Pu Duhawman Aizawl west-I chhuahsan

MLA Bial 2 Aizawl West-I leh Serchhip Assembly bial tling kawp ZPM Candidate Pu Lalduhoma chuan Serchhip bial luahin Aizawl West-I bial a chhuahsan dawn.

Nimina ZPM thuchhuahin a tarlan danin Bial 2-a ZPM Block hruaitute chu 17 dec khan an thukhawm a, thutlukna chu ZPM thuneitu sang kutah an dah a. Hemi hnu hian ZPM Caucus chu an thukhawm a, Zoram Politics kalchhoh zel dan turte ngun taka ngaihtuahin ZPM Official Candidate Pu Lalduhoma Serchhip bial zawk luah turin thutlukna an siam ta a. Aizawl West – I zawk a chhuahsan dawn ta a ni.

Hetih lai hian Assembly Secretariat aṭanga thudawn danin Pu Lalduhoma’n a bial chhuahsan tur zawk hi official-in an la dawng lo a ni. An dawn hunah Election Commission hriattirin a remtihna angin bial a ruah thu hi hriattirna a chhuah ang a. Election Commission-in a hun ruatah by-election buatsaih a ni ang. Tun dinhmunah hi chuan nakuma Parliament inthlanpui ruala by-election hi neih a rinawm thu dawn a ni.

Aside | Posted on by | Leave a comment

Minister portfolio thlak

Chief Minister Pu Zoramthanga chuan Deputy chief minister Pu Tawnluia hna chanpual zinga pakhat Animal Husbandry and Veterinary department chu laksakin Minister of State Dr. K. Beichhua a pe.

Dr Beichhua hian a hna chanpual Social Welfare, Excise and Narcotics leh Sericulture department bakah AH and Vety hi a chan belh ta a ni. Hemi chungchangah hian chief secretary Pu Arvind Ray chuan nimin khan hriattirna a chhuah a. Hetah hian Deputy Chief Minister, Cabinet Minister leh Minister of State zawng zawng hian an hna chanpualte hi midang pui ni lova an mahni pual (independent) veka an enkawl a nih thu tarlan a ni bawk.

Aside | Posted on by | Leave a comment

Assembly speaker ah Pu Lalrinliana Sailo

Minister hlui Pu Lalrinliana Sailo chu Mizoram Assembly Speaker atan chuhtu awm lovin nimin 18 dec khan thlan tlin a ni.

November ni 28-a member 40 awmna Mizoram assembly inthlanpui a thlan tlin takte protem speaker Pu Lalrinawma’n thutiam tira MLA atana a lakluh hnu-ah ama kaihhruaina hnuaiah tho Speaker thlanna ni neih tura tih a ni a. Hemi chungchang hi sawiin Pu Lalrinawm chuan Pu Lalrinliana Sailo hming hi Pu Lalruatkima’n a rawt thu leh Pu Lalchamliana’n a thlawp thu a sawi a. Speaker dinhmun chuh tura hming pek luh dang a awm loh avangin chuhtu awm lova thlan tlin a nih tak thu a puang a. House leader Pu Zoramthanga, ZPM Legislature party leader Pu Lalduhoma leh Congress Legislature Party leader Pu Zodintluanga te’n speaker thar hi Speaker ṭhutna-ah an chhawm chho a ni.

Speaker ṭhutna a a ṭhut hnu-ah Pu Lalrinliana Sailo chuan chuhtu awm lova thlan tlin a ni chu lawmawm a tih thu a sawi a, house leader leh member zawng zawng, eptu member-te tiamin lawmthu a hrilh a. Member-te chu Mizoram Assembly hmingṭhatna leh zahawmna vawnhim pui-ah a sawm bawk. Speaker chuan tunhma lama a changtu Minister House chhunga a awm loh avanga Minister dangin zawhna an chhan sak a zawh belhna zawh phal loh ṭhin chu Assembly inkhawm kaihhruaina dan bu-ah a hmu zo lo niin a sawi a. Hei hian zawhna an chhan duh loh emaw hreh emaw avanga Minister-te assembly-a kal loh phah theih a nih avangin a kaihhruaina hnuaiah chuan a changtu minister awm lo mah sela zawhbelhna chu chhan tir a nih tawh tur thu a sawi.

Pu Lalrinliana Sailo chuan MLA te Mizoram pawna an zinin hmuah leh thlahna atan lirthei pek ni vek tawh se a duh thu House leader a hrilh a. Officer liante tluk lova mipui thlan tlin dah chu fel a tih loh thu sawiin tun aṭang chuan lirthei pek ni se a ti a, hemi avang hian sum sen belh tur a awm dawna a hriat loh thu a sawi bawk a ni.

House leader Pu Zoramthanga chuan Pu Lalrinliana Sailo a lawmpui thu sawi pahin Mizoram Assembly chu Parliament rorel inkhawmte leh state ṭhenkhat assembly inkhawma rorel thei lova inauh buai leh tharum thawhna hial a thlen ṭhin lai a fel leh mawi taka inkhawm ṭhinna a nih thu a sawi a. Mizoram Assembly inkhawm chu mawi, zahawm leh entawn tlak a nih zel theihna atana ṭan la zel turin speaker leh member zawng zawng a ngen a ni.

Eptu ZPM hruaitu Pu Lalduhoma leh Congress legislature party hruaitu Pu Zodintluanga, Speaker hlui Pu Lalchamliana leh BJP MLA awm chhun Dr Buddha Dhan Chakma te’n Speaker thar chu lawmpuina hlanin Assembly House zahawmna vawnghim tlat tur leh thlei bik nei lova rorel tura an duh thu an hrilh a.

Eptu hruaitute chuan sorkar chu a hnathawh ṭhatah thlawp tlat an tum thu leh ram leh mipui tana ṭha lo an tih erawh chuan na taka an do tur thu an sawi a ni.

Aside | Posted on by | Leave a comment

NLUP sem phalloh vangin lungawi lo.

  • MNF in NLUP an titawp?
  • NLUP dawng turte an hawihai.
  • MNF in phuba an la em ni?

Sorkar tharin NLUP a sem a rem tih rih loh avangin vawiin khan NLUP dawn tum engemawzat chu Lunglei District Veterinary Officer (DVO) pisa kawtah an pungkhawm a, lungawi lohna an lantir.

Lunglei-a kan Corr sawi danin Lunglei District Veterinary Officer (DVO) hriattirna a chhuah angin vawiin khan AH&,Vety Deptt hnuai a NLUP tanpuina dawng tur te chu Vety office ah an kal khawm a. Mahse AH&Vety Deptt. chuan NLUP hi sem chhunzawm a theih leh loh tiin NLUP dawng tur te an lo hrilh a, hei hian NLUP dawn tum te a ti hrilhhaiin a ti thinrim hle. A hmuna awm, Pu H. Darzinga, Lungei Dist. Congress Committee Secretary sawi danin NLUP dawng tur a tih te hi Lunglei khaw pawn lam engemawzat awmin motor te hire chawpa lo kal an awm nual a, an zingah hian nau pawm chunga lokal te awmin Krismas hma ngeia lak an beisei em em a ni a ti a. An zingah hian MNF mi leh sa engemawzah an awm ve niin a sawi.

Hetihlai hian Department lam pawhin NLUP tanpuina hi sem mai theih turin engkim tihfel tawh a ni a, pawisa pawh awmsa vek a ni tih thu leh Minister thar Dr. K. Beichhua’n lo sem rihlo turin Phone in Department lam hi nizan lamah a hrilh niin LDCC secretary chuan a sawi.

Aside | Posted on by | Leave a comment

KAN TRANSPORT MINISTER THAR LEH LIFETIME VEHICLE TAX

KAN TRANSPORT MINISTER THAR LEH LIFETIME VEHICLE TAX by Maṭana Pachuau

Kan Transport Minister thar Pu TJ Lalnuntluanga hi dan hremi a ni hlauh a, a tihzia ngawt mai. A chhan chu a portfolio chanah hian kan sorkar paihthlak tak khan a sum khawhral nasat avanga sum mamawh nasa lutuk phuhruknan dawt hmangin kum 15 atana lirtheir chhiah kha a la a. Hei hi mipui phurrit a nih bakah dawt hmanga chhiah lak a nihna hrim hrim avang pawh hian tih tawp nghal tlak a ni a. Kan sorkar thar hian mipui phurrit chhawkzannan tih hmasakah nei se thil duhawm tak a ni ang.

May 19, 2016 khan Mizoram Taxation Service Association (MITSA) General Meeting vawi 10-naah Chief Minister hlui Pu Lal Thanhawla’n khuallian niin hun a hmanpui a. Chutah chuan CVJAC-te nena an inkawmnaa lirthei lifetime tax lak chungchang a sawi a sawichhawng a. Chief Minister sawi dan chuan lirthei lifetime tax kum 15 chhung atana lak nghal tur tih hi “sawrkar laipui thu chhuak” a ni.

Kan Transport Minister in a hriatchian em em tur chu India constitution 7th Schedule List II ah hian state list tia hriat state sorkar thuneihna ziah a ni a. Entry No 57 ah heti hian kan hmu:

“Taxes on vehicles, whether mechanically propelled or not, suitable for use on roads, including tram cars subject to the provisions of entry 35 of List III”

Oct 23, 2013 dar 11.00 AM-a NASC Complex, DPS Road, Pusa, New Delhi-a Transport Development Council meeting neih a nih khan lirthei chhiah zat tur te sawiho a ni a. Chutah chuan Ministry of Road Transport and Highways in lirthei lifetime tax 6% chu 2 wheeler, car leh LMV ah te lak turin “recommendation” a siam a. Meeting neih zawhah khatih laia Road Transport Secretary Pu Vijay Chhibber-a’n sorkar thuchhuak nilovin sorkar laipuiin state tena an hman atana a rawtna a nih thu chiang takin a sawi a, “These are recommendations to the states, we are trying to prevail upon them” tiin news correspondent te hnenah a sawi a ni. Meeting-a tel tur zingah State Transport Minister te, State Principal Secretary (Transport) te, State Transport Commissioners te an nih avangin Mizoram sorkar Transport Minister leh sorkar hotu lian te pawh kha meeting ah khan tel tura ngaih an ni.

Pu Vijay Chhibber-a sawi leh chu central sorkarin state sorkar hnenah 6% a ni emaw engzat pawh nise lifetime tax lak hi vawi khatah a ni emaw a “instalment” pawhin a ti lui thei lo tih a ni a. A sawi nachhan chu sorkar laipuiin India constitution hnuaiah state in thuneihna a neihna lai a va tihbuai theih loh vang a ni. Hei hi federal system kan neih kalphung a ni a, kan Transport Minister bawk hian a chiang em em a ni.

Chief Minister-in Taxation hotute hmaa a sawi “sawrkar laipui thuchhuak” tih kha Indian constitution leh Road Transport Secretary thusawi atang tea ngaihtuah chuan thil awm theilo a ni a. Sawrkar laipui khuan Mizoram sawrkar hi kum 15 chhung atan vawi khatah lirthei chhiah lo la rawh u tia thuchhuah kha vawiin thlengin hmuh tur a la awm loh avangin a sawitu Chief Minister khan thudiklo a sawi tihna a ni a. Hre reng chunga thudik anga a sawi a nih phei chuan dawt muhlum a sawi tihna a ni. Kan Chief Minister chhuak ta khan dawt a sawi mai nilovin chu dawt tlawhchhan chuan chhiah tam tak a la tihna a ni.

Khami a sawi tukah khan Congress party mi leh sa te hmaah, “hmun dang aia Mizoram kawng a chhiat avangin ram dang angin lirtheite a tlo thei lo” tih a sawi a, “motor chhiah pek hun chu kum 10 tala tihniam a rawt tawh thu leh, ṭum khata pek tlak nghal lohin, instalment-a pek theih tura tih Central-ah a rawt tawh thu a sawi bawk” tih chanchinbu lamah kan lo chhiar leh a.

Khatah tak khan khatih hunlaia Transport Secretary Dr Franklin Laltinkhuma’n khan mawhphurhnaa ngaiin khatih hun laia Transport Minister Pu John Rotluangliana leh Chief Minister te kha thurawn a pek hun tak a ni a. Chief Minister leh Transport Minister te kha Transport Secretary khan thudik a hrilh lo nge a hrilh vek hnuah pawh kan sorkar hotute khan thudik chu pawm duh lovin mipui hnenah dawt an sawi tih kha zawhna lian tak a ni.

Tum khata pek tlak nghal tura sawrkar laipui thuchhuah a awm tia a lo sawi tawh avangin Chief Minister khan “instalment-a pek theih tura tih Central-ah a rawt” angin a sawi a. Mahse, transport hi state subject a nih avangin Chief Minister khan central sorkar a hranpaa a rawn a ngai lova, rawtna zu siam ngai thil nilovin ama hovin emaw Transport Minister hovin an rel fel vek thei a ni. Khatia sawi kual leh kha mipui bum tumna a nih loh chuan kan Chief Minister khan dan a hrelo tihna a ni anga, chu chu a nih loh pawhin Transport Secretary khan dan tlawhchhanin thurawn kim a pe lo tihna a ni ang. A enga pawh chu ni se, rorel dan fello tak chu a ni ta reng reng a ni.

State dang en lawk ila. Haryana sorkar in 2013 TDC meeting hunlai vel khan an tih dan an sawi a, vehicle lifetime tax kha vawi khata pek nilova a “instalment” ang zawnga pek/lak turin anni chuan an lo ti hrim hrim a. Khatih hunlaia Haryana Transport Commissioner Pi Ashima Brar-i’n TDC meetinga a sawi chu chhiah tihpun a nih chuan vawi khata pek nilova a “instalment” ang zawnga motor neituten chhiah an pek khan an tan phurrit a nih loh tur thu a ni.

Congress sorkar laia CVJAC te thil phut leh tihdan zawng zawng kha thil tihawm a tih theih loh a, invauna nena an che phei kha chu Home Minister sawi ang khan law and order kaihhnawih thil a ni daih tawh a, ukil Pu Lr Chhunga phei chuan zu rui chunga duty te a that lohzia a sawi lang hial a ni.

Zanin khan Kolasib lama journalist Pu Zmp Tlau A sawi dan chuan he lifetime vehicle tax hi sorkar paihchhuahtak khan a lo la la reng a, a lo la titawp lova. Amaherawhchu, sorkar thar hian a tihtawp dawna a hriat thu a sawi a.

Mipui te phurrit reng reng hi sorkar hian a ngaipawimawh nghal zel tur a ni a. Kan sorkar thar hian he lifetime vehicle tax hi a tihtawp chuan mipui tana thil tha a tih a ni ang a, sorkar hmasa dawtsawi pawh a titawp nghal tihna a ni ang.

Transport Minister thar hian a department Secretary Pu HL Rochungnunga hi zanin la la hian phone in bia se, he DAWT CHHIAH hi tih tawp a nihna tura ruahmanna siam nghal turin ti se a tha ngawt ang.

Aside | Posted on by | Leave a comment

Zu khap a ni

Zu zawrh titawp

Mizoram sorkarin sorkar agency hrang hrangte zu zawrh vawiin (18th Dec. 2018) aṭangin a titawp.

Sorkar hnuaia mi ni lo, mimal zu dawr zawng zawng pawh 21st Dec 2018 – 14th Jan 2019 chhung (Dry Day-a puangin) khar nghal vek a ni dawn a, Assembly Session hmasa berah Zu khapna dan pass a ni ang. Hemi chungchang hi CM Pu Zoramthanga’n Press Conf. kovin a puang.

MNF sorkar lakluh a nih (15, dec, inrinni) aṭanga ni 3 ah zu zawrh tihtawp a ni a. Zu dawr khar nghal a ni. Hetihlai hian Local zuar tamna khua te an lun leh hle tura ngaih a ni.

Aside | Posted on by | Leave a comment

Hnathawk turin inruahman fel

  • Kawng chgawng siam dawn.
  • Assam rifle ram hmang ṭangkai dawn.
  • Hnahthial, Khawzawl leh Saitual district tipuitling dawn.

Chief Minister Pu Zoramthanga chuan tunhma a an sorkar ang ni lovin tun ṭumah chuan hmasawnna hna thawk nghal phat turin an inruahman fel a ni a ti.

Inrinni a sorkara council of ministers te lakluh zawh hnu a Raj Bhavan tuala chanchinbumite a kawmnaah Pu Zoramthanga chuan an flagship program SEDP hmangin Mizoram chu India ram puma hmasawnna lama ṭhang ber leh mitin sum lakluh chawh rual (per capita) a sang ber ni turin ṭan an la dawn a ni a ti a. Mizorama ram awl tam a nih avangin chu chu hmang ṭangkaiin nasa takin sum lakluh tihpun a ni dawn a ni a ti a. An ngaih pawimawh tur zingah chuan zu leh ruihhlo vanga harsatna tawk ṭhalaite chhanchhuahna tur home changtlung tak din tura hmalak nghal a nih thu a sawi a. Hemi kawngah hian doctor-te, tlawmngai pawl leh kohhrante nen ṭanhona ṭha a pawimawh dawn a ni a ti bawk.

Pu Zoramthanga chuan kawngpui ṭha nei turin tha thawh nghal a ni ang, a ti a kawngpui chhe zualte siamṭhat hna thawh nghal a nih tur thu a sawi a. Ṭhalaite hmakhua atan infiamna lam leh information technology lam uar a nih tur thute, district 3 an lo puan tawh – Hnahthial, Khawzawl leh Saitual te chu a taka tipuitling turin kum thar budget-ah sum dah nghal a ni ang a ti. Aizawl lirthei tawt lutuk tihziaawmna’n kawng chhawng (elevated road) leh lirthei hunna tam tham tak siam a nih dawn thu a sawi bawk a. Hemi atan hian Assam Rifles chhuahsan tur ram chu hman ṭangkai tum a ni a ti.

Zawhna chhangin MNF president chuan BJP kaihhruai NDA leh NEDA ah an tel ve ve a, chuvangin an party thuneitu sangin thutlukna dang an siam a nih loh chuan an la tel zui zel dawn niin a sawi a ni.

Aside | Posted on by | Leave a comment

KHUAI IN ZUK HLUM

JAMPUI tlang dung a khaw pakhat BEHLIANGCHHIP ah nimin Inrinni chawhnu lam khan Pu Lalfaka ZDO officer khuai in an zuk hlum.

Pu Lalfaka hi a hlawhfate nen an huan vat a kal an ni a, a hlawhfa zinga mi pakhat pawh hi khuai hian chawhma lamah an bawm a, a inven nan khuai hi lo vai vein, amah leh amah hi a inti palh nghe nghe a, a kutah a chem kenin a invai palh a, thisen chhuak a tawp theihloh avangin an haw tir a.

Chaw te fakin chawhnu lam an bung ṭan chauh tihin khuai hian an hnathawk hi rawn bawh lehin an tlanchhia a, amah Pu Lalfaka hi a sir zawngin a tlanchhia a, khuai hian an bawm nasat avangin an huan ri a hnathawka awm ve Pu Thangvula hi auin, min lo chhan rawh tiin a han au a, Pu Thangvula pawh tlan thlain zuk chhan mai a tum a, amah Pu Lalfaka hian Meichher nen lo chuan lo kal suh a tih vangin meichher te siamin zuk chhan a tum a, hetia a nunna a chan hma hian Pu Thangvula hian khuaiin an zuk rawnna hmun aṭang hian a pawt leng dawrh a, mahse Pu Lalfaka hi pa lian tak a nih avangin chuti maia laksawn theih chi a ni silo nen, khuai hian an bawm nasa bawk nen, harsa tak chung leh an awmna bul vel a changel hnah ro te halin Pu Lalfaka hi Pu Thangvula hian a pua a, mahse pen thum vel bak a kalpui thei lova. An bul vela mei an hal vel chu khuai hian hlauin rei vsk lo hnuah an rem san ta a. Mahse Pu Lalfaka hi thisen sang nei leh zunthlum nei a nih bakah khuai zuk haw tak mai a nih avangin chhan hman a ni ta lo a ni.

Jampui tlang dung NEWS

Aside | Posted on by | Leave a comment

KOHHRAN HI POLITICS BALL-AH HMAN KAN PHAL TAWH TUR A NI LO

KOHHRAN HI POLITICS BALL-AH HMAN KAN PHAL TAWH TUR A NI LO by Tpa ngente

Kohhran humhalh nan hei hi ka’n sawi teh ang.

Campaign hun laiin pressbyterian kohhran chhungah pastor ṭhenkhat leh revival speaker ṭhenkhatten langsar tak leh hai theih rual lohin party sawichhiat bik leh sawimawi bik neiin pulpit tlang an tibawrhbang ka ti lo thei lo. Kohhran mipui thlarau nun pachhe tak tak tam tak thinlung an hliam a. Inthlan zawh hnuah pawh mi ṭhenkhatten inti revival speaker deuhin social media lamah political party ṭhenkhat an la rawn vawm zui bawk.

Kohhranin kum thum dawn kan aupui leh ram pum huap ṭawngṭai kan buatsaih khan enge Pathian hnenah kan dil kha? Zu zawrh tih tawp a ni lawm ni. Tichuan, election a lo hnai a, party tin manifesto a lo chhuak a, Zu zawrh tih tawp tum awm chhun chu an ṭawngṭai chhannaah pawm duh leh si lovin, sawrkarin zu zawrh tuma mipui mar min deh vel laia theihtawpa zu zawrh fakmawitute pawl din kha hriatthiam theih leh langsar takin revival speaker leh pastor ṭhenkhat ten an campaign pui ta sup sup a. Khang ho khan kohhran hmai an timawk hle mai.

Tin, mahni ṭawngṭainaa ding duh leh si lo ho hi dik tak chuan milem an ni a, pastor pawh ni se, speaker pawh ni se, kohhran tichhetu an ni a, mipui hmuh danah hian hniam tak an ni, rawngbawl chhunzawm zel tlak an ni lo.

Milem rual, mahni ṭawngṭai chhanna pawm duh lova a chhanna mahni duh zawnga thlen tir tum, kohhran kâwra hmanga an party ṭan zawngte campaign pui ching ho hi kan ram kohhran aṭang hian then fai an ngai hle mai.

Kohhran pumpui ang pawh hian politics a inrawlh dan chintawk zir ṭhat leh a ngai hle mai, hetiang reng reng chuan kohhran hi kan ti phirsi chhe zo vek ang tih hlauhawm tak a ni.

Kohhran hi Kristan a thisena min din sak a ni a, a chhunga pastor emaw, revival speaker emaw ten an duh zawng sawichhiaa an duh zawng campaign puina tura min din sak a ni lo.
Cp

Aside | Posted on by | Leave a comment

AUSTRALIA RAMIN ISRAEL RAM KHAWPUI ATAN WEST JERUSALEM A PAWM TA

AUSTRALIA RAMIN ISRAEL RAM KHAWPUI ATAN WEST JERUSALEM A PAWM TA! – Familia Fanai Lalţansanga

Australian Prime Minister Scott Morrison chuan a sorkarin West Jerusalem chu Isreal khawpui atan a pawmpui thu a puang ta.

Amaherawhchu, inremna an neih hma chuan Australia embassy chu Tel Aviv atanga Jerusalema an sawn loh tur thu a sawi thung a, Palestinian-hovin East Jerusalem an khawpui atana an hauh chu a hriatthiampui thu a sawi bawk.

JERUSALEM KHAWPUI INCHUHNA

Jeruslem khawpui hi Israel leh Palestinian te hian an inchuh reng a, inremna thuthlung siamna kawnga mutan lian ber a la ni chhawm ta zel a. Israel chuan Jerusalem khawpui hi hmakhawsang ata tawh Israel ram khawpui kumhlun leh chatuan khawpui, ţhendarh thiang lo tawpah an ruat a. Palestinian-te chuan kum1967 indonaa Israel in a lak tak East Jerusalem hi an khawpui atan an lo huallawk ve bawk a ni. Khawvel ram dangte hi chuan Jerusalem khawpui hi Israel ram angah an pawmpui ngai reng reng lo va, kum 1993 kuma Israel leh Palestinian te inbiaknaah khan Jerusalem khawpui chungchang hi inbiakrem dan azira a tahtawla sawi fel tura dah a ni.

Kum 1967 hnu lamah khan Israel sorkar chuan East Jerusalemah hian Juda-ho chenna in 200,000 lai a sak tawh a, hei hi international law atang hian dan kalh a ni. Kum 2017 December thla khan UN member state te chuan UN General Assembly-ah America ramin Israel khawpui atana Jerusalem a pawm ringawt chu awmze nei lo a ni tiin a phar a, Jerusalem chu Israel khawpui atana an nemnghet ve ringawt chu sut lehnghal turin an phut bawk a ni.

DONALD TRUMP-A’N ISRAEL KHAWPUI ATAN JERUSALEM A PUANG

2017;

February 16: Donalt Trump chuan Israel leh Palestinian ram pahnih siam tumna policy chu a hnawl a, Israeli Prime Minister Benjamin Netanyahu nen inbiakna an neih hnuin single state solution a pawm thu a puang.

March 24: US Senate chuan dan phal lohva Palestinian rama Isreal fate in leh lo bengbel tura a ruk a rala tanpuina petu David Friedman chu Washington’s ambassador to Israel atan a ruat.

December 6: Donald Trump chua sawiselna tam tak karah Tel Aviv khawpui atangin US embassy chu Jerusalem khawpuia sawn tur a nih thu a puang a, Israel ram khawpui atan Jerusalem a pawm thu a puang ta bawk. Hei hi kum tak tak US policy-a an lo vawn nghet tawh a tihdanglamna a ni.

2018

January 3: Trump chuan Palestinian te chu inremna kawnga inbiak anduh loh avangin US tanpuina sum titawpah a vau.

January 17: US chuan Palestinian raltlan mi mtd 5 te tanpuina sum pek tur $125m atanga $65m pek tur a sut.

May 14: Israel ram pian ni, Palestinianten chhiatna rapthlak ni an tih niah tak US chuan Jerusalem khawpuiah US embassy chu officialin a hawng.

August 25: US chuan Palestinian te hnena chhawldawlna sum a pek tur $251m atangin $200m a pek tur chu a hrek a, a pe ta lo.

August 31: US State Department chuan Palestinian raltlante chhawmdawlna sum a pek tur zawng zawng a titawp leh vek.

September 9: US chuan East Jerusalema damdawi in 6 tanpuina tur sum $25m pek tur a titawp leh.

September 10: US huaihawta Palestinian te leh Isreal inbiakna turah PLO an tel duh loh avanginUS chuan Washington, DC-a PLO mission a titawp.

September 17: US chuan conflict resolution aid atan Waet bank leh Gaza-a Palestinian te tan $10m pek a tum thu a titawp.

AW, JERUSALEM!

Thing bul, lung bul be mai mai a, ramhuai hlau reng renga inthawi ţhin hnam mawl tak chuan Juda sakhaw si per Kristian sakhua sa kan phun hnu hian kan lungkham ram chu Rih lipui thlafam leng kaina leh Pialral ram nuam atangin Jordan lui daikai-in Hmangaih Johana inlarna hmuh angin Jerusalem khawpui thar kan thlir ta thup mai a. ‘Aw! Ral mai rawh lei ninawm! tih hla sa sa thin mah ila,he khawvela kan la chen chhung chuan Jerusalem khawpui hi kristiante chauh pawh ni lovin Juda kulmuk Judaism leh Dialbola pawlte emaw kan tih mai Mosolman(Islam) sakhaw mite pawhin an khaw thianghlim, an lungkham ram ngei chu a lo ni ve mek bawk a ni.
‘Mi ama ngaihin a kawng zawng zawng a thianghlim a’ tihziak angin mahni rindan, mahni sakhaw biak leh mahni Pathian biak dan chu dik vekah ngai ţheuh chungin Jerusalem thar chu rinna mita thlir chungin kan pan mup mup ţheuh hlawm chu a ni a!

JERUSALEM HMING TOBUL

Pathian kohna ringa Abrama ram tiam pana a vahvaihna Kanan ramah khan Salem khaw lal Melkisedeka chuan chhang leh uain a rawn la a: Abrama chu mal a sâwm a,tih ziak a awm a(Gen 14;18), Aigupta lehkhazial hluiah chuan 1900 BC vel khan tuna Jerusalem hi Rushalimum an ti a, BC 1300 velah chuan Uraslim an ti a, BC 600 vela Asuria lehkhaziala an ziak dan chuan Uruslimmu an ti a, a Hebrai tawng chuan Yerushalem an ti niin an sawi bawk. A khaw hming awmzia hi Salem lungphum emaw, Pathian lungphum tihna emaw a ni awm e.Salem/Shalem tih hi hmakhawsang Ugaritic thawnthu-a an pathian nu, hmeltha leh mawi tak hming a ni awm e.

DAVIDA KHAWPUI

1000 BC vel khan Davida chu Jerusalem-ah an kal a (chu chu Jebus a ni); chutah chuan Jebus-hote chu an awm a. Davida chuan Zion kulh chu a la ta rêng rêng a: chu chu Davida khua tih a ni ta a. Davida chu kulhah a awm ta a; chuvangin Davida khawpui an ti a ni.955 BC vel khan Juda-ho ngaihlut ber leh roh em em,Sinai tlanga Mosia hnena Pathianin a pek thupek sawm ziakna lungphek 2 an dahna thuthlung bawm chu Davida khawpui-ah chuan zawn luh a ni ta a.Davida chuan a khawpui hming chu Jerusalem‘Muanna khawpui” tiin a thlak a.

SOLOMONA TEMPUL

Davida’n Bethsebi laka a fa,Solomona chuan Jerusalem Tempul chu mi thiam 33,000 kaihhruaina hnuaiah chhiahhlawh 150,000 zetin kum 7 zet a sa a, 957 BC-ah a sa zo va, A sakna hmun hi Moria tlang,a pa Davida-in Onana hnen atanga rangkachak sekel 600-a a lei a ni a. He lai hmun hi Abrahama’n a tar lam fa Isaka halral thil hlana hlan a tumna tlang kha ni awm tak a ni a. Jakoba, a u Esauva hlauva a Beer-seba atanga Haran khaw lam pana a tlanchhiat kawnga zana a mut laia inlarna a hmuhna hmun pawh kha Moria tlang bawk hi niin an hria a ni. Jakoba chu a muhil a han harh a, “He hmunah hian LALPA chu a awm ngei mai’,ti-a lung a lukhama a dah chu a la a, lungphun atân a phun a, a chhipah chuan sahriak a leih a.

Chu mi hmun hmingah chuan Bethel (Vanram kawtchhuah) a vuah a. Jakoba’n Bethel hmuna a lung lukham sahriak a leiha a phumna chungah ngei Solomona Tempul din niin an sawi bawk a ni.

LAL SOLOMONA

Solomona chuan nupui tam tak a nei a, a lo upat tak hnu chuan a nupuite chuan mi lemte be ve turin an lo thlemthlu ta hial a,chung milem biakna tur inte lamin a sa ta a.A chungah Pathian a thinur a, Juda lehkhabu ziaktuten lal fing ber anga an lo sawi chu lal â tak leh sual tak a lo ni ta a, Pathian chuan a pa Davida avang chauhvin a dam chhung chuan a ram a laksak lo chauh ta zawk a.A sual avangin Pathianin a dotu tur hmelma Jeroboama a lo siam ta a ni.

Solomona fapa Rehoboama lah kha a lo fing lo leh tlat pek a,Lal Davida huna Juda ram leh Israel ram pum khata awm thin kha ram bung hnih-ah an lo inthen darh ta a, Solomona fapa,Israel hnam 12 zinga hnam 2 ,Juda leh Benjamina thlahte chunga a lalna ram chu Juda ram a lo ni ta a, an khawpui chu Jerusalem a ni chhawm ta zel a.Jeroboama, Israel hnam 10 te chunga a lalna ram chu Israel ram an ti a,an khawpui chu Samari a ni.

Israel hnam 10 ten Jehorama an lal atana an thlan achin kum 254 hnu,lal sual tak tak 19-in ro an rel hnuin Israel lal ram chu Asuria lalin a rawn run ta a,Israel hnam 10-te chu tunthleng hian an awmna chin pawh hriat theih lohvin hnam dang karah an ral thumin an Khuangchera bo hlauh a.Juda leh Benjamina thlahte lal atana Rehoboama a awm a chin kum 388 hnu,lal 19 leh lalnu 1 an neih hnu chuan Babulon ral a lo lian a,Juda lal ram pawh chu a lo kin leh ta a ni.

NEBUKADNEZARA

604 BC leh 597 BC-ah te Babulon lal Nebuchadrezzar II chuan Jerusalem runin Juda lal Jehoiakina a man a, lal atan Zedekia a dah a,Babulon lal thu thu-a awm turin a intiam a,nimahsela a thuthiamte hlen tum lovin,a hel leh ta mai a.Zawlnei kal tlanga Pathian thupek a pawm duh bawk si lo va.Kaldai/Babulon ho chuan Jerusalem chu an bei ta vak mai a, thla 18 an hual a,ei tur a awm tak loh avangin Zedekia chu a sipaihote nen zanah an tlanchhuak ru a. Kaldai-ho chuan an um a, an man ta a, a mithmuh lai ngeiin a fapate 2 chu an that a,amah Zedekia mit chu an kherchhuahsak a,thir kawl an buntir a, a thih thlengin Babulonah an tantir ta a.Jerusalem Tempul leh in te chu an hal chhia a, kulh zawng zawng pawh chu an tichim vek a,an sakhaw bungbel thianghlim serh leh sanga an hman zawng zawng pawh Babulon lamah an kalpui vek a.

Babulon/Kaldai-hovin in Jerusalem Tempul an rawk hma hian Pathian thuthlung bawm kha a bo daih mai a, tunthleng hian a bo hlen ta!

ZERUBABALA

Judate mi sala kum 70 an awm kum chu a lo vei ta a,BC 539 kum khan Persia lal Kura a lo lian leh ta a, Babulon a hneh ta a. kum 200 zet liamta a Zawlnei Isaia’n “Pathianin lal ropui tak Kura(Cyrus) a la rawn laltir ang a, “A ni chuan Jerusalem khua leh Tempul chu din thattir leh turin a mite chu an ram lamah a hawntir leh ang”tia a lo sawi lawk kha a lo thleng ta a.Persia lal Kura chuan Judate chu an rama kir leh a phalsak a,An vai erawh chuan an kir leh rih lo va.

Jerubabela hova kir lehte chu Juda mi 42360 an ni a, Jerusalem an thlen chuan Nebukadnezaran a chhutchhiat a, a kalsan lai ang khan a ngaiin a lo awm reng a.Khaw kulhte,an inte,biak in te kha a chim rem rum a, a kang chhe vek mai a. Tempul an din thar leh tan ta a,Samari mite chuan tanpui ve an tum a, Jerubabela leh puithiam lalber Jeshua leh Israel upaho chuan, “Pathian in sakna-ah zawng in lo tel ve hlek lovang” an ti tlat a.Samari mite thinrim chuan an Tempul sak lai tihpuitlin loh dan tur zawngin Persia lal Artazerzia hnenah an hek tak avangin Tempul sak chu a chawlhtir ta vek a.

KA THLARAU ZAWKIN LE!

Tempul an sakchhunzawm theih loh hnu chuan anmahni in sak thu ngawt chu an ngaihtuah ta mai a, Pathian a lung ni ta lo va. Zawlnei Hagaia leh Zakaria te a tir ta a. Hagaia chuan “Biak in chhe rem ruma hmu reng chung siin, nangni in ropui leh nuam tak taka in awm bik si hi a dik em?Tempul sak inthlahthlam ta hlauh va, mi tinin mahni in sak ngawt mai in rian tak noh noh avang hian a ni lawm ni in hmuingil theih tak loh va, lawm pawh in lawm theih loh hi?’ Tlanga thingte han kit ula, zai ula, Tempul sak chu bei zawm leh rawh u,hei hi Pathian thupek a ni tiin a tlangau va.Zawlnei Zakaria kaltlangin Pathianin a thiltum a rawn puang ta bawk a. “Chakna ni lovin,thiltihtheihna ni hek lovin, ka thlarau zawkin le”(Zak. 4;6) a rawn ti ta a ni.

Pathian atanga thuchhuak mihring tawnga sawichhuah hi hriatthiam a har viau ngei a, tinungtu thlarau thianghlim hriattirna atang lo phei chuan Pathian thu hi hriat kim vek chi pawh niin a lang lova.Heta zawlnei thuchhuak hi ‘literal’ tak chuan Jerusalem Tempul sak chungchang a ni ang tih a rin theih rualin ‘symbolically’ chuan Lal Isua thawhlehna a chan hnu-a thlarau thinghlim paraklete, ţanpui vartu hnai reng hnatawh dan zel dan a sawina pawh a ni thei mahna! Pathian thu hi a nung a,a thuziak chu ngai reng ‘static” mah se mihring mi hrang hrang thinlunga a hna thawh dan, rilru a deh dan erawh chu a inang lo thei a, a danglam ‘dynamic”thei tih pawh hi kan pawm thiam a tul awm e!

Tichuan, Zawlneite kaltlanga Pathian thupek angin Tempul chu an sa tan leh a,Samari mite bawk khan an rawn tibuai leh a. Tempul sak chhunzawm khapsaktu Persia lal kha a lo thi tawh a, a aiah Lal Daria lal lai a ni a.Samari mite hekna lehkha atang chuan thil kal tawh an han chhuitir hnu chuan Tempul sak chhunzawm a phalsak mai bakah Samari mite chu bawngpa tuaite,berampachal leh a notěte pawh an pumhal inthawi nan lo pe tel tur leh buhte,chi te, uain te, hriak te pawh puithiamte’n an lam a piangin lo pe zel bawk turin thupek a chhuah ta a,BC 538 kuma an sak ţan kha BC 516 kumah an sa zo thei ta a,bawngpachal 100,berampachal 200,beramno 400 leh kel 12 talhin Pathian hnena inthawi nan an hmang a,hlim takin an kut ta a ni.

NEHEMIA

Daniala leh a thiante leh Lalnu Estheri te hi Persia lal sala an awm lai chanchin a ni a,Zawlnei Hagaia te,Zakaria te Malakia te,Ezra te leh Nehemia te hi Persia lal hun laia mi bawk an ni.Zerubabela leh a hote Jerusalem khuaa an han kal achin kum 90 zet a lo vei ta a. Jerusalem khawpui kulhte chu a la chim rem rum a, kulh kawngkharte pawh a la tlu phengphung mai tih thu a hriat chuan Persia lal Artezerzia I-na uaiin no hlan thintu Halikia fapa Nehemia chu a ţhu chawt a, a ţap a, lungngai takin chaw a nghei a,van Pathian hma-ah a ţawngţai a.Jerusalem kulh chhiate siam tha turin Persia lal hnena haw an dilna chu Pathianin lal chu a phaltir zel a.Jerusalem khawpui chu a thleng ta a,Judate hnenah chuan “Hawh u ,sawichhiata kan nih tawh loh nan Jerusalem kulh chu I din thar leh ang u” tiin a sawm a, “I tho ang u khai;I din teh tak ang u” an ti a. Hmelma Sanbalata leh Tobia te tihbuai karah kulh siam that chu an bei tlat tlat a,ni 52-ah an zo thei ta a ni.Nehemia chanchin hi BC 445-433 inkar vel thil thleng a ni awm e.

ROM LALRAM

Persia chuan BC 332 thleng Jerusalem chu an awp a, Greek mifing Aristotle zirtir Alexander the Great (356-323)chu mi ropui tak leh ral rel thiam takah a lo chhuak leh ta a,Persia lal Daria III-na tutlawmin Jerusalem chu a la leh ta a, BC 332 atangin 323 thleng a lal ramah a senglut a,a hnu lawk Aigupta bawkin Jerusalem chu an run a, BC 320 atanga BC 198 tleng an thuhnuaiah an dah leh ta a. Seleused lalram hnuai-ah 198 atangin 63 thleng a ni leh a. BC 63 kumah Rom sipai hotu lu ber Pompey chuan a la leh ta thung a,AD 312 vela Constintine ringtu-a a inleh thleng khan rom thuhnuaiah an awm a ni ta ber a.Heroda ropuia lal lai (BC 37-AD 4) chhung khan Jerusalem Tempul a dinthar leh a a hmun tihzau nan Khawthlang lam bang(tuna Tahna bang an tih tak ) hi a rem ta a ni.

Rom sorkar chuan Jerusalem enkawltu procurator an thlakthleng chhen a, a panga-na Pontius Pilata chuan Isua khenbehna tur thupek a chhuah a. Rom sorkar lakah Judate vawi 2 an hel avangin AD 70 kum khan Isua’n a lo sawilawk ang ngeiin Jerusalem chu tihchhiat a ni leh a.AD 135-ah Rom lalber Hadrian chuan Jerusalem khawhlui hmunah khawthar Aelia Capitolina a din a,Tempul hlui hmunah chuan Jove(Greek Jupiter) pathian biak in a din a,hei hi Byzantine lal Constantine kristiana a inlehhnu khan tihchhiat leh vek a ni thung.

Lal Constantine nu Empress Helena-in AD 326 kum khan Jerusalem khawpui a tlawh atang khan he khawpui hi kristiante tan muanna nun bul a lo intan ta a.Helena hian Kalvary tlangah Lal Isua an khenbehna thing kraws ngei kha a hmuchhuak niin an sawi a.

Hetiang thilmak hmu anga an insawi avang hian Church of holy sepulcher AD335 kumah an sak zawh phah ta reng reng a. Chuta tang chuan tun thleng hian kriatiante chuan ram thianghlim tlawh (pilgrimage) an intihhmuh tan ta a ni. Khawvel hmun hrang hrang atang lo kal kriatiante’n an tlawh tam ber hmunte chu Isua pianna Bethlehem te, Isua an khehbehna hmun Golgotha, Kalvari tlang an tih bawk, Adama luruh an phumna nia titi an sawi te, Isua ruang an zalhna nia ansawi church of the holy sepulcher leh Isua van a lawnna hmun nia an sawi leh Davida an phumna nia an sawi Olive tlang te an ni.

• AD 614 kum khan Persia chuan Jerusalem a run leh ta a, Tempul leh kriatiante hmun pawimawh tam tak an tichhia a, mi tam tak an that bawk. Mosolman sakhaw dintu Muhammad thih hnu kum 6-na-ah Mosolman puithiam sipai hotu Umar chuan Jerusalem a la a, mosolman sakhua hi kriatian sakhua aia a ropuizia entir nan Muhammad vana a lawnna nia an hriatna hmun-ah Dome of Rock ropui tak hi a saktir a,
• AD 969 kum atang khan Jeruslem khaw enkawlhna chu Fatimid Caliph of Egypt kutah a awm leh ta thung a, Juda biak in synagogues leh kristian biak in te chu a ţhiahsak leh ta a.
• AD 1071 kumah Turks hnam Seljuk chuan Jerusalem chu a la leh ta a, kristianho biakzin a khapsak ta tlat a.Chu chuan khawtlang lama kristian ramte a tithinrima the Crusades indona a chawkchhuak ta a,kristian tangrualte chuan 1099 kumah Jerusalem chu an lalet leh thei ta a ni.kum 90 Kristian kuta a awm chhungin Mosolman dome of the rock chu Templum domini( Pathian biakbuk) tiin an hming an thlak a,the church of holy sepulcher pawh an dinthar leh ta a.
• Mosolman-ho bawkin AD 1187 kum khan an la leh ta a,Mamlukes ho kutah kum zabi 13-na atangin kum zabi 15-na thlengin,(kum1229-1239 leh 1240-1244 inkar tih bak chu) a awm leh ta thung a ni.Kum zabi 19-na hnu lam atang tawh khan khawvel ramhrang hrang atanga Judate chu an ramah an kir leh ta a, Jerusalem khawpui mihring awm zatve deuh thaw hi Juda mi an lo ni ta a.
• 1949 kuma indona-ah khan Israel chuan Jerusalem khawpui veng thenkhat a la a, 1967 indonaah khan a khaw pumin a la ta a, an ram capital-ah a puang a,khawvel ram tam tak chuan an pawmsak (recognized) duh lem lo va, Palestine mite chuan an ram khawpui atan an hual lawk ve thung a ni.

Jerusalem khawpui chunga boruak hi sakhaw hran hrang betute beiseina duhthusam tawngtaina chi hrang hrang a inkalthleh zut zut a, boruak a rit a, a ipik a hle, niin poet Yhuda amchai chuan a sawi. Molsolman sakhaw hmuchhuaktu zawlnei ropui Muhammad khan van a lawn hma khan Jerusalema vawikhat tawngtai hian hmun danga vawi sang sawm tawngtai a hen tiin a lo sawi avang khan mosolman ho chuan Jerusalem hi an tlawh zut mai a, Dome of the Rock –ah mihring nuai 2-in Ramadan ni serh hmanga Allah chibai bukin an han ţhingţhi teh reng a nih chu!

Khawvel hmun hrang hranga Juda sakhaw zuitute chuan Jerusalem khawpuia an hmun serh thinghlim Solomona Tempul lo sakna hmun hnaih theihna ber Ţahna bang chu an rawn pan khawm reng bawk a,an thlarau nun atan kawng an sialah an inngai a ni.

Ram tin kil tina kristiante chuan nghafuan ang maiin Good Friday leh Easter Sunday hmang turin Jerusalem hi an pan khawm zut zut hlawm bawk a, Jerusalem khawpui hlui-a lungngaihna kawng Via Dolorosa zawhin kraws te an pu a, a tuarna tawmpuiah an inngai a, thlarau thinghlimin a zawhpui ve-a inhriaiin an rinna namen lova tihchakin a awm niin an hre ve bawk thin a ni.

Jerusalem hi Israel ram official-a an chhinchhiah dan chuan BC 2800 vela din a ni a,tunah hian mihring 910300 an cheng mek a,a khaw awmna zawn tak hi 31º47´N35º13´E a ni a,a khawpui huam chin hi 125.156 sq.km a ni.

Jerusalem khawpui hi sakhaw hrang ţhiau pathum zuitute thlarau nun beiseina leh lungkham insuihfinna, an tawngtaina luipui anga a luanna hmun a ni a, beisei dik lo leh ring dik lo,Pathian biak dan A pawmtlak ni lo hi chu kan awm chiang dawn ropui mai si a! Chu kan rinna dik bera kan ngaih ţheuh avanga kan lei hringnun kawng bumboh leh hreawm, thlaler ram ro chu chhel tak leh huai taka kan zawh theih phahna tur tha thona,siamthar lehna tuikhur hlu kan lo hmu fuh a nih a hnu,chu aia hamthatna,engthawlna leh nihlawhna dang a awm tawh chuang dawn em ni!

A lehlam zawng taka thlir chuan kan rinna hian min ti â ta emaw tih turin at kan so chu a ni leh lawi si a, Karl Marx’n “Religion is opium of the mass” a tih pawh hi a pawm-nah-awm rum rum thei dawn alawm maw le!

Aside | Posted on by | Leave a comment