TUIKUAL NORTH SECTION 4 YMA HRUAITU VANLALHNEHZOVA TRUCK-IN A CHIL HLUM

  • 15th December, 2016 zan dar 10:30 vel khan Tuikual North Temple to Vaivakawn Road, Tuikual ‘D’ waiting shed bulah Scooty MZ-01/N-0355 Vanlalhnehzova (29) S/o. Kapzawna Tuikual North khalh leh LPK MZ-01/G-4576 Lalvulmawia kum 30 S/o Sorkarliana Chawlhhmun khalhte chu Tuikual North Temple Road Waiting Shed bulah an intai a, Vanlalhnehzova hi motor hnuaiah inbarh lutin motor ke hnungin a luah a chil a, ka pawh chhawn lohvin a boral.

    Chetsual lai hi mita hmutu an awm loh avangin chiang taka sawi thei an awm lo. LPK driver-in a sawi dan chuan an tlan chak lo ve ve niin a sawi a, a motor bang chu a ri deuh hruk-a thil a pawi tur ang chu a thleng fel nghal vek mai niin a sawi tih thudawnna chuan min hrilh. Vanlalhnehzova scooty pawh hi a him ang reng hle a, a hnung lam tlema khem deuh tih mai loh chu chhe dang a awm lem lova, LPK truck bang tlem a reng deuh a, an inpel tur light in a chhunkhalh che buai deuh chuan LPK bang chu tai deuhin vanduaithlak takin Vanlalhnehzova hi truck hnuaiah a tla lut palh a nih thenkhat chuan an ring.

    Chanchin buatsaih lai hian Vanlalhnehzova ruang hi AizawlCivil Hospital lamah postmortem turin buaipui mek a ni.

    Vanlalhnehzova hi khawtlang tana mi tangkai tak a ni. Tuikual North YMA Section 4 ah Finance Secretary ni mek a ni a, kum tharah 2017 hruaitu atan Asst Leader ni tura thlan niin charge an la inhlan hman lo a ni. A nu leh pa leh a farnu te nen Tuikual north RM High School chhak kawng an ah an cheng a ni.

    Advertisements
    Aside | Posted on by | Tagged , | Leave a comment

    PRO WRESTLING (WWE,TNA, etc.) HI SCRIPTED VEK A NI : BEHIND THE UNKNOWN STORY

  • Aw le, ka thu post tur hi inhnialna chawh chhuah tum lam ani lo va, group member zingah Pro Wrestling hi a tobul atang mai bakah a kalphung hrim hrim hre chianglo an tam avangin kan han sawifiah dawn a ni.

    Khawvela Pro Wrestling Promotion Company lar leh hausa ber chu World Wrestling Entertainment (WWE) hi a ni tih kan hre theuh awm e. WWE hian an show bakah social media lamah pawh an KAYFABE (thuruk) hi humhim duh viau mahse tunlai media chak tawh lutuk ah chuan thil engmah hi thup zawh a ni lo. WWE hian Show an neih bakah hian thuruk tam tak khawvel hmaa puanchhuah loh an nei a, humhim tlat pawh duh mahse a BEHIND THE SCENE tak hrethiam lo an tam avangin kan han phawrh chhuak dawn a ni. Example atan hian tun hnaia thil thleng deuh chauh ka hmang mai.

    Khawvelah hian wrestling company tam tak an awm a, chung zingah chuan WWE, TNA, WCW, Ring Of Honor, New Japan Pro Wrestling, Combat Zone Wrestling te hi a lar pawl an ni. 2002 khan WWE chuan WCW leh ECW a lei. Heng zingah hian WWE hi entu ngah ber leh lar ber a ni a, kalphung mumal tak nei an nih mai bakah Superstar te lakah pawh an strict hle. Tunah phei chuan Brand Extension (Raw leh SmackDown tih hran) a nih leh tawh avangin rating a sang chho hle a, merchandise lamah stock a san belh zel avangin McMahon chhungkua hi an hausak belh zel a, kum khata an sum lakluh ringawt hi $25M bawr vel niin an chhut. Tin, Vince hi sumdawn thiam tak a ni a, promotion lamah phei chuan UFC President Dana White an a tluk lo hle a, UFC ai hian WWE in entu an ngah zawk thin reng a ni. Commercial vela an sum lakluh pawh a inthlau hle. Tin kumin Wrestlemania kha a hmunah mi nuai khat chuangin an en a, kha event kha tun hnaia Sport Event zingah entu ngah ber niin Super Bowl, FIFA World Cup, UEFA Champions League,etc pawhin a tluk lo a ni. Tin Pro Wrestling hi sap ho hian Combat Sports huangchhungah an dah reng a, WWE erawh Sport a ni lo va, Entertainment a ni. Amaherawhchu a game Pro Wrestling hi sports huangah an dah tel miau avangin Sports Entertainment tih a lo ni ta a, sports channel ah te an Live thin avang leh sport news ah te wrestling news hi tarlan thin a nih avangin sports a ni lo tiin kan lo sawi ngawt thei lo.

    1.DISCIPLINE – WELLNESS POLICY, SUSPENSION, TERMINATION
    Vince McMahon hi a bikin Drug Policy lamah a strict hle a, WWE Wellness Policy zawm lo te chu a suspend hmak hmak zel. He dan bawhchhe tu te chu an contract atangin vawi 3 suspend theih an nih bakah pawisa an chawitir thin bawk. Kumin July thla khan Roman Reigns chu drugs eng emaw a lo hman avangin a vawi khat nan thla khat suspend a ni a, vawi 3 an suspend hnua dan an la bawhchhe cheu a nih chuan an contract atanga terminate theih an ni. He thil hi Jeff Hardy WWE atanga a chhuah chhan lian ber pakhat a ni nghe nghe a, fans te duh em em lai ni mahse dan zawm theilo te chu dim an ni ngailo. 2014 khan Alberto Del Rio chuan backstage lamah Employee pakhat kut a lo thlak avangin a contract tih tawp sak a lo nitawh bawk.

    2. THE STORYLINE

    WWE hi storyline neia kal a ni a, susperstar leh superstar in huat lai te a awm a, chumi hnuah story dang neiin midang nen an in fued kual leh thin. HEEL an tih hi misual pawla tang tihna a ni a (eg. Kevin Owens, Bray Wyatt, Triple H),
    FACE tih erawh chu a fel pawl (eg. Seth Rollins, John Cena,Dean Ambrose) tihna a ni. Misual atanga mifel/mifel tang misual a inlet hi TURN an ti a, class hniam zawk atanga dinhmun sang deuha an dah chhoh hi PUSH/PROMOTE anti bawk.
    A thawnthu ziaktu an awm a, results pawh an lo duang lawk vek thin a, an intum zat minutes tur thlengin ansiam thin. Thui tak ngaihtuahin a tul dan a zirin result an lo duan lawk pawh an lo tidanglam thin a, championship title kawl tur pawh an ruat vek a, mahse a tawpa thuthlukna siamtu erawh Vince McMahon tho a ni. Match laklawh lai a tihdanglam chang pawh an nei a, chu chu referee in ear phone a vuah thin hmangin an hrilh a, referee hian mipui te hriatloh turin wrestler te a hrilh ru thin. Tin, fans te hi an pawimawh hle a, pa lian lem lo, amaherawhchu fans te atchilh an nih tlat si chuan World Champion thlengin an nihtir thin. (eg. Daniel Bryan, Rey Mysterio, Aj Styles). WWE Superstars te hian an ring name atan hian an hming tak ni lo an hmang fo. Hei hi chu kan hriat theuh ka ring. An hming dik tak (real name) an ring name a hmang zinga lar zual te chu John Cena, Randy Orton, Brock Lesnar, Chris Jericho, Steve Austin, Batista te an ni.

    WWE Superstar ni tur hian in ring skills ringawt hi a pawimawh lova, English thiam nal a ngai a, fans lamah boruak siam thiam a ngai a, mic skill ah that a ngai a, body a mawi a ngai bawk a, fitness that a pawimawh hle bawk. Undertaker leh Kane te hi storyline ah chuan Brothers of Destruction an ni a, amaherawhchu real life ah erawh chuan unau an ni hauh lo. Tin a pawimawh ber acting thiam a ngai hle a ni. WWE creative lam hian superstar inhliam vang leh chhan dang vangin storyline an thlak zeuha ngaih changa awm thin a. Nikum kum laihawl vel khan Rusev, Lana leh Dolph Ziggler te ah Love Triangle storyline an siam a, Dolph leh Lana te hi inngaizawng angin an lang. Amaherawhchu a hnu deuh lawkah Rusev leh Lana te hian a tak takah an inhual thu an puang ta si a, chawp leh chilhin he storyline hi tihtawp a ni nghal. Tin kumin January khan John Cena chu lo kir leh mahse a dar a hliam palh avangin thla 6 vel chawl tura tih a ni a, creative lam rilru a hai hle. A chhan chu Cena hi Undertaker nen Wrestlemania a inbei tura tih a ni a, a aiah Shane McMahon leh Undertaker te an inbei ta zawk a ni. Wrestler te hi script writer ten an story ziah dan anga chang chhuak an ni a, Live action a nih avangin camera cut vel a awm ve tawh lova, a chunga ka sawi tak quality nei te leh scripted anga che chhuak thiam thiam kha top star tur chu an ni mai. Hetiang mipui sing chuang hmaa chang chhuak tur chuan mi bik ni a ngai a, a hautak a, mi nazawng tih chi a ni lo.

    3. CHAMPIONSHIPS AND PUSHES

    Tuna WWE ah chuan WWE Universal Championship (RAW)leh WWE World Championship (SMACKDOWN LIVE) hi title sang ber major title an ni a, kan hriatthiam theih dan tur chuan post card(sang ber), Upper Mid Card(sang ber dawt), mid card(a vantlang) leh lower card(a hniam ber)/jobber an ti bawk, chutiang division chuan wrestler te hi an then a ni. Superstars te hi ring chhunga an chet dan a zir leh mipui laka an tlak nat dan a zirin card sangah an push chho thin. Eg. Aj Styles chu kumin January khan WWE ah debut chauh mahse a ring action a hmuhnawm a, mipuiin an duh em bawk avangin September khan WWE World Champion an nih tir nghal. Ring chhunga che tha em em lo, mahse boruak siam thiam leh entertainer tha an nih chuan an champion tir ve thin tho. Eg. The Miz te pawh hi a Champion thei em em. Tin Overpushed an awm thei bawk a, Roman Reigns chu 2014 a singles a a kal hnu khan push nghal char char a ni a,Face(a fel) ni mahse 2015 Royal Rumble match ah a rawn chak a, mipuiin duh lo in an boo hluah hluah. A unaupa The Rock an a boruak chhe lutuk tura rawn khuh hram chauh zawk a ni. Kumin Wrestlemania a main event leh phei kha chuan face mahse boo tu a ngah hle a, a face character a tichhe zo vek. Amaherawhchu Seth Rollins, Edge, Randy Orton, Triple H te hi an Heel laiin sual thiam thin viau mahse lawm an hlawh tho a, haw tawk pawh an awm tho. Chan chawp a ni tih hre reng chung pawha mipuiin an huat theih chuan pro wrestler tha an nih zia a lang. WWE hi Democracy ram ang deuh a ni a, mipui duhthlanna an dah pawimawh hle. Mipuiin an duh miau chuan an superstar hlui te pawh an ko let fo thin. WWE hian 2013-14 vel khan fans te hnenah tunge WWE ah hian lo kir leh se an duh tih lam hawiin poll an siam a, fans ten koh let tura an duh zual Rob Van Dam leh Batista te chu hetih hunlai hian McMahon Family te chuan fans te tan an koh kir sak leh.

    4. IN RING ACTION

    Match hi referee in a duration tur a control vek thin a, inkhawih dan tur thlengin a hrilh thin. Pro Wrestling ah chuan weapons an hmang fo va, eg.Tables, Ladders, Charis, Sticks, Bell.etc. Dawhkan a an tlak thlak hian na viau tura ngaih ni mahse an hnungzang hlanga an tlak aiin a na lo zawk fo. An dawhkan hi keh hma tura siam a ni a, a then chu keh sa deuh reuh an hmang thin. Tin striking leh an hnek ah hian an chet ran deuh chuan intawh fuh loh an nei ve fo thin. (YouTube ah pawh checkout tur a tam). WWE danah chuan match laklawh laia superstar an inhliam chuan chawl lovin chhunzawm zel tho tur a ni. Eg. John Cena vs Seth Rollins, August, 2015 khan Rollins chuan Cena hi a khup in a hnar ah a do a, John Cena hnar hi thi zawih zawih mahse referee in match a ti tawp lo. He thil thleng hi an zir lawk dan a ni lo hauh lo va, tum loh deuha inhliam palh a ni. Sports dang Football, Boxing, MMA, Basketball tih velah chuan referee te hi kut thlak phalloh bur an ni a, kut thlak emaw tawngkam mawi lo hman khum chuan na taka hrem theih an ni. Mahse pro wrestling ah chuan a ni lem lo a, referee te hi superstar ten match laia an tawh fuh hian an na der ve fo thin.

    WWE ah chuan Boxing leh MMA te angin weight an thliar ve vaklo a, palian deuh leh lian vaklo pawh an inbeih tir thin. Eg. Big Show vs Rey Mysterio. Tin, WWE Cameraman te hian show an cover hneh hle a, angle dik thlapa focus tur chin tihlan an thiam hle a ni. Match neih laia turnbuckle atanga an zuan thlak te hian a zuan tu chauh an focus thin. A chhan chu ring a lo mu kha a lo zuan a rem nan a lo insiam tha thin. WWE Taped Shows (NXT, Main Event, Superstars, etc) te hi edit thin an ni a, scene fuh vaklo chu an paih thin a, a chang chuan mipui au thawm te hi show neih hmaa an lo record tawh an playback thin. Mahse hetiang thil hi Live Event Shows (Raw, SmackDown Live, Pay-Per-View) velah chuan an ti ngailo thung. Cameraman te hi an pawimawh hle a, match neih laia superstar ten move an lo inhrilh zeuh emawh a lo lan palh chuan an angle an thlak vat a, mipuiin a hre lem ngai lo. Hei vang hian WWE Shows te hi a hlawhtling te pawh a tih theih awm e. Tin, ring hnuaiah hian microphone te pawh dah thin a ni a, an han tlan vel leh an zuan te hian a ri a ring thin reng a ni.

    5. SCRIPTED AND UNSCRIPTED SCENCES

    Ring chhunga an match bakah an promo te hi script writer te ziah dan anga chang leh sawi chhuak vek thin an ni a, amaherawhchu story writer ten an ziah dan lo ang deuha thil thleng pawh a awm ve fo a, a vai chuan kan sawi seng lo vang. Tun thlenga WWE Fans tam tak ten an la hriat chu Survivor Series 1997 Shawn Michales vs Bret Hart match a Bret Hart an WWE Chairman Mr.McMahon chil a chhak khum kha a ni. Kha thil thleng kha Canada rama thleng niin Montreal Scewjob tiin tun thleng hian hriat lar a lo ni ta a ni.

    Tin hmai kawr vuah thin, Sin Cara pawh hi a entrance kan hmuh chuan ring hnuai chhuat atangin ring hrui sang berah ring chhungah a rawn zuang lut thin. He thil hi mihring pangngai tan chuan thil tih har tak a ni ang. Mahse a phenah erawh ring chhunga a zuan dawn hian a hnuaiah trampoline (spring) an dah thin a, a zuan san theih phah thin. Chu chu camera ah an ti lang ngai lo. Tin a hunlaia World Champion pawh lo ni tawh, a nupui leh a fate a thah hnua amah a inthat tia evidence an hmuh na atanga an sawi Chris Benoit pawh kha, WWE ah accomplished in mipui pawhin lawm viau mahse engtik ah mah WWE Hall Of Famer a ni ngai lovang. WWE Wrestler hlui fam ta Hall Of Famer an awm nual tawh a, amaherawhchu a thih dan rapthlak tak avang khan a thih tuk atangin Vince McMahon chuan on screen bakah WWE kaihhnawih hrim hrimah Chris Benoit a hming hi lam a ni leh tawh lovang tiin a sawi hmak mai. Tin kumin August Summerslam a Randy Orton leh Brock Lesnar inbeih tuma Brock a chet dan kha an zir lawk dan ang chiah a ni lo a, Brock khan duh aiin a khawih na a, scripted lo a a chet avang hian pawisa chawi tir a ni a, he show zawh hian Backstage lamah Brock Lesnar leh Chris Jericho te an insual a, Jericho hi a chet danah a lungawi vaklo ni ngei tur a ni.

    PG Era (2009) hma vel kha chuan WWE ah hian a hmuhnawm leh bawn thei ang bera a lan nan thisen hmuh tur a tam thin hle a, tunah erawh hmuh tur a awm khat ta hle. He an thisen chhuak thin hi an inkhawih nat vanga chhuak a ni lo tlangpui thin a, accident vangin thi erawh an awm fo. He thisen an tihchhuah dawn hian bladejob an hmang mai thin a, chu chu a tlangpuiin referee in an kawl mai thin a, camera a lan loh lai tein wrestler an pe ru zeuh thin. Mahse tunah erawh Vince McMahon hian Bladejob tih hi a phal tawh lo va, a chhan chu khawvel hmun hrang hrangah WWE Show hi entu an pung tial tial a, chung zingah chuan naupang te te te an tam avangin thisen lam tihchhuah a khap ta a ni. Wrestlemania 30 khan Undertaker leh Brock Lesnar te chu bladejob lo hman ruk an tum avangin a lungawilo hle tawh a ni.

    Off Script hi ring chhungah hmuh tur a tam lo hle a, mahse langsar tak pakhat a awm. Chu chu July 2011 a thil thleng a ni. He thil thleng hi WWE Fans tam tak tan chuan theihnghilh theih a ni tawh lovang. He post chhiar tu pawh hian WWE i en thin chuan he thil thleng hi chu i hria ang. July 2011 khan Raw ah CM Punk chuan Vince McMahon a puan a, WWE a lo tel tirh atanga a dinhmun te sawi kai zelina lungawilohna te a sawi chhuak hrep a, Main Card a awm reng a phu zia te leh a beisei ang a hmuh thin loh thu te thlengin a sawi fai vek a, a hnuah a mic an off sak hial. He promo a a thusawi hriat hlawh tak te chu “He company (WWE) hian Vince McMahon a thih hnuah chiah hma a sawn ang”tih leh “Enkawl turin a fate laktlakloh tak a dah” tih te. He a fate laktlakloh a tih hi Stephanie McMahon leh a pasal Triple H te an ni. He promo a a thusawi te hi creative lam ngaihtuah chhuah a ni hauh lo. Tin he promo hi a lar em avangin “Pipe Bomb” promo tia hriat lar a ni ta a ni. Chumi hnuah Punk hian contract a sign leh a, mahse January 2014 khan Wrestlemania 30 main event turin Vince McMahon an a duhloh bakah amah an enkawl danah a lungawi lo hle a, Triple H nen an inmil chiah bawk lo nen Royal Rumble show an neih zanah a titau chhuak a, a contract titawp nghalin pro wrestling a chawlhsan thu a puang a ,UFC ah contract a sign ta daih a ni.

    6. DON’T TRY THIS AT HOME!

    He sentence hi chu English chhiar thiam chin tan chuan sawifiah leh chuan ngai lovin kan hrethiam theuh awm e. WWE Superstars te hian kum tel tak meuh meuh ring chhunga an move hrang hrang tichhuak tur hian an bei nasa a, ring chhunga an move te hi nunna atan a hlauhawm em avangin khi sentence lar tak khi hman atanga tun thlengin an la sawi chamchi a ni. Nunna thap tak meuha bei an nih avangin inhliam phah leh thih phah te pawh an tam tawh a ni. Show an neih hma hian uluk takin an inzir hmasa phawt zel a, an thusawi tur thlengin an practice lawk vek zel. Tin an moves hrang hrang te hi kum tam tak an lo zir tawh a, ring chhungah hian a na lo thei ang bera inkhawih an tum thin a, amaherawhchu na ti thei ang bera an hmel nen in express chhuah an tum thin. Tha tawpin tang se chuan mihring pangngai tan chuan damchhuah na chi a ni lovang. An tih thin ang hi mi nazawng tih theih a ni lo tih hriat a tha a, ladder sang tak tak atanga an zuan thlak te pawh hian risk an la takzet a ni.

    Heng match hlauhawm zual – Hell in A Cell, TLC Match, Elimination Chamber, Extreme Rules,etc. angah phei hi chuan an inzir lawk nasa thin hle a, superstar vantlang mai mai an tel tir ngai lo.
    Khing kan han sawi tak zawng zawng atang hian WWE kalphung leh an thuruk thenkhat te chu kan han hre ta a, a vai vai chuan ziah sen a ni dawn lo. Heng an thuruk te hi puang chhuak mah ila, Pro Wrestling fans te tan chuan a hlutna leh hmuhnawmna a bo phah lo a, an inrelbawlna that zia leh an ropuizia tarlangtu mai a ni. Wrestling hi Combat Sports dang Boxing, MMA,etc. te nena tehkhin chi a ni lo va, line hran vek an nih avangin tehkhin phet chi a ni lo. Tin wrestling hi chu scripted action a nih avangin thutaka han lak chiam chi a ni lova, Entertainment show a nih na anga en thiam a tha ber. WWE hi chan chawp ni lo se chu an fans 50% vel hi chu an chan tawh ngei ang, amaherawhchu keini aia fing leh changkang zawk ten live a a hmuna an pawisa chawi an en phal a nih chuan a ngai hlu hle tihna a ni. Sawi hmaih tam tak pawh a la awm ang a, an chanchin leh kalphung a zavaia sawi zawh vek dawn chuan, lehkhabu a chhuah tham a tling hial ang.

    I duhtawk phawt teh ang.

    Aside | Posted on by | Tagged , , | Leave a comment

    LEGEND OF THE M’KIRIBON LAKE

    Africa ram a dil mak tak mai leh M’atai hnambo ta te chanchin mak tak mai chu.

    Khawvelah hian thil mak tak tak hi a tam mai a.Heng thil mak te hi tam tak chu zir chian an nitawh in engvanga mak nge an nih pawh zirchian an ni tlangpui tawh hlawm a. Tam tak te chu a chhan pawh an hmuchhuak mek zel bawk ani. Mahse tun tuma kan rawn sawi tur M’atai hnam tlemte ho, Central Africa a khawsa tehovin an sawi thin M’Kiribon lake’ chanchin hichuan khawvel hriat a hlawh lovin mi ngaihven ahlawh lo bawk a niang Google ah meuh pawh hmuh tur a vang em mai.

    M’atai hnam ho hi Central Afrrica vel a hnam tlemte khawsa, pem kual pem kual chi an ni a. Anmahni hnam hi 1000-2000 vel bawr vel khawsa a ngaih an ni a. Khawvel pawn lam atang hian tlawhpawh tu an awm lo em em mai a, tin anmahni pawh hian midan tlawhpawh hian ngaithei vak lo bawk a ni..
    An chanchin hi khawvel hian a hre tam lo hle mai a. An tawng hman ber hi a hranpa a a hming vuah a ni lo a. African hnam hrang hrang te tawngah a zawlpui deuh awm ang pawh a awm chuang lo a. Anmahni hi sapel a ram hnim remchang apiang ei mai chi an ni bawk. 1963 khan American Anglican missonary pahnih in an tlawh chhuak a, heta tang hian a ni he dil mak tak mai M’Kiribong’mbla’ ‘Kiribon lake’ chuan mingo ho hriat a lo hlawh tan na chu.

    He dil hi Central Africa a ngaw chhah tak mai chhunga awm ni a sawi a ni a, anmahni M’atai hnam ho chuan an pathian te chenna anga han ngai a ni. An sawi dan chuan he dil hi dil lian vaklo, tui luanglut leh luang chhuak awm miahlo a ni a. A tui hi a tlem ngai lova tin a tam ngai bawk lo a, a ngai reng mai a ni. Kumtin hian vawithum a rawng a inthlak ziah a, fur ruahtui tam laiin a fim kuk a, nipui khaw lum laiin a hring a, thlasikah chuan a eng(yellow) phut thin a ni.

    Hetianga a tui rawng a inthlak hunlai hian a tui chu a so bulh bulh thin a, hetih hunlai hian M’atai ho hian an chang a, damlo te tuiah chuan an hnim phum a, dam nan an hmang thin a ni. Anmahni ho sawi dan chuan he dil hian pemkual na hmun bul zelah a insawn ve thinan ti tlat mai a, pathian biak in an be hial a ni.

    He thil hi a awihawmloh angreng viau mai a, mahse American missonary pahnih in an va tlawh chhuah tum hian he dil hi an khaw bullawkah chuan a awm a ni a, mahse kum 10 hnu1973 a va tlawh chhuah leh an tum chuanM’atai hnam ho chu an lo pem sawn tawh a, chu dil pawh chu a lo awm tawh miah lo mai a ni.

    Tichuan an pem sawnna hmun chu an zawng ta a, mel 200 dawna hlaah khaw thar an lo din leh hman tawh a. Mak deuh mai chu Kiribonlake pawh chu chu an khaw thar bul maiah chuan a lo awm ve leh tlat mai a ni. An mahni sawi dan chuan “he dil hian an mahni hnam chu a veng a, an kalna apiangah a zui thin ani” an ti.

    Hemi tuma missonary pahnih te va kal leh hian he dil thla hi lak an tum a, vawi tamtak an thlalakna chuan an hmet amahse an rama an hawn a an thlalak te chu an han print chuan ramngaw thla bak engmah zuk lang miah lova mawle…mak ve tak chu a ni.

    Hemi dil mak tak mai leh M’atai hnam ho chanchin hi zirchian tumim 1998 khan British Explorer Jonas Willham-a leh a team te chuan an zawng chiam tawh a, mahse mak tak maiin heng hnam ho hi emaw, M’Kiribon dil emaw hian hnuhma takngial pawh zu han hmu hauhlova mawle…Khawi lamah nge an thang bo tak,a dil a pawh chu khawnge a awm tak tih pawh an hre chhuak zo ta lo reng reng a ni.

    Aside | Posted on by | Tagged , , , | Leave a comment

    Kovno Ghetto – Kima Sailo.

    Hnam tlem emaw sakhaw te zuitu minority te, an puala khua emaw ram bik siamsaka an dah khawmna hi Ghetto an ti a. Indopui pakhatnaa German-in sipai leh mihring tam tak a hloh leh a hnua ram hrang hrang ten an hrek a, a mualpho thei ang bera an siam kha ‘hnam feeling’ la na tak Fuhrer (Hitler-a) chuan ngaithiam thei loin kha’ng hun laia sawrkar leh sumdawnna lama dinhmun sang tak luahtu Jew mi te chu German ram tlukchhiat chhanah puhin Indopui pahnihna a chawk chhuak ta nghe nghe a nih kha. Tichuan Jew te chu an puala awmna tur bik Ghetto, Europe khawmual hmun hrang hrangah siamsakin namen loa nghaisak leh thah an ni a. Ghetto tlukpui tho, Concentration Camp an tihah pawh khawvela mi suatna rapthlak bera chhiar kumkhua ni tawh turin Gas Chamber-ah pawisawi lo nunau tam tak ur hlum an ni bawk.

    Lithuania rama Kovno khuaah hian kum sang tam tak kal ta aţang khan Jew mi te an lo khawsa tawh a, he khua aţang hian sakhuana leh politics thil avanga hnawhchhuah leh hruai kir vawi tam tak an lo tawk tawh ţhin. Chuti chung chuan Jewish hmun pawimawh tak niin an sakhaw inzirtirna lamah pawha hmun ropui ber te zinga mi a ni reng a; Synagogue te, hmakhawsang Jew ţawng zirna Yiddish sikul leh Damdawi In te ţhahnem tak a awm ţhin a ni.
    💨
    Kum 1940 June thlaa Soviet Union-in Lithuania a awp khan Jew mi te hi nekchep a tihduhdah an ni nghal a, chu a chhapah Lithuanian nationalist te chuan an ram Lithuania, Soviet Union-in a awp chhanah chuan Jew mi te chu puhin nasa taka thliar hran a, sawisak an ni bawk a. Chu tawrhna aia rapthlak tawrh belhtir tur chuan German chuan June ni 22, kum 1941 khan Soviet Union chu a han run thut mai a, Soviet sipai te chu um chhuakin Lithuania pawh chu a awp zui ta nghal a. September ni 28, 1939 khan German leh Soviet Union chuan Poland ram chu an insem a, chuta inremna ang chuan Lithuania chu Soviet Socialist Republic ram bung 14-na a lo ni ve ta a ni.
    💫
    Indopui pahnihna chhuah ţan tirh, kum 1939, vel khan Kovno-ah hian Jew mi 40,000 vel an awm a, German-in Lithuania a awp rual hian Jew Huatna (Anti-Semitism) khawng taka kalpui nghalin Jew mi tam tak chu thah an ni a, kum 1941 July thla chhung ringawt khan mi 10,000 chuang tihhlum an ni. Jew te khuahkhirhna dan tam tak zingah kawngsir mihring kalna tura an kal ve khapna thuchhuah te pawh siam a ni a, an kal a nih pawhin kawng sir ding lamah, pakhat te tea inzuiin an kal tur a ni tih te a ni nawk mai.
    💨
    Tichuan, Jew huatna chu nasa lehzuala inzirtir a uar zawka kalpui sauh sauh zel a ni a, chutiang atan chuan Kovno khuaah pawh hian Ghetto pahnih siam niin thirhlingneia hung chhuah vek a ni. Heng Ghetto te hi Lithuanian police te bakah German sipai ten an veng reng a, a vanglai chuan Jew mi 29,000 vel khung khawm an ni. Heta an dah khawm Jew mi te hi kum 16 chin chung lam chu German sipai te ralthuam leh indona hmanrua dang te siam tura hah thi kûla chhawr an ni a; German sipai officer te chuan zing lamah khalh khawmin a hlawm te tein an ţhen hrang a, an hnathawhna hmun tura phurh chhuah ţhin an ni. Zing lama hnathawk tura an phurh chhuah, tlai lama an chhung ten thlahlel taka an lo nghah, dama rawn let leh ta lo emaw an chanchin hriat zui tur awm ta reng reng lo te chu nitin nunphung a ni a. Mipa te chu chi thlah thei lo tura damdawi pek niin hmeichhe lo rai palh an awm chuan îhe loa tihhlum nghal an ni; Jew mi an inthlah pung tur a ni lo tih chu an Fuhrer thupek a ni tawp mai.
    💠
    Heti chung hian nau pai tawk an lo awm lo thei lo a, a khat tawka rawn endiktu German sipai officer nunrawng tak tak te laka nausen an thuhruk dan leh man chhuah an nih a an nghaisak tak dan te, an nu te nena an tihhlum dan chanchin lungchhiatthlak vawrtawp, ziah leh sawi chhuah hreawm tak tak a tam hle. Ţhenkhat vannei deuh te erawh nausen jection muhil chunga tlan chhuak thei ta te pawh an awm a; bawm chhunga khunga children’s home tlan thlenpui thei hram te an awm laiin an hmelhriat ngai reng reng loh thingtlang lo neitute kuta an fasên hlan ta tawp te pawh an awm bawk. Kovno Ghetto-a awm te ei leh in hi a chhe em em a, tuma’n khamkhawp an hmu lo. Chhangthawp leh Alu tlem te bakah kar khatah Sakawr chaw vawi khat an pe ţhin bawk.
    💤
    Indopui pahnihna vanglai tak, kum 1943 a lo nih chuan Kovno Ghetto-a Jew tam tak chu tihhlum an ni tawh a, kum 1944 July ni 8-a Soviet sipai Red Army ten Lithuania run tuma an rawn pan tih an hriat khan Jew la dam te chu German rama Concentration Camp hrang hrangah thawn darhin naupang leh nunau pawisawi lo thlengin, zahngaihna chhete mah awm loa ur hlum an ni. A la dam chhun khaw chhunga biru te pawh chu an bihrukna in chawpa hal hnan te niin; tam tak chu mei khu hakin an thi a, tam tak an kang hlum bawk. Heta dam chhuak mi 13 te chuan German sipai ho tena Ninth Fort an tih (a huhoa mi tihhlumna) hmuna mi sang tam tak an tihlum lai evidence tihchhhiat an tum lai thla te pawh an lo laksak nghe nghe a ni.
    💥
    Indonain a vawrtawp a thleng chho a, Jew huatna chuan zual lam a pan zel bawk a. German nationalist te chuan he khawvel aţanga Jew te nuai chimih hmiah chu an tum em em ringawt mai a ni. Tichuan kum 1943-1944 chhoah khan puitling mai ni loin naupang tihhlum runpui an nei leh ta a, a hmingah ‘Children’s Aktion’ vuahin naupang kum 12 hnuai lam sang eng emaw zat chu kah hlum emaw tihhlum tura Rela phurh bo an ni. Chu’ng hun lai mit ngeia hmutu pakhat Dr. Aharon Peretz, Eichmann Trial thuziak hi lo en ila:
    💥
    Kovno, March 27, 1944

    “Hospital bulah chuan motor hi a khat tawkin a rawn tlan reng a, nu nau pawmin an va pan loh leh naupang, hruaitu nei lo naupang te te te chuan an va pan ţhin a. Hnung lamah chuan German sipai pahnih, chu’ng nu leh naupang te misual ven taka veng te chu rifle nen an ţhu bawk a. A khat tawk chuan naupang te chu motor-ah chuan a theh hian an theh chho nawlh nawlh mai a ni.
    💥
    Chutihlai chuan nu pakhat mangang au thawm hi ka hria a, a fate pathum an chhuhsak a ni. Motor chu ţap chungin a han pan hnai a, sipai pakhat hnenah chuan, “Ka fate kha min pe hram rawh.” a han ti a. Sipai chuan, “Engzah maw? I duh chuan pakhat chu i la thei ang!” a lo ti a. Ani chu motor-ah chuan a lawn a, a fate pathum chu a han a en kual a. Anni chuan an lo ban ţheuh a, an pathum chuan a nu bula kal chu an duh vek a ni; nimahsela pakhat chauh thlang tura tih a nih avang leh thlan bik tur a hriat mawlh si loh avang chuan a tu a mah thlang ta lo chuan a chhuk leh a, ţap chungin kawtthlerah lam pan chuan kal ta a. Nu pakhat dang pawh chuan motor chu a vuan tlat a, a kaltir phal lo a ni. Chutih lai chuan hnung lama an sipai ui thlun chuan a seh ta nghe nghe a, ţap chungin motor chu a thlah ta a.
    💥
    Ka tukverh aţang chuan chutiang chu ka thlir nileng a ni ber mai.”
    💥
    Pic: Avram kum 5 mi leh a nau Emanuel Rosenthal kum 2 mi te, ‘Children’s Aktion’ March 1944-a an tihhlum hma lawka an putea’n thlalatu George Kadish a laktir a ni a, he thlalak lo chhuak hi an putea pawh hian Hitler-a thih hnuah a hmu ve leh chauh a ni. An awma arsi lem inbel hi German hoin Jew an chhinchhiahna (Jewish Star), tihluihnaa an belsak niin Emanuel-a phei hi chu Kovno Ghetto-a piang a ni nghe nghe. Cherub ang maia duhawm naupang pahnih, anmahni hre ngai lo leh hmu miah lo te pawhina an chanchin an hriat ruala an ţahpui fo ţhin si te hi khawvel awm chhungin theihnghilh an ni tawh ngai lo ang.
    💠
    “Fair was thy blossom, tender flower,
    That open’d like the rose in May;
    Though nursed beneath the chilly shower,
    Of fell regret, for love’s decay.”

    Aside | Posted on by | Tagged , | Leave a comment

    PEPTIC UlCER DAMDAWI -Dr. C. Lalrampana

    Tun tum chu a nat dan lam sawi vak lovin Mizo tual chhuak damdawi indigenous medicines leh natural & home remedy hrang hrang hmanga pumna peptic ulcer damdawi tha tak takte tarlang ila. Vawi khata hman rual nghal thup thup tur tihna ni lovin i hman remchan theih leh hmuh awlsam chi emaw a man tlawm tur chi apiang thlang mai rawh le.

    India PM rothap tak leh khawvel huapa hruaitu lar leh langsar Pu Narendra Modi pawhin India tualchhuak damdawi hlir hman theih hun thlirin hengho tihhmasawnna tur ruahmanna hrang hrang hi a duang mek nia sawi uar a ni.

    Hengte hian nghawng tha lo a nei ve em em lova a hautak lo bawk a, dam nghal vut vut lo mah se a dam a chiang a, a rintlak hle a ni tih hriain tangkai taka hman tum thin ang che.

    1. Balhla hmin pum 1 bawnghnute tui pawlh loh no 1 nen nitin vawi 2 zingkarah leh tlai riltam laiin ei thin tur. Iron ngei lo tan erawh chawei kham hnu minute 15-20-ah ei thin tur.

    2. Yogurt rialno 1-ah drumstick hnah rawtsawm 10gm chawhpawlh in thin tur.

    3. Saptheite atanga siam bawnghnute nitin zingkarah leh tlai riltam laiin rialno 1 zela in thin tur.

    4. Coconut tui rialno 1/2 zelin ni 1-ah vawi 4-5 in thin tur.

    5. Nitin zikhlum hel tui sawr rialno 1 zelin zingkarah leh tlai riltam laiin in thin tur.

    6. Aloevera tui nitin zingkarah leh tlai riltam laiin rialno 1/2 zelin in thin tur.

    7. Thingfanghma hnah darkar 1 chhum hnuah a tui thlifim nitin rialno 1 hmum 1/3 zelin zingkar, chhun leh tlai riltam laiin in thin a tha. A hel densawm tui pawh hman theih tho a ni a; mahse, chhum hmin hi tha zawka ngaih a ni.

    8. Japan hlo hel hnah densawm tui thlitfim rialno 1 hmun 1/3 zelin nitin zing, chhun leh tlai riltam laiin in thin tur. Japan hlo hi chhum hmin pawhin a tha tho a, ei pawh a nuam zawk.

    9. Mizo aieng hel densawm tui thlitfim rialno 1/2 zelah khawizu thirfiante 1 pawlhin nitin zingkarah leh tlai riltam laiin in thin tur.

    10. Nitin chaw vawi 3 zing chhun leh tlaiah tlemte tea eiin chaw ei kham apiangin sawhthing hring tharlam kutzungpui tiat vel ei thin a tha. A tui in emaw a dip ei ei pawh a tha bawk. Thana leh hriatna thazam tha lo tan erawh hman loh a tha.

    11. Tlangsam (Pholeng) hnah densawm tui rialno 1/2 zelin nitin vawi 3 zing, chhun leh zanriah ei hmain in thin a tha a, a chhum tui pawh a tha tho bawk.

    12. Kaihzawl pil chhum tui thlitfim nitin vawi 3 rialno 1/2 zelin zing, chhun leh zan mut dawnah in thin a tha.

    13. Kawlthei hmin hrisel tha nitin vawi 2 tukthuan leh zanriah ei kham apiangin pum 1 tal ei thin a tha a, a tui (guava juice) pawh in thin a tha. Kawlthei hian ril hnathawh a tanpui nghal bawk.

    14. Alu hel kawr kheh loh densawm tui nitin vawi 2 zingkar leh tlai riltam laiin rialno 1/2 zela in thin tur.

    15. Meihawl tui (Eucalyptus hawl) thlitfim vawi 1-ah rialno 1/2 zelin nitin zing leh tlaiah in thin tur. Meihawl tui hi vawi 1-ah in teuh emaw rei tak in a tha kher lo.

    16. Fartuah pil chhum tui thlitfim rialno 1/2 zelin nitin vawi 2 zingkarah leh tlaiah in thin tur.

    17. Fartuah parvar chi hnah chawhma lama lak kher chhum tui thlitfim nitin vawi 3 rialno 1 zelin zing, chhun leh zanriah ei hun hmaa in thin tur. Hei hi ril tha lo tan a tha lehzuala ngaih a ni.

    18. Ailaidum densawm tui thlitfim nitin vawi 3 vawi 1-ah rialno 1/2 zelin zingkar, chhun leh zanriah ei hmaa in thin tur.

    19. G. Mix Ephraim Herbal-in a siam nitin vawi 2 chaw ei khamah rialno 1 zela in thin tur.

    20. Liicorice zung atanga siam powder thirfiante 2-ah khawizu thirfiante 1 chawhpawhlin nitin v3 zing, chhun leh zanah thla 3 chhung tal ei tur.

    21. Hnim hnah nem chikhat Slippery Elm pil den dip rialno 1/2 leh tui chhuansu rialno 1/2 pawlhin nitin v2 zing leh tlaiah khel lova ei tur.

    22. Nitin purunvar mum 4-5 thial sawma eiin tui rialno 1 in zui thin tur. Hei hi thla 2 chhung tal tih thin tur.

    23. Hmarchapui hmin dip Nimbu tuiah tlem phula chawhpawlh in thin tur. A tirah rialno 1/2 vela inin tihtam tial tial thin tur a ni.

    24. Theihmu chikhat Bilberry rah hmin nitin ei thin a tha. Hei hian ril thali thlengin a venghim thei.

    25. Pa ei chi marshmallow phoro dendip thirfiante 1 leh tui thianghlim chhuanso rialno 1 chawhpawlhin nitin zing leh tlaiah in thin tur.

    Aside | Posted on by | Tagged | Leave a comment

    National Food Security Scheme hman a nih hnuah mipuiin buhfai tam zawk an dawng

    Food, Civil Supplies and Consumer Affairs Minister John Rotluangliana’nNational Food Security Scheme hman anihhnuah mipuiin buhfai tam zawk an dawng mek tih house a hrilh a.

    Supply Minister hian zawhna chhangin, AAY hnuaiah chhungkaw khatah kg-a cheng 3 zelin buhfai kg 35 pe a nihthu leh, hei hi chhungkaw khata mihring awm zat chhut kher lova pek a ni tih a sawi a, Priority Household family chu kg a cheng 3 tho in kg 5 pek an ni a ti bawk.

    He scheme hnuaiah hian PHH family member te chuan an buhfai dawn bakah buhfai kg 3 cheng 15 in a dil belh thei tih sawiin, National Food Security Scheme in a huam ve lohte chu kg ah cheng 15-in buhfai kg 8 pek an ni a ti bawk.

    Pu John Rotluangliana chuan, Mizoramah chuan National Food Security Scheme hnuaiah puitling leh naupang hrutrual an nih thu sawiin, kg 8 vek pek an ni a ti a, mipuite hnenah buhfai hi thla khatah quota full-a sem tura tih a ni naa, a latu tur lam thenkhat tan vawi khata lak vek a harsat deuh thin avangin siamremin thla khata vawi hnih emaw la turin tih a ni thin, a ti bawk.

    Aside | Posted on by | Tagged | Leave a comment

    State Finance Commission in village council te hman tur cheng vbc 21.20 a tuk chu hman a ni lo

    Finance minister Lalsawta’n kum 2015-16 atana Mizoram State Finance Commission in village council te hman tur cheng vbc 21.20 a tuk chu hman a ni lo tih a sawi.

    Nimin session-a zawhna chhangin Finance Minister chuan,Mizoram State Finance Commission pakhatna report angin kum 2015-2016 chhunga VC-te tana sum ruahman chu Cheng Vbch 21 Nuai 20 Sing 2 Sang 5 a ni a, mahse State Finance Commission pakhatna report hi kum 2015-2016 sum pekna turah Mizoram sorkarin a la pawm loh avangin hman a la ni lo a ti a, hei vang hian 2016-a sorkarin State Finance Commission pakhatna report a pawm hnua Local Body-te hnena sum release-na tura sorkarin Ofice Memorandum a tihchhuahah chuan Local Body-te hnena pawisa pek chhuahna tur chungchangah kum 2015-2016 atana Mizoram Finance Commission-in recommendation a lo siam chu pawisa liam tawh (lapse) anga ngaih tur a ni ang a, arrear emaw installment emaw angin emaw state sorkar hnenah phut theih a ni lo tiin hriattir an ni a ti.

    Sorkarin hetianga thutlukna a siam fel tawh avang hian kum liam ta 2015-16 atan bika Mizoram State Finance Commission-in pawisa pek tura a rawt hi, pekchhuah a ni dawn lo, a ti.

    Aside | Posted on by | Tagged | Leave a comment

    Zu card nei 70000 chuang tawh

    Mizorama MLPC Act dan hman a nih atanga tun thlenga zu lei phalna Card nei chu mi 70,889 an ni.

    Excise and Narcotics Minister Pu R. Lalzirliana chuan Ningani khan Dr K. Beichhua, Pu Lalrinawma leh Pu Lalruatkima te zawhna intawm chu ziaka chhangin zu in phalna card nei hi Aizawl district-ah an tam ber a mi 51,051an awm a ni a ti a. Mamit district-ah tlem berin mi 1,061 an awm a.

    MLPC Act hman ve lohna Siaha District-ah pawh card nei mi 1,322 an awm a, Lawngtlai district-ah an awmlo thung a ni.

    Minister chhanna atanga a lan dan chuan kumin October ni 31 thleng khan Excise and Narcotics department chuan zu chhiah cheng vaibelchhe 101 a lalut tawh a. MLPC dan bawhchhia mi 2,759 man an ni tawh a ni.

    Aside | Posted on by | Tagged , | Leave a comment

    Lottery buaipuitute’n Mizoram sorkar hnena an thehluh tur cheng vaibelchhe 11,808 leh nuai 77 zet an thehlut kimlo

    CAG REPORT: Comptroller and Auditor General of India-in Mizoram State Lotteries a chhui chianna-ah lottery buaipuitute’n Mizoram sorkar hnena an thehluh tur cheng vaibelchhe 11,808 leh nuai 77 zet an thehlut kimlo nia tarlan a ni.
    😴✳
    CAG-in lottery chungchanga thil awm dan a endik (audit)-na report- Performace Audit on Mizoram State Lotteries hi Ningani khan Finance Minister Pu Lalsawta’n Assembly dawhkanah a dah a. He report a a lan dan chuanlottery buaipuitu (Distributor) pali te hian kum 2012-13 leh 2014-2015 chhung khan Mizoram sorkar sum bawm (Consolidated Fund)-ah an sum hmuh atanga cheng vaibelchhe 11,834 leh nuai 22 chhun luh turah cheng vaibelchhe 25 leh nuai 45 chauh an chhunglut a. An la chhunluh ban’ cheng vaibelchhe 11,808 leh nuai 77 chu an chhunglut lo mai ni lovin Mizoram sorkar lamin chhunglut turin a ti bawk heklo niin CAG report chuan a sawi.

    Report chuan sorkarin lottery atanga sum a hmuh tur atanga chhuta a hmuh chhun hi za zela 0.22 chauh a nih thu a tarlang a. Lottery enkawl kawngah hian danin kaihhruaina a siam tam tak zawm a nih loh thu a sawi bawk a ni.

    Aside | Posted on by | Tagged , | Leave a comment

    NUPUI THATTU KUM 10 TANG TURIN HREM

    Nikum October ni 22 zana a nupui that-tua puh, James P. Laldawngliana, kum 42 chu Aizawl Judicial District, Additional Judge Pu Vanlalenmawia Court-in thiam loh a chantir a, kum 10 chhung lung in tang turin a hrem.

    James P. Laldawngliana hi Lunglei District-a Lungsen khaw chhuak a ni a, Lunglei Venglaia hun eng emaw chen an awm hnuah nikum khan a nupui, Pi Zonunsangi nen Thenzawlah pemin JNV Vengah mi in luahin thla 2 vel an khawsa hman a.James P. Laldawngliana hian a thiante pahnih nen Octoberni 22 tlai khan an In-ah zu an in a, a nupui hian a thiante hnenah a pasalin hal hlum a tum tih hrilhin, mahni insaseng thei lova a awm avangin khumah an mut thattir a.

    Tlai dar 6 velah a thiante hian hawsanin, hemi zan vek dar 12 velah James P. Laldawngliana hian a thianpa, R. Lalthangliana chu kai thovin a nupui awm dan chu a dik lohthu a hrilh a, an va enfiah chuan Pi Zonunsangi hi a lo thi feltawh a ni.

    Pi Zonunsangi thih thu-ah hian Thenzawl Police Station-ah thubuai ziahluh a ni a, a pasal, James P. Laldawngliana hi IPC Section 302 tlawhchhanin tualthah thubuai siamsak a ni a, vawiin khan a thubuai hi Aizawl Judicial District, Additional Judge Pu Vanlalenmawia Court-in a ngaihtuah hnuah, puh a nihnaah hian thiam loh chantirin kum 10 chhung lung in tang tur leh Rs. 2,000 chawi turin a ti a. A pawisa chawi tur hi a pek theih loh chuan ni 30 dang a tàn belh ang.

    Thiam loh chang ta hi a thubuai rem a nih danah hian a lungawi loh chuan Court sang zawka ngaihtuah turin a dil thei a ni. Pi Zonunsangi ruang endikna atangin a pasal, James P. Laldawngliana hian a thah hnuah a hal zui nia hriat a ni a, tun hma lamah pawh James P. Laldawngliana hian a nupui hi thah-ah a lo vau fo tawh a, hal hlum pawh a lo tum tawh thin a. A nupui a thah zan pawh hian a rui hle nia hriat a ni.

    Source : Dingdi

    Aside | Posted on by | Tagged , , | Leave a comment