STOOL A INVUAK VANGIN BORAL

Tv. J.Chuau liana(34) s/o PC Thuamliana Darlawn chhimveng chu Oct.21, 2017 (Inrinni) zing dar 7 bawr velah Tommy Lalchhanchhuaha s/o Thanpari(26) chuan Stool in a vua a. Inrinni zan dar 10:30 khan Chuaua hi Aizawl panpui a nih mek laiin Sesawngah a boral a ni.

Intihbuaina an nei lo niin hriat a ni a. An lenna Thutthlengseia Chuaua mu chu in neitu Pi Lalhlimpuii chuan, “Thu chhuak vela, hei inleng an awm hi,” tiin a hrilh a, thinrima hrilh pawh a ni lo nia sawi a ni. Inneitunu chuan eirawng a bawlsan leh mai a, chutia eirawng a bawl lai chuan Tommy-a chuan in neitute thlavang hauh ni awm takin stool in Chuaua mu chu a luah a chhu a. A chhutu chu a hawng nghal daih avangin inneitu in a lo hmu lawk silo. Inleng pakhatin rawn lutin Chuaua thisen baw nuaih a zuk hmuh hnuin buaipui damdawiin lam an kalpui nghal a ni.

Zing lama an inkhawih hnu hian Chuauva hi Darlawn damdawiinah kalpui a ni a. thui ngai leh dressing te tih zawh a nih hnuin In lamah an haw leh a. Harsatna em em nei zui anga a awm loh laiin chawhnu lam atang chuan thi in a luak a, a kaih tak reng avangin Damdawiinah bawk kalpui a ni leh a. Nikhawhre lote a a awmzui tak zel avangin Aizawl lam hi panpui an ni a.

Tommy-a hian a chhut chhan ber ni a inneitunuin a sawi chu a ruih at vang bak sawi tur a hre lo. Pathianni khan Darlawnah postmortem a ni a. Chuaua kutthlaktu Tommy-a hi Darlawn Police ten an man nghal a ni.

Advertisements
Aside | Posted on by | Tagged , , | Leave a comment

STOOL A INVUAK VANGIN BORAL

Tv. J.Chuau liana(34) s/o PC Thuamliana Darlawn chhimveng chu Oct.21, 2017 (Inrinni) zing dar 7 bawr velah Tommy Lalchhanchhuaha s/o Thanpari(26) chuan Stool in a vua a. Inrinni zan dar 10:30 khan Chuaua hi Aizawl panpui a nih mek laiin Sesawngah a boral a ni.

Intihbuaina an nei lo niin hriat a ni a. An lenna Thutthlengseia Chuaua mu chu in neitu Pi Lalhlimpuii chuan, “Thu chhuak vela, hei inleng an awm hi,” tiin a hrilh a, thinrima hrilh pawh a ni lo nia sawi a ni. Inneitunu chuan eirawng a bawlsan leh mai a, chutia eirawng a bawl lai chuan Tommy-a chuan in neitute thlavang hauh ni awm takin stool in Chuaua mu chu a luah a chhu a. A chhutu chu a hawng nghal daih avangin inneitu in a lo hmu lawk silo. Inleng pakhatin rawn lutin Chuaua thisen baw nuaih a zuk hmuh hnuin buaipui damdawiin lam an kalpui nghal a ni.

Zing lama an inkhawih hnu hian Chuauva hi Darlawn damdawiinah kalpui a ni a. thui ngai leh dressing te tih zawh a nih hnuin In lamah an haw leh a. Harsatna em em nei zui anga a awm loh laiin chawhnu lam atang chuan thi in a luak a, a kaih tak reng avangin Damdawiinah bawk kalpui a ni leh a. Nikhawhre lote a a awmzui tak zel avangin Aizawl lam hi panpui an ni a.

Tommy-a hian a chhut chhan ber ni a inneitunuin a sawi chu a ruih at vang bak sawi tur a hre lo. Pathianni khan Darlawnah postmortem a ni a. Chuaua kutthlaktu Tommy-a hi Darlawn Police ten an man nghal a ni.

Aside | Posted on by | Tagged , , | Leave a comment

KAN KALPHUNG HI TIHDANGLAMA SIAMTHAT A HUN TA TAK MEUH E by M. Lalmanzuala

Pawl țhenkhatin an Souvenir-a chhuah atana min dîlna lamah he article kum 2012 daih tawha ka ziak kha ka pê a. He’ng ka thuziakte hi a țha lozawngin an la dik deuh vek mai a. Kan chhe zual tawh zawk emaw tih khawpin kan kalphungte hian belh chian an dawl lo a ni. Ngaihtuahna in lo hmanzui beiseiin ka han post a ni e.


Kan tunlai nun hian belhchian a dawl lohzia leh a pawnlanzia hi kan sawi fo tawh țhin a. Insiamțhat kan mamawhzia pawh kan sawi fo tawh țhin. Chuti chung chuan kan kalphung kawng hrang hrangah belhchian kan dawl lo tawlh tawlh a, Rev. Thansiama’n, “Kan pawnlanzia hi a thûk a ni,” a tih țhin chu a dik zual zêl sî a; insiamțhat dan kawngte a awm theih mial beiseiin belhchian kan dawl loh zualna laite chu kan han tarlang leh dawn a ni.

Politics leh Sawrkar :
Politics hi ram leh hnam inkaihhruaina kawnga a pawimawh ber a ni kan ti lo thei lo va. Hemi kawnga kan kal sual chuan kawng dangah kal dik ngaihna a awm lo tih theih a ni. Heti lama kan kal sual nasatzia hi i han tarlang phawt teh ang.

Democracy chu mipuite’n an țhatna tura ro an inrêlna kawnghmang a ni a. An aiawha an thlan MLA leh MP te chu an rawngbawl turte an ni. Hei hi thil awmdan tur a nih laiin rawngbawl tura thlan tlinte chuan thlan lal an inti a, chutiang tak chuan an khawsa nghal a; mipuite pawhin chu chu a nih dan tur rengah kan pawm nghal bawk a. Kan thlan LAL te chu lawmpuina rilru pu ni lovin, an thiltihtheihna zâr zo beisei vang zâwkin chibai kan bûk nghal a. Anni pawhin Sawrkarina thuneihna sâng tak leh thiltihtheihna tam tak a pêkte chu mahni hmasial nana hmang thei tur an nih inhresa ranin an nihna thar neih chu thil lawmawm tak leh chhuanawm takah an ngâi a. Ram leh mipui tâna hnathawh tumna chu nei lo mah se, lemchan thiam tak an nihna chu hmang țangkaiin an nihna chan chu inthlahrunna leh zahna chhe tê pawh nei lovin, ‘Pathian malsawmna, Pathiam remruat’ ti tein an chhâl țhin a ni.

Sawrkar pawisa chu ram hmasawn nan leh ram leh mipuite mamawh thil danga hman tur a nih laiin, kan thlan LAL te chuan an mimal tâ anga ngaiin anmahni tân te, an chhungkhat laina leh țhian țhate tân leh politics-a an țangkai pui theihna thilah an hmang a. An thuneihna leh thiltihtheihna dang pawh chutiang tho chuan an hmang a ni. Tun kum 45 zet chhûnga kan Chief Minister leh Minister ni tawhte zîngah ram leh mipui tâna thil țangkai leh chhenfâk tlâk min hnutchhiahtu an la awm mang lo hian he kalphung țha lo tak hi a hrilhfiah chiang hle a ni. Kawng hrang hranga hmasawnna kan neih vête hi chu Sawrkar kalphung pangngaiina a ken tel vête zînga mi an ni a; ui cho pawh Chief Minister emaw Minister emaw se la, kan hmuh tho tura ngaih theih thil an ni.

Hetianga mipui chanâi tur an hui zawh deuh veka neih loh aram pawh nei tawh mang lo leh chhungkhat laina leh țhian țha dangte pawh dawmkân loh alawi an neih mang loh tawh hnu-ah pawh duhtâwk neih ahnêkin an hlawh leh thil dang danga hamțhatna thilah an inpêk belh zêl a. Chawmhlawm State-a kan thlan lalte chu India rama thlan tlinte zîngah hlawh nei sâng ber leh hamțhatna dang nei ngah ber-a chhal theih an lo ni ta hial a ni. Nihna an neih tawh loh hnu pawha nuamsa tâwk taka an khawsak theihna tur an ruahman fel vek tih theih a ni. Sum leh pai lama hnianghnar bâkah mipui hmuh leh ngaiha ropui leh pawimawh nih hlawh theihna hi an zawn reng leh an ngaihpawimawh ber pakhat a ni. Chuvang chuan tê lua leh ho lutuk pawh ngaihtuah lo lêka sawmtu an awm phawt chuan khawiah pawh ‘khuallian’-a țang thei zêl mai an ni.

A kuang bâng mipuiin an chan ve chin, Sawrkar thil leh pawisa te pawh, an ngilneih êm vanga an mimal tâ an pêk niawm taka lantirin ‘silpolin’ thlengin a hmun ngeia petu-a țan an la chuh zêl a. Fakna hla nena lo âwitu an awm zel bawk a ni.

Kan politiciante’n kan hnam nun an tihchhiat nasatna ber pakhat chu thawhrim aia thatchhiat ngaihsân zâwkna nuna nghet taka min hruailût tâ hi a ni. Sawrkar Dept hrang hrang hmlâkna apiangah pawisa sanction hu thawhchhuah hmuh tur a awm ngai lo va. Sawrkar hnathawk leh contractor/supplier-te nena țangrualin thawh loh bill an la a; an inti hausa thûr thûr a. Hnathawk lova tu leh fate thlenga duhtâwka hman tur pawisa an nei a. An hun tam ber chu chhiat ni țhat ni-a mi kan kual nan an hmang a. Eiruk pawisa siper dawng pha ve chin, hnathawk lova hetiang tih nana an hun tam ber hmang țhintute nen an inhmuhna apiangah, “I va ti țha ve,” tiin an infak(der) tawn a. Hnathawh tur pawimawh an neih avanga chutiang ti ve thei lote chu ‘ti țha ve lo”-ah an ngai a. Hnathawk lova ni lêng lênga vah kual chu tih dan țha angah an lantîr a. Taima taka hnathawh nun chu âtthlâk leh ngaihnêp thil-ah an chan ta țhin a ni.

Kan Sawrkar hrang hrang thil intihhmuh țha lo tak mai chu, vantlang țhatna-a ngaihtheih ve ang reng sî, vote zawnna remchâng atâna mipui lawmzâwng thil an ti vak țhin hi a ni. Entir nan, tupawhin sikul leh college neih hi an duh vek a. Hetiang neih hi zirna lama hmasawnna leh țangkai thei ni mah se, changkânna-a ngâiin inel nân tak, khaw/vêng tam takin an hmang a. Kan mamawh ber a nih leh nih loh pawh ngaihtuah lo lêkin hmun tin hmun tangah sikul leh college te kan hûng thluah a. Sikul leh College țhenkhat-ah chuan zirlai âia zirtirtu an tam zâwkna te pawh a awm nual a ni. Hetiang kalphungah hian zirna mumal a neih theih loh a. Fail deuh pup pup-na leh a hminga pass ve țâwk țâwk, thiamna hman țangkai tlâk nei mang si lo kan neih duah țhin pawh hi heng vang hi a ni pakhat a ni. Hetianga mumal lohna hi zirtirtu tam takin dâwngdah phah nân an hmang a. Aikal lâk thluah mai te, mahni thawhna leh hlawh lâkna thingtlang sikula awm lo va, Aizawla kan in attach fur mai te pawh hi hetiang kalphung mumal loh lutuk vanga lo awm a nihna chin pawh a awm. Hetianga zirtirtu dan bawhchhia leh awm țha duh lote zînga Kohhran Upa te, Pathian thuhril lâr tak tak te, Sande School zirtirtu te leh khawtlang thila invawrh lâr tak tak an awm fuk thei reng mai hi kan nun tlakhniamzia leh bawlhhlawhzia tilang chiangtu a nih avang pawh hian țha lo tak a ni.

Hetiang kalphung țha lo avang hian ziak leh chhiar thiam chu kan pung reng a, ‘lehkhathiam’ erawh chu an tlêm tial tial thung a. Sawrkar hnathawh nan chauha hman tlak ‘cerificate’ nei, thil țangkai tih nana thiamna nghet nei an awm ta mang lo hi kan ram tiluhaitu ber pakhat a ni ta. Hei hi kan hruatute hian hre mawlh se, ziak leh leh chhiar tam berna nih hi politics khelh nana hmang tawh lovin zirna pawimawhzia leh thiamna hman tlak nei chher chhuah hi kan mamawh ber a ni tih hi hre tawh se, quantity ni novin quality hi kan mamawh tak chu a ni tih hriain chutiang hawi zawng chuan min kalpui tawh se, țhat lam kan pan zâwk ngei ang.

Kan Sawrkara thuneitute hian pawisa hmanna leh thilpêkna lama an thiltihtheihnate chu an hmang rim hlê a; mahni hmasialna kawngah an hmang deuh vek bawk tih kan sawi tawh a. He lamah hian an tih tur dik tak an tih loh avangin ram leh mipuite an phatsan chiang hle a ni. Hei ai maha pawi zâwk phei chu an mawhphurhna an hlen lo lutuk hi a ni. Chhûngkaw lû, pâ a ni ang hian ram leh hnam lû chu Sawrkara kan hruaitute hi an ni. Chhungkaw pa chuan kawng hrang hranga chhungkaw intodelhna kawnga țan a lak chu a tih tur pawimawh tak a nih rualin, chhungkaw zahawmna humhalh pawh a mawhphurhna pawimawh tak a ni. Chu mi kawnga a hlawhchham chuan patlinga chhiar tlak a ni lo vang.

Kan Sawrkarin ram leh hnam pa a nihnaa sawrkar zahawmna a humhalh loh lutuknaah hian pa ber chan chu a chang zo lo hul hual tih loh theih a ni ta lo. Dan bawhchhetu leh thil tisualtu hrem ngam alawi hi a nei tawh lo va. Thil țha leh țûl ti tur phei chuan a nawra nawr kal an ngai tawh a ni. Hei hi kan Sawrkar tlin lohna ber a ni a. Ram hmasawn nana hnathawh hi a hna pawimawh ber pakhat a ni tih a hriat rualin ram leh hnam tan pa chan chang a ni tih hriaa ram leh hnam thil leh hnam zahawmna humhalhna kawngah patling chêta a chêt a hunin a țul tak meuh a ni.

Sawrkar hnathawk :
Sawrkar hnathawkte hi Sawrkar hmalâkna hrang hrang ti hlawhtling tura lâk an ni tih kan hria a. Sawrkar hnathawkte lâk nana hnathawh tur hi siam chawp a ni lo. Hei hi thil kalhmang dik tak a nih lâiin kan kalphung erawh chu a letling hlauh a ni ta.

Kan Sawrkar apiangte hian Sawrkar hna hi politics thila ngaihpawimawh zâwngte leh chhungkhat laina leh țhian țha te duhsakna remchângah an hmang a. Hna thawh tur mumal a awm loh pawhin chhuanlam siam chawpin hna an siam belh zêl a. Mizoram hi mihring tam lam ngaihtuaha India ram State hrang hrang zînga Sawrkar hnathawk tamna ber pakhat a lo ni ta hial a ni.

Sawrkar hnathawkte zîngah hian mi rinawm leh taima tlêm azâwng chu an awm; a tam berte erawh chu rinawm lo leh hnathawk țha lote an ni. Sawrkar hnathawkte chanchin leh an țhat tâwk lohna te sawichhuah hrim hrim hi kan tum a ni lo va. Amaherawhchu an kalphung dik lo hian kan khawtlang nun a țha lo zâwnga a nghawng avangin insiamțhat dan a awm te beiseiin kan sawi a ni zâwk.
Sawrkar hnathawk tam berte chu kan sawi tâk ang khan Sawrkara kan hotute’n an duhsak zâwng an lâk te an ni a. Hei vang hian hlawh sâng zâwk leh hamțhatna dang an nawr chak thei hlê a; ram pum-ah an ni âia dinhmun țha sawi tur an awm lo tluk a ni.
Sawrkar hnathawk hlawh hi chhungkaw chawmna khawp a ni a; chutiang taka ruahman țhin pawh a ni a. Hei bâkah Medical Re-imbursement te, Leave Travel Concession te, T.A./D.A. țha tâwk tak leh chawlh hnu-ah ‘pension’ innghahfâkna tham tak an nei a ni.

Medical Re-imbursement phei hi chu hotute nena inhriatthiam tawnna leh inchhawr tawnna a awm vang te pawh a ni ang, kan phalrai ta hle a, chhûngte chhûng te thlengin kan țangkaipui ta deuh vek a ni ber mai. A hmang țangkai an tam bâkah a hmang apiang tih theih deuh thaw-in a hleihluak zâwng deuh vekin an hmang bawk a, Sawrkar tan chuan hautak tak a ni. Kan Sawrkar Budget pum pui ațanga za-a 40 zet Sawrkar hnathawk hlawh leh a behbawm-a kan hman a\ang ngawt pawh hian hmasawnna hnathawhna kawngah kan Sawrkar hnathawkte hi phurrit an ni ta tak meuh a ni.

Eirûk leh thamna chi hrang hrang te reng reng hi, Minister tih a ni emaw, contractor/supplier tih a ni emaw, hna zawng te tih a ni emaw, Sawrkar hnathawkte hriatpui emaw, kaltlang emaw, tel vêna emaw-a tih vek a nih avangin kan Minister te, contractor/supplier leh hna dîlte chu eng emaw kawng kawnga eiru leh thamna pûk chîng deuh vek an nih avangin, he kalphung bawlhhlawh tak mai hian Sawrkar hnathawkte hi a tipawimawh zualin a tihnianghnar zual a ni. Hei vang hian kan Sawrkar hnathawkte hi a tlangpui thuin an hlawh lêt vêla khawsa an ni deuh vek a; a lian leh dinhmun pawimawh chelhtute phei hi chuan an eiru hnem êm a, an eirûk pawisa-a in leh lo an siam ropuizia chu ni tin tih theih deuh thaw-in chanchinbu-ah te chhiar tur a awm tâ a nih hi. He kalphung bawlhhlawh tak bawk hian Minister-te leh Sawrkar hnathawkte chu a innl tawntîrin a inhlauh tawntîr bawk a. Chuvang chuan dik lo hrem ngam alawi leh thil țha tih țûl ti ngam alawi pawh an awm loh phah ta țhin a ni.

Hetianga kan Sawrkar kalphung dik loh avang hian a tak taka hnathawh hmuh tur a tlêm êm êm a. Kan Sawrkar hnathawk tam berte hi chuan hnathawh tur an nei lo tak meuh meuh a ni. Hei vang hian leh Mizote hi nihna leh dinhmun duh ngawih ngawih hnam kan nih avang hian, a tih dan hrethiam pha chinte chu Pathian rawngbawl duh tak tak vang emaw, țanpui ngai țanpui duh vang tak tak emaw ni chuang hauh lovin, Kohhran Upa-ah te leh Tlawmngai Pawl hruaitu-ah te an țang ta fur mai a ni. Chutiang an nihna te pawh chu a nihna taka hmang lovin mahni țanghma ûmna remchângah leh intihlârna remchângah an hmang ta deuh zêl bawk a ni. Chu bâkah kan Kohhran te, kan Tlawmngai Pawl te leh pawl dang te pawh hian Sawrkar hnathawkte hi an thiltihtheihna țangkaipui theih beisei avanga nihna lo siam sak ni te pawhin a ngaih theih a ni. Hetiang nihna chang pha ve lo te chuan an hun tam tak chu chhiat ni țhat ni a phungthlûkna remchângah an hmang a.

Inkhel en a thiang a; picnic a thiang a..Thawhpuite emaw leh an chhûngte emaw thî râlna phei chu Inrinni emaw leh office chawlhni emaw te-a neih chuan a hlutna a bo vek an hlau emaw tih mai turin office chhuahsan ngeiin an nei țhin. Heng hun te hi, inneih leh lungphun te pawh tiamin, office nî leh office hun chhûng ngeia an tih thinna chhan pakhat chu, office chawlhni chuan mahni mimal hna kalsana hetiang huna kal duh hi an awm bar thin loh vang a ni. Office chhuahsan lote pawhin hnathawh tur ber a awm miau loh chuan, lehkha te an dêngin, computer/video games te an khel mai bawk țhin.

Sawrkar hna chu a tak ram thleng lova, thil dang tihna remchânga kan hman tâk avangin Sawrkar hnathawkte chuan an nihna dik tak leh an awm chhan ber pawh chu an hre tawh lo va. Hna avanga awm an nihna ber pawh chu an hrethiam tawh lo va. Hnate chu anmahni vanga lo awm ve chauh emaw an ti zâwk tawh a ni. Engineer te chuan kawng te, in te, electric te, tui te chu anmahni avanga lo awm ve maiah an ngai tawh a; hengte hi kan mamawh thilte an nih avanga, anmahni zâwk chu lo awm an ni tih an hre tawh lo. Sports Minister/Director pawhin Football te, Badminton te, Judo te leh game dangte avanga awm an ni tih an inhre tawh lo va; hengte hi an duha an awmtir theih leh an duh loha a awm lohtîr theih-ah an ngai a. Vety Department pawh ran vulh vang leh natna te an neiha enkawl hna thawk tur an ni tih inhre chang tawh lovin, an hnathawh țhat avanga vawk te, âr te, bawng te leh ran dangte chu lo nung dam ve zelah an ngai emaw tih tur an ni. Agriculture, Horticulture leh Dept. dangte pawh chutiang zelin.

Hnam changkâng leh ropui Sâp kan tihte’na mahni hna chelh lâi țheuh duty an tih an ngaihpawimawh êm êm, chutiang hna an thawhna lama a țul chuan thih phah hial pawh huama thawk tura an lo inzirtir țhin laiin keini chuan kan han sawi tâk kha kan kalpui dân chu a ni a. Chuvang chuan Sawrkar hna-in zahawmna a neih țhinte pawhin a tlakhniam phah tawlh tawlh a; tih tur dang an hriat ngang loh avang leh hlawh leh hamțhatna dang chhenfakawm tak a ken tlat avangin kan țhalai lehkhathiamte chuan inhnimphûm nana hman an tum deuh vek zêl rih sî a ni.

Kan Sawrkar hotute leh Sawrkar hnathawkte kalphunga thil duhawm lo tak mai chu mipuite ngaihtuah miah lova an țanghma an ûm zêl hi a ni. Anmahni zînga hlawh sâng zâwk leh hamțhatna nei tam deuh te nih ang leh neih ang niha neih an tum zêl a; an aia State dang mite chanvo nei țha zâwk an awm chuan chutiang mite nih ang leh neih ang niha neih an tum zêl bawk a. State dang leh Central Sawrkara thawkte aia sâng zâwka indah hial pawh pawi an ti tawh lo a ni.
Hetiang an tihna kawngah hian a sâng zâwng leh a hnianghnar zâwnga an awm theih dan tur ngawr ngawr an zawng a; an kân ruala mipuite țhat ve dân tur an ngaihtuah ngai reng reng lo. Chuvangin anni hi an sâng tawlh tawlh a, an hnianghnar tawlh tawlh a; mipuite chu anmahni nena tehkhin chuan an tlahniam tawlh tawlh thung a ni.Hei hi thil dik leh thil awm dan tur a nih ngang loh avangin, Sawrkar hruaitute leh Sawrkar hnathawkte kan itsîkin kan elrel tihna ni lovin mipuite hi kan chanvo hria-a chu chu kan neih ngei theih nana tan kan l ak thiam a hun tak meuh tawh a ni kan tihna a ni.

Kohhran :
Sawrkar leh Sawrkar hnathawkte kalphung mumal loh ang tho hian kan Kohhrante kalphung hi a mumal lo va. Kan thlarau nun ngaihtuahawmzia chu sawi loh kan mihring nun tlahniam zêlah pawh hian a mawhphurtu ber an nihna lâi a awm a ni.
Kawng engkim tihtheih deuh thaw-ah an kalphung hi a khawvel êm êm mai a. Kohhran hruaitute chuan a hming an lam zûr zut tih mai loh chu Pathian thuawih an nihna âwm hmuh theih a awm mang lo. Hemi kawngah hian ringtute pawhin danglamna kan nei chuang vak lo bawk.
Kan Kohhran hruaitute’na an ngaihpawimawh ber chu thawhlawm khawn hi a ni a. Thawhlawm thawh hi Pathian thu laimu lâi takah an ngai emaw tih mai tur khawpin hemi lamah hian țan an la nasa a. Kan thawhlawm thawh hi Pathian thu kan awih leh awih loh tehfung berah an hmang a. Thawhlawm a tlâk țhat chuan kan rinna a chak ni-ah an ngai mai a ni. Thawhlawm thawh hi a pawng apuiin kan sawisel a ni lo. Amaherawhchu kan thawhlawm pawisa hmanna te hi Pathian duhzawng ni-a a lan loh êm avang zâwkin sawisel nawn fo a ngai a ni zâwk.

Mizorama pawisa vir vêl tam ber hi chu kawng hrang hranga eirûk pawisa a ni. Chutiang eirûk pawisa hmang chuan biak in ropui tak tak te kan sâ a; missionary-te kan thawn chhuak a; office changkâng tak tak te kan sâ a, hnathawk, hlawh țha tâwk leh ham thatna chi hrang hrang pê-in kan ruai a; sumdâwngte tih angin pawisa lâkluh nan in te kan sâ a, press te leh thil dang dang pawh kan nei a; Kohhran hruaitute’n changkâng taka khawsak nan an hmang a; a tawi zâwngin sawi ila, a khawvel zâwng deuh vekin kan inkaihruaiin a ni ber mai.

Kan inkhâwm te, kan inkhâwmpui te, kan camping te, kan crusade te, kan revival te, kan țawngțairual te, kan Bible chhiar te, kan sualsimna entirna te hi,anmahni hrim hrim chu a țha lo kan tihna a ni lo.Amaherawhchu kan thinlung taka ti lova, alang amawi atan ringawta ti lek fang kan nih vâng tih loh rual loha kan nun chhûngrila țhatpui nana hman ahnêka kan nun a chhe tawlh tawlh a, corruption do pawl pawh an pun tual tual lawi sî avang hian inbihchian a ngai kan tihna a ni..

Kan Kohhran hruaitute ber pawh hi a changkâng zâwnga khawsak duh mi an ni a. Kawng hrang hranga an inrelbawlna hi mipui mimir tamberte aia sâng zâwk vek a ni. An hawiher leh an chêttlat dânah pawh mipui mimir chunga lêng an ni. Sawrkar leh khawtlang thilah an inrawlh nasa hlê a; inthlan thuchah khêl lovin an siam ziah a, Total Prohibition phei chu an nawr luih avanga Sawrkarin a tih a ni. Hengte hian țangkaina nei thei an nih lâiin a bawhzuina lamah Kohhran ber hi a saseh hun a thlenin a insaseng leh lawi sî țhin a, țangkaina tak a awm leh țhin lo a ni.

Kum zabi 16-na kha Catholic Kohhran hruaitu, Pope leh Bishop te, a khawvel zâwnga an khawsak zualkai hun a ni a. Politics bâkah nun kawng hrang hrang-ah inrawlh lohna an nei meuh lo va; kawng tam taka khawtlang nun a chhe lama hruailuttu an nihna lai a awm. Chuvanga Martin Luthera te khan Reformation rawn nawr an ni. Tunlai kan Kohhran hruaitute kalphung en hi chuan khang hun laia Pope leh Bishop te nena danglamna an neih, kawrfual vâr an ha ve lo tih mai loh chu, hmuh tur a vâng hle. Moderator-te pehi chuan kawrfual dum/sen an ha țan leh tawh nghe nghe a.

Kan sawi fo tawh angin Mizorama pawisa virlêt vêl hi Central Sawrkar pawisa kan hmuh a dik lo zâwnga kan hman ațanga lo chhuak deuh vek an ni a. Sumdâwngte pawisa dawn te pawh hi chutiang pawisa tho chu a ni. Inhlawhfate pawisa dawn te pawh, taima tak leh rinawm taka hnathawk an awm mang loh avangin a thianghlim chuang lo. Loneitute’n an thawh hah rah thlai thar an hralhna man te hi chu a thianghlim awm chhun a ni mai ang. Chungte pawh chu an pawisa dawn bera kha a bawlhhlawh chuan a thianghlim chuang lo, kan tih zêl phei chuan pawisa thianghlim hi a awm lo tluk a ni.
Hetiang hi thil awmdan a nih lai a, kan Kohhrante’n kum tina pawisa vabelchhe 1000 chuang zet an dawng țhin a nih a, an hmanna ber pawh a khawvel zâwng leh a changkâng leh ropui zâwnga inrelbawlna a nih chuan chu bâka corruption chu a awm chuang dawn em ni? Hetiang kalphhung hi mi corrupt te mi zahawma siamtu leh corruption tipunluntu ber zawk chu a ni ti ila, hnial thei kan awm ang em?

Kan Sawrkar leh Sawrkar hnathawkte kalphungah thawh awm mang lo va pawisa tam tak tak siam țhin hian kan nun kawng hrang hrangah min tichhia kan tih ang chiah kha, kan Kohhran kalphung-ah pawh hian a awm a. A thawha thawh vang ni lova, rinna avang chauha chhandam nih theih tih inzirtirna te, inkhawm tam te, țawngțai rual te, Pathian fakna hla sak thiam leh sak zin te, camping te, crusade te, revival te leh anazawnga Pathian hming lam te kan inzirtirna leh inkaihhruaina langsar berte an ni a. Hengte hi a thuhrimin țul lo leh țangkai lo-ah kan ngai tihna ni lovin, Pathian biak dan țha ber leh awm chhun niawm taka kan kalpui erawh hi chuan a țha lo zawnga kan nun a kaihhruai avangin her rem dan kan zawn a țul kan tihna a ni zâwk. Hetiang kalphung hian mahni hnathawhna țheuha taimak leh rinawm a pawimawhzia a hliah mai pawh ni lovin, rinawmna te, taihmakna te leh TAKNA ber pawh chu thil țul lo leh ngaihsantlâk loh-ah a siam a. Heti taka kan lo thatchhe ta a, kan lo rinawm lo ta a, serh leh sang leh chhia leh țha hriatna kan nei lo ta lutuk hi hetiang kalphung hrin chhuah hi a ni tih loh rual a ni lo.

Kan khawvel hi chênna tlâk loh, lungngaih țahna, hlimna reng reng awm lohna leh kan mikhualna ram mai a ni ti-a kan inzirtira kan hla zawng zawng tih theih deuh thaw-a kan aupui țhin hi Pathianin khawvel a siam dan leh a remruat dan nena inkalh a ni tih kan inhrilhhriat a hun tawh a. Hetiang sawi reng chunga kan nuam tih zawng hlira Pathian rawng kan bawl leh sî țhin te hi thil inmil lo tak a ni tih kan hriat a pawimawh a ni. Khawvel hi Pathianin a duh taka a siam a ni a; kan dam chhûng hun hi uluk tak leh țha taka kan hman hi Pathian duhzâwng a ni tih te hi kan inzirtir a hunin a țul tawh tak meuh a ni.

Kan Kohhran hruaitute hian Thatchhiat Theology bansanin, tuarna te, intodelh te, mimal nun uluk taka vawn te hi ringtute nuna tel tlat leh pawimawh a ni tih te min zirtir tawh se, Lal Isua’n khawvel ropuina a hawisan ang khan hawisan ngam ve se, thupêk a zawm zel thei ang khan zawm ve thei se, a inngaihtlawmna nun kha entawn se, hmangaihna leh khawngaihnaa khat a nih te kha haider mai lovin entawn zâwk bawk se, retheite phurrit-te hi phurhpui ve se, ringtute pawhin kan țhatphah ngei ang. Kan Kohhran hruaitute hi inbihchiang ngam se kan tihna a nih chu.

Tlawmngai Pawlte :
Kan Tlawmngai Pawl langsar zual, YMA, MUP leh MHIP te hi pawl lian tak leh thiltithei tak an ni vek a. An thiltihtheihna hmanga ram leh hnam tâna thil țha tih pawh an nei nual a ni. Amaherawhchu an pawl din chhan leh thil tum hlam chhiah ti tih khawpa thil danga an inhman nasat luat tâk avang hian an pen sual ta deuh em ni tih loh theih a ni lo. Entir nan, YMA thil tum pawimawh ber chu țanpui ngaite tanpui leh retheite dâwmkân a nih reng laia, kum 80 zet a nih hnu tawh pawh a, mi rethei dâwmkân ngâi, in leh lo țha pangngai leh eizawnna nghet nei lote, dâwmkâna eizawnna nghet an hmuh sak sawi tur alawi an awm lo chauh pawh ni lo va, an pung tual tual emaw tih tur zâwka kan awm hi chuan ngaihtuahna a ti kal thui deuh țhin zawng a nih hi. YMA din chhan leh thil tum en chuan TNT-a fahrah 1000 chuang zet awm te pawh saw, an tân chona lian tak a ni tih loh theih pawh a ni lo a ni.

Heng bâkah hian kan Tlawmngai Pawlte’n inthlan an neih apianga inhruipawhna leh hmanraw bawlhhlawh an hman thu sawi tur a awm ziah țhin hian kan Tlawmngai Pawlte hming a tihliau a. Sawrkar leh khawtlang thil pawimawh apianga an inrawlh deuh ziah țhin hian pressure group lian tak an nihzia a ti lang țhin a; chu chuan tlawmngai pawl kalphung dik tak a ni em, tih zawhna a rawn awmtîr țhin hian ngaih a ti țha lo țhin a ni. Pawl pakhatin an pawl thil tum nena inzawm, ram pum tâna thil pawimawha Minister pakhat an hmuh țuma an rawtna chu chhângin, Minister chuan, “Keipawhin in rawtna chu țha ka tiin, tih țul tak ni pawhin ka hria, mahse, YMA/MZP-te’n min han nawr phawt se mawle,” a lo ti a. Hei hian hemi kawnga kan kalphung țhat lohzia a tilang hle a ni.

Kan Sawrkar hruaitute, Sawrkar hnathawk țhenkhatte leh Contractor/Supplier țangrualte’n kan Sawrkar pawisa tamber chu an hui vek avang te, kan Sawrkar pawisa tam tham tak Sawrkar hnathawkte hlawhah a kal vang te, kan Kohhrante’n eirûk pawisa a vaibelchhe têla an lo dawn reng avang te, kan tlawmngai pawlte pawh Sawrkar pawisa-a innghat deuh vek an nihna hian kan ram economy hi awmze nei lohah a siam a. Kan kuthnathawktute’n hah taka an hnathawh rah te chuan an phû ang hlâwkna a hmu thei lo va. Sumdawnna kawngah pawh rinawm taka thil tih tum tân tih hleih theih loh khawpin kawng a ping a ni. Hetianga kan kal zêl chuan chhiatrupna hun hi kan thleng ngei dawn a; chung hunah chuan hausate pawh an him chuang lo vang.

Rev. Thansiama’n a sawi fo țhin ang khan TAKNA hi Mizote’n kan nuna kan tlak chham ber chu a la ni zel a. Kan ngaihsan zâwng, Sâp țawnga value system an tih a dik loh avangin kan mimal nun leh kan khawtlang nunah kan puitling thei lo va; kan pawnlâng êm êm reng mai a; min hrechiangtu hnam fing zâwkte chuan min ngainêp êm em mai a ni. A taka nun pui si lova, Pathian thu sawi leh a hming lam rîk zen hi intihchangkânna emaw kan ti a, inel nân tak kan hmang a. Zai ngaina mi kan nih avangin zai thiam kan ngaisang a, zai an thiam poh leh an mimal nunah bawlhhlawh viau mah se, Pathian rawngbawl țha ta viau zêlah kan ngâi a. Thawhchhuah loh pawisa ringa ni tin deuh thaw leh ni lêng lênga mitthi ral tur awm apiang suartluan țhin te chu kan ngaisang a; MLA candidate emaw Kohhran Upa emaw nih tum tan chuan essential qualification –ah kan la ngai zêl a. Eirûk pawisa hmanga intiropuite chu thawhlawm leh thilpêk dangte-a Kohhran te, Tlawmngai Pawl te leh Political Party te an vûr thiam phawt chuan mi ngaihsanawmah kan ngai zel a; nihna leh dinhmun țha leh pawimawh te kan chantîr zêl a ni. Mahni tawtawrâwt hâm thiam leh lemchan thiam apiangte chu mahni hna-a rinawm lo leh mihring nihna pawha belhchian dawl lo tak an nih hre reng chung pawhin kan ngaisang tho a, kan khawtlang nunah centre stage an chang thei fo a ni.
Hei tak hi insiamțhat kan mamawhna lâi ber a ni a. Heng kan ngaihsan zawng dik lo leh hetiang ang thil dangte hi kan bansan a, a țha leh puitling zâwnga kan inkaihhruai loh chuan kawng hrang hranga insiamțhat nana țan kan lâkna te chuan awmzia an nei thei tak tak ngai lo ang a; a hlawhtling tak tak ngai bawk lo ang. Rilru-a țhanlen hi kan mamawh a ni.

Engpawhnise, ram a ro reng lai leh mipui an retheih reng lâia, ram leh mipuite hmangaih vanga an rawngbawltu intite an mam kûng reng a; ringtute aia Pathian rawngbawltu intite an khawsak theih zawk reng a, Pathan fa-a vuah tlâk alawi kan awm bawk sî loh va, tlawmngai pawl member-te mithmuh ngeia, rethei leh țanpui ngai an awm reng a, an pun zêl bawk chhûng hi chuan, a tak ram chu kan la hlat hlê zêl a ni tih hria ila. Chuvang chuan inbihchiana insiamțhat hi kan mamawh tak meuh meuh tawh a ni tih kan hriat a țul a ni. Mi tinin dân leh kan chhia leh țha hriatna-in ti tura min tih apiang țha takin ti zêl ila, ti lo tura min tih apiang ti lo thei zêl ila, chu chu insiamțhatna kawng țha ber chu a ni ngei ang.

Aside | Posted on by | Tagged , , , | Leave a comment

MIZORAM, MANIPUR LEH NAGALAND PROTECTED AREA THLAHDULNA KUM 2022 THLENG PAWTSEI

Mizoram, Manipur leh Nagaland te Foreigner (Protected Areas) Order, 1958 hmanga Protected Area-a puan an nihna thlah dulna chu kumin December thla atanga chhiar tana kum nga dang, December ni 31, 2022 thleng atan pawhsei a ni.

He Protected Area thlahdulna thupek hi India sawrkarin venhimna thila tul a tih hun apiangah a chawplehchilhin a hnuk kir thei tih a ni. He thlahdulna hian Afghanistan, China leh Pakistan mite leh heng ram atanga zi chhuak ram dang mi a huam lova. Heng mi hian Mizoram, Manipur leh Nagaland te an tlawh duh a nih chuan Ministry of Home Affairs-ah phalna an la hmasa tur a ni. Protected Area Permit (PAP) tel lovin heng State pathumte hi an tlawh tur a ni lo. PAP nei lova an tlawh lui a nih chuan Foreigners Act dan anga hrem tur an ni ang.

Foreigner dang heng State tlawhtute chuan State an luh atanga darkar 24 chhungin Foreigner Registration Officer (FRO)-ah an in register tur a ni a, FRO Office chuan foreigner lo zin te chuan ram dan bawhchhiatna thil an tih leh tih loh an thlithlai zui reng tur a ni.

Myanmar mite pawh kum nga dang PAP tel kher lova heng State te tlawh phalna hi pek an ni a, a chunga mi ang tho hian heng State pathum te visa nei chunga an rawn luh chuan FRO-ah darkar 24 chhunga in register ve tur a ni. Lirthei hmanga heng State te paltlanga, riak/cham khawmuang tur an nih loh phei chuan FRO a in register kher pawh a ngai chuang lo a ni. FRO/State Police ten an cham chhunga an chet dan an thli thlaiin dan an bawhchhiat loh nan an enzui reng tur a ni a, dan bawhchhiatna a awm chuan dan hmanga hrem tur an ni ang, tih a ni.

Aside | Posted on by | Tagged , , | Leave a comment

BUNGHMUN TLANGVAL LALROKIMA TUIAH TLA HLUM IN, A RUANG HI ZAWN MEK ANI:

Thu dawn danin vawin chawhma dar 11 vel khan, Bunghmun tlangval Pc Lalrokima kum 35 chu tuiah a tla a,zawn mek a ni.

Thu dawnna in a sawi dan chuan Tv. Lalrokima hi Tlabung a ui la a kal, an haw lam Diblibag thlangah an lawng chuanna chu lawng dang nena insu palhin, Rokima hi lawng tlãngah a thut avangin a tla ta a ni. Lawng hi speed-boat ani.

Lalrokima hi a makpa, a farnu pasal Lalchungnunga nena kal an ni a, tuiah hian vawi 2 vel a lo lãng a, lawng han insu vir nasa lutuk ah ka chhan hman lo a ni tiin a makpa hian a sawi bawk. Tunah hian ruang hi an la zawng mek a ni.

Aside | Posted on by | Tagged , | Leave a comment

JESSE JAMES chanchin tawi

September 5, 1847 khan Jesse Woodson James tih hming puin Clay County, Missouri-ah a lo piang a. Pianpui mipa leh hmeichhia Alexander Franklin “Frank” leh Susan Lavenia James te a nei. A pa Robert S. James hi Baptist Pastor a ni mauh mai pek a, mahse Gold Rush hunlai leh a hun a innan tak avangin Rangkachak zawngin California a pan ta zawk. A thih lai hian a fapa Jesse chu kum 3 chauh a la ni. A nu Zerelda hi nghei thei lo chi deuh a nih hmel. Jesse a pa thih hnu hian pasal pahnih ngawt a nei leh. A nu leh a pahrawn ten fa an han neih leh tak diah diahah chuan Jesse hi a uichuang awm tan ta der mai. Chung hun inmung karah chuan American Civil War a lo chhuak ta. Hetah hian Jesse-a te chhung hi Sal 7 zet nei lai a ni a. Confederate an awn nghal tlui mai. Jesse James phei chu a u nen Confederate guerrillas-ah an inhnimphum ta der mai. Battle of Wilson’s Creek indona-ah tel nghalin hliam a tuar ta nghe nghe. Union sipai ten a pahrawn thingkungah an han khaihlum lehnghal nen. Jesse a hringnun hi phuba lak chaknain a khat ve tlat.

A u Frank James pawh rawlrala che pawlah telin, ani pawh hian a dam veleh a zawm ve leh nghal a. Union sipai suatna rapthlak tak takah pawh an themtlengte zawk ang maiin an inrawlh ve ta sek. An hotupa Bloody Bill Anderson-a chu an kahhlum tak avangin an unau pawh hi an han inthen hrang ren rawn a. Vanduaithlak takin Jesse-a hian a awmah silai mu a dawng leh tlat. A vanduai thei hle. Civil War a lo tawp hnu chuan ram pum chu Party lian zet mai pahnihah an inthen ta. Sal neih duhlo lam Republican Party leh anmahni eptu Democratic Party tiin. Republican lamin rorelna an chan takah chuan Jesse-a te unau chu Archie Clement-a zuiin an la rawlbo zui zel a. A theih ang angin Republican milian te chu an rawk tan ta a ni.

Chutiang a nih avang chuan Governor Fletcher a chuan chung Gang rual te bei tur chuan Sipai rual Johnson County-ah chuan a chahlut ta rup mai a. An Gang hotupa Archie Clement-a pawh kahhlum a ni ta hial. Mahse an hotupa thih hnuah pawh a thibang te chu inpek mai tum lovin pawikhawihna chi hrang hrangah an la inhnamhnawih zui zel a. Bank hrang hrang rawkin an sum lak te chu anmahni lam khawsak harsa te an sem hlauh thin.

Hetih lai hian Jesse James hi mi hriat a la hlawh lo. December 7, 1869-a a u Frank-a nen Daviess County Savings Association, Gallatin, Missouri an rawk atang chiahin khawvelin a hmelhriat ve tan. Chu Bank cashier, Captain John Sheets-a chu a Civil War laia a Boss hlui “Bloody Bill” Anderson-a thattu Samuel P. Cox-a emaw tiin a kaphlum ta hmiah. ‘Phuba lakna’ a nih thu an auchhuah pui ngei bawk a. Chu thil thleng avang chuan mimal takin Missouri Governor Thomas T. Crittenden-a chuan OUTLAW-ah a puang ta rup mai.

Jesse-a hi mi mawl a ni lo. Kansas City Times Editor John Newman Edwards nen inchharin, chu chanchinbu-ah chuan thu chi hrang hrang lehkhathawn angin a chhuah ta thin a. A lar ta vet vet hle. Confederate rilru chawk nung lehin an unau chu Cole Younger-a te unau nen inzawmin James-Younger Gang tia hriatlar an ni ta zel. Civil War laia an lamtang engemaw zatin an rawn zawm bawk. Jesse James hi a hotu berah tangin Bank leh stagecoaches mai an rawk tawh lova, Rel hial an suam tan ta. Hetih lai hian a thian Editor Edwards-a lah chuan Robin Hood nen khaikhinin a chanchinbu ti lar nan a lo hmang ve bawk. Mahse a nihna takah chuan an sum ruk, midang tanpui nana an thehchhuah hi anmahni Gang chhungkhat hnaivaiah vek a ni. An Circle pawn lamah an sem ngai lo.

Hetianga an hmingthan tak em avang hian anmahni suatrem turin Adams Express Company chu 1874 khan Pinkerton National Detective Agency tia thlakin chahluh an ni leh ta rup mai. Mahse an ni hi Chicago khawpui vela sualna hrang hrang chhui thin an ni a. Jesse-a Gang te ramhnuai leh hmun hrang hranga han chinglet tur chuan an che hleithei lo. He an inpel tawnna hi a rapthlakin inthah mai bakah in inhalsak thlenga a awm tak avangin a nghawng a na hle. Mahse hetih lai hian Missouri state legislature chuan Jesse-a leh a Gang te hi an fak zawk hlauh.

Jesse James hi a cousin Zerelda “Zee” Mimms nen April 24, 1874 khan inneiin, fa pahnih Jesse Edward James leh Mary Susan James te an nei a. Phir an neih erawh an tet laiin an boral ta hlauh. Jesse James hi an a Gang te zingah inthununna a keng kawh tha hle a. Amah hi zu in lo a nih avangin a thluak pawh hi a fim hle. Inrawkna reng rengah hlawhchham an nei meuh lo. September 7, 1876 a lo thlen chuan an chesual ve ta tlat.

First National Bank, Northfield, Minnesota ami chu Union lam hotupa Bank nia hriaiin rawk an tum a. Mahse hemi tum hian a Gang member ten zu an rui ta tlat. An unau chiahin dam leh man lohin an tlanchhuak thei ta hram. Pawisawi lo civil mi pahnih an kahhlum tel avangin an hming pawh a chhe hle.

James-Younger Gang chu a tawp ta.
An unau hnih chuan Nashville, Tennessee lamah tlanchhiain hminglem Thomas Howard leh B. J. Woodson tia invuahin awmhmun an bengbel a. 1879-ah Jesse James hian Gang thar din lehin an hna ngai pawh an han thawk leh tak tak. Mahse ama Gang member ngei a thah avangin a nau thenkhat ten an tlanbosan. December 1881 khan a himna zawk tura ngaiin Saint Joseph, Missouri-ah a let leh a. A u Frank erawh chu Virginia lamah a kal ta thung. A Gang member zingah hian Ford-a te unau Charley leh Robert(Boba) te chauh hi a rinngam an ni tawh. Chuvang chuan a bodyguard ni turin Ford-a te unau chu ama inchhungah ngei a chen tir ta nghe nghe. Mahse a tisual. Bob Ford-a chu Thomas T. Crittenden, ,Missouri governor nen a ruka lo indawrin Jesse James a luman chu an unaua ei ngei an tum a lo ni.

April 3, 1882 chu nidang aiin a lum bik hle. Jesse-a leh a Gang te pawh chu mi suam turin an inbuatsaih a. An chhuah hma lawk chuan Jesse-a chuan banga milem bal chu hrukfai tumin Chair-ah a lawn a. Khawlum vang nge, a Coat mai bakah a gunbelt te chu a hlip nghe nghe. Chu hun remchang chu chuhin Bob Ford-a chuan Jesse-a tukhumah chuan ngen mu a thun ta a ni. Jesse-a thih thu chuan khawchhung a fan chak hle. MIpui tam tak a ruang hmuh tuma lokalin a inkawt chu an khat nghal a. A thih atanga darkar hnih hnu lekah hian Thuneitute kuta inpe Ford-a te unau hi Governor Crittenden-a chuan a ngaidam zui ta nghal. Mipui lung a dam lo hle.

TB a vei bakah morphine a khawih nasat avangin Charley Ford chu May 6, 1884 khan Richmond, Missouri-ah a intihlum a. A Unaupa Bob Ford chuan Puanin hmangin Saloon te tak te, Creede, Colorado-ah a siam thung. June 8, 1892, a lo thlen chuan Jesse James a phuba la tu tur Edward O’Kelley-a chu Bob-a saloon ah chuan Shotgun nen a lo lut ta zan zan mai. “Hello Bob” tih pahin Bob-a chu a kaphlum ve ta a ni. Edward O’Kelley-a hi damchhung a tang tura tih ni mahse mi 7000 chuang zet ngenna avangin Governor chuan October 3, 1902 khan a ngaidam ta a ni.

Jesse James a thlan lungah chuan a nu Zerelda Samuel chuan hetiang hian a ziahtir ngat.
In Loving Memory of my Beloved Son,
Murdered by a Traitor and Coward
Whose Name is not Worthy to Appear Here.

Aside | Posted on by | Tagged , | Leave a comment

ACHILLES : Son Of Peleus….

Achilles-a nun hi hrilhlawkna ropui leh rapthlak, Hercules-a nen phei chuan mi khawngaihthlak tak an ni.

Greek ho te Pathian ropui leh chungnung ber Zeus-a hremna avangin rimawi leh thal kah lam Pathian Apollo-chuan tumahin a an tihchhiat theihloh tur Troy kulh chu asa a, sipai rual engzaha tam pawh in an tih nghin leh lawn liam theih loh tur khawp a nghet ani, he kulh avang hian tumah in troy hi anla hneh thei lova, a hunlaia khawvela khaw ropui leh lar ber ani.

He kulh hi tumah in an tichhe thei lova, an la hneh ngai bawk hek lo, mahse hrilhlawkna alo thleng a, chu chu tuipui Lasi Thetis-i fa Achilles-a chu Greek pasaltha zawng zawngah a huaisen leh ropui ber ala ni anga, Troy kulh chu abul chawp in ala kar phawk vek ang, Achilles-a lo tumahin Troy kulh hi anti chhe thei lovang tih hi ani.

Han kir leh lawk ila, Pathiante zinga chungnung ber Zeus-a leh Lui Pathian Asopus-a fanu Aegina-i te chuan fapa Aeacus an nei a, Aeacus-a chuan Pelion tlangram a nymph (lasi) Endeisk-i neiin fapa Telemona leh Peleus an nei leh a, Telemona chuan Salamis Lal Cychreus-a fanu Periboea-i neiin, an ni hian Ajax-a, (A film a Hector a nena insual Palian pui kha) an nei a, Peleus-a chuan Pathian te zinga hnuaihnung deuh Tuipui Pathian Nereus-a fanu tuipui lasi Thetis-i anei thung a, chuan fapa Achilles-a an nei leh ta ani.

Zeus-a hian Thetis-i fapa lo piang tur Pa hi Pathiante zing ami ani ang tih ahlau em em a, achhan chu Thetis-i fapa Achilles-a chu alo puitlin hun chuan achak in ala ropui dawn a, Chuvangin Thetis-i hian Pathiante zinga mi pasal aneih chuan A lalna chu ala chuh buai thei dawn tih ahria a, chuvangin Myrmidon Lal Peleus a nen a in neih tir a, he an inneihna hi a ropui hle a, khawvel inneihna ah chuan a ropui ber ani, Achilles-a nu leh pa inneih lawmna Ruai pawh hi Pathiante chenna Olympus tlangah an theh a, Pathian leh Lal, Pasaltha zawng zawng an kim vek a, Pathian te chauh ina an in thin Zu thlum ber thlengin a awm vek a.
tin Pathiannu Pakua Zaithiam, Pathiante hma chauh a zai thin leh mihringte hriat ve thianglo, Muse- ho te pawh in hla an remsak a, Pathiante ruaitheh pawh hei ai hian ala aropui ngailo ani. Tin, Tuipui Pathian Chungnung ber Poseidon-an inneih lawm nan sakawr thi thei lo pahnih, Balius leh Xanthus a pe bawk a, he sakawr te hi ahnu a Troy indo na a Achilles-an a hman te kha an ni.

Achilles-a nu Thetis-i hian a fapa chu Troy indo na ah la thi dawn tih chu a apian hma daih atang tawh a a hriatlawk avangin, Lui thianghlim Styx Lui ah abual a, Styx lui hi thiltihtheihna ruk leh danglam tak nei, Mei thianghlim nen a inzawm anih avangin, He luia an inbual chuan Pathiante angin an thi thei lo ve dawn ani.

Mahse Achilles-a luia a chiah pil laiin a ke artui ah avuan a, chulai te chu a huh kim loh avang in, a ke artui chauh a khawih fuh in athi thei ani, a hnu ah Troy lal fapa Paris-an thal in a kah fuh avangin athih phah ani.

Achilles-a chuan Centaur zing a lalber (a kawng achin hnuailam sakawr, chunglam mihring) Chiron-a (zeus a pa Cronos a leh tuipui Pathian Philyra-i te fa) hnenah ngat indo leh hriamhrei hman dan azir bawk a.

Tin khawvelah amah aia fei khawh thiam leh khawhna an awm lo a, he Trojan war, Troy indo na, khawvel History a indona lar leh ropui ber ah hian Pathiante pawh an in rawlh nasa a, Troy ho hi Ramsa leh ramhnuai Pathiannu Artemis in a tanpui a, greek sipai ho awmna ah Colchis sakeibaknei, bawng chal tiat, lu pahnih nei, a ngho pawh feet 2 dawnlai a sei, a vun pawh achhah em avang a Fei pawh ina akhawh nat zo loh chu achhuah a, he ramsa hi Achilles-a chuan bei in, alu pahnih chu a tansak hial a, hei vang hian, Pathiante pawh in an hlau a, mihring zingah khuti khawpa huaisen khu engtinnge an awm theih tiin Greek sipai an tihbuai avangin Achilles-a pawh an hlau hial ani.

Achilles-a indo thawmhnaw leh hmanrua hi Hmanraw siamthiam Pathian, Hephaestus-a, Pathian te pawn a hmanrua an siamtir thin,

Finna Pathiannu Palllas Athena-i fei pawh siam tu in a aia tha awm tawh lo tur a asiam sak ani a, A phaw hi rangkachak, dar, thir leh tangkarua a thuah li laia chhah a asiam ani.

He indo na ah hian Zeus-a leh, Hmangaihna Pathiannu Aphrodite-i te fapa Aeneus-a pawh a that tep a, mahse Pathianten Aeneus-a hi hun lo la kal lehzel tur a a fa te nenTroy khua a rorel tur a anlo ruat tawh anih avangin Tui Pathian Poseidon an Aeneas-a chu arawn humhim hman a, tin lui Pathian pathum ten an sual rawn laiin, Pathian Hephaestus an a rawn pui bawk.

Hector a athah dawn hian, a thuruk a sawi a, hei hi Pathian Apollo chuan lo hre ru in Paris-a a hrilh leh a, Achilles-a Troy Kulh a alawn lai chu Troy lal fapa Paris-a chuan alo kap a, Apollo an a thal mu tih ngil sak in, Achilles-a ke artui ah tak a kap fuh a, chuan Pathian te pawn a an hlauh leh greek pasaltha ropui ber chu a thi ta ani, tin Achilles-a hian hlauh anei a chu chu, kum sangkhat ral hnu a a chanchin thangthar ten an rawn hre lo ang tih chauh hi ani.

The end

Aside | Posted on by | Tagged , , | Leave a comment

Sudden Law of the Lariat (Mizo Version) 16

SUDDEN LAW O’THE LARIAT – 16
Rukru ho chu va um darh vek mah se an Pi Phili ber chu an va hmuh tak loh avangin Lazy M cowboy ho chuan nuam lo an ti hle a. An zinga a va tel ve theih tak bawk siloh avang khan Larrya chuan hrehawm a ti leh zual a, tunah chuan duh duh in a vak vel thei tawh a, mahse a kut na lam chu puanin a la awrh tho a. Severna pawh chuan larrya lungawi lohna chu thawi dam tumin a hnenah chuan, “theihtawp tak meuh kan va chhuah tawh a, tih ngaihna dang a awm tawh chuang lo a ni. Tunah hi chuan va kal ka tum tawh lo, Hope khuaah ka va kal dawn, nula bual at ban lehlam na lehnghal phei chu kalpui ka duh bawk hek lo,” a han ti a.

Hope chu chhun lai velah severna chuan a va thleng a, ni a sa in, khua a lum bawk a, mihring vak chhuak hmuh tu an vang hle a, Bank chu a lo inhawng leh tawh tih a hmuh veleh sakawr atangin a chhuk a, bank chhungah chuan a lut ta a, chauh hmel tak leh hmai dang fe chungin Rapsona chuan Bank chu a lo nghak a, severna a hmuh veleh hmelhriat han hmu ta chu, za mang lo fe chung hian a lo nui deuh sak a.

Severna chuan “A va lawmawm ve, i lo dam leh tawh a ni maw? I hna i chhunzawm leh nghal mai dawn em ni? a han ti nual a. Rapsona chuan “Bank hi hawn leh chu ka han tum phawt zawng a ni a, mi an lo tha em a, pawisa ka hloh sak avang khan tuman ka thiamloh ah an puh chuang lova, Barta ngei pawh khan Banka an rawk hma ni chiah khan Dollar 5000 zet a rawn dah lut a, dik tak chuan a apawisa ka bat sak tluk chiah a ni, mahse mi pawh thing duh chuang lovin, I pawisa bo chu i hmuh leh hunah min la rul mai dawn nia,’ a ti mai a. midang pawhin chutiang chuan an ti ta ve zel mai a ni” a han ti a.

Severna chuan a va han ti lawmawm ve, Rapsona hnenah chuan a han ti phawt a, mahse hriat tham loh khawpa zawiin, “a fing kher mai” a han ti zui a. Chanchin dang an sawi zawm ta zel a, rei deuh hnuah severna chuan “Khawngaih takin pawisa min thleng nawi sak tak che, pawisa nawi pek chhuah a tul dawn a”, a han ti a. Chutia tih pawh chuan za nawt hlir panga hi Rapsona chu a han pe a, Rapsona chuan nawt chu a la a, a han en thuak thuak a, a kutte chu a khur deuh dar dar a, “ka thleng sak thei ngei ang che, mahse thil tih tur pawimawh tak a awm avangin ka clerk hi ka han tir phawt ang a, lo nghak hram ta che,” tiin severna chu a han zawt leh rih a, “ani chuan a hmanhmawh thlak love” a lo tih san mai a.

Rapsona chuan Clerk hnenah chuan tih tur zawi te hian a hrilh ru a, clerk chu a chhuak ta thuai a. A chhuah hnu chuan Rapsona chuan pawisa nawi chu muangchangin a han chhiar chhuak a, pawisa chhiar zawnga a kut te chu a khurh nasat em avang leh a chhiar nawn zin em avangin severna chuan ‘a zam tawh hle a nih dawn hi tih leh a demawm vak bik love’ a lo ti ril ru a. Rapsona hnenah chuan “pawisa bo chu hmuh chhuah leh i inbeisei emaw chu?” tiin a zawt chhuak ta a.
Rapsona chuan “vawiin chawhma lam thleng kha chuan hmuh leh pawh ka lo inbeisei tawh lo hle a, mahse tunah hi chuan hmu chhuak leh mai dawn nia inrinna ka nei ta”, a han ti a, A tawngka chhuak atang te leh a han chet vel dan atang chuan rapsona chu a zam ta lo hle ni hian severna chuan a hria a. A hnunglama ke per ri a hriat avangin a han lehhawi a, sheriff leh a hote pahnih bank chhunga lo lut lai chu a va hmu ta a.

kawngkhar bul velah te chuan mi thenkhatte chu an awm ve a, an lo thlen belh zel bawk a, severna chuan buaina engemaw tak lo thleng tur a awm a ni tih chu a hrethiam nghal a.

Sheriff leh a hote pahnih chuan severna chu an rawn pan hnai zel a, ani pawh chu saisir zawng deuh hian a ding a, anni ho chu a lo en reng a, sheriff chuan hlawhtling inti awm tak hmel hi a pu a, an pathum chuan puakruk kawm an vuan sa ringawt mai bawk a.

Severna pawh chuan a kutzungpui chu a puakruk paina kawnghren karah chuan a han rawlh lut ve a, nui chungin, ”Sheriff, lo kal rawh khai, ka chhuak tep tawh ania’ alo ti a.
Sheriff chuan,”I la chhuak mai rih dawn lo, za nawt i thleng darh tak kha khawi atangin nge i neih?” a rawn ti ta a. Severna chuan,”I hriat ve a tulna chhan kher chu ka hre lo hle a, mahse ka hrilh tho ang che – Bank an rawk hma chiah khan zingah Bank atang vek hian pawisa ka la chhuak a, chumi zinga lo tel chu a ni – chu chu a dik a ni lawm ni, Rapson?” tiin Rapson a chu a han zawt ve nghal a.
Rapsona chuan lu thin pahin,”Tun lawka za nawt min pekte kha pawisa ruk zinga tel ve chiah a ni,” a lo ti ta mai a.

Severna chuan makti tak maiin Rapsona chu a han en a, mitmengte pawh chu en ngam loh khawp hiain a nelawm tawh lova, awki hniam tak, ban fe mai hian, “Ka pu, i ti sual palh a ni ngei ang chu maw? tiin Rapsona chu a han zawt ta a. Rapsona chu a zam em em a, severna thinrim zia pawh chu a hani bik lova, mahse hmui khur hlawk hlawk chungin, “ka tisual palh lovang, Bank an rawk hnu khan pawisa rukbo zinga nawt lian deuh deuh number chu ka la vek a, sheriff hi a copy ka pe ve bawk a, i duh phawt chuan nangmah ngeiin i endik ve thei ang chu,” a lo ti leh a. Number a lo chhinchhiahna lehkha leh severna za nawt rawn kente chu a han lek chhuak a, severna pawh chuan a han endik ve nghal a. Rapsona sawi ang chiah chu a lo ni si a. Rapsona chuan a lehkhabu atangin number dang a rawn ziak chhuak a, chu chu severna pek pahin, hengte hi Bank atang i pawisa lak chhuah number te chu ani, a han ti leh a.

Severna chuan lehkha chu en pahin ngun takin a han ngaihtuah a, a chunga thil lo thleng chu a hre thiam lo hle a, mahse a dinhmun derthawn zia erawh chu a hre chiang em em thung a. Sheriff lam chu a hawi a, lehkha chu a iptea ah luh pahin ring fe hian a han nui phawt a, sheriff hnenah chuan, “sheriff engti ti thei nge i nih chiah zawng ka hre lo, mahse min hmehbel i tum tih erawh chu ka ka hria, bank rawk tute zinga tel veah khan min puh i tum a ni ngei ang maw?” a han ti a.

Sheriff chuan “tum chiang e, chu bakah Rapsona kaptu ah pawh hian puh che ka tum a sin”, a la ti ta deuh deuh a. Severn chuan pawi ti hle niawm tak in, Rapsona chu a han en a, a hnenah chuan “Rapson, ka lo kap che a ni maw? ka tihpalh der a nih chu !!” a han ti a. Sheriff bawk chuan “Mastersa thattu i ni bawk,” a la rawn ti ta fo a. Severna chu za fe hian a han nui leh rih a, sheriff hnenah chuan “Tyler, i la hre kim lo anih zawk chu, President Lincoln a kaphlumtu pawh kha ka nia sin,” a han ti a. pawn lama mite chu anlo nui ham ham a. Chu chuan sheriff chu a ti sa phat mai a, a thinrim lutuk chuan puakruk phawi mai a han tum a, mahse Severna phawi ran zia chu a han ngaihtuah chhuak a, a inbeng dai leh ta a, mahse a thil tih tur chu a hmutute chuan an lo hai awzawng lo mai, sheriff chu nuihzat fahran hian, “Sheriff, lehkhaden thar i duh a nih zawngin ka rawn la vat mai ang,” a hnunglam atangin mi pakhat hian a rawn ti el a. Severna’n lehkhaden pawh huai siaka a cho kha an la hre reng a ni ngei ang!!

Sheriff chuan chhanna dang vak a hriat a loh avangin a hote chu, severna puakruk laksak rawh u, tiin thu a pe ta a. Mahse a deputy pahnih te chuan Severna puakruk pai lai va laksak ngawt chu an lo chak lo dun kher mai, severna chuan nui chung bawk hian “sheriff hmanhmawh lutuk teh suh, engemaw chenah chuan zaidam tak mai ka ni ve a, dan reng reng chu pawisa tak mai ka ni bawk. Law ka tih chu hre reng la, Sheriff, diklo taka dan kengkawhtu rannung hman tlak lo tak tak hi chu ka ti lo a nia, pawng nek ngawt chu ngaitheilo tak ka ni” a han ti a.

Sheriff chuan “chuti a ni maw? thu ka pek phawt chuan kan kap darh vek thei che tih i hre nange? ram zet hian a han ti ve thung a, Severna chu sawi fe hian a la ding reng a, mahse hmuh chian hman loh khawpa rengina puakruk pahnihte chu a phawi a, sheriff leh a hote chu a tin ta reng mai a. “Tyler, thu chu han pe ta che, nangmah phum tur chein” a ti ta a.

Sheriff chu a phu zawk hman chauh a, a hmaite chu a dang nghal vek bawk a. Chak fahrana mi thenkhat bank chhunga lo lutte pawh chuan silai mu tawn palh hlauvin chak tak bawkin pawnah an chhuak leh ta nghal a, an tlan chhuak lai chu hlim taka enreng chungin, “tlan chhiat a tul lovang, sheriff leh a hote hian ban an phar ang a, an hnena thusawi tur tlem ka neih chu an ngaithla mai dawn a ni” a han ti zui a. Sheriff leh a hote chuan rang takin an phar ta a. Ban pharchhuah pahin Sheriff chuan, “Sheriff man i lo hnial avangin dan i bawhchhiat belh leh ta a ni hi,” a han ti leh hram a.

Severna chuan “Min kahihlum nawn thei chuang nag, han hnial ka tum lova, tlanchhiat pawh ka tum hek lo,, mahse min man hmain thil tih fel tur tlem ka nei a ni. Lazy M ah chuan hotu tumah an awm dawn lova, chuvangin mn man tih an hriat chuan buaina siam tumin an lo thawk chhuak mai ang tih ka hlau a, chuvangin mi pakhat tir ula, engmah rawn ti lo turin va hrilh sela. Tin Desert edge khuaah Judge Emblya kha va hrilh nghal bawk sela, a ni chuan tih tur engkim a lo hre nghal mai ang” a ti a.

Kawngkhar zawna lo dingte chu an tawlh kiang dial a, Bank chhungah chuan pawisak neilo fe hian Snap Lunta chu a lo lut a, Severna pawh chu la hre ngailo niawm tak hian a hnenah chuan, “Mister, Desert Edge ah chuan ka kal dawn tho a, i sawi duh chu min chah nghal mai rawh”, a rawn ti ta a. Severna chuan “a lawmawm ngwt ang a” a han ti hman chauh a. Mahse sheriff chuan “chuti mai tur chu a ni thei lovang” a lo ti leh a. Snapa chuan sheriff chu thip zet mai hian a han mel a, a hnenah chuan “Sheriff, duh duh a ka chet vel hi phal loh tumna rilru te i nei em ni?” a han ti a, sheriff chua ngawi ta reng a. Severna chuan a puakruk paina kawnghren chu a phelh a, sheriff chu pek pahin, “ka tihtur chu ka ti zo ta bawk a, tunah chuan i thuhnuaiah ka intulut e. man loh zawk tur min man a, mahse chutiang thil tenau mai mai te chuan i rilru a tibuai vakin ka ring lo” a han ti leh kher a.

Khua a thim dawn tep tihin severna chu ring zet mai hian a han au va, a vengtupa chuan enge ni i duh? a rawn ti a. Severna chuan “chaw min pe ve dawn lawm ni?” ril a tam nasa tawh asin a lo ti a. Chupa chuan nui chung hian “ka lo theihnghilh daih che ani, ka han ngaihtuah a nge” a ti a a kalbo ta nghal a. Severna chuan a kut an phuarna chu a tui intur in a chiah a leih a, reilo teah a lo zawi a, awlsam takin an phuarna chu a phelh thei ta a. Kawngkhar chu a rawn inhawng a, vengtu chuan chaw thleng keng chungin inchhungah chuan a lo lut a, thleng chu chhuat laiah a han dah a, zawi muangin a dan ding chhuak a. A ding chhuak chiah chu, severna chuan a va zuan thut a, nazet maiin a khabe ah chuan a va hnek sak a. Chupa chu a tlu nghal der mai a. a tlu lai chu severna chuan a phuar bet a, a kaah puanchhe tumtel a hnawh sak nghal bawk a. Chupa puakruk pai lai chu a phawi chhuak a, a mu a inthun tihte a enfiah hnu chuan a kawnghren karah a zep a, a kawrin a khuhbo leh nghal a, reilo te thawm riva a han ngaithla rih a, tah chuan muangchangin pawnah a chhuak ta a.

Severna chu jail a tanga a tlanchhuah hnua a tih tur tul nia a hriat te a tih fel vek hnu Minute 20 hnu velah chuan a sakawrah a chuang a, a kal leh ta zel a, thui vak pawh a la kal hmain sakawr tlan ri a hre leh a, puakruk pheisa rengin kawng sirah chuan a biru ta a, mahse lokal thar chu Larrya a ni tih a hriat veleh, “Engtinnge….” tih pahin a bihrukna atang chuan a lo chhuak a, Larrya chuan Hope khuaa mite chu an buai kher mai, i lu manah Dollar 500 an phal tak kha a han ti a. Severna chuan ” Itawm tham a nih chu mawle?” a han ti a. Larrya chuan “Hlawh ve mai i rilruk deuh em ni?” tia a han zawh chuan “tum pawh chu tum mai e” a han ti leh a.

Severna chuan “enge min hmuh i duh chhan chu”, tiin a han zawt leh a. Larrya chuan “Desert Edge khua ah khan Snap Lunt an Judge Embly a va hmu zo lo, tunhma ni thum velah tawh khan Judge inah chuan mi pali an lokal a, Judge chu an hruai ta a ni awm e, inneitunu chuan chung mi palite chu a lo hmu ve a, mahse a hriat ngai loh mi hlir anni awm e, judge chu a lo kir leh ta reng reng lo” a han ti a.

Judge lo awm lo chu severna tan chuan a pawi em em a, mhse thil dang vak sawi lovin, “an ru bo ve a ni maw? an ngaihtuah kim hle mai,” a han ti chauh a. Larrya chuan “tuten nge ru a, khawiah nge an kalpui tih chu min hrilh i tum lo a ni ang maw?” tiin a han zawt leh hram a. Severna chuan “a ru tute chu tute nge an nih ka hre chiah lo, mahse emblya chu Phili an thuhrukna hmunah bawk an thukru ve a nih ka ring” a han ti a. Larrya chu a han ang nang nang a, mahse severna chuan ” i sawi zawh tawh chuan i kal tawh ang hmiang” a lo ti a.

Larrya chuan khawiah maw? tiin a han zawt thuai a. Severna chuan a kal tumna a sawi veleh Larrya bawk chuan “I a ta em maw ni chu le, khua a mi zawng zawngin an zawng huai huai che a, chutih lai kara va kir leh kher…… ” a han ti hman chauh a, “Khuaah chuan ka awm an ring tawh tawp nang engpawhnise, tih tur ka nei tlat a, ka kir leh dawn” a han ti a. Severna’n sheriff chenna in a va thlen chuan a la hma bawk a, tho chhuak tumah pawh an la awm lova, lung a la lawk a, kawngkhar chu ring fe hi hian a han chhu ri bur bur mai a. Mi reh lai a ni bawk a, thawm a rin duh em avangin a bul vela kawtthlera tukverh te chu a rawn inhawng a, engtizia nge ni ta? tiin mi tam tak chu an lo dak chhuak ta bawk a.

Severna chuan rei pawh a la din hmain sheriff chuan kawngkhar a rawn hawng a, phak fe hian a rawn meng chhuak a, severna chu hmuh pawh hmu ta mumal mang lo niawm tak hian “Enge i duh?’ tiin a han zawt a, severna chuan “Lo luh a ni mai dawn lawm ni?” nui chung hian a han ti phawt a. Tah chuan “ka hah tawh em a, mut ka chak tawh a ni, tin, dollar 500 chu ka duh bawk a, hmanna tur pawimawh deuh mai ka hre tlat a, tunah khan i kawl nghal mai lawm ni. sheriff” a han ti zui a. Sheriff chuan “kawllo, kawl mah ila ka pe chuang lovang che” thinrim fe hian a han ti a. Chutih lai chuan severna thiltih chu hriat chian tumin mi an lo pungkhawm tam hle tawh a, chu chu severna duhthusam a ni zawk a. Thil mak tak, misualin lungina tan leh duh in sheriff a rawn be lai chu, khuaa mite chuan an lo ngaithla ta a nih chu.

Severna hnenah chuan inti thei fahran hian “thu rawh, khaihlum tura kan hruai chhuah leh hma che chuan thlifim dawng turin i vak chhuak tawh kher lovang” a han ti a. Severna chuan “ka chungthu i rel thlu der tawh a ni maw? a lo ti ve thung a. Chutih lai chuan deputy te pawh an lo thleng ve hman tawh a, an hnenah chuan “Lunginah khung leh nghal ula, tin, a ke leh a kutte pawh phuar tel vek tawh ang che u”, tiin sheriff chuan thu a lo pe a, amah pawh chuan a zui ve ta nghal a. Mipui pawh chu an kal darh ve ta a… mahse an kal darh hma chuan pakhat hian, “kha pa kha a aaa a nih loh vek chuan thil a tisual lo tawp a ni ang” a han ti zui hram a.


Bartholomew-an a kalsan hnu khan Phili chu a mangang em em a, Barta mizia chu a hrechiang sawt bawk a, tunah chuan neih a hreh mai ni tawh lovin amah chu a huatin a haw hluah hluah tawh zawk a. Rilru buai taka a awm reng lai chuan puakruk ri tum hnih a han hria a, a pindan kawngkhar chu a rawn ri dawt dawt a, Barta chu a lo lut leh ngei dawna a hriat avangin a huphurh hle tawh mai a, mahse mit khingkhat tuam pa te lam deuh, khabe hmul tham mai chu a lo lut a. Phili chu a kut a rawn hui pahin “lo kal rawh” a rawn ti chawt mai a.

Phili chu hlau in a kimki reng tawh a, chupa hnenah chuan “khawiah maw? thanga awk leh turin em ni min hruai dawn?” a lo ti hu a. chupa chuan, “tunah hian i awm sa reng tawh a, hruai chhuah che ka tum zawk anih hi,” a han ti phawt a. Aw nem deih zawkin “bang phena hrilh tu che kha ka ni a, ka thu i zawm avangin ka lawm ngawt mai”, a han ti leh a. Chu veleh phili chuan “ka rawn zui ve nghal ang che” a lo ti ta thuai a. Phili chu pawnah a hruai chhuak a. Tawite an va kal a, phili tan hmasakna ang chiah bawka sak, in chu an va thleng a, chupa chuan kawngkhar chu a hawng a, phili chu a luh tir ta a. inchhungah chuan kawngkhar lam hawi zawngin mi pakhat hi a lo ding a, chu chu Phili’n a va hmuh veleh, Judge Embly makti tak maiin a ti a, chu chauh chu a sawi chhuak hman a, mahse a han inngaihtuah chiang a, Barta thusawi kha a rilru ah a lo lut thuai a, Emblya erawh chuan “Nang i ni maw? Bar B neitu kan misual pa kha emaw i nih dawn ka lo ti asin” a han ti zet a. Phili rawn hruaitu hnenah chuan “ka thian enge thil awmzia ni ta le?” a han ti leh a.

Chupa chuan “Judge, thil awmzia engmah a awm teh chiam lo, Severna te hovin nimina puk an rawn beih khan mi pakhat an kap hliam a, chupa chu a thi tep a, a thih hmain inpuan tur thu pawimawh tak a nei a, a thusawi chu i lo ziah a, nula hi witness a alo tan duh dawn bawk chuan heta tang hian ka hruai chhuak ang che u” a ti ta a. Emblya chu reilote chuah a inngaihtuah a, “hma chu hruai rawh le” a ti ta thuai a.

Emblya te chu thui fe a hruai hnuin hmun biru fe ah hian in pakhat an lo thleng leh ta a, a chhungah chuan an lut a, pindan pahnih a lo awm a, khumah hian damlo pahnih an lo mu bawk a. An hruaitupa chuan pakhat zawk mutna khum chu a va pan a, Emblya chuan “tunge a nih? tiin a han zawt a. Ani chuan “Slick-a a nih hi, hetah hi chuan hotu ang deuh a ni a, a muhil dawn a nih hi,” a lo ti thuai a. Khum pakhat chu a va pan leh a, chuta mu chuan harsa ti tak chungin, “enge chanchin patch? tiin a lo zawt a, (Patch – mit khingkhat chauh hup turin savun emgaw puan emaw an siam a, chu chu mitko chungah hruiin an hling bet a, chu chu Patch an ti. patch tia a lo kohna chhan pawh chu a mit atuam vang chu a ni mai) Patcha chuan “ka tiam tawh che ang khan Judge leh Nula chu ka rawn hruai a”, a ahan ti zet a. Judge hnenah chuan “in ring thuai rawh khai, rei a daih tawh lovang” tiin a han hrilhru ve thung a. Khuma damlo mu Mobeya chuan
“Hun rei ka nei tawh lo, rilru nuam taka thih ka duh a ni. Desert Edge khaw bula sakawr tawlailir an rawk a, a driver Tug Satters a an thah tum kha in la hria ang a, a rawktu pali te zingah khan ka tel ve a. Sattersa kha keima kah hlum a ni nghe nghe. Tawlailir kan rawk hnu khan lehkha ka ziak a, ka hming nen, sattersa thattu niawm takin midang kan zinga telve hlek lo chu ka puh ta a, chutia ka tih loh chuan lungina khung turin vau ka ni si a. Shattersa thattua ka puh a chu Phillip Mastersa a ni” a ti ta a. Phili chuan “kapa maw?” makti fe hian a lo ti a. Judge chuan “tuin nge vau che a, lehkha chu ziah luih tir che?” tiin a lo zawt ve thung a. Mobeya chuan “Bar B neitu Bartholomew-a” a ti ta a. Emblya chuan chung thu a ziah zawh chuan hming a ziak a, Phili a han ziah tir leh a. Mobeya pawh chuan thei leh thei lovin a han ziak ve hram a. Mobeya chuan “bartholomewa hi a ni…” a han ti leh chauh a, mahse a sawi zawm thei ta lova. Judge chuan kawmawlin a hmai chu a khuhsak ta nghal a. Judge chuan “engtinnge ni zel ang? i hming pawh kan lo hre bawk si lova,” a han ti leh a, Patch chuan “Mobeya min kohna kha ka hming atan chuan a tawk rih mai, mi pali te kha an lo kir leh tep tawh ang hmanhmawh tur a ni” a han ti a. Emblya chuan “tute nge an nih?” tiin a han zawt leh rih a, Patch chuan “anni chauh kha White Masks la dam chhunte chu an ni mai, kei leh slicka tiam lo hian” a han ti a, Emblya te chu a chhuahpui ta nghal a.

Emblya chuan engmah dang pawh sawi lovin, “I hmanhmawh ang u. Phili, Patch leh kei chu Hope khaw lam panin kan tlan nghal ang a, XT lam panin nangni chu tlan nghal bawk ula, in thiante rawn pun khawm ula a tha ang, kan la tlai lutuk lo maithei a ni” a han ti a. Hmanhmawh takin an kal ta nghal hlawm a.

Severna chhanchhuah a inbeisei vanga Emblya chu hmanhmawh a ni tih Phili chuan a hria a, a ngaihsan phah hle bawk a, Judge hnenah erawh chuan, “Hman laiin Severna hi Sudden, Outlaw an tih thin kha a ni maw? tiin a han zawt a. Emblya chuan “Ni e, mahse Outlaw chu a ni lo, Governor hnuaiah Deputy Sheriff hna a thawk mek a ni. Severna hi i haw hle niin ka hria mahse engtikah emaw chuan amah hi ila hre chiang ang a. Chumi hunah chuan a laka i bat nasat zia pawh hi i la hre chhuak ang,” a han ti a. Emblya chu a chungah a lungawi vak lo nia a hriat avangin Phili pawh chu a ngawi ta reng a.

Severna rawn inpek tuk chuan Saloon chhung chu rorelna pindan atan an buatsaih ta chuk chuk a, Judge leh mi pawimawh deuh thut nan chair pathum dawhkan bulah an hung a, dawhkan hmalamah chuan Lungin tang leh Deputy thutna tur, thutthleng pathum an dah leh a, tin, jury thutna tur an ruat leh bawk a, midangte erawh chuan thutna tur pawh an chang ve tawh mang lo, hmun remchang lai apiangah awmhmun an lo siam nghal ve sawk sawk a. Severna chu Saloon chhungah chuan an rawn hruai lut a, a thutna tura an ruatah chuan an thuttir a, a sir tuakah Deputy pahnih te chuan puakruk phawisa rengin an veng nghal bawk a.

Severna chu a han hawi kual vel a, Jury ho chu Forte a awm vek anni tih chu a hre nghal thuai a, in chhungah chuan Benta, Callahana leh Larrya te pawh an lo thu ve a. Mahse Lunta chu a hmuh ve loh avangin a han zawng rilru deuh a, chutih lai chuan Lunta chu Bar B cowboy pali hian inchhungah an rawn chhawm lut ve nghal a. Snapa chu a lungawi loh hmel hle a. Severna chuan “a thiante sawm tuma a kal laiin kawng lakah Bar B ho chuan an lo lambun a, an rawn hruai lut ve ta a nih dawn saw, Barta chu a fimkhur hle maw” tiin a ngaihtuah neuh neuh a.

Judge chuan tuboh in dawhkan chu a han chhu a, inchhung chu a reh ta thup a, tah chuan “Sheriff enge ni in thubuai chu? tiin a han zawt tan ta a, Sheriff chuan ” thil tih sual a ngah mai- Martina hi kahhlum a tum a, Bank a rawk a, Jail atangin a tlan chhuak…” a la tih mek laiin Judge chuan “a tawk e, Bank rawk thu leh tualthah thu chu kan ngaihtuah anga, chung chu a lo ti ngei a nih chuan a thiltihsual dangte chu kan theihnghilh thei ang chu……” a han ti a. Bank Manager Rapsona chuan Bank an rawk dan te, an pawisa ruk sak ngei Severna bawkin a rawn ken leh thu te chu chiang takin a han sawi ta a, Judge chuan “thu zawh chian duh i nei em?” tiin severna chu a han zawt a. Ani chuan “Nei e”, tih pahin Rapsona chu a han ena, a hnenah chuan “A kaptu che chu keimah aia hniam deuh hi a ni thei mai lawng maw?” tiin a han zawt a.

Severna bawk chuan “a kaptu che chuan hmai a tuam tlat avangin tunge a nih i hre thei si lova, chuvangin keimah ang tia vel hi a ani mai thei a. Keimah aia lian deuh zawk pawh hi a lo ni mai thei bawk a,’ tih pahin a han hawi kual a, “ntirnan Bartholomewa te ang tiat vel hi” a han ti a. Rapsona chuan severna thusawi chu a ring lo hle a, “Barta hi chu ka chungah a tha em em a, Bank ah chuan Dollar 5000 a dah ve bawk a, ani hi zawng nih ngaihna a awm lo reng reng” a han ti a. Severna chuan “a rawk che chuan Dollar 5000 pawh chu a hloh dawn chuang hauh lo a ni tirawh?” a la ti leh a, Severna bawk chuan, “keipawhin ka rawk dawn tho si che chuan ka pawisa dah kha lak chhuah kher ngai awm lo tak, buaithlakin” a han ti zui a.

Judge chuan “engvangin nge i lakchhuah a?” tiin severna chu a lo zawt ve ta a. Ani chuan a lak chhuah chhan chu hrilh fiah pahin a lehkha hmuh chu a han phawrh chhuak a, Jury ho chuan an en kual diat diat a, pakhat chuan “I lehkha hmuh hi i zep hle a ni maw?” tiin a han zawt a. Chutihlai chuan benta chu a lo zuang tho a, “Kei leh XT neitu Ridgea te pawh min entir ve asin, Bank atangin kan pawisa dah pawh kan lakchhuah phah ve ta nghe nghe a, chuvang ngawt a, Bank chu rawk hle min ring in awm em ni?” a rawn ti ve ta a. Judge chuan “tumah dang kan puh love” a lo ti thuai a.

Severna chuan “Judge, thil i ti sual palh der a ni, ka dinnaah hian Barta hi ding zawk tur a ni. A nihna chhan pawh chiang takin ka tilang thei ang” a lo ti ve ta a. Chuveleh Bar B atanga Severna thil va lakchhuahte kha saloon neitu chuan a rawn la chhuak ta a, Barta erawh chuan “i duh duh chu han sawi teh le,” tiin severna chu a han cho a. Severna chuan lehkhabu chu pek pahin, “hei hi i ta em ni?” tiin a han zawt a, Barta chuan “Ni e, engtinnge i kuta a lo awm theih?” a lo ti thuai a. Severna chuan Barta zawhna chu chhang lovin, “a chhunga thu pawh kha i ziah bawk a ni ngei ang maw?” a han ti leh a.
Barta chuan “ni e, mahse…..” a la tih mekin Severna chuan “White Masks hovin kan zinga mi pakhat an lakbo tumin lehkha an hnutchhiah a, chu lehkha chu kha lehkhabu atang pawh thlak kha a ni tih a number atangin nang ngei pawhin i hre thei ang. Tin, chumi lehkha a kutziak leh lehkhabu a kutziak hi ziaktu thuhmun chiah ani” a ti a. Lehkhabu leh lehkhate chu judge chuan ngun takin a lo en ve a. Barta chuan “kha lehkhabu ka hlohna kha thla khat lai a ni tawh a. Darbya min hawtu tak, tuna in ranch a thawkte khan a ruk a nih ngei pawh ka ring, kha lehkhaa ziaktu khan ka kutziak a zir thiam hle a ni” a han ti a.

Severna chuan “Shadewella ka rawn hruai tuma ka entir che khan i lo hre chhuak mai lo ani ang maw?” alo ti leh a. Barta chuan “khami tum kha chuan en pawh ka en chiang hman hleinem,” tiin a lo tang ve tlat a. Severna chuan “Lehkhabu bo thu kha chu a dik viau, nizanah Bar B Ranch atangin ka ru bo a nih kha, tin, thil dang tihsual pawh i la nei, i dawhkan atang chuan hengte hi ka la tel bawk a, Rapsona hian enge an nih min hrilh theiin ka ring” a han ti a.

Rapsona chuan severna kuta pawisa chu a la a, nawta number te chu ngun taka a envek hnuin, “heng nawt te hi Severna hnena ka pek chhuah te kha anni” a ti ta a. Judge leh Barta chu an inbe ru leh rih a, tah chuan, “engeni sawi i tum?” tiin severna chu judge chuan a han zawt leh a. Severna chuan a hlawhtling dawn lo tih chu a inhre chiang nghal a, mahse, “Lehkhabua thu inziak leh lehkhabu atang khan Barta hi White Masks hotupa ani tih chu a hriat a. Lazy M atanga Phili an ruk chhuah tum khan ka pawisa an ru a, a aiah Bank atanga an pawisa ruk kha an lo dah ta a. Tin, heng hi va la turin Jail atangin ka chhuak a, keima thu ngeiin ka lo kir leh nghe nghe” a han ti a. A lo kir lai hmutu te pawh chuan “A dik e” an lo tihpui bawk a.
Barta erawh chuan “i fing hle mai, severn thawnthu ziak ve la, lehkhabu ru mai mai lovin a tha ang”, tiin inchhunga mite chu a han enkual vel a. An hnenah chuan “keima pawisa bawk Bank atanga ka ruk chhuah avang chuan duh leh min khailhlum ta mai che u,” a han ti fiam a, anni ho chu an lo nui ham ham a. An jury Mugera chu a lo ding chhuak a, Jury ho chuan “engmah dang hriat tul tawhin ka ngai lo, severna hi a pawisa ruk nen ngei kan man a, rinhlelh tur engmah a awm tawh lo, a ma ruk ngei hi a ni ang tih kan ring tlat” a rawn ti ta a. “A nih leh rukruk thu chu tawk tawh sela tualthah thu chu i ngaihtuah tawh ang u” a han ti a.

Severna chuan “Mastersa ka thah avanga hlawkna ka neih loh tur zia tilang turin kan zingah Emblya a lo tel ve si lova,” a han ti tan chauh a. Judge chuan “nangmah nena inthurual niin embly a chu kan hria a, tunah pawh hian a lo tel ve ngam lo a nih kan ring, amah vang hian a ni lawm ni Mastersa hnenah pawh hna i va hmuh? a lo ti a. Severna chuan “Ni kawngkhat e,” ti chauhin a lo chhang a.

Judge chuan “Lazy M a hna i thawh veleh mastersa chu a bo ta a, a nih leh Masters in a ken ngei a rifle kha engtingne i lo neih? a han ti leh a. Rifle a lo neih dan te chu Severna chuan chiang takin a han sawi a, Ignacio a thah thu te nen, Barta chuan “I daw a nih chu, Ignacio chu Mexico khuaah Pentona’n a va hmu a ni, nimin piah lawk khan” a lo ti leh a. Severna chuan “hei hi Ignacio ipte atanga ka lak chhuah a ni a, Barta kutziak a ang leh pek hle a nih hi,” a han ti a. Judge chuan “Thil ziak i uar hle a nih hi, Mastersa rifle i chhar thu chu tunge i hrilh?” a han ti eh a. Severna chuan “Phili” ti chauhin a chhang a, Judge chuan “Phili chu a awm leh bawk si lova, i thu hretute hi an bo vek a nih awm hi mawle”, deuh sawh deuh tak hian ahan ti phawt a. Tah chuan, “sawi tur dang i la nei em” tiin a han zawt ve thung a.

Sheriff chuan Mastersa thawmhnaw, hnimbuk hnuaia a chhar thu te chu kimchang takin a han sawi a, tin, “puan zingah chuan hei hi ka chhar tel bawk a”, tih pahin silai chu a han phawrh chhuak a. Judge chuan ngun taka a en hnu in, “hei hi i silai em ni?” tiin Severna chu a han zawt a, a ni chuan “Ni e, White Masks hovin min ruk sak a nih kha, chutih lai chuan a kawmah hian ka hming a la inker lo, Bartholomew ziah ringawt pawh duhtawk lovin ker te i lo ching leh zel a ni maw?” a lo ti a. Barta chuan “Phat mar i thiam hle mai a,” hmusit awm fe hian a lo ti a.

Chutih lai chuan Benta a lo ding chhuak a, “ngawi teh u, in puh ang hian Severna hian a lo ti tak tak anih chuan mi aaaa theihtawp ani tihna a ni dawn a, a at lohzia chu in hre chiang hle si a. A pawisa ruk sa chu a rukna Bank ah bawk thleng nawi a tum a. Masters a that a, a kawr a thukru a, chumi zingah chuan ama silai, a hming pawh inker lehnghal chu a hnutchhiah leh bawk a. Jury te hi ka zawt a che u, “Severna hi mi aaa let der niin in hria em ni?” a lo ti ta a. Judge chuan “a thian i nih avangin chu thu chu zawt awm tak pawh i ni, misual reng reng chuan an sual zia an thup hlen tak tak thei ngei reng reng lo, lo lan chhuah hun a awm ziah, an fimkhur zo tak tak thei thin lo. Masters a thah chhan hi chu Ranch a neih sak duh vang mai a ni” a han ti phawt a. Jury ho chu an inpeih tawh em tiin a han zawt let a, Mugera chuan “kan inpeih tawh e” a lo ti thuai a.

Chu veleh Bartholomewa chu a lo ding chhuak a, “Judge, Jury ho hian an hriat tulin ka ring a, tuna severna inti hi tun hma a Sudden-a Outlaw thin kha a ni,” a rawn ti ta daih mai a. Inchhunga mite chu an phun ru mur mur a, Suddena chanchin la hre ngailo chu an zingah tumah an awm bawk si lo, Severna chuan puakruk han keng nase chuan awmsam takin inchhung atang chuan a kal chhuak thei ngei ang a, amah dal ngam tumah an awm dawn loh avangin. Chutiang khawpa hmingthang, leh mite hlauh chu a nih avangin mipuite chuan an hmu duh hle a. Mugera chu lo ding chhuak leh a, “Judge, thu engkim ngaihtuah buai ngai lovin kan peih fel tawh e,” a rawn ti ta mai a. Judge chuan “enge in thu tih tlukna chu’ tia a han zawh chuan “Severna hi a thiam lo let der a ni,’ Mugera chuan a ti ta a.

Judge chuan “chuti a nih zawngin rorelna chu kan zo tawh e, tual a thah avangin Severna hi thih thlengin a nghawngah khai tur ani. Sheriff severna hi khawpuiah i hruai anga, tah chuan an lo khaihlum tur a ni ang” a ti ta a. Martina chu thinrim deuh mai hian a lo ding chhuak a, “Khawpuia thawn kher a ngai lo, kan khuaah pawh amah khaihlum theihna tur thingzar leh hruizen te chu a tam ve tho. Khawpuiah chuan a thian, thil ti thei tak tak ten an lo chhuah leh mai ang” a han ti a. Martina thusawi chu mipui lawm zawng tak mai a lo ni a, tichuan inchhung chu tawng riin a khat leh ta mur mur mai a, Bartholomewa chuan hlawhtling a inti bawk a, a hlim hle mai a.

Judge chuan mipuite chu ngawi rih tura a khap hnuin, “Sheriff, tluang taka dan i kenkawh loh chuan a mawh chu nangman i phur vek ang” a han ti leh a. Sheriff chuan hlauthawng tak chungin Barta chu tanpuitu atan a mit in a va sawm a, ani lah chuan “i hna alawm”, a lo tihsan mai si a. Thenkhat te chuan “Hruizen leh sakawr” ti ringawta auvin Severna chu an rawn bawh a, pawnah an hruai chhuak ta a.

Pawna an va chhuah chuan thenkhatin, “Khawiahnge kan hruai ang?’ an tih laiin Martina bawk chuan “Forgya te in khaina hmunah khan i hruai ang u, Forbya thlarau pawh a lo khawhar tawh anga sin, a lo ti thuai a, Tichuan, severna chu a nghawngah hruiin an hling a, a kut an hnungkhirh bawk a, ti chung chuan Sakawrah an chuantir a, khua atang chuan an chhawm chhuak a, Forbya khaihlumna hmun lam pan chuan an chhawm ta zel a. Barta leh Sheriff leh Judge Luftona te pawh chuan hnunglam deuhah sakawra chuangin an zui ve ta zel a.
A hmasaa kal, Martina chuan a va hmu hmasa ber a, “En teh u, thingkunga saw mi pakhat a inkhai reng mai,” a han ti a. Forbya khaihlumna thingkungah chuan mi pakhat hi a lo inkhai a, thing pangah chuan a lo inreh belh leh tawh bawk a. An zinga pakhat chuan Forbya thlarau chu a lo tul ve hle anih dawn hi, thing panga inker te hi eng tihna nge maw ni dawn reng reng chu le? a han ti a. Ruang chu an lak thlak hnin Barta chuan “Pentona a nih hi, Severna, i hnathawh a ni pek ang maw?” a han ti a. Severna chu a ngawih reng avangin amah bawk chuan “Jail atang khan amah kaphlum tur ngawt hian i va chhuak a ni maw? a pawi love, a ai i awh dawn alawm” a han ti leh a. Sheriff chuan mipuite chu khap a han tum leh dek dek a, mahse a hmaiah puakruk in an lo tina, engmah ti thei lovin a tawlh kir leh ta mai a. Severna chu sakawr atangin an hlang thla a, a nghawnga hlinna hrui hmawr lo uai thla chu sakawr zinah chuan an suih bet leh a, severna chu a han hawi vel a. Larrya a leh benta te ho, beidawng hmelpu tak chunga lo ding rengte chu a va hmu a, an piah lawkah chuan thingkung nghengin Snap Lunta chu kawi fe hian a lo ding ve a, an thiltih laite chu ngaihsak awm lo fe hian a lang a, mahse a thih ve ngawt siloh chuan engmah ti lovin Severna an khaihlum lai chu a en mai mai thei hauh lovang tih Severna chuan a hre chiang em em a, chuavangin, tum engemaw tak a nei ang tih a ring tlat a.

Hope khua atanga Severna an hruai chhuah hnu lawkah khuaah chuan mi pakhat sakawr chung chuang kum 50 mi vel hi a lo lut a, mi an reh em avangin mak a ti hle a, nu pakhat hi a va hmu hlauh a, a hnenah chuan ka pi, engtizia nge, an va reh teh duak ve,? tiin a zawt a, Nu chuan, “Khaihlumna hmun lamah an kal ta anih kha, ka fapa pawh kum 8 mi lek a la ni na a, kal ve a tum sa teh mai a”, a lo ti a.

Chupa chuan “Engvanga khaihlum tur awm ta nge ni?” tia a han zawh chuan “A pu a that a, Bank a rawk bawk a, tih vangin tlangval pakhat khaihlum an tum a nih kha”, nu chuan a han ti leh a, Mikhualpa chuan, “chu zawng thi tlak a nih chu, tunge a hming?” tiin a han zawt leh a, Nu chuan, “Severna ka ni e zawng a inti na a, Mahse Sudden-a Outlaw kha a ni an ti tlat a”, a han ti leh a. Chu veleh sakawr chung chuangpa awm dan chu a danglam nghal vek a, aw danglam tak maiin, ‘khawiah nge khaihlumna hmun tur chu’ tiin a zawt ta a.

Nu chuan Forbya awmna hmun hluiah, hla vak lo, a han ti a, Pa chuan, “I nau chuan min va hruai hram se ka ti ngawt mai, mihring khaihlum lai a hmu hauh lovang tih pawh ka tiam ngam nghal a che,” tih pahin Dollar nga a phawrh chhuak a. Nu chuan pawisa chu lak pahin, a fapa chu a kova, naupang chu Mikhualpa chuan a sakawr hmaah chuan a chuantir ve a, hmanhmawh takin Forbya te inhmun lam pan chuan an tlan ta nghal a. An tlan pahin pa chuan a panna kawng hnai ber zel min hrilh rawh, a huna kan thlen hman chuan Dollar khat i hlawh ang, kan thlen hman loh erawh chuan…. a han ti a, sawi zawm lovin a ngawi hlen ta a.

Severna khaihlum an tumna atanga hla takah chuan sakawr chung chuang pathum hi an lo lang tan mek a. Bartholomewa chuan Severna chu khaihlum thuai thuai turin mite chu alo fuih thuai thuai a, chutih lai tak chuan “Severna hrui in pawhmar tir rual chiah khan i thi ve nghal dawn, Bartholomew, sakawr vaw kaltu paw a thi ve nghal ang” tih ri an hre ta a. An han hawi phei a, Snap Lunt-a chu thing ngheng chungin a lo ding a, Puakruk pahnih a lo keng reng tawh a, Bartholomewa chu kah mai tum hian a lo kau sa vek tawh bawk a. Bartholomewa chuan “Tunge i nih? Engvanga lo inrawlh buai ve nge i nih? thinrim fe chuan a han ti a. A ni chuan “Ka hming chu Snap Lunt-a a ni, dik tak a thiltih ka duh vang chauha lo inrawlh ve ka ni, Sakawra lo tlan te saw lo nghak rih ila, sawi duh enge an neih te pawh hre fiah phawt ila, inkhaihlum hmuh duh ringawt vanga lokal te anvnih chuan khaihlumna hun chu a la tam tho dawn a lawm” a han ti a.

Judge Emblya chu sakawr atangin hman hmawh deuh maiin a zuang thla a, Phili pawh chu a hlang thla ve nghal a. Patch-a pawh chu Sakawr atangin a chhuk ve a, engmah ngaihtuah lo niawm takin mipuite chu a han enkual vel a, Phili leh Emblya chauh chu an ngaihtuah avangin Patch chu tumah pawhin an ngaihsak zui tawh lova. Judge chuan Judge Luftona chu a va pan hnai a, a hnenah chuan “Engtizia nge ni ta mai, Lufton? Dan lo anga inkhai hlumna hmunah ka hmu ta che chu a ni em lovang chu maw?” a rawn ti a. Luftona chuan “Ni aw zawng lo, khaihlum tir lo turin theihtawpin ka bei a, mahse ka hlawhchham a nih hi,” a lo ti a. Emblya chua “A nih leh Bartholomewa hian a hnial nasa ve em?” tiin a han zawt leh a. Luftona chuan “Kawng tinrengah min tanpui zel a ni,” a ti mai a. Bent-a chuan “A dik viau ang, Sakawra in lo tlan lai a hmuh che pawh khan Severna hi khaihlum thuai thuai turin a hote hi a fuih nasa a nih kha,” alo ti ve ta a. Emblya chuan “Chu chu a dik em?” tih pahin Bartholomewa chu a han en a, ani chuan,”Nangmahni in ni tih ka hre lo a ni, amah puitu tur an lokal a nih ka hlauh vang chauh a ni, a eng pawh chu lo ni ta se, in lokal avang ngawtin danglamna engmah a awm chuang lo, kan duh ang leh tum ang chu ti thei turin kan chak tawk a ni,” a han ti leh hram a. Mahse emblya chuan “i hre sual deuh a nih chu, midang lo thleng tur an la awm a, chung ho hnenah chuan thusawi tur tam tak i neiin ka ring” a han ti leh a.

Chutih lai chuan Sakawr tlan ri an hre ta nghal a. XT leh Lazy M Cowboy 12 vel tur hi hmanhmawh zet maiin an lo tlan a. Bartholomewa chu a mangang rilru hle a, mahse a hote chuan tam hneh hle a a la hriat fo avangin Emblya hnenah chuan “Enge ti theia i inrin?” tiin a han cho ta a. Emblya chuan “Hope khua hi ka huam chhunga awm a ni a, chuvangin he thubuai hi a bul atangin ngaihtuah that leh tur thu pawh ka pe thei asin,” a lo ti a. Luftona chuan, “Misual tih hriat sa, a chungthu han ngaihtuah nawn leh kher chu thil tih dan mawi lo tak a ni,” alo ti ve a. Emblya erawh chuan, “Thil tisual hlek lo lo khaihlum ngawt chu a mawi lo leh zual ang,” thinrim deuh mai hian a han ti ve ta a.

Severna thung kha chuan a ngawnga an hlinna hrui kha a hlip thla tawh a, thing nghengin ngawi rengin Embly-a te thusawi chu a lo ngaithla ve reng a. A thiante pawh chu Ridgea’n a hrilh angin sakawra chuang reng chungin an inzar pharh vek tawh a, buai mai inpeih rengin an lo inralring thap tawh bawk a. Bartholomewa hote pawh chu an inpeih ve hle bawk a.

Bartholomea chuan hmusit aw zet maiin,”A nih leh Severna thu chu ngaihtuah nawn leh tur lo ni ta se, tu’n nge a thu chu ngaihtuah ang? A thianpa nangmah hian nge ni ang a, Luftona hian? tiin Emblya chu a han zawt leh a. Chu zawhna chu ka chhan sak thei che u in ka inring, tih pahin Hope khua atanga Naupang rawn hruaia kha mipui hma lamah a lo kal chhuak a. Emblya chuan chupa chu a lo hmuh veleh hlim tak maiin, “Bleke, tun tum tluka i hmel hmuh nuam ka tih hi a la vang hle ang, engtinnge….,” a la tih lai mekin chu pa chuan “Ka lo kal ve mai a ni,” a lo ti thuai a.

Governor Bleke a chuan “Thil hriat thar te pawh in lo nei leh mai thei a, chuvangin, he thubuai hi ngaihtuah that leh tulin ka hria,” tih pahin Governor chu a han hawi kual vel a, tah chuan “heng lai tluka hmun nuam hi a vang hlein ka ring a, chuvangin hetah ngei hian thubuai chu kan ngaihtuah nghal dawn a nia,,” ti chung zel in an piah lawka thing luangah chuan a va thu a. Hei hi rorelna thutphah chu a ni mai ang, nula nen tah hian kan thu anga, midang te erawh chu in din a ngai dawn a nih hi, a pawi ngawt mai a han ti leh a.

Emblya’n a hui avangin Patch chu a lo kal chhuak a, mahse Emblya bawk chuan “Unau, hei hi kan ram Governor a nih hi, rang takin i lukhum kha phawk rawh”, alo tia. Patch chu zak awm tak hian alang a, Governor hnenah chuan “rem i tih theih hram chuan lukhum hi phawk rih lo ila ka duh a ni,” a han ti a. Bleke chuan hmahmawh ti hriat tak hian “a pawi lo, i sawi tur chu sawi mai la, dawt i sawi vaih erawh chuan i chungthu ka la ngaihtuah leh ang” a”lo tia. Patch a chuan “a bul intanna ni chiah lo mahse Bank rawk thu atang khan ka han sawi tan ang e. Bank rawktu pahnihte zinga pakhat zawk kha ka ni a, pawna kan sakawr lo chelhtu kha chu a thi tawh a, Rapsona kaptu kha erawh chu ka nilo,” a han ti a.

Bleke chuan “Tunge a kaptu chu?” a lo ti thuai a, Patch chuan zungchala kawk chungin, “Bartholomew” a ti ta a. A thusawi chu awih lo lutukin thenkhat chu ring fe fe hian an lo nui chhuak a. Barta phei chu a nui ring berah a tang nghe nghe a, Patch hnenah chuan “Mi a… Bank an rawk hnu darkar chanve lekah khan rukru ho um turin Hope khua a mipuite ka sawm khawm kha i hre ta lo em ni?” alo ti a.

Patch erawh chuan,”Hria e, khua atanga mel chanve lekah i thawmhnaw i thlak a, sakawr i lo dah lawk saah i chuang a, kawng dang atangin Hope khuaah i lut leh ta a nih kha, ka zui zel che alawm,” a ti ta deuh deuh mai a. Barta chuan “Dawt muhlum a nih chu, i sawi,” a han ti leh hman chauh a, a sawi zawh hmain, “A sawi tur chu sawi zawh tir phawt la, i thu chu ka la ngaihthla leh ang,” Bleke chuan a lo ti ta a. Account bu leh lehkha te chu pek pahin, ”Heng chanchin hi enge hriat i neih ve?” tiin Patch chu a zawt leh ta a. Patch chuan “Bartholomewa ziak a nih kha, Ignacio chu Severna that tura tirh a ni a, mahse a mah chu a thi ta zawk a nih kha,” a han ti leh a.

“Ignacio chu tunah pawh a la dam reng alawm” Barta chuan a lo ti leh ta a. Mahse Patch chuan “Kahhluma a awm lai ngei ka hmu ani, Severna hi a lo lambun a, a thih phah ta zawk anih kha. Phili rukbo te, Lazy M severna pawisa lo va thlak thleng te pawh kha Bartholomewa thupek zawma tih vek a ni. Severna pawisa an laka pawh Bartholomewa kutah bawk an pe lut a, amah hi White Masks chu a ni” a ti ta a.

Barta chu za lo te hian a han nui a, “He mi bawlhhlawh rukru inpuang hi, i sahimna ngaihtuah in i lo zirtir ngun hle ani maw, Embly? a han ti leh a, Embly chuan Governor hnenah zawk chuan,”He pa hian enge a sawi dawn tih hriat lawkna engmah ka nei lo, min chhan chhuak a, a chhan pawh a sawi hlek lovin min zui ta zel mai a ni,” a han ti a. Bleke chu a bu nghat a, a hmel atang chuan hriat tur leh puak chhuah tur engmah pawh a awm lo, tunah rih chuan roreltu a ni a, thian tha leh hmelma te pawh atan chuan thuhmun vek anni rih a, dik taka engkim ngaihtuah chu a tih tur pawimawh ber a ni.

Bleke chuan Patch hnenah chuan, “Mastersa chanchin enge i hriat?” tiin a han zawt leh a. A ni chuan “Ka hre tawk viau bawk, a nupuiin a thihsan atang chuan a lungleng lutuk a che khawlo hle a, zu te a in a, pawisa khelh te a ching a, thian sual tak tak hlir a kawm ta a. Tin, Desert Edge khuaah sakawr tawlailir an rawk a, a khalhtu an kahhlum nite kha a lo thleng ta zel a, khami chanchin kha in la hre hlawm emaw? a han ti leh rih a, an la hriat reng thu chu an lo sawi thuai hlawm a. Patch bawk chuan, “Tawlailir rawktute kha Masters thian kawm thinte chu anni a, an rawk tuk khan a mutui lutuk chu a lo harhchhuak a, tawlailir rawk tu chang ni lovin, a khalh tupa kaptu pawh kha amah chu ani tih thu an hrilh ta a, chumi thu chu lehkhaa ziah sa, a ruk puite ziah ngei pawh chu an hmuh tir ta zel si a, a ruih em avangin a hma nia a khawsak dan chu a hre reng tawh hek lo. An thusawi te pawh chu a awih ta vek a, tin, an lehkha ziak chu a entirtupa chuan a kawl tlat a, in hriat theuh angin rukru ho chu man chhuah anni ta lo reng reng a.”

“Chutiang thil lo thleng chuan Masters rilru a tiharh thar leh a, a nungchang chu a sim ta a. Thil sual tih te chu a bansan a, mahse ngai a awm thei tawh lo; tual that nia a inhriat tlat avangin a rilru a hah em em a, tin, a that tih ziakna lehkha chu mi pakhat chuan a kawl tlat bawk si a. Reilo te ah lehkha keng tu chuan Mastersa hnen ah chuan pawisa leh thil dang tam tak a phut tan leh ta zel a” a ti ta a.

A sawi zawh chuan mite chu an ngawi thup tawh a, Barta pawh chu a zam hle tawh tih a hmel atang chuan a lo lang chhuak tawh bawk a. A han hawi vel ruai a, mahse a bul velah chuan mi an tam em avangin tlanchhiat chu a theih loh tih a hre nghal mai a, a han inti huai lui hram a. Patch chuan a thusawi chu engtin mah a fiah thei dawnin a ring lova, chu bakah Mastersa chu a thi tawh bawk si a.

Patch bawk chuan, ”A tirah chuan pawisa tlem te te chauh lehkha neitu chuan Masters chu a dil thin a, mahse a dil tam tulh tulh a, a tawpah phei chuan a nei seng zozai ta lova, Bawng rual te a pe ta zel a. Reilote ah a Ranch leh a fanu a pek ngawt loh chuan lehkha neitu chu a lungawi thei dawnlo tih a hrechhuak ta a. Tichuan hei hian a lo inngaihtuah ta a, amah ber chu a bo daih chuan a chunga thuneitu khan engmah a ti thei lo anga, tichuan, a sum leh pa pawh chuan him phah thei zawk dawn nia ngaiin a Ranch Lazy M chu mi pakhat kutah a hnutchhiah a, amah chu a bo ta daih a ni,” a han ti leh a.

Governor chuan “A chunga thuneitu, a neih lo eisak thin tu chu tunge a nih?” alo ti leh a. Patch chuan, zungchala kawk chung bawk in, “Bartholomew-a” a ti leh ta a. Barta chu a lo inring lawk vek tawh a, a lo ding chhuak a. Emblya chu kun meuhin chibai a han buk el phawt a, a hnenah chuan “Embly, thu phuahchawp i thiamin i mi rawihpa pawh hian thu tak angin a sawi thiam kher mai, mahse, sawi mai chu awl tak fiah erawh chu harsa tak ani ang,” a ti zet a. Patcha lam chu a hawi leh a, a hnenah chuan ”Engtinnge Masters chanchin chuti taka i hriat chian theih chu le? Nangmah hian i lo kaphlum a ni zawk ang ka ti?” a han ti ve thung a.
Patch chu reilote a han ngawi a, tah chua, “Kawng engemaw zawnga ngaihtuah chuan ka thah nih theihna lai zawng a awm a lawm!!” a han ti phawt a. Mahse Lazy M Cowboy ho chu an lo inhrosa nasa ta em a, chuvangin, ” lo thinur vak teh suh u, in pu chu nungdamin ka rawn thlen sak leh dawn che u a ni” tih pahin a lukhum chu a phawk a, a mit kingkhat tuamna pawh chu a paih thla a, “Phil” a han ti chhuak ta a.

Phili chuan alo en ngun em em a, mahse thi tawh nia a lo rin tlat avangin a pa a nih tak tak chu a ring ngam lawk lo. Mahse a pa in, “Phil” a han tih takah meuh chuan hai rual a ni ta lo, “Ka pa” tih pahin a va kuah ta chuk chuk a, a lo thlirtute pawh chu an hlim ve hle a ni ang. Thi tawh anga an ngaih, a thattu nia an rin an lo khaihlum dawnlai mek a nungdama lo kir leh ta mai chu an tan thil mak tak a tling ve reng a ni. Severna pawh chu chhuah tur anih tak avanga lawmpuiin thenkhat chuan chibai an rawn buk a, an rawn chul thuak thuak hlawm a. Severna erawh chuan nuihzatna tak a nei, Patcha te kha lo thleng hman ta lo hlauh se zawng, tuna lawmthu rawn hrilhtute ngei hian lawm tak bawkin an lo khaihlum ngei dawn a ni tih a hre tlat a.

Mastersa chu nungdama a lo kir leh tak avangin a tan beiseina engmah a awm tawh lo a ni tih Bartholomewa chuan a hria a, tlanbo mai loh chuan dam chhung lungin tan chauh a hmabak a ni tih pawh a hria. A han hawi vel a, mipuite chu an phili em avangin amah chu tuman an rawn ngaihsak tawhlo tih a hria a, tichuan zawi zawin a tawlh sawn hret hret zel a, mipuite chuan Mastersa te ho chauh an ngaihtuah tawh a, zawng kan ti na a, mahse Masters te pawh ngaihtuah ve mang lo,Bartholomewa chauh ngun taka lo en rengtu mipui zingah chuan a lo awm ve tlat mai. Bartholomewa chu pen tam pawh a la kalsawn hmain “Tum duh suh,” tih ri chu a hre ta mai a.

Bartholomew-a chu a lo leh hawi thuai a, a mah rawn betu chu Snap Lunta a ni tih pawh a hre ta nghal a. Lunta chuan a kut khinghnih chu a puakruk kawm bulah a lo dah thla ve ve tawh a, Barta chu thip zet mai hian a lo en reng mai a, thu tam tak sawi kher lo mahse a hlauhawmzia chu Barta pawh chuan a hai lo. Barta chu a phu deuh zawk a, a ding nghal chawt mai bawk a. A rilru ah ngaihtuahna thar a lo lut leh a, Masters chu chhawr theihna kawng dang la awm leh thei dawnin a hre ta a. Bleke chuan mipui bengchheng chu a han khap reh leh ta rih a, mahse Bartholomewa chuan chance dang nei tawh dawn a a inhriat loh avangin Mastersa leh Severna kahhlum tum chuan a theihtawp a rang chuan a puakruk chu a chuh ta thut mai a, phawi rang hle mahse a aia rang zawk an lo la awm ta fo a ni, puakruk chu a hmeh per hman hmain Severna sir dinglam, kawng zawn vel atangin a lo puak chhuak a, Bartholomewa chu a thingthi ruap a, a tlu zui ta nghal a, a tluk pahin a puakruk chu a hmet puak ve na a, mahse a bula vaivut chu akap khu ta lawih chauh a.

Severna chuan a puakruk ken lai, la khu vat vat chu a neitu, Snap Lunta a han pe kir leh ta a, a kalsawn ta nghal a. Bar B Cowboy thenkhatte chuan Barta chu an va enchiang a. Pakhat chuan “A la hman ngai hauh loh, a bula ding kawnghren atangin puakruk a phawi chhuak a, Bartholomewa mit leh mit inkar takah ala kap fuh thei tho si,” a han ti phawt a. Tah chuan “Sudden-in ti maw kha? a lo rang em kher a nih hi, thihna a cho va, kan pu chuan a ngam ta lo a nih hi,” a han ti leh a, chutiang tak chuan Bartholomewa thlan lungah pawh an ziak ta nghal a.

Chumi ni tlai lamah vek chuan Lazy M Ranch ah Severna chuan a bungrua a siam fel vel a, kawngkharah chuan hlim hmel pu fe chungin Phili chu a lo dak a, Severna hnenah chuan “Ka pain chaw rawn ei ve rawh,” a ti che a sin,” a rawn ti a. Severna chu a han dak chhuak a, “Ka lawm ngawt mai, mahse midang zingah ka ei ve zawk ang e,” a han ti a.

Chu veleh Phili chuan “Ka ti dik zawk a nih chu, Larrya nen hian a hre sual zawkin vawi sawm….” a han ti zet a, mahse sawi chhunzawm lovin, “i lo kal duh dawn leh dawn loh thuah kan inchawi a,” a ti ta zawk a. Severna chu a nui mai a, a meizuk lai chu a paih a, a ui lu chu a chul a, “Naktukah, thiana, naktukah kan haw tawh ang, kan inah,” a han tiri chu pawna Larrya te chuan an lo hre ve reng bawk a, an thil hriat chu sawi chhuak lovin an pai uih tawih ta vel mai mai a.

• A TAWP TA

Aside | Posted on by | Tagged , | Leave a comment

Sudden Law of the Lariat (Mizo Version) 15

SUDDEN LAW O’THE LARIAT CHAPTER-15
Chhun pachanga Phili an ruk bo ngam avang te, Bank an rawk avang te chuan Hope khua mipuite chu an lungni lo hle a, rukru ho hi hneh taka sawisak an hun tawh a ni, tih chu an ti ti tui ber a ni tawh a, Mahse rukru ho chu tihbo tuma beitu an awm thu an hriat meuh chuan mi thenkhatte chu an lo lungawi lo leh tlat lawi si a. An lungawi lohna chhan tak erawh chu Sheriff chuan ngaihdan thar an rilrua a rawn tuh sak vang ani. Hope khuaa mite tumah sawm ve lova, Lazy M leh XT Ranch ho chauhin an lo va bei mai chu Sheriff an pawisak loh vang leh Hope khua mipuite pawh chu eng huah mah an ngaih loh vang nite in a sawi kual vel a, Sheriff thudawi chu thenkhatte chuan dik hlein an lo hre ve tlat a

Chung avang chuan a tuk Zinga Bar B Ranch a Sheriff va leng pawh chu a hlim rilru hle a, Bar B neitu in Sheriff a lo biak dan erawh chu a lawmawm vak lo, a thuhnuai a dah theih tawh te chu Barta chuan a hmusit em em a, biak pawh a be tha duh ngai mang lo reng ani. Sheriff hnenah pawh chuan,”I va han hlim awm ve? eng thu lawmawm nge i rawn thlen tak? tiin a lo zawt a.

Sheriff chuan ti thei inti tak hian, “Severna chu a buai hle ang le !! Rukru ho an va beih avanga fak hlawh inbeisei te a nih zawngin a beidawn thlak hle ang chu,” a han ti a, Sheriff thusawi chu ngaisang lo tih hriat fahran hian Barta chuan “A va lawmawm dawn ve!! Hlau lutuk in a thi dang thei hial ang chu !! Severna chuan engtinnge a tih a i rin? kan ram hi a tlan chhuahsan nghal mai ang em le?” a han ti a.

Barta’n chutia a lo tih tak avang chuan Sheriff pa hmel, hlimawm taka lo lang tawh chu, puan huh a han hruk fai pawk ang mai hian a reh nghal vek a, hrehawm ti tak maiin a thut hmunah chuan ngawi rengin a thu ta a, chu veleh Barta chuan Sheriff lak tlak loh tak zawng i lo nih ngei hi maw le, tiraw? Ka tanpuina tello hian Sheriff hna hi eng chen nge chelh theia i inrin? a ti ta daih mai a.
Sheriff chuan Bart, ka thian tha ber i ni a, chu chu englai mahin ka theihnghilh ngailo reng reng a ni, tiin a han chhang a, Barta chuan I tan chu chu theihnghilh loh a tha ang, i thian neih ve chhun chu keimah chauh ka ni, severna chu eng hunah nge man i tum? a lo ti leh a, Sheriff chuan ka man ang maw? engvangin maw? mak ti tak mai chuan a han ti a.

Bartholomew chuan “I kawtzawla pangpar a lawh vangin mawle,” a han ti el zet a, mahse, thu tak zet hian “Mastersa a thah vangin” a han ti phawng mai a, chu chuan Sheriff pawh chu a ti thinthawng hman viau mai a, Sheriff chuan, “Masters a thah a nih tilang turin fiahna chhete pawh ka nei si lo a?” a han ti a. Barta chuan “I nei nang sheriff i ni miau a, i thawh tur midangin an thawh sak zel che a ngai tlat alawm”, hmusit eltiang chuan a han tih khum leh phawt a, chumi hnuah “I tan ngaihtuah ngai engmah a awm tawh lo, engkim ka ngaihtuah fel vek tawh” a han ti leh a.

Barta thusawi chu makti awm fein Sheriff chuan “Severna’n mastersa a that tih chui fiah thei dawn a maw? ” tiin a han zawt leh a. Ani chuan, “Khaihlum tur a ni sa mai, i sakawrah khan lawn kai la, min zui rawh”, a ti ta a. Darkar chanve hnuah chuan Bartholomewa’n Masters’a thawmhnaw a chharna hmun kha an lo thleng a, a chharna lai hnimbuk chu kawhhmuh pahin, Sheriff hnenah chuan, “tilai hnimbuk hnuai kha han en ve teh,” a han ti a. Sheriff chuan hnimbuk chu a han keu va, Mastersa thawmhnaw chu a mal malin a rawn phawrh chhuak ta a. Lukhum a han phawrh chhuah lai chuan mak ti tak maiin hei hi Mastersa lukhum ngei a nih hi, thawmhnaw dangte pawh hi ama thawmhnaw chu a ni ngei ang, Uai,, hei chu enge ni ta? tih pahin hnimbuk atang chuan silai Winchester Repeater a han phawrh chhuak ta nawlh mai a. Silai kua chu a bal hle tawh a, tin, a kawmah chuan J.S tih hi chiang fe hian a lo inker bawk a, chu veleh sheriff chu a thaw huai a. Thil hriatthiam harsa tak, rei ngial ngaihtuah hnua han hre chhuak ta phut ang mai hian, “Jim Severna silai a nih ngei dawn hi” a han ti a.

Bartholomewa chuan “I va han fing tehlul em, sheriff… Mahse JS tih ngawt kha chu John Smith tihna pawh a lo ni maithei a sin”, a han ti leh a. Sheriff chuan Barta chu en reng chung in, “Severna silai a nih i ring a ni lawm ni?” tiin a han zawt ve thung a.
Bartholomewa chuan “Mi a pa, Severna silai a ni tih chu ka hre sa reng alawm. Tikhan, i thil hmuh zawng zawng kha a awmna ngaiah khan dah leh vek la, keima lo hmuh chhuah a ni tih pawh hi theihnghilh nghal bawk rawh. I Deputy pakhat i hruai ang a, heti lam kawngah hian i kalpui anga sakawr hniak te hi in chhui zel ang a, tichuan, hnimbuk hnuaia thawmhnawte hi in hmu chhuak dawn zuk nia,… i hrethiam em?” a han ti a.

Sheriff chu a hlim ta ngei mai, Hope khuaa miten an lo ngaihsan tur ziate chu a han ngaihtuah a, lar thar leh sawt dawn ni hian a inhria a ni. “Bart, thil i lo ngaihtuah thui hle mai a!! Barta hnenah chuan a han ti a, In lam panin an kir leh ta a, hawn kawngah chuan Sheriff chuan “severna chanchin min hrilh tur dang i la nei em?” tiin Barta chu a han zawt leh a. Ani chuan muangchangin, “Bank rawktu ah leh Rapsona kap hlumtu ah pawh khan i puh nghal thei ang”, a han ti a. Barta thusawi chu mak a tih em avangin, Sheriff chu a sakawr atang chuan a zuang thla lo chauh hi a ni tawh a. “chung thilte pawh chu i fiah thei vek ang maw?” tiin makti tak mai chuan a han zawt let a.

Bartholomewa chuan “kei a rawn tihfiah a ngai lovang, severna chuan a rawn puang chhuak nghal mai ang”, a lo tih san mai a. Sheriff chuan “Mahse, ka lo ngaihtuah ve dan chuan….” a han ti leh tan chauh a, Bartholomewa chuan x I ti dik lo tawp a nih chu, nangni ang hi chuan engmah ngaihtuah ve lo ula a tha, at phah mai a hlauhawm, ngaihtuah tul apiang chu keiman ka ngaihtuah sak zel ang che, i tan a fin thlak zawk ang” a lo tih sak leh thuai a.

Sheriff chu a bu nghat a, a kal ta nghal a, a liam tur chu Bartholomewa chuan nuihzat tak mai hian a en zui reng a, “Suddena man turin ka tir tih chu hre na se zawng mexico khaw lam panin a tlanchhe nghal ngei ang mawle,” a han ti chhuak a. A hnunglam atang chuan “Tlanchhe nghal pawh nise ka dem vak lovang,” tih ri chu hriain rang deuh maiin a han lehhawi a, a hnung lamah Pentona chu a lo ding reng mai a, a hnenah “,E,,, Penton, enge chanchin? tiin a han zawt nghal a. Ani chuan, “Tui in tluk chauh a ni, harsa engmah a awm lo, kan sheriff chu i lo be tawh em?” tiin a han zawt let ve thung a. Barta chuan “be tawh e, mahse tanpui a ngaih thut takin a bul hnaiah awm ve reng ang che, kan che a tha ve dawn tan chauh a, engkim fimkhur taka tih a tul a ni” a han ti a.



Sakawr chungah rei ngial hrehawm taka an chuantir hnu chuan tuna a awmna hmun hi an lo thleng ta a ni, a chenna pindan chhung chu a han en vel a, tlan chhuah harsa tak a ni ngei ang tih a hria a. Tukverh pakhat chauh, feet khat bial vel tur hi a awm a, chung te chu a han enkual vel lai chuan kawngkhar inhawng ri a hria a, rang takin a thutthlengah chuan a va thu a, a thu fel hman chauh tihin mi pakhat, hmai tuam hia lo lut ta a. Chupa chu amah hruaitu palite zinga telve kha chu a ni lo tih Phili chuan a hria.

Phili chuan “engvangin nge hemi hmunah hian min hruai” tiin chupa chu a lo zawt a. chupa chuan, “I la hre mai ang, nakin deuh ah, tunah hi chuan Chance khat chauh i nei tih hrilh tur che a lokal ka ni. Mi pakhatin a rawn tlawh dawn che a, a rawtna anga i tih duh dawn chuan i chhuak leh mai ang” a han ti a.

Phili chuan “a rawtna chu lo pawmpui duh ta lo ila,” tiin a han zawt a. Chupa chuan “Lo pawmpui ngei la a tha ang, i lo pawm sak duh loh chuan kan zingah thum kan vawr anga a vannei ber chuan a chang hmasa dawn che tihna a ni mai” a han ti a. Philli’n chu thu chu a hriat chuan a dang nghal sawp sawp mai a, “min rawn kantu tur chu engtikah nge a lo kal ang,” tiin a han zawt leh a. Chupa chuan “a lo kal mai ang” tia chhan pahin a chhuak leh ta mai a.

Amah rawn kantu tur chu tunge ni ang tih Phili chuan hriat a chak hle a, a chang chuan Severna ni tein a han ring thin a, Bartholomewa khan a rilruah thil tam tak a lo tuh tawh avangin Severna chuan an Ranch neih sak tum niin a ring tlat a. Chuvang chuan thu engemaw tiam tir turin a lo kal dawn niin a ring a, mahse Larrya vangin chu chu ni theiin a ring chiah bawk silo.

Rilru mangang tak chungin tukverhah a va dak chhuak a, kawtlaiah chuan pa tawite, sa tha tak, kun fahrana lukhum khum, khabe tuak var va tawh mai leh mit lehlam puan duam tuam hi a va hmu a. Chupa chu Hope khaw kawtthlera Bartholomewa’n a sut per nawlh kha a ni tih a han hre chhuak a, chupa chuan Phili awmna in pawh chu en chuang lovin a kal pel ta mai a.

Mahni chauha pindan khata khung hi lungin tan danah pawh hrehawm ber pawla an ngaih thin a ni, ni hnih leh zan hnih zet mahni chauha a awm hnu chuan Phili pawh chu a mangang chhe tawh mai a, a khat tawkin pakhat hian chaw a rawn pe thin a, chupa lah chuan tawngkam khat pawhin Phili chu a be duh bawk silo.

A tuk thum tukah pindan kawngkhar chu a rawn inhawng a, kawngkhara lo ding chu a hmuh veleh Phili chu lawm em em in a zuang tho a, “Nang i ni maw, Bart? Midang emgaw lokal dawn ka lo ti a,” a han ti a. Bartholomewa chuan hlim hmel putak chungin Phili chu a han en a, dawhkanah chuan a va thu a, mei a han zial a, “Phil, i dam em? I thian hluite paihthlain mikhual mai mai i lo buaipui a, i hrehawm phah hle a nih hi,” Phili hnenah chuan a han ti a. Phili pawh chuan dik lo inti rilru ve tak chungin “thil awmdan hi hriat thiam engmah ka nei tawh lo”, a han ti a. Barta chuan “hriat loh tur engmah a awm hleinem, a tir atanga ka lo hlauhthawn ang leh nang pawh ka hrilh tawh che ang khan thil a lo thleng ta a ni mai alawm, Embly leh Severna i foreman te hian Lazy M hi neih an tum a. Tuna nangmah mantu che pawh hi Severna hnuaia thawk vek an ni a. Nang hi Severna lung in tang chu i ni a, engtia tih che nge a tum zawng ka hre lo, mhse ka ngaihdanin Larrya kha neih luih tir che an tum ni ngeiin ka ring. Larrya i lo neih hlauh chuan Lazy M chu an thu hnuaia awm tluk a ni tawh mai dawn a. Tin, in inneih hnuah nang hi accident i lo tawh palh hlauh chuan……” a han ti a, sawi zawm zel pawh tul lova a hriat avangin a ngawi leh ta mai a.

Barta thusawi a hriat atang chuan makti deuh maiin Phili chuan “chutiang khawpa mihring an sual theih ka lo ring ngai lova, mak ka va han ti em!!!” a han ti a. Barta chuan “mihring mize hrang hrang i la hre tam lova, awih pawh harsa i ti hle ang, severna hian i pa a that a, Bank a rawk bawk a. Bank neitu Rapsona pawh kha ama lo kah bawk hi ani tih rinhlelh rual lohin tihlan a ni tawh” a han ti leh a. Phili’n a pa thih thu a han hria chu a ngui nghal hnap mai a, nung dama hmuh tawh loh tura anga a lo ngaihna chu rei hle tawh mahse, duham vang ringawta kahhlum a ni tih a han hriat meuh chuan awm ngaihna hre lo khawpin hrehawm a ti a.
Bartholomewa hnenah chuan “heta tang hian min hruai chhuak dawn em? min hruai chhuak tura lokal i ni ngei ang ti rawh? Ka hlau em mai, ka hlau takzet a ni,” a han ti a. Barta chu a lawm rilru hle a, an duh zawng takin Phili chuan a dinhmun hlauhawmzia chu a lo hre tawh a ni tih pawh a hre ta bawk a, Phili hnenah chuan, “Hlau awm tak pawh i ni reng e – mahse hruai chhuah che chu ka tan harsa tak a ni, i chhuah theih dawn leh dawn loh chu nangmah ah a innghat ber zawk a ni,” a han ti a.

Phili chuan “Engtin maw?” a lo ti thuai a, Barta chuan “a man tu che hi misual tak tak hlir an ni a, mahse Black Barta duh loh zawng sawi chu an hlau hle a ni, heti zawng hian sawi ta ila, keima chungchangah leh ka thil neih chungchang reng rengah an rawn inrawlh ngam dawn lo ani, chu chu i hrethiam em?” a han ti a. Phili chuan “ka hrethiam mang lo”, a lo tih veleh Bartholomewa chuan “Innei tura ka sawmna che a ni mai ang chu, hetiang hmun leh huna inneih a sawm che hi ka thil tum ber pawh a ni hauh lova, mahse kan inneih a, ka nupui i nih ngawt loh chuan kan misual ho hian i chhuah an phal dawn silo, Judge emblya kutah kan innei thei mai ang chu, ani pawh hetah hian a awm ve reng tho alawm” a han ti a. Tin, severna khan a thian Larrya kha neih tir che a tum a nih pawhin pasal i lo neih tawh si chuan a thei dawn lo tihna a ni bawk ang, enge i ngaih ve dan?” tiin a han zawt ta phawng mai a.

Phili chu a beidawng hle a ni. Severna leh a thianpa chu haw teh mahse bartholomewa han neih ngawt chu a duh bawk silo, kawng dang chu awmin a hre bawk silo. Reife a ngawih hnu chuan “Judge chuan kan inneih chu rem alo ti kher lo maithei asin” a han ti ngawt a. Barta chuan “ka titi pui phawt chuan a duh ngei ang, a rin ai ngawt chuan a chanchin ka hre chiang tlat si a”, a lo ti a. Phili chu a han maimitchhing a, tah chuan kawng dang a awm tawh hlawl lova a hriat avangin a beidawng lutuk chuan barta chu neih mai a duh thu hrilh a han tum a, mahse chutihlai tak chuan bang pawn atangin mi pakhat hian “A daw a nih kha, duh suh, tih khawtlai tum rawn” tiin phili chu a rawn hrilh ru ta hlauh mai a. Phili chuan a ngaihna a hre lo hle a, mahse a mah rawn hrilh rutu chuan a la puih theih tak hlauhin tih thuah beiseina thar a rilru ah a lo lut a, Barta hnenah pawh chuan “Inngaihtuahna hun tlem tal min pe thei dawn lawm ni?” tiin a han zawt ta zawk a.

Barta chuan lawm lo tih hriat tak chung hian “Hun kan ngah lo teh ania, heta lokal ngawt pawh hi ka tan hlauhawm tak a ni tawh a, han cham leh lek phei chu a hlauhawm tak a ni tawh a. Thil dang pakhat hrilh hmaih che ka la nei, I foreman pa hming kha Severna a ni lo, Suddena tia an koh thin kha a ni zawk, a chanchin pawh i hre ve tawh thinin ka ring.” Phili chu a phu zawk a, Suddena Outlaw, a huaisen zia te, silai a kah thiam ziate, vawi tam tak a mah umtute laka tlan chhuah dan chanchin te pawh Phili chuan mi sawi a lo hre fo tawh thin a, a hriat ve loh erawh chu Suddena chu mi tam takin Outlaw angin sawi thin mahse Law tanpuitu tha tak a nih zia te, ama tih sual anga mi tamtakin an puh thinte chu Suddena tih a nih loh zia te chu a ni. Suddena chu misual theihtawp ni anga a lo ngaih thin avang chuan a chungah pawh chuan khawngaihna nei lo tawp turah a ngai tlat a. Tchuan, phili rilru chu hria niawm takin, Barta bawk chuan “chung zawng zawng chu hre chung siin nghah rih chu i la duh fo a maw?” tiin Phili chu a lo zawt leh ta a.

Phili chuan a chhan hmain pawn lam bang phen atang bawk chuan, “Beidawng suh” tiin mi pakhat hian a rawn hrilhru leh ta a. Phili chuan, “Aw, in ngaihtuahna hun tlem min la pe thei la ka duh a ni,” a ti ta a. Barta chu a dawhthei lo tan hle tawh a, a hma aia vin deuh zawk hian, ngaihtuah tur teh chiam engmah a awm hleinem, “ka nupui i ni a, heta tanga kal chhuah mai nge i duh rukru ho duh duh a sawisak tura la awm tih chu a ni mai lawm” a han ti leh a.

Phili hmel a han hmuh atang chuan thil sawi sual a nei tih chu a hre nghal thuai a, tichuan, a thusawi sual chu tlip mar leh tumin, i chanchin an sawi lai ka lo hre ru hlauh a ni , a han ti leh thuai a. Barta thu lo sawi sual tawh chu tlip mar leh chi rual a ni tawh lo, rukru hovin an lo vauna ang chiaha Phili chu a han vau leh tak avangin Barta rinhlehna lian tak phili chuan a nei ta a. Barta’n phat mar tumna pawh chu a ringhlel zo vek tawh bawk a. Bartholomewa pawh chuan Phili chu chhuahsana Judge Embly-a biak leh chu a tum ta zawk a.

Aside | Posted on by | Tagged , | Leave a comment

Sudden Law of the Lariat (Mizo Version) 14

SUDDEN LAW O’THE LARIAT CHAPTER – 14

Severna chuan chaw te a eikham hnuin ama riahna lam a pan ta a. A ui Quirt chu a hmuh mai loh avangin faifukin a han ko a, mahse ui chu a lokal ta mai si lova. Thil bo dang a awm emaw tiin a pindan chhung chu ngun takin a han enkual leh rih a, mahse engmah bo dang chu awm lovin a hria a, rukru ho chuan Phili ruk bo tum ringawta lokal an nih chu a ring deuh a. An ruk bo chhan niawm te chu a han ngaihtuah leh a, Shade-well-a khan phuba lak a duh vangin a thian te nen lo thawk pawh an ni mai thei, a nih loh vek leh Barta leh a hoten an rawn ru pawh ani mial mai thei. An thil tih chu White Masks ho puh rawh se, tih vangin Barta leh a hote chuan puan varin hmai an tuam pawh chu a lo ni reng mai thei bawk a. Severna chuan thil dang come again saloon a an insual dawn khan Barta kha chhan engmah pawh awm chuang lovin, ‘Masks’ ti khan a ko chawt tawh bawk a, chutih laia Barta rinhlelh rukna a lo neih tawh chu tunah hian a rilruah a lo lut thar leh ta a ni.

A hma niin lo thawk hah hle tawh mahse, a tuk ni a lo chhuah meuh chuan Lazy M cowboy ho chu an inpeih fel hman hle tawh tho a, ni danga hlim em em thin, fiamthu hlira inkawm ho thin an ni a, mahse chumi tuk chuan nui hmel hmuh tur an zingah an awm ta lo. An pi an lo rukbo sak chungchangah chuan thinrimna chhan tam tak an nei. An pi chu an ngainat em em bakah, an rawn rubo ngam ringawt mai chu anmahni rawn pawisa lo leh hlau lo lutukah an ngai a, tlawm an ngai tlat a, ramdang mite ngaihah mahni mi leh sate hum zo lo anga han lan chu an duh lo eltiang a ni. Chuvangin, chumi tuk chuan khuai tawh kawlh laklawh ang maiin an kawlhsen a, an zingah fiamthu a leng tawh lo a ni.

An silai theuhte chu ngun takin an en fel a, a mu tam tawk an pai theuh bawk a, an sakawr zin te pawh chu tuk dang aia ngun zawkin an phah a, an pu, Severna thupek chu nghakin Ranch kawtah chuan an inhawr khawm a. Severna chu a riahna atangin a lo chhuak a, chutih lai chuan ui bauh ri a han hre nghal a, severna chu a han lehhawi thuai a, a ui, quirt chu a lam panin a rawn bai phei a, a pu ke bulah chuan a rawn bawk chawt mai a. Severna chuan a ui nghawng chu chul sak a han tum a, tah chuan ui nghawnga thil var engemaw lo bet chu a hmu ta a, a han enchiang a, lehkha them hi ui nghawngah chuan hruiin a lo inhling bet a. Lehkha chu a la a, a han pawt pharh a, a chhungah chuan hei hian a lo inziak a, “White Masks hovin pukah hmeichhia chu an hruai, hmanhmawh rawh- i thian,” tiin
Lehkha chu tu ziah tak ni maw? Darbya a han tih dawn chuan a hma ni khan severna te ho nen an awmkhawm reng a, ziahna hun a nei bawk silo. Engpawh nise Quirt chuan a pi mantute chu a zui ve a, lehkha rawn thawntu chuan ui chu a lo hmu fuh ta hlauh a ni ngei ang. Severna chuan thil awmdan a hote chu a han hrilh ve a, an ngaihdan te a han zawt nghal bawk a.

“Hope khuaah mi va tirin Sheriff leh a hote va sawm sela?” tiin pakhat chuan ngaihdan a rawn sawi chhuak a. Severna chuan, Lu thin pahin,”Tyler-a chuan keini ho hi min ngaina lo hle a, chu lo rengah kan chunga thil lo thleng hi keimahni ngeiin kan chinfel thain ka ngai – ka ngaih ve dan chuan XT Ranch ah va kal ila. Ridge a leh a hote a hman hman in min pui se, tichuan rukru ho hi va bei zui ila, tha berin ka ring” a lo ti a. Severna ngaihdan chu cowboy dangte chuan rem an ti tlang vek a, ti chuan XT lam chu pan an tum ta a. Larrya chu a kal ve theih loh vangin a khum atang chuan a lo inhrosa ve chiam ringawt a. Severna chuan “I rilru lo tibuai vak duh suh, i lal fanu chu kan rawn hruai haw sak leh ngei ngei ang che, a lo rutu te pawh chu va zilh nghal kan tum bawk a,” larrya hnenah chuan a han ti a, a kalsan ta nghal a.

An hmanhmawh bawk a, XT Ranch chu an thleng thuai a, Ridge a thil awmdan an hrilh ve hnu chuan ani pawh chu a lo thinrim ve em em mai a. Severna te hnenah pawh chuan “min pui thei ang em in ti a ni maw? min thlim thei bik lovang, chhun pachangah lehnghal, mahni in luma lo awm lai han ru bo ngam ngat mai hlawm chu !! Kan misual ho hian kan ramah hian duh duhin an khawsa thei dawn emaw an ti a nih tawh hi, tan lak a hun tawh ani, a han ti zet a, “He mi hi tunge a nih i hria em ?” tiin pawna thutthlenga Snap Lunta thu kun reng chu Severna chu a han kawhhmuh ve a.

Severna chuan “I hote zingah a tel ve em ni?” tiin Ridge a chu a han zawt a, “ani chuan tel ve rih lo, tukin zing khan Ranch ah hian a lo kal a, hna thawh tur a zawng a nih ka ring, enge anga i rin?” a lo ti leh a. Severna chuan “buainate a lo awm palh hlauh chuan a hman tlak viauin ka ring, a puakruk paite hi a tharlam teh chiam tawh lo em a”, a han ti a. Ridge chuan “i ti dik mai thei, tun hi hman tlak dawn nge dawn lo hriat chhuah theihna hun remchang tak chu a nih hi. Mahse ka va sawm chhin mah anga, mi lo hnial lohva leh – Dollar khat inchawi ka ngam” a han ti leh a, Severna chuan “Ka ruksak che a ni ngawt dawn a, mahse inchawi ang hmiang,” nui chung hian a lo ti a.

Ridge-an Snap Lunt-a a sawm zo chu inchhungah a lo lut leh a, Severna chu Dollar khat a rawn pe a. pahin, Severna chuan “kan lo inchawi kha a fair chiah lo reng a ni, ka thian a nia, i hnenah hian hnathawh tur zawng a lokal pawh a ni chiah lo mahse rin ngam ani” a ti ta a.

Ridgea hote panga leh Snap Lunta te chuan severna te cho chu an zui ve ta a, tichuan rukru ho awmna nia an rin lam chu an vai chuan an pan ta nghal a. Bawng tlat theihna phaizawl nuam chin chu an pel thuai a, tlang pangah an lawn chho ta a. An kalna hnu a chhengchhe bawk a, fimkhur a ngai hle a, chhun lai velah tlang pawng pakhatah hian an lo chuang chhuak a. An awmna atang chuan anthlang lam chu a zuk thlir thla a, mual chu a awih bung thla deuh vut a, chumi mual tawpah chuan dil pakhat hi a awm a, an awmna atnaga dil ral lehlam atanga han en ngawt phei chuan han lawn chhoh theih chi rual ni hian a lang lo. Dil kam velah chuan bawng leh sakawr te hmuh tur an tam a, chungte chuan dil kama hnim hnah an lo pet a, an lo tla kual vel a, dil chung lam feet 80 vela sang, lung bangah chuan rukru ho tawmna puk chu a awm a ni.

Severna chuan “An tawmna puk atanga rukru ho hnawh chhuah chu thil huphurhawm tak a ni. Puk han lawn chhohna kawng dang pawh a awm ngeiin ka ring, mahse chu chu khawiah nge a awm kan hre si lo. Ka hriat ve chhun chu dil kam atang lawn chhoh khu a ni ringawt a, kan lawn chho lai min lo hmuh vaih chuan a chhak lam atang khian pakhat chauh pawhin min lo tibuai thei hle dawn bawk si a, heti hian ti ila a that ber ka ring. Pahnih, pathum vel ka hruai ang a, lung bangah khuan lawn chhoh kan tum ang a, a dang zawng chuan dil kam heti lam atang hian min lo veng ula, puk atanga min kah tuma lo chhuak an awm phawt chuan in lo kap zel thei ang a, tichuan a thain ka ring” a han ti a.

Severna remruat ang chuan amah leh Snap Lunt, Gentle Annie leh Big boy te chu an chhuk thla ta a. An kal pah chuan big boy chuan phuba lak duh vanga kal ve a nih thute chu a sawi nghal bawk a, reilote ah rukru hovin severna an lo tih dinna hmun kha an thleng ta a, chuta tang chuan kein an kal ta zel a. Sakawr huang te pawh kha an hmu leh a, a chhungah chuan sakawr tam fe a lo awm a, chungte chu an chhuah nghal a

Puk awmna lam pan chuan tawite an lawn chho hman chauh a, silai ri vawihnih an hre ta mai a, an thiante kah ri a ni lo tih pawh chu an hre thei nghal a. Severna chuan “Min rawn vauna a ni ngei ang, khawi hmunah ber hian emaw vengtu an dah a ni ang” a han ti a. Silai ri chu hriain puk atang chuan an lo chhuak a ni ngei ang, chutih lai chuan severna thiante pawh chuan silai an rawn hmet puak ve tan ta a. Severna te tan chuan puk awmna lam pana lawn chhoh chu thil hlauhawm tak a ni ta a. an chhak lam puk kotlang atang chuan mi pahnih hian bawk chungin severna te lawn chho chu an lo chang reng a, chung lam atanga lang theia an kal lai apiangin chu mite pahnih chuan an rawn kap hman ziah mai si a. Severna chuan lung bang hrulah zel khan kal tum hram ula, chung lam atang rawn lang thei tura in kal lai chuan a hmanhmawh thei ang berin chet tum zel ang che u, tiin a thiante chu a han hrilh a.

Lungbang chu hnung chhawn chungin zawi zawin an lawn chho zel a, a khat tawkin chung lamah chuan silai a ri reng bawk a, puk kotlang atanga yds 20 vela an la awm lai chuan an han chawl rih a. An inkar a hla bawk a, puk kotlanga mi pahnih bawk phek rengte chu kah fuh chi rual an nilo tih an hriat avangin Ridgea te ho pawh chuan an rawn kap tawh rih lova. Severna chuan an piah, lung tohlawt deuh atang chuan a han en chho a, chutih lai tak chuan puk kotlanga rukru bawk pakhat zawk chu fimkhur fe hian a lo ding chhuak a, chutih lai vek chuan severna te awmna piah lam atang chuan rifle alo ri a. rukru lo ding chhuak lai chu a te thawt a, a silai ken lai chu a thlauh a, awih pangah chuan a tla thla ta nghal a. Chu veleh severna chuan “mi rawn zui thuai rawh u, vengtu pakhat chauh a ni tawh” tiin a thiante chu a ko ta a. A sawi lai la la in severna chu a awmna atang chuan a zuang chhuak a, puk awmna lam a pan chho ta nghal a, an awmna leh puk awmna inkar chu kawng mumal lo deuh a lo awm tawh avangin severna te ho pawh chu an kal chak thei hle a. Chutia an chho lai chu puk kotlanga mi chuan a lo hmu a, kah a rawn tum a, mahse anni ho chuan an hnaih chilh tawh em avangin puk chhunga tlan luh tumin a han ding a. Chutih lai chuan silai a han ri leh a, chupa pawh chu puk kotlangah chuan a tlu ve leh ta a.

Severna chuan “A hlauhawm hle dawn a, mahse kan bawh thut ringawt mai loh chuan tih dan dang a awm lo,” tih pahin puk kotlang lam chu a han kawk a, an tum dan chu an inhrilh fiah hnu chuan zawi zawiin puk kotlang lam chu an pan chho hret hret a. Tah chuan thawklehkhatah an awmna atangin an zuang chhuak a, puk awmna lam chu an bawh ta huk mai a. Puk sir tuakah chuan an bawk rawp a, puk chhung chu an rin kah ta chiam mai a, rukruho pawh chuan puk chhung atang chuan an rawn kap ve bawk a, mahse tumah zawng an rawn kap fuh thei chuang lo. Puk chhung chu a thim em avangin severna te pawh chuan an kah fuh leh fuh loh pawh an hre thei bik bawk hek lo. Severna chuan a hote chu thu a han pe leh a, tah chuan thawk leh khatah a rualin puk chhungah chuan an tlan lut ta chawt mai a.

An tlan lut lai chu rukru ho chuan puk chhung atangin an rawn kap a, an silai kah en atangin an tawmna zawn vel nia an rin lai apiang severna te ho chuan an va kap let ve a. Chutihlai chuan XT Cowboy pakhat chu a tlu nghal a, severna pawh chuan puk chhuat a mi pakhat lo tlu reng chu a pal palh hlauh avangin a petek dawrh a, chutih lai chuan a beng zawnah silaimu a ving thuak bawk a, rei vaklo hnuah silai ri chu a reh fel leh ta mai a. Cowboy pakhat hian puk chhungah chuan Laltin a va hmu hlauh a, chu chu a han chhi eng ta a. Severna te ho tam fe chu an inhliam a, mahse na lutuk erawh chu an awm lem lo, chhuat laiah chuan rukru pahnih an lo khirh tawh a, a pathumna erawh chu a lo la dam a, rukru dang erawh chu hmuh tur an awm tawh lova. Severna chuan “khawnvar dang han zawng ula, puk chhung hi ngun takin i dap vel ang u, tlan chhuah theihna khawi laiah emaw hian a awm ngeiin ka ring” a han ti a. Khawnvar an chhit en atang khan Snap Lunt a pawh chu a bo ve nghal daih a, khawnvar an chhit en lai chiah khan puk kil sir leh lama mi pakhat kal liam tur chiah hi a va hmu hman a, chu pa chu a umzui ta nghal a, chupa a umna kawng chu leiverh hi a ang berin a hria a, thui pawh a la kal hmain a hma lamah chuan eng a va hmu a, a va kal hnaih chuan kawngkhar chu a va hmu ta mai a Kawngkhar chu zawite hian a han nam chhin a, a lo inkalh loh avangin a inhawng ta a, a chhung chu lung ker kuak, pindan hrang anga siam a ni a, pindan laiah chuan dawhkanah hian khawnvar a lo inchhi a, a sir khatah chuan khum a awm bawk a, mi pakhat hian khumah chuan a thawmhnaw a lo vawm khawm mek a.

Snpa chu pindan chhungah chuan zawite in a lut a, kawng chu a han khar leh phawt a, tah chuan vawi thum vel ring fe hian a han tlak hlak hlak a. Tlak ri chu a hriat veleh khum bula mi pakhat lo awm chu a rawn lehhawi thuai a, Snapa arawn hmuh chuan a hmel chu a dang nghal vek a, ramhuai pawh hmu se Snapa a hmuh avanga ahlau hmel put ang tluka hlau hmel a put theih chu a rinawm lo a ni. Chupa chuan engmah dang sawi lovin, “Snap” a han ti ringawt a. A ni chuan “Ni e, Snap Lunta pangai bawk kha ka la ni, Shady, i puan tel lai kha chu ngaihtuah duh tawh suh, i kalna turah chuan puanthan i mamawh tawh lovang” a han ti a.

Hun rei tak atanga a lo hlauh ber thin a hmaa lo ding ta chu a han en thin a, shady chu a zam hneh hle mai. Khawvel pumpuiah hian mi pakhat chauh hlauh a nei a, chu chu tunah hian a hmaah a lo ding ta si a, chuvangin Snapa lak atang a beisei theih chhun chu rei na tuar hman lova thih a ni ringawt a. A mangang tih ngaihna hre tawh lo chuan dawhkana khawnvar chu a phiat thla thut a, chutih pah chuan kil lehlamah a zuang per nghal thuai bawk a. Snapa chuan thimtham zing atangin “Shady i zam ta mai a ni maw? a thim tak vang hian beiseina tlem i nei pawh a ni maithei e, mahse damin i chhuak chuang lovang, Nula chu khawiahnge a awm min hrilh la, tichuan ka chhuah ang che – tun tumah hi chuan,”a han ti a.

Shady chuan “Hrilh che ai chuan hremhmun a hmuh che pawh ka duh zawk” a han ti a, Snap chuan nuih pahin “a dik viau ang, mahse hremhmunah chuan i lo va kal hmasa dawn miau a ni”, ahan ti leh a. Shady chuan a chhang duh ta lo a, tichuan an pahnih in reilote an han ngawi leh rih a. Thimtham zingah chuan inthah tum ve ve hun remchang zawngin an ngawi dun ta vang vang mai a, an pahnih chuan inkahna ah an lo tel tam tawk ve ve tawh bawk a, thil tih palh engemaw hlek avangin a thih mai theih tih pawh chu an hre chiang dun em em a.

Shady chu chet pawh che lovin kil khatah chuan a ding reng a, kut pakhatin puakruk a keng a, thawm riva a ngaihthla reng bawk a.
Chutih lai chuan pheikhawk keartui in lung a han rah hrual ri niawm tak hi a hria a, ri lo chhuahna lam chu hriat tumin ngun fe hian a han ngaithla a, reilote ah chutiang ri bawk chu a han hre leh a. Snapa chuan a rawn veh hnai niin a ngai a, a hmulthi a ding nghal sung sung mai a, ri lo chhuahna hmun chu hre ngei nia a inngaih avangin a rinna lai chu a va kap ta ngawt mai a. A silai kahin inchhung a han tih en zawk laia a hmel lo lang chu shady atan chuan hmuhnawm lo tak a ni. Snapa chu va kah leh nghal mai a han tum a, mahse a kah hmain silai a ri thuai a, shady chuan a kut veilam chu sa zawkin a hria a, a banah silaimu a lut tih chu a hre nghal mai a, a ban chu na a tih em avangin a han rum hak a.

Chutihlai chu nuihzat tih hriat deuh maiin snapa chuan “i kut veilam ka kap fuh a ni maw? shady tunah chuan i kut dinglam a ni tawh thung ang, chumi zawhah chuan….?” a han ti a. An awmna chu a thim tehlul nen, snapa’n chutianga a rawn hre thei mai chu a mak hle a ni, aw lo chhuahna zawn nia a rin lai shady chuan a va kap leh a, silai a hmeh puah rual chiahin sir lehlamah a zuang per nghal thuai a, a rin loh ang takin snapa chuan a rawn kap let ve ta hauh lo mai a. A va kap fuh palh ta hlauh em ni ang le? bang ngheng chungin a ding a, thawm ri a han ngaithla leh vang vang a, a ban hliam chu na a ti sawt hle a, a thi duh hle bawk a. Pawn lamah chuan ke pen ri a hria a tah chuan, “Hei, Mikhual, puk chhungah hian i awm em?” tih ri pawh chu a han hre leh ta bawk a.

Snap Lunta chuan thimtham zing atang chuan “awm e, min kalsan rawh, ka buai rih,” tiin a rawn chhang a. A aw atang ngawt pawh chuan a zam lo hle tih shady chuan a lo hre thei nghal a, snap a rawn autu chu a kalsawn leh ta mai a. Chu pa ke pen ri chu a reh fel hnu chuan anni pahnih chu an ngawi leh ta veng veng mai a, thimtham zinga inkah hlum tum ve ve, inhmu thei bawk silo, ngawi renga han awm dun tak reng mai chu shady chuan tuar har a ti em em a, a mangang rilru hle tawh bawk a, chutia an ngawih reng lai chuan, “Shady, Rafe Sanders kha chance i pe hauh lo tih chu ka hria, mahse kei chuan ka pe ang che, tunah hian sathau khawnvar ka keng a, ka chhit en veleh puakruk kan chuh ve ve nghal dawn nia, enge i ngaih dan? Snapa chuan a rawn ti ta a, shadya chuan “A tha bawk alawm,” a lo ti ve thuai a.

Snap an nawalh bawk a han khawih ri te chu a hria a, nawalh a han nawh en lai takin shady chuan a va kap ta a, nawalh chu a thim nghal mai lo. Snap lunta kawng bawr ding lamah silai a lo de chhuak zawk a, shady chu a tlu a, a thluaka silaimu lut chu tuar lovin a thi ta nghal a. Shady a chu fing vervek hle mahse snapa fin chu a lo la chelh lo deuh a ni. A tirah khan shady a lo beisei dan chuan snap Lunta khan a kut dinglamin nawalh chu a nawt ang a, chuvangin nawalh lo dena atanga ding lam hret kha tum i la, a taksa ka va kap fuh ngei ang a lo ti rilru a, chuvangin, nawalh lo enna atanga a man (shady) ding lam zawnah chuan a va kap ta ngei a, mahse Snap Lunta pawh chuan shady rilru tur chu a lo suangtuah lawk ve vek tawh a, chuvang chuan kut ding lam a nawt lovin nawlah chu a taksa a tanga hla feah, kut vei lamin a nawt eng ta zawk a, a kut dinglamin puakruk chu a keng lawk sa reng bawk a. Shady chuan a fin loh zawk man chu a tuar ta a ni.

Snap Lunta chuan khawnvar chu a han hal a, chhuat laia shady a tlu reng tawh chu hmusit tih hriat zet hian a zuk en a, “A tawp thlengin rinawmna i tla chham a ni, ka rin ang chiah i ni reng e, shady, ka lei i batna a rei tawk tawh viau reng a ni,” a han ti a. Shadya chu a thi tih a hriat chian hnu chuan a awmna atangin a chhuak a, a thiante chu ava zawng ve ta a. Ridgea leh severna te chuan puk kotlangah rukru pakhat chu an lo din chilh a, thil eng engemaw an lo zawt vel mek a. Rukru an lo man kher chu luhlul hmel tak mai hi a ni a, severna pawh chu engmah a lo hrilh duh lova.

Severna chuan lehlam hawisan pahin, “engmah a sawi duh loh chuan Ridge khai hlum nghal mai rawh,” a han ti a. Thi mai thei ani tih a lo ngaihtuah chhuak lo ang maiin rukru chu a phu zawk a, “enge ni min zawh?” a rawn ti chhuak ta a. Severna chuan “Khawiah nge Phili a awm,? thudik min hrilh vat loh chuan i thi rang lutuk ang a, hremhmun khua leh tuite pawh an lo inring hman hlek lo mai tur ania” a han ti zui a.

Rukru chuan “bihrukna hmun dangah an hruai leh tawh” a han ti a, severna chuan “chu chu khawiah nge a awm?” tiin a han zawt leh a. Chupa chuan “ka hre lo, kei pawh ka la kal ngai bik lo, an pawl zingah hian rei ka la tel ve hman lo, ka lo tel ta kher kher kha ka inchhir tak zet ani” a han ti zui a. Severna chuan “tunge in hotupa chu? tiin a han zawt leh a. Rukru chuan “ka hre chiah lo, thu min petu ber thin chu pa tawi deuh, shadewell an tih chu a ni mai a, englai pawha hmai kan tuam reng thin avangin tute nge kan nih pawh kan inhre pawh hlawm lo,” a ti a. A thusawi chu severna chuan dikin a ring tlat a, chuvangin, “Eitur keng la, sakawr pakhat nen, he ram hi rang takin chhuahsan nghal rawh, i nunna hi i la ngaihlu ve te a nih zawngin muangchang hlek suh ang che,” a han ti a.
Severna chuan Ridgea leh Snapa te lam chu a hawi leh a, an hnenah chuan, ”Kan chhak lam deuhah khian puk atanga chhuahna kawng dang a awm a, chuta tang chuan rukru ho hi an tlanbo vek tawh a nih ka ring, tuna kan rukru man khan thudik a sawi a nih a rinawm a, chuvangin Phili chu hetah hian a awm tawh lovang,” a han ti a. Ridgea chuan “Shadewella kan hmu ta lo chu a pawi mang e,” a han ti hman chauh a, Snap Lunta chuan, ”Kan hmu lo hleinem,” tih pahin a chhuak ve ta nghal mai a.

Snap Lunta puk kotlanga a chhuak lai chu en reng chungin, Ridgea chuan “A tawng tam lo hle maw?” a han ti a. Severna chu a nui mai a, tah chuan “Engtinnge kan tih tak zel ang le?” tiin Ridgea chu a han rawn a, ani chuan, “Heng lai vel lo en thlithlai tur hian thenkhat awm se, midang chu haw rih mai ila a ni dawn lawm ni?” a lo ti ve mai a. Ridgea rawtna ang chuan, mi tlemte chauh an hnutchhiah a, a dangte chu an haw leh ta a.
—————————–

Aside | Posted on by | Tagged , | Leave a comment