DAMDAWI CHI HRANG HRANGA SIAMNA BAWLHLO ASCORBIC ACID TAM THAM TAK AIZAWL CUSTOM DIVISION TEN AN MAN

Nimin 10th August, 2017 chhun dar 1 vel khan Aizawl Custom Division chuan Vairengte Zalen venga Pu Lalbiakzuala in sak lai hnuaiah Ascorbic Acid bag 690 zet an man a, tukin zing khan Aizawl lamah phurh chhoh nghal a ni.

Thudawn danin Ascorbic Acid an manna Inneitu, Pu Lalbiakzuala nupui chuan heng Ascorbic Acid te chu Monoia nupuiin dah lawk a rawn dil avanga dah tir an nih thu a sawi a, karhnih khat chauh dah tir turin an in bia a, mahse thla thum chuang an dah thung nia sawiin, heng bungrua te hi an pekna lam tur an la in peih loh avangin an la la chhuak lo niin Pu Lalbiakzuala nupui chuan a sawi.

Custom lam hian an thudawn bawhzuiin Nilaini tlai lam khan Pu Lalbiakzuala in hi an enfiah a, hetah hian Ascorbic Acid hi bag 690 a awm a, bag khatah hian box pahnih zel awmin box 1 hi Kg 25 a ni a, Ascorbic Acid an man zawng zawng hi Kg 34,500 a ni a, Aizawl custom lam chuan Ascorbic Acid hi kg khat cheng engzat man chiah nge an la hre thei rih lo a ni. Hetih lai hian tunkar tir lama Directorate of Revenue Intellegence (DRI) lamin Ascorbic Acid an man kha kg khat Rs 800 niin an sawi thung. DRI lam hriat dan ang chuan kg 34,500 hi (cheng vbc 2, nuai 76 ) Rs 2,76,00,000 man a ni.

Tunkar tir lam khan Monoia kudam Fieldveng atangin Ascorbic Acid te hi kg 88,000 chu DRI lam ten an lo man tawh a, hei hi Rs 7,04,00,000 man hu a ni a, DRI lam hian Silchar lamah an lo phur thla tawh bawk a ni.

Thudawn danin Ascorbic Acid te hi damdawi siamna hmanrua a ni a, hemi hmang hian damdawi chi hrang hrang siam theih a ni a. Ascorbic Acid hi phalna neite chauhin an kawlin an lei thei a, ramdang atanga lakluh phal a ni lo tih thudawnna chuan a sawi bawk.

Ascorbic Acid hi Vitamin C kan tih hi ni awm tak a ni

Author :

Advertisements
Aside | Posted on by | Tagged , , | Leave a comment

LEIMININ THEKTE CHHUNGKAW 5 TE THLAWHHMA A TICHHE VEK, CHHUNGKAW 6-TE THLAWHHMA MIN CHHE MAI THEI DINHMUNAH A DING

Thawhlehni kalta zan thimhlim khan Champhai District chhim tawp, Khawbung RD Block huam chhunga Thekte khuaa loneitu chhungkaw 5 te lo chu leiminin a tichhe vek a, chhungkaw 6 te lo pawh min mai thei dinhmuna a awm avangin ninim khan ram riah chhunzawm thei lovin an haw.

Leiminin Thekte thlawhhma a tihchhiat hi nimin khan Thekte VC leh YMA hruaitute’n a hmunah kalin an enfiah a. Chhungkaw 5 te’n an kumkhat thawh rah seng tura an thlir mek an thlawhhma chu chhe vekin, chhungkaw 6 te lo chu min mai thei dinhmunah a ding niin an sawi a.

Thekte hian kumin lo bawh atan Thalhrik Mual, Lurhtlang bulthut, Tiau Lui kam an nei a. Lei a chet lai hian leiminna hmuna loneitute chu an insaseng hman a, an thawmhnaw leh thlam bungbel erawh chuh hman lovin leimin hian a chhilh fai ta vek a, thenkhat chu haichhuah theihin a awm niin a hmuna tlawhtu Thekte VC leh YMA hruaitute chuan an sawi.

Aside | Posted on by | Tagged , , | Leave a comment

Samţuak tihreh dan

I kum mil lo khan i sam a țuak pawh a ni thei a, kum upa lam deuh tawh samțuak nei tan pawh, a ţuak tih reh dan țha ber chu.

1. Sunhlu-hnah i la ang a, niah phoro rawh, tichuan a ro ta maw tihah i deng phut ang, i den phut kha fian (teaspoon) khat a ni tur a ni. Chuan limbo/nimbu (lemon) pumkhat kha a tui i sawr ang a, i pawlh ang. Tichuan i lu vun zawng zawngah i hnawih ang. Minutes 20 hnuah fai takin i su leh ang. Kar khatah vawi 2 tal ti ţhin rawh. Reiloteah i samţuak chu a bo vek ang.

2. Thingpuife kha tuiso-ah i chiah ang a. Tichuan chi (salt) tlemin i phul ang a, a sa tawh lo maw tih velah chumi tui chuan ilu chu i su ang. Minute 20 vel i su/i chiah ang.Tichuan tui thianghlim nen i sufai leh ang.

Number 1 na emaw, Number 2 na zawk emaw i duh zawk zawk i hmang thei. A pahnih hnih chuan tih loh tur.

Aside | Posted on by | Tagged , | Leave a comment

Aizawl Hospital leh Care Hospital te sorkar pawmpuina tihtawp a ni.

Aizawl Hospital leh Care Hospital, Aizawl te chuan RSBY a bill tura BPL te an admit duh loh avangin Mizoram Sorkar chuan heng hospital pahnihte a recognise-na chu nimin August 10 atang khan a titawp.

Mizoram sorkar chuan Nimin a hriattirna a tihchhuah ah Aizawl Hospital & Research Centre, Khatla leh Care Hospital, Dawrpui te chu mi rethei zawk, BPL damlo te manman zawka an inentir theihna RSBY chu an pawm duh lova, sorkar recognition atan hospital te’n RSBY hi an hmanngei a ngaih si avangin an recognition hi nimin atang khan a hlihsak ta a ni.

Health Secretary Lalrinliana Fanai thu chhuah tarlan danin Mizoram sorkar leh Mizoram State Health Care Society (MSHCS)-te’n RSBY hi hmang ve ngei turin Aizawl Hospital leh Care Hospital te chu an lo ngen tawh thin a, mahse, damdawi in te hian an zawm duh lo a, An chungchang hi July 11, 2017-a Chief Minister Lal Thanhawla kaihhruaia Mizoram State Health Care Society Governing Body meeting vawi 15-na chuan a ngaihtuah a, sorkar ngenna anngaihpawimawh duh loh avangin heng damdawi in te recognition chu a hlihsak ta a ni a ti.

Heng damdawi In pahniha sorkar hnathawk leh an chhungte inekawlte chuan sorkar-ah Medical Reimbursement an bill thei tawh dawn lo a, Sorkar hnathawk ni lo te tan pawh Mizoram State Health Care Society ah pawh a bill theih tawh dawn loh ti a ni.

Hetihlai hian notification chhuah a nih hma zawnga heng damdawi ina lo inentir tawh te erawh a huam lovang.

Sorkar hian health care bill hi a ba nasa hle nia hriat a ni a. Bill la tur hian Hun rei tak nghah a ngai bawk a ni awm e. Hei hi private hospital tan chuan a tihchi lo hle thei ve tho a ni.

Aside | Posted on by | Tagged , , | Leave a comment

ENGATINGE KAN LA HARH ZAWH LOH? India citizenship neih dan.

India ram khua leh tui ni leh ni lo te hrilhfiah tu dan The Citizenship Act, 1955 in a sawi dan chuan:

1. Mi tupawh India rama Jan 26, 1950 leh July 1, 1987 (July1 hma) inkara a pian chuan India ram khua leh tui an ni angtih a ni a. Naupang nu leh pa te kha foreigner emaw dan lova Mizoram rawn lut illegal migrant an nih pawhin India ram khua leh tui nihna an nei a ni.

June 29, 1987 khan Bangladesh atanga rawn lut ru Chakma nupa awm ta se, a tuk June 30, 1987 zanlai dar 12hmain Tlabung damdawiinah nau nei ta se an fa chu danin India khua leh tuiah a pawm a ni.

2. Mi tupawh India rama July 1, 1987 leh December 7, 2004 inkara piang, a pian laia a nu emaw a pa emaw India ram khua leh tui a nih chuan danin India khua leh tuiah a pawm a ni.

Pi leh pu te atanga Mizorama lo khawsa tawh Chakma nula hian Jan 2004 khan Bangladesh atanga Mizoram rawn lut ru Chakma tlangval pasalah nei ta se, nau paiin an fa chu December 6 zanlai pelh hmain Chawngte-ah piang ta se, a pa zawk kha Chakma foreigner pawh ni mahse India ram leilunga a pian avang leh a nu kha India ram khua leh tui a nih avangin Indian citizenship a nei a ni.

3. Mi tupawh India rama December 6, 2004 hnua a pian chuan India khua leh tui a ni a, amaherawhchu a pian laiin a nu leh pa te kha India khua leh tui ve ve an nih emaw a pakhat zawk India khua leh tui niin a pakhat zawk dan lova India rama awm (illegal migrant) a nih loh a ngai.

Chakma nupa Bangladesh atanga Mizorama rawn lut ru awm ta se, Dec 6, 2004 khan fa nei ta se, an fa chu India khua leh tui a ni thei lo. A chhan chu anmahni ber dan lova India rama rawn lut (illegal migrant) an nih vang a ni.

He’ng te hi India ram leilunga pian avanga khua leh tui nih theihna te a ni a. Kan ramah hian Chakma zingah an pi leh pu te atanga lo awm tawh, Mizo tawng pawh thiam bel em em, Mizo te nen pawha inpawh tha tak tam tak an awm laiin dan bawhchhiaa rawn lut engemawzat an awm tih hi electoral roll atanga paih engemawzat an awm tawh thin atang te hian a chiang em em a. Chuvang chuan anmahni Chakma Mizoram khua leh tui dik tak kan tih ho tan pawh hian Chakma foreigner te hi an thalo a ni.

The Citizenship Amendment Bill thlasik inkhawma pharh tum hi India ram dan siamtuten Mizo mipui ngaihdan la hmasa lova an pass chuan kan sawi Chakma foreigner zawng zawng Mizorama awm te hi dan hmanga ngaihdam an ni ang a, kum 6 an lo awm tlin tawh chuan India khua lehtui ni thei turin an dil (apply) thei vek dawn a ni.

Kan hriat chian chu Mizorama document rintlakloh a tamzia hi a ni a. Kum 1 awm pawh khan kum 6 awm tling tawh anga inziahna lehkha hmuh an harsat kher lovang. Chutiang a nih phei chuan Chakma foreigner zawng zawngMizorama awm te leh State dang atanga rawn kal te pawh an ni thei ang, chu’ng ho chu India khua leh tui an ni vek dawn a ni. Kan ramah hian kan electoral politics nasa takin a ti danglam anga, se bo hnua kawng khar an sawi ang chiahin a pawi hi kan ti vawng vawng dawn a ni.

Chu chu tunah hian kan rek bung thei a, kan harh erawh a ngai. Arunachal Pradesh ah chuan June 19 khan all-party meeting an nei a. An rama pawl zawng zawng deuh thaw an tel awm e. He Bill hian Chakma te India khua leh tui nih theihna a pe vek dawn tih an hriat avangin an do bur a, an pawmloh hulhual tur an sawi nghe nghe a ni.

June 19-a kanchanchin thar headline te chu he’ng te hi an ni:
# “Sorkarin company 5-te chhiah Rs. 12,42,35,730 a àwltir tawh”
# “Kângmei laka damdawi-in Him dan tur zirna buatsaih”
# “I Day-a zirlai parade tur doctor-in an hriselna endik dawn”
# “RD department-in lawmman a dawng”# “Joint NGO-in ràl tum”
# “Sangau-ah electric bill pek loh tum”
# “Tlan phal lo” (Traffic SP chuan thupek chuan Ramhlun South leh Chanmari inkar kawngpuiah leikhi a awm avangin mipui him nan leh chhiatna nasa zawk a thlen loh nan lir-thei lian 407 leh a chunglam tan helai kawngpui ah hian chhim leh hmar panin tlan a khap.)

Sawi nawn leh ila, MZP pawh an thahnemngaihna chu a fakawm. Amaherawchu, a hem lohna lai tura thapuiin an hem vak a. Hei hian rah tha engmah a chhuah dawn lo tih hi an hriat a ngai. Inhnialna awmze neilo indigenous chungchang hi an kalsan a ngai a. Eng ang pawhin lo indigenous lo pawh nise, India ram danpuiin 1950 khan Mizote Scheduled Tribe kan nih ang chiahin Scheduled Tribe nihna hi a lo pe tawh a, chu chuan indigenous leh nous lo kha a hre hrang tawh lo. ST kan ni rual vek tawh a ni. Tin, 2000 kuma Cachar vai Bhanu Choudhury-a’n Mizoram sorkar a khin khan category hran siama pum hauh titih theihna dan kan lo siam ve hi High Court ah chiang bel bawl taka paih thlak a lo ni tawh a. Supreme Court ah pawhkal ila, kan duhdan ang hian rel sak kan nih lohna turin Indian Constitution Article 15-na leh 16-na hian Chakma te leh Mizo te pawh hi inangkhat vekin min humhalh a ni. Quota seat hi Mizo te tan nilovin Mizoram state tana pek kan ni a, hei hi chu kan thlah a ngai. Kan thlah loh a, kan pawr deuh deuh chuan tanhmun kan in phet zel tihna a ni ang. Mizoram ukil tha ber pawh zawt ula chu chu an sawi tur tho a ni ang. Kan vei tur zawk chu illegal migrant/Chakma foreigner te hi an ni. Mana, thawn haw a, E-Roll atanga paih hi kan phut ngei ngei zawk tur a ni. Tin, sawi tawh ang khan thawn haw theih tawh miah loh tura siamtu tur Citizenship Amendment Bill hi MZP te hian an dodal loh chuan Congress party ang chiahin Chakma politics an khel tihna a ni ang.

Chakma zirlai, an zir hah avanga tiţha Darshan Chakma, Nibir Chakma, Mini Chakma leh Nibhir Tongchangya te hi an background zirchiang ila, a chunga kan sawi ang khian Indian citizen an ni nge nilo finfiah ila. An lo nih loh chuan seat hi min chuhpui thei loh mai bakah Mizoram/India ram chhunga awm hi danin a remti lo hrim hrim a, thawnhaw dan pawh kan ngaihtuah hial a tha zawk ang. A lo nih loh a, India khua leh tui dik taka chhiar theih an nih erawh chuan an inziahtlinna anga seat an hmuh hi kan dodal thiang reng reng lo. Dodal na a nasat poh leh Mizo te tan leh Mizoram sorkar tan harsatna kan siam belh zel tihna a ni ang. Ram leh hnam hmangaih hi tih tur a ni a, mahse mawl aiin fin hi kan thlang zawk tur a ni. Kan hmalaknaah pawh.

PRISM in May thlaa an auchhuahpui, ZNP in a hnu lawka an rawn auchhuahpui leh bawk Citizenship Amendment Bill hi kan buaipui tur dik chu a ni a. Tin, ZNP President in Action Committee din a rawt kha sawiho mai nilo action la tura din thuai a tul takzet. Chakma ho chuan an hnam hmakhua ngaiin pawl an in din fel vek tawh a, Arunachal ahpawh Arunachal ho chuan All- Party Meeting ah resolution an siam fel tawh. Mizo te hi engatinge thla tam pawh a awm tawh loh laia kan la harh theih loh fo chu le?

Author : Matana Pachuau

Aside | Posted on by | Tagged , , , | Leave a comment

KUM 2018 HIAN CONGRESS AN SORKAR LEH KA RING

An tih ţhat vang te, a thawh tam vang te, Phullem phah leh NLUP an sem vangtea kum 2018 hian congress hi an sorkar nawn leh ring ka ni bik lo a. A paihthlatu tur mipui lam hlawm khata siamtu an awm loh vangin a term 3 nan an sorkar nawn leh ka ring.

Sorkarin zu a zawrh hnuah kan tuar malh malh viau tih chu kan hria. Nimahsela, an tlakchhan ‘factor’ ni thei turin ‘zu’ hi dah len a har khawp. Village Council leh L/C inthlan hnuhnung ber 2015 khan kohhran hmunpui zawng zawng tih theih – Synod hmunpui Mission veng, BCI office Thuthmun Serkawn, Salvation Army Temple awmna Tuikual South, Adventist hmunpui Vaivakawn-ah te leh, khatih lai harhna thlenna hmun Kelkang thlengin Congress V/C, Local Council an chak fai vek. 2012 aiin Aizawl khawpui chhungah sorkarna an la tam zawk bawk. Hei hian chutih teh uala ‘zu’ hi kan thinhrik lem lohna a tilangin ka hria.

Tin, Liquor card, ‘zu lei phalna’ nei ringawt pawh hi mi singriat (80,000) bawr an awm tawh a. Sorkarin liquor card permit a pek phal loh, kum 18 hnuai lam zawng zawng paihvek phei chuan, kan population atanga tehin mi za zela sawmhnih (20%) dawn hi chuan zu lei phalna an nei tihna a ni hial awm e.

Tin, congress party hian opposition party te zei loh zar an zo ang. Central India leh state dang politics kan en chuan rorellai chu thil dik loah beihrawnin opposition te an tangrual thin a. 1998-2008 MNF kum 10 sorkar chhung pawh khan opposition party lian ber, congress khan politics-ah zei na tak, ze ropui tak pakhat an nei tlat. Opposition party dang leh pawl tenau te kha an huikhawm vek a. An phawkhai a ruala, MNF sorkar khan a mal tawrh ngawt ngawt a. Chumai a ni hleinem, congress khan medialam an huibet tlat bawka, 2008 inthlanah meuh chuan MNFkha trangzo tur a awm ta lo a ni ber.

Tun dinhmun enin opposition party te hi a inhal hal-ah an tang emaw tih tur!. Rorellai bei hman manglo hian an inkheng erh zel a. Congress tan chuan ‘Lensuaha man nuam tawk leka ru tui lo sawr zeuh zeuh’ kha a ni deuh mai ang chu. Hei hi opposition party president-te leadership chhiat vangah a puh loh theih loh. Kum 2008-13’ term chhung khan Zoram Nationalist Party (ZNP) president, Pu Lalduhoma chuan opposition ‘bench’ lama thu chung si khan, congress sorkar kha a ngheng ru tlat a. Opposition lama a thutpui MNF chu nuihza siam nan hmangin nasa takin a bei thin. Kha khan leadership quality a neih lohzia a ti lang.

Pawl dang zawng zawng huikhawm tur bera ngaih MNF President, Pu Zoramthanga lah hi helamah hian a hlawhchham thawthâng bawk. ZNP, MPC, BJP, PRISM leh a dangte thleng hian thiana siam leh kawmngeih bakah, hmanruaa hmang thiam tur zawngin kawng a hre hlawl lo emaw ni!. Nge, election-ah party dangte thawhpui palh hlauin thuneihna chungchangah a huphurh lawk tih pawh ngaihtuah tham a awm.

Ruling party thil tih dik lohte chu a huhoin an nawr ang a. Party mala bei lo in, heng – Zo-Carbon te, State Lottery te, Dihmunzawl PHE building ţhiah dan te, NLUP CAG report te, NIAS chungchang te, Zu zawrh te, Sorkar hnathawk lak dan diklo, NLUP vawkte thih thu ah te, Kawngchhia leh thil dang dangte hi party mal ai chuan a huhova nawr chu a den a na zawk ngei ngei dawn a, a thawm pawh a lian ang. Mahse, mahni sîk sikin an si a. A fawng chelhtu ruling party lah an tal pît zung zung bawk si a. Mipui hmaah ‘corruption’-ah min puhna tur an hre lo, tiin an uan khum a. Heng politics ah hi zawng Pu Zoramthanga leh Pu Lalduhoma hian Pu Lal Thanhawla hi chu an lo khan lo deuh chu a ni e.

MLA 34 lai nei, Pu Lal Thanhawla sorkar paihthla tur hian opposition te hi Election-ah an thawk ho ang, tihna lam ni loin, tih takzetna leh ‘action’ nena an chet chhuah loh chuan beisei thiam an harsa dawn hle a ni. EVM Rigging tihvel mai mai hmang hian Pu Lal Thanhawla sorkar hi an au thla lo ang, ‘mipuiin an ning tawh lutuk,’ tih mai mai te, ‘kan kum 10 sorkar kha chu aitechhin na’ tih hmangte hian congress sorkar hi an paihthla lo tawp ang. A tak ramin beiho se, thawkho se, election chu a dang daih tih lam hi anrilru ah riak teh se.

Author : Lalnunsiama Pautu

Aside | Posted on by | Tagged , , , | Leave a comment

SUB HQRS YMA LUNGLEI CHUAN MIZO HMING HAWHA NON-TRIBAL SUMDAWNGTE MAHNI AREA A MI THEUH DAP CHHUAK TURIN YMA BRANCH TIN A NGEN

Nimin ni 8.8.2017 (Thawhlehni) chawhnu dar 2:30 khan YMA Sub-Hqrs. Lunglei chuan Lunglei khawpui chhunga Mizo hming hawha hnamdang sumdawng chungchanga an hmalakna thlirin Sub-Hqrs. Executive Committee (SEC) meeting an nei.

Meeting hi Pu R. Lalnunthara, President-in a kaihruai a, YMA Sub-Hqrs. Lunglei hian Ram leh hnam humhalh kumpuana neih zulzuiin Dan lova sumdawng Mizo hming hawha hnamdang sumdawng chungchang hi kum rei tawh tak atangin vawi tam tak hmalakna a lo nei tawhin Survey leh anmahni zawhfiahte pawh an lo kalpui tawh a ni. Hemi an hmalakna kal zelah hian Mizo hming hawha sumdawnna management hnamdang ngeiin enkawla an hriat dawr 19 (sawmpakua) chu kharsak an lo ni tawh a ni.

Sub Hqrs YMA chuan, Sumdawng dawr kharsak mekten lehkha leh tawngkaa ngenna an siam chu zahawm viau mah se; O.B ten an zirchian hnuah SEC ten la relfel ni se an ti a, heng baka Lungleia Mizo hming hawha Non-Tribal sumdawngte chu mahni area-a mi theuh lo dap chhuak a, 31st August 2017 ral hmain YMA Sub-Hqrs. Lungleia thehlut turin YMA Town Branch te ngen ni se an ti a, phalna nei lo leh dan lova sumdawngte chu 31st August 2017 ral hmaa an sumdawnna titawp/siamrem ngei turin an beisei a, hun tiam chhunga titawp lote chu YMA-in a bawhzui zel dawn a ni an ti.

Meeting-ah hian General Conference Item chungchang, Central Co-ordination Committee (CCC) Meeting kal dan turchungchangte leh Central YMA leh 23 Sector Assam Rifle buatsaih, Familiaration Tour -a YMA Sub-Hqrs. Lunglei aiawha kal tur chungchangte an rel bawk a ni.

Aside | Posted on by | Tagged , , , | Leave a comment

Kan inchapchar chungchang- Michael Lalmanzuala

Sawihona program en ve loten ka thusawi hriat an duh thu an rawn sawi avang leh a hnu-a comment-tu thenkhatten ka thusawi a veivir zawnga an lâk avangin khami ni-a ka thusawi kha ka han post a ni e. A hmun/huna ka sawi ang diak diak nih lo lai te chu a awm thei ang a, a ‘substance erawh a tidanglam lo.

Tun hun kan hman chhan hi “Chhiah awl chungchang sawihona” tih a ni nain Aizawl Post-a ka thuziak a chhiar zawh a, Pu Robert Romawia Royte-in, “Hmaichhana han inchapchar ka va chak teh lul em. Hetiang mi nêp hi lepse a ngai” ti-a Social Media-a min rawn cho vang a ni a. Min cho chhuah a nih chu.

Pu Robert Romawia hi a chotu ni-a thu sawi hawngtu tur a nih laiin upa zawkin sawi hmasa se a tih Moderator-in a pawm avanga sawi hmasa dawn hi ka ni a. A changa aia upa zawk tih hre reng chunga, ‘hetiang mi nêp’ ti a, a changa aia upa zah thiam anga a’n inlantir leh lawi ti hi a mak ka ti.

Naupangin sephûng an insîktîr ang hrima hetianga han inchapchar hi a zahthlakna chin pawh a awmin ka hria a. Mahse, min rawn chona chhan thu hi Ram leh Hnam hnuk khawih pha, pawimawh tak a nih avangin ngawihbopui mai chi-ah ka ngai lo a, sawihona neieh hi ka remti ve ta a ni.

Ka ngaihdan chuan kan rama hmasawnna nghet a awm theih lohna chhan hi kan hruaituten dan chunga lêng ang hrima an nawm an mâka dan an bawhchhiaa an palzût fo mai leh pawisa a hmanna tura an hman loh ţhin vang a ni a. Kan hruaitute hian dan chunga lêng ni-a an inngaih thu chu kan Chief Minister ngeiin Assembly House-a zawhna chhang a, “Dan hi a nihna ang diak diakin kan la zawm thei lo va. Inngaihhnathiamna sâng tak nen kan la kal zel rih zawk a ni,” a tih khan a tilang chiang a ni.

NECS chhiah awltir a nih hi chutianga dan palzutna kal zelah ka ngai a. Hei hi mipuiten kan hriat chiana a tihtawp dan kan zawn loh chuan kan ram leh hnam kal zelna tura thil hlauhawm tak ni-a ka hriat vanga he thu hi rawn auchhuahpui ka ni.

Dan palzut leh pawisa a hmanna tura hmang lova, a hman lohna tura an hman thin avang hian kan ram chu ei leh bara intodelh ahneka chawmhlawm titiha awm kan ni a. Mamawh pawimawh thil dang, kawng ţha tha kan neih lohzia leh power chu MW 10 pawh la thar zo lo kan nih thute hi kan hriat tlan vek a ni a.

Chawmhlawma awm chunga thil pawimawh tih tum ahnek a, inrenchem pawh tum lova, a intlakral zawng hlira kal kan nih hi Central Sawrkar chuan a hrechiangin naupang chhe enin min en a, thil ţha leh pawimawh pek tlakah pawh min ngai lo a ni.. Chuvang chuan nihna ţha leh pawimawh pêk tlâkah min ngai lo va. Hnam changkang zawkte chu sawi loh, kan tlangmipui, kan hnuaien ve khanglan, Khasi, Garo, Naga, Arunachali bakah, a la tenau leh chhawng, Mikir, Bodo, Tripura Burman te pawhina eng hun emaw-a an lo nih fir fer tawh, Governor, Union Cabinet Minister, Supreme Court Judge, Chief Election Commissioner, Union Public Service Commission Chairman/Member te chu tun thlengin kan la ni pha ve ta rih lo a. Vety College leh Mizoram University kan neih hma khan kum tam tak chhung India ram puma State leh Union Territory-te zinga National Institute nei lo awm chhun kan nih ţhin te kha a tlawm thlak tak meuh a ni.

Mi kan an ve nan insiamthat hi kan mamawh tak meuh a. Heng kan sawite hi insiamthatna kawng daltu lian tak ni-a ka hriat avangin, a sutkian dan kan zawn tlan theih beiseia han auchhuahpui ţhin ka ni.

The Value Added Tax Act 2005, Sec 47(1) chuan “class of dealers or persons” tana chhiah awl theih dan a ziak a. Hei hi dealer sumdawnna inang engemaw zat tihna a ni a, dealer pakhat tana chhiah âwl a kâwk lo. NECS hi dealer pakhat a nih avangin he dan hmanga chhiah âwltir theih a ni lo. NECS registration-ah hian ‘dealer’ tih ni mah se, a thiltih ziakna-ah ‘dealer’ ni lovin a sumdawnna lama a thil hman tur leitu zawk a nih thu a chuang a. A thil neihte kha midang hnena hralh chhawngtu ni lovin ama hlawk nana hmang a ni a, chhiah âwlna chi a ni lo lehzual a ni.

Dawrkaite chuan an dawr thil leitute hnena atanga chhiah an lak kha an ta a ni lo va, Sawrkar hnena an chhun luh tur a ni mai a. Chu chu an tih loh chuan rukru ang chiah an ni. Contractor-te pawhin Schedule of Rate hmanga Estimate an siam khan an chhiah pek tur Sawrkarin a lo bituk sa diam a. Chutiang zat chu Sawrkara an pek(let) tur a ni mai. An pek loh chuan dan bawhchhia an ni.

A chhan chu engpawh nise, chhiah awltirna order gazette notification-a a chhuah ni aţanga a taka chang tur tih a ni a. Chutiang notification chu July 14-a chhuah a nih laiin chhiah awl nuai chêng 126 chu 19.5.2017-ah NECS chuan AFC account-ah a lo chhunglut daih tawh a. Dan mit aţang chuan kha chêng nuai 126 kha awm lo tluk a ni.

July 1 aţanga GST hman a nih khan VAT dan chu nuaibo a ni tawh a. July 14-a Exemption Order Gazette Notification-a chhuah hi VAT dan behchhana chhuah a nih leh lawi hi a mak a, dan mitah chuan a thi lehzual ang. Pu Robert Romawian March thla daih tawha Sawrkarin Exemption Order an pe ni-a a sawi pawh kha Gazette Notification-a chhuah a nih loh avangin chhiah awlna atan chuan awmze nei lo a ni.

Cheng nuaih 126 chhiah awlna hi Pu Robert Romawian a hma atang khan a lo dil tawh a. Chu a dil chu Taxation Minister-in thil tih chi loh, tih a nih chuan midangina an rawn thîka, harsatna namen lo thlen thei ti-a a lo hnar a ni a.

Pu Robert Romawia hian Tlawmngai Pawlte phungbawma sawma a nawr zel vanga Chief Minister-in 15.3.2017- a lo ‘approve’ ta a ni a. April 30-a AFC, I-League Champion a nihhlim chhawn khan Pu Robert Romawia khan a rawn puangzar chauh thung a. Chhiah awl hi a tum ber ni zawkinI-League Champion nih kha chhuanlam remchang, thangţhat lak nan an hmang ta ni berin a lang.

Chhiah hi ram inrelbawl nana Sawrkar innghahna, ngaih pawimawh bera ngaih a nih avangin lâk tam theih dan ber angaihtuah a, inâwltîr lam hi a tih zen zen loh a ni. Mitin batah a ngai a ni. Kan Pathian thu pawhin, “Kaisara thilte chu Kaisara hnenah pe ula…” a ti a. “Chhiah chawina tura hnenah chuan chhiah chawi ula,” tih a ni leh a, chhiah awl lam hi a lang lo a ni.

Sawrkarina NECS chhiah a awltir thu a chhuahna-ah hian, ‘tun ţum atan chauh, a hnu-ah NECS emaw midangin emaw tana tih leh miah loh tur’ tiin a inziak a. Hei hian an thiltih hi a dik lo a ni, tihnawn tlak a ni lo a ni tih chiang takina lantir a. Tlanchhe chunga thilti ang an ni. Thil ţha chu, Bible chhiar te pawh, tinawn fo turin kan inzirtir zawk ţhin a ni.

‘Public Interest’ hi mipui vantlang tam zawk ţhat tlanpui thil tihna a ni ber a. Kawng ţha te, tui leh kawlpetha hnianghnartaka kan neih ang te hi chutiang sawifiahna ţha tak a ni. Infiamna lama kan tawn sân chu a lawmawmin a chhuanawm teh meuh mai. Mahse, mihring kan nihnaa kantana thil pawimawh zawk, a chunga kan sawi angtea neih alawi kan neih lo lai chuan infiamna thila kan sân vanga tu emaw hamţhatna pek chu ‘public interest’ a ni thei lo. Kan hnam Pa Mahatma Gandhi chuan, “Sawrkar thiltih apiang hi miretheite mittui hru hul thei a nih loh chuan engmah a ni lo,” a ti a. Miretheite mittui hruk hul nana pawisa tam tak hman theih, mi hausa tawntaw hamţhat nana pek hi ‘publicinterest’ a nih theih dan a awm lo a ni.

Pu Robert Romawia’n football player tam tak tan eizawnna ţha AFC-in siamsak anga a sawi pawh hi thu belh chian dawl lo a ni. Player lar ber berte hi AFC chher chhuah an ni lo.
Sawrkarin play ground changkang tak tak a lo siam te hi kan player-ten hma an sawn theihna bul a ni zawk a, engkim maia AFC thawh chhuah anga sawi hi a dik lo. Player eizawnna ţha neih nana football hmangtute pawh hi ram pum ngaihtuah chuan an la tlem lulai deuh bawk.

A chhiah pek awltir zat atanga chhut ringawt pawh hian PuRobert Romawia hi kan zinga hausa lawr lakah a ngaih theih ang a. A neih chuangliama cheng nuaih 50 man car a’n lei theih aţang ngawt pawh hian a hausak falzia chu a chiang a ni. Heti zat pawisa hi kan rama mipui 99%-in an dam chhunga an thawh chhuah phâk loh a ni hial ang. Mirethei bakberh tê tête pawhina tui bill, electric bill an pêk lai leh hah tak leh harsa taka kan kuthnathawktuten an thlai thar hralh nana tlaivar ţhaka an ţhutpuina hmun aţang pawha chhiah kan chawitir laia, kan mi hausa ber chhiah awltir hi zawng ‘public interest’ a ni thei ngang lo a ni.

Tun kum nga chhung vela kan Sawrkarin Pu Robert Romawia a duhsakzia chu contract ţha zawng zawng tih theih an pêk deuh vek mai aţang hian a langchiang a. An hlâwk tlanpuizia leh tlâng hriatin Pu Robert Romawia hian a puangzar a ni. Heti taka thilpek a dawn tam takte hi lawm nachang hriata Sawrkarin ram hmasawn nan leh mirethei dawmkan nana hman tura pê lêt zawk tur nia kan ngaih laia, chutiang tih ahneka chhiah awl a la dil ta daih zawk te hi chu hriatthiam theih pawh a ni lo. Pa pakhat duhâm tak duhâi a sam a, “Pawisa chhiar sen loh hi han nei mai ila âw, hmanchawp tur tlêm nen,” a ti, an tih te nen khan an inan hmel khawp mai.

Exemption hmuh hi a thiam zawng tak chu niawm a ni. Hman deuh tawh khan Zawlnuam-ah exemption a lo hmu tawh a. SSA-ah khan exemption chi khat chu a hmu bawk a. Vigilance case nei lai sawrkar hna atanga ban awih loh a ni chunga a ban sawrkarin a phalsak kha exemption bawk a ni. Heti zozai exemption hmuh hnu a, duhtawk ve mai aia a la zawng chhang ta zawk hi chu a mak deuh zawng a nih hi.

Kan Sawrkar hian football-a kan hlawhtlinna hi ‘public interest’-a a ngai a, lawmman pek phute chu pek a duh a nih chuan player ţha zualte hi sawrkar hna ţha te pe se a inhmeh zawk ang. Punjab Sawrkar chuan 400 meters tlan chak Milkha Singh chu Sports Officer nihna a pe a, Director Sports-in a pension a. Kar hmasa lawka Women ICC World Cup semi final leh finala khel ţha chungchuang, Harmanpreet Kaur chu Dy SP, nihna a pe leh nghal mai bawk a. Badminton khel thiam PV Sindhu chu Andhra Pradesh Sawrkar chuan Deputy Collector hna an pe bawk. Cricket khel thiam Sachin Tendulkar phei chu Bharat Ratnapek a nih bakah Rajya Sabha member a ni. Chawimawi huna an chawimawi pawh chhiah awl vanga hrem a hun chuan chhiah an pektir leh mai a nih kha.

Hetiang hi an ti ve thei lo a nih pawhin tu emaw chhiah awltir lovin sawrkar pawisa chu AFC kutah pe ta se a tluangtlam zawk viau ang. Boxing leh Karate-ah te hian India ram pawn khawvel puma intihsiakna-a Gold Medal la te pawh an awm tawh ţhin a, hengte hian duhsakna an pek emaw an Sports Association-te hnena ţanpuina an pek kan hre ngai lo. NECS leh AFC an vulh bîk hian chhan dang pawimawh tak a neih a rinawm hi a pawi thui theihna tur chu a ni.

A nazawnga Pathian hming kan lam fo leh sakhaw thil, hmun leh hun danga kan senglut fo hi kan tihfuh loh tak pakhat a ni bawk. AFC-in an symbol-a Kraws an hmang leh an chakna chu Kraws hnehna an tih hi thil inhmeh lo tak a ni. Kraws hi Kristiante symbol pawimawh ber a nih avangin a zahawm a, a hman dan tur dik taka hman a pawimawh hle. Lal Isuan Kraws-ah hnehna a puan dan kan en chuan a nunah mi sualte hmangaihna te, inngaihtlawmna te, tuarsaknate a lang a. Lainatna tel hauh lova amah khengbettute tan ngei pawh, “Ka Pa, anni hi ngaidam rawh,” tiin a dilsak a. A zirtirnaah pawh, “ Inngaitlawm apiang chawimawiin an awm ang,” tih a ni.

Lal Isuan Kraws-a hnehna a puan dan kan en hian keinin intihsiaknaa kan chakna chu Kraws hnehna kan lo vuah ve ngawt hi a inmil thei lo. Keini chuan kan khingpuite chu tharumin emaw, thiam thilin emaw hneh ngei tumin kan beia. Kan hneh chuan kan hawi cham lap a, kei ber emaw intiin kan chapo va, chu chu Kraws hnehna nen a inang theilo. Hnehna kan chana Kraws hnehna kan vuah chuan kan hneh loh chang a tam daih zawk si a, chu chu engtin nge kan vuah tak ang ? “Kraws hneh lohna,” kan vuah mai dawn em ni ang ? Chuti a nih chuan Kraws chu kan timualpho zo vek dawn tihna a ni ang. Chuvangin intihsiaknaah hi chuan Kraws hi symbol atan hmang lo law law ila, kan lo chak ta a nih chuan Pathian hnenah lawmthusawi ila a tha tawk chauh a ni.

Rev Saiaithangan, “Kraws chungchang kan sawi chuan thutak a nih avangin phur hurhna thil a ni lo. Lal Isuan Kraws kawng a zawh lai khan a phur hurh lo,….” a tih te khan Kraws hi haw haw chunga phurpui chi a nih lohzia a tilang leh zual a ni.

Nagaland chungchang thil belh chian dawl lo leh rin thil thu anga a rawn sawi kha article-a ka ziak ang khan Nagaland CM leh CS hnena an 3 crore project pakhat hna thawk miah lova an insemtir ringawt thu a ni a. Khatiang thu ka beng hriata sawitute hnenah Nagaland CS leh Pu Robert Romawia te hi ka Mizopui an ni a. Hetianga corruption thil ti-a in sawi hi Mizo hnam tihhmingchhiatna-ah ka ngaih thu leh chutiang an tih pawh ka rin loh thu ka hrilh a. Mahse, MP inthlan laia Nagaland CM leh CS leh an thuihruai 10 chuang zet Pu Robert Romawia campaign-puia an lo kal tak rup kha chuan an cheng vaibelchhe têl siam nena inkungkaihna nei a nih loh chuan chhan dang a awm theia ka ngaih loh thu ka sawi mai a ni. (Pu Robert Romawia khan a chhan dang chu a sawi thei lo ngei a ni.)

AFC chungchang sawi nana hun kan hman tam deuh vang pawh a ni ang a, ka thupui pahnihna, ‘pawisa a hmanna tur hman loh’ chungchang phei chu kan sawi hman ta lo kha a ni a. Tlangkawmna hun lah kan nei ta hek lo. Hemi chungchanga ka lo ziak lawk kaih tawi chu hetiang hi a ni.

Pawisa a hmanna tura hman loh hi kan ram hmasawnna tiţhuanawptu ber a ni a. Thil tam taka pawisa a hmanna tura kan hman loh rualin a nasatna ber chu contract hna-ah hian a ni a. Pawisa a hmanna tur taka hman chuan kan kawngte hi kum 10-15 daih tur an ni a. A hmanna tura kan hman loh nasat em avangin kum khat pawh a daih meuh lo a ni. Cement Concrete inte pawh kum 100 daih tur an nih laia kan Mizoram House te ngei kum 15/20 vela kan ţhiat leh ta mai ţhin hian kan pawisa hman dan dik lohzia a tilang chiang hle. Sawrkar thil tih dangah pawh chutiang chu an ni deuh fur mai. A tlangpui thu-a contractor-ten 10%vel hlêp tur an nih laiin a lêt 4/5 te an hlêp avanga kan kawng te, kan in te hi chhia an ni. Heng hna thawktute leh petute an hausak viauna chhan hi chu chu a ni.

Pu Robert Romawia hi kan contractor hriat ţhinte aiin nasa takin kum 4/5 lek chhungin a rawn hausa ta a. A hausakzia chu chanchinbu-ah te lam a rawn tar chhuak a ni. A hnathawhte lah kan hriat ve chinah pawh contractor dangte hna aia ţhat zawk a hnekin a chhe zawk deuh fur a. Chu chu a hausak nasat chhan niin kan hria a. Kan ram hmasawnna kawng daltu lian tak ni-a ka hriat avangin a hlauhawm ka ti a, ngawihbopui chi-ah ka ngai lo a ni.

Pu Robert Romawia hnathawh danah hian dan bawhchhiatna leh palzutna a tam hle bawk. General Financial Rules-in Public Works Department lo chuan contract hna lian thawh awih loh a tih laiin Works Department ni lo Home Dept, Rural Development Dept, Social Welfare Dept te-a Cheng Nuaih 100 chuang hna 20 dawnlai an thawhtir a ni. Hei bakah Central Vigilance Commission ‘guidelines’-in, Project Report siamtu-in hna (Works) a thawh a thiang lo tih chiang taka a sawi laiin Pu Robert Romawia chuan Project Report siam leh hna(Works) thawh a fâwmkêm vek a ni.

Project Report a siam thiam chhan hi thiamna bik riau a neih vang ni lovin a pekna tur apianga manţang a pek thiamvang ni zawkin kan ring a ni. Hei hi tak tak a nih chuan midangin an rawn thîk anga corruption thila kan luh thûk lehzualna tur a ni ang a, kan ram leh hnam tana thil hlauhawm tak a ni ang.

Tih dan pangngaia open tender chhuah lovin ‘restricted tender’ hming puttirin NECS hian a hmu deuh zel mai a ni. Chuvangin ţawngkam tlanglawn tak ţhin, ‘chawm bawk, hâwp bawk’-in a rawn lâr thar bakah a hnate a chhiat bawk avangin ‘pal baw bawk/bâr baw bawk’ tih te pawhin a rawnrîk phah ta a ni. Hengte avang hian dan palzutna leh pawisaa hmanna tura hman lohna chuan a zualkai phah a. Hei hi a pawi em em bakah kan hnam nun ber pawhin nasa takin a chhiat zual phah dawn avangin a hlauhawm tak meuh a ni.

Heti taka dan pawisa lo baksaka NECS-in Sawrkar remtihpuinaa contract lian tak tak, pumhmawm titiha a thawk mawlh mawlh mai hian pawisa a hmanna tura hman loh kalphung chu a rawn tizualkai a. Chu chu corruption a nih reng bakah a tihluartu a ni a, kan hnam tichhe lehzualtu a ni ngei dawn a, a hlauhawm a ni. Chuvanga amah Pu Robert Romawia mimal thila beihna ni lova, a thiltihin kan ram leh hnam nasa taka tichhe thei ni-a ka hriat vanga hetianga rawn auchhuak hi ka ni.

“Dan zulzuia kal chuan Democracy hi inrelbawlna ţha a ni a, hruaituten dan an palzut erawh chuan inrelbawlna hlauhawm ber a ni,” Aristotle-an a lo tih thin te kha kan chungah a lo thleng dik ta niin a hriat a, a pawi tak zet a ni. “Power corrupts, absolute power corrupts absolutely” tih hi kan nihna lanchianna ber a ni e.

Hemi thu Social Media-a kan khelna lamah kan ţhalaite zinga tam ber chuan kan kalphung ţha lo hi an vei a, insiamthat duhna an neih nasatzia a lang a, beiseina min neih zualtir phah a. An thiamna hmanga eizawnna nghet nei tura hnathawh an châk a ni tih hmuh theiha a awm te hi a lawmawm ka ti tak zet a ni.

Aside | Posted on by | Tagged , , , , | Leave a comment

“ZORAM MIPUITE KAN HARH A HUN TA.”- Lalduhoma ZNP President.

Pu Lalduhoma chuan, “Kum 1998 inthlanah khan, Mipuite Nawrna avangin Congress Party chuan District thar 5 – Champhai, Kolasib, Serchhip, Mamit leh Lawngtlai, Apuanga, Lawngtlaiah chauh an tling. Lawngtlai hi Congress that hrim hrimna hmun a ni. Chutiang bawkin 2008 inthlanah, MNF Party chuan District 3 – Khawzawl, Saitual leh Hnahthial, Apuang a, an tla fai leh vek bawk. Kan vote sukthlek dan (voting behaviour) en hian mipuiten kan thil duh min petu kan vote phah lem lo niin a lang” a ti.

ZNP President chuan, “Sorkarin- Tung, Pangbal, Sawhthing,Aieng, Aloe-Vera, Jathropa, hmunphiah etc. min chintir a, a Market a chhiat vangin chhungkaw tam tak B.P.L. an nih phah fo thin. Market leh a Rate hresa a min chintir tumtute ai chuan… Min Tihtawihtir Tute kan la vote duh zawk zel… Inthlan dawnin Opinion Poll siam a ni thin a. Sorkar atana kan duh aiin kan duhloh ten vote an hmu tam zawk ziah.

Kuthnathawktute Dinchhuahna atana pawimawh em em Urea ( leitha) chu, Burma lamah aruka hralh zawh vek a nih thin dan, A Finfiahna nen Press Conference-ah puanchhuah a ni a, A Tuartute ngei pawhin an ngaihsak lem lo,” a ti bawk.

“Sangha chaw, a thlawna sem a nih ve loh vanga, Sangha kan thar tam theih loh dan te… A thlawna sem a har lohzia teleh sangha a intodelh thei kan nihzia te, A Finfiahna nen Press Conference ah puan a ni bawk a… Sangha Dil neitute ngei pawhin an Bengkhawn lem lo a ni” tiin.

A sawi zelnaah Pu Duha chuan “Kan ramah hian Sorkar kan Hrawn tawhte Thlakna tur dang kan awmlo pawh ani lova. Sorkar kalphung thar, ‘CHANGE’ siam tumtute kan awm reng a ni. Amaherawhchu, Buh chi thehtuin thahnemngai takin theh thin mahse… A tlakna leilungin a zir miau loh chuan, Rah a chhuah thei lo. Pialtlep Leipan leh Hnim Hlingnei kan la tam em a ni… Chuvangin, tuna kan dinhmunah hi chuan Hruaitu tha aiin Mipui tha kan pawimawh zawk rih a ni. Mipuite hian Football emaw kan inti a, Politician-te hi Player ni tlatin kan hria a. Tun hnaiah pawh, Chakma chungchang leh thil dangah Party leh N.G.O. zawng zawngten hma kan lakho duhin, Kan au kan auva, awmzia a la nei thei lo” a ti bawk.

Pu Duha chuan ngenna siamin, “Hetiang boruak karah hian ZNP chuan kan ram Politics-a PATHIAN RAM a lo thlen theihna tura kan Thlarau lam Goal “PATHIAN MANIFESTO”chu kan aupui zel dawn a… Tap chung pawhin kan Buhchi te chu kan Fehchhuahpui zel dawn a ni. Kan HARHNA chante hian kan thil Ngaihhlut zawng tehi thlak ngei sela, Kohhran hovin Nakkum Inthlanpui atana, mipui thinlung an buatsaihna te hi lo Hlawhtling ngei se, tih hi kan Tawngtaina a ni.

Pathian hnenah Beidawng lovin i dil zel ang u, Beidawnna hi Setana chan a ni a, Beiseina hi Pathian chan ani,” a ti bawk.

Author : L.r. Ralte

Aside | Posted on by | Tagged , , | Leave a comment

THE BEATING RETREAT : Kima Sailo

Kum 1959 aţang tawh khan khêl loin nitin, tlai ni tlak sûarah, Amritsar (Indian Punjab) leh Lahore (Pakistan Punjab) ramria Pakistan lam side Wagah (Lahore District, Punjab, Pakistan) khuaah khuan phir inhmelma kumhlun ram sipaite (Indian BSF leh Pakistan Rangers) chuan kum zabi 17-na laia British sipai ho lo tih dan Beating Retreat an tih parade-in an inper khawng khum ţhin a. An tih dan pawhhi sipai lam dan pangngai aia sang uchuak taka ke khaiin au pawh an au ţeng zual hle ţhin. Hetia an lam zawh hian ram pahnih sipaite chuan urhsun takin an ram flag ve ve chu a rualin an la thla riai riai a; lehlam lehlama duty-te’n zahna chibai an inbuk tawn hnuah a tuk khua a var leh hmachuan ramri gate chu khar a ni ta ţhin a ni.

Tun August thla hian India leh Pakistan ram pahnihte hian an birthday vawi 70-na an lawm leh dawn ta a, Wagah-a Pakistan lamin ţhutna chhawrdawh an siamah hian mipui eng emaw zat chu he Beating Retreat en tur hian an fuan khawm leh ang. India ram lamah pawh hian hetiang deuh tho hian mi 15,000 vel ţhutna tur siam a ni ve tho a. Ni khat leka inupat hleih ram pahnihte Independence Day (14 leh 15August, 1947) hi Wagah ramriah hian urhsun taka hman zelniin hei hian buaina nei chamchi mahse unau, chhulkhat chhuak an nihzia a entirna a ni ber awm e.

Indopui pahnihna zawha India la awp ţawk ţawktu Britain khan chu ram zau tak, mi chitin chitang chenna chu a chhuahsan a ngai dawn ta a, mitin mai chuan independence chu an tuipui emaw tih turin an nghakhlel hlawm a ni. Mahatma Gandhi-a hoa Congress Party-in rorelna pakhat hnuaia awm khawm an rawt laiin Muhammad Ali Jinnah-a Muslim League erawh chuan chutihlaia India rama cheng mihring 30% chu Muslim an ni a, Hindu majority hnuaia kun kumkhua tur kan ni lo e tiin ram hran neih an ngiat ta tlat mai a. Sakhaw inkara intualvuakna namenlo a chhuah hnuah British viceroy hnuhnung ber Lord Mountbatten-a chuan thutlukna hmanhmawhthlak tak siamin India ram chu ram pahnihah (Bangladesh la ni zui tur East Pakistan tiamin pathum a ni mah zawk) a ţhen darh ta a ni. Pakistan ngei pawh chu rampahnih, vawiin Pakistan (West Pakistan) leh Bangladesh-ah(East Pakistan) ţhen hran a ni a, an inkarah India ram kilometre 2,000 laia thui a tlazep a ni.

Kum 1947 August thla laihawla ram pahnihte an lo pian takah khan thil a kal tluang viau dawn emaw an ti a, a lo ni teuh mai si lo. Sakhaw buaina nasa chhuak zuiin hun rei lo te chhungin mi maktaduai khat velin nunna an chan a, maktaduai sawmpanga dang chu an in leh lo aţanga um chhuah an ni.

Kashmir lal ramah pawh buaina hi chhuak zuiin Pakistan nena an inrina kilometre 750-a thui dung tluan chuan a chingchivet zo ta a, chumi nghawng kal zelah chuan indona pahnih, kum 1965 leh 1971 khan a chhuak ta nge nge a. A vawi hnihna zawkah hian mi nuai nga velin nunna chanin pi Indira hoa India-in Bengali ţawng hmangte a puih ruk char char hnuah East Pakistan aţang chuan Bangladesh a lo piang ta bawk a ni.

Muanna a awm tak tak thei chuang lo a, kum 1990 chhoah khan Pakistan puih helho chetna avangin mi 40,000 velin nunna an chan leh a. Kum 1999-ah phei chuan Pakistan sipaite’n Kargil-a ram ţhenkhat an rawn luah hnuah Kargil War a chhuak zui a, feet 8000 chuanga sang tlang chhengchhiaah thla thum chhung an inbei a nih kha. Inkahhai thuthlung kum 2003 aţanga an ziak chungin Pakistan-sponsored hel pawl hrang hrang te chuan vawiin thleng hian pawi an la khawih chawl lo thung a ni.

Geopolitical Analysts ho hian thil hi an lo chik khawp a, ram pahnih politician-te an inkawmngeih apiang hian Kashmir-ah buaina a hnai an ti; eng vang tak ni ang maw? Hei hi tun hnaiah hian a dik zuala ngaih a ni a, nikum hmasa lama prime minister pu Narendra Modi-a’n Pakistan prime minister, Nawaz Sharif-a a tlawh hnu lawkah khan Indian airbase beih a ni a, hel pawl dangin ramriah thihchilh bomb hmangin India sipai 19 lai an that bawk. Hemi ţum hian commando team ţhahnem tak chu Pakistan-ah tirh luh nghal an ni a, Kashmir border-ah inkahna a thleng zui nghe nghe a nih kha.

A khat tawka India thinthawk leh phut ţhin hi a awmna lai tak a awm a. Pakistan aia mihring a let ruka a ngah zawk bakah economy-ah pawh a let riat laiin a sang zawk a, a ram ang zawng pawhin a let li velin a lian zawk bawk; Nuthuri zuam tur hi chu a ni ve reng reng mai. Chutih rualin ram pahnihte nuclear warhead kawl belhbawm hi 100 chuang a ni a, hei hi an hre tawn kar a ni ang pu Modi-a Hindu-nationalist BJP, kum 2014 aţanga rawn sawrkarin tun hnaia surgical strike a va neih hnu phei kha chuan ţawngka mai ni lo, chet ziain an inchhang ta zauh zauh a ni.

Ram pahnihte hian nuclear hman hmasak loh doctrine an kalpui ve ve nain a ruk tak chuan an inkau ru reng thoin a rinawm a. India hian kg 300-a rit, khawvela cruise missile thlawk chak ber Brahmos III, Pakistan ram chhung khawilaipawh sai fuh chat chat tur khawpa kap dikte, ramri bul Lahore khawpui minute khat leka kap pha leh an khawpui ber Islamabad pawh minute hnihah kap phut sut thei a kawlte chu a chhuang hle a ni.

He kum 70 chhung inhmelmakna hian India tluk zetin Pakistan pawh hi a tibuai ve tho a, “Ram himna a derthawng e” tiin democracy aiah sipai general tu tute’n emaw sawrkar an hup leh thut ţhin. He buaina kumhlun avang hian kha chen culture leh tradition hrang hrang a lo ţawmpui tawh India aiah Islam firna Arab khawvel (Afghanistan etc) an hawi lo thei lo fo a, ram mipuite’n hei hi an tawrh phah zing hle a ni. Chutih laiin Pakistan buaina kaihhnawih neuh neuh hian India pawh a ram ţhenawmte nena an inlaichinna a tihchhiat phah nasa hlea ngaih a ni a, south east Asia-a ram hla zawkte ngaihtuah chuan a ramri a inţawmpuite leh a chhehvela mite nena an insumdawn tawnna percentage hi a sang lo ţhin hle a ni.

Tun hnaia China lian zel leh a rama Muslim tam takte tiduhdaha an hmeichhiate inthuamna thlenga khapsak chung sia Pakistan-in a tlawn hurh reng mai te, Donald Trump-a policy rin lawk har thei lutukte, chumi kara North Korea lo rum chhar chhar reng mai nen; ram ţhenawm ni sia kum khat chhunga dollar billion hnih emaw chauh insumdawn tawn nana hmang Pakistan leh India inkar hi chanchin ngaihnawm tak a ni reng mai.

Sawi tawh angin November ni 2, 2014 tlai khan Wagah ramria ram pahnih sipaite’n flag an lak thlak hnu lawkah mi pakhat chuan bomb tipuakin mi 60 an thih bakah midang 110 velin hliam an tuar bawk a. Kum 2016 September ni 29-a ram pahnih sipaite an inngur leh hnu phei kha chuan Wagah-a border closing ceremony hi la neih zel ni mahse India ram lam mipui ţhutna hi eng emaw chen kharzui a ni. Hei vang hian nge ni, nikum Diwali lai khan BSF-te chuan Pakistan Rangers-te chu kum tam tak an lo tih tawh ţhin sweet an pe duh lo a ni!

Author :

Aside | Posted on by | Tagged , , , | Leave a comment