Hollywood Film hian engtin nge sum a thawhchhuah ?

POSTED by On July 8, 2016

  • Film atanga sum an thawh chhuah dan
  • Film kalphung
  • A entu zat chhut dan
  • Pay per view awmzia

Theater chuti zatah chuan chhuah a ni a, dollar chuti zat chu kâr khat chhûngin a lalut kan ti leh mai ṭhin a. Engtin nge theater chuan film an chhuah ngawt a, an sum thawhchhuah chu engtin nge sem darh anih tak chiah? Actor te hian movie an chan man engtin nge an lak ṭhin a, tu tu hian nge hlawkna tel ber?

Script Writer :
Film chan tur chanchin ziaktu an awm hmasak zet a ngai a. Ziaktu an awm a, chumi chuan Contract kaltlangin Producer hnenah a chanchin ziah chu a zuar ṭhin a. An inrem anih chuan a tirteah Ziaktu hnenah chuan pawisa eng emaw zat pêk hmasak phawt a ni ṭhin. Mi thawnthu ziah sa anih a, film mil tura ziak danglamtu tura an thlan Ziaktu pawhin tiang bawk hian atirah pawisa a dawng hmasa ṭhin.Tichuan, film an chan ni khat niin Ziaktu hnenah chuan pawisa pêk belhin chu Movie Script chu Producer hnenah neitu nihna hlan a ni ta ṭhin a ni.

Script ziah man hi a inang lo thei hle a, movie budget hniam angah hian $ 1000/4000 vel lek Ziaktu hnenah pêk a nih laiin budget sanna angah chuan $ 250,000/1 mil Ziaktu hian a hlawh daih ṭhin. Chutih laiin Harry Potter novel ziaktu JK Rowlings khan 1998-ah Warner Bros hnenah a lehkhabu hmasa pahnih film rights lei nân khan $ digit 7 (a zat chiah puan loh) an seng a. Kum 2004 a nih meuh chuan Ziaktu billionaire ni hmasa ber a ni der!

Producer :
Script leitu kha Producer niin a nih loh leh JK Rowlings-i kan sawi ang khian Production Company Sony, MGM, 20th Century Fox, Paramount, Warner leh Universal Film etc hnenah hralhin anni’n producer ruaiin ani’n film changtu tur actor leh director, thawhpui tur a thlan bakah film siam leh hralh hi a kutah a awm vek a. Film chu an han chang ta char char a, an chan zawh hnuah Producer chuan Film Distributor hnenah a film chu a siamna budget aia tamin hralh a tum ta ṭhin a ni.

Sony, MGM, Disney etc kan tihte ang hi chuan an duh chuan an Studio aṭanga film siamin an duh chuan Distributor-ah pawh an ṭang nghal mai thei bawk.

Distribution Company :
Producer-in film a siam zawh chu DVD leh Cinema/Theater-a chhuah turin a peih fel ta a. Distribution Company an awm a, anni hian heng film an siamte hi a hma lamin film budget, actor an hmante an hriatlawk bakah a chang chuan zawrh an inhuam hmain film hi a zavaiin an enlawk bawk ṭhin. An hna ber chu Marketing a ni ber a, pawisa a heh hle a ni. He pawisa a heh vang tak hian Sequel Film kan tih mai, American Pie te, Sex & The City te, Twilight Movies ang chite kha an siam nachhan.
Twilight saga angte kha Editing an zawh hma hmain a film dang an siam leh nghal mai a. A chak thei ang bera Market lama Film chhuak hmasa mipuiin an hlut a la reh chian hman hmaa a chhunzawmna film an zawrh zung zung theih chuan budget ṭha tak nen film hlawhtling i siam zung zung theih bakah Profit ṭha tak i nei thei dawntihna a lo ni. Producer hian Distributor hnenah Film chhuah theihna Rights hi US, Europe, Asia ram bik tân tihangin a hralh thei a, he Distributor hi Cinema chhuahtu atân, pakhat dang leh hi DVD zuartu atân ti pawhin a duh a thlang thei a ni.

Cinema :
Khawvel ram hrang hranga Cinema-te hian tu Distributor hnena mi film nge ka chhuah ang tiin an duh an lo thlang ṭhin ve leh bawk a. Star Wars chhuah zan lo ni ta se, khuaah Cinema Hall pahnih lo awm ta se, a chhang huaitu zawk zawk khan Star Wars Film chu a chhuah mai dawn a ni.

Agents :
A chunga mi pawimawh i ti mai ang kan sawi zawng zawngte inkârah hian Palai an la awm leh ta zel a. Anni hian mi chi hrang hrangte chu thlunzawmin an inhmelhriattir a. Hmelhriat an ngah poh leh pawisa an thawkchhuak tam ve tihna anih chu.

Film Hlawkna Tel Tam Ber :
Film an siam tawh zingah $ 15,000 lek senga an siam Paranormal Activity khan hlawkna a thawhchhuah chu $ 196,000,000 zet niin he film aia Profit siam hnem film an la siam lo niin a lang. He Profit a thawhchhuah zat hi 19,749 % return on investment zuk tling a! THE DEVIL INSIDE (2012) chu pahnihna niin Budget: $1,000,000 niin Profit: $37,316,634 a hmu a, ROI chu 3632% chauh a ni!
~~~~~~~~~~~~~~~

1. Pay per view kan tih ang hi chu Subscriber ten TV Network-a chhuak tur kha man chawia leiin Private Telecast hmangin a en theih ang hi hi a ni. Entirnan, MGM Grand a Boxing khu HBO channel chuan a tichhuak ṭhin a. Ticket lak ai chuan mahni inlum aṭangin kha Boxing Event kha HBO channel chuan pay per view hmanga lei theihin a zuar ta a, i lo lei tak kha a ni.

2. Nielsen Ratings :
TV Programme chumi chu mi chuti zatin an en an ti leh mai ṭhin a. Hemi chhutchhuaktu hi Nielsen Ratings an ni a, anni hian chhûngkaw 20,000 TV Programme en ṭhin kha sample atân lain hemi atân hian set meters an tih mai hmangin minute tin an endik ṭhin.

He meters kan tihah hian chhûngkaw member tinte kha TV an en apianga inhriattirna hmangin Nielsen hnenah hianan inhriattir ta a ni. Entirnan. Kum 2013-14 khan US ah hian Chhungkaw 115.8 million awm anga chhut a ni a. Nielsen samle zat chu 0.02% chauh a ni. Tichuan he % hi pung chho zelin tun ang hunah hi chuan chhungkaw sample an neih zat chu chhungkaw pumpui aṭanga chhuta 10% dawn lai a nei tawh a ni.

Chuvang chuan, miin chumi zat chuan an en an tih hian 100% in a rintlak theih ngailoh a ni. hetiang lova TV entu chhut dan hi an la hmuchhuak chiah lo niin a la lang rih bawk.

Aside | Posted on by | Tagged | Leave a comment

UK-IN HMEICHHE PM NEI LEH DAWN

POSTED by Kiddy Vanchhawng On July 8, 2016

Jul 8, 2016, MSR: Khawvel ram ropui, US chuan an ram hruaitu ber ni turin hmeichhia an neilo ang tih a sawi hleihtheih loh laiin a sangawizawnpui, Britain pawhin kum 40 emaw zet liam ta a, hmeichhe PM ropui tak, Margaret Thatcher (1979-1990) a lo neih tawh hnu-ah tunhnaia Brexit vote avanga David Cameron-an kumin October thla hian ban a tum tak avangin a aiawh tur atan home secretary, Theresa May leh energy minister, Andrea Leadsom te a chhawpchhuak ve leh ta rup mai!

Nimina Conservative hruaitu inthlitfimna second round atanga Justice Secretary Michael Gove paihthlak anih ve lehtak avangin tunah chuan May leh Leasdom te hi all-women contest-ah an inchaltauh dawn ta a ni.

May leh Leadsom te hian final round atana rampuma Conservative Party te convince ngei tumin campaign an nei tan nghal ang a, a chak zawk hi September 9 ah puan a ni ang. Heta a chak zawk zawk hi Britain PM an ni dawn a, Britain Hmeichhe PM pahnihna an ni ngei dawn a ni.

Aside | Posted on by | Tagged , | Leave a comment

PU TAWNLUIAN MIZORAM BUAI CHHANAH CHAILIHA A PUH CHU SUT LEH TURIN MPYCC IN PHUT

POSTED by Vanneihthanga Vanchhawng On July 7, 2016

MPYCC chuan thuchhuah siamin MNF Senior Vice President Pu Tawnluia’n July ni 4, 2016-a Hnam Rûn inkhawm an neih ah thusawiin, ‘Mizoram buaina chhan chu Assam Chief Minister Chaliha a ni’ tia puhin thangtharte hriat atana thu felhlel tak a sawichhuah hi sût leh se an tih thu an tarlang.

MPYCC thuchhuah chuan ‘Pu Tawnluia hian kha tih hun lai khan politics awmzia a hre phak lo hle tih a inpuang a ni’ an ti a, “Pu Laldenga ten inbiak an duh laia Chaliha-in sipai a rawn tirh luh tak avanga Mizoram buai anga Pu Tawnluia’n a sawi ta lek mai hi pawi kan ti tak zet a. Kum 1966 March ni 1-a Zoram Zalenna puan a nih hma kum 1964 December thla khan Hnam Sipaite chuan East Pakistan panin indo zirin an kal daih tawha ralthuam thahnem tak an rawn hawn a, kum 1965 April thla khan ralthuam phurin an kal nawn leh a ni. Zalenna sual tura Hnam Sipaite’n engkim huama a kum tel harsatna tam tak kara an lo inpuahchah tawh laia Chaliha sipai Mizorama a tirh vang maia Mizoram buai ta anga MNF Senior Vice President-in a sawi ta mai hi a tlawm thlak kan ti a. Loh theih loh vanga India kap let ve chauh anga a han sawi ta mai hian zalenna sualtu tak takte a hmusit a. MNF hruaitute rilru chu tlawm sa a nihzia Pu Tawnluia hian a tarlang chiang hle a ni” an ti.

Aside | Posted on by | Tagged , , , | Leave a comment

Zofate Zalenna leh Rorelna pakhat hnuaia awm thlahlel

POSTED by Dingdi On July 8, 2016

SILAI KENGIN ZALENNA SUAL TAWH LO MAH SE…Pu Laldenga nupui, Pi Lalbiakdiki chuan, “Kan pa-in a lo din, MNF leh a kaihhruai ‘Mizo Hnam Sipai’ te’n silai kengin zalenna sual tawh lo mah se, zalenna hmu tura beihna thinlung thangthar te rilruah a la kal reng hi lawmawm ka ti, tiin, nimin (July 7,2016) khan Mizo Hnam Pa Pu Laldenga thlanah a sawi a.

Pi Lalbiakdiki chuan, kan pa leh hnam tana ‘martar’, ‘hnam sipai’ ten kawng an lo sahkuak zawh a, Zofate zalenna leh rorelna pakhat hnuaia awm hi ka thlakhlelh ber a ni” a ti.

Aside | Posted on by | Tagged , | Leave a comment

Zonuama Aids Vei Enkawlna Tui Pipe Phum Sak

POSTED by Dingdi On July 8, 2016

Zemabawka 225 Battalion CRPF-in Civic Action Prog ramme hnuaia HIV/AIDS vanga fahrahte enkawlna hmun, Gan Sabra-a tui thianghlim an pekna tur lung chu phun fel a ni ta.
Tui Pipe metre 450 a thui phum a ni dawn a. Senso leh thil pawimawh zawng zawng chu 225 Battalion CR PF-in a tum vek a ni.

HIV/AIDS vanga fahrahte enkawlna, Gan Sabra hi Aizawl Zonuam-a awm a ni a, HIV/AIDS vanga an nu leh paten an thihsan leh naupang HIV/AIDS veite enkawl an ni.

Aside | Posted on by | Tagged , | Leave a comment

France in Euro 2016 Final lut

POSTED by Vanlalruatliana Renthlei On July 8, 2016

Nizan/Zanin Euro 2016 semifinal inkhel hmuhnawm tak ah a thleng tu France in World Cup Champion lai German chu hnehin Final an lut.

France hian minute 45+2 ah penalty sawisel theih tak an hmu a, Antoine Griezmann an a pet goal a, penalty pet goal hmangin German lakah hma an hruai a, a bak first half ah goal a lut lo. Player awmkhauh rual German player te Ball bawh a na zawk a, mahse an vanneih loh zan a ni a, a goal thei lo.
Second half ah pawh German hian na takin Ball an bawh a, mahse a hlawhtling hlei thei lova, goal zawn ah an pet thei meuh lo. Minute 72 na ah German defence te tihsual an nangching a, Pogba in Ball a la fuh a, ding lam goal sir atangin a Ball siam chu Germany keeper in beng per mahse Griezmann a hma ah a tla a, a lo tlawh lut daih a, 2-0 a ni.

Griezmann hian tun Euro 2016- ah a goal 6-khungna niin goal khung tam ber a la ni mek a ni. 1984- a Michel Platini tih loh ah Griezmann hi Euro tournament vawikhata French player zinga goal 5 aia tam khung thei awm chhun a ni bawk. Zanin hian goal vawi 7 a shot a, vawi 4 goal zawn ah kalin vawi 2 a goal a ni.

German player Mats Hummels yellow card vangin a khel thei lova. Sami Khedira leh Mario Gomez te inhliam vangin an tel theilo bawk a, an tuar ta a ni.

France hian kum 1998 a world cup an chawi tawhna – Stade de france stadium ah Portugal nen final an khel dawn ta a ni. Euro ah hian a thlengtu ram hi an champion khat hle a, 1984 a France an champion kha a hnuhnung ber a ni.

Germany leh France hi major finals tournament ah an vawi 4 an intum tawh a, France hian an intum hmasak ber 1958 ah (6-3) a an chak tih loh chu an la hneh leh lo. Germany hian a hnuhnung vawi 3 ah te – 1982 (3-3, 5-4); 1986 – (2-0 ); 2014(1-0) ah world cup ah an hneh vek a. Tun hi Euro a an intum vawikhat na a ni.

Germany hi Euro vawi 3 champion tawh in France hi vawi 2 an champion tawh a, Germany hian goal 72 thun tawhin, France hian goal 62 an thun ta bawk. Alain Giresse an 1982 world cup semi final a Germany lama a thun bak kha major finals tournament ah France hian Germany lakah goal an la thun leh lova; goal an chhuah ziah thung.
Zanin hian record thar an siam a ni ta ber

FT France 2-0 Germany
Griezmann 45 (pen) ,72.

STATISTICS
7 Shots on target 6
5 Shots off target 6
35 Possession (%) 65
5 Corners 6
0 Offsides 3
12 Fouls 8
2 Yellow cards 4.‪

#‎MATCH ‬FACTS
‪GERMANY‬: Neuer; Can (Gotze, 67), Boateng (Mustafi, 61), Howedes, Hector; Kroos, Schweinsteiger (Sane, 79); Kimmich, Ozil, Draxler; Muller.‪

‎Subs‬not used: Leno, Ter Stegen, Tah, Schurrle, Weigl, Podolski.‪

Booked‬: Can, Ozil, Schweinsteiger,Draxler

Manager: Joachim Low.‪

FRANCE‬: Lloris, Sagna, Koscielny, Umtiti, Evra; Matuidi, Pogba, Sissoko, Griezmann (Cabaye, 90), Payet (Kante, 71), Giroud (Gignac, 77).

Subs not used: Mandanda, Costil, Jallet, Rami, Mangala, Digne, Schneiderlin, Coman, Martial.

Booked: Evra, Payet.‪

Referee‬: Nicola Rizzoli (Italy)

Aside | Posted on by | Tagged , , , | Leave a comment

NIKUM LEH KUMIN CHHUNGIN RUIHHLO CHENG VBC 14 CHUANG MAN HALRAL TAWH

  • Heroin vanga thi awm tan kum
  • Proxyvon vanga thi awm tan kum
  • OD a thi tawh zat

Nikum leh kumin chhung hian hlawm lian tak takin ruihhlo tum 4 halral a ni tawh a, ruihhlo halral zawng zawng hi Rs (vbc 14, nuai 59, sang 6 leh 681) 14,59,06,681/- man hu zet a ni. Ruihhlo halral zinga cheng nuai 59.43 hu zet chu Central YMA hnuaia din SRS te mankhawm sa a ni.

Nikum chhung khan Central YMA hnuai a din Supply ReductionService (SRS) te man khawmsa ruihhlo chi hrang hrang tum hnih hlawm lian tak takin halral a ni a, July 4, 2015 khan ruihhlo chi hrang hrang Rs. nuai 19, sing 1 sang 6 leh 900/- man hu man chu CYMA pisa tualah halral a ni.

Hemi hnu October 17, 2015 khan SRS te man khawm sa vek hi Home Minister R Lalzirliana chuan halral leh bawkin, hemi tum a ruihhlo halral te hi Heroin hawng 28, Can 550 leh Chhinsen 87;Alprozelum strip leh Tramadol mum 11,134; Ganja packet 27, Methamphetaminemum 4,200 te a ni a, local market rate-a Rs. nuai 12 leh sing 6 (12,60,000/-) man hu zet a ni.

SRS te hmalakna veka ruihhlo man khawm sa hi Central YMA Office tualah kumin February 20 khan halral a ni leh a, ruihhlo halralna hun hi Finance Minister Lalsawta hova hman niin, hemi tum a ruihhlo halral te hi No 4 hawng 28 leh can 448, Alprazolam strip 274 leh Ganja Kg. 1 a ni a. Aizawla an hralhna rate-a chhutin ruihhlo halral zawng zawng hlutzawng hi Rs. nuai 27,sing 6 sang 6 leh 800/- a ni.

Nikum leh kumin chhunga SRS ten ruihhlo an man khawmsa halral zawng zawng te hi avaiin Rs nuai 59,sing 4 sang 3 leh 700/- man hu zet a tling. Heng ruihhlo an hal ral tak bak ruihhlo an man thahnem tak te pawh SRS te hian Police leh Excise & Narcotics hnenah hlan an nei bawk.

Hetianga SRS te man khawmsa ruihhlo nikum leh kumin chhunga tum thum zet halral a nih tawh lai hian June June 24, 2016 khan R.Lalzirliana Excise & Narcotics Minister chuan Brigade Field, Bawngkawnah International Day Against Drug Abuse and Illicit Traffiking denchhenin Excise & Narcotics dept man khawmsa ruihhlo chi hrang hrang Rs. vbc 13, nuai 99, sing 6 sang 2 leh 981/- man hu zet a halral a, ruihhlo halral te hi Heroin5.653 Kgs, Ganja 574.821 Kgs, Alprozolam 2,319 tabs, Diazepam 20 tabs, Spasmo Proxyvon 82,056 capsules, Methamphetamine 48,000 tabs, Pseudo mum vbc 1, nuai 52,sing 1 sang leh 550 Parvon Spas 7,000 capsules leh Nitrazepam 2,000 tabs te an ni.

Hemi nen hian nikum leh kumin chhunga SRS leh Excise & Narcotics department in ruihhlo an mankhawmsa an halral zawng zawng hi Rs vbc 14,nuai 59 sang 6 leh 691/- man hu a tling.

Hriat theih chinah Mizoram-ah kum 1984 khan Heroin OD vanga thi an awm tan a, kum 1990 atangin spasmo-proxyvon vanga thi an awm tan bawk a. Kumin 2016, June 9 thleng khan ruihlo hrang hrang hmansual avangin mi 1,300 zet thi an awm tawh a ni.

Aside | Posted on by | Tagged , , , | Leave a comment

JACKIE CHAN

POSTED by On

  • Jackie Chan a chanchin

(Khawvel Kungfu/Martial art star) Jackie Chan hming tak chu Chan Kong-sang a ni a, ni 7 April 1954 khan a lo piang a. Hong Kong actor,action choreographer, comedian, director, producer,martial artist, screenwriter, entrepreneur, singer, leh stunt performer te a ni kawp vek mai thin a ni. Kum 1960 atanga film chang tanin, film 150 chuangah a lang bawk. Chan hian ‘Hong Kong Avenue of Stars’-ah leh ‘Hollywood Walk of Fame’-ah star nihna a dawng hial a ni.

Chan hi pop hla hrang hrang,cartoons,leh video games-ah te a lang nasa hle a, Film a lo chan tawh thenkhata Theme songs te pawh ama zai vek a ni a, zai lam pawh hi a ti thei viau mai a ni.

Early life
Jackie Chan chu ni 7 April 1954 khan, British Hong Kong-ah a lo piang a. A hming dik tak hi Chan Kong-sang a ni a, Chinese civil war avanga tlanchhia,, Charles leh Lee-Lee Chan te fapa a ni. Pao-pao (Cannonball) tia koh thin a ni. A chhan chu, a naupan lai hian a harh lutuk a, a lum kual vel reng mai thin vang a ni. A nu leh pate chuan Hong Kong-a French ambassador tan hna an thawk a. Chan chuan Hong Kong island-a Nah-Hwa Primary School ah a kal thin a, a tirah a fail a, tichuan, a nu leh pa chuan an chawlhtir ta a. Kum 1960 khan, a pa chu Canberra, Australia-a American embassy-te tan Head cook hna thawk turin a kal ta a. Chan pawh chu China Drama Academy-ah luhtir a ni ta zawk a. Peking Opera School ah a kal ta bawk a, chu chu Master Yu Jim-yuen-a din a ni. Chan chuan a zir ngawrh hle a, martial arts leh acrobatics chu a lo thiam ta viau mai a ni. A hnuah, the Seven Little Fortunes-a mi a lo ni ve ta a ni. Hei hi an school-a performance group, zirlai tha bik thiaute infinkhawm a ni. Chan chu group members Sammo Hung, leh Yuen Biao te nen chuan inthian tha tak an lo ni chho ta a. Tichuan, an pathum chuan Three Brothers emaw, Three Dragons tih an lo ni ta a ni.

Film industry-a a luh ve hnuin, Chan leh Sammo Hung te chu Hapkidounder, master Jin Pal Kim hnenah an zir a. Chan chuan black belt a zir thleng ta a ni. Kum 5 a nihin film ah a lang tan tawh a, kum 8 a nih chuan, film hrang hrangah a lang ta nual mai a ni. Kum 17 a nih meuh chuan, Bruce Lee films ; “Fist of Fury” leh “Enter the Dragon”-ah te chuan Stuntman a ni a. Chumi hnu daihah ama film bik chu a chang ve ta chauh a ni.

Kum 1975 khan Chan chu fiamthu lam deuh, sexy ve deuh bawk, comedic adult film ang chi-ah a chang ve ta a, chu chu “All in the Family” a ni a, he film-ah hian Chan chu ruak te pawhin a lang ve bawk. He film hi insual pakhat mah awm lo a channa awm chhun a ni. Jackie Chan chu a hnuah, sex scene dangah pawh a lang leh tho bawk.

Kum 1976-ah Chan chu a nu leh pate awmna Canberra ah a kal ve ta a, chutah chuan rei vak lo chu Dickson College ah a kal a, construction worker hna a thawk nghal a. Chuta a thian thar Jack chuan Jackie Chan chu a hnuaiah a thawhtir ta a, tichuan, Jackie Chan chu a hming lemah “Little Jack” tih a ni a, chu chu a hnuah a tawi zawngin, “Jackie” an ti mai thin a; tichuan, Jackie Chan tiin an ko ta mai a ni.

Kum 1990 tawp lamah, Chan chuan a Chinese hming chu Fong Si-lung tiin a phuah tha leh a, hei hi a pa original surname kha Fong a nih vang a ni.

Film career
Jackie Chan hi a tirah chuan Bruce Lee films “Fist of Fury(1972)” leh “Enter the Dragon(1973″ahte stuntman a ni a,( stuntman awmzia hi sawi fiah deuh ta phawt ila; a awmzia chu film reng rengah a hlauhawm lai, a changtu (star) leh mi dang dangte tih ngam loh apiang ti zeltu a ni a. Anmahni ang taka chei danglamin, a hlauhawm lai apiangah an aiawhin stuntman hian a ti ta zel mai thin a ni. A hna a rum khawp mai). Bruce Lee pawh khan a ngaisang hlein a rinawm. Kum 1976 khan, Jackie Chan chuan Hong Kong film industry-a film producer,Willie Chan hnen atangin telegram thuthawn a dawng a. Willie Chan chuan Lo Wei-a film direct turah chang turin a rawn sawm hi a lo ni a. Lo Wei hian Chan chu, John Woo film “Hand of Death(1976)”-a Jackie chan lanna a lo en ve tawh a, a mi duh zawng tak ni ngei tur a ni.

Tichuan, Bruce Lee tha chhang daltu ang maia tihlar a tum ta a. Chan stage name chu Sing Lung tia thlak a lo ni ta a. Cheng Long tih chu “become the dragon” tihna a ni. A chhan chu, chan hian Bruce Lee nen inanna nei tam hlea an hriat vang a ni. Mahse, an film siam chu a hlawhtling lo angreng hle mai a, a chhan ber chu,Bruce Lee style-a chettir zel a ni si a. Jackie chan chuan Bruce Lee-a martial arts style hi a zir thiam vak bik lo a ni. Chuti chung chuan, Lo Wei chuan chutiang deuh bawk chu a siam nawn leh talh a. box office lamah tlem chuan a invawrh ve ta deuh a. Mahse, Chan-a larna film erawh chu, kum 1978 khan”Snake in the Eagle’s Shadow” tih kha a chang leh a, a lo hit ta phian mai a ni. He film an chan lai hian chan, hian film hrang hrangah stuntman a lo chang ve nual bawk a, a indaih lo hle mai a. Mahse, Director Yuen Woo-ping pawhin Chan chu, stunt worka lo thawh laklawh laite chu a tihzawh law law a phalsak hlauh mai a ni.

Hetih hun lai hian fiamthu lam tel deuh kungfu (comedic kung fu genre) lam chu Hong Kong ah a lar viau mai a. Tichuan, Chan pawh “Drunken Master” tihah a chang leh ta a, chutah zet chuan mite hmelhriat leh ngaihven a hlawh ta hle mai a ni. Chan pawh Lo Wei-a studio lamah a lo let phei ve leh a, Lo chuan Chan pawh hi “The Fearless Hyena” tih co-direct turin a lopui ve ta a ni.

Willie Chan khan company a chhuahsan takah chuan, Lo chuan Jackie chu a bula thawk nghet turin thurawn a lo pe ve reng bawka. “Fearless Hyena Part II” an chan laiin Jackie Chan chu a bang ta thut a, Golden Harvest lamah a insuan phei ta a ni. Fame in Hollywood Hun inher zel hnuin, Chan pawh chuan Golden Harvest-a a film hnuhnung ber chu, “Who Am I?” tih kha a ni a. Kum 1999-a Golden Harvest a chhuahsan hnuin, Chan chuan kum 200-a PlayStation game an siam a pui ve ta rih a, tichuan, Western action comedy “Shanghai Noon” tih chang turin Owen Wilson nen an inkawp ta a. chumi hnuah Shanghai Knights(2003) an chang chhunzawm leh ta a ni. Chris Tucker nen pawh khan “Rush Hour 2(2001)” an lo chang dun tawh nghe nghe. The Tuxedo(2002) leh The Medallion(2003)pawh kha a larpuiin, a hlawhtling hle. Kum 2004 khan “Around the World in 80 Days” tih a larpui leh hle bawk a. chutih laiin, Chan chuan ama film production company, JCE Movies Limited(Jackie Chan Emperor Movies Limited) chu Emperor Multimedia Group(EMG) nena thawk dunin a din ta a ni.

Personal life
Kum 1982 khan, Chan chuan Lin Feng-jiao(aka Joan Lin) Taiwanese actress chu nupuiah a nei a. An fapa Jaycee Chan pawh zaithiam leh actor a ni. Fanu pawh Elaine Ng Yi-Leibore chu 1999 khan a nei bawk. Kum 2009 khan, Chan chuan honorary doctorate chu University of Cambodia atangin a dawng ta bawk.

Chan hi Buddhist a ni a, Cantonese tawng te, German, korean, Japanese, Thai, Mandarin tawng te leh English te a thiam a ni. Ropui hle mai a. chubakah, Chan hian football lam hi a ngaina ve hle mai a. Hong Kong national football team te, England National Football Team te leh Manchester City te chu a tan nghet bur mai a ni.

Music career
Kungfu chauh a thiam emaw kan tih laiin, zai lam pawh a lo ti thei viau mai pek a. Jackie Chan hian a naupan laiin, Peking Opera School-ah khan vocal lam a lo zir nasa ve thin hle a. Kum 1980 khan a professional hla hmasa ber chu a record ve ta a. Hong Kong leh Asia-ah chuan zai lam na na nah zawng a lo lar ve hle mai a ni. Kum 1984 atangin albums pawh 20 lai a released tawh nghe nghe. Heng tawng; Cantonese, Mandarin, Japanese, Taiwanese leh English tein a zai thei vek mai bawk a. A film chanahte hian theme song chu ama sak a ni deuh zel bawk. Chan-a hla record hmasa ber chu, “Kung Fu Fighting Man” tih kha a ni a, The Young Master(1980) kuma theme song a ni. Police story film-a Cantonese song “Story of a Hero” a sak phei kha chu, Royal Hong Kong Policea chuan an hlaah an thlang a, police lak (recruitment advertisement) atan kum 1994 khan an dah a ni. Tunah hian Jackie Chan hi khawvel film star ah lalut hnem ber dawttu niin $50 million a hui lut a ni.

Source:Milarte chanchin.

Aside | Posted on by | Tagged | Leave a comment

BURMUDA LEH A KAIHHNAWIH

Tuifinriata thil thleng mak chanchin sawi dawna hmer tel ngai ziah pakhat chu Burmuda Triangle chanchin hi a ni awm e. Ani lah tak a, helai hmun hian mihring engzat chiah nge a lem zawh tak tih hi chhuitham fe a awm reng a ni.

Baltic Anomaly
Kum 2012 June 19 khân Swedish tuichhûng lût thiam, Oceon-X team member-te chuan indopui pakhatna hun laia thlawhna tla an zawnna lamah Baltic tuipui mawngah sâwn thilmak lutuk mai an hmuchhuak ta tlat mai le. He an thil hmuhchhuah hi Baltic Anomaly an ti a. Anomaly chu thil a nih dan tur pangngai anga awm lo sawina a ni. Chu an thil hmuhchhuah chu an en chian poh leh mak an ti a, sawifiah ngaihna pawh an la hre lo. Sweden leh Finland inkâr tuipui hnuai feet 275-a thûkah chuan thlawhna tumkawng ang mai hian meter 1,500 zet tur hi a inphah zui mai a. Chu tumkawng (tiphawt ila) tâwpah chuan meter 60 zeta chhah hian leilung chu a toh lâwt a, chumi thil toh lâwt chungah chuan lungphêk (lung a nih chiah leh chiah loh pawh hriat a la ni lo va) lian em em mai hi a awm a. Chu lung chungah chuan ngil nalh tak tak hian thil a inziak tlat mai a nih chu.

Tin, he lung tungsawl chunga thil inrin bâkah hian a chung zâwl pan chhohna step niawm tak leh bang niawm tak an hmu a.Tin, a chhûng lam pan chhukna step niawm takte pawh a awm bawk. Chu mai chu a la ni lo cheu, he thil mak deuh mai atanga meter zahnih velah hian Gothic biak in tukverh ang deuh mai hi thil dang a awm bawk a. Chu thil hual vel chuan mihringin an remkhawm niawm tak hian lung 25-30 bâwr vel hi a inrem kual leh zel bawk a. Chu pawh chu finfiah châkawm tak a la ni.

He Baltic Anomaly hi fiah tura a bul hnaia kal a harsa hle niin an sawi bawk. Hei hi a chhan chu a bul meter zahnih bial velah chuan electronic lam thil reng rengin hna a thawk thei lo va, a thi hmiah zel an ti. Thil engemaw tak hian a lo dal tlat mai niin an sawi bawk. He tuipui chhûnga an thil hmuh hian mak tih a hlawh hle a, thu lêng vâk pawh a tam phah khawp mai. Mi thenkhat chuan Nazi hun lâia indona hmanrua atana an siam a nih an ring a. Thlengthlâwkthei sulhnu a nih ring an awm a, Russia thiam thil nia ringte pawh an awm.

Tuifinriat khu a thûk si, a zâu si, a thim bawk si, a awm dan chiah pawh hi hriat hleih theih a ni lo. Thla-ah khian mi 12 an han tum tawh a, tuifinriat thûk lâi ber Mariana Trench-ah (6,811 feet /2,076 meters) chuan kum 1960-a U.S. Navy Lieutenant Don Walsh leh Jacques Piccard ten an thlen bâk kha tumah an la thleng thla leh lo. Tuifinriat mawng âiin mihringte hian thla leilung leh planet pakhat Mars khi kan hre chiang zâwk a, kan bel chiang zâwk a, sawi tur pawh kan ngah zâwk. Tin, khawvel pâwn lam arsi chanchin zir turin pawisa pawh a lêt engemaw zâtin kan sêng tam zâwk bawk. Tuifinriat tui chhûnglam za zela 99 chu la hriat chian loh a ni. Tuifinriat hlauhna hian hmanlai phei chuan mihring rilru-ah hmun a luah thûk hle a ni. Tuifinriat chu a zâu va, a thûk bawk si nên hmun hlauhawm zual leh chanchin ngaihnawm tak tak pawh a tam khawp mai. Chung zinga a hlauhawm zual leh mi hriat hlawh deuh deuhte chu han chul ram fan thuak thuak ila.

Burmuda Triangle
Tuifinriata hmun hlauhawm ber pakhat chu Burmuda Triangle khu a ni. He triangle hi kilometer maktaduaih khat bial vela zâu,North America leh South America inkâr chhak lam tuipui zâu tak luahtu khua a ni. USA chhim chhak lama khawmual inkhawh lût Florida atanga chhim lam Bermuda thlengin a kal phei a, chuta tang chuan hmar chhak lam hawia lo kir lehin Puerto Rico a han thleng chho leh a. Puerto Rico atang chuan hmâr thlang lam hawia kal zelin Florida a zu pawh leh ta a ni.

Kum 1940 chho khân he lâi hmunah hian mak tak takin lawng leh thlawhna an bo thin a. A bikin kum 1945 December 5-a Avenger bomber panga an bo hnu phei kha chuan miin an ngaihven lehzual a. Pilot-te chuan ‘tui vâr’ chhûngah an lût dâwn mêk tih an sawi hman tawk a, an reh ta vang vang mai a ni. Chung thlawhna zawng tur leh chhan chhuak tura an thlawhna tirh chu a bo ve leh ta zel a. Chu chuan mi ngaihven leh ngaihnawm tih a hlawhtir leh zual bawk. Kum 50 chhûngin lawng leh thlawhna sawmnga dâwn lâi a bo hman a. Amaherawhchu kum 1980 chho atang khân a reh ta a ni.

Bermuda triangle-a chhiatna thleng thinte hi a chhan an inrinsiak luih luih a. Thlengthlâwkthei lam mite thiltih a nih ring pâwl an awm a. Rin dan chi hrang hrang a tam khawp mai. Sakhuana lama lo la lût te pawh bang bik lo. Tun hnua miin an pawm tlân deuh tâk ber chu Australia rama Monash University a thawk Joseph Monaghan-a theory hi a ni.

Kum 2003 khân Joseph-a chuan scientific ang reng tak mai ngaihdan a rawn vawrh chhuak a. A ngaihdan chu American Journal of Physics-ah “Could Methane Bubbles Sink Ships?” tih thupui hmangin a chhuah a. A sawi dan chuan a experiment atangin methane boruakte hian lawng an tipil thei a ni.

Joseph-a chuan tui hnuai thûk taka methane hlâwm, gas hydrate an tihte chu tuipui chung lamah an rawn phuan chhuak vak thei a. Hmun hnâwng leh thil laihchhuahna hmuna awm thin, rim nei lo boruakte chu tuipui mawngah tuifinriat rihna chuan thil sakhat ni thei hial khawpa ritin a delh thei. Vûr khâwn ang maia methane boruak hlâwm chu tuipui chung lama an lo chhuah chuan nasa takin a phuan bulh bulh thei a. Chu chuan lawng leh thlawhnaa electronic hmanraw hnathawh a tibuai thei a ni. Tin, lawngte pawh tui sakhatna (density) a lo hniam thut khân an pilthei bawk.

Bermuda-a thil thleng pakhat, Flying Dutchman an tihfiam thin chu mak tak maia lawngpûte an bo daih thin kha a ni. Hei hi a chhan awm thei chu infrasound vang niin an ngâi bawk. Scientist thenkhat chuan infrasound hi tui chhûng atanga a pâwn lama boruak lo phuan chhuakin a siam thei a. Chung thil phuan ri chuan mihring lûng leh thisen zâmah hlauhna nasa tak a siam a. Chutiang a lo thlen chuan nasa takin mi chu a lo chi-âi vak a. Lawngpûte awm ngaihna hre lo, an thil tawn pumpelh duh chu tuipuiah an zuang lût a ni thei.

He ngaihdan hi a pawmawm ang reng viau a. Amaherawhchu eng vanga kum 1980 hnu lama chutiang chu thleng leh ngai ta miah lo nge an nih tih chu tuman an hrilhfiah thiam tawh lawi si lo.

Sargasso Sea
Sargasso tuipui hi Atlantic Tuipui lailia awm a ni a. Tuipui chhûngah tuipui dang a awm tihna a ni ber e. He tuipui hi sana vir zawng hian a vir mup mup mai a. Tuipui hnim chi khat sargasso an tih chu a tam em em mai a. Chu chu tuifâwn chuan a vir pui bawk. He tuipui vir mup mup mai hian dân hran a nei ve tlat mai a. Chu tuipui temperature chu a pâwn lama amah hual veltu tui aiin a sâng zâwk tlat bawk. Chu mai a la ni lo, mit a vai duh viau nge ni, chumi hmuna awm tam tak chuan Ni khi a ruala khawchhak leh khawthlanga lo chhuak angin an hmu fo mai. He tuifâwn hian chung lam boruakah cyclone a siam fo va, chu cyclone kal zel chuan Bermuda triangle chhûnga thlawhna tênâu deuh thlâwk laite chu a titla a nih an ring.

Devil’s Sea
He tuipui hi ramhuai tuipui tih mai awm a ni reng e. Tokyo atanga chhim lam kilometer za vel, Miyake thliarkâr bul vela awm a ni a. Map ah zawn chi a ni lo. Lawng mite chuan he lai hmun hi pumpelh hram an duh thin. Thlipuite hi a rawn thawk thut a, chutah mak tak maiin a bâng leh thut thin. Mak tak a ni. Whale te, dolphin leh sava te pawh he lai hmunah hian an awm duh lo niin an sawi. Kum 1950 chho khân kum nga chhûngin lawng pakua a bo hman a. A lar ber chu Japanese research tihna lawng Kaiyo Maru No.5 kha a ni.

Helai tuipui hnuaiah hian tlângkang a awm a. Tuipui mawng lam chu a che deuh reng niin an hria. Tlângkangin a siam thliarkar te hi a rawn lang thut a, a hnu rei lo tê-ah a bo leh daih thin. Tin, helâi velah hian cyclone na fê fê a tleh fo bawk.

Cape of Good Hope
South Africa tuipui kam chhim lam, Cape of Good Hope an tih saw thenkhat chuan Cape of Storms tiin an ko bawk. Saw tuipuiah sâwn thlipui te a tleh thut thut a. Tui lah chu sâng tak tak, meter sawmthum lâia sângten a fâwn hlup hlup a. A han kaltluan laklawh tawh vêk vêk lah chuan mâr pât hian kilometer tam tak tak a fâwn bawk si a. A hlauhawmzia an hrilhfâk thin. Lawng engzât nge he tuipui hian a lo dawlh tawh pawh hriat phâk a ni lo an ti hial a ni. Hei lo pawh hi Norway hmâr thlang lam tuipui saw an sawi hlauhawm fê bawk. A hmingah pawh Maelstrom livir an ti a. Livir hrâng tak niin an sawi. Ni khatah nasa fê fêin vawihnih a vir chiam thin a. A livir chak dân chu tuifâwn pangngai lêt sawm zet a ni.

Hei lo pawh hi thawnthu ang deuha an sawi hmun hlauhawm tak tak a la awm a. Amarawhchu a thente hi chu a lasi thawnthu deuh a, sawi lan loh pawh a pawi lo vang chu.

Tuifinriat chhûngah khuan rannung eng zât nge awm hriat sên rual a ni lo. Mithiam tam takin an han rin chhin dan chuan khawvela rannung za zela 90 chu tuifinriat chhûnga awm niin anngâi hial a. Amaherawhchu tuilût mi tam tak chuan fit 1,500 velah khuan nunna nei thil che vel hmuh tur awm mang tawh lovin an hria a. Mahse hei hi thil hmuh chian a harsat vang mai a ni an ti.

Tun hnâiah hian thiamna a lo sâng ta a, tunhma lama an tlawh pawh phâk loh tuifinriat hnuaite pawh an zu hmu pha tan ta. A thim em avang leh tui rihna a nasat tawh lutuk avanga nunna nei thil engmah a awm theih pawha an rin lohna hmunah rannung mak tak tak an hmuchhuak thar a. Chung an hmuh chhuah pakhat chu changpât lianpui, fit riat zeta sei, a ruala awm chi an ni a, eng tin nge mêl hnih mêl thuma thûk tuifinriatah chuan an dam khawchhuah theih hriat a ni lo.

Tuifinriat chhûng hi mihringte hian kan la hre tlêm em em a, thiamna sâng zelin tlêm tlêma a hriat belh hi kan nghâk ngawt mai lo thei ta lo a ni. Tuifinriat chhûnga Pathian themthiamzia inphûm kuh tûn mai khu chiang zâwka hriat chu châkawm tak a ni.

Courtesy: Nunkhua.

Aside | Posted on by | Tagged , | 1 Comment

IN LEH LO NEI LO TAXI DRIVER-IN A TAXI-A $187,000 AWM CHU A NEITU A HRIAT LOH AVANGIN POLICE HNENAH HLAN, A NEITUIN LAWMMAN ATAN $100,000 PE!

POSTED by Saihmingliana Sailo On July 6, 2016

6th July : Raymond “Buzzy” Mac Causland (72), Massachussets-ami chu in leh lo nei lo, Independent Taxi Operators Association, Boston, Massachussets hnuaia taxi khalha eizawng, kum khata $36,175 vel hlawh chhuak thin a ni a, kar kalta Zirtawpni (1 July) khan a taxi- hnung (back seat) ah chuan $187,000 ($50 leh $100 note tel) a lo awm ringawt mai a, a neitu niawma a rin a taxi-a chuang hnuhnungber te chu zawn chhuah ngaihna a hriat tawh loh avangin chu pawisa tam tham tak mai chu Boston Police Headquarters-aha hlan ta a. Police ten an han enfiah a, pawisa kara lehkha inziak an hmuh chuan chu pawisa chu ro sum / ro chun (inheritance) a ni tih an hmu chhuak a, a neitu an han zawn chhuaha police station-a an koh chuan thil awmdan sawiin a theihnghilh ngei tih a sawi a, hetianga mi rinawm a tawng hi a lawmzia entirnan leh lawmthu sawi nan chu taxi driver, MacCausland chu $100,000 a pe ta a ni.

Police Commissioner William Evans chuan he taxi driver hian a rinawmna avangin midangte tan entawn tur a hnutchhiah a, hetia lawmman a dawng pawh hi a phu hliah hliah a ni a ti.

Aside | Posted on by | Tagged , | Leave a comment