Khuanglian’pa ramhuaiin an tibuai

Tahan awm tantirha an buaina.
Ramhuaiin an hmun an hauh tlat.
Tunhma, Tahan khua an sah hlim lai vel chuan Tahan leh a chheh velah thilmak leh ramhuai hnathawh mak deuh deuh sawi tur hi a tam khawp a. Tlang ram atanga Kawlphai ni sensatna hmun zuan an ni a, an luh tirh chuan lo an han vat a, tu ma la vah ngai loh ram un zet zet an vat a, khaw lum kenna chang hre lovin thing lian pui pui an kit a, an hah lutuk khaw lum bawk si chu an thawmhnaw nen tuiah an inchiah dai a, chu chu an taksain a haw hle mai a, an dam lo chuah chuah mai a ni. Thosilen an nei si lo, sikserh an vei a, kum tam an dam loh phah a. Kum thum li velah chuan hmeithai an awm thluah mai a ni. Chu nak alaiin 1918- ah hripuiin Zoram a fan chhuak a, hripui hlauvin mi tam tak Kawlphaiah an lut a, hripuiin a umzui zel a, dam renga inkawmte pawh zan an mut hlanin an lo thi mai a. Nat lawk an nei lo. Sainguauvate chhung pawh zan an mut hlanin an chhungin an lo thi reng mai a, fapa pahnih an nei na a, chi thlah sawi tur awm lovin an lo chhung thih vek a ni.

Chutiang dinhmun chuan Kawlphaia Mizote a tuam lai chuan, Khuangliana pa chuan tu ma la tukdarh loh ram ngaw a vat a. A lo vahna hmunah chuan thing-lubul a vat chhuak a. Upain thing-lubul țhutna lova neih chu an serh hle si a. Nimahse, Khuanglianpa chu pa sehhel leh ngawltawt tak a nih avangin a ngai pawimawh duh lo va, thing-lubul tlawhchhan chuan thlam a sa lui ngat a.

Zan khat chu thlama a riah laiin naupang pahnih, samkir bim bem hian a hnarkua an hawlh tlaivarsak a. Nakinah chuan ramhuai-ho chu an huangtau zel a, a chaw chhum hminsa ah te țiau leh hnahthelte an thlaksak thin a. Khuanglianpa chuan, “Tha tetein awm rawh u, Sapchhawna ka ko mai tur a nia,” a ti țhin a. Chung lai chuan Tahan khaw sattu Sapchhawna chu an chheh vela kawl-ho pawhin an fakin an nel hle a, Kristian țha tak a nih avangin, “Sapchhawna Pathian chu thil a tithei lutuk, Pathian huaisen tak a ni bawk,” an ti țhin a.

Zan khat chu Khuanglianpa muthilh laiin ramhuai pakhat chuan a lukham chu meilingin a lo muhsak a; ani thinrim chuan thingthunung chuhin chu ramhuai chu a vaw ta zawt mai a ni. Nimahse, chumi zan ațang chuan Khuanglianpa chu a damlo a, tuisik lem theilo hial khawpin a nâ ta a. A thlawhlai pawh thleng thei lovin thla ruk zet chu thi lek lekin a awm a. Nimahse, tual upaten an țawngsak a, a rawn damchhuak leh ta a ni.

Author : Andy K Zarzoliana   &nbsp

Advertisements
Aside | Posted on by | Tagged , , | Leave a comment

Zanlai Pitar dangdai

Zun in ching pitar chu.

Pu Aichhunga’ khan he a thiltawn mak chanchin hi a sawi fo țhin.

Chikha khuaa an awm laiin Halkha pa-ho nen Phawngpui ram velah an ramchhuak țhin a. Țumkhat chu an hlawhchham avangin an khua Chikha lamah haw rih lovin a țhiante khua Halkha ramah a chambang a.

Chumi khuaah chuan pitar damlo thi lek lek tawh hi a awm a, a thaw chauh an en a ni tawh a. Zan khat chu a thlen-in te chuan damlo kan an tum avangin amah chauhin in an nghah tir a. Zan rei viau hnuah pawh a thlennate chu an la rawn hawng thei lo va. Mutsan mai tumin a insiam a, pawn leihka ler thim chinah chuan a ding a, a zung thla tau tau a. A zun chu leiah a inkhawh ri har har a; mahse, a zun a tawp dawn hnaih lamah chuan a zun inkhawh ri chu a reh ta ta hmak mai a. A la zung reng chung si a chutia a zun inkhawh ri a tawp hmiah mai chu mak a ti viau mai a.

A ngaih țha lo chuan a dinna leihkapui hnuai thimtham lam chu a hmehenin a han chhun chu le!!! lapaw var ang maia pitar dawldang hian a kut khinghnih dawh meuhin a zun khawh thla chu a lo dawh heu mai hi a lo ni a! Chu a thil hmuh danglam tak vang chuan patling țhankin zet tawh chu mak tih luat avangin a țe țhawt hial a ni.

Ama sawi danin,” zing var ruala kan khua Chikha pan mai tur leh Nghalbuala tukțhuan fak hman tum ka nih avangin mut hma ka ngai a, leihkapui lera ka han zung chu pitar pakhat hian ka zun a lo dawh mauh mai a ni. Țhihna a awrh sen tuar lehnghal a. Khatia ka țe tak vak hnu khan, veng mawng lam ațangin lusun țap thawm a rawn chhuak ve nghal zat mai a, engvang chek nge ni, ka hmulthi a rawn tho va, ka mur sung sung thei a ni,” a ti.

Ka nu hian a sawi ve fo mai.
An naupan laia Luangmuala an awm laiin, an kawmchhaka pitar pakhat, Pi Dari an tih chu mak tak maiin mi zun in tur zawngin zan laiah a kalchhuak țhin a, a rawn hawn chuan a fenhnuai thlengin a hing rum rum țhin a, a kam chhe lutuk hi tuibur a dap ruai țhin a ni awm e. A chhungte chuan an manganpuiin an dang țhin a; mahse, a hun a rawn thlen tawh chuan mawlhtu a nei tlat a, a chhuak leh nge nge thin.

Rei tak chhung khum betin a damlo a, chumi hnu atang chuan a reh hlen ve ta chauh a ni.

Author :   &nbsp

Aside | Posted on by | Tagged , | Leave a comment

Ramhuai Antam vanga In hrang

Lungler khuaa antam zung maksak chu.
Ramhuai sual vangin In luah ngam lo.
Ramhuai phun Antam chu.
Lungler khua hi, Țiau chhak maia awm a ni a, khaw lian lo tak a nih rualin khaw hlun tak zawng a ni ngei mai.

Tawnphunga’ te nu-pa chu Thingsai ațangin Lunglerah an pem a, Lungler leh Thingsai hi khaw inhnaih tê an ni nghe nghe.

Hemi kum hian Tawnphunga nupui Zachhingi chu a raipuara nau a hring țep tawh nghe nghe a. Tawnphungate chhung chuan nul siamin vaimim leh anțam te an ching țeuh mai a. Tuk khat chu Zachhingi huan thlo chuan an huan kil lama anțam țawih duah hluah mai chu a chekthlu palh hlauh mai a. Mak tak maiin chu anțam ațang chuan thisen ang deuh hi a rawn hnam țuam țuam a, chu thil chu Zachhingi chuan a hlau ta hle mai a.

Chumi zan vek chuan Zachhingi chuan nau a hring ta a; mahse, a nau chu hlamzuihin a thi mai a. Zachhingi mumangah chuan naupang pakhat mitmeng pawl rem hian “i anțam chawhthluk tak kha keima chin a ni a, i phun nung leh ngei tur a ni,” a rawn ti țhin a. An ngaih a țha thei ngang lo va, nakinah chuan nauhring hlim Zachhingi chuan anțam chu a hmun ngaiah a ching leh a; nimahse, chumi zan ațang chuan an in chu ramhuaiin an luah ta a ni.

Zana an muthilh laite hian an chhuat laiah sakawr kepen thawm an hre thin a. An chawbel te hi thingrem chhungah a lo awm leh mai țhin a. Tin, zanlamah an in chhungah naupang tu tihhriatloh an hmu fo thin a. Tawnphunga mangang lutuk chuan an khaw chhak Dawn khuaa ramhuai hnawtchhuak thei a han ko a, nimahse chu ramhuai chu a chhuak duh reng reng lo va.

Ni khat chu Tawnphunga te se kaih hlanin a nupui Zachhingi chu chhuat laiah a lo muhil a. An inchhungah chuan palian pui mai hi a rawn lut a, Zachhingi mutui lai chu a awmah a nemsak ta chiam mai a ni. Zachhingi hlau thlabar chu pawnah a tlanchhuak a, an inah chuan kir ngam tawh lovin an țhenawmte inah a riak a. Tawnphunga lo thlen hnu chuan thil awmdan an hrilh ta vek a.

A tukah chuan an huana a nupui anțam chin țhang duah hluah mai chu a zung chawpin an lai ta a, mak deuh maiin anțam zung chu mihring pianzia ang hian a lo awm vek a. Hmeichhe pianzia ang a ni a, hnutê a neih bakah a serhhmul thlengin a lo țo iar mai a ni. Chu thil chu mak tiin an en huai huai mai a.

Dawn khua ațanga putar pakhat chuan lai chhunzawm zel tura a tih avangin an lai ta zel a, patling awm thleng an laih hnu chuan ruhkawl lian pui pui an laichhuak ta zel mai a, an ruhkawl laihchhuah chu bawmrangah an dahkhawm a, ruhkawl an laihchhuah zawng zawng chu 13 lai a tling a ni. Tin, mak deuh mai chu, heng ruhkawlte hi mihring khelruh ang deuh vek a ni bawk.

Chung ruhkawl an laihchhuahte chu an hlauh avangin daipawn ah an paih vek a, Tawnphunga te nupa chuan an in chu țhiatin Dawn khaw lamah an pem chhohsan ta a ni.

Author : Andy K Zarzoliana   &nbsp

Aside | Posted on by | Tagged , , , | 1 Comment

Damlai thla vak

1) Kan venga nu pakhat Siaha lama pasal zuk nei chu, a pasal Ramliana nen vawk leh ar vulhin ramah an riak a. Ramliana chu pa sehhel ve tak leh sa kap thei tak hi a ni nghe nghe a. Ni khat chu Ramliana’pa chu a damlo a, a nâ angreng hle mai a, zun-ek pawh a thiar thei lo va. Anni nupa chu khuaah hawngin a pa eitur sakhi sa-te an hawn a. Mahse an damlo chu pum lam fel lo a nih avangin doctor-in thil sak leh rum lam ei an phal lo va, Ramliana pa damlo lah chuan a eichak ngang mai si a, sakhi sa-rep chu ngen tak têin a ngen tlut tlut mai a. Chumi zan chuan an sakhi sa rapchunga an rep zawng zawng chu a tul chawpin a bo vek ringawt mai a ni.

An ran vulhte an ngaihtuah avangin an riaklut leh a. Ramliana chuan an vaua sakhi rahtlan chan tumin zanriah chhum hun velah a nupui chu a chhuahsan a. Khua a rawn tlai deuh deuh a, a thutna hnuaiah sakhi thawm ang tak a hre ta a. A han en chiang a sakhi pachal niin a hria a, a mei a hem tarh tarh pawh chiang takin a hmu thei a. Mahse chu sakhi a rawn lan chian hnu chuan, mak tak maiin a lû chu sakhi lû ni lovin, a pa lû a lo ni reng mai a ni. A hmel hmai mai bakah a samțuak var thlengin chiang takina hmu thei nghe nghe a; kah mi nia a hriat loh avangin rilru nuam lo tak chungin a hawnsan ta a ni.

Chumi tlai vek chuan, a nupui chu hlau thlabarin thlamah a lo awm a. Ramliana chuan thilawm dan a han zawh chuan a nupui chuan, “Nichin mai khan ka pa a lo kal a, mahse, thlam a rawn thleng theng thei reng reng lo va, ka bia a, min chhang thei miah lo a ni, in-ah damlo chau takin a awm kha a ni si a” a ti a.

Zanah chuan thlam hnuai kalkhang leh thlam bang vel chu hmawlha rin ang par par hian a thawm reng a. Ramliana chuan, “Ka pa, zah ngai ve deuh la maw le,” a ti a, chu veleh a reh ta vawng vawng mai a ni. Chumi zan chuan, zualko kâ ațangin in lama an pa damlo chu a thi tih an hria a, mak an ti kher mai.

Mihringte hian ngaihbel theih tura thil hmuhsual palh awm ve thin mahse, ngaihbel loh theih loh tur thilmak leh dangdai hi a thleng ve châwk reng a ni.

2) Luangmuala ka pute thenawm putar pakhat chu a damlo a, doctor’te chuan in lamah hawnpuia a ei theih zawngte ei tir mai mai tawh turin thurawn an pe a. In an thlenpui chuan a nâ zual sauh va, zun-ek thiarsak ngaiin a awm ta mai a. Chutia mahni pawh a inbengkang hleithei tawh lo a nih lai mek chuan veng dangah leh an thenawm hnaivaiah an chhungkhat lainate chuan an hmu ta zauh zauh mai a. An tupa mi ang pha zan lo phei chuan chiang lutuk mai hian an kawmchar behlawi zamna hnuaiah a hmu a, a sawi duh kher mai.

Nikhat chu ka pu thianpa a rawn leng lut a. “Pu Thang, hei i thenawmpa hi a kâng ve ta deuh a ni maw? Nimin tlai khan rawn len chhoh tum niawmin kan in lamah a rawn inhawl chho va, chaw kan lo ei mek bawk nen, tukverh atangin “khah, rawn leng lut rawh, kan kham țep e, i lo va tlangval tawh ve le!” tiin ka lo be luam a. kaițenah a rawn lawn chho va, a tiang hawl pawh kan kawngka biang pawn lamah a sawh ri tlat tlat a, khua a thim deuh tawh avangin inchhung lut tura kawng ka va hawn chu hmuhtur reng reng a lo awm tawh lo va, kan hmelchhiat lai a nan avangin a kir leh ni hmiang kan ti ngawt a,” a ti roh a. Ka pu chuan,” A..a bet viau a, nizan pawh hei kan nau ten an men deuh tituai a sin, a va mak awmve,” a ti ve a, mahse ka pu thianpa chuan a hmuhchian nasat zia leh a kawrlum rawng țial dan chenin midang an nih loh zia a sawi ve tlat mai a. Chumi tlai a chu putar damlo an va kan pawh chuan a kawrlum țial ngei mai kha a lo ha a, a mitmeng a tang chuan han vakchhuaka han che vel tur hmel a pu tlat lo. Tin a chhungten khum atanga a chhuk lohna chawlhkar ruk zet a nih tawh thu an lo sawi ve mauh mai.

A boral dawn zanah a nupui a inthiar a, a inthiar zo chu kawmchara vawkchaw pekna bucket a seng hawi lehtur, an lehhawi chiah chu, a pasal damlo chu a hmaah diar khimin a lo ding reng mai a. A nupui chuan, “Tei pa i lo tho harh thei a ni maw? tiin a pasal lu a khawih chu, a diarkhim chu a khawih tla tawp a, mahse a pasal chu a boral daih mai a ni. A nupui chu a țim sawng sawng a, a diar chu kengin khumlam a va pan a, a pasal damlo chu khumah a ngai ang chiahin a lo la mu reng a, mahse a diar khim kha a lu-ah hmuh tur a lo awm tawh hauh lo a ni. A nupui chuan a hlau hle a, pawna a fanute chu a ko lut a, chumi zan dar 11 velah a chu putar damlo chu a thi ta a ni. A boral hnuah erawh chuan a thla tih angreng hmuh leh sawi tur engmah a awm lem lo. Mahse hun enge maw chen chu a nupui chuan a hlau tlat mai a, mak a ti ve ngang nitur a ni, hemi chanchin hi a sawi chhuak ve fo mai.

3) Tum khat chu, Tlauhmun pitar pakhat Ngunțiali hi thinvungin a dam lo va, chakai leh sangha a rawp hle mai a. Chuvang chuan, an kawmchhakpa Kapthanga leh a fapa Hriatthanga, kum sawm mi vel chu sangha man turin maulawn ramah an kal a. Maulawn lui ah chuan sangha a lo tam khawp mai a. Tlai lam a lo ni a, Kapthanga chuan a fapa chu bukah chaw chhum turin a hrilh a. Kapthanga chuan pitar damlo tan chakai leh tumbu khawrhin lui hnar lam panin a inak chho zel a. Ni tlak fê hnuah pawh Kapthanga chuan rawn kir tih reng a nei thei lo va.

A pa nghaka ngawi renga lo țhu Hriatthanga chu lui mawng lam atangin mi tuin emaw an rawn au a. “Buangte, he lamah rawn chhuk rawh, kan hawng dawn e,” tiin an rawn au țhin a. Buangte tia a pa’n a koh thin avangin a pa emaw a tiin lui mawng lam chu a pan thla ta a. A hma lawkah aw chuan a ko thla ta a; mahse, a pa hmel reng reng hmuh tur a awm lo. Khua chu a thim fel a ni der tawh a. Hriatthanga chu a sir tawn tawn a tangin, “Buangte, Buangte, Buangte,” tiin an ko ta noh noh mai a. A hlau lutuk chuan țah pawh a țap ngam lo va. A aw hriat chu an țhenawm pitar damlo aw ngei kha a ni tlat mai a ni.

Chu aw bawk chuan, Kapthanga hnenah, “Ka pa, i fapa Lurh tlangah kan hruai dawn, țlak rawh, țlak rawh,” a rawn ti ve leh a. Kapthanga chu a chi-ai ta hle mai a, lui mawng lam chu hmanhmawh takin a zawhthla ve ta a. A khat tawkin a fapa chu a ko zel a.

Thui fê a zawh hnuah lungpui phena a fapa lo țhu khur hlak hlak chu a zuk chharchhuak ta hlawl mai ani. Khua an luh chuan an kawmthlang pitar Ngunțiali chu a lo thi fel tawh a, Kapthanga chuan chumi țuma an thiltawn chu mak a ti hle a ni.

Andy K Zarzoliana

Aside | Posted on by | Tagged , , , | 2 Comments

Damlai thla vak

1) Kan venga nu pakhat Siaha lama pasal zuk nei chu, a pasal Ramliana nen vawk leh ar vulhin ramah an riak a. Ramliana chu pa sehhel ve tak leh sa kap thei tak hi a ni nghe nghe a. Ni khat chu Ramliana’pa chu a damlo a, a nâ angreng hle mai a, zun-ek pawh a thiar thei lo va. Anni nupa chu khuaah hawngin a pa eitur sakhi sa-te an hawn a. Mahse an damlo chu pum lam fel lo a nih avangin doctor-in thil sak leh rum lam ei an phal lo va, Ramliana pa damlo lah chuan a eichak ngang mai si a, sakhi sa-rep chu ngen tak têin a ngen tlut tlut mai a. Chumi zan chuan an sakhi sa rapchunga an rep zawng zawng chu a tul chawpin a bo vek ringawt mai a ni.

An ran vulhte an ngaihtuah avangin an riaklut leh a. Ramliana chuan an vaua sakhi rahtlan chan tumin zanriah chhum hun velah a nupui chu a chhuahsan a. Khua a rawn tlai deuh deuh a, a thutna hnuaiah sakhi thawm ang tak a hre ta a. A han en chiang a sakhi pachal niin a hria a, a mei a hem tarh tarh pawh chiang takin a hmu thei a. Mahse chu sakhi a rawn lan chian hnu chuan, mak tak maiin a lû chu sakhi lû ni lovin, a pa lû a lo ni reng mai a ni. A hmel hmai mai bakah a samțuak var thlengin chiang takina hmu thei nghe nghe a; kah mi nia a hriat loh avangin rilru nuam lo tak chungin a hawnsan ta a ni.

Chumi tlai vek chuan, a nupui chu hlau thlabarin thlamah a lo awm a. Ramliana chuan thilawm dan a han zawh chuan a nupui chuan, “Nichin mai khan ka pa a lo kal a, mahse, thlam a rawn thleng theng thei reng reng lo va, ka bia a, min chhang thei miah lo a ni, in-ah damlo chau takin a awm kha a ni si a” a ti a.

Zanah chuan thlam hnuai kalkhang leh thlam bang vel chu hmawlha rin ang par par hian a thawm reng a. Ramliana chuan, “Ka pa, zah ngai ve deuh la maw le,” a ti a, chu veleh a reh ta vawng vawng mai a ni. Chumi zan chuan, zualko kâ ațangin in lama an pa damlo chu a thi tih an hria a, mak an ti kher mai.

Mihringte hian ngaihbel theih tura thil hmuhsual palh awm ve thin mahse, ngaihbel loh theih loh tur thilmak leh dangdai hi a thleng ve châwk reng a ni.

2) Luangmuala ka pute thenawm putar pakhat chu a damlo a, doctor’te chuan in lamah hawnpuia a ei theih zawngte ei tir mai mai tawh turin thurawn an pe a. In an thlenpui chuan a nâ zual sauh va, zun-ek thiarsak ngaiin a awm ta mai a. Chutia mahni pawh a inbengkang hleithei tawh lo a nih lai mek chuan veng dangah leh an thenawm hnaivaiah an chhungkhat lainate chuan an hmu ta zauh zauh mai a. An tupa mi ang pha zan lo phei chuan chiang lutuk mai hian an kawmchar behlawi zamna hnuaiah a hmu a, a sawi duh kher mai.

Nikhat chu ka pu thianpa a rawn leng lut a. “Pu Thang, hei i thenawmpa hi a kâng ve ta deuh a ni maw? Nimin tlai khan rawn len chhoh tum niawmin kan in lamah a rawn inhawl chho va, chaw kan lo ei mek bawk nen, tukverh atangin “khah, rawn leng lut rawh, kan kham țep e, i lo va tlangval tawh ve le!” tiin ka lo be luam a. kaițenah a rawn lawn chho va, a tiang hawl pawh kan kawngka biang pawn lamah a sawh ri tlat tlat a, khua a thim deuh tawh avangin inchhung lut tura kawng ka va hawn chu hmuhtur reng reng a lo awm tawh lo va, kan hmelchhiat lai a nan avangin a kir leh ni hmiang kan ti ngawt a,” a ti roh a. Ka pu chuan,” A..a bet viau a, nizan pawh hei kan nau ten an men deuh tituai a sin, a va mak awmve,” a ti ve a, mahse ka pu thianpa chuan a hmuhchian nasat zia leh a kawrlum rawng țial dan chenin midang an nih loh zia a sawi ve tlat mai a. Chumi tlai a chu putar damlo an va kan pawh chuan a kawrlum țial ngei mai kha a lo ha a, a mitmeng a tang chuan han vakchhuaka han che vel tur hmel a pu tlat lo. Tin a chhungten khum atanga a chhuk lohna chawlhkar ruk zet a nih tawh thu an lo sawi ve mauh mai.

A boral dawn zanah a nupui a inthiar a, a inthiar zo chu kawmchara vawkchaw pekna bucket a seng hawi lehtur, an lehhawi chiah chu, a pasal damlo chu a hmaah diar khimin a lo ding reng mai a. A nupui chuan, “Tei pa i lo tho harh thei a ni maw? tiin a pasal lu a khawih chu, a diarkhim chu a khawih tla tawp a, mahse a pasal chu a boral daih mai a ni. A nupui chu a țim sawng sawng a, a diar chu kengin khumlam a va pan a, a pasal damlo chu khumah a ngai ang chiahin a lo la mu reng a, mahse a diar khim kha a lu-ah hmuh tur a lo awm tawh hauh lo a ni. A nupui chuan a hlau hle a, pawna a fanute chu a ko lut a, chumi zan dar 11 velah a chu putar damlo chu a thi ta a ni. A boral hnuah erawh chuan a thla tih angreng hmuh leh sawi tur engmah a awm lem lo. Mahse hun enge maw chen chu a nupui chuan a hlau tlat mai a, mak a ti ve ngang nitur a ni, hemi chanchin hi a sawi chhuak ve fo mai.

3) Tum khat chu, Tlauhmun pitar pakhat Ngunțiali hi thinvungin a dam lo va, chakai leh sangha a rawp hle mai a. Chuvang chuan, an kawmchhakpa Kapthanga leh a fapa Hriatthanga, kum sawm mi vel chu sangha man turin maulawn ramah an kal a. Maulawn lui ah chuan sangha a lo tam khawp mai a. Tlai lam a lo ni a, Kapthanga chuan a fapa chu bukah chaw chhum turin a hrilh a. Kapthanga chuan pitar damlo tan chakai leh tumbu khawrhin lui hnar lam panin a inak chho zel a. Ni tlak fê hnuah pawh Kapthanga chuan rawn kir tih reng a nei thei lo va.

A pa nghaka ngawi renga lo țhu Hriatthanga chu lui mawng lam atangin mi tuin emaw an rawn au a. “Buangte, he lamah rawn chhuk rawh, kan hawng dawn e,” tiin an rawn au țhin a. Buangte tia a pa’n a koh thin avangin a pa emaw a tiin lui mawng lam chu a pan thla ta a. A hma lawkah aw chuan a ko thla ta a; mahse, a pa hmel reng reng hmuh tur a awm lo. Khua chu a thim fel a ni der tawh a. Hriatthanga chu a sir tawn tawn a tangin, “Buangte, Buangte, Buangte,” tiin an ko ta noh noh mai a. A hlau lutuk chuan țah pawh a țap ngam lo va. A aw hriat chu an țhenawm pitar damlo aw ngei kha a ni tlat mai a ni.

Chu aw bawk chuan, Kapthanga hnenah, “Ka pa, i fapa Lurh tlangah kan hruai dawn, țlak rawh, țlak rawh,” a rawn ti ve leh a. Kapthanga chu a chi-ai ta hle mai a, lui mawng lam chu hmanhmawh takin a zawhthla ve ta a. A khat tawkin a fapa chu a ko zel a.

Thui fê a zawh hnuah lungpui phena a fapa lo țhu khur hlak hlak chu a zuk chharchhuak ta hlawl mai ani. Khua an luh chuan an kawmthlang pitar Ngunțiali chu a lo thi fel tawh a, Kapthanga chuan chumi țuma an thiltawn chu mak a ti hle a ni.

Andy K Zarzoliana

Aside | Posted on by | Tagged , , , | Leave a comment

Rulpui Ai leh Pu Țhianzamunga

He chanchin hi, Methodhist Kohhran thlakip chhuak chanchinbu “Hriatna Robawm” chuan kum 2009 khan a lo chhuah tawh nghe nghe a ni.

Pu Țhianzamunga te chhungkua hi tunhma chuan Chin Hill ram, Chawhte khuaa awm thin an ni a, kum 2008 nipui lai khan an chhungkaw chungah mite mak tih thil mak tak a rawn thleng ta a ni.

Ni khat chu Pu Țhianzamunga leh a fapa chu saphu leh sakuh kaw lai turin an ramchhuak a. Ram pilril chin an thlen chuan puallawi chinah ințhenin an kalhrang ta a. Kawr ruam kiangah chuan sakhi patuai lo ding khur ngawr ngawr lai chu Pu Țhianzamunga chuan a hmu ta thut mai a. A chempui a phawrh nghal a, sakhi sahhlum tum chuan a va kal hnaih deuh a; nimahse, chu sakhi kiangah chuan saphai lian zet mai hi a lo inham nasa mai a.

Pu Țhianzamunga chuan tihbuai mi nia a hriatloh avangin kiansan thain a hria a, kiansan tuma a intihtuah lai chuan mak tak maiin chu saphai chuan a rawn bei ta mai a. Kawr chhungah chuan rualrem lo zetin saphai nen chuan an lum thla ta a ni. Pu Țhianzamunga chuan saphai luah chuan a chempui chuan a sat vak vak a, saphai chu a chalchang ta a.

A fapa chuan an thawmvang hriain an lam a rawn pa thuai a, saphai chu an hnukchhuak a, tawng 15 laia sei a lo ni a. Puah tura lui lama an hnuhthlak lai chuan a lû a rawn din ta ur ur mai a, a fapa chuan lung lian takin saphai lû chu phek vek khawpin a chhu chiam a, a thi felah an ngai a.

Pu Țhianzamunga chuan chemin saphai lu a han tan mai chu, mak tak maiin thlipui a rawn thawk ta chiam mai a. An kianga thingkung hrawl pui puite chu rawn tlu tur ang maiin an ri tuar tuar a. Chutih lai chuan an saphai chu lubung chung chuan a rawn che tha leh a, dung pil pilin a ding a, an kianga fahkung chawnpuar tia tiate chu a hem thlu țhuai țhuai mai a. Rawbulchhah an sat a, an vuakrawn chiam mai a, an vawhlum ta a ni.

Lui kamah an han puah a, thlipui chu chawl lovin a thaw vuk vuk reng a. A fapa phei chu a thauvah a man a, a che hleithei meuh lo va. Amah Pu Țhianzamunga chuan, “Mipui tam takin min thlir țhup ang mai hian kan inhria a, ka hmulthi a tho sung sung mai a, Ka fapa phei chu a hlauhthawng vang nge a chesual khut khut reng a, sawi kher lo mahse a hmelah a hlauthawngin a thlabar hle a ni,” a ti.

A fapa chuan in lama hawn thuai thuai a duh a; nimahse, Pu Țhianzamunga chuan a sa hawn ngei ngei a duh si a. Saphai pum an han keu a, mak tak maiin artui tia vel lunghlu var pahnih mum pal mai hi an haichhuak a, an kianga lung chungah chuan insi rialin an dah a, hlauh nen lawm nen an fawmkem a. An hnuah rangkachak tlawn ruk, kezungpui tia vela lian, inchi ruk laia sei an hai chhuak leh a, chu chu a hmaa lunghlu nena fun khawm an han tum a; nimahse, mak deuh maiin chu lunghlu, lungpui chunga an dah chu a lo bo daih ringawt mai a ni. Midang tumah lo kal an awm si lo va, mak an ti kher mai.

Khua a tlai tawh hle a, saphai sa chu hrang lian pui puiin an chan a, damdawiah a thau, a mít leh a siak an la a, chhawlin an fun a, thangțung hruiin an țawn a. Pu Țhianzamunga chuan a hnuaa sawi leh dan chuan, “Kan pa-fa khan hlauthawnna kan nei ru tlat mai a, kan inbiak pawh khan mumal nei lo takin an inbe khur hlawk hlawk a ni ber mai,” a ti țhin.

Saphao sa chu an hawn theih zaha tam an la a, hmanhawh takin an hawng hlawk hlawk a. Mahse hnunglam ațanga rawn umtu nei niin an inhria a, a khattawkin hnung lam an hawi zawk zawk reng a, a fapa phei chu puitling a ni uaih tawh nachungin a țap lek lek hial a ni. Thui tawk an thlen hnuah țhawngaleivir hian a fapa chu a rawn deng dawt mai a, a’n inbawihsawm nghal a, an rangkachak chu an han zawng ngial a, an hmuzo tawh reng reng lo va, a funna chhawl ringawt chu a lo awm tlawng a. A fapa chuan an saphai sa chu paih vek a duh a, mahse Pu Țhianzamunga chuan a phal lo va. Chutiang chuan khawchhung an lut a.

In an thlen chuan an vengho chuan hlauh an nei tih an hrethiam nghal a. A hre hmasa apiang an lenglut a. Pu Țhianzamunga chuan thil awmdan a sawi mawlh mawlh a, mak an ti kher mai. Chumi zan chuan Saphai mít chu chingal dahna saidawium-ah tha takin an khung a, phui takin an chhin bawk a. A siak chu sipai tuithawl-ah an dah a.

Chumi zan chuan Pu Țhianzamunga chuan mumang mak tak mai hi a mang a. A mangah chuan a fapa nen ramhnuaiah an lo awm a, khawchhungah chuan aurinna hian mi pakhat a au lauh lauh a. Chupa chuan, “Țhianzamungate pafa man tur a ni” a lo ti a. Tichuan an hnung lamah sipai pahnih an lo kal a, “Kan lalnu in thah avangin man in ni” an ti a, an hruai ta a. Lung-inah an khung dawn a, an țang nasa mai a, an sipai pakhat chu a nghawng an chhawkbunsak a. Sipai hotu chuan a sawisa hrep a, lung-ina thla li tang turin an lo ti a.

Chumi zana a mumang chu Pu Țhianzamunga chuan mak a ti kher mai a, zingah an saphai mít chu a lo awm tawh lo va, a siak pawh an dahna bur chhin inhawng miah lovin a lo bo daih ringawt mai a ni.

Saphai an thah ațanga ni hnih hnuah chuan Pu Țhianzamunga te pafa chi an khua a sik a, khum betin an nâ nghal char char mai a. Zawlsei khuaa țawngțai dam thei an kova, an tha thei chuang lo va. An sakawrte tiralin kawlphai damdawi an pan a, an țhachhuak thei reng reng lo va. Kawlpui khuaa dawi sut thiam Phung Tin-a an pan a, an țhatpui chuang lo va. Laitui khuaa an sakawr leitu Pu Khan Za Khupa chuan “Ramhuai lung-inah in tang a ni, in dekral duh tawh suh u, in thihpui miah lovang,” a ti a.
Mak deuh maiin an nat ațanga thla li- a ralah chiah chuan damdawi enkawlna pawh la lovin an rawn dam ta phawng mai a ni.

Pu Țhianzamunga hi Lalpa khawngaihna zarah a la dam hrisel hle a, a ramkal changa saphai a hmuh leh pawhin thah tinah a tih duh tawh reng reng lo a ni.

Author : Andy K Zarzoliana   &nbsp

Aside | Posted on by | Tagged , , | Leave a comment

MAWNGKAWHUR (GAY) NUPA AN VUAK LAI ENTU AN TAM HLE : KAN FATE TAN ZIRTIRNA THA DEUH A NI AN TI

Banda Aceh province, Indonesia ramamawngkawhur (gay) mipa pahnih, kum 20 leh kum 23 mi Court-in mipui hmaa vawi 85 zet vuak/hlap tura a hrem te chu tunkar Thawhlehni , may 23 khan, Muslim thlaserh Ramadan thlen hmain vuak an ni ta. Mipui entu 1,000 chuang awmin, chung zingah University kal lai an tam ber (Hemi chungchang hi MSR-ah post tawh a ni).

May 23-a mipui hmaa hemi te nupa-mawngkawhur an vuakna hmun hi Synhada Mosque Plaza, Banda Aceh province ah a ni a, mipui lo kalkhawm te chuan mit tla dawnin, en nawm mak tak hmuhin an thlir huang mai a ni! An vuak tan hmain Quran bua thuchang awmte chhamin, zai te pawh a awm a, Quran bu thu leh hla angin an hla sak chu, “Pathianin mipa leh hmeichhia nupa turin a siam a…” tihte a ni. Syiah University a zirlai engemaw zatin an vaw laichu a hmunah an thlir a ni.

Murleili, kum 65 a upa chuan, “Sharia dan anga an hrem lai hi ka hmu duh a, enge a hremna chiah chu ka hre duh. Kan fate tan zirtirna tha tak a ni dawn a ni” a ti. Hetia mipui hmaa vuak an nih hian a vawtute hian dan ang thlapin, police endik puiin an kut lek dan thlengin an en dik a, 90% vela zak kau hakin an vaw tur a ni. Kum 23 a upa zawk chu khabe hmul a nei a, na tilutuk hmel a pu lova; kum 20 mi zawk erawh chu a tap deuh pur niin an sawi, na a tih hmelin an vuak vawi 83 na tlin hmain, a laklawhah a tuihal chu plastic novin tuite pawh an intir a, chutih lai pawhin a maimichhing tlat, an ti. Entu mipui tam takte a hmu ngamlo te pawh a ni ta ve ang, a zahthlak awm si a.

Banda Aceh hmunah hian nikumah hmeichhe 4 te chu an inchei sexy lutuk bawk nen, Uire a puhin vuak an lo ni tawh bawk. “Uire denhlum” ai chuan, vantlang hmaa han invuak thrak thrak chu a la zia zawk awm e. Human Rights group lam chuan hetianga thiltih hi Indonesia-moderate Muslim ram chu Islamic fundamentalism-ah a tluk luh tanna niin an ngai a, thenkhat chuan “sakhua leh politic inchawhpawlhna”(toxic of mix religion and politics) hrichhiain Indonesia boruak thiang chu tibawlhhlawh mekah an puh thung.

Jakarta khawpuia Kristian Mayor awm chhun Basuki-Ahok chu inthlanah a chak loh veleh, Quran sawichhia (blasphemy) a puhin kum 2 atan tan tir nghal a lo ni tawh a, tun hnaiah Jakarta hmar lama Gay-ho “sauna meeting” an tiha tel mi 141 zet man khawm an lo ni tawh bawk. Indonesian thenkhat chuan “Gay ho chu Muslim an ni thei lo (gay people, no Muslim)” tih ngaihdan an nei a ni.

Kum 1998-a Dictator Gen. Suharto paih a nih hnuah media zalenna lo awm tanin, fundamentalist/conservatist-holeh sakhaw mite aw a lo ri ring chho tan a ni. Kum 2004 ah pheichuan Islamic Defenders Front (IDF) lo ding chhovin, chungho chu Tsunami-in an ram nuai chiam khan ruang tam tak tuipui atanga la chhuakin an buaipui a, an hmingtha hle a ni. Mipuite chuan IFD chu “pasaltha” hmuhin an hmu a, an ngaisangin, mirethei zingah pawh an tla na hle a, chung mite chuan Jakarta Mayor “Ahok” chu,”A chhang eitute doral an chang zo ta” tih ang mai khan, Quran sawichhiaa puh kawngah chuan lunga den hlum hial an duh leh ta si a ni. Mayor Ahok kha Muslim zingah pawh a hnathawh that leh eiruk a duh loh vangin a lar hle.

Bandah Aceh province hi “Mecca Varanda” tiin an lo ko hial thin reng a, Indonesia Central sorkar chuan mahni rorel inreltheihna (autonomy) sang tak pe in, 2001 atang khan Muslim dan khirh “Sharia Law” hman an titlu a ni. He Sharia Dan ang chuan Zirtawpni a Muslim Prayer a tel lo mipa te, playing cards/carrom board pen a tawngtai tura kal lo te, Zu in leh Mezial zu leh Uire, Gay etc. te chu mipui vantlang hmaah vuak tur an ni! Mizoramah hmang ve ila chuan ni tin vuak tur, en luih luih tham tur hi kan awm mial mai thei e?

IDF te chu police ni lo, mahse, Indonesian “Rilru Police” (unofficial morally police) angin an che chhova, anni hovin tling lova an hmuh chu hrem tur an ni tawp mai! Banda Aceh-ah chuan miten gay /lesbian an nih leh nih loh sawi kher kha tul lova, “Don’t ask, Don’t tell” policy kal puiin, Banda Aceh hmuna gay-hote chu an mangangin an chiai ru chho hle a ni.

Hatoya, Gay Rights activitist ve thung chuan May 23 a an vuak takte nupa enkawl zui nan tanpuina a khawn zui a, mahse, Banda Aceh a misual (thugs) rual ten an beih a hlauh vangin, “Theih tawpin tanpuina kan thawk zel ang a, underground-in kan bei ang. Bandah Aceh hi kan chhuahsan lo vang” a ti.

Mizote zingah pawh danglam mek khawvelah kan chen miau si avangin, human rights base-in “Gay Rights activist” te an lo la chhuak ang. Supreme Court pawhin “Gay-homosexuality” chungchangah thutlukna te a la siam mai thei (tunah pawh ennawn (review) tur anga sawina a awm).

Hetiang hunah hian Mizo society leh kohhran-ten engtinnge kan lo thlir ve ang? Ngaihtuah tham tak a tling.

Author : Ct Lalrinawma   &nbsp

Aside | Posted on by | Tagged , , , | Leave a comment

ZONUN MAWI- Lal Chungnunga, Ex. CYMA President.

Bus-ah i chuang a, i bula ding, seat chang ve lo kha engatinge i seat-ah i țhut tir? bus fare a tumsak che em ni? tumsak lo, nang aia a upat avangin i zah a, i seat i kian mai a ni. Ruaițhehnaah chaw dawh turin i intlar a, i ril pawh a țâm ve tawh. Mahse i hnunga putar chu i kiana, i dawh hmasaktir țhin. Hei pawh eng dang vang mah a ni lo, i Zonun zemâwi lo lanchhuah vang a ni. Zinnaah mi motor chhia a lo ding a, motor chhe siam thiam miah lo chunga “engtizia nge”? ti-a i din chilhna chhan pawh zonun zemâwi hawihh^wmna nangmaha nung reng kha a lo chhuah vâng mai a ni. Zing dar 2 a ni tawh a, mitthi dar ri val val chuan i muhil tui lai a tiharh che a, YMA tlangau-in tunge thi, engvanga thi nge tih a rawn puanga, vanneihthlak takin i chhungte an ni lo hlauh mai. Mahse i muhil zui thei ta lova, chutiang ang hunah chuan țanpui ngaite țanpui turin ruahsur hnuai-ah pawh kê i pên țhin. I exam hun a hnai, a nih loh leh a Shillong-a lehkha zir kan intih hmuh tan tirh lam khan Khasi ho chuan “Mizote chuan mitthi an lawm a, tui tak leh hlim takin ruang an zaipui tlaivar a, a tûkah phûr takin thlan an lai leh țhin” min ti. Mitthi lumena hlim viau thu a awm lova, thlan laih phûr viau thu a awm hek lo, kan mizia an hre lo a ni. Kumin kumtir lam khan Tlungvel tlangval pakhat a bova, nasa takin khawtlangin an zawnga, mibo zawng tlangval tlawmngai hnatlangte zanah an lo hawng a, dawrkawn ah nulaten thingpui nên an lo hmuak a, pa pakhat chu lo ding chhuak in “Mizo kan ni kan hmel a țha” tih hla thu hi a sawi a, mibo zawng tlangval tlawmngaite hmel kha țha a ti hle a ni. Rîkrum thil a lo thlena kan fuankhawm thuai țhinte, damlo mangangte hnena a thlawna thisen kan pe țhinte, hmeithai In kan sak sak țhinte leh țanpui ngai YMA ten kan țanpui țhin hi chu a ropuiin a hlu êm rêng a ni. Ngaihtuah ngun ngai ta chu a chunga kan sawite khi tuna kan dinhmun, tuna kan mizia hi a la ni em? tih hi a ni.

Vawi khat chu YMA programme hmangin thingtlang khua, Aizawl ațanga km 170 vela hla ah ka zina. “Aizawl zaithiam rawn hruai hram ang che” an tih avangin mipa pakhat leh hmeichhe pakhat ka hruai a. Kan haw lamah chuan pitar kum 70 mi ka phur tel a. Chu pitar chuan “motor hi ka rui leh țhin, tukverh bulah ka lo țhu ang e” a ti a. Ka zaithiam hruaite chuan motor an rui lo, mahse an kian duh lo. Aizawl city bus-ah hian a awm nêm zawk hmeichhia hrim hrim chu sawi loh, aia upa tar chak lo seat kian thei lo, ken tur a ni tih pawh hre lo, High School naupang chu sawi loh, College zirlai leh țhalaite zingah an va tam tehlul em! Mizo zia hre lo țhalai duh aiin kan pung chak ta hi a pawi a ni. Anmahni thiam loh a ni vek lovang, a zirtirtu tur nu leh pa thiam loh a ni tel ngei ang.

Ei leh in-ah hian tunlai hian Mizozia hawihh^wmna a lang ta lo bawk. Fatu-ah ka țang fova, țhalaite zingah hawihhawmna hmuh tur a vang ta hle a ni. |um khat chu mo lawmna ruai țhehnaah chawei tur an intlar țhup a, tlangval pakhat chuan a hma chiah a ding putar pakhat chu ” ka pu, ka hmanhmawh deuhva….” tiin a hmakhalh a, zahna chang hre hauh lovin zu bâr tûn tûn ngam a! Kawng laka motor chhia, ûksak miah lova tlan pêl țhin driver an tam sawt hle mai. Hawihhawmna hi kan mawipui a ni tih hria a kan zir thar a țûl takzet a ni.

Doctor, super specialist pawhin en se “nula, tlangval, nang zawng i hrisel e” an tih ngei ngei tur khawpa hrisel si, eng mitthi d^r mah ina a kaih harh zawh loh mutui țhalaite zîngah an pung zel hi punna țha a ni lo bawk. A thuhrimah, eng mitthi d^r mah in kan thin a țhawng ta miah lo mai hi a MAK ta a ni. Tunhma chuan thih dan rapthlak deuhva thi an awm chuan Zoram a dêng chhuak țhin a nih kha. Mizo nih tinuamtute leh kristian zirtirna lan chhuahtirtu kan nunze mawi, mi zawng zawng tana entawn tlak kan neihte hi khawvel hriata kan hming ti thangmawitu a nih zêl theih nan uar leh zualin i chawi nung zel ang u khai.

Aside | Posted on by | Tagged , | Leave a comment

Champions League Quota Bihchianna by Bena Hmar

Champions League leh Europa League Final chu khelh hmabak mai in a awm mek a, heng intihsiakna pahnih atanga season thar a League quota awm theih dan leh League lama nghawng a neih theih dan chu heng te hi a ni.

Rules pangai :

– Champions League champion hian season tharah Champions League Group Stage atangin an khel tan thei ang.

– Europa League champion erawh chuan Champions League play-off atangin bul an tan thung ang.

*Champions League a champion club te a zirin Europa lama rules a danglam theih dan :*

– Champions League a champion in an ram league hmanga season lo awm leh tur Champions League Group Stage an lut thei a nih chuan Champions League lama champion in Champions League Group Stage an luh nghal theihna quota kha Europa League lamah a chhuk anga, Europa League champion in Champions League Play-off khelh ngai lovin Group Stage atangin bul a tan thei dawn tihna a ni.

Entirnan Champions League Final khel tur pahnih Real Madrid leh Juventus te hi an ram ve ve ah an Champion a, season tharah Champions League Group Stage an qualify sa tawh avangin Europa League lama Champion in direct in Champions League Group Stage an khel nghal thei dawn tihna a ni a, Manchester United hi Europa lamah an champion a nih chuan season tharah Champions League play-off khelh hah ngai lovin Group Stage an lut nghal thei dawn tihna a ni.

*League hrang hrang in quota an neih theih dan :*

Europe lama club te chet that dan a zirin league hrang hrang te hi point pek an ni thin a, chung zinga point hmu sang pathum te hian Champions League quota pali(4) an nei a, tunah hian Spain, Germany leh England te hian point hmu sang in Champions League quota pali(4) an nei mek.

Hetihlai hian Europe lama club che tha khat Serie A lam te chuan Champions Leageu quota pathum(3) chiah an nei a, league tenau deuh European Competition a che tha vak ngailo league te chuan quota pahnih(2) te, pakhat(1) te leh ram league champion in Champions League Qualifer an khelh phawt ngai league te an awm ve bawk a ni.

*Ram pakhat atangin a tam berah club engzah in nge Champions League khel thei?*

UEFA Rules-ah chuan ram pakhat atangin a tam berah club panga(5) in Champions League an khel thei ang.

Champions League quota pathum(3) nei league a club te Champions League leh Europa lamah Champion ta se, Champions League leh Europa League a champion club pahnih te kha an ram league-ah che tha lovin an ram league quota hmangin Champions League season tharah khel phalo ta se, chumi ram league chuan Champions League quota pathum(3) atangin panga(5) an nei thei dawn tihna a nih chu.

Hetihlai hian Champions League quota pali(4) nei te ah a chung a kan tarlan ang hi an chungah rawn thleng ve ta se, a tam berah ram pakhat league in Champions League quota panga(5) bak an neih theihloh avangin Champions League leh Europa lamah champion mahse an quota neih paruk(6) ah a in sawn chho thei dawn lova, League lama palina(4) khan Champions League a khelh theihloh phah zawk dawn a, Europa League lamah an chhuk thlak a ngai dawn tihna a ni.

Entirnan tun season a parukna(6) a awm Manchester United hi Europa ah champion in sawmpahnihna(12) a awm Leicester City kha Champions League-ah lo champion ta bawk se la, ram pakhat league in Champions League quota panga aia tam an neih theihloh avangin palina a awm Liverpool hian Champions League an khel pha dawn lova, Europa League an khelh zawk a ngai dawn tihna ani.

Aside | Posted on by | Tagged , | Leave a comment

EXCISE SUPERINTENDENT LUNGLEI ZU RUIIN BUAINA A SIAM

Dated: Lunglei, Ni 26.5.2017

(Nizan dar 9 pelh hnu khan H.Lalhmingthanga Excise Superintendent, Lunglei leh a țhianpa(a hming ka hre lo) zu ruiin Jedaz Pump bula Vai dawrah chaw ei an tum a, an lo nei si lo a, buaina an siam a, Dawr te suamsam vakin, kut tean thlak a, Jedaz Pump enkawltu Chowkider in zuk țhelh a tum chu an lo sawisak rawn ta chiam ringawt a, Chowkider hi X-Ray te tih a ngai a, chhunlai vela ka kal kha chuan engmah an la ti thei lo a, pawi khawihtute pawh hi Police Custody ah an awm lo)

Nizan Dar kua(9) vel khan excise suptd. leh a thianpa chu Jedaz canteen ah chawei turin an lut a, mahse canteen thawktuten chaw an neih mumal twh loh thu an lo hrilh a.Excise suptd chuan mi 2 ei tur lo dah ru kan tih kha engatige in dah loh,,a ti a.
Thawktuten “ka pu chutiang in sawi awm kan va hrelo ve an tia.,hei 2 vel ei tur chu a awm a, kelsa pawh a la awma ei ta mai che u” an ti a,
excise suptd.hian hetiang chawthing ka ei duhlo a tiin a thinrim a..dinning chair leh table te chua a namtthlu a.

Chu chu pump chowkider chuan hriain a zu chhuk a..e khai hetiang chu a mawilo e..tiin ban a zu phara,a chair paihthluk te pawh a tunding a..ani chuan nang hian ege i sawi ve tiin a awmah a tham a..a nawr leng deuh dawrh a ni awm e…Chowkider chuan “e hetiang a nih chuan kan pute ka phn mai ang e” tiin a chhuahsan a, excise suptd. hian “i duh duh phn rwh enge an tih theih kan en ang chu” te a ti a, tichuan kan chowkider chhuak chu um zuiin kan sales building kawta a tui la chu a hrawk ah an rek a. cooler dahna bulah an namthlu a..a kut ah pem a ,a khel na a ti bawk.

Tichuan kan chowkider chuan buai thui a hlauh vangin an tham leh tur chu an kut paihthlak sakin a room ah a tlan luhsan a.A room lamah chuan umzuiin lo chhuak turin an ko a..khawngkhar te an chum ri vak vak a..mahse chowkider chuan a hawn ngam ta lo a.

Tichuan pump neitute leh veng hnai hmelhriat te a phn a. Pump neitute pawh an chho nghal ta a.

Pump neitute thlen hma hian venghnaia a phn te chu lo han thleng hmasa in a mah pawh chu hei kan lo thlenga lo chhuak rawh an ti a..a lo chhuak chu khawih leh an tum a, mahse midang te chuan an lo dang bet a..an khawih thei ta lo a ni.

Tichuan pump neitute thlen chhoh hnu in thil awm dan te an zawt a kual a, mahse chapo deuh hleka nan hriat avang leh kut an thlak chungchangah inthiam lohna lam hawi sawi rik an neih duh tak loh avangin police an ko ta a.

Police lo thlen chu nghak ho a, sawi tlang turin an ngen a..mahse excise supdt. hian nangni detain theih ka nilo..police ho chuan min lo hmu rwh se tiin a tlan lui ta a..police te an lo thlen chuan thil nih dan te an sawi a..thana lamah FIR nen an liam thla ta a ni.

(Hei hi Jedaz Chowkider B.Lalrohlua statement a ni)
Copy from Lunglei chanchinthar

Aside | Posted on by | Tagged , , , | Leave a comment