Electronic Voting Machines (EVM) leh Voter-verifiable paper audit trail (VVPAT) hman a ni tawh dawn

Election Commission chuan inthlanna awm leh tur zawng zawngah Electronic Voting Machines(EVM) leh Voter-verifiable paper audit trail (VVPAT) hman a ni tawh tur thu a sawi. Nimina New Delhi-a party hrang hrang aiawhte nen inhmuhkhawm koh anih hnuah Chief Election Commissioner Nasim Zaidi chuan he thu chanchinbumite hmaah a sawi a. he inhmuhkhawm hi EVM leh VVPAT rintlak leh tlakloh chungchangah leh inthlan danphung siam that chungchang sawihona tura koh a ni a.

Pu Zaidi chuan Commission-in political party-te chu tunhnaia inthlanna neih zawh takahte EVM-te khawihchingpen a ni em tih fiahna hun a siam sak tur thu a sawi bawk.

Advertisements
Aside | Posted on by | Tagged , , | Leave a comment

DONALD TRUMP-AN “WIRE TAPPING” A LO TI VE EM NI? FBI HQRS A TLAWH NGAM TA LO !

President Donald Trump chuan FBI Director James D. Comey a ban (fire) hnu lawkah, FBI Hqrs tlawh a tum a thulh. White House a luah hnu Jan 27 khan Comey hi private dinner ei puiah sawmin, chutah chuan Comey chu “Russia” nena inzawma FBI thil chhui mekah a lama tangah sawmin, an inkawmna chu a rukin alo chhinchhiah (secretly tapping) ni a rin theih turin Twitter ah nimin khan a ziak a, hei hian tun hnaia FBI Director Comey ban thut chungchangah boruak a vaw alh phah hluai. Hetianga White House-in Comey nena an inkawmna”tapping” niawm chu Congress ah emaw Senate IntelligenceComtt hmaah pharh tura nawrna a hmachhawn mek.

Sarah Huckabee, White House thupuangtu nu chuan President Trump chuan FBI Director Comey a ban hnuah Washington khawpuia FBI Hqrs chu hun reiloteah a tlawh thuai dawn a ni, a tih hnuah nimin tlai khan White House official-ten pha lehin, tlawh a tum lo tih media-hote an hrilh. FBI office lam hian President Trump hi hlim takin an lo welcome an ring lova, FBI officer hlui thawk tawhlo pakhat chuan “FBI staff te chuan hnung lam an lo chhawn mai theia ni,” tiin kum 2015 a New York City ah police officer 2 kahhlum chungchangah New York Mayor pawh police ten hnung lam an lo chhawn a ni, tiin a tehkhin.

Mizoramah pawh India President lo zin, MZP huaihawtin hman kumah hnung chhawn zawnga hmuah a lo ni tawh a nih kha. FBI Comey ban thut a nih hian nghawng a nei lian chho tan hle.

Comey ban a nih chhan chu Hillary Clinton email scandal chhui chungchangah Dept of Justice lam atanga Dy Attorney General Rod Rosenstein thurawn anga ban thut anga sawi a nih laiin, amah President Trump chuan “Russia chungchang” (this Russia thing) tiin a sawi leh si a. Trump leh Russia sam inphiar zawmna hi a ril hle niin an ngaih phah ta a ni.

Donald Trump chet dan hi 1973 kuma “Watergate Scandal”chungchanga President Nixon a chet dan nen an tehkhin a. Nixon pawh White House ah Attorney General Elliot L. Richardson leh Dy Attorney General William D. Ruckelshus te chu White House ah meeting neih puiin, “Watergate Scandal” chhuitu Special Prosecutor Archibald Cox chu ban turin a ti a, an meeting a thusawi chu a rukin a lo chhinchhiah (tapping) a, anni pahnih chuan Archibald Cox an ban duh loh avangin Nixon chuan Cox chu ama thuin a ban thut a, chumi chu “Saturday Night Massacre” tiin a hmingthang hle a, a hnuah President Richard Nixon chu Congress ah “impeachment” hmachhawn tura tih niin, a hnuah amah chu a bang zui ta zawk a ni.

Adam Schiff, Senior Democrat Senator chuan House Intelligence Comtt-ah, “Mr President (Trump), hetianga “tapes” i tih dan leh Comey i ban chhan hi Congress i hrilhfiah tur a ni” a ti. Elijah Cumming of Maryland state leh John Conyers of Michigan state pawhin “Open Letter” chu White House thawnin, “Tapping chu a dik ngei em tih tih fiah kan phut a ni” an ti. President Trump hian harsatna (hot water) a hmachhawn chho zel dawn niin a lang.

James Clapper, ex-Director of National Intelligence Agency chuan, Jan 27 zanah FBI Director Comey chuan a hna chawlhsan tur vangin thlahna a neih pui thu leh, chum tlai chuan President Trump-an Comey chu private dinner kil puiah a sawm a, hei hi hnial theih a nih loh vangin leh President meuh sawmna chu polite taka chhan a tul si a ni, tiin Trump-an Comey hnenah “Russia nen inzawmna thilah chhui ka ni em?” tih a zawt leh Comey-an thil awm dan a hrilh chu tih miah loh tur niin a sawi. Comey hian Trump bulah chuan, “Nang chu chhui i ni lo” (not under investigation) tih a hrilh a ni.

Tun hnaiah FBI Director Comey chuan ban a nih hmain, Trump Associates leh Russia inzawmna chhui phalna hi Justice Dept-ah Dy Attorney General Ros Rodsenstein hnenah a dil leh a, hei hi Rodsenstein hian duh lovin, Attorney General Jeff Sessions hnenah thu a thlen a, Sessions chuan President Trump hnenah ban tura tihna a ziak ta a, Trump hian hman hmawh takin a ban (fire) thut niin a lang ta ber.

James Comey hian ban a nih lai hian Los Angeles ah FBI staff te meeting neih puiin, TV News lo hretuten “Ban i ni e” an tih an hrilh chuan a awih ngam lova, “Chutiang thil a thlen a rinawm loh” tiin a lo nui mai niin an sawi.

Donald Trump hian Russian billionaire nen kum 3 kalta khan Trump Solo hotel, New York siam nana thawk hovin, Russia rama piang Felix Sater a company “Bayrock” te nen pawh thawk hovin, Bayrock chu Soviet official Terfix Arif ta niin, kum 2008 ah Trump nen an thawk hovin an sawi. Miss Universe Contest 2013 vela a hlep hmuh te pawh tax a pe em tihte chhui a ni. Hetianga Comey ban thut a nih takah chuan mite chuan “FBI is Trumpland” tiin, an koh phah a ni.

Author : Ct Lalrinawma

Aside | Posted on by | Tagged , , | Leave a comment

HLAUHAWM LAWRKHAWM

Tunhma chuan Myanmar ramah hian ramhuai hnathawh thilmak leh titi mak tak tak hi hriat tur a tam țhin khawp mai. Thil thleng thar ni lem lo mah se, in hrang nia an sawi kan lawrkhawm den den teh ang.

1) Chhianthakyi khuaa in hrang.

He thil hi, Finna khawvel chanchinbu chuan August ni 5, 2010 khan he thil thlenna hmun, Pu Do Khan Pau-a te inah kalin thil tak tak a ni chiah em? tih a chhuizui nghe nghe a ni.

Pu Do Khan Pau-a te hi nupa chauhva khawsa an ni a, an in bang chu dapa sak niin, chhuatah pawh a țhen thingphel, a țhen dap chik vuak beh, in lian vak lo a ni a. Nitin khawsak indapchawp an ni a, he an thiltawn mak tak hian tawkfang chu an khawsak a tibuai viau nghe nghe a ni.

Fur khawchhiat lai tak a ni a, zan khat chu chhuat laiah mihring pen ri khauh khauh thawm leh chhuat hiat thawm an hria a, pa ber mu tui lai chu a harh hlawl mai a. Thawm awmna lam chu kawlphekhawnvarin a han en a, mahse, engmah a hmu lo va, mak a ti rilru viau mai a. Mut leh mai tuma a intintuah lai chuan vawilehkhatah in hnuai ațang chuan a kawr hak lai chu a rawn pawt vak vak mai a. Chumi zan chu an hlau hle a ni. A tir lamah chuan khawchhung tlangval awm țha duh lo thiltih ah an han puh deuh va, mahse, chutianga han tipeih tur awm ang an hriat mai loh bakah han rinhlelh tur em em an hriat loh avangin mihring a nih an ring ta lo va.

A tir chuan zan lamah a thawk deuh ber a, zana an vawkchawbel chhuan lai te chu a lo insuan thla leh ngawt zel a. An in chhungah chuan thil mak deuh deuh a thleng ta fo mai a. A rei tak deuh hnu chuan zan lamah chauh ni lovin, chhunah te pawh a thawm an hre thin a ni. Zan lamah chuan sazu chaw zawng ang maiin a thawm a na țhin hle a, chhuara an thil dahte chu a hai thla rum rum thin a, chhunah erawh chuan inleng awm loh laiin lung a rawn vawm lut ur ur thin niin an sawi.

He thlahrang hi a che mak thei khawp mai a, Pu Do Khan Pau-a nupui vawkchaw chan laite hian a chem hman mek leh a kuangkuah chan mekte hi a la sawn a, chhuat laiah a dah daih zel mai a, a huangtau ang reng viau niin an sawi. A chang chuan a thawmhnaw dahkhawmte chu chhuatlaiah a vawm khawm hnur thin a. Thawm engmah nei miah lo hian an bangte hi pawn lam atang a hrut kual vak zel mai a. A rei tak deuh hnu phei chuan hlauh lam ai mahin mak tih lamah a thawk thin a ni awm e.

A chang chuan zana an mut laite hian an tholen chu a rawn keusak hial niin an sawi bawk. A thawm a rawn na tial tial a, a thawm avang hian inah pawh riak ngam lovin, hmun dangahte an han riak ve thin a. Mahse, mak ang reng tak chu, amah Pu Paua chuan, “Hmun danga kan riah pawhin min rawn umzui zel mai a, mu thei lovin min tibuai zui zel a ni” tiin a sawi hial a ni.

He ramhuai chet dan hi khawchhunga pa țhenkhat chuan a tak a nih an ring lo va, fiahah an cho va. Ni khat chu pa pakhat hian a cho va, a inhrosak lai tak chuan ramhuaiin a rawn bei thut mai a, a taksa hmun hrang hrangah a beng vak vak mai a, a khawih sil hle niin an sawi. Amah chotu apiang chu a vel hrep zel a, mahse, an cho loh chuan mi tina zawngin a thawk lem lo niin Pu Pau-a chuan a sawi.

Tum khat chu an huanah hmuh theihin a inlar a. A hmutu an thenawmte chuan, “Fiah tak chuan kan hmu lo va, mahse, feet 2 vela sang, dum ngel ngul, sa tha tak a ni” an ti.

He thlahrang lo chhuahna chhan nia mi tam zawkin an rin dan leh amah Pu Do Khan Pau-a ngeiin a sawi chhawn dan chuan, “Tum khat chu kan nupain kan ramchhuak a, luikam lungpui pahnih inkar ațanga to chhuak changel kung lian zet mai patling pawm khat tia lawih mai hi vawk-chaw atan kan la a, he changel mak em emna pakhat chu patling pawmtia lai chu a nihphungah chuan rit ve tak tur hi a ni a; mahse a zang em em thung a. Chuvang chuan, mi tam zawk chuan he changel leh ramhuai hian inzawmna mak tak an nei ang a, he ramhuai hian a rawn zui haw cheu a ni ang e” min tihsak a ni, tin, thilmak deuh mai chu he ramhuai hi changel kan hawn zan ațang chiahin a lo che ve tan a ni, a ti bawk.

Amah Pu Do Khan Paua chuan he thil lo chhuahna chhan nia a rin chu tihian a sawi a, “Tun hmain, Thingzung miin kan nu hi an lo dawi a, hetianga thil a rawn thlen takah chuan an rawn sut leh a. Zia awm lam chu kan pan deuh va, mahse, kan tha chhuak thei tak tak tawh lo va, khami kalzel kha a ni mai ang em tih ka ngaihtuah thin a, chuvangin, tawngtaipui kan ngai hle a ni” a ti.

He ramhuai hi 2010 July thla vel khan a che deuh ber a, tawngtai mite tawngtaina zarah, 2010, August ni 10 thleng kha chuan thawm a awm tawh lo niin an sawi. Tin, Letpanchaung Emmanuel Nazarene rawngbawltu Rev. C. Lalpekmawia’n Bible a chhiar a, tawngtaisakna a nei bawk a, ramhuai hnathawh chu a bo ta a ni.

2) Ramhuaiin nausen a man.

He thil hi hmanah post ka siam tawh a, kan tharthawh leh hram teh ang. Kan pian ve hma daih a ni a, kan venga thilthleng a ni nghe nghe.

Kum 1982 vel khan kan venga chhungkaw pakhat chuan veng tlabirh deuhah hian in an luah a. A bang dap, a chhuat thingzai rualrem lo zeta remkhawm a ni a. Chumite chuan fapa an nei a, an fapa chu pianphung, hmel leh cheziaah pawh mi pangngai tak mai hi a ni a. Mahse, thil rapthlak leh tihbaiawm tak, mite sawi duh em em chu, an chhungkua ah a lo thleng ta tlat mai a ni. Fur khawchhiat lai tak a ni a, zan khat chu ruah a sur bur bur mai a.

Zanlai, mi mut reh hun lai tak chuan, an naute tap ri-ah, an nupa chuan an thangharh hlawl mai a, mahse, khumah chuan an naute chu a lo awm der lo mai a. In hnuaiah a lo zuk tap vak vak ringawt mai a ni. Chhuat awng a awm si lo va, kawngkhar leh tukverh zawng zawng lah chhung lam atangin an kalh vek bawk si a. Chuti chunga, Nausen, vah pawh la vak sawn hlei thei lo, in hnuaia zuk awm daiha tap ta vak vak mai chu, an nupa chuan mak ti tak leh hlauthawng tak chuan an fapa chu an zuk la a. Amaherawhchu, engemawtia thil hlauhawm tak hriat chhunzawm tur zawng a awm lem lo va; mahse, a ngaihthat thlak ta lo hle a ni.

Zan tin phei zawng ni lo mah se, chutiang chuan an mutthilh hlanin nausen chu in hnuaiah a zuk tap ta fo mai a. An nupa chuan mak an ti bang lo va, an rap lehling viau thin reng a ni. Mahse, mahni rila rah zawng an phatsan phal em bawk si lo va. Engvanga chutianga an naute chu in hnuaia zuk awm ta fo nge tih zawng tu hriat a ni law! Rin dan mai maiah chuan, an fapa nausen kha mihring ni lovin ramhuai nia ngai an awm laiin, thenkhat chuan, ramhuai in in hnuaiah a chawi thla thin niin an ngai ve thung. Tichuan, khawtlanga mi titi tam ber a lo ni ta a.

Mihring pangngai awmphung lo deuha awm thin na nana chu, nat lawk pawh awm lem lovin rei lo teah a thi ta nge nge a. A thih hnu chuan, a thlarau nge, ramhuai ni zawk dawn ni? an bathlara nausen, an fapa ang chiah lo țhu hi mite’n an hmu thin a. an nupa erawhin an hmu ve ngai lem lo. Sawi sep sep a tam tak viau-ah chuan, an nupa beng hial a lo thleng ve ta a. Chutia mahni fate thla hrang anga mite’n an hmu thin chu mi hmai an zah a, an zak angreng thin khawp mai a.

Tlai khat chu, Nausen lo inlar leh lai tak chu a pa chuan a hmu fuh ve ta hlauh mai a. A pa thinrim leh rilru nâ chuan, hreipui a la lawka ‘nang hi min timualphotu i nih hi’ a ti a, cheh hrep tumin a tlan phei a. Mahse, chu naute chu a bo ta daih mai a. Chuta chin chu vawi khat pawh a rawn inlar leh tawh ngai lo a ni. Tun hnua upa hoin an han sawi leh hian, khatih lai khan an in hnuaiah hian sawntlung pawng hi a khat tlat a ni an ti țhin.

3) Falam bialah.

Pu Aichhunga khan Falam biala an awm laia an khuaa thilthleng pakhat a sawi fo țhin.

Ni khat chu chap an hal a, khawtlang a fehchhuak an nih avangin khawchhungah tar leh naupang chumchiap bak an awm lova. Zanriah chhum hun a lo nih chuan, Lungler khua ațanga an khuaa pasal rawn nei raipuar pakhat chu khawlaiah a tlan chiam mai a. Chu nu chu Pu Aichhungate inah a tlanlut a, a khur zawih zawih mai a. Pu Aichhunga chuan “khah, enge ni ta mai, i va thlabar ngai ve,” a han tih chuan, chu nu chuan, “ka nau pai lai hi a rawn țapchhuak a ni, mi rap lutuk,” a ti ta mai a. An țhenawm hnaivaiah chutianga nau buchip chawi an awm mang hauh si lo va, mak an ti kher mai.
Chutiang chuan țum hnih-thum lai mai chu nu naupai lai chu a rawn țapchhuak a, a pasal pawhin a hre ve nghe nghe a.

An mangang chuan tihtlak tumin Thingsai khuaa nauchharthiam an pan a. Mahse an pan ber nauchharthiam chuan ngaihthat lohna tur a awmloh thu a lo sawi avangin an kir leh ta zawk a. Kar lovah chu nu chuan nau a hring ta a.

An nau chu, pianțo fel lo takin a rawn piang a, a kuttin chu, upain “Thlan chhilh tin” an tih ang deuh hian a zungzang hmawr lamah a kawm lut vek mai a, a vawt ngiak reng a, pangti lum a lawi a nei lo an ti. A hringtu ber a nu chuan a hlau ta tlat mai a, a țih luat a hleiah thinthi pawhin a mu ngam lo va, chhun khawengah pawh hnute a pe țha ngam bar love an ti.

Chutiang a nih avang chuan chu nu thla chu vawkin an hualsak a. Nimahse, chumi zan vek chuan an naute chhuat laia an mut chu a bo daih ringawt mai a, tlangvalho chuan meichher nen an zawng huai huai a. Tichuan an khaw daia tuikhur hmunah chu naute chu thiin an chhar a, mak tak maiin a taksa pumah kuttina sihna hnuhma a khat chuk mai a ni an ti. An rindan chuan sih huaiin an sik hlum ta a nih a ring ber.

Heti anga mahni naupai lai rawn țapchhuak hria hi sawi tur an awm fo mai.

4) Zan țihbaiawm.

An hming han thup ve țit țet teh ang. I hriat tawh hnu pawh a lo ni mai thei.

An nupain Mizoram ațangin Burma-ram, Chinhill-ah an pem chho va. Falam lamah mi in luahin an khawsa a. Nupa hlim leh inngeih tak an ni a, piangthar tha tak ve ve an ni bawk a. Amaherawhchu Pathian rawngbawla han chhuak-vak chi chu an ni lem lo va, mahnia țhat țhata țha ve tawp kan tih ang hi an ni ber ang chu.

Fa pakhat an nei a, an fa chu a bawkvak thei lek lek tawh a. An in luah chu tun hma ațang tawha in hrang tia an sawi, mi luah duhloh hi a ni a. Amaherawhchu, mikhual tharlam mai an la ni a, khawhring leh ramhuai an awm ang tihngaihna reng an hre bik lo va. An chheh vela mite erawh chuan, chu in chu an lo thinhrik em em leh an lo țih viau thin kha a ni si a.

Chumi kum chuan malaria a tamin tuihri a hluar hle a, chhung chhunga thi ta te pawh an awm hial a. Zan khat chu, zan dang ang thovin mut dawnah kawngkhar zawng zawng chu țha takin an kalh leh thlap a, khumah chuan engthawl takin an mu tlar leh țhap a. Tholen pawh zarin, thosi a lut ang tih hlau takin an delhkilh vek a, an muhil ta bawrh bawrh a. Zan a lo rei a, nu ber zunchhuak thangharh chuan naute chu a han dap a hmu ta lo va. Tholen lah chu pangngai takin a lo la indelhkilh tha vek bawk si a. Mak ti tak leh ngaihțha lo fein khum ațang chuan a chhuk a.

Mutna lu chunga fâr thing chu a chhi eng a, a han kal phei deuh hlek chu le! an fa nausen chu chhuat laiah a lo thi reng mai a ni. ( a awmdan chu ziaklang lo mai ila) Chutia rapthlak elkhena an naute thi saa a va hmu ta thut mai chu, thimtam zingah a țe tuar tuar a. Chu veleh an pa pawh chu a rawn thangharh ta hlawl a, a va tlan phei thuai a. Ani pawh chuan an naute thihdan chu rapthlak a ti lutuk a, a au nasa mai a. In chhung atang chuan an țhenawmte an au vak vak a, thenawm khawvengte pawh an lo tlankhawm thuai a, kawngka an hawnsak nghal a. Chutia hlau lutuk leh thlabar em em an han hmuh chuan, mak an ti em em mai a. Țhenawm khawvengte pawh chu in chhungah lut ve nghal a, an va en nak chuan, a hmu hmasa apiangte chu an chek tlawk tlawk mai a, a țhen an țe chhuak tuar tuar bawk a.

Kawngkhar kalh vek a, tholen zar thlap leh delhkilh vek pawh engmah khawih danglam awm si lo va nausen chhuata lo thi ringawt mai chu thil dang engmah a ni theiin an ring lova, ramhuai thiltih ni ngeiin an ring ta vek mai a ni. An nupa chuan an hlauvin an thauvah a man a, awmngaihna pawh an hre mang lo hial a. An naute lah thi bawk, an rilru nâ bawk. A hria apiangin an lainat a, mak pawh an ti em em zel a.

Piangthar bulah mah heti khawpa a chet ngam chuan, piangthar lo phei chu a va ngam dawn em!! tiin pa ber chu a inngaihtuah nasa hle a. A hma aia Lalpa thuawih leh țiha ramhuaite ngam loh khawpa Lalpa rawngbawl a tulzia a hriat phah ta hlauh mai a ni. Țawngtaina te hmangin tan an la nasa mai a, an hlauhna zawng zawng pawh Lalpa’n a lak bosak ta vek a. Tichuan, an pa phei chuan Bible chhiar a atchilh a, Bible a chhiar ta tluk tluk a, tunah phei chuan Evangelist hial a ni ta a ni.
Bible a chhiar nasa hle a, ama sawi dan chuan, “Khawvel Bible zawng zawng hi bo vek pawh nise la, Pathian zarah, keiman a ngai ang thlapa ziakin ka siam leh thei ang” a ti hial a. Bible a hre bel hle a ni ngei ang, Vawiin ni thlengin Bible hria-a tiin Chinhill-ah chuan a hming pawh a thang ta hle nghe nghe a, Lalpa rawngbawlin Evangelist a ni ta hial reng a ni.

Author : Andy K Zarzoliana

Aside | Posted on by | Tagged , | Leave a comment

THLAWHTHEIHNA BLACK BOX

Digital Flight data recorder (DFDR), ADR-Accident Data Recorder tih bawk, hi electronic device a ni a, thlawhtheihna electronic system-a electronic instruction pek chhuah leh lâk apiang record-tu a ni. Specific aircraft performance parameters record nan hman a ni. Thlawhtheihna a tlak emaw accident emawa an zawn hmasak ber, data vawnghimtu a ni.
Hei hi “black box” tia hriat làr leh sawi țhin a ni bawk.

Data a record te chu accident investigation, leh air safety issue thil analyze nan te, thlawhna khâwl leh part tlachhia en nân te (material degradation) leh Engine thawh țhat leh țhat loh hriat nan (engine performance) te hman a ni bawk. Hetia a pawimawh em vang hian na tak leh chak taka vuak/khawn chawrh (high speed impact) dâwl zo tur leh meialh laka eng emaw chen him thei (heat of an intense fire) tura design a ni.

Underwater Locator Beacon (ULB) a nei bawk a, tuia a tlak chuan device pakhat, “pinger,” tih chu a activate ta thin a ni. Acoustical signal (37.5 KHz) chu special receiver-a dawn theih turin tuifinriat hnuai 14,000 ft (4,200 m) vela thuk atangin a pe chhuak thin a ni.

A RAWNG:
Tin, Black box tih a ni na a, a rawng hi kàngmei laka him tur (heat-resistant) serthlum rawng lar tak (bright orange paint)-a hnawih chhuah a ni țhin, a chhan chu accident palh pawha hmuh awlsam turin [comment hmasa berah a thlalak 😉 ]. Cockpit voice recorder (CVR) hi a bulah dah a ni țhin bawk a, chu chuan cockpit chhunga pilot-te inbiakna leh thalwhtheihna ațanga ATC inbiakna chi tin reng a record a, a pahnih hian unit khata dah dun a ni fo.

A AWMNA:
A dahna hmun hi thlawhna mei lam [aircraft’s empennage (tail section)]-ah a ni deuh ziah bawk. Hei hi thlawhtheihna a tlak pawha engine puak leh fuel kang laka him nana tih a ni. Airbus A320 series-hovah hi chuan a mei lamah hian ding lam (starboard side)-ah hawn theih kawngkhar tereuhte a awm a, chutah chuan luha downloader hmanga download țhin tur a ni. Chu chu Aircraft Maintenance Engineer hna a ni a, operations department lamah theh luh țhin tur a ni. Hei hi avionics engineer-ho hna a ni na a, keini Mechanical (Engine & Airframe) lam pawhin kan ti ngun hle. Thlawhna nâwt faitute leilawn kan hman țangkai hun lai ber a ni bawk awm e.

A HMING HI:
Science, computing, leh engineering, lamah chuan khâwl emaw, hmanrua emaw, taksa chi khat eng emaw pawh hi a thil dawn/lâk luh leh pek chhuah chauh hriat a, a chhunga a thawh dan tak hriat chian theih si loh a nih chuan ‘black box’ tia sawi a ni. A hna hlen chhuah dan (implementation) chu hriat loh/ thim chhah tak (“opaque/black) ang mai a ni. Hengte hi Black Box tia sawi a ni fo: a transistor, algorithm, mihring thluak.

Aviation bikah hian a hming put dan hi sawi dan hrang hrang dang a awm leh nuk a:
1. Thlalak siamtu thlalak siamna hmun- darkroom an tih ang maia a chhung lam hi a thim/dum a ngai a, recording data corruption ven nan. Chu vang chuan black box tia sawi a ni, an ti.

2. Cold War lai, kum 1950 chho khan a vawi khatna atan thlawhtheihna instrument reading mai ni lo, inbiakna audio thlenga record thei khâwl chu Australia mi David Warren-a’n a siam chhuak a, a rawng a sen lar vât vangin “Red Egg” tia sawi a ni nghe nghe.

Meeting țum khat an neihin journalist pakhat chuan, “Black box mak dangdai leh țha tak a nih hi,” tia a sawi ațanga hman țan nia sawi a ni. He unit hi EMI Minifon wire recorder, kum 1950 chhova West-German manufacturer Protona Monske siam inenthlakna hmanrua (espionage gadget) zulzuia siam a ni nghe nghe.

3. Sawi dan dang leh chu Indopui Pahnihna laia RAF (British Air force)-ho țawng hman uar a ni, tih a ni. Kum 1940-1945 hhung khan electronic khawl thar tam tak thlawhtheihna (a bikin bomber)-ah vuah chhin a ni a, entir nan: Oboe, GEE leh H2S. A hmasa lamho chu kuta siam thîr bâwm, enkhalh (reflection) dâl tura rawng dum hnawih-ah khung a ni hlawm vek a. Hun a vei deuh hnu chuan eletronic khawl thar apaiang chu “box-of-tricks” (mit dawivaih thiamte bâwm) emaw “black-box” emaw tiin an sawi zui ta zêl ni awm a ni.

Author : Samuel Lalrozâma Hmar

Aside | Posted on by | Tagged , | Leave a comment

ZAMPUI MIZO CONVENTION HUAIHAWTIN KAWNG ZAWHPUI NEIH A NI, CM MANIK SARKAR HNENAH NGENNA HRANG HRANG AN THLEN

Zampui Mizo Convention (MC) huaihawt in ‘Kawngzawhpui’ nimin khan Zampui tlangdung(Tripura) a, zofa ten an nei.

He kawngzawhpui (Rally) hi Pu Lalramzauha Sailo, President, Zampui Mizo Convention chuan kaihhruai in Zampui tlangdung khaw hrang hrang atangin mipui thahnem tak an tel. Tripura Sawrkara an thil phut hrang hrang te chu; BDO Office, Vanghmun kaltlangin Tripura CMPu Manik Sarkar hnenah an thlen a ni. He kawngzawhpui hi Behliangchhip atanga BDO Office Vanghmun thleng neih a ni.

Zampui Mizo Convention(MC) ten an demand hrang hrang zingah Zampui tlanga Zofaten Hnam anga an dam khawchhuah theih nan, an beisei thin ber ‘Zampui Autonomous Region(RegionalCouncil)’ chu point hmasa berah dah a ni a, hei bakah hian official name, Lushai tih chu, Mizo tia thlak te, Teacher Eligibility Test syllabus a Mizo subject telh te, Tripoura University a Mizo tawng subject telh te, Agartala DD Programme a Mizo Programme telh te, ramri siam fel, National highway 44-B chhunzawm vat a, chak zawka thawh leh thildang engemawzat an telh a ni.

Author : Vanneihthanga Vanchhawng

Aside | Posted on by | Tagged , , | Leave a comment

Rul Chuk Hi

Rul hi a zirmi leh tui mite tan chuan ngainatawm tak a ni a. A ngaina lotu tan erawh ţihbaiawm tak leh râpawm tak a ni thung a.
India hi khawvela rul chuk vanga thi tamna ber zinga mi a ni a. Indian cobra, common krait, russel’s viper leh saw scaled viper te hi mi chuk hlum hnem ber leh rul tûr nei hlauhawm bera ngaih a ni a. Rul tûr thahna ‘Polyvalent Anti Snake Venom’ pawh hi heng rul 4 te tûr denchhena siam a ni a.

Rul chuk hi keah a awm tam bera, a dawtah kutah a ni a ngaih a ni a. Rul hi chi hrang hrang a tam hle mai a. Vanneihthlak takin mihring tihlum thei khawp tûr nei hi chu tlem tê chauh a ni a.
Rulin mi a chuk hian a hmasa berah chuan hlauhthâwnna a awm nghal a. Na tak leh hrehawm takin ka thi mai ang tih hlauhna a awm nghal fo ţhin. Rulin mi a chukin hlauhthâwn a chiâi nghal tur a ni lo va. Sawi tawh angin rul tûr nei hi tlem tê a ni a, rul tûr nei lo chuk hi a hlauhawm loh va. Rul tûr neiin mi a chuk pawh hian ţhenkhatah chuan a tûr a tichhuak lo fo va, a tûr taksaah a lut lo va, engtinmah an awm lo fo. Miin, “rul chuk ka haw lo” a tih chuan rul tûr nei lovin a chuk emaw, rul tûr neiin chuk emaw pawh ni se, a tûr a chhuak lo tihna a ni ang. Rul tûr nei chuk a huat loh ngawt theih loh.
Taksaa rul tûr a luh tam leh tam loh a zirin a hlauhawm nasa zualin a hlauhawm nêp mai a ni. Rulin tlanchhe paha mi a chuk aiin thinrim taka mi a chuk hian taksaah a tûr a lût hnem zawk niin an sawi bawk a. Tin, rul chuk reng reng chu, a chuktu rul hriatchian a nih loh chuan rul tûr nei anga ngaih tur a ni.

Rul tûr neiin mi a chukin…
# Tawi tê pawh kea kaltir loh tur a ni a, engti kawng zawng pawhin zâwn ngei ngei tur a ni. Hei hi a bik takin kea a chukin a pawimawh hle a ni.
# A rang thei ang bera damdawi in panpui tur a ni. Muanchân loh tur a ni.
# A chukna hmuamhma ţawn khalh loh tur a ni a, thil dang emaw kut emaw a hmeh beh loh tur a ni a. A chukna hmuamhma leh a bul vel zai thî loh tur a ni.
# Rul chukna hmuamhma chu ruh tliak kan enkawl dân anga enkawl tur a ni. A chukna lai kutke tihchêt loh tum hrâm hrâm tur a ni a. Bandage emaw puan emaw a nghet lutuk lova tuama, ţhem dawh tur a ni; ruh tliaka ţhem kan dawh ang hian. Hei hi a pawimawh hle mai.
# I theih dân dânin rul chuk chu thlamuan ang che. A hlauhthâwnna leh chiâina i tihreh kha a pawimawh a ni.

Rul tûr nei chuk lanchhuah dan:
A hmuamhma awmin, a chukna lai a nâ a, a vûng deuh va, a thî bawk ţhin a.
Luakchhuak leh luak, luhai, lunâ, pumnâ, chaklohna leh nguaina a awm thei a.

BP hniam, lungphu mumal lo, khawhmuh fiah lo leh âwma hnawh a awm thei a.

Nguaina, leia hriatna leh hnara rim hriatna danglam, lei hit mem mem, mit men ţhat theihlohna, kutke zawi leh chaklohna a awm thei a.

A nasat chuan ke aţanga zeng ţanin taksa, kut, nghawng leh hmai tihrawlte a zeng ţhin a. Thil lem a har a, ţawng a har a, nghawng ruh tliak ang maiin nghawng tihchar a har ţhin a.
A hmuamhma aţangin thi a chhuak nasa thei a. Hahni thî leh hnar thî a awm thei a. Zun thî, thî khuh chhuak leh vun aţanga thi chhuak a awm thei a, mit aţangin thisen a hnâm chhuak thei hial a ni.

Rul tûr hi chi hnih, lian deuhin a ţhen theih a. Hriatna thazâm khawih chi (neurotoxin) leh thisen khawih chi (haematoxin) a ni a. Tihrawl khawih chhe thei a awm bawk a. Cobra leh krait rul chi hian hriatna thazâm a khawih chhe tlangpui a, viper lam chi- Russell’s viper leh saw scaled viper te hian thisen a khawih chhe tlangpui thung a. Viper lam chi hian thisen a tikhang thei lova, thi pût vak a siam a ni ber a.

20 minutes whole blood clotting time (20 WBCT):
Mihring pangaiah chuan thisen hi engmah pawlh lova dah tawp hian minute 8 aţanga minute 15 inkarah a khang tur a ni a. Rulin a chuka thisen kha lain, glass bur (test tube) thianghlim takah khawih che lovin minute 20 chhung dah ila. Minute 20 chhunga a khang (coagulate) loh chuan viper rul chuka ngaih a ni tlangpui a. Rul tûr thahna, Anti Snake Venom (ASV) pêk a ngai tlangpui ţhin a ni.

Mizorama mi chuk tam ber chu rultuha hi a ni âwm e. Tin, Mizorama rul chuk vanga thihna thlentu tam ber hi khuavang rul chuk vanga thihna hi a ni maithei bawk a ni.

Rultuha:
Rultuha hi a sap ţawng chuan ‘Bamboo pit viper’ a ni a. A chunga kan tarlan tawh angin viper chi a nih avangin a tûr hi thisen khawih chhe chi a ni a. Rul che muang tak a ni a, hnim, sazu kua leh lungrem karahte a awm duh hle a. A rawng hi a hring a nih avangin hnim zinga a awmin khawih palh leh rah palh hlauhawm tak a ni a, a mei a uk ţhat bawk a. Sazu leh rannung dangte a ei ţhin a, zana chaw zawng chi a ni.

Khuavang rul:
Khuavang rul hi a sap ţawng chuan ‘greater black krait’ a ni a. Krait rul chi a nih avangin a tûr hian hriatna thazâm a khawih chhe ţhin a. Tihrawl a khawih chhe thei bawk a, a tûr hian kal a khawih chhe thei a ni. A rawng hi a dum tle lam niin a dul lam hi a eng emaw a var paw lam emaw a ni tlangpui a ni. Sazu leh rul dang a ei ţhin a, zana chaw zawng chi a ni a. Tihbuai loh chuan mi a chuk zen zen lo va, a chukna hmuamhma hi a tirah a nat lêm loh avangin hriat loh emaw ngaihthah emaw a ni fo ţhin a ni.

Mizorama rul tûr nei dangte chu Chawnglei (banded krait), Chawngkawr (cobra), Rulmuk (mountain pit viper), Rulngan (king cobra), Rul Nghawngsen (red necked kneel back) leh Rul-ţhi-hna (maclands coral snake) te hi a ni a. Heng lo pawh hi rul tûr nei dang a awm thei ang a. Rul tûr nei chuan ngho an nei tlangpui a ni.

Rul hi mihring tan ţangkaina tam tak a awm ve a. Sawi tawh angin rul tûr nei chi hi chu tlem tê a ni a. Rul hian mihring a bei ngawt ngai lo va. Thah emaw khâwi emaw tum vanga kan va khawih emaw rah emaw hian mahni invên nan min lo chuk ta ţhin a. Rah palh emaw khawih palh emawin min chuk ţhin bawk a. Rul chanchin zir mi, mi thiam kan nih loh chuan eng rul mah hi khawih mai mai loh tur a ni a. Rul kan that dawn a nih pawhin hmawlh sei tak hman tur a ni.

Rul hian a tûr hi chaw zawn nan a hmang ber a, a ţul hunah mahni invên nan a hmang ţhin bawk a. Rul hmangaih viau emaw huat viau emaw hi a ţul lo va. A nun dânin lo nung ve mai mai se la, rul hmuh apiang thah tum ringawt zel hi thil ţul lo tak niin ka hria.

Author : Lalkhawngaih Sanga

Aside | Posted on by | Tagged , , | Leave a comment

Rul Chuk Hi

Rul hi a zirmi leh tui mite tan chuan ngainatawm tak a ni a. A ngaina lotu tan erawh ţihbaiawm tak leh râpawm tak a ni thung a.
India hi khawvela rul chuk vanga thi tamna ber zinga mi a ni a. Indian cobra, common krait, russel’s viper leh saw scaled viper te hi mi chuk hlum hnem ber leh rul tûr nei hlauhawm bera ngaih a ni a. Rul tûr thahna ‘Polyvalent Anti Snake Venom’ pawh hi heng rul 4 te tûr denchhena siam a ni a.

Rul chuk hi keah a awm tam bera, a dawtah kutah a ni a ngaih a ni a. Rul hi chi hrang hrang a tam hle mai a. Vanneihthlak takin mihring tihlum thei khawp tûr nei hi chu tlem tê chauh a ni a.
Rulin mi a chuk hian a hmasa berah chuan hlauhthâwnna a awm nghal a. Na tak leh hrehawm takin ka thi mai ang tih hlauhna a awm nghal fo ţhin. Rulin mi a chukin hlauhthâwn a chiâi nghal tur a ni lo va. Sawi tawh angin rul tûr nei hi tlem tê a ni a, rul tûr nei lo chuk hi a hlauhawm loh va. Rul tûr neiin mi a chuk pawh hian ţhenkhatah chuan a tûr a tichhuak lo fo va, a tûr taksaah a lut lo va, engtinmah an awm lo fo. Miin, “rul chuk ka haw lo” a tih chuan rul tûr nei lovin a chuk emaw, rul tûr neiin chuk emaw pawh ni se, a tûr a chhuak lo tihna a ni ang. Rul tûr nei chuk a huat loh ngawt theih loh.
Taksaa rul tûr a luh tam leh tam loh a zirin a hlauhawm nasa zualin a hlauhawm nêp mai a ni. Rulin tlanchhe paha mi a chuk aiin thinrim taka mi a chuk hian taksaah a tûr a lût hnem zawk niin an sawi bawk a. Tin, rul chuk reng reng chu, a chuktu rul hriatchian a nih loh chuan rul tûr nei anga ngaih tur a ni.

Rul tûr neiin mi a chukin…
# Tawi tê pawh kea kaltir loh tur a ni a, engti kawng zawng pawhin zâwn ngei ngei tur a ni. Hei hi a bik takin kea a chukin a pawimawh hle a ni.
# A rang thei ang bera damdawi in panpui tur a ni. Muanchân loh tur a ni.
# A chukna hmuamhma ţawn khalh loh tur a ni a, thil dang emaw kut emaw a hmeh beh loh tur a ni a. A chukna hmuamhma leh a bul vel zai thî loh tur a ni.
# Rul chukna hmuamhma chu ruh tliak kan enkawl dân anga enkawl tur a ni. A chukna lai kutke tihchêt loh tum hrâm hrâm tur a ni a. Bandage emaw puan emaw a nghet lutuk lova tuama, ţhem dawh tur a ni; ruh tliaka ţhem kan dawh ang hian. Hei hi a pawimawh hle mai.
# I theih dân dânin rul chuk chu thlamuan ang che. A hlauhthâwnna leh chiâina i tihreh kha a pawimawh a ni.

Rul tûr nei chuk lanchhuah dan:
A hmuamhma awmin, a chukna lai a nâ a, a vûng deuh va, a thî bawk ţhin a.
Luakchhuak leh luak, luhai, lunâ, pumnâ, chaklohna leh nguaina a awm thei a.

BP hniam, lungphu mumal lo, khawhmuh fiah lo leh âwma hnawh a awm thei a.

Nguaina, leia hriatna leh hnara rim hriatna danglam, lei hit mem mem, mit men ţhat theihlohna, kutke zawi leh chaklohna a awm thei a.

A nasat chuan ke aţanga zeng ţanin taksa, kut, nghawng leh hmai tihrawlte a zeng ţhin a. Thil lem a har a, ţawng a har a, nghawng ruh tliak ang maiin nghawng tihchar a har ţhin a.
A hmuamhma aţangin thi a chhuak nasa thei a. Hahni thî leh hnar thî a awm thei a. Zun thî, thî khuh chhuak leh vun aţanga thi chhuak a awm thei a, mit aţangin thisen a hnâm chhuak thei hial a ni.

Rul tûr hi chi hnih, lian deuhin a ţhen theih a. Hriatna thazâm khawih chi (neurotoxin) leh thisen khawih chi (haematoxin) a ni a. Tihrawl khawih chhe thei a awm bawk a. Cobra leh krait rul chi hian hriatna thazâm a khawih chhe tlangpui a, viper lam chi- Russell’s viper leh saw scaled viper te hian thisen a khawih chhe tlangpui thung a. Viper lam chi hian thisen a tikhang thei lova, thi pût vak a siam a ni ber a.

20 minutes whole blood clotting time (20 WBCT):
Mihring pangaiah chuan thisen hi engmah pawlh lova dah tawp hian minute 8 aţanga minute 15 inkarah a khang tur a ni a. Rulin a chuka thisen kha lain, glass bur (test tube) thianghlim takah khawih che lovin minute 20 chhung dah ila. Minute 20 chhunga a khang (coagulate) loh chuan viper rul chuka ngaih a ni tlangpui a. Rul tûr thahna, Anti Snake Venom (ASV) pêk a ngai tlangpui ţhin a ni.

Mizorama mi chuk tam ber chu rultuha hi a ni âwm e. Tin, Mizorama rul chuk vanga thihna thlentu tam ber hi khuavang rul chuk vanga thihna hi a ni maithei bawk a ni.

Rultuha:
Rultuha hi a sap ţawng chuan ‘Bamboo pit viper’ a ni a. A chunga kan tarlan tawh angin viper chi a nih avangin a tûr hi thisen khawih chhe chi a ni a. Rul che muang tak a ni a, hnim, sazu kua leh lungrem karahte a awm duh hle a. A rawng hi a hring a nih avangin hnim zinga a awmin khawih palh leh rah palh hlauhawm tak a ni a, a mei a uk ţhat bawk a. Sazu leh rannung dangte a ei ţhin a, zana chaw zawng chi a ni.

Khuavang rul:
Khuavang rul hi a sap ţawng chuan ‘greater black krait’ a ni a. Krait rul chi a nih avangin a tûr hian hriatna thazâm a khawih chhe ţhin a. Tihrawl a khawih chhe thei bawk a, a tûr hian kal a khawih chhe thei a ni. A rawng hi a dum tle lam niin a dul lam hi a eng emaw a var paw lam emaw a ni tlangpui a ni. Sazu leh rul dang a ei ţhin a, zana chaw zawng chi a ni a. Tihbuai loh chuan mi a chuk zen zen lo va, a chukna hmuamhma hi a tirah a nat lêm loh avangin hriat loh emaw ngaihthah emaw a ni fo ţhin a ni.

Mizorama rul tûr nei dangte chu Chawnglei (banded krait), Chawngkawr (cobra), Rulmuk (mountain pit viper), Rulngan (king cobra), Rul Nghawngsen (red necked kneel back) leh Rul-ţhi-hna (maclands coral snake) te hi a ni a. Heng lo pawh hi rul tûr nei dang a awm thei ang a. Rul tûr nei chuan ngho an nei tlangpui a ni.

Rul hi mihring tan ţangkaina tam tak a awm ve a. Sawi tawh angin rul tûr nei chi hi chu tlem tê a ni a. Rul hian mihring a bei ngawt ngai lo va. Thah emaw khâwi emaw tum vanga kan va khawih emaw rah emaw hian mahni invên nan min lo chuk ta ţhin a. Rah palh emaw khawih palh emawin min chuk ţhin bawk a. Rul chanchin zir mi, mi thiam kan nih loh chuan eng rul mah hi khawih mai mai loh tur a ni a. Rul kan that dawn a nih pawhin hmawlh sei tak hman tur a ni.

Rul hian a tûr hi chaw zawn nan a hmang ber a, a ţul hunah mahni invên nan a hmang ţhin bawk a. Rul hmangaih viau emaw huat viau emaw hi a ţul lo va. A nun dânin lo nung ve mai mai se la, rul hmuh apiang thah tum ringawt zel hi thil ţul lo tak niin ka hria.

Author : Lalkhawngaih Sanga

Aside | Posted on by | Tagged , , | Leave a comment

India Film star te hlawh

Tunlai vai film hit em em, Baahubali 2 chuan April 28 a an release atang khan Rs 10 billion ($156 million) zet a lalutin record a rawn siam nual mai a. India film industry sum chevel hi a turu khawp mai. He film a a changtupa Prabhas pawh hian Rs vaibelchhe 25 zet a hlawh.

Prabhas hian Kum 2018 a chhuak tur Saaho chu a chang leh nghal dawn a. Baahubali 2 ah a chet that em vang hian Rs. vaibelchhe 30 hlawh a phut tawh niin sawi a ni.

Prabhas hian film lamah hma a sawn hle nachungin India top star te a la thlau hle a, india film star te hlawh hi a neplo hlawm hle. Film pakhata an inchhiar dan.↓
Salman Khan – 60 crores (Amah hian a produce fo avangin a sum lakluh a sang.).
Aamir Khan —– — 55-60 crores
Shah Rukh Khan- 40-45 crores
Hrithik Roshan – – 40-45 crores
Akshay Kumar — Rs 35-40 crore ( a release tam hrim hrim a, a hlawh hnem hman thin hle.)
Ajay Devgan – – — 25-35 crores
Ranbir Kapoor- — 20-25 crores
Amitabh Bhachan- 18-20 crores
Ranveer singh – – 15-20 crores
Shahid Kapoor— 15 crores
Saif Ali khan– – — 7-10 crores

Hmeichhe lam hlawh/inchhiar pawh hi neplo tak a ni.
Kangana Ranaut—- Rs 10-12 crores
Deepika Padukone- Rs 8-10 crores
Kareena Kapoor—- 7 crores
Priyanka Chopra – — 6 -7 crore
Anushka Sharma – –5 crores

Aside | Posted on by | Tagged , , | Leave a comment

US MILITARY “SECRET PLANE” HIM TAKIN NI 700 HNUAH LEIAH A LO TUM

US military experimental X-37B space plane chuan ni 700 zet van boruakah thil chi hrang hrang, technolgy lam an han enchhin hnuin, him dam takin Sunday zing 7:47am ET khan Florida state ah a lo tum a, hetianga tum ri hi a bengchheng nasa (sonic boom) hle a, State pum pui deuh thawin an hria a ni awm e! He X-37B hian enge a han tih an sawi duh lova, “secretive programs” enchhin vek niin US military/air forces chuan an puang. X-37B hi Orbital Test Vehicle ti pawhin an sawi bawk thin.


Space Shuttles lo tum thinna hmun, Vandenberg Air Force station, California state ah vawi 3 chu a lo tum tawh a, a vawi 4na chu Cape Canaveral air force station, Florida state ah a tum daih a ni. He X-37B space fleet an tih hi 29ft a sei a ni. Air Force Rapid Capabilities Office chuan enge anhan tih hi a sawi duh lo. He X-37B space plane hian Orbit ah enge a tih hi thuruk a nih vangin, an inrin siak lai laih a ni. Ni 700 zet an han khawsa si a, eng tak han ti ang maw?!

United Launch Alliance an tih US military ralthuam siamtu Lockheed Martin leh Boeing company tang dun siam a ni. A vawikhatna atan April 2010 ah kah chhuah niin, thla 8 zet van boruak thiang leh zau takah khian an awm a, a vawihnihna chu March 2011 ah kahchhuah leh niin, thla 15 an han khawsa a, a vawithumna chu Dec 3,2012 ah khan kah chhuah niin, thla 22 zet an han khawsa a, a vawi 4na erawh chu May 2015 ah kah chhuah niin, Ni 700 zet an han awm a ni. US chu America a lo ni nge nge e!

Author : Ct Lalrinawma

Aside | Posted on by | Tagged , , | Leave a comment

ISUA I TAN THU PUANG RAWH by DL Moody

Rom 10:10 Miten thinlungin an ring a, felna an hmu thin a; kain an tan a, chhandamna an hmu bawk thin a ni.

Ireland rama rawng kan bawl tumin tlangval pakhat hi Pathian nen an intawk hlauh mai a, mahse a pianthar hnu ni thumna thlengin chhandamna kawnga zawhna neite tana buatsaih pindanah chuan ka la hmu ta tho mai a. “Harsatna i nei em ni?” tiin ka zawt chuan, “Hman zan khan hre chiang mang hlei lo va ka inhlan nghal vut vut vang kha a ni ang keimahah hian danglamna engmah a awm thei tlatlo mai.” a ti ta a. Kei chuan, “Khatianga i inhlan nghal kha a chhan a ni lo. Isua i tan thu i la puanchhuah loh vang zawk a ni.” tiin ka lo hrilh a. Chu thu a hriat rual rual chuan mak a tih em avangin a zuang lo chauh a ni.
“Engtin nge chu chu i hriat? Tu nge hrilh che?” tiin min zawt let ta vat a,
“Tumahin min hrilh lo. Min hrilh pawh ka ngai hek lo. Miin Isua a pawm tawh hnu lawka rinhlelhna a neih leh chuan Isua a tan thu a lo la puanchhuah loh vang a ni.” tiin ka lo chhang a.
Chu veleh, “I sawi dik khawp mai. Ringtu tha tak, ka nu nen chauha khawsa kan ni a. Kha mi zan khan in ka thlen veleh Kristianah ka inpek thu ka nu ka hrilh ang tiin ka ngaihtuah zeta mahse ka rilru chuan a ngam ta tlat lo. Tichuan naktukah ka hrilh mai ang tiin ka ngaihtuah leh ta a, mahse ka hrilh leh ta chuang lo. A chhan chu a tuka chauh ka hrilh chuan ‘ngatinge nizanah min hrilh loh’ a tih ka hlauh vang a ni.

Ka rilrua lo awm chu, ‘Pawisa chhar ta ila ka nu hnenah ka hrilh nghal vat dawn a. Tunah Isua nen kan intawk a, chatuan nunna ka nei tawh sia, engvangin nge ka ngawih tlat mai le, hriat sual eng nge maw a awm a ni ang. ‘Kei hi ka piangthar tak tak lo a ni ang, piangthar tak tak chu ni ila Isua ka tan thu ka puang chhuak nghal em emang’ tiin ka ngaihtuah ta a ni.” tiin min hrilh a.
Kei chuan, “Ka thian, tunah hian sualin a thlem lo che a, mahse a lo thlem tawh zawk che a ni. Hmelmapa chuan a game ngai bawk hmangin Pathian thu awih lo turin a bei tan tawh der che a nih hi.” ka ti a.

Tichuan chhandamtu hnenah a tharin a inhlan nawn leh ta a, a nu hnenah Isua nen an intawh thu hrilh turin a haw ta a ni.

A tuk zana kan inhmuh chuan, “Tunah eng nge i an tawh le?” tia ka zawhna chu hlim tak leh nui sang chung hian, “ Ka nu chu ka hrilh tawh e” a ti a.

Author : Melvyn Vanlalhlimpuia

Aside | Posted on by | Tagged , | Leave a comment