Hunthar veng lei tawlh vangin Chhungkaw thenkhat thiar chhuak.

Aizawl Hunthar venga National High Way 54 tlak hniamna chung zawn chu August 22 thleng khan a la chim belh a, hei vang hian chhungkaw 30 sawnchhuah an ni tawh a, vawiin ah chhungkaw 2 sawnchhuah an ni leh ang.

An veng Branch YMA President Pu Rohmingthanga hnen atanga thu dawn danin vawiin thleng khan Mihring chenna in 7 thiah a ni tawh a, harsatna tawk chhungkua te hi hmun hrang hrangah insuanchhuahpuian ni a, sorkar ruahmanna angin, Lawipui-a sorkar insakah an awm phalsak an ni a, chenna in rauhsan te awm duh leh duh loh hi YMA lamin an zawtfiah dawn a ni.

Nimin khan Home Minister Pu R Lalzirliana, DM & R MinisterPu C Ngunlianchunga,Health Minister Pu Lal Thanzara bakah official engemawzatin helai lei chetna hmun hi an tlawh a, in thiah tak neitute hi sorkarin zangnadawmna cheng nuai 1 & 1900 a pe dawn a ni.

He leimin hian National Highway a hnawhpin loh nan lei tawlh te chu paih fai nghal zel a ni a, amaherawhchu lirthei chevel erawh nasa takin a khaihlak phah a, nimin ah tum 2 a min leh avangin kawngpui then hna pawh hi a hautak hle tih kan thudawnna chuan a sawi a ni.

Puan tawh angin chhungkaw 50 vel chenna khi chu a zau zel a. Hunthar venga National High Way 54 tlak hniam thinna chung zawn ram zau takah lei min, khi leh lei che hi a awm avangin chhungkaw 50 vel chenna hmun chu him tawk lova ngaih a ni a, YMA hruaitute sawi danin lei tlakhniamna hmunah hian tuitai put chhuak a awm reng a, amaherawhchu hei hi tunhnai atang khan a tlem deuha, a tlemna chhan hi leihnuai lamah a relhru nia rin a nia, hei hian ngaih a tithalo zual a ni.

Hetihlai hian, nimin dar 8:40 vel khan Lawngtlai Chanmary venga Pu Vannawlthanga In Assam Type chhungkaw pathum luahlai chu a chim a, Inchim vang hian Pi Tialdimi kum 58 chuan hliam a tuar a Lawngtlai District Hospital ah hruai nghala ni a, ngaihtuahawm erawh a nilo.

Vanduaina tawkte chhawmdawl hna hi Chanmary khawtlang chuan an thawk nghal a, In chimna hmun hi bialtu MDC Pu Lalsawmzuala chuan a thutchilh a, Lawngtlai DC Dr. A.Muthamma leh Lai Autonomous District Council a Chief Executive member Pu VL Hmuaka te pawn helai hmun hi tlawh nghal in, Sorkar atanga chhawmdawlna awm thei tur te ngaihtuahsak an nih tur thu an a sawi.

Nihnih chhung Lawngtlai a ruah a sur nasat deuh vangin khawpui chhung ah leimin hmuh. tur a awm nual tih kan corr chua a sawi a, Lawngtlai-III leh AOC Veng ah te kawngchhak min vangin In pahnih chu dinhmun hlauhawm ah a awm mek bawk a ti.

Aside | Posted on by | Tagged , , , | Leave a comment

Prism in POLICY MUMAL NEI LO-AH Sorkar an PUH

AUTHOR : Dingdi
  • Olympic ah Mizo awm lo.
  • Prism in Sport Policy an vei.

PRISM President Pu Vanlalruata chuan “Sorkar hian Policy mumal a nei lo,” a ti.

Nimin August 22 Prism Conference Hall-a Bengvar Inkhawm neihah Pu Ruata chuan, “Kum 2010 chho atangin 2016 Rio Olympic-ah Mizoram a\angin infiammi tirh ve ngei an tum thu an aupui dum dum a. 2016 Rio Olympic hun a lo thleng a. Infiammi pakhat pawh Mizoram Sorkar hian a tir lo. Mizoram Sorkar hi policy-ah a hlawhchham a, Olympic vision-ah phei hi chuan a hlawhchham chiang hle. Hei hi chhan dang vâng ni lovin Sorkar hian policy mumal a neih loh vâng a ni a ti.

Prism hotupa chuan, Olympic Vision 2016 nei a, 2016 Rio Olympic-a Mizo infiammite tirh ve ngei an tum thu 2010 chho a aupui tu khan, hmanni lawk June ni 23, 2016 khan Mizote Olympic a kan tel ve theih dan tur an ngaihtuah ve leih leih chauh a ni.

Sorkarin policy mumal sawi tur anneih lohna chhan hi Party-in policy an neih loh vâng a ni a. Inthlan hmain an party thiltih turhrang hrang an ziahna, mipui hmaa an inzawrhna leh tiamkam, manifesto tak ngial pawh hi an ngaipawimawh lo hle. PRISM-in ram leh hnam hmakhaw ngaihna avângin uluk takin kum engemawzat kan lo enzui pui tawh thin a, mi an huat phah lek lek zawk fo a, a beidawnthlâk thei hle a ni.” a ti.“Hetiang a nih lai hian 2008 MLA inthlan dawna an manifesto-ah khan Sports Policy siam an tiam a. Tha taka bawhzui anga langin hun reilote chhungin policy an duang (draft) zo thuai a, mahse, 2013 inthlan dawn thlengin he policy hi pass chu sawi loh, Assembly House-ah pawh an pharh lo.2013 inthlan dawna an manifesto-ah phei chuan sports policy hi an ziak lang ngam tawh lo hial a ni. A lan danah chuan policy mumal tak neia awmze neia hmalak aiin policy nei lova an duhsak zawngte duhsak theiha kal mai mai hi kan sorkar neih tawh te duh dan niin a lang ber. Hetiang a nih avang hian PRISM hian sorkar tha a awm theih nan hma kan la vak mai dawn nge? Midang hmalakna ngaichangin kan lo ngawi dawn? tih hi kan ngaihtuah mêk a ni,” a ti bawk.

Bengvar Inkhawm hi Lalrinzuala Chawngthu General Secretary i/c Political Affairs-in a kaihruai a, S.Vanlalpekropuia,Executive Member-in hunserh hmangin, Pu Lalthuamliana’n Secretary report a pe thung a ni.

Aside | Posted on by | Tagged , , , | Leave a comment

Assembly session nei dawn

Mizoram Legislative Assembly Session chu tun thla ni 30 khian an thukhawm dawn a,Session thutkhawm kohna hi Governor chuan vawiin khan a siam a, he session hi constitution siamthat tum 122-na bill, tunhnaia Parliament in hnihin a lo pass tawh state Assembly tenan pawmpuina tur a ni a, constitution siamthatna hi pawm a hman theiha siam anih hunah sorkar laipuiin chhiah a lak dan siamthatna tur GST bill chu pass leh tur a ni ang.

Hemi bakah hian Transport dept in road tax pek dan chungchanga ordinance tunhnaia a siam Assembly in a pawmpuina tur a ni dawn bawk a, session rei zawng tur hi Speaker Pu Hiphei-a hova Business Advisory Board tun thla ni 24-a an thutkhawm hnuah chauh hriattheih a ni anga, session programme kimchang duan a ni dawn a ni

Aside | Posted on by | Tagged | Leave a comment

Lengpui Airport-ah Dengue vei leh vei loh endik tan

AUTHOR : Dingdi
  • Japanese ancephalitis veng lawk.
  • Dengue natna check mek.
  • Dengue natna ti darh tu

Assam leh West Bengal-ah ah Dengue natna a len nasat avangin Lengpui thlawhna tum hmunah he natna vei leh veilo endikna neih tan a ni.

Integrated Disease Surveillance Program (IDSP)-a State Nodal Officer Dr Pachuau Lalmalsawma hnen atanga thudawn danin Dengue natna vei rin-hlelh lo endik hna hi kar hmasa laihawl vel atanga khan tih tan a ni a. State pawn atanga lo let leh pakhat chu a vei tih hmuh chhuah a ni a. Mizoram chhungah chuan rinhlelh mi 115 thisen endik tawhah pakhat chuan Dengue a vei tih hmuhchhuah a ni a; mahse tunah chuan enkawl dam a ni tawh a. Aizawl leh Lunglei Civil Hospital te chu Dengue vei leh veilo endikna hmun Sentinel Surveil-lance atana puan a ni a, mithiamin an thut chilh bakah he natna vei hmuhchhuah theihna hmanrua dah a ni.

Dr Pachuau Lalmalsawma chuan Dengue natna pu darhtu thosi seh avang hian hun reilote chhungin chhungkua pawha vei mai theih a nih avangin a darh chak thei hle a ni, a ti a. Chutih laiin Mizorama vei an hriat chhuah tawh chhun chu a hlauhawm lo chi a nih thu National Vector Borne Disease Control a thawkte chuan an sawi a. Enkawl dam pawh an awlsam niin an sawi.

Assam-ah hian tunhnai-ah Dengue vei hi mi 458 hmuh chhuah an ni tawh a ni.Hetihlai hian state thenawm Manipur-a leng mek Japanese Encephalitis natna chu Mizoramah-ah vei an awm thu hriat a la ni lo niin IDSP hotute chuan an sawi a. Rinhlelh endik zingah vei hmuh chhuah an la awm lo chungin inringhlelte chuan inentir vat a pawimawh an tih thu an sawi.

JE tia an sawi he natna hi vawkin a pai a, natna hrik pai vawk chu thosi chi khat Culex in a seha mihring a seh lehin mihring in a vei ta thin a. Manipur atanga vawk lakluh loh chuan Mizoram chu a him thei-a an rin thu an sawi bawk a ni.

Aside | Posted on by | Tagged , , | Leave a comment

UNION MINISTER-IN PASALTHA KHUANGCHERA HRIATRENGNA LUNGPHUN A TLAWH

  • Khuangchera Lungphun tlawh.
  • Ailawng ah Khuangchera lung.
  • Khuangchera lung ziak.

Union Minister of State for Railways Rajen Gohain chuan August 19 chawhma dar 9:30 khan Khuangchera hriatrengna Lungphun Ailawng khuaah a tlawh a,a thlanah zahna chibai bukin pangpar a dah.

Union Minister chuan Khuangchera hriatrengna lungphunah thutawi sawiin Mizote hnam pasaltha chu a ngaisan thu a sawi a, Pasaltha Khuangchera’n British te lo do a, Mizo hnam tana a nunna a hlan chu a ngaihhlut thu leh a ngaihpawimawh thu a sawi bawk a ni.

Union Minister chuan Khuangchera hriatrengna turin Ailawng khuaah Khuangchera hminga chawlhbuk emaw Khuangchera hriatrengna tur thil engemaw ber siam a nih theih nan ruahmanna siam turin Sorkar laipui hotu te hnenah thlen tur thu a sawi bawk.

Khuangchera Memorial Society Chief Patron Prof.Laltluangliana Khiangte, Head of Department (Mizo), Mizoram University chuan Pasaltha Khuangchera a buaipui chhoh dan sawiin, a chanchin drama a ziah chu India ram mipui tam zawkin an chhiar theih nan Hindi-a tih chhuah a nih thu a sawi a, “hei hi a lo hlawk hle a, heta tang hian thil kal dan hi a lo danglam ta a ni” a ti.

Khuangchera hriatrengna lungphuna thu inziak ‘Duty Nobly Done Famous Mizo patriot A martyr for his Country Mizo/Indian Freedom Fighter’ tih ziak a nih chhan a sawifiah bawk.

Union Minister of State for Railways Rajen Gohain leh amah tawiawm tu te hi hi Ailawng khawtlangin a khawnawt in an lo hmuak a, Khuangchera Hall-ah thingpui inpuina hun an hmang bawk.

Union Mininster in Khuangchera hriatrengna lungphun officiala a tlawh tur hi zirlai pawl pahnihin thulh tura an ngen angin offical-in he hun hi hman a ni lova, Zirlai pawl pahnih MZP leh MSU hruaitu thenkhat te pawh Union Minister in a sawmna angin Ailawng khuaah hian an kal a, boruak duhawmlo thleng a awm lo.

Aside | Posted on by | Tagged , , | Leave a comment

Hunthar veng ah lei tlahniam

Aizawl Hunthar venga lei tla hniam avangin chhungkaw 12 te chuan an in luah lai chhuahsanin khawtlangin an bungrua an thiar chhuah sak tawh.

Hunthar Veng YMA huaihawtin an veng Lei khi leh lei tlahniam avang hian August 19 khan nileng hnatlang neiin, chhungkaw in 10 Bungrua an thiar chhuak niin Hunthar Veng YMA President Pu Rohmingthanga chuan a sawi a. A hma hian chhungkaw chennaIn hnih an lo thiar chhuak tawh a, vawiin thiar chhuah hnatlangrunpui an neih nen chhungkaw luahlai In 12 te bungrua an thiarchhuak ta a ni. An hriat theih chinah lei khi hi tlemin a zau belh niin Pu Rohmingthanga chuan a sawi a. Tunah hian kawngpui chhaklam a Baptist Biakin pawh a derthawng hle niin a sawi a, ruahman dan chuan Thawhtanni lamah hnatlang hi chhunzawm leh tur a tih a ni.

Hunthar Venga lei tlahniam ṭhin kawngpui chhak lamah tun hnaia ruahsur vangin zau takin lei a khi a; hei vang hian in pahnih ṭhiah tawh a ni a. Ruah bawhawk sur zui zel avangin lei khi hi a zau deuh deuh nia sawi a ni a. Lei khi huam chhungah hian chhungkaw 50 vel an awm niin an sawi a, riak chhuak lote pawhin ruah sur zan chuan mutmu an tuah meuhlo nia thudawn a ni a.

Lei khîkna hmun hi Aizawl Bawrhsap aiawhte leh Disaster Management & Rehabilitation (DMR) department hotute’n an enfiah tawh a; lei khî khuhna tur silpauline eng emaw zat leh tuihâwk paihna tur tuidawt an pe a ni.

Disaster Management and Rehabilitation Director Pu C. Lalpeksanga chuan leikhi avanga inthiar chhuah ngai, mahni chhungte belh tur neilo tan UD and PA department-in mirethei chenna in tura an sak chu ruahman a ni a. Helai-a lei che leh leikhi zel tur venna atan hian Detailed Project Report siam turin National Disaster Management Authority chuan Mizoram sorkar a hriattir a.

Chumi atan chuan vawiin Thawhtanni hian Shillong-a Geological Survey of India atangin mithiam an lokal dawn a. Anni hian kar khat chhung velin report an peih hman beisei a ni .

Aside | Posted on by | Tagged , , | Leave a comment

KA FAPA LALRINPUIA

Ka fapa ruang kan inchhunga an rawn zawn lut lai chu ka lo en reng a, ka awmdan ber pawh ka sawi thiam lo ka chawmawlh vek, aruang chu khumah an han zalh a, apang ka deh chuan ala lum deuh thar thar a. Ka fapa ruang chu an tah luai luai a, kei erawh ka tap thei reng reng lo. Ka awma min hnawhtu chu chhuak se ka tah theih ka ring.

Ni e, nichin chawhnu inkhawm lai khan a chhuak a, “Chhuak la,lo let tawh suh, nang ang misual hi kan mamawh lo chhungkaw chawk buaitu mai i nih hi” ka tih kha maw le !. En teh u hei ka fapa hian ka ti tak tak e maw a ti aniang!!!

Kan fa te hi an vaiin paruk an ni a, a Upa berah hmeichhia kan nei a, chumi dawtah a inzawn zat in mipa pathum kan nei leh a, a pangana tur ka pai leh chuan hmeichhia ni ve leh tawh se kan tih em em laiin Lalrinpuia hi a lo piang leh a, tichuan achhang chiah erawh kan duhthusam angin hmeichhia a ni thung.

A naupan lai zawng zawng khan naupang sual a nih ka hre ngai lo. Thu a awih em em a, a u mipa te tih duh ngai loh thleng sil leh hmunphiah thlengin a unau hmeichhia te angin ka chhawr thei vek. A zirlai athiam thei em em a, a ti tha pawl a ni ngei ngeithin.

Pawl sawm azir kuma Hostel a dah kan tum khan min hnial teh tlat a, mahse a pa nen chuan hetiang taka thiam thei anih chuan Hostel-ah awm se Top Ten a lan phak kan beisei tlat a, a phur vak lo chung chu kan dah lui a. Kan tisual ta!.

Damdawi a khawih ve thin tih kan hriat chhuah dan chu hei hi ani. Pawl sawm Final an Exam zo a rawn haw atang a kar thum vel nita in ka hria, Holiday a ni a, inchungah a nau hmeichhia nen insuk kan zar a, ka chhuk leh tur chuan kan inbul Step tawntirh lam ka han melh kher a, chutah chuan ka fapa leh kan veng tlangval sual ve tak pakhat chu ‘Eng emaw’ an in pe zeuh laika hmu a ni.

Nu leh fa inkar a inzawmna Pathianin adah hi hmeichhia i nih a, fa i nei anih chuan i hretthiam ngei ang. Chutianga ka fapa kahan hmu chu chhungril atang hian rinhlelh rual lohin ruihtheih thil a ti ve a ni tih rinna a awm nghal a.

A pa ka hrilh nghal a, kan pahnihin kan dawp ta a, atang tlat a, kan dawp chhuak zo lo. Mahse a inthup thei lo telh telh a, zep rual a ni ta lo. Mi fa te rui ka hmu fo a, an fa te sual avanga lungngai mangang a rum thin te pawh ka lo hre ve tawh thin. Kachan turah hian vawikhat mah vawikhatte mah ka la dah chhin ngai lo. Mahse tunah hian ka Fapa te ber Lalrinpuia chu Drug Addict a ni a, kei hi Drug Addict Lalrinpuia nu, a Fapa sual vanga lungngai mangang a rum mek chu ka lo ni ve ta!!.

A pa nen a unau te nen a sim theih nan kan tawngtai a, kan zilh a, mahse a lo kal thui tawh viau aniang, a sim thei der lo. Hun akal deuh a, pawl sawm pahnih a nih kum phei chuan kum chanveah school a chawlhsan ta a, inchhungah a sual telh telh a kan thawmhnaw te, bungbel te, buhfai thlengin a hralh a, a unaute lawm a hlawh lo telh telh a, khawlaiah a tal tam em em a, hau mah i la awmzia a awm lo a, zilh a sawt hek lo. Ka fapa avang hian ka rilru a hah a, mutmu ka tuah hlei thei lo a, khawlaiah a tlu hlum mai ang tih hlau reng rengin ka ngaihtuahna ka seng thin.

Vawiin chawhma inkhawm ban ka haw khan, a U amah chhangtu zaina tur ka dah that pawisa a bo vek tih ka hmuchhuak a, pawisa hi lak ruk zeuh zeuh aching ve tho a, mahse a la tam em em ngai lo. Mahse tuna bo hi chu a tlem lo, Lalrinpuia lo la tur dang an awm lo.

A room kawngkhar ka chum bur bur a, a rawn hawng chiah chu” I pawisa lak kha min rawn pe let rang rawh” ka ti nghal tawng a, “Eng pawisa maw? Tunah hian cheng sawm chiah ka nei” min tawng el khum niin ka hria “Safe-a ka dah i la, ka chabi dahna i hria aniang i U Remruata zaina tur a nih kha, Larinpui ka la lo tih tum suh i la khawp mai” ka ti tuarh a, A pa inkhawm bang a rawn lut chiah a, thil awmdan ka lo hrilh chuan, a pa thinrim lutuk chuan a hmaiah a beng sawk a, a pai dawrh a, mahse “Ka la” a ti duh reng reng lo. Kan dawp a, kan vau a, kan hlap bawk a mahse “Ka la lo” a ti tlat thung. A tawpah a pa chuan”Chawhnu kan inkhawm chhungin lo inngaihtuah la, min pe dawn lo anih chuan Police ka man tir ang che” a ti ta a. A ni chu a ngawi reng thung.

Kan boruak tawn chuan min ti chau nghulh thei, ka rilru a na a, ka tap a, atana tawngtai pawh ka thei ta lo. Tun tum a mi hi chu a ni em em tawh lo eng pawh thleng dawn se, Lalrinpuia hnen atang hian a pawisa lak hi kan hmu let leh tur a ni.

Kan pahnihin ngawi rengin T.v kan en a, a hnuah chuan a tho a a room-ah a va lut a, inchei deuhin a rawn chhuak leh a, “I pa thu sawi kha ngaihtuah rawh, pawisa chu min pe let ngei ngei ang che i hria em?” Ka ti a, min chhang lo a, chokaah a phei a, filter a tui chu a thli a, a in mek lai chuan “I hria em Lalrinpui ka sawi chu i hre lo a mi” ka ti vin leh thak a, min chhang chuang lochuan kawngka lam a pan a, a chhuak tur chu ka thinrim lutuk chuan “Rawn haw tawh suh ang che, nang ang mi lakthlak loh misual lutuk hi kan mamawh lo che” ka ti leh chiam chiam a, a chhuak a, kawt atangin min rawn ko a, ka chhang duh lo a, a kalta aniang a reh ta vang vang a. Mahse a akal atanga darkar khat pawh liam lo ah a thih thuin min rawn deng ta ani.

Ka Fapa ruang ka en ngawih ngawih lai chuan, mi tu emaw hian”Nu Sangpui pawnah khuan an hmu duh che” a rawn ti a, Vai ruaiin ka chhuak a, kan inkawt Step hnaih lama lo ding kan veng YMA President Pu Rinmuana chuan min lo hui a, inhnuaiah ka zuithla a.

Pu Rinmuana chuan “Hei he lehkha hi i Fapa kekawr ipte a mi a nia aruang hmutu te’n min pe a” tih pahin lehkha uluk vak lo a thleh nawk nawk niawm tak hi min pe a. Kan inhnuai te Room-ah chuan ka luh pui a, ka chhiar ta a, chu lehkhaah chuanhe thu hi a lo inziak a.

“Nu, pawisa kha ka la lo ka ti tak tak. I dahna i hai anih ka ring… kha thawmhnaw hak tawh loh i dahna Drawer ah khan thawmhnaw thleh karah ka hmu a, nichin khan hrilh che ka tum a, mahse Drawer ka hawn chhan kha sawi leh angai awm sia, ka sawi leh ngam lo a, chuan ka chhuah dawn a pawn atanga ka lo auh che khan hrilh che ka tum tak tak a, mahse min chhang si lo a”

“Chuan maw Nu, pawisa ka hmuh khan ka la chak khawp mai, Mahse ka hmuh lohna tur a i rin berah i dah a nih ka ring a, chuti chung chung a lo ruk kha chu, i PATHIAN hian a phal lo a nih ka ring, a chhan chu tunah khan en la a la awm reng ang”.

“In tan ka hnawksak hle tih chu ka hria a, Mahse thi ta ila chu vengthlanga tuikhur bula mi Nu Maremi te khuan min ui ve maithei. In kawr hak tawh loh i dah that ho kha ka pe ve tawp zel a, an lawm thei lutuk. An pa a Cancer kha i hria em Pa Zuala kha, a Cancer a hna a thawk tha thei si lo a. Nu, sawi tawp mai i la anin bulah khuan kanin Chiu thin a, kan rui phur hi kan leng lut thin a, mahse min ning hmel an pu ngai lo. An in a chuangkai thin awm chhun kan nih thin vang pawh a ni mahna.”

” An retheih zia chu maw Nu, i hre lo nih kha buhfai chhum tur pawh achang chuan an nei lo thin an chhangchhe bawk sia.. kan buhfai pawh aruka ka hralh then bakah ka pe ru ve leh thuai zel”.

” In awih lo mai thei a mahse kar hmasa atang khan ka dry tawh. Inkhawm te pawh ka chak ve lutuk asin ka nu. Tukin zing khan min sawm ve u la ka ti lutuk a, ka kamis neihchhun adum kha i hria em? U Mami te inneih dawn a min lei kha.. a chuar lehchuar loh ka en ru a, achuar sia, in hmuhah ka nawt ngam si lo a, min sawm u la chuan ka nawt nghal ang ka tia mahse min sawm si lo a, ka thingrem mawngah ka hnawh leh tawp. Nu, Sunday lehah chuan mn sawm tawh ru aw”.

A hmuh lohna tur ber a ka rin thawmhnaw hlui ka remkhawm na Drawer chhung a pawisa ka dah lai chu ka ngaihtuah a, ka kalh leh thlap a nih tak kha! Chabi engtinnge ahmuh tih ka hre lo a, mahse ka thinlung chuan pawisa chu angaiah a la awm a, ka Fapa Lalrinpuia’n a la lo tih chiang takin min hrilh!!.

Tichuan, pindan chhungril atang chuan rawl chuah meuhin ka tap ta rawih rawih a.

Aside | Posted on by | Tagged , , | Leave a comment

HMANGAIHNA CHAUH Hi a tawk

AUTHOR :

Do you love me Becos i am beautiful or am i beautiful because you love me? -Cinderella

Indopui lai khan Sipai tleirawl rethei ve tak leh nula hmeltha takpakhat hi an in hmangaih tlat mai a. Nula nu leh pa chuan an fanu chu chu tleirawl tlangval chu ngaizawng lo se an duh hle mai a, a chhan chu an rethei si a.

Mahse chu tleirawl fing tak chuan nula thinlung chauh hneh lovin, nula nu leh pate thinlung hneh chu zawi zawi in a hneh a, nula nu leh pate pawh chuan mi tha tak ani tih an hria a, an fanu pasal atan chuan a duhta hle a.

Harsatna dang alo thleng leh ta tlat mai, Chu sipai chu ralkap turin ralram, tuipui ral ah kal a ngai ta thut mai.

Ral rama a kal hma kar khat vel ala awm tih ah chuan chu tlangval khawngaih thlak tak mai chu a hmangaih-i bulah chuan alo kal a, ‘Min nei duh angem?’ mittui parawl tuau in a ti a, nula chuan a mittui chu hruk sak pahin, ‘duh teh reng mai’ a lo tia. Tichuan a rukin an in huala, kum khat hnu ralram atanga alo let leh hunah in neih an ti tlu ta a.

Chu tleirawl a kal hnu lawkah chuan Nula chuan vanduai thlak takin accident a tawk hlauh mai..!! Ni khaw hrelovin a let reng a… A lu lah chu a sawh na viau leh nghal a.

Damdawiina a’n harh meuh chuan a bula thute a’n melh kuala, a pa mitmeng atang leh a nu lo tap fap fap a hmuh chuan thil diklo a awm tih a hre nghal a.

A hnu deuhah chuan a thluakin hliam a tuar tih a hria a, a nerve peng pakhat a hmai tihrawl control tu ber a chhia hi alo nia. Chumi ni atang chuan a hmelmawina chu tih bovin a awm ta…..!!! Darthlalang a a’n en chiah phei chu ate nasa ngang mai, “tun hma khan ka hmelthat teh lul nen, tunah chuan Ramhuai ka ni ringawt a lawm’ a ti chul a. A taksa lah chu ser lian tak takin a bawh khat luk mai leh nghal a.

Chumi ni atang chuan a bialpa pawh chu theih nghilh a, an in hualna pawh chhut chah nghal a tum a. A chhan chu a bialpa chuan a duhtawh dawnlo tih ahre reng sia…!! Theihnghilh a, hmuh tawh ngailoh a tum a.

Tichuan kum khat chhung chu, mipa chuan lehkha alo thawn char char a, a chhang let ngai lova, phone atanga lo biak a tum paw’n a chhang ngai lo.

Ni khat chu a nu hi a pindan ah a lo tei lut a, ‘Vawiin khan a rawn thleng asin’ a tia.
‘Maw…!!’ Nu ka chanchin hrilh miah suh aw, hetah ka awm tih pawh hrilh suh aw” a ti a.
A nu chuan ‘Nupui a nei dawn alawm’ hei a sawmna che pawh……..!! tiin a lehkha ken chu a fanu chu a’n pe a.
Chu thil a’n hriat chuan na a ti kher mai, a hmangaih tawh lo emaw a tia, a lo la hmangaih reng a lawm le, a theihnghilh tawh emaw atia a lo la hre reng a lawm le….!!mahse tunah chuan a theihnghilh tak tak a ngai tawh ang……a chhan chu nupui a nei tawh dawn alawm.

Lehkha chu khur deuh dar dar in a’n hawng a, a phu chiang kher mai, in neiturte ah chuan a hming alo lang kulh mai a. ‘Hei hi enge a awmzia…?”Chu tih lai tak chuan, a hmangaih em em chu a pindanah pangpar bawr keng chungin alo pen lut a, Nula hmaah chuan thingthi in, “Min nei duh angem…?” a ti a.

Nula chuan a kutin a hmai a hup tawk tawk a, ‘Ka hmelchhe tawh lutuk min duh lovang…..’Tlangval chuan, ‘I phalna la miah lovin i nu’n i thlalak min rawn thawn a, i thlalak ka hmu a, mahse thil engmah danglam a awm lo tih ka hria. Tun hmaa ka hmangaih em em kha i la ni reng a, tun hma ang tho khan i hmeltha reng alawm…a chhan chu ka hmangaih che a’

Aside | Posted on by | Tagged , | Leave a comment

McGREGOR-A’N AMA WEIGHT AH DIAZ CHHUK VE TURIN A SAWM VE THUNG TA E

McGregor chuan Diaz-a hian a vawithum nan in fight leh a duh anih chuan ama weight (lightweight) ah a lo chhuk a hun ve tawh tih a sawiin ama duhdan anga an tih ve hun a ni tih a sawi.

“Surprise, surprise! The king is back!. A vawithum nan i la duh a nih chuan ka hun a ni ve tawhin ka hria. 170 – ah ka lo chho a, tunah chuan 155-ah lo chhuk ve tawh la, chuan, a bul kan tan tawh hi kan chingfel dawn nia. Tun hunah hian ka tih tur ka hria a, ka ti reng bawk a ni”, tiin Diaz chu ama weight ah lo chhuk ve tawh turin a sawm.

“Ka ngal kha ania. Vawi 40- vel a khupah ka pet a, kha² min ti na a ni. Ka ngal a ni mai a, chu² a ni mai. A bak zawng chu a tha vek e”, tiin a ke na ni a lang chungchang a sawi bawk.

Aside | Posted on by | Tagged , , | Leave a comment

McGREGOR NEN REMATCH NEIH LEH HMA CHU DIAZ-A’N IN FIGHT TUM LO

Irishman Conir McGregor chuan Nate Diaz nen UFC 202- rematch an neihna minute 25- chhungin judge te point pek hmangin hnehna a chang a, mahse UFC 196- a lo chak tawh zawk Diaz chuan a chak loh chu a pawm vak lo a, a vawithum nan rematch an neih leh hma loh chu in fight a tum loh thu a sawi.”In fight zawh khan second khat pawh ka chak lo ang tih rin ngaihna ka nei lo. Round hnihna atang khan ka chak vekin ka hria. Tlanchhiat kha a uar em² mai a, a tlanchhiat atang khan point an la tur a ni bawk a ni. A tlanchhe kual nasa em mai”.

Diaz hian kha an in fight na tur atan a inbuatsaihna ah hliam tlem a nei tih sawiin :”Thla liam ta mai khan ka khup ka ti na a, Jiu Jitsu pawh ka ti thei lo a ni. Karhnih liam ta vel atang khan sparring ka chawlhsan a ngai a, in fight hnuhnung zawk ai khan hei hi thil duhawm loh zawk a ni. He fight atan hian ruahmnanna tam tak ka nei a, mahse ka ruahman angin ka ti thei ta lo a ni”.

American fighter Diaz hian McGregor nen intum nawn leh ngei aduh a, an in fight leh hma chu fans lamin a hmel an hmu tawh hrih lo ang tih sawiin :
“Engtik hunah pawh ka in fight thei. Engtik hun atan pawh an duh hun² ah a ni mai. Mahse a vawithumna kan tih hma chu min hmu tawh lo ang. In fight vawithumna a awm hma chu eng thil mah ka ti lo ang”, tiin Diaz hian a sawi.

Aside | Posted on by | Tagged , , | Leave a comment