpui liana palai ni pha, Headquarter Committee liana tel chin, tualchhung leh biala hruaitu kumhlunte chu an thu a, an hnungah chuan tualchhung hruaitu inthlan leh pek thlir rân, Junior zawk leh kum phu lova intipuitling âl ho chuan an dawt a, heng ho zingah hian Pastor thu hla a kip a kawia zawm duh pawl leh zawm duh lem lo Principle hran nei ngat chi hi an inzah vel awm e.

An zai ve ûl ûl lova, an phusa viau duh lo. Nghet deuh charhin an thu a, inlak puithu leh khûnkhan kha an tih turah an ngai tawp mai. Hruaitu atanga thusawitu hun hman lai zawng chuan ngaihsak leh sawitha ti tak, ngaisang taka thusawitu, an Upa pui chu thlek duh aram an awm lova, a ni aia sawithiam zawka in ngai melhin an melh ve zeuh zeuh duh chauh a ni. A thenin Kohhran chanchinbu an bih a, a thenin Bible an bih san a, a thenin Note bu ah pawimawh hmel takin eng eng emaw an ziak reng a, engteh ual mah an ziak lovang. Hengte hi a ti tha pawl an ni a, mipui hmaa thu a muthlu reng mai, muthlu hmel pe chhe ve tak mai te hian thusawitu an pui lo mai a ni lova, mi sukthlek a chhe zawngin an la peng hial zawk a, rawngbawlna nung lo ber a ni awm e!!

Pa ho tlar hmasa ah chuan a pheka phawk thlu lova thui zawk thlir rana Upate thu zawm diak diak ho, Upa leh Pastor chenna tlawh taima, Khiangkawi ipte leh savun ipte ak chin an thu a, heng ho hi chuan Principle leh Kohhran tana Vision tha pui pui nei mahse an sawi ve phawng phawng duh lo, hmalam an thlir tlat a, tih lungawi tur chin an hria a, an thunlung tak tak ni miah lova mi kawm dan Training mek te an ni. Inkhawm banah Upa tu emaw ber an bek bawr sur sur fo thin. An hnungah hian nihna beisei ve miah lo, inkhawm hun chu hlah duh lo, Bible keng tlawng mai, an Kohhran thil tih dan dik tawk lo pawh sawisel hmiah hmiah ngam chin an thu leh a, heng ho hian chanvo tha an chng mawh hle. A kawng zawh ve duh hek lo!!

Thalai tlarah chu khuangpu hnung atangin a intan a, a hmasa chu hmeichhe thutna a ni. Nula Senior leh naupang deuh pawh, inhmang hma tak leh biak in a tlang nel tak chin, thawhlawm khawn paha zai rut rut ngam chin an thu a, Bible/hlabu kara sahdah, Sikhar, Sachin zeh ching em em te an ni duh. Vai ho hian Kuran bu karah te hian zep ve thin tak maw?!! Zaipawlah chuan an zai tang thei hle a, an ban vai dan pawh a Style in a mawi phian. Mahse Kohhran inkhawm zaiah chuan an zai tang tha duh der lo thung. A hmei apa chuan Phone khawih ching an intlar chho duah a, Lal tawngtaina sawia tawngtai laite hi puanven siamthat hun, thil ei ruk hun a tan an hmang ber a, hengte hi Kohhran hlimpui a thlen laia taksa chetna chang nasa ber berte an ni duh viau bawk. Sermon sawi chhawn tur an hre ngai lova, kawr thui dan thar an hre haw thei hle a ni.

Upa epah chuan nu lam hruaitu leh Upa nupuite an thu a, chawlhni tin kawr thar nei deuh thaw an awm nual, nula aiin kawr leh puanah an buai a, heng hi mit an lênna ber pawh a ni, pawnlang takin Pathianthu duh hmel takin an lang a, mahse, changkanna leh chapona in an thinlungah lalna a chang thung. Samkir tawi fel tak tak an tam a, thuahnaw Match an hre hle. Pangpar Committee a telte chuan Pangpar khawi an en fo a, an khawi loh tum a nih chuan an khawi mawi loh lai an ngaihtuah sak reng bawk a. Muhil si lova maimitchhin tlat ching an tam hle. Tui Bottle tê, manto chi an pai a, inlak changkan nan an in zeuh zeuh bawk a. Mihlim tak tak nih an duh miah lova, mihlim tuipui phak khawpa chansanga lan ve erawh an duh vek thung. An pasal te thusawi tum chuan Spy ang maiin an meng kual a, mipui leh mimal sukthlek an lo chîk hle thin. An zingah hian Facebook khawih dan thiam thar, thlalak hmanga Status Update peih tak tak an tam hle bawk. Thlalak an uar hle a, engngemaw hlekah thla an la chhen thin. Zawm aia sawi peih tak tak thiau an ni.

Nu valai leh tlawngawl deuh te chu a hmalamah an thu a, an zingah hian nu phawk tak tak, mi tihdan zir thiam em em, mi sawisual leh sawi fuh loh chhinchhiah thei em em an kat nuk a, thutak lam aiin heng zawng hian an lo châng ve khiau bawk thin. A hnung lamah chuan Thalai lama Over tawh nula Senior tak tak leh nuthlawi, lengleh leh la valai tak tak bakah chhangchhe ho an thu a, heng ho hian mi nau an lawm a, an pawmsak a, chutiang chuan inkhawm an tlingtla ve fo bawk thin. Mahni inchawm zo veh vawh an ni duh a, zah leh pawisak teh chiam an nei tawh lo. Thuamhnaw pawh an duh changkangin an duh Common lo a, an duh Simple bawk. Tleirawl leh tlangval satliah fiam mai mai chi an ni tawh lo. Refreshment, Decoration tih vela Kohhran puipa ber an ni duh khawp a, Upa kaihhruai Committee ah pawh an sawi ve zat zat thin.

PROGRAMME –
Hruaitu a rawn dinga, urhsun fahranin engmah sawin lovin “Hawh u…” tiin Sam ziak chu muang ban chatin a rawn chhiar a, tawite a tawngtai a, Secretary a sawm zui a, chu chu inkhawm kaihhruai thiamte dinhmun a ni. A Part chu mûk takin a kaihruai zo te te a, mutthluk ching a nih chuan mipui ep takah pawh a hnar lo chauh ve bawk thin.

Thusawitu chu a hmel hmuh atangin engnge a sawi dawn tih kan hre lawk fur a, hmán atang tawh khan thuthar a dawng lova, hmangaihna, thilpek, tunlai ringtu, ramthar/ramthim etc heng bak pel thei lo Upa kan kuh tul a, an din rualin an sawi tur kan hre lawk fur thin. Sana an melh rulh rulh a, Thlarau nilo sana lalna hnuiah thunung puan an tum thin.

ZAI HONA –
Kohhran hlim vanglai pawha Solfa hla ûn tak mai thlan tlat ching Upa an awm a, lengkhawm hla sak chuan Leiah hian chhuantur nei reng reng lo, nu tar lam, a lam ngai bawk chu an rawn penchhuak hmasa leh ber a, Amah lo chu chhuantur dang reng reng neilo tan lo chuan Regular taka lâm hi a theih loh reng a ni!!

A bul atanga vawikhat kan nawn tawh chuan hlabu ken lai khup tawh chu a chanve dawn kan ni der tawh a, hawikual hruk hruk paha zai chu a tam zawk kan ni bawk. Thinlung chunglama rilru dah rana hlathu ngaihtuaha zai chu tlemte an ni.

INKHAWM BANG –
Biak In hi PÛM(Hriamhrei chherna) ang a ni a, hriamhrei chherte chu pûm inah chuan a hmanna a vang hle. Misual, fello biak ina inchher hriam a, pawnlama vak darh a, hmang tangkai tura inkhawm bangte hmelah chuan chutiang hmuhtur a vang a, tihtur hlen fel der, Inkhawm leh hun nghah veng veng a ni mai. Inkhawm lo te, Kohhran leh pawl sawichhiate chu mitlaw ber leh zakthei lo, piangthar lo dawn dawna chhuah duh tawk lekin kan Inkhawm chu kan chapopui haw nghal a, a ni lo zawngin inkhawm lo kan hre hle bawk a.

Vanram kai tuma Kohhrana kan phêt kual vel dan en hi chuan vawikhat pawh inkhawm ve lo, a hun tha zawng zawng tualthah leh mi suam nana hmang, Kross lera thih dawn darkara Paradis a chawl tura tih ngei pawh kha kan thîk duh hial hlawm ta ve ang.

Aside | Posted on by | Leave a comment

INFIAMMI 2018 CHHUNGA SUM LALUT HNEM TE

Mawia Chhangte Arsenal

Heihi Forbes tarlan a ni.

1. Mayeather $285m
2. Messi $111m
3. C. Ronaldo $108m
4. McGregor $99m
5. Neymar $90m
6. LeBron James $85.5m
7. Federer $77.2m
8. Stephen Curry $76.9m
9. Matt Ryan $67.3m
10. Matthew $59.5m

Thlalaka Money an pawisa a dahna bag hi $250,000 man a ni.

Pawisa ka ngaha hmanna tur ngaihtuah a ngai tiin tunah hian Car 100 chuang leh Private Jets 2 a nei…..

Aside | Posted on by | Leave a comment

KHAWVEL KHAWPUI HRANG HRANG ZINGA ECONOMY LIAN BER TE

ᴋʜᴀᴡᴠᴇʟ ᴋʜᴀᴡᴘᴜɪ ʟɪᴀɴᴛᴇ sᴜᴍ ᴛʜᴀᴡʜᴄʜʜᴜᴀʜ ᴢᴀᴛ.

Pakhatna ah Tokyo a awm leh a. USA an lang tam leh bawk a, chenna man sang lutuk avanga an rauhsan, lirthei siamna hmunpui Detroit khawpui pawh an rawn sang leh tawh a, 26 na an ni. India ah chuan Mumbai in sum thawkchhuak tam berin 24 na a ni pha a. Arab ram hausa te an turu lo hlawm viau mai. Dubai chu 77 na a ni a. Tourism leh oil hi an sumhnar a ni a. A dang an neih tam loh vanga hniam an ni. Real Madrid team awmna Madrid khawpui pawh 25 na ah a awm ve. Nuclear bomb siam thei ram zinga siam ve duhlo nia insawi Mexico khawpui pawhin 7na dinhmun a luah thei bawk.

Khawpui hausate hi industry chi hrang hrang awmkhawmna leh khualzin ngah an ni vek a. Industry – lirthei, ei leh in, toys, inchhung bungrua, ruhrel lian siamtu company, thlawhna, lawng, fashion, electronic etc hmunpui an ni vek. New york chu World trade center/Manhattan kawtthler vangin a ropui a. Los Angeles chu A veng pakhat Hollywood vangin a lar hle bawk.

An thawhchhuah hi tluklehdingawn bi zela chhiar tur a ni.

Cities GDP

  1. Tokyo (Japan). ᅠ 1,602
  2. New York(USA). ᅠ 1,561
  3. Los Angeles(USA). 886
  4. London(Britain). 708
  5. Chicago(USA). 645
  6. Paris(France). 611
  7. Mexico City(Mexico). 608
  8. Philadelphia(USA). 440
  9. Osaka/Kobe(Japan). 430
  10. Washington DC(USA). 426
  11. Buenos Aires(Argentina). 416
  12. Boston(USA). 413
  13. Sao Paolo(Brazil). 411
  14. Hong Kong. 407
  15. Dallas(USA). 384
  16. Shanghai(China). 360
  17. Seoul(South Korea). 349
  18. Atlanta(USA). 347
  19. San Francisco(USA) 346
  20. Houston(USA) 339
  21. Miami(USA). 331
  22. Toronto(Canada). 327
  23. Moscow(Russia). 325
  24. Mumbai(India). 300
  25. Madrid(Spain) 299
  26. Detroit(USA). 287
  27. Istanbul(Turkey). 287
  28. Seattle(USA). 269
  29. Beijing(China). 259
  30. Nagoya(Japan). 258
  31. Manila(Phillippines). 257
  32. Rio De Janeiro(Brazil). 256
  33. Sydney(Australia). 256
  34. Jakarta(Indonesia). 253
  35. Delhi(India). 229
  36. Phoenix(USA). 228
  37. Guangzhou(China). 227
  38. Minneapolis(USA). 225
  39. Shenzhen(China). 224
  40. Kolkata(India). 224
  41. San Diego(USA). 220
  42. Singapore. 220
  43. Cairo(Egypt). 212
  44. Barcelona(Spain). 201
  45. Melbourne(Australia). 201
  46. Denver(USA). 190
  47. Rome(Italy). 187
  48. Bangkok(Thailand). 180
  49. Montreal(Canada). 180
  50. Milan(Italy). 174
  51. Tehran(Iran). 172
  52. Riyadh(Saudi Arabia). 167
  53. Busan(South Korea). 165
  54. Bogota(Colombia). 163
  55. Santiago(Chile). 160
  56. Baltimore(USA). 157
  57. Monterrey(Mexico). 157
  58. Tel Aviv(Israel). 153
  59. St. Petersburg(Russia). 151
  60. St. Louis(USA). 146
  61. Tampa(USA). 142
  62. Johnannesburg(S. Africa). 131
  63. Lisbon(Portugal). 130
  64. Cleveland(USA). 129
  65. Belo Horizonte(Brazil). 129
  66. Portland(USA). 128
  67. Vienna(Austria). 127
  68. Karachi(Pakistan). 127
  69. Dhaka(Bangladesh). 126
  70. Lima(Peru). 123
  71. Vancauver(Canada). 121
  72. Cape Town(South Africa). 121
  73. Stockholm(Sweden). 121
  74. Guadalajara(Mexico). 119
  75. Abu Dhabi(UAE). 117
  76. Pittsburg(USA). 115
  77. Dubai(UAE). 114
  78. Tianjin(China). 112
  79. Jeddah(Saudi Arabia). 111
  80. Bangalore(India). 110
  81. Dublin(Ireland). 99
  82. Ho Chi Min City(Vietnam). 98
  83. Birmingham(Britain). 96
  84. Wuhan(China). 96
  85. Fukuoka(Japan). 96
  86. Manchester(Britain). 96
  87. Hyderabad(India). 92
  88. Chennai(India). 91
  89. Athens(Greece). 91
  90. Berlin(Germany). 88
  91. Ankara(Turkey). 87
  92. Chongqing(China). 87
  93. Lyon(France). 85
  94. Turin(Italy). 84
  95. Porto Alegre(Brazil). 82
  96. Brasilia(Brazil). 82
  97. Warsaw(Poland). 80
  98. Ahmadabad(India). 78
  99. Hamburg(Germany). 77
  100. Recife(Brazil). 76
Aside | Posted on by | Leave a comment