PARTY HRANG HRANG MIZO ANGA KAN TANRUAL HUN A NI

PARTY HRANG HRANG MIZO ANGA KAN TANRUAL HUN A NI by David Sailo
4th November

BJP AN CHE NAWI TLAIKHAWHNU –
Joint NGO ngenna palzuta huaisen taka Chakma Candidate siamtu an ni. Congress pawhin hetiang chiah hian an siam ve bawk. Chakma ah kan phunna chilper pawh a la reh loh laiin Tuikuk lam an pawng leh ta hi a Kaikuang chu BJP hi puh loh theih loh an ni ta. Indirect taka kan sel thinna chu kan boruak tawn hian Mizo mipui min beng harh dawt a, BJP Politics dik tak min hmuhfiah tir tan ta! Mizopa ngei BJP nih zahthlak hun a hnai tlat ta.

TUIKUK CANDIDATE VE THUNG –
Chakma lamah kan nam tang tanga kan nam pil hleih theih loh laiin Tuikuk lam a rawn pawng a, kan Officer tha kan chan a, Tuikuk Candidate na kawng a lo in hawng ve leh ta ruah mai a nih hi. Heng Tuikuk mi 2 Candidate tum te hian BJP Ticket a din an tum thu an sawi hi tak tak a nih chuan BJP hi Mizo ang pawhin kan ngaidam thei tawh lo hial maithei.

TUIKUK AN TLING THEI EM?
Hachhek biala Mizo Vote nei awm zat hi sawi danin Vote 13811 a nih laiin Tuikuk Vote hi Vote 9804 a ni a, Mizo Vote nena inthlauhna hi Vote 4000 bawr chauh a ni. Kan ram hruaitute leh Party Leader te MIZO anga hetiangah hian kan tan ruala kan harh loh chuan kan chan thei a ni. Keimahni leh keimahni Politics tuinu hmanga kan in beih reng lai hian mengkara a pawp lai lo zawng ru reng an awm tih hi hriat a va hun tawh ve le.

CONGRESS LEH BJP MIZO TAKIN KA NGEN –
Mizote rilru put mek leh kan buai nuai nuaina hi haider lui lo hram ula, Mizona hunah kan cheng tih hriain Chakma Candidate hi khua a tlai hmaa Cancel hram turin ka ngen tak meuh meuh a, Tuikuk BJP Candidate awm tura sawi awm leh hemi denchhena Tuikuk Vote thlak duhsak em em kawng kan zawh a, kan Officer fel tak hialin a tuar ta mai hi in dam chhunga dem inhlawh loh nan leh kan hnam himna khawih pawi thei a ni tih hriaa he thil pahnih chauh hi chu in MIZOPUI tam tak hachang thial mekte lungdam nan hian Cancel lul ula Zofate hian kan va duh tak em!!

Aside | Posted on by | Leave a comment

KUMIN 2018 CHHUNGIN IT ACT THUBUAI 9 ZIAHLUH A AWM TAWH

Mizoramah kum 2009 atanga kumin October thleng khan IT Act thubuai 93 ziahluh a awm tawh a, kumin 2018 chhungin thubuai 8 ziahluh a awm tawh.

Mizoram Police a CID (Crime) hotute hnen atanga thudawn danin, kum 2009 khan Cyber Cime thubuai ziahluh 2 awmin, 2010 ah thubuai 3, 2011 ah 5, 2012 ah 4, 2013 ah 10, 2014 ah 28, 2015 ah 9, 2016 ah 15, 2017 ah 9 leh kumin January – October chhungin thubuai 8 ziahluh a ni.

CID (Crime) hian Cyber Crime kaihhnawihah hian kum 2009-ah thubuai an ziak lut tan a; case ziah luh tan atanga thubuai ziah luh tam ber kum chu kum 2014 kha niin, thubuai 28 ziah luh a ni. Thubuai ziah luh zinga a tam ber chu social media-a thu post kaihhnawiha police-in complaint an dawn atangin a nih thu CID (Crime) hotute chuan an sawi.

CID (Crime) hotute chuan, social media-a thu post kaihhnawihah police-in complaint an dawn tam thu sawiin, “Complaint zawng zawng hi register chi a ni lo a, tam tak chu a tuartu tana huatthlala tak, case ziah luh hleih theih si lohte a ni,” an ti.

May 21, 2014 khan Mizoram Police, SP CID (Crime) hnuaiah Cyber Crime Investigation Cell din a ni a, helama harsatna nei chuan Police Station hnai berah FIR thehluh theih a ni a, hemi bawhzui hna leh hnuchhui hna hi Cyber Crime Cell hian an thawk thin a ni. Tunah hian Cyber Crime Cell hi Cyber Police Station a hlangkai turin hmalak mek a ni a, sorkar laipui atangin nuai 148 hmuh niin, Cyber Forensic Laboratory leh Cyber Training Centre din turin hmalak mek a ni.

CID hotute chuan, IT kaihhnawiha thubuai thehlut turte chu thlalak – screenshot/print screen nen thehlut turin an chah a, “A theih phei chuan computer atanga print screen ni se, website link-te a lang thei dawn a ni. A kimchang thei ang bera thehluh a tha a, thil thlen hun lai chiang taka tihlan bawk tur a ni,” an ti a, tunlaia mi tam takin an chin ‘copy-paste’ chu himna a ni lo tih an sawi.

Hetihlai hian Mizoram Police-a public relations officer (PRO) chuan tunhnai khan thuchhuah siamin, tunlaiin online-a sum peipunna awlsam tak ni anga lang, him si lo a awm nual tih a tarlang a; fimkhur turin mipui a chah. Police PRO chuan, online hmangin direct marketing business model hmangin product mumal siam nei si loin downline member tur an zawng thin tih a tarlang a, “Heng lakah hian mipui kan fimkhur hle a ngai. Company thenkhat chuan virtual currencies/crytop-currency/bitcoin, etc. investment hlawk tak ti angte’n an insawi a, e.g. Adwazo. A then chuan Paytm wallet, Freecharge, Mobikwik leh Airtel wallet anga sumdawnna hlawk tak ti angte’n an insawi a ni,” a ti.

Aside | Posted on by | Leave a comment

PARTY CHU PARTY A NI MAI

PARTY CHU PARTY A NI MAI!
(Methinks and my thoughts)
.
– V.Kûngtea,
West Saizawh, Awmhar Cabin.
.
Khaw’nge, a hun lai alâwm le! Tu’n min sêl lo u. Kei hi politics khêl ṭhîn ‘politician’ ka ni lo va; ka awmna ‘party’-a rinawm leh nghet bur mi erawh ka ni thung. ‘Politician’ tih hi politics khêl ṭhînte sawina a ni a, mahni party-a rinawm burte sawina hi sâpin engtin nge an tih? ‘Partian’ tiin ka chher chawp mai dâwn em ni? ‘Partian/partían’ tih thumal hi English word-ah a awm chiah lo na a, Spanish ṭawng te, Finnish ṭawng te leh Galician ṭawng; Western Ibero-Romance pêng pakhat, Indo-European ṭawng te-ah chuan a awm chiang a; a awmzia erawh chhûn leh zân ai maha inhlat, Thawhṭanni tih leh fu huan tih tluk hiala awmze inpersan a ni thung. English hi khawvêla ṭawng hausa ber nia kan chhâl mêk lai hian politician pawh ni si lova mahni party-a ruh êm êmte sawina erawh zu nei hauh lo va! A zia lo ka ti deuh mang e. Chuvângin, rei lo tê atân thumal thar he ‘partian’ (a person who is professionally involved in party) hi ka’n chher (coined) ta mai a ni. Eng nge pawi? Lalhruaitluanga Chawngte pawhin ‘Aizawler’ tih a chher chawp ve tho alâwm.
.
Party-a rinawm tlatte hi fak hlawhna viauna emaw in lo ti thla rawk ang e– a ni lo nasatzia mai chu nasa tak a ni. Mite ngaihsân an hlawh lo mai ni lovin dem leh dêu chu an hlawh zaw mah a, a mak bûr bûr ṭhîn khawp mai. Party-a ka rinawm êm avâng hian hmuhsit pawh ka hlawh nangiang rêng a. “Nangni ang, party ruihchilhho hi kan ram ṭhanmawh bâwk chu in ni,” tih ang ṭawngkam te hi hausakpui tham lawih khawpa ṭhahnem chu ka dawng ve tawh. A ni lah tak alâwm, party dangah pakai tum miau hek lo vi le!
.
Kum 2006, Chawngte (Tuna Tuichawng) constituency MLA by-election dâwn ṭum khân Indian National Congress General Secretary hlui, Mizoram Congress Party (MCP)-a awm rên râwn; a hnua MNF party zawm ta, Pu TC.Pachhunga, Ex-MLA chu kan in tlâwm takah rawn lêng lûtin, an party MCP-ah awm tûrin tih tak nangialin ka pa a lo sâwm a. A zan thumnaah phei chuan an party president, Pu J.Lalsângzuala (RIP), Ex-Finance Minister leh an G.S.(?)-te nên meuh an lo lêng lût a. Ka pa chu tûna kan awmna party hi chhuahsana an party-a awma ad hoc president ni tûrin leh ka pa a luh phawt chuan kan in chhe tawh tak chu thawm ṭhatna tûr sumpai pawh ngaihtuahsak an intiam a. A zan hnihnaa Pu TC.Pachhûnga a rawn lên ṭum khân ka pa a awm lo va, keimah nên kan inkâwm a. “I pa hi kan pâwlah rawn awm ve sela,” tiin eng eng emaw therhlo nên min thlêm a. Kei chuan, “Mahni party chhuahsan hi mahni hnam hralh tlukah ka inngai,” tiin ka chhâng tain ka hria. Pathian zârah eng party dangah mah kan la zuang lût lo chu a ni a, kan inchhîr lêm lo khawp. Pu J.Lalsângzuala erawh a hnûah MCP aṭangin INC-ah bawk a lêt leh a nih kha! A thleng thui lo khawp asin. Chutia, Congress party-a a lêt leh hnu hian MPCC President, Pu Lal Thanhâwla chuan Working President-ah a dah a; a thih lai hian a ruang chunga a chanchin sawitu pakhat chuan, “Pu J.Lalsângzuala hi Congress mi leh sa dik tak, a ṭhiante fuihpawrhna avânga pêng ta mai a ni a, vawiin nîah hian a ruang hi Congress flag ngeia tuam tak ka nâp a ni,” a han tih zet chuan Pu Lal Thanhâwla meuh pawh a nui ve suk e, an tih chu!
.
Khai, kan pêng thui ta deuh e. Ka awmna party-a ka ruh êm êmna chhan hi sum leh therhlo ka dawn vâng a ni hran lo va; eng mah dawng lo pawh ni ila, ka party-ah chuan ka ruh tho tûrah ka ngai. Ka duh rêng avânga Mizo ni ta ka ni lo va, ka duh loh avânga Mizo ni lo thei lah ka ni hek lo. Eng chi leh kuangah pawh lo piangin lo sei lian mah ila, ka pianna chu zahpui lovin duh takin ka pawm a ngai a ni. Chuti ang deuh chu a ni, party pawh hi. Miin min sawisêlin min dêu ṭhîn mah se, ka party chu ka party a ni miau va, chhuahsana party danga sa phun thei ka ni lo. He ka party hi nu leh pate hun aṭang tawha lo awm tawh a ni a, chu chu ka chhawm ve zêl a ngai a ni. Mi ṭhenkhat, eng emaw therhlo beisei avângin an awr an tihsen loh leh an awr an tidum a; chuti ang mi chu em ni, mi ngaihsânawm chu? Sum leh pai duh ilang chuan e, BJP ka zawm daih tawh ang chu! Congress-in nuai 1 (NLUP) an sem laiin MNF party-in nuai 3 (SEDP) sem tumin an inzuar a, BJP-in damlo inenkawlna tûr leh thil dang atân chêng nuai 5 an tawktarh ve bawk. Mahse, a sum pai thûah chuan a eng mah mah hian ka rilru an hmin lêm lo va, ka awmna party aṭang hian eng mah beisei ka nei ve lo.
.
BJP sawi tâkah chuan, BJP hlau ber ber chu Mizo (Kristian)-te hi ka ni hial lo maw? A mak hi ka va’n ti tehlul êm! Lal Isua hlau lova BJP hlauh tâk tlat mai chu? Eng kristian nge maw kan nih le? BJP follower kan nih loh nâkah! BJP hi keima mimalah chuan hlauhna chhe tê mah ka nei lo va, political party ve mai a ni. Lal Isua ringtu (kristian) ka ni a, BJP ai chuan Lal Isua hi kei chuan a hlauhawm ka ti daih zâwk. Mi pakhatin, “Kristian inti reng sia, BJP hlau tlat mai chu,” a tih kha ka pawm khawp mai. Chuta ṭang chuan kei pawh BJP ka hlauhna pawh a tinêp deuh. BJP chu kristian tiduhdahtu, tiin kan sawi deuh kher ṭhîn a, kristian tihduhdah tûr hian BJP nih a ngai kher hleinêm! Zu hmun sa hmuna i awm khân kristian chu i tiduhdah dêr tihna a ni! Hlauhawm deuh asin. BJP chu party satliah ve mai a ni a, eng nge han hlauh tûr vak? Inngaihtuah chiang rawh. BJP vânga kristian-te’n kan tuar ta a nih leh kan thlarau lallukhum a mâwi ting dâwn tihna a ni mai a! Hêng ka thil sawi te avâng hian eng party tân mah ka campaign lo a nia!
.
Ni e, mahni party ngaia awm hi a lo nuamin a engthâwlthlâk ber mai. Nu pakhat MNF ruh êm êm chuan, “MNF hi chu a hming aṭang ringawt pawh hian min tinui ver ver ṭhîn; ârsi hi a lo mâwi êm alâwm le!” a ti thlâwt mai. Mahni party-a rinawm a ni a, ka chhuang hle. MNF an sâwrkâr lai pawh khân eng an dawn pawh ka hre law… Mahse, a party-ah a rinawm a ni. Mizote hi thil thar lâwm êm êm hnam kan ni a, thawmhnaw hlui inbel reng hi kan ning ṭhîn a, thawmhnaw thar kan hâk chiah hian min tinalh thar ta thutah hian kan ngai a, thawmhnaw chu a thar reng theih si loh; hâk nin deuh hun a lo awm leh thuai a, thawmhnaw thar bawk chu kan beisei leh ṭhîn. Thil thar teh vak hi ka lâwm êm êm lêm loh vâng ni maw; kei, kei kan silhthuamte hi kum tam ka inbel ṭhîn. Party pawh, kum hei leh chen Pathian malsâwmna azârah ka lo dam ve tawh a, second chanve pawh party danga ka inleh chhin ngai lo.
.
Thil thar lâwm lo viau e ti lo hian lehkhabu erawh a chhuak thar thar hi neih ka châk a; ka sum sên hnemna ber pawh a ni. Amaherawhchu, lehkhabu lei nân party sum ka beisei lo. Party suma lehkhabu lei ai chuan ka thawmhnaw inbel lai hi ka hralh ang a, lehkhabu lei nân chuan ka hmang zâwk mai ang e. Party suma lei chu ka mizia nên a inmîl lo êm mai! Kumin inthlanpui kan hmachhawn leh tûrah pawh hian party tin candidate-te chu vote zawngin an lo chuang kai leh ta sup sup pek ang chu! Sum leh pai, nuai pa za pawh pêk min tiam mah se, party ka nei ve alâwm. Ka party ka vote mai loh nâkah! Keia vote khat lek mai mai zawng eng a ni pha tak tak chuang lo vang; lo ît duh suh u.
.
“Rinawm phawt la, a bâk chu Pathian thu ni rawh se,” tih leh, “Thih thlengin rinawmin lo awm rawh; tichuan, nunna lallukhum ka pe ang che,” (Thupuan 2:10b) tih hi ka thupui ber a ni fo.

Aside | Posted on by | Leave a comment

EMIRATES-A INKHEL ROPUIAH CHAK ZAWK AN AWM LO

EMIRATES-A INKHEL ROPUIAH CHAK ZAWK AN AWM LO

Arsenal 1-1 Liverpool (FT)
Ars : Lacazette 82’
Liv : Milner 61’

Man of the match – Lucas Torreira (Arsenal)

Emirates Stadium a inkhel ropuiah hun tawp lama Alexandre Lacazette-a goal thun hmangin Arsenal chuan Liverpool lakah an si phurh an sut a, a zawnin match 13 chhung tlawm nei lovin an kal ta.

He inkhelah hian inkhel tan atanga darkar khat liam felah James Milner chuan Arsenal goalkeeper Bernd Leno ball nam chhuah tha tawk lo hmang tangkaiin goal a thun a, mahse, hun tawp na’n minute 8 chauh a awm tawh tihah Lacazette chuan Liverpool goalkeeper Alisson-a man hman lohva ball lain nalh taka a inherkualpui hnuah a ke dinglama thunin an si phurh a sut a ni.

A tan lotute tan pawha inkhel hmuhnawm ‘attacking football’ mit la takah hian Liverpool tana first half-a Sadio Mane goal thun chu offside tiin pawmsak a ni lo va, Virgil van Dijk chuan hun tha elkhen vawi hnih neiin goal ban a tauh per bakah Leno chuan hnai set sawtah a lo dansak bawk. Liverpool an vanduaiin lang mahse an khingpui Arsenal hian tlawm an phu lo!

Arsenal in chhanna an pe :
Head Coach thar Unai Emery hnuaiah Arsenal in hmasawnin a zawnin game 12 chhung tlawm lovin kal mahse season tantir Premier League game hmasa pahnihah club lian pahnih Manchester City leh Chelsea te an hneh loh avangin vanneih vanga kaltluangah a ngaih theih a. Mahse, tun season-a team hmachhawn chakawm lo ber Jurgen Klopp-a team lakah inrintawkna leh theihna an ngahzia lantirin point an hlawhchhuak a, team namai an nih lohzia a lang.

Game rang, game nung, game hmuhnawm chhawpchhuakin an khingpui tuan tha tak tak fuankhawmte lakah huntir lam minute 45 chhung phei chu an khel tha hle. Hei ai maha London club tana thil lawmawm chu Milner-a goal thun hmanga chak tawh mai tura inngai hmel pu hman, Klopp-a ‘hlim hmel’ goal hmanga ‘ngui hmela’ an thlaksak thei kha a ni. An tlarhnung pawp erawh thawmthat a ngai tih a lang thung.

Wenger-a hunlaia an neih loh an mamawh em em, defensive midfielder khawng leh taima, pate (palian) Lucas Torreira an nei ta chu an hawipir theih chhan niin tlar hma lama Lacazette te ang, an khelh fuh vak loh tum pawha goal pawimawh thun thei an nei chu hnuaichhiah theih loh an nihna chhan pakhat a ni bawk.

Hmasawnna tur erawh an la ngah tih hai rual a ni lo va, chutih rual erawh chuan team chungnung zawka dah mek Liverpool laka 62% zet ball chang a, phu taka point an hlawhchhuak kha Emery leh a player te mai bakah anmahni tantute tan hmasawnna ropui tak a nihzia tlang chunga khaw awm tluk zetin a chiang a ni.

Van Dijk paliana :
Liverpool manager Jurgen Klopp chuan an chak lohna lai hriain tlar hnung lama game dam dap khelhpui thei tur a zawng a, a mi duh hi kum 2017 nipui transfer lai khan lak tum mahse buaina lian tak an neihzui avangin a la thei lo. Chu player chu tudang ni lovin hmanlai pasaltha ang maia sam hnungzial thin Netherlands captain Virgil van Dijk hi a ni.

Southampton in nipui laiin harsatna siamin lak phal lo mahse Klopp hian khaw dang hawi lovin thlasik transfer a thlen veleh ‘bat tam chu changkanna’ tih thupui hman huamin khawvela defender man to ber ni turin £75m in Anfield-ah a seng lut ta nge nge.

A tirah a man a phu lo tiin sel hlawh hman mah se tunah erawh nupui tha hmu moneituin a nupui man pek belh a duh hial ang maiin Kop ten a man pek belh ngai se thawhbelh an hreh lo vang.

Van Dijk hi huntir lam minute 45 chhunga Arsenal in na taka nawr a, Liverpool tlar hnung an chhaihbuai fo tum pawha lo dang chattu ber, boruak leh leia a thatzia pholangtu a ni. Ani hi awm lo se zawng Emirates-ah Klopp a nui sung lo tawp ang.

Tlarhnung a ven that pui piah lamah set piece (free-kick & corner) ah a hlauhawm a, a sang thlawn lo. Vawi khat goal ban tauh perin a hun taka dawk chhuakin a thun ngei tura ngaih chu Gunners German goalkeeper Leno chuan a lo dansak hlauh.

Kum kha leh chen Liverpool tlahnung sai hlawk hlawk thin kha ani zarah a nghet ta churh a, Premier League title lak tuma an beihna kawnga a laimu a nih chhunzawm zel ang.

Emirates Stadium a nung thar :
Arsene Wenger-a season hnuhnung bera Emirates Stadium boruak kha sawi hmaih chi a ni lo; mipui 60,000 chuang lenna hmun kha a thawl huai a, inkhel zawh hmain an haw rem duak thin; hlim leh phur hmel aiah ngui leh thinur hmel a pe tuarh fo.

Emery hnuaiah erawh hmanni maia khang hmelte kha thlak danglamin a awm mek a, zanin inkhelah pawh Emirates Stadium-a Arsenal fans te thawm hi mitdelte hriat khawpin a ring!! Wenger-a hnuaia beisei leh tur chuang nei lo khan Umery hnuaiah sawi chhuah hlei theih loh khawp beiseina an nei. Hun rei an la inhrawn lo nain Wenger-a thlaktu tur dik tak an la tih an pawm thlap tawh.

Enge an sawi? :
Liverpool manager Jurgen Klopp chuan, “Point khat hmuh hi thil hlu tak a ni, Unai Emery pawm dan pawh a ni tho ang. Goal thun ngei ngei theihna remchang kan nei. Arsenal in hnehna chan tuma an nawr khan tu mai pawh kha an chungtlak thei vek mai a, a hmuhnawm ang reng hle. Ka beisei angin kan inhlawmkhawm thei tlat lo.

“Kan midfielder te an tal na tawk lo va, lehlam tan hmunawl kan pe tam mah mah thin. Alex Iwobi pawh khan kan hnaih chilh hman loh avangin goal thun tur kha a pe thei a ni,” a ti.

Arsenal manager Unai Emery pawhin inkhel chungchang sawiin, “Hnehna chan duh mahila beisei ang result kan hlawhchhuak zo ta lo. Kan khel tha tak zet a, na takin kan nawr thei a, kan thawkrim bawk a, khelh dan tura kan ruahman lawk angin kan khel chhuak a, tin, mual pawn atangin kan fans ten tharui min pe reng bawk a ni.

“Inkhel entu tan ennawm ropui a ni ang tih ka chiang, a hmuhnawm khawp ang. Mahse, kei chu ka hlim dan a tluantling ve lo, hnehna chan duh khan hnehna kan chang ta si lo va. Kan team a inkhairual em em a, minute 90 chhungin tha takin kan khel a, hei aia result tha zawk hi kan phu a ni,” a ti.

Sulhnu :
*2007/08 hnu lama a vawikhat na’n Liverpool hi Premier League a an match hmasa 11 ah an tlawm tawh lo.

  • Arsenal hian Premier League-a Liverpool an hmachhawn hnuhnung vawi 7-ah hnehna an la chang ta lo (D3 L4).

*Arsenal hian tun season Premier League match 11-ah first half-ah hma an la hruai ta lo vek a, mahse, second half-ah goal 19 an thun thung!!

*Liverpool midfielder James Milner hian Premier League-ah goal 50 thun tling tain heng zinga 14 hi Liverpool tana a thun a ni.

*Tun season EPL game 10-ah Arsenal substitute player ten goal 6 thunin an thiante goal thun tur vawi 4 an siamsak tawh.

*Alexandre Lacazette hian inelna hrang hrangah Arsenal tan goal 23 thun tawhin heng zinga goal 17 hi Emirates Stadium-a a thun a ni.

Lawmkima Hmar

Aside | Posted on by | Leave a comment

TRUMP’S WORLD : Part- XIX.

TRUMP’S WORLD : Part- XIX.
-@Ricky L. Colney

Tun tum chu Post a thui leh deuh mai thei ania aw!!

1). Judge Kavanaugh a Pawngsual tu a puh tu khan DAWT a sawi :
Hmanni mai khan USA Supreme Court Justice ah Judge Kavanaugh a lakluh ani tih kan hre theuh awm e, khami an lak luh na kawng kha a bumboh hle tih pawh kan hria anih kha..Theihtawp takzet in Democrats ho chuan Donald Trump an Judge atan a ruat Kavanaugh a chu Justice anih loh na turin hma an la a..mawi leh mawilo pawh dawn lovin an Sapa tal anih ber kha, chutiang zawng zawng chu sawi tawh lo mai ila, Khatih lai khan Mi engemaw zat in Judge Kavanaugh a chu Pawngsual leh an chunga che mawilo ah hun tepter tawh takah an rawn puh luai luai a,mahse Congress in ngun taka an ngaihtuah hnu ah an Puhna te chu thu tling lo tiin an hnawl a,chuti chung chuan Democrats ho lungawi theiloh tlat avangin FBI( FBI pawh hian a tir chuan a Puh tu te hi an ringlo lutuk/evidence an nei thalo tiin an puhna te pawh Chhui tlak ah an ngailo a ni) chuan an chhui leh ta a, FBI hian vawi tamtak an chhui hnu ah Kavanaugh a thiam loh na an hmu lo a, tichuan Democrats hovin nasa taka an duh loh na lantir anih lai chuan Judge Kavanaugh a chu Justice atan nem ngheh ani ta anih kha.

Democrats ho hian tun Mid Term election ah hian Hnehna an chang anih chuan Justice Kavanaugh a hi Um zui zel an tum tih an puang tawh nghe nghe..Democrats hovin heti taka Kavanaugh an duhloh chhan hi ” Nau tih tlak a duh loh vang te, Mimal chanvo Rights a dah sang a, US Constitution chu a ziah dan ngai ngai a kalpui duh mi a nih vang te, Mawngkawhur support lo anih vang leh Christian tha tak anih vang te” ani tlang pui a.Tichuan Sunday mai khan Justice Kavanaugh a Puh tu, Min pawngsual ti tu Pakhat Kentucky hmeichhia chuan khatih hun laia Kavanaugh a a puh na te kha DAWT VEK ani tih an dawp chhuak a ni. “Jane Doe” inti hmeichhia, a hmingtak Ms. Munro-Leighton i hian kum tamtak kal ta ah khan Kavanaugh a leh a thian ten an pawngsual niin a puh a, Democrats Sen. Kamala Harris (D-CA) chuan Chu Puh na chu Congress ah a pu lut a, an buai phah nasa ani.Puh tu nu hian Kavanaugh a leh a thiante chuan an beng a,Mipat Hmeichhiat lam hawiin an chet luih tir a, Car hnung seat ah vawi tamtak an Pawngsual rawn tih a sawi a ni. Hetiang puh na te hi MEDIA leh Democrats ho chuan thutak vek ani tiin an tan hle a, Kavanaugh a beih nan an hmang nasa hle a ni.Senate Judiciary Committee chuan an chhui chiang ta a, tichuan an chhui chhuah chu..a puh tu hi Left-wing Activist(Liberal kal fawr) ani a, Kavanaugh a aiin kum 10 laiin a Upa bawk a.a in sawi anga Washington DC emaw California a cheng pawh nilovin Kentucky a cheng a ni.An chhui chian lai chuan Munro-Leighton i chuan a Puh na te chu a Phuahchawp vek ani tih a sawi a, Judge Kavanaugh a kha a duh loh em avangin Juctice atan an nem ngheh loh nan ti khan DAWT in a puh ta ani tih a puang ta a ni.Hetia Senate Judiciary investigation hma a a dawtsawi a inpuan hnu hian amah chhui zui na chu FBI leh Department of Justice kut ah hlan chhawn a ni.

2). U.S. Supreme Court Justice Brett Kavanaugh a puh hmingchhiat na te chu Democrats hovin Politics a hamthat nan hmanrua ah an hmang tih US mi tam ber in an pawm :
Harvard/Harris Poll in a tar lan dan chuan US hmeichhia leh Mipa Tam zawk in Justice Kavanaugh a puh hmingchhiat na kha DEMOCRATS chuan thu tak leh thil thleng tak tak ni a an ngaih vang nilovin an Party hamthat na tur a tan an vaw lian a, an Party in dinhmun tha a chelh theih nan an ngai pawimawh mai a ni an ti. Zawhna an siam atanga chhang tu US Voters 55% chuan kha thil kha Democrats hovin hmanrua atan an hmang an ti a, Voter leh Voters lo tiam in US hmeichhia 55% vel chuan Democrats ho in Party hamthatnan kha thil inPuh na kha an hmang an ti a, Mipa 56% in chutiang chuan an ngai bawk a ni.Chutih lai chuan 45% Chauh in Kha in puh na kha thil thleng taktak ah an pawm a ni.

3) DEMOCRATS hmeichhia techuan Republican do dal nan leh Democrats Vote tur a in fuih nan RUAK in thla an la:
Congress Mahila nilo zawk, Democrats Hmeichhia thenkhat te chuan Republican an duh loh na lan tir nan leh Tun Dt.6th Nov. a inthlan lo awm tur a an mi leh sa te fuih nan RUAK vek a thla an lak techu an tlangzarh a,an Project hming ah chuan “Grab them by the Ballot” tih an hmang a ni.Hetia Ruak a an thlalak hian Mipui te thinlung ah hna a thawh an ring a, tichuan Republican nilo, Democrats Candidate te an Vote phah an beisei a ni. He hmalak na hmuchhuak tu chu Dawn Robertson-i, 48,Harvard Law School graduate a ni. Robertson-i chuan Republican ten Hmeichhia an do thin na te,Transgender an beih na te chu an thil tih hian a tih tawp phah deuh a beisei thu a sawi bawk.

4) Inthlan a hnai, Campaign a na, Republican Party Office chu Silai a Kah a ni:
Ni thum lek a awm tawh a, an inthlang tawh mai dawn a,Democrats leh Republican te chu tha tawp in an Campaign mek a, Republican lam ah chuan Donald Trump a chu hma tawng tu ani a, Nitin Rally a buatsaih a, State hrang hrang ah Thu a sawi a, Mipui kalkhawm te chu a hma a kan sawi tawh ang tho khan Sing tam fe fe anni thin a, hetih lai hian Democrats pawh an awm hle hle bik lova,Barak Hussein Obama chuan hma a hruai a, Rally a buatsaih ve thin a,nasa tak tak in Donald Trump a chu hming hmerh ni silo in a bei thin a ni.Tun hma ang bawk in Democrats tan a campaign tu te chu Celebrity mi ropui taktak anni a, Hollywood star rual ho chuan tun lai hian Democrats tan Door to Door/House to House Campaign an nei mek a, chutih laiin Republican lam chuan Democrats bansan na Movement “Walk Away Movement” an buatsaih a, tin Mi hang ho in Democrats an chhuah san na Movement thar “Blexit” chu an tlangzarh/puangzar bawk a..Mi hang Conservative hruaitu thalai thahnem tak chuan White House an inhmuhkhawm/ Inkhawm an nei bawk a ni. Hetih lai hian Florida,Volusia County Republican Party’s office chu Silai hmanga beih a ni a, mahse hliam leh kah fuh an awm lo a, South Daytona police Capt. Mark Cheatham a chuan he inkah na ah hian hliam an awm lo tiin Silai hmanga Office an kah lai hi tuma hriat loh lai ani a, Sunday chawhnu leh Monday zing in kar a thil thleng ani tiin Reporter a hrilh. Party Office kah anih hi Monday zing a Office hawng tu ten an hmu hmasa ber a, Darthlalang techu a keh nasa hle a, tin Inchhung bang ah chuan Silai kahna kua 4 a awm bawk a ni. Sawi tel hram ila Hollywood Star James Cromwell a chuan Tun inthlan lo awm tur hian Democrats in hnehna an chan loh vaih chuan Tual lai zawng zawng ah THISEN a luang dawn tiin Republican in hnehna an chan chuan In rikrap na a thleng a rin thu a sawi, a thusawi hmang ah chuan Tual lai ah Thisen luang an hmuh duh loh chuan Democrats chu thlan tlin mai tur a ti ani( In vau na rapthlak tak niin in hria em?!)

5) BRAZIL President atan thlan tlin “BRAZIL Donald Trump” an tih chu tunge? :
Donald Trump a USA ah thlantlin anih hnu hian Khawvel hmun hrang hrang ah Donald Trump a anga rorel na kalpui duh , Far Right ti a Media hovin an hming an phuah te chu an pung nasa hle a,chutiang movement lian zel chu mi tam ber in kan hriat loh chhan erawh MEDIA te hian thup bo vek an tum a, an puang zar duh miah loh vang a ni. Hungary ah te,Poland ah te, Italy ah te leh hmun hrang hrang ah Far Right/Right wing kan tih lam,Conservative lam,Globalism duhlo, Mahni ram dah pawimawh hmasa ber duh, Christian rindan chawi san duh lam an Lian nasa tawh hle a,hetiang ho hian Muslim Raltlan hi an ngaithei lo tlangpui bawk a,Far Left ram Germany ah meuh pawh an Hotunu Angela Merkel i duh loh na a lian tawh hle a, inthlan an neih hnuhnung lam ah chuan a Party te chu an che chhe tual tual a, hetiang avang hian amah ngei pawhin German ram hruaitu nih bansan a tum tawh thu a puang ta anih kha..Hetiang lam hi sawi tur a tam hle a, mahse tunah hrih chuan Brazil ram hruaitu thar Jair Bolsonaro chungchang chauh i han sawi lang teh ang.

Brazil President thar Jair Bolsonaro hi “Brazil Donald Trump” tih te pawn anlo sawi tawh thin a,amah hi sipai bang ani a,tun inthlan khan 55.5% hmu in hneh na a chang a, a mah hnaih ber tu chuan Point 8 atanga point 10 in a thlau a ni. Bolsonaro hi Donald Trump ang tak mai pa Rorum zet mai ani a, A tawngkam chhuak te chu Liberal leh Media ho huatzawng ani thei hle mai a,chutiang vang chuan Racist tiin an sawi fo a, Politics milian leh thiltithei ho Establishment do tu a ni a,Mawngkawhur a ngaina lo hle bawk a ni.Tin amah hi Christian tha tak mai ani nghe nghe a,Thil tih ah Pathian dah hmasa tu niin Brazil thenfai chu a thil tum a ni a,Inthlan laia a Slogan chu “Brazil Above Everything, God Above Everyone” tih a ni. A Tlin chiah chuan “A hmasa berin Pathian hnen ah Lawmthu ka sawi duh ani, hei hi Party in Promise a siam ani lo, Mihring thu sawi mai ani hek lo,Pathian hma a intiam kam na ani” tiin a sawi.Tin Ro a rel dan tur ah BIBLE leh ram Constitution mil zelin a kal tur thu a sawi a, Socialism, Communism leh Extreme Left(Liberal) te nen in zai ho a duh loh thu a sawi bawk. A mah hi A khingpui leh Globalist te chuan a tling ang tih an hlau em em mai a, Hman deuh khan thi lek lek a VIH a tawk a, chuvangin Campaign pawh hun rei tak chhung a ti ve theilo a, A lo dam chhuak leh anih pawhin President a tlin loh phah an ring hial ani a,mahse hneh na chu a rawn chang ta tho a ni..Vih anih a,thi lek lek nisi a rawn dam that leh na ah pawh Thil dang vang nilo, PATHIAN vang liau liau a rawn dam chhuak anih thu a sawi a, President atan thlan tlin anih hnu a mipui hma a a in lan leh hmasak ber na Evagelical Christian Service ah thu sawiin ” A hmasaberin DAM a ka awm hi PATHIAN hnen ah lawmthu ka sawi duh a ni” a ti a, A dam chhuah leh na chu “Miracle” Pathian thil mak tih ani a ti a, Sunday khan Assembly of God- Victory in Christ Church ah a inkhawm a, he thu hi a sawi a, a thusawi ngaithla tute hnen ah chuan Intiamkam na neiin amah “support tute chuan CHRISTIAN Chhungkua chawi sang tu leh ngai pawimawh tu an thlang chhuak/thlang tling a ni” tiin a sawi a ni.

USA President pawh a lawm ve ani chek ang Jair Bolsonaro a lawmpui tu hmasa ber zingah a tel a,Conservative President thlan tlin thar chu Phone ah bia in lawmpui na thu a hrilh nghal vat a, an inbiak na ah chuan Brazil leh USA chu trade leh Military leh thil dang hrang hrang ah chuan hnaih taka thawk dun turin an in Lungrual tih an sawi nghal a ni. Brazil President thar chuan thlan tlin anih atanga ni reilo te ah Donald Trump a hnung zui ve nghalin JERUSALEM ah BRAZIL Embassy a nghat dawn tih a puang zui ve ta bawk.

6) US Economy a sang zel :
October thla chhung ringawt khan US ah chuan hnathar 250,000 a piang a,nitin Manufacturing Jobs 1,000 aia tam zel a piang a,hei hi chhiatna rapthlak tak Hurricane in US a nuai lai ala ni zui a ni.US ah chuan hnathawk hlawh a sang tual tual a, Unemployment chu hniam zel in tunah 3.7% a ni tawh. Labor force participation rate pawh 62.9% ah a pung chho tawh a Hetiang taka US economy leh Military etc a USA dinhmun a tha chho chung hian Naktip lawk a Inthlan na ah Republican nge chak ang Democrats tih hriat a har hle a, a dan phung ah chuan Democrats chak hun tur a dah ani a,mahse kum dang Campaign leh tun kum Campaign hi a boruak a in san hleih hle mai a,Rin loh takin Republican lam hi an chak khiah thei bawk a, ni rei lo te ah a hriat mai dawn a ni.

Awle, Sawi tur pawimawh a la tam hle mai, Post lah chu a thui mah mah tawh si.America chheh vel Ram atanga a hu hova USA a kal luh tum Migrant Caravan chungchang leh hemi phen a Democrats in rawlh na te, USA Mid Term election tih buai na(Republican chhiat na tur) hmanrua anih dan te,.Russia Indo hmachhawn tura an inpuahchah thu te,etc..etc chu kan sawi lang hman ta lo a ni e.

Aside | Posted on by | Leave a comment

PRISM Candidate, Pu B Vanlalhruaia’n hming sign duh lo

Tuirial bial a PRISM Candidate, Pu B Vanlalhruaia’n Kawnpui College Governing Board te hmaa a thusawi :

“MLA Fund hi MLA ta a ni lova, mipui ta a nih avangin hming ziah tul ka ti lo. Mipui ta a nih angin bial mipuiin tha intihna apiangah inhmang mai dawn a ni. Bial mipuite’n college tana tul inti a nih chuan 20 lakhs aia tam pawh inhmang mai tur alawm, MLA thuneihna bik a nih loh avangin intiamkamna hi ka ziak thei lo a ni,”

Kawnpui College Governing Board chuan Tuirial Constituency Candidate zawng zawngte a huhova kawmin, Kawnpui Collage hmasawnna atan tupawh MLA a thlantlin an nih chuan, kumtin MLA Fund atangin nuaih sawmhnih (20Lakhs) dah tura intiamkamna a ngen a, chutah chuan hming ziahhnan tura beisei an ni. He thil hi Pu Hmingdailova Khiangte Ex-MLA chuan Kawnpui Collage tan a lo tiam tawh leh hemi atanga 15 lakhs a lo pek tawh kalpui zel a nih theih nana Kawnpui Collage Governing Board hmalakna a ni. He intiamkamnaah hian he biala ding tur Pu Hmingdailova Khiangte (Ind), Andrew H Thangliana (Ind), Pu Sailothanga Sailo (MNF), Pu Joseph L Ralte (INC) te chuan hming an ziak theuh. Pu Lalennawma (Ind) leh Pu B Vanlalhruaia (Prism) te chuan hming an ziak ve lo. Anni pahnih hian hming an ziah loh chhan sawiin, Pu Lalennawma chuan, “Engkim hi Pathian kuta awm a ni a, a hun takah Pathianin min pe mai dawn a ni,” tiin a hming ziah loh chhan a sawi. Prism Candidate Pu B Vanlalhruaia (Pu Hruaitea) pawhin heti angin, “MLA Fund hi MLA ta a ni lova, mipui ta a nih avangin hming ziah tul ka ti lo. Mipui ta a nih angin bial mipuiin tha intihna a piangah inhmang mai dawn a ni. Bial mipuite’n college tana tul inti a nih chuan 20 lakhs aia tam pawh inhmang mai tur alawm, MLA thuneihna bik a nih loh avangin intiamkamna hi ka ziak thei lo a ni,” tiin a hming ziah loh chhan a sawi ve bawk.

Aside | Posted on by | Leave a comment

MIZO KRISTIAN BJP TE’N IN DINHMUN TI CHIANG RU LE

MIZO KRISTIAN BJP TE’N IN DINHMUN TI CHIANG RU LE….Hriata Chhangte

A hmasa in BJP hian Hindu sakhua based takin India hi kalpui a, the 3 Hs…. ka tih ve mai Hindustan, Hindutva leh Hindi te chuan India ram hi luah khat tlat se an tih pawh hi an ” Not So Hidden Agenda” ani tih kan hriat sak vek tho va. Chutiang agenda an nei te pawh chu India rama mihring 80% bawr vel Hindu ho duhthusam atan chuan ” awm ve tho ve” kan la tihpui thei zel a.

Amah erawh chu engtik hunah emaw chuan MIZO KRISTIAN TRIBAL te hian Indian kan lo la nih ve luklak hrih avangin he BJP hidden agenda ( RSS MOVEMENT turu ber) hi chu Mizoram chhung atan pawh thlansa bat ringawt nilo thisen chhuak hial pawha kan lo la do ve hrak a ngaih hun chu a lo la thleng ve dawn tho tih te pawh kan hisap thiam ve leh bawk.

A dik tak chuan Central sawrkar a BJP first rule kal mek hi Socio-economic Development lama an chet fawr chhoh em avang khan a bikin keini Mizoram tan chuan Basic Infrastructure Development chin tal kha lo hman tangkai ve em em kha Mizoram tan a pawimawh tiin BJP pawh hi beiseina sang tak nen ka lo thlir ve thin a. MIZO KRISTIAN TRIBAL takin a BJP theih… BJP member ni chungin Vanram pawh a kai theih tih te chu BJP ka sawi dan lar tak ani.

Amaherawh chu… hetia Mizoram atanga BRU ral tlan laklet, Tripura atanga Vote tir theih, theih loh bur tih ang ISSUE lian tham kan han neih takah hi chuan ngaihtuahna a zuang ta dawrh mai le.

Engvangin nge kan Mizoram CEO hian Bru ho vote theih dan tur ECI thu tlukna fel tak dated 7 April 2014 a awm tawh hi a zawm mai loh…ngati nge Bru Voters thar turte, vawiin a Mizoram chhunga awm pawh ni hlei lo te chu eng ati teh reng nge chuti taka a lo lungphur phur pui ve vak rik ngawt ni…

Ngati nge CEO hian kan State sawrkar sum dinhmun pa chhiat zia hai der a, sum ren baksak lova CRPF ho chu Mamit district leh Bru/ Chakma tamna bial a duty chiam tir ngai ti ta tlat vel nge…

Pu Nunmawia, Mizo pa, Mizoram leh hnam tana tha leh tha lo hre zawk em em tih chiangsa, Mizoram sawrkar Principal Secretary, Home leh Finance department changtu’n fair leh transparent deuhva ngaihdan a lo pe chu…. ngati teh chiam nge amah Pu Nunmawia, a senior officer ve ngawih ngawih, local mi leh sa ni bawk si chu chu Vaipa ( bahar ka aadmi) chuan uluk taka sawi pui emaw official correspondence justifiable tak neih pui hmasa zet lova ni 29 October 2018 ah a hek tak ngheng mai le. Hek rawh, bhaia tia fuihpawrh tu an lo lian viau te hi ani lo maw…???

Tin, mak ka tih leh em em bawk chu…. Ngati nge kan ECI pawh hian amah Pu Nunmawia teh reng pawh chu Mizoram CEO in a hekna ah chuan Explanation call (thiam thu sawina chance) an pek ve tak kher loh le… tih te. Dan zawng zawng bul ber Natural Justice chu kan Pu Nunmawia chungah hian pal zut an va chak hmel si em. Kar khat em pawh ral hmaa ngati nge Pu Nunmawia chu ECI hian marching order an pek nghal chung chung vel le… tih te hi kan zawhna tur chu ani reng hrih dawn.

Chutih laiin RSS pachal Governor min rawn pek fel dimdiam tawh te hi inzawmna an lo nei thuk hle mai a…. ti zawnga ngaihruat a va awl ta si em.

Tin, kan Central BJP hotute pawh hian Mizoram BJP hotute hi engah mah an ngailo tihna em ni…an rawn ve ngai aih lo em ni. Chutiang anih te chuan Direct takin Central BJP in min rawn awp ani dawn asin. Kan Pu Hawla hovin Central a an hotute an dawr ngam ang chuan kan Pu JVa hote hian Delhi lama an hotute hi an dawr ngam chiah lo ava ni awm ve. Kan hma lawka Central sawrkar Defense Minister lo kal tur hian BJP candidate an neihna tho, an huat ber Party INC ( Congress) Chief Minister hlun Pu Hawla dinna bial Serchhip a kal chat lova Mamit bial tlawh tum daih kher nge. Bru/ Chakma tamna hisap a Election campaign hi a fuh ber dawn em ni…??? Mizoram ah chuan an Party huat ber kumhlun Congress party bei lovin Minority community votes hmanga Mizoram chu divide an rule an lo tum ruh hle zawk. Let the whole World knows that MIZORAM is MIZO-RAM, not Bru- or Chakma – Land.

Contesting Party an nih ve na anga MLA tam thei ang ber tling tura an beih erawh kan hriatthiam pui vek ang. Mahse MIZORAM chhunga chi bil / chi bing hisapa Election campaign hi ECI phal loh zawng tak ani lawm mi…??? Mizoram a MIZO KRISTIAN TRIBAL te hian hetiang taka Mizoram leh hnam tan a hrisel lo tur tih chiangsa zawnga hmalakna hi kan va digest thei bik lo em….

Mizoram a kan unaute, MIZO KRISTIAN TRIBAL BJP hote khan BRU hovin Postal ballot hmangin an vote tur nge tur lo… tih chungchang ah Mizoram mipui hriatin Press Release han siam vat teh u khai. In pute zuk hrilhfiah vat bawk ula. CYMA hovin Mizoram CEO in Mizoram chhuahsan tura date line an siam, 5 pm, Monday ni 5 November 2018 hmain rawn che teh u khai. Nih loh chuan in nawi ral thrak anga… Mizo Kristian BJP in ni zui ngam tawh kher lovang.

Aside | Posted on by | Leave a comment

MIZO NIH A ZAHTHLAK LEH TA

Michael Lalmanzuala

Inthlang ram kan nihnaa kan hun pawimawh berin a vawrtawp a thlen mḝk laiin hun harsa tak mai kan tawng ta a, a vanduaithlak hle mai.
Pu Lalnunmawia Chuaungo hi Mizo IAS officer kan neih laite zinga senior ber a ni a. A awmna ṭhin Gujarat State-a hnathawh ṭhat vanga hmingṭha tak leh ngaihsan hlawh tak a ni a. Prime Minister Modi-a pawhina a hriat chian leh a ngaihsan zinga mi a ni. Officer fel tak a nih hriain Mizoram Sawrkar pawhin a thiamna leh a tawnhriatte chu kan ram ngeia hmang ṭangkai tura an duh avangin an zu sặwm a. A awmna State aṭanga Mizorama rawn sawn ngheh a ni ta hial a ni.
Beisei ang ngeiin hna a rawn thawk ṭha nghal a. Rei lo te chhungin a enkawl department-ah hnuhma ṭha tak tak a rawn nei a, ngaihsan leh ngaihnat pawh a hlawh hman hle a ni.
Chutiang officer fel leh senior chu zan hnih khat thil thu-ah Mizoram aṭanga sawn chhuah a ni ta rup mai a. He thil thleng hian Mizoram mipuite min barakhaihin min tithinrim hle a ni.
Hetiang thil a thlen chhan ni-a sawi zinga a langsar ber chu Tripura-a Mizoram aṭanga Bru awmthlặten an awmna hmuna vote thlak lova Mizoram ngeia vote thlak tur an ni a tih vang niin kan hria a. Hei hi Pu Lalnunmawian ama mimal ngaihdan leh duh thu a sawi ni lovin Election Law-in a phῠt dan a ni. Chief Election Commissioner ngei pawhin kum 2018 inthlanah chuan Tripura-a Bru awmte hian Mizorama vote an thlặk tawh tur thu a sawi a ni. Registration of Electors Rules-in a phủt dan chuan Form 6-a dῐltu chuan, “I am ordinarily resident at the address(i.e. constituency)” a ti a. Hei hian vote kan neihna leh kan thlặkna tur chu kan awmna hmun a ni tih chiang takin a sawi a ni. Keinite pawh hian Punjab-a kan awm lai chuan Punjab Electoral Roll-ah kan indah a, chumi hmunah chuan vote kan thlặk mai ṭhin a ni. Vote thlak turin Mizoramah kan lo haw ngai lo. Mizorama Bru awm, Tripura-a kal thlate pawhin vote thlak hunah chuan Mizoram Electoral Roll-a an awmna hmunah an rawn thlak mai tur a ni a. Kum 20 zet Tripura-a awm tawhte chuan Tripura Electoral Roll-a an hming an dah a, an dahna hmuna vote an thlak ve tawh mai a dik ber ang.
Inthlan hi kan ram inrelbawlnaa hun pawimawh ber a ni a. Hetiang hun ralmuang taka neih nana venhim hna thawh hi a pawimawh ber pakhat a ni bawk. Hemi kawnga mawhphurtu berte chu Chief Secretary, Home Secretary leh Director General of Police te an ni a. Anni hian Chief Electoral Officer leh Dy Commissioner, Superintendent of Police te rặwnin venhimna hnathawk tura mamawh zat uluk taka chhủtin Ministry of Home Affairs-ah rawtna an siam ṭhin a ni.
Kan hriat dan chuan tun ṭumah hian Chief Electoral Officer hian D.C. leh S.P. te rawnin ama thuin hetiang rawtna hi Home Ministry-ah a thawn a. Chu chu tihdan ṭha tặwk lo ni-a a hriat thu Home Secretay hian a hrilh a. A chunga kan sawi ang khi tihdan dik Gujarat leh State dangte pawha an tihdan ni-a a hriat thu a hrilh a ni.
Heng thil pawimawh pahnihah te hian Pu Lalnunmawia hian dan zulzui leh tihdanphung pangngaiin thu tlủkna leh rawtna a siam ni maiin a lang a. Dan zulzuia thutlủkna a siamna lama Election Commission/Central Sawrkarin an rawn hrem ta hlauh zawk hi a mak a ni. A phḝnah hian thil inthup a awm niin a rin theih a. Chu chu kan hnam tặna thil pawi thei nia a lan avangin kan hriat chiana tih tur ṭul apiang chu kan tih ngam a ngai a ni.
Arunachal miten Chakma chungchanga buaina a tawn ṭum khan Minister-ah pawh Home Minister ngei mai, Kiren Rijiju khan eng nge a sawi kha? “Hnam thil pawimawhah chuan min vote-tute lam ka ṭang,” a ti thḝn mai kha a ni a. Kan hruaitute hian eng ặw nge an neih ve tawh le?
Pu Kummanam Rajasekharan, kan Governor-a an rawn dah hlim khan a duh lo pặwlte kha chuan RSS pachal a nih ang ngeia inthlan huna an ṭangkaipui tur atana BJP-ten an rawn dah ni-a kan ngaih thu te kan auchhuahpui kha a ni a. Zawlnei kan ni ta deuh ngawt mai chu a nih hi. Lehlamah ‘roreltute chu Pathian ruat an ni’ tih changchawia lo ṭawngṭaisak tặwk te kha an awm a. Khualliana lo insawm chhặwk zut mai tham an awm lehnghal. Ram leh hnam thil pawimawha inthurual hi chu kan zei lohna lam tak a ni fo a nih hi.
Ngaihtuahnaa lo lang pakhat chu, Chief Electoral Officer, Kolasib D.C., Mamit D.C., Lunglei D.C. atan hian inthlan puan hma khan Mizo officer lo dah se, hetiang buaina hi kan pumpelh theih a rinawm. Se bo hnu-a se kawngkhar an tih ang chu kan la ni ḝm lovang chu.
Keiin mimal taka ka ngaih pawimawh ka sawi fo ṭhin, chawmhlawm kutdawh titiha kan awm vanga Central Sawrkar leh mi dang min hrechiangtutena min hmuh hniam vanga engmaha min ngai lohzia lanchianna a rawn ni leh ta hi pawi ka ti khawp mai.
Pu Lalnunmawia, officer senior leh fel kan duh taka kan ram leh hnam tana thawk tura kan dah, dan bawhchhiat awm lo, dan zulzuia a thawhna lama pawi nasa tak khawih niawm taka an hrem hi hriatthiam theih a ni lo. Pu Lalnunmawia tih ang hi West Bengal-a Bengali IAS officer-in ti se, Election Commission-in emaw, Home Ministry-in emaw Pu Lalnunmawia chunga an tih ang hi an tih a rinawm loh a ni. Hnam hnuk khawih thei thil pawimawh a tihna lama Pu Lalnunmawia chunga thil thleng hi amahina a tuar ngawt chi a ni lo. Mizo hnam hian a thlavang kan hauh tur a ni. Hemi kawnga kan kalna lamah erawh chuan ngaihtuahna fῐm tak nena fimkhur taka kan kal a ngai ang.
Intodelh hi kan tum hmasak ber tur leh pawimawh ber a ni a. Chutih hma chuan chặng dang a kặn theih loh. Pawisa a hmanna tura kan hman chuan chu chu awlsam tḝ-a tih theih a ni. He thu mặwl tak, pawimawh tak si, Mizo mipuiten kan hrethiam thei lo emaw, kan zawm thei lo emaw hi mak ka tih leh ka vuina ber a ni.
He thil thleng duhawm lo tak hi mahni ke-a dinga mi dang kuta innghat ni lo ila chuan a thleng lo vang tih hriain inbihchian huna hmanga kan tih tur tak kan tih theih a, hnam zahawm kan nih ve theihna kawng hawngtu lo ni hlauh zawk nan theihtawp i chhuah tlang ang u.

Aside | Posted on by | Leave a comment

MJA TEN CEO PRESS CONFERENCE TEL SAK DAWN LO

Mizoram Journalist Association (MJA) te chuan CEO SB Shashank an press conference November ni 5, 2018 a koh chu an tel dawn lo tiin thu an ti thlu.

Mizoram CEO hmalak dan hi Mizoram a tlawmngaipawl intelkhawm ten an dodal avangin MJA te pawh hian thlawp in an dodal ta a ni.

Aside | Posted on by | Leave a comment

Mizo hmusittu SB Shashak vangin YMA inkokhawm

Ni 3/11/2018 ZAN DAR 8:00PM-AH CENTRAL YMA-IN MIZORAM C.E.O. S.B. SHASHAK VANGIN AIZAWL KHAWPUIA YMA BRANCH TIN AIAWH MI 10 THEUH A KOH KHAWM

Mizo Hnam hmusittu Mizoram Chief Election Officer Pu S.B. Shashak, IAS chu Mizoram NGO’s Co-Ordination Committee-in November 5, 2018 tlai ni tlak hma ngeia Mizoram chhuahsan tura an ngenna bawhzuina turin, zanin (Nov 3, 2018) dar 8:00pm ah Vana Pa Hall-ah EMERGENCY MEETING kohvin, Aizawl khawpui chhunga YMA Branch tin aiawh mi 10 theuh kal turin a hriattir.

CEO S.B SHASHANK, IAS-IN NOV 5 AH MIZORAM A CHHUAHSAN LO A NIH CHUAN NOV. 6 (TUESDAY) ATANGIN A OFFICE KAL TUR DANG TURIN RAJ BHAVAN KAWTAH MIZO TAWH PHAWT CHU PUNKHAWM TUR TIIN, CYMA BUL TUMA AIZAWL KHAWPUI CHHUNG (CITY YMA BRANCHES) ATANGA YMA MEMBERS 10 THEUH KALTE CHUAN AN REL.

MSU GEN.HQRS PAWHIN NOV 5 TLAIAH AN OFFICE-AH “HNAM HNA TLANG” AN KO BAWK.

NIMIN (NOV 3) A CENTRAL YMA EXE-COMMTT EMERGENCY MEETING CHUAN “HNAM CHHAN HNA TLANG” KOH THUT A NGAIH PAWHA CHE CHHUAK THEI TURA LO INRING TURIN MIZO MIPUI LEH YMA MEMBER-TE A BEISEIIN, A HRIATTIR A NI

He pa hi amah aia senior daihte hek hreh miah lo, mi sual tak a ni a. Mizote hmusittu a ni. Vawhlum duh an tam ngawt ta ve ang.

Aside | Posted on by | Leave a comment