ARGENTINA IN AN TUI IN TURA DRUGS AN PAWLH HLAUH LEH AVANGIN PERU TEAM IN ANMAHNI TUI NGEI KENG DAWN.

Peru team doctor Jorge Alva chuan World cup qualifying pawimawh taka Argentina nen Benos Aires a an intum hun turah an fimkhur tur hle sawiin Argentina ram tui in lovin an ram tui ngei an ken tur thu a puang.

1990 World Cup quarter-final a Argentina leh Brazil intum tum, khatih hunlai a Argentina manager Carlos Bilardo hminga ‘Bilardo’s flask’ an tih mai match ah khan Brazil left-back, free kick specialist Branco chu break laiin Argentina technical staff ten tui a damdawi rohypnol pawlh alo pe a, Branco hi ruih phain a khel hlei theilo zui nia sawi a ni.

A tifiahtu atan hemi tuma khel ve Maradona pawhin Branco tui in tura drugs pawlh a nih thu hi thudik a nih thu a sawi. Argentina hi hemi tum hian 1-0 in an chak nghe nghe a ni.

Author : Mafela Ralte

Advertisements
Aside | Posted on by | Tagged , | Leave a comment

EVAN Dr. SAWIVELA RAWNGBAWLNAAH DAMNA CHANG 1190

(Zonet Zing Daifim & Lenlaini – 04.10.2017)

Evan Dr Lalsawivela’n UPC Biak In, Bawngkawn-a rawngbawlna a neihah chuan damna mak taka chang an pung zel a. Niminah ringawt khan Bengngawng tawngtheilo mi 6 an dam a, nizan thleng khan damna chang nghal in report chu mi 1190 an tling tawh.

Upa R. Lalhmangaihzuala, Bawngkawn in kan palai a hrilh danin, Nimin piah October ni 2 khan naupang kum 8 mi thisen cancer avanga hmundanga beidawng tawh, Kevin Lalrintluanga, Ramhlun North chu an pawm lut a, a mutna tura siam sakah mut a ni chungin a nat tawh em avangin sermon lai leh a hnuah pawh a \ap char char a, a ke nate chu khawih sak ngam loh khawpin na a ti tawh a. Evan Dr Lalsawivelan a khawih veleh he naupang \ap hi a bang nghal hmiah a. Reiloteah amahin a kal nghal a, “Pathianin min tidam” a rawn ti chhuak reuh a, damlo pantu dang pawh an mittui a lo tla ve phung mai a ni.

Lunglei District Chithar khuaa nu pakhat, fa 3 nei tawh, thin cancer vanga zangthal zawnga thla hnih chhung mu thei tawh lo, a zawna an zawn luh pawh Lalpan a tidam a, amahin zang vahin damlo room a chhuahsan a, damna thu, \ap zawih zawihin a puang a ni.

Evan Dr Lalsawivela rawngbawlnaah hian Pathian thiltihmak a thleng nasa hle a. A room chhung an luh chiah a dam nghal te an awm a. Bengngawng, a khuma an \hut ruala beng var nghal nia insawi ringawt pawh mi 10 chuang an awm tawh.

Record atanga a lan danin, a sermon atanga an natna dam nghal nia insawi pawh mi 30 chuang an awm tawh a. Phai lam Doctor a beidawng tawh cancer leh natna dang dam ta nia insawi pawh an awm nual tawh. Tun thleng hian chawplehchilha dam nghal nia insawi hi zaa 80 chuang an la ni a. An dam nghal leh nghal loh hriat loh nausen leh fa nei theilo an tam em avangin dam percentage hi a sang thei lo zawk a ni.
Nizan thlenga thlenga record dinhmun –
Damlo khawih zat – 1502
Damna chang nghal zat – 1190
Dam zui inbeisei – 249
Dam zinga natna langsar zual te :
Bengngawng – 358
Tawngthei lo bengngawng kawp – 87
Spinal Cord thalo – 19, Nerve thalo – 139, Cancer – 41, Stroke – 20, Mitdel – 4
Sermon atanga dam – 30

Evan Dr Lalsawivelan ralkhat atanga mobile phone kaltlanga a tawngtai avanga dam nghal nia insawi leh damlo, a mut dawna an hminglama a tawngtai sak avanga dam nia insawi pawh an thahnem tawh hle a. A mut dawn hian damlo mi 20 chuang tawngtai sak tur list a nei zan tin a, nizanah phei kha chuan mut dawna tawngtaisak tur hi mi 157 an awm a, heng mi 157 te hming hi a chhiar chhuak vek a ni. Dan tlangpuiin chhun atanga damlo a khawih chu zan dar 11 velah a khawih zo thin a. Tunah hian ni 5 ni 6 kal zawn tawh, khawih hun la chang thei si lo te a khawih thei tan a. Zingkarah Stroke vanga che thei lote an in lamah tlawhin a khawih thin bawk a ni.

Dr Sawivela lo be duh Kan awm chuan
+919862355410

Aside | Posted on by | Tagged , , | Leave a comment

CHAKMA AUTONOMOUS DISTRICT COUNCIL CHUNGCHANGA PU C.LALRINCHHUNGA THUHLA

Chakma District Council hi mi thenkhat chuan dan lova din, a ramneitu Mizote rawn lova din kan ti thin a. A dik ngei ang tih pawh ka ring. Regional Council pahnih District Council a hlankai a nih leh Mizoram-in UT kan neih chiah khan a hmaa Regional Council pawh awm hmasa chuang lo khan a lo piang ve tawp kha a ni a. Mahse, District Council din chungchangah 6th Schedule ah hian hetiang hian Governor thuneihna kan hmu:

Para 1(3) The Governor may, by public notification,—
(a) include any area in 3[any of the Parts] of the said table,
(b) exclude any area from 3[any of the Parts] of the said table,
(c) create a new autonomous district,
(d) increase the area of any autonomous district,
(e) diminish the area of any autonomous district,
(f) unite two or more autonomous districts or parts thereof so as to form one autonomous district,
5[(ff) alter the name of any autonomous district,]
(g) define the boundaries of any autonomous district:

Provided that no order shall be made by the Governor under clauses (c), (d), (e) and (f) of this sub-paragraph except after consideration of the report of a Commission appointed under sub-paragraph (1) of paragraph 14 of this Schedule:

Helai atang hian Governor thuneihna chu kan hrethiam mai awm e. 3(a) to 3(e) ah khian Governor-in Sixth Schedule, para 14 hnuaiah Commission a din hmasa tur a ni a, chu Commission rawtna ang chuan kalpui tur a ni. Chakma District Council din dawn khan Commission hi Assam Governor khan a din lem lo ni awm a ni. Amaherawhchu District Council/Regional Council thar siam dawnin a hmaa District Council lo awm tawh sa biak rawn chungchang engmah a awm lova, Commission ngaihdan anga kalpui tur a ni thung. Mizoram UT kan nih dawn pawh khan District Council siam belh leh Regional Council lo awm tawh District Council a hlan kai chu Governor thu a nih rualin Commission ngaihdan la hmasa lo chuan thutlukna a siam thei bik lo a ni. A pawi ta ber chu Commission din a nih si loh chuan khatih laia Mizoram sawrkar khan eng vang nge kan lo ngawihpui mai mai tih hi a ni!

Chutiang chu a lo nih si chuan Chakma District Council lo pian danah pawh hian khatih laia thuneihna pumhlum neitu chu Assam Governor a ni a, mahse Commission report ang lo chuan thutlukna a siam thei lova. Commission din nisela chuan Mizo-te duh dan lak a nih ve pawh a rinawm a ni. Chuvangin CYMA Agenda-ah khan “Chakma District Council dan lova din a ni a, thiah dan ngaihtuah ni rawh se” tih chu chhawpchhuah tur niin ka lo hria a, thil pawimawh tak chu a ni. Kan hriat tur erawh chu kum 45 liam tawh ami tuna han challenge leh chu awmzia kan nei lovang tih a hlauhawm hle a, mahse “thlen loh ai chuan thlen tlai a tha” an tih ang deuh khan ngawihbopui ngawt ai chuan tlai khawhnua challenge thar leh pawh hi a thatna a awm tho turah ngai ang.

Court lamah lo hlawhchham ta hlauh pawh ni ila kan enliam mai mai tur a ni tihna erawh a ni lo. A chunga Sixth Schedule Para 1(3) khi chhiar ila Mizoram sawrkar hian enge kan tih theih kan hria a, Chakma District Council huam chhungah hian Regional Council, kan siam belh thei a, a area kan tizim thei a, a hming kan thlak thei bawk a ni tih hi kan hriat reng a pawimawh hle mai. A hnam hming anga District Council dah hian harsatna a siam thei reng a, chuvangin District Council zawng zawng hi khua/hmun hmingin emaw thlak (rename) ila state khata cheng kan nihna ang pawhin kan inlungrual theih zawk pawh a rinawm hle a ni. A hnam bila intihthuna a tibo thei ang a, a huam chhunga hnam dang cheng vete enhranna lian tak awm thin leh tuten emaw neitu riauva an inhriatna hi a bo thei bawk dawn a ni. Hei bakah hian Constitution leh dan mit atanga thlir pawhin thiam kan chang bawk dawn a ni. A thui lutuk dawn tlat duh tawk phawt teh ang.

Aside | Posted on by | Tagged , | Leave a comment

KHEHPUAM VANGIN IAS (RETD) ROBERT HRANGDAWLA CENTRAL JAIL-AH

Mizote’n “khehpuam” kan tih mai, ruihhlo hlauhawm siamchhuahna pseudoephedrine tawlhruk thubuai ngaihtuah mek ah vawiin (October 4) khan Aizawla Special Drugs and Cosmetics Act Court chuan Mizoram Chief Information Commissioner hlui Robert Hrangdawla (IAS retd) chu man turin police thu a pe a, Central Jail-ah a khung nghal. Thubuai erawh hi chu ngaihtuah chhunzawm leh tur a la ni a, bail an dilna pawh October 11-a ngaihtuah turin a ti a, anticipatory bail an dil pawh a hnawl nghal.

Thubuai hi a tirah chuan Judicial Magistrate First Class T Lalhmachhuana’n a ngaihtuah a. Mahse, Drugs and Cosmetics Act hnuaia thubuai a nih angin Special Drugs and Cosmetics Act Court Judge Vanlalenmawia’n a ngaihtuah chhunzawm ta a. Vawiin khan thubuai hi ngaihtuah chhunzawm leh niin, Robert Hrangdawla hian court hmaah hian thubuai awm chhan bulpui, khehpuam man chungchangah dan ni lova thil thleng a awm a ti a. Robert Hrangdawla chuan a man tu ber chu Drug Inspector a ni lo va, a thil man te hi man theitu a ni lo a ti a. Tin, seizure memo chu Lengpui Airport ah siam niin in ziak mahsela, chu chu seizing officer thu phuahchawp a ni a ti bawk a. Hetih lai hian, Special Public Prosecutor C Lalremruati chuan dan pela chetna awm lova, dan pawh a khauh hle niin a sawi thung a.

Lehlam lehlam thu thlen a ngaihtuah hnu ah Special Judge Vanlalenmawia chuan Robert Hrangdawla leh Lalchhanmawia lakah hian thubuai chu a awm thei ngei a ni tih a lang chiang a ti a. Tin, anni pahnih hi “non-bailable” leh “cognisable offence” thubuai siamsak an nih angin, man ngei tur an ni a ti bawk a, police te chu man tir in Central Jail-ah khung turin thu a pe nghal bawk a ni. An thubuai hi October 18-ah ngaihtuah chhunzawm leh turin thutlukna a siam.

Aizawl District Court building-a *TFD*-in a kawmnaah Robert Hrangdawla chuan, “Damdawi kan lak hi license kan nei a. A hralhna receipt I kawl lo min ti a, mahse ka nei ngei a. Judge rilru ah chuan damdawi kha khehpuam a ni,” a ti a. Dan dik lo in case an siamsak a, dan pelin an man niin a sawi bawk a, court sang zawkah a zualko tur thu a sawi bawk.

*TFD*-in a lo tarlan tawh angin, kumin March thla khan Health Department hnuaia Food and Drugs Administration (FDA) chuan Robert Hrangdawla leh a mi chhawr Lalchhanmawia, Zonuam, lakah pseudoephedrine lei leh hralh chungchangah criminal complaint court-ah a thehlut a. Taxation department thawktu te’n Lengpui airport ah khehpuam tia hriat lar pseudoephedrine parcel panga (5), a vaiin mum nuai sawm (10) emaw vel chu rinhlelh thil thu ah an man a. Lehkha pawimawh te an enfiah hnu ah thil felhlel awm a an hriat avangin FDA hnenah hian an hlanchhawng ta a. FDA chuan thil awmdan a zirchian hnu ah Robert Hrangdawla hian pseudoephedrine lei leh hralh theihna hian license chu a nei ngei a, mahse, a tihral dan record a lo dah that loh avangin a lakah hian complaint an thehlut ta mai niin *TFD* chuan thu a dawng a ni.

A tlangpui thu in khehpuam hi Excise & Narcotics Department hnathawk te’n emaw Police te’n emaw ruihhlo beihna dan Narcotic Drugs and Psychotropic Substances Act hnuaiah an man thin a. Excise & Narcotics-a hnuchhuitute chuan kum 2015 October thla khan Robert Hrangdawla hi khehpuam tawlhrua an rinhlelh avangin man an lo tum tawh nghe nghe a, nimahsela, license a neih miau avangin case an siamsak thei lo niin *TFD* chuan thu a dawng bawk a ni.


Thu a hriatchian theih nan Frontier Despatch in he thubuai lo awm tan dan a post tawh hi lo dah tel ila.

CIC hlui lakah criminal complaint (March 25, 2017)

Health department hnuaia Food and Drugs Administration (FDA) chuan tunhnai khan Mizoram Chief Information Commissioner (CIC) hlui Robert Hrangdawla IAS (Rtd.) chu pseudoephedrine lei leh hralh chungchangah criminal complaint court-ah a thehlut a, court chuan Robert Hrangdawla hi April 7,2017 ah inlan turin thu a pe nia thudawn a ni.

Tualchhung chanchinbu ‘The Frontier Despatch’ in a tarlan danin Taxation hnathawk te chuan tunhnai khan Lengpui airport ah khehpuam tia hriat lar pseudoephedrine parcel 5, a vaiin mum nuai 10 emaw vel chu rinhlelh thil thu ah an man a. Lehkha pawimawh te an enfiah hnu ah thil felhlel awm a an hriat avangin FDA hnenah hian an hlanchhawng leh a ni. Joint Director FDA, Lalsawma sawi danin Robert Hrangdawla hian license hmangin thla tin airport-a taxation hnathawk te’n an man zat ang hi thlawhna hmangin vawi thum atanga vawi nga vel a chah lut thin niin a sawi a, pseudoephedrine hi a lo thlen zin em avangin taxation hnathawkte chuan ringhlelin an lo endik ta niin a sawi bawk.


Aside | Posted on by | Tagged , | Leave a comment

PASALȚHATE THLAPHANNA TLANG by Rohlupuia Chhangte

• Pasaltha ramvak te chetsualna chu
• Pasaltha te leh thlahrang
• Zama leh Muanga te thiltawn rapthlak chu

Mizo lalte zinga lal ropui tak, lallula Sailo chuan Thlanrawnho a ráwt chiam a, an thinrim rawn er lét leh tur tuar ngam lovin a thlang tlák phah a, kum 1800 bàwr vél khan Lungphun leh Hreichuk vèlah in 300 chuang neiin a lal a, kum 1807-a a boral thlengin he hmunah hian a awm hlen ta ani. A khua a lian tham bawk a, mi chi hrang² pawh an tam hle reng a, sa leh ràl lakah pawh inmuanchhuah tham an awm ani. Pasalțha leh mi huaisen tam tak an awm a, chúng an pasalțha zing ami Záma, Kâpthanga leh Muanga te sai ram chhuak pél tura an rammut chanchin chu a ni ngaihnawm ta ber mai chu!

Chutih hun lai chuan Tut lui thlang lamah hian khua tih tham a la awm lo va, ngaw dur chhah țha takin ala tuam vek a, Hachhek tlàngdung chhim lamte phei chu sai ram tlatna hmun, țuan leh màng ata tûma la tuk loh ngawpui chhah țha takin a khuh hring ngulh mai ani.

Tichuan, pàwltlàk thla tirah chuan pasalțha pathumte chuan sai kah tumin Hachhek tlàngdung ngawpui hnuaia rammut chu an tum ta a. He lai ram velah hian sa chi hrang² a tam ém avangin hmun hla tak² ațang pawhin pasalțhate chu an rammu țhin ani awm e. Vachhe tláng chhak lam daiha khaw țhenkhat Hmunpui, Arte leh Chhippui khua ațangte pawhin pasalțhaten sapui an lo pel ve tawh thin. Chung pasalțha rammúte chuan sapui mai bakah huai leh rau mak tak te pawh an tawng țhin ngei ang. Muanga te țhian pathum thil tawn pawh hi àwihawm loh ang hial alang, mahse a tak² a thil thleng ngei si a ni.

Rammu tura an inbuatsaih lai atang tawhin an phur em² a, vàn lam an han en a, an duhthusam ang ngeiin thla de tir ding lam sirah chuan arsi a awm và a, chu chu pipu chena rammut hun țha ber chhinchhiah nàna an lo hman kumkhua a ni. Chuvang chuan saingho vàr tha tak nen hlawhtling taka an haw leh hun tur thlengin an suangtuah a, an kal dawn zan phei chuan chu mawlh mai chu helhkamin mut pawh an mu tha hlei thei tawh lo a, Muanga phei chu naupang te a la ni a, dài hnai sa hliam beihna velahte chuan alo tel ve tawh ngei a, mahse rammutna puithamah chuan a vawikhat tel ve na tur chauh a la ni. Chuvang chuan a rilru tak pawh in a huphurh na leh chàkna a inzat thial ta ve ang.

Khua alo var hnu chuan an thian thum chu zan sarih riak faisa ak chungin an chhuak ta a, a ngil thei ang bera kalin Hachhek tlangdung chhim lam chu an pan ding nghal ngat² a. Thui fé chu mumal takin an kal thei mai a, mahse an kal thui deuh² va, hmun tam takah àwih țen, lung khawkrawk leh hrui hnawk avangin an kal sawt hlei thei lo va, han bo deuh țhat² chang pawh an nei a, a tawpah chuan sai tluang (sai kalna kawng) an hmu ta zauh² va, ni hnih lai an kal hnu chuan Hachhek tlangdung, chhim leh Hmar zawnga inkhawh zui mai chu an thleng ta ani. Chumi ni chuan riahbuk an sual nghal a, a tûk lama che chhuak turin an chawl hahdam ta a.

A tûkah chuan sai pèl tur chuan an thawk chhuak ta a; chu chen²a hlaa rammu ta chuan sai ngho țha tak hawn loh chu an duh hauh lova; amaerawhchu, ramsa chi hrang² a tam ém avangin Muanga te anga la rammu ngailo tan chuan an sa hmuh apiang mai chu kah achàkawm èm² vek tawh mai a, sazuk chal, ki hreu țha tak² mai te chu kah chàkin a thlek leh vang² thin a, mahse an hotupa Zàma chuan, “kan hlawhchham ta anih leh kut bénga haw thlàw aiah sa dang chu kan la káp chauh dawn nia,” a ti si a.

Chutih rual chuan sai pawh chu an hmu nual a, mahse a ruala an tlat țhin avangin ruahmanna fing tak nei chunga beih an ngai si a, tlèma tla fal deuh hmuh tumin an bei ngial a, an hlawhchham ta țhak a, “vawiin zawng a ai rih lo a nih hi, i ținsan rih mai ang u,” an ti a, an riahbuk lam panin an kir ta rih a.

Chumi zana an han mu leh zet zawng an zinga pakhat mah chu an mang a țha ta lo va, khawvar hmain an harh vek nghe² a, amaerawhchu, khua a han var hnu chuan Muanga chiahin a mumang chu a sawi chhuak thung a. Ani chuan, “Nizan ka mang chu a mak hle mai, thla a lo eng hle mai a, vawk kuang ah hian tui nu deuh mai hi alo tling khat luau mai bawk a. Reilote hnuah cuan tui chu thisen hian a rawn bual a, a so but² a, chutih lai chuan àwkin thla chu a rawn lem pil ruai² a, chu veleh ka bula thingler atang chuan thisen a rawn far thla ta zawih² a. Tu thisen nge ni ang aw, tiin ka han dak chhuak a, thing buk chu sàr hian alo zam hual a, sàr zam chuan min chhun khalh tlat avangin engmah ka hmu thei lo va, chiang taka en tumin ka han thlék chiam a, ka harh hlawl mai a, ” tiin a mumang chu a sawi chhuak a. Zàma chuan ,” i taksa hah tawngkhawngin eng² emaw i mang mai² a nih chu, mangțha a ni ngai, sa mang a nih chu. Hauhûkin èk min theh a, tlàkawrhin min chhaih te a nih ngawt loh chuan vawiin zawng sai ngho vàr kan kap tawh ngei dawn a nih chu,” a tihsan mai a, mahse chumi ni chu nuam erawh an ti lo tlang ngei mai. Fimkhur pawh an fimkhur tlang hle reng a.

Chutia chhun lama sai kah tuma an han che chhuak leh ta chu an rin loh takin sakeiin a rawn bei ta thut mai a, an pathum chuan theihtawpin awràwl nen an han beilet ve a, sakei pawh chu an kap hliam ve ni ngei tur ani, hûk tuarh² chungin a insaseng ve ta mai a. Mahse an țhian pakhat, Kàpthanga chu a hrawk khawih pha thuak khawpin a dar vei lamah alo hap hman reng chu niin, a hliam ațang chuan thisen chu a chik chhuak zuaih² a, a thaw hràwk² a. Zàma chuan, “he ti ringawt chuan a dik dawn hauh lo mai, kan bûk lamah tal kan thlenpui a ngai a ni,” a ti a. Muanga nen chuan a zak lehlam lehlama țàngkham chungin an bûk lam chu an panpui ta a, thui pawh an kal hmain Kàpthanga chu a hliam tuar lovin a thi zui ta mai a.

Tichuan, a ruang chu mau tlawnah an phuarbet a, an zàwn ta a, thisente chu a baw zawih² reng a, anmahni pawh chuan thisen chu an kai hneng hnuang a. Ram palailenga țhiante ruang han hnutchhiah ngawt mai chu an ngaingam ngang bawk silo, rit ti chung²in an zawn zel a, an han chawlh pui leh rih țhin a, an țhianpa hmel lah chu an han en a, thil hmuh nuam tak a ni bawk silo. Mak tak mai in an riahbûk chu an pawh thei ta reng² lo mai a, an inzàwnkual an inzàwnkual ta mai a, an darte chu a nàin a vûng nasa tawh hle a, an dar vúng chuan an beng a thleng deuh thaw a ni.

An hah tawngkhawng tawh avang leh an dar vûng nasa ta lutuk avang chuan zawn zèl ngaihna a awm ta ngang lova, a tawpah chuan Zàma chuan ,”Muanga, i mumang kha a thleng dik ta a nih hi. A tih ngaihna hlawl a awm ta lo ve, țhiante ruang rampalailenga hnutchhiaha kan hawnsan chuan tu leh fate thlenga men ngamloh na khawpa thil zahthlak a ni si a, tunah hian tih theih leh duh thlan tur dang kan nei tawh lo. Ruang hi helai a khiang kungah hian kan han dah ang a, pakhat zàwk zawk in kan lo awm pui ang a, pakhat zàwk zawk zualko tur in kan kal ang. Nang, a naupang zawk i ni bawk a, zualkoa kal nge i duh ruang lo nghah?” tiin Muanga chu a zawt ta a. Ani chu a inngaihtuah vang² a, a tawpah chuan , “Zualko tur chuan ka kal ang e,” a ti ta a, tichuan khiangkung lerah chuan țhangte an dawh a, ruang chu an han hlang dun phawt a. Thingler ațang chuan thisen chu leiah chuan a far a, a hnuaia hnahthel ro te chu a buak sen ngei nguai a.

Tichuan, tui leh eitur an neih ang² te chu insem in an in țhen ta a. Muanga pawh chu zualko tur chuan a kal ta vang² a, a ngil thei ang ber pawh in kal se km 80 vel a kal a ngai dawn a ni. Chuta karah kawng dap chawpin a kal dawn a ni si a. A kalna chin chhinchhiah nan leh kawng a bo loh nan thing kak kar ah a khat tawk in lung a zep ta zel a, thlaphang leh mangang takin rampalailengah a maltlat ta a ni.

An țhian dun tan hian duhthlan tur avang hle awm e, Muanga hi engtia rei nge a thang ang, kawng mumal lo taka kal tur a nih bak ah sa te pawh in an lo bei thei a, chu lovah a vanduai phei chuan kawng lak ah tluk hlun der theih a ni. Chu tak chu ngawpui kar a mahni chauhva țhiante ruang lo nghak tu tan chuan ngaihtuah tham a tling ngei ang. Amah Muanga tak pawh chu a ngaihtuah awm letling zawk a, chhun zan zawm a kal tur ani a, a țhianpa khawhar dan tur leh a lokir hun anghahhleh tur zia hre ran bawk siin, hah pawh sawi hlei thei lovin a kal dawn a ni a, a ruang lo nghah ang bawkin thil huphurhawm tak chu a ni ngei ang.

Zan a lo ni a, Zàma chuan ruang awmna thingkung bulah chuan mei a chhep eng hluah a, khawhar takin thingbul ngheng chuan a țhu a, chung lai ngaw vel chu chhun pachangah pawh a thim ruih ani si a, zanah ngat phei chuan a thimzia chu ai mit thlawn an sawi ang mai a ni. Chutia thingbul nghenga khawhar taka a țhut lai chuan sakei chuan thawm a rawn nei ta a, mei chu a chhawm țha sauh² a, mei alh vung lai chuan sakei chu a han kal hla ve deuh a, mahse mei mit rual chuan a rawn hnai leh țhin a, a thawm chu a na telh² ta mai a. A rawn bei tak ngial dawna a hriat tak avang chuan a țhianpa ruang awmna thingkung ah chuan a lawn ve ta ringawt mai a ni.

Tichuan, a țhianpa ruang bulah chuan a țhu ta ran mai a, dumde lah chu an tam khawp a, ruang chu an rawn pan zel emaw tih tur in an rawn leng sup² a. Chu mai bakah thawm mak tak², mihring thawm ni awm taka titi nawk² te, hmeichhe zai ri riai² ni awm tak te, mangang awm taka au deuh ruai² te leh patling rum ri ni awm tak te chu a hre thin a, hlauh leh hlauh lohin awmzia a nei chuang der si lo. A ril țam bawk si chuan a faisa ah chu a han bar leh hawng² țhin a, Muanga awm zel dan tur mawlh maite chu a ngaihtuah a, `dam takin a thleng em ang chu maw´ a ti rilru a, a khua chu a har em² mai a.

Zan a lo rei deuh² va, thawm riva a tam ta telh² a, lei lama a mei tuah lah chu a mit țhuap tawh mai si, thing ler aţang chuan vawi eng emaw zat chu mei chhawm țha tur chuan a zu chhuk a. Mahse chuti ringawt chu a tlin reng ta bik lo va, a țhianpa ruang ngheng chuan a țhu ve ta ringawt mai a ni.

Nakkinah chuan sakei hliam chuan thawm a rawn nei leh ta a, thing hnuaia thi far te chu a liak ri ta hlawp² a, chutia a thi far a liah rual chuan Kapthanga ruang chu thlaphang awm takin a ai ta tuar² mai a. Chutah zet zawng pasalțha Zama hmulthi chu a ding ta sung² a. Sakei lah chuan thingbul te chu a vel thur² reng a. A chang chuan inhrosa chungin lawnchilh a tum a, thingkung chu a ham vak² a. Zama chuan tuibur leh sawhthing a seh pawlh a, a phuh nam rum² țhin a, a rim chuan eng emaw chen chu a hnawt kiang thin a. Mahse a rawn lawn chilh ngei dawna a hriat tak avangin, upa-in , “sakeiin ran leh mihring piansualna nei a seh duh ngai lo ve,” an lo tih țhin chu hriain, Zama mangang lutuk chuan ama kut zungte chu a tan chhum ta hmawk mai a ni. Chuvang chu a ni mahna, sakei chuan a lawn chilh ta em lo va, mahse thingkung leh a vèlah chuan a inhrosa zantin ta tho va. Zama mangang leh thlabar lutuk chuan a țhianpa ruang chu a han thlir a, “Țhiana, lo tho ve teh, a va manganthlak em!” a ti thlawt a ni.

Zualkova kal ta Muanga pawh chu an țhianpa thla ai chuan a zui ve zel tho va. Thim tham hnuaiah, rampalailenga kawng dap chawpa a kal lai chuan sakeiin an țhianpa thisen a liah hun awm velah tho chuan a thla ai chuan a rawn zui a, “Muanga min lo nghak rawh,” tiin a rawn au zui tuar² a, ngaw hnuaiah chuan a aw chu a thangkhawk ruah² a. A thla chu a bul hnai maiah a awm a ni tih hriat tak in hnahthelte chu pal rik ang mai hian a ri sun² țhin a. Pasalțha phanchang tan pawh thla ai ber kher chu a rapthlakzia hrilhfak a nih vei nen, ani ang naupangin chutiang a han hre ta mai chu a khur zawih² a, khawhar tawh nak alaiin a thidang lo chauh a ni. Zan tin mai chuan an țhianpa thla ai chuan a umzui zankhua ta țhin a. Chaw mumal ei lo leh hmanhmawh taka kal ngai bawk si a nih avangin a chau em² a, a chang chuan a chau tawngkhawng tawh chu thingbul ngheng ten a muhil leh sek thin a. Mahse amang lamah leh zel pawh an țhianpa chuan thisen kai hnuang chungin man a lo tum țhin a, a phu harh leh zawk thin a.

Tichuan, chhum lo chat lova nithum leh zan hnih a kal hnu chuan ral hla tak ațangin an khaw chul ram chu a hmu ta a, chu lam pan chuan a kal ding nghal ta char² a, a hmun a thlen chuan thlamah chuan a tlu lut rawp a, chul ram kal te chuan an lo hmu a, “E, kan pasalțha Muanga ni reng chuan, eng thil nge thleng ta, “an ti a, an bial nghal laih² a. Muanga chuan thil awm dan zawng² a han sawi a, anni chuan ,”In thiltih dan chu a va rapthlak tak em, Kapthanga lu chu la ula, Zama nen chuan rawn haw dun mai ula țha tur, tu-khaw-khain nge maw dem ang che u le ” an ti a, an chek tlawk² a.

Tichuan, khaw lam pan in an in chhawm hawng ta a. Khua an thlen hnu chuan tlangvalte chu inpunkhawmin Zama ruang nghahna hmun lam pan chuan an liam ta a. Muanga pawh chuan kal ve leh a tum a, mahse a ke te chu a pilh nasain, a chawn te chu a vūng luah mai si a, val upate chuan kal ve an rem ti ta lo va. Tlangval ho hnenah chuan ,”kawng bo lohna turin thing kak rem chang apiangah lung ka zep zel a, chu² in chhui zel don nia,”tiin a chah ta a. Tichuan, Muanga lung zeh chu an chhui zel a. A lung zeh ațang chuan Muanga chu a changin a bo thin a ni tih a hriat theih a ni. A tawpah chuan ruang awmna hmun chu an chuang chhuak ta hlawl mai a.

Ruang lo nghaktu pasalțha Zama hmel chu mitthi ang maiin a lo dawldang vek tawh a. A hmel ațang chuan thlaphanna nasa tak a tuar a ni tih chu hai rual a ni lo. A hriatnate chu mumang ang ruai a ni tawh a, a aw pawh a tham vek tawh a ni. Tlangval ho chuan ,”Thlaphang reng² suh, nangmah lam turin kan lokal e” an ti a, an thlamuan a.

Kapthanga ruang chu a lo chhe hman tawh in a rimtui lo hle tawh a, a tui a far tluk² thei tawh a ni. Chuvang chuan a ruang chu zawn haw chi niin an ngai ta lo va, chulai vel ah chuan an phum ta a, a thlan chhinchhiahna atan lung an rem a, an kalsan ta a. Ruang lo nghaktu Zama zawk chu an zawn haw ta a ni. Heng pasalțha te vanduaina leh an thil tawn hi a rapthlak ém avangin an lalpa Lallula Sailo chuan khawtlangin awmni khamin an thla a hual sak hial a ni, an ti.

Hun a lokal zel a, mihring lo pung zelah chulai ngaw vel te chu daidar zelin a lo chereu hret² zel a, Kawrtethawveng khua leh khaw dang te a lo awm ta a. Pasalțha Zaman Kapthanga ruang a lawnpuina Khiang thing pawh hi hun rei tak chhung a ding a. A hnu zelah pawh he thing ber kher hi sakei dangte pawhin an rawn ham ve ta ziah mai nghe² a. Chu² Kawrtethawveng khaw daiah hmuh theihin a awm reng thin a, chu mi chang chawi chuan chulai hmun chu, “Sakei thing ham tlang,” an ti ta a. Muanga’n kawng bo loh nana a tih, thing kak kara a lung zeh te pawh hun rei tak chhung chu hmuh theihin a awm a ni.

Aside | Posted on by | Tagged , , , | Leave a comment

CHAKMA BUAINA CHUNGCHANG

Central lamah khuan Chakma ho te hian Social Media chi hrang2 i.e Facebook Groups, pages, blog, Twitter etc leh Newspapers, articles etc hmang in min lo hek nasa hle tawh tih a hriat. Hindi te an lo thiam in an sakhuana velah vai(mainlanders) ho nen an lo inhnaih zawk bawk nen Vai ho khuan an tran zawk tlat zel Fb groups vela inhnial te hian.

Hmannia Lunglei a Indian National Flag leh lord ganesh lim an lo hal (a dik/tha tih leh diklo/tha tih loh lam chu mimal tin ngaihdan a inanglo ang) avang khan Chakma ho khuan Vai (mainstream) ho lakah khuan min sawi chhia in an mawng an hiat nasa hle. Anmahni vai ho ngei pawh khu khami vang khan an thin chu a rim ve khawp tih chu a hriat. Amaherawhchu a nih tur ang a ni tawh tho2 a thluak kan hman a ngai ve deuh ta a ni.

CHUTI A NIH CHUAN KAN HLAU IN KAN KHUR RINGAWT MAI DAWN TIHNA EM NI?A TEUH LO MAI!!!!!
Chakma ho lakah hian Tharum Hman mai hi a tha em?
Ans: Tha/Thalo a awm ve2 thei.
Mizo thalai tam tak hi kan thin a rim tawh tlat. Chawngte vela a ruka truck trip 2/3 vela zuk chhuka zuk nuai ve hlak chak kan awm nual tawh mai kei ngei pawh tiamin. ‘Marohchu Ka mimal ngaihdan 1 ah ve thung chuan Tharum hman ngawt hi Central lamah kan thiamlo zawk deih thei tlat, chakma ho hi an fing phakar lutuk Vai(mainlanders) ho khu an hmin thlu zo deuh vek tawh;social media etc ah min hek leh nasa dawn lutuk; vai milim leh National flag kan lo hal kher khan kan mark a ti chhe lutuk.

KAN TIH VE THEIH:
Mizo te hian social media kan khawih nasa tho sia Chakma issue lam an rawn thai lan na page lian tam tak Times Of India, NDTV ,Sanskriti, North East Today etc ah te hian hawh u Mizoram tan Aw i chhuah ve thin ang u(thawh thin thawh mek pawh an tam tho). English thiam leh grammar dik vel a ngailo keipawh broken deuh2 in k hnial ve pawp2 zel tho, vai ho leh Chakma ho pawn an English a broken ltk tho. Group ho tak2 ah thu ho deuh2 sawiin kan iak kan iak nileng tho..a ropui vaklo. Chu ai chuan kan Mizoram tan ningkhawng neih ve theih na hmun groups/pages ah te hian rak ve thin ang u.

Chuan a tawp nan Chakma ho khuan “LU LA HNAM” (HEADHUNTERS) tih thu i sawi chuan hnial zawt2 che mahse an ngawi hmak mai ang, an ţih lutuk hemi tawngkam tak hi chu, hnamdang laka MIZO nih kan in chhuan ve na thin pawh a ni. ‘Marohchu kan ram politics kalsual avang hian kan dawih zo taa, in lak changkan lutuk te hi bansan ang u( changkan chu a tha lutuk tho mase hnam tana tranho a huna huai ngam lo khawpin mipa chu awm no loh tur)

Aside | Posted on by | Tagged , | Leave a comment

Theipui tangkaina

Theipui hi Bible-ah kan hmu fo va, kan ramah pawh hian a awm ve nual bawk a.

Theipui hian vitamin A, riboflavin, pantothenic acid, pyridoxine, vitamin K a pai a.
Theipui hian calcium, iron, magnesium, manganese, phosphorus, zinc a pai a.
Theipui hian antioxidants a pai tam bawk a.

Kan rama theipui kan hmuh hi Ficus Religiosa tih a ni a. Vai ţawngin Pipal/ peepal tih a ni a. Theipui hi Hindu leh Buddhist-ho tan thingkung thianghlim a ni a. Siddhartha khan theipui kung hnuaiah rilru leh thlarau lama harhna, thlarau thil var pawhna, enlightenment changin, Buddha tia koh a ni ta a.

Theipui pâr hi a rah chhungah a awm teh daih a, a pâr hian chi tam tak a siam chhuak a, ţhial ila a ri rep rep thei a.

Theipui hian calories leh dietary fiber a pai tam a, theipui hian lung natna hrang hrang neih theihna remchang a titlem theia ngaih a ni a.

Theipui hnah hian leucine, isoleucine, methionine, tryptophan, threonine, glycine aspartic acid, serine, arginine leh tannic acid a pai a.
Theipui pil hian bergaptol leh bergabten a pai a.
Theipui rah hian tyrosine leh asparagines a pai a.

Theipui hnah hi êk khal tan a ţha a.

Theipui hi pumpui leh ril hriselna atan a ţha a.

Vun hriselna atan theipui a ţha a. Theipui hnah tihkawi hi khawihli leh pema bel ţhin a ni a. Theipui hnâi leh a zung tui sâwr chawhpawlh hi ringworm leh vun natna danga hman ţhin a bawk a.

Theipui hian rilpui cancer awm theihna remchang a titlem theia ngaih a ni a. A hnah leh a pil hi santên leh kawţhalo enkawl nan hman ţhin a ni a.

Theipui hian blood pressure a vawng dik thei a.

Pile nâ nei tan theipui a ţha a.

Theipui pil tui sâwr hi zunthlum natna leh hmeichhe lam natna atan hman ţhin a ni a, ml 50 a pêk ţhin a ni a.

Theipui hian thisena cholesterol awm zât a tihniam theia ngaih a ni a.

Theipui zung ţhial hi hahni natna atan hman ţhin a ni a. A zung hian gout nâ a tiziaawm thei a.

Damdawi atana theipui hmanna hi a tam a. A phut hi gram 3 aţanga gram 5 pêk ţhin a ni a.
A tui sâwr hi ml 50 aţanga ml 100 pêk ţhin a ni.

-Dr. Lalkhawngaihsanga-
Gilead Thinghnai

Aside | Posted on by | Tagged , | Leave a comment

MYANMAR RAMA HRUAI BO MI 8 TE’N IN AN THLENG TA

Kan hriat tawh angin Singapore leh ram hrang hranga hnathawk tura bum leh dawt hmanga an hruaibo, Churachandpur mi hmeichhia 8 te, thla hmasa September a Myanmar rama an hmuh chhuah te chu, government leh NGOs te’n kar thum lai an buaipui hnuin nimin khan S Thienlaljoy Gangte, AC to DC/Churachandpur leh Social Welfare Department official te’n Kolkata atangin Churachandpur an rawn hruai thleng ta.

Hruaibo a awm hmeichhe 8 te hi Deputy Commissioner, Churachandpur Shyam Lal Poonia leh SP Rakesh Balwar te’n lo hmuakin, DC office a reception programme neihpui a ni a.

He hunah hian District Minister In-charge V Hangkhanlian an heng mi 8 te hi lo lawmin thu a sawi. Pu. V Hangkhanlian hian pawisa fai ₹ 5,000 theuh a pe a ni.

District Police Chief Rakesh Balwar’an a sawi dan chuan, hruaibo a awm hmeichhe 8 zinga 4 te hi kumtlinglo an nih vangin Government rehabilitation ah awmin an duh chuan lehkha an la zir thei ang tiin a sawi.

An vai hian government rehabilitation ah an la awm rih phawt dawn thu a sawi bawk a ni.

“Heng mi 8 te hi Yangon ah Indian Embassy , Impulse Care Info Centre, YMCA leh ZYA-Yangon te tlawmngaihna zara theihtawp chhuah a hruai let leh an ni hi an chungah kan lawm tak meuh a ni” tiin Pu. V. Hangkhanlian hian a sawi bawk a, “keini Mizo hnahthlak te hi kan awmna ram theuh a kan inpuih tawn hi a tul tak meuh a ni” tiin lawmthu sawi pahin a sawi bawk a ni.

Aside | Posted on by | Tagged , | Leave a comment

Jai hind!! an lo tih chuu…!! by Faktea Pachuau

CS GROUP 1 Pu Thena khan 1982 khan Chakma Foreigner 4572 lai chu Mizoram atangin a umchhuak a. Election Commission of India ah Electoral Roll atanga paih turin a thlen bawk a. Prime Minister hnenah pawh ni 10-6-1982 khanMemorundum a thehlut bawk a ni. Chutianga hma chak taka a lak lai chuan, MNF President Emissary Pu Aichhinga chuan ni 11-6-1982-ah, Chakma chungchanga hma engmah lo la ve tawh lo turin ziakin a hriattir ta mauh mai a. MLA kah hlum te a lo ni ta bawk nen, hma an la zui thei ta lo a ni.

Interim Sorkar, MNF leh Congress intawm sorkar a din lai khan, UT Assembly hnuhnung ber, ni 5-9-1986 ah PC Party chuan Chakma District Council ţhiah rawtna Resolution chu an pulutleh ta a. MNF leh Congress-te chuan an pharthlak sak leh ta a ni. Resolution hnawl a nih veleh Hari Kristo Chakma chu lo ding chhuakin, ban phar chungin, “Pu Denga leh Pu Hawla dam reng rawh se, Jai hind” tiin a au nghe nghe a ni.

Source: (Proceedings of the Sixth Mizoram Legislature Assembly, phek 161-na).

Aside | Posted on by | Tagged , , | Leave a comment

INDIA FLAG LEH HNAMDANG PATHIAN LIM HAL TU MI 7 TE SERCHHIP JAIL AH TAN TIR AN NI

23 SEPTEMBER 2017 Ningania Lunglei Police station bula hnam puanzar leh hnamdang pathian lim hal tu mi 7
Lalrinawma kum 21 leh Lalruattluanga kum 29 mi bakah Bualpui V rawlthar 5- R.Lalhruaitluanga kum 18, Vanlalfela kum 21, Rodingliana kum 23, C.Lalrammuankima kum 23 leh Zohmingmawia kum 22 te Chu Serchhip Jail(Lungin) ah tan tir niin an zinga Lalrinawma(Awmtea) Chu damlohna avangin Serchhip Damdawiin ah enkawl mek a ni.

(An zinga Lalrinawma(Awmtea) hi India Prime minister N Modi Hnenah “Zofate hi an saltanna atang hian chhuah zalen tawh rawh LALPA’N a ti” tih sawi tura Pathian in a tirh thu Puangchhuak tu kha ani e)

Aside | Posted on by | Tagged , | Leave a comment