GUNFIGHT AT THE OK CORRAL (Mizo version)

GUNFIGHT AT THE OK CORRAL (American showdown history a inkahna hmingthang ber chu)

Khawnge tuntum chu cowboy lam lawm mi te tan American gunfight chanchin a lar ber mai Clantons unau te leh Mc Laury te leh Earps unau, Wyatt Earp,Virgil, Morgan leh Doc Holliday te ho OK Corral a an inkahna ‘GUNFIGHT AT THE OK CORRAL’ tih a khawvel in a a hriat lar hi kan hriat thin dan anga inkahna turu tak hi a lo ni tak tak meuh em tih hi in khel chho tak tak dawn teh ang…

Cowboy thawnthu chhiar thang chuan Wyatt Earp-a te Doc Holliday-a te chanchin hi hrelo kan awm mang awm love. Chutih rual erawh chuan thangthar tam tak leh hmeichhe ho chuan hrelo kan awm nual maithei bawk. He GUNFIGHT AT THE OK CORRAL hi Cowboy hun lai chanchin ah chuan cho leh cho inkahna ah chuan hmingthang leh lar ber ani a. He inkahnah ah hian Earp brothers an tih ho Wyatt Earp,Virgil Earp,Morgan Earp leh an thianpa zu heh vanga hmingthang dentist ni bawk Doc Holliday-a te tangho leh…. .McLaurys te unau pahnih leh Billy Clanton-a te unau pahnih leh an thian thenkhat te chu chhungkaw thil inhmuh thiamlohna avangin OK Corral an tih ah chuan 26October 1881khan an inkap ta a. He an inkah na ah hian Doc Holliday-a leh Wyatt Earp-a te phawi ran zia leh silai kah thiam zia hi hrilh fak a tling a ni. MAHSE he inkahna hi a thawnthu a a hmingthan dan ang hi a tak tak ah chuan a lo turu in a lo ngaihsanawm tehchhiam lovin a lang tlat mai…

A LO IN TAN DAN: Tombstone,Arizona chu khaw bawnra ve tak mai ani a,dan leh thupek kenkhawh vak theih a nihloh avangin nitin deuhthaw mai hian inkahna hi a thleng deuh fo thin ani. 1881 March thla khan sakawr tawlailir pakhat chu rawk a ni a. He tawlailir rawk chungchang ah hian Earps unau te chu rinhlelh an kai deuh hlek a. Hetih lai hian Wyatt Earp chu Tombstone mayor atana in candidate ve a tum lai anih avangin hminghliauna nei thei a ni tlat lo mai. Tichuan tawlailir rawk tute chu Clanton-a te ram ah chuan an biru tih Wyatt Earp hian engtin tin emaw a hre ta a. Tichuan a hminghliauna chinfel nan chuan chung rukru ho chu man a tum ta a.

Ike Clanton-a chu $1000 pe in rukru ho ambush a man dan tur chu ruahman turin a ti ta a. Mahse mak tak maiin rukru ho chu man lova kah hlum vek an ni ta tlat mai. He thil ah hian mi tam tak chuan Wyatt Earp hian rukruk naa a inrawlh ve na hre tu te hup bo nan witness ho chu aman a kap hlum ta a nih an ring ber.. He thil ah hian Wyatt Earp-a hian Clanton te unau hi puh let in thamna a pek te pawh chu vantlang hriatah a puang zar ta a. An inkarah inngeihlohna a lo inmung tan ta. Chutih nak alaiin Clanton-a te pa ber chu Mexico lamah a bawng khalh lai kahhlum a lo ni leh a, hetah hian Wyatt Earp chu inrawlh leh a ngaih a ni a tichuan an chhungkaw pahnih inkar boruak chu a chhe chho ta tial tial mai le…

Clantons unau te hi Earps unau te lakah hian an lungawi thei tlat lo mai. Tichuan 26 October 1881 nilaini chuan Earps unau te awmna Tombstone ah chuan Clantons unau Ike leh Billy Clanton leh McLaury unau pahnih leh an thian pawhraw ve tak tak te chu an lut ta thiau thiau mai. Clanton unau te chuan Earps unau te leh an thian Doc Holliday-a te chungah chuan thil thalo tak a thleng dawn tih hi an lo sawi lawk tawh hrim hrim a. Chumi ni a khua a an rawn lut chu Tombstone khaw mipui te chuan buaina a awm an lo ring nghal..an ring sual dawn lo. Buaina a chhuah hlauvin sheriff chuan Clanton-a te ho chu khua chuahsan mai turin leh khua an awm anih chuan an silai te dahtha turin a ti a, mahse Clanton-a te ho chuan buaina an zawn loh thu a chhangin an silai te chu an dah duh lova. An sakawr te chu OK Corral ah chuan dah in chhun lai vela chulai hmuna rawn kal ziah thin Doc Holliday chu an lo chang ta a. Mahse hemi ni kher hian Clanton-a te khua an rawn lut tih hria in chulama kal lo chuan Wyatt Earp-a te chuan puih an ngaih takin tiin Earps unau te awmna lamah chuan a lo kal hlauh.

Chutah le OK Corral atanga yard 60 vel a hla ah chuan chung unau in haw ran mai ho chu an in tawk ta.(an inkahna hmun tak hi OK Corral ah chiah a ni lo, a tak tak ah chuan) Wyatt Earp-a chuan silai a phawi a a kap ta nghal miah miah mai. Chutia a kah hmasak takah chuan Clanton-a te ho pawh chuan an kap ve ta a… a tirah chuan Clanton-a te ho hian ban pharin kap lo turin an ti a mahse Wyatt Earp-a hian a kah tak miah miah avang hian midang ho pawh hian silai an chuh a an kap let ve ta a ni. An inkah chhung hi a tak tak ah chuan minit khat pawh a tling lo a,tin Doc Holliday leh midang te phei hi chuan an kap ve hman mang lova, silai ri an reh meuh chuan Clantons unau pahnih Ike Clanton leh Billy Clanton bakah McLaury unau pahnih chu an lo thi fel der hman tawh a… a lehlam ah chuan Virgil Earp leh Morgan Earp leh Doc Holliday te chuan hliam na tak an tuar ve bawk.

Tichuan American Gunfight history a inkahna lar ber chu cho leh cho inhmachhawna an inkahna anga kan lo hriat thin chu Clanton-a te ho inringlo lai Wyatt Earp’an a kah thut avanga lo thleng a lo ni reng mai ani.He inkahna hi hetia a lo lar tak em em nachhan hi Wyat Earp’an a kalna apianga a turu thei ang bera a sawi zel thin vang niin chhui tu te chuan an ngai ani…THE END

THU BELH: Wyatt Earp hi thawnthubu velah hian a changtupa,phawirang,huaisen leh silai kah thiam anga sawi ani thi a mahse atak ah chuan mi laktlak loh tak, hna thawh ngai thawk rei thei lo ning zung zung mai mi. Mi inringlo lai kah pawh pawisalo a ni a. Kansas ah te pawh saloon leh nawhchizawrhna in te pawh a lo hawng tawh a. Sakawr ruk vanga man te pawh a lo tawk tawh a. Tombstone ah hian saloon leh gambling khelhna hmun lian ber an unau in an hawng a. OK Corral a an inkah hnu hian Alaska lam ah rangkachak… .zawngin a kal leh a,chutah San Fransisco ah pem leh in nupui a nei a boxing refree ah a tang leh a,refree a a tan lai hian a chak tur zawk ruat lawk tih vel chungchangah a hmingchhe leh zek a,a awmna hmun apiangah hian OK CORRAL a an inkahna chungchang hi a turu thei ang ber in a sawi zel bawk a. A tawpah 1929 khan Los Angeles ah putar kum 80 mi dawheh tak niin a thi ta a ni..

A CHE CHANGTUPA VAK LO.

Aside | Posted on by | Leave a comment

CENTRAL BUREAU OF INVESTIGATION (CBI mizo version)

By ~Atea Thihlum

CBI hi India ram a hnu chhui hna thawktu lian ber an ni a Ministry of personnel, Public grievances leh Pension dept.te thu neihna hnuai a hnathawk tu a ni. He pawl hi an hotu ber Director hnuai a awm niin Economic crime, Special crime, Corruption case te bak ah milian leh milar te dan bawhchhiat na chhui tu ti a hriat a ni bawk.CBI office hmunpui hi ‘Lodhi road’ New delhi a awm a ni. He hnuchhui tu pawl hi a tir ah chuan ‘The Special police establisment’ tih a ni a, central gov’t police force a ni, kum 1941a din a ni a indo lai a bungrua eng engemaw supply chungchang a thamna awm te leh eiruk na chungchang te chhui tura din a ni.

An hqrs hi Lahore ah awm in an SP chu Khan Qurban Ali khan a ni a, a hnu ah India leh Pakistan ṭhenhran a nih khan a ni hi Pakistan lam ah a awm ta zawk a ni. Indo a tawp hnu ah pawh Central gov’t hnuai a hnathawk te thamna leh eirukna te chhui zel tur mamawh an nih ang in an hna chu chhunzawm tir zel an ni a, kum 1946 ah chuan he pawl hi Home dept.hnuai ah Delhi Special police Establishment ti a dah luh an ni ta a DSPE hnathawh theih chin huam chhung pawh tih len leh tih zauh niin gov’t of india hnuai a dept.zawng zawng te chu huam tir vek an ni.

Hei bak ah hian an huang chin chu ti zau zel in Union Territory te pawh huam tel tir an ni a, a hnu ah State hrang hrang gov’t te pawh an state chhung ah hnathawh tir an rem ti a nih chuan hnathawk thei a an huang zauh tir zel an ni bawk. Ni 1/4/1963 ah chuan Home ministry rawtna ang in DSPE chu Central Bureau of Investigation (CBI) ti a hming thlak a ni ta a, India ram a hnuchhui tu lian ber lar ber leh hmingthang ber an lo ni ta a ni. CBI te hi an hna pangngai bak ah pawikhawihna ṭhenkhat tualthah inrukbo te leh terrorism te pawh chu khawi tel tur a ngen an nih ang in an hma tel bawk. Tin Supreme court bakah ramchhung High court engemawzat te pawhin thubuai hrang hrang chhui tur te chu an kut ah an hlan ṭhin ta bawk a, tun hnu ah phei chuan an mahni pual in special court hial an nei.

Kum 1987 ah CBI chu hlawm lian pahnih ‘The Anti-corruption devision’ leh ‘The Special crimes division’ ah te ṭhen an ni a, He pawl bawn zet hi Director enkawlna hnuai ah awm in chu chu IPS post niin Director General of Police rank a ni. Director te hi CVC act 2003 tlawhchhan in kum 2 chhung atan thlanchhuah ṭhin an ni a, CBI Director hnuai ah hian IRS (Indian Revenue Service) officer te leh IPS te chuan Special Director, Addl.Director, Joint Director, DIGP, SSP, SP, Addl.SP, DSP, INSP. SI, ASI, HC leh Costable hna te chelhin SSC kaltlang a recruit an ni.
Heng ho bak ah hian a chang chuan Police, Income tax leh Custom dept.aṭang te in hun bik nei a hnathawk tur lak an ni bawk ṭhin. Delhi Special Police Establishment Act chu siam ṭhat a nih ang in, CBI Director tur te ruat tur leh thlang chhuak turin selection committee hnen ah thuneihna a pe a chu committee ah chuan Prime minister chu chairperson niin opposition leader chu member a ni. Tin Chief justice of india emaw a aiawh tura a ruat Supreme court judge tu emaw chu member a ni bawk.

Committee in CBI Director thar an thlan dawn hian Director kal chhuak mek chungchang te pawh an ngaihtuah tel vek ṭhin. A hma chuan Director hna ruat chungchang hi Central vigilance commissioner in CVC Act hnuai ah a ti ṭhin a, a hnu ah Lokpal leh Lokayukta Act 2013 hnuai ah Prime minister kaihhruai selection committee hi din a lo ni ta a ni. New delhi a CBI hqrs.office ‘State-of-the-art 11story’ an tih chu ₹186crore seng a sak a ni a, he office building lian zet hi Agency branch zawng zawng te chuan an luah vek 7,000sq.m (75,000sq.ft) zet a zau he office hi tunlai inbiak pawhna changkang ber ber a thuam a ni.

Tin advanced record-maintenance system, storage space, computerised access control te bak ah khawl leh hmanraw thar ber ber te interrogation room, cell, dormitory te bakah conference hall te an awm. Heng bak ah hian mi 500 lenna staff cafetaria a awm bawk tin mipa leh hmeichhe tan gym te leh terrace garden te a awm a, building hnuai ber chu lirthei 470 dah na a ni. Heng zawng zawng bak ah hian he building hi advance fire control leh power backup system hmang a thuam vek a ni a, tin press briefing room leh media lounge te pawh an awm bawk.
Kum 1996 ah Ghaziabad, Uttar pradesh ah CBI hian Academy an din a, he academy hi New delhi railway station aṭang a 40kms a hla leh Indira gandhi international airport aṭang a 65kms a hla ah a awm. 26.5 acres(10.7ha) a zau he academy campus ah hian mual, thlai leh thingkung chinna hmun te leh in, hostel leh chenna hmun te a awm. Tin he academy bak ah hian Hyderabad a State police training institution leh The Sardar vallabhbhai patel national police academy te chu DSP, SI leh constable te basic training course neih nan CBI te hian an hmang ṭhin bawk. He academy ah hian CBI mi leh sa rank hrang hrang te training na tur thil mamawh a awm a ni.

Tin CBI te bak ah hian state police, central police organisation, bank leh gov’t dept.hrang hrang te bak ah indian armed forces te leh public-sector vigilance organisation te tan training theihna tur engkim a awm vek bawk. Dan ang chuan CBI mi leh sa, Sub inspector chunglam te chu Police station officer in charge (OC) an ni thei vek. Amaherawhchu CBI te hi central gov’t in hriattirna leh phalna a pek chauh in case chhui theihna an nei thung. Central sorkar hnathawk dan bawhchhia te central public-sector undertaking leh public-sector bank hnuai a hnathawk te pawh an chhui thei. Tin gov’t of india hnuai a thamna leh eiruk na, inbumna lian tham te leh pawisa eiruk na te bak ah state engemaw zat a dan bawhchhiatna nei leh inhnamhnawih te, agency tam tak leh khawvel huap case nei te thleng in an chhui thei.
Supreme court a judge 5 te awmna constitutional bench thuthluk na ang in state thunei tu te phalna tello chuan state chhung a pawikhawihna hrang hrang te leh dan bawhchhiatna te chu CBI hian an chhui theih loh thu chu Supreme court leh high court te chuan order an nei thung. CBI te hian ramchhung leh pawn a case lian tak tak chin fel tam tak an neih laiin case an khawih ṭhenkhat ah te chuan inhnial na tam tak awm in sawisel an kai nasa hle thung. heng case – Bofors scandal, Hawala scandal, Priyadarshini mattoo murder case, Sister Abhaya, Sohrabuddin case, Sant singh chatwal case, Malankara varghese murder case, Bhopal gas tragedy, 2G Spectrum case, Indian coal allocation scam, 2008 Noida double murder case.

Khing CBI in an khawih case lian tak tak ah te khian sawisel an kai in case ṭhenkhat ah phei chuan an mualpho hle a ni. Mahse tam tak ah hlawhtlin na an chang ṭeuh tho, heng kum te hi CBI in high conviction rate an neih te chu an ni. 2011 – 67%, 2010 – 70.8%, 2008 – 66.2%, 2007 – 67.70%. Taka CBI Director hmasa ber hi D.p kohli niin tuna Director ni mek chu Alok verma, mizoram ah pawh DGP lo ni tawh kha a ni a, a ni hian 1feb,2017 aṭang in Director hna hi a thawk ṭan a ni.

Source : https://en.m.wikipedia.org

(Tunhnai hian ram pum nghawrnghing dawt khawpin CBI Director leh Spl.Director te chu eiru a inpuh in an hna aṭang a chawlhtir mek an ni.

Aside | Posted on by | Leave a comment

ADDL. CEO HOVIN ELECTION TELECAST 2018 TUR PAWT

Election Commission of India-in a phal angin political parties-te chuan sorkarin a phalsak media pahnih – All India Radio & DDK – kaltlangin mipuite hnenah thusawina hun siam sak an ni dawn a. He ‘Election Telecast 2018’ atana political party hrang hrang ten AIR leh DDK-a an lanna tur ni leh hun (dar zat) tur chu vawiin khan Addl CEO Pi lalzarmawii, IAS hovin ama pisaah an pawt a ni.

Addl CEO chuan heng media pahnih kaltlanga Election Telecast hi kum 1998-a Lok Sabha inthlan atang khan hman tan a ni a, khami kum vek khan state elections-ah pawh hman phalsak a ni nghal thu a sawi a. National leh recognised party-e tan chuan minute 15 lai hun pek a ni a, a dangte erawh chu minute 11 te, minute 8 leh minute 5 te pawhin an sem a ni, a ti. Election Telecast atana an thusawi turte chu a hmain thehluh a ngai vek dawn a, chu chu mipuite ngaihthlak atan a him tawk em tih endik duh tur Committee pawh din a nih tur thu a sawi bawk a. Political party-te chuan an thusawiah ramdang sawichhiatna lamte, sakhua emaw hnam insawichhiat sak lamte, khawtlang leh ramchhungah innghirnghona tichhuak the zawng thil emaw, Court hmuhsitna te, rampum inpumkhatna tichhe zawngte emaw mimal tu emaw hmingchhiat khawpa a chanchin duhawm lo tak tak sawichhuate chu khap tlat a nih thu political party aiawh lo kalte a hrilh a, fimkhur taka an thusawite chu media kaltlanga mipui hriat tura puanzar a nih theih nan an tawngkam hmante uluk lehzual turin a chah a ni.

Political Party hrang hrangte Election Telecast hi ni 9/11/2018 leh ni 26/11/2018 inkarah tihchhuah vek a ni ang.

DIPR

Aside | Posted on by | Leave a comment

INTHLANPUI LO AWM TUR A CABLE TV NETWORK LEH TELEVISION CHANNEL KALTLANGA POLITICS KAIHHNAWIH ADVERTISEMENT TIHCHHUAH DUH TANA HRIATTUR PAWIMAWH

Election Commission of India in dan alo siam tawh sa angin Mizoram Assembly Election neih tur inpuahchahna kal mekah Political Party/Candidate leh mimal, pawl etc. in Cable TV leh Television Channel kaltlanga inthlan kaihhnawih advertisement chi hrang hrang (thusawi /zai/ drama/ animation etc.) man chawia tihchhuah tur an neihin heng a hnuaia mi te hi an zawm tur a ni :

  1. Cable TV/Television Channel kaltlanga tihchhuah tura an duh audio/visual items te chu an awmna District Media Certification and Monitoring Committee hnen atangin phalna an la tur a ni a, District tinah District Bawrhsap Chairman na hnuaiah he Committee hi din a ni.
  2. Recognised National/State Party, Registered leh Unregistered Party leh inthlan chuhtu Candidate ten audio/visual advertisement tihchhuah an duh anih chuan a chhuah ni tura an duh ni thum hmalamah dilna an thehlut tur a ni.

  3. A chunga tarlan nilo mimal, pawl etc. in inthlan kaihhnawih thil audio/visual items Cable TV/Television Channel a tihchhuah an duh anih chuan tihchhuah ni atana an duh ni sarih (kar khat) hmalamah dilna an thehlut tur a ni.

  4. Dilna hi Election Commission of India in application form a ruahman sa hman tur a ni a, District Media District Media Certification and Monitoring Committee office ah emaw DIPR website dipr.mizoram.gov.in/post/inthlanpui-lo-awm-tur-a-cable-tv-network-leh-television-channel-kaltlanga-politics-kaihhnawih-advertisement-tihchhuah-duh-tana-hriattur-pawimawh ah download theih a ni.

  5. Audio/visual item tihchhuah tur chu CD/DVD copy pahnih application form rualin thehluh tur a ni a, District Media Certification and Monitoring Committee in uluk taka a thlir hnu a phalna Certification of Advertisement a pekchhuah rualin copy khat hi Cable TV/Television Channel a tihchhuah turin pek kir leh tur a ni.

  6. Audio/Visual Advertisement dilna lut te phalna pek leh pekloh thu ah District Media Certification and Monitoring Committee in thu a nei ang.

  7. District Media Certification and Monitoring Committee thutlukna a lungawilo tan State-level Media Certification and Monitoring Committee ah thlen theih a ni.

DIPR

Aside | Posted on by | Leave a comment

BJP Candidate Dr LR Colney chu Mission for Christ EM a nihna an hlip

Mizoramin hun pawimawh tak mai – “Mizoram State Assembly Election, 2018” kan hmachhawn mek a, he Election hian boruak hrang hrang a rawn keng a, keini Mission For Christ pawhin tawngtai leh Pathian aw ngaithla chungin he hun hi kan hmachhawn mek a ni.

Kan rawngbawlpui leh Executive Member nilai Rev. Dr. L.R Colney chu BJP Candidate tura ruat a nih thuin min rawn thawng thut mai a, he thil hian kan hmalakna leh rawngbawlna peng hrang hrangah harsatna a siam theih avangin Rev. Dr. L.R Colney chungah thutlukna harsa tak kan siam a lo ngai ta a, vawin October ni 28, 2018 atang hian Mission For Christ Executive Member a nihna hlihsak a ni.

Sd/-
Gen. Secretary
Mission for Christ.

Aside | Posted on by | Leave a comment

HIV/AIDS AH MIZORAM SANG FILAWR

Zirbingnain a tarlan danin Mizoram chu HIV/AIDS vei tam lamah a sang lawr lak a, mi cheng 2.04%-in AIDS/HIV an vei mek a, he natna hian mimir (general population)-ah bu a khuar nghet tawh hle niin tarlan a ni bawk.

National AIDS Control Organization (NACO) chuan HIV Estimate 2017 tichhuakin 2018 thlirlawkna a ni a,micheng 2.04% chu HIV/AIDS vei an ni mek a, Mizoram chu India ramah a sang berah awm mekin 1.43% in Manipurin a dawt a ni.

Ram pumah tlakhniam a pan laiin state 5-ah la pung zel a- Arunachal Pradesh (65%), Assam (37%), Mizoram (18%) Meghalaya 10% leh Uttarakhand-ah 4%-in 2017-ah a pung a. Manipur leh Nagaland-ah chuan HIV vei thar hi 10%-in a tlahniam thung a ni.

Kohhran heti zat kan awm a. Zan tin deuh thaw kan inkhawm a. Hindu ho pawh kan tluk lo hi chu Kohhran hruaituten zah nachang hre teh se. – Mizo Archive

Aside | Posted on by | Leave a comment

SUPREME COURT THUPEK ANGIN MLA CANDIDATE THUBUAI NEI TEN AN THUBUAI NEIH DAN MEDIA-AH AN PUANZAR A NGAI

Supreme Court thupek angin, MLA Candidate thubuai lo nei tawh thin leh nei mek te chuan an dinna Constituency chhunga chanchinbu lar leh darh zau ber berah leh TV channel-ahte, an thubuai neih dan chanchin kimchang an puangzar ngei tur a ni.

Supreme Court of India in Judgement order a chhuah zulzuiin, Ministry of Law & Justice, Govt, of India chuan thupek a chhuah a. He thupek (Notification) ang hian, Candidate, thubuai lo nei tawh thin (convict cases) leh nei mek (pending cases) chuan an dinna Constituency chhunga chanchinbu (Newspapers) lar leh darh zau ber ber bakah, T.V. channel-ahte, an thubuai neih dan chanchin kimchang puanzarna (declaration); a tlem berah ni thum (3) chhung tal Format C-I hmang hian an ti chhuak tur a ni.

Kumin MLA inthlanpui bikah chuan Nov 15.2018 – Nov 26.2018 hun chhungah ni thum (3) chanchinbu ah chhuah tur a ni. Criminal case’ puanzarna hawrawp len zawng hi Font size 12 aia te lo a ni tur a ni a, chanchinbu chhiartute hmuh awlsam theihna laiah tarlan tur a ni.

Thubuai nei Candidate chuan, a thubuai neihdan kimchang puanzarna chanchinbu copy-te chu, District Election Officer hnenah Election Expenditure Account thehluh rualin an thehlut ve tur a ni.

Political Party-te chuan Criminal Case nei Candidate-te thubuai kimchang puanzarna chu an nei ngei a ni tih finfiahna report, Chief Electoral Officer, Election Dept hnenah chuan, declaration puanzarna chanchinbu phek cheh thlak an-chilh tel tur a ni.

Thubuai nei Candidate chungchanga puanzarna (declaration) siamna huamchhung hi Candidate tan, a dinna Constituency chhungah a ni a; Political Party tan State pum huapin puanzar tur a ni.

Aside | Posted on by | Leave a comment

RILRU CHIANG ZAN LO TLANGVAL LEH NULA KEBUL INHMANGAIHNA CHU

Kum 10 mi leka upa anih laiin Lalmalsawmi Thingdawl khua chu motor in a chil avangin,a ke dinglam chu a khup hnuaiah an tansak a.An mahni hi chhungkaw khawsak harsa tak niin,thingtlang lo neia eizawng, kham khawp thar chhuah loh chuan chuti hlauh dinhmun a ding an nih avangin, lehkha pawh pawl thum(3) thleng bak a zir thei lo a ni.

Thil engkim a hria a, nulat tlangval inngaihzawnna awmzia pawh a man thiam vek a, a takin a tawnglo mai pawh a.A chhan chu chhia a inti bik em em a, ke khai vu vu chuang a mi zing a awm pawh a zak a, a inkiltawih a, a thian ten an bialpa te a bula an rawn hruai thin tih mai loh chu tlangval dang bulah pawk a awm duh lem lo.

A vanduainaah chuan lungawi har a ti a, “Mi anga awm ve theih ka va han chak tak em! hetia awm reng chu a hreawm em mai” tiin a rilru chu a na thin hle a, rual awhna te pawh a nei nasa ve hle thin. A ni, kebul,rethei si chu tu khaw kha mahin an hel dawn lo tih a hria a, phu tawk beisei tur pawhin phu tawk neiin ain hrelo a, chan tawk a lungawi tumin hma ala ta zawk a ni, ava lainatawm tak em.
Kum 21 a rawn tling ve ta. Vanduai ber ni a in ngai te pawh ensan velo tu kan Pathian chuan amah hmangaihtu tlangval a rawn pe ta! chu tlangval chu ani pawhin a hmangaih a, “Hei zet chu Lalpa min pek anih dawn hi,” tiin hun rei tak, bialpa chanchin sawi tur nei lova lo awm tawh chuan mut hmunah duhthusam a, phur takin, lungleng veng veng chungin a ngaihtuahna a kawm ve tan ta a, midang a ngai tawh bik lova a thian ten bialpa an neih pawh a awt tawh bik hek lo.

Thingdawl tlangval Lal David-a chu tawng tlem tak a ni a, tawng mawilo nilo sela, huihphai lam deuh a ni. Chumi chu ni, Sawmte-i bialpa chu ni! An inngaizawng tih miin hria in mak pawh lo ti viau mahse, an pahnih a inkar ah chuan a mak na pakhat te pawh sawi tur a awm lova, Hmangaihna Mitdel an lo tih thin hi anni tan chuan Hmangaihna duhawmah a lo chang ta zawk a ni.

Lal David-a U, Pu Lalherliana chuan, “An in hmangaih dan em em hi a mk zawk hial ani. An in duat thiamin an inzahtawn em em a, an induh leh lutuk hi a buaithlak zawk a ni,” tiin hmangaihna an laknat dan chu a sawi a. An inneih tak dan pawh ti hian a sawi a, “May 27, 2011 a ni a, ka nau leng chu a rawn haw mai loh avangin kan va zawng a. Chutah le an hmelhriat te inah anlo tlan ve chu niin, ka nau chuan,”Duh leh an inah ka awm rih phawt mai ang,” ati a. An inru chu ani mai si a, a duhdan chu kan zahsak a, kan hawsan leh ta mai ani,” tiin anau te in ruk dan chu a sawi.

An dinhmun an in hrechiang a, an chan chhiatzia pawh an hai lo. An inthlahrun em avangin, veng mawng tawpah cheng 50 man mi inhnuai chu luahin an indang ve tawp ani. A khat tawkin an chhungtye in chu an tlawh ve reng a, an ni chuan chawei ah te pawh lo sawmin an duat em em thin. An hmalam hun an thlirpui erawh chuan an lungngai ru bawk si a, an rilru a buai tlang hle thin.

Lal David-a pawhin a dinhmun chu a hrechiang ve a, a nupuiin hna a thawh theih loh avangin a phak ang tawk tawkin a duat ve a, Gas hman tur an neih ve loh avangin thing tuah tur te hi a pu khawl a, rap chunga thing inchhek khawl ve nual chuan an lung a tiawi tawk ani. Inhlawhna a hmuh apiangah iptepui phe hlawk hlawkin a tlan dawr dawr a, thingzai a putna lamah a darte chu pilh phung mahse, a nupuiin tuilumin a deh sak leh dawn tih a hriat avangin hrehawm a ti lo. Hna hrehawm ber thawk chungin nupa hlim nih hlutzia an zir chho mek zel ani.

Thil han chhuan tur engmah an nei lova, an inhmangaihna chauh lo chu! Chuti chung chuan bul an tan chu a ni si a..

An chhungte rilru buaina ber pakhat chu hei hi a ni- “Fa te an lo neih ve chuan engtin nge an khawsak ve tak ang? Fa enkawl tur chuan an lainatawm em em a, kan in lamah la chho dawn ila, a inthlahrun vang nge ni dawn an duh bik silo, an hmalam hun hi ngaihtuah ngam pawh a ni meuh lo'” tih hi ani. Fa an neih pawhin anmahni enkawl tu tur pawh a ni thei a, a engamah hmaa lo huphurh pui ringawt chu a dik ber lo maithei e.
Aside | Posted on by | Leave a comment

Sialkal group yma in kawng enfiah

Inrinni kalta khan Sialkal Group YMA chuan CYMA leh Mizoram PWD in thawh dunna an ziah ang in Ngopa atanga Mimbung kawng siammek an endik a, Bialtu SDO PWD lam atang a teltur erawh an tel thei lo a ni.

Sialkal Group YMA a tang a kal te hi Project Engineering Pu.Malsawmkima’n kawng siammek nih phung tur leh thil tul leh pawimawh hrang hrang hrilhfiah in an harsatna tawh mek thenkhat te lo hrilh a, Sialkal Group YMA pawh in an kawng hi kum 1995 chhovel a BRTF in an laih tlang leh ansiam chumi hnu a siamthat tawh loh tuna CT Mawia Construction Company in he hna an thawh leh a ni thu an sawi a, Mipui lam atanga harsatna an tawh pawh in puih an in huam thu an hrilh bawk a ni.

November thla tawp lam a tang chuan Mimbung lam a tanga Black topping tih theih an in rin thu pawh Pu. Malsawmkima Project Engineering chuan a lo hrilh bawk a ni

Aside | Posted on by | Leave a comment

MBDPF in an camp chhunga vote thlak leh Mizoram electoral roll a thun belh an dil

Tripura relief camp 6-a Bru awmte insuihkhawmna pawl MBDPF chuan an camp a vote thlak leh Mizoram electoral roll a thun belh an dil leh.

October ni 1 aṭanga sorkar laipuiin Tripura relief camp a Bru chhungkaw awmte a thlawna eitur leh sumfai ṭanpuina a pek ṭhin a tihtawp hnu a tunhnaia pek chhunzawm leh a nih hnu lawk khan Mizoram Bru Displaced People’s Forum (MBDPF) hotute chuan Mizoram chhunga vote thlak lova Tripura a an camp-a vote thlak leh electoral roll a hming thun belh an dil leh a. Chief Election Commissioner Om Prakash Rawat leh Mizoram chief electoral officer S.B. Shashank hnenah lehkha thawnin camp-a Bru hming 200 vel chu paih niawmin an sawi a. Hei bakah hian kum 18 tling tharte thun belh ni se an ti bawk a. Chhuan lam hrang hranga siamin relief camp-ah ngei vote thlak an ngen a ni.

MBDPF president Pu A. Sawibunga leh general secretary Bruno Msha te hming ziah hnan lehkhaah hian August ni 23 khan mi tu tih hriat lohte’n Mamit district Election office aṭangin Bru vote nei hming thunna tur lehkha chu ru chhuakin an tichhia niin an sawi a. Hetiang thil thleng avang hian vote nei tam zawk hi hmeichhia leh kum upa lam an lo nih bawk avangin Mizoram chhungah chuan muanawm leh thlamuang takin vote an thlak thei lovang tih an hlau tih an tarlang a. Hemi avang hian relief camp chhungah ngei polling booth siam ni se tiin an ngen leh a ni a. A hma a sorkar laipui a an thu thlenah chuan October ni 1 aṭanga eitur an dawn tak loh avangin an rilṭam a, Mizoram thleng thei an ni lo tiin chhuanlam an siam tawh bawk.

Bru hruaitute chuan relief camp-a awmte electoral roll ennawnna atana Mamit aṭanga official kal turte chu August ni 10 khan Zawlnuam-ah YMA hovin an lo danga, relief camp an thleng thei ta lova. Mamit district bawrhsap chuan form 6, 7 leh 8 te hi e-mail hmangin relief camp-ah a thawn a. Chutah chuan Mamit district mi 4,241, Lunglei district mi 692 leh Kolasib district mi 381 te hming thun belh tura rawtna a awm a. Chu’ng form te chu August ni 23 zan khan ruk chhuaha hal chhiat vek a ni, an ti. Hetiang a nih avang hian Mizoram chhunga vote thlak chu an tan a ralmuang lo niin an sawi a ni.

Mizoram election department hotute chuan electoral roll a thun belh tura dilna hi thil kallai mek a ni an ti a, a hranpa a hetianga dil pawh a ngai lo niin an sawi a. Bru hote’n Tripura relief camp-a polling station siam a vote thlak an dilna chu Election Commission in a pawm sak an rin loh thu an sawi a. Kum 2014 April ni 7 a Election Commission-in a lo intiam tawh angin Assembly leh Parliament inthlanah chuan relief camp a awmte hian Mizoram chhungah ngei vote an thlak tur a ni tih a ni a, hei hi an dinna a la nih reng thu an sawi a ni.

Aside | Posted on by | Leave a comment