SORKAR HNATHAWKTE 7th pay milin hlawh pe dawn.

Mizoram sorkar chuan a hnuaia thawktu mi 42,457 (regular employees) te chu an thlahlawh leh alowance te chu Seventh Pay Commission, dungzuiin an pe tawh dawn niin 26th Oct khan sorkar official chuan a sawi.

Council of Ministers-te Chief Minister Lal Thanhawla kaihhruainain sorkar (regular) hnathawkte hlawh leh allowances te chu Central Pay Commission-in a lo duan angin siamsak an ni tawh ang tiin Mizoram Finance Department chuan an sawi.

Hei vang hian ₹ 563 crore chu kum tinin an sen belh tawh tur thu a sawi bawk a ni.

“Tunah hian, state anual budget atang hian 36-37 per cent chu sorkar thawktute hlawh leh allowances-in kan pe chhuak thin a ni,” tiin a sawi bawk.

Sorkar hnathawkte hlawh leh allowance siamrem turin committee sang zawk (high level commitee) din a ni ang tiin a sawi bawk a ni.
Hemi hlawh ruahmannaah hian Lai, Mara leh Chakma tribal autonomous district councils, schools thenkhatah teacher te, contractual a thawk leh casual worker-te a huam pha ve lo a ni.

Cabinet meeting hian hna thar 629 (new posts) medical college — Mizoram Institute of Medical Education and Research — Falkawn a thawk turin siam belh a ni bawk a ni.

Advertisements
Aside | Posted on by | Tagged , , | Leave a comment

KHAWVELA HAUSA BER Amazon neitupa JEFF BEZOS

Bloomberg in report thar ber an tih chhuah ah Amazon neitupa, Bezos chuan khawvela hausa ber Bill rawn khumin hausa ber nihna a hauh leh ta. Bezos hian July thla khan he dinhmun hi a lo hauh tawh a ni.

Bezos hian khawvela internet dawr lian ber Amazon company ah share maktaduai 81 a nei niin tarlan a ni a. Stock exchange lamah Company share $79.64 a san thut avangin ni khat thilthu lekah $6.44 tluklehdingawn in a share neih hlut zawng hi a san belh a, Tunah hian $90.6 tluklehdingawn zet neiin pakhatna a ni ta a ni.

A hnuai ah hian tla chhe hleitheilo Bill Gates a awm a. Ani hian zirtawpni data an lakkhawm danin $88.5 tluklehdingawn a nei niin Bloomberg chuan an tarlang bawk a. Gate hian Dollar maktaduai 423 zet sum a huiluh belh a ni.

Bezos hian Amazon company share 17% hi a chang a. Hei bakah hian Rocket siamtu company Blue Origin ah $3 tluklehdingawn zet a nei bawk a. Chanchinbu lian Washington Post ah khuan Dollar maktaduai 250 a nei bawk niin Bloomberg chuan a tarlang.

Bezos hian alarm clock a hmang ngai miah lova, thawh hunbi a pelh chuang lo. Chhungkua a ngaipawimawh em em a. Zing lamah hian a nupui MacKenzie Bezos leh a fate 4 nen hun nuam tak an hman theih nan programme a nei duh ngailo tawp bawk. Inlaklen leh chapo vel hi a tih duhloh lam a ni a. Mahni chaw eina thleng sil mai pawh a la ching reng tho.

Mihausate hausak dan hi sum faiin an kawl lova, company ah share an lei ṭhin. Entirnan rangkachak Kg 10 nei la, vawiin ah kg 1 kha nuai 100 ni se, naktukah nuai 150 man ni leh thut se, vawiin leh naktuk a i hausakna chu a inthlau thut dawn a ni.
Chutiang chiah chuan company share pakhat man pawh hi a sangin a hniam thut thut ṭhin a. Indo lai chuan Ralthuam siam company te hi an hlutna a sang a, Oil lampang pawh an sang thut ṭhin. Ram ralmuangah chuan nawmchenna,, bazar, zinveivahna lampang leh eitur siamna lam an sang leh mai bawk.

Aside | Posted on by | Tagged , , | Leave a comment

71st YMA GENERAL CONFERENCE, 2017 ROREL MINUTE

A HUN : 18th October, 2017 (Wednesday) Dar 11:00 AM
A HMUN : ZOKHAWPUI RUN, Champhai Zotlang.

PALAI KALDAN :-
1. Central YMA OB – 6
2. CEC Member – 48
3. CYMA OB hlui – 2
4. Sub Hqrs – 237
5. Group – 704
6. Aizawl khawpui chhung – 424
7. CYMA in direct a awp Group-te – 12
TOTAL – 1433

Kan rorel inkhawm hi Pu Lalbiakzuala President in min kaihruai a, Pu K.Lalthanmawia CEC in Isaia 58:12, Galatia 6:9 te chhiarin Pathian hnenah a hlan a. Heng mi – Pu R.L. Zomawia CEC, MZP Gen Hqrs, MSU Gen Hqrs, YZOM-te hnen atanga 71st General Conference chibai bukna kan dawn chu Gen.Secretary hnen atangin ngaihthlakna neih a ni.

20th October, 2016 leh Vawiin 18th October, 2017 inkar chhunga YMA member boral mi 797 te sunna hun; Pu Lalhruaitluanga, CEC-in a hmang a, Champhai Kahrawt Branch YMA ten Sunna hla ‘ Kawngkhar mawiah’ tih chu thiam takin an sa bawk a. Kan member sunte zingah hian Branch Office Bearer 10 leh CEC Pahnih (2); Pu Vanlalthlanga, Upper Republic leh Pu P.C. Lalropara, College Veng te, CYMA OB lo ni tawh; Pu C. Rokhuma Mission Vengthlang, Pu L.Sawithanga, Thakthing, Pu.C. Lalruata, Ramhlun ‘S’, Pu B. Daniala, Ramhlun ‘S’-te an tel a ni.

Rorel Palai chhiarna Tv. Lalhmachhuana, Gen Secretary-in a nei a, Chumi zawhah Rorel tan a ni.

1. Annual Report :
Tv. Lalhmachhuana Gen Secretary in Annual Report 2016-2017, ni 17.10.2017 zan a a pek chu pawm a ni.

2. Finance Report :
Pu. Lalrochuanga Pachuau, Finance Secretary-in 2016-2017 Finance Report a pek chu Rorel Palai ten lungrual takin kan pawm.

3. Central YMA Budget :
Pu J. Lalsailova, Treasurer-in, Kum 2017-2018 chhung atana Central YMA Budget tur
Rs. 1,14,87,900/- ( Nuaiza sawm pali singriat sangsarih zakua) a pharh chu zawhfiah ngaite zawtin kan inhrilhfiah a, pawm a ni.

4. AGENDA

A YMA KHAWIH :-
(1) ‘Mizo Lengkhawm khawhar hla kan neihte hi thangthar ten a thluk kan hriatreng theihna turin, Solfa-a a thluk dan dah a nih theih nan Central YMA-in hma la rawh se’ tih chu kan sawi hova kan pawm.

(2) ‘Hlo tur leh rannung thahna hlo kan hmandan hi fimkhur tak leh a nihna tur ang taka hman anih theih nan Central YMA in hma la rawh se’ tih chu kan sawi hova a lo luh ang hian kan pawm.

(3) ‘Ruihhlo ngaite chhanchhuahna tur Rehabilitation Centre tha leh changtlung tak neih a nih theih nan Central YMA-in hma la rawh se’ tih chu kan sawi hova kan pawm.

(4) ‘Mizoram chhunga Central leh State Institution hrang hrang awm ah hian Mizoten Seat tamzawk kan chan theih nan leh kan Seat neih sa te kan luahkhah ngei theih nan Central YMA-in hma la rawh se’ tih chu kan sawi hova kan pawm.

(5) ‘Mizoram hmun hrang hranga inkalpawhna kan neihte hi tun aia tha leh changtlung zawk a siam anih theih nan Central YMA-in hma la rawh se’ tih chu kan sawi hova, a lo luh ang hian kan pawm.

B. SAWRKAR KHAWIH :-
(1) ‘Tun aia kan lo intodelh theih zawk nan, thingtlang atanga thlai tharte khawpui chhunga zawrhna tur, Sawrkarin ngaihtuah rawh se,’ tih chu kan sawihova, a lo luh ang hian kan pawm.

(2) ‘Mizoram leh Bangladesh ramri khauh taka venhim a nih theih nan, Sawrkar-ah ngen ni rawh se,’ tih chu kan sawihova, a lo luh ang hian kan pawm.

(3) ‘Dan lo anga din, Chakma Autonamous District Council (CADC) hi dan anga thiah a nih theih nan, Central YMA-in hma la rawh se,’ tih chu kan sawi hova, a lo luh ang hian kan pawm.

C. KUMPUAN CHUNGCHANG :
Kum 2017-2018 chhunga YMA Kumpuan atan ‘RAM LEH HNAM HUMHALH,’ tih chu lungrual takin kan pawm.

5. Kum 2019 YMA General Conference :
Kum 2019 YMA General Conference Vawi-72 thlen dil – Tuisual Group – Sakawrdai, Joint YMA, Bilkhawthlir, N. Vanlaiphai Joint YMA leh Kawrthah Joint YMA atangin N. Vanlaiphai hmun a neih turin Rorel Palai ten kan thlang.

6. Kum 2018 Rorel Inkhawm chu Central YMA-in thleng se kan ti.

( LALHMACHHUANA ) ( R. LALNGHETA ) ( LALBIAKZUALA )
General Secretary, Assistant Secretary, President,
CENTRAL YOUNG MIZO ASSOCIATION

Posted in Uncategorized | Leave a comment

KAWNSPIRACY NGE KAN ȚHAT TLAN ZAWKNA TURA THUP by Samuel Lalrozama

March thla a ni a, kum 2010 hma lam deuh kha a ni, India rama mi tinin thlawhtheihna kan chuan theihna tura hma rawn latu, low-cost airline hmasa ber Air Deccan-ah Aircraft engineering zir zawhin kan lut ve a. Chumi țum chu night shift kan neih zawha kan haw dawn lai vel a ni. Airbus Weekly check kan nei a, a ke te kan thlak a, haw turin kan inpeih tawh hle. Mahse, haw mai thei lo tura min dangtu a rawn thleng thut si; zîng hriatreng tlak a ni ngei mai!

Thlawhtheihna hian motor ang bawkin registration nambar a nei ve a, Mizorama motorin MZ kan hmang ang hian India ramah chuan thlawhtheihnate chuan VT hman a ni a, chumi hnuah letter emaw nambar emawin a zui țhin. Airline tin hi bul țanna tur inang pek veka ni bawk. Deccan kha chu AD leh DK pek a ni. Thlawhtheihna tê chi, mi 72 chuan theihna, registration nambar Delta Kilo Charlie (VT-DKC) chu an rawn chuang khat leh țhep țhawp hle a, dan narânin bungrua pawh an nghah leh khawp a, a rit hle.

Coimbatore ațanga lo thlawk lut tur a ni a, țum thei turin ATC chuan clearance a pe a, HAL Airport Bangalore-a runway 27-ah chuan a han țum chu ‘hard landing’ tia technical lama kan sawi, a țum bur tihna ang vel a ni ang chu, a rawn nei ta hlauh mai a. Tichuan a tleng (skid) nghal a, runway pâwnah a tleng chhuak nghé nghé. Passenger panga chu na vak lovin an inhliam a, a ke bâwr (underccariage) chuan chhiatna nasa tak (major damage) a tawk bawk.

Airport chu darkar nga chhung khàr zui nghal a ni. Inquiry neih nghal a ni a, official announcement pawh media lamah neih nghal niin a tul anga ngaihdam dilnate pawh neih a ni. Pilot-in a țum sual vanga hard landing neih tih a ni. A theih ang angin kan batch chuan kan siampui nghal a, thlawhtheihna pawh a siamna bay-ah hnuh phei a ni a, mahse, thlawk leh thei chi a ni tawh lo. A hnuah French airliner Airlinair chuan a part vel an lak duh vangin an lei ta a ni.

Amaherawhchu, keini a chhûng amite chuan a chhan tak kan hre si a. Ui pakhatin kawng a lo kân tur chu a ke hmalamin a chîl ta a, a tlengpui ta a ni ber mai. Hetianga airport chhung lehzela ui awm hi mak in ti a ni mai thei; mahse, India ramah chuan thil mak vak pawh a ni lo. Airport thar awm hnu hi chuan an awm tawh lo chiang, HAL kan hman lai kha erawh kha chuan tui luan chhuahna kawr pakhat atang hian an rawn lut ru țhin. Ui luh țhinna airport awm chhun kan ni mai ang em âw Bangalore kha, ka ti țhin. Engah vak kan ngai lo va, security lam lah khan an ngai pawimawh lo nge ka hre lo. Mahse, zan leh zing lamah an inlâr tlângpui. Ui pathum phei chu an fing tawh khawp a, runway an kân dawn chuan lehlam lehlam hi an hawi a, hla deuha thlawhna light hmuh chuan an nghak fan fan țhin a ni. Tuk khat chu Venezueala engineer kan thawhpui hian, “Ehe! airport-ah uicho an awm,” tiin a au vak a, “Kan thiante a nih hi,” kan ti mai a. Zàn lama thlawhna siam zawha khawhar chang pawhin thosi leh ui ten lunglen an hnem fo a ni.

Airlines leh sawrkar tana mualphona a ni a, hetianga ui an vak nuaih nuaih thei hi, mipui lamah chuan pilot thiam loh anga sawi tak mai a ni. A ram ang pawha hmingchhiatna a nih vangin dawt vâr hi sawi zeuh zeuh a lo țul em ni dawn? Eng nge i ngaih ve dàn?

Hetianga thu thup hi avaition lamah hian a tam ve angreng khawp mai a, ka tawn ngeiah pawh a tam khawp mai. Politics-ah phei hi chuan a lo tam dawn nih hi ka tia 😁😂😁

Posted in Uncategorized | Leave a comment

ZAMPUIMANGA LEH JIM CORBETT

Pu C. Lalaudinga’n Zampuimanga, Jim Corbett-a leh Saihnuna te a tu nge ropui ber tih zawnga a rawn khaikhin chiam mai hi thil tihâwm loh tak niin ka hria.

‘Jim Corbett-a hian Keipui 19 leh Keite 14 (Total — 33) silaiin a kaphlum a. Zampuimanga erawh hi chuan a Kawlhnam chauhin Keipui 13 a sathlum a, silai a hmang lo thung.’ (Mizo Pasaltha ZAMPUIMANGA CHANCHIN. p121)

Jim Corbett-a sakei tihhlum zât hi hriat a ni lo. Internet site thenkhatah chuan mihring sa ei ching keipui leh keite 33 a kah thu an ziak a; hei hi official a ni lo. F. Chhawnmanga chuan a lehkhabu, ‘Jim Corbett-a Sakei Kah Thu’ tihah chuan mihring sa ei ching sakei 45 a kâp niin a sawi. Chowgarh khaw keipui mihring sa ei ching kha kum khat chuang a veh a, tihpalh thilin sakei dang, sakei sual ni lo pahnih a kap hlum tel. Powalgarh keipui kha mihring seh ching a ni lo bawk; mahse, sakei hmingthang, sai râl an tih ang chi, kha tih laia pasalthate’n an kah chak ber, an kah theih si loh a ni a. Powalgarh keipui a kah atang chuan mihring seh ching an ni tih a hriat chian chauh lo chu a kâp duh tawh lo va; sakei humhalh chu a thupui ber a ni ta zâwk a.

Sap mi liante’n India ram an rawn tlawh a; Vai lal, Maharaja-hovin an lo intlawnsiak a. Sai chunga chuangin hual chhungah sakei an lo kahtir thin a. Sakei a la tam si a, sakei za thuar vel kahte chu thil har lo tak mai a ni a, Prince of Wales (Lalbanga) te pafa pawhin tih tham fe an kâp. Prince of Wales-in sakei a kah theih nân khân Gorkhali-ho sing khatin ramhnuaiah an buaipui a ngai a ni. Maharaja of Surguja khan sakei 1100 a kâp a. Sakei 500 chuang kâp an tam mai; mahse, chûng mite chu khawvelin pasaltha tiin a chhâl lo. Sap mi lianho nunchan dân chu Jim Corbett-a khan a duh lo hle a; ani kahte kha chu ramvachal tak takte pawh an hlawhchham thak thak tawhna sakeite a ni a. Mi tam tak thih leh dam thu a ni. Champawat keipui, mihring 436 zet sehtu chauh pawh kha kâp se, a hmingthanpui tho vang. Kah tam aiin eng anga hlauhawm leh kah harsa nge tih a pawimawh. Khawvel hian Jim Corbett-a hi a ngaisâng a, Pu C. Lalaudinga sawi nêp tum ang ngawt hi a ni lo, duh se atân sakei za tih vêl lek kah kha thil harsa lo tak mai a ni a. Zampuimanga nên khaikhin chi an ni lo va — an hma zâwnah an ropui ve ve tia sawi hi a tâwk viau.

Phek 123,124-ah chuan heti hian a ziak a. ‘Sakei tihhlum nân Zampuimanga chuan Kawlhnam chauh a hman laiin, Jim Corbett-a chuan silai a hmang thin a. Silai pawh Rifle, Ulhbun phir, Puakrang leh Puakruk a hmang thin a.’ (p123-124) ‘Zampuimanga hian hmanraw hrang hrang silai puakrang pathum lai ang chu nei ve se Jim Corbett-a ai hian a hming hi a thang zawk mah awm e.’ (p126)

Puakruk chu a lo nei pawh a ni mahna, hriat ni suh. Puakrang a tih hi chu submachine gun a tihna a nih ka ring a, machine gun pui pui chu mi pakhat chelek vêl atân chuan a lian tham deuh. Submachine gun hi Indopui Pakhatnaah khân an la hmang lovin ka hria. Tommy gun an tih mai, Thompson submachine gun kha America chuan kum 1920-ah a hralh chhuak tan a. Al Capone leh mi sual pâwl dangte khan anmahni (gangster) pâwl leh pâwl inbeih nân an hmang nasa a, kha vâng khân a lâr phah phian a. Kha zu khap vanga Chicago gang indona kha Mafia-ho din chhuahna bul a ni. Tommy gun kha ‘Chicago Typewriter’ tih hial a ni. Indopui Pahnihna laiin German-in tommy gun aia tha schmeisser (MP 40) an siam a, British-in sten gun an siam thung. Chuvangin, Jim Corbett khan puakrang (submachine gun) a neih chu a rinawm chiah loh; chu lo rêngah ramsa pelh nân submachine gun leh puakruk chu a hman tlak tehchiam loh vang. Jim Corbett-a silai hman thin chu .275 bolt-action, rigby rifle a ni a; rifle barrel phir, .450/400 nitro express a hmang bawk. Tin, sa pêla a chhuahin silaimu 3 emaw chauhte a keng thin, a pawng a puia sa kah a tum lo tih a chiang.

Phek 124-na. ‘Sakei hliam emaw hliam lo pawh Zampuimanga chuan hual chhungah a luhkhung ngam a, a sathlum thin. Jim Corbett-a erawh chuan hual chhunga mipui hmaah sakei a luhchilh ve ngai lo.’ :

Jim Corbett khan Champawat keipui kha a hual turin mipui a sâwm a, khami tum tih loh chu amah deuh zêlin a ni a chêt thin.

‘Zampuimanga hian tangka fai hlawh khawiah mah a nei lova, a tlawmngaihna avang liau liau….. Jim Corbett-a hi Sipai a ni a, a sakei beih tur hi Deputy Commissioner-ten an pass sak leh remruat vek a ni a. Lo thi palh pawh nise zangnadawmna (Compensate) tam tawk sawrkarah a hmu ngei ang.’ (p124)

Indopui Pakhatna, kum 1914-ah khan labour 500 hruaiin Corbett-a hi indona hmun lamah a zu kal ve a. Champawat keipui (1907), Muktesar keipui (1911) leh Panar khaw keitê (1910) — hêng mihring sa ei ching sa kawlhte a kah avâng hian a hming a thang tawh hle a. Indopui a zawh hnuin a hna pangngai a chhunzawm lehnghâl a. Indopui Pahnihna a lo chhuah khan ramhnuaia chêt dân sipai zirtir turin an sâwm leh a, Lt. Colonel rank an pe a. A kumte a lo upa tawh a, a hriselnain a tlin loh avangin rei a zirtir thei lo.

Mi hausa a ni a, India thingtlang mite a khawngaih vânga sakei huai pêl tura in-volunteer a ni a, tu tirh leh thupek mah a ni lo. Sakei sualte kha House of Commons-ahte pawh an khel laih khawpa hlauhawm a ni a. Corbett-a kha kap turin a ngenin an ngên zâwk thin. Tin, British India sawrkar khân Corbett-a kha a duh duh ramsa, a chhân eng vâng pawha tihlum theih turin phalna an pe a. Ani anga phalna pek hi mi dang an awm ve lo.

Pu C. Lalaudinga hian Zampuimanga hi kum 1880-ah kum 81 mi nia thi angin a ziak a. Jim Corbett-a pawh kum 81 mi nia thi angin a ziak a. ‘Zampuimanga leh Jim Corbett-a hi an dam rei zawng a inang a, kum 81-na an hman mek laiin an thi ve ve a ni.’ (p126) A mak i ti mai teh ang. Thil chhinchhiahna fel thlawp thlawp la awm hmaa Zampuimanga kum leh a thih kum a hrechiang hi! Jim Corbett-a hi chu kum 1875, July ni 25-ah a piang a; kum 1955, April ni 19-ah a thi a — kum 80 tling lo deuh, kum 79 a nih chu. Chhinchhiah thlap Jim Corbett-a kum hi a sawi dik lo.

Tin, Zampuimanga leh Saihnuna te sakei tihhlum zât hi 13 ve ve tiin a sawi bawk a. Tun hma atangin Saihnuna sakei kah zat hi inhnialna a awm fo tawh a. Saihnuna autobiography, Liansailova Sailo chhuahah chuan Saihnuna hian a sakei kah dân ngaihnawm takin a ziak a. Pu C. Lalaudinga hian Zampuimanga sakei sah hlum zât a hriatchian viau laiin, Saihnuna sakei kah zât chu a rawn sawi dik leh pek lo. Saihnuna sakei kah dân hi ziak ni mah se, dik taka chhiar a harsa hle. 1) Amah ngeiin a kah hlum — panga. 2) A thian nên thal an thlah rual — pakhat. 3) A kah hliam, a hnua khawtlang nên an huala an kah hlum — pahnih. 4) A kah hliam, a ruang an hlawm loh; mahse, a lu ro ni ngeia an hriat, ram hrana an chhar leh — pathum.

Mizo dânah sa hi a tira kaptu khan a vun thi ser ser chauh pawhin kâp se, a hriam thlak hmasa bertu kha sa lu changtu an ni a. Sa lian chin, ramsial leh sai te erawh chu a tâwpa a kap thlutu kha sa lu changtu an ni a. Sakei hi chu eng tin tak nge an tih ka hrechiang ngam lo; chuvângin, Saihnuna sakei kah zât hi chhiar a buaithlak rêng a. A ruang hlawm loh, a hnua a lu ro hmuh lehte pawh hi engtin nge an ngaih ka hre lo. Eng pawh ni se, hêng a kut thlak chin zawng pawh hi chhiar vek mah ila, sawmpakhat (11) a ni.

Zampuimanga, Jim Corbett, Saihnuna te hi pasaltha an ni a, sakei hlauhawmzia an hrechiang a, chuvâng tak chuan an fimkhur rêng a, âtthlak takin an che duh lo. An nihna leh dinhmun a inang lo vek a, khaikhin chi an ni lo va, an ropui theuh. Hrangthiauva te, K. Zawla te, TRI te’n Zampuimanga chanchin hi an ziak a, a pawmawmin a ngaihnawm hle a; tin, eng hnam pawhin an pasaltha (legent) te chanchin chu uar leh chhuang takin an sawi thin. Nimahsela, Pu C. Lalaudinga thahnem ngaihna hi chuan Zampuimanga ropuina a khuh ang tih a hlauhawm a. Chuvangin, kan thupui ber tur chu Zampuimanga hi Mizo pasaltha a ni a, kan chhuang a, kan chawimawi tur a ni.

(He ka thuziak hi Zampuimanga dah hniam tumna a ni lo va, Pu C. Lalaudinga thuziak ka rawn thlirna a ni. Pasaltha chu eng hnam pawh ni se, tu hnam pawhin kan ngaisang vek a ni.)

Author : Lalnunchanga Taitea

Aside | Posted on by | Tagged , , , | Leave a comment

PATHIAN MI, KA PU KHA by BChnunga Ralte

Kan khua chu thingtlang khaw lian lo tak, mihring pawh inhre vek tham lek, khaw hmâwr ațanga khaw hmâwr lehlam hmuh phâk tâwk lek kan ni. Khaw inlungrual leh inhmangaih tawn tak kan ni a, chhiat țhat thuah pawh kan induhsak tlângin kan inlainat vek a ni ber. Ram buai hma, sipai hmêl pawh kan la hmuh hma thil daih tawh kha a ni a, tunlaia politics an tih ang te hian kan khua a la thleng pha lo va, changkang lo tak khan kan changkang em em thung a, sikul pawh a awm loh avangin ziak leh chhiar thiam chu a khaw nâwtin ngaih san hlawh an ni țhin. Chutianga ngaih san hlawh ber chu ka pa pa, ka pu kha a ni a, a chhan pawh, amah chauh chu kan khuaa ziak leh chhiar thiam awm chhun a ni.

Ka pu hian kum khat sikul a kal ve a, mahse, khaw dangah sikul hi kal a ngai a, a nuin hmun danga a awm chu a ngai theiin, a tel lo chuan a awm thei tlat lo va, kum khat sikul a kal hnua, sipel chawpa chhiar a thiam hnu chuan, a nu chuan tâwk a tihpui ta tlat a, ka pu chuan a zir zawm ta lo. Tichuan, kan khaw lamah chuan nupui te neiin chhungkua a din chho ta a. Mi taima tak leh tum ruh tak a ni a, hmuingil pawh a hmuingil viau a, kan khuaah chuan a khawsa thei ber te zinga mi a ni chho va, lehkha chhiar thiam awm chhun a lo ni nen, kan khuaah chuan pa râwn ber leh pa zah kai ber a ni ta hial a.

Kan khua chu mihring kan tam lo bawk a, kohhran dang awm lovin kohhran pakhatah kan awm vek a, Biak in pawh pakhat chauh a awm a, chutah chuan kan lawi vek a ni. Ka pu chu lehkha chhiar thiam awm chhun a nih avangin kan kohhranah chuan upa awm chhun a ni mai a, kan awmna a chengker em avangin, min bialtu Pastor pawhin kum khatah vawi khat bak min rawn tlawh hman ngai lo va, ka pu chu kohhran serh leh sâng khawihtu ber a ni mai a, Pastor tlukin kan khaw mipui te chuan an en phah hial reng a ni. Ziak leh chhiar thiam lo ta hlawm chu, tu te mahin Bible pawh an nei lo va, ka pu chauh chu kan khuaa Bible nei awm chhun a ni a, ani pawh chuan chuti tak chuan a khâl peih lem lo. Khum mawnga țhehlân chungah a dah reng a, inkhawm dawn chauhin a la thla țhin a, inkhawm banah chuan a dah leh mai țhin a, a hnuah a chhiar chhunzawm pawh kan hre ngai lo.

Chutiang khawpa kan khuaa mi te zah leh ngaih sân ni ta chu, eng emaw thubuai hlabuaiah pawh, ka pu chu koh berah a țang a, chalremtu leh zaizâptu berah a țang ziah a, a sawi tawh hi chu tu te pawhin an awihin an zâwm thlap zel țhin. A chhan pawh, chutianga a tih reng reng chuan, Pathian thu ngatin a zilhhau a, Bible châng hmun hrang hranga mi sawi chhuakin, an thil tih dik loh te chu, Bible thu nena inmil chiah zelin a sawi chhuak a, a bung leh châng nen lam a sawi vek zel avangin, mi te chuan “Pathian mi, Pathian thu pawh hre vek tawh, Pathian thlarauin a luah tlat mihring” niin an ngai a, a thu leh hla reng reng chu an zawm lo ngam ngai lo. Keini naupang te pawh chu, thu kan awih loh deuh chang leh, eng emaw chânga kan han tihtauh ve hlek pawhin, Bible bung leh châng sawi chhuakin Pathian thu ngatin min zilh țhin a, chutiang a nih tawh chuan thu kan awih lo ngam ngai lo. A chhan chu, ka pu sawi chu Pathian sawi tluka kan ngaih vang a ni.

Krismas lai te hian amah chu thusawitu ber a ni a, kum tinin Lal Isua pian thu chu ngaihnawm takin a sawi țhin a; mahse, kum tinin Lal Isua pianna khua chu a sawi danglam ziah thung. Kan khuaa a țhian bul ber Pu Kâpa chuan, “Rûma, nikumah Isua kha Jerusalemah i piantir a, engah nge kuminah lêm, Kapernaum-ah i piantir leh si?” tia a zawh pawhin, “Kâpa, Kapernaum hi Jerusalema vêng pakhat hming a ni tih pawh i hre lo a ni maw! Ziak leh chhiar thiam lo nih hi pawi deuh asin. Zawhna âtthlâk deuh deuh min zawh phah hi,” a ti lêt a, Pu Kâpa pawhin, “Chuti zawng chuan i sawi si lo va, ka lo man thiam lo deuh a nih tak chu,” a ti ve mai. Ka pu chuan Isua kha, a chang leh Kalvari tlangah a thihtir a, a chang leh Olive tlangah a thihtir bawk a, mahse, tuma’n, “A ni lo,” an ti ngai lo. A chhan chu ka Pu chuan dawt a sawi an ring lo.

Țum khat Pathianni tûka a thusawi ka hriat reng chu…. “Lal Isua pa Josefa kha, tlangval hmel țha tak a ni a, Lal no hlântu a ni a, a hleitlingin a ruakhau nasa si a, nula chauh ni lo, mi nu te pawhin an ît ngawih ngawih a, chung zinga lo ngaizawng deuhtu pakhat chu, Lal khawnbawl upa Potiphera nupui chu a ni. Mi lian nupui, hmelțha leh itawm lutuk hi a ni a. Țum khat chu remchang takin Josefa awm fâl lai chu a nang fuh a, chu nu chuan mutpuiah a thlêm ta a, mahse, Josefa chuan a duh tlat lo va, chu nu chuan a pawngsual titih ta mai! Kâpa te chu ni se, an tlâwm rang duai duai teh ang chu! Mahse, Josefa chuan a mumangah nula thianghlim a la nei dawn tih vantirhkohin a hriattir tawh avangin a tlâwm mai duh lo va, a tlânchhiatsan ta daih a, chu nu pawh chu a beidawng chiang ngawt mai. Chuvang chuan, a mumanga a hmuh ang ngeiin a tawpah nula thianghlim Mari chu nupuiah a neih theih phah ta a ni. Tlangval ho kha, nangni pawh nula thianghlim ngat nupuia in neih duh chuan, in lîk kha lên lutuk suh ang che u. Josefa ang hian insûm tlat ula, remchang in hmuha in châk hle pawhin, tlanchhe hmiah zel ang che u. Chuti lova in bawh ruak ruak a nih vaih chuan, a reh pawh sâ a nia in neih ang ni. Fimkhur hle ang che u,” tiin a sawi a, a thu sawi chhung zawngin tumah kan muthlu lo.

Sawi tawh angin, ka pu chu kan khuaah chuan ukil a ni ber. Tlangval intibuai te hi a țhelhtu berah a țang a, Bible chang sawi chhuakin, “Buaina siam chîngte chu buaina vekin an nun a tibuai ang a, an dam a rei lo vang… Thuhriltu bung 67:34” a tih tawh chuan, tumah an intibuai zui ngam ngai lo. Țum khat chu, kan țhenawm lawka nupa awm te hi an intithiam lo va, an monu chu a tlân a, an chhungkaw pa ber chuan ințhen phal lovin koh a duh a, ka pu chu ko turin a rawn ngen a. Chumi țum chuan ka pu chuan min hruai ve hlauh mai a, a hnung chu ka zui ve ta a. Chutah ka pu chuan a țawngkam thiam theihtawpin a thlêm a; mahse, a hmeichhe pa ber chuan haw a remti ta tlat lo mai a. Ka pu chuan nasa fea a tih pawhin a hmin thei ta mang lo va. Chutah le, ka pu mitmeng chu thawk leh khatah a danglam thut a, chu pa chu mitmeng lian kel kawlin a en ta rûn rûn mai a, mit khap lêk lova rei ngial a melh hnuah, muang ban charh hian, “Chhungkua inpum aia a keh darh duh zawktu chu anchhedawngin awm rawh se. A inchhung pawh buainain a khat ve ang. Thufingte 36:6.” tiin, chang khel khawl leh fiah fak hian a’n ti ta mai a. Chutah zet chuan chhungkaw pa ber chu a kun lap a, a maimitchhing diar diar a, ngunthlûk takin a inngaihtuah ta a. Chutah a lo dâk chhuak a, ” À, Pu Rûm, ka lo ngaihtuah chiang lo deuh a ni e, min hre thiam teh. Ka lungni lo deuhin ka han phal lo ve deuh mai a nih kha. Ni e, ințhen hlen te chu kei pawhin țha ka ti bik hlei nem. Mami chu haw phei rawh se, lungawi taka awm a țha e. Mami, insiam la, i pu Rûma rual hian va haw tawh. An thinrim reng ngai lo ve. Țha te te khan va haw leh tawh.” a ti ta a. Hlawhtling takin kan ko haw thei ta a.

Kan khuaah hian sikul a awm loh avangin ka pu hian A AW B hi inah min zirtir țhin a. Thla ruk zet min zirtir hnuah chuan, sipel chawp chungin ka chhiar thiam ve țawk țawk a. Ka pu hian a tu hmuh hmasak ka nih avangin, mi hi a duatin, a hriat leh thiam ang ang hi chu thiam turin min duh a, min zirtirin min kaihruai nasa thei hle. Hemi tuk hian ka puin Bible chang hmanga mi thinlung a hneh dan ka hmuh khan, ka pu chu ka ngai sang zual ta em em mai a, amah ang maia Bible thu te chu hriat ka duh ta thut mai a. Țhenawmte ina kan mi koh a hruai luh lai chuan kei chu kan in lamah chuan ka haw tlang a. Ka pu Bible châng sawi kha ka thinlungin ka vawng reng a. In ka thlen chuan kan Bible chu ka la thla a, ka pu te mutna khumah chuan ka inchhawp a. Ka pu Bible bung leh châng sawi chhuah ngei chu ka zawng ta a. Thufingte chu ka hmu nghal a; mahse, ka’n keu țhin a, bung 36 na chu ka hmu zo ta reng reng lo mai! Ka pu khan a sawi sual em ni dawn le! Ka keu ka keu a; mahse, Thufingte 36: 6 awzâwng a awm lo.! Mak ka ti em em mai a, ka pu chuan dâwt a sawi ka ring thei bawk si lo; mahse, ka hmu zo miau si lo! Chutia mak ti taka ka awm lai chuan, ka pu chu a lo haw a, ka awmna lamah chuan a lo phei a. Ka mak ti hmêl leh khuma Bible inkeu a hmuh chuan, thil awmzia a hre thiam nghal vek a, chutah, a kut zungpir chu a hmuiah lekin, a hmui chu a zum a, “SSSHHH”. Zawi te hian, “Eng mah i sawi tur a ni lo,” tiin min khap nghal a.

Kum te a lo vei a, ka pu pawh chu a lo upa ta deuh nen, a hriselna pawh a tla hniam ta hle. Zan khat chu, “Taite, i lehkha tur ka ziak a, ka thih hnuah chauh lo chuan i chhiar tur a ni lo. Ka lukham hnuaiah hian ka dah a, ka thurochhiah che a nih avangin, i ngai pawimawh hle tur a ni. Ka kal dawn hnai tawh a, he khuaah hian kei ka awm tawh loh chuan, ka ai awh zo thei tur chu nang chiah hi i ni. Ka hniakhnung hi rawn zui la, ka rawngbawlna hi rawn chhunzawm ngei ang che. Chu chu min tiam thei em?” min ti a, kei chuan, “Aw, ka tiam a che,” tiin ka chhang a. Chumi a sawi ațanga ni thumnaah chuan ka pu chuan min kalsan ta!

Chutia ka pu a boral takah chuan, a lukham hnuaia a thurochhiah min hnutchhiah chu ka la a. Roh em emin ka ak țha a, ka pu kan vui zawh hnuah chuan, Biak in tlâng lamah keimah chauhin chhiar turin ka chho ta a. Min hmangaih em emtu leh min kaihruaitu ber a nih avangin, a thurochhiah chu ka hlutin ka roh em em mai a. Chhiar pawh chu ka châk rualin ka huphurh deuh bawk a. Amah mitthlaa hmu reng chungin lehkha chu mittui parawl deuh pûr chungin ka phawrh ta a. Chutah le, a va mak kher tak em! Ka rin loh thu daih ka zuk chhiar ta!

“MAHNI PÛ TE MUALPHONA TUR ZÊP TLATTU CHU A HMUINGÎL ANG A, LEIAH LEH VANAH MALSAWMIN A AWM ANG. THUFINGTE 33: 33” tih thu hi a lo inziak a!

He thuziak hi a nuihzatthlak a, a ṭha ru riau bawk.

Aside | Posted on by | Tagged , , | Leave a comment

ALMENDO TLÀNG by KCi Pa Khawlhring.

Thihna hruihrual fip tak mai awrha intihhlum hial duh khawpa nun beidawng, a nuna huatna bet khat tlat nun hrehawma hun a hman mèk laia a hringnun inthlàk thut mai chu mi mak tih a tling na meuh mai! Ni e, Almendo tlàngah chuan tih palh thil thuin a danglam tlat a ni!

Chu tlàng chu ramngaw chhah tak chuan a tuam vèl a. Chhum chhah tak kàrah chuan Almendo tlàng chhip chu a lang thei a. Tlàng hmingthang leh hahipa hmuhnawma sawi tling phàk lo mah se, a tàn erawh chuan hriatreng tawh túr tlàng ngainatawm a ni lo thei ta lo a ni.

Kum 1875, kum tàwp lam a ni a. Chutih lai chuan Kolemi chu kum 14 emaw leka upa a ni a. Heti lai hian an ram chu an pachhe èm èm mai a. Chu mi kum chuan skul pawh kal tluan thei lovin kum lai hawlah a pa thu angin a chawp tawp a. Chhúngkaw harsat nak alaiin a pa chuan a thawhchhuah sa chu zu manah a tlan zo nghàl vek mai zèl si a. A nu rilru hah thin lutuk chuan Nigeria nu thenkhatte’n an tih fo dànin kum kal ta atang khán zàn lama chaw zawn a chìng chho ta a ni.

Chuti chinah chuan Kolemi hringnun chu a khirh chho ta fat fat hle mai. A pa chu thim thet thetah rui chungin a lo haw a, a pa mutthilh veleh a nu chu an chhùngkaw chàwm tùrin a chhuak leh ta thin a ni.

Kolemi chuan a pa thil tih chu a hria a, nìtinin leirawhchan siamnaah a inhlawh thin a. Zán lamah a nu thil tih erawh a hriatpui ngai lo a ni.

Zàn khat chu a nu chu a zui ru ta a. Dawrpui hmun a va thlen chuan a nu leh mi pakhat inbe lai chu a va hmu ta a. An thil sawi erawh a hre thei lo. Reilotè hnu-ah chuan a nu leh mi pakhat chu an dinna in lian zet maiah chuan an lut ta daih a. A va pan hnai a, mahse, a chhùngah erawh a lut thei lo. Chu in phenah chuan biruin, a nu lo chhuah hun chu a nghàk ta tawp a. Mahse, dàrkàr tam tak a nghah hnu pawhin a nu hmèl rèng rèng a lang thei lo.

Zíng dàr hnih thleng rawk mai a nghah hnu chuan a haw san ta a. Zínga a’n harh meuh chuan a nu chuan a ei túr thenkhat te chu a lo chhawpsak leh dim diam tawh a ni.

Kolemi chuan a nu chu engmah a zawt lo a. Mahse, chu mi tuka a fapa hmèl danglam ta daih mai a nu’n a’n hmuh chuan zawhna a zawt ta thung a. A fapa chu a ngawi reng a, mahse, a nu’n a’n zawh a’n zawh takah chuan nizàn lama thil thleng chu Kolemi chuan a sawi fai ta lèng a.

Chutah, a nu hmèlah chuan hlauhthawnna leh mak tihna a lo lang rual ta thawt a. A tàwpah chuan tlang takin a fapa chu a thil tih leh a hmangaih vàng a nih thuin a’n tlip zui a. A fapa chu mak ti áwm pawhin a lang lem lo a, ngawi renga a nu chu a chhuahsan ta daih a. Chu mi atanga thla khat àwm vèlah chuan an in chhùngah chuan thil ràpthlàk tak a thleng zui ta a ni!

A nu chu an in chhùngah ngei chuan rawng tak leh dimna tel miah loa thah a ni a, a pa lah a tlanbo zui nghàl a, chu mi atang chuan Kolemi khawvél chu a mumal lo tan ta a ni! La naupang hle mah se, a nu thattu chu zawn chhuaha, a nu chunga a tih ang chiaha ti ve a phuba làk chu a tum nghet ta bur mai a ni!

Túnah chuan kum 30 val a tling tawh a. Vawi tam tak kawtthlerah rukruin, mi pathum lai a that tawh a. A thinlungah chuan a nu thihna rawng tak avànga mihring thisen a chàkna chu a zual zèl emaw tih túr hi a ni a. Chhunah ramhnuaia a púkah chuan hahchawlin, zàn lamah chuan ramhuai ang maia che chhuakin mi suam túr a zawng thin a ni!

Zân khat chu kawtthler táwpa a kal laiin a hnung maia putar ni àwm tak, inthazo hmel tak si nèn chuan an intàwk thut mai a. Chu pa chuan a khua a sik thu leh tanpui hràm túrin a’n ngen tàk chiamah chuan hla taka a púk chhetè-ah chuan a hruai thleng ta poh a. Chu pa nèna thla thum zet an inenkawl hnu chuan haw a duh thu chu a sawi ta a.

” Khaw’nge i kal dàwn?”

Chu putar chuan hla taka Almendo tláng lang chu a kawk ringawt a. Kolemi chuan a lu a thing a.
” Kha nu kha ka thah a ni miah lo asin! ” tiin, a phun ri sup a. A kal zui chu a ni mai a. Kolemi chuan a kal hnu minit 30 àwm vèlah chuan a zui ru ta a. A táwpah chuan Almendo tlàng chu a zui thleng ta a ni.
Amah ang bawkin chu pa chu pùka kum 30 chuang lo chèng tawh hi a lo ni a. Mahse, thil pakhat a hriatthiam theih loh a awm ta tlat mai, chu pa chuan a nu thlalak a tár tlat mai.

Thil engkim an sawi dun ta. A tàwpah chuan Almendo tlànga pùk pakhatah chuan inkuahin an pafa chuan an inkuah a, an tap dun a…

Rei rial lovin an tho a, a nu thattu zawng chhuaka an pafaa nun thara bul tan leh túrin Almendo tláng panga pùk té reuh tè chu a an chhuahsan ta a ni, a nu thlalak hlui tawh tak keng chung chuan!

I inrintàwk phawt chuan i tithei ngei ang!
– KC-i Pa, Khawlhring

Aside | Posted on by | Tagged , , | Leave a comment

FORENSIC FILES : TRANSACTION FAILED

Mak tak maiin High School zirtirtu pakhat chu a khuangcherbo ta tlat mai. Midangte hrilhhriat lovin chawlh hmangin a zin chhuak em ni?. Nge, a duh lo chungin an hruai lui zawk?. Khing zawhnate khi Forensic Science in a chhang thei ang em le……?

School vangtlang a kal zirlai naupangte hi an ti tha vek kher lem lo. St. Antonio, Texas a High School zirlai tleirawl rual a bik taka zirtirna leh tanpuina mamawhte tan chuan Edward T. Robbins High School chu High School kal nana thlannahawm ber a ni a. Robbins ah hian zirlai naupang chi hnih an awm a. Chi khat chu High School pangaia lo kal tawh thin ti tha vak lo zirlai naupang te leh chi hnihna chu zirlai naupang then khat inkhuahkhirhna lama harsatna neih vang emaw, school kai that loh vang emaw, nungchang thlahdah vang emaw a fail a Robbins a kal chhunzawm ta te an ni hlawm.

Kum 58 a upa Pi. Diane Tilly chu Edward T. Robbins High School dintute zinga pakhat a ni a. Student harsatna neihte an harsatna sutkian sak leh siam that kawngah a hlawhtlinna vangin hming lemah “The Miracle Worker” an phuahsak hial a. Ani hi zirtirtu, mahni zirlaite chunga rinna nghat mi leh an tih theih chin hmu thiam em emtu a ni a. Chuvang chuan anni pawh chuan amah chu an bengkhawn bik a ni. Amahah hian thil chhinchhiah tlak tak a awm a. Zirlai naupang harsatna neite bula hna tha takin a thawk thei a, an thatna lai a hmu thiamin fuih an ngaihna kawngah a fuih thiam em em a. A zirlai naupangte chu zahawm takin a siam thiam tlat a ni.

Kum 2004, November thla n23 Thanks Giving Day hma ni in Diane Tilly chu School a a awm hun thin pangaiah a awm ta tlat lo mai. Chuvang chuan a chanchin ngaihvenin a thawhpui pakhat chu Alamo Heights, San Antonio, Texasa a chenna Inah a va inkhalh ta ngawt a. Kawngka a han kik a. Chhawntu an awm mai lo. Tukverh atangin Inchhung chu a han bih a. Inchhung lo hnawk nuaih mai a hmuh avangin a ralkhel hle a. Bexar County Sheriffs Department te chu enfiah tura punin chu lai hmunah chuan a ko ta a. Policeten an han enfiah chuan insuamna a thleng ngei a ni tih an hrethiam nghal mai a ni.

Inchhung chu nasa taka suasam a ni a. Bungruate chu hmun tinah theh darh nuaih a ni. Inchhung chu an khawrh chhuak vek emaw tih mai turin nasa taka chingletin a lo awm a ni. Closet pawh nasa taka haidarhin a lo awm. Sgt. Yvonne Villarreal, Homicide Investigator chuan, ” Helaiah hian ‘eng thil tak chu thleng ang maw’ tih ka ngaihtuah a ni. He nu chungah hian eng thil chiah ng eng vangin nge a In hi hetiangin a awm?” tia sawiin In hnawk dan atang chuan a ngaih a tha lo hle. Electronic bungrua thenkhat chu a bo a. Chutiang bawk chuan mahni inven nana a kawl thin 357 Magnum Pistol pawh a bo bawk a ni. A chungah vanduaina a thleng thei a ni tih hriat theihna hmasa ber chu thutthleng a silai mu luhna lo kaw tlang huau leh chhuata silai mu la inverh tang reng mai chu a ni a. Tichuan a tirh phat atangin tharum thawhna hnuhma a awm ta nghal pang mai le.

Police Technician te chuan Diane inchhungah chuan pawnlam mi finger print hmuh an nei lo va. Diane Car pawh a lo awm lo bawk. Thisen hmuh a nih loh avangin pawi khawihna thlen laiin Dianei chu Inah a awm lo mai thei a ni tih ngaihdan te pawh a awm a. A lo kir leh ang a, “Nga ti nge hetah in awmkhawm thup?. Ka In hi eng tin nge hetia a awm tak mai?” te pawh a rawn ti thut thei bawk a ni. Mahse, chu inah chuan buaina a thleng thei a ni tih lanna an hmu ta. Detective te chuan mut pindanah chuan condom tuamna kawr ruak hi a hmu a. Tin, Tennis khelhna pheikhawk khing lehlam hrui awm lo an hmu tel bawk. Inchhungah chuan Diane purse a lo awm a. Mahse, a chhunga ATM Card a awm lo thung. Investigatorte chuan choka dawhkanah ATM withdrawal receipt pathum an hmu a. A hma zan dar 8 vela Withdraw na te an ni. Mahse, mak tak maiin chung receipt te chu PIN Number chhut luh dik lo vanga hlawhtling lo vek an ni a, pawisa lak chhuah a ni lo. Zawhna awm ta chu;

“Tuin nge mahni PIN number vawi thum lai hrechhuak zo lova awm a, Transaction hlawhchhamna receipt kawl tha ngai ?..” tih hi a ni.

Chuta tanga han ngaihtuah pawhin thil dik lo eng emaw tak chu a awm ngei a. Chuvang chuan Investigator te chuan thang kam zai an rel ta a ni. Tichuan, Dianein Account a neihna Bank chu Diane Bank Account hmanlai chu inhawngsa a dah turin an ngen ta a. Bank lam pawh an lo inhawng hle. Investigator te chuan tupawh chu lo ni se, Card kawltu chuan Card hmangin pawisa lak chhuah tumin ATM Card chu a hman leh ngei an beisei a. Hmang leh ngei se pawh an ti ngawih ngawih a ni. A hman rualin Card hmangtu chu an thlur bing nalh theih dawn a. Tichuan Card hmangtu chu chhui chhuakin a hnen atangin Diane Tillyi pawh an zawn hmuh ngei an beisei a ni.

Diane Tilly khuangcherbo thu chu St Antonio, Texas chanchinbu te thupui ber a ni a. Zirlaia harsatna nei naupang tam tak a lo tanpui tawh thin a ni kan ti tawh kha. Chutianga mi a tanpuina kawngah chuan thian tam tak pawh a siam reng a. Zirlai tam tak chuan an mimal harsatna te zirtirtute bulah an sawi ngai meuh lo. Mahse, zirlai zawng zawng deuh thawhin Dainei bulah chuan an harsatna te inthlahrung hauh lovin an thlen thin a ni.

Diane Tillyi hi pasal then tawh, fa puitling pahnih nei a ni a. Mahni chauh a khawsa a ni. Chu chuan midangin a awmna chin an hriat loh chhan pawh a sawifiah hle awm e. Investigatorte chuan mel 300 a hla Dallas-a cheng a bialpa Municipal Court Judge nilai chu an han bepawp ta a. Police te a hrilh dan chuan Dianei bo zanin Dallas ah a awm a, Zan dar 6 ah Diane pawh a biak ngei thu a sawi. Phone Record atangin a thusawi chu a dik ngei a ni tih fiah a ni. An inlaichinna chu a ngheh hmel hle a. Eng vang mahin Diane han tina tur leh thungrul duh mi niin a lang lo. Dianei hmakhua a ngai hle zawk a ni.

Police te chuan Airlines lam an han enfiah leh a. Dianein Dallas lam panin emaw hmun dang panin a thlawk chhuak a ni tih fiahna an hmu zo lo va. A zirlai naupang zingah tu emaw amah lo tina duhtu tur an awm em tih thleng an ngaihtuah tel a ngai a. Tichuan zirlai naupang buaina siam ching te pawh uluk takin an enzui a. Achhan chu naupang zinga then khat chu Gang pawla lo inhmang tawhte pawh an awm ve a ni.

Ngunthluk taka thil ni thei awm ang te an enfiah hnuin chhuizui ngei ngei tur hnu pakhat a awm ta. Chu chu Diane choka dawhkana an hmuh ATM Receipt pathum te kha a ni. Receipt a Code Number inziak atangin khawilai ATM in nge Diane ATM kha lo reject tih a hriat theih a. An han chhui ta. Diane chenna atanga mel 1 a hla a awm Shell gas station ( Tuialtheih zawrhna) chhunga ATM atanga hman hi a lo ni a. Vanneih thlak takin chutah chuan Security Camera quality tha ber ber chi an lo vuah a. Tichuan CCTV Footage chu an han enfiah ta. Footage ah chuan Pa pakhat ATM awmna lam pana kala ATM hman tum chu an hmu a. Tichuan chu pa chuan a kuta ATM reject na Receipt kengin dawr chu a chhuahsan leh a. Chu pa chu mihang a ni loh vek pawhin hispanic (A tawi zawngin Spanish emaw Latin American lam mi) mi niin a lang a. Cher sang lam deuh a ni. Minute 20 hnuin hmeichhia tleirawl pakhat hian Diane ATM Card chu hmun dangah a lo hmang ve leh a. Chu nu pawh chu hispanic a nih loh pawhin mihang a ni ngei ang. Eng mi chiah nge a nih an la sawi fak thei lo va. Mahse, chu nu chu tleirawl kum 17 bawr vel, a nih loh pawhin kum 20 bawr vel a ni ngei ang. Kawr vang tial a ha a ni. He hmeichhia thung hi chuan PIN number dik tak chhu lutin Diane Account atang chuan $ 400 a lachhuak a. Investigator te chuan chu footage an enna a misual pawi khawihtute chuan an hnen a hruai thleng ngei dawn tih an hria a ni.

Security Camera atanga a lan dan chuan chung mi pahnihte chuan Diane Tillyi car ni ngeia lang Fleetwood Cadillac (General Motors hnuai a Cadillac te siam Car pakhat hming) an khalh a. Dar kar tlem a ral leh hnuin motor khalhtu pakhat hian hmun finrial deuha motor pakhat lo alh hluah hluah hi a hmu a. Motor alh thelh mih a nih hnuin an han enfiah ta a. Investigator te rilruah chuan Dianei chu Car hnunglam bawmah chuan awm lo hram se an ti ngei mai. Vanneih thlak takin bawmah chuan Dianei chu a lo awm lo. Witness dangin a sawi dan chuan Pick Up truck var pakhatin chu lai hmun a chhuahsan lai chu a lo hmu a. Mahse License number erawh a lo chhinchhiah hman lo va. Chu Truck a chuangte hmel hmang an sawi leh surveillance video a rinhlelhte hmel hmang chu an inmil chiah a ni tih Policete chuan an hre ta.

Diane Tilly chenna lamah thung chuan Investigatorte chuan zu um a finger print them lo kai hi an hmu chhuak thei hlauh a. A lan dan chuan pawi khawihtu chuan Dianei inchhunga thil thlen laiin hun tam zawk chu kutkawr a bun niin a lang a. Scotch a in dawn khan a glove a phelh a ni ngei ang. Chutia a tih vangin zu um hnuai lam pangah a finger print chu a hnutchhiah ta niin an ngai a ni. Investigatorte chuan mipa leh hmeichhia tleirawl Diane ATM Card hmangtute chu zawn hmuh thuai chakin an zek zek tawh a. A chhan chu an zawn hmu dan a zirin Diane Tilley thih leh dam thu pawh a innghat thei tih an hria a ni.

Diane Tilly bo chungchanga an mi rinhlelh ber chu pa valai leh tleirawl, an hmuh hnuhnun ber tuma pick up truck var khalh te an ni a. Chung lai vela Police tawh phawt chuan an mi rinhlelhte chu an ngaihven reng a. Patrolman in Motel parking lot a mi pahnih an miduh pianhmang nena inmil te a lo chhelhdin nan hun a duh rei lo kher mai. Chung a chelhdin te chu kum 15 a upa Pearl Cruz leh a pa kum 33 a upa Ronnie Neal te an ni tih finfiah a ni. Thu an han zawtfiah ta a. An pahnih chuan Diane Tilly bo chungchang ah inhnamhnawihna an nei lo tiin an pha nasa hle a. Mahse a car erawh an ruk sak ngei thu a pha bik lo. Tichuan Dianei bungrua a neih dan thawnthu awihawm lo zet mai a sawi ta a. Ronnie sawi dan chuan a ni chu car silna hmunah a lo awm a. Tah chuan Diane Tilly car chu a hmu a. Chabi lo invuah sa reng mai leh khawl pawh tih nunin a lo awm a, kawngkhar te pawh a lo inhawng sa vek a ni. A chhungah bungrua eng eng emaw a awm bawk a. A hnar thei ta ngang lo va, a ru ta mai niin a sawi. Ni leh Diane ATM Card kha eng tin nge an neih theih?. A sawi zel dan chuan Car hmalam pawhdawhah ATM Card chu a lo awm a. A hnuai maiah chuan lehkha thema PIN Number inziaksa hi a lo awm bawk a ni. Police te chuan dawt a sawi tih chu an hrethiam nghal mai. A chet zia leh a tawngkam chhuak atangin dawt ngialngan a sawi tih an hria a ni. Neala sawi dan chuan chanchinthar atangin Dianei bo chungchang a lo hria a. Amah nena thlunzawm nih a duh loh vangin car kha a hal ta mai a ni. Neala thawnthu sawi chuan bulfuk leh awmzia a nei lo va. An zim hneh hle tawh tih a hriat vangin phatna awm thei ang ang a dap mai niin a lang.

Neala nunhlui chu an han chhui zui leh ta a. Ruk ruk leh mirawk vangin vawi tam thiam loh chantir tawh a ni a. Silai kaihhnawih dan bawhchhiat vangin Tan Ina a tanna atangin tun hnai maia chhuah a ni. Chumai ni lovin Policete chuan Diane Tilly leh Ronnie Neal te inzawmna an hmuchhuak bawk a. Ronnie chuan Dianei chu a vawi khat nan tual samfai chungchangah a hmu a. Dianei chuan a kawtzawl vela hna eng emaw thawhtir turin Ronnie chu a lo ruai tawh a ni.

Ronnie finger print leh Dianei chenna a zu uma finger print them lo kai te chu an han khaikhin a. An lo inmil ta chiah mai. Neala phone call record an han enfiah leh chuan Diane Tilly hruaibo a nih zan khan a nupui hlui Elisa Stanley a bia tih hmuh chhuah a ni a. A biak laia phone in tower a hman chu Diane Tilly chenna atang mel 50 a hla a awm a ni. Chu lai hmun chu acre 1000 chuang a nih loh pawhin acre 100 tam laia zauin a hual vel hmun hi a ni a. Chu chuan Policete chu rin dan a neih tir a. An ngaihruat dan chuan Nealan a nupui hlui Elisa Stanley a biak laiin tower bulah a ding ang a. A bulah chuan Diane ruang pawh a awm mai lovang maw tih an ngaihruat a ni.

Elisa Stanleyi chu thu an han zawtfiah ta a. Nealan a lo biak ngei thu a sawi a. Mahse, Dianei hruaibo chungchang engmah hriat a nei ve loh thu a sawi a ni. Pi Stanley sawi dan chuan Neala chuan pawisa eng emaw zah a neih hlauh a, Shoppinga kalpui turin a lo sawm a ni. Chutiang finfiahna te an neih chung pawhin Ronnie Neala chuan Policete chu a puihbawm tha duh lo va. A ngeng ngal mai a ni. Chuvang chuan Policete chuan a fanu Pearl chungah an insawr bing ta thung a. A tir chuan ani pawh a ka a ang tha duh bik lo.

Ni 10 zet Police kuta a awm hnu ni 4 December.2004 khan Pearl chuan Policete chu Dianei ruang awmnaah a hruai ta nghe nghe a. A ruang awmna chu Ronnie Nealan a nupui hlui a phone na lai ngei kha a lo ni nghe nghe. Diane Tilly chenna atanga mel 50 a hla, hmun fianrial taka thing tang vur hnanin a ruang chu a lo awm a ni. Dianei ruang chu a chhe ang reng hle tawh nangin vawi eng emaw zah kah a ni tih chiang takin a lang a. A kut chu Tennis khelhna pheikhawk hrui bo ta ang tak pheikhawk hrui dum pawl hmanga phuar a ni.

Dianei kut phuar nana hman pheikhawk hrui leh Dianei pheikhawk khing lehlama pheikhawk hrui te chu an han enfiah ta a. Pheikhawk hrui pahnih te chu sin te te a tial hi a ni a. Pheikhawk hrui hmawr tawp tuamtu plastic kawr hi “aglet” an ti a. Crystina Vachon, Trace Evisence Analyst in chung aglet te chu ngun taka a han en chuan len zawng intia leh rawng pawh inang ngei an ni tih a hre thei ta a ni.

Dental record atangin ruang chu Diane Tilly ruang ngei a ni tih finfiah a ni ta bawk. A laina leh thiante chu Diane ruang chhar thu chuan a thawng tak zet n lung a chhiain an tuar tak zet a ni.

Neala motel room luah hawh chu an han enfiah leh ta a. A chhungah chuan Dianei 357 pistol an hmuchhuak a. Dianei luggage leh electronic bungrua te pawh an hmuchhuak tel bawk.

Dianei taksa atanga silai mu an phawrh chhuah chu a per chhe hneh hle a. Mahse vanneih thlak takin a bul lam chu enfiah theih turin a lo him pial a. Balistic Expert chuan silai mu chu ngun takin a han enfiah a. Lands leh grooves (File dangah kan sawifiah tawh. Sawifiah tawh lo mai ang) te chu silaimu bul lamah chuan sam takin a hmu thei a. Dianei pistol hmangin test fire a han ti a. Tichuan test fire silaimu a lands leh grooves leh a ruang atanga an lak chhuah silai mu a lands leh grooves te chu uluk takin a han khaikhin a. Silaimu a rang awm te, khem leh gooves zau zang leh thuk lam te, lands inkar hlat lam te ngun taka a khaikhin hnu chuan Test fire silaimu leh a nunna laksaktu silaimu te chu an inang chiah a ni tih a finfiah ta a ni.

Dianei ruang kha a chhe viau nangin a taksa atangin Scientist-te chuan Biological sample an la chhuak thei hlauh a. Chu sample chuan Ronnie Neala DNA Profile a mil ta chiah mai, chu chu a pawngsual ngei a ni tih finfiahna a ni. A tawp berah chuan Diane Tillyi chunga thil thlen dan rin harsa em em tur chu Pearlchuan kimchang takin a puang ta a.

Let lawk i la. Diane Tiley ruang an hmuh hnu chuan kum 33 a upa Ronnie Neal leh a fanu kum 15 a upa Pearl Cruzi te chu man an ni ta a. An pahnih chuan mi rukbo leh tualthah thubuai awrhtir an ni. Investigator-te chuan Neala khan Dianei kawt thenfai hna a thawhsak tih an hre chhuak a. Chumi tum chuan Dianei chuan a hman tawh loh pipu uaina (Swing Set) a lo pe nghe nghe a ni. Dianei leh Cruz ten Swing set la tura an kal tumin Cruzi chuan Diane i hnenah chuan a nail polish nalh a ti thu leh mawi a tih thu a hrilh a. Dianei pawh chuan a school kalna te a lo zawt ve bawk a ni.

Pearl Cruzin Investigator-te a hrilh dan chuan Dianei nen an inhmuh hmasak ber atangin a pa nen Diane chu rawk turin ruahmanna an siam nghal a. Diane chuan an neih aia tam a nei tih an hria a, ruksak an duh a ni. Kha tualthahna thlen zan November ni 22.2004 khan ruah a sur chep chep a. Dianei chuan New York lama Thanks Giving Holiday hmang turin thawmhnaw vel a khung mek a. Pearli chuan Dianei kawngkhar chu a kik a. Nu fel leh hawihhawm tak Dianei chuan kawngka a lo hawn sak a. Dianei hian Pearli hi hnathawk tura a pa a lo ruaina atangin a hria a. Pearl chuan hla vak lova an truck a chhiat thu chhuanlamin phone hmansak a dil a. Diane i chuan a chungah eng thil nge thleng dawn tih hre hauh lovin chutia mi manganin phone hman a rawn dil ta chu lo remtiin inchhungah a luhtir ve mai a.

Inchhung an luh rual chuan Pearl chuan silai chu phawrhchhuakin Dianei chu a tin ta. Thu turin thu a han pe a. Tichuan a pa luhna turin in sir lam kawngkhar chu a hawn sak a. Neala pawh inchhungah chuan a rawn lut ve ta. Neala chuan Dianei Tennis khelhna pheikhawk pakhat a pheikhawk hrui chu phelhin Dianei hnung khirh nan a hmang ta a. Tichuan a silai leh ATM Card chu a ruksak a. Choka chhuara Chivas Regal lain Scotch zu chu a han khiat khawlh a. Um mawng lamah chuan a finger print them a hnutchhiah ta a ni. Tichuan ATM PIN number sawi turin Dianei chu a ti a. Dianei chuan hreh tak chungin a ATM PIN number chu a hrilh ta a. Pearlin Dianei chu a lo ven hlanin Neala chuan Diane Account atanga pawisa lachhuak turin a kal chhuak a. ATM ah chuan PIN number chu a han chhu lut a. Mahse PIN Number chu a dik tlat lo. Vawi 3 lai a tihnawn hnu pawhin a pawisa chu a lachhuak thei talo. Tah chuan Dianein PIN number dik lo a hrilh a ni tih a hrechhuak ta a. In lamah chuan let lehin PIN Number dik tak a hrilh loh chuan Dianei zawhte chu thahsak ah a vau ta a ni. A hrilh lawk duh loh avang chuan Niela chuan Dianei tihthaih nan Sofa lam hawiin silai chu a hmetpuak a. Dianei chuan PIN Number dik tak chu pein zawhte chu tihnat lovin a awm phah ta a ni. Neala chuan ATM Reject Receipt chu dawhkanah a hnutchhiah a. Diane carah chuan a bungraw ruksak te a hlang lut a. Chumi hnu chuan a pawngsual zui ta nghal a. Tichuan an pathum chuan Diane carin an inkhalh chhuak ta a ni. ATM dang an hmu a. Pawisa lachhuak turin an ding a. Pearli chu pawisa lachhuak turin a va kal a. Hemi tum hi chuan Pearli chuan Diane Account atangin $ 400 a lachhuak thei ta a ni. Chuta tang chuan Dianei chu hmun finrial lam an panpui leh ta a. Hmun fianrial an thlen chuan car tidingin Diane chu pawnah an hruai chhuak a. Neal a chuan a han thingthit tir a. Zahngaihna neih hauh lovin Deani chu a kap hlum ta. Dianei thu hnuhnung chu ngaihdamna thu a ni.

Cell phone record atanga a lan danin Neala chu Dianei ruang bulah dingin Pearli nu Elisa Stanleyi chu a bia a. Tunhnai lawkah pawisa a neih thu sawiin an vaia shopping a kal a rawt a. A hnuin Neala chuan Dianei car chu nam liamin a hal zui ta nghal a, Forensic Evidence zawng zawng nuibo vek turah a in ngai a. Mahse evidence tam tham zet an lo la hnutchhiah reng a ni.

Kum 2006 April khan Ronnie Neala thubuai chu ngaihtuah niin Capital Murder ah thiam loh chantir a ni ta. May 4. 2006 khan tur hmanga chiu hlum tura hremna pek a ni. A inpuan avang leh kum tling lo a nih vangin Pearli nunna erawh zuah sakin a awm a. Kum 30 lung in tang tura hremna pek a ni. A tawpah chuan Pearl Cruzi inpuanna vangin Diane thihna chu chhui chhuahin a lo awm ta a. Mahse, Investigatorte chuan Pearl Cruz inpuanna kha awm lo pawh nise an convict theih ngei ang tih an sawi a ni.

San Antonio Express News in he pawikhawihna chungchang a tarlanna ah Reporter Karisa King chuan Ronnie Neala chanchin tuihnai lo zet mai ziah tel a nei a. A sawi dan chuan Diane Tilly thah a nih lai khan Pearli khan a pa Ronnie Neala fa a pai mek a. Tin achangin pawisa hmuh nan a fanu chu mipa upa lam deuh te hnenah a inzawrhtir thin bawk. Zu leh cocaine a pe lui thin a. Pawisa hmuh nan a fanu chu a hmang thin a ni. Article pakhata Elisa Stanleyi chungchang inziah dan chuan mi hran hran lakah fa a neih thluah a. Tin, Pearli kha thlahpawlh a ni bawk.

Tur hmanga chiu hlum a nih loh nan Neala chu a a der a. Mahse, a hlawh tling lem lo. Neala tanpui, a cell-mate in a sawi dan chuan Neala khan inthah a tum thu sawiin kar khat chhung zet a ruahman a. Sunday ah tang vengtu an tlem lai taka inthah a tum a ni. Mahse heihi chu a thianpa a bum nan maia sawi niin a lang. Achhan chu a hma ni Saturday ah a intihlum a ni. A bungrua te pawh a lo thun fel thlap a, a mimal bungrua pawh a sem ral vek a ni. Neala chuan nachhawkna an pek chu ei lovin a lo khawl char char a. Tichuan chung damdawi a khawl te chu vawi khat eiah hmangin kum 2010 khan Ronnie Neal a chu jail chhungah Overdosein a intihlum ta a ni.

×××××××××

Author : Bruce Kibby

Aside | Posted on by | Tagged , , | Leave a comment

NAUPANG LUNG ZAI NGAI MI 15 TE MANIPAL HOSPITAL BANGALORE LAMAH TIRH LIAM AN NI

23rd October, 2017 khan National Health Mission (NHM), Mizoram hnuaia programme pakhat Rashtriya Bal Swasthya Karyakram (RBSK) chuan, natna khirh zual zai ngai, natna 13, a puih theihte zinga pakhat, Lung Natna nei, naupang 15 te chu Manipal Hospital Bangalore-ah a tir.

NHM Mizoram leh Manipal Hospital, Bangalore hian August ni 28, 2017 khan Congenital Heart Disease enkawl dan tur chungchangah inremna an lo ziak fel tawh a. Inremna an lo ziahfel tawh angin October ni 5, 2017 khan Dr. Lalchand H Bandagi, Cardiac Surgeon leh a team te lo kalin Congenital Heart Disease Screening Camp, an rawn buatsaih a. He programme hi Health Minister Pu Lalthanzara chuan hawngin naupang 167, piang hlim atanga kum 18 inkarte an inentir hlawm. Chung zinga naupang 49 te chuan Congenital Heart Disease an nei tih hriatchian sak an ni a. Heng naupang 49 zinga 15 te hi zai ngai an ni a, a bak 34 te hi la nghak hret thei an ni bawk a, a tul dan azirin an ni pawh hi inenkawl thei tura la support zel tur an ni.

Naupang 15 heart surgery ti tura tirh chhuah tak te hi phai lama in enkawl tura refer tawh, sum lam harsatna avanga kal theilo te an ni hlawm.

Manipal Hospital Bangalore hian heng naupang zaina leh enkawlna senso hi NHM Mizoram hnenah an bill anga, damlo te hnen atangain engmah an la dawn lo a ni.

Heng lung zai ngai naupang inenkawlna tur senso, kalna leh thlen man te hi, NHM, Mizoram chuan RBSK kaltlangin a tum sak vek dawn a ni. Naupang kum 7 hnuailam tan attendant 2 leh kum 7 chunglam tan attendant 1 te kalkawng senso leh thlenna a tum sak tel bawk ang.

Damlo kal turte hi chawhnu dar 1 khan Millenium Centre kawt atangin a rualin an chhuak hlawm a. Thil tul leh pawimawh inhrilhfiahna hun hi, Dr.Lalthlengliani, SPO (RBSK) hova neih a ni.

Aside | Posted on by | Tagged , , | Leave a comment

NAUPANG LUNG ZAI NGAI MI 15 TE MANIPAL HOSPITAL BANGALORE LAMAH TIRH LIAM AN NI

23rd October, 2017 khan National Health Mission (NHM), Mizoram hnuaia programme pakhat Rashtriya Bal Swasthya Karyakram (RBSK) chuan, natna khirh zual zai ngai, natna 13, a puih theihte zinga pakhat, Lung Natna nei, naupang 15 te chu Manipal Hospital Bangalore-ah a tir.

NHM Mizoram leh Manipal Hospital, Bangalore hian August ni 28, 2017 khan Congenital Heart Disease enkawl dan tur chungchangah inremna an lo ziak fel tawh a. Inremna an lo ziahfel tawh angin October ni 5, 2017 khan Dr. Lalchand H Bandagi, Cardiac Surgeon leh a team te lo kalin Congenital Heart Disease Screening Camp, an rawn buatsaih a. He programme hi Health Minister Pu Lalthanzara chuan hawngin naupang 167, piang hlim atanga kum 18 inkarte an inentir hlawm. Chung zinga naupang 49 te chuan Congenital Heart Disease an nei tih hriatchian sak an ni a. Heng naupang 49 zinga 15 te hi zai ngai an ni a, a bak 34 te hi la nghak hret thei an ni bawk a, a tul dan azirin an ni pawh hi inenkawl thei tura la support zel tur an ni.

Naupang 15 heart surgery ti tura tirh chhuah tak te hi phai lama in enkawl tura refer tawh, sum lam harsatna avanga kal theilo te an ni hlawm.

Manipal Hospital Bangalore hian heng naupang zaina leh enkawlna senso hi NHM Mizoram hnenah an bill anga, damlo te hnen atangain engmah an la dawn lo a ni.

Heng lung zai ngai naupang inenkawlna tur senso, kalna leh thlen man te hi, NHM, Mizoram chuan RBSK kaltlangin a tum sak vek dawn a ni. Naupang kum 7 hnuailam tan attendant 2 leh kum 7 chunglam tan attendant 1 te kalkawng senso leh thlenna a tum sak tel bawk ang.

Damlo kal turte hi chawhnu dar 1 khan Millenium Centre kawt atangin a rualin an chhuak hlawm a. Thil tul leh pawimawh inhrilhfiahna hun hi, Dr.Lalthlengliani, SPO (RBSK) hova neih a ni.

Aside | Posted on by | Tagged , , | Leave a comment