Zang bawng leh bawnglo hriatna

Hmân deuh khan Bawrhsap pisa puiah Aizawl chhim lam tlangval 2, Zika leh Laia hi an thawk a. Tlangval ho deuh, fiamthu leh zahmawh ringawta inkâwm țhin an ni a. An Office rawn dawrtu mipa chu, ” A zang a bawng ang em?” ti mai mai hian an pâwt nileng țhin a..

Ni 1 chu an kohhran Upa, pu Hranga chu an office-ah a lo kal a. A haw hnu chuan Zika chuan, ” Laia, pu Hranga kha a Zang a bawngin i ring em ?” tiin a zâwt a. Laia chuan a rinloh thu in a chhâng a. Zika chuan, ” Kei chuan a bawng ka ring tlat, inchawi ang,” a ti ta a…

Tichuan an office lehkhabu an hâwn a. An vêng paho zawng2 hming an ziak chhuak vek a, an hming zâwn-ah :-
” Bawng.”
” Bawng lo.”
” Bawng.”
” Bawng lo.”
tiin an tlar thla vek a…..
A tûk zingah Upa Hranga te inah chuan an Office lehkhabu lian nen an inpawm thla ta a. Pu Hranga chu banril puin a lo ramkal a. A nupui leh a fanu an lo awm a. An nu hnenah chuan, ” Ka pi, Sawrkar laipui ațangin Order a lo chhuak a. Pu Nehru-a’n India khua leh tuia paho zawng2 hrisêlna endik turin min rawn ti tlat mai a. ihh !! Englo ania,, In pa zang hi a bawng leh bawng loh kan rawn zâwt dawn che a ?” an tia.

An nu chuan, ” Amah zâwt ula ani mai,” a ti bak hlak a. An fanu chuan an lehkhabu ken chu a han en dâk dâk a, ” Ka Nu, hei an ti tak tak ania,, kan vêng paho zawng2 pawh an rawn zâwt thla vek tawh, ” a lo ti a. A nu chuan, ” Lo nghak se a ni mai !” a ti hlar a …..
AN LO NGHAK TA A.

Nakinah chuan Pu Hranga chu a rawn Heiha chho dat dat a, an kawta a thing put a keuh hnu chuan inchhungah a lut a. Zika leh Laia te țhiandun lo țhu a hmuh chuan, ” E khai ! Nangni kan Babu te meuh in rawn lên,, a va pawimawh awm ve !” a rawn ti lut a..

Laia chuan, ” Pu Hrang, Central lam ațangin paho zawng2 Zang bawng leh bawng lo endik turin min rawn ti tlat mai a, hriselna lam atan ani awm e. Hei, vêngchhak paho zawng2 chu kan rawn suartluan thla tawh a, ” tiin an thil ziah sa chu a hmuh a..

Pu Hranga chuan pindana a tarmit a va la a, lehkha chu a’n bih vang vang a, ” An va han ti kher kher țhin ve mawle !” a ti chuar chuar a. Chutah, ” Kan tlangval hi nikum chhung zawng khan Sikserh vangin a pum tluk a, kei lah…..” tiin a’n pehhel kual a.

An nu chuan, ” Kha.., an lo nghah rei tawh che kha, a nihna ang ang khan hrilh thuai ta mai che !!.” a lo ti bak hlak a …

Pu Hranga chuan Tuibur a’n hmuam te te a, a puanven a’n sâwi țha a, ring vak lo, inchhunga awmte hriat theih tur hian, ” A tih ve teh tuh kha,,” An tiah.

Advertisements
Aside | Posted on by | Tagged , | Leave a comment

INDONESIA-AH “GAY” PAHNIH MIPUI HMAAH VAWI 85 AN VAW DAWN : HUMAN RIGHTS GROUP-IN A DEM

Indonesia ram, Banda Aceh province-a Court chuan Gay pahnih an man te chungthu relsakin, May 25 a Muslim thla thianghlim Ramadan thlen hmain, mipui vantlang hmaah vawi 85 zet hlap/vaw turin hremna a siam. He hremna dan tur court a puan a nih laiin, pakhat zawk chu a tap truau a ni. He Gay pahnihte hi kum 20 leh kum 23 mi an ni.

Hetianga Indonesia Court in thutlukna a siam hi International Human Rights group chuan demin a sawisel a ni. Jakarta Mayor hlui Ahok, kristian pawh Muslim sakhawbu Quran a sawichhia tiin, kum 2 tang turin Court in hmanni lawkah a hrem a, Moderate muslim ram ni a ngaih Indonesia chu Islamic lamah thuk takin a tlulut mekah an ngai. Bandan Aceh province hi Muslim Sharia law hmanna niin, Islamic deuhva rorelna kal pui duhtute lalna-nghawng lenna hmun a ni.

Tunkar Nilaini hi International Day Against Homophobia and Transphobia niin, hemi denchhenin thutlukna hi an siam niin alang.

Gay pahnih te hi an thenawmte chuan March thla khan sex an hmang dun lai phawkin an man niin an sawi a, police hnenah an hlan a, hetia an man lai hian pakhat chuan kawr ha lovin tanpuitu zawngin a phone in mi a bia mek a, chutiang thil phone-video a awm vangin Judge Khairel Jamel chuan, mipat hmeichhiatna (gay sex) an hmang ngei tih rin hlel rual a ni lo, a ti.

Islamic Criminal Code ang chuan kum 2 tan tir leh vawi-100 vuak tura tih a ni. Banda Aceh ah hian nikumah mi 300 zet hrem niin, “uirena, pawisa khelh, zu in phal loh, hmeichhia ni si kawr/thawmhnaw tawt treng trawng hak phal loh, mipa ni si-Friday Prayer huna tawngtailo te” hrem tur an ni.

(Mizoramah Kristian Taliban law siam ve ila, hlap hrep tur kan tam duh viau ang em aw!?)

Author : Ct Lalrinawma

Aside | Posted on by | Tagged , , | Leave a comment

JAPANESE ZINGAH “MODELING” TITURA SAWM SI, “SEX” LAMA HAWIA MODELING TIHLUIH TIR A HLUAR !

Japanese tleirawl Kurimin Aroma (24) chuan kum 4 kalta khan glamour modelling ti tura sawm a nih angin, TV celebrity lama chak zawng tak a nih vangin a zawm a, mahse, a thawhna company te chuan “modelling” tak tak lam aiin, tihluihna hmangin mipat hmeichhiat lam hawi, X-rated film lamah nawr luihna avanga a chantir thu a sawi. Kurimin Aroma chuan, “Saruaka awm tura min tihluih avang chuan ka tap chhuak a, nasa taka ka tan ngial pawhin chu company a thawk mipa 8 te chuan nasa taka min nawtna avangin, ka rem tih loh chinah tawp san tur leh tilo tura min hrilh avangin, a tawpah ka rem ti a, mahse, dawt vek a lo ni si”, a ti.

Hetiang thil a thlen vangin Japan sorkar chuan naupang zawkte thil fak nana hman khapin, mi 20,000 zet modelling ti tura interview zinga thalai 200 te chuan an thawhna modelling company ten an rem tihna baka nawr luiin, mi 50 phei chuan”sex” hmang tura nawr luihna an tawk tih an sawi a ni.

Nikum 2016-ah khan January atanga November thlainkarah hetianga hmeichhe tleirawlte hman khawlohna hi “Lighthouse” NGO an tih, “People Against Pornagraphy and Sexual Violence” pawlte chuan hmeichhe 148 zet an tanpui a, cases 83 lai ziak lutin, kum 2015 ah cases 29 chauh a awm laiin,nikumah a hluar chho zawk a ni, an ti.

Japanese hmeichhe 1 chuan film 100 dawn an siam luih tirah, a thawhna company te thu a awih loh chuan a chhungte hrilh an tum avangin, a remtilo chungin a zawm niin a sawi. Japanese Porn Industry chu kum tin Yen (¥) tluklehdingawn 500 (US$4.4 billion) zet a tling a, kum tin puitling film 20,000 lai an siam chhuak thin niin an sawi!

Japan ram chu tar lam an tam vangin, chutiang kawnga sumdawnaah naupang/ tleirawl kum 20 hnuai lam te an hmang nasa hle tih a ni. Chutiang film siam antum chuan hmun fianrial zawk leh Hotel remchang, tlanchhiat dawn pawha remchanglo laiah te an chantir thin, tih a ni.

Mizoramah pawh “sex video” a lo lar ve leh hluai thin a! Hetiang kawngah hian mipuite leh hmeichhiate kan fimkhur hle tur a ni. Kristian ni ve lote thiltih a tha leh mawi anga lang tam tak hi, Mizoram kristian State anga ngaihah a lo thleng ve leh thin hi, ram leh hnam mualphona leh Mizo leh Kristianna tihmel hemtu, hmel tibaltu a ni fo thin. Hnam dang ngaih chuan Mizo te reng reng chu Kristian tur vek leh nungchang tha, thianghlim, nun mawi turah ngaih kan ni.

Japan ramah film a ni emaw, picture ah pawh naupang hman khawloh lai thla (child abuse image) reng reng smartphone vel thlenga chuang man sak an nih chuan, US$ 9,800 chawi theihna leh kum 1 tan theihna dan siam a ni. Thil thalo hi thunun a, khuarhkhirh kan duh a, kan tum tak zet a nih chuan a hremna dan na tak leh khauh tak siam a tul fo thin a ni.

Author :

Aside | Posted on by | Tagged , , | Leave a comment

TWO WHEELER TAXI

Aizawl khawpui chhungah Two Wheeler Taxi khalha eizawng, mi 25 vel an awm mek a, an zinga pakhat chu hmeichhia a ni a, ni khatah Rs. 500 atanga 800 inkar an hlawh thin niin an sawi. ZONET zawhna chhangin Two Wheeler Taxi khalh-a eizawngte chuan, pawl dinin fel takin an inkaihhruai niin an sawi a. Sorkarin an dinna tur stand, khawpui chhunga a ruahman sak, Bawngkawn, Chanmari, Dawrpui-ah Health Care leh Hotel Floria bul bakah, Khatla, Treasury Square, Thakthing leh Chanmari West-ah te a remchan dan angin an ding thin a, heng an stand-ah te hian vawi khatah pathum palite din phalsak an nih thu an sawi bawk.

Two Wheeler Taxi khalhtute chuan sorkar bithliah dan chuan, a hman man hi km 1-ah Rs. 10, a bak km khat zelah Rs. 5-a pung tur a ni a, hetiang hian an tlan mek a, an rate hman mek hi an lirthei enkawlna nena chhutin tihsan deuh ni se an duh thu ZONET an hrilh a ni.

Zawhna chhangin Two Wheeler Taxi khalhtute chuan, anmahni hmangtute chuan an zawngchhanghle nia an hriat thu an sawi a, mi thenkhat chuan a hman man hi a tlawm an tih avangin an pek belh hial thin niin an sawi bawk a ni. Aizawl khawpui chhunga Two Wheeler Taxi-te hian number plate eng hmangin, an lirthei hma leh hnung bakah a sirahte Taxi tih an bel a, a khalhtute hian helmet eng, taxi tih inbelna an khum bawk a, mi an phurh loh chuan khawi hmunah pawh a remchang a nih chuan phar dina hman theih an ni. Puan tawh thin angin, State Transport Authority rawt angin Aizawl khawpui chhung atana Two Wheeler Taxi Permit hi February thla tawp thleng khan mi 222 pek an ni tawh a, chung zinga mi 147-in Permit an la chhuak tawh a ni.

Source: Zonet


Rema Rema
Stand khat km ah Rs 10/- ,a bak km ah Rs 5/- tih a nih chuan; Bawngkawn bazar atangin Durtlang AOG camping centre khi km-5 /6 ah ngai ila, heta rate ziah danah chuan Rs 30/35 man vel a ni a, mahse Rs 100/- an ti daih sia ,a rate dik tak sawi thei kan awm em ?

BT Mathana Mta
Keipawh Laipuitlang atangin Tuikhuahtlang ah ka hmang a, Rs. 200 a ti daih sia, heta a rate i rawn tarlan nen chuan ava inmil silo ve

Rema Mikaela Pa
Rate an siam angin tumah an tlan duh lo. Km 1 ah rs 10 nih chuan hlawk vak dawnlonih chu dik takin la se

Hc Ralte
Two wheeler Taxi hi ala tlem lutuka hmang duh tamtak an awm, Taxi pangngai hi hman man a to em mai a, traffic jamin a tibuai ve bawk si, Two wheeler Taxi hi tun ai hian tam se ka ti khawp mai. A tam chuan tun aiin hmangtu an tam ang a, an hlawk zawk ngei ang.

Nghaka Ralte
Laipuitlang leh Tuikhuahtlang inkar Texi rate engzatnge, a tam mah², 200 chuan.

Ngaitei Ralte
Treasury atangin Aizawl hospital poh Rs50/’ an la rate khi chu an hmanglo a niang

Author : Vlr Pautu

Aside | Posted on by | Tagged , | Leave a comment

Forensic Files: Murder On The Menu (mizo version)

Restaurant neitupa chu a office ah thi a hmu a ni a. Assistant Chef pakhat a intihlum bawk. Heng thihna hmun hnih a thleng te hian eng emaw kawng zawng talin inlaichinna an nei theih ang em? Scientist te chuan chu zawhna chhang thei tur chuan ngunthluk taka hnu an chhui a ngai a. Investigator te’n finfiahna hrang hrang an han enfiah meuh chuan inbumna leh phatsanna thawnthu lungchhiat thlak tak mai an hailang ta nawlh mai le !

“General Wayne Inn” hi Philadelphia khawpui chhinchhiah nana hman hmun pawimawh leh lar ber pawl a ni a. Kum 1704 a din a ni. He Khual Buk hi Colonial hun lai kha chuan “William Penn Inn, the Tunis Ordinary and Streepers Travern” tia hriat a ni thin. Franklin leh Washington te lo tlangnelna he Khual Buk hming hi Revolution hnu rei lo te ah he lai Khualbuk a lo thleng ve tawh General “Mad” Anthony Wayne, Revolutionary War Hero hming chawiin kum 1793 khan General Wayne Inn tia thlak danglam a ni a. George Washington-an he hmun a a vawi khat nan a chaw a ei tumin he Inn hi kum 70 zet a upa a ni tawh a ni. He Inn (Khual buk ) un zet hian mit a la in mi a hip a. Tu pawhin “General Wayne Inn” awmna chu an hre vek mai a ni ber. Lower Marion ah han kalin a mi cheng 60,000 vel zingah he Inn a chaw vawi khat tal la ei lo emaw a hming emaw tal hre lo chu hmu tur an vang ngawt ang.

Kum 1995 khan Chef Jim Webb-a leh a sumdawnpui chuan he Inn hi tunhma a a ropuina thin ang a ngaiawh tir leh tumin thuneihna an chang ta a. Theihtawp an han chhuah a. Hun khirh tak paltlang vanga tlu chhe ta leh dawrtu tlem vanga khar mai hmabak chu tunhma a a lo ropui thin ang khan an siam leh thei ta mai reng a. He hmun danglamna em em pakhat chu thuthangah chuan kum 300 lai a upa he Khual Buk hi hrang anga an sawi hi a ni. Restaurant Manager Robin Webb-i sawi dan chuan amah chauh va restaurant chhung khawilaiah emaw han awm chu a hlau a. A mur sung sung thei hial niin a hria a. Thlarau sual a awm te pawh a ni mahna.

Kum 1996, Christmas ni atanga a ni hnihna ni ah chuan hnathawktute chuan chumi ni a tan sumdawnna tan leh turin restaurant chu an hawng a. Inchung lam chhawng thumna Office-ah chuan Jim Webb-a chu chhuatah thi in an hmu ta a ni. 911 an call ta nghal vat a. An pu chu a thi ni a an rin thu leh a tlukna lama a lu a sawh ni ngei a an rin thu an hrilh a. A taksa pawh a vawh vek tawh thu leh a duk vek tawh thu an hrilh a. Ambulance an mamawh nghal tur thu an thlen nghal bawk a ni.

Paramedics te chuan Jim-a chu a thihna a tangin hun eng emaw chen a liam tawh tih an nemnghet a. A hma zan a thi pawh a ni thei. Bruce Castor, District Autorney chuan “Chhuatah tlu angin an sawi a. A chhan chu a chal ah intauhna hnuhma an hmu a. A chal ah vuakna emaw tlukna lama dawhkan kotlang a intauh a ang mah zawk a ni” tiin a sawi a ni.

Jim-a dawhkan chunga pawisa dahna thleng chungah chuan 25 Caliber Kartut ruak an hmu a. Investigator ten uluk zawk a an han endik chuan Jim-a tukkhumah chuan silaimu luhna hliam an hmu a. A nihna takah chuan Jim-a tukkhum ah silaimu chu lutin a chal vun tawn tlang lovin a tang a ni.
Jim-a chu kum 31 chauh va upa a ni a. A thih hian a nupui leh a fa te pahnih la buchip tak tak te a kalsan a ni. A nupui tan chuan tawrhna nasa tak a ni ngei ang. A pasal thihna vang chuan mu leh mal pawh nei lovin a buai in a chi-ai hial a. Investigator te chuan Inrawkna chu tualthah chhan niin an hre lo va. A chhan chu Jim-a khan a nghawngah rangkachak thi lian tawk tak a awrh a. A pocket a wallet chhungah Dollar za tam a ak bawk. Chung te chu laksak a ni lo va. An hmuh theih chinah Building chhung atangin engmah lak emaw khawih danglam emaw a awm lo bawk a ni.
Jim-a ruang an hmuna lai hi hmun fianrial lai tak a ni a. Police te ngaihdan chuan Jim-a thattu chu tu pawh lo ni se la Inn (Khualbuk) awm dan vel a hre bel thawkhat hle niin an ring a ni.

Police te chuan Jim-a chhungte chu Jim-a michhawr te zing atangin tu emaw talin Jim-a kha thi se tia lo duh deuh an awm em tiin an han zawt a. Chutiang han kawh fak tur erawh an hre mai bik lo. Jim-a kha hna thawhpui harsa chi; a hnuai a lo thawk tawh zawng zawng ti theih deuh thawh khan a kaihhruai leh enkawl dan an duh lo deuh vek a. A mi rawih te chungah a khirhin an hnen atangin sawilselbo a hna an thawh a phut thung a ni.

Police te chuan tualthattu chu an thangkam awh-tir thei beiseiin silai kahna hliam chungchung kha, Jim-a chhungte tiamin, tumah hrilh hriat rih lo ni se tiin thutlukna an siam a. Dik tak chuan Jim-a chhungte chuan Jim-a chunga thil thleng chu hriat an duh em em a. Mahse Police te chuan an hrilh mai duh bik si lo. A chhan chu chu thuruk chu Police te chauhin an hriat chuan rinhlelh (Suspect) khan tih sual emaw tawlh thluk hun emaw a nei palh thei a. Tualthahna ah a/an in hnamhnawih a ni ngawt loh chuan chu an thu ruk zep lai mek chu a/an tan han hriat theihna chhan tur a awm dawn lo tihna a ni.

Jim Webb-a thattu an zawnna kal zelah chuan Police te chuan chu kum 300 zet a upa restaurant chhungah chuan chhui chhuah theihna tur hmanrua (clue) an han zawng ta a. Jim-a ruang kha chhawng thumna hmun biru lai, a Office a hmu a ni. Chu lai hmuna thil awm zingah chuan kum 300 zeta upa kailawn vawnchhan nei, rahbi thingphel a phah a awm a. Han rah zawngin chik leh innawt ri tawt thei hi a ni. Tuma hriat lovin a ruk a ral a han kal chho ngaihna a awm lo. Han in-thawn (surprise) ngaihna pawh a awm lo; a chhan chu hla tak atang paw’n mi lokal thawm kha a hriat theih tlat a ni.

A hmasa ber a tan Investigator te chuan Jim Webb-a nupui Pi Robin-i chu thu an han zawt a. A sawi dan chuan khami zan khan a fa te pahnih nen in-ah a awm a. A pasal a haw lo tih pawh a lo hrechang meuh lo va. Police ten, “Nizan ah Jim-a kha dar eng zat ah nge a lo haw?” tia an zawhna chu “Ka hre lo” tiin a chhang a. “Ni leh, tukin khan dar eng zat ah nge In a chhuahsan? ” ti a an zawhna pawh “Chu pawh ka hre lo” ti bawkin a chhang a ni.

Jim-a sumdawnpui kum 29 a upa Guy Sileo pawh Police-te rinhlelh zingah chuan a tel ve a. An pahnihin $ 650000/- Life Insurance Policy an neih a. A tu emaw zawk zawk kha lo thi ta se a dam zawk khan chu Life Insurance Policy atang chuan hamthatna a dawng dawn tihna a ni a. Sumdawnna kawng a inremsiam dan danglam tak ni lem lo mahse chu chuan Sileo tan tualthah duhna tur chhan tha tak a siam sak thei a ni. Chu mai ni lovin an sumdawnna a an inkawpna chungchangah Jim-a kha a lungawi vak lo a ni tih pawh Sileo chuan a hria a. A chhan pawh ama’n (Jim) hna tul zawng zawng a thawk a Sileo an zu nasa taka in in Waitress te a chhaihkual vel a ni tih chu Jim-a khan a hmu thiam tan ta si a ni.

Investigator te chuan Jim-a thah a nih hma kar thumnaah Sileo-an Phoenix Arms siam 25 Caliber Pistol a lei tih an chhuichhuak a. Sileo chuan phal takin chu pistol chu Police te hnenah test turin a hlan a. Firearm expert te chuan Test Fire chu an han ti ta. An pistol Test Fire silaimu (bullet) in barrel a tawntlang zawng a hnuhma (mark) lo insiam Lands and Grooves leh Jim-a kahhlumna ngenmu (bullet) a Lands and Grooves te an han khaikhin chuan an in ang ta hauh lo mai !

Note: Mawlmang takin hrilhfiah chhin ta i la. Silai/pistol ngul (barrel) chhung hi a mam (smooth) chi leh mam lo (silai kawherh) ang chi a awm a. Ulhbun/elhbun kan ti ang hi a mam (smooth) chi a ni a. Rifle leh pistol lam chi ngul te hi a chhung lamah a herh zawngin a inrin khuar duk thung. Tichuan, silai ngul (barrel) chhunga a in rin khuarna lai chu Groove a ni a. Groove leh Groove inkar a pawng lai lo awm chu Land an ti a ni. Ngenmu (bullet) in silai a tawntlang khan land leh groove te chuan ngenmu ah khan land leh groove (Rifling Mark tih pawhin an sawi ve bawk) a siam chhawng ve leh a. Ngenmu ah chuan chhinchhiahna/mark a awm ta thin a. Kan fingerprint ang mai hian silai a hran ang zelin ngenmu a chhinchhiahna/mark lo insiam pawh a danglam ve vek a ni. Tichuan, test fire na a bullet leh crime scene a bullet te chu Comparison Microscope hmangin an han enmil ang a. Land leh Groove te an lo inmil thlap chuan chu mi silai ngei hmang chuan crime scene a silaimu kha kah chhuah a ni tih kha an finfiah thei ta thin a ni.

Police te khan pawikhawihna thlenna hmunah (crime scene) 25 Caliber ngenmu (bullet) an hmu a. Test-na a tan 25 Caliber pistol an nei bawk. Chu pistol ngei chu pawikhawih nana hman a ni ngei an beisei hle a. Mahse, test an neihna atangin an inmil lo tih an hriat hnu chuan Sileo a 25 Caliber pistol chu pawikhawih nana hman a ni lo tiin an hnawl ta phawt a. Chu mai ni lovin Sileo chuan pawikhawihna thlen lai khan hmun dang daih ah a awm a ni tiin chhuanlam a nei bawk a. Khami pawikhawihna thlen zan khan zankhuain a bialnu Felicia Moyse bulah awm angin a insawi a ni. A sawi dan chuan hna an thawh zawhin a bialnu leh Jim Webb-a te nen zu an in ho a. A hnu deuh ah anni pahnih chu Christmas party chhim turin an chhuak a Jim-a erawh eng emaw in ziah fel tur a neih avangin a awm hnufual thung a ni.

Felicia-i hi he restaurant ah tho hian Assistant Chef a ni ve a. Sileo a kha a bulah a awm a ni tih a nemnghet mai bakah Lie Detector test pawh a paltlang bawk a ni.

Chuvang chuan Investigator te chuan rinhlelh thei tur dang an zawng zui ta zel a. General Wayne Inn sumdawnna inrelbawl dan chu an han enfiah leh ta. Chu restaurant a hnathawktu te chu an han enfiah a. Hnathawktu te zingah tualthah duhna chhan tur (motive) nei an awm theih em tih an han chhui chiang a. Chu ta tanga an hmuhchhuah chu thla eng emaw zah liam ta ah khan chu retaurant a Waiter pakhat Ken Norcut a chu costomer te credit card ama mimal thil lei nan a hman avangin Jim an a lo ban tawh tih Investigator te chuan an hre thei a.

John Stillwagon, Homicide Detective sawi dan chuan Customer te inhnawhpuar laiin an Credit Card chu vawi hnih khawlah a lo hmang a. Chumi atanga transaction pakhat zawk chu a lo puanhnuai ta a ni. Thu an han zawh chuan Norcut a chuan Jim Webb thah a ni zan khan hmun dang daih ah awm angin a inchhal ve thung a. Mak deuh mai-in kha tualthahna thlen lai khan mi bum nana thil lem siam (forgery) charge vangin police kut a a awm lai tak a ni teh tlat a.

Jim Webb thah a nih atanga thla hnihna ah chuan vanduaina dang a lo thleng leh ta. Guy Sileo bialnu Felecia Moyse-i chu a lu a silai kahna avanga thi-in a chenna in ah hmu a ni ve leh ta. Inkahhlum nan hian a pa Sevice puakruk (Revolver) a hmang a ni. Dik tak chuan Felicia-i chu thuhretu pawimawh tak a ni a. Mahse tunah chuan a thi ta si; a thihna chuan Police te lo inralrin lawk na leh ruahmanna zawng zawng chu a ti sukuk zo ta vek a. A thih hmain ziaka hnutchhiah engmah a nei lo va. Chu vang chuan a intihlum chhan chu thilmak la hriat theih loh thil a ni ta.

Jim-a nu Terry Webb sawi dan chuan Jim-a kha rim taka hna thawk thin leh chhungkaw ngaihsak mi a ni a. Fapa tha tak; eisiam thiam tak leh eisiam lam vei bur chi niin a sawi a ni.

Jim Webb-a vuina hunserh chu thah a nih atanga a ni ruk-na ni ah St. Tymothy Church, Philadelphia khaw pawnah hman a ni a. He hunah hian chhungkhat laina, thiantha, thawhpui te leh an dawr a lo chawl tawh thin za tam takin ama zahna chibai hnuhnung ber an hlan a ni. Chutilai mek chuan Police te chuan an hnuchhuina kawng a hlawhtlinna hmasa ber tur an tawng ta. Hnathawktu pakhat chuan General Wayne Inn ep, kawtthler lehlam a Parking lot ah 25 caliber silaimu a chhar a. Ballistic Expert ten an han enfiah chuan Jim Webb pawisa dahna thleng a an chhar kartut ruak Jim-a thihna thlentu nen khan an brand an lo in ang ta chiah mai. Tualthattu khan silai kha bawlhhlawh bawmah a paih a ni ang tiin Police te chuan an ngaituah a. Bawlhhlawh bawm chu an han en a. Mahse, a lo ruak vek si. Ni tlem te liamta ah bawlhhlawh paihtu/khawn khawmtu motorin a thiar sawn a ni ngei ang. Mak tak maiin bawlhhlawh paihtu motor chu an va hmuchhuak thei hlauh a. Motor chhung a Ton 12 laia rit bawlhhlawh chu an han chinglet ta a. John Stillwagon sawi chhawn leh dan chuan chutia bawlhhlawh chitin reng mai nileng lenga han hai darh mai chu a hringnuna rimchhia a tawn nasat ber tum leh tenawm a ti ber tum a ni hial thu a sawi. Mahse, chuti chung chuan hmaih neih hauh lovin truck chhunga bawlhhlawh zawng zawng chu an chinglet a. Mahse, vanduaithlak takin silai chu an hmu zo ta chuang lova. An hnuchhuina kawng chu a ping leh ta phawt mai le.

Rinhlelh tur chu
Police ten an hnuchhuina chu chhui zui hleih theih lovin a tawp ta tlat mai. Mahse, Jim-a nupui Robin Webb-i chuan thil hriatchhuah pawimawh zet mai a nei ta hlauh mai le! A sawi dan chuan mitthi dahna lam pan tura In atanga Jim-a ruang an lak chhuah lai khan restaurant kawt a a din lai a ni a. Chutilai chuan Jim-a sumdawnpui Guy Sileo chuan a hnen ah tawrhpui thu hrilh turin In atang chuan a lo chhuak a. Robin-in a lo chhinchhiah hmasak ber chu Sileo’an sun glasses a bun kha a ni. Tichuan Robin-i hnenah chuan, “Tu in nge Jim-a kha “KAPHLUM” duh ang le! ” tiin pawi a ti thu a hrilh a. A tum ni hauh lovin Police te leh tualthattu chauh in a an hriat thuruk chu a puangchhuak ta a ni. Investigation a inhnamhnawih mi tlemte chauhin Silai a inkah hlum changchang kha an hria a ni si a. Chuvang chuan an rinhlelhna mit chu Guy Sileo-a chungah a fu nghal chat mai a ni. A chhan chu Medical lama training nei tawh nurse pawhin Jim Webb-a kha a tlu niin a ring kha a ni a; kah hlum a ni tih eng tin nge Sileo khan a hriat theih ngawt ang?. Chu mai bakah Police te chuan hmuhchhuah belh dang an neih leh ta bawk.

Restaurant a hnathawktu zinga then khat te chuan Sileo-an Police te hnen a a hrilh loh 25 Cal. Pistol dang a neih thu an sawi a. Witness pakhat-in Police te hnen a a hrilh dan chuan chu Pistol chu Pistol hlui zawk leh la register loh, Sileo-a pu in Indo zawh hnu a Italy atanga a lo hawn, a rochun tak a ni. Restaurant a lo thawk ve tawh leh rinhlelh zingah pawh tel tawh Ken Northcut chuan chu Pistol chu chiang taka a hriat thu a sawi a. Northcut chuan Sileo-an silai a kawl ni a a sawi pianhmang chu chiang takin Police te a hrilh ta a. A sawi dan chuan silai chu Barretta niin a ngul chung lama hmeh hawn theih ang chi a ni. Northcut te ang Military lama tawnhriat pawh lo nei nual tawh chuan pistol pang a “Trident Seal” tia a hriat awm thu nen lam chuan Police te chu a hrilh ta a.

Police ten Sileo-a chu silai chungchang an han zawh chuan chutiang Barretta hand gun a nei ngai lo thu in a lo chhang a. Mahse Police te chuan Sileo chu mi tawngkam thiam leh dang nal zet mai a ni tih an hria. Dawt a sawi tih leh a luhlul tih pawh an hria a. Sawi pawh a sawi thiam reng a ni.

IN DAPNA
Police te chuan Sileo-a Office chu an han dap ta a. 25 Cal. Silaimu bawm an hmuchhuak a. Chu silaimu chu Jim-a kahhlum nana hman ang chi kha a ni. Analyst Gene Krebs chuan chung kartut (cartridge) te leh tualthahna hmun a kartut ruak te chu a han khaikhin a. Bunter in chhinchhiahna danglam bik a siam te chu chung kartut ah chuan a awm em tiin a zawng a. “Bunter Mark” kan ti tak hi silaimu siam a nih lai a khawlin Kartur mawng a chhinchhiahna/mark danglam bik a siam hi a ni a. Silaimu siamchhuaktu ten kartut an siam laiin an hming emaw, hming lam tawi emaw hming bul hawrawp emaw chu kartut kawr ah emaw a mawng lam-ah emaw an chhut kai thin ang hi a ni. Chung kartut pahnih a “Tool Mark” te chu an inang chiah a ni tih an finfiah ta. Chu mi awmzia chu chung silaimu te chu factory thuhmun leh ni thuhmun a siam te an ni tihna a ni.

Mahse, a tlangpui thu in Bunter thuhmunin a chhut kartut sang tam tak a awm thei a. Chuti a ni chuan silaimu bawm tam tak ah chuan kartut tam tak Bunter thuhmun in a chhut an awm thei a ni.

Tualthahna silai awm loh vangin hnuchhuina chu hluihlawn in a awm ti tih ta. Hnu thar han chhui zui tur awm lovin kum hnih lai a liam ta bawk. Mahse Police te chuan beiseina sang tak an la nei reng a. He mi case bika an hmasawnna erawh a muang hle thung a ni. Kumpui linglet a Case buaipuitu te chu hnu chhui zui tur nei lovin an tangkhang hi a ni ber tawh a. Mahse Chief Investigatir Richard Nilsen-a erawh a la beidawng duh hauh lo mai. He Case hi chhuichhuah a tum ruh tlat a. Chutianga a awm lai chuan beisei lo lam atangin phurna thar a chhar ta nawlh mai le! A chang hi chuan Investigation-ah hian hnu han chhui hleih theih loh chang a awm thin. Chutiang hunah chuan thawk han lak te te a evidence te chu tha thar nena han enfiah that leh a ngaih chang a awm fo thin a ni.

Zan khat chu Richard Nilsen-a chuan Forensic Files episode pakhat a Diatom hmanga Case an solve-na a en fuh hlauh mai a. Mak pawh a ti hle. Midang pawhin Diatom hmanga case an solve theih chuan anni pawhin Diatom hmang a case an solve theihna tur an evidence room a evidence an neih zing a mi a eng emaw ber chu awmin a ring a ni.

Diatom, microscopic organism
(A sam zawngin: Mit lawnga hmuh theih loh thil nung),
chuan he case hi an tanpui thei chiah lo va. Mahse, Nilsen-a chuan Guy Sileo silai paina (Holster) ah chuan Sileo-an Police te hnena a pek silai ni lo silai dang daih lo thawlh luh ni ta se eng tin nge a awm ang tih a hre duh ta a. Kha tualthahna silai kha eng emaw laiin chu holster ah chuan thawlh luh a ni phawt chuan eng evidence emaw tal chu Holster-ah chuan a kaichhawng/insawn (transfer) ngei dawn a ni. Hloh tur an nei lo va mahse hlawkna hlir a ni dawn tih hria-in Nilsen-a chuan Holster chu Forensic Lab lamah enfiah a tan a thawn ta. An thil hmuhchhuah chuan a barakhaih ngawt mai le.

Jim Webb-a thah a ni hma kar thumna-ah khan a sumdawnpui Sileo a chuan Pheonix Silai 25 Caliber hand gun a lei a. Forensic test-na chuan tualthahna silai a ni lo tih a finfiah tawh a. Mahse a hma kum khat kal ta khan Restaurant a thawktu tam tak chuan Sileo chu silai dang daih Barretta pistol kengin an hmu thung a. Sileo-a erawh chuan chutiang silai a nei lo tiin a pha thung a ni.

Police te chuan restaurant a hnathawktu pakhat chu a ruk a microphone vuah tirin Sileo-a chu Barretta pistol chungchang zawt turin an han ti a. An sawi angin Sileo-a chu barretta pistol a la kawl leh kawl loh a han zawh chuan a hman theih loh avanga a dah bo thu in a lo chhang a. Police te chuan an man chhuak ta chiah mai le. 25 Caliber Barretta pistol kawl ngai lo ang a Police te hnen a dawt a lo sawi thin chu ngaihthlak rukna hmangin an finfiah ta. Chuvang chuan Police te chuan savun a siam holster ah chuan Barretta pistol a lo inkhung/thawlh tawh ngei a ni tih finfiahna zawng turin thuthlukna an siam ta a ni. Nilsen-a ngaihtuahna-ah chuan Barretta pistol kha chu holster ah chuan thawlh luh lo ni kher lo mahse chu hoster ah chuan hlimthla nem kai (Impression) a awm ngei dawn a. Chu impreasion atang chuan a hmain eng silai nge thawlh luh lo ni tawh thin tih kha a hriat theih tho dawn a ni.

Forensic Analyst chuan holster chhung enchiang turin a tlang thuina te chu a han phelh a. Pistol a a pawng sang lai ber chu pistol holster chhung lam savun nena an intawhna lai a ni a. Investigator te chuan Pheonix Arms pistol in impression a siam te chu an hmu ngei mai. Mahse, thil dang pawh hmuh tel an nei bawk. Impression atanga a lan dan chuan pistol chi hrang pahnih lo dah tawhna hnuhma ngei a ni a. Silai pahnihna zawk chuan impression thuk tak siamin bawlhhlawh pawh a kai tel a. Impression dang leh chuan silai naran a awm lo, hmeh hawnna (release lever) ang leh silai ngul chung lama chamber hawna lai kawpza (hinge) a mil a. A dang leh chuan pistol pawh tawlh zawng a a cheng kauna (Slide) leh dan pangai aia lian zawk Silai hmeh puah palh theihna laka vengtu (Trigger guard) a mil bawk. Khing impression zawng zawng te khi silai pakhat chiah in a siam thei a ni. Chu silai chu Barretta model 20, mit a hmutu (witness) ten Sileo-an a ken lai an hmu ang kha a ni.

Investigator te chuan Barretta silai leh holster chhunga impression awm te chu an han enmil ta zak zak a. Silai a logo leh safety switch te chuan holster chhung lama impression awm nen an mil a ni tih an hmu thiam a. Police te tan chuan chung chu thu lawmawm tak a ni. A chhan chu an thu hriat chuan witness te thusawi te kha a nemnghet a. Sileo-an tual a thah hma khan a kut-ah Barretta silai kha a awm ngei a ni tih a tichiang ta a ni.
Guy Sileo chu man a ni ta. First Degree murder a puh a ni ta bawk. Prosecutor te rin dan chuan tualthahna chhan chu pawisa lam thil vang nihin an ring a. Kha thil thlen hma vel khan General Wayne Inn khan pawisa a hloh mek a. Jim Webb khan an khualbuk chu khar mai rilrukin Sileo nena an sumdawnna (Business partnership) pawh titawp a mahni a inrelbawl a duh a ni. Jim-a nupui Robin-i sawi dan chuan Jim-a khan an restaurnt lawyer sawipui-in chung boruak vel an chinfel zawh ve leh kal sawn daih a duh a ni.

Prosecutor te sawi dan chuan Webb-an Business Partnership a titawp hma ngei-in Sileo khan $ 6,50,000/- Life Insurance Policy kha neih ngei a duh a. Webb-a kha that turin thuthlukna a siam ta niin an ngai a ni.

Sileo-a khan hnathawktu dang ten 25 caliber Barretta pistol a nei thu kha an hria tih a hre vek a. Police-te’n silai mu te chu an khaikhin ngei dawn ti pawh a hre chiang bawk. Chuvang chuan ama silai kawl lai ngei hmanga Webb-a kha kah hlum a ni lo tia a chhuanlam (alibi weapon) theih nan silai pahnihna kha leiin hun remchang kha a nghak ta ran mai a ni. Chu hun remchang a ngah chu Christmas tuk leh zan ah chuan a lo thleng ta. Sileo chuan Assistant Chef Felecia Moyse-i chu tualthahna thlen laia hmun dangah a awm ngei a ni tih hriatpuitu a tan (alibi) a hmang ta a. Restaurant a hna an thawh zawh chuan an thiante In a christmas party chhim turin ruahmanna an siam a. Felicia-i chuan Restaurant an chhuahsan laiin Jim Webb-a kha a dam ngei a ni tih a nemnghet a. Mahse Sileo-a leh Felicia-i te chuan Party a kal nan car hran ve ve an hmang thung a ni. Felicia-i chuan party-na hmun thlen hmain a pen kawi hmasak lawk tur thu Sileo-a a hrilh a. Chu chuan Sileo-a chu a motor inher tirin restaurant lamah a let lehna hman tur hun a siam sak a. Evidence atanga a lan dan chuan Sileo a chuan a car kha kawtthler lehlam-ah a hung a. Chumi hmunah chuan a Barretta pistol chu a enfiah a. Tihpalh thil thu in silai cheng a kau (Cock) na lamah silaimu kha a perchhuk ta a. Chu silaimu chu a hnu a Police ten bawlhhlawh bawm bula an chhar tak kha a ni.

Investigator te rin dan chuan Guy Sileo-a chuan Jim Webb-a Office lam chu a pan chho ta them them ang a. Kailawn a a chho thawm chu Webb-a khan a lo hre ngei bawk ang . ” Tu nge ni?” tia Webb-an a lo chiu-auna pawh “Keimah ka ni e. Thil ka theihnghilh a ” ti a a chhan ngei pawh an ring a. Ti chuan Webb-a Office ah chuan lutin a inrin loh laiin a tukhum ah a kap ta niin Prosecutor te chuan an ring a ni.
Sileo silai paina holster chhung a thil khuar (indentation) awm chuan Barretta pistol a lo inthawlh tawh ngei a ni tih a nemnghet a. Mahse chu pistol chu Sileoa’n khawi ah nge a thehthang tak tih erawh hriat phak rual loh thil a la ni ta reng a ni.

Tichuan tual a thah zawh chuan Sileo-a chu Party-na hmun tur-ah chuan a let leh ta a. Felicia Moyse-i thlen hmain a thleng leh hman ta bawk. Chu chuan a alibi kha a tinghet leh zual sauh a ni. Prosecutor te chuan kha tualthahna-ah khan Felicia-i khan inhnamhnawihna a nei a ni tih chu an pawm loh zawng tak a ni a. Mahse kha tualthahna ah khan hman tangkai a ni tih a inhrechhuak ang a. Chu chuan mahni intihlumna kha a thlen tir ta niin an ring a ni. Felicia-i khan a bialpa Sileo-an Webb-a kha a that tih a hre chhuak ta si a. Chu a thil hriat rapthlak tak mai chu a tuar zo lo ah an ngai a ni.

Jim Webb-a thihna atanga kum ngana ah chuan Guy Sileo thubuai chu ngaihtuah a ni ta. First Degree Murder a thiam loh chantir a ni a. Damchhung lungin tang tura hremna pek a ni. Eng pawi mah a sawi lo tiin a thiamthu a la sawi ta fan a. Mahse Jury te chuan Forensic Evidence thawnthu sawi chu an pawmpui ta zawk a ni.

Silai holster a Barretta pistol inthawlh rem thei chuan witness ten (theory) tualthahna hmanrua chu Barretta pistol a ni tia an sawi te chu an inmil thlap a. Ballistic Expert te khan Investigatorte hnen ah khan Jim-a ruang bula kartut ruak an chhar kha Barretta pistol atanga per chhuak a ni thei thu an hrilh a ni kha. Jim-a chal vun hnuai a ngenmu (projectile) tang an hmuh kha Barretta silai atanga kah chhuah a ni a. Investigator te’n witness tam tak thu an zawtfiahna atangin Sileo-a Barretta kha a awm ngei a ni tih an nemnghet a. Chu mi tichiang a nemnghet turin Forensic Evidence a awm tha em em bawk. Chu chu thil pawimawh lai ber chu a ni a. A chhan chu Forensic Evidence te’n Court hmaah dawt an sawi ve thei lo tluk a ni.

Author : Bruce Kibby

Aside | Posted on by | Tagged , | Leave a comment

MIZO KUTTHLAK THU AH CHAKMA TEN NGAIHDAM DIL; ZANGNADAWMNA SING 5 AN PE :MSU CHAWNGTE

Date:13.5.17 zing dar 7:30 am vela Tv.Francis Zothanpuia, kum-17 Chawngte ‘P’ ami chu Chawngte’C’ atanga a haw chu Chakma thenkhat ten kut an lo thlak a nih kha.

He thil hi MSU Sub-Hqrs, Chawngte, General Headquarters, Aizawl leh Regional Headquarters, Lunglei ten theihtawp chhuahin hma an la nghal a.

Home Minister pawh hma la tura ngen niin, he thil hi hnam issue a nih anga theihtawp chhuaha bawhzui a ni.

Dt.16.5.17 khan Mizo kutthlaktu Chakma lam hian ngaihdam an dil nasat em avangin, CADC EM pakhat leh MSU Chawngte hruaitute hriatpuinain inbiakna neih a ni a, Mizo kutthlaktu Chakma lam hian ngaihdam an dil nasat em avangin Tv. Francis Zothanpuia chhungte hian an ngaidam ta a. Kut an thlakna vanga zangnadawm nan cheng sing 5 an pe bawk a ni.

He thil thleng hi MSU General Headquarters Aizawl leh MSU Regional Headquarters Lunglei hruaitute chuan ngaihdam an dil nasat em avangin an hrethiam hram a, tun hnuah chuan ngaihdam indil ngai tawh lo turin hetiang thil a thlen leh chuan a hmuna kal chilha chinfel zel a ni tawh dawn a ni.

Author : Vlr Pautu

Aside | Posted on by | Tagged , , | Leave a comment

LUNGZARHTUM SELE VANGA TUARTE CHHAWMDAWLNA TUR RAWTNA PCCF-AH THLEN

Lawngtlai District, Lungzarhtum khaw rama Sele awm avanga tuartute chhawmdawlna turin Chhimtuipui Wildlife Division chuan PCCF-ah rawtna a thlen.

Lungzarhtum a Sele awm avangin bawngvultu leh zikhlum chingtu thenkhat ten harsatna an tawk nia sawi a ni a, hei bakah mihring tan pawh hlauhawm thei a nih avangin harsatna a thleng mek a. He Sele hian Bawngrual te a thunun vek tawh a, a chang chuan In lama haw pui lovin ramhnuaiah te a riahpui thin nia thu dawn a ni.

Lungarhtum Sele hian Bawng a awmchilh avang hian Bawng vulhtu Pu Lalcheua chuan March 13, 2017 atangin a bawnghnute a la sawr thei lo va, bawng hnute sawr lai bawng-pui pali a neih mek te chu sawr theih an nih tak loh avang leh a bawng rualte chu a thunun theih tak loh avangin Environment & Forest dept-ah compensation a dil mek a. Hmun thenkhata thlai chingtute pawhin harsatna an tawk nia thu dawn a ni.

May ni 3 khan Chhimtuipui Wildlife Division te, LADC a Forest department hotute leh Lungzarhtum khawtlang te chuan hmalak dan tur an sawiho a, chutah chuan warning signboard tar nise tih a ni a, LADC Forest Department lam chuan hmun thumah an tar tawh a. Bawng tlatna area kawng chhak lama Bawngrualin kawng an kan theihna laite hung nise, chu chuan mihring tana hlauhawm tura nep phah ang tiin rawtna an siam a, Sele vanga bawnghnute sawr theilo leh thlai ching theilote chhawmdawlna tur rawtna PCCF lamah an thlen bawk.

Hetih lai hian Pu Lalcheuva tanpuina tur hian Mizoram a ramngaw leh nungcha humhalhtu pawl ASEP chuan tunah hian vehbur an khawnsak mek nia thu dawn a ni.

Author : Vanneihthanga Vanchhawng

Aside | Posted on by | Tagged , | Leave a comment

TUIKUK TEN SUPREME COURT-A AN PUHNA SAWIFIAH TURIN CYMA IN UKIL RAWIH THA TI: CYMA THUCHHUAH

Mizoram atanga mahni duhthu ngeia chhuak, Tripura Refugee Camp-a awm mek Tuikuk ten Mizoram Bru Displaced People Forum hminga Supreme Court-a India Sawrkar, Mizoram Sawrkar, Tripura Sawrkar leh Election Commission of India-tean khinna lehkhaah, YMA leh MZP-te anmahni tiduhdah a, militant ang hial a min puh hi Central YMA chu a lawm lo hle a. Supreme Court zahawm takin Tuikuk tena min puhna chungchang a insawifiah tura min tihna chu Central YMA chuan a tul anga Supreme Court-a ding tur Ukil ruai a, min puhna dik lo tak hi sawifiah a, thudik thehluh ngei tha kan ti a, Central YMA Executive Committee dt. 16.5.2017-a neih chuan a tul anga bawhzui ni se kan ti.

Tin, Tripura Sawrkar-in Adhaar Card tun dinhmunah a lo siam sak chungchang pawh a tul anga chhuizui ni se kan ti.

Sd/-
LALHMACHHUANA
General Secretary,
Central YMA

Author : Vanneihthanga Vanchhawng

Aside | Posted on by | Tagged , , , , | Leave a comment

Sainik school luh man a sang

Sainik School, Chhingchhip admission tihfel thawkhat a ni tawh a, admission tih ruala pawisa pek ngai pawh a sang thawkhat hle.
Hetiang hi prospectus-a an tarlan, admission tih ruala pawisapek ngai zat a ni a, fee hi Board of Governors in hunbi neiin a ngaihtuah thin ang:

(a) School/Tuition Fee : Rs. 52,493/- p.a

(b) Diet Fee : Rs. 29,100/- p.a (@Rs. 97 per day for300 days)

(c) Caution Money : Rs. 3,000/-Rs. 1,500/- (for SC/ST )Refundable

(d) Clothing Money : Rs. 7,500/-

(e) Utensil Charges : Rs. 1,500/-

(f) Incidental Money : Rs. 16,000/- p.a (including pocket money Rs. 2500/-)

(g) Electricity & Gen charges : Rs. 2,300/- p.a

(h) Washing charges : Rs. 2,300/- p.a

(i) Postage Charges : Rs. 100/- p.a

(j) Insurance Premium : Rs. 300/- (Valid for 5 years only)

(k) Entertainment charges : Rs. 200/- p.a.

(l) SMS Charges : Rs. 150/- p.a.

TOTAL – Rs. 1,13,443/- (FOR ST)

Sainik School, Imphal-ah hian a vaiin Rs. 1,00,283 pek a ngai a, Sainik School, Chhingchhip nen a inthlauhna hi Rs. 13,160/- a ni.

Aside | Posted on by | Tagged , | Leave a comment

Mizo nulain nuclear code dik lo a hmu chhuak

Mizoram University (MZU) Physics department-a doctor of philosophy (Ph.D) ti mek, Rebecca Lalnuntluangi d/o PC Vanlalhruaia, Chhinga Veng chuan Germany rama group pakhatin nuclear code an hman mek, PINO (Proton In Neutron Out) dik lohna a hmu chhuak a; nuclear code siam chhuaktute pawhin a dik lo tih an pawm.

Rebecca Lalnuntluangi’n German group-te nuclear code hman mek dik lohna a hmuh chhuah hnuah, chumi hmang chuan September 2016 khan Belgium rama Bruges khawpuia International Conference on Nuclear Data for Science and Technology (ND-2016)-ah paper a present a; chutah chuan nuclear code hman mek dik loh dan a sawifiah a ni.

Dik lohna hmuh chhuah dan
Rebecca Lalnuntluangi hian Ph.D a tih meknaah amah kaihruaitu (supervisor) Dr B Lalremruata kaihhruaina hnuaiah nuclear lam zirbingna an kalpuia, an nuclear code hmingah EPEN (Energy of ProtonEnergy of Neutron) an vuah. Rebecca chuan, EPEN a buaipuinaah hian PINO dik lohna zawnga hmuh chhuah chu an tum a ni lo tih Vanglaini palai a hrilh.

Rebecca chuan, “A dik lohna tuma’n an hre lo a, keini pawhin kan hre lo. Stand Alone Version, offline pawha hman theih siam kan tum a, chumi tur chuana physics zawng zawng kan zir a ngai a, kan inzirna lamah mi paper publish tawh, an equation dik thei lokan hmu nual. Equation a dikin kan siam thar a, kan paper-ah kan telh nghal. A physics dik thlapa kan kalhnuah PINO ho dik lohna hmu chhuakin kan hai langta a ni,” a ti.

PINO chu eng nge?

PINO hi nuclear code pakhat, nuclear bomb siamna atan pawha hman a ni a, International Atomic Energy Agency (IAEA)pawhin an pawmpui a ni. Germany rama group pakhat hmuh chhuah niin, khawvela nuclear data group-a lar berte zinga mi anni a, an hotupa chu Dr Rene Reifarth a ni.Rebecca-i chuan, PINO chu nuclear ralthuam siamna atan hman a nih thu a sawi a; nuclear siam nan bakah, van sang lam thil (astronomy, astro physics) atan pawh an hman ṭhin thu a sawi bawk.

Code chungchang

Rebecca Lalnuntluangi chuan, India rama nuclear accelerator hman ber ;eh neih ṭhat berte chu Bhabha Atomic Research Centre (BARC), Mumbai leh Tata Institute of Fundamental Research (TIFR), Mumbai te an nih thu sawiin, “Hengte hian time of flight (ToF) technique an neih loh avangin neutron spectrum code hi an neih ngei ngei a ngai a, code tel lo chuan neutron energy dik tak a neih theih loh,” a ti a; chu chu nuclear bomb siamna atan pawha pawimawh a nih thu a sawi.

Brugge, Belgium-ah

Rebecca Lalnuntluangi hian September 11-16, 2016 chhunga Bruges, Belgium-a neih, International Conference on Nuclear Data for Science and Technology (ND-2016)-ah telin, September 14-ah paper a present a; chutah chuan PINO code dik lohna leh an hmuh chhuah dan te, code thar an siam, EPEN chungchangte a sawifiah. A paper thupui chu, ‘A Tool for Calculation of the 7Li (p,n)7 be Neutron Spectra below the three body breakup Reaction Threshold’ tih a ni.

International Conference on Nuclear Data for Science and Technology hi nuclear chungchanga khawvela conference lian ber pakhat niin, kum thumdana neih ṭhin a ni a; a huaihawttute pawh International Atomic Energy Agency (IAEA), NuclearEnergy Agency (NEA) leh European Commission (EC)-te an ni.

Bruges-a ND-2016-ah hian PINO siamtu zinga an hotu ber, Dr René Reifarth leh a hote chuan Rebecca Lalnuntluangi hi an kâwm a, PINO code diklohna chungchang an zawtfiah. Chutah chuan PINO siamtute chuan PINO code chu a dik lo a ni tih an pawm tih sawiin Rebecca chuan, “An pawm mai bakah, kan spectrum min dil a, mahse, ka paper (EPEN) hi publish a la nih loh avangin ka pe lo,” a ti.

An thil hmuh chhuah chungchang chu ND-2016-ah hian scientist dangte pawhin an ngaihven hle a, thawhhopui atan an sawm nual tih a sawi a; European Commission hnuaia awm Joint Research Centre (JRC) pawhin Europe ram hrang hranga an project-ah thawhpui atan an sawm a, thawkho turin an buaipui mek tih a sawi.

ND-2016 avangin Rebecca Lalnuntluangi code hmuh chhuah, EPEN chu nuclear code lama experiment titu hrang hrangin an nghak mek a, international journal-a tihchhuah a ni veleh thawkho turin an inrem siam hlawm a ni. EPEN siam kawngah hian IAEA-a nuclear data scientist Dr Naohiko Atsuka nen pawh an thawkho bawk.

EPEN publish a ni

Rebecca Lalnuntluangi nuclear code siam, EPEN (Energy of Proton Energy of Neutron) chungchang chu American Nuclear Society-in May 9, 2017 khan an tichhuak (publish) tawh.

An project publish-tu tur an zawng a, mahse, an hmu mai lo tih sawiin, PINO siamtute’n khawvel hriata an mualpho theihna a nih ve avangin ṭan an la ve nia an rin thu a sawi a; hun eng emaw chen hnuah American Nuclear Society-in an publish tak thu leh, ND-2016 ah paper a present tawh avangin European Physical Journal pawhin an tihchhuah dawn thu sawiin, “Tun thla (May) chhungin an publish hman kan beisei,” a ti.

MZU-a Ph.DEPEN atana hma an laknaah an bei nasa hle tih sawiin Rebecca chuan, MZU-ah nuclear laboratory an neih loh avangin theory-in an zir ṭhin tih a sawi a, “Experiment kan tih dawn chuan BARC, Mumbai-ah kan kal ṭhin,” a ti a; chutih laiin, BARC-ah experiment ti turin hmun chan mai a harsat thu a sawi.

Rebecca Lalnuntluangi chuan, PINO code dik lohna hmuh chhuah leh EPEN an siamnaah MZU-a amah kaihruaitu Dr B Lalremruata a ṭangkai hle tih sawiin, “Ka supervisor min puihna leh fuihna vanga ti thei chauh ka ni,” a ti a; Ph.D a tihnaa a thawhpuite’n an puih nasat vang a nih thu a sawi bawk.

Rebecca Lalnuntluangi hian HSLC leh HSSLC chu Synod Higher Secondary School aṭangin a zo a, B.Sc(Physics) chu Pachhunga University College aṭanga zoin, MZU aṭangin M.Sc (Physics) a zo. B.Sc leh M.Sc-ah hian MZU-ah topper a ni ve ve.

Tunah hian MZU-ah Ph.D a ti mek a, a thil hmuh chhuah avang hian Europe khawmualpui leh hmun hrang hrang aṭangin post doctoral ti tura sâwmna eng emaw zat a dawng a ni.

Source: Vanglaini
Dated: 16 May 2017

Aside | Posted on by | Tagged , | Leave a comment