MOTOR INSU AH BORAL

9-7-2016 Inrinni tlai dar 4 :15 pm vel khan Kawnpui atanga Kawnpui Kanan Veng (Tea Garden ) thlen hma Km 1 vel a hlaah CBZ Bike leh Truck 1109 Aizawl lam pan chu an insua Bike khalhtu Lalthlamuana (26) Khuangphah khua, tuna Kawnpui Vengthara Pi Chawngchhungi inluah mek chu a boral a, a bike a chhe hneh hle a, a bike atanga ft 50 vel a hlaah amah hi a vawrh phei a, a lu a hmuh tlak loh a ni.

A sutu motor hi a tlan tlang avangin Kawnpui Police ten an umzui.

Muana hi Thingzaia inhlawh thin a ni a, a hmaa a lo awmna thin Pu Sanga, Kawnpui Kanan Veng te inah a ruang lak a ni.

Aside | Posted on by | Tagged , , | Leave a comment

SPANISH BULLFIGHTER LAR BER CHU A AWMAH BAWNGIN A AWMA A SIK VANGIN THI

POSTED by Saihmingliana Sailo On July 10, 2016

July 9 Inrinni khan Teruel, Aragon region-a bullfighting an neihnaah Spanish bullfighter lar leh thiam bera an sawi Victor Barrio (29) chu bawngin a awmah a a kiin a si a, bawng ki hi a lut thawih mai a, a hmunah hian a thi nghal niin damdawi in an pan pui hnuah doctor ten an sawi.

Barrio hi kum 20 chhunga bullfighting neihnaa bawngin a sik hlum hmasak ber nia sawi a ni a, kum 1992 khan Manolo Montliu leh Ramon Soto Varga te chu bullring chhungah bawngin a lo si hlum tawh bawk a ni.

Hetia Barrio bawng in a sik lai hian entu mi za tel an awm a, a nupui pawhin en vein leia bawngin a sik beh a a kalsan hnuah Barrion damdawi in panpui a, mahse; a lo chat thla fel hman a ni.


A nupui Raquel Sanz, 32 nen hian 2014 khan an innei.

Kumtinin Spain-ah hian bullfighting vawi 2,000 vel an buatsaih thin a, mi 134 ten nunna an lo chan phah tawh a ni. Mi tam takin sima bansan an duh laiin hmanlai atanga an thil lo chin than tawh (tradition) a nih avangin an sim hlei thei lo a ni ber a, khaptu pawh an la tlen hle a, kum 2010 khan Catalonia chuan an lo khap tawh a, Spanish region-a khaptu hmasa ber dawttu niin a khap hmasa ber chu Canary Islands an ni.

Aside | Posted on by | Tagged , | Leave a comment

KAWNPUI DAIAH KAPLIANMUANGA RUANG CHHAR A NI

  • Motor insu ah boral

Nimin July 9 tlai dar 4 vel khan Kawnpui atanga Aizawl lamkm 3 vela hla National Highway-ah motor nena insu ni ngeia hriat bike pakhat khalhtu Kaplianmuanga, kum 26 Khuangphah khua chuthi-a chhar a ni.A ruang hi nizan khan Kawnpui Kanan Section YMA chuan lumenin vawiin chawhma lam khan Kawnpui PHC-ah a ruang hi postmortem a nih hnu-in an khua Khuangphah Champhai district panpui nghal a ni.

Kawnpui Police station atanga thudawn danin chetsualna thlen lai tak hi hriat chian a ni lo va, bike sutu hi a tlan tlang niin a lang a, a sutu lirthei zawngin Sairang, Lungdai leh Kolasib lamahte police te chuan motor kal vel an endik nghal a ni.

Kaplianmuanga hi kum 2006 atangin eizawnna dapa Kawnpuia khawsa țan a ni.

Aside | Posted on by | Tagged , , | Leave a comment

JAIL TANG TLANCHHUAK‪

POSTED by Dingdi

  • Unau kaphlumtu tlanbo

Ni 9/7/2016 khan Lalrindika (26) s/o Vanlalchhuanga, West Lungdar, chu Central Jail atangin a tlanchhuak a. Amah hi 31/1/2016 a West Lungdar khua, a unaupa (cousin) a kahhlum vanga man leh case siamsak a ni.

A tlanbo avang hian VVK PS Case no 108 dated 9/7/2016u/s 224 IPC register nghal a ni. Amah hi ngo lam deuh, feet5.5 bawr vela sang, a ban vei lama tattoo nei, a mitko veilama ser nei a ni.
A Unaupa A Thah Dan

Hetiang mi lo hmu leh a awmna chin hria chuan mahni awmna atanga hnai ber Police Station ah hriattir nghal turin mipuite kan inngen a, fimkhur turin kan inchah bawk.

Aside | Posted on by | Tagged , | Leave a comment

KASHMIR A MISUAL TURU TAK BURHAN WANI CHU ANANTNAG AH THAH A NI.

08/07/2016, friday khan Jammu & Kashmir Anantnag ah Police te leh Army țangkawp ten operation an neih laiin helho te nen an intawh chilh na ah misual turu tak mai most wanted terrorist kah hlum a nih thu police ten an puang a ni.

Hizbul Mujahideen’s pawlho a an commander Burhan Wani kum 22 a upa luman Rs 10 lakh lai mai nei chu Jammu and Kashmir’s Anantnag hmun ah intawhchilh naah kah hlum a ni a, amah hi kum 2010 khan class 10 exam ahma chhawn hmain an chenna in ațanga tlanbo in Hizbul Mujahideen pawl te chu a zawm ta a ni.

Aside | Posted on by | Tagged , , | Leave a comment

NORTH KOREA IN BALLISTIC MISSILE KAPCHHUAK LEH TA RUP MAI.

POSTED by AZ Khawlhring On July 9, 2016

Tumah ngai pawimawh vaklo North Korea chuan South Korea leh US ten advanced missile defence system South Korea lamah tirhluh a nih tur thu an puan hnu lawkah an duhlohna lantirna ni ngei turin Submarine-launched ballistic missile a test leh ta rup mai.

North Korea in missile an test thu hi South Korea defence ministry chuan rawn puangin an test hun hi chawhma lam dar 11:30am vel khan Korean peninsula a water east ah niin an tarlang.

North Korea hian khawvelin test mai mai atan an duhloh tak mai SLBM missile hi April 23 khan Kim Jong Un chuan South Korea leh US bei turin theihna an nei a ni tih entirnan a lo test tir tawh bawk a ni.

Vawiin a missile an han test leh nghut nachhan ber ni a rin chu Kim Jong Un hrekna thar US in a siam vangte leh Terminal High Altitude Area Defence system(THAAD) South Korea lama huntur thupuan thar awmta te vang ni ngeia rin a ni. He missile defence system tha eltiang lutuk South Korea lama awm tur hi China leh Russia pawhin an helh hle reng a ni.

Aside | Posted on by | Tagged , | Leave a comment

EURO 2016 a sum chet dan

Zanin a final hmuhnawm tak en tur, Henri Delauney Cup chawi tura thlengtu France leh Portugal inkhela chak zawk zawk hian € 27 million (Rupee 2,003,130,000) emaw a aiatam emaw a hlawh dawn a. A chak lo zawk pawh hian € 24 million (Rupee 1,780,560,000) emaw a aia tam emaw a hlawh dawn a ni. Mi fate infiamna hi chuan tluklehdingawn hi a hawl zuai zuai mai zawng a nih hi.

Sum sem zat :
EURO 2012-ah khan € 215 million (Rupee 15,950,850,000) lawmman atân sem a ni a. Tun kumah erawh chuan € 300 million (Rupee 22,257,000,000) zet lawmman atân hian sem a ni dawn a ni. EURO a tel hrim hrim hi ram tân a hlawk hle a. Tel hrim hrim khan tel ve lawmman € 8 million (Rupee 5,93,520,000) an hlawh nghal a. Group match a an tumpui an draw chuan €500,000 hlawhin an chak chuan € 1 million an hlawh thung. Group match pathuma chak vek chuan € 3 million (Rupee 2,22,570,000) an hlawh der!

Round of 16 lut team zawng zawng khan €1.5 million hlawhin Quarter Final lutin €2.5 an hlawh bawk. Semi thleng teamte hnenah khan €4 million pêk an ni a, Runners-up in € 5 million hlawhin champion chuan € 8 million a hlawh dawn ta a ni. Group match aṭanga an pawisa hlawh theih zat chhutin champion hian € 27 million vel a hlawh thei dawna chhut a ni ta a ni.

Sum hmuh inbeisei zat :
UEFA hian tun kum EURO aṭang hian € 2 billion vel sum lak luh a inbeisei a. EURO 2012 khan chuan € 1.4 billion bawr vel chauh sum a hmu a ni. Khawvel pum huapa sponsorship a hmuhnate chu Adidas, Carlsberg, Coca-Cola, Continental, Hisense, Hyundai–Kia, McDonald’s, Orange, SOCAR, Turkish Airlines te an ni a. National sponsor a hmuhnate chu Abritel–HomeAway, Crédit Agricole, Française des Jeux, La Poste, PROMAN, SNCF te an ni bawk.

Sponsorship aṭang ringawt hian EUFA hian €450 million (Rupee 33,385,500,000)a hmu phawt dawn a. Media Rights hi Copa America Centenario hnenah €99.6m(Rupee 7,389,324,000) in a hralh a. Heng bakah hian Ticket 2.5 million hralhna man aṭang te, TV Broadcast aṭang te leh thil dang dang aṭangin sum hi a hmu ṭeuh dawn a ni.

France tân hlawkna thuahhnih :
Tukin news ka en pawh khan France hian a ram angin sum a huilut hnem tawh hle a. sum hmuh an inbeisei zat €1.3 billion (Rupee 96,447,000,000)chu EURO a thlen vang hian a hmuh ngei rin a ni a. Stadium hman manah ngawt pawh EUFA hian €1.7 billion a seng nia!
Nang tunge i ṭan le ?

Aside | Posted on by | Tagged , , | Leave a comment

ZOFATE ZINGA PALIAN BER LEH CHAK HMINGTHANG KAPKHAWVUNGA

  • Paihteliana Chanchin
Kapkhawvunga chanchin hi hmanah FB group ah ka post tawh a, mahse a kimchang lo deuh a, ka post nawn leh a ni e.

Zofate khawvela mi chak leh palian ber, Mizo history-a hming dai tawh lo tur Paihteliana tia kan hriat thin hi a hming tak chu, ‘Kapkhawvunga samte’ (Vaiphei samte) a nia. Kum 1904-a piang ni-a hriat a ni.

Kapkhawvunga pa chu Lamzathanga samte a ni a, a nu chu Khawlniangi Songput hnam a ni. Chin hills (Burma) a Lunglenpi bula Bualtal khuaah a piang a; pianpui unau hmeichhia pathum a nei a, amah hi a upa ber dawttu leh an unau zinga mipa awm chhun a ni.A pa Lamzathanga Samte hian kum 1910-ah vanduaithlak takin a boralsan hlauh mai a. A pa thih leh Mautam țampui chu a innang zui ta si a, an khawsak chu a harsa hle mai.

Kum 1911-ah ei leh bar a ziaawm deuh ringin Manipur ram, Lungthul khuaah an pem ta ngawt mai a. Lungthul khuaah chuan fahrah naupang rethei tak niin a nu chuan a hmeithai pui ta a. Amah hi naupang thang mawh tak, tuana-saruhkhel an tih ang chi hi a ni a; mahse, kum 15 atanga kum 17 bawr a lo nih chuan thawklehkhatah hmuh theih khawp leh mite mak tih khawpin a lo thanglian ta thut mai a. A hmaa a mutna thin khumah te chuan a mu leng ta hauh lo mai a ni. A han puitling phei chu a san lam ringawt pawh ft.7 a ni a. A tawng zawng phei chuan tawng ruk chuanga sang ni a. A dar pharh lam hi ft-3 a ni a. Sum kua laia lian a ni. A taksa a len em avang hian ft.7 zet nimahse a lang sang lutuk lo hial zawk a. A palenna hi mite hmuhnawm tih leh hrilhfak a tling a, an en huai huai mai thin.

Hetia a rawn țhan vakna chhan hi a mak ang reng hle a. An sawi danin, a hringtu-nu in sazu var ruh nei lo hi a man a, a hem hmin sak a, a eizo ta vek mai a, chu mi a ei atang chuan a rawn thanlen phah ni te’n an sawi thin a ni.

Kapkhawvunga chuan nupui atan Theigotang khaw nula Nemkholuani a nei a, rei vak lo an inneih hnuah an ințhen leh ta mai a. A nupuiin a țhenna chhan nia an sawi chu amah Kapkhawvunga awm loh hlan hian mi tuten emaw,” I pasal hi dawl ang maiin a țhang uak uak mai a, nakinah i la hmeithai ngei dawn a ni,” tiin an lo hrilh a, chu vanga a nupui Nemkholuani chuan țhen ta niin an sawi a ni.

A nupuiin a then tak hnu chuan a nu nen khawhar takin an awm a, Lungthul khuaah kum 15 vel an awm hnuin a nu chuan a boralsan ve leh ta a. Tin, a hringtu-nu in a boralsan hnuah chuan Singhat khuaah a pem a, chutah chuan ‘Letngaii’ Nupui atan a nei leh a ni. Ani nen hian fanu pakhat an nei a; mahse, vanduai thlak takin an fa churei lo teah a boral ta a. Singat khuaah hian kum nga an awm hnuin, Lingsiphai (hlingsiphai) khuaah a insawn a. Heta an awm lai hian a unaunu (A farnu) Vaihentingi pawh a pasalin a thihsan avangin a u Kapkhawvunga hi a rawn fin ta a ni. Tin, Lingsiphai khuaa an awm lai tho hian Kapkhawvunga hi a nupui pahnihna, Letngaii chuan a boral san ve leh ta hlauh mai a. A unau-nu in pasal dang a neihsan hnuah amahin a parawl a, nupui dang pawh nei tawh lo vin a ban tlang ta a ni.

Kum 1944 Indopui II-na, Japan ral a lo len tak avangin Chongkhawzova (Tipaimukhroad) ah a raltlan ve ta a ni. Chongkhawzo a Kapkhawvunga a awm lai hian taksa lam bawrhsawmnain a tlakbuak a. Santen (Dysentry-Typhoid)natna veiin a lu hai chu khumbetin a chau der mai a ni. A unaunu leh a makpa ten an thiam ang tawkin an bawihsawm a, a thih mai an hlauh avangin an kaitho a, an tiharh hram hram a. Japan ral len lai ngang a nih avangin Doctor han koh ngaihna a awm si lo va. Tin, damdawi lam han ngaihtuah hleihtheih a ni bawk si lo, a natna chuan zual lam a pan zel a. A tawpah chuan mihring ve tho ta chuan han tlin reng ngaihna a awm si lo, a pa len vang leh a chak vang ringawtin a natna tawrh chu a nep phah chuang si lo va. Tichuan Zofate zinga mi chak leh lian hmingthang, Zofate zingah amah anga lian leh chak hi an piang leh thei a ngem tih pawh hriat loh chu Japan ral len lai tak kum 1944, August thla khan Chawngkhawzo khuaa Kaizagena inah chuan kum 40 mi chauh niin a boral ta a ni.

A thlan an laih hian patling pahnih in-hnungchhawn zawngin bawngtuthlawh a rualin an lek a, inbat buai miah lo vin an lai a ni. Kuang chhuat phah turin thingphel ft 2-a hlai pahnih an hmang bawk.

Kapkhawvunga hi mi insum thei tak a ni a, a hunlai hian zu an leklam hle a, induhsakna takah an neih a. Ani pawh hian tlem te te-in a in ve thin a. A palen ang bawkin a rilrua zau a, pa damdup mai, mi zakzum leh mi inthlahrung thei tak a nih avangin a țawng zen zen lo va. Zu a in ve chang te hian,” Zu rui khawpa ka in chuan mi ka vel hlauh dah ang e,” a ti a, rui khawpin a in ve ngai meuh lo a ni.

Mihring mihrinnaah chuan pa vanduai tak a nih vang nge, a lung a lengin a khua a har thei em em a; midangte hrilh lovin a lunglenna leh a khawharna chu amahin a sepui ruah tawrh tlawk tlawk mai thin a ni.

Imphal maharaja chuan a lenzia leh a chakzia a hriatin a ngaisang hle mai a,a hmel a hmuh phei chuan a body-guard atan a duh hle a; mahse, Kapkhawvunga chuan a duh tlat lo a ni.

Sechal, chhang panga nei tawh hi a ki-ah a kutin a chelh ding a, sechal chu chechang thei lovin a vuan bet tlat zo a ni. Vaimim kawm sawm leh panga zela țawn khawm, bawrza leh sawmnga lai a phur zo a, chu chu, kawm 2250 a phur zo tihna a ni a, a namai lo hle a, han ngaihtuah vang vang pawhin a mak hial zawk a ni.

Sanghal sum ngaa lian hi ramhruiin a ak a, mel riat a hla an khua thleng awlsam takin a ak haw thei a ni.

Nghalchang sum 7 a lian thanga awk, thi lova tal buan buan chu feiin leiah a chhun bet zo.

Tuilang atanga hla tak, Parbung thleng chi mound 1 (kg40 vel)a kutin a khai thleng zak bawk.

Sechal, a ki tawng chena sei, a ke hnunglam hmawrah a chelh kawp a, a chawi kang zo. A kut dinglamin sechal vek, a ki tawng chena sei, che thei lovin a chelhbet tlat thei.

Mau pum 100 țawn khawm a pu a, a rit bawk a ni ang, a hnuailam a koki dep chu a sawp vek a ni.

Belpui khap sawm tiat lung mum per deuh Lanva lui atangin Piarson khaw hmun, Kilometre chanve a hla thleng a kuta chawia zakkep chungin a dah zo. (he lung hi hmuh theihin a la awm nghe nghe. A rihlam hi quintal 3 chuang mah niin an sawi.)

Ba chhum hminsa leh Mai tai chhum kho khat a ei zo a, “Ka puar dan a tawk chauh e,” a ti nghe nghe. Khap 4 bela lian khat in chaw, rum tha taka chhum, vawk sum li bawp pahnih nen a ei zo vek thei.

Manipur Reng-in a chak leh chak loh en nan leh sipai atana a that dawn leh dawn loh a en duh vangin chaw a ei theih zat hriat tumin chaw eitir a tum a; mahse, mi thenkhatin an thik a, a chaw ei turah chuan khawnvartui an lo telh ru a. Ani chuan a ei thei ta lo va, tam a ei theih tak loh avangin Manipur Reng chuan a chak tak tak turah a ngaih loh phah a, sipaiah pawh a la ta lo a ni.

Japan ral len lai a sipai ho in an sakawr chung chuanna tur thutphah an hrenbehna savun chu a kawnghren turin a tawk chiah a ni.

Indopui II-na Japan ral len laia sipai ten an han hmuh chuan an en duh in mak an ti hle mai a, an hual luih luih mai thin. Chutia an zim tak luai luaiah chuan nuam a ti lova, thingtum leh lungtum keng tein a’n um darh leh ang dawr dawr hlawm thin e, an ti.

Japan sipai ten Churachanpur an lak khan Kapkhawvunga an hmuh chuan mak an ti hle a, a chakzia hriat tumin an camp-ah an hruai a, chaw ei-ah an sawm ta a. Buhfai kg 3 an chhum sak a, Kapkhawvunga chuan,”min hre chiang duh nafam chu.” tiin, a eizo ta leng mai a, buhtleia chawmal kai chen chuan a zut fai pak mai a ni.

Chaw a ei kham chuan motor hian petrol barrel 25 phur an lo kal tir a, an han hlan thlak tira, a zo ngang mai. A kut lehlamin barrel mawng chu a vuan a, lehlamin barrel chunglam a vuan a, a taksa pawh daitir lovin a ban thain rei lo teah a hlangthla fai ta hem mai a, Japan sipaiho chuan chak an ti kher mai.

Doctor-in,”A taksa pian a dik a, a ruh a len em avangin a taksa phu tawk aiin thahrui a ngah a, a chak a ni,” a ti.

Nikhat pawh an ramvahna-ah pa pakhat lo vat an hmu a. Phulraw hung a lo thiat a, hreipui hian a lo chek ngat ngat mai a. Kapkhawvunga chuan, “Keiman kan thiat ang e, lo chawl teh,” a ti a. A ramvahna chempui kg 5 laia rit hmang chuan a thiat ta hem hem mai a. An chheh vela midang awm ve te chu an rawn tlan khawm a, an thlir ta thup mai a ni. A han sat chhum hmawk hmawk a, hung sawm vel zeta sah chhum hnuah, a hung chu a rualin a namtlu ta duai duai mai a. A en tuten hmuhnawm an tihzia hahipin an sawi thin.

Lusei michak pakhatin a cho va, an inbuanna tur an thenfai lai chuan Kapkhawvunga chuan a kut khingkhatin mau bul pathum a chelhkhawm a, vawikhatah a pawt phawng hlawk hlawk mai a. Chutianga a che lai a chotupain a’n hmuh meuh chuan a cho zui ngam ta lo a, thupha a chawi hial a ni.

Sawleng khaw pa Pu Hrangkai’n a damlaiin Kapkhawvunga malpui chu a sum ve tawh a,” Ka sûm ruk a tling,” a ti. A hnarkuaah te hian Patling kutzungpui a leng zan e an ti bawk. Mi ina a lente hian tapchhaka a thu ve te hi rapchungah a dak du mai thin.

Vawk sum nga hi tûlah thil in a kut veilam in a kengkawh a, dinglamin chemkawmin a ziat thin.

Se patuai a ki leh a beng inchen an talh a. Sial leia mu chu a ke khing lehlam in a sep kang lauh lauh thei a ni. “Tuallaia sa chan zawng vaivut te a kai ang, a bawlhhlawh ang e” a ti a, lei atang chuan leikaah amahin a hlang a ni.

A thenawmpa in sa turin ban tur thing a kit a, Kapkhawvunga ramvak chuan a hmu a, “A tân a harsa ang, kan put hawnsak ang e” a ti a, a putsak ta a. An han pheldarh nak chuan patling put zawhtawk ban sawm a chhuak; a thenawmpa a lawm ngei mai. Khawnvartui a zuar a, vawikhatah tin 10 zel a phur thin. (tin 1 ah Lt. 18)

Nghalchang sûm ruk lai mai thangah a lo awk a, a tal chhuak leh si a. A kawlh hle mai a. Kapkhawvunga chuan thingtuai ban tiat, a hmawr kak a keng a, sanghal chuan a rawn phin ta thut mai a, a tiang ken chuan a lo hawlh vak mai a. Sanghal chu leiah bawkkhup zawngin a bet thlawp mai a, a kut khingkhata hawlh betin a kut lehlamin a sathlum ta a, sanghal chu a che lo kher mai.

A chempui kg.5-a rit a ak tawh hi chuan a thla a muang tawk hle a, “Pa tê deuh silai keng ai chuan min ring zawk ta che u,” a ti fiamthu thin a ni.

Țum khat pawh, a thiante nen savawm an tawk a, savawm chu a kawlh viau mai a. A thiante hnenah chuan ‘lo insaseng deuh rawh u’ a ti a. Savawm nen chuan an inpan ta cheu cheu mai a, savawm chuan a rawn zuan thut a. Chutia savawnin a rawn zuan chu Kapkhawvunga chuan a awmah a lo pet leng lawp mai a, inchhung dung chen zet a pet leng a. Savawm chu a lo tho leh a, inhrosa chungin a huk dum dum mai a, lei hai pahin a han ing-euh kual vel a. Chutah a rawn zuan leh a, Paihteliana chuan a lo pet leng leh ta dawrh mai a, inchhung dung chen zetah chuan a tla thum leh dum mai a.

Savawm chu a beidawng ta a ni teh chek ang chu, a tlanbo ta a ni. A thiante chuan,”insual pawh in ang lo e, football pet i ang ber e,” an ti a ni.

Mizorama zin hi a chak thei hle a,”min sawmtu leh zo taka min thleng theitu chu awm se, Zoram han fan hi ka va chak tak em. Keima thu chuan han zin ngawt chi a ni si lo. Hmelhriat loh Ina han thleng tur chuan, ka nikhat ei pawh buhfai kg. 3 lai a ni si a, ka tan a zahthlak deuh a ni,” a ti thin an ti.

Kapkhawvunga chanchin hi a thianpa, Mizo pachak dang Thuamchaka khan a hre tam hle a, a mizia ti hian a sawi thin,
“Mi zaidam, inngaitlawm, mi tawngtlem, tlawmngaihna ngah, a ngaihdan a pelh tawh erawh chuan luhlul deuh mai leh ngeng ngulh mai a ni. Mi tumah a pawisa ve lo va, keipawh hi a țhian bul ve tak chu ni mah ila, a rilru chhungril takah chuan mihringah pawh min chhiar bar lo,” tiin a sawi a ni.

Nikhat chu tuilehluangah phulrua an pu a. Thuamchaka chuan hlam thum, pum riat a pu a; Kapkhawvunga chuan a bulchhah atanga a ler thlengin a hlawi a, pum sawm leh pakhat a pu a ni. Thuamchaka chuan, “Eng atan nge i tih a?” a ti a. Paihteliana chuan,”Thlipui tleh huna inchung kaih ngheh nan.” tiin a chhang.

Kum 1940 vel khan Imphal Reng, Churachand singh-a khan a ram chhunga tlangval chakte inchai zir turin a ko khawm a, a țhianpa Thuamchaka nen chuan an kal ve a, miten an lo lawm khawp mai a, Reng lal pawh a hlim hle. Amah a palianin a pian a nalh a, a inthazo bawk si a; inchai an han zir chu a zei-zat mai a. A chaw eitur chu a hrangin buhfai kg. 3 an chhum sak a, a ei zo vek zel a ni. Zingah bawmrangin khawnvartui tin 10 a ak a, khawlai an fantir thin a, a rual hian Rengin a chhawm patling fel tak, ft.3 leka sang kanhai singh-a a kal ve tarh tarh bawk a. Imphal khawlaia an lenkual dawn țum chuan tlangau an autir phawt a, mipui a mak a makin an pung khawm a, kawng kamah chuan an intlar zui mai a, hmunawm titakin an thlir țhup a, miten an lawm hle thin a ni.
Kapkhawvunga chu muangchanga pen khat a pen chhungin patêreuhte (kanhai singh-a) chu vawi tam a pen tan tan mai thin a ni.Inchai an zirlaia a harsatna tawh tam ber chu a zirpuiten an chai ngam tlat lo mai chu a ni. Imphal Reng chuan Thuamchaka hnenah,”I Lusei-pui a ni a, nangma’n chai mai rawh.” a ti a. Thuamchaka chuan,”A malpui pawh ka tiat si lo va, engtin nge ka chai theih bik ang?” tiin a chai duh bik si lo. Hun engemaw ti chen Imphala a awm hnu chuan Kapkhawvunga(paihteliana) chu inchaipui tur pawh nei lovin a haw leh ta a ni .

In a thlen hnu chuan kal leh a tum a, mi-in,”Rengin i fapa a chhuhsak dawn che,” tiin a nu an lo sawi țhaih avangin a nu chuan kal a phal tahauh lo mai a. Imphal Reng chuan pawi a ti em em mai a, “I fapa hi ka chhuhsak dawn reng reng lo che, khawvela mi hmingthang berah siam ka tum a ni,” a tih pawhin a nu chuan kal a phal si lo va, Imphal Reng chuan pawi a ti em em mai a. “Tu tehlul in nge maw lo sawițhaih che le, a pawi ka va han ti tak em!,” a ti a, beidawng takin an ințhațhen ta a ni.

Kapkawvunga hian nakina thangtharten a chakzia kan la hriat theihnan thil min hnutchhiah a.
(1) Lanva lui atangin Lung Quintal 3 chuang zet zakzehin Piarson khawlaiah a dah a, tun thlengin mi’n an la tlawh reng a ni.
(2) Hlingsiphai chhak, Bisan mualah a lung put a dah bawk a, he a lung put hi Quintal 8 vel laia rit a ni. Nimahsela, Khugadam Hydel Project an khuah dawn a tui kawng siamna lung laten an Bomb darh tawh niin an sawi. (a uihawm in,a pawi hle mai).

Kum 1940 khan Kristian a la nih ve loh avangin a chipui Vaiphei ho chuan an vei deuh a, hetih lai hian Pu Lalkheraha leh Pu K.Chaldailova te țhian dun chu Churachanpur phairuam a chanchin tha an hril lai a ni a. Pu Lalkheraha hnenah kristiana sawm ve turin an ngen a, Pu Lalkheraha chuan,”A lian in a chak ropui si a, keini ang thusawi te chu a awih dawn em ni chu aw,” a ti a. A han sawm ta ngei a, Kapkhawvunga chuan,”Nangni meuhin min sawm te chuan duh tehlul e a,”a lo ti sam then mai a. A sawmtute chu an lawm hle a,”Vawiin hian kan hlawhtling takzet a ni, mi pahnih la lut tluk kan ni,” an ti hial a ni.

Zofate zinga hetiang taka palian leh chak, Mizo hnam awmchhunga a hming dai tawh lo tur ni bawk si hi, a lu phumna hmun ngeia a thlanlung chhinchhiahna leh chawimawina chhete tal pawh a awm mumal lo tlat lo mai hi, a fel tawk lo hle a. Hetia ram palailenga riangvai leh khawhar taka a awm tlat mai hi Zofate hian eng emaw chu tihtur kan nei niin a lang a ni.

‘KAPKHAWVUNGA (PAIHTELIANA) THLAN HI CHAWNGKHAWZO KHUA, MANIPUR AH A AWM.

Kapkhawvunga chanchin kimchang i chhiar duh a nih chuan K. C. Vanlalruata ziak ‘MIZO MI CHAKTE’ tih Lehkhabuah khan a awm e.

Aside | Posted on by | Tagged , | Leave a comment

CHAKMA HO IN PASTOR. HRANGCHHINGPUIALEH A FANU AN THAT…

POSTED by T Tetea Mizo

( He mi thu hi kum 1966 kuma thil thleng a tak tak ngei a ni e)

Pastor Hrangchhingpuia hi Tlangbung bialtu pastor niin, a bialte a vawng hneh hle thin. Kha tih hun lai 1966 vel lai kha chuan Mizoram ah hian mihring kan la thawl in, pastor pakhat pawn bial zau tak tak a vawng thin a. pastor. Hrangchhingpuiapawh hian Tlabung pastor bial a vil a vangin leh a bial a zau em a vangin, Tlabung ah awm hmun khuar lovin a bial a vil hneh zawk nan leh kal vel a awlsam zawk nan, Thehlep khua ah an chhungin Hrehawm pawisa lovin Bawkte an khawh ve a. Thehlep atang hian a bial te chu hneh tak in a vawng thin a ni.

Kum 1966 mizoram buai chhah lai tak in, a bial fang tur leh Tlabunga Krismass hmang tur in a fanu naupangte kum 12 mi Vanlalhluni chu hruaiin Tlabung ah krismass an va hmanga, he mi kum hian rambuai a vang leh Tam a vang in krismass ruai pawh theh lovin an va hmanga. mahse thlarau ruai theh in hlim tak in an va tling tla ta a, Kohhran ho pawn hlawk pui an in ti hle.

December 27 ah chuan Pastor. Hrangchhingpuia leh a fanu Vanlalhluni chuan, Kum thar 1967 hmang turin an khua thehlep lam chu puakphur pakhat hruaiin an pan ta a. He mi ni hian Hre lawk ang hrim in tlabung kohhran ho chuan a nawl puiin minttui nen an pastor te pafa chu an thlah liam ta a. Pastor. Hrangchhingpuiia chuan ” Lalpan rem a tih chuan kum thar ah kan la in tawk khawm leh dawn nia” tiin a thlah liam a.( Hei hi pastor hrangchhingpuia Tawng an hriat hnuhnun ber a ni ta a ni) Pastor Hrangchhingpuia leh a fanu hian an hmaa an thil tawn tur chu hre lawk ni se lang chuan, chu mi ni chuan an chhuak tawp lovang le.

Tlabung khua an pelh fel erh awrh hnu chuan Pastor Hrangchhingpuia fanu vanlalhluni chuan ‘ A pa ka ke a kham” a tih a vangin a pa chuan a paw ta a. Tlabung a tanga hla vak lo Melnga Tlang an tih an thlen chuan, An rin phak loh leh an beisei phak loh mumang a tan pawha an man duh loh Chakma mizo te do tura pawl in din, Kristo mohan chakma Nunsuri khua a awm thin leh a hote chuan Pastor Hrangchhingpuiate chu lo ti ding in an din hual nghal a. Pastor Hrangchhingpuia chu pawisa dilin a ni chuan pawisa an neih loh thu leh bialfang an nih thu a hrilh a. An ni chuan ” mizo mai mai kan hua che u a sin” tih pah in Pastor Hrangchhingpuia inringlo lai chu a dar ah an chem chuan an sat ta a. pastor Hrangchhingpuia na ti leichara tlu chu an ni chakma ho chuan an chem ken chuan an sat zui ta mawlh mawlh a. Pastor Hrangchhingpui chu a hmel pawh hmuh tlak awm lo khawp in an chhuah a.

Chutia a pa chakma ho in an sawisak lai chuan a fanu vanlalhluni chuan hlau chung chungin leh a pa a khawngaih em a vang chuan ” A pa.. a pa’ tiin hlau in a lo ding khur ve zawih zawih a. Nghet takin an puak phur chu a kut te tak te chuan a kuah chawih chawih a. Hetih laia a fanu mangan dan tur hi. Chutia hlau mangang chhantu ngai em em a a awm lai chuan a ni pawh chu Chakma ho chuan rawn pawh then an tuma, Vanlalhluni chuan min chhan thei dah law maw tiin an Puak phur chu ” A Pu.. A pu..” tiin beisei na nen a melh chho tawk tawk a. chakma ho thin in a tuar tawh lo a niang chu, chu tia Puakphur leh Vanlalhluni in pawmbet chu ” Nang mizo mai mai” tiin Vanlalhluni chu kuai van va dak in a nghawng ah chuan an chem mizo thisen chhuah chaka tah hriam ngei chuan Vanlalhluni nghawng ah chuan an zai thler sak ve ta a ni. He tia Vanlalhluni an buaipui lai hian an puakphur chu kawng thlang ah zuang thla in a him ta hlauh a ni.

Pastor Hrangchhingpuia leh a fanu tu pawi mah sawi ngailo chu chakma misual kut ah an nunna hlu tak chu an lo hlan ta a ni.

Aside | Posted on by | Tagged , , | Leave a comment

ENG VANGA VAWIH ȚHIN NGE I NIH?

POSTED by Duhawma Kawlni

  • Vawih lo insiam dan

Chaw emaw, thil dang eng eng emaw i ei khan i thil ei chauh kha ni lovin boruak i lem tel nual țhin. A bikin, kan vela boruak awm oxygen leh nitrogen i lem deuh ber. Chung i boruak lemte chu i pumin i thil ei an țhial sawm rualin an lo che sawn kual ve reng a. I thil ei i pumin a țhial sawm tâkte i rila an tlak thlak hnuin boruak țhenkhat: hydrogen, carbon dioxide leh methane te chu an lo insiam ve leh a ni. Hydrogen leh methane hi boruak alh thei (flammable gas) an ni. Chutiang boruak inpawlh chuan chhuahna an rawn zawng a, mawngah lo chhuakin “vawih” kan lo ti ta a ni.

ENG VANGA UIH NGE?

Vawih zawng zawng hi a uih vek lo. A uih leh uih loh hriltu ber chu boruak chi khat ‘sulphur’ hi a ni. Hydogen, carbon dioxide leh methane te ațanga lo awm hydrogen sulphide leh ammonia te chu rîlah boruak rim chhe takah an lo insiam țhin a ni.

Kan puma boruak siam tam thei heng: be lam chi (dal, bekang, etc.), purun sen, zikhlum, artui leh kan mawm (fried food) lam ei insum la, i vawih tlem deuh ang. A bikin- artui, zikhlum, be leh purunsen hian sulphur an pai tam tih hriat tur. Tin, hun bi neia inthiar hi vawih hnem pumpelhna tha tak a ni.

TUTE NGE VAWIH ȚHIN?

Mi thiamte chuan mi hrisel țha pangngai chu ni khatah vawi 16 vel tal kan vawih thin niin an sawi. Khawvel mihring- a Zo a Vai, Dumka ațanga Sap, khawvel mihring tu pawh hi vawih ngai lo kan awm lo. Khawi hmunah pawh, ‘London ațanga Neihdawn’ thlengin a bo a bang awm lovin kan ri chuah chuah țhin, ti ila kan sawi sual awm lo ve!

Mi thiamte chuan mihring hi kan thih hnuah pawh kan la vawih pawp pawp thei niin an sawi! Mihring kan thih hian kan tihrâwl (muscle) sâwng leh puam che vel (contracting & expanding) chuan kawchhunga gas lo awm sa chu a rawn tichhuak thei a; kan thih hnu darkar thum chhung vel chu kan la vawih thei fo ni âwm tak a ni!

I VAWIH HIAN…

Vawih khat i’n vawih pawp khan mi thiamte chuan hetiang hian za zela chhûtin i boruak rawn phuh chhuah kha an lo thliar hrang:

1. Nitrogen – 59%
2. Hydrogen. – 29%
3. Carbon dioxide – 9%
4. Methane – 7%
5. Oxygen – 4%

I vawi khat han vawih khan khitiang khi i bula mite i khilai țhin tihna a nih ber chu!

MIZOPA RILRU AȚANGIN
Technical takin, medical term ațang te’n vawih hi eng nge kan thlir ho tawh a. Tunah chuan Mizopa rilru ațangin vawih hi i’n thlir ve leh teh ang.

A mawl (simple) thei ang berin hetiang hian Mizopa rilru ațangin vawih hi a thliar theih mai âwm e.

Vawih inthlahrung:
Hei hi suahsual vang emaw, tum rêng vanga vawih a nih loh avangin a ri a lo ring palh a nih pawhin a inthlahrung aw deuh dui țhin. Hun rei tak insumtheihna thlarauin a sal beh hrep hnua loh theih loh avanga lo chhuak tih takah, a uih pawh a uih duh viau. Kan bula mite zah loh vang leh enga maha ngaih loh avang ni lova thleng palh liau liau a nih avangin engah maha ngai lo anga lan a, ngaihdamna thinlung nena hîp quit țhak theih pawh a pawimawh âwm e. Tlangval tan phei chuan kan bialnu te an lo vawih palh a nih pawhin, “Duat, i vawih palh elo?” tih kher te hi a mawlthlak hle tih hriat a țha.

Vawih Chapo:
Hei hi chu inthlahrunna nei miah lo, kan bula mite engah maha ngai lo vawih a nih avangin “vawih inchhuang/vawih chapo” a ni, a tih loh theih loh. A ri ațang hian a hriat hran theih mai a; san pe tak, țang em ema rawn inpuang chhuak tih takah, a ri pawh a ring a, a ri tuarh tuarh țhin tlangpui. Nula senior hian an uar bik a, an inlêngte bulah pawh an zah loh theihna meter-in a kâwk sang ve tawh hle a ni tih hriat takin an ri ûl ûl țhin. Tin, tlangval senior-ho hian vawih rin theih hi talent ropui takah an ngai ta em maw tih turin an uar duh viau bawk.

Tichuan…
Vawih hi i dam chhunga i nuna bet tlat tur a nih avangin tenawm uchuak leh zahthlak lutuka lak tur a ni lo. Zahthlaka lak loh tur a ni e tih avangin a hun leh hun lo, chaw ei lai pawh sawi lo va, mi dang thiam ve loh thiam ta bika inngai ni âwm hrima mi zinga rik pawm pawm reng mai erawh a ringtu hna lovin a Kristian hna lo viau, kan ti thei âwm e. Hun bi neia inthiar te, kan pumpuia boruak (gas) siam tam thei laka insum te, vawih uih viau dawn ai chuan mi bul ațanga kal sawn nachang hriat mai te hi a pawimawh hle.

—Duhawma Kawlni,
Vawksa Street,
Slumdog’s Cabin

Aside | Posted on by | Tagged | Leave a comment