DR ARUN T., IAS HI…

Tunlaia Mizoram titi luahtu tam pawl tak, Kolasib Bawrhsap hlui, Lawngtlaia sawn phei, Lawngtlai atanga a chhuah chhan sawidan inmil hleithei lo, tunah Kasib DC tura dah leh tak. Dr. Arun T., IAS, Mizoram sorkar in a khai kual dan em em hi chu a nilo ve deuh mah mah a, state sorkar tan mualphona lian tak a ni a tih theih awm e.

Ka hriatsual loh chuan Dr. Arun T, IAS hi a posting chungchangah a tluanglo hle a, a hmasa berin Hnahthial SDO(C) atangin Kolasib SDC ni turin DC Office, Kolasib-ah sawn a ni a. Hetah hian Hnahthial mipuite chuan an ui viau a ni awm e. Hemi hnu lawkah hian Kawnpui SDO(C) turin an sawn leh a, chumi hnu reilote-ah Vairengte SDO(C) turin sawna ni leh a, hemi hnu hian Kolasib Bawrhsap (DC) atan dah a ni a. Kolasib a a awm chhung hian mipui mimir fak leh ngainat a hlawh hle a mahse Kolasib atang hian Lawngtlai DC ni turin Mizoram state sorkar chuan a sawn leh a. Kolasib atanga an sawn chhan hi sawi neuh neuh a awm a ni awm e.

Lawngtlai DC a nih chhung reiloteah hian a hma a DC lo ni tawh te tih ngailoh leh tih hleihtheih loh a ti nual ni a sawi a ni a, CADC sorkar sum hmandan diklo te pawh a chhuichhuak a.

Mahse rei pawh a awm hma in mak deuh maiin amah pawh a awmloh lai, official duty a Punduchery a a kal hlanin WhatsApp hmangin, “Special Secretary to the Govt. of Mizoram” post phuahchawp, a hna tur pawh awm lo ah sawn a ni leh ta mai a. Lawngtlai mipuiten an ui em em a, Lawngtlaidistrict NGO co-ordination committee in picketing te neiin Lawngtlaia dahlet leh an ngen ngawih ngawih laiin Mizoram CM, Lal Thanhawla chuan CADC election neih tur chhuanlamin, CADC election neih zawh hma chuan Lawngtlaia sawn emaw theih anih rih loh thu lehkha in a rawn hrilh a, co-ordination committee te’na CADC inthlan tibuai lova, inthlan zawh a hma lak zui an tum mek laiin Kolasib DC atan dah a ni ta daih mai!

Heti ang em em a IAS val, a awmna hmun apianga mipui fak leh ngainat hlawh kan state sorkar in a thehphar kual vel hi chu state sorkar tan pawh a zahthlakin state sorkar mualphona te pawh niin a lang a, a zia lo lam deuh chu a ni.

<

p style=”text-align:right;”>Author: Kiddy Vanchhawngᅠ

Advertisements
Aside | Posted on by | Leave a comment

PA TAL HAH THUKHAWCHANG PART – II

KAN NU CHANCHIN –
ᅠ Nu hmeltha tak a ni ve thin. A hmel en mai chuan a sensuah a, dam lai reng a awm lo thung. Ka Nerve, ka pum a tih loh leh a hmai a buaipui em em a, na sawi hi thiamsa sawi ang maiin a nal tawh. Thuamhnaw țhui dan tur hi a hisap ber a ni a, kan fanu te pawh hi a hetih vanga thil nalh leh to hre em em an ni. Awh nachang an hriat hma atanga lo tih hmuh tawh tu a ni ka ti ve tlat.

Heti chung hian thuamhnaw hak tur ka neilo an ti reng a, an Wardrobe han hawng ila a intlar dul mai bawk si. Ka hriatthiam zawng a ni ve lo. Christmas, Kumthar, MHIP Day etc ah chuan kawrthar neih ngei a ngai thin. A hautak em emna chu Kawr a lei hian a milpui tur puan a ngai zel hi a ni. Kan fanute pawh chuti chiah chu. Usher dawnin, Bial Inkhawmpui, ram pum huap, inneihna etc ah a milpui tur zawng zawng nen an han lamkim hi chuan kan sum hi a kaw dawk dawk a ni ringawt.

Inleng an awm chuan țawngkam nem leh dam duai mai a ni a, a lawmloh zawng a nih erawh chuan a sawi hlawk kim thei khawp mai. Sawi ngai a sawi peih lutuk hi a bulah an awm tha peih lo. Kohhranah pawh hian a mawi chinah chuan theihtawp hi a chhuah ve a, mahni ngei penchhuak tur erawh chuan hrisello a intihna bawk hi chhuanlamin a sawi thiam hlaih hlaih thin hle.

KA FA TE –
ᅠ Pawnlamah ka Officer nihna chu an chapo puiin an inchhuan pui teh lul nen in chhungah erawh min han hlauh loh zia mai chuh !! A chang chuan an tha duam a, thla te min laksakin min lak pui bawk a, Fb tih vela dah luh tur an tia, a chang leh min tawng khum fek fek a, an duh chuan án hla leh tawngkam pawh hi an lo thiam khawp mai. An chawmhlawm zawk ang maiin kan ți duk mai thin.

TV ena țhutthlenga an mut mai mai hian ngaih a tha ber tawh. An chhuah dawnin kan buai a, kan ri hlut a, an leng haw in chuti bawk. Heng thil pathum hi tha taka ka tihsak reng lohchuan an tan Pa sual tak ka ni; Incheina, lirthei leh Pocket Money te hi.

PAWN LAM LEH CHHUNGLAM –
ᅠ Pawnlam atang chuan Sorkar Officer invawng tak leh Kohhran Upa min chhungkua, sum lama harsa teh chiam lo. Fate pawh an hmel en mai chuan changkan hmel ve tak kan ni. Kan in pawh a nuam ve khat. Mi chuan changkang leh nawm hmelin min hmu. Inrinni zing bazar ah te chuan an nufa in an bazar a, sa leh thlaihnah an khai haw țun țun a, Cake/chhang Sipisial tak tak an lei bawk thin. Thlir zui vawng vawng tur hi chu an ni ve. Kan choka, Sitting Room leh Bed Room te chu a fel thlup mai.

Chhung lamah erawh chuan inpawhna kan nei lova, tumah inhlau leh inzah bik kan awm lova, hauh dawn hlek chuan NANGPAWH KHA kan in ti nghal țhaw zel. Chawhmeh leh eitur tuihnai te chu kan ei ho ngai mang lova, mahni tetein kan ei a, a siam tui dan aiin a siam sa sawisel kan thiam tlang zawk bawk. Ka chhungte lakah hi chuan rawngbawltu, Upa ka nih ve te hian awmzia a nei lova, engahmah min ngaihsak lo tih hi ka hmu chiang a ni. An piangthar lo tih hi ka hmu chiang khawp a, chutiang chiah chuan min lo hmu chiang ve reng pawh a ni mahna!!

MIKHUAL NEIH –
ᅠ Hrehawm tak a ni. Ip zawr zawrna tur a tam khawp mai. Tumah zahpah an nei silo, chhungte/mikhual han um e velte hi an peih lo mai a ni lova an hmuh leh hriat laia án hmuar hmuar an hreh lo te hlei hlei hi a ni hrehawm ni. Mikhualte han thutpui a han kawm tlangnel pawh hi ka duh viau a, ka thut rei chuan an hmuh lai hian min rawn cha chhuahin kan mualpho ang tih ka hlau a, ka in thiarfihlim leh thuai thin.

Mikhual neih loh vangin ka thawven phah lo a, mikhual neih erawh chuan phur hi a rit leh zual thung.

Duhtawk leh phawt ang…

Author: David Sailo

PA TAL HAH THUKHAWCHANG PART – I chhiar rawh

Aside | Posted on by | Tagged , | 1 Comment

PA TAL HAH THUKHAWCHANG PART – I

Ka țhat lai hun zawngin State pawnah lehkha ka zir a, Sakhuana ka ngaihsak lem lo. Sorkar hna ka thawh hnu ah pa pangngai tak chuan Kohhran an bel fur sia. Ka inkhawm ve țan a, kar lovah Upa ka ni zui ta.

Piantharna tak tak ka nei lova, Kohhrana ka tel chhoh dan nen sawi chhuah a rem tawh hlek lo. A chang chuan phurrit a ni lek lek mai. Mi tih dan en tawn chuan ka kal ve thei zel a, kumtam a vei meuh chuan Upa râwn tlak tak, tuihnang lem lo, duhfîr tak ka ni chho ta a ni. Rorel nikhua pawhin ka thu leh hla an ngaichang țhup țhin tih ka hria, nuam ka tia ka neitu viau bawk.

Ka fate tet lai chuan an len bo hian kan nupa hian kan hah a dam huai țhin a, chuti chuan tunah zawng kan thaw ta awp awp mai. Kan nupa chuan khum laizawl te hi Pathian thu leh chhungkaw kalphung sawina hunah kan hmang lova mi aia kan țhatna, keini aia an nepna sawiin mi relna hmun leh thiamchanna hmun berah kan hmang thin. Kan rawngbawlpuite tunlai lohna leh duhkhawp lohna inchhungah kan sawi zing a, chu chuan kan fate Biak in kawng zawh tur a hnar tan ta a nih hi.

A lian hmasa apiang buaipui an ngai a, kan chhungkaw sum dinhmun kan ti langtlang ngai lova, fate rawn leh hrilhhre lem lo in kan nupa thutlukna in thil lian tham kan lei fo a, tichuan pawisa kan neih loh laiin faten min awih sak tawh lova, thinrim bak lengin kan in leiba țhin chho ta a ni. Ka tel lova Kohhran Committee koh hmasak ber chuan hrehawm ka ti khawp mai. Ka fapa in sawn a thlak miau a, a nei duh bawk si lo. Biak in ah thununna min han puan khum ulh ulh mai chuh!! Mi chhungkua ni zawk se aww ka ti vawng vawng. Mi pangngai in ni tihna a nih kha mi tam takin an tawng a lawm an tih chu inhnemna thlum leh ngaihthlak nuam ber a ni.

Thawhțanni chuan chhun darkhatah mitthi ral turin Office ka chhuahsan a, thawhlehni chuan chutiangin man einaah, nilaini chuan damlo kanin, Ningani ah thenawmte lungphun, Zirtawpni ah Pastor Programme ah. Office hun chu ka eiru kartin ringawt mai a, ka țhut ve chhun lahin Phone hman leh Newspaper chhiar vel a ni mai. Dik tak chuan ka hlawh en chuan ka thawh hlawk lo chiang a lawm.

Zan lamah chuan Inkhawm loh zanin Committee a lo awm a, eng eng Adviser ah emaw min lo ruat a, zahawmna ni a ka hriat avangin ka pha phal bik si lo. Zan awl ka nei mang lo. Chuta karah ka Sermon hun lo herchhuak ve sek bawk. Sawi tur hi ka dawng lo hrim hrim. Missionary emaw mikhual tuihnang deuh hun pek tur an awm hlauh chuan ka thaw huai thin.

Ka fanu a rai leh ta!!
Amah aiin ka zak zawk a, nupui/pasal nei fumfe mang lo hian tinge hetiang hian kan awm nuai mai ni. A hahthlak chiang a nia. Ka tuang ka ti chhah lui a, ka zak vak duh tawh lo. A dang pawh a la thleng leh mai thei!! Mi piangthar nun tlawm raih mai ka hmuh hian ka awt ngawih ngawih a, Thlarau lam thil hi ka man tak tak lo. Ka nun hi a lái tlat a ni.

Kan Pension hun a hnai ve ta, ka fate lah chu in nghahna tlak pakhatmah an awm lo. Sum dawnna lama kal tur pawhin rin ngam turin kan lo enkawl reng reng lo. Kan Car te chu a țul ah pawh ka hawlchhuak chang mang lova, Woofer thum dup dup in ka fapa in țul mang lovah a hawlchhuak nitin zantin ringawt mai. Keini nupa aiin a țhiante an chuang zing zawk ta ve ang. Taxi ka phar lauh lauh chang a tam a sin. Ka nupui lah Pathian thu duh tak si, phun leh ang reng mai a ni a, sawisel tur a hre reng emaw tih mai tura fakawm a ni.

Ka nun a nuam lova, kan chhungkua a nuam hlawl lo. Ka țawngțaite hi a hul hak mai a, a ringlo hmasa bertu chu keimah ngei hi ka ni. Kan inchhungah mi sàwn te chu kan chhawnchhaih a, reilote chhung ka hlim ve na ber a ni. A pa an sawi chhuah erawh chuan ka thinlung hi a na leh vawng vawng si !! Rei deuh daih tal han hlim ve veng vengna tur ka zawng ruai thin.

Ka la hrilh zel mai thei che u…

Author : David Sailoᅠ

PA TAL HAH THUKHAWCHANG PART – II
chhiar rawh

Aside | Posted on by | Tagged , , , | 1 Comment

CADC inthlan neih tan a ni

Chakma Autonomous District Council (CADC) inthlanpui atan tukin dar 7 atang khan vote thlak tan a ni a, tlai dar 5 thleng vote an thlak ang.

CADC huam chhunga awm vote nei te’n kim taka vote an thlak theih nan Mizoram Governor chuan CADC Area-ah sorkar chawlh a puang a, Inthlanna muanawm tak a awm theih nan venhimna lam pawh khauh taka kalpui a ni.

Inthlanna atan hian EVM hman a ni a, vote tlate hi karleh Thawhlehni khian Chawngteah chhiar a ni ang. CADC-ah hian MDC bial 20 a awm a, vote nei hmeichhia 15,087 leh mipa 15,478; an vaiin mi 30,565 an awm a, Polling Station 66 siam a ni.

MDC bial 20-ah hian Congress leh MNF-in bial 20, BJP-in bial 19-ah candidate an dah a, Independent candidate 7 an awm a, a vaiin candidate 56 an awm a, Kamalanagar West-a INC Candidate, Raja Lakhi Chakma chu hmeichhe candidate awmchhun a ni. Mondirasora bialah candidate an tam ber a, candidate 6 an awm a, an zinga 3 chu Independent candidate an ni. MDC bial 20-ah hian candidate paruk awmna bial 1 leh pali awmna bial pali a awm a. Bial 14 chu INC, BJP leh MNF ten kilthum aṭangin an inchuh dawn a ni.

CADC-ah hian inthlan hnuhnung berah khan Congress chuan bial 20-ah bial 17 changin, MNF-in bial 2 an chang a, BJP-in bial khat an chang ve bawk a. Congress sorkar engemawchen a kal hnuah BJP Member leh MNF Member pakhatin Congress an zawm a, Nominated Member pali nen MDC 24-ah Congress-in MDC 23 neiin, MNF-in MDC pakhat an nei mek a ni.

Hetihlai hian tun tum inthlana Futuli biala Congress candidate, Kali Kumar Tongchongya, chuhtu awm lova tlinga Returning Officer-in a puan tawh chu a nomination RO-in a hnawlsak MNF candidate Sumir Tongchongya-a’n Gauhati High Court-a a khin avangin tlinga puan a nihna ‘Certificate of Election’ chu High Court-in a ‘stay’ rih a ni.

Source: (PTC Lawngtlai)

Aside | Posted on by | Tagged , , | Leave a comment

AIZAWL KHAWPUI CHHUNG HMUN HLAUHAWM LAIA INSAK LEH PHALNA LOVA INSAK CHUNGCHANG CYMA STUDY GROUP MEMBER TEN AMC SAWIPUI

Aizawl khawpui chhung hmun hlauhawm, midang tana hlauhawm a In sak phalna pek chungchang ah chawhma dar 10 khan Central YMA Study Group member ten AMC Commissioner an kawm.

Inkawmhonaah hian Aizawla In sakna hmun atana hlauhawmnia ngaih, hmun rem lo laia Insak phalna pek tawh leh an la pek lohte chu pek an nih tawh loh nan leh an pek chhuah tawh pawh a tul anga ennawn a nih leh theih nan hmalak ni se an ti a.

Chaltlang kham chho, Durtlang kham, Bawngkawn to Edenthar Veng kham pang leh kawngsir, Kulikawn Ngaizel pheia mimal In sak phalna pek chhuah a nih dan te pawh sawi a ni.

AMC Commissioner Dr. Lalthlangliana chuan kum 2013-a Aizawl Master Plan-a Heritage site-a lo puan tawh Chaltlang kham leh Durtlang khamah te chuan In sak phal a nih loh thu leh AMC-in In sak phalna a pek chhuah loh thu a sawi a. Sa luilo turin mipuite an ngen bakah, hriattirna (Signboard) pawh heng hmunah hian tar a nih thu a sawi.

Aizawla hmun hlauhawm laiahte chuan AMC-in In sak phalna a pe ngai lo tih sawiin AMC Commissioner chuan Geology and Mineral Resources Deptt. in an endik hnua recommend an siam dan behchhana In sak phalna Licence hi pek chhuah thin a nih thu a sawi. Geologist ten phalna an pek loh chuan AMC-in a pek ngai bik loh thu te meeting-ah hian sawi chhuaha ni. Central YMA Study team te chuan he thil hi Geology and Mineral Resources Deptt. lam sawipui leh an tum a, Aizawl khawpui chu awmze neia a kal theih nan tanrual a tul thu Central YMA Study Group member te chuan an sawi.

He inkawmhonaah hian Bawngkawn Brigade rama phalna neilova In sa te chungchang, Govt. Complex-a sorkar rama In sak chungchangte sawi a ni a, a tul anga enzui zel an tum thu Central YMA Study Group member te chuan an sawi bawk.

AMC Commisioner an kawmnaah hian Study group member Pu David Lalnunkima, Pu Vanlalruata leh Pu RB Tawna te an tel a ni.

Aside | Posted on by | Tagged , , , | Leave a comment

ACBOA inkhawmpui neih a ni

City Bus service theih hun chhung.
Aizawla city bus awm zat.

Nimin khan Transport Minister Pu John Rotluangliana chuan Aizawl City Bus Owners’ Association (ACBOA) khawmpui lian vawi 45-na chu Kulikawn YMA Hall-ah a hman pui a, City Bus neitute chu Bus fare chungchangah mipui sum dinhmun ngaichang phawt tur leh tihdanglam tum rih lo turin a ngen a ni.

Transport Minister Pu John Rotluangliana chuan sawrkarin City Bus kum 10 tlan tawhte thlak tura thupek sawrkarin a chhuah chu Bus neitute thurawn anga siam a ni a; an duh leh tak loh avangin an thurawn ang bawkin kum 15-ah pawhsei a ni tih a sawi a. Khawpui chhunga tlan City Bus te chu Fitness-ah MVI ten la tlan thei tura tha tawk an tih phawt chuan kum 15 tlan tawh pawh an tlan chhunzawm sawrkar chuan a remti a, MVI Fitness test erawh paltlang a ngai dawn a ni a ti.

Transport Minister chuan ACBOA ngenna – Mandatory Replacement of Vehicle/Bus chu kum 15 atanga kum 20 a pawhsei ni rawh se tih chungchang chu Chief Minister a rawntawh thu a sawi a. Mizoram sawrkar chuan Central Vehicle Act chu a hman tho angin Central Sawrkarin Replacement chu kum 20 ah a pawtsei a nih phawt chuan chutiang anga kal ve chu remtih a ni ang a ti a. City Bus kum 15 tlantir tawh neitute a thlakna tur sum nei si te chu lirthei mawihnai zawka Aizawl khawpui chei an mawhphurhna a ngaia an Bus hlui tawhte thlak turin a chah thung a ni.

Aizawl khawpui bikah Taxi Permit pek a ni tawh lo a. MZ09 Registration hmangin DTO (Rural) kaltlang erawh chuan Aizawl pawn lam Aizawl District chhunga tlan turin pek a ni zawk tih a tarlang.

Transport Minister chuan 2 wheeler taxi pawh a pun chak em avang leh Traffic a tih tawt belhchhah loh nan license pek theih chin siam a ni a ti a; a tam lama tiam chin 500 pek chhuah a nih tawh thu a sawi a. 2-wheeler Taxi License chu pek chhuah a ni tawh dawn loa; license neitu zinga huntiam chhunga lirthei nei hmanlote an awm a nih erawh chuan chung mite chanai erawh a dil theih chauh tawh ang a ti.

Auto Rickshaw, Aizawl khaw chhehvel a service tir pawh a pun chak em avangin license pek chhuah theih chin a thleng leh tep tawh tih sawiin khawpui chhunga lirthei tawt lutuk tih tlem nan sawrkar a khauh thu a sawi a. MV Act chu dan a nih angin thuneitute tan pawh siam danglam a nih loh chuan palzut theih a ni lo a ti.

ACBOA hi kum 1973 khan din a ni a, report a tarlan a nih dan chuan tun dinhmunah Aizawl khawpui chhungah ACBOA City Bus 262 a tlan mek a, office staff 16 an chhawr mek a ni.
(DIPR)

Aside | Posted on by | Tagged , | Leave a comment

Supreme Court in CBI judge BH Loya thihna chhui rawtna hnawl

Supreme Court chuan CBI judge BH Loya thihna mak tak nia puh chhui tur a hranpaa din tura ngenna engemawzat lut chu a hnawl.

Chief Justice Dipak Misra kaihhruai bench chuan Justice Loya thawhpui judge ten a thihna chu thihdan pangngai nia an sawi chu rinhlelh tur a awm lo niin a sawi a. Court chuan petition thehluh atanga thil lang chu Judiciary te zalenna chungchang na taka beih tumna a awm tih a sawi a. Politics-a innghirnghona siamfel turin tum neisa ranin petition thehluh thin a ni a ti bawk.

Justice Loya hi Soharbuddin inbeihna lem thubuai ngaihtuahtu a ni a, kum 2014 December 1 khan Nagpur-a inneihnaah lung thalo avangin a thi thut nia puh a ni..

Aside | Posted on by | Tagged | Leave a comment

M-R VACCINE CAMPAIGN neih a ni

Vawiin aṭang khan Mizoram chhung District hrang hrangah Sentut hri venna pek runpui thlak ṭan a ni a, Siaha-ah chuan Nilaini aṭang khan beihpui hi thlak ṭan a lo ni tawh a ni.

Aizawl-ah chuan Sentut pangngai leh Sentut hri chhuak thar hridanna pek runpui, ‘Measles-Rubella Vaccination Campaign’ (MRVC) hi Health Minister Pu Lal Thanzara’n Govt. Mizo High School Auditorium-ah a hawng a.

National Health Mission Director Dr.Lalrozama kaihhruai hawnna inkhawmah hian Health Minister chuan he MRVC Campaign-in a tum ber chu naupang thla 9 pumhlum aṭanga kum 15 hnuailam zawng zawngte Sentut hridanna pek vek a ni a; kum 2020-ah chuan Sentut umbo vek a, Rubella natna leh a kaihhnawih CRS chu khuahkhirh a, Sentut vanga nau thi leh Rubella natna vanga nau piangsual an awm tawh lo hi a ni, a ti a. Mizoramah CRS case 1 hriat chian a ni tawh a, thla hmasa lawk khan Rubella positive naupang 2 hriat a ni leh bawk a, heng lo pawh hi awm tura ngaih a ni a, chuvangin naupang rualbanlo tam tak enkawl mekte pawh hi Rubella vang a ni lovang tih a sawi theih loh, a ti a. A hmaa Measles, MR emaw MMR vaccine lo la tawhte tan pawh he campaign chhung hian lak nawn leh vek tur a ni a, naupang tan a hlauhawm loh, a ti bawk.

State Immunisation Officer Dr.Lalzawmi’n MRV Campaign chhung hian Mizoramah naupang Nuai 3 Sing 7 Sang 5-te Sentut hridanna pek tum a ni, a ti.

Lungleiah chuan MRVC hi Baptist Higher Secondary School Serkawn-ah a hawnna hun hman a ni a. Hun kaihruaitu Sr, Medical Officer Dr.Lalrinthangi’n Sentut hridanna pek tur hi Lunglei District-ah naupang 42,631 an awm thu leh a pekna tur School 397 a awm thu a sawi.

Champhaiah chuan MRVC hi Govt. Primary School I-ah DC Pu Vanlalngaihsaka’n a hawng a. Champhai District chhunga vaccine la thei tur naupang 40,511 ten he vaccine hi an lak vek theihna turin line department-te leh mipuite ṭanrual a ngai tak meuh a ni, a ti.

Mamit-ah pawh MRVC hi vawiin khan Govt M/S – I-ah District Task Force on Immunization Chairman, DC Pi Lalbiaksangi’n a hawng a. Sorkar hmalakna zara Vaccine man to tak, a thlawna Mamit District naupangte’n an dawng thei tur chu lawmawm a tih thu sawiin naupang thla 9 aṭanga kum 15 hnuai lamte chu Vaccination Campaign neih chhung hian Vaccine la vek turin a sawm a ni.

Lawngtlai District pumpuia Sentut hridanna pek beihpui thlak kalpui tur chu Don Bosco School, Lawngtlaiah Addl DC Pi Ethel Rothangpuii’n a hawng a. District Immunization Officer Dr S. Thaizi kaihhruai hawnna hunah hian Chief Medical Officer Dr Lalthlamuana chuan MRVC chu thla khat chhung Lawngtlai District-a kalpui a nih dawn thu leh vaccine pek tur naupang 42,532 chu zaa za tihlawhtling tura hma lak tum a nih thu a sawi a ni.

Serchhip District-a MRVC kalpui tur chu Chawngbuangi Memorial School-ah Addl. DC Pu Chuauhnuna’n a hawng a. District Immunization Officer Dr Lalhlunpuii’n hmalak dan tur ruahmanna tlangpui a sawi a. Hawnna hun hman zawh hian he School-a naupangte hnenah hian vaccine pe tura din team in vaccine an pe zui nghal a. Serchhip khaw chhunga School leh District chhung khaw hrang hranga zirna inah te team hrang hrangin vaccine pek hna hi an ṭan nghal a ni.
Kolasib-ah chuan MRVC hi St. Maria Goretti’s School-ah DC Pu R. Zarzosanga’n a hawng a, Scool naupangte hridanna pek nghal an ni. Campaign chhung hian School Session site 149, Outreach (Anganwadi, Sub Centre) Site 58-ah nausen thla 9 leh kum 15 inkar mi 26,666 hnenah Sentut hridanna pek tum a ni a, hei hi Kolasib District-a mihring awm zawng zawng aṭangin zaa 29.8 a ni.

Aside | Posted on by | Leave a comment

Mara Autonomous District Council hnuaia VC 91 inthlanah Congress Party in seat 55 la

Mara Autonomous District Council (MADC) sorkar hnuaia VC 91 inthlanah tluang taka vote thlak a nih hnuah vote pawh chhiar zawh a ni tawh a, polling party 4 erawh chuan Siaha DC office an la thleng lo.
Siahaa kan Corr. thudawn dan chuan MADC VC inthlanah hian INC in VC 55 an la a, MNF-in VC 17 leh BJP-in VC 6 an la a, sorkar siam thei awm loa inhnehtawkna VC 13 a awm bawk. Amaherawhchu result hi Offial-a puan a la ni lo a, zanin hi chuan a puan theih beisei a ni.

Tun ṭum VC inthlanah hian a pumpuiah vote zaa 77.44 a tla a, vote tlak ṭhatna ber polling booth chu Miepu nia hriat a ni a, zaa 93.81 a tla a, a tlak tlemna ber Phura North-ah zaa 62.60 a tla a ni.

Siaha-a kan Corr. chuan inthlanna hi thianghlim leh felfai taka neih a nih thu leh buaina chhuak engmah a awm loh thu a sawi a ni.

Aside | Posted on by | Leave a comment

Central YMA zaipawl hmasa ber lakluh a ni.

Sawiselna tam tak karah pawh YMA chu ram leh hnam tan a kal zel dawn a, Pen khat pawhin a hnung tawlh dawn lo a ni, Central YMA Vice President Pu R.Lalngheta chuan a ti.

April 13, Ningani zan dar 7:30 khan Central YMA hall Tuikhuahtlang ah Sound and music sub.-commtt hmalakna in kum 2018-2019- chhunga Central YMA Zaipawl member lakluhna hun hman ani a, Central YMA Vice President chuan zaipawl member te lakluhna hi a hmanpui.

Pu R.Lalngheta chuan kum 1992 bawr vel khan Veng pakhat zaipawl chu, Central YMA hmingin an zai thin a, anni hnu a, tuna member tharte chu zaipawl member leh hmasa ber an nih thu a sawi a. Mizoram aiawhin YMA hminga hmun hrang hrang Mizo nunze mawi zaia chawinung tura ruahman an nih thu leh a tul chuan Mizo hnam lam chi hrang hrang pawh entir nghal thei turin hnam lam chi hrang hrang pawh thiam tura tih a nih thu a sawi.

“Sawiselna tam tak karah kan ram leh hnamin a mamawh miau avangin C.YMA chuan ruihhlo do hna hi a thawk chhunzawm zel dawn a. Social Media lamah na tak taka YMA sawichhe duhtawk an awm. Heng mite hi Thlan pawh lai ngai lo, khawhar in a tlaivar ngai lo leh hnatlang ngai lo, YMA hminga pen chhuak ngai lo te an ni. Ruihhlo in a tih buai mek te chhanchhuak tura zan khat pawh duty a, la chhuak lo ten na tak takin YMA hi beiin sawi chhe thin mah se, heng mite sawiselna chhanga social media insawifiahna siama beih zui hi Central YMA hruaituten chuan tul an ti lo a ni” a ti bawk.

CYMA vice president in Zaipawl member thar a hlan te hi an vaiin mi 17 an ni a, member tharte hi CEC member ten duhsakna chibai an buk.

Zaipawl member te hi khawpui chhung branch hrang hrang atanga ruat niin conductor leh director te nen an vaiin mi 18 an ni a, Central YMA hnuaia Sound and Music Sub.Commtt chairman Pu R.Lalduhawma chu zaipawl Director a ni.

Zaipawl lawmluh inkhawm hi Pu R.Lalduhawma’n a kaihruai a, Pu Lalmalsawma Ralte – hnen atangin report ngaihthlak a ni.

Aside | Posted on by | Leave a comment