MSU LEH ACCJSU HRUAITU HLUI LEH NI MEK TE COURT AH AN INLAN LO

Kum 2015, January ni 19 a PwD Commissioner pension tawh rawihnawn duhlohna lantirnaa MSU leh ACCJSU te’n a pisa kai tur kan dannaah zirlaite leh Police te nasa taka innawr a ni a. He thil thleng avang hian zirlai te’n hliam kan tuar nual a ni.

Kan hriat țheuh angin, hruaitute leh sawrkar thuneitute inbiakna angin commissioner hi rawihnawn a ni ta lo a, zirlai pungkhawm te pawh kan țin darh a nih kha..Mahse kan beisei loh leh rin loh tak maiin khatih hunlaia hruaitute chu court case siam sak an lo ni a.

He thil hi kan hriat velah a țul angin MSU chuan hma lain a bawhzui nghal a. Ni 20. June, 2017 khan Lungleiah MSU President RB Lalmalsawma chuan, “Kan hruaitute hi court-ah hian an inlan kan phal ngai lo ang.” tiin a lo sawi tawh a ni.

Vawiin ni 2. August, 2017 (Nilai) hian kan hruaitu court a inlan tura tih te chu thuawih tak leh dan zahawm tak zah tak chungin court a inlan turin an lo chhuakkhawm a. Mahse Vana Pa Hall kawta zirlai khat tlat te chuan court a an inlan hi phal loin an dangbet ta a ni.

Author : Tluanga Langel    

Advertisements
Aside | Posted on by | Tagged , , | Leave a comment

Tlawng luiah Khamrang naupang a tla

1st August, 2017 chawhnu lam khan Khamrang hmeichhe naupang Esther Lalawmpuii (9) D/o Lalchawiliana pawl 4 zirlai chu Khamrang ram chhung, Tlawng lui, Tiauzau ah a tla a, nizanah tlaivarin an zawng a, an la hmu lo.

Khamrang YMA hruaitute hnen atanga thu dawn danin lui ralah Nulah a pi leh puten an unau thumin an fehpui a, Estheri hi an unau ah mi lai niin chawhnu hera an haw dawnhnaihah a piin lui kam lawngleng thlunna bula lungpuiah an ip te chu dah turin an unau thum chuan a tir a, an unaua an chhuk chu khua a lum si a, tuiah an cheng a, Estheri chu tuiah chuan chesualin a tla ta niin an sawi.

Estheri tuia a chesual chu a u mipa chu chhan tumin a vuan a, ft 20 vel zet an hleuh dun hnuah a u mipa kum 11 mi hian rairuang kung lo uai chu a man a, Estheri hian a u chu a thlah palh ta hlauh mai a, tui chuan a len zui ta a ni. A u hian Estheri vawi thum a rawn lang chu a hmu a, a hnuah a hmu zui ta lo a, a pi leh pute hnenah a hrilh a, khawtlang punin nizan zankhua khan theih ang angin an zawng a, he chanchin buatsaih lai thleng hian hmuh a ni ta lo.

Estheri hi vawiin hian zawn chhunzawm a ni.

Author : Vanneihthanga Vanchhawng    

Aside | Posted on by | Tagged , , , | Leave a comment

LPS local operator te inhmukhawm

Aizawl khawpui chhunga LPS hnuaia Local Cable Operator (LCO) te chu nimin 1 august chawhnu dar 2 khan LPS Auditoriumah an inhmukhawm a, August thla atanga fee khawn dan tur leh TV Channel thlan chungchang an sawi ho.

LPS LCO meetingah hian August thla atanga TV channel hrang hrang a hlawm Bouquet (Buke) a channel dah dan tur te sawiho a ni a. August thla fee khawn rualin Customer Activation Form semchhuah nghal a ni dawn a. He Cusmoter Activation Formah hian customner ten TV channel then hrang hrang Bouquet (Buke) an thlanna tur pawh tarlan a ni dawn a ni.

TV Channel then hrang Bouquet hi pathumah siam niin a man tlawmber Bouquet 1-ah Free to Air Channel 100 leh LPS (1) a awm dawn a, Thlakhat-ah GST 18% plus Rs 150/-a ni ang.

Bouquet 2 ah Free to Air channel 100 leh SD Pay channel zawng zawng bakah LPS channel zawng zawng dah a ni dawn a, thlakhatah GST 17% plus Rs.350/- a ni ang.

A man to ber tur Bouquet 3-ah hian Bouquet 2-a awm zawng zawng bakah HD channel te a awm dawn a, thlakhatah GST 18% plus Rs 400 a ni ang.

He meetingah hian LPS hnuaiah LCO khawpui chhunga awm te an tel kim hle.

Aside | Posted on by | Tagged , | Leave a comment

TBCC Report duh khawp lohna leh Pu Vana sawifiahna

Chawnpui bethel camping center chungchang vidoe coverage ah mipui lam beisei a pha lo deuh a ni ang. Sawiselna a awm sap sap mai a.

LPS SPECIAL REPORT, TBCC AH by Lal Notea
News reporting te hi journalism huanga a pui ber zinga mi ani. News reporter te hi mi ramah chuan an duh uluk thin hle.Mi fing leh huaisen lo tana thawh chi a ni lo. Mi hmaiswn, kutthlak hial an tawk fo a, thil chhui chhuaka mipui hnena hrilhhretu pawimawh tak a ni.

TBCC chungchanga LPS Special Report Ka hmuh dan..

1. Inmate pakhat a interview a, chu pawh hmeichhia, a hmuna tlatlum tawh tih hriat reng, an hotupa pawh Àpu ti ngata ko tawh khawp! Kan lo beisei dan chuan inmate a kawm kual àng a, a kawm hmain engkim sawi theihna chanvo an nei tih hrilh hmasain a thlamuan ang. Chutiang kawm leh ilo engmah hmuh tur a awm lo. Investigative lo hle.

2. Victim chhungkaw mi leh sa chiang taka kawmna a awm lo. Thihna chungchang engmah kan hriat belh lo mai ni loin an fapa dinhmun kan hriat belh lo.

3. Kha thihna chungchangah khan a nat dan leh thih dan hre tur ber a hmuna awm, security emaw, a room mate te a kawm kual turah kan ngai. A ni si lo. Pu Vana kha leng satliah, a remchang em mai tia a rem rem kawm mai a ang hle ! News reporter chuan systematic takin thil a ti tur niin kan lo ngai a, a kawm tur chin leh kawm awm chin bithliah fel sa vekin a kal turah kan ngai. Chutiang hmuh tur a awm si lo.!

4. Kha report kha tunlai kan issue lian ber pakhat hmel tak hailanna turin kan lo beisei. Tu emaw ngaihdan ie Pu Vanhela etc kan beisei lo a, kan châng hek lo. Witness tak takte awka kan hre duh a, “An thau kung mai, an ei chhe lo a niang” tih mai mai kha thil ho lutuk a ni. Evidence mumal nei lo thil kha kan tangkaipui lo. Worst form of reporting!

5. Laipuitlang chhiat tawh tuma dan pel rawka in chimin a delh beh tleirawl zu interview paha thlamuantu leh Khatlaa hmeichhe tleirawl a thih tuma a chhungte hnena “An unau zingah thih dan pangngai loa thi an awm tawh em” tih ang zawng thlenga zawt chik peih Pu Vana kha tun tum chu a insum niin a lang. A chhan lah hriat va ni suh!

Tun tum LPS Special Report zet chu investigative reporting tih theih a ni lo! A kawm tam zawk atang khan Fact ni loin ngaihdan bawk a ni kan hmuh leh tho. Keini pawn ngaihdan kan nei. Min rawn kawm se a inang reng.

Hei zet chu News Report chhe tak a ni e!
******************************


Vanneihthanga Vanchhawng chuan ti hian a rawn post ve thung a.

TBCC CHUNGCHANG BAWK HI

Mi tam takin min beisei dan hi chu kan kal hma atang khan ka hrethiam sa vek mai a, TBCC nasa taka zuk lepse turin min beisei a, a chhunga awm mek te zuk interview kual hrep turin min beisei niin ka hria. Ka tawng lo ngai haw lo se, chhung lama enkawl mek te hi ruihhlo ngai leh humsual dai te an ni nawk hlawm a, TV hmachhawn loh hram an duh deuh tlangpui ang. Awm senior tawh, gate vengtu ni phak chin leh cook ni phak chinte zingah sawi ve chak an awm nual thung tih ka hria a, an sawi duh ka hria a, an aiawhin pakhatin a sawi kha a tawk thawkhatah ka ngai a ni.

Punkhawm ni, report kan siam ni khan pawn lama chhuak tawh, hlauh nei tawh lo tura ngaih, social media lama sawiselna leh vuivaina lam ziaktu te an rawn lang nual tura beiseina ka nei a, mahse duh ang interview tur alawi kan hmuzo tlat lo. Govt Complex lam mi pa fel tak takin min dap khawm pui a, “Hmel thup vekin” tih pawhin interview ngam an awm meuh lo a, mi pahnih, mipa leh hmeichhe pakhat kan be thei hram a ni. Khami ni khan Govt Complex lam khawtlang hruaitute an rawn tel tha hlauh a, an ni kha awm lo phei se pawn lam boruak cover tur kan hmu meuh dawn lo tihna a ni. A hrilhhai thlak lek lek. Diktak chuan social media lamah kan sawi chiam chiam a, a sasehah kan penchhuak leh tak tak ngam si lo ni berin a lang e.

Kan phak ang tawka interview te kan tih zawh hnuah “kei ka lo thuchawl ange” tiin ka camera man Ab-a chu insert picture tur, home hrang hrang cover kual turin ka tir a, mi pahnih velin tlawmngaiin an zuk hruai kual a. Bathroom pakhtah chuan parda phenah mi pakhat a lo inbual ri sur sur mai a, Aba chuan “rawn chhuak lang la pawnah hian i inbual lai thla kan lo la duh a, hmel lang lovin” tiin a han bia a. Chupa pui chu saruak ngalngatin a rawn chhuak ta mai a, barrel-a tui chu no-a suakin a in leih ta sur sur mai a.

An thil zuk lak te kha chanchawp a nih ka ring lo. Chang chawp ni ta se, kan hman hun tur a hriat si loh a, lo inbual der vel tur tan phei chuan a buaithlak ve phian ang. Ka camera man Aba’n a sawi dan chuan vieo-a lan an duh lova, an lo darh hak hak zel a, “In hmel lang lovin kan la duh a lawm in awm ngai khan awm rawh u kan ti zel zawk a” a ti. Mi hi kan ring chhe lutuk deuh thin a ni mai thei.

Engpawh nise, TBCC inenkawl danah hian thil fel tawk lo tam tak a awm tih phat rual a ni lova, tun hnaia nunna hlu tak chan an han awm te kha a pawi em em a, an nu leh pa leh chhungte tan a na lehzual ngawt ang. Tun thil thleng hian thil tha zawk a rawn thlen beisei ila, tan lam kan lo nei a nih pawhin tute mah hi chhe taka indem chiam chiam lovin puitling takin kan ram kan hnam tan ngaihtuahna i hmang tlang zel ang u.—

COMMENT TLEM

Maliana Liana
Tun a sawisel tu che ho hi fake account an nih loh chuan sawisel na lai, i interview na ah an nei anih chuan an mahni hi interview ve la a țha phian ang..kei chuan i interview na ka lo en khan ngaihdan ka nei thei nghal mai…

Pu Vana hian mizoram chhunga cheng te hi Thiltha tak tak amah ngei kalin min hlui țhin a mahni in lum ngei ah mizoram chhiatna te leh dil dang dang bengvar thlak tak tak min hlui țhin a..keini chhungkua tan chuan malsawmna i ni..i kal zelna tur ah mizoram tan tiin duhsakna ka hlan a che.

K Romuana Rma
Ka hmuhve dan chuan, mi hetizat nungchang inanglo, țhenkhat phei chu mahni in a duh duha ei inthei, han awmhoa, nuam satak tur a an in ngai hi adik lo, kei chu an sel luai luainate hi ka pawmlo, he camp Hi atangkai a, nu leh pa thenkhat mahni fa te pawh enkawl zolo ten he camp a kan fa kan dahte mahni in lum ai pawha nuam sa zawk tura ngaih hi chuuuu, Nu leh pa tehi lawm viau zawk tur kanni lawmni,?

Muantea Hauzel
Pu Van, i zuk kawm a, zawhna an lo chhan dan te vel kha chu an inbuatsaih ţha tawh tih a hriat.. i kal hma ni khan Zonet an kal a, zawhna an zawt a, i kal kha chuan zawhna chhan dan tur an lo inbuatsaih fel vek tawh ang.. Chuvang chuan dem theih i ni lo..

Manchester Chhana
Mipui ho pawh… TBCC lipse tur a kal ani lo tih hre ve ula.. Mi an kal khawm dawn a.. Report a zu siam a ni mai a.. Zonet lam te chuan ‘enge an sawi ‘ tih prog an hmang a.. An hman ang in min an sawina an zawt ani mai a.



Ephraim Lalmalsawma chuan tihian a post ve thung.

Nizanah Pu vana Special Report ka en ve a., Thunawi tlem kan nei ve lawks.

Pathian tana hlawkna tur ngaihtuaha “kan fapa hian he camp hi rawngbawlna a ngaiin pui ve rawh se” tih sawi tur awm bawk silo, kan enkawl peih lo/kan khawtlangin a duhlo .,min lo enkawl sak teh uu” tih avanga nawr luh deuh vek a ni mai te hi Kristian rama thleng chu ni sia. Biakin ropui tak tak a zantin deuh thaw lawmman dawn tuma inkhawm kim thlap thlap te hian kan enkawl peih lova., kan thei bawk hek lo. Pathian hian biakin ropui tak tak mifel awmkhawmna a chen ai chuan TBCC a chen hi a thlan zawk ka ring!

Tin, pastor, kohhran upa leh Pathian hming lam zing em em ho te tih theih loh leh tih duh loh heng ruihhlo ngai, enkawl buaithlak tak tak te enkawl tu An pu (a hming pum pawh ka hrelo zohminga tih chiah) hi a fakawm thlawt ka ti. TNT a an pa (sanglianthanga mi kha?? ka hre dik em??) nen hian mizo Pa ropui ah ka ngai , sum leh pai leh hmingthatna um a, a nuam lam lam kawng zawh ngawt hote sawichhiat ve sek chi pawh an nilo.

Pathian hi hlauh tur.
A duh tana chhuah theih ti a, an chhungten an rawn lak chhuah te ho zawng zawng khan an in leh khawtlangah eng rah tha nge a va chhuah ang??? an chhungten mangang takin an rawn dah let leh mai ang ngem!!?* A centre pawhin a dawl zawh loh khawp campa awm ngai an awm tih kan hre tlang a, Lang chiang em em chu FA hi a SIAM chiah kan peiha, a ENKAWL kan peih lo.

Fate ai Sum leh Pai kan hmangaih zawk.
In lama tihngaihna an hriat lohte enkawl turin Home/Centre ah an dahlut a, an tlanchuah emaw chuan a thawktute thusawi aiin, vawi tam tak dawt hrilh tawhtute thusawi hi Nu leh Pa tam tak,zoram mipuite hian an awih leh tlat thin te.* An hrehawm tih mai mai !!! nun siam that nan chuan hrehawm tawrh ve te pawh a ngai a ni. he hmunah i fate nawmsak beiseiin dah lut suh. ENKAWL THA MAI RAWH.

He camp a administration fel loh zia hi hai rual a nilo. Mahse Biakin pulpita au ring leh chum thum dum dum te ai an hna/rawngbawlna hi Kan Pathian mit hmuhah a mawi zawk ka ring. Mihring ve bawk an nih avangin chetsual leh famkimlohna an neih chu ka ring e.

Nimahsela, a him chin atanga “chu chu ti rawh se,chu chu ti suh se.” lo tih ve ngawt thin hi a atthlak a, siamthat kan duh takzet chuan NANGMAH NGEI KHAN ZU SIAM THA LA! Nangmah ngei kha in pe rawh. Pathian chu a dik leh fir ngairengin kumtluanin a dikin a fir reng ang, mahse a rawngbawltuten an bawhchhe thei tih hria ila. Pathian dem chi nilo ang hian, Chutiang chiah chuan TBCC ah hian an pu ber hian zir mahse a nau te, a thawktu lam ten an bawhchhe ve thei ania.!!

Aside | Posted on by | Tagged , , | Leave a comment

CHAWNPUI BETHEL CAMPING CENTRE chungchang a ka thil tawn

Lalrinzawna Zawna Hrahsel chuan tihian a post a.
Thu dik leh ka tawn ngei ka han sawi ve teh ang..

Feb 27 Khan Krista hnungzuitute tawngtai bethel camping center ah ka lut ve a.. a hming nen a inhmeh tak in kan tawngtai tam khawp mai, zing leh tlai ah kan inkhawm a.. kan thu ngaihthlak tam ber erawh hotupa insawifiahna a ni deuh ber.. tin mi chhuak tawh hnu hmusit leh deusawh na thu pulpit tlang a tang ngaihthlak tur a awm fo..in hmangaih tawn ang u ti a a au dum dum lai in tumah ring zolo in tu pawh rinhlelh na mit in a thlir si.

Room tin ah in charge an awm theuh a, security 4 te an awm tel bawk.. tichuan chungho chuan room an kaihruai a.. lal ang mai in an khawsa tlangpui. damdawi lam khawih tu medical in charge an awm theuh a, damlo buaipui tu ber an ni a, thenkhat kawtalo damdawi leh damdawi dang lo rui tawk poh an awm thin..tichuan security thenkhat mi thil thiam taka neih sak ching an awm bawk..security zing ah tlawhtu nei ngailo mahse thlatawp theng a cigarette bawm thar hawng reng thei an awm nual. An luh tirh a hakthlak tlemte thalemlo nen a lut hruaitu an nih hnu a an thawmhnaw dahna tur ngaihtuah belh ngai lah bolo..”rinawmlo ka duhlo an lo awmpalh chuan rawn sawi rawh u” ti ve reng mahse..mipui tan ka han an ngamna chi lah nisuh..hotupa in hremhmun nen a tehkhin fo thin camping center kha a ni miau a lawm.

Tui no 6 a patling thankin chhip atanga keler thleng a fai taka kan in bual thin khu Tui ren na kawng a min puitu a nih ka beisei.

Rilru lam a rualbanlo te nen kan mu tlar put a. Chung mipangailote kut chu kan tuar leh zauh thin.
tih let chu thianglo a ni tawp.

Dar insi thap a mut a ngai a.. room khat ah mihring 200 chuang te awm in lutthar taksa chaklo tak2 te chu chhuat (kalkawng) ah mu in zing dar 5 vel a tang zan mut hma chu tlukzal na tur an neilo, tin damdawi lo thleng reng² nachhawkna leh kawthalo damdawi bak chu office ah an la vek a hmuh(dawn) Kim loh a tam hle.

Hmani deuh (a ni chiah ka chiang fak talo) Khan room pakhat a an medical in charge chuan ART ei ho mipui hma ah a din tir hmiah mai bawk, heihi thilthalo tak leh in hmuhsitna ni in ka hria. archaw man min dah khawm tir a tang in hmani deuh mai Khan TV thar lei a ni a, arsa chu mipui lam chuanl kan ei khat hle lawi si.. ar damlo thi an awmloh phei chuan kan nghak lian deuh reng mai a ni..hotupa ber room a a rawn kal chang in mipui lam in anlo bia ang tih hlau ang maiin hruaitu ten an rawn zui nghal chat zel bawk si.

Chung zawng zawng ai a ka nun ti nghing lawih tu Complex Rawlthar kan chan ta kha..a thih hma zan ah a tlun vak a, a tuk ah tlun leh in a marphu a rang hle bawk, heihi hruaitu te poh hriattir an ni. ORS no khat an pe lai chu ka hmu.. ka mit a thim engmah ka hmu theilo ti a Rawlthar zakzum em2 maiin a mangan thu a sawi lai leh inthlahrung zo tawhlo khawp a mi mutna remchang lai2 a pan tawk2 late kha aw.
chutihrual vek a kan hruaitu fel tak2 te ngaihtha tak mai a duty post a an thut veng2 lai te khan a tawrh kha a lo va han na dawn rua em..a rualpui ten zahpah nei lemlo a rual u te bul a an pawt ve hawm2 lai a, bawih a hreawm I ti em tih ka zawh lai a, “Anu ka ngai” ti a min chhanna te khan a rilru thianghlim Zia a tilang chiang hle in ka hria..ka va han lainat em..thlamuang in chawl mawlh rawhse.

A thatlohna tamtak awm mahse thatna lai pawh a nei ve tho mai.. hruaitu te tan krismas dawn a Bazar buai ngailo thei mai ang a tihte ka rilru ah a lo lut a, tin thil mak ka tih em2 mai chu engti kawng in nge he camp hian sawrkar a tang inbuhfai kuata a neih? sawrkar hnuai a in ziak lut duh silo in hetiang thil a dawng ziah mai hi a va mak em.

Nichin mai khan ka thawmhnaw hawn kimloh room no 1 Ami an security eisiamtu in a kawl chu ka unaupa nen lam tum in kan kal a, kut beng in min haw tir leh bawk..

Tichuan patling rual khap khat leh a chanve vel a zantin mutna hmun khu kar hmasa khan puber in Vanram tlafual zu han tehkhin pek a.

Kan sawi belh leh law law teh ang – an thil chin thalo ka tih em2 mai chu chhuak tawh an thawmhnaw leh bungrua la tur a kal lo khung luih an ching, tin an pawisa deposit tepoh a hun hma a chhuak chu pek let duhloh an nei fo mai..min lo hrethiam teh u, a poimawh ber zing a mi ka sawi hmaih tep..
natna nei ten direct a chhungte hnen a an sawi phal a nilo.. chhuah lam thu I sawi a nih phei chuan.. ekin silfai.. chhuat nawh..
23 July at 13:48
***************************************

Aside | Posted on by | Tagged , , | Leave a comment

DE-ADDICTION CENTRE CENTRAL FUNDING NILO TE TANA THURAWN: Dawngpuii Chhakchhuak

De- Addiction Centre-ah hian ka awm kual ve nual tawh a. Ka awm tawhnaah chuan Chawnpui Bethel Camping Centre khu nuam ka la ti ber ve tlat a ni. Khatih hunlai khan Thlarau Thianghlim a zalen em em a. Ka awm tawhnaah chuan Thlarau Thianghlim a zalen berna hmun a ni. Pu Hmingtea leh Cynthia te an thawhlai kha a ni a. Thawktute hi Pathian lamtang, thlaraumi, an awm nual a ngai tlat a ni. A hmun khu chu hrehawm ka ti khawp mai a. Mahse, ka hlim thei em em thung. Pathian a Lalna hmun hi nuam ka ti a. A Lal lohna hmuna awm chu thawpikthlak ka ti takzet thin.

Tunlaiin Chawnpui Bethel Camping Centre hi a lar hle mai a. An hmingchhe takzet a. Hmingchhiatloh theih pawh a ni lova. Pu Hmingtea leh Cynthia an chhuak tawh si a. Thawktu Thlaraumi, mi huaisen, an neihloh vang a ni pakhat a. Ruihhlo ngawlvei mek ten ruihhlo ngawlvei mek te an enkawl a ni a. A rapthlak hi ka ti lutuk. Kut an inthlak nasa thei ngawt ang. Centre dangah pawh a ni vek. Ruihhloa la fihlim chiahlo reng reng chuan kutthlak an uar lutuk. Chubakah, thu han nih vel hi nuam an ti lutuk a. Lal ngai lo lal a na, an Lal a kha, an tih thin kha. Pathian tih miahlo, Pathian hruaia awm lo te hi room incharge te an han ni thin a, a buaithlak thin.

An buaina chhan dang leh chu hmun pakhatah ruihhlo ngawlvei khuti zozai khungkhawm khu a diklo reng reng a. Tawt lutukin an inbeng a. Hriselna atan pawh a tha lova. Dan mumal tak siam a ngai a nih chu. Hmeichhia 100 leh mipa 200 aia tam lak theihloh nise, Tichuan tui chungchangah leh ei leh in velah pawh a ziaawm kawk dawn a ni. Enkawl zawhloh tur lak luh vak hi buaina mai a ni.

Ei leh in inpek chungchangah te hian dan mumal siam a ngai a. Mi phakar awmkhawm an ni a. Room enkawltute, Pathian tihlo tan chuan phakar taka chet theihdan a tam lutuk a. Eitur leh zuk leh hmuam velah te enkawllaite hi intlawntir theih deuh mai a ni a. Chuvang chuan, Pathianmi thawktu an mamawh em em a ni.

Tin, kan hriat atana pawimawh em em chu Central lamah khuan ka pa, Pathian fund a awm a. Ruihhlo ngawlvei leh Hiv Aids veite enkawlna lam hi Pathianin a ngaipawimawh em em a. Fund pawh a dah hnem. Central atanga tanpuina dawn te hi a Pathian thu lo riau te hian kan hre ringawt a. Mi tanpuina dawnloh chuan Centre din theih a ni chuang silo. Donation hmuhdan tur kan ngaihtuah a. Kan tawngtai leh vak vak tho si a. Tanpuina dawn loh hi insawitheih na’na hman chi a nilo. Pathian ring bik tihna pawh a nilo. Nakina insawitheihna’n an duh ni berin ka hria. “Pathian kan ring tawp a, tanpuina engmah kan dawng lo,” inti Pathian ring deuhva han tih vel an chak a nih ka ring. Tanpuina, Donation an dawng reng sia. Kan hawiher te hi a zau a ngai a ni. Zim lutuk a thil kan ngaihtuah vang hian Pathian hi rilru zim deuh turah kan ngai ringawt thin.

Mihring kan nih chuan mamawh hrang hrang kan nei ve a. Hlawh nei lova thawh ringawt hi sum ngah lutuk chhungkua kan nihloh chuan a harsa a ni. Thawktute hlawh pek tur te hi ngaihtuah a ngai a. Hlawh nei lova thawh hi intihtheihpui chi a nilo. Ngawlvei enkawlna anih vanga hlawh neihloh bik kher a tul hranlo.

Ngawlvei enkawl tur hian mifing lutuk nih a ngai a. Pathian nena inpawh tha, mi Psychology man zung zung, ngawlveiho enkawldan tur training tawh nih te a ngai asin. Awm mawl ve tawp a, ruihhlo ngawlvei enkawl han tum ve ringawt chu atthlak tak a ni.

Chaltlang, Dawrkawn ah hian RRTC office a awm a. Social welfare Dept. hnuaiah MSD and RB a awm a. Chumi chhungah chuan Regional Resource and Training Centre (RRTC) a awm a, ADDICT enkawl dan training theih a ni. Khawvela mithiamten an lo enkawl thin dan te hriat ve a ngai. Kan thawhna tur reng reng chu kan hriatchian a tul a ni. Mawl taka thawh ve tawp ringawt loh tur.

Chawnpui Centre pawhin RRTC atangin training tura sawmna lehkha in dawn thin kha.

Thawktute hian intuaithar zel an mamawh a. Mihring kan lochangkang chho zel a, fing kherek tak tak te an rawn awm a. An Psychology man thei turin tan kan lak a, kan intuaihriam chhoh zel a ngai. Pathian thu ah pawh a pawimawh bik lai a awm a. Sual bul, Chhandamna, Ringtu nun te Hriatchian ngei ngei tum tur a ni ang. Intithu taka thut bur ringawt hi a ni lo. Tawngkam thiam fahrana insawifel tuma dak char char ringawt lovin Hriattur pawimawh te kan hriat a tul a ni.

He thurawn hi De-Addiction centre, Central Funding nilo zawng zawngte tana ziah a ni.

26 July, 2017

Aside | Posted on by | Tagged , , | Leave a comment

POLICE TE DEMNA HI Ziaktu : HC.Vanlalruata, Principal Correspondent, PTI

ALL INDIA RADIO NEWS AIZAWL
REGIONAL NEWS UNIT
NEWS COMMENTARY : 29.07.2017 (Zing dar 7)
POLICE TE DEMNA HI
Ziaktu : HC.Vanlalruata,Principal Correspondent, PTI
.
Tunhnai-ah Chakma zirlai thenkhat technical thil, a bikin MBBS leh BDS (ha doctor) zir tura India ram Medical College hrang hranga Mizoram chanpuala thlan an nih avangin Police leh zirlai pungkhawm an inep a. Zirlai nena an innawrna-a boruak sa hulhah khan thenkhat chuan social media-ah Police an dem em em mai a, a bik takin Police Officer pahnih – DSP pakhat leh Aizawl OC phei chu ar-chuk-tuilo khawpin an bei nasa a nih kha.
.
Mizote hi kan changkang ve fu tawh emaw ti a, India ram hmun dang dang pawh kan daidar tawh viau emaw tih hnu hian kan khawhawi hi a lo la zim ang reng fu mai tih hi a lang leh thin a. Thliarkar rilru pu kan la tam a, ram leh hnamhumhalhna atana thawk tha leh midang aia hnam hmangaih bik nia inhre tlat, midang chu hnam hmangaih vevaklo nia hre ho thunawn fo chu ram leh hnam tan chuan thliarkar rilru pu anga puh nih an hrehloh thu hi a ni. Chutiang rilru avanga Police-te leh midang kan dem ngawt hi a fuh reng lem lo.
.
Police hi ram dan leh nunphung muanawm pangngai (law and order) vawnhimna atana thawk tur an ni a. Sorkar chhawr, an ni a, sorkarin an hna thawk tura a lak, an hlawh pawh a pek a ni a. Chubakah sorkar hnathawk dangte ang lo takin thununna (discipline) khauh tak hnuaia enkawl, a bik taka chutiang tura training leh hotute thu-awih tura zirtir an ni a. Mizo tawngkauchheh lar tak, “Bula tu tawh,” tih a tu mai tur an ni a. Thupek zawm tur an ni a, dem vak pawh a sawt teh chiamlo.
.
Mihring ze langsar tak pakhat chu tha leh dik nia kan hriat tawh phawt chu midangin min pawmpui ngei ngei tura ngaihna hi a ni ve a. Lungawilohna lan tira Bandh kan han huaihawt te hian kan bandh huaihawt chhan kha ram leh hnam leh mipui tana tha leh pawimawh ngawih ngawihah kan ngai vek a, hnam hnuk ni hialin kan chhuah thin. Chutianga mi chhuak tur kan dan lai chuan kan ngaihdan min pawmpuilo hranpa pawh nilo, kawl-a-ni-chhuak chhiara hnathawka eizawng, ni khat pawh hna a thawh loh chuan a nupui fanaute chaw nghei mai theite, an thil zawrh lai chhe vek turte pawh inti hnam hmangaih tak maiin kan dang ta thin a. Ngaihtuah chian deuh chu a ngai a ni. Democracy rama awm kan nih avangin ngaihdan kan nei thiang mai a ni lova, kan ngaihdan leh duhdan sawi chhuahtheihna atan zalenna leh chanvo kan nei a, kan ngaihdan nilo chu sawisel theihna chanvo pawh kan nei. Chutiang chiah chuan chu zalenna leh chanvo chu midangin an nei tih kan hriat a ngai a, midang zalenna leh chanvo chu kan zah sak ve a ngai a, ngaihdan dang an neih kha kan pawmlo a nih pawhin kan hriatthiam sak a ngai a ni.
.
Tunhnaia kan buaina-ah pawh hian tam tak chuan Police tekha zirlaite nawrh chhan hrethiam a, an sawi dan taka ram leh hnam chhanna atana anmahni lam tang a, buaina an siam pawha dim turin an beisei a. Thenkhat phei chuan Police te kha an lam tanga an mihring bitumte kha zu vaw zawk turah an beisei hial mai thei a ni. Chutiang chu a ni hauh silo. Police hna chu kan sawi tawh angin ram dan leh nunphung muanawm pangngai vawnhim a ni a. Chumi kawngah chuan ngaihdan an neih ve a thiang hranpa lova. “Charge of the Light Brigade” a sipaiho chungchang tarlan ang khan zawhna an zawh a thiang lova, a chhan an zawh pawh a thiang lova, hotute’n thu an pek a piang zawm mai tur an ni.
.
Chubakah democracy kan tih mai, mipui rorelna sorkar hi mipui-in a huhova, a haw haw a rorelna tur leh mipui pungkhawmin dan kengkawh a ro an relna tur a ni lo. Mipui rorelna (democracy)-ah chuan mipui-in an aiawh tur an thlan chhuahte’n ro relin dan an siam ang a, chu dan ang tak chuan sorkar (executive)-in hna a thawk ang a, dan bawhchhiatna a awm nia zualko an awm chuan dan rorelna hmanga roreltu Court-in thuremna a siam ang. Democracy awmzia ber chu mipui mimirin tam chhuanga ro an relna ni lovin dan rorelna hnuaia dan ang taka kal hi a ni a. Chu chu mipui zalenna leh an chanvo humhalhna a nihbakah dan mithmuhah mi zawng zawng an intluk tlanna a ni. A tam tam, a chak chak, a sek sek, a thluak tha tha-in chutiang ni velote an rahbeh a an kuta dan an kenkawh lohna turin sorkar chuan mimal zalenna humhalhtu atan Police a neih hi a tul a ni.
.
Dan siam pawl an ni emaw sorkar an ni emaw court rorelnaa ni emaw tihbuai a nihin hengte hian tha taka mipui rawng an bawl theihna turin Police hi a hmanrua an ni. Eng pawlin emaw bandh an huaihawt karah mahni hna a kal duhte an chanvo leh zalenna humhim sak chu Police hna a ni. Tualthattu emaw pawikhawihna dang emaw titu a puh chumipui-in an chil hlum mai lohva, dan ang thlapa court-in a chungthu a rel theihna tur leh pawi a khawih ngei a nih chuan khaihlum thlenga a hrem theihna turin Police-in mawh an phur a. Pawikhawihtu-a puh chu court-in a chungthu a rel ngei theihna’n mahni kuta dan kengkawh a lo chum hlum mai tumte lakah a venghim tur a ni a, a tul chuan tharum pawh a hmang mai tur a ni.
.
Chu chu Police mawhphurhna a ni a. Chutianga a tih avangchuan misual a hum a ni lova, danin mitin chanvo a pek a humhim zawk a ni. India rama misual man hrem tamna ber Mizoramah hian Police te fak nachang kan hrelo fo. Kan thenawm Manipur-ah khian nunau pawisawilo thleng a dan kalha Police te’n an thah zat chu sang chuang an tling tawh tih tunhnai khan Supreme Court hriattir a ni. Mizoram Police te hi chutiang chuan an chet kan la hrelo. Mawl fal leh tha lemlo chu a sangtel zingah chuan an awm ang chu.
.
Mizoram Police hi an felin an dik vek a, an tha kim veklo. Chuti chung chuan state Police zinga a tha ber pawl an ni a. Hmuh chhuah theih pawha langlo pawikhawihna a mawhphurtu man chhuah kawngah te hian chhuanawm tak an ni. Chutiang a nih lai chuan an thutiam leh chhechham kalh zawnga che tura kan beisei chuan kan beisei sual ngei dawn a. Thununna hnuaia awm theilo, thupek zawmlo Police chu Police thalo tak an ni zawk. Thupek zawm hi an tihtur an hlen chhuahna kawnga pawimawh hmasa ber a ni tih i hriat sak ang u.
An mawhphurhna leh tihtur (duty) an tiha kan dem zui zel a nih chuan Mizoram hi dan kenkawh lohna ramah chhuah kan duh zawk tihna a ni hial ang.

Aside | Posted on by | Tagged , , , | Leave a comment

CHAWNPUI BETHEL CAMPING CENTRE LUHCHHUAH THU

july 26, dar 11 vel khan tunlaia sawi hlawh em em mai Chawnpui Bethel Camping Centre chu mi 100 atanga 150 bawr velin lungawi lohna lantir turin an pungkhawm.

Ruatfela Nu tia kan hriat lar, Pi Vanramchhuangi Mizo Social Worker huaisen takin kalkhawmte hmaah thu a sawi.

Ruatfela Nu chuan, Chawnpui Bethel Camping Centre atang hian sawrkar inenfiah se a duh thu a sawi a, Mizoramah hian Centre/Rehab hi 30 chuang zet a awm niin a sawi a, a duh duhin Centre hi an din a, Lengpui leh Lengte inkarah pawh Children Home Silpouline hnuaia an enkawl mai mai a awm thu a sawi bawk.

Chawnpui Bethel Camping Centre hi mumal taka kalpui a nih loh thu sawiin nimina addict, vawiina worker, naktuka speaker ni ta te nen home hi kal pui a nih thu a sawi.

Pungkhawm ten au rualna an neih zawhah tin zui nghal a nia, mipui nawlpui haw darh hnu ah Chawnpui Branch YMA hruaitute hoin Centre hi luhchhuah a, patient te thu zawhfiah an ni.

Room khatah hian mi 130 atanga mi 200 vel an awm a, room a chep hle, patient te hian a hrehawm an tihna chu mutna chep lutuk, mipa leh mipa infawp lo chauha an mut thu te karkhatah thingpui thlum vawihnih chauh an in thu te, mi 150 velin room khata ekin 3 chauh an inhman tawm thu te, inkhawm mumal loa an awm thin dan te chiang takin an lo sawi.

Ar an vulh nual a, a chaw hi chhungte an chah tir thin a, a ar erawh a thih deuh mawlh mawlh thin avangin a sa an ei ngai mang lo niin an lo sawi bawk.

An tui tlan chu thianghlim lo zawk zawk erawh a nih hmel loh a, tunhma anga pangbal hnah bai tih vel chu an hmeh tawh loh thu te, alu leh dal an hmeh thin thu an lo sawi.

Home neitupa ber Pu TT Zohmingthanga erawh chu a zinbo lai a lo ni.

Pu Zohmingthanga hian motor a enkawl deuh chawt avangin a awm loh chuan Pathian biak ho a awm ngai lo a, Pawn lam atanga rawngbawltu lo kal Nl. Mimii te an rawn kal chuan an inkhawm ve thin thu an lo sawi bawk.

Tun dinhmunah chuan thawktu mipa 4, hmeichhia 6, naupang pariat awma sawi a ni.

Campers awm zat an lo tarlan hi a chiang lo hle a, mipa 639, hmeichhia 132 a vaiin 797 an lo ti kuau mai a, 639 leh 132 belhkhawm chu 771 a nia, an enkawl zat an chiang lo hle niin a lang.

Author : Denis Lr Ralte    

Aside | Posted on by | Tagged , , | Leave a comment

CHAKMA 3 LEH VAI 1 VANGIN BUAINA CHHUAK

• Chakma hnena MBBS seat pek an duhlo.
• Chakma an huangtau lutuk?

Mizoram State Quata a MBBS leh BDS zir tur chungchangah zirlaite interview an nei mek a. Zirlai pathum an tih zawhah a pali na Chakma interview dawnin buaina a chhuak. Police leh Zirlai an innawr nasa hle.Sawrkar lamin Interview an cancel/ti dawn rih ta lo, Boruak pawh a dai ta deuh e. Vawin 1:00pm hian MZP in an kal zel dantur an rel ang.

MZP PRESS RELEASE.

MZP IN CHAKMA PAWM LOMZP PRESS RELEASE

Nimin 18th July 2017 chawhnu dar 1:00 khan MZP Executive meeting neih a ni a, meeting hi Pu Lalsangzuala Ngente president in a kaihruai a ni. Meetingah hian Mizoram State Quata-a MBBS leh BDS zirtur thlan chungchang rel a ni.

Meeting chuan Mizoram Quata-a Technical Course (MBBS& BDS) zirtur thlan chungchangah dan hman mek-a categoty-I a tel tur hrilhfiahna- Indigenous people of the state of Mizoram a tih chungchangah a dinna ngaiah MZP chu a la ding reng a, he chanvo min chuh puitu Chakma te chu engti kawng zawng mahin a pawm thei lova, a ram leilungfa Mizo te chanvo min chhuhsak hi a phal ngai dawnlo a ni.

Hun hmasa lama Higher & Technical department(Technical wing) a thawk tute fimkhur tawk loh avanga Category-I a lo chhiar tel an ni leh hemi in nghawng thalo tak a nei zel tur hi tihtawp nghal a duh a. Kumin 2017-a MBBS leh BDS zirna tura kan chanvo Chakma te tana pekchhuah hi MZP chuan rem a ti thei lo a ni.

MZP chuan Chakma zirlaite hnena seat lo pe lo turin Mizoram sorkar a ngen a, Chakma zirlaite pawh Mizote Chanvo chhuhsak zawnga che lo turin a hriattir nghal bawk a ni.

Mizote chanvo hi a ram leilungfa Mizote ngeiin kan chan zel theih nan MZP chuan a theihtawpin hma a la zel dawn a, kan chanvo min chhuhluih tum Chakma zirlai an awm a nih chuan an chungah engpawh thleng se MZP in mawh a phur dawn lo a ni.

Kumtin deuhthaw-a Technical Course zirtur thlan chungchangah buaina awm thei pumpelhna tura Higher & Technical department(Technical wing) hmalakna hi MZP chuan a dem takzet a, hnam rilru pu ran chunga ruahmanna a rang thei ang bera siam thin turin MZP chuanthuneitute a ngen nghal bawk a ni.

(L.RAMDINLIANA RENTHLEI)
General Secretary
MZP Hqtr.

Author :    

Aside | Posted on by | Tagged , , | Leave a comment

PIANGTHAR-IN THIL A TISUAL THEI LO MAW? by Dr John Hlychho

1. THU HAWNNA
Pathian thu kan lâk dân leh kan pawm dân te hi in-ang lo ţhin mahse, a châng chuan thil chiang tak, kan pawm tlân leh dik kan tih tlân hi chu a awm a. Kan pawm duh leh duh lohva a innghat ţhin.

Helai kan thu khel tur “PATHIAN HRIN CHUAN THIL A TISUAL THEI LO” (1 John 3:9) tih thu pawh hi, a sawi tum dik tak chu, “PIANGTHAR DIK TAK CHUAN THIL A TISUAL-LUI THEI LO” a tihna a ni tih kan chiang tlâng awm e.
He thuziak hi i chhiar zawh hunah chuan i thlarau dinhmun dik tak chu i inhrechiang hle tawh turah ka beisei a. Chuvangin, i dinhmun kha insiam ţhat a ngai a nih chuan tawi-khaw-muang lova insiam ţha vat turin ka sawm nghal che a ni.

2. AN VA TISUAL ȚHIN SI VE??
Adama te, Nova te, Abrahama etc. te dah ţha in, Lal Solomona aţangin ţan ta ila. Solomona khân Pathian lakah thil ava tisual nasa si ve!? Hnamdang-mi nupui-ah nei lo turin Pathianin thu a pe mawlh mawlh a. Pathian Thupêk bawhchhia-in nupui a nei ţeuh si!?
Solomona nupui chungchâng hi Bible Scholar ţhenkhat-ten an chhui dânah chuan, Solomona khân, hnamdang-mi nupuia a neihna chhan kha a Pathian-thu riauvin an chhui tlat pek!

Solomona rilru leh tum dân (heart & motive)-ah chuan, hnamdang-mi nupuia a neih chuan, JEHOVA betu an pung ang a (a nupuite hi JEHOVA a biak-tir theih a in-ring a ni).

Hei bâkah hian Pathian Thupêk (chi tam tak thlah tura thupêk) tih-hlawhtlin nân, Israel mi chithlah pawh a neih phah ţeuh a beisei bawk a ni, an ti. Mahse, hmeichhia hi sual tura thlêmna lam kawngah hi chuan an Pi Evi kha an lo chhûn fuh khawp a, Solomona pawh kha a ţang zo ta ngang lo a ni e, an ti!

Theologian pakhat chuan, “Satan Most Powerful Weapons Are – Money, Women and Power” a ti a. Setana hian heng hmanrua-te hi a hmang ţangkai hle mai. Rawngbawltu duhawm tak tak-te chu Lalna, Thuneihna leh Lârna (power/popularity) lakah an tlâwm tawh a.

Hengte hmanga a hneh theih loh te hi, Pawisa leh khawvêl thila nawmsakna (money/pleasure) hian a hneh leh ţhin a. Lalna, thuneihna, lârna, pawisa leh nawmsakna-in a tih-tlâwm theih loh-te chu Hmeichhia (sex/mipat-hmeichhiatna) hmang hian a ti-tlâwm leh ngei ngei ţhin.

A pawiin a râpthlâk hle. He Setana thangah hian Mizoram-a Rawngbawltu duhawm tak tak engzât tak âwk tawh ang maw?

Bible Scholar ţhenkhat chuan, Lal Davida pawh kha, thil tisual tur hrim hrim-in Uria nupui kha a zawngin a melh lo, an ti tlat! Uria nupui zâwk khân, Lal Davida inchung zâwla a len hun (Timing) a hria a, Davida ît (thlêm) tur hrim hrim khân inchung zâwlah inbualna tui a han siamtir kher e, an ti!
An sawi dân chuan, Palestine ram khu a lum êm êm a, ţhenawm-te hmuh theih tura inchung zâwla tlai lama han inbual kher hi thil tih chi a ni lova, tih ţhin dân pangngai a ni lo ve, an ti! Uria nupui zâwk hian Davida hi hmanraw chikim hmangin thlêm-thlûk ngei tumin a bei niin an ngai a ni. Daih mai a!!!

Amaherawhchu, Pathian rilru ang pu mihring Davida chu loh-theih-loh thila suala tlu pawh nise, Sual ngaizam thei lo Pathian chuan a hrêm ta tho a nih kha. Bible-ah hian Davida chanchin a thlûr bing avangin, Davida hi thil tisualtu berah a lang deuh zâwk niin a lang.

Hetianga tuemaw chanchin thlûr bing hi Bible ziak dân kalhmang deuh pawh a ni hrim hrim. Pathian chuan kan rilru leh thil tum (heart & motive) hi a hrechiang khawp a, Davida leh Solomona chungchângah pawh hian hei hian awmzia a nei thui hle a ni.
Solomona leh Davida mai pawh ni lovin, Jona pawh khân Pathian thu meuh hnial-in tlânchhiatsan mah se, Jona rilru leh thiltum (heart & motive) kha Pathianin a hmuh tlat avangin Pathianin a ţhutchilh a, a la thlêm ţang ţang a nih kha.

Jona khân Ninevi khuaa kal a duhlohna chhan bulpui ber chu, Pathian nung JEHOVA hmusit êm êm-tu leh diriam êm êm-tu, a hnam thlan Israel mite pawh tiduhdah êm êm-tu Ninevi khaw mipuite kha (Pathian a țan êm avang leh Pathian a lainâtna thinlung aţangin) an sual man hmu ngei se, Pathianin Ninevi khua kha hrêm ngei se a duh a ni.

Hei hi kan rilru ţheuh pawh a ni awm e. Mahse, Pathian erawh chuan Jona mithmuh lai ngeia Ninevi khuaa mite hrêm kha a hun a la ti lo mai chauh a ni.

3. A ȚAWNGKAM HI KAN HRECHIANG LO EM NI?
Helai thu, “THIL A TISUAL THEI LO” (cannot go on sinning) tih lai tak hi zirchian deuh a ngai a, Mizo-ţawng hian a fun famkim zân lo deuh niin alang. Lo phelh darh dâwn chhin teh ang.

Helai thu, “Tisual” (to sin) tih lai tak hi, Greek “hamartanō” a hmang a. Greek “Hamartanō” hi a grammatically chuan, “present active infinitive” a ni a. Hei hian a sawi tum chu, “thil tih lai ti-chhunzawm/ti-nawn reng” (implying continued action) tihna a ni.

Greek “hamartō” hian, “thil tih lai, a khât tâwka ti chhunzawm reng” a sawi avang hian, thil sual tih, ngaia nei a, a khât tâwk emaw, zing deuh emaw-a tisual chhunzawm reng (practice or habit of sinning or habitual sin) chungchâng a sawi a. Thilsual tih chu a nunphung pangngai (sin as a life style) ang maiin a nei tawh a, a nun-ah a bet tlat tawh tihna a nih chu!!

Pathian thu hian a sawichiang viau, “Piangthar dik tak, ringtu dik tak chuan, a duh rêng vang emaw, a châk rêng vang emaw, tum rêng vang emaw ni lovin, Pathian lakah thil tisual ţhin mahse, thil sual a ni tih hre rêng chungin, châk takin, duh rêng vang leh tum sa ran (knowingly, willingly, intentionally)-in thil a ti sual-lui nawn fo thei lo hrim hrim a ni” a tihna a ni (1Joh.3:6, 10).

Thil a “tih-sual luih theih lohna chhan” pawh “Pathian chi” (Thlarau Thianghlim) amah-a a chên tlat vâng a ni, a ti bawk (1Joh.3:9, 5:11-12, Joh.15:4, 1Pet.1:23, 2Pet.1:4).

4. TUM RÊNG VÂNGA SUAL-LUI FO CHU… SETANA FA?
1Johana 3:1-5-ah chuan, Piangthar dik tak-te chungchâng a sawi a. Ringtu dik takin, tum rêng vang ni lo (un-intentionally) leh duh rêng vang ni lo (un-willingly)-in thil a tisual thei a, Pathian hnênah ngaihdam dil a, a inthen-thianghlim zel a pawimawh thu a sawi tawh a (cf.1Joh.1:8).

1Johana 5:18-ah phei chuan, Piangthar-te dinhmun ngheh zia leh ropui zia a rawn sawichiang lehzual a ni.

Piangthar dik tak-te chu, anmahni-a chêng Thlarau Thianghlim-in a hum tlat a, SETANA HIAN THIL TISUAL LUI NAWN FO TURIN EMAW, PATHIAN DUHLOH ZAWNG TI-NAWN FO TURIN EMAW A TI-LUIIN, A THUNUN THEI LO MAI NI LOVIN, THIL TISUAL-LUI NAWN FO TUR HIAN SETANA HIAN RINGTU DIK TAK-TE HI A HNAIH NGAM LOVA, KHAWIH PAWH A KHAWIH (FORCE/CONTROL) THEI LO HRIM HRIM a ti a nih chu! Ringtute dinhmun hi ava ropui êm!!

Helai “MISUAL CHUAN TAWH PAWH A TAWK THEI LO” tih hi Greek “haptetai” hman a ni a. A awmzia chu “thih ngam khawpa hliam tuar” tihna a ni.

Ringtu dik tak-te chu, Setana hian hârsatna (khawsak dinhmun danglam vek khawpin) leh lungngaihna (lusûnna leh khawharna) hrang hrang hmangin nâ takin min khawih-in, min hliam ţhin mah sela, thihna khawpin (kan chhandamna bo khawp leh Pathian nên-a kan inzawmna chhe khawpin) min khawih thei lo, hlauh pawh kan hlau tur a ni lo, tih hi Pathian thu nung ding reng chu a ni (Joh.14:27, 16:33).

1Johana 3:6-ah chuan, “SETANA FA” chungchâng a sawi ve thung a. Mi tupawhin, tum rêng vang te, châk rêng vang te, duh rêng vang te-a thil a tisual lui nawn fo ţhin a nih chuan chu mi chuan Pathian nên inzawmna a nei lova, Pathian fa ni lovin Setana fa a ni zâwk tih chiang takin a sawi a. Piangthar (Pathian fa) anga a lo inchhâl ve a nih pawhin, “thil tisual (nawn lui fo) țhin chuan amah chu a hmu lova, hriat pawh a hre hek lo” a ti tawp mai a ni.

Pathian thu sawi tum hi a chiang tawk hle mai, “Hre rêng chunga châk taka, duh rêng vang leh tum rêng vang a, thil tisual lui chu, piangthar angin inngai mahse Pathian nên hian an la intâwk lo hrim hrim a, Pathian pawh tunge a nih a hre lo” a ti hial a nih chu! 1Johana 3:10-ah phei chuan, hetiang mi hi chu Setana fa an nih thu chiang takin a sawi ta a!

Setana fa ni ta na na na chu a Hringtupa Setana chuan thilsual ti-lui nawn fo turin duh duh-in, a duh hun hunah, a duh dân dân-in a thunun ţhin a nih pawhin thil mak a ni rêng rêng lo a ni!

Bible Scholar-te chuan, Davida leh Solomona khân rilru-a sual tum sa leh, thilsual tih tum lâwk êm êm-in thil an ti lova, an thil tihsual kha Pathian pawhin a ngaihnathiamna chhan leh an thlarau nun (chhandamna) a khawih pawi lohna chhan chu ‘tum rêng vang leh duh rêng vang leh châk tak leh inbuatsaih lâwk sa thlap-in thil an tisual lui nawn fo lo tih Pathianin a hrechiang a ni’ an ti!

Pathianin a hmanzui zel dân leh an chungchâng thu-a a thiltih aţang hian Davida leh Solomona khân Pathian ngaihdam theih-loh-sual chu an lo khawih lo tih a chiang a ni (Pathian meuhvin a ngaihdam theih loh sual hi remchâng dangah la khel leh ila).

5. PIANGTHAR DIK TAK I NI CHIAH EM LE??
Paula chuan, “Rinna-ah chuan in awm emaw, nangmahni ngei inchhin ţhin ula, nangmahni ngei in fiah ţhin rawh u. A nih loh leh, nangmahniah Isua Krista chu a awm tih nangmahni ngeiin in hre fiah lo vem ni? Duhloh in nih nghal loh chuan” (2Kor.13:5) a ti a.
Pathianin a hnâwl tawh (Setana leh Vântirhkoh sualte, etc.) kan la nih loh avangin, tunah hian Pathianin kan dinhmun in-enfiah turin khawngaih chunga khawngaih leh chhawnna hun min hawnsakah ngai ila. Rilru lama chawlawl tawh kan nih loh chuan, Thlarau lama kan dinhmun dik tak hi mahni ngeiin kan in-enfiah hi Pathianin min phut tlat a ni.

Pâwnlam aţanga midangten min hmuh dân leh min hriat dân chu a chiang lo thei ţhin a ni tih hei hian a tifiah nghal a. Pâwnlam-a thlarau-mi êm êm anga lang, chhungril nun belhchian dâwl lo tak te a awm theih a.

Pâwnlam lan dân-a berh tak, dawrâwm tak, mahse chhungril lamah chuan thlarau lama hausa ru êm êm, Pathian nên-a thûk taka inpâwl ru reng si te pawh a awm theih a ni.

Piangthar (ringtu) tia kan sawi hian, Piangthar dik tak, ringtu dik tak kan sawina a ni. Chuvangin, kan dinhmun ţheuh in-enfiah ila, in-siamţhat kan ngai a nih chuan i in-siam ţha thuai ang u.

6. TLÂNGKAWMNA
Lalpa chhiahhlawh Mosia te, Joba leh Davida-te kha an tum rêng vang te, an châk reng vang leh an duh rêng vang-te in thil an tisual-lui nawn fo lova, Setana pawhin a thunun-in a ti-lui nawn fo (control & force) thei lo hrim hrim bawk.

Piangthar dik tak chuan, tum rêng vang (intentionally) emaw, hre rêng chung leh duh rêng vang emaw, châk êm êm vang (knowingly & willingly) emaw, remruat sa thlap chungin hreh miah lovin thil a tisual-lui nawn fo thei lo hrim hrim tih hi Bible min hrilh dân a ni.

Hriatloh vang te, vanduai vang te-a bum thlûk a ni emaw, tum rêng vang ni hauh lova beisei loh deuhva thil a tisual-palh a nih pawhin a tih-sualna ngaiah a ti-sual nawn a ti-sual nawn fo thei lo hrim hrim bawk ang. Hei hi ringtu dik tak zia (the true nature of truly born-again believer) a ni.

Khai le, “Piangthar dik tak, Pathian fa ka ni e” tiin i thinlung chhungril ber aţangin i sawi thei em le???

Author : Dr. John Hlychho    

Aside | Posted on by | Tagged , , , | Leave a comment