Chhinga Veng Local Council leh Branch YMA thuchhuak

AUTHOR : Dingdi

Kan veng Pa Pu R.Malsawmdawngzuala, Civil Judge cum JMFC, Lungleia awm chu ni 27.9.2016 khan khawtlang hruaitute leh YMA Sub- Hqrs. hruaituten nasa taka ban an phar pawh pawisa lova Zohnuai mipuiin a Office leh Quarterl suasamin a nupui leh fanaute thlenga thlabar taka an siam hi Chhinga Veng Local Council leh YMA chuan a dem tak zet a ni.

Hetiang thil chin țhalo tak hi tunhnuah thleng tawh lo se kan duh a, pawikhawihtute hi man chhuaha an phu tawk hremna pek ngei ni se kan ti.

Aside | Posted on by | Tagged , , | Leave a comment

ADC dilin awmzia nei dawn lo

AUTHOR : Dingdi

: Home Minister Pu R.Lal-zirliana chuan HPC (D) ten sorkar nena an inbiaknaah Autonomous Dist Council (ADC) pek an dil niin a sawi.

Inrinnia thuthar lakhawmtu thenkhat ten a chenna Ina an kawm-naah Home Minister Pu R.Lalzir-liana chuan Mizoram sorkar leh Hmar Peoples Conven-tion Democrats chu thla thar Oct. ni 4 khian an inbe dawn tih a sawi a. Zawhna chhangin Home Minister chuan a hma a an inbiakna-a an lo ngiat tawh Autonomous Dist Council pek chu thil theih a nih loh thu sawiin, “Tun \um an inbiakna turah pawh an thil ngiat hi ADC pek chungchang a nih dawn chuan an inbiakna chuan awmzia a nei dawn lo” tiin vote zawn nana inpek chi a nih loh thu a sawi bawk.

Home Minister chu-an HPC (D) ten ADC an ngiat chu awm lo a tih thu sawiin Hmar-te hian Mizoram chu an ram ngei a ngai a, an ta ti tur zawk nia a ngaih thu a sawi bawk.

Aside | Posted on by | Tagged , | Leave a comment

AIZAWL VENG HRANG HRANG HMING TOBUL

(Aizawl khawpui veng hrang hrang hming put chhan ziaktu hi ka hre lo, whatsapp group-a ka dawn ka rawn cp ve thuai mai. A bengvarthlak viau. Rual u zawk ten sawi belh tur an hre nualin ka ring..vnt)

Bawngkawn: He laiah hian kum 1917 lai khan sebawng nei Gurkha in hnih lek an awm a. An awmna kâwn chu sebawngpu awmna kâwn tih a ni a. Tûnah chuan Bawngkawn kan lo ti ta zâwk a ni.

Bungkawn: Khatla leh Maubawk inkâra awm a ni a. A kâwn lai taka bung awm chu hmingah chawiin Bungkawn hming an vuah a ni. Tûn hma chuan sipai ho nupui an awm thîn.

Bethlehem: Tûn hma chuan, Babaji Veng, Midum emaw, Thatvunga veng, Transport emaw tih a ni thîn avangin lehkhathawn pawhin Address mumal a nei thei lova, a buaithlak hle mai a, Kum 1961 a lo in herchhuak a. Pu Thangbuaia, Transport-a thawk Inah krismas an hmanga, an zai tui hle mai. Pu Zikpuia sawi danin, “Tlai kan ruaithehzo, kan han zaikhawm leh chu kan zai tui ta hle mai a, chuta kan zai khawm lai chuan ka ding chhuak thut a. ‘ Kan veng hmingah chuan Bethlehem tih a lo ni tawh ang’ tiin ka puang ta thut mai a ni” a ti. He tih lai hian Krismas leh Kumthar pawh Sipai lane atangin an rawn chhim ve thin a ni awm e.

Veng hming mumal tak neih duhna a lo awm bawk nen zan khat an lengkhawm chau tawh chuan chu chu remchangah hmangin titi ho nan an hmanga, Veng hming turte an sawi hova, chuta an relah chuan, thuchhuah siamin Veng hming rawtna nei duhte chu Pu Thangbuaia hnena hriattir turin an ti a. Hun rem changah inhmukhawm leh inhmukhawm lehin, veng hming tur an sawi khawm ta a ni. chutah Pu zikpuia rawtna leh a hmaa a lo put thin te an sawikhawm a, Rawtna hrang hrang zingah Pu zikpuia rawtna ‘Bethlehem’ tih hming a phuah chhante an ngaithla a, ‘Pathianin min hmuhtir a ni’ a tih a vangin tuman an hnial ngam ta lova, tichuan Veng hming atan BETHLEHEM tih chu lungrual taka pawm a ni ta a ni. Veng hming phuah fel takah chuan Notice board siamna tur pawisa khawn khawmin ‘Bethlehem, Aijal District’ tih chu tuna Dakin pui bulah an han tar vah a ni awm e.(He Bethlehem tih Hming phuahtu Pu Zikpuia hian UPC Mualah Tun thleng hian a la dampui)

Chanmari: Tûn hma chuan sipaiho chân kahna (silai kahna) hmunpuia an hman a nih avângin, an sawn hnu pawhin, vai hming vuah Chanmari hming hi an la pu ta zêl a ni.

Chaltlang: Tûn hmaa helai hmuna Châl (mau) a tam avângin a hming hi vuah a ni.

Chawnpui: He vêng hi Hmuia Veng tih a ni thîn a. A awm thar hovin mimal hming an duh ta lo va, Chawnpui kung khat chauh awm chu hmingah chawiin Chawnpui an vuah ta mai a ni. Tûnah chuan Chawnpui-ah hian Chawnpui hmuh tur a awm tawh lo.

Chhinga Veng: Bazar pheiah vai tlémtë chauh an awm laiin he lai ngawpui kâr ni thînah hian Chhinga leh mi tlémtë chauh an awm a. An zînga vengva ber hming chawiin Chhinga Veng hming a pu ta a ni. A hming pum chu Chhingrawnga a ni a, Hnamte a ni. Mizo zînga tawng rang bera sawi a ni a. Ui ngul lêr atangin a tla a, thaw vawih, thaw vawih, thaw vawih a ti hman a ni an ti thîn.

Chite Lui: Aizawl khawpui bul chhak lama lui luang a ni. Kulikawn thlang atanga lo luang luite pakhat chuan Mualpui tláng thut takah a fin a. A finna lai tui chu a al a, Bullut (sava chi khat)-in an tlàn thîn a, Bullut sih an vuah nghe nghe a ni. Chu tui al chu a nêp e, tiin a zuk fin lui chuan Chite lui hming a put phah mai a ni.

Durtlang: Tûn hma chuan ngawpuiin a khuh vek a, ruah a sûr duhin khua a dur reng thîn a. Khua a dur reng e tiin Durtlang hming a pu ta a ni. Chu’ng hun lai chuan he tláng hi ramhuai leh phung tamna ram niin an sawi thîn.

Dinthar: A hming hmasa chu Keltawlh Veng a ni. Chu hming chu duh lovin vêng zau zâwk an siam tâk vângin, kan din thar e tiin Dinthar Veng an vuah ta zâwk a ni.

Electric Veng: Tûn hma chuan he laiah hian Tuitu a hrâm thîn avângin Tuitu Veng vuah a ni. Electric khâwlpui bunna hmun a nih tâk avângin a hming chawiin Electric Veng an ti ta a ni.

Kulikawn: Tûn hma chuan sipai te, sap te leh midang te puakphur tur apiang chu he laiah hian an innghâkkhâwm thîn a. Kuli ho innghahkhâwmna kâwn tiin a hmingah Kulikawn an vuah ta a ni.

Khatla: Gurkha tawng a ni a, kâwn emaw, ruam emaw an tihna mai a ni. Sipai kâwnghrèn nawhtlêtna hrui thûr he lai hmuna mi an lâk thin chu ‘khawia mi nge?’ tia an zawhin ‘khat tla’ khu mi kâwna mi khu,’ an ti thîn a, keini’n Khatla kan lo ti ta a ni.

Laipuitlang: Kumpinu sawrkarin Mizoram khawpuia Aizawl a hman tan lai khan mite’n Pathianni an hriat theih nan tiin Col. Lock Manding sapin Pathianni apiangin he tlángah hian laipui a han kâp thîn a. Kristian an lo awm hnu chuan a lo remchâng hle a. Kanghmun khua leh Sateek khua te pawhin an lo hre phâk a. Mizovin laipui an kahna tláng tiin Laipuitlang an lo vuah ta a ni.

Luangmual: Hmán laiin a mual hi luang hmunpui a ni a; a mual pumpuia luang awm chu Luangmual tiin hmingah a put phah a ni.

Maubawk: Aizawl tlâk lamah khuan tûn hma chuan mi tlémtëin bâwk an khawh a; an bâwk chu a chungah mau hnah an chih theuh va, chu vângin chu bâwk chu Maubawk hming an vuah.

Mission Veng: Tûn hma chuan Hriang thing a tam avângin Hriangmual an ti thîn. Zosap hmasa Saphluia kha a lo awm a, Sapthara’n a rawn fin leh a. Missionary awmna hmun a nih tâk avângin Mission Veng vuah a ni ta a. Veng lai, Dawrkai Veng leh Laltawnga Veng tiin hmun thumah an then a. Tûnah chuan a lo zau ta a. Laltawnga Veng tih chu Vengthlang (Mission Vengthlang) tih a lo ni ta zâwk a ni.

Macdonald Hill: Tûn hma chuan Thingpui huan tlang tih a ni thîn. He lai hmunah hian Aizawl leh a chhehvêla thingpui awmte chu an phun khâwm a, sipaiin an awmchilh a, an rin pui ber pakhat a ni. Kum 1930 khan Mizo chowkider pawh he huan enkawltu-ah an dah nghe nghe. Kumpinu sawrkar hnuaia bawrhsap hnuhnung ber Macdonald-a’n High School hmun atan he lai hi a pêk avângin a petu hming chawiin Macdonald Hill an vuah ta a ni. Tin, he lai hmun hi missionary hmasa berte; Pu Buanga leh Sap Upa te lo awmna a ni.

Ramhlun: He vêng hi a hming phuahtuin hlaa ‘Aw ramhlun, ka ram ropui..’ tih atanga a phuah niin a lang.

Republic Veng: Lunglei Jeep road laih zawh hnuah a chunga lamlian kal chu bawrhsap Barkataki hova laih tlang niin a kawng hmingah Republic Avenue vuah a ni a. Republic tih chu a vêngin hmingah a pu ta a ni.

Rangvamual: Aizawl chhehvêla rangva In awm hmasak berna a nih avângin a mual chuan Rangvamual hming a pu ta a ni. Vai chuan Paila Camp an ti thîn. Kum 1890-a Aizawl-ah fort (kulh) an siam hmain he Paila Camp hi awm tawhin an hria.

Saron Veng: He hming hi rambuai hnua an vuah thar a ni. Police Veng (tûn hnua Armed Veng kan tih hi a nih hmêl) leh Mirawng veng an kaikawp a, Saron Veng an vuah ta a ni. Hla thu-a ‘Isua sarawn pâr mawi vul lai a chul lo’ tiha sarawn hi an vuah chhan niin an sawi.

Tanhril: Tûn hmaa Palian lal nunräwng tak Tanhrila khua a nih avângin a hming chawiin ‘Tanhril’ an vuah hlen ta a ni.

Tlangnuam: A hming hmasa chu Lalchhinga (Lal Singh Thapa) Veng a ni. Hetah hian nula pakhat tlangval lêm thiam tak a awm a, a tláng a nuam fawm bawk a; tlangvalin nuam an ti a, a tláng chuan Tlangnuam hming a put phah ta hial a ni an ti.

Thakthing Veng: Aizawl-a vêng upa ber pâwl a ni. Rahsi leh Babuho, DC pisa chhuah lam, Venghlui ti-a an vuah tâk (Rahsi Veng) atanga an insuanin Thakthing tlángah hian an awm a; an awmna vêng chu Rahsi Veng tih a ni ta zâwk a. Thakthing Venga awm hmasa, kamding ni lo chu a hnuaiah an hnawt thla a, Rahsi Venghnuai an vuah a. Mahse, hun a lo rei a, rahsi thuneihna a lo dal ta deuh va, Thakthing Veng tih chu a lo lâr leh ta zâwk a ni.

Tuikual: A vêng thut lui chu Tuikual lui a nih avângin hmingah a pu mai a ni. Indopui pahnihna hma chuan ngawpui a la ni.

Tuithiang :Tun hma chuan Tuithiang veng pawh hi Bethlehem veng hian la huamin ‘ Bethlehem Tuithiang veng’ tih a ni thin nghe nghe a, Bethlehem veng a indan hnu a chhinga veng atanga an indan khan Bethlehem lamah VC te an lo mumal vaklo bawk a, an mahni’n Sarawn veng lamah beh an lo duh bawk nen Bethlehem veng tan a han penhlel deuh tho si a, ngaihsak zui a hlawh vak lo va, tichuan Tuithiang veng chu Sarawn veng atangin an lo indang ta zawk a ni.

Venghlui: He hmun hi Rahsi lo awmna hmasa ber a ni. Mahse, Rahsi ho chu Thakthing lamah an sawn phei tâk avângin Rahsi Venghlui tiin an sawi ta a. Tûnah chuan Rahsi bànin Venghlui kan ti ta a ni.

Venghnuai: Thakthing Veng hnuaiah a awm. Rahsi ho Thakthing Venga an awm laiin, kamding lo an hnawhthlâk ho awmna a nih vângin Rahsi Venghnuai an vuah a. Tûnah chuan Venghnuai ti-a sawi a ni ta a ni.

Zemabawk: A hming hmasa chu Seling a ni. Se pûl phûm a tam avângin Seling hi vuah a ni. Darlawng tláng Seling-ah an pêm zawh hnuin Zema hovin melveng in tlémtë an awm a, bâwk tiin an invuah a. An hotu chu Zema a nih avângin Zema bâwk tiin an sawi kher thîn a, Zemabawk tih hming hi a lo pu hlen ta a ni. Zema hi palian tak, thau tak a ni. Zanlawn-ah a pêmthla a, kum 1940 vêl pawh khan a la dam.

Zarkawt: He lai kâwn hi Vaki liam kâwn a nih avângin Ki len an zâr thîn a, Zarkawn an ti thîn. Tûnah chuan ‘Zarkawt’ tih a lo ni ta a ni.

Hriat dik lohna lai a awm thei bawk e.

———————————

Mickey Hlondo
Kum 1890-a Mizoram Vai len hnuhnung bera awm hlen taten Assam Rifles hmuna Aizawl Fort 1890 February-a an din a\ang khân Aizawl Dawrpui a lo indin chho a, Dawrpui Area chhûnga Civil mite awmna hmasa ber chu tuna Saron Veng hi a ni. A tir lamah Mirâwng,
Hmunphiat leh Bawlhhlawh paihtute, Police Lane, Midum Lane (Buk) te, Khualbuk-te a awm a, Mizorama Village Council neih hma zawng kha chuan Dawrpui Veng
kawtthler pakhat anga ngaih a ni.

Chhinga Veng leh Saron Veng kaikawpin V/C “Saron Chhinga Veng Village Council” 1957 atangin neih tan a ni a. Kum 1982 atangin
Saron Veng chu V/C hran neiin a lo awm ve ta a ni.

Rambuai hnua Saron Veng nita chauh chu a ni lo deuh… Police Veng tia an lo kohna chhan pawh Police Lane (Qtrs.) eng emaw zat a intlar put thin a, chumi hming chawi chuan an lo ko ve bawk thin. Tun thlengin Police Qtrs lian pui pui In 5 a la awm.
Saron Branch YMA pawh 1962-ah (Rambuai 1966) a ding tawh a. Chuvang chuan Rambuai hnua Veng hming phuah ta chauh chu a ni lo.

Ht Hualngo
Saron veng hmingpu tu kha Nikum Fur mai khan a min hnan ta ani. Saron kha a lian thabawka a hnuai lama tangin a mina tunah kha.Saron thing kha a awm tawh lo kum khat emaw chauh a ni.Pu Ch.Chhunga kawt chhak lok kha a ni a YMA tualchhung a tangin kan hnatlang a ni mi 40 lai kha Saron veng hming putu Saron kung kha kan thian nghek maw le Pic Up Motor tip 3 lai zuk ni a.

——————–
Mamatea Ralte Kawlni
Chawnpui veng khi ka ko sawi ve lawk. Chawnpui veng anih hma khian meihawl rawh veng tih leh, hmuia veng tih ani zawk e. Tin chawnpui kung hi kan la nei ve bawk e. Chawnpui veng a awm hmasa chhungkaw 5 zing ah ka pi leh pu te kha an lotel ve bok hial ani.

———————-

Dylan B Khiangte
Rangvamual khiiii……”Khamliana Lungleng Lal chanchin nita in k hria” chuta a in ziahdan chuan. Khamliana in chak tur (Tuna la ding saw, Rangva in hmasaber a ni bok) vairam atanga sairanga lawnga an rin phurh chu A khuaten sairang to lungleng hi an phur a. Khulai RV ah khuan an Rangva thiar chu an chhekkhol a, chumi atanga Rangvamual ti ta chu an ti.

Aside | Posted on by | Tagged , | Leave a comment

Khawpui bo hmingthang: TROY KHAWPUI KHAW NGE A AWM : TROJAN WAR A TAK TAK A NI EM?

“Helen of Troy” film en tawh tan Troy khawpui Lalnu “Helen-i” hmelthat dan tur a ngaihruat theih. Troy khawpui chuan Western culture leh history te chu kum zabi tam alo luah tawhin, William Shakespeare a ziak “Troilus and Cressida” atanga Wolfgang Peterson’an 2014 a “Iliad” tih a siam Brad Pitt te kan hmuhna thlengin “thawnthu” ngaihnawm a nei a nih hi. Greek hote khawpui hmingthang Troy khawpui chuan ram hmangaihna (heroism) leh politic thila nihna (political identity) bakah, mihring rilru put hmangte a tarlang a ni.

Khawvel mihring hmasa leh fing hmasa, Bible meuh pawhin “Judate chuan chhinchhiahna an phut thin a, Grik te chuan finna an zawng bawk thin” (1 Kor 1:22) a lo tih hial Grik hote chuan thuvauk (myth) thawnthu an nei ngaihnawmin, chung te chu hman lai Mizote suangtuahna khawvela “Ngaiteii thawnthu” te leh “Rih Dil” leh “Pialral-Mitthi khua” ang tluk zetin thawnthu a nei ngaihnawm thin.

Troy khawpui chu khaw upa lutuk ni mahse, khawi hmunah nge a awm tih fiahna erawh thil hlui laichhuaktu (archaeologist) te zarah kan lo rin hriat riak ruak thei ta. Troy khawpui an sawi hi khawpui pakhat chauh ni lovin, khawpui hlun tum 10 dawn, hmakhawsang atanga din thar leh thin niin an hria. Grik epigramist Euenus ngei chuan, “Troy khawpui bo dan chu inhnial theih tak a ni ngei ang. Mahse, Homer- “Troy” khawpui chu ala awm reng a, bronze gate ten an venghim tlat a ni. Greek hote fei ki bar te chuan mi chhun in, min lai chhuak a ni lo. Greek mite hmuiah ngei chuan a ni a awm ni” a ti.

Homer a hnathawh ropui tak chu he Troy khawpui chanchin alo ziak hi a ni. Chu khawpui ropui leh hlui chu khawi lai berah nge a awm tih erawh kum zabi tam her liam tawh vangin, a hmun dik tak chu an hre thei der tawh si lo ! Mithenkhat chuan Troy khawpui chu HISARLIK, Turkey rama mi khu niin an ring ta ber.

He thawnthu (mythology) ngaihnawm leh lungchhiat thlak tak mai, Greek thawnthu (epic) chu Poet hmingthang Homer khan kum zabi 8na BC laiin a lo ziak chhuak a, “Iliad” tih chu Troy khawpui hual behna vanga Greeks sorkar buai dan ziakna niin, “Odyssey” tihah alo lang bawk.

He Troy khawpui la tura beihna hi Greek history ah ral dona ropui ber a ni. Peloponnesian War-ah, he Trojan War-indona aia nasa reng reng hi a hma lam leh hnuah a awm ngai lo niin, kum zabi 5na BC laia Historian Thucydides chuan a sawi. Indona hmingthang tak a ni.

~ Troy khawpui chu khawnge a awm tak?

Inhnialna awm thei chu kum sul tam liamtaah a nih vang a ni. Kum 1200 BC ah Greeks leh Rom-hote chuan Troy khawpui chu luah lehin “Ilios/Ilium” tiin, a hming an phuah niin an sawi a, mahse, kum 500 BC liam tawha thil thlengte chu zu hriat fiah kil kelh rual a ni si lo.

Tunlai khawvelah mi tam tak chuan Troy khawpui chu Turkey rama Hisarlik khu niin an ring ber a. Trojan history kum 4,000 liam tawh chu a dik ber hriat a harsa ta hle a ni. Thenkhat chuan kum 3,000 BC -500 BC inkara thil thleng dik tak chu zu hriatfiah a harsa hle niin an sawi. Iliad bua sawi angin Bronze Age-thir hriam hrei hman tawh hnu, 6th-7th BC Brone Age hun lai Troy VI emaw Troy VIII chu thu hmun anih ring an awm a, chu chu Iliad-ah King Priam khawpui tih a ni.

Greek hoten Troy khawpui an beih nana an hmanraw pawimawh “Sakawr” kha an pathian “Poseidon” lem niin an ring bawk.

~ POSEIDON chu tunge ni?

Greek thawnthuah chuan Poseidon chu Zeus a unaupa niin, khawvel leh tuifinriat te hi thununtuah an ngai. Tuipui leh thlipui te thununa, chung hmanga tharum thawhna thlentirtuah an ruat. Poseidon chuan tuifinriat thuk lai takah a nupui tan chenna hmun a siam sak a, a nupui Thetis chuan fapa hrin sakin, pa ni mai turah a inngai a, mahse, a beisei ang thleng lovin, tuipuimi midang Amphitrite chu nei leh, ani chuan Poseidon chu a ngaina lovin, hla takah a tlanbosan ta daih a. Poseidon chuan thuchah kengtu palai tirin, chung zinga pakhat chu Dolphin-(Thaichhawni nu?) a ni. Chutia tuipui lalpa pasal a neih chuan Poseidon vangin a lo hlim lovin, midang nena inngaihzawnna-extramaital affairs an lo neih phah ta a; Amphitrite chuan a pasalin a ruka hmei a lo kawl chu, thil mak rapthlak (barking monster) ah a chan tir ta.

Poseidon chu tuifinriat chunga lal a nihnaah a lungawi zo lova. Athens hmuna thuneih duhin Athena nen an intibuai ta. Pathian pahnih te chuan inelna neiin, Athenians hote chu tunge thil thlawn pek tha ber (best gift) changtu tur zawk an zawng ta a; Poseidon chuan a ralthuam chu Acropolis ah thlawh tirin, tui hna emaw, sakawr a lo piang ta niin an ngai. Athena pathian chuan Athenians te chu olive thing a pe a. Chutah Poseidon chuan Athena chu inbeih (combat) puiah a cho ta. Mahse, Zeus pathian chuan an buaina chu pathiante kutah ching fel turin a phut a, pathian mipa (male gods) te chuan Poseidon chu an tan ta vek a, pathiannu (goddess) te erawh chuan Athena chu an tan vek thung a. Zeus chuan a vote chu tikhaw tlaiin, pathiannute chuan Athena vote vekin, Athena chu hnehtu a ni ta. Poseidon a lungawilo chuan phuba lak leh thungrulh nan Athens velah tuilian a siam ta a ni. Thuneihna chan tuma a beihna chu a hlawhchham vangin, Naxos chu Dionysus atang lak tumin leh Aegina chu Zeus kut atanga lak tumin a bei a, Corinth pawh Helios kut atangin leh Argolis pawh Hera atangin. Thuneih chakna leh awhna avangin Greek pathian dang Olympians ang lo takin a lar loh phah, an ti.

~ Tunge Troy khawpui lai chhuaktu chu?

Kum zabi AD 19na tirh lam, April 1870 ah German sumdawngmi, a hnua thil hlui laichhuaktu (archaeologist) ni zuita Schliemann chuan Hisarlik hmun hi a lo lai chiam tawh a ni. A sawi danin Homer-a ziak Troy khawpui kawng chhe tawh a lai chhuak niin a sawi a, a thil laihchhuah zingah chuan King Priam a thilte pawh telin, thenkhat chu a nupui inchei nan a pe a sawi a ni.

Shliemann chuan Bronze Age hun laia Troy khawpui (1700-1200 BC) chu thenkhat hmuchhuakin, Troy II na ni thei awmin a sawi. Hei hi tuna mi Iliad a “Troy” khawpui aia kum 1,000 zeta upa zawk niin an ring zawk.

Eric Cline, historian leh archaelogist chuan, “Trojan War” a chhuinaah Schliemann chu mi vannei ber zing a mi a ni. Mahse, a thil laihchhuah dan Map en hian, “Troy chu a hmu chhuak a, mahse, Troy chu a tichhe bawk a ni” a ti.

~ Troy- Bronze Age City :

Kum 3,000 BC ah chuan Troy khawpui chu trade, agriculture leh sanghaman lamah a hmingthang hle. 1180 BC velah khan hetiang khawpui niawm tak tak sakna hmun 9 laiah hmuh chhuah a lo ni tawh a ni. Trojan War ah khan Troy khawpui chu Iliad lehkhabu sawi angin, Greeks hote kutah a tlu a. Archaeologist Manfred Korfmann ten AD 1990’s chhova an chhuichianaah he lai hmun ang renga Troy anihna tur ang hi Europe chhimchhakah a awm lo a ni, a ti.

“Trojan horse” tih chu Greek pathian “Poseidon” (lei tinghingtu) an tih chu niin, natural disaster- leilung dana chhiat rupna hmangin, Troy khawpui hi tihchhiat ni tain a rinawm.

Cline chuan, “Troy tlukchhiatna hi Bronze Age pumpui tlukchhiatna entirna ang a ni” a ti. Homer hian Troy chu tlang nuam thengthaw tak, zothlifim leh chhemdam thli te thawt heuh heuhna a ni, a ti. He Hisarlik khaw awm dan vel pawh hi Troy nen thuhmuna ngaih a ni. Brone Age hun laia mihring 4,000-10,000 chenna khawpui niin alang.

~ Hnamtin chi tin chenna khawpui Troy !

Troy khawpui chu khawpui lian (major city) a ni, tih rinhlelh rual a ni lo. Jonitt Kelder, Oxford University chuan, “Troy chu tunlai London khawpui anga ramdangmi chen tamna a niin, sumdawnna leh pemho pawh an tam hle ang. Kum zabi 14-13 BC ah Troy khawpuiah chuan foreigner an tam hlein ka ring” a ti.

Troy khawpui chu culture ah chauh a ni lo, thavauk (mythology) lamah pawh a hmingthang hle niin alang. Persian (Iran) lal Xerxes chuan Greece ram a fan (expedition) pawhin, Athena pathian hnenah Troy khawpui a tlawh tumin thilpek (offering) a lo hlan tawh a ni. A hnu kum 150 hnuah Alexander the Great chuan Persia Lalram chu hnehin, Troy khawpuiah a chawl a, Athena temple-a Archilles a in atangin phaw a la a, Illiad pawhin chumi chu a copy niin an sawi.

Rom-hote pawhin “Trojan” chungchang an nei. Rom hla phuahtu hmingthang (poet) Virgil chuan, “Aeneid” ah “Trojan Aeneas”- indona atanga tlan chhuakin, Italy ah kalin, Rome khawpui ropui tak dintu (founding father’s) zinga pakhatah a lo tang ta a ni. “Rome khawpui chu ni khata sak zawh a ni lo” tih thufing ropui tak alo chhuah phah. Aeneid hi Emperor Augustus a thupuanzarna ( propoganda) niin, amah ngei chuan “Trojan hero” nena inzawm angin a sawi.

Thenkhat chuan Alexander the Great khan May, 334 BC ah Asia Minor a run a, Persian Empire a beih khan “Troy” hmun tak hi a hria a, a tlawh bawk. A hnenah Rom hoten an pathian chibai buk na hmun Troy khawpui hmun thianghlim (alter) a hlan a ni, an ti. Chumi hnuah Byzantine Empire chu Islamic (Ottoman)hote runna vanga tluchhiain, a bo zo ta a ni. Archaeologist Shliemann khan rangkachak a laih chhuahte chu a nupui tan tiin, Germany ah a hawn a; a hnuah Indopui 2naah Russia sipaiin chungte chu la ve lehin Russia ramah an kawl niin an sawi.

Tun hnaia Mizorama khaw hmun hlui upat hmel tak laihchhuah, uluk taka endik mek “Vangchhia” pawhin Mizo history bung thar leh tun hmaa Mizote khawsak dan leh sulhnu hluite min la hrilhfiah ve theih ngei i beisei ang u.

Aside | Posted on by | Tagged , , | Leave a comment

CADC laka lungawilo Chakma pawl hrang hrangin kawngzawh dawn

AUTHOR : Dingdi
  • CADC lakah chakma pawl te an lungawi lo.
  • Chakma pawl ten kawng zawh dawn.
  • CADC in dan lovin hnaruak hnawhkhat .

Chakma Autonomous District Council huamchhunga pawl hrang hrang hruaitute tunhnaia Chawngte-a thukhawm chuan, CADC sorkar chu kawng hrang hranga a thuneihna hmang sualah an puh. CADC sorkar laka lungawi lohna lantir na’n naktuk Thawhlehni khian Chawngte-ah kawng zawh an tum.

Chakma hnam bil huap pawl hrang hrang – Central Mizoram Chakma Students’ Union, Central Young Chakma Association leh YCA branch hrang hrang bakah zirna in hrang hrang aiawh zirlai pawl hruaitute chu Chawngte-ah an thukhawm a, Central Young Chakma Association president Jyotir Moy Chakma-in a kaihruai. Pawl hrang hrang hruaitute chuan, CADC huam chhungah eirukna a hluar hle niin an sawi a, sorkar hotute chu an laina hnai leh chhung leh khat te duhsak bikah puhin, dan loa hna ruak thahnem tak hnawhkhatah an puh.

Chakma pawl hrang hrang aiawh thukhawmte chuan, hna chi hrang hrang thawk tura dan loa lak mi 100 chuangte ban an nih theih na’n, kum 2015 atang khan anmahni ruaitu CADC sorkar an nawr tawh niin an sawi a; pawl hrang hrang inzawmkhawm hmalakna kal zel nghawngah nikum August ni 4 khan zirlai pakhatin nunna a chan phah niin an sawi.

CADC huam chhunga NGO hrang hrang hruaitute chuan, kuminah CADC sorkar thuneituten an duhsak zawng mi 40-te chu hna hrang hrangah dan loin an thun niin an sawi a; “Dan loa lakte ban an nih theih na’n kumin July 15 khan CADC leh NGO-ten inremna kan siam a; nimahsela thla khat chuang a ral hnu-ah pawh he inremna hi CADC sorkar-in a tihlawhtling thei lo a ni,” an ti.

Hei bakah hian Chakma Autonomous District Council huamchhunga hmasawnna hna thawhna tur sum thahnem tak chheprel thinah, pawl hrang hrang hruaitute chuan sorkar thuneitute an puh a; kum 2009-a order tihchhuah Ministry of DONER sum cheng nuai 1152 senna tur Lawngpuighat atanga Kukurduleye panna tur kawng tun thleng laih a la nih loh thu te,Kamalanagar khawchhung tihhmasawnna tur cheng nuai 1988 tihchingpen a nih thu te an sawi.

DCA-in SPA hnuaia inkalpawhna thawmthatna tur sum a ruahman cheng nuai 287 te, Kamalanagar helipad kaltlanga Bajeisora leh Borapansury inkalpawhna kawng siamna tur chengnuai 199 te chu tun thlengin a hmanna hmuh tur a la awm lo niin Chakma pawl hrang hrang hruaitute chuan an sawi a ni.

Aside | Posted on by | Tagged , , | Leave a comment

MIZORAM CHIEF MINISTER HNENA GUWAHATI CHIEF JUSTICE LEHKHATHAWN

23rd September, 2016
Dear Chief Minister

He lehkhathawn hian hriselna leh chakna a thlen ngei che ka beisei.

Lunglei-a District and Sessions Judge Court-ah thil vanduaithlakchungchuang a thlen avangin he lehkhathawn hi ziak lo thei lo ka ni ta a ni. Nimin khan misual thenkhatte chu court building-ah dan bawhchhiain an lut a, court te, office te, officer-te chenna inte suasamin an tichhia a. Thu kan dawn danin, heng danbawhchhetute hian anmahniin dan rorelna an chelek a. Courtleh office-a lo awm Judicial officer-te leh staff-te thlengin an vau hial a. He thil thleng hi a pawiin a ngaimawhawm tawpkhawk a ni.

He thil thleng duhawm lo leh beisei lawk loh tak hian min barakhaih tak meuh a. Thil pawmawm loh hulhual a ni. He thil thleng hi sawrkar (administration) tan a hmingchhiatthlak a, dan leh hrai kenkawhna (law enforcement) a hlawhchham nasa hle a ni. Chuvangin dan hmanga inthununna chak tak lekkawh nghal a nih loh chuan a hnu zelah hetiang dan bawhchhiatna duhawm lo tak hi a cho chhuak ngei ang. He thil thleng hi Mizorama state-a Judiciary chanchin ziahnaah thil thleng duhawm lo, ‘hun thim’ ah ziah luh a ni dawn a ni.

Chutichuan Constitution-a pillar (executive, legislative leh judiciary) zawng zawngteah mipuite rinna leh zahna a tlakhniamloha, ngai a awh leh theih nan, heng danbawhchhetute lakah hian i hnen atangin dan anga inthununna chak tak (stern action)a thlen nghala, an thil tihsualna tichiangtu (evidence) te lakkhawm nghal a nih ka beisei a ni. Hei bakah hian court te, office te, chenna inte chei that (repaired) nghal a nih ka beisei bawk a. Dan rorelna chhunzawm a nih theih na’n leh tha taka an kal chhunzawm theih na’n a tul ang zawng zawngah venhimna pek a nih ka beisei bawk a. Juidicial Officer-te leh staff-te bakah, court-in bungrua a neihte himna atan venhimna pek a nih nghal ka beisei bawk a ni.

ᑕᕼᑌᗪᕼᗩᖇᗩᗪᒪ I rintlak

ᑕᕼᑌᗪᕼᗩᖇᗩᗪᒪ Ajit Singh

Aside | Posted on by | Tagged , | Leave a comment

GOVERNOR CHENNA TUR CHENG NUAI 708 SENGA SAK THIAH LEH CHHAN SAWIFIAH TURIN PRISM IN SORKAR AN PHUT

New Secretariat Complex Aizawl-a Governor chenna tur leh office tur atana cheng nuai 708 lai seng a in sak sorkarin a thiat leh mai chu a chhan sawifiah turin Prism chuan sorkar an phut tih thuchhuah siamin an tarlang.New Secretariat Complex, Aizawl-a Raj Bhavan thar tur sak hna hi kum 2002, November thla-a bul tan niin, Conference Hall, Durbar Hall, Security Personal Room, Banquet Hall te nen vek sak nan a tira sum ruahman zât chu Rs 147.76 lakhs a ni.

Hun rei tak sak puitlin loha a awm hnuin, sum leh pai dinhmuna kan ram a harsat em em lain heti zât sum senna hi tun hnaiah sorkar chuan luah pawh luah miah lovin a vaw thiat leh ta ringawt mai a. Sorkarin a vuak thiah leh hun, kumin 2016 thleng a sum hman an hriat theih zât chu a vaiin Rs 708,85,070.00 a tling tih PIRSM thuchuah chuan a tarlang.

Aside | Posted on by | Tagged , , | Leave a comment

NAUPANG HUAISEN LALBIAKFELA’N A NAU NUNNA CHHAN A TUMNA LAMAH A NUNNA A CHAN VE

Nimin Inrinni chawhma dar 10:00 vel khan Champhai Tlangsam naupang (unau) pahnih Champhai zawl leilet kam tuikhuahah an tla hlum.Pu VL Ruatkima Fanai fate 2, Lalbiakfela kum 7 mi hian a nau Lalngaihkima kum 5 tuitla lai (nunna) chhan a tumna lamah amah pawhin nun a chan phah ta a ni.

Lalbiakfela kum 7 leh Lalngaihkima kum 5, Pu VL Ruatkima Fanai fate tlak hlumna dil hi MGNREGS atanga Tlangsam VECten Community Farm Pond an siam niin, Lalbiakfela leh Lalngaihkima te unau hi an Patea fapa Lalmuanchhana te nen an ni pasal Pu C Lalramlawma chu luh meh tir turin an kal a, Tukthuan pawh an ei nghal a.Tukthuan an eikhamah hian Pu C Lalramlawma te kawmthlanga Tlangsam VEC ten MGNREGS atanga Community Farm pond an siam ah hian tui cheng turin an kal a.

Boral ta unau naupang zawk Lalngaihkima (kum 5) zawk hi tuiah hian a lut hmasa zawk a, a rawn lan har em avangin a u Lalbiakfela kum 7 mi hian a nau chhan tumin Tui ah hian a lut ve leh nghal a, an kalpui Lalmuanchhana chuan an pil rei tak em avangin (an Ni) Pi Baby Vanlalhlupuii a han ko a, Pi Vanlalhlupuii hian tanpuitu au in an thawm hria Pu T. Remsangpuia leh a fapa Vanlalnunzira te chuan chhiat tawhna hmun hi an thleng nghal a. Lalngaihkima ruang zawk hi an la chhuak nghal a. Lalbiakfela awm loh thu an hriat chhuah hnuah zawng lehin Lalbiakfela ruang pawh hi hmuh zui ve leh nghal a ni a. An tlak hlumna hi feet 5 a chanve vela thuk a ni. Dila an chen hma hian naupang dangte pawh an cheng ve a, an haw rem lai takin anni pathum hi an cheng ve leh a, he vanduaina hi an tawk ta a ni.

Lalngaihkima ruang la chhuaktu Pu T Remsangpuia sawi daninan ruang te hi dil mawngah a lo awm tawh a, an ruang hi in hnaihteah hmuh anih thu a sawi. Chetsual laia awm ve Lalmuanchhana sawi danin Lalbiakfela hi zuang lut nghal mai loin a thuk lo lai atangin a nau chhan tur hian a lut tan niin a sawi a, a lan dan chuan Lalbiakfela hian a nau chhanna atan hian tuihleuh pawh thiam miah loin dil thuk lam hi a pana a nunna hi a chan ve ta niin a lang.

Tuitla hlum unau 2 te nunna chhan tum hian theih tawp chhuah a ni chungin, chhanchhuah theih an ni ta lo a ni. An ruang hi zanin lumenpui niin, Tlangsam thlanmualah vui an ni ang.

Aside | Posted on by | Tagged , | Leave a comment

LUNGLEI COURT TUALAH ZOHNUAI MIPUI PUNGKHAWM, MAGISTRATE CHENNA IN SUASAM

Sep 22, 2016, chawhma lam khan August 27 zana Zohnuai tlangval, C. Lalsawmliana vithlumtu a puh, Stephen Lalchawiliana hmuh ngei tumin Zohnuai YMA leh khawtlang mite court hmaah an pungkhawm a, pungkhawm lungawilo te hian Lunglei CJM Pu R. Malsawmdawngzuala in an suasam.August 27 zana Tv C. Lalsawmliana Zohnuai vithlumtu a puh, Stephen Lalchawiliana hi tun thla ni 9 khan a court dawn tih hria-in Zohnuai khawtlangte hi court tualah amah hmuh tumin an lo pungkhawm tawh a, mahse a hma niin magistrate te’n jailah camp court an lo neihpui tawh avangin Zohnuai mipuite hian an hmu thei ta lo va, Court lama thawktute’n vawiina a court tur thu leh chutah chuan hmuh theih a nih tur thu hrilhin vawiin Sept 22 khan amah hmuh an duh avanga pungkhawm leh an nih thu an sawi a. Mahse a hma ang bawkin nimin lamah camp court jail hmunah an lo neihpui leh si chu inbumna leh inpalzutna a ni tiin Zohnuai khawtlang hmusittu leh dawt hrilh fotu magistrate chu hmuh an tum thu Zohnuai khatlang hruaitute chuan an sawi.

Hetih lai hian court tuala pungkhawmte hian court-ah luh an tum a, police te nen an innawrin Zohnuai mi 2 in hliam an tuar a, hemi hnu hian mi thenkhat chu magistrate quarterah kalin a chenna hi an suasam a, CJM Pu Malsawmdawngzuala nupui fanaute hi an insaseng hman a ni.Mipui thinrimte chuan magistrate in leh a driver in chu a kawngkhar tichhiain nasa takin inchhung bungrua an tichhe bawk.

CJM hi Zohnuai mipuite chuan court tualah alo chhuah nghakintlai dar 4:30 thleng khan an nghak a, hemi hnu hian court tual leh a chhevelah punkhawm phallohna dan (unlawful assembly) puan a ni a, pungkhawm mi eng emaw zat police te’n manin an tin zui ta a, CJM pawh Police te venna hnuaiah an in lam panpui a ni.

Thla hmas khan Stephen Lalchawiliana (26) s/o H Remlalliana, Lawngtlai chuan C. Lalsawmliana (33) s/o C. Lalrinawma, Lunglei Zohnuai a vit hlum a; Stephen Lalchawiliana hi police-te’n man nghalin, Lunglei District Jail-ah an dah nghal a ni.

August 27, 2016, Inrinni zan dar 10 pelh hret khan Lunglei Zohnuaiah Stephen Lalchawiliana leh tlangval dang pakhat, Muana tia kohte hi an intibuai a; intibuaite hi C. Lalsawmliana hian a thelh a. Muana chu a kal sawn mai a, Stephen-a pawhin haw tur angin a insawi a, a kal pahin C. Lalsawmliana hi a dulah a vit ta mai nia sawi a ni.C. Lalsawmliana hi Christian Hospital panpui nghal a ni a, mahse, chhan hman a ni ta lo a ni.

Aside | Posted on by | Tagged , , , , | Leave a comment

Chhuarlung Nu pahnih thattu man.

Dt. 7/ Sept/ 2016 Siaha District, Chhaôlo (Chhuarlung) khua a mi pahnih (Ka nu liani leh kan Farnu) rawng taka that tu chu man ani ta.

Thu dawnna in a tarlan dan chuan Lalpianga hian Sept 22 zan tlaiah ama thah ngei ani tih a in puanga, tukin Sept 23 khan Police lam chuan Lunglei lamah an thawn tawh thu in an sawi.

Mipui lungawi lo te Siaha Police Complex ah an pungkhawm nasa hle.

Aside | Posted on by | Tagged , , , | Leave a comment