ZAMPUIMANGA HMUN A THIL THLENG

ZAMPUIMANGA HMUN A THIL THLENG
– HC Vanlalruata, PTI

Tun hnaia Aizawl khawpui fêm, Zampuimanga hmuna thil thleng tenawm tak ni-âwm a an sawi chungchang kha ziah duhna-in a turin min tur ut ut mahsela inthlan boruakin min nang a, inthlan boruakin a chhilh nasat em avangin a nghawng a na dawn lovin a lang a. Kan rin ang ngeiin Mizorama thleng ngai a kan hriat loh a ni chungin inthlan boruakin a chhilh hneh hle a nih kha. Tunah chuan vote thlak a zova, mipui mimirin a chak tur, sorkar tur leh party tin MLA tling zat tur inrinsiak bak tihtur kan neih loh lai tak hian i han thailang teh ang.

He thubuai hi thubuai danglam tak, a tuartu pawh mipa puitling a ni na a dimdawih ngai zet a ni a. Hmeichhia emaw mipa emaw kum tling lo khawih chingpen ang chi nen a inang chiah lo chunga tehkhin theih a ni a. A tuartu pawh khawtlangin khawngaiha lainat chunga an thinhrik theih a nih avangin he thil hi fimkhur taka sawi chhuah a ngai tlat. Chu chu pawikhawihtu a puhte an mi len leh an chhungkaw hlun vang a ni lova, thil thleng chungchang chai zui danah dimdawih leh fimkhur ngai a ni.

Hei hi thil awmdan a nih avangin hemi chungchanga Aizawl Police Station a first information report (FIR) thehluttu thuziah dik leh dik loh (merit of the case) lam luhchilh kan tum hranpa lova. Pawikhawihtu a puh lamin hekna an thehlut let ve (counter FIR) chungchang pawh sawi thui a ngai lem lo. FIR a thuziah hi a lo dik hlauh a nih chuan Mizorama thilthleng rapthlak leh tenawm ber zing ami a ni pha ngei ang. Chuvang ni maw social media hmanga inkokhawm mi tam takin tum lawk pawh awm lova Aizawl khawpuia kawng an zawh tak kha ni!

A dik lo ber zawk chu hei hi a ni – He thilthleng hi FIR aţanga a lan dan chuan September ni 8 zinglam (zing dar 3 hnulam) a thleng a nih hmel a. Police Station a FIR an thehluh hi September ni 10 a ni. Police-te hian a tuk September ni 11 khan FIR hi bawhzuiin a thehluttu leh pawikhawihtu a puh hi thu an zawt fiah ve ve a. A tuk leh, September ni 12-ah chuan he thil thlenna hmun ni a an sawi chu a hmunah Police te hian an zu tlawh ngei chu a ni awm e. Mahse, an reh ta vang vang a, a tuartu lam chuan an tuar zo ta ngang lova. Hei hi a chhan ni a lang chu Police hotute hian an FIR thehluh hi bawhzuiin lang mahse, thubuai an ziaklut ta tlat lova. Ziahluh a hnekin insiamrem (compromise) tǔrin an nawr ta ngar ngar zawk niin a tuartute chhung hnai tak pakhat chuan a sawi.

Hetiang hi thil awmdan a nih tak avangin an dikna leh chanvo hmu dawn lova inngaiin a tuartu lam hian September ni 27-ah Aizawl district SP an hmu ta ringawt mai a. SP chuan Police Station lam hi bia-in tihtur a hrilh ni ngei tur a ni a, A tuk, September ni 28-ah chuan Aizawl Police Station-ah thubuai ziahluh a ni ta hram a. Heta an thubuai ziahluh hi Aizawl PS Case no. 202/2018 dt. 28.9.2018 u/s 341/342/323/506 Indian Penal Code (IPC) a ni. Hetia thubuai ziah luh a nih hnu pawh hian Police lam hian an bawhzui ţha lo niin an hria a, an bawhzui dan hi October ni 15 khan Right to Information Act hmangin an zawt leh ta a ni. Dikna an zawnna kawng hian ngaihtuah a tithui hle mai.

Hman kuma Kawnpui khaw tlangval chanchin kha tehkhin loh a harsa khawp mai. Kha tlangval kha zawngţah khai khat (Rs 50/- man hu) ru a puhin Police in an man a. Bail lohvin thla hnih vel lunginah a tâng tawh tihin judge pakhatin lungin a tlawhnaah a dinhmun a zuk hria a, a tân tawh chu hremna a ngaiin a chhuah zalen ta a ni. Zawngţah kawm li/nga lek ru a puh a nih avanga man a ni nghal a, a thil tihsual (lo ru tak tak pawh ni ta se) leh lungin a hrem a nihna hi a inphu hlawl lo.

Kha tlangval chanchin kan hriatna chhan pawh kha lungin aţanga a chhuak kha (March ni 1 a ni a) an inah a haw a, a chhungte an lo awm lova. Amaha zana an ina a riak chu an in a kan’ avangin a kanghlum a. A kan hlum avanga tlang hriat lo hlawh ta a ni.

Mahni mihringpui ngei chunga hleilenna rapthlak leh zahthlak tawpkhawk a thlen ni a puh an nih tawh hnu a man chu sawi loh thubuai pawh ziaklut duh lova insiamrem a, inrem tura lo titu Police hi dân kengkawhtu leh dân humhalhtu (custodian of law) a ngaih theih an ni lo.

He thubuai an chhui dan kan sawi hma-in an FIR thehluh lo ǔksak ţha lova, thubuai an ziaklut ta mai lo leh insiamrem a, inremna zawng tura an lo ngen kha Police tih loh tawp tur a ni. Inrem leh insiamrem tir awm chi hi chu a awm, lirthei intai leh thil ţhenkhatah chuan thubuaia la lova chinfel a inremsiam hi awm thei a ni.

Dan bawhchhiatna (crime) a nih chin tawhah chuan dan chuan a kawng a zawh mai tur a ni a, chumi a thil kalpui chu Police mawhphurhna a ni.

Hemi thilah ngat phei hi chuan FIR thehluttu hian pistol hmanga vau a nih thu leh tiang hmanga vuak a nih thute a sawi bakah ruang thunna ip hmuhtir a, chumi chhunga a ruang dah a nih tur thu an vaunate a ziak a.
He’ng thilte hi Police hian an man (seize) lo niin an sawi a, an ngaihven lo hle niin an puh. Chubakah chuan a tuartu hringtunu hian a fapa kawr an pawhthler pawh Police Station-ah hian ‘evidence’ a tan a keng a, an lo uksak sak lem lo niin an sawi bawk. Hetiang hi a nih avangin he thil hi ngaih thutak loh theih a ni lo. A tawktu kan ni ve thei
vek a ni.

Mizoram Police te hi kan ram hruaitute hian an fak viau ţhin a, India rama Police ţha ber niin chhuang takin an sawi ţhin. A tlangpui thu-ah kan Police tam ber hi eirukna kawngah pawh sawisep kai lo an ni a. An chhuanawmna ber chu dan bawhchhia an man thiamloh chantir tam kawng (conviction rate) a India rama a ber an ni hi a ni. Hetiang ni tur chuan kan Police te hian an thil chhui danah an taima-in an uluk tihna a ni lo thei lo. Chutiang chu kan Police te hmingţhatna a nih laia mi harsatna tawh lo en liam a, FIR thehluh pawh lo buaipui sak duh lo an awm hian kan Police hmingţhate hmai a ti mâwk ang tih a hlauhawm hle mai.

Hetiang hi keimah ngei pawh hian ka lo hre ve tawh. Ram inchuh an awm a, chumi hmun nasa taka kum tam tak lo chei tawhtu thlâm leh a tuizêm lo siamte chu helaia ram nei nia kum tam hnua rawn inlar ve chuan hlawhfa ruaiin a tihchhiat sak vek mai a. Hetianga dan bawhchhia a mi thil tihchhiat saktu hi Kohhran Upa a la ni zui. FIR thehluh a ni a, a taka thiltih tuma Police-in chet an thawh dawnin an aia lal officer-te’n hnampui nihna vang nge ni, chu pa pawikhawih leh dan bawhchhiatna chu hmuhkân luiin an man duh tlat ta lova, thubuai pawh an ziak lut duh lo. Khatianga Police thiltih khan mahni kuta dan kenkawh a tharum thawhna a cho chhuak thei tih an ngaihtuah lo a ni mai thei.

Dan mithmuhah, dan hnuaiah chuan mihring hi kan intluktlang tur a ni a, chutiang a nih lohna ram chu ram nuam a awm thei ngai hek lo. Dan bawhchhiatna leh pawikhawihna a thlen a report an dawn chuan Police an che vat tur a ni a. Dan angin engkim an bawhzuiin an hna an thawk nghal tur a ni. Thiltisualtu-a puhte an mi len vang emaw thuneihna sang chelh an nih vang emaw-in dan kenkawh kawngah an che muangin an chhui ţha duh lo tur a ni lo. Chu chu dan bawhchhiatna leh dan hmaa intluktlanna thuthlung mausamna a ni. Thiam loh chantir leh a dang chu court thu a ni tawh ang. Police-te’n chhan engemaw vanga dan hnuaia an mawhphurhna an kenkawh duh loh chuan tumahin Police hnena dikna leh chanvo kan zawn duh loh hun, mahni a dan kenkawha phuba kan lak duh zawk hun a la thleng palh ang a, he ram hi dan awm lohna leh bawhchhiatna ramah kan chhuah mai dawn a ni.

(Vanglaini December 2 & 3, 2018)

Aside | Posted on by | Leave a comment

APA KUNGTE

APA KUNGTE.
(Mi bik Lalrintluanga Pachuau)

Zoram fiamthu khawvelah hian Arsi eng bik leh lian bik hi an lo lang leh thin, chung zingah chuan Lalrintluanga Pachuau hi atel ngei a ni tih hrechiang tu leh hmutu te zingah hian ka awm ve a, ka van lawm teh lul em.

Kum 2002 khan Delhi-ah Drama ‘Basic Technique Course’ National School Of Drama an tihah Art & Culture tirhin kan zu zir hova, Pu Zothansanga (Tuarpuii) & Lalnunsiama (Suntea) te pawh an tel ve a, heta tang hian kan inkawm ngeih chho ta a, Zephyr Drama club kan sawma min telpui ve ta a, kum 21 chauh ka la ni a, a ni kha kum 31 a ni thung, kum lamah hian kan inthlaua mahse, min u suh a ti tlat thung! A naupanlai atanga a chhung te leh an vengte’n an kohna hming chu ‘mapuia’a ni a, kei hi kum 2002 khan kan drama chana ka hming mapuia hi ka pu thunga, An vengah ka han len te hian ‘Mapui’ an tih hian kan hawi rual fo mai, a borala thu social media-a miin an hmuh pawn mapuia an ti si a tiin ka chhungte rawn pe pawp ta mai pawh an awm nual mai.

kum 2003 kuma Keima drama ziah ve “Rawngbawl tura chhandam ‘ tih kha ka thianpa tur hmingah ‘Pakungte-a’ tiin ka phuah a, chu apart chu a inhmehin, ahnehsawhin a thiam em em a, amah ‘Pakungte-a’ Zoram mipuiin an hriat chhoh zualna leh a hming Pakungtea a put hlennna a ni bawk. Kan Drama Club-a alo tel hma hian Doordardshan-ah Drama an chang bawka, ‘Taituka’ lemah changin a hlawhtling em em bawk a, kum 2000 KTP General Conference-ah pawh khan Phatsan lovang tihah khan thiam takin Sikh pa lemah alo lam kual hle tawh bawk.

Khatia Drama kan chan ve atanga miin min han hriat khan Mipui hmaa dina fiamthu thawh;chawp leh chilha rilru-a lo lang (by-heart) ni lo fiamthu han sawi chhuah mai hi ka thiam lovin ka khawr em em a, tunah chuan ka thiam e phei chu ka ti lova, kawng thui tak min kaitu leh min zirtira min her rem puitu chu Lalrintluanga Pachuau (Pakungtea) hi a ni. Mimal tak pawhin kan inkawm nasa in an inah pawh vawi tam ka riak thin a ni. chawp leh chilha han sawi mai tur fiamthu leh ama hun tawn nuihzatthlak amah leh amah han insawi sak te hi a tluka thiam hi an awm pawn ka hre lo.

November 5 khan kan naute neih tukah an inah ka zuk lenga,( An in hi Durtlang Hospital thlang lawk a ni a) kan inkawm a, ICU-a thi tepa a awm dan leh alo harhchhuah a a awm dan an sawi chu mittui tla zawih zawihin ka la nuihpui a ni. Thihna lui kawrruam azawh pawhin fiamthu hian a kiansan reng reng lova, a thil tawn harsatna leh manganna atawn te hi fiamthu-ah a chantir zel thei a, Fiamthu-a mi han sawi sak te, han bawlzan te hi a thiamin a hnehsawh em em a ni. Zoram Fiamthu khawvelah hi chuan mi bik a ni tih hi a lemchan sulhnu atang hian achiang zual hle a ni. Fiamthu ngaina mi tan chuan a fiamthu thar kan hre tawh lo tur hi thil runthlak ava tling em. Zofate fiamthu khawvel a pa chhe sawt dawn a ni.

‘APA KUNGTE CHENG HNIH’ tu nge min pe ta ang le! tu nge kan dil tak ang? Van mipuite hian i fiamthu an ngaithla chak tawh chu a ni chek anga, mahse, helam pawh hian kan la ngaithla kham lo asin. Taksa nat, Lungngaihna leh manganna awm tawh lohna ah chuan isum lek lovin anih han che law law ang che aw..
APA KUNGTE..

Aside | Posted on by | Leave a comment

INTHLAN DAWN CAMPAIGN TENAWM

NEWS COMMENTARY: 01.12.2018 (Zing dar 7)
Ziaktu : HC.Vanlalruata, Principal Correspondent, PTI

Tun ţum kan inthlang zet chu inthlan vote thlak a hnai telh telh a, kan politics chhiatzia leh thuneihna kan duh luat avanga kan duhtui loh theihzia a lang chiang ngawt mai. Political party leh politician-te’n ram kaihhruai an tum dan, an kalphung tur leh hmasawnna hna an thawh dan turte, tun dinhmuna kalphung dik lote sawi chhuaka siamţhat leh tihdanglam an tum dan reng reng an sawi mang lova. Mipui tana vote tur hriat ngaihna awm lo khawpin inchirhtheh ringawtin an hmanhlelin an hun tam zawk an hmang a. A chhe thei ang bera inpuh a thudik leh dik lo pawh hriat theih lohva inbeih hi politics ber chu niin kan hre ta a ni awm mang e.

In lo chĩk ve emaw? Kan ram hruai tumtute khan mipui hnenah an tih tur leh tih loh tur pawimawh zu sawi hman mang hauh lova. BJP thawhpui mek leh thawhpui tuma inpuhna ngar ngar an buaipui a, BJP an thawhpui lohzia insawifiah reng rengin an hun ţha zawng zawng an khawh ral a ni ber. A tawpa lang chiang tak chu thawhpui tawh vek si, thawhpui nih duh lo vek an lo ni a, KS kawm vek tawh si inthup tum ang chauh an ni. Sorkarna chelh theihna atana a ţul dawn chuan thawhpui hreh lo tak tak tur vek an ni bawk a, an pehhel leh thup thiam dan erawh chu a inang vek kher lovang. Political party pakhat ve mai inthinhrik siak a, sorkarna siam theihna a nih dawn chuan thawhpui hreh miah lo tur tih hriat reng site lemchan nun hi a tenawm.

Insawisel hrim hrim hi khap chi a ni lova, kan aiawh tur leh ram hruaitu tur kan thlan dawn avangin kan uluk hle tur a nih avangin an dik lohna, a bik takin ram hruai tura an tlâk lohna lai kan hriat phawt chuan kan puangzar ngei ngei tur a ni zawk. Mahni party hamţhatna atana dawt hmanga inbeih erawh hi sim ngai ber zawk chu a ni. Thudik puan hi inpuh hmingchhiat huanga khung theih a ni lova, India ram dan IPC-ah pawh thudik sawi hi mi a tihmingchhia ti a hrem theih a ni hek lo. Thudik kan sawi chhũng chuan tumah kan tihmingchhe lo tihna a nih chu.
American mipui khu mipat/hmeichhiat kawnga an thiangzau dan kan hre vek a, helama kan kohhrante duhdan leh an chet duhdan tam ber khu chhim leh hmar ang mai a ni. Mahse, chuti chung chuan hmeichhiat/mipat kawngah hian an ram hruaitu tur atan chuan an thĩkthu a chhia-in an duh fĩr hle thung. Gary Warren Hart (a laiah hming chu Gary Warren Hartpence niin mi hriat dan lar ber chu Gary Hart.) kha US President thlanna tur atana kum 1988 a Democratic party candidate ni thei ngei tura ngaih khawpa lâr chho a ni a. Amah hi ram palai langsar, politician leh ukil hmingţha tak nih fawmkem a ni. Chuti chung chuan US President thlan hma lawkah nula pakhat Donna Rice nena an inzui a, Monkey Business tia vuah lawng pakhata thawmhnaw themhlem tak ha a an awm dun lai thlalak chanchinbu a chhuah a nih avangin pawm lai nei a lo nih bawk si avangin a inhnukdawk ta a nih kha.
Hnam changkangte’n an huat leh an hlahthlem theih hauh loh chu ram hruaitu-in dawt an sawi hi a ni bawk a. Mizoramah hi chuan kan ram hruai tum leh hruai mek politician-te hi mipui dâwt an hrilh avanga paihthlak zel ni ta sela kan politician zawng zawng deuhthaw hi an chawl vek tawh ngei ang. Chutiang chu a ni awzawng lova; kan ram politics khelmualah ve hi zawng football khelmuala khingpuite bum thiam thiam an ding chang ang mai hian dawtsawi thiam thiam, dawt hmang bawka an dawtsawi thup thiam thiam an ding chang a ni ringawt a, sawi tur dang a awm lo.

Thuziah thiam em em mai Pu Zarzoliana (fam), Sikulpuikawn ami-in “Politics Haitho”tih thupui hmanga a thuziah khan kan ram politics hi a sawifiah hle awm e. Mizote politics a kan mit a keu ţan tirh khan Mizo Commoners Union/Mizo Union kha political party hmasa ber a ni a; an politics khelh thiam dan hmasak ber chu lal băn nawr leh Mizo lalte diriama mipuite’n lal ho an huat theihna tura zirtir kawnga phusa ber kha an ni a. Kha an politics bul ţan dan khân kan ram politics chu thui tak a nghawng a, tun thleng hian indiriam leh indeusawh hi politics ber emaw kan ti ta a ni ber e. Chu politics tuinũ chu tun thleng hian hman kan la chĩng ta a, kan politics khelh thiam dan ni a nu em em reng a, a kheltute hi an nǔ-in an rui êm êm hlawm mai a ni.

Politics hi ram siamna, ram leh hnam himna leh mipui hmasawnna atana pawimawh a ni a. Sorkara thuneihna chan loh chuan ram siam tura thawh tak tak a har ţhin a, chu tak chu inthlanna a thuneihna chang tura tha thawh a ţulna hi a ni a. Thuneihna chan theihna atana tlin hrim hrim hi politics thiltum dik a ni lo thung. Sorkar chu ram kaihhruaina kawnga ruahmanna leh kalphung engkim duangtu leh mipui sum (chhiah lakkhawm leh a dangte) hmanga hmasawnna hna pawh thawktu a nih miau avangin sorkarna chan hi political party leh ram hruai tumte chuan an tum tur chu a ni teh meuh mai. Mahse, sorkarna chan tuma an beihna atana tuifĩm leh tuinũ thliar hauh lo mai a thuneihna duh luat avanga tenawm taka thil dik leh dik lo pawh thliar thei lo khawpa rui nǔ a kan che ţhin hi chu lalna âtchilh leh nihna ruihchilhna a nih loh chuan puh tur dang a vang khawp mai.
Kalphung ţha leh dikah chuan a tling apiang, a thawk thei apiang leh a fel leh fing apiang an dingchang mai ţhin a. Kalphung tha lo leh hlemhletna chiahpiah ramah chuan induhsakna (nepotism/favoritism)-in ro a rel ţhin. Kalphung ţha leh dik awmnaah chuan inthlanna pawh a thianghlim tlangpui a, vote neite hi khua leh tui ţha leh thil hria (well-informed citizenry) an nih avangin a tling leh tlakte thlantlin an ni ţhin. Kalphung ţhat lohna hmunah erawh chuan vote neite’n ram leh hnam tana ţha tur ngaihtuahna aiin anmahni tana ţha tur leh anmahni duhsak thei tur emaw an awmna political party candidate an nih vang emaw-in vote an thlak zawk ţhin a. Hei hian ram leh hnam a tichhe satliah lova, ram leh hnam boralna hial thlen thei a ni tih kan ngaihtuah ngai meuh lo.

Mizote’n kan politics kalphung hi siamţhat kan duh tak tak a nih chuan party politics ruihchilh hi kan bânsan phawt a ngai. Kan party leh party hruaitute thusawi leh awmdan apiang sahuai thingvawn tlat kan chĭn chhung chuan kan siamţha ngai lovang. An sorkar laia an thiltih dik loh leh an sum hrawm dan zawng zawng hre reng chunga kan party hotu an nih avanga kan ţan tlat ţhin hi sim a ngai. Kum 2023-ah Assembly inthlanpui a awm leh ang a, fim zawka hmachhawn ngei beisei thei turin tun aţang hian i inbuatsaih teh ang u. Kalphung thar atan hruaitu ţha leh dik bakah lei theih loh leh dikna duh tak tak mipui kan mamawh a ni.

Aside | Posted on by | Leave a comment

KAN MODEL TEN CONDOM AN PAI ZEL TAWH MAW?

WORLD AIDS DAY a kan MODEL te kha an nalhin an hmelṭha asin. Kan model-te hi an changkang tawh bawk si, ka ngaisang hlawm. Mahse, kha Ni ‘World Aids Day’ a kan Model chhuanvawr ten, “CONDOM PAI HI A ZAHTHLAK LOH A, ZAH AH LA LOIN, I PAI VEK ANG U AW, KEI PAWH HEI KA PAI” tia Condom an han lek va va mai kha chu, a ṭhatna hre kur mah ila, ka lo ṭim deuh uai uai a, ka lo zak deuh tlat a, ka ṭim deuh chuai niin ka hria a, ka mur chem chem a, ka lai deuh huih a ni ber awm e.

Khatia an tih kha, Invennan an ti tih chu ka hai lo, MAHSE Purse or ipte ah Hmeichhiate hian Condom hi pai ṭat zel ila, miin lo hmu ta se!, bialpa ten lo hmu ta se! Engtin nge an ngaih ang aw tih ka ngaihtuah. Mipa tam tak chuan, hmun fianrial emaw Bed room emaw lama min hruai an tum nghal mai lo’ng maw? Kan mipa ṭhenkhatte lah hi, Bethlehema Chhandamtu Isua pian thu kan sawia kan lawm mek lai pawh hian, kilkhawr tak tak hi an lo ngaihtuah thleng hman fo bawk si. Bialnu leh nu lote bulah pawh, “Hei chauh” ti a a dang pakai tum leh zel si, “tun chiah” ti a vawi khat chauha lungawi tum hauh si lote an ni ve hlawm bawk si. Hmangaihnate hi Tih a pung tur emaw an ti a, min duh chhan, kan hlutnate hi kan Thianghlimna hi a ni tih hre kur siin chu kan thianghlimna chu tihbawrhban an chak a, an tum ve ngar ngar ti ila a dik hial ang. Kan khaw hawi hi zau fu siin ṭhenkhatah hian a zim ṭhin si a, a zim mai a ni lo, a fala awm phei chuan a kilkhawr tak zet a, an kun ngur nghal ringawt zel a nih hmel hlom hi!.

Khawi kipah Condom hi lo pai zel ta tak tak ila, Nu leh pa, u leh nau, ṭhiante leh naupang zawk ten, “a hmang ve ṭhin a ni maw?” min ti roh si angah! Kan rilru puthmang hi a la dik zan hlawm si lo. Nula thianghlim kha min ngai thianghlim lo zo vek thei a, min hmu khaw lo zo thei ve tlatin ka hria. Chu chu Thianghlim loh tak tak nen a nat dan a dang vak lo mai thei. HIV +ve ngei pawhin, AIDS vei ngawr ngawr aimahin mite thinhrikna leh hmuh khawlohna kha Na a tih thu a sawi kha.

Kha Ni ah khan, kan Model te khan Condom kha an vawr a, naupang, tleirawl te te, Sikul uniform ha rualte pawh khan, a hmei a pa khan an chhar zo duak duak a, an ak hmak hmak a nih kha. Rilruah, Condom an chhar te kha hman lohin an kawl rei ang em? tih a lo lut nghal a. Condom kha hman chhin duhna a lo piang anga, sex la ti ngai lo ten an tih ve ngawt phah kha ka lo hlauh ber chu a ni. Chuvangin, AIDS chungchanga Awareness kan pek nasat tluk zetin, SEX lamah pawh hian Awareness i pe nasa ang u. Tuna kan hawiher en hi chuan, mipui nawlpui zinga Condom fak chiam leh sem chhuah vak vak hi kan la zo lo deuh lo maw? Sex lamah hian Awareness kan mamawh viauin a lang si.

AIDS hi Condom tel loa Sex hman vangin a hluar a nih chu a rinawm, mahse Condom kan tih luat hian SEX kan tihluar zual ang tih ka lo hlau. AIDS lakah him ila, SEX lakah him si lo ila, a pawi ve viau tho a nia aw. Chuvangin, SEX chungchang hi nasa takin Awareness neih tel a ngai a ni. Sex hman ṭhat loh zia, kan nun leh chhungkua, khawtlang leh ram thlengin a nghawng thei a ni tih hi hrechiang ila, insum turin inzirtir nasa ang u. Loh theih loh a Sex lo hman palh dawn chuan CONDOM erawh hman ngei ni se tih erawh hi chu, sawi uar zel a ngai ve bawk. Condom hian AIDS lakah min hum mahse, Hurna sual leh a hnathawh erawh a hum tel lo a, a tipung zawk hial niten a ngaih theih.

Condom ka sel a ni lo, kan rilru leh ngaihtuahnate a la ṭawp hlawm si a, chutih laia mipui vantlang zingah ualau lutuka Condom sem vak vak hi a him loh theihna lai ka lo sawi ve a ni e. Kan mipa tam takte rilru puthmang leh an easy zia chu Facebook Inbox keu hian a hriat a, an za zek zek a, Load sa in an pai a ni ber a, inbox ah te an rawn ralsai pop pop zel a nih hi. Ka ipte ah Condom ka pai tih hria phei se, hmanpui min tum dawn chiang hian ka hria. Condom ka pai avanga min zuam nghal ngawt tur khawpa rilru ṭhang dik lo mipa an la tam hmel si a. Mipa tam tak hi chuan Sex hmanpui tur hriat hi hlawhtlinna emaw an la ti niin a lang a, an la uanpui lek lek nia. Hengho hian Condom chu anmamawh chiang. Mahse, sex ngaihtuah lem lo, rilru la thianghlim tak tak ten Condom an pai ngawt tur hi chu a fuh lo em?

Keini pawhin kan pai zel ti mahse, ka model ngaihsan Rody pawh khan, Condom hi a pai zui reng ka ring bik lo. Ani ang hi chuan, Condom tel loin a inveng thei ngei dawn si. Condom tel lova inven dan chu Insumtheihnate, Thianghlimna hlut zia hria a, chu thianghlimna chu vawn tlatte, Sex hi zahawmna hlohna a ni tih hria a, kan zahawmna vawn tlatte, hmangaihna leh nawmsakna, hlimnate hi Sex ah a innghat vek lo tih hria a,Sex a insumtlatte, Sex chu a hun hma a hman a pawi theihzia leh a hun taka hman erawh malsawmna a nih zia hriatnate hi a ni.

Condom pai ngai lo turin i rilru siam la, HIV leh SEX lakah fihlim rawh. AIDS hi a hlauhawma SEX pawh hi a hlauhawm bawk.

Aside | Posted on by | Leave a comment

Vote thlaktu upa te

Vote thlak thei zinga upa hriat theih te.
Dozamanga, kum 109, Khawlian khua in Khawlian ah vote a thlak.(Hruai a ngai)

Upa Rochhinga, Kum 108, Zemabawk North in chawhma dar 11am khan AIZAWL EAST-I , Govt. Zemabawk P/S -I ah vote a thlak.(A la kal thei)

Pi Darrohnuni, Kum 106, Kawrthah chuan Kawrthah ah vote a thlak. Kawrthah a vote thlak upa ber.(Wheelchair in nawr a ni)

Pi Lalrovi, kum 100, Tlungvel Venghlun chuan Tlungvel ah vote a thlak.(An kai)

(Pic ka upload thei lo tlat.)

Aside | Posted on by | Leave a comment

Mizoram Assembly inthlanpuia vote tla a chhinchhiah thar berah vote zaa 81.38 a tla.

  • Mizorama vote tla zat
  • Vote tlak that berna bial
  • Vote tlak chhiat berna bial

State Election Commission in thlahlui ni 28 a Mizoram Assembly inthlanpuia vote tla a chhinchhiah thar berah chuan vote zaa 81.38 a tla a, Ajasora polling station-a vote thlak that tur leh postal ballot-a vote tla te chhiar tel a la ni lo a ni.

State Election Commission chhinchhiah dan chuan Mizorama Assembly constituency 40 zingah Aizawl South III bialah vote a tla tha ber a, vote zaa 89.54 a tla a, Hachhek bialah tla chhe berin vote zaa 66 a tla a ni.

Vote nei hi voter nuai 7 sing 7 & 395 zinga mi nuai 6 sing 1 & 9808 an ni a, mipa nuai 2 sing 9 & 9,347 in vote an thlak a, hmeichhe vote thla hi nuai 3 a tling a, hmeichhe vote thlak zawng zawng hi an vaiin nuai 3 sing 2 & 461 in vote an thlak a ni.

Aside | Posted on by | Leave a comment

rualbanlo te Ni hmang

Khawvel pum huap Rualbanlote Ni vawiin khan District hrang hrangah hman a ni.

Aizawlah chuan rualbanlote ni pual hian Social Welfare, NILD (NERC), SSA, RMSA, DSCERT leh Health Services, Hospital & Medical Education department-te’n Zarkawt Recreation Hall-ah inkhawm an buatsaih a.

International Day of Persons with Disabilities hmanpuitu Social Welfare Department Secretary, Pi K.Vanlalrawni chuan, ruabanlote chu tun hma chuan khawtlangah dinhmun hniam zawkah dah thin an nih thu sawiin, tunah erawh mimir an changkan tawh avangin an ngaihdan an thlak tawh a, theihna bik nei angin an pawm tawh, a ti a. Rualbanlote thiamna leh theihna hai chhuahsak chu mitin tih tur a nih thu sawiin, mi ṭhahnemngai tak tak, hlawkna um loa rualbanlote tana inpe an awm a, anni hmalakna avangin mipui pawhin an hmuh dan a danglam hret hret a ni, a ti.

Aizawla rualbanlote ni hmanna ah hian rualbanlote zirna hnun leh enkawlna hmun hrang hrang atangin an kalkhawm a. Pianphunga rualbanloten wheelchair race, spoon race, Three Legged Race, Foootball leh Relay race ah te inelna buatsaih a ni.

Mizoramah hian kum 2011 chhiarpui-ah rualbanlo mi 15,160 an awm mek a ni.

Lawngtlaiah chuan Social Welfare Deptt.; SSA Mission; RMSA leh Eirene Society te ṭangho huaihawtin LADC Hall-ah hman a ni a. Hun hmanpuitu Lawngtlai SDO (Sadar) Pi Rochuangkimi Khenglawt chuan kum 1992 khan UNO-in Rualbanlote Ni chu ni pawimawha a puan thu sawiin, he ni hi vohbikten an dikna chanvo an chan theih nan te, an talent hrang hrangte haichhuah nan te hman \hin a ni, a ti a. Vohbikte hi sawrkar chuan a ngaihsak em em a, an tan hamṭhatna chi hrang hrangte a buatsaihsak ṭhin a ni, a ti.

Mamit-ah chuan Chhimveng YMA Hall-ah International Day Of Persons with Disabilities hi hman a ni a. Distrcit DC Pu Vanlalngaihsaka’n a hmanpui a. SSA leh RMSA Co-ordinator-te’n rualbanlo an enkawl dan leh an hmalakna hrang hrang an report a. Mamit District chhungah Middle School leh Primary school zirlai zingah vohbik mi 443 an neih mek thu te, Higher leh High School zirlai vohbik 136 te pawhin enkawlna an dawn mek thu an tarlang a ni.

Lunglei-ah chuan Cultural Heritage Center-ah SSA, RMSA leh Social Welfare Department te ṭangkawpin Rualbanlo te ni, Special Olympics Cum Observation of International Day of Persons with Disabilities 2018 hman a ni a. Empowering Persons with Disabilities and ensuring Inclusiveness and Equality tih thupui hmaqnga hun hman hi Lunglei DC Dr. Ankita Chakravarty-i’n a hmanpui.

Lunglei District-ah hian sorkarin a chhinchhiah rualbanlo 673 an awm a; SSA, RMSA leh Social Welfare Dept. te hmalakna in Health Camp te buatsaihsak ṭhin an ni a, School naupangte hnenah handicap stipend pek ṭhin a ni bawk.

Kolasib St. Joseph’s Parish hall-a International Day of Persons with Disabilities hman chu District DC, Dr. Arun T-a’n hmanpuiin, Mizorama a hmasa ber ni turin khaw hmuh lama harsatna neite tana buatsaih Braille Textbook a tlangzarh a. Heng lehkhabute hian khawhmuh lama harsatna neite tan chona leh phurna nasa lehzual a pek a beisei thu sawiin, heng mi bikte tana zirlaibu buatsaih a ni chu hmasawnna chhinchhiah tlak tak a ni, a ti.

Kolasib-a Vohbikte ni hmannaah hian sikul hrang hranga zirlai bakah hostel a awm te leh Kolasib District-a School Education Department (RMSA leh SSA), Social Welfare Department-a thawk te, Department hrang hrang Head-te leh Salvation Army Home for the Blind bakah Mizoram Peoples’ Forum aiawhte an tel a, Vohbikte tan intihhlimna hun buatsaih a ni bawk.

Serchhip-ah chuan RMSA leh Zoram Entu Pawl (ZEP) \angdunin P&E Venga Marian Hall-ah Serchhip District Education Officer, Pu lawmawma hoin rualbanlote ni hman a ni a.

He hunah hian sawrkar hmalaknain SSA hnuaiah E.Lungdar leh Sechhip Block-ah rualbanlote enkawl dan zirtirtu Resource Person mi 4 leh Resource Teacher 2 ve ve neiin, IEDSS bikah hian Serchhip District-ah thawktu IEDSS Co-ordinator – 1 leh Special Educator 2 an awm mek a. Kum 2018-2019 chhung hian Childrens With Special Needs (CWSN) naupang 96, mipa 44 leh hmeichhia 52 an awm mek thu te, heng naupang harsatna neite hi thawktuten an School ah kalchilihin an harsatna an zawnchhuahsak ṭhin a, theih ang anga an zirna kawnga hma an sawn theih nan ṭanpuina pek ṭhin an nih thu te tarlan a ni.

Mizoram Blind Society (MBS) chuan kumina khawvel pum huapa Pianphunga Rualban Lote Ni pual hian thuchhuah siamin, kuminah Rights Of Persons With Disabilities Act, 2016 tlawhchhana Mizoram Sawrkar hmalakna hrang hrangte avangin mitdelte leh pianphunga rualban lo dang ten Mizoram Legislative Assembly Election neih zawh takah kum dang aiin vote thlak a awlsam phah a, hemi avang hian kum dang aiin mitdelte leh pianphunga rualban lo vote thlak an tam phah a ni, an ti a; Mizoram State Election Department leh District tina District Election Officer te leh an staff zawng zawngte chungah lawmthu an sawi a ni.

(PCT & Corr)

Aside | Posted on by | Leave a comment

G20 Summit a President Xi Jinping Thusawi Thenkhat

“Vawiina G7+G13 = G20 Summit chhim tura lo kal palaite leh he khawmpui hnehsawh taka lo dawngsawngtu, Latin America rama China thian tha ber #Argentina hnenah lawmthu ka sawi e.
Khawvel leh a chhunga cheng ram leh hnam tinte hian he lei hi thangthar lo la awm zel turte tana siam turin political leaders zawng zawngte hian hma kan la theuh va, chumi thiltum tihpuitlinna leh changtlunna chu intihbing emaw thliarkar rilru put emaw ni lovin insumdawntawnna leh thawhhona tha neih hi a ni. Ram kalsiam thlir lo hruaitu thenkhatte avangin ram thenkhat chu rethei takin an awm mek a, #climate change hriatthiamna neih loh avangin ramte thlalerah a chang mek a ni. G20 ramte chu international trade hmanga thawkho va, he khawvela hluber mihringte mihrinna #humanity ngai pawimawh hmasa ber turin ka duh che u a ni.
Vawiina he Argentine capital, #BuenosAires a G20 Summit hmangho theia kan awm hi lawmawm tak a ni a, kan mawhphurhna – stick to openness and free trade, maintain and further expand open market, and realize win-win cooperation through mutual exchanges and complementarity erawh kan theihnghilh tur a ni lo. #International trade and economic globalization chu kan hnapui ber a ni tur a ni. Ramte chu inngeih tlang tak leh intluk tlang taka lengza dial dial tur kan ni a, tlakchham leh mamawh te inphuhrutawn tur kan ni. He lei hi a zau lo va, khawvel danga mihring dang lo la awm a nih pawhin khangte nena inpawh kan la tum zel tur a ni zawk dawn lo em ni?

#China, #France leh #UnitedNations chuan #Paris Agreement 2018 siamin khawvel khawi hmun pawh #climate change hmanga chenna tlakah siam zai kan rel a, hei hi #G20 ramte pawhin min puih a ngai a ni. All relevant sides should faithfully abide by their commitment to the UN Framework Convention on Climate Change (UNFCCC) and the Paris Agreement, reinforce their actions before 2020, and push for the green and low-carbon transformation across the world.

Mawia cz

Aside | Posted on by | Leave a comment

A pakungtea ropuizia

ICU-a awm lai pawha fiamthu la thawh thei a ni: Mapuia

Hun tawp lam: A nupui Rohmingsangi leh Mapuia (Zephyr)

Mizorama Drama club hlut hlawh, ngaihvenhlawh leh mipui ngainat ber zinga chhal ngam, Zephyr Drama Club dintute zingami Lalrintluanga Pachuau (Apa Kungtea) chu December 1, 2018, zan dar 10:05 khan Dur-tlang Synod Hospital-a ICU-ah a lei zinkawng a zawh tawp ta.

Hetiang hian Mapui-a’n a thiantha tak chungchangah inbunruahna a nei:

‘Ka dam veleh min rawn hruai dawn nia..’
“A that reng laia kan inhmuh pawhin dam taka a chhuah rin lohna ka nei lian tawh. Nimin piah khan a hmel en khan a hrisel lo tih ka hre tawh. Ka beisei lo, ka rilru a nuam thei lo. Dam lo chungin, ‘ka inhuam a lawm,’ a ti a, shooting nei nei ang kan la ti a, ‘Mapui, ka khua a sik a, a remchan veleh ka dam chian veleh min rawn hruai dawn nia aw,’ a ti a, chu chu ka inbiak hnuhnun ber a ni ta a ni.

Fiamthu lungphum phumpuitu
“Apawi ka ti a, ka fiamthu bul\anna, mipui hmâa ka din ang chi hi amah atanga tam tak min kaihruaitu leh fiamthu lungphum min phumpuitu a ni a, ani hnen atangin tam tak hi hriatphah, min zirtir a ni.

A thih thu a hriat veleh
“Kan nunhlui, ka chhuikir nasa hle a, tunhnai lawka programe nei dun leh tur kan nih avangin min nghawng na hle a, hrehawm ka ti a, rilru mumal put pawh a har khawp mai.

A miza leh entawntlâk a nihna
“Ka tluk lohna hi ka sawi duh a, ka tluk lohna key pawh ka sawi duh. Eng harsatna pawh tâwk se, thil reng rengah a ho (Light) leh hlim awmzâwng a la zel thei hi tluk lo ka inti ngawih ngawih. ICU-a a awm chanchin pawh min hrilh a, ‘ICU-ah ka that tawh hnu khan ka bula mite kha an boral a, Doctor-in chhuah a la phal si lova, ICU-a lungphu enna (Heart monitor) te kha ka chhaih nileng thak mai a ni. A chângin ka’n thaw lo der vel a, a inrin te kha a kham pheiin a kal,’ te a ti a, mittui thlaphungin kan la nui. Chutiang khawpin ICU-a awm lai pawhin fiamthu thawh thei kha a ni. A ngaihsanawm ka ti hle. Comedian search-a lo tel tam tak te zingah a nê pawh pha leh tluk an awm lo. By-heart lovin chawplehchilha sawi tur nuihzatthlak deuh deuh hi a hria, tlachawpin a sawi nghal zung zung thei a, mibik a nih zia a hriat hle.

–Written by Robert Zoliana

Aside | Posted on by | 1 Comment

TUNLAI THIL AWMZIA: INDIAN EXPRESS CHANCHINBU NGE, CEC O.P RAWAT LIM KAN HAL DAWN?

Chief Election Commissioner (CEC) of India, pension a kal chhuak ta O.P Rawat, IAS (Madhya Pradesh cadre) 1977 Batch chu Indian rama Saptawng chanchinbu lar tak, khawpui lian zual 16 zeta Edition an siam thin “Indian Express” (Dec 2, 2018 issue) palai Ms Ratika Chopra chuan kawmna a nei a, chutah chuan Mizo mipuite leh Mizoram sorkar leh kan Mizo IAS tlangval chu min chhuah off-side hle mai a! Hetiang hi khawvel hmaa Mizote min tarlan duhdan a nih chuan engtia hmalak chi nge ni ang? CEC thar hi Sunil Arora a ni.

Ratika Chopra:
In Mizoram, you were forced to remove your officer S.B Shashank after protests will that set a bad precedents? In future, there could be more such demands removal of officers seen as inconvenient or against the interests of certain section?”

O.P Rawat:
He thil thleng (issue) hi Bru hnam thil nena inzawm a ni. Kum 1997 ah tharum thawhna thlengin Bru mipui 30,000 chu Mizoram atangin an chenna Districts 3 atangin Tripura-ah an tlanchhia a…Chutih hun lai chuan Ministry of Home Affairs leh Mizoram Sorkar chuan Tripuraa Bru ho awmte chu Mizoramah an kir leh theilo tih a hria a. Heng camps a awmte hi 1997 hnua awmte an ni. Hengho hian kum 4 kalta khan inthlanah Mizoram ramri bula Polling Stations ah postal ballot an thlak mai a.

Commission chuan thalai kum 18 tlingte chu electoral rolls ah vote thlak thei turin awm se a duh a. Chu thil chu dodalna a awm a ni. Mipuite chuan Mizoramah lo kir leh se emaw, Tripura ah khualehtui angin awmin inziak lut se an duh a ni.

Chu hmunah chuan Shashank chu zu tirh a ni a, civil society leh Bru awm hote rin ngamin hma a la a; kum 4 kal taa thalai kum 18 tlingte chu vote nei tura la lutin, mi 1,280 an ni. Mahse, rang tak maiin Mizo organizations zinga mite chuan an kut atanga awm lo (slipped out) tih an hria a. Principal Secy (Home, Lalnunmawia Chuaungo), Gujarat atanga deputation a rawih chu a inrawlh (interfered) a, enrollment te chu hnawl a ni ta ni. Appeal siam turin kan ngen a. Chutianga Home Ministry duh dan a “identity documents” siamte chu Chuaungo chuan hman a ni tur a ni lo, a ti a. Chu chu a inrawlhna a ni.

A hnuah CEO hnenah, “Engvangin nge Central Paramilitary Force te chu Home Ministry rawn lova i chah?” tiin a zawt a. Chu chu direct-a a inrawlhna a ni. Hetiang hi State official te thiltih theih a ni lo. Chutichuan Commission (ECI) chuan State sorkar chu dah kiang (relieve) turin thu a pe ta a ni. Chuaungo leh amah thlawptute chuan social media-ah campaign-in CEO (Shashank) chu inrawlh lo turin an ti ta a ni. Vote nei theite tihtawp chu Consitution kalh leh danlo a ni. Shashank chu Delhi-ah ka koh thla a, a hna chu chhunzawm tir lo turin min ti a ni” tiin.

Hetiang hi CEO kal chhuak ta O.P Rawat-an India ram mipui tluklehdingawn 1.2 zet leh khawvel hmaa min sawi duh dan a ni! Hmanni lawkah lungrual takin CEO Mizoram S.B Shashank leh ECI-in an thiltih dan chu a dik lo, tiin Districts 5 zeta “Mizo Hnam Hnatlang” kovin, Zoram mipuite chuan “Mizoram leh Hnam tan” tiin, ropui takin “lungrualna chhim thlipui” kan thawt tir hum hum kha a ni a. Tuna CEC thil sawi pawh hi ngun taka ngaihtuaha chhanlet ngei chi a ni.

Mizoram sorkar aiawha hna thawk L.Chuango IAS khan Dan piah lama a thiltih dikloh hi sawi tur a awm lo tih a nih laiin, hetianga “Dan bawhchhia” anga puhna hi a diklo hul hual a ni. Amah L. Chuaungo IAS service thlenga tawrh theihna te, “Mizo mipuite diklo taka hnam dang, ram dangin min hmuh phah tur” niin a lang. He CEC kal chhuak O.P Rawat thusawi hi “ziak leh thiltih” hmangin kan chhanglet ngei tur a ni ang.

RAWTNA:
New Delhi leh Aizawl khawpuiah CEC O.P Rawat diklohzia tarlanna ziak fel fai tak, English leh Hindi tawnga sem tur siam ni sela. OP Rawat lim emaw, Indian Express chanchinbu hi (anmahni huat vang ni lovin) CEC thudiklo sawi tarlanna a nih vangin hal tur a ni ang. Hei hi khawvel hmun dangah pawh, tharum thawhna tel lova lungawilohna lantirna tangkai tak a ni thin.

New Delhi-ah Jantar Mantar-ah Delhi MZP hmalaknain a thei a piang phunkhawm nise. Thuziak chu National & International media-Reporters te lo pek theih turin English leh Hindi-in Pamphlet lo sem ni bawk sela, banner lian tak zarin Mizo mipuite lungawiloh chhan leh dawt a nihzia tarlan a tul a ni. India ram huap Media-hote chet tir tum chuan thiltih tih neih a ngai.

Indian Express chanchinbu lian tak hian an chanchinbu Mizoten kan halsak tih an hriat chuan, India ram media leh anmahni beng pawh a verh lo thei dawnlo a ni. Tichuan thudik tak ziakna chu kan lo pe ang a; thudik chu an hre mai dawn a ni.

Mizo pain “thudiklo leh hekna” vangin hliam a tuar a, Mizo kan nih ang ngeiin kan intawrh puina te, kan Hnam diklo taka khawvel hriata pholang duhtu dodalna kan lantir hi India Constitution in kan birth-rights min pek dik tak a ni. Hetiang lama hmala thei pawl (All NGO’s nge Zirlai pawl?) ten hma lain, rawn pen chhuak leh rawh ule.

Thudik tan turin mi tam tak nih pawh a tul lo. Khawvel hi mi tam tak ni lovin, “mi tlemte” in an tidanglam thin a ni! Chung zinga “mi pakhat” lo nih ve tum rawh le! I ram leh hnamin chhantu a ngai a, ama mawh che a ni. Mamawh lai taka tanpuitu hi an hlu asin!

Author : CT Lalrinawma

Aside | Posted on by | Leave a comment