G-20 SUMMIT-AH USMCA INREMNA AN ZIAK FEL TA: PRESIDENT DONALD TRUMP A HAWI VAH!

Nimin 30 Nov, a G-20 Summit, Beunos Aires, Argentina ah President Donald Trump, Canadian PM Justin Trudeau leh Mexican President Enrique Pena Ninato te chuan, North American Trade Agreement (NAFTA) thlakna turin US-Mexico-Canada Agreement (USMCA) chu an hming an ziak hnan ta rup mai. Hei hi US Presdent Donald Trump tan chuan hnehna ropui tak a tih theih awm e. A campaign laiin NAFTA hi thlak a lo tum tih sawiin, “NAFTA chu trade deal a chhe ber” tiin a sawisel thin a ni. “America first” leh “Make America Great Again” tithintu Trumpuia chu hetianga inremna Canada leh Mexico ramte a siam pui thei hi a hawi sang vah ta mai.

NAFTA hi kum 1993 khan Democrat President Bill Clinton hun laia siam niin, 1994 ah hman chhoh a ni a, he thil hian American sumdawngtute dikna humhalh kawngah chak tawklo tiin, sumdawngmi Donald Trump chuan US President a nih hma pawhin a sawisel thin a ni. Mahse, chuti maiin thil tih zung zung theih a ni bik lova. Trump Admin chuan June 2018 atangin Mexico leh Canada leh EU lakah “Steel” (25%) leh “Aluminum” (10%) chhiah (tariff) a han la bur mai a, Mexico, Canada leh EU ram 28 te pawhin Trump thiltih hi duhlovin an thungrul (retaliate) nghal a ni.

Mexico chuan US bungrua, steel, apples, vawksa etc ah chhiah a la nghal a. Canada pawhin steel, aluminum, zu-whiskey, serthlum tui leh food products ah chhiah a la zui a, mahse, a tawpah Trump chuan hnehna a chang ta a tih theih.

Canadian PM Justin Trudeau (liberal) chuan G-20 Summit a USMCA Agreement ziaknaah tel a tum lo zet a, mahse, Foreign Minister te ngenna angin a tel leh a ni. USMCA Agreement hi Justin Trudeau chuan a lawm vak lo niin a lang.

President Trump chuan, “Sumdawnna kawnga inremna (trade deal) lian ber a ni e” tiin ha hipin a fak a ni. He USMCA inremna ang chuan Canada rama General Motors siamna (plants) lian zet chu khar a ni ang a; US ah an insawn lut ang. Thenkhat chuan hetianga US inveng tlat (protectionism) leh anti-Globalist leh US Automobiles industry humhim tumna hi an sawisel hle a ni.

President Enrique Pena Ninoto chu Mexico ah thlawk haw nghalin, vawiina President thlan thar lakluh tur Andres Manuel Lopez Obrador chu vawiin lakluh tur anih avangin a haw nghal a ni.

US, Canada leh Mexico ram hian kum tin US$ tluklehdingawn 500 chuangin insumdawn tawnna an nei a, China leh EU aiin a lian zawk daih a ni.

Author: CT Lalrinawma

Aside | Posted on by | 1 Comment

Armstrong Pamei a’n naupang tanpui

Mizoram State Assembly General Election 2018 a Lunglei District a General Observer atana lokal zinga pakhat Manipuri pa Pu Armstrong Pamei, IAS chuan Lunglei Dist chhunga a zin kualna khua pakhat a tlawh Zehtet khua ah mipa naupang Lalrindika s/o Vanlalsiama kum 11 mi a piantirh atanga hmui kak a hmuh chu a lainat em em a… an chhungkua an harsat avangin engmah inenkawlna leh zaina tur an nei lo tih a hriatin a khawngaih lehzual a..

He mipa naupang hi Pu Armstrong Pame, IAS hian ama sum senga zai tir tumin Imphal, Manipur ah kal ve turin a ti a…
Zehtet atanga Lunglei an panna tur pawisa a pe a…

He mipa naupang hi vawiin (30.11.2018) khan Pu Armstrong-a (Observer) motor in Aizawl ah hruai phei niin Pu Armstrong-a chuan a driver te hnenah Aizawl atanga Churachanpur thleng Sumo driver fel tak zawng a… chumi rual chuan Churachanpur thleng Sumo a thawn turin a ti a..

Churachanpur ah Pu Armstrong-a hoten an lo hmuak ang a..

Imphal thleng an hruai ang a..chutah chian a hmuikak hi zai tura hmalak a ni ang a.. a senso zawng zawng hi Pu Armstrong Pame, IAS hian a tum sak vek dawn a ni..

Armstrong Pamei hi Facebook page kaltlanga donation hmanga Manipur- Nagaland, Assam panna Peoples Road (Mipuite kawng) km 100 laitu kha a ni a. A thiltih ṭhat vang hian Facebook chuan California-a an headquarter tlawh turin an sawm hial a ni.

Aside | Posted on by | Leave a comment

BLADENBORO KHUA TIRALKHELTU RAMSA MAK DANGLAM TAK CHU

Kum 1953 a ni a, krismas lawm hnu lawk chuan lo neitu pakhat hian an khawchhungah ramsa pian danglam tak mai chuan ui pakhat a bei lai a hmuh thu a sawi a, chu ramsa chu zawhte ang tak a nih thu leh a ui beih chu hnehsawh taka a chinleh vel thu a sawi a.

Bladenboro khua chu…

Bladen County, North Carolina (USA) chhunga awm Bladenboro khua hi hetih lai hian khaw lian lo tak a ni a. Vaihlo an thar hlawkin an sum lakluhna ber pawh a ni nghe nghe. Sawi tawh angin Bladenboro khua hi khaw lian lo tak niin mi 700 bawr vel awrh chauh an cheng a. Khaw inlungrual leh an hna thawh pawh in ang thum mai an nih avang hian an mahni tawkah an hlimin an khawsak sang lo mah se, an in pawh hlawm em em a ni.

Mahse, chuti taka inpawh leh inlungrual tak chu he a chanchin kan sawi tur ramsa mak danglam tak hian a rawn tibuai thung ta tlat mai. He khua hian an vaihlo chinte chu ui an ventir thin a, mahse, vengtu tura an ui dah te pawh chu ramsa dang lakah a him bik ta hauh lo mai.

He khua amite hian hetiang thil hi an la tawh ngai loh avangin lo neitu pakhat thusawi pawh chu an bengkhawn lo hle a. Mahse, a kum leha kumthar an lawm tuk chuan ui ruang pahnih an chhar ta nawlh mai. Han en mai pawhin chu ui ruang chu hnehsawh taka sawisak leh ngam takin a sawisatu chuan a sawisa a ni tih a lang nghal mai a. Chutah zet zawng lo neitu thu sawi kha awih loh chi ziazang a ni ta lo. An khaw mipuite chuan he ngaih dan hi an nei nghet ta nghal a; an khuaah chuan an ran vulhte chu engemawni hian a rawn pel thin a ni tih hi.

Eng Ramsa nge ni ngai…

Chu thil chu an tawh an tawh takah chuan veh leh chang pawh an awm tan ta a, hmu pawh an awm ta nawk mai. Mahse, UFO hmu anga inchhal an tam tluk zetin he thil hmutu nia inchhal pawh hi an lo tam ta viau mai a, an khaw Mayor phei chuan “hmutu inti nazawng hi awih sak chi an ni lo, za a 90-te chu an suangtuahna mai mai a ni a, hmutu inti zinga za a 10 vel chauh hi awih chi a ni” a ti hial. A hmu hnai pawlte sawi dan chuan chu ramsa chu lian tak pawh ni lo, hmai bial deuh, meng sen rem rum mai leh ha lian tak nei, sakei ang deuh tak, feet thum vela sei leh inches 20 vel awrha sang niin, mei sei tak a nei a, chutih rualin, zawhte hmel ang tak a nei, an ti bawk, a rawng hi a thimlam pang niin an sawi nghe nghe. A hniak ni awma an sawi an chhui dan chuan pound 90-100 inkar bawr vela rit ni turah an ngai; tin, a hniak hi ui hniak nen pawh a inang hle niin an sawi.

Mak tak maiin he ramsa hian mihring a bei ngai lo thung tlat, tin, ran a khawihte reng reng hi a hnehsawh thei hle a, an hrawkah sehin an thisen a hip sak thin a ni; an taksa dang erawh a khawih teh chiam lo thung.

He thil thleng avang hian reiloteah Bladenboro khua mai ni lo, khawpui lamte hial pawh a lo thang ta a, Police-te hialin an buaipui ta bawk, chanchinbuah te chhuah a lo ni takah chuan mitin ngaihven a lo nita; a hmingah ‘Vampire Beast of Bladenboro’ tiin an vuah ta nghe nghe. He thil avang hian Bladenboro hian ngaihven a hlawhin a lar phah ta viau a ni.

Hetia a lar chhoh takah hian kah tuma vehtu pawh an pung sawt ta viau a, Tennessee, Washington DC, New York tih vel atangte pawn he ramsa kah tum hian an silai nen an rawn thawk hial a ni. Hlawhtlinga sawi tur erawh an awm ta chuang lova. Hetih lai hian mipui pawh an fimkhur hle bawk a, a hmei apain chu ramsa mak tak mai chu hmuh thuta bei let ve nghal thei mai turin hmanrua an pai vek a ni.

Hetia man leh thah tuma an chet sup sup lai hian vanduaithlak takin a vehtute zing ami chu chesualin a thi ta hlauh mai a, hetiang tehnuaih thil a thlen tak avang hian an khaw Mayor leh Police hotu lamte chuan chu ramsa zawn hna chu bansan a that thu an puang zui ta bawk a ni.

Mak tak maiin…

Hetia veh an chawlhsan hnu lawk atang hi chuan he ramsa mak danglam tak hi a rawn inlar leh ta miah lova, a reh ve nghal mai nia. An ran vulhte pawh a rawn khawih zawm tak lovah chuan khaw mipuite pawh zalen takin an khawsa leh ta a ni.

A reh hlen awzawng lo mai…

A rawn inlarna atanga a kum sawmngana, kum 2003-ah chiah chuan chu khua bawk chuan buaina an tawk leh ta tlat mai. An ran vulhte chu a thi a thi leh ta mai a. Eng dang tih ni lovin kha ramsa bawk kha a ni. Tun tumah pawh hian a hma ami ang bawkin ui leh kel a khawih ber a. Mak tak maiin hetia an ran vulh ruang an chhar ho hian thisen an nei ngai lova, a bul velah pawh thisen far an hmu ngai tlat lo. An thisen a hip dan hi a mak dangdai hle. A hma ami ang lo takin tun tuma a rawn inlar lehah hi chuan tumahin a hmel an hmu ta miah lo thung. Chutih rualin an ranvulhte chuan an tuar ngat ngat thung si a ni. He thil thleng hian an khua a tiralkhel leh hle a, naupang pawh pawnchhuah an khap ta hial a ni.

Hnu chhuina chu…

Chu ramsa mak danglam tak chu Wild Life Biologist-ten an han chhui ta a, a hniak ni awma an ngaihte chu lain an han bei ta chiam a, eng ramsa nge tih chiang takin an hre thei ta chuang tlat lo. Rinthuin an sawi ta vel mai mai a ni. North America lama an ram zawhte chikhat Bobcat an tih ang chu ni deuh berin an ngai a, tin, South & Central America a ramngaw-a cheng thin zawhte chikhat Ocelot an tih ang chi pawh chu ni thei turah an ngai bawk a. Thenkhat chuan ramsa awm tawh lo (extinct) Carolina Panther a nih an ring thung a, a chhan pawh kum 1996 bawr velah khan heng Carolina Panther-te hi an la awm niin an sawi vang a ni,.

2053-ah…

A rawn inlar vawi hnihnaah pawh hian eng nge a nih chhui chhui mahse hriatchian a ni ta chuang lova. A mak lehna em em chu a rawn inlar dan atang hian kum 50 dana rawn inlar thin niin a lang, chuti a nih chuan hriat lohva lo awm hriat loh veka bo leh thin ramsa hlauhawm tak Beast of Bladenboro – eng ramsa nge a ni tih hriat chhuah theih tak loh, mak danglam tak bawk si chu a vawi thum nan kum 2053-ah a rawn inlar leh ang em ?

Aside | Posted on by | Leave a comment

Lawngtlai Dist Ajasora bialah December Ni 4 khian vote thlak that a ni dawn.

Lawngtlai District chhung, Tuichawng Assembly Constituency huamchhung a Ajasora ah hmundang rual a inthlanna neih zawh theih a nih loh vangin, Election Commission of India chuan December Ni 4 ah inthlanna neihthat (re-poll) turin ruahmanna vawiin khan a siamfel.

Vote nei mi 1080 awmna, Lawngtlai atanga KM 150 a hla Ajasora Polling Station ah hian November 28 khan VVPAT leh Control Unit lam a chiangkuanloh vangin inthlanna hi hmundang aiin tan tlai a ni a, EVM Engineer te thutchilhna hnuai ah, chawhnu lam ah vote thlak theih chauh niin, vote thlak theih hun chu zanlai dar 12 ah a tawp tak vangin vote thlak tur la awmten vote an thlak hmanlova, hei vang hian Returning Officer Pu R.Lalremsanga chuan thil awmdan Election thuneitute hnen ah thlenin re-poll a dil a, a dil ang hian vawiin khan Election Commission of India chuan December 4 zing dar 7 atanga tlai dar 4 inkar ah Ajasora Polling Station ah hian vote thlak turin ruahmanna a siamfel ta a ni.
Nilaini-a Mizoram puma inthlanpui vote thlaknaah vote thlakna khawl EVM chhia report a awm nual a, amaherawhchu vote thlak theihloh khawp chu Ajasora polling station chauh hi a ni a, hmun dangah chuan tluang takin inthlan vote thlak zawhfel a ni a, vote thlakah khan vote awm zawng zawng a\anga za zela 80.15 a tla a, postal ballot vote chhiar tel a la ni lo a ni.

Mizoram puma vote nei zat hi mi 7,70,395 an ni a, Vote tla te hi inthlang state dang 5 rualin December ni 11 khian chhiar a ni ang.

(Lawngtlai PTC)

Aside | Posted on by | Leave a comment

Party hruaitu ten inthlan an hmuh dan an sawi

Hun tawpa lei theih Mizo an lo tam- JV Hluna

BJP State President Pu JV Hluna chuan inthlan neih mek chu dik leh thianglim tih a sawi a ni a silai leh tharum thawh ni lo mahse hun tawpa lei theih Mizo an lo tam em em a ni a ti.

Vawiina kan corr in a kawmnaah he thu hi sawiin Pu JV Hluna chuan BJP chu sum ngah anga sawi a ni thin chu a dik lo hle a ni a ti a, ECI in a phal zat ang bak chu tuman an hmu lo ni a sawiin, Party dang ten sum an ngah em avangin an phak lo hle a, an chhiatpui bawk niin a sawi a, Mizo nihna leh Kristian nihna chu enthat a tul hle a ni, a ti a. Party dangin an puh chhiat ber BJP chuan Sum hmanga in leinaah an fihlim tih a sawi a ni.

Pu JV Hluna chuan tu party mahin Seat 20 an hmuh phak a rin loh thu a sawi a, BJP chuan Seat 10 chuang neih theih a in rin thu sawiin, sorkarna siam turin an in puahchah mek a ti a. BJP kaihhruai Sorkar siam tura an inbuatsaih mekah Party dang MLA te chuan an mahni party chhuahsan a BJP rawn zawm turin an beisei a, a bik takin Independent candidate tling an awm chuan BJP Party zawm turin a ngen tih a sawi a ni.

MPCC President Pu Lal Thanhawla chuan Inthlan chhungin Party thenkhatten phat rual loh in sum an chelek nasa hle tih vawiin khan Congress Bhavan-ah a sawi a. Hetih lai hian sum leh pai chelek lamah Congress Party-in sawi an kai ve lo a ti a. Pu Lal Thanhawla chuan Chakma ramah BJP ten sum an sem tam em avangin Congress Candidate pakhat chu an chan a rinawm tih a sawi bawk a. Congress party chu an chak ta a nih pawhin chak dan thiam tur leh an chak lo a nih pawhin puitling takin chak loh dan thiam mai tur a ni, a ti.

Inthlan result a chhuah hunah BJP te hian tan an la dawn a ti a. Meghalaya, Manipur leh Nagaland ah te pawh MLA nei tam lo mahse BJP an Sorkar theih nan a thawhpui theitu chu cheng vaibelchhe tam takin an lei a ni, a ti a. BJP pakhat tling a awm a, BJP ten Sorkarna an siam a nih chuan Vaibelchhe engzatin nge an hausak ang tih kha lo chhui zui turin Mizo mipuite a chah tih a sawi a. Kristian tam na Meghalaya leh Nagaland-ah pawh sum a an lei theih avangin BJP an Sorkar thei a ni a ti.

ZMP Chief Ministerial candidate Pu Lalduhoma chuan MNF leh Congress angin hun tawp dawna zei ve lo, tih thiam reng pawh ti ve duh lo an ni a ti a. Inthlanni ah mipangaite chu tihdanglam theih an nih loh laiin tih danglam theih erawh an awm a, a pawi hle a ni a ti a, MNF Party te hausakna leh sum an chelekna chuan ngaih a ti tha lo a, kawppui an nei ngei tih a chiang a, mi lei tuma vak vel pawh MNF an ni a ti.

MNF President Pu Zoramthanga chuan Inthlanna muanawm tak, fel tak leh thianghlim thawkhat, hmun thenkhatah fel lo han siamthat ngai awm bawk mahse, tluang taka zawh fel a ni a ti a. Mizoram pumpuiin a hmuh angin sorkarna an siam theih ngei a rin thu a sawi a, Party pakhat, inti-thianghlim ber, inti-Kohhran ‘bel’ ber, inti-fing ber leh inti-fel ber chuan tawngkam an duhtui lo ber a, an duh tawp bawk a, insawiselna chitin rengah an kal na ber a, MNF kawng hrang hranga an beihna hmuh tur a awm vek a ni, a ti.

Aside | Posted on by | Leave a comment

WILDLIFE INSTITUTE OF INDIA-A MITHIAM RUALTE’N MANIPUR-A RAN THIHNAA MAWHPHURTU CHHUI DAWN by Keimah Taia

“Preliminary report atanga a lan dànin heng Churachandpur, Imphal East, Kakching leh Kangpokpi tea ran thah an nihna ah hian keite/sanghar(civet cats) chikhat an inrawlh nia rin a ni”
~Minister Shyamkumar
Environment & Forest

Minister hian a sawi dànin heng thil thlengte hi chhui chiang turin Wildlife Institute of India atanga mithiam rualte rawih an ni a. Anni hian heng thil thlengte hi chhuiin Manipur Zoological Garden-a ramsa hran hrangte chaw ei dàn(pattern) an zirchiang bawk ang.
Churachandpur district-a sa ruang an hmuhte hi Autopsy lak chhin a ni a, report atanga a lan danah chuan heng ran taksa hek duai te hi ramsa ha hriam tak hmanga tih ni ngeiin a lang.

Hetianga thil a thlen hmasak ber tum chu October 27, Churachandpur district-a Chiengkawnpang khuaah niin hemi tum hian ar leh varak engemaw zat tihhlum an ni a. Heng thil a thlen hnuah hian lo thlithlaia lo chhuitu tur Special Surveillance team-te han din ve bawk mahse thil thleng hian kiam lam a pan chuang lova, hmun hran hranah a thlen belh zui zel zawk a ni.
Zirtawpni khan Thoubal ah vawk note ruang, a taksa chanve ei zawh tawh hmuh a ni a. Hemi hma ni lawk hian Kangpokpi district-ah bawngpui raipuar thi, a ki pahnih awm lo(lâk bo)hmuh a nih bâkah Kakching district-ah beram pahnih, an kawchhung lâk bo(ei zawh?) vek hmuh a ni bawk.
Mipui mangang chiai chuan he thil thlenga a mawhphurtu nia an rin heng sanghar/keite(civet cats) te hi kah tumin hma an la mek a, amaherawh chu forest minister chuan heng civet cats protected species-te hi pel lo turin mipuite chu a ngen thung a. Wildlife expert-te final report dawn a nih hma chuan hmalakna tak tak kalpui theih a nih rih theih loh thu sawiin rinhleh thilthu avang ringawta heng ramsate(civet cats) lo thah ngawt chu thil dik a nih loh thu a sawi bawk.
Heng bâkah hian Forest Minister Shyamkumar chuan mipui hlauhthawnna boruak tih daih nân thu sawiin heng ramsate(civet cats) hi henglai khaw bul kawr ruam velah hian hmuh tur an tam thute, mihring tâna hlauhawm an ni lem loh thute bâkah Forensic department lama mithiamte chu forest department task forces te nen tang kawpa hma an lak mek thu a sawi bawk.

Source: The Indian Express

Aside | Posted on by | Leave a comment

GOVERNOR RAJASEKHARAN IN SYNOD HOSPITAL LEH HMANGAIHNA RUN A TLAWH

Vawiin khan Governor Kummanam Rajasekharan chuan Durtlangah Hnuchham te enkawl hmun ‘Hmangaihna Run’, Synod Hospital leh Nursing School te a tlawh.

Hmangaihna Run leh Synod Hospital a tlawhnaah Governor Kummanam Rajasekharan chuan vantlang rawngbawlna kawngah Kohhran ten hna an thawk tha hle a ni tih a sawi a. Mahni lam inngaihtuah hmasa lova mirethei, fahrah leh mi harsa te enkawl hnathawhna hmun apiang te chu Pathian awmna hmunthianghlim a ni a ti. Mizoramah Healthcare hnuaia hmalakna ten hmun kilkhawr ber ber a thlen phak vek theih nana hmalakna te chu thil hmanhmawh thlak tak a ni a ti. Synod Hospital in kum 90 chuang tihdam rawngbawlna a kalpui thei chu chhuanawm a tih thu sawiin an hmalakna te pawh a thlawp tlat a ni tih a sawi a. Damlo enkawl dam tawhte zingah inenkawl man pe theilo tam tak ngaihdam an ni chu thil ropui tak a ni a ti a. Mi hausa leh rethei thliar hrang lovin a mamawhtu leh a pantu, damlo te tan tihdam hna nasa leh zuala kalpui turin Synod Hospital a thawk zawng zawngte chu a chah a ni.

Governor Kummanam Rajasekharan chuan Integrated Child Protection Scheme(ICPS) hnuaia Synod in a enkawl mek ‘Hmangaihna Run’ chu a tlawh hmasa a. Home chhunga inenkawlna leh inchhung hmun hrang hrangte a endik hnuin naupangte leh Home Mother te nen inkawmna hun an nei a ni. Home Superintendent Pi Vanlalsawmi hnen atangin report ngaihthlak a ni a. Hmangaihna Run hi kum 1984 khan din a ni a; tunah chuan sawrkar hmalakna ICPS hnuaiah Home dang te ang bawka enkawl niin naupang awm thei zat pawh 15 a ni. He Home a awm mek, kum 6 hnuailam, Mipa naupang 11 leh Hmeichhe naupang 4 te hi Home Mother 12 leh Staff 8 ten tha takin an enkawl mek a ni.

Hmangaihna Run a tlawh hnu hian Synod Hospital chhunga Ward hrang hrang te fangkualin damlote enkawl dan te a en a, Nursing School, Laboratory leh hospital room pawimawh te pawh a tlawh nghal vek a ni. Hospital a fankual hnuin Hospital puipate te nen Synod Hospital Director Office-ah inkawmna hun an nei a. He hunah hian Synod Hospital dinhmun tlangpui leh hmachhawp thenkhat te Dr LH Thanga Singson, Director, Synod Hospital hnen atangin ngaihthlak a ni. Kum 1928 khan Dr John Williams chuan Welsh Mission Hospital(WMH) leh Nursing School chu a lo tan a. 1958 kum khan WMH inrelbawlna chu Mizoram Presbyterian Church Synod hnenah hlan a ni a. 1994 kum khan Presbyterian Hospital tia hming vuah niin 2012 kum atang khan Synod Hospital tia hming thlak a ni. Tun dinhmunah Doctor 39, Staff Nurse 2017, Para Medical Staff 32 leh General staff 224 niin a thawktu zawng zawng hi mi 501 an ni a. Khum 355 awm mekin engtik lai pawhin khum awm zat atanga chhuta 80% chu luah khah deuh reng a ni. Synod Hospital-ah hian tunlai hmanraw changkang ber ber a awm deuh vek a. Kohhran enkawl Hospital an nih angin Damdawi In a rawn lut zinga mi tam tak damdawi leina leh inekawlna neilo te chu ngaihhnathiam thin an ni.

Kumin chhung bikah April thla thlenga mi harsa zawk Bill pe thei lote avanga Hospital account a pawisa dawn tur, lut thei ta lo zat chu Rs 337,88,317/- lai a ni. Synod Hospital chuan kumtin miharsa te enkawlna atan Rs 50 lakh atanga Rs 60 lakh a thehchhuak ziah bawk a ni. Dr LH Thanga Singson chuan kohhran dang te pawn Synod Hospital tan tanpuina an rawn chhunglut thin tih a sawi a. Hospital Building thar, khum 400 atanga khum 500 thleng awm theihna hmun din tumin hmalakna a kal mek tih a sawi a. Mizoram a Nursing School hmasaber , kum 1944 a Indian Nursing Council pawmpuina hmu tawh pawh Bsc Nursing zir theihna atan hmalakna a kal mek tih a sawi bawk a ni. Synod Hospital hotute chuan an Hospital awmna chu veng hmawr deuh a nih avangin a panna kawngpui chuan duhthu a sam lo deuh tih sawiin kawngpui tha zawk siam kawngah hmalakpui turin Governor chu an lo ngen a ni.

DIPR

Aside | Posted on by | Leave a comment

COACH ṬHA BERAH ZIDANE LEH DESCHAMPS

International Federation of Football History & Statistics ( IFFHS ) chuan kum 2018 a Club coach ṭha berah Zidane thlangin, National Coach ṭha berah Deschamps an thlang a, Coach ṭha ber lawmman chu French pa kutah a lut ve ve a ni!

Kum 2006 khân IFFHS best playmaker award chu Zidane hian a lo dawng tawh bawk a, playmaker leh Best coach award dawng kawp thei hmasa ber a ni. Season hmasa khân Zidane chuan Real Madrid chu champions league nomawi a chawi pui a, 296 point hmu in a chung ber a luah. Liverpool coach Jurgen Klopp chuan 109 pts hmu in pa 2 na a ni a, Man City coach Guardiola chuan 105 pts hmu in pathumna a ni.

2018 Fifa World cup a France champion puitu Didier Deschamps chuan 304 pts hmu in Best National coach ah thlan a ni a, France mi he lawmman dawng thei pa 4 na chiah a ni. Deschamps dawtah hian Croatia coach Dalic awmin 198 pts a hmu a, pathumna ah Belgium coach Martinez awmin, 84 pts a hmu.

Rd-mawia-ralte

Aside | Posted on by | Leave a comment

COACH ṬHA BERAH ZIDANE LEH DESCHAMPS

International Federation of Football History & Statistics ( IFFHS ) chuan kum 2018 a Club coach ṭha berah Zidane thlangin, National Coach ṭha berah Deschamps an thlang a, Coach ṭha ber lawmman chu French pa kutah a lut ve ve a ni!

Kum 2006 khân IFFHS best playmaker award chu Zidane hian a lo dawng tawh bawk a, playmaker leh Best coach award dawng kawp thei hmasa ber a ni. Season hmasa khân Zidane chuan Real Madrid chu champions league nomawi a chawi pui a, 296 point hmu in a chung ber a luah. Liverpool coach Jurgen Klopp chuan 109 pts hmu in pa 2 na a ni a, Man City coach Guardiola chuan 105 pts hmu in pathumna a ni.

2018 Fifa World cup a France champion puitu Didier Deschamps chuan 304 pts hmu in Best National coach ah thlan a ni a, France mi he lawmman dawng thei pa 4 na chiah a ni. Deschamps dawtah hian Croatia coach Dalic awmin 198 pts a hmu a, pathumna ah Belgium coach Martinez awmin, 84 pts a hmu.

Rd-mawia-ralte

Aside | Posted on by | Leave a comment

CHAMPHAIAH INTHLAN NEIH ZAWH TAK ENFIAH, VAWIINAH VOTE 40 TLAK BELH LEH

29th Nov. : Nimin November Ni 28, 2018 a MLA General Election 2018 neih zawh tak enfiahna leh zirchianna Post Polled Scrutiny chu vawiin khan Champhaiah neih a ni a.

He hunah hian Champhai District chhunga Assembly Constituency panga a inthlanna kalpui dan leh vote tlak dante enfiah a ni a. Assembly Constituency a vote tlak dan chawhrual aia za zela 15 a tam emaw, tlem emaw Polling Station a awm chuan Post Polled Scrutiny hmang hian chung Polling Station-te chu zirbing a ni a. Presiding Officers Diaries, Form 17 a voters ziah luhna leh lehkha pawimawh dangte endik a ni a. He hunah hian EVM/VVPAT chhiate, EPIC nilo hmanga vote tlak tam lamin za zela 25 a pel em tih enfiahte, Polling Station-ah tender voters panga aia tam an awm em tih thlengin enfiahna neih a ni.

Vawiin hian 21-Lengteng Assembly Constituency leh 22-Tuichang Assembly Constituency-te NIC Conference Hall-ah Pu Debashis Das IAS, General Observer hova endik a ni a. Lengteng Constituency-a Polling Station 27 a vote tla chawhrual za zela 80.89 anih laia, District chhunga Vote tlak thatna ber 21/19 Vankal Polling Station a vote za zela 95.38 tla leh District chhunga Vote tlak chhiatna ber 21/5 Hrianghmun Polling Station-a vote za zela 60 a tlak avangin heng Polling Station pahnihte hi enfiah a ni a, engmah diklo leh felhlel a awm lo tih hmuh a ni a. 22-Tuichang Assembly Constituency-a vote tlak dante enfiah ve leh niin diklo awm lo a hriat a ni.

23-Champhai North, 24-Champhai South leh 25-East Tuipui Assembly Constituency-te chu Observer’s Room, DC Office-ah Pu Narander Kumar Meena IAS, General Observer kaihhruainain endik leh vek a ni a, heng Assembly Constituency bial pathumahte hian diklo awm loa hmuh niin, enfiah bik Scrutiny tih ngai Polling Station a awm lo a ni.

Vawiin Scrutiny neihnaah hian Champhai District-a Assembly Constituency panga atangin RO, ARO, Candidate Election Agent te an tel a. Zawhfiah duh leh complain duh an neihte sawina hun siam sak an ni a, engmah harsatna leh thu thlen duhte a awm lem lo a ni.

He tih rual hian DC Office-ah Postal Ballot Paper hmanga Vote thlak dilte tan vote thlak theih reng niin, vawiin lamah Vote 40 a tlak belh leh a ni.

-DIPR

Aside | Posted on by | Leave a comment