Sialhawk ah Thlarau Maksak a thleng em ni

Tunlai chu Sialhawk lamah hmuhnawm a awm a ni awm a. Kal ve mai dawn mi le.

Sakhuana hian mihring a ti a thei hle a ni tih ka hriatna chu Hindu ho zinga ka vah vaih hrep atang khan a ni.

Hei le, Mizo zingah pawh a lo thleng leh ta a nih hi. Mipa leh hmeichhia tisa leh thisena duan, hrisel ve ve puan inzawna mut chuan an bulah mi awm reng mahse puan an sin tlat a lawm.

Hman deuhah pawh khan ‘innausen’ tihte pawh a awm kha maw. Nula leh mi pasal pawmlai neite pawh an indungsulinu a, an rai pawp tawh hlawm kha maw. A hnuah Pathian tana pasaltha leh a Kohhran tana mi tangkai tak an ni lem chuang lo.

“Tairaw tiangin hlap er zawt ula. Ze khelh hur chi kha chu a reh mai ang” tih hi ka thurawn chu a ni.

Thlarau hnathawh chu a ni a, thianghlim erawh a tel tlat lo. Duh leh leitlang leh leitlang chu lo innawt mai mai rawh se, kan van in kawng zawh min dal chuang lo intih chuan “Innawt, innawt se” a ni mai lawm. A hrin chhuah I lo thlir zel ang.

Author :    

Advertisements
Aside | Posted on by | Tagged , , , | Leave a comment

US MILITARY THLAWHNA A TLA : F-35B AN SIAM BELH TEUH DAWN

US Marine Corps tranport thlawhna lian leh hrawl zet mai, KC-130 chu Mississipi Delta Region-ah Jackson atanga mel 85 ah chesualin, a thawktu 5 pawh an thi vek. He KC-130 tranport plane chetsual chhat hi hriata ni lo. Khawi atanga thlawk chhuak nge tih leh a pan lam pawh hriat a ni lova, thil awm dan chhui mek a ni.

He tih lai hian Dept of Defense lam, Pentagon chuan Lockheed Martin Corp hnenah, F-35B leh F-35A Fifth Generation Joint Strike Fighter chu US$ tluklehdingawn 4.49 man zet an order leh mek. Chung siam chhuah zinga 48 F-35A chu Air Force hnenah, 18 F-35B chu Navy hnenah pek tur a ni. Heng siam thar tur F-35 te hi 141 zet chu US Military ten kum 2019-2020 chhungin an dawng hman tura tih a ni. Tin, heng F-35 Fifth Generation Jet Fighters te hi US chuan a thawh pui thian tha ram- UK, Norway, Australia, Japan, Turkey, South Korea leh Israel hnenah, kum 2018 khian a thei sem ve anga; heng ram te hian an lei ve dawn a ni.

Author : Ct Lalrinawma      

Aside | Posted on by | Tagged , | Leave a comment

SAIKHAWTHLIR-A GOVT ROSANGA MEMORIAL ME SCHOOL AN KHAR

• Zirtirtu awm tha duhlo vangin school khar?

Gov’t Rosanga Memorial Middle School, Saikhawthlir a zirlai nu leh pa te chuan July 10 atang khan tiamchin awmlo in an fate sikul an chawlh tir.

He sikulah hian teaching staff panga an awm a, zirtirtu te hisikul an kal tha lo hle niin an sawi. Ni 5th June 2017 phei chuan naupang hoin zirtirtu an neih loh avangin an hawng ringawt a. Zirlai naupangten zirtirtu indaihloh avangin subject an zir kim thei bawk si lo. school-ah hian discipline mumal taka ken kawh a awmlo bawk niin zirlai nu leh pate chuan an sawi a ni.

Headmaster tur lah chu DEO Office, Mamit-ah attached in an dah mek niin an sawi a. A post zawm vat turin an phut a,tun session chhung hian Class V-ah Mathematics class vawikhat chiah an la nei niin an sawi bawk. Mid day meal buhfai a bo thin niin an sawi bawk a, naupang hoin chhun chaw eitur an neilo fo mai niin zirlai nu leh pa te chuan an sawi bawk.

Hengte avang hian Nu leh pa te chuan an khaw sikul hi thuneitu ten an enfiah sak an phut a, hetiang ringawt hi chuan fate kalna tlakah an ngai tawhlo nia sawiin nimin atang khan tiamchin awmloin sikul an chawlhtir ta tih an thuchhuahah an tarlang a ni.

Author : Vanneihthanga Vanchhawng      

Aside | Posted on by | Tagged , , , | Leave a comment

VALLEY STRONG AGENT & DEALERS LEH MSU TEN INREMNA SIAM

Valley Strong Cement Carrying & Forwarding (C&F) Agent leh Dealers aiawhte leh MSU Gen. Hqrs, Aizawl chuan july 8, Inrinni khan Valley Strong Cement mantur chungchangah inremna an siam.

A hralhna tur rate hi Home Delivery tiamin Aizawlah Rs.425; Lunglei-ah Rs.475; Lawngtlai-ah Rs.495; Saiha-ah Rs.500; Champhai-ah Rs.475; Khawzawl-ah Rs.470; Hnahthial-ah Rs.465 leh Serchhip-ah Rs.450 a ni ang.

Cement man hian Mizoram chhungah Rs.500/- a pel tur a ni lo, an ti.

Author : Vanneihthanga Vanchhawng      

Aside | Posted on by | Tagged , , | Leave a comment

TEDIM-AH MIZORAM-A KHUAREL CHHIATNA TAWKTE TANPUI DAN TUR AN NGAIHTUAH

Mizorama ruah sur nasa vanga chhiatna thlengte tanpui theih dan dapin Tedim, Chin State,Myanmar-ah tlawmngai pawl hrang hrang an thukhawm.

Meeting hian Ruahsur nasa vanga Mizoram mipuite tanpui dan tur an sawiho a, tanpuina pek ngei ni se, hemi atan hiancommittee “Zomi Donghu Kipawlna” tih hman ni se tiin an rel a, hma latu an inruat nghal. Meeting-ah hian tanpuina pawisa fai Ks.1,03,500/- hmuh nghal a ni. Tanpuina hi -1) Tedim khawpui chhung,
2) Kohhran hrang hrang,
3) Myanmar a khawpui then khat leh
4) Ramdanga awm Zomite hnenah khawn khawm an rel a, tanpuina hi Zomi Innkuan, Aizawl kaltlanga pek nise tih an rel bawk.

Meeting-ah hian Tedim khaw chhunga tlawmngai pawl hrang hrang – Tedim Youth Fellowship (TYF), Zomi Youth Association (ZYA), Shalom Youth Club (SYC), Zomi Development Foundation (ZDF); kohhran thalai inzawmkhawm – Tedim Town Baptist Youth Union (TTBYU), leh political party lam a tangin Zomi Congress for Democracy (ZCD) youth wing aiawhte leh mi thahnem ngaithenkhat an tel.

Author : Vanneihthanga Vanchhawng      

Aside | Posted on by | Tagged , , | Leave a comment

MELBUK AH RANGKACHAK NUAI 598 MAN HU MAN

Land Custom Station Zokhawthar leh Champhai Customs te tangkawp chuan an thudawn bawhzuiin Melbukah Rangkachak Nuai 598 man hu an man.

Report an dawn veleh Champhai Customs te chuan bawhzui nghalin an mi rinhleh chu Melbukah nangchingin an man ta a ni. Rangkachak neitu hi C.Lalpekhlua s/o C.Lallawmzuala Zokhawthar niin a insawi a, Rangkachak tlang 20, tlang 1 kg 1 theuh a vaiin kg 20 chu a hnen atangin man niin sawrkar thuchhuah chuan a tarlang.

Saihmingliana Sailo

Aside | Posted on by | Tagged , | Leave a comment

Michael Lalmanzuala’n PU VANLALNGHAKA CHHAWNCHHEK open letter a thawn let.

Pu Vanlalnghaka Chhawnchhek,

            Open Letter min han thawn, Mizo Aw chanchinbu July 10-a chhuak hi ka lo hmu ve a. Tihdan pangngaiah chuan Open Letter hi kan mi thawn hnena pek hmasak a ni ţhin a. Chutianga i tih loh avangin ka lo hmu tlai deuh a ni. I duh dan zawk ni-a a lan avangin tun ţumah hi chuan kei pawhin chanchinbu/social media-ah ka han chhuah ve mai a ni.

NECS-in chhiah Cheng Nuaih 126 a âwl thu Chief Managing Director, Pu Robert Romawia Royte-ina a puanzar thu ka lo hriatin hetiang hi ram leh hnam inrelbawl dan phung tibuai thei thil a nih avang leh chhiah inâwltir dan pawh hi dan kalh a nih avangin ngawihbopui chi-a ngai lovin chanchinbu-ah ka ngaihdan ka chhuah a, Open Letter-in ka rawn chhuzui a ni.

Hemi chungchang hi ka ‘article’ leh ‘open letter’-ah chiang takin ka sawi tawh a, sawi belh tur tehchiam pawh a awm lo. A pawimawh zual lai erawh ka’n sawinawn leh ang e.

Chhiah pek tur Sawrkarina a bituk ang ang chu khua leh tui ţhate chuan kan pek ngei tur a ni a, chu chu kan Pathian thu pawhin a sawi dan a ni. Chhiah pe lo chuan ram inrelbawl dan pawimawh leh Pathian thu a bawhchhia tihna a ni. Tunlai kan ram kalphungah chuan a hausa apiangin chhiah an pe hnem a. Mi hausate berina chhiah an pek loh chuan ram leh hnam inrelbawlna a tichhe thei a ni.

Tun ţuma kan Sawrkarin NECS chhiah a âwltir dan hi a dik lo. Mizoram Value Added Tax Act, 2005, Section 47(1)-ah chuan a huhova thil ti ţhin(class of dealers or persons)-ten an thil lei emaw hralh emaw-ah vantlang ţhatna tur a nih chuan Sawrkarin chhiah a âwltir thei tih a ni a. Chutianga a tih dawn chuan, a âwltir chhan chiang taka ziakin Official Gazette Notification a chhuah tur a ni, tih a ni a. Company mal emaw, mimal emaw chhiah âwltir theihna dan a awm lo. Tun thlenga hetiang Official Gazette Notification chhuaha la ni loh avngin, chhiah awltirna ber pawh hi dan hma-ah a ding lo vang.

Company pakhat emaw, mimal pakhat emaw Sawrkarin chhiah a awltir chuan a tidik lo va, dan a bawhchhia tihna a ni.

Democracy kalphunga inrelbawlnaah chuan Dan(Rule of Law) a lal ber a, dan chunga lêng thei tu mah an awm lo. Mizorama kan Sawrkar neih ve ţhinte hian dan ngai pawimawh lovin an palzutin an bawhchhe fo ţhin a. Hetiang tih hi dik lo leh ţha lo ka tih thu ka auchhuahpui fo tawh thin. Chuvang chuan tun ţumah pawh hian ka rawn auchhuahpui leh a ni. Ram leh hnam tana pawi thui thei thilni-a ka hriatah chuan thil dangah pawh ka auchhuak ţhin a ni.

Tun ţuma ka thu khel ber(subject) chu dan kalha chhiah âwltir sawisel a ni a. Aizawl Football Club chungchang hrim hrim sawina a awm lo. Pu Robert Romawia Royte hi NECS leh AFC neitu a nih avangin leh amah berin he chhiah awl chungchanga NECS leh AFC te a rawn sawipawlh nawk nawk avangin AFC hi a rawn lang ve mai a ni.

AFC-in Mizoram leh Mizote tana hmingţhatna leh ngaihsan hlawhna a rawn thlen hi Mizo tawh phawt tan thil lawmawm a ni a, kei pawhin lawmawm ka ti a ni. Amaherawhchu Football-a kan hmingthanna te hi Chhiah nena inzawmtir chi a nih loh avangin chutianga inzawmtir a nihna hi a dik lo va, ka sawisel mai a ni. Pu Robert Romawia Royte hian AFC kaltlanga Mizoram leh MIzo mipuite hming thatna a thawh chhuah avangin cheng nuaih 126 a chhhiah pek ngei ngei tur awltir ni berin a lang a. Pu Robert Romawia Royte hian heti zat hlawkna a tel a nih chuan AFC player-te hi chuan a hmuh aia tam hamthatna pek ve hi an phu ngawih ngawihin ka hria a ni.

Hetianga hmingthanna leh hming ţhatna te hi AFC leh Football ngaisangtute tan chuan a hlu lehzual tih pawh kan hria a. Amaherawhchu hnam pum dinhmun kan enna kawngah chuan thil pakhata kan hmingthanna ringawt khan min awihmut a thiang lo thung a ni.

Kan Sawrkar hruaitute hi chu hnam pum thil ngaihtuaha, chutiang thila mi kan an vena tura min kaihhruai hi an tih tur leh an bat a ni. Ei leh bar leh thil pawimawh dang pawhaneih alawi kan neih lohnaah a mawhphurtu liau liau an ni. Kum hnih khat thil thu ni lova, kum 50 chhung zet pawha chawmhlawm leh kutdawh ti tih dinhmuna min dintir-ah hian an tih turah an hlawh chham a ni.

Chutiang ram leh hnam tana thil pawimawha tih alawi nei lo va, Football thil ngaih pawimawh bera nei anga an awm hian hruaitu tling an nih lohzia leh an tih tur an tih lohzia a lantir a ni. Tun ţumah pawh hian he thu hi kan rawn ngaih pawimawh ber chu a ni.

Hetiang dinhmun zahthlak taka min dintirna chhan ber chu PAWISA A HMANNA TURA HMANG LOVA, A HMAN LOHNA TURA AN HMAN ţhin vang a ni. Hetianga kan Sawrkar kalphung ţha lo hi NECS nena an kalphung hian a chhunzawm zel niin ka hria a. Chu chu kan ram leh hnam tana hlauhawm ni-a ka hriat avangin ka rawn auchhuahpui a ni.

Ka nihna dik tak chu ka ‘open letter’ tlangkawmnaah khan ka sawi tawh a. Mahni kea ding ka ni a, chutiang dinhmuna ding chuan mi dang kan itsik ngai lo. An dik lohna ni-a kan hriat chu ram leh hnam thil khawih pha a nih phei chuan kan sawi chhuak ţhin a ni.

Mi dang rinna reng reng nei lo ni-a min ngai hi ka dem lo che a. Ka sawi tawh ang khian kan politician neih tawh tam berte hi chu mahni hmasial luat vanga ram leh hnam thil pawimawh ti lova, kan ram hi mimal hmasawnna chauha awmtirtu an nih avangin rintlakah ka ngai lo va. Chutiang deuh vek chu an nih avangin eng political party mah hi zawm tlakah ka ngai lo a ni. Kan tun dinhmunah chuan kan Chief Minister te ber pawh hi kutdawh an ni deuh ngawt mai a. Kutdawh tura Chief Minister nih chu ka duh ve loh thu te pawh ka lo sawi tawh ţhin a ni.

Chawmhlawma awm te hi a thim ka ti a, ka hmu êng ve theilo va. Corruption kairualna ber nih te hi a thim a, ka hmu êng ve thei lo va. Natna chi hrang hrangina a bawm nasat ber kan nih te hi a thim ka ti a, ka hmu êng ve thei lo a ni e.Ka nihnaah hian ka chiang a. Chhia leh ţha hriatna leh dan kalha thil ka tih ve ngaih loh te hi a hrechiangtu ber ka ni a. Ka nihnaah hian ka lawm tawk e. Ngaihdan dang i neih ve erawh kan ram Danpuiina zalenna a pek che i hmanzai venaah ka ngai mai a ni.

I rin tlak,
11.07.2017
M. Lalmanzuala
Chaltlang, Aizawl.

Aside | Posted on by | Tagged , , , , | Leave a comment

VICE-PRESIDENT ATAN EPTU PAWLTEN MAHATMA GANDHI TUPA, GOPAL KRISHNA GANDHI THEHCHHUAK

Vawiin July 11, 2017, khan kan hma lawk, August thla a India ram Vice- President thlanna lo awm tur atan Congress Party kaihhruai, Opposition party 18 te intelkhawm chuan Parliament Library building, Delhi-ah meeting neiin lungrual takin India Hnam Pa, Mahatma Gandhi tupa, kum 72 mi, IAS officer chawl ta, Gopal Krishna Gandhi chu candidate intawm atan an thehchhuak ta.

Tuna kan Vice-President,Hamid Ansari hi August 11, 2007 atang khan Vice-President a la ni a, tun August 10 hian a hun hi a tawp dawn a ni.

A tir takah kha chuan Gandhi hi eptu party te hian President candidate thlanna lo awm tura an candidate atan an vawrhchhuak ni a sawi a ni a, mahse eptu party te hian President candidate atan hian Hindu hnam hnuaihnung, Dalit, Pi Meira Kumar chu Presidential candidate atan hian an thehchhuak ta zawk a ni.

Vawiina eptu party 18 meeting-ah hian Congress President Sonia Gandhi, vice-president Rahul Gandhi, former Prime Minister Manmohan Singh, LS a Opposition leh Congress party leader, Mallikarjun Kharge, RS a Opposition party leader, Ghulam Nabi Azad ten an telpui.

Vice-president thlanna tura nomination file theih ni hnuhnung ber hi July 18 a ni a, July 19 hian scrutiny neih a ni ang a, July 21 thleng hian inhnuhdawh theih a ni ang.

Hetihlai hian rorel lai, BJP te chuan July 13 hian an nominee hi an final tura beisei a ni.

Author :      

Aside | Posted on by | Tagged , , | Leave a comment

California ram kang a nasa

United States-a California state-a ram kang chu thelh mih theih a la ni lova, chak taka a kan belh zel avangin mi za tel, hmun him lamah sawn chhuah an ni tawh a ni. Khaw lum lutuk leh lei ro lutuk avangin kang thelh hna hi a thawh chakhleih theih loh niin sorkar hotuten an sawi a ni.

Kangmei hi California state chhung hmun 17 velah a chhuak a, Santa Barbary County-ah kang nasa zualin ram, sq.km 93 chuanga zau a kang mek a, mi sang telin a thelh hna, ngawrh takin an thawk mek a ni.

Ram kangah hian chenna in engemawzat a kang chhe tawh a, in engemawzatin hliam an tuar bawk. Mithiamte chuan khaw lum hian ziaawm lam a la pan rih dawnlo tih sawiin kum upa lam leh naupangte tan a hlauhawm zual a ni, an ti.

Aside | Posted on by | Tagged , , | Leave a comment

Malabar exercise an tan ta

Ram 3 – India, US leh Japan navy-ten tuipuia indo nunchanan zirhona prog chu nimin khan Chennai Port-a Indian navylawng lian, INS Jalashwa-ah tan a ni a, Malabar Exercise tia vuah, he nunchan zirhona hian tun thla ni 17 thleng a awh ang.

India Eastern Naval Command-a Flag Officer Commandingin Chief, Vice Admiral HCS Bhisht-a’n thuthar lakhawmtute a hrilh danin, nmin atanga ni li chhung chu vaukam lam nunchan zir a ni ang a, tun tumah hian indo thlawhna phur thei Indian navy lawng lian, INS Vikramaditya pawh a vawi khatna atan tel tir a ni ang.

Ram 3 navy-te indo nunchan zirhonaah hian khawvela indothlawhna phur thei indo lawng lian ber, USS Nimitz telin indo lawng 16 an tel dawn a, indo thlawhna 90 chuang leh tuihnuai lawng 2 an tel bawk dawn a ni.

Aside | Posted on by | Tagged , , , | Leave a comment