SURYANELLI SEX SCANDAL RAPTHLAK by Faka Hnamte

Suryanelli chu Kerala state-a Idukki District thingtlang khaw pangngai ve tak a ni a. Kum 15 dawn lai kalta khan Suryaneli hmeichhe tleirawl kum 16 mi chu an khua atanga bum chhuaha hruai bo a ni a. Ni 42 zet a bo chhungin mi chi hrang hrangte’n hmun hrang hrangah hruai kualin nasa takin an pawngsual a. Thi lo aruangin an khua a rawn thleng leh a ni.

He thu hian a hun laiin India ram a nghawr nghing tak meuh meuh a. Misualte’n hremna an hmuh ngei theih nana tleirawl leh a chhungte hmalak dan chanchin ngaihnawm tak chu hei hi a ni.

Suryanelli khua hi tlang panga awm niin thingpui huan mawi tak takin khua hi a tuam vel a. Tunlai tawng takin he lai bial vel hi a hmunhma leh ram awm danin a zir bawk a, a ‘Romantic’ hle.

He khuaah hian hmeichhe tleirawl, hmeltha leh duhawm zet; an vengah pawh an sawi ve hat hat, Sukanya te chhung pawh an cheng ve a. Mahse, vanduaithlak takin Sukanya hian taksa lama hrisel lohna eng eng emaw a neih avangin pangngai takin School a kal thei lo a. Mahse, zir ve zel a duh avangin an khaw thenawm maiah Tuition a kal ve tlauh tlauh thin.

He mi khaw pahnih inkarah hian bus pakhat chauh a tlan avangin Sukanya pawh a tuition lakna khua pan turin Bus chu a innghahna ber a ni a. Bus driver leh conductor chu an larin Sukanya-i paw’n driver leh conductor, Raju-a chu a hmelhriat tha hle.

Bus Conductor chuan tleirawl hmeltha leh ngaihno beii che vel chu a lo thlir ru fo thin a. “Ngaizawng ta ila, min duh ve a ngem?” tih chu a rilru luahtu ber a ni.” Mahse, ngaihzawn a tum dan chu hmangaihna thianghlim leh dik a ni lo a, nawmchenna atan maia it leh duh a ni zawk.

Ţum khat chu Raju-a chuan a be pawp ta rawih a. Chutatang chuan zawi zawiin an innel chho a. Kar lovah Sukanya paw’n Raju-a hmangaihna chu a chhang let ve ta reng a.

A thinlung hneh nan Raju-a chuan thang a kam thiam hle. A nihna baka mahni insawi khawngaihthlakin an chhungkuain sum lama harsatna nasa tak an tawh avanga a mangan thute a sawi vel thin a. A sawi apiang chu a tak emaw tiin a lo ralkhat khawngaih ve hle thin.

Raju-a chuan a hmangaih ve hle nia a hriat avangin Sukanya-i chuan a neih chhun chhun pawisa pawh ui phal lovin an chhungkaw tanpui nan a pe ta fo a. Raju-a lahin tawngkam thlum leh ngaihno bei tak tak hlirin a kawm a. Chu hmangaihna lem chu Sukanya te ang tleirawl rilru thianghlim, heti lama tawnhriat engmah la nei ve lo tan chuan a tak tak emaw tih a awl hle. Raju-a thusawi apiang mai chu a lem hian a lem duak duak a ni ber e.

Hun rei lo te chhungin Sukanya chuan a rilru zawng zawngin Raju-a chu a hmangaih tawh a. A hmangaih ang thovin a bialpa paw’n a hmangaih ve hle niin a hria. Hmangaihna khawvelah chuan a thlawk delh delh a, a ngaih a tha hliah hliah mai. A chass thar rilru chhungril erawh hria se mak a ti ang. An chungah eng nge lo thleng dawn, a chhut thiam phak lo.

Ni khat chu Raju-a chuan thiam tak maiin Sukanya hnenah, “Bawihi, ti hian Bus-ah nitin kan chuang dun a, chu mai chu kei chuan ka duh tawk lo. Hringnun kawng chhuk chho hi kan pahnih hian a tak ngeiin i zawh dun zawk ang hmiang,” tiin a sawm ta chawt a. Sukanya chuan chu zawhna chu chhan thiam harsa ti hle mah se, a ruk tak chuan a hlimin Raju nena bus chhung mai ni lova han len vel a chak hle. .

Raju-a hi tlangval phanchang tawh a nih avangin biahthu thlum tak tak hmanga Sukanya thinlung han den mawih dan a hre hle.

A hriselna a that deuh avangin Sukanya paw’n school a zawm veleh tawh a. Nitina bus-a kal ziah ngai lovin a chhung te’n Hostel-ah an awmtir ta thung a. Raju-a nen nitin an inhmu thei tawh lo a. Mahse, Raju-a chuan chawlhkar tawp apiangin Sukanya chu a tlawh ziah thung.

Ţum khat chu Sukanya-i hnenah, “Bawihi, i tel lova mahni chauha hringnun hman chu ka zuam lo. Ka ngai che a ni. Mite ang bawkin kan pahnih hian i tlanbo dun daih mai ang hmiang, chutah chuan tu ma chim buai phak lovin nun hlim tak kan hmang ang a,” tiin a sawm a. He tih lai hian Sukanya hi class IX chauh a ni.

Sukanya chuan tlang takin, “Kei paw’n ka ngai che alawm; mahse ka nu leh pa te remtihna lo chuan ka zui thei lovang che,” a ti thâwp sat a. Raju-a chuan, “Chutia ka rawtna anga min zui thei lo a nih chuan thil pakhat ka tih a ngai a nih chu…” tih pahin Sukanya-i thlalak pakhat, a album atanga a lak chhuah chu a rawn phawrh hlawl a. “Ti hian i lu hi ka chep thla ang a, chu chu hmeichhe dang saruaka lang, hmeichhe duk dak lo zinga pakhat lu lem atan ka hmang ang a, chu chu i pa te thawhna Post Office kawt bangah ka tar dawn a ni,” a ti ta mai a.

Chu thu chuan Sukanya chu a țhawng na hle. A album atanga thlalak pakhat Raju-a’n a lak țum khan chutiang rilru chu a lo pu ang tih reng a ngaihtuah phak lo. Thlalak chu pe let leh turin a dil ngial a; mahse Raju-a chuan a pe let phal ikhaw lo mai. Chu chuan naupang rilru thianghlim Sukanya ngaihtuahna a tibuai tâwk hle a. Tlangval chu a duhin a hmangaih a; mahse a nu leh pa han țhen phah nana hman lah a ngam chiah bawk si lo. Thu tlukna siam harsa a ti hle.

A bialpa chuan a sawi angin a thlalak chu a pa thawhna Dak In bangah chuan tar ta ang se la, amah leh a chhungkaw tan hmingchhiatna zakhua a thleng dawn tih a hria. A mangang si, hmalak ngaihna hre lo chuan Raju-a lo rawt tawh angin, chumi kumthar ni-ah chuan tlanbo dun chu a remti thei ta a. An tlanbo dan tur ruahmanna erawh Sukanya chuan engmah a hre lo a, han zawh chian ngaihna pawh a hre lo. A bialpa chhungte bul emaw khaw hla deuh ni turah a ngai ve hmiah mai.

Chutih laiin Raju-a leh a thianpa pakhat chuan, an tum ang taka Sukanya-i an ruk chhuah theih chuan a rang thei ang bera Advocate (dan hre mi) pakhat Dharmarajan-a hnena hralh chhawn leh tumin ruahmanna engkim an lo peih sa diam a. A bialpa leh a thianpa thil tum tenawm tak hre reng reng lovin Sukanya-i chuan a bialpa um turin sum leh pai lam pawh a theih ang angin a lo inbuatsaih ve nasa mai.

Rangkachak ilo chhertu dawrah kalin a thil neih hlute hralh a tum a. Mahse, rangkachak chhertu chuan an lo hmelhriat avangin eng vanga rangkachakte hralh tum ta mai nge tih a zawt a. Chhan ngaihna a hriat loh avangin a hralh thei lo a; sum a neih loh avangin an tlan dun tumna chu a tlawlh leh ta.

An ruahmanna hmasa an puitlin theih loh avangin Raju-a chuan Sukanya-i chu hostel-ah bawk chuan ava tlawh leh a. Chutah chuan ruahmanna dang a siampui leh ta. An ruahman ang chuan January 16-a tlanbo dun a ni. A bialpa’n a bawl thiam bawk a; amah leh an chhungkaw hmingchhiat vek ai chuan Raju-a uma tlanbo mai chu tha zawkin a ring nghet tlat tawh.

January ni 16 a thlen chuan an ruahman ang ngeiin Raju-a nen kumkhuaa hmangaihna chen dun turin a thawmhnaw then khat chu Bag-ah hnawhin in a chhuahsan ta.

An lo ruahman fel vek tawh angin Raju-a nen chuan Munnar atangin Adimaly thlengin Bus-ah an chuang dun a. Chu khuaah chuan Raju-a thurualpui hmeichhe pakhat Usha an tih chuan a lo nghak reng tawh a. Adimaly atang chuan bus-ah bawk chuang lehin an zingah chuan Usha pawh telin Kotamangalam thleng tur chuan an chuang ta zel a. Mahse, chumi khaw inkar an kal laia bus dinna hmasa berah chuan sawi lawk pawh awm lovin Raju-a chu a chuk a; lo kir awm lovin a bo ta daih mai.

Mite hmuh hlauhin Sukanya-i mangang chu a țap ru kerh kerh reng a. Mahse, Munnar lama han kir leh mai turin bus kal vel pakhat mah a awm lo. A tih ngaihna hre lo chu Kotamangalam thlengin a chuang ta zel a.

Kottayam bul lawka khaw pakhat Mundukkayam lama kal mai thain a hria. Chutah chuan an chhungte thenkhat an awm avangin pan a rilruk a ni. Mahse, a hmun a thlen chuan a kal tumna khua Mundakkayam lam pan tur Bus engmah a awm tawh lo. Bus awm leh hmasa ber chu a tuk zing lamah chauh a ni ang tih tualchhung mite chuan an hrilh a.

Tleirawl hre ve țan chauh, mahnia la tal hrang ngai lo a nih avangin ruahmanna anga thil a kal tak lovah chuan a buai hle a, a tawpah phei chuan a tap ta hlawp hlawp a.

Mangang taka a awm lai chuan an zinga kal ve Usha kha a bulah a rawn kal thuai a. Thiam takin a rawn hnem a, a theih ang anga tanpui a inhuam thu a rawn hrilh vei luam a. Chutih lai tak chuan Advocate, Dharmarajan-a paw’n chu lai hmun chu a rawn thleng ve chiah mai.

Chu tleirawl chu a theih anga tanpui a tiam bakah an khaw piah maia Sukanya-i Pate-a te chu a hriat thu a sawi a. Sukanya-i chu a thaw huai mai. Mahse khua a thim tawh avangin Advocate pa chuan, chu lai hnaia Lodge-ah chuan a nu, upa lam deuh tawh nen an cheng dun a. A nu bula chumi zan chu riak mai turin a sawm a. Belh tur dang nei lo Sukanya chuan lawm si, hreh ru tak chungin a zui ta a ni.

Mahse, lodge-ah chuan a nu nen awzawng an lo cheng lo.

Thil awmzia zawh fiah tuma Ukil pa lam a hawi lai tak chuan a lu-ah tak a rawn tuk chawrh a. A kut tha chak tak chuan a rawn pawm bet nghal a. Sukanya chuan awka chhuaha au vak a tum a; a tal pawh a tal nasa; mahse, a ka a hupsak tlat si!

A au chhuah a, thâwm a neih vaih chuan amah leh a nu leh pa chawpa thah nghal vekah a vau zui a. Tichuan, chu pindan reh takah chuan chhantu tu mah reng awm lovin tleirawl, mipa laka thianghlim chu Advocate mihur chuan a duh ang tawkin a bei zankhua ta zak mai a ni.

A tuk khua alo var chuan Advocate chuan Sukanya-i chu Ernakulam khaw lamah a kalpui ta daih a. Chu khuaa Chittoor Road-a Lodge pakhatah chuan a thlenpui a. Chutah pawh chuan zankhuain nawmchenna atan a hmang zui leh a. January 18 tlai lamah Ernakulam chhuahsanin Kumili Khualbukah an riak dun leh a. A tuk zing alo thlen chuan Sukanya-i chuan chu khualbuk nghaktu ber Cherian-a chu a tlan chhuah theih nana tanpui turin a sawm a. Mahse, chupa chuan tanpui chu sawi loh, Advocate hriatpuinain a pawngsual veleh ta.

Khualbuka ni hnih an cham chhung chuan mi chi hrang hrangin an rawn mutpui a. Chutianga ni hnih hun an hman hnu chuan Kumili atanga Km 200 zeta hla Pallakad khua an pan dun leh ta a. Chu khuaah pawh chuan a hma ang bawkin a hman hman chuan an pawngsual a ni ber mai. Khawngaih tura chu’ng mite a ngenna chuan awmzia engmah a nei lo.

Amah pawngsualtute zingah chuan mi chi hrang hrang an tel a. A then chu a pa rual te, a u rual awrh te pawh an ni bawk a. Chu’ng mite hnenah chuan, “Fanute, farnute in nei ve lawm ni, in farnu leh fanute chanah ka chan hi dah ula in duh bik dawn em ni?” ti tein khawngaih a han dil sateh thin a. Mahse, a thu sawi chuan sawtna engmah a nei lo. A duh apiang chuan an kuai thal a ni ber mai a.

Advocate Dharmarajan-a chuan January 23-ah chu hmun atanga hruai chhuakin Calicut-ah zan hnih a awmpui leh a. Chutah pawh chuan a duh duh pawl atan a țheh leh ta a. Ni hnih a ral hnuin Tamil Nadu leh Kerala inrina bul lawk, Kambam khuaah chuan a hruai leh a. Chutah pheichuan Sukanya-i incheina rangkachak leh tlereuh ilo chu an chhuhsak vek a ni.

Heng a tlereuh an hralhsak takte hi a hnuah Police te’n Ernakulam khuaah an hmu let leh nual hlawm. Hetia mi 30 chuang zen zawnin duh tawka an beih hnu hian na tuarin a thidang ta hial a.

A rawn harh chhuak leh a, a thil tawn rapthlak chu a tahpui chiam a, a mittui a hul dawn chauh tihin midang an lo lut a, a rawn ti leh zel a. Advocate pa hnenah khawngaih a han dil ve thin tak naa, chu lah Zawhte hmaa Sazu tawngtai ang chauh a ni. Hurherh takin a sawisa vel a; a chang leh zu a tulh lui thul. A rilru nat dan chu thua sawi fiah rual a ni lo.

Chutia rei tak a vah kualpui hnu chuan February 15-ah a hmaa an kalna, Kumili Rest House-ah bawk chuan an lo kual let leh ta a.

A hrehawm tawrhna zozai chu a reh tawh dawn emaw tih laiin chu hmunah chuan Khadi vara inthuam Politician ni ngeia lang chuan a pawngsual veleh a. Chu mai ni lovin a thian dangte paw’n an ti ve leh a. Chupa Khadi vara inthuam chu Baji tia koh a ni nghe nghe. He tih hun lai hian Central-a Congress sawrkarah minister dinhmun hial a luah nia sawi a ni.

Chutia nasa taka pawl luih leh sawisak a nih avang chuan Sukanya-i hriselna chuan a tuar ta lo a. February 21 alo thlen chuan a dinhmun alo chhe zual ta hle.

Tih ngaihna dang awm ta hek lo le, amah pawngsualtute chuan loh theih lovin Hospital-ah enkawl tura an hruai a ngai ngei dawn tih a lang. Mahse, chutianga an tih chuan man chhuah an ni dawn si. Chuvang chuan, hming lem hmangin a chhungte nia sawi Jamal-a hnenah chuan an dah ta ngawt a. Amah khawngaiha lo bawisawm tura a beisei chupa pawh chuan alo pawngsual veleh cheu a ni awm e.

Chutih lai chuan a zunkawngah harsatna lian tak a thleng a, hei bakah a kumkuruh nasa takin a kau a. A serh bawr vel chu a vung nasa hle.

Ni 42 zet an kawl hnu, February 25 chuan amah kawltute chuan an chhuah ta ngawt mai a ni. A chhan chu a thih vaih chuan an tuar tur chu Police man a ni mai. Amah enkawltu doctor te chuan tlemin chhuah har deuh se chuan a nunnain a tuar ngei an rin thu an sawi chhuak hial a. Thi lo aruangin a nu leh pate chenna an khua chu a thleng leh hram a. A hrehawm tawrh chu thua sawi fiah rual a ni lo.

Munnar Police station-ah chuan a nu leh pate nen an thlen vat a. An complaint theh luh chu chu lai bialtu Circle Inspector of Police, V.K Mathew-a chuan a buaipui phur lo hle mai. Amah leh constable pahnih te chuan thubuai chu dik lo taka ziak lutin misualte hum dan chu ngaihtuah an tum ta hlauh zawk a. Mahse, chutih lai chuan Court-a Judge pakhat beng a lo thleng ta hlauh a; an vanneihpui ta.

Chupa chuan sawrkar thuneitute hnenah chu’ng Police pathum te chu na taka hrem turin a kar zui a. Chutih rual chuan misualte chhui hna pawh police thuneitu sang zawkte kutah hlan zui a ni bawk a. Chumite chuan uluk leh rang takin an chhui zui ta zung zung a. Rei lo teah amah khawihtu nia puh mi 40 vel lai chu an man chhuak ta thuai a.

Kerala chanchinbute paw’n thil rapthlak tak mai chu an lo chhuah chamchi bawk a. A hun lai chuan India chhim lam state te chu a nghawrnghing hneh hle. An mi man apiangte chu an thlalak nen chanchinbuah an chanchin an rawn ziak zel a. Pawngsualtua puhte leh an chhungte chu an zak hle.

Pawngsualtu mihurho in zawna kalte reng rengin chil an chhak a, an kawk zui bawk a, an chhungte tan chuan tuar har tak chu a ni ngei ang le.

Pawngsualtua puh mi 40 zinga 32 lai chu thiam loh chantir an ni a. He thubuai hi kum khat thelh an chai hnuin Kerela High Court chuan thubuai neite chu bail theih turin a ti a. A state pum buaiin an buai ta luih luih mai a ni. A chhan chu Court chuan thubuaia inhnamhnawih mi challang leh politician thenkhatte humhim a tumna niin an ngai. A thenin hremna na thei ang ber pek phutin kawng an lo zawh bawk a. A tawpah chuan mi 32-te chu thiam loh chantir a, kum 5 aia tlem lo vek Jail tang tura an chungthu rem a ni ta a ni.

A hnu kum leh lam thlengin he thubuai hian Kerela state chhungah mipui inhnialna tawp thei lo a chawk chhuak a. Chuvang chuan Court pawhin misualte hremna hi rei tak chhung chu a puan ngam loh phah hial a ni. Thubuai chin fel a nih hnu pawhin chu thil rapthlak tak chuan Sukanya-i (hming lem) chu ala um zui zel a. Vawi tam tak intihhlum a tum hial a. Mahse, a vannei nge a vanduai, chungte chu a hlawhtling lo vek thung a.

A duh dan chuan an state chhungah ni lo state pawnah a thawh awm tawk tak hna thawh ve a, awm bo daih mai a chak a. Kumkhuaa mite nuihzat leh endawng nih chu tuar zawh rual niin a hre lo. Mahse, nasa takin a tawngtai a, chu chuan hmalam pan tura huaisenna nasa tak a pe niin a hria. A duh vanga chungte chu a chunga thleng a ni lo a, thil sualtitute pawh khawlai a len ngam chuan a ngam loh bikna chhan tur a hre lo.
————————————-

Advertisements
Aside | Posted on by | Tagged , , , | Leave a comment

HLIMTHLA KHAWVEL..!! by Margareth Hnamte

“Mama kha khaw’nge i kal dawn? Chaw ei a hun tawh hi, ” tiin ka farnu chuan ka chhuak tur min lo au a, “Min lo eisan mai ru, tihtur pawimawh ka nei tlat, ” tiin ka car ah chuan ka lut a, ka inkhalh chhuak zui nghal a.
.
Nia, ka tihtur chu a pawimawh alawm, ka bula seat ruak ah chuan, present bawm tereuhte leh pangpar bawr ka dah a, kan melh zauh a, ka nui deuh sak nghe nghe a.A dawngtu turin a dawng lai hmel tur te, mawi taka a nui ver ver hmel tur te chu suangtuah mitthla in ka hmu a, ka phur takzet a ni.
.
Lalnunmawii..(chu chu a hming ani) he hmeichhia ‘LM’ ti a ka koh thin hian, ka rilru a luah zia ka hria, a hming ang chiaha ‘nun mawi’ ani. A nem a, a zaidam hle bawk a..a hmel chu mi te mitah a tha ve angem ka hrelo, nulian han tih tur chi nilo mahse, mizo hneichhia ah chuan rual pawl pha pangai tak ani, ria chawm lam mah, ngo aia hang ngaihnobei lam, sam duhawm tawk chauha kir chiat ani a, a sam buang thim lek lek leh a mitmu buang-uk khak chu a inchawih hle.
.
A mitmeng lian leh fiah kiau te, a mit tlangkawm lian deuh tap te, a mithmul buk leh siamchawp ngai lova sei sang te, a hnar ngul sang vah leh a hmui pan lam lek lek te, a nuih zawnga a biangsum lo khuar kelh thin leh a ha uingho tro thuah lo lang var sar thin te chu a inchawih vel vek a, vai hmel a pu lek lek na a, a inhmeh zawk mah nia…
.
Khawvela hmeichhe duhawmna zawng zawng hi amahah a kim niin ka hmu a, amah ka hmuh hmasak ber ni te chu kan ngaihtuah let a, ka hna avangin hmun hran ah ka awm deuh ber a, kar a hla nen ka haw zen zen lova, vanneihthlak takin kum enge maw tih hnu ah, Aizawl ah min dah ve ta hlauh a, mahni inlum atanga thawk ve tawh turin ka in pu haw ve ta bung bung a.Ka haw hnu a ka inkhawm hmasak ber ni chuan, thenrual tha leh thian ten minlo chibai ve nak nak a, mi tamtak karah, kil khata nula ding chuan ka mit ala nghal chat a, kawr var a mawi tawk leka chei hming pu leh puan sen a bih a, ka vawikhat hmuhna ni mahse, ka duhzawng tak ani tih ka hai lo nghal bawk.A hmel pawisawilo tak leh a nungchang hawihhawm tak chuan a ni telin min hneh chho ta zel a, a chanchin tlangpui pawh reilo te ah ka hre ta thuai reng a.
.
Nurse hna thawkin private hospital pakhatah a in hlawh ve ani tih te, pianpui unau a nei lova, a nu nen in luah hawhin an khawsa tih te pawh ka hre ta bawk a.Pathian trih mi tak a nihna te chuan, a duhawmna an belhchhah a, hnaih ka tum em avangin, rei vak lovah thian chu kan ni ta mai reng a.
.
Kum khat chuang teh meuh kan inkawm tak hnu ah pawh, ka duhzia leh a chunga ka rilru te tilang fo mah ila, a hrelo nge a haider ka hrethiam lo, a rilru ka hre thei tlat lova, ka hmangaih ani tih hrilh turin hun remchang min siamsak ngai lo, sawi ka tum apiangin thu dangah min pakai pui thuai thin a, kan inkar chu inthianthatna ah bawk a chhuah leh nge nge thin. Nelawm leh ngainatawm taka nui sang chungin min be reng tho va, ka chhungten an hnar lohzia leh a nihna ang ang a ka pawmzia pawh a hre ru ve in ka ring, mahse bang eng emaw, hmuh tlang theih siloh in a in hung ani ber mai, ka phone call leh message te pawh pangai takin min chhang mai a, han inzui chhuah ve lawp lawp chang pawh kn nei tho, min be hmasa ngai hauhlo thung.
.
Kei, Vanlalsanga hi, kei ka ni inti ve tawk ka ni a, hmeichhe laka tlawm duh ngailo ka ni, lehkhazir ringawt buaipui thin khan, hna kan hmuh tak hnu leh, officer nihna te kan chelh tak hnu pawh hian, mumal taka ngaihzawng sawi tur pakhat chauh ka la nei, mahse chu pawh chu ka duh ang a tling lo tlat a, ka thlah leh ta mai. Ka ngaih zuiloh danah ka hmangaih lo a ni ngei ang.
.
Kan chhungkaw khawsak leh ka hna dinhmun te vang pawh ni hmiang, nula tamtak mitmei min hmuh tu chu ka tawng ve nual a, ka ngeng an chhun chhin ngailo..hmeltha ka ni em tih chu ka hre hauhlo, mahse ruihtheih thil ka khawih ngai lova, ka hna ah ka rinawm hle bawk a, palian han tih ve theih chin niin ka inhria, ka thau lova, ka ngo lem lo na a, ka fai thung, fai ngaina mi ka ni tlat..ka in hriatchian em avangin, kei meuhin heti taka chang dang kan lova ka buaipui hmeichhia hi, hmeichhe naran ah ka chhal thei lo..a nui hmelah ka tuiral a, a mitmengah khawvel ka hmu tlat alawm..!! Chuvangin, vawiinah pawh hian chaw ei ṭhulh thak in ka pan ani reng a, chuan vawiin chu ka nupui atan sawm ngei ka rilruk bawk..nidang anglo takin amah zawkin inhmuh a duh thu rawn sawiin min ko hmasa ve tlat a, ” VL, Aizawl khawpui a lan tam theihna laiah khan lokal rawh, ka lo nghak ang che” tiin ka thinlung lalnu chuan thu min thawn ve mial a, ka tan chu aia pawimawh chu enge awm thei ang?
.
A hmun rawn sawi chu ka hre lutuk tlat, ka chhuahpui ve chang apiangin, chu hmunah chuan kal a rawt thin, engmah sawi lem lovin Aizawl khawpui lang pe uar chu a thlir vang vang fova, ‘ he hmun hi ka ngaina ani’ a ti sap thin.A chhan ka zawh changin, a nui mai zel a, zawh enah pawh ka en tawh lemlo, a lung len tu ani ve ah ka ngai mai.
.
Ka rilru ah chuan, zanin tlai hian amah ka va hmu anga, khawi restaurant ah emaw hruaiin, ka rilru te chu a bulah ka phawrh anga, ka nupui turin ka sawm ang’ ka ti ran a, Valentine’s day a nih avangin nula, tlangval chhuak pawh hmuh tur an tam hle nghe nghe, ‘rei ta deuh pawh ni ila, a mawiloh lem loh hi’ ka ti rilru a, tin kum lamah hawklak hun pel fel tawh, mi puitling a ngaih rual ve ve kan lo ni tawh bawk a…Amah ngeiin min hmuh a duh danah leh Valentine’s day a nihna denchhen in, ka tan a inhawng ve tawh dawnah ka ngai ve ngawt a, chu hun remchang chu bawhpelh ka tum lo hrim hrim.
.
Ka car chu, remchang hnawklo laiah kan hung fel a, tlang phul deuhah chuan mau hmanga thuthleng an siam hi a awm a, tah chuan ka LM-i chu a lo thu a, he hmun hi khawpui atanga hla lo te ah a awm a, a khawthlir a nuamin a fianrial reuh reih a, zanah phei chuan, Aizawl khawpui thlir nana duhthusam ani ti ila, a dikna chen a awm ang.LM-i chuan earphone vuahin hla a ngaithla ni tur ani, ka thleng tawh tih pawh a lo hre lova, a dara ben thak pahin “hey..iva ngaithla tui awm ve” nui sang chungin kan ti a.. “ehe VL ilo thleng tawh a ni maw, lo thu rawh” tiin min lo nuih let ve seih a, “enge nang meuhin min hmuh duh chhan chu ni ta le” tih pahin a bulah chuan ka thu a, ” ilo kal tak tak pawh ka lo ring vak lova, Valentine’s day te ani sia, ka khua ahar ve deuh a, tin eng emaw hrilh duh che ka nei bawk a” tiin min chhang a,
” chu minlo ngai viau ani maw..nangin min koh te chuan ka lokal lo ngam nang, keipohin hrilh duh che ka nei asin” tih pahin kan nghawk fiam taih a..
.
“Tak tak a, ilo kal dawn tih ka hria alawm, kei chu lirthei nei ve lo tih takah taxi in ka kal a” tiin min en ha a.. “i va confi reuh ve, lokal lo ta ila, engtia haw nge itum a” tihtak hmel deuhin kan ti a, nuih deuh seih pahin ” Aww..ilo kal dawn tih ka hre miau a..e chuan enge min hrilh duh chu?” an tih zawm a, ” Aaa i sawi tur chu min hrilh hmasa phawt la, ka sawi ve dawn nia” tiin ka chhang a..

” Ih..ih..VL, i hmanhmawh em?” an ti leh rih te te a, ” hmanhmawh love, sawi rawh ka lo ngaithla ange” ka tih tak hnu chuan an inher deuh a, nitla turin Aizawl khawpui lang chin a chhun dul ruih lam chu a thlir vang vang a, thlifimin a sam an chhem leng siau siau te leh, chu nitla tur kawl dul ruih hnuaia Lm-i hmelthatzia chu, khawvelah tehkhin tur ka hre mawlh lo…!!
.
” VL, i rilru ka ti na lovang tiraw..i na lovang tih min tiam phawt rawh” a hmelah chuan tih tak hmel ka hmu a.. mak ka ti deuh, mahse mipa ka ni a, hei chen ka lo zui tawh hmeichhia in thu min hrilh a duh takzet chu, engpawh nise ngaihthlak ka ba tih ka hria..ka nui deuh sak a, “Ka na lovang, ka tiam e” tiin ka chhang ta a..
.
Lm-i chuan, a ṭhi awrhlai chu zawi muangin an phelh a, a locket chu a khawih niap niap a, a inhawng ta phak a..ka hmuh theih turin an keng kang a, thlalak pahnih ka tana hmuhnawm ni hauhlo hi a lo in tar vah mai a, tunah chuan he ṭhi, englai pawha roh taka a awrh thin chhan hi ka hrethiam ta..thlallak pakhat zawk chu, tlangval hmeltha tak nena, hlim taka nuidun chunga an in kuah lai a ni a, pakhat leh chu, duh taka chu tlangval nena an infawp lai ani..!!
.
Ka sa deuh pup a, ka trek deuh chhak in ka hria, mahse chi-ai anga lan loh chu ka tihtur ani tlat.Tin, chu tlangval chu tunge a nih ka hria, ka chiang lutuk zawk, ka thianpa, ka zirpui thin, Alexander Lalropuia ani..!!
.
” LM, Ropuia nen in in ngaizawng a maw..tunah in la inkawp nge, in tawp tawh zawk??” tiin ka zawt nghal phawng mai, a thi chu an awrh tha leh rih a, thawk an la deuh halh bawk a, “thawnthu sei tak ani, i ngaithla duh angem?” tiin min han zawt let a, ‘aw’ tih nan ka lu ka lo bu nghat a, tichuan Alexander Lalropuia nena an thawnthu chu tihian Lm-i chuan a sawi tan ta a…
.
“Helai ka rawn awm tirh khan, ka mikhual in ka tri ru deuh dek thin a, thian leh hmelhriat pawh ka nei lem lo, Jenny(alex-a nau) kha minlo chiauau hmasa ber tu a ni a, kan inkawm ta chawt bawk a, a u mipa chu phaiah hospital ah a thawh ve tho thu leh, doctor a nih thu te min hrilh ve fo thin.Ka aw, e liam ve tawp ani ber mai, mahni tawkah ka buai ve em avangin, an inah ka lenglut hman lova, biakin leh thalai thiltih ilo velah erawh kan inzui chawt a.
.
Hun a lo kal deuha, ka tlangnel chho ve ta viau a, thian thar pawh ka siam ta nual a, Jenny u mipa chanchin chu an sawi ka hre fo, tlangval hmeltha tak a nih thu te, ka ngaihven lem lo, he hmunah hian, mipa emaw, ngaihzawng emaw, pasal zawng tur emaw a lokal ka ni lo tih ka inhria, ka nu nena kan damkhawchhuah nana hnathawk tura lokal ka nihzia ka chiang a, ka rilru ah mipa ka dah lo.
.
Pathianin a hunah min la pe ve mai ang tiin ka ngaihtha awm hmiah thin a, ‘kha pa kha chu aww’ han tih zui vawng vawng ang chi hi, ka la tawng lova, ‘duhzawng ka neilo aniang, keimah hi ka diklo aniang’ tiin ka nu bulah pawh ka sawi thin.Mahse u Alex-a ka hmuh hmasak ber ni khan, duhzawng ka nei a, hmeichhe diktak ka ni tih ka inhre nghal, a chhan chu amah ah khan, mipa ka lo suangtuah thin ang hmel ka hmu tlat.
.
A sam dum dak hlarh te, a mitmeng nung sarh te, a nui hmel mawi tak te, in duhtawk taka a che vel leh a tawng hmui-hmai zawng zawng te, a pian in khaithli thlarh nena in hmeh em em suit nalh tak a hak te khan min ko va, pan ka chak, ka ban phak nise ka duh in, mawi awmzia ka hrethiam ta ni berin ka hria.
(Lm-i hmelah chuan nui hmel a lo lang lek lek a, ngaihtuahna kawm ni awm takin an ngawi rih a, tihian a sawi zawm leh ta a.. )
.
“Keimaha ka hmeichhiatna rilru leh hmeichhia in mipa a duh theihna chu, chu mipa chuan a kaithova, Jenny’n “mate hei hi ka u chu a nih hi, kumin chu helamah a awm ve rih dawn a, hna remchang te thawk pahin” ti a min rawn chibai tir khan, ka lai leh zak kha, ka sen ap ap in ka ring.
.
Ka hming leh hnathawh te chu a hrilh a, kan awmna te pawh telin, “e ani maw, kha i va fel ve” ngaihsam hmel takin ati liam ringawt a, min ngaihsak zui hmel pawh a pu lem lova, min ngaihsak se ka tih em vangin ka lo na ru ngawt pek a nih chu..!!
.
Chumi ni atang chuan ka rilru ah a riak ta reng a, ka mitthla ah te a cham a, chhuanlam eng emaw siama an in han len mai te ka chak ru thin, mahse ka zak ve bawk si…
.
Trum khat chu, Sunday zan kan inkhawm bang, Jenny chuan thingpui in ah min sawm a, a tlai tawh deuh na in, an in ka la hmuhpui loh chhuanlam in ka pha buai duh ta lova, ka leng chak ru ve bawk nen..
thingpui te chu kan in a, a nu leh pa te pawh anlo felin min lo kawm ve bawrh bawrh a, ka hmuhchak ber erawh inah a lo awm lova.
.
Thingpui te kan in zawh hnu chuan, Jenny roomah thlalak te kan en dun a, kan hlim hle mai a, “Ka u mama chu nula arim aniang, ani hi chu a luck ve a, kei ka luck loh nen” tiin ka thiani chu a nui har har a, ka rilru ah chuan ‘bialnu a nei a nih dawn chu’ tiin ka lo na ru lehpek hman a, keimah pawh ka in haw zawk, ani ang te chuan a nei ang tih lo rin lawk daih tur ania..engamah hma a ka lo hauh ve ngawt chu ka zak angreng zawk a.Chutih lai mek chuan, a leng chu a lo haw ta a, sana kan en chu a lo tlai tawh phian a, ka nu in min ngaihtuah ang tih te pawh ka lo hrechang lo hman trep ani.. “mate, a tlai deuh tawh emai, ka haw tawh ang e” tiin Jenny chu ka hrilh a, nidangah ka la len leh tur thu te nen, chuan sitting room lamah kan inzui chhuak dun ta a.
.
“Kha ilo leng ani maw? engtin nge i haw dawn” tiin U Alex-a chuan min lo zawt a, chhan nachang pawh hre mai lovin ka ngawi deuh vung vung a, ” taxi ka zuk chanpui ang e” tiin Jenny chuan min chhan sak a, “Ka thlah ang che, minlo nghak lawk rawh” ati chu ka phu deuh zawk a ” aaa..angai lo, taxi a awm alawm, i tan a buaithlak mai mai, ka lawm lutuk e” pangai takin ka ti ve mai a, ” nula tan zanrei lam tawhah taxi a him lo palh thei, ka thlah ang che” ati nawn leh a, Jenny chu kan mitmei zauh a, ‘mate, mama’n a peih chuan kal mai rawh’ a lo ti ve var a..phur ru deuh, zam ru bawk, hreh ru bawk chungin inthlahrung angreng takin a bike hnungah chuan ka thu ve ta ran a, amah kuah ngam silo, tlak hlau si in kan in bul chu ka chuang thleng ve mai bawk a..
.
“Ka lawm lutuk aw, kha keimah vangin i chhuah leh phah sia” lawmthu hrilh pahin ka chhuk a, “ehe thingpui inah pawh min sawm dawn nange..” ka beisei loh deuhin min chhang daih..

“A tlai tawh sia…ih i duh chuan lo in la” ka ti bah deuh niah a, a bike chu an hung rem deuh a, min rawn pan hnai a, tawng tumin ka ang zuau hman, a kut chuan ka hmui a rawn hup zauh a, a lu a thing a, ka tawng zawm ta biklo.Min hnaih em avangin ka tawlh kiang deuh hrat hrat a, cement bang chu ka va ngheng fu dawt a, ani lah chuan min rawn hnaih zel bawk si, ka ngaihtuahna chu a nu nuaih a, ka khur der der bawk a, “mi en teh” a ti zawi sap a, zak deuh chungin ka melh zawk a, “ka mitah mi en rawh” a ti leh a, ka hnial ngam miahlo chu mak ka in ti, a mitah chuan ka en ve ta ran a. Mahse, chu mitmengah chuan, engmah ka chhiar thiam thil ka hmu lo, kan inhnaih em avangin, a rim tui tak leh a thawk lum ham ham pawh ka hre pha a, ka hmai si cheta min hnaih takah chuan, min fawp dawn emaw tiin ka chhing riai riai a, thawk leh khatah min uap tu chu a kiang ta thut a, hamhaih zeta ka mit kan meng chu, bike ah a lo thu daih tawh a, minlo nuih deuh sawng in ka hria, ka zak lutuk chu hawi let eih lovin kan inah ka tlan lut ta ringawt a.
.
Ka nu chuan sitting room ah min lo la nghak a, “iva tlai ve ka ngaihtuah lutuk che a, phone i keng silo” a lo ti a, ngawi rengin ka nu chu ka pan phei a, ka kuah a “nu ka tihpalh” tiin ka phun sap a.. “ngati nge, thil thalo i tawng em ni” a tih chuan “aih tawng love, nu engkim a tha vek e” tiin ka chhang a..chumi zan chuan ka muhil miah lo, ka zak ru veng veng tlaivar zak..
.
A tuk hna a ka kal chuan, amah chu ka hmu ta mai a, ka phu kang dawrh in ka hria, minlo hmu ve ani ang, nuihza insum hmel deuh in minlo en a, pumpelh hram dan ka zawng char char, ka zah ala reh lo atin nen..
.
Zan lam duty ka nei lova, ka haw thei chu ka lawm hle a, a hma zan ka mu tlem nen, hahdam ka duh a, phur takin haw turin ka chhuak a, amah bawk chu pawnah a lo awm a;hmuhloh der tum in ka kal pel thuak tih ah “hey, lo chuang rawh ka thlah ang che” ka ding dat a, “angai lo mai, taxi a haw ka duh zawk” tiin ka chhang a.
.
“I rilru chuan i lo chuang chak tih ka hria, pha kual lo khan lokal rawh” ka ngei ve ta riau, eng ang pawn duh ila, hawihhawm lo lutuk ti rilru chungin ka kal ta daih a.

. A thlangah chuan taxi nghakin ka ding a, a rawn tlan thla a, ka bulah chuan rawn dingin, “Lalnunmawi, ilo chuang dawn nge, ka kalsan dawn che? thu pe aw deuhin a rawn ti leh a, a luhlul leh inring tawk lutuk chuan ka nuih a ti za lek lek. ”
.
Aih ka duhlo kal rawh” tiin ka chhang deuh hmak a. ” I duh, pha lo khan rawn chuang mai teh.”
.
Hnar luih ka tum mahse, ka theilo..ka inhua, he pa hian enga ti nge ka nun a thunun tlat tih inzawt chungin, ka chuang leh ta nge nge a..!!
.
Nitin, zantin kan inhmu ta fova, lunch kan ei dun a, hna ah kan kal dun a, a rem danin kan haw dun bawk a, dinner eiin kan chhuak dun fova, thiante tlawh in kan lengchhuak dun thin bawk.Thu pe leh inti ta deuha min bia te chu ka hlimpui phian.”Ka hmangaih che, ka ngai che, ka duh lutuk che ” min ti ngai lova, ka ti ngai bik lo, mahse kan inkar chu, hriatthiam theih loh, hriatthiam ngai si in min phuar belhbawm tlat lawi si..
.
Reilote ah ka nu pawhin kan awmdan chu a man ve ta thuai a, ” mambawih, Alex-a te ang zawng, i beisei sang mah mah lo maw..kan tan chuan an sang emai, i rilru natna tur leh i tah na tur ani mai ang tih ka hlau hle mai, thlah tum zawk la ka duh hle mai” min ti thin na a, ka duhzia a hriat avangin min khap bur lem lo.Ka thiante leh thawhpui te pawhin bansan tum turin min hrilh ve fo bawk, ka rilru a buai a, thlah tumin ni hnih, thum te ka han be lo ve a, mahse a hmel kan hmuh a, tawngkam nem taka min biak chuan, ka tumna zawng te an bo va, a tellova ka nun chu chelhtu neilo lehkhachaih ang chauh a nih avangin, kalsan ai chuan, in ham tan trang trang ka thlang leh thin..
.
Zankhat chu, ka nuamlo deuh nen, inah trawp angreng takin ka awm a, ka nu in min mutsan tawh a, TV hma a sofa ah chuan duhdah takin ka thu-mu titih a, hmuhnawm tih bik pawh nei lovin, ka hmet sawn chhen a, U Alex an ka message a reply loh vanga mood off ka ni tih erawh a rukin ka hria.
.
Kawngka kik karh thawm chu hriain, hawng turin pheikhawk pawh bun lemlo in ka tlan phei a, U Alex-a ka hmu thut chu, ka awm trawp si, ka zak lehpek hle a, ka sam tuai mam pah in ” enge ilo tih dawn” tiin kawngka ah tak chuan ka ding a, ka ke ler atanga ka chhip thlengin min en vang vang a, ” ka lo leng dawn.”
.
“Ka nu a mu tawh a” ka ti thla ngawt a. “I nu ka kawm dawnlo, lut ang ” ati a, “A tlai …..” ka sawi zo hmanlo, a lamah min pawt hnai dawrh a, min fawp ta a, ka ding khawng tawp, ka tal lova, ka chhanglet lova, ka rilru chu a bing mup ni berin ka hria. .
.
Rei tawk fang, duhthawh taka min fawh hnu chuan, “khatianga tih kha ka chakna arei tawh” tiin ka biangah a piai zauh a. “Mahse, a lehpek ah chuan milim ka fawp duh tawhlo” tih sap pahin a nui a, a kal leh ta nghal a.Zak si, hlim ru bawk siin ka ding reng a, ka taksa nuamlo pawh a dam ta huai in ka hria.
.
Hun a liam a, ni a ral a, inzui reng ta chu, a laka ka beiseina neih pawh a sang chho tial tial a.Trumkhat chu, he hmunah hian kan pahnih in kan kal dun a, Aizawl khawpui lang pe uar te chu kan thlir dun a, heti zan in, chhiarsenloh awmah hian, ka ta a awmlo tih te ka sawi a, min lo nuih var var a.. ” U Alex, kei hi min hmangaih em?” tiin ka zawt ta phawng a, achhan chu in ngaizawng te hian, hmangaih thu an inhrilh turah ka ngai a, ani chuan chutiang thu chu min hrilh ngailo tlat si..a ngawi vang vang a, chiang taka min en chungin ” Lalnunmawi, ngaihzawng tamtak ka nei tawh, “ka hmangaih che” tih thu hi awlsam takin an bulah ka sawi vek, thenkhat te chu a hunlai chuan ka duhin ka buaipui ve em em thin a, mahse a hunlai a liam a, mi thar kan tawng a, ka hmangaih emaw ka tih te pawh ka theihnghilh leh mai thin.Mihringin ‘hmangaihna’ kan tih hi enge a nih chiah ka la hrelo nge, keimah hi ka diklo zawk, ka hrethiam chiah lo.Pathian atanga chhuak hmangaihna erawh, a danglam mahna..!!Hmeichhia ka lo tawn tawh te anglo takin, danglamna tamtak inei a, ka ngaina che tih chu ka awmdan te hian a hril ve in ka hria, duh ni ila, i lawmna tur tawk tawngkam thlum tinreng hman a, han tih nuih ver ver na tur che hi ka hre hnem lutuk, mahse chutianga ka tih chuan, midangte ang bawkin, tawp hun nei ta ila, i tana harsa leh i tahna ti tam tu ani dawn tih ka hria, chuvangin ‘ka hrelo’ tiin ka chhang ang che..” a ti deuh duah a.A mitmengah chuan enge maw tal chhiar ka duh hle na a, ka chhiar theilo.Ka mittui a lo hnam triam triam a, a hmuha tah duhlo hle mah ila;a vawikhat nan mipa hmaah tlawm takin ka tap ta.Min kuah a, ” tap suh, i tah ka duhlo, i tah chuan i hmelchhia ania” tiin ka hnungah a beng thak thak a, “kei chuan ka hmangaih che tih ka hria asin” inhnit faih chungin ka ti a.. ” ka hria, min hmangaih tih ka hria alawm” tiin min chhang a.A dara bei chungin he thuthleng ah hian kan thu dun a, ka chhanna dawn te chu ka hrethiam lo, mahse ka rilru ah chuan, he mipa; ka thinlung zawng zawngin a duh hian, min hmangaih em tih a hrelo takzet a nih chuan, risk ka la sang hle tih ka in hriat angai tih ka ngaihtuah a, dawt hmanga min nuihtir ai in, thudika min chhan a thlang erawh, ka ngaisang zawk.A kianga ka awm theih nan, nghaktu nih ka zir a trul tih ka hre nawn leh a, ka hmangaih takzet a nih chuan, ka tana a inpeih hun nghak ngam tura chakna Pathian hnenah ka dil ru mawlh mawlh a.
.
Amah ka tawn atanga ka nun in thlak danglam zia ka chhut thin, inhauh leh thu inhmuh loh chang kan han nei a, chung hunah chuan, ka nun a ruak vawng vawng zel a, dawhtheih leh zaidam ka zir a, hrethiamtu leh tlawm zawka tan te ka zir tel bawk a, ‘thikthu’ awmzia ka hmu fiah a, Pathian ka auh hnem phah zia chu sawi maia fiah chi pawh anilo, achangin min hmangaih theih nan ka dil a, achangin min kalsan pawha tuar thiam thei turin chakna ka dil bawk a, ka nuna awm reng tura ka dil rualin, ka tana a ruat a nih loh chuan, min laksak turin ka ngen leh lawi thin si..!! Pathian tan pawh chhanna pek a harsat ka ring rum rum thin.
.
(Lm-i thusawi chuan, ka tum leh ka rilruk thil te chu kalh hle mahse, a hmela tih takzetna lo lang te, a thusawi rama a cheng tlat te chuan min hneh riau tho mai, a sawi zawm leh hma in tihian ka zawt a, “Lm, a nih leh in thawnthu chu engtin nge a tawp tak?..nge ala tawp lo zawk..??”
.
“Ah..VL, i ning tawh em, ila ngaithla peih ami?” inthlahrung deuhin a ti a, “Engtin nge ka hnial theih ang che, i bula ka awm theihna tur a nih phawt chuan, ka damchhunga ngaihthlak ngai pawh ni se, ka inhuam asin” han tih mai ka duh rum rum, mahse ‘aw’ tih nan ka lu ka bu ta nghat zawk a.
.
Ni atla fel tawh a, khua erawh ala thim chiah lova, thlifim in Lm-i sam an chhem leng siau siau te leh chu boruak hnuaia a hmel landan te, ka thu ngaihthlak lai mek te chu, engkawng emaw takin an in chawih riau nghe nghe)
.
“Kan thawnthu chuan enge min thlenpui dawn ka hre lova, a tawp dan tur pawh kawng hrang hrangin ka ngaihtuah thin.U Alex-a nena kan khawvel chuan awmzia a nei tamlo tih ka hria, awmze nei tura siam erawh ka thiam chuang lo, mahse ka hmangaih ber nena kan chenna a nih vangin, mi tana awmze neilo zawng zawng chuan, ka tan awmzia an nei thuk em em asin “VL” (tiin ka lam a lo hawi ha a, hetiang hian a chhunzawm leh ta a)
.
“Party kalpui tura u Alex-an min sawm zan chuan, ka thiam tawka nalhin ka inchei ve a, a bulah ka insit thin, insit lo tura min hrilh zin poh leh, ka insit zual tho.Vawikhat mah party ka la kal ve loh avangin ka phur viau a, U Alex-a hi ka chhuan em avangin, chhuah dun nuam ka ti ve bawk a.Kan kalna tur kan thleng chu an lo chibai nak nak a, ‘hei hi ka bialnu a nih hi’ ti a min han chibai tir lai te chuan, khawvelah kei aia hlim an awm ka ring lo.
.
Nakinah chuan, hmeichhe pakhat, hmeltha leh nalh zet hi a rawn kal a, U Alex-a chu a rawn bekbawr sar sar a, “ka va chhuak lawk ange aw, tikhan lo thu rawh” tiin min kalsan a, ngaih thatlohna pawh ka nei lem lo, mahse rei fe ka thut hnu pawha a lo la let lo chu, nuamlo ka ti ta deuh a, zawng tur em em pawh nilovin, ka va chhuak ve a, U Alex-a leh kha nula kha, thu pawimawh tak sawidun niawm takin an lo ding dun rial a, ka hriat ve chi lemloh thu khunkhan te an sawi ringin, ka pawh duh ta lova, hmupha tho siin kawngka phenah ka ding a, enthla ang ziazanga din reng chu tiin luhsan leh mai ka rilruk lai tak chuan, khawvela ka thil hmuh tawh a zawnga na ka la tih ber tur chu ka hmu ta..!! U Alex-a leh chu nu chu an infawp a nih chu..!!
.
Ka tiril a khur nghal der der a, va pawh ṭhena, va sapatal chiam ka chak, mahse chu chu ka ti duhlo, kha chen ka lo zir tawh, hriatthiamna leh dawhtheihna kha tihchhiat ka duhlo ani..hrelo leh hmulo angin ka awm lui hram a, kan haw kawngah pawh pangai takin ka awm tlat a, “U Alex, Aizawl khawpui thlir ang” tiin ka ngen titih a, min kalpui ve mai bawk a.Ka rilru na leh pik chuan “kha nu kha tunge a nih”tiin ka zawt ta chat a, ” Merilyn-i a nih kha, ka bialnu hlui” ati satliah mai a, ka insum hman tawh lo chuan ” i bialnu hlui chu i fawp a maw??” thinrim chungin ka ti a, ka hmai chu a ri deuh chawrh a, ana ka ti lo, ka taksa aiin ka thinlung ana zawk, ka mittui a tla nghal ngiah ngiah a.
.
“Tap suh, thil hrechiang lovin khatiang zawhna kha siam tur ini lo, ka tihpalh a na em” tiin min kuah a tum a, ka duhlo chu ka lo tal a, ” Bawihte, ni e, ka bialnu hlui te chanchin hi i bulah ka sawi ngai lo, min zawt ngailo ve bawk nen, nunhlui ani a, sawi a trulna ka hre tam lova, Merilyn-i kha, mi challang tak chhungkua ami a ni a, nang ka tawn hma daih che atanga inzui thin kan ni, nang nen kan intawn hnu ah pawh, vawi hnih khat chu ka leng ve ngei mai, ani kha nupuiah nei ila, khawvelin ‘hausakna’ a tih ang hi ka chan tur ani tih ka hria.Mahse mi thinchhia ani a, a chapo bawk a, kan in kawp rem thei dawn lovin ka hria a, ngaihthlak nan beng pahnih a nei a, tawng nan ka pakhat chauh a nei chung pawhin, ngaihthlak aia tawng chak zawk mi ani tlat.In thenna mumal tak siampui lovin, nangmah ah ka bei ta ringawt si a, zanin khan inthenna mumal siampui pahin, inthlah nana a duh ber ka pe mai a nih kha” tiin min hrilh ta a.
.
“a nih leh, kei aia kawng tam tak a tha zawk ani te ang kha i.hnawl thei a nih si chuan, kei hi enge min duh chhan, i enge ka nih?” ka zawhna chuan awmzia a nei em ka hrelo.
.
“Ka chhanna che chu angai ‘ka hrelo’ tih tho ani mai, ka hriatloh karin nangmah ah ka lo bei ve tawp ani ber e, chuan ka bialnu ini tih i hrelo ami” chu chhanna chu hriatthiam ka tum, mahse ka theilo..hei erawh ka chiang, ani hian, atir atanga tun thlengin, dawt min hrilh ngai lo..!!
.
Hriatloh karin hun a kal zel a, U Alex-a nen pawh kan la in zui chhunzawm reng a, christmas boruak leh khawvawt var te chu engti zawng pawhin a romantic riau a, ka nu chuan ka pu te khua ah mas hmang turin min pheisan a, ka hna chhuanlam in ka phei ve duh lova, U Alex-a bula christmas hman ka chak vang ani tih erawh ka hre ru.
.
Mahni a khawsak chu, a khawharthlak na in, ka tih fo thin ani ve reng reng a, hlauh leh nuamlo tihna ka nei lem lova.
.
Ka hnathawk ka hah deuh vangin, tuilum sa vara inbual harh tumin tui ka lum hluah a;uluk em em in ka inbual a, ka inbual zo chu towel vengin ka khur chhuak hlak hlak a, ka room ka lut chiah chu, ka phu zawk mai, ka khumah chuan thatchhiat hmel zetin U Alex-a a lo thu a, “ebgtin nge ilo luh” tih pahin bed cover inthlep chu ka pawt thla sawk sawk a, ka intuam mawlh mawlh bawk a.Mahni a awm tih takah kekawrte takngial pawh ba ṭhoomah ka ken luhloh avangin, engmah ka inbel silo, nui deuh sak chungin ‘kawngka i kalh lova’ ati sam et a, mi pawh chu a enzui lem hlei lova.
.
Ka rilru ah chuan, ngaihtuahna tha lo zet a rawn lut a, hei chen kan inzui tak hnu pawha, hun fal leh fianrial ah pawh mipat hmeichhiatna min hmanpui a tum ngai miahlo hi mak ka tih rukna arei ve tawh bawk nen, a itzawng ka nilo ah ka in ngai thin te chu fiah duhna ka nei ta tlat a nih chu.Ka intuam chhawnna bed cover chu dahin, towel chhing te chauh veng chuan a bulah te ka zuk thu ta vel a, mak tih hmel deuhin min en a, nidang anglo takin kan fawp hmasa a, min nam deuh sak pahin ‘Lalnunmawi’ ati sap a, ka kiang duh bik miahlo, enge..fiah ka tum alawm, a tak ram thlenpui lo tawk velin ka fiah ve reng reng ang tih rilru ka pu.Ka thiam ang tawka lem tumin, kan kuah vel a, mak tihna mitmeng chu zauthauna in a pawlh nawk ta mai..min pawm tho nawlh a, khumah chuan min mut a, ka towel nghet lo tak chu a phelh nghal niah a, engmah ka inbello tih ka hrechhuak leh hnuhnawh, ka zak chuan inkhuh that ka tum a, min dang tlat tawh si..” hey…ka ti tak tak lo ania, ka fiam che a nih kha, duhtawk rawh”tiin talchhuah kan tum tak na a, min tih tawp dan chu a thiam khawp mai.Ka hmuia min fawh takah chuan, nidang ang thovin khawvel dang ka ngaihtuah thei leh tawhlo, zanin phei chu, a kut pawh a awm mai mai lo lehnghal..ka taksa hmun tin chu a fang kual vek ani ber a, hmun hrang hrang a min fawh mawlh mawlh lai chuan, tlansan turin theihna engmah ka nei tawh lo, ka ngaihtuahna a tawi a, ka hriatngailoh zauthauna leh a tawp.thlen duhna chuan min bual vel a.
.
Ka taksa a inpeih thei lai zawng zawng chu amah hnar lo takin an inpeih a, ka thawk rang ta sawt te pawh ka hai lo, tlanchhiat san aiin, ka theih ang angin ka chhang let zawk a, a thuamhnaw te pawh ka phelh pui ve a, ka zahna te pawh an bo ta diak in ka hria.Keimah ang thovin a zauthau ve tih ka hmu a, a thawk rang te, a lungphu lo lian ta sawt te, a taksa lum ham ham leh a khur deuh der der te chuan, mipa diktak ka cho chhuak ani tih min nemngheh sak chiang hle.
.
Nghet deuha min kuah betin, min hmer vawng vawng a, a tawp min thlenpui dawn emaw ka tihlai chuan, a tho ta hluai a, mak ti leh hrilhhai takin ka en ringawt a..” tho la, in ha rawh’ ati tham deuh chhalh a, zak takin ka tho.nghal a, mittui karah ka thuamhnaw chu hmu phe riai chungin ka inbel a..ani pawh chu a in ha ve mek bawk a.Ka khumah, a bulah chuan min pawt thu a, ka mittui luang ngiai chu duat awm takin a hru a.
.
” Bawihte, tlemah ka insum zo lo teuh hle mai, trap suh, i tana tha tur ka ngaihtuah vang zawk ani tih hmuhthiam tum thin ta che.Hmeichhe nalh leh itawm tak ini a, mipa tamtak mit fukna pawh ini tih ka hria, kei pawhin i duhawmna te hi ka hmuh kan lo.Zanin ah khan, nang ai mahin a tawp thlenpui che a, duhtawk a chet ka chak asin, mahse chutiang chuan ti ta ila, kei chu mipa ka ni, nang a hmeichhia zawk hi engtin nge ni ang..?Kan hma hunah enge kan inkarah thleng dawn kan hre lo ang hian, nang leh kei hi runhmun ah fanau chawiin kan tawp dun lo thei asin…chutiang chu ni ta se, i tahna titamtu leh damchhung chhiatna thlen thei tu che ani dawn a..tin, zah taka i biak thin Pathian pawi kan sawi dawn tihna ani a, malsawmna aiah anchhia pe ta che sela, i biak Pathian phatsan khi i ngam em ni…ka theilo, sual viau mah ila, nang hi zawng i danglam emai” tiin duat takin min kuah ta hle hle a, chhan ngaihna ka hrelo, dik ka ti a, ka inthiamlo bawk, mipa sual leh rilru chhe tak tawng ta ila, zaninah hian ka kumkhaw tahpui theih thil ka tawng dawn tih ka hmuthiam nghal ani.” min ngaidam rawh, ka tihpalh ani” tiin ka inhnit faih faih a, ‘ni bik love, mipat hmeichhiatna hunlo taka hman hi, midangte nun tih chhiatna leh mahni pawh rilrua inthiamlohna min pe ru veng veng tu a nihzia ka chian em avangin, nang tihnat che hi ka hlau em ani..Lalnunmawi, hei hi ka zawn thin hmangaihna chu a nih ka ring, i tana thil tha chauh ka duhna lian tak hi..”
.
Chu tawngkam chuan ka rilru a khawih hle mai..
.
Ka khumah chuan inhmatawnin kan mu a, ka rilru in Pathian hnenah ngaihdam ka dil mial mial a, U Alex-a chu a muhil a, kei erawh ka harh kar thung, tui taka a muhil hmel chu hmuhnawm ti takin ka thlir vang vang a, a mithmul dum hlap mai te, a hnarngul invuah dan te, a hmui te chu, dim te in ka khawih kual dan dan a, a mawi ka ti, hmangaihna mit phei chuan a mawi lehzual ani.Ka rilru ah chuan ‘hmangaihna awmzia diktak chu enge ni ang’ tih ka inzawt a, inneihna maw..? nge nupa nun(sex)..nge nitina ‘ka hmangaih che’ in tih tawn kur dup hi..!! heng te hi hmangaihna anilo ka ti hauh lo, hmangaihna in a kalpui pakhat chu ani ngei alawm..mahse hmangaihna vanga innei te hi enga tinge an inthen a, fanau nei duah tawh chungin, nupa tamtak enga tinge an in lerh san si..?? Sex hi hmangaihna ni ta se..engah nge mipakhata lungawi lo tamtak an pian a, nawhchizuar leh a dawrtu anlo chhuah tak si..?Fanau neih na ah hian hmangaihna kim awm ta se, fahrah leh sawn zat ve hi an bo angem..? ”
.
Zawhna chhiarsenloh, a chhanna ka hriat siloh ka inzawt a, tuna ka thlir mek, ka hmaa mu hi, khawvela mipa fel ber chu ani hauh lovang, nunhlui trawp leh tenawm tak pawh a lo nei mahna, mahse ka tan chuan, tuna a rilru nen hian mi dik ani tlat.
.
Ka hmangaih ah in ngaiin, ka ta chauh ni turin ka lo hauh em em thin, hmasial tak ka lo nih chu.Thil pakhat hlu tak hriatchhuah ka neih tak chu, hmangaihna hi, inneihna ah a tawp kherloh chang a awm thin, kan hmangaihte hi, damchhunga kan chenpui a remloh hun a awm thin bawk. Mahse thinlung taka, dik taka kan hmangaihte chu, hrethiamtu ni chunga, an thatna tur atana duhsakna thinlung put ngam te, tah angaih hun pawha, nui chunga tah dan zirthiam te, ani a hlim chuan, keipawh ka hlim ani tih theihna thinlung put te hi, he kan hringnunah hian, hmangaihna dik a nih zawk chang a lo awm ve thin tih hi ani.
.
U Alex-a nena thil tamtak kan pal dun hnu chuan, ka thil thlir dan ka thlak ve tan ta a, amah nena kan hun hman dun apiang chu, theihnghilh lova ka vawn reng theih nan, atam thei ang ber thlalak dun ka duh a, a lo len chang te, khuma kan mut dun rial lai te, hlim taka kan inkuah lai, duh taka kan in fawp lai te leh a muhil hmel te chenin, thla ka la ta thin.A chhan min zawh changin, ‘danglam thei zawng zawng an danglam hunah pawh, hlimthla hi chu a danglam dawn lova, kan hlimlai hi hetah hian dahthat reng ka duh alawm” tiin ka chhang thin.
.
U Alexa kha, mi tumruh leh hmasawn zel duh mi ani a, ‘vawiina kan nihna ah hian lungawi tawp lovin, dinhmun sang zawk kan zuan ngam tur ani, hlawhtlinna te hi mi chanah chauh ruat loh tur’ tiin min fuih fo thin a, taimakna leh chhel nih duhna rilru min puttir thin.Sang zawk leh ropui zawk nih a tum tlat thin a, zirna a ngai pawimawh em em bawk a, ‘ thluak chawl lova kan hman hian, a chak deuh deuh ani’ tiin a sawi thin, chuvangin hmalam pan a tumna kawng daltu nih ka duh ngai lo.
.
Christmas urlawk zanah chuan, vengchei te enkualin kan lengchhuak dun a, kan hlim dun hle maia, kan chhuah apianga ka kal duh ngei ngei na, Aizawl khawpui lan tam theihna ka tih mai, he hmunah hian kal ka rawt leh pek a, he thuthlengah hian in ngheng rialin kan thu dun a, “eng emaw pek tur che ka nei asin” tiin, he ṭhi, tuna ka awrhlai hi min pe a, min awrhtir lai chusn lawm avanga hnuk ulh treuh chungin ka nui var var a.”Bawihte, kum thar lamah chuan, zirna sang zawk bei turin hla takah kal ka rilruk asin” tiin min hrilh a, sponsor a hmu a nih chuan kumtirah akal a ngaih thu te a sawi bawk a, ” i kal daih te chuan, engtin nge ka lo awm ang” ka mittui a tla leh trep tawh, mahse ka dang hram a, “dinhmun sang zawk sual tura ka kal thei a nih chuan, min fuiha min lawmpui tur zawk ini, tin ka cham hlen dawn hleinem, ka lo haw hun minlo nghak anga” tiin ka biangah a chul heuh heuh a..diktak chuan, dinhmun sang zawka ding tura a beih duhna chu ka zahsak, mahse a tellova ka nun tur ka ngsihtuah lo thei lo ani..ka huphurh takzet.
.
Chumi zan chu hlim takin, in thlahlel tawn leh thianghlim tak siin kan hmang dun ta a.
.
Kumthar chu ka nu kalna ah hmang turin leh ka nu hruai tur ni pah fawmin, ka pu te khuaah ka phei ve a.U Alexa tello chuan, chhungte bulah pawh ka kim theilo chu mak ka in ti.Zankhat chu tihian thu min rawn thawn a, ” Bawihte, hrilh che chu ka hreh hle na a, spinsorship ka zawn kha ka hmu ta hlauh a, ilo haw vat loh chuan, naktip mai hian ka kalna tur pana ka chhuah angai dawn si a” tiin..
.
Hmuh hmanloh ka hlauh em avangin, a tukah chuan ka nu pawh nghak lovin Aizawl ka pan ta a.
.
U Alex-a nen chuan hun kan nei tlem ta hle mai, he hmunah tho hian kan pahnihin kan thu dun leh rial a, nitla tur sen dul raih te chuan, naktuk maia min kalsan tur, U Alex-a hmelthatna chu a nidang zawng aia mawiin a lantir niin ka hria, nidang kan ang lo ve ve ani.’ i kal kher chu angai takzet em ni’ tiin a kut chu ka hmer vang vang a, ka mittui an luang ngiai bawk a, ” ka phur viau rualin ka huphurh” ti chauhin min chhang a, a mit kan en chu, mittui a lo tling ve pam a.Ka ngaih tur ziate, a tello khawvel chu, vul chunga mawina neilo a nih tur thu te ka hrilh mial mial a, ani pawhin chhel taka lo awm turin leh a lo kir leh huna hmasawnna thar lo nei turin min fuih ve bawk a.
.
Ui beh chi a nilo tih ka hriat avangin, a suangtuahna leh a tum te ti hlawhtling ngei tura duhsakna ka hlan a, eng chena rei pawh nghah ngai se, ka dinna ngaiah ka lo din reng tur thu te pawh ka tiam nghe nghe.
Zandang ang bawkin, ka khumah inhmatawnin kan mu zal dun leh rial a, Pathian ramri kham chin erawh kan pel lo.A kut chu ka vuan tlat a, “ilo kir leh hun ka lo nghak ang che” tiin ka phun sep sep a, min chhang miah lo, min en vang vang a, ka mittui chu duat takin min hruksak a, “U Alex, ka ngai dawn che ani” ka ti nawn leh a, “keipawhin ka ngai ang che, mahse mihring kan nih chhung chuan, hmalam pana kan kal hi angai si a, dam leh hrisel takin lo awm la, lungleng leh min ngaih vang mai mai in, i tihtur ṭhulh ngai lo la, midang tana nelawm leh ngainatawm ni reng thei turin lo nui fo thin ang che, hmalam hun sawi theilo mah ila, dam taka inhmuh leh tum phawt ang aw..” tih pahin min kuah a, “tui taka i muhil hmel ka thlir leh theih nan, lo kir leh rawh aw” tiin a awmah chuan ka bei hle hle a.
.
A tuk maia kaltur a nih avangin, min trinsan har lova, chumi zan chu mu lovin ka tlang zak ani.Ka mittui a tla nasa hle a, a tukah chuan, mittui nen kan in vai liam ta a.
.
A kal tak hnu chuan ka nun chu a ruak vawng vawng mai a, nui thin tura min fuih avang chauhin, ka nui lui hram hram ani.U Alex-a nena kan khawvel kha, a hmingah vuah tur ka hrelo, mahse atello chuan, mawi thin zawng zawng ten an mawina an hloh ta tih erawh ka hria.
.
A tello khawvelah chuan, ka nui a, ka nunphung pawh pangai takin a kal chho ve zel tho a, nitinin a lo kir hun tur thlirin ka nghak thin…zan a lo tlai a, ka khuma ka mut apiangin, a muhil hmel leh a tawngkam te ka hrechhuak nawn ziah a, theihnghilh ni ka nei ngailo, harsatna ka tawhin ka hrechhuak a, ka hlimni ah pawh ka hriatchhuah hmasak ber ani fan a, ti hian vawiin thlengin ka la nghak zel a nih hi ”
.
(Lm-i bianga mittui luang ngiai chu hruksak ka chak hle mai, mahse chi hmeichhe mittui chu, ka hruk hul theih anilo tih ka hre si a..” a nih tunah inla inbia em..akal atangin hei kum hnih aliam tawh si a” tiin ka zawt ta zawk a”)
.
A kalna tur hmun a thlen tirh kha chuan kan inbe fo thin, a tel lova nun hmachhawn ka thiamloh avangin.Mahse hun a lo kal deuh a, a tellova nun hman ka zir chho ve a, amah hrereng chung si a, ti buai tu nihloh ka zir a, kar ahlat vang te pawh aniang, kan in be khat ta tial tial a, lokir tura ka beisei hun pawh a pel tawh, tunah phei chuan kan inbe ngai ta meuh lo”
.
“Chuti a nih si chuan, enga tinge ila nghah reng si, tawpna mumal tak siamin hmalam pan zawk la, itan a tha zawk lo em ni” tiin ka zawt leh a.
.
“VL, ka chunga i rilru hi ka hria asin, mi fel tak ini a, ka tan i hluin i pawimawh em em a, mahse U Alex-a kha, ka thinlung ka lo pe tawh si a, thinlung pahnih ka nei silo.Tawpna siamtu nih ka duh lova, ani pawhin tawpna a siamlo hi ka.lawm zawk, kan thawnthu hi hetah hian tawp tir ka remti lo..hun rei tak pawh nghah ngai se, vawikhat mah dawt min hrilh ngailo tu nghak tur hian ka inpeih asin” tih pahin a mittui a hru zauh a.
.
“a nih lo kir tawh ngailo se, engtin nge itih ang”(chu zawhna ka zawh lai chuan Lm-i chu a nui sak a)
.
” a lo kir leh ang, Vl, ka hria alawm, ka beisei lej duhthusam anga lokir lovin, nupui fanau nen lo kir ta zawk pawh ni se, a hnena ka tiam tawh ang khan, tui taka a muhil hmel leh a duhthusam hlawhtlinna a tawn ni ka hmuhpui hma chu, ka.lo nghak dawn ani..ka dinna ngaiah ding chungin” tiin a ṭhi chu a hum vawng vawng a.
.
Kei Vla hi, ka rilru chu he hmeichhia hian a hliam ani tih ka pha lo, haw ta viau pawh ni ila, tu’n min dem.lovang, mahse ka haw tlat lo, he hmeichhe rilru nghet tak hian, duhthlan theihna anei a, a thlan kawngah chuan, tahna leh mittui ten hmuak mahse, a kal lui dawn tho tih ka chiang.
.
Khua pawh a lo thim fel vek tawha, Aizawl khawpui pawh ralah mawi takin a de chuah tawh..Lm-i chu ka en thin a;mak tihna leh khawngaihna in ka khat a, a rinawmna erawh zah phu khawp ani tih ka hria.
.
“Lm, a nih leh Alex-a chu i hmangaih takzet ani maw..?” kan ti leh hram a, “Aw, ka thinlung zawng zawng in” chu chhanna chuan, ka thinlung vawikhat pawh la na chhin ngailo hi, a pawtsawm vek ani, mahse chu thinlung nghet tak chuan zahsak a phu em avangin, ka na tih lantir ka tum lo.
.
“I haw tawh ang hmiang” tiin na lo awm takin ka zawt a, “i thil min hrilh tur ve kha ila sawi ve silova” a tih chuan, “angai tawhlo mai e, hun dangah ni rawh se, a pawimawh lem lova, i haw tawh zawk ang’tiin ka thova, ani pawh in min rawn zui ve nghal a.A rawn hmuh hman hma in, ka pek tura ka tih, zungbun chu ka ak tha thuai a, pangpar erawh chu ‘hei hi itan ka lei a, a pawi em.lovang chu maw’ tiin ka pe a, ‘ka lawm e’ nui seih chungin ati a, “hei hi ita ve tur ania” tiin lehkha ip min pe ve thung a.
.
Ka roomah chuan lutin, ngawi rengin ka thu a, ka duhthusam thamral mek chuan min ti chau hluah hluah ani.Lm-in min lek lehkha ip chu kan hawng a, pendrive leh lehkhathawn a lo awm a, ka laptop tinung in, pendrive chu kan vuah a, Lm-i leh Alex-a thlalak chi hrang hrangin a lo khat tlat a, hla pakhat a lo awm tel ve bawk a, chu erawh chu ka la ngaithla lo.Chung thlalak te chu Lm-i tan an hlut dawn vei nen, ka tan chuan hmuh hrehawm ani si a.Lehkha thawn, ka tana Lm-i’n a ziah chu muzal chungin ka chhiar a hetiang hian a lo inziak a:
.
” Vl, ka tana i inpekna leh, ka chunga i rilru ka hmuh hian, nang hliam tu che nih ka duhlo zual thin.
Hmangaihna hi a mak ngawt mai tiraw..hriatthiam ka tum poh leh ka hrethiamlo zual thin.
.
U Alex-a nena kan kgawvel kha, ka tan chuan khawvel duhawm ber ani a, khang hun te kha ka nunah ka ko kir thei tawhlo tih ka hria, mahse pendrive a ka dah hlimthla te khan, ka nuna hun duhawm ber min hriat nawn tir asin. Hmangaihna hian achang chuan, min ti na thin tiraw..? Keipawh nat luatah ka tap ve fo asin, chutiang hun ka tawn ni chuan, danglam ve ngailo hlimthla kha ka thlir thin a. Kan inhmangaihna chu, khang hlimthla ah khan chambangin, nui hmel chuai ve ngailo te, mittui luang tur awmlo mitmeng nung sarh reng te, duhtawk chin nei lova infawh na te, thlah leh tawh ngailoh tura in kuah rial te kha, a ngai rengin an ding ka hmu thin.
.
Ka ṭhi awrhlai ah hian, U Alex-a nena kan khawvel duhawm lai ber chu, hlimthla hmangin ka dah a, khawiah pawh kal ila, ka thinlung zawn takah kan hlimlai chu a awm reng thin.
.
He ka ṭhi chhungah hian, ka thinlung a kehsawm ngai lova, keimaha ka insiam chawp hriatrengna khawvel, hlimthla khawvel chu, a tak ram ang maia hlimpui luih tumin, ka khawhar leh ka mal ngawih ngawih changin ka thlir thin.Che sawna danglam ve ngailo, nui hmel pu reng hlimthla khawvel ah khan, ka cheng thar leh thin.
.
“Ka lo kir leh ang” ti a thu min chah tu kha, kei chuan nghah rih phawt ka duh ani tih min hriatpui hram turin ka ngen duh che. Tin maw Vl, hmangaihna ka thlir ve danah chuan, a tawpna chu engpawh nise, kan hlimna chauh buaipui lova, kan hmangaihte hlimna thlir chunga, dawhthei taka hun lo nghah tawp mai te, kan duh ang diaka thil a thleng ta lo a nih pawha, mittui karah nui hmel pu chunga, an thatna tur leh an hlimna tur atana duhsakna hlan thei tu nih te hi a inziak tel asin.
.
Hmasial taka tu emaw va neih ngei tumna hi, hmangaihna ani ber lo tiraw..?! A hnena ka thutiam te khan, U Alex-a tan pawimawhna anei tawhlo a nih pawhin, kei chuan a lo thlawna tham tir ka tum lo, thamral tur beiseina ka lo pai palh ani thei e, ka thutiam erawh hlen phawt ka tum.Chumi hnuah chuan hmalam ka pan ve ngam tawh mahna.!!
.
Ka thian rinawm i nih avangin, thiantha hmangaihin ka hmangaih che a, ka chunga i thatna zawng te hi, hmangaihna Pathian chuan, hmun diktak ah, mi diktak tawn tir nan che hmang lul rawh se..
.
Vawiin hi, lei mi ten inhmangaih te ni ah an vuah si chuan, ka tan chuan, ka hlimthla khawvel leh a chhunga ka nun zawng zawng kha “Valentine’s day” chu ani mai e..”
.
Lm-i lehkha ka chhiar zo chu, ka mittui a hnam ve sawk a, “aw..a lo kir hun tur pawh i hriatloh, ala hmangaih ve che em tih pawh i hriat hek loh mipa nghakin maw hun ilo hman thin” tiin Lm-i thlarau chu ka zawt a, a sawi, ‘hlimthla khawvel’ chu beiseina beiseibo mai ani tih ka hriatpui rualin, rinawm taka a thutiam hlen duhtu hmeichhia ani chu, ka ngaisang thung.
.
Hetiang khawp hian a lo ni maw, rinawmna pai hmangaihna pawmtu ten hringnun an lo dai tih ka hrethiam ve ri riai a, ka laptop a Lm-i hlimthla khawvel chu thlir nawn chungin, hla a rawn dah tel chu ka ngaithla a, Ed Sheeran hla Photograph tih ngei mai kha a lo ni a, ka ngaithla liam mai thin, zanin ah erawh a dan a dang ta.
.
Hmangaihna chu hlimthla hmangin kan dah ṭha a, Chu hlimthla khawvelah chuan kan inkar thu te theihnghilh turin, kan mit kan chhing ngai lo, Kan thinlung kehsawm leh rum turin, hun a kal ve lova,
Kan hlimlai hlimthla ah hun chu a ding reng ani.
.
Thlah leh tawh ngailo turin kan invuan tawn a, Nui hmel te an chuai ve tawh hek lo.. Ka rilru ah chuan, ” nia, he hlimthla khawvel hian, hunbi tam ral mahse, danglam lovin kan hlimlai a dinpui a lo nih hi” tiin ka ngaihtuah a. Chu hla uluk taka ka ngaihthlak nawn hnu chuan, ka smart phone la chhuakin Lm-i chu thu ka thawn ta a:
.
“Lm, nang hneichhe awm nem zawk mahin, i hmangaih nghak tura thutlukna siamin, hlimthla leh hriatrengna khawvelah nghet taka i ding ngam a nih chuan, kei pawhin nang ka tawnni che atanga vawiin thlenga kan hlimthla khawvel ah hian chengin, i ban phaka hnaiah, ka tana kawngkhar i hawn hun leh i ‘hlimthla khawvel’ kalsan a hmalam i pan theih hun ka lo nghak ve thung ang che.. Ka hmangaih che asin” tiin.
.
Ka khumah chuan kan thu leh rih a, chu kan khawvel, ‘hmangaihte nghahna- hlimthla khawvel’ chu, hriatthiam har ka ti, keimah ang thovin, ka Lm-i pawh khan a hrethiam bikin ka ring lova, chutiangin midang pawhin an hrethiam hek lovang.Mahse tah chuan kan tang miau si..!!
.
Beidawng leh beiseina inkawp rilru pu a, nui sak chungin, hrethiamlo tak chunga nghah ve phawt chu ka tum ta a, ka mitthla ah chuan, pawisawilo taka nui ver ver thin, a ruka hmeichhe chhel leh chak tak ni lawi si, Lm-i bianga mittui luang ngiai hmel chu a lo lang thar leh a, a hmangaih chu kei ka nilo, mahse amah hmangaihtu ka ni tih ka inhria.Ka rilru luahtu ber rilru chu midangin a luah daih thung tih hre chungin muthilh ka tum ta a, chutih lai tak chuan ka phone a lo ri a, Lm- i hnen atangin he thu hi ka dawng a:
.
“Ka hlimthla khawvel hi chhuahsan ngailo ta ila, engtin nge itih ang?” tih a lo inziak a..
.
” Angkhat renga min hmangaihtu Pathian tan khian, ka tawngtaina nge chhan chakawm anga, i tawngtaina?” tiin thu ka thawn let ve leh ta a..!!
.
(He thawnthu hi Ed Sheeran hla-Photograph ka ngaihthlak atanga ka phhuah niin, behchhan neilo fiction a ni a, zirtir leh entir tha tak anei lem lo, hmangaihna a hriatthiamloh tam tak nei thin zawng zawng te tan ka hlan e- Margareth)

Aside | Posted on by | Tagged , , | Leave a comment

ASEP-IN DAMPA CHHANCHHUAH BEIHPUITHLAKNA KALPUI ZEL

PRESS RELEASE No. 2 of 2018

ASEP General Headquarters chuan General Assembly vawi 13 naa an lo pass tawh angin Dampa Chhanchhuah Beihpuithlakna ASEP FOR DAMPA Programme chu a hawnna an neih hnu-ah hmalakna a kalpui chho mek zel a. A thawh khatna mission atan Campaign Director Pu H. Lalhmunsiama chuan Dampa fringe villages zawng zawng tlawh chhuakin ASEP hminga theihtawp chhuahpui tura ngenna VC leh YMA branch zawng zawngah a pe a, a theih chen chenah a sawipui nghal bawk. Tun ṭumah hian West Phaileng, Kawnmawi, Chhippui, Saithah, Lallen, Phuldungsei, Pukzing, Teirei, Damparengpui, Khawhnai, Serhmun, Tuipuibari, Rajiv Nagar leh Andarmanik te a tlawh a ni.
.
Dampa hian chanchin ngaihnawm loh leh lungchhiatthlak tak tak a nei zauh zauh va. Mizorama Sakei humhalhna kan neih chhun leh protected area kan neih zinga lian ber a nih avang hian ngaih pawimawh bîk a ngai hle a. Chutiang a nih avang chuan he hmalakna hi ASEP chuan a kalpui ta a ni.
.
ASEP chuan Dampa chanchin a chhia a ṭha zawng zawng a enthlithlai reng dawn a. A ṭul ang zelin tumah thlei bik nei lovin hmalakna a kalpui zel dawn a ni. He programme a kalpuina kawngah Zoram mipuite thawhpuina leh support-na ASEP chuan a ngen tak meuh a ni.
.
Issued by The Association for Environmental Preservation (ASEP)
General Headquarters, Aizawl.

Aside | Posted on by | Tagged , , | Leave a comment

US SENATOR LAR 2-IN NORTH KOREA INNGAIHTUAH NGUN TURIN AN DUH : NUCLEAR BOMBER CHI 3 AN CHHAWP HNAI TA

US Republican Senator pahnih Lindsey Graham of South Carolina leh Ted Cruz of Texas te chuan North Korea chu nuclear leh missile program a kal pui chungchangah inngaihtuah ngun hle se, an duh tih sawiin, Senator Ted Cruz chuan, “US in a hremna ngai pawi mawh lova a chet zel chuan, mafia sorkar North Korea hian US in a dawtah enge a tih dawn, tih hlauvin a ngaihtuah tur a ni. US chuan thangkhat lian tum 3 dawn a ngai chang tawh a ni” a ti. Ted Cruz hi US Presidential election a primary election a Donald Trump hneh lotu kha niin, Republican Senator lar zinga mi a ni.

Senator Lindsey Graham chuan, “North Korea hian Donald Trump hi an chhut sual (under cutting) ang” a ti bawk. Lindsey Graham hi Senate Armed Service Committee member niin, pa duh rum ve tak leh Republican hawkish Senator a ni. President Donald Trump nena Golf khel dun fo thin an ni a, President Trump hian North Korea a vau hian tam takin a tih tak tak an ring lova! Sen. Graham erawh chuan, nikum Dec thla khan, Donald Trump-an North Korea chu sipai chakna hmangin a beih tur hi 30% zetin a chiang chho tawh a ni, a ti.

US chuan North Korea hi a bei a nih chuan “bi tuk chin” (limited) emaw “surgical strike” ni lo deuh, “bloody nose” a beih hi a tum dan niin alang. President Trump chuan North Korea chungchang chu “Poker game khelh ang maia harsa lutuk” (very hard game of Poker) a ti hial.

North Korea chuan Feb thlaa South Korea a Winter Olympics ah infiam mite tirin, Joint Women’s Ice Hockey team angin Unifed Korean flag kengin an tiho dawn a ni.

US chuan a nuclear bomber chhuanvawr chi thum, B-1B Lancer, B-2 Stealth bomber leh B-52 rualte chu Anderson Air Base, Guam hmunah a rawn chhawp hnai tawh bawk.

Author : CT Lalrinawma

Aside | Posted on by | Tagged , , , | Leave a comment

DONALD TRUMP A sorkar a zeng dawn em ni

US Congress chuan sorkarin sum hman dan tur a ruahman “Spending Bill” kawngah thutlukna lungruallo an neih vaih chuan zanin Feb 19 zanlai pelh atangin, Federal gov’t chu che thei lovin (frozen) khar (shutdown)in a awm dawn a ni. Hemi anih vangin President Donald Trump leh Republican ho chu mawng vawm ba ang sekin an phi ruai.

Kum 2013 khan President Barack Obama hun laiin, Republican hoten a “Healthcare Bill” duh loh vangin sorkar che theilova siamna (shutdown) an lo thlentir tawh a, khami tum khan ni 16 chhung sorkar chu khar a ni. Hetianga Federal gov’t che thei lova siam hian nasa takin US Economy nghawngin, kar khat chhung ringawtin US$ tluklehdingawn 6.5 vel hloh thei tura chhut a ni.

Trump Admin hian “spending bill” hi October 2017 khan a nei tawh lova, mahse, “multiple temporary spending measures” tiin an siam rem a, chu chu Feb 19 zanlai hi a thih hun (deadline) tur a ni.

Federal sorkar meuh a chet theih loh chuan nasa takin nghawng a nei dawn a, mahse, tul bik riau (essential) thil, heng Homeland Security Dept leh FBI bik te erawh, a tul tawp khawk chauhah an chein, an thawk thei ang.

Sorkar “shutdown” chhungin hnathawktu (workforces) 40% te chu hlawh pek an ni dawn lova, active duty military te pawh chawlh (furlough) pek an ni lovang.

Engvangin nge “Shutdown” a lo awm ang?

E le, Barack Obama sulhnu chin pawr duhlotu Democrats ho an lungawi thei tlat lo! President Obama khan dan lova US pem ru fate (undocummented migrants) mi 700,000 zet mai te chu, America khualehtui ni turin thupek a siam sak a, (an vote duh vang chu a ni bik em lo vang chu maw?), chung naupang-thalai hote chu “The Dreamers” tiin an kohva, chungho humhimna turin President Obama chuan kum 2012 khan “Deferred Action for Child Arrivals” (DACA) tih chu a hming a lo ziak hnan tawh si. President Trump erawh chuan, chungho chu Sept 2018 chhungin an lo kalna ramah vek thawnlet vek a tum vang a ni.

Barack Obama chuan heng “The Dreamers” tihote hi “temporary legal status” a pe a ni. Democrats hote chuan he mi chungchang hi sawi fel hmasak phawt an duh a, Trump leh Republican hote erawh chuan, “He thil hi issue hran daih a ni a, spending bill nen ngaih pawlh loh tur a ni. Spending bill pass hnuah hemi issue bik hi sawi chauh tur a ni”, an ti ve thung.

1981 hnu atangin “shutdowns” hi vawi 12 zet a lo thleng tawh a, a rei ber chu President Bill Clinton a hun lai kha niin, ni 21 chhung (Dec 1995-Jan 1996) zet a ni. Chutih laia House Speaker, Republican Newt Gingrich chuan Medicare, Mediaid leh Welfare fund a sum hman chu tihtlem (sharp cut) a duh vang a ni.

President Obama hunah khan, 2013 ah a lo awm tawh a, Republican thunun House chuan Obama’s Healthcare Bill (Obamacare) a sum hman tur tam lutuk an duh loh vang a ni. Ni 16 chhung zet an shutdown vangin an buai hle a nih kha. Hetianga “shutdown” a lo thlen chuan Federal employee 850,000 te nun phung a khawih thin a, mihring nuai 1 chuangin “regular paychecks” an dawng lovang.

S&P Global Analyst chuan, “Federal gov’t shutdown ah chuan, business khawihin, revenue, private contractors, sales hloh, retails sales etc., a harsa hle ang” tiin, US$ tluklehdingawn 6.5 zet chu karkhat chhungin a tibuai ang” a ti.

Nizanah khan House lam chuan “major increase defense spending, hardline immigration bill” hi House ah a thu phungin “shutdown” thlen loh nan an pass tawh a, mahse, Senate ah pawmpui a ngaih vangin Democrats hoten an block thei a ni. Senate ah 100/60 talin an lo remtih a ngai a, tunah Republican-Democrats hi 51-49 an ni mek.

President Trump chuan niminah Pentagon a tlawh tumin, “I lo thlir zel ang. Democrats-ho thu thu a ni e” a ti. Democrats hote hian “shutdown” turin House ah erawh kawikawm thin ang thap, arpui mei tan angin an lungrual a, Senate lamah pawh “shutdown” ti turin an lungrual mai thei. Shutdown thlen hi President Trump tan a tha lova, a chhan chu Jan 30 ah khian Joint Congress ah thu a sawi dawn a, chu chu a sorkar kum 1 chhunga a hmalakna tawh leh hmalakna tur a sawi chhuahna tur a nih vangin, atan “shutdown” awm chu buh pho dawn a khawdur khup, ruah tla ang a nih theih dawn vang a ni.

• CT Lalrinawma

Aside | Posted on by | Tagged , , , | Leave a comment

LALZARMAWIA KAN CHÂN TA

PU C.Lalzarmawia , Facebook thuziak thin, RALTHUAM KHAWVEL/THE MIZO POST Group siamtu leh Ralthuam leh tunlai khawvel admin chu vawiin chawhnu 3:30 PM khan Newlife Hospital ah a boral.

Zanin ah an chenna in Venghlui ah lumen tur niin naktuk chhun dar 12 ah vui a ni ang.

Facebook lamah chuan Czars Khiangte tiin mi tam zawk chuan kan hre awm e.

Aside | Posted on by | Tagged , | Leave a comment

RO KAN ZAWNG by Faka Hnamte (Rags to Rag Picking)

Chaw ei kham veleh ka chhungte chuan hmanhmawh takin chaw min funsak a. Chaw dal chawm sa diam leh nghathu rawt polythene-a min funsak chu min pek pah chuan, “Bawlhlawh paihna kawrah lut tawh lo ang che u, Sakawrekhrik in kai ang,” min ti a. “Lut dawn lo, lut dawn lo,” tih pah chuan ka best friend teho in lam panin ka tlan nghal daih a.

Chhungte bulah khan Saihri lui chhaka Ruata te huanah theite lo turin kan kal dawn ka ti kha ania. Kan tum ram erawh Aizawl tlak lama bawlhhlawh paihna lian ber “Kham uih” kan tih mai lepse tura chhuak kan ni. Ka sikul kai ipte hlui ‘Pu Ro-hood-a’ min thuisak chhungah chuan magnet bial, rit lung mai bawlhhlawh paihnaa ka chhar leh ka nu chaw min funsak chu ka ak puar ve lang a.

“Ruata”
“Eih, lo kal rawh ka hman tep”
“Valpuia ka lo va sawm zawk ang”

Valpuia chu sawm hran ngai loin an in lam atang chuan kawihsapir nen a rawn lang a. A pu vawkchaw lak ipte lian pui mai, a ngal thleng dawna fual tur hi a rawn ak pai hnuk hnuk a. Amah pawh chuan ak lian a inti deuh a ni ang.

“Tui thak te ka pai a…” (a nui ţhâw mai)
“E… pai ve nachang ka lo hre miah lo a”
“Ka pai kep che u lawm. Mahse ka ta tur chu aieng telh. In taah chuan ka telh ve lo. Anu’n min rawn hmu hman a…!”

A ipte chhungah chuan tuithak Ostocalcium bur thum leh chaw fun a ak a. Valpuia hi chu kan puitlin hnu pawh hian tih nachang kan hriat loh thil kilkhawr te pawh lo ngaihtuah thlap thin a la ni reng mai.

January thla tir sikul luh hma a ni a, khua a vawt si, pem hlek pawh a pun zel a. Kan pem pun bakah kan chât khir te chu a pan zui lo choh a ni.

Ruata pawh a inpeih ve ta a. Ani pawh kawrlum ţial sawi vekin a kawr ipte chu a rawn puar a. A ipte rawn puar em em nachhan chu eng dang ni loin a nu-in lung rawh lum a ahtir leh a ni tih kan hre nghal a. Ruata hi naupang hrisel lo tak, khawsik ser ser ching a ni. Tun hnu hian mak ka tih em em chu Ruata te chhungkua khan lung an lo va ngah awm em em. Thlasik zual chhung, thla hnih chuang teh meuh nitin deuhthaw a rawn ak chhuak a; a lum a rehin a paih daih zel.

KA U THANGA

Ruata te huan lam pan tur ang deuhin veng thlang lamah chuan kan liam ta diak a. Chhungte’n min hmu pha tawh lo ni a kan hriat hnuah hmar lama ‘Kawr uih’ lam pan chuan thlamuang zetin kan inzui ta ţhâm ţhâm a. Ni hnih thum kal ta mai khan Pu Kai hausaa te tractor-in an in ţhiahna hnâwm a paih tih Valpuia’n a hmu a, chu mi hnuah naupang dang lut kan la hmu miah lo.

Kan haw huna kan mit tlai dan tur te suangtuahin kan hlim ngang mai. Kan tum ber chu video cassette dawra Bruce Lee a film, “The Big Boss” hawh a ni.

Kawng laka kan titi mam mam lai chuan Ruata’n, “Ka u Thanga” a rawn ti thut mai a. Thu dang sawi zui a ngai tawh lo. Hlauhawm a hnai tih hriain chak em em mai hian inthurual ang hrimin kan tlan thut a. Kawng kawi kan pil veleh kawng kama hnim buk phenah Valpuia nen rang lutukin kan dive lut a. Kan hnung daihah Ruata chu ipte zen ţût chung hian a theihtawpa chakin a rawn tlan ve a. A hmel atang chuan hlauhthawnna nasa takin a tuam vel mek a ni tih a hmuh theih. A iptea lung tum lian tak pahnih te chu a dawm beh loh chuan a balance a buai a. A dawm beh lahin ban vai loa tlan a ngai bawk si. Kan bihrukna hnim buk phenah chuan hnap tawlh purin a rawn lum lut ve tawl a. Ipte hruia hnap hruk zauh pahin.

“Tinge kan tlanchhiat…?”
“Min hmu a ni lawm ni?”
“Tuin?”
“I u Thanga’n min hmu a ni lawm ni?”
“Ka hre nang… amah in hmu mi?”
“Hmu nang…”
“In hmu emaw ka tia…”
“Min hmu lo reng reng”
“Tinge in tlan vak si?”
“Nang pawh ti nge i tlan vak”
“Ka u Thanga in hmu lo a ni lawm ni?”
“Ka u Thanga i ti sia…”
“Ka sawi zawh hmain in tlan vak a kan chhungte tu emawin min hmu emaw ka tia lawm”
“E…”
“Ka u Thanga te pawh hmana an kalin thil tha deuh deuh an chhar tih ka tum a… ”

Tunhnu hian kha mi tuma Ruata tlan muang kan tihzia kan sawi chhuah apiangin Ruata tlawmngai hian, “A nih, ipte zen chungin intlansiak ila,” tiin min cho ziah a, ipte zen chung chuan amah pakhatna a ni ziah. Ban vai loa tlan et et thei hmel kha a pu hrim hrim a.

A BU PUI

Kan hma lawkah chuan mual pum khuh hmawk bawlhhlawh chitin reng mai awmna chu a lo awm nghûk mai a. A rim pawh kan hre pha tan ta! Mahse, kan tan chuan tunlai naupangte’n KFC dawr an kal pelh a a rimin an ngaihtuahna a tiharh zawk ang thoa rim ngainatawm a ni. Africa khawmuala rangkachak leh lunghlu zawng mite’n rangkachak khur an pan ang maia thatho leh suangtuahna ropui tak nen chu lai hmun chu kan va thleng ta a.

Eng emaw châng chuan an lo hal fai kûlh thin a. Vawiin chu kan beisei aiin bawlhhlawh a lo tam a, video cassette pahnih hawhna daih chu kan hai chhuah theih kan inring hial. Cassette kan hawh huna naupang dangte’n min tlawn turzia leh TV enna a cassette hawhtute thutna chan that theihzia te chu tuma hrilh kan ngai lo.

A bu pui kan luhchilh tan ta. Kan hna kan tan tak tak hmain Valpuian, “Tuithak in phawt ang u,” a tih avangin tuithak chu kan in leh te te a.

Ka magnet bial lian kengin hma ka hruai a. Valpuia’n a Kawihsapirin bawlhhlawh pawnlang leh te tham deuhte chu a hai kiang zat zat bawk a. Mahse ka beisei aiin ka magnet chu a tangkai lo daih mai. Kuta hai mai a hlawk zawk. A man theih loh chi hnawmhnawk dang a tam lutuk. Perek nawi hip khawmna chi chauh a lo ni.

Valpuia pawh chuan a Kawihsapir aiin a kut a lo hmangthiam zawk a. Kan pathum chuan mahni seh seh mual hranah ti niawm takin a tam kan rinna lai laiah kan hai ta miah miah mai.

Thirchhia chu a lo tam ngang mai. Thirchhia bakah saidawium te pawh tlawm deuh mah se chhar tel tho chu tha kan ti a. Sangha ţin bur ruak leh ţin ruak dangte chu kan rap sawi nghal zel a. Ruata satha ipah kan chhar ang ang chu kan khung ta zel a.

Rei fe kan inhai hnu chuan kan satha ip pawh a khat mawi ta. A han khah takah chuan Ruata satha ip chu a lo lian em em mai a. Kan han hnûk chhuak dawn a, ţanhmun rem lo nen a hautak lutuk. Bur ruak kan rah sawiho karah khan thirchhe hralh huna a buk tirittu atan lung kan lo thun nual bawk nen. Primary sikul naupaang pathum tan chuan a rit ngei mai.

Valpuia paw’n a track kekawr kawng elastic rul a ngai pawimawh hleithei tawh lo a; a ţan zawnga a mawngkawkehkak chip taih taih te kha kan in-marble thâp lai chu ni se kan nuih nasa ngawt ang. Mahse, tuna kan thil tih lai hi chu thil tak tak, sum leh pai kaihhnawih a nih avangin nuih theih a ni lo.

Ruata paw’n a chawrche a chawrchein ip mawng lamah a lo nawr ve ţang ţang a, Valpuia nen eng tin tin emaw a lu lamah ţangin kawngpuiah chuan kan hnuk chhuak thei ta hram a.

Kan thahnemngai lutuk chuan kan chaw fun pawh ei nachang hre loin kan lo theihnghilh hmin hman der a, chawhnu her a lo ni daih tawh.

Naupang harhvang tak, kal that pangngai pawh a kal thei lo, zuang lim reng thin kha rei ngial tha pui chhuah a kan rohlu kan han hnuh tak hrepah chuan kan chau nasa mai a. Riltam tih pawh inhre lo lekin thirchhe buaiin kan buai nileng lo chauh a ni.

Kut pawh sil mang hlei loin kan chaw fun chu kan bar ta hawng hawng a. Chaw kan fak mawlh mawlh lai chuan Ruata kha a tho thut a, chaw hmuam ţûn chung hian, “Thil ka hmu,” tih leh phur fahrana khâm lama liam thlak a rual leh ta!

Chuti taka phur chu rod bung sei deuh a hmu thut a nih ringin Valpuia nen pawh kan lo tang hrû a. Ruata chuan bawlhhlawh piahna zawl chhe te, bawlhhlawh inchhek khawmna lai atang chuan Bangla channel-a kan hmuhnawm tih em em mai Street Hawk-a helmet ang a zuk khai chhuak nawlh a. A dum a ni lehnghal.

A hmai khuhna a awm lo a, a chhung dûp pawh a awm tawh lo. Mahse, mawi kan tiin pa kan ti kher mai. Ruata’n a chhar bik chu kan thik a ni. Thirchhia lah a chhar tlem ber bawk si.

Valpuia insum zo lo chuan, “Kan thil chhar reng reng inţawm vek tur kan tih kha aw!” a zuk ti hram a. “Aw in khum ve dawn lawm” tih pahin a mah chuan a’n khum hmasa te te a. Puitling helmet a nih bakah a cushion a awm tawh lo nen, a lu a te bawk si a, a hmui leh khabe chiah a lang thei. Fanghmir Lalpa a ang a ni tawp mai.

Intithei takin a zuang a, bike te khalh lemin “vroom vroom” a ti vak vak a. A chang leh posi te a la a. Chutia a sapatal vel lai chu Valpuia nen chil putin kawngpui atang chuan hrilhhai zetin kan thlir reng a. Mahse, thawklehkhatah beisei loh thil a lo thleng ta!

Ruata chu a dinna bawlhhlawh hlawm tam tak nen chuan thlang lamah an tawlh thla ta dial mai a. Kan han nuih chiam dawn a; mahse thih leh dam inkar a ni tih kan hre thiam ve tlat.

A rang a rangin Valpuia nen bawlhhlawh kara ke tlum thawih thawihin kan thiannpa ngaihven tur chuan kan liam thla ve nghal a. A helmet chharna lai kha hmun zawl tak tak niloin bawlhhlawh tling khawm inchhek vum mai mai a lo ni a. Khatia a han zuan a, a han tum vak vak takah khan a chim ta mai a ni.

Lengkir sang vak lo, tlak sual erawha thihna tham tur a ni ang. Chu mi hnuaiah chuan bawlhhlawh zingah a Street Hawk helmet khum chuan a lo let ngât a.

“Ruata, Ruata”
“Ummm…” (a rum ţuah ţuah mai)
“A na em? A na em?”
“Haw ang u (tap pur chungin a rawn ti a)”
“Tap suh, khawi lai nge na?”
“Ni e, tap suh i pa lo lutuk”
“Ni e, i tah chuan a na lo tihna a nih kha!”
“Khawiah nge ka beetar khing?”

A beetar khing zawnga bawlhhlawh kan hai hrep hnu chuan kan hmu ta hram a. Dimdawi takin Valpuia nen chuan kan han kaihkuah ve ngial a. Kan kal dawn ţan chauh tihah Ruata bawk chuan, “Ngawi r’u thil ka hmu,” a rawn ti leh ta. A accident hma khan a hmu tha ropui si a, tunah pawh thil tha deuh a hmu leh a nih ringin kan lo phur ve hle ringawt a.

“Telhawng, telhawng” tih pah chuan kawr kama hnim pik lamah chuan a bai phei uih uih a. A telhawng hmuh chu arbawm tiat dawn a ni. Tunah zawng helmet leh telhawng a nei tawh a, ti fuh a inti ngang a ni ang.

“Kei chu kaih ka ngai lo, keimahin ka kal ang a, telhawng hi rawn keng zawk ula, kan inah kan sat phel ang a kan insem dawn nia,” phur serh surh tak a ni.

Kan telhawng hmuh chuan kuang sei deuh a nei a. Chawi ţung ţung ngai loin Valpuia nen chuan a kuangah vuanin kawng thleng kan hnuk chho a. Kan chaw fun ei bang leh tuithak bur thum pawh chu a ngai ngaiin an lo la awm a.

Kan ipte te kan la a, kan thirchhe zawn chu ina hawn nghal chi a nih loh avangin kawng sir hnim buk karah chuan a ip chawpin kan thukru ta hmak a. Nakinah vai thirchhe zawng Islama lo kal hunah put hah ngai loin he lai hmunah hian kan hruai mai dawn a ni.

IN KAN THLENG

In thlengin Valpuia nen kan telhawng chhar chu kan hnuk kawngtluan a. A khem neng nung tawh mai. Kan hnungah Ruata chuan bai uih uihin min rawn zui ve zel a, helmet pawh a la khum reng a, a chhar tirh a mi kha a la phelh lo reng reng.

Bawlhhlawh kara rei tak lo inphum tawh a khum reng avangin a lu a thak nasa hle a ni ang. A hiat sut sut reng a; a mit a rawn khuh zel avangin a helmet chu siam that sek a ngai a, a ke a bai bawk nen. A indaih lo kawngtluan a ni ber e. Mahse, a helmet phelh loin a lu a hiat thei hlauh a, chu chuan a chhawk ve deuh ka ring. A helmet chhungah chuan a lu mai bakah a kut pawh a la leng. Chu mai ala ni lo, ala hiat kual vel thei lehnghal.

Ruata te in kan thlen chuan khua a thim hle tawh a. Kawngkaah chuan kan telhawng hawn chu kan hnuk lut hrut hrut a. Intithei fahran hian Ruata chu helmet khum chungin kan hnungah a rawn vroom lut a; mahse, a ke a bai tawh lo reng reng. In chhunga nu pathum lo thu te chuan “Eheeee…..” an lo ti rual ţhawt a, kan telhawng hawn a len em avang chuan an lawm viau a nih kan ring.

Ka nu : “Khaw’nge in kal a?”
Valpuia nu : “Engatinge kha’ng te kha in rawn hawn?” (a aw ki atang chuan ani pawh a lawm viau lo a ni)
Ruata nu : “Lalremruat, engatinge kha’ng te kha I khum bûr?”

Zawhna chhan sen loh min zawt zut zut a ni ber mai. Ka nu leh Valpuia nu chuan kan haw har chu min ngaihtuah avangin Ruata te in lamah min lo zawng a lo ni.

Kan hmuipui pu ber Ruata chhanah kan khek nge Ruata ke bai tawh lo thut chu mak kan tih vang zawk? Valpuia nen chuan kan ngawi dun ngal a.

Ruata chuan, “Telhawng kan ei chak a, ram hnuaiah kan zawng a, a vang lutuk a pakhat chiah kan lo hawn thei…”a ti dek dek a, kan nute pathum chu za em em hian an nui ta chiam a. Chu veleh Ruata chu an ni ai maha za hian uar em emin a rawn nui ta vak a. Valpuia nen mak kan ti tawlh tawlh.

Hrilhhai taka rei fe kan din hnu pawhin an la nui tawp hleithei lo a. “Telhawng a…!” an tia an nui tha leh thin. Ka nu chuan nui bawk bawk chungin, “Chaihchun a nih hi…! A rih awm teh reng nen! Thlansaphulkaiin in rawn hnuk haw ve chu a ni awm si a” a rawn ti thei tawk.

Ruata khan chhungte bula insawi thiam nan chaihchun kha telhawng a ni lo tih hre reng chungin min hnuh hawtir a, amah aia kan len zawk mai bakah kan zingah pawh a dawih ber a, a chak lo ber bawk. Mahse a thluak hmang hian min hnen fo mai. Kha mi ni pawh khan ama’n a hnuh ve peih loh vangin a ke a lo bai der mai mai a ni.

In lama ka pa, thinurna meipui nena lo inur vut vut tawh pawh chaihchun thawnthu a’n hriat meuh chuan a dai leh ta! Chaihchun chu chhuanlam atan mai ni lo; min chhanhimtu a ni. Thinrim tana damdawi tha ber chu nuih hi a lo ni.

Ruata lah chuan bum fuh min intiin min fiam nan a hmang fo lehnghal. Naupan laia ka lo vel hrep lo kha ka inchhir ngawt mai. Tunah lah kei aiin pawisa a ngah zawk a, a velh chi tawh bawk si loh. Pawisa ngah chuan huai vak pawh a lo ngaih loh hi! Ka aw te hi thumin ka ban pawh hi sek phiar engang mah se pawisa ka neih si loh chuan ka tan eng nge sawt ang. 😀

Aside | Posted on by | Tagged , , | Leave a comment

MIZO NULA MISSIONARY LEH ASSAMESE TLANGVAL GOGOI by Apuia Tochhawng

Assam sawrkar hnuaiah hian Forest Range Officer niin kum nga vel zet ka thawk tawh a, Mizoramah Deputation in ka rawn chhuak ve zawk a, kum 1988-ah Assam-ah ka let thla leh ta a, tlangval puanthuah khai lai ka ni bawk a, Haflong-a ka chenna quarter-ah chuan ka thawl hle mai.

Kum 1989 May thla tawp lam a ni tawh a, Official thilah Guwahati pan ka ngaih avangin Guwahati pan tur chuan ka insiam a, ka insiam mawlh mawlh lai chuan kan bangla chowkidar Patel-a a lo lut a, “Saheb, khua a chhe si a, kawng lah a tha lo bawk si nen; khaw that hun nghak zawk la,” a rawn ti a, “Patel, naktuka ka thlen ngei ngei a ngai, ngun takin ka chenna saw lo thlithlai ang che,” ka ti a, a lu a bu nghut nghut a. Kan office leh kan chenna colony-ah hian zan lama vak chi rulngan te, chawngkawr te, keite te hial an rawn kal thin a, staff ho kan buai nak nak chang a awm thin avangin ka quarters chu lo veng ngun deuh tura chah ka ni a.

Kum 1972 hnu lamah khan Assam state atangin Meghalaya leh Mizoram chu lak hran an ni a, Assam state chhunga tlangram awmchhun ni ta Karbi Anglong leh North Cachar Hills District enkawl tura post ka ni a, he tlangram pahnih hi tunhma chuan Khasi & Jaintia Hills, Garo Hills leh Mizo District in then a lo ni a, chu chu Forest Circle pakhat Hills Circle an ti mai thin a, he hills circle hi Conservator of Hills in a enkawl thin a, mahse Karbi Anglong leh North Cachar Hills District chauh an nih takah chuan a bialtu Ranger Officer in ka awm ta a ni.

Zing dar 10 a rik chuan ka inpeih fel vek tawh a, mahni chauha long run tur ka nih avangin ka mamawh tur Rifle te, pistol te, thingpui paina flask te, whisky um khat leh ka mamawh thil dang chu ka motor-ah chuan ka hlang fel a, Jeep chu ka han tirum ham ham a.
Khua a rawn dur khuih khuih a, Jeep hood chu uluk takin ka siam tha a, muangchangin ka tlanchhuak ta a.
Lumding Reserved Forest lam kaltlanga tlan a ngaih avangin chak takin ka tlan pur pur a, kelral(clouded leopard) ka hmu zauh zauh a, suamhmang an awm leh zauh thin tih ka hriat ve reng avangin fimkhur tak leh inralring ru tak chungin ka tlan zel a, ka silai pawh load sa in ka dah diam a. Khua a har duhin ngaihtuahna a bing duh vung vung hle mai a, Mizoram lama ka chhungte leh ka ngaihzawngte chu ka rilru-ah an awm vang vang a.

Sai rual(Rogue elephant) ka tawk thut a, ka tlan chak laklawh si a, anmahni sut hlau chuan ka motor chu ka herh kawi zawk a, a brake a lo chak vak si lo a, kawng sira hmawng buk tha zet (Figus reliosa) chu ka su bur mai a, nikhaw hre lo chuan ka let reng mai a.

Ka harh leh meuh chuan khua a lo thim chhulh chhulh tawh a, ka awm a na vawng vawng a, ramhnuai chu a reh tlawk tlawk a, ka chhak tlang lamah chuan tlumpui a kui dut dut bawk a, khawhar a hnem lo kher mai. Helai kawng vel hi chu chhun pachangah pawh thim rum rum khawpa ngawpui un a nih avangin zan thimah lek phei chuan chet a harsat tur zia ka hre sa nghal vek a, na sawi hman a ni lo, a nih loh chuan helai ngawpui dam duk hnuaia tlaivar hi a ni mai. Thingte chu Chhura rual rual an ni tawh a, thingsam a uai huai huai bawk a, ramsa hniak a chiar nuk bawk a, ka insaseng vat loh chuan ka chan tur chu a duhawm lo hle dawn a ni. Ka tlûkna hmun atang chuan harsa ti takin ka tho chhuak a, motor chhunga mi ka hmehen te, ka silai te chu ka la chhuak a, flask ami thingpui sa ver vawr ka pai chu ka han thli a, ka in khawlh khawlh a.

Whisky chu ka rêk chhuak a, dal deuh takin ka siam a, ka han lem sak a, helai kawng hi chu ka tlan ngun thawkhat tawh bawk a, khaw kar kawng vel chu ka hre chiang tawh bawk a, khawchhunga luh vat loh chuan ka nuamsa dawn lo hle tih ka hriat avangin helai atanga khaw hnai ber ka awmna atanga hnai ber kilometre hnih vela hla Phuloni khua pan mai chu a awlsam berin ka hria a, muangchangin Phuloni lam pan chuan ka kal ta a.

Sava hram ri mak tak tak te, bak thlawk ri leh phurh thin te chu ka ngaithla reng a, khawchhak lam atangin thla pawh a rawn chhuak duk duk a, chhun lama khua a chhiat nen chutia khua a rawn thiang ta kûk mai chu ka lawm angreng hle mai a, hliam tenau nena ruahpui vanawn han do leh rih chu thil chakawm tak a ni mawlh si lo va. Thla eng chuan chulai mualdung inkhawh zui mai chu khawhar ti zual tur tawk lekin a chhun eng no ruih mai a, tlangdung inkhawh kham ruah mai te chu thla êngah chuan chiang em emin a lang a.

Thawklehkhatah chhungrilah nuam tih lohna riau ka nei thut mai a, ka hmulthi a ding sung sung a, ka bul hnai velah chuan engemaw hian min vil renga hriatna ka nei a, enge ni ang? Sakei nge savawm nge keite ni ang? Ka silai chu ka hûm nghet sauh a.

Phuloni khua chu ka hma kawi hnih vela hla-ah chuan a awm tawh a, a khaw thlen hma chuan leilet a awm fir fer a, leilet lamah chuan phulrai nuam deuh mai hi a cham duai mai bawk a, helai vela hnam mawlho hian buh chin hi an eizawnna pui ber a nih avangin eizawnna dang han dap tumna em em pawh an nei chuang lo a, kumtluana leilet enkawl chu an damchhung hna a ni.

Cigar ka phawrh a, rifle chu ka bula khawkherh kungah chuan ka han tung a, tui ti takin meizial chu ka zu hlat hlat a, ka awm nuam lo kha a rawn chhuak leh a, engemawin min zui a ni tih chiang takin ka hria. Ka silai chu ka han kau a, ka torch light ken chuan ka han chhun kual pup pup a, engmah hmuh tur a awm si lo, ngun takin beng ka han chhi a, sa an nih chuan an thawm chu ka hre thei ngei ang, an thingtang rah rik emaw chu hriat tumin thawm chu ka han ngaithla a, chutah ka han hawi phei chu ka hma-ah hian hmeichhe pakhat hi a lo ding reng mai a, ka phu nasa ngei mai. Ka lungphu a inthum rawn tluk tluk a.

Chu hmeichhia chuan min rawn pan hnai a, mizo hmeichhia a lo ni lehnghal a, a hmel chu a zahawmin a nungchang a zawi hle ang tih a hriat theih mai a, “Ka pu I lo kalna a hla si a, ka inah lo thleng ta che, a ti ta a.
Chutia hmeichhia lehnghal ram palailenga zana chutia ka hmu ta mai chu ka mak tih a zual a, chhan nachang ka hre lawk lo lehnghal a. Amah bawk chuan, “Helai vela missionary-a awm hi ka nia, ka hming chu Zopuii a ni, i hliam te kha kan enkawl dawn nia, nurse ka training chhuak alawm,” a ti leh zel a.

Chutia min han biak tak bawrh bawrhah chuan ka hamhaih a reh a, ka zui ta a, kawng chin a hre hle mai a, mahse mak takin kawng atangin min penpui zawk a, mi a beisei deuh emaw chu le ka ti rilru hman a, kawng atanga chil pik phak lekah chuan thlan vung hi a lo awm a, chu thlan chhu kawkin he thlan hi tuma hriat loha awm mai mai tur ania, mahse he thlan a lo awm tak ngawt nachhan hi i la hria anga, i thin a rim ve viau mai thei a ni,” a ti a, a tawng pah chuan a sehchilh nawk nawk a, a thin a ur a ni tih a hriat hle mai.

Khaw lam pan chuan kan kal leh a, leiletah te chuan uchang an lo tlak tluar tluar a, khaw chhung kan hlut a, khaw chhunga in te chu a lo thim khup vek tawh a, an mu reh tawh a ni ngei ang, dai kawngkhar te chu a thing thip thep a, Zopuii chenna in lam chu kan pan phei zel a.

In chhe tawh takah hian kan inzui lut a, bati a han chhi a, in chhung chu thla thum vel luah tawh loh ni awm fahran hian a chul rup tawh a, a khawharthlak duh vung vung hle mai. Ka hliam te chu kan silfai a, uluk takin min tuam sak thlap a, chaw ka ei a, ka eikham chuan meizial ka han zu vang vang a, ka hma ah chuang lungngai hmel takin a thu kun lap a, ani anga hmeltha hi chu Mizo nula zingah an awm tam lo hle in ka hria a, fit ruk zeta sang ka ni a, palian inkhaithli thlerh thlawrh ka ni chung pawh hian ka beng chen vel zet chu niin ka hria. A ngo in a pian a nalh si a, a hnute bu kawh lah mai te chu chil puta en tham niin ka hria.

“Aizawlah hian ka nu leh pate an awm a, dawr lian tawk kan nei a, ka pa chu sumdawng hausa hmasa pawl a ni a, Doctor zir ka tum a, mahse interview na ah ka tlin loh avangin ka zir thei ta lo a, Shillong-ah nurse ka zir ta a, ka zir chhuak a, Civil-ah reilote ka thawk a, ka pianthar tak avangin Missionary in ka chhuak a, ka nu leh paten remti lo hle mahse Lal Isua chanchintha puan darh hi ka koa tla-ah ka ngai tlat a, ka chhuak lui ta a nih hi,” a ti a.

“I chau awm si a, mu rawh aw, mutna ka siam ang che,” a ti a, khum awn tlei tlawi deuhah hian mutna min siam sak a, ka mu thuai a, ka mutna khum chu ka inleh zawngin a chik tuarh tuarh a. Pawn lamah chuan thli rum a thaw vung vung a, pawn lamah chuan pen thawm ka han hria a, mi pahnih vel niin ka hria a, kawngka an rawn chum dawt dawt a, “Tunge a chhungah khan awm?” an rawn ti a.

Mak ka ti hle mai a, Zopuii chuan a chhang mai turah ka ngai a, mahse a reh ta tlawk tlawk mai si a, pawn lam atang chuan vin angreng takin, “Tunge khatah khan awm? Rawn hawng vat rawh,” an rawn ti leh a.

Ka tho chhuak a, kawngka chu ka va hawng a, Zopuii mutna chu ka va en hram a, mahse tumah an lo awm hauh lo mai!

Putar pakhat leh tlangval pakhat hi an lo lut a, putar sam tuak var vo mai hian, “Ka pu tunge i nih?” a ti a.

“Helai bialtu Ranger hi ka ni, Official thilah Guwahati pan tum ka ni a, kawng lakah ka che sual a, ke-in in khua hi ka rawn pan a, khaw thlen dawnah sawn Zopuii inti hian min lo hmu a, he inah hian min hruai lut a ni,” ka ti a, anni pahnih chu makti lutukin an inen a, tlangval zawk chuan, “Ka pu dawt i sawi lo maw?” a han ti a, “Dawt ka sawi ve ngai lo,” ka ti hmak a.

Putar chuan, “Ka pu min rawn zui teh,” a ti a, kan inzui chhuak a, kawngka chu kan kalh a, thil engemaw dik lo chu a awm a ni tih ka hre nghal mai a.
Ka luh hmasakna in atanga in ngana-ah chuan kan lut a, an chhungkua in an lo la meng thap a, putar chuan, “Dhoni, kan mikhual hi eitur han siam sak teh khai,” a han ti a, an nu ni awm tak chuan kel hnute leh chhang ur hlim tih hriat tak mai hi min rawn chhawp vat a, ka han ei a, a lo tui zêk a.

Putar chuan a chhungte chu mu turin a han tir a, an mut reh hnu chuan, putar chuan laltin eng chau tak mai hi ka bulah a rawn chhawp a, “Saheb, I chauh viau ka ring a, mahse thil engemaw hrilh duh che ka nei a ni, mahse ka thu hrilh tur che hi ka ka atanga chhuak a ni tih i sawi chhuak tur a ni lo, min tiam rawh,” a ti a

A duh ang chuan ka intiam a.

“Saheb, milian, officer i ni a, ka ring ngam che a, ka thu sawi tur hi ngun takin lo ngaithla ang che,” a han ti te te a. A sawi zawm zel a.

“Kan khua-ah hian sumdawng hausa deuh mai an awm a, kan khua-ah chuan an hausa ber ang, an hausak avangin miin an tlawn a, an hlau bawk a, he khua hi an thunun a ni, he khaw roreltu an ni ber mai, fapa tlangval hmeltha deuh mai, lehkhathiam bawk si hi a awm a, Calcutta-ah MA a zir zo a, a hming chu Gogoi-a a ni, an chhungkua hi Hindu ruh em em mai an ni a, an duh loh zawnga awm chu an tiduhdah thei hle niin an sawi.

“Tichuan, mizo nula pakhat Zopuii hi kan khua-ah hian a rawn awm a, kan chhungkua hian kan ngaina em em mai a, kan inlenpawh reng thin a, kan chhungkaw zinga an damloh chuan min enkawl thin a, kan tan chuan a hlu thlawt a ni, tunhma chuan Hindu kan lo ni ve thin a, mahse Zopuii zarah Lal Isua chu Lal leh Chhandamtu-ah kan lo pawm ve ta a ni.

Hla taka tawng ang mai hian a aw chu hriat a har hle mai a, ka han en chuan a mittui a lo parawl kuang mai a.
“Saheb, tichuan Zopuii chu Gogoi-a chuan a ngaizawng a ni tih kan hre ta a, a lenchilh tluk tluk mai a, Zopuii pawh chuan duh chin a lo nei ve mai bawk a, zanah te hial an riak dun tih kan hriatin kan rilru a na ngawih ngawih mai a, Lal Isua chanchin min hrilhtu berin chutia nulat tlangval nawmchenna lama min tlansan mai chu kan thinlung a na vawng vawng mai a ni, Zopuii pawh chuan min hel deuh ta tlat a, tunhma anga infiama inkawm bawrh bawrh thin kha kan inkarah leikak thuk tak a awm tawh a, khawlaiah inhmu in inbe fo mah ila, thinlung tak chuan kan inpawh thei tawh lo.

“Chutia nupa anga khawsa dun ta chu Zopuii chu a lo rai ta a, a rai a ni tih a hriat chuan Gogoi-a chuan a hmusit zui ta viau mai a, an insawisa thawm chu kan hre ta fo mai a, va chhan chu kan duh thin a, mahse kan hlau miau si a.

“Zankhat chu Zopuii te in piaha kan kel inah ka thil theihnghilh va lak tumin ka kal a, ka thil theihnghilh chu ka lak hnu chuan ka let leh nghal a, Zopuii in chu kal pelh mai ka han tum a, mahse ngaihthat lohna lian tak mai ka nei thut mai a, bang awng atang chuan ka bihthla ta a. Gogoi-a chuan Zopuii chu a lo sawisa a, Zopuii chu thi hnuang hian chhuatah a lo mu a, Gogoi-a chuan, ‘nang hmeichhia hi ka duh tak tak ngai reng reng lo che, nupui hual ka nei daih tawh, ka fa hi i tihtlaktir duh loh avangin ka that dawn che a ni,’ a han ti a, a hmel chu ramhuai hmel dik tak a ni tawh, a mit te chu a sen rum mai a, Zopuii hrawkah chuan a rek a, Zopuii chu a na lo tawrh tawh nen chuan a tuar zo ta ngang lo a ni, engatinge khatihlai khan ka lo tlan luh mai loh le! Tun thleng hian ka inthiam thei ngang lo va, ka tap tlawk tlawk mai a ni.

“Zopuii ruang chu a pu nawlh a, sawti lamah sawn a kalpui ta a, zui zel turin huaisenna nei tawh hek lo I, ka thlir liam ta ringawt a.
“Chutia Zopuii bo ta ringawt chu an zawng huai huai mai a, khuaa mite chuan rindan kan nei theuh a, mahse tumahin kan sawi chhuak ngam lo, police an lo kal a, mahse tihngaihna an hre bik lo a, an let leh mai a, chuta chin chu Zopuii tawng thawm ni awm tak te, helai vela a tap thawm te chu kan hre thin a, kan hlau em em vek a, Gogoi-a chu hmannni kha’n a ramvak savawmin a seh hlum a, a hmel pawh hmuh tlak loh khawpin a seh chhe vek a ni,” a ti ta a.

Mak ka ti kher mai a, dawt zawng a sawi hauh lo tih ka hria a, a thlarau ngei pawh ka hnenah a rawn inlar si a. Mahse a thlarau chu khawnge a kal tak ang tih chu ka ngaihtuah zui vawng vawng a.

Aside | Posted on by | Tagged , , | Leave a comment

DAMPA TIGER RESERVE A NGAU KAPTUTE MANTU MAN AN NI

Thu kan dawn danin nikum December thla laihawl vela Dampa Tiger Reserve huamchhunga Ngau (capped langur/Trachypithecus pileatus) kaptu mi 3 te chuan anmahni mantu Forest Guard 3 te lakah FIR an thehlut a, nimin kham West Phaileng police ten an man.

Kan thudawnna in a tarlan danin heng Ngau kaptu mi 3- V. Rualsailova s/o V. Lalramthara (L), Lalrinawma s/o Deri leh Noela s/o Kumara te hian anmahni mantute lakah hian FIR anthehlut a, he an FIR thehluh avang hian anmahni mantute hi police ten la in nimin (Thawhlehni) bek khan bail a chhuahtir lehnghal an ni.

Ngau capped langur/Trachypithecus pileatus) te hi Schedule 1 animal (mang mai hlauhawm, humhalh ngai bik) an ni a, a tihlumtu hremna hi WPA 1972, Section 51 hnuaiah kum 3 lungin tan leh Rs 10,000/- aia tlem lo chawi a ni a, hemi piahlamah hian protected area chhunga sapelh pawh hi dan bawhchhiatna tho niin hremna pek belh theih a ni.

Author : Kiddy Vanchhawng Vanchhawng

Aside | Posted on by | Tagged , , | Leave a comment

RAHPUAH BOMB RAP PUAK

Date 15.1.2018, Thawhtanni Zinglam dar8 vel khan Lawngtlai District khawthlang lam, Parva khawbul,Bondukbanga khua ami, Jitua Tongchangya chuan Chawhmeh zawnga an ram kalna ah rahpuah bomb rap puak palhin hliam na tak a tuar.

Zingkar khan Jitua Tongchangya, kum 26 mi leh a thianpa Morokto Tongchangya te hi chawhmeh zawngin ramah an kal a. Chawhmeh an zawn zawh hnu hian Hmunphiah kek turin an kal leh a, chutia Hmunphiah kek tura an kal lehnaah chuan Jitua hian Rahpuah bomb hi a rap puak palh ta a ni.

Bomb hian Jitua kephah vei lam (a kheimit hnuai lam zawng) a thlawh dar vek a, a ngal dinglamah hliam natak a tuar bawk.Jitua Tongchangya hi tukin zing dar 7:30 vel khan District Hospital Lawngtlai rawn thlenpui a ni a, amah enkawltu Dr. Vanlalremsiama chuan a dinhmun chu nunna atana hlauhawm a nih loh thu sawiin, vawiin vek khan Lunglei lamah a refered a, chawhnu lam dar 1 vel khan Lunglei an pan nghal.

Bondukbanga hi India ram chhung, Myanmar atanga km 5 vela hla a awm a ni a, Rahpuah Bomb hi India ram chhunga kam anih thu leh Myanmar Sipai kam nge Arakan Hel Pawl kam tih an hriat loh thu Jitu hruaitute chuan kan Palai an hrilh bawk.(PS: Tongchangya ho hi Chakma angah kan ngai thin a, mahse anmahni erawh hi chuan Chakma an inti lo a, Dainak an inti a, Tribe hran niin an insawi a, kum 1989 khan Bangladesh sorkar chuan Tongchangya ho hi indidenouscommunity pakhat angah a pawm. -KV)

Aside | Posted on by | Tagged , | Leave a comment