Thilmak hriatfiah har te

ZÂN LAMA CHHIAR CHI:- Valpuia Leo Chawngthu.

Zanlai naupang ṭap chu.

Kum 1982 July 23 zing dâr 2:00 vêl khan Champhai bul lawka khaw pakhat ah khawlaia Naupang tap ri an hre thut mai a.A bul hnaia awm thenkhatte chuan thenawm naupang tap anih an ring a. Mahse a tah rei tak deuh avangin tukverh leh bang awng atangin an bih hlawm a. Mi pakhat hian naupang pakhat hi a bêng a, a chang leh a khai kang a, naupang chu a taptuarh tuarh a. A hnu deuhah chuan Nu pakhat a lokal a. Naupang chu a pawm kang lawk a, a kalpui ta vang vang mai a. Thlanmual lamah a kalpui ta a. Naupang tap pawh chu a reh zui ta a ni. He thil hmutute hi mi 6 lai an ni. Thlânmual lama an liam tak avangin an enzui ngam ta lo a ni.

Phuaibuang lal thlan hai a ni

Kum 1980 khan Phuaibuang lal Därthuama a thi a. A Thlân hi thûk takin an lai a. A chhuatah dâp an phah a. Dâp chungah Kuang dahin Lungphêk lian deuh 4 laiin an delh leh thlap a.

Kum 1981 khan tûk khat chu Thlân chu hai a ni tih an va hmu fuh ta hlauh. Thlân an haina ah chuan hnuhma engmah hmuhtur a awm lo. Thlân khur chu rual nalh em em a hai a ni a. Kuang hnuaia dâp an phah chu kuang chungah a lo awm a. Lungphêk pakhat chu a keh thung. Thlân khur an haina leivûng chu tharlam em em siin hniak leh hnuhma a awm hauh si lo. Tu haitak ni ang maw??.

Malvari kha tunge

Kum 1970 May thla khan S.Sabual ah thil mak deuh a thleng. Tlângmawii te nufa chu chhûn chawfak zawhin Thingphur turin an chhuak dawn a. A fanu Khum pindana a va lut lawk chuan khuma rizai che dut dut a va hmu ta mai a. A nu a zawh chuan a Nu chuan tumah an mut loh thu alo hrilh a. A nu chu a va lut ve a. Rizai an hlim chu hmeichhe tleirawl, kawr sen par ha, sam tawi hi kawmchar lam hawiin a lo mu a. A hmêl erawh an hmu thei lo. Khum tlângah a ke a thlak thla a. A mal chu a var em em mai a. A hnu ah pawh ‘Malvâri’ tiin an sawi ringawt.Tlângmawii chuan a sawi nawk nawk a, mahse a sawi harh zo lo. An nufa a thenawmte ko tura chhuah an tum lai takin ri rek an hria a, an va en leh chuanrleirawl mu chu a lo awm tawh lo va. Rizai pawh chu khumah fel takin a lo awm thlap.!!.

Ngau kah chu Naute a ni

Mizoram buai (1966) hma lawk khan Lallen khuaa awm Thangchungnunga chu Tut lui ral Tuikuk ho awmna bulah a ramvak a. Tlai dar 3 velah Ngau thing zara awm a hmu a. Ngun taka a tin hnuah a kâppawp mai a. Ngau chu a inbin a, tla ta mai lo chuan thingzârah a thu thluang ta diai a. A nâkah a kâp leh a, a la tla lo fo. Thingzar sâng zawkah a lawn chho va. A vawithumna atan a thin zawn velah a kâp leh a, a la tla chuang lo.!!

Chu Ngau chuan Thangchungnunga lam a rawn hawi a. Mipa naupang hmêl chiah a lo pu tawh a, a rawn nuih ta ver ver mai a. A hlau lutuk a, a tlan haw ta ringawt a ni

Aside | Posted on by | 1 Comment

THISEN KHANG THEI LO TIH THU KHA

✍ Kimajongte.
Tunlai hian Facebook leh WhatsApp ahte Self-Styled Prophet Awmtea “Thisen Khang theilo” tih thu post a darh (gone viral) nasa hle mai a. Awmtea leh a zuitu mi tlêmtê te chêt dan keima tawnhriat aṭangin ka lo sawi ve lawk ang a; Comment pawh tâwitêin ka han siam zui ang e:
Awmtea hi Samlukhai khawchhuak, Pachhunga University College aṭanga B.A. chhuak niin ka hnenah chuan a insawi a. Hun engemaw lai khan Isua anga ni thum hnua tho leh tur anga insawiin a nungchunga inphûmtîr pawh a lo tum tawh a nih kha.

June ni 6, 2017 khan Lunglei SP ka nih laiin Awmtea leh a pawlte hian kan Police Station bul mai, Lunglei Venglai hmun hulûm lai takah India Flag leh Moorti (Vai Pathian lim) an hal a. An tlanbo zui a. Mahse, a tûk zanah Sialsuk OC chuan an vaiin mi 7 chu Samlukhai ah min lo mansak ta kha a ni a. Police Custody ah rei kan dah theilo, a rûk taka a zirtirna lo thlâwptute an rawn pungkhâwm chak hle, ka beisei phak piah lam daihin. Mahse, Judicial Custody a kan thawn hma darkar pawh tling lo chhung chuan ka kâwm hman nual a.

Hetianga Hindu pathian i hâl hian, kan Mizo Missionary-te Hindu ho zînga awm mêkte sahimna atan a pawi thei tih i ngaihtuah lo em ni, tia ka zawh chuan, “Lalpa kutah ka dah mai” tiin min chhang a. “Lunglei hi India ram a ni a. India Flag hmusit takin i hâl a, nangmah ngeiin i hliau lai video clip pawh ka hmu a ni..” ka tih mêk lai chuan, “Lalpan min tih tîr a ni,” a lo ti zung zung a. Anih leh Asssam Rifles Commandant Col. B.B. Punn ka phone ang a, an Compound chhungah hal rawh aw, i vun hi lâktlâk awmlo lêkin an kâp chik vek mai ang, tih pahin kaihthawh ka tum a; a zâm hau lo. Ka ṭhu leh a, “Amte, tukin mai khan kei pawh Lalpa nen chuan kan inbia a. Hetianga mite deusawh leh an pathian halsak zawng hian mi a hruai ve ngai lova. Ka biak Lalpa chu Isua a ni a; khengbet mawlh mawlh tute tan pawh ngaihdam dîlsaktu kha, i hria em?” ka ti a.

Chuta a mitmeng ka hmuh chuan tûn thleng hian ka thâuvah min la man fo; tiril a mûr! Mitkhapkar aia rei hret ang chauh a ni – ka sawithiam danin – a mitnaute dum lai chauh hi a sâwl a, a tung zâwngin a awm. Ka ṭhianpa K.Lalchamliana, Vohbik Chhanchhuah Ṭeam Speaker ka ngai khawp mai khatih lai tak khan; kei chuan ka hlau a, a chhunga awma hi ka hneh chuang lovang tih ka hria. Pu Chama chuan a cho at zêl mai a. A hnua ka hrilh chuan Jailah pawh rawn luhchilh mai a hnial lova, mahse remchanlohna dang avangin kan puitlin ta lo kha a ni.

Ka hote nena kan chhui zêlnaa kan thil hriat ṭhenkhat chauh tarlang ta ila; heta hming lang ho hi an phalna ka la hmasa lova, thubelh erawh ka nei lova, an mi hriatthiamna pawh ka dîl nghal ni se:

  1. Awmtea zirtirna avang hian nupa inkar buai in uirêna a thleng nual tawh.
  2. Bualpui V ah sawn BCM Upa pakhat chu ar varin a inthawi. Isua thisen power kha renew a ngai tawh, a rei tawh emai tiin (Awmtea hi Zoram chhim lam zêlah a chêt avangin keini BCM hian kan tuar ber).
  3. Lunglei traffic-a keima staff B. Thuammawia ngei pawh khan engemaw chen chu a zui a. Mahse hetianga ar thisena an inthawi fo chinah khan zui chi ah a ngai ta lo a ni.
  4. K.Lawmsiama, Lunglei Luangmuala khawsa kha Police pensioner a ni a. Awmtea zirtirna avangin an nu nen Kohhran Register aṭangin an hming an thaichhiattir a. Ama sawi dan chuan, Kulh aṭang khan lalpan chhuak turin a ti che, tiin Awmtea hian an nu chu a hrilh ani; An nu hi BKHP monthly journal “Loisi” semtu nihna aṭang pawhin a bang nghal a.

Tunah hian RAN THISEN KHANG THEI LO tih caption hnuaiah arpa khuanglai thisen, arvar thisen, ardum thisen leh bawng thisen kan buaipui leh ta nuaih mai!!

Thisen hmanga sakhuana kaihhnawih thil reng reng hi zirtirna kalsual vek a ni, tûn kan hun hman mêkah hi chuan; Kalvari hnu lamah chuan, tihna. Chhandamna thu a ni emaw, thil lo thleng tûr entîrna a ni emaw, inthâwina a ni emaw – Isua thisen hnu lamah chuan eng thisen pawh kha Diabola aṭanga chhuak an ni zêl tawh tih lo hria ila, a him a ni mai.

Pathian chu ran thisen hmanga inthâwina thuthlungah a lungawi zo tawh ngang lova, chuvangin –
“Hawh u, chatuan thuthlung
theihnghilh tawh loh tûrah
chuan LALPA chu rawn vuan rawh
u khai,” tiin zawlnei Jeremia hunlai daih tawh khan ruahmanna a siam a (Jer. 50:5). Chu ruahmanna chu hei hi a ni –
“Chu mi duhzawng chuan
Isua Krista taksa vawi khata
hlan nghal vang khan
tihthianghlimin kan awm ta.”
(Hebrai 10:10).

Hebrai 10:10 in “Isua Krista taksa vawi khata hlan nghal” a tih, Kalvaria Pathianin Isua hmanga inthâwina a buatsaih piah lamah emaw, a hnu lamah emaw, thisen dang dang hmanga “inti râu-te leh inti maksakte” tan chhandamna tûrin kawng dang a awm tawh lo! He thu hi keima sawi ni lovin, Bible sawi a ni. Khai mah aw –
“Pathian thu tha leh hun lo la
awm tura thiltihtheihna tem
tawh zeta tluksante kawng
thu zawng – chu mite chu
an simna turin siam thar
leh rual a ni lo, Pathian Fapa
chu anmahni tan khengbet
nawn leha timualpho an nih
avangin.” (Hebrai 6:5-6).
Hemi avang hian inti pathian Enoka kha Salem Veng, Aizawlah zu vangin a thi tawh a; “Kan thi dâwn lo,” tih zirtîrna tirhkoh zawlnei Thangfala pawh kha kum 5 liamta khan a tar thi bul tawh bawk!

Olive tlanga a ṭhut laia a zirtirten anmahni chauhva an va kal a, Isua chu a fâla (midang nazawng tel lova) an kâwm ṭuma a thusawi pawimawh tak takte zingah khan,
“Zawlnei der tam tak pawh an lo
chhuak ang a, mi tam tak an
tihder ang,”
tih hi a tel a ni. (Matthaia 24:11).

Thisen bawk chu sawi zawm leh lawk ila; Awmtea leh a pawlten ran thisen an hmang ta fo mai hian (tun ṭumah hian ar bakah bawng an hmang tel ve ta a), Hindu an do viau angin insawi ṭhin mahse Hindu Basis a nei tlat zuk nia!

Hindu zirtîrna ah chuan kan khawvêl damchhung hi hunbi 4 (pali) ah ṭhen a ni a. Chung hun hrang hrangte leh an hunlai ṭheuhva inthawina ran thisen hman tûr-te chu –
1. Sat/Satya Yug : Beram thisen;
2. Dreta Yug : Bawng, kêl, lawi thisen
(Sial hi Shastra in a sawi lo tlat).
3. Dwapor Yug : Ar, varak, parva, sava dangte thisen (Vatawk hi chu lehkha thiamna petu pathiannu goddess Saswati chuanna a ni).
4. Kal/Kali Yug : Mihring thisen chauh lo chu sual thâwinan a hman theih tawh loh. Hei hi a rûk taka Hindu kulhmûk ho buaina pawh a ni. Kan thisen a luan lohnan eng thisen emaw chu a thlâkthleng nan (Boli atan) a luan a ngai si!

Hindu ram India ah ngei pawh mihring hmanga inthâwiten IPC 302 an awrh zêl mai si! A sei lutuk lohnan, lo Google ve mai rawh u, ‘human sacrifice in hinduism’ tih chhu ula.

Awmtea sakhua hi Hindu 2nd Era leh 3rd Era chawmpawlh khi a nih duh hmêl.

Lal Isua thisen sawichhiatnan leh Mizo Kristiante hruaibova an awm theihnan he Mizo tlangval hmêl fel tak leh mahni kalna lama mi ṭhahnemngai tak hi Diabola chuan a hmanrua atan a hmang mêk zêl a ni thei bawk e.

-Kima Jongte

Aside | Posted on by | Leave a comment

Inkap lui-palh

INKAP PALH.. !!

30 Dec. 2018 zan dar 6:30pm vel khan Hmawngtlang khua ah ṭhian dun ram vak dun chu a ṭhianpa in sa emaw tiin a kap palh a, a kaha chuan ka thi dawn tih a inhriat in a kaptu chu a kap let ve leh a. A tipalh hmasa tu zawk chu a thi.

Rualchunga, Hmawngtlang ‘B’

Aside | Posted on by | Leave a comment

Ruihhlo vangin Mizote thi tam

Kum 1984 aṭanga kumin August thla thleng khan ruihhlo avangin Mizoramah mi 1,504 an thi tawh.

Excise and Narcotics Department-in an chhinchhiah danin ruihhlo vanga thi mi 1,504 zinga 1,333 hi mipa an ni a, 171 chu hmeichhia an ni. Kum 1984-a ruihhlo vanga thi chhinchhiah awm chhun hi heroin vanga thi a ni a. Kum 1990 hma lamah chuan na chhawkna chi khat spasmo proxyvon/parvon spa vanga thi chhinchhiah a awm lova, hemi kum hian mi 4 an thi a. Heroin vanga thi hi tlem chho zelin kum 2009 a 11 an thih ṭum tih loh chu kum khatah 10 an thi tling ngai lova. Chutih lai chuan kum 1993 bawr vel aṭang khan proxyvon vanga thi hi an pung chhova, tun thlenga proxyvon vanga thi zat chu 1,161 an ni.

Kum 2004 kha ruihhlo vanga thi an tam ber kum niin mi 143 an thi a, an zinga 132 chu proxyvon vanga thi an ni a. Kum 2000 kum khan ruihhlo vangin 139 thiin 2003 kum khan 136 an thi bawk. Kum 2016 aṭang khan heroin vanga thi an pung leh thut a, 39 an thi a, proxyvon vanga thi chu 2 an ni a. Tun thleng hian heroin vanga thi hi an la kiam hlei thei lova, kumin January leh August thla inkar chhung ngawt pawhin heroin vangin 15 an thi tawh a, nikum khan 28 an thi a.

Nikum leh kumin hian proxyvon vanga thi an awm lo a ni.

Aside | Posted on by | Leave a comment

PATHIAN DUHZAWNG THIL TUM CHUAN TUARCHHUAK THEI TURIN BEISEINA MIN PE

PATHIAN DUHZAWNG THIL TUM CHUAN TUARCHHUAK THEI TURIN BEISEINA MIN PE
– Rick Warren
Dec 31 2018

“Hmu tawh reng inti ka ni lova, famkim tawh reng inti pawh ka ni hek lo; ‘Krista mi man chhan chu ka man thei dah law maw,’ tiin a ûmin ka ûm zawk a ni,” (Philippi 3:12).

A hma khan thil tum neih a țul chhan kan sawi tawh a. Vawiinah chuan kawng thumin thil tum neih a pawimawhzia leh Isua pawhin thil tum a neih dan kan sawi dawn a ni.

1. Hmalam pan thei tura beiseina leh chhelna a pek che avangin thil tum i neih a ngai: Joba chuan, “Ka chakna hi eng nge ni a, ka han nghah rengna tur chu? Ka tâwpna eng nge ni a, ka han dawh rengna tur chu? (Joba 6:11). I kal zelna turah thil tum i neih a ngai a ni.

Nangmah fuiha tiphûr thei tur chein thil tum chu lian tak a nih a ngai kher lo. Entirnan, i inzai dawn a nih chuan i dam chhuah lehna tura i thil tum chu khum ațanga țhut theih a ni. Chumi hnuah chuan ding thei tura thawh te, chumi hnu lehah kal te a ni ang.

Hengte hi thil tum tê tham tak a ni a mahse a pawimawh vek a ni, a chhan chu khawi ațangin nge tih leh khawiah nge awm i duh tih hi zuankhumna (leap) nasa tak a ni lo. Rahbi tê tham tam tak a awm a ni. Thil tum chu pawimawh turin a len kher a ngai lova-chhunzawm zel turin fuihna i mamawh a ni.

2. I nungchang a siam avangin thil tum neih a țul: I nuna hlawkna ropui tak chu i thil hlenchhuahah ni lovin, i thil tum tihlawhtling tura chêtna kawnga i chhungril nuna thil thleng kha a ni. Pathian chuan i thil tum hlenchhuahah ni lo vin, i nungchang kha a ngaihven zawk a ni. I thil tum tihlawhtling tura i thawh lai khan, Pathian pawh nangmahah khan a lo thawk ve reng a. I nungchang a chher chho mek a, chu chu chatuan thleng a awm tura chu a ni.

Chuvangin Paula chuan Philippi 3:12-ah chuan, “Krista mi man chhan chu ka man thei dah law maw tiin a ûmin ka ûm zawk a ni,” a ti. Thil tum tihlawhtling tur hian tha (energy) a duh a, beih (effort) a ngai a, tih chhan leh vâng mumal tak neih a ngai a, a rah chhuah chu Krista ang nihna a ni.

3. Thil tum țha chu lawmman pek a nih dawn avangin thil tum neih i mamawh: Thufingte 11:27 chuan tihian a sawi, “Thil țha i duh tlat chuan duhsakna i dawng ang.” I nun chu thil țha tih tum nan i hman chuan chawimawina a thlen che anga, khawvelah ro hlu tak i hnutchhiah tihna a ni ang.

Thil tum țha tak lawmman chu chatuana atan a lo la thelng dawn a ni. Bible chuan I Korinth 9:25-ah chuan tihian a sawi, “Intihsiaknaah te chuan a bei țalh țalh apiang chu engkimah an insum țhin a ni. Anni zawngin lallukhun chhe thei hmu turin an bei a, keini erawh chuan lallukhum chhe thei lo hmu turin. Chutichuan tiam chin lam panin ka tlân ngat ngat a ni.” Paula hi thil tumin a khalh kal mihring a ni a. Nang pawh vâna Pathianin lawmman a buatsaihsak che hmu turin chuti ang chu i nih ve a ngai a ni.

Han ngaihtuah teh.

Vawiinah hian i rilru a hnual viau a nih chuan thil tum dang nei rawh. Eng thil nge ni ang i thil tum tihlawhtling tura nawr kala tiphur thei tur che chu?

I thil tum tihlawhtling tura i thawhna kawngah eng thil pakhat nge zirchhuah i neih? Chumi i tihna ațang chuan eng thil pakhat nge Pathian chungchangah zir chhuah i neih le?

I thil tum chuan i thil beisei leh rin chu Pathianin nangmahah leh nangmah kaltlangin engtin nge a lan chhuahtir?

Aside | Posted on by | Leave a comment

Ring Magazine Fighter of the Year 2018 Oleksandr Usyk

ℰnzet ℭhongthu

Ring Magazine Fighter of the Year 2018 atan Unified Cruiserweight Champion Oleksandr Usyk thlan a ni .

Han ngaihtuah lêtin tun kum chhunga boxing khawvela thil thleng te kha a lo va ropui in a lo va ngaihhlutawm hlawm em.

Heavyweight huangah Anthony Joshua ,Tyson Fury leh Deontay Wilder te incho thawm kan hriat rualin boxing fans te phurna nasa tak a siam nghal a , TV company leh streaming pe chhuaktu te pawh kum dang zawng aiin an pun belha ,boxing entu leh ngaihlutu khawvel hmun hrang2 awm te pawhin tunhma zawng aiin kan ngaihhlut belh ni in a lang .

Khawvel huapin talent thar ṭha tak tak rawn chawr chhuak kan hmuh nual bâkah pound for pound fighter ṭha tak tak ,Vasyl Lomachenko ,Canelo Alvarez ,Terence Crawford ,Mike Garcia te bâkah boxer ṭha tak2 chetla kumin chhung hian kan hmu ani .

Mahse hêng fighter ṭha taktak kara kumin boxing calender a mi mit la ber leh beng verh ber erawh chu Ukrarian boxer ṭha chungchuang Oleksandr Usyk hi ani .

Osyk hian World Boxing Super Series kumin aṭanga neih ṭanah a vawikhat nan Muhammad Ali trophy a la a,hei hian Cruiserweight history a a vawikhat nan World title belt pali a neih kawp tir a ,Unified cruiserweight champion hmasa ber ni in ,a fight hnuhnung berah Tony Bellew lakah knockout hmanga chakin kum a khar ani.

Ring Magazine in Fighter of the Year atana an thlang hi boxing fans te aṭanga sawisel chu sawiloh, ani aia he lawmman dawn phu hi an awmlo tih hi mi zawng zawng ngaihdan ani e.

Aside | Posted on by | Leave a comment

PAWNGSUAL HREMNA DAN THAR

India ram dan siamtu Legislature chuan pawngsual leh a kaihhnawih hremna dan chu siamthain The Criminal Law (Amendment) Act 2018 chu kan dan hmanlai mek Indian Penal Code, 1860, The Indian Evidence Act, 1872, The Code of Criminal Procedure, 1972 leh Prevention of Children from sexual Offences Act, 2012 ti danglamin, President in August 11, 2018-a a pawmpui hnuah hemi ni vek hian Gazette ah chhuah a ni.

The Criminal Law (Amendment) Act, 2018 ina dan a siam danglam pawimawh zualte chu:

(i) IPC section 376 (1) a pawngsual hremna kum 7 aia tlem lo tan tih ni thin chu kum 10 aia tlem lo tan tia thlak a ni.

(ii) IPC section 376 ah hian sub-section (3) belh thar a ni a, hetah hi chuan hmeichhia kum 16 hnuai lam pawngsual hremna chu kum 20 aia tlem lo tan bakah damchhung a tan thleng pawhsei leh fine chawi tir theih tih dah thar a ni.

(iii) IPC Section 376AB dah thar a ni a. Hetah hian hmeichhia kum 12 hnuai lam pawngsual hremna chu kum 20 aia tlem lo leh damchhung daiha pawhsei theih leh fine chawitir emaw thi tura hrem tih dah a ni.

(iv) CrPC section 173 (1A) a naupang pawngsual investigation chu case ziah luh ni atanga thla 3 chhung zawhfel tur a ni’ tih chu’ pawngsual thubuai reng reng case ziah luh ni atanga thla 2 chhunga investigation zawhfel tur a ni’ tia thlak a ni.

Hei hi pawngsual thubuai chinfel hma anih theihna tura Police lamin rang zawka investigation an kalpuina tura duan a ni.

(v) CrPC section 374 leh 377 ah te sub-section (4) a Paw.

Aside | Posted on by | Leave a comment

SORKAR THAR LEH KUM THAR NEWS COMMENTARY: 29.12.2018

(Zing dar 7)

Ziaktu : HC.Vanlalruata Principal Correspondent, PTI

Kumin Krismas chu kan lo hmang zo leh ta a, naktip nakthai maiah kum thar lawmna hun hmangin kumthar 2019 kan lo thleng dawn ta. Hmanni lawkah kan ram hruaitu turte thlangin kan ram hruaitu atan a thlan chhuahte pawhin sorkar thar an siam tawh a. Kan sorkar thar leh mipui pawhin kan la dai loh kum thar, 2019 hian enge min thlen ang tih chu lo sawi lawk theih a ni lo. Sorkar thar hian Mizo nunze pangngai angin an ngaih pawimawh hmasak (priority) chu an lan chhuah tir ta nghal chu a ni a. Zu huat inzirtir a zu haw ber anga lan hi miin thianghlim min tih rinna nghet tak vuan chungin zu zawrh lam an han khawih hmasa ta ber chu a nih kha.

Congress sorkar laka Mizoram mipui kan lungawi lohna langsar ber chu hmuntin mai a kawngpui chhe lutuk kha a ni a. Tunah hian khua a hulin hnathawh hun (working season) vanglai tak a ni a. Chutiang a nih laiin mipui vang a kha Congress sorkar paihthlatu sorkar thar chu an sorkar tuk aţangin kawngpui siamţhat hna an thawk nghal dawn emaw kan tih laiin zu huat lan chhuahtirna lam an han ngai pawimawh ta phawt chu a ni a. An sorkar ţan chauh a ni na-in beisei an pha lovang a, an ngaih pawimawh hi a nep set ang tih a hlauhawm ţan.

A chhan chu ngaih pawimawh (priority) a zir hian thil hi a danglam nasa thei hle a. Entir na’n “World class education” min tiamtu sorkar khan SSA leh RMSA hnuaia zirtirtute hlawh kha thla 3 te, a aia tamte a pe lo fo mai tih kan hre ţheuhva. Chutianga thla 3 lai a batsat mek lai chuan MNF sorkar thar lo ding hian ni hnih/khat lekah tihfel sakin a pe mai kha a ni a. Sorkar hmasa kha chuan NLUP sem kha a ngai pawimawh zawk a, na tak leh hmanhmawh taka nawrin inthlan puan bawr velah pawh a pe chûk chûk a nih kha.

Kan sorkarin a ngaih pawimawh leh a ngaih pawimawh loh hi a pawimawh thei hle mai. Sorkar han tihah hian sorkarna changtu ram hruaitute leh sorkar hnathawk liante hi an ni ber awm e. Anni hian car man to an ngaih pawimawh chuan car man to leina tur sum chu an dah ang a, an lei mai dawn a. Car tlanna tur kawngpui siamţhat lam an ngaihtuah loh phei chuan car man to an lei kha kawng chhe takah an zinpui dawn tihna a ni mai. Chumi-in a hrin chu hmasawnna khingbai a ni a, hmasawnna zahpuiawm tak pawh kan ti thei ang chu.

Ngaihtuah chiang mah teh ang u. Mizoram hi ram hausa, a mi chengte pawh mi hausa awmkhawm ni ta ila, chutiang karah chuan nang kha i lo rethei a nih vaih chuan thil zahthlak tak a ni ang. Midang zawng an hausak a awm thei tak an nih laia i rethei em em bik a nih ngat chuan i thatchhiat vang a nih loh pawhin i mawl vang tal a ni ang. Chutiang chiah chuan ram rethei takah mi hausa lutuk ni ta la, i hausak chhan chu eiruk, ruihhlo leh dan kalha sumdawnna i khawih vang a ni ang.

Chutih rualin mi zawng zawng kan inchen vek thei lova, kan hausakna emaw, kan taihmakna emaw kan finna emaw a inchen vek dawn lo. Chuti chung chuan sorkar ţha hnuaiah chuan mipui hi a tlangpuiin kan inthlau lutuk lovang. Sorkarin a tihtur zinga pawimawh pakhat kawngpui ţha min pek phawt chuan kawngpui ţha ah kan zin tlang anga, kan intluk tlang thawkhat ang, kan chuanna car man a in ang vek lo a nih pawhin kawngpui ţha a kal hlawm ta chu intluk tlanna pakhat chu a awm tihna a ni.

Entirna pakhat leh chu hei hi a ni. Electric eng hi nei ţha ila, kan tu leh fate ekzam dawnah a milian leh rethei pawhin nei ţha ila kan intluk tlang thawkhatah a ngaih theih ang. Chuti a nih loh chuan kan ram hruaitute leh sorkar milian leh hausate chuan electric eng an neih kha television enna leh eng eng emaw atan bak an hmang vak lo a ni thei a, a chhan chu an tu leh fate kha phai ram sikul ţha-ah an dah vek avangin kan ram a electric eng ţha lo kha an tu leh fate ekzam nen a inzawm lo. Chubakah UPS leh Inverter nen an infam a, keini angin an buai ve lo. Electric eng kan neih ţhat chuan inchen lote inchenna chin kan nei a nih chu.

Chutiang chu a ni. Ei rawngbawlna gas hi kan hnianghnar loh chuan a thei fa leh a chênbeh chu nasa takin kan inthlau nghal mai a. A thei fate’n bur tam tak an kawl an dah khah vek theih lai a a pawisa nei lo zawkin man to zawka lei tur kan han zawng ţhin hi chu a fel chiah lo. Hnianghnar ila chuan engemaw chen chu kan intluk tlang thei a ni. Chu chu tui chungchang pawh a ni a, nitin a kan mamawh buhfai chungchangah phei chuan a ni leh zual. PDS kaltlang a kan ration buhfai dawn piah lamah hian bazar-ah buhfai hi man to lutuk lova lei tur a awm reng chuan engemaw chenah mipui kan intluk tlang a ni kan ti thei ang.

Kan sawi duh tak chu hei hi a ni. Kumthar dawnah sorkar thar kan nei a, mipui pawhin mothar tha chhawr taka chhawr duhna thinlung an nei mai thei. Chutih rual chuan kan sawi fo ţhin angin Mizoram mipuite hian chuti takin kan sorkar lakah thil sang leh ropui lutuk kan beisei lo. A hma a kan sawi ang tal khi chu hlawhtling sela chuan mipui hi an phun na vakin a rinawm lem loh. Tun dinhmunah hian khawvela ram rethei (third world) zing ami Singapore ram, ram hausa (first world) a dintu Lee Kuan Yew te ang pui pui hi kan duh ve a nih pawhin chuti thutin kan ram mipuite hian hruaitu-ah beiseina sang lutuk kan nei lem lo. Nei thei dinhmunah ding ila chuan kan lawm ngawt ang le!

Duhthawh a na viau chungin kan Chief Minister-in Aizawl-Silchar inkar kawngpui pawimawh tak mai a hmuna en a siamţhat hna thawk hma tura a hrilh hi a lawmawm phawt a. January kan chuangkai ţep a, hna thawh hun hi March thla thleng a la awm a, thla thum chhunga a siruk-la a an thawh chuan kan kawngpui hi a ziaawm hman ngeiin a rinawm. Thui tak thlira hnathawk ţan a ngai bawk. Kan ram kawngte hi kum 10 aţanga kum 20 inkar daih tura (a nihna tur anga) siam hi a pawimawh hle. Chutiang ni tur si fûr khat pawh daih lova an siam ţhin avanga kum tam kan kawngpui hi chhe ta a ni a. Kawng enkawlna tur sum (maintenance fund) hi a awm ngei ang a, mahse, siam zawh hlim enkawl zui rengna tur chu ruahman a ni ngai lovang. Chuvangin an kawngpui siam hi a tlo tur a ni a, kum a lo vei ang a, siamţhatna tur sum ruahman a awm hunah a hun takah zel siamţhat ni sela kan ram kawngpui hi a chhe lutuk bik reng lovang.

Thil dang tam tak a awm. Zirna kalphung siamţhat a pawimawh em em a, hriselna lam dah pawimawh a ngai a, chutih rualin ei leh bar leh nitin mamawha intodelh turin hmalak a ngai bawk. Nikhat a zawhfel theih a ni lo tih kan hria. Mahse, Nitish Kumar te’n kum 5 chhunga Bihar hmel an tihdanglam dawrh theih chuan Mizoram ang ram zimte, mihring nuai 10 awrh awmna hmel, a ţha zawnga siam danglam hi thil harsa a ni lovang. Tih tak takin thawk sela, hausak tum lo sela, ram rawngbawl sela kan ţha em em ang. ///////

Aside | Posted on by | Leave a comment

Mafaa Hauhnar passed away

H. Lalrinfela, Kum 43, Mafaa Hauhnar tia hriat lar chuan 30th December 2018, Pathianni zing dar 5 khan a chatuan hmun a pan ta. Chawhnu dar 1 ah vui a ni ang.

Thu leh hla lama zofate arsi lian tawngkam thluai thlum nalh thiam em em maiin heti teh thuta min kalsan mai hian zofate min thawng hle a ni.

A naupan lai
H. Lalrinfela, Mafaa Hauhnar tia hriat lar hi Kum 1975 May ni 19 khan Aizawl Tlangnuamah a lo piang a. H. Lalsanglura leh Lalrinliani te fa panga zinga a tlum ber a ni

St. Paul’s High school a kal laiin vengchhung YMA chanchinbu-ah sports columnist a ni thin a. Kum 1993khan vengchhung YMA-ina an kum puan bawhzui nana ‘Nungcha Humhalh Essay Competition’ a buatsaihah lawmman pakhatna a la a. Kum 1994-a Mizoram pum huap Chapchar Kût essay competition, Art & Culture Department leh Chapchar Kût Celebration Competition tangkawpina an buatsaih-ah lawmman pakhatna a la leh a. Young Writers’ Association: Mizoram-ina kum 1995-a “Poetry Contest” ram pum huapa a buatsaihah pakhatna a la leh a. Heta tang hian thu leh hla hi a luhchilh zui ta tak tak a ni.

A sulhnu thenkhat
Zoppen Club International (Mizo Poet Playwright Essayist Novelist Club)-ah hian founder secretary a ni a. Hun rei tak chhung, a hunlaia Chanchinbu tlangtla ber Sabereka Khuangkaih editor a ni a. Tunah hian ZOlife magazine executive editor a ni. Sawrkar Department hrang hrang te, College leh University thlengin creative writing competition-a endiktu-a hman thin a ni a. Mizorama television shows (Comedian Search, Talent Show and Look-alike contest) lar tak takah celebrity judge-ah a tang tawh. Seminar chi hrang hrangah, All-India Writers meet-ah te thlenga resource person-a hman a lo ni tawh. “Vulmawi Writer of the Year award” te pawh a lo dawng tawh nghe nghe. A lehkhabu chhuah reng reng hi a hunlaia best sellers kai phak vek a ni.

A lehkhabu buatsaihte

  1. Chawlhna Tuikam (1997) – essays, poems & criticisms
  2. Thaikawi Palai (1999) – Selected letters of JF Laldailova – edited
  3. Khawithlâr (2001) – Collected writings of R. Zuala – edited
  4. Thlaler Aurawl (2008)- essays, poems & criticisms JF-a
  5. German Ral Run (2010)- Collected writings of JF Laldailova – edited
  6. Vaihna Vartian (2010) – Selected Short stories Hlim Nî leh
  7. Nuihlai Nî (2011)- a galore of wit, humour and annecdotes Kungpui Miril JF Laldailova – (Writings about, by and for JF Laldailova) edited

A hlahril thenkhatte

  1. Hringnun hling,
  2. Khawnge ka ram?
  3. Ziakfung,
  4. Ka hlau tawh e,
  5. Inpumpêkna them,
  6. Thlaler Aurâwl,
  7. Thlaler Aurâwl (Hmawrbawkna),
  8. Las Palabras de amour,
  9. Nunna par tlawmngaihna,
  10. Tawn hnihna leh then lehna,
  11. Leitlangpui Zaihnunpui hnenah,
  12. Hun hlui leh Thar,
  13. Tahlai bâng rawh,
  14. Ka dil lo che,
  15. Tual kan lenna Tlangnuam,
  16. Thinlung leh thlunglu inhnialna,
  17. Mi a pialral,
  18. Kungpui Miril Sûnna,
  19. Tuahtirh tuahkhirh di,
  20. Kawng Zawnna,
  21. Chhandamna,
  22. Maicham,
  23. December 25, 1994 ,
  24. Kei leh nang,
  25. Sakhmel Tawn loh tleitiri,
  26. Panlai Ngaihawm,
  27. Hla Zangkhai,
  28. Ram Hruaitute Hnena Thurochhiah,
  29. Chhawkhleipar Zarpuii,
  30. Tual Kan lenna Zoram,
  31. Tan Hla ,
  32. Varpawhna,
  33. Hmangaihna Zarah ,
  34. Rauhsan Run,
  35. Shalom,
  36. Hmangaihna Saltang,
  37. Khawvel Pahnih,
  38. Beiseina Thuthlung,
  39. Kawl a Var Leh Ang,
  40. Chuailopari.
Aside | Posted on by | Leave a comment

Mizoram MLA te phone number

IN BIALTU MLA I BE DUH EM?

MAMIT District
1.HACHHEK – Lalrindika Ralte (INC) 9436743017 / 9862200266
2.DAMPA -Lalrintluanga Sailo (MNF) 9436240431
3. MAMIT -Er. H. Lalzirliana (MNF) 9674444074 / 8787702785

KOLASIB District
4.TUIRIAL- Andrew H. Thangliana (ZPM) 8415841483
5.KOLASIB – K. Lalrinliana (MNF) 9436143054
6.SERLUI -Lalrinsanga Ralte (MNF) 872951230

AIZAWL District
7.TUIVAWL- Lalchhandama Ralte (MNF) 9436140014 / 883709150
8.CHALFILH-Lalrinliana Sailo (MNF) 9436142657
9.TAWI- R. Lalzirliana (MNF) 9436140622
10.AZL N1-Vanlalhlana (ZPM) 9436156546
11.AZL N2- Dr. Vanlalthlana (ZPM) 9436365274
12.AZL N3 – C. Lalmuanpuia (MNF) 9436392631 / 9862566389
13.AZL E1- Zoramthanga (MNF) 9436155253
14.AZL E2 – Robert Romawia Royte (MNF) 9436144216
15.AZL W1-Lalduhawma (ZPM) 9862568870
16.AZL W2 -Lalruatkima(MNF) 9436140331
17.AZL W3 – VL Zaithanzama (ZPM) 9436159332
18.AZL S1 -C.Lalsawivunga (ZPM) 9436351142
19.AZL S2 -Lalchhuanthanga(ZPM) 9436140614
20.AZL S3 – Prof. Dr. Lalnunmawia(MNF) 9436153991
21.LENGTENG – L. Thangmawia (MNF) 9862378987 / 7005627610

CHAMPHAI District
22.TUICHANG – Tawnluia (MNF) 9436140507
23.CHAMPHAI N – Dr ZR Thiamsanga 9862735591
24.CHAMPHAI S – T.J. Lalnuntluanga(MNF) 9436191974
25.E. TUIPUI -Ramthangmawia (MNF) 9436151514 / 708507479

SERCHHIP District
26.SERCHHIP -Lalduhawma (ZPM)
27.TUIKUM – Er. Lalrinawma (MNF) 9436376133
28.HRANGTURZO -Lalchamliana (MNF) 9436141041

LUNGLEI District
29.S. TUIPUI – Dr R. Lalthangliana (MNF) 8837383154
30.LUNGLEI N – Dr Vanlalțanpuia (MNF) 8730926049
31.LUNGLEI E – Lawmawma Tochhawng (MNF) 9436147141
32.LUNGLEI W – C. Lalrinsanga (MNF) 9436140509
33.LUNGLEI S – Dr K. Pachhunga (MNF) 8014416134
34.THORANG – Zodintluanga Ralte (INC) 9436140667
35.W. TUIPUI – NK Chakma (INC) 9436140150

LAWNGTLAI District
36.TUICHAWNG – BD Chakma(BJP) 9436370128 / 897475273
37.LAWNGTLAI ‘W’ -C.Ngunlianchunga (INC) 9436148109
38.LAWNGTLAI ‘E’ – H. Biakzauva (MNF) 9436148095 / 8132044008

SIAHA District
39.SIAHA – Dr. K.Beichhua (MNF) 8131989581 / 9436149846
40.PALAK – KT Rokhaw (INC) 9612168342

Aside | Posted on by | Leave a comment