NGAIHNAWM TAWI – V

1. Zàn khat chu 42 Street, New York-ah mihang pakhat hian savun ip lian tak leh suitcase khai chungin Hotel lam a pan a. Chuti lai chuan pa pakhat hian a ip khai chu rawn ban pahin, ” Thianpa, i bawr lu deuh a nih kha! Ka lo tanpui ang che,” a rawn ti a. Negro-pa chuan zàn thima, chutia, hmèlhriat loh lehnghál chu a pe hreh deuh a. Mahse, pa rintlak tak ni-a a hriat avàngin a pe ta tho a. Hlim taka ti ti-in, an kal dun a…

Booker T. Washington[1856-1915], Tuskegee Institute, Alabama-a zirtìrtu leh hnarkaitu ber ni thin, mihang hoin an ngaihsàn èm èm chuan, ” Khami zàn kha Theodore Roosvelt-a ka hmuh hmasak ber tum a ni. A chet dàn khàn min hneh takzet a ni! ” a ti.

2. US President 29-na, Warren G. Harding-a a thiha amah thlàktu, Vice President, Calvin Coolidge-a kha Aug. 3. 1925 atangin President a ni tan a. A làrna pakhat chu, ‘a tawng tlem,’ kha a ni!

Tum khat chu Massachusettes awptu a nih laiin, senator pahnih chu rorélnaah an inhnial chiam mai a. Pakhat chuan, ” Hremhmunah kal rawh!!” a ti ta piap piap mai a. Pakhat chuan Coolidge lam chu hawiin, ” Engtin nge, i tih dàwn?” a ti a.

” Hremhmunah kher chuan i kal lo ang! ” ti chauhin a lo chhang!

3. Lehkha thiam tak tak zìngah pawh hian kut ziak chhiar harsa fe fe chu an lo awm ve.

Kum 1872 vèla US President candidate hial rawn ni thei, Horace Greeley-a, New York Tribune chanchinbu enkawltu kha tum khat chu Illinois-ah thusawi tùrin an sawm a. ‘tiang hian an sàwmna chu a chhang a –

‘ Mr. MB Castle, Sandwich, Illinois

Pu duh tak,

Feb. 3 hian kum 60 ka tling ve dáwn ta a.
Hetianga sàwmna hi ka dawng malh malh ta hle mai. Ka hnar ngam te pawh a tul ta! Hnar chin ka neih ngawt loh chuan ka lo kal thei ang, tih pawh ka sawi dawt thei lo ania…!

– Horace Greeley

Nì eng emaw zat hnua chhanna a hmuh chu –

Horace Greeley,
New York Tribune

Pu duh tak,

Thusawi tùra kan sawmna che i pawm thu tukin khàn kan lo hmu e. I kutziak kha kan hre fuh mai thei lo a. Mahse, ka hre kim ta tho e. I sawi ang hian 3. feb. ni ta se, lawmman atàn pawh dollar 60 kan pawm e! I rawn sawi ang hian tum dangah pawh kan la sawm leh ang che!
– zah takin, MB Castle

4. Vawi khat chu a thusawi ngaithlatu pakhat hian John Banyan-a hnènah, ” Ka pu, tukina i thusawi kha a va’n tha kher em! ” tiin, chibai a lo buk a.

Chutah, Banyan-a chuan, ” I tlai lutuk tawh. Pulpit atanga ka rawn chhuk khàn setana’n min hrilh daih tawh! ” a lo ti daih a.

5. Edwin Stanton-a ang rèng rènga Lincoln-a tinawmnahtu kha an awm ngut lo ang! Lincoln-a policy rèng rèng kha sawisel loh a hleih a nei lo a. ‘ Bum hmangah chuan a lak tlak loh ber ang! ‘ a ti hial.

‘ Gorilla thlahtu’ tiin, hming lem a vuahsak a. Thil thar dapa zin kual thin, Paul Du Chaillu pawh Africa-a Gorilla man tùra kal dàwn tumin, ” Africa-ah kal kher a ngai hleinem. Springfield-ah hian awlsam tè-a man mai tùr a awm alawm! ” tiin, Lincoln-a chu a deusawh a ni!

Hèng te hi Lincoln-a chuan a hre ve vek a. A chhang duh miah lo a. Chu mai ni lo in, War Minister-a tha bera a hriat avàngin Minister atàn a ruat ta hial zawk a!

Abraham Lincoln-a an kah hlum zàn khàn a ruang an dahna bulah Stanton-a chu a ding a. Lincoln-a ruang, ngawi renga mu chu mittui tla zawih zawih chungin a en a, tap chungin, ” Khawvèlin roréltu a neih tawh zawng zawnga ropui ber leh ngilnei ber chu a chawl ta…! ” a ti hial a ni.

6. Cyrus McCormick-a chuan a lù a mehtìr a. Lumèttu, la naupang tak chuan a beng a cheh palh ta hlauh mai a. Pawi ti takin, thupha a chawi a. McCormick-a lah chuan, ” Thlaphang rèng rèng suh; i la làr dàwn a nia! Robawm min kawhhmuh alawm! ” a ti mai si a. Luméttu chuan a ngaihna a hre lo kher mai.

A hnu-ah chuan a tih ang ngeiin, ‘ McCormick’s Reaper’ an tih huai huai, buhseng khàwl tha zet mai chu lummèttuin a beng a chehsak hlak atanga a hmuhchhuah thu chu Chanchinbu-ho chuan an rawn chhuah ta chuai chuai a!

7. England Correspondent, Quentin Reynolds-a kha an rama a haw dàwn tèpin, White House-ah Theodore Roosevelt-a kha a va hmu a. A va lut chu, President chuan phone a lo hmang mèk a.
” Minit 3 a ral ta e, ka dah a hun ta..! ” a ti a, a dah ta mai a. Sawrkar pisa mah ni se, thu fahrah mai mai sawiin, pawisa a ti hek lo hle mai!

₹₹ Ka nuih avàng hian inchhirna ka la nei hauh lo nia!
– KC-i Pa, Khawlhring

Advertisements
Aside | Posted on by | Tagged , , | Leave a comment

MILLER NUPA

Posted by : Lalhma Chhuana On 8 August, 2006

Alu man ka pek fel hnu chuan chawhmeh lei belh tur ka melh kual leh a, mipa naupang pawr lampang hian Basket kengin kimkit hmel tak hian chawhmeh alo en kual ve mek bawk a. Chutia thlairah tharlam lei belh tuma ka en kual lai chuan dawr nei tupa, Pu Miller-a chuan mipa naupang chu alo chhawn vat a.

Pu Miller-a :- Hi..! Barry i tha maw, i nu a dam tha em? Tan pui theihna che ka nei em?

Mipa Naupang :- Aw, tha e..! I thlairah tharlam hi kan en kual chhin mai mai a nia, an itawm hlawm khawp mai!

Pu Miller-a :- Nia, kha a tha khawp mai! Hawn ve ta che.

Mipa Naupang :- Aih, kapu a leina tur pawisa ka nei lo.

Pu Miller-a :- A nih chuan eng emaw tal a man hu thil neih i nei em?

Mipa Naupang :- ka pu, Marble chiah ka nei!

Pu Miller-a :- A pawi hleinem, i Marble chu han la teh (Mipa Naupang chuan a Marble chu a pe a). Aaaaa…., a rawng hi ka duh zawng a ni lo, a sen ngei ka duh..! Ti khan thlairah hi hawn phawt la, ilo kal leh hunah Marble sen chu i lo keng mai dawn nia!

Mipa Naupang :- Aw le kapu, ka lawm lutuk e!

An indawr dan mak ka tih hmel deuh avang chuan ka bul maia ding Pu Miller-a nupui, Pi Miller-i chuan nui sang chung hian ti hian min hrilhfiah a, ” Kan khua Idaho (USA) ah hian rethei fal deuh mipa naupang 3 hi an awm a, khatiang khan an riltam tum hian ei tur ngaihvenin kan dawrah an rawn kal fo thin. Kan pa hian Apple, Tomatoe leh thil dang dang hi an Marble nen alo inthlengpui thin a. A rawng ka duh zawng a nilo tiin a dang rawn keng turin a ti zel thin! An thil hawn an ei zawha an riltam huna an lo kal leh meuh chuan kan pa Marble rawng duh zawng chu alo inthlak hman ziah a, thlairah leh ei turte a hawn tir leh a, Marble rawng dang bawk rawn keng turin a ti leh mai thin”.

Pu Miller-a te nupa rilru put hmang ka hriat chuan mak ka tiin hlim hle a ni.

Kum a vei a, Idaho chhuahsanin Colorado lamah ka pem ta. Pu Miller-a leh mipa naupangte Marble chanchin erawh ka thinlungah a cham reng thin! Kum tam a liam hnu chuan Pu Miller-a boral thu ka hre ta a, Idaho-a ka thian hluite tlawh pahin a vuinaah tel ve ngei tumin ka khaw hlui lam chu ka pan ta a.

Tum ang ngeiin Pu Miller-a vuinaah chuan ka tel thei a, kan hawi kual vel a, tlangval zahawm tak 3 ka hmu. Pakhat chu sipai uniform ha a ni a, midang 2 pawh an inthuam dan atang rengin mi naran chunglam an ni tih a hriat.

Chung tlangval 3 te chuan Pi Miller-i chu tap zawih zawih chung hian an va kuah a, Pu Miller-a kuang lam pan pheia mittui tla zawih zawih chunga a kut an fawp ngawih ngawih kan hmuh chuan mak ka ti angreng hle a!

Ka hun a thleng ve dawn ta, Pu Miller-a thlah nan a ruang tal hmuh ve ka duh a ni. Pi Miller-i bulah chuan tunge ka nih tih ka han insawifiah hmasa tete a, kum tam tak liamtaa an pa leh mipa naupangte Marble chanchin atang chuan min lo la hre kar hi a ni a.

Pi Miller-i chuan ka kut vuan chung chuan an pa kuang lam chu min pan pui a, “Khang tlangval 3 te kha hmana an chanchin ka hrilh che kha an ni. An chunga kan pa thiltihte kha an hre reng a, tunah chuan kan pa hian Marble rawng duh zawng thlak turin nunna a nei tawh lo…! An ba rul turin an lo kal a nih kha”

“Khawvelah hian inchhuanna tham ro ropui sawi tur kan nei lo; Mahse, kan pa (Jim Miller) hi Idaho-a pa hausa ber a ni”

Aside | Posted on by | Tagged , , | Leave a comment

MZP PRESS RELEASE14th September 2016

Tunhnaia MPSC kaltlanga staff nurse hna lak chung chang ah hian MZP chuan thil dik lo, chhung leh khat induhsakna uchuak a awm ngei niin a hria a, hei hi MZP chuan a duhlo tak zet a, a rang thei ang bera cancell-a a thara diktak leh fel fai taka he hna zahawm tak thawk tu tur hi la tha leh turin Mizoram Public Service Commission(MPSC) chu a phut tlat a ni.

He hna hi dil tu hi mi 860 an awm a, Mizoram Public Service Commission(MPSC) hian diltu mi 62 an dil dan dik loh avangin an hnawl a, a dil tu dang mi 260 te hi interview ah an inlan lo bawk a ni. MPSC kaltlanga staff nurse hna lak tur ah hian mi 538 in interview an hmachhawn a, heng atang hian mi 25 lak an ni a, mi 9 te chu panel list-ah an awm a ni.

He hna lak chung chang ah hian Health minister zahawm tak pawhin Bhavan-a a thu sawina ah pawh hunrei tak a nghet lova lo thawk tawh te dah nghehna tur leh tumah duhsak bik awm lova diktak leh fel fai taka he hna hi lak a nih tur thu pawh a lo sawi tawh a, he tih lai hian he hna thawk tur interview result a lo chhuak a, MPSC Chairman Pu P.C.Lawmkunga monu, kum thum chauh Private Hospital-a la thawk leh a thiannu kum nga chauh private hospital-a thawk te, senior zawk tam tak la si lo a senior lo zawk te lak an ni hi MZP chuan tha a ti lo a ni. MPSC Chairman Pu P.C. Lawmkunga hian State danga an chin thin ze tha lo hi MPSC ah hian rawn seng lut lo tur in MZP chuan a ngen nghal a, hetiang a nih chuan MPSC hnalak reng reng ah sum a inthamna a awm thei tawh dawn a, mipui ten MPSC ah rinna kan nghah loh phah ang tih MZP chuan a hlau tak zet a ni.

He kan ngenna hian awmzia a neih loh chuan a tawp thlengin MZP chu he thil diklo do tur hian a kal zel dawn a ni.

(L. RAMDINLIANA RENTHLEI)
General Secretary

Aside | Posted on by | Tagged , , | Leave a comment

REV C CHANCHINMAWIA LEHKHA BU BUATSAIH ‘THUTHLUNG THAR HRILHFIAHNA BU ‘ HAL A NI

AUTHOR : Slchhunga

VAWIIN chhun dar 11:00 khan Rev C Chanchinmawia lehkha bu ziah ‘Thuthlungthar hrilhfiahna ‘ tih bu chu Sangau khawtlangin , Bazar lun laiah halna hun an nei.

Sub hqrs YLA , Sangau hruaitute hnen atanga thu kan dawn danin, Rev C Chanchinmawia lehkha bu buatsaih ‘ thuthlungthar hrilhfiahna bu , kum 2013 a a tih chhuah phek 460 na ah Sangau khua chu hmanlai Korinth khua nihna nen a hmehbel a, chu thuziak chu, “Sualna lamah Korinth hi hmingthana em avang hian,’ I korinth e,’ tiin mihur leh awm khawlote chu an lo ko thin a ni. I korinth an tih chuan an nun kha sualna lamah a pil thuk hle tawh tihna a ni. ‘Korinth ho ang maiin I nung a nih hi ‘ tiin an sawi bawk thin .

I nun hi a rawva emaw , a tlaran zawng hlirin I nung tih nan an hmang thin a ni, Tunlai tawngin, ‘ I SANGAU E’ an tih ang hi a ni ang . he lai thu hi duh loin siamtha turin amah ngeipawh kan ngen tawh a , mahse vawiin ni thleng a siamthat a la nilo chu hriatthiam harsa kan tih vangin heti hian hma kan la ta ani, ati

ᑕAn Hruaitu pakhat chuan , Sangau hi khaw sual leh hurherh kan nilo a, kan tuchhuan lo la awm tur te thlengin hetianga hriat hlawh kan ni tur hi kan duh lo ani ati bawk.

ᑕLehkhabu halna hun hi YLA Sub Hqrs President, Ls Lalhmingthanga’n a kaihruai a ni.

Aside | Posted on by | Tagged , , , , | Leave a comment

Serchhip ah Dan kalhin hnam dang sponsor

PRESS NOTE
YMA/SUB-HQRS/SCHP/M&D/PN-23
KUMPUAN COMMITTEE
PRESS MEET

Sept 10 (inrinni) khan YMA Sub-Hqrs, Serchhip Kumpuan Committee chuan YMA Office-ah Press Meet neiin Serchhip-ah dik lo taka a hlawkna uma hnamdang sponsor 17 an awm mek thu an sawi.

Sub Hqrs, YMA Serchhip Kumpuan Committee Press meet-ah hian Kumpuan Committee te chuan ram leh hnam humhalh kawnga an hmalak hrang hrang te an sawi a, Kumpuan Committee Chairman, Pu Kawlthuama chuan ram leh hnam humhalh kawnga an hmalakna zingah a hlawkna uma, dik lo taka hnam dang sponsor 17 awm mek thu sawiin heng mite hi September thla chunga inchingfel tura tih an nih thu a sawi a, Mizo nih avang ringawta ILP sponsor ve ringawt an tam thu sawiin hnam dang sponsor chungchang inzirtirna neih a tul thu a sawi. Sub Hqrs YMA President, Pu R. Sanghmingthanga chuan hlawkna duh vang ringawta hnamdang sponsor an awm thin chu pawi a tih thu sawiin hemi kawnga mipui en dan kan hriat a tul thu a sawi.

Kumpuan Committee Secretary, Pu C. Lalrammuana chuan Press meet buatsaih a nih chhan te sawiin kumpuan Committee hmalakna hrang hrang te a sawi bawk a, Serchhip-ah ILP fello engemaw zat a awm thu sawiin dan hriat loh avanga bawhchhiat a tam thu a sawi a, ILP temporary pass ni 15 chhung tih chu hnamdang ten hemi chhunga duhtawka an sumdawn hman avangin Temporary pass huamchhung hi tih tlem a nih theih nana hmalak a nih thu a sawi a, ILP pekchhuah chungchanga YMA te hriatpuina tel tura hmalak mek a nih thu te a sawi.

Kumpuan Committee te chuan Inner Line Permit chungchanga hriattur pawimawh hrang hrang te an sawi a, heng zingah hian ILP Condition & Restriction chungchangah ILP neitute, Mizorama an awm chhunga an nungchang sual leh sual loh chungchangah a sponsor tuten a mawh an phurh thu sawiin dan bawhchhia te hremna a awm theihna tura hmalak mek a nih thu an sawi a, ILP neitu chu a sponsor tu hna chauh a thawk tur a nih thu leh a sponsor tu hnuaiah bak a thawh theih loh thu an sawi a, Sponsor tu hna thawk lo a, anmahni hna thawk tura kan sponsor tak mai mai an tam thu sawiin ILP neitu chu a sponsor tu hna a thawh loh a, ama hna a thawk anih chuan hnam hralhna ang hiala thil pawi anih thu an sawi a, ILP sponsor tuin mamawhna a neih loh chuan a ILP laksak tur a nih thu leh mihring thawnhaw thleng a an tihtur a nih thu an sawi a, thawnhaw an nih loh chuan anmahnin Sponsor tu tur an zawng a, hei hian kan eizawnna tam tak min luahlanin kan sum leh pai tam tak an rut ta thin a ni an ti a, ILP pekchhuah tawh chu a sponsor tute inthlak phal a nih loh thu leh ILP renew chu a sponsor tu tihtur a nih thu an sawi a, kan hnathawh tur an thawh zawh hnuah ILP tih tawp sak a thawnhaw zel chu a that ber thu an sawi.

Hei bakah hian Kumpuan Committee te chuan nupuia Mizo nei te chu zalen ta maia ngai an tam thu an sawi a, hei bakah hian Affidavit hmanga hmingthlak chu ngaimawh a hun tawh thu sawiin single parent hmanga hnam dang nisi, mizo hming a inziak te chu ngaimawh a hun tawh hle a ni an ti.

Sub Hqrs YMA, Serchhip, Kumpuan Committee Press Meet-ah hian Serchhip-a thuthar thehdarhtu te bakah branch YMA President leh Sub Hqrs YMA OB te an tel a ni

Aside | Posted on by | Tagged , , | Leave a comment

S KHAWLEK KHUA AH NUFA THAH AN NI

11/9/16 zan khan Suilianmawii w/o Cheuva leh a fapa kum 5 mi chu an chenna inah rawngtaka thah an ni.

New Khawlek khawtlang hruaitute hnen atanga Save Mizoram-in thu kan dawn danin, Tukin zing khawvar hma khan Isaak Lalrinmawia, S khawlek khua a mi chu New Khawlekah kalin, ‘Tual ka that a min hum ru’ tiin khawtlang hruaitute a va ngen a, YMA ten lam kal intira an va chian hnuah S. Khawleka khawtlang hruaitute hriattir an ni a, pi Suii ruang hi chhuatah saruaka hmuh a ni a, nasa taka vih a ni a, a fapa Lalmuanpuia (5) pawh hi a hrawkah thuk tak a zaiin bang thlanglam bulah hmuh a ni bawk. He thil thlen lai hian chhungkaw pa ber Cheuva hi ramriak a a awmbo hlan a ni. Cheuva te chhungkua hi Myanmar lam mi niin S.Khawlekah hian Kum nga (5) vel an awm tawh a ni.

Khawtlang hruaitute hnena Isaak-a’n a sawi danin an in bang kar kauin in chhungah hian a lut a, Pi Suii hi mutpui tumin a thlem a , a duh loh vanga hetiang a che zui ta mai hi a ni awm e.

Pi Suii te nufa ruang hi engmah khawih danglam loha dah an ni a, Lunglei police leh Bunghmun doctor ten a hmun hi pan nghalin chawhnu dar 4 vel khan a an thleng a he thu buatsaih a nih lai hian ruang enfiah hna an thawk mek a ni..

Aside | Posted on by | Tagged , , , | Leave a comment

Miriami Tan In Sa Dawn

AUTHOR :

Mamit Bazarveng a, Pa eisual vanga a nu leh pa leh unau ten an boral san tak, naupang lainatawmtak MIRIAMI te In chu a hlui rawp tawh avangin ATHAR a sak sak turin Sub Hqrs YMA Mamit chuan ruahmanna an siam a, Vawiin ah Mamit khawpui chhunga Br Executive chin in, inthiat hnatlang hi an nei a ni.

Tunah hian Miriami hi a Ni in mi in luahpuiin a tulpui mek a, An chenna in sak thatna tur hian mitlawmngaite’n Sub Hqrs YMA Mamit hnenah cheng nuai 322184 an chhunkhawm sak a , hemi hmang hian 24×17 a lian ,Semi pucca- in sak tumin ruahmanna siam a ni a,sak zqwh anih hma chu a in chhawkin mamit khawpui chhunga YMA branch te a an hnatlang thin dawn a ni

MIRIAMI chhenna in sak that anih theihnan hian Save Mizoram pawhin kan bawm dawh leh mi thahnemngaite thawhkhawm atangin Cheng sing 3 chuang an YMA hruaitute hnenah kan hlan a ni.

Kan tarlan tawh thin angin Mamit Bazar venga Saikhuma-te chhungkua hian ramhnuai atanga an lak, Papar ni-a an hriat chu kangin April ni 4 Thawhtan zan khan an ei a, hemi hnu hian an pum a nat bakah luak leh khawsik an nei nghal a, April 5 Thawhleh zan khan Mamit Damdawiin-ah an lut nghal a, Mamit Damdawiin ah hian an fapa Biakrinawma (10) chu April 7 Ningani zan dar 8 velah a thi a; a chhang, Malsawmtluanga (8) chu a tuk April 8 Zirtawpni zinglamah a thi leh a. An chhungkaw pa ber, Saikhuma (35) chu Aizawl Civil Hospital an thlenpui hnu-ah a thi leh a, An pathum hian April ni 8 zan khan vui an ni a. April ni 10 zing khan nu ber Ramdinmawii (34) a thi leh a, Ramdinmawii hi zanah lumen a nih hnu in April ni 11 chhun dar 12 khan vui niin, a pasal leh a fate 2 thlan bul-ah phum a ni a. An chhungkaw zinga thi hnuhnung ber leh an fapa upa ber ni bawk Saihmingthanga chu April ni 13 khan a boral veleh ta a ni.

Pa eisual vang hian Pu Saikhuma te chhungkaw hi member 6 ah 5 an boral a, tuna dama la awm chhun Miriami hi vanneihthlak takin a dam chhuak hlauh a ni.

Aside | Posted on by | Tagged , , , | Leave a comment

SAIHA -AH CHHUNGKUA LI LUAH LAI CHENÑA IN BUNGRUA ENGMAH CHUH HMAN LOHIN A KANG RAL VEK

AUTHOR : Slchhunga

11/9/16 Zan dar 8:00 vel khan Saiha New Coloney Vc-111, Ebenezar Biak in bul lawk a awm Pu S.Pawkhai JE Pwd te in , Chhungkua 4 luahlai chu bungrua engmah chuh hman lohin a kang ral vek.

Save Mizoram-in thu kan dawn danin , He in hi Assam type, Zopa chhiar a chhawng 4 , chhungkua 4-in an luahlai a ni a, Kangmei chhuah lai hi Inkhawm reh hun lai a nih avangin hriat lawk a ni lo a, hmuh anih meuh chuan kangmei hi alo nasa tawh hle a niawm e.

Mei sipai (FIRE Dept) lam hriattir nghal an ni a ,an kaihhruaina hnuaiah theihtawp chhuahin mi tlawmngaiten thelh tumin an bei a, kangmei hi alo nasat hman tawh em vangin thelh mih mai theih ani lo a, Bungrua engmah chuh human lohin a kangral ta vek a ni. An thenawm te in a man kai tur erawh ven hman a ni a, an kawmchhak Pu Lallungmuana Hrahu te in chu a bang leh darthlalang tih chhiat vek a ni.

Kangmei hi a chhawng chung ber dawttu pu Vb Pachha (vc sec) te In atanga chhuak tan ni a hriat a ni a, a chhan hi hriat a ni lova, Electrict current Kal sual vanga nih rin a ni. Vanneihrhlak takin mihring Thi leh hliam erawh an awm lo hlauh niin kan thudawnna chuan a sawi.

In luahtute :

A chung ber : K beithangia
A dawttu : VB pachha vc sect
A dawt leh tu : Bethlehemi
A hnuai ber : Makholu-i

Aside | Posted on by | Tagged , | Leave a comment

UPA DR PC BIAKSIAMA CHU UPA A NIHNA ATANGIN CHAWLH TIR (SUSPEND) LAI LAWK A NI TA

12/9/16 : Aizawl , Kanan Veng Presbyterian kohhran a Upa nihna nei mek Pu Dr PC Biaksiama chu Bible pakhat Parallel Bible a leh lin thu kal zelah Kohhran Upa a nihna chu kum 1 chhung atan hlih sak lai lawk ( suspend) a ni.

Kan Thu dawn danin , Upa a nihna hlih sak lai lawk anih thu hi Nizan , Pathianni zan kohhran inkhawm na ah kohhran mipui hriat atan puan chhuah a ni ta a ni awm e.

Kan thu dawnna in a sawi danin , Kohhran hian Bible a lehlin vanga Upa a nihna hi hlih sak lai lawk a nilo a, thuhmahruai lam a ziah danin kohhran hruaitute thinlung a tih nat deuh vang a ni awm e.

Aside | Posted on by | Tagged , , , | Leave a comment

A vawi thum nan kan Sorkar leh dawn Pu Lalthanhawlan a ti.

MPCC President Pu Lal Thanhawla Chief Minister chuan tunah hian a zawnin term 2 kan kal chho va, a zawnin term 3 kan sorkar dawn a ni, a ti.

September 9, Zirtawpni-a MPCC Political Session, Congress Bhawan-a neihahthu sawiin Pu Hawla chuan “Kan hotute hi emotional issue hmanga ram kaihruai an ni ve lova, naktuk naktipah kan inthlang dawn tawh si a district pathum i siam belh ang, sikul i upgrade vak ang tih te, inthlan a hnai si a I.R. battalion i din leh phawt ang ti mai mai an ni ve lo. Ram rorel hi vote hmuh nan ringawt a ni hranpa lova, ram tan thil tha leh rotling, mipui te mamawh tihna tur a ni” a ti.

Pu Hawla chuan NLUP avangin UNO atangin an agency 4 an lo kal thu a sawi a, “helai hmunah an office an rawn hawng ringawt pawh hi a ropui hle, party dangtih chu nise an au pui nasa viau ang. NLUP-a hlawtling tawh te pawh an hlawtlin leh zualna tur atan chhawmdawl an la ngai a, chuta tan chuan NEDP hi kan hotuten an duang chhuak a ni” a ti.

MPCC President chuan “Kawmchhak hovin a theih loh, Mizoramah a la awm ngai lo ti mahse khawvela la awm ngai lo, remna leh muanna awm theihna atana mahni sorkar namthlutute kan ni a, chu aichuan term 3 a zawna sorkar hi a awl zawk daih, record siam thintute kan ni a, kan siam leh dawn a ni” a ti.

Pu Hawla chuan “FC Kudam hi khulai mite ngaimawh hma daih hian kan ngaimawh tawh a, MZU hotute leh a awmna khawtlang hotute duh dan hi hman atang kan duhdan a ni tawh,tun maiah a kawng a awm lo a nih pawhin inpuhmawh nan hmang lo ila ka dih khawp mai” a ti bawk.

Revenue Minister Pu R.Romawia pawhin thu sawiin Ramrikawn FCI Kudam sawnna tur hmun an zawn reng thu a sawi a, “Mualkhang ram lampang pawh kan melh a, rel kawng atanga hla lo tur kan duh a, mahse Mualkhang khu Kolasib district huam a ni si a, District 1-ah buhfai kudam pathum thuma dah theih loh an ti si. Tlawnglui kanin Nghalchawm ramah khuan ram duh deuh kan nei a. Sairang te pawh kan han melh deuh a, mahse rel lo kal mai tur nghah rih deuh a la ngai a, Bairabi anga rel head atanga hnai te a insawn law law te kan duh deuh bawk si avangin tun dinhmunah insawn a la buaithlak deuh rih a ni” a ti.

Aside | Posted on by | Tagged , , | Leave a comment