CSS HINDI TEACHER TEN CHAWNGHEI AN LA CHHUNZAWM ZEL, MI 364 DAMSAM LO, MI 56 DAMDAWIINAH HRUAI TAWH

Mizoram CSS Hindi Teacher te chuan sawrkar laka an thilphut tihhlawhtlin ngiatin chawnghei an la chhunzawm zel.

Hunger strike nei mek te hi an vaiin 1080 vel niin an hruaitute chuan an sawi a, tun dinhmunah hian CSS Hindi teacher chawngheia nuar mekte hi a tlangpui thuin an chau tawh hlawm hle a, damsam lo 364 an awm a, an zinga mi 56 chu damdawiina hruai tawh an ni a, tlema ziaawm chu chhuahtir leh zel an ni. Tui thianghlim intur mumal a awm loh avangin santen leh kawthalo vei eng emawzat an awm mek bawk niin an sawi.

Nimin chawhnu dar 2:30 bawr vel khan damlo na zual an awm vangin Ambulance chah a ni a, mi 4 chu Aizawl Civil Hospital Casualty lamah phurhphei an ni. Chawnghei zinga damlo tam zawk chuan Doctor checkup pawh an duh lova an thil ngiat a hlawhtlin hma chuan chetsawn an tum tawhlo tih an sawi.

Tun dinhmunah Civil Hospital Aizawl bikah chawnghei zinga damlo mipa 2 leh hmeichhia 9 enkawl an ni.

Author : Vanneihthanga Vanchhawng

Advertisements
Aside | Posted on by | Tagged , , | Leave a comment

BANKING CHUNGCHANGA KAN THUHRIAT/LAMDAN DIKLOTE

  • Bank thumal awmzia
  • Debit card awmzia
  • ATM awmzia

Banking chungchangah hian thil hriatthiam loh leh lam thiamloh, a nihna hriatloh kan ngah mai a. Heti lama thawknihloh chuan hriat vek theih a ni lo bawk a. Chung thil thenkhat chu kan post ve reng reng ang e.

1. CREDIT/DEBIT : “Credit chu Lut, Debit chu Chhuak” tiin sawifiah ila a chiang ber awm e. I account-ah Engzat nge in Credit ? kan tih chuan, I Account-ah pawisa engzat nge lut ? tihna a ni a, chumi lehlam chiah chu Debit (lachuak/cut) tihna a ni mai.

2. ATM CARD/DEBIT CARD leh CREDIT CARD: Hei hi mi tamtakin kan hriatpawlh leh kan hriathmaih thin a ni. Debit chu lachhuak tihna a ni kan titawh a. ATM Card in pawisa kan lachhuak thin a. Chuvangin ATM Card leh Debit Card hi a inang tihna a ni. ATM Card tih chuan a Noun Form-in kansawi a, Debit Card kan tih chuan Verb Form-in kan sawi tihna a ni. ATM Card kha pawisa lakchhuah nana I hman avangin Debit Card tihna a ni mai. Credit Card chungchangchu sawitur tam tak a awm ang. Bank pawisa pukna Card a ni mai ang chu. Thil kan leiduh a, kan account ah pawisa kan lo nei mai silova, Credit Card kan neih erawh chuan, kan Credit limit azirin kan Credit Account a mi kan hmang puk thei a, amaherawhchu, kan lo puk anih pawn huntiam chhunga kan Credit Account-a kan rulh (Credit) leh a ngai ani. Credit Card leh Debit Card hi thil hrang hlak a ni a. Credit Card nei tur hian theihchin (eligibility) a awm avangin duh duh zat Limit kan nei thei lo thung. Kan hlawh/lakluh a zirinLimit hi Bank lamin a siamsak thin a ni.

3. ACCOUNT-A PAWISA AWM :
Mi pakhat chuan, “ATM-a pawisa awmzat engtin nge kan phone atang kan hriat theihang?” tiin zawhna a lo zawt a. ATM-a pawisa awmzat hi mizawng zawng hriat theih a ni lova, ATM enkawltu Bank-te hriat chauh chi a ni. A rawn zawhtum erawh chu, a Account-a pawisa awmzat a ni. Midang leh chuan, “ATM-ah pawisa engzatnge ila neih?” tiin min zawt thin a. ATM-ah hian pawisa kan nei reng reng lova, kan Bank Account zawkah pawisa kan nei a ni. Chuvangin, “Account-ah engzat nge I neih?” tih mai tur a ni. ATM hi chu kan ATM Card nena in Link-a pawisa lakchhuahna maichauh a ni.

4. MOBILE/INTERNET BANKING:
Mobile Banking chu, awlsam zawka Transfer te, Top Up te, Balance-te, Statement en nana hman thin a ni a. Thil tam tak erawh chu a theih loh a. Chutihrualchuan, Bank Account danga Transfer nan a awlsam em em thung a, Offline (iOS leh Windows chu online a ngai) in engkim a tih theih avangin, internet hmang kher lovin, transfer, top up etc. a tih theih vek a ni. Internet Banking atang erawh chuan thil tam tak a tih theih a. Tunlaia mi tamtak buaipui, Aadhaar Card, PAN Card, Gas Subsidy chungchangah te hian Bank-a kal ngai kher lovin awm hmun atang Bank Account nen a link theih vek a ni. Tin, Loan lak nan emaw, thildang tihnan emaw I Bank Statement I mamawh a, I passbook I update bawk siloh chuan Internet Banking atang I duh chen chen Transaction Statement I en in I print chhuak thei bawk. Chu mai a la ni lo, Fix-a pawisa dah te, Recurring Deposit-a pawisa dah te, SBI Insurance Premium pek nan te, ATM Card Block nan te, Cheque dilnan te, Nomination ilo dah lohpalh pawn Nominee Register nan te, tin, Mobile Top up, Bill payment, Online Shopping nante a hman theih vek a ni. Bank-a hun tam tak kan han seng thin hi he Internet Banking hian a chhawk zangkhai em em a ni. Bank-a kal ngailovin thil engkim deuhthaw a tih theih a ni. Tin, Bank dang engpawh Account-a pawisa thawn a awlsam hlei hlei. Sawifiah dan berah chuan, awm hmun atanga Bank dawrna a ni ber a, I account chet dan hrang hrang te I en thei dawn a ni.

Sawitur tam tak a awm ang. Bank I kal dawnin I thiltih tur hrechiang la. Saptawng tlem (Deposit/Transfer/Withdraw)I thiam a nih chuan midang rawn kher lovin Green Channel atang khan I chhiar/en zel dawn nia, a inziah vek kha. Tin, hriattur tul an tar ang chite pawh chhiar nachang hriat a tha. (Entirnan : “Aadhaar Card thehlut turte inchungah” tih a intar mawlh mawlh laia, a hnuai lama hnathawkte va zawh kher khan, annin an lo vin/tawngkam nemlo deuh an lo hmanin in thinrim leh thin sia).

Tin, Bank in Lunch Break an neih hun hi hriat ve tum tur a ni, Bank tam zawkah chuan an tar a, en thin tur. An Break hun tawha dawr kan tum hian, annin Break an lo duh ve bawk si avangin awki ring deuh hlekin min lo be thin a, kan thiamloh anih laiin Customer-te zawk lungawilo ah kan tang leh thin.

Bank hi sumdawng an ni a, mipuiin kan dawr loh chuan sumdawnna an nei dawn lo tihna a ni. Chutihrual chuan, I pawisa kha khawlpun, dahthat nana Bank I hmanglo a nih chuan, khawiah nge him taka I dah ang ? I kawl khan a himloh bakah a pung thei dawn lo a sin!!


Author : El Zeta

Aside | Posted on by | Tagged , , | 2 Comments

VISHAL MEGA MART HAWN A NI TA

Vawiin chawhma khan Vishal Mega Mart Bawngkawn a michu hawn a ni a, dawr duh kal an thahnem hle.

Dawr tura kal an thahnem a, motor a tam hle bawk, traffic a jam nasat em avangin traffic lam an buai hle a, Vishal dawr hi khar hrih mai turin an ngen niin mi thenkhat chuan an sawi.

Aside | Posted on by | Tagged , | Leave a comment

VISHAL MEGA MART HAWN TUM CHUNGCHANG MZP IN AN NGAIHTUAH

27th March, 2017 khan MZP Executive Meeting MZP Pisapui-ah neih a ni a, meeting hi Pu Lalsangzuala Ngente President in a kaihruai a ni. Meetingah hian Aizawl-a Vishal Mega Mart hawn tum mek chungchang an ngaihtuah ho a ni.

MZP executive meeting-ah hian Vishal Mega Mart te ang chi chain store-te hian metro city ni lo mihring tam lohna khuaah nghawng tha lo an nei thei a, tual chhung sumdawnna an tihchhiatsak avangin an khuaah sum lengvak a tlem phah a, economy-ah nghawng tha lo a nei theih thu sawichuah a ni.

Mizoramah hnam dang sumdawng an rawn inbun thei em tih leh kan dan neih laite hi a him em tih MZP-in Mizoram sorkar hruaitute a zawt a, mipui leh pawl hrang hrangte pawh he thil hi ngun taka ngaihtuah turin an ngen a ni.

MZP executive meeting chuan Vishal Mega Mart hian dan leh thil kalphung an zawm em tih pawh ngaihtuah a ngaih thu an sawi a, AMC Licensing Regulation hmanga sumdawn phalna, August ni 24, 2016-a issue-ah Vishal Mega Mart neitu hmingah Mizopa hming a chuang tlat mai a, he Licensing Regulation hi 2015-ah Mizorama tlawmngai pawlte’n tangrualin siamthat an lo ngiat tawh a, an hlawhchhamna kha a ni an ti. Nikum August thlaah license an hmuh tawh laiin dawr hawn dawn tep, mipui an inhnial hnu leh dodal an awm hnu March ni 23, 2017-ah Vishal lam leh license neitu Mizo te’n Franchisee Agreement an siam leh chauh niin an sawi bawk.

Franchise agreement siam a niha franchisee Mizo a nih chuan Mizovin man chawiin Vishal hming hawhin dawr a hawng dawn tihna a ni a, chu chu an indawrna hmasa tur ni awm tak a nih laiin sawisel an awm hnuah an siam chauh si tih an sawi a, Chu agreement awm hma chuan a neitu hmingah Mizo hming a lo awm tawh tlat bawk. Chu agreement chu Haryana Non-Judicial Stamp hmanga tih a ni a, Mizoram lam a lan loh bakah Franchisor tur Mizopa phone number chu 9999999999 a ni mauh mai tih MZP te chuan an sawi bawk. He agreement phuahchawpah hian witness an awm lo niin an sawi a, notarial registration number a awm lo a, stamp duty pek a ni lo a, he agreement hi danin a phut anga register a ni hek lo.

A pawimawh ber laia mi thenkhatin an ngaih VAT registration chu Airplaza Retail Holdings Pvt Ltd (hnam dang ta) hminga tih a ni leh daih thung niin an sawi bawk.

MZP executive meeting chuan Airplaza neitute hian kum hnih daih tur ILP a neih vanga registration hi tih theih a nih thu an sawi a, ILP pek a nih dan pawh sawifiah turin MZP chuan thuneitute an beisei a, ILP hian min la chhan em tih thlenga ngaihtuah thamah MZP chuan a ngai a ni.

He thilah hian thil man to vanga harsatna mipuiin kan tuar nasa tih leh cost of living a san avangin mipuiin rit kan ti tih a lang a, consumer-te venna te, price control leh inflation lamte Mizoram sorkarin a ngaihthah vanga mipuite tawrhnaah MZP chuan a ngai tih an tarlang a. Chuvangin hetiang thilte ngai pawimawha mipuite tana theihtawp chhuah turin Mizoram sorkar kan phut a, chutih rual chuan kan sumdawngte pawh an chungah mipui an lungawi lo tih hriaa insiamthatna kawng dap turin kan phut bawk.

Vanneihthanga Vanchhawng

Aside | Posted on by | Tagged , , | Leave a comment

MIMA TEN KAWNG AN ZAWH

Mima hote chuan Vishal dawr hawn duhloin kawng an zawh a, thlawptu an nei chhe hle. 50 vel an ni hmel.
Facebook lamah comment ah tantu an awm ngai lova, duham lutuk ti vekin an sawi thin.
MZP pawhin tantu an neilo.

Aside | Posted on by | Tagged , , | Leave a comment

MIMA HRUAITUTEN THA THLAH LO TURIN MEMBER TE AN NGEN, COURT TE PAWH THLENG HIAL MAITHEI

Mizoram Merchant Association(MIMA) General Headquarters huaihawtin nimin chawhma dar 10 khan VishalMega Mart duhlona lantirin an pung khawm a, Aizawl khawpui a dawrtam tak khar a ni.

MIMA huaihawta neih Vishal Mega mart duhlohna lantira Millenum Centre-a punkhawmnaah hian MIMA President Pu PC Laldinthara chuan Vishal Mega Mart chu Rajiv Mishtra hmingin Taxation Deptt. Aizawl North Zone ah ziah luh a ni a, tuna bungrua awm te pawh hi Rajiv Mishtra hminga a lokal a nih loh chuan engtin nge Vairengte Taxation check Gate a paltlang theihtih hi MIMA zawhna a ni a ti.

LRM te hian Franchiseze angin agreement a sign chu ni 24.32017 mai khan tihdanglam a ni a, heng zawng zawngte pawh hi chhui chian tur a ni a, kan thlenchin tur hi enge kan hre lova court ah te kan kal dawn em tih te hi kan la ngaihtuah chho zel dawn a ni a ti a. MIMA hruaitu dangte pawhin thu an sawi bawk.

Lungawilohna pungkhawm MIMA member te hian Millenium Centre atangin Vishal dawr Bawngkawn veng kein an pan a, Bawngkawn local council leh Police ten an ngen angin a hmun thleng lovin MIMA Member te hi an tindarh ta a ni.

Vishal dawr hawn tur duh lohna lantir nan khawpui chhungkawngpui dunga dawr chi hrang hrangte chu khar a ni a, loh theih lohna avanga reilo te chhung dawr an hawng tih loh chu sumdawng ten MIMA ngenna ngaipawimawhin an dawr te an khar hlawm a ni.

Nimin chawhnu lam khan MIMA hruaitute hi an thukhawm zui nghal a. Vishal Mega Mart duhlohna lantir nan a, Aizawl dawr khartu zawng zawng te leh anmahni supporttu Mipuite chungah lawmthu an sawi a, an kal zel dan tur chu ngaihtuah zel a nih tur thu leh tumah tha thlah lo turin an in chah a ni.

Vanneihthanga Vanchhawng
28th March, 2017

Aside | Posted on by | Tagged , | Leave a comment

KIM JONG NAM KHA NGATINGE AN THAH???

Hmanni lawka North Korea Hruaitu, Kim Jong Un a unaupa(Half Brother) Kim Jong Nam…Malaysia Airport a an assasinate dan kha kan hre fur tawh ang a. Mahse a phenathil inthup te, engvanga that nge an nih tih te, engtin nge that tura hma an lak ruk dan vel te hi tawi te te in ilo thlir zuai zuai teh ang u. Mahse a indawt fel thlip thlepa sawi a harsat deuh avangin a chhiar lam min lo uluk sak hram mai rawh u.’.

A hmasa berah chuan Kim Jong Un hian ama chhungkua (North Korea Lal Chhungkaw) zinga mite a thah hnem malh malh tawh zia chu kan hre theuh turah i han ngai phawt ila. Mahse heng a mi thah te zinga pawimawh fal bikem em pathum te hi thlurbing tum ta zawk ila. A hmasa berin a patea Chang Song Thaek kha a that hmasa ber a. A then chuan a patea hi an phelh ruak vek a, ui kawlh an seh hlum tir tih thuthang te pawh a awm kha. Chumi zawhah tunhnai lawka a thah tir Kim Jong Nam-a unaupa Jang Young Chol chu Pyongyong ah an hruai lut a, an that leh hmak bawk a. Tin Kim Jong Nam a ni leh ta bawk a. He mite hi ngatinge an pawimawh bik na chhan, ngatinge Kim Jong Un hian a hlauh tlat na chhan.

‘Kim Jong Un-a pa, Kim Jong iL a thih dawn khan, an inthlah chhawnna (Lineage) ah chuan Malaysia-a an thah tak Kim Jong Nam kha lalthutthleng rochun tu tur ber a lo ni reng pek a. Mahse thil pahnih khat vangin Kim Jong iL khan a thih dawn ruaiah a thu a sut leh a ni ber awm e.

A hmasa zawkah chuan Jong Nam hi chu a progressive (Tunlai lutuk tihna ang a ni ber ang chu) lutuk a, N.Korea kha khawvel hmuha inhawn zau a, CHina ang deuha sumdawnna lam pawh kal pui te kha a rilru sukthlek dan a ni a. Kha kha KIM chhungkaw in kaihhruai dan leh an ram hruai an duh dan kha a ni bau silo a. Tin chhuanlam tur tingin 2000 nge 2001 vel khan Jong Nam hian RecreationalPark tlawh tur ringawtin a rukin a lo relh ru bo pek a ni awm a. Chutiang te chu tlai khaw hnua chhuanlam atana hmangin a chanvo dik tak pawh chu Jong Un-a kutah hian a lut ta daih reng a ni.

Kim Jong Nam assasinate tute ber hi Indonesian hmeichhai Siti Aisyah leh Vietnamese hmeichhia Doan Thi Huong te an ni a. Anni pahnih hi Massage Parlour-a thawk an ni awm e. Malaysia vela massage parlour a thawk an tih hi chu K.S ang deuh thaw-a ngaih an ni. (Phai vela kan massage parlour-a thawk te hi ni ve tak maw …RF)
An insawi thiam dan chuan Reality TV show a tel niin an inngai a. Kim Jong Nam hi tunge a nih an hre lo a, camera hmaah a hmaiah thil tuiril an va tat ringawt angin an inngai niin an insawi a. Mahse CCTV Footage-a a lan dan chuan heihi a awihawm loh deuh. A chhan chu khatia Jong Nam-a hmaia thil an va tah zawh khan an kut kha an phar chhuak a, insilfai turin an kal nghal tih hriatchhuah a ni a. Chuvangin an kuta thil awm kha enge a nih tih leh a hlauhawm a ni tih chu an hrechiang hle ni ah thuneituten an ring hmiah.

Awle, an thah chhan lam i lut tawh ang.
Jang Song Thaek kan sawi tawh a. Ani kha Jong Un-a patea kha a ni a. Tin Jong Un-a pa…Kim Jong iL a thih hlim vel phei kha chuan…lalthutthleng chang tur ni lo mahse, N.Korea ah chuan mi thil ti thei ber a ni a. Jong Un a rawn lal hnu pawh khan a power a la sangin, tantu leh zuitu a ngah em em a ni. Kim Jong Un hi a lalthutthleng luah chungchangah hian hlauthawng reng rengin a awm reng tih hi hre bawk ila. He a patea leh a fate pahnih an awm chhung hi chuan a Lalna hi a famkim tak tak thei dawn lova, engtik lai pawha paihthlak thut theih reng nia a inngaih tlat avangin heng mi te chungah hian action a la ta a ni ber mai.

He tualthahnaah hian N.Korean official inhnawmhnawih an tam viau mai a. Jong Un hian a thih chian bal hi a duh takmeuh niin a lang. A thattu hmeichhe pahnih te pawh hian mi pakhat James inti in a rawn contact niin an insawi a. He James inti hi a hming leh nihna diktak chu Ri Ji U a ni a, North Korean tho a lo ni reng pek a. Tin, Kim JOng Nam…Malaysia Airport-a hmeichhe pahnihin Nerve gas hmanga an beih lai khan, an beihna hmun bul lawka CAFE (Thingpui dawr) ah khan North Korean Official pali an lo thu ve reng tih hriat chhuah hnuhnawh a ni bawk a. Heng mi te hian khatia Jong Nam-a beih a nih zawh chiah khan thlawhnaah an chuang a, Middle East lamah an thlawk bo nghal vang vang a ni awm e.

Kan lo sawihmaih char char a, an thahna hmanrua hi VX Nerve Agent a ni a, biological weapon te zinga a hlauhawm ber pawl a ni hial awm asin.

Thil pakhat sawi tel loh theih loh nia ka ngaih chu…ngatinge khawvel hian N.Korea leh an hruaitu Lumehmawia hi an beih mai loh kan ti mai thei. A chhan ber chu China in a thlawp tlat vang a ni. Mahse hei tak hi tunhnaia N.Korea thiltih avangin an inkar hi a buai ru viau tawh tih hi hriat a tha in ka hria a. Missile a enchhin reng avang khan a hmain China chuan N.Korea nen an inrinaah hian sipai thahnem tak a lo chhawk ru hnuk tawh a. Tin tunhnaia Japan sea-a missile a enchhin leh chiah khan, China chuan an ramriah bawk hian sipai sang tel a tirh belh leh a ni awm e. An inkar hi a khi zau tawh takmeuh meuh a. Jong-un hian a mawl man hi a tel harin a rinawm tawh lo. China hian an thlawpna an hnuhdawh rual rual hian N.Korea chu a bet nghal rawp rawpin ka ring tlat.


Author : Rawna Fanai

Aside | Posted on by | Tagged , , | Leave a comment

LIANURHA of THINGSAI KHUA RAMHUAI HMUH DAN!!

  • Ramhuai nulain pasala neihah an thlem.
  • Ramhuai nula ten sangha an mansak

Kum 1969 khan Ţiau kawng lamah lo atan Thalhrit kawn ka nei a, buh hmin dawnin ka lovah chuan sanghal a chhuak thin a. Chu mi veng chuan ka riak a, lungfal 5, ka thlam velah chuan ka kam a. Zan khat chu khua a thimchauh tihin ka lungfal chu a per a, ka han en a, sazu te tak te hi a lo delh a, ka rawh ta a. Ka rawh zawh chuan thingpui ka in laiin ka lungfal chu a per lehin ka hria a, ka zuk en leh a, a lo per hauh si lo va. Ka chho dawn a, a dang chu per ang chiahin a ri leh chhak a, ka zu en leh a, a lo per leh miahsi lo va. Ka chhoh dawn țep chuan a thlanga mi chu per chiahin ka hre leh a, ka zuk en chuan a lo per leh lo va, mak ka ti hle mai a, “Engtizia nge maw ni chu le?” ka ti a, mak ti tak chuan thlamah chuan ka lut ta a.

Inrinni a lo thleng a, kan hawn kawngah chuan Pu Taithanga nen kan haw tlang a, ka thil tawn ang chiaha lungfal a kama per ri ang taka a awma a per hauh si loh thu chu a sawi ta a. Kei chuan, “Kei pawh chutiang chiah chuan ka lungfal zu awm a, mak ka ti em em mai a, a ngaihna lah chu ka hre si lo va,” ka ti a. Ani chuan, “A, Liana, chutiang chu rammi alawm maw le,” a ti a.

Kar lehah chuan ka ri pa nen chuan riak turin kan insawm leh a, ani pawh chuan riah ngei tumin a insawi a, kei chu ka kal ta mai a. Tlaiah chuan ka ri pa chu a lo kal leh kal loh ka lo thlir reng a, thim dawn țep chuan ka thlam bul kawngah chuan mi lo kal rawn țawng nawk nawk hi ka hria a, ka thlam zawn rawn thleng awma ka rin chuan ka han ko va, min chhang ta reng reng lo mai a, mi tihder tumah ka ngai mai a.

Zanriah ei kham hun velah chuan ka thlam chara vah hual mau hmunah chuan țawng nawk nawk leh ri deuh rawk rawk hi ka hre leh a, ka va pan hnai a, ka ri pa kha niin ka ring a, ka han ko leh a, mi chhang leh ta hauh lo mai a, mi tihțhaih tum niin ka ring leh a, “Engtizia vei nge maw ni che le,” ka ti a, mau bung hian ka han vawm a, a reh leh ta țhap mai a, lungțhil ka țham a, ka han vawm leh uai uai a, engthawm mah ka hre leh ta lo va. Ka thlamah chuan ka phei leh a, thla hi a eng deuh riai ruai a, ka rilruah hlauhna deuh ka nei ta tlat mai a, ka hmulthi a ding sung sung ta mai a, “Kan velah hian tunge riak ve awm aw, ka fin ngawt mai loh chuan a țha dawn hauh lo mai,” ka ti a.

“Ţiau kam lamah riak a awm ve awm kha maw, ka zuk fin mai teh ang,” ka ti a, ka insiam a, kal mai tur chuan ka in ak ta uaih mai a. Chutih lai tak chuan in lam ațang chuan mi lo kal țawng nawk nawk hi ka hre leh a, “E, chu chu mihring țawng tak tak a ni,” ka ti a, ka lo thlir reng a, hla deuh ațang hian anmahni pawh chu ka hmu thei ta a, ka lawm hle mai a. Ka thlamah chuan an lo kal a, nu pahnih sanghal veng tur ve bawk an lo ni a, ka mei an rawn chhi a, an kal leh mai dawn a. “Awi, chawl ve ta rih che u, kei pawh mahnia riah zawng ka duh lo, in hnenah ka riak ve ang,” ka ti a. A upa zawk chuan, “Sanghal veng tura riak si, i lova i riah loh te chuan i tihim dawn em ni? Nang hi engemaw tak hlauh i neite hi a ni ang e, engnge i hlauh?” a ti a. “Engmah ka hlau lem lo, kei hi zawng ka dawih ve reng reng a, riah fin mai che u ka duh a ni,” ka ti a. Nu pahnihte chu an kal a, ka zui ve ta a. An lo kan thlen chuan zan dar riat vel emaw a niin ka ring. Nu pahnihte chuan, “Lo mawng lamah mei kan zuk chhem ang e, thlam hi lo nghak rawh,” an ti a. An mei zuk chhem chu lo chho har ka ti hle mai a, ka zu au nghe nghe a. Anni chuan ka hlauh deuh dan kha an hriat avangin an lo chho ve thuai a. Nu upa zawk chuan, “Liana, engnge i hlauh, hlauh i nei zawng a nih phawt mai hi, han sawi teh,” a ti a. Ka thil hlauh chu ka hrilh ta a. Ani chuan, “Isua Kristaah i awm lo a nih hi, kei chu Isuaah ka awm avangin engmah ka hlau lo, ka țawngțai ang che,” a ti a, mi han țawngțai nghe nghe a. Chumi zan chu tui takin kan mu ta a.

In lamah chuan mitthi awm avangin hawn țulna a lo awm a, kan haw ta a. Ka riak lut leh tur chuan ka fanu Thanpuii kum 7 mi lek hi khawhar dalah ka hruai a. Zanah chuan thosilen kan zar a, kan pafa chuan kan mu ta a. Zanlai velah chuan ka fanu chu ngik deuh feih feih hian ka hria a, ka han harh chuan ka han dap a, a mutnaah chuan a lo awm lo va, thosilen pawnah bang bulah hian puan pawh sin lovin a lo awm daih mai hi a lo ni a. Ka han chawi a, a lo vawt ngiak mai a, ka han pawma ka han en chuan a mit men dan hi a rang hlir hian a lo meng ta mai a. Mei ka chhem a, (ka ri pa kha chumi țum chuan a riak ve tawh a) ka han ko va, an lo kal a, “A, ka fanu hi a awm dan a țha tlatlo mai a, zanin chuan haw lovin min riahpui mai rawh u,” ka ti a, min riahpui ta nghe nghe a.

Zan lehah chuan kan thlam char lam bang bulah hian ‘Rawt’ a rawn hram ta a, bang chu ka han beng thin a, a reh duh chuang si lo va, kan thlam bang chu ka han keu va, chem humin ka zen chhuak a, ka han vai vel a, a tawlh hla deuh va. Kan han mu a, mei a thim dawn chauh tih chuan ka muthilh hmain, “Lianurh” ti hian mi han ko va, ka han inbeng kang a, “Lianurh” mi rawn ti leh a; mahse ka chhang hauh lo va. Chumi kar chu a tawp a, kan haw leh ta a.

A kar lehah chuan kan rite nen chuan mahni thlam țheuhah kan riak leh ta hlawm a. Zan thla engah chuan ka riteho chu ka thlamah chuan an rawn leng a, tlaitlanah an țhu a, an zai an zai a. Kawngka lam chu ka kalh a, ka țhianteho hnenah chuan, “In peih chin chin awm ula, kei chu ka han mu ang e, in hawn pawhin tlaitlan kha chu khar pawh a ngai lem lo vang” ka ti a. Ka mutsan ta mai a. An hawn lai pawh chu ka hre ta lem lo va.

Zan lai velah chuan ka thlam tlaitlan ațang chuan, “Lianurh, tho rawh,” ti hian min rawn țhawng ta a, ka han harh a, ka tho nghal phut a. Ka thlam tlaitlanah chuan nula tleirawl deuh te hi a lo ding reng mai a, ka hlau hle mai a. Mei ka han chhem a, ka rilru chuan, meichher chhita tlan chhuah thut ka tum deuh va. Ka rilru hria ni awm tak chuan nula chuan, “Hlau reng reng suh, hlauh tura awm ka tum hleinem,” a ti ta a. Chutia a tih chuan ka hlauhna pawh chu a reh deuh huai a. Nula chu a lo lut a, kei chu thlam char lam tap bulah ka țhu a, nula chu ka hma zawn chiahah chuan ka lam hawiin țhutphah atana thing tum tawng chen lek ka siamah a țhu ta siah mai a. “Engnge i tiha heta i riah?” tiin min zawt a. “Ka buh hi sanghalin an ei ka hlau va, ka veng a nih hi” tiin ka chhang a.

Ani chuan, “Ngaihtuah duh suh, an ei lem lovang” a ti a. Nupui ka neih leh neih lohte min zawt a, ka neih tawh thu leh fa pawh pathum ka neih tawh thu te ka hrilh a, “A nih tak chu,” a ti ve mai a. Chutia kan inbiak lai chuan nula te chuan, “Lo lut ta che maw le,” a ti a. Pawnah chuan țhian dang a lo nei lo niin, a lo lut ve ta a. Chu chu nula upa lam deuh hlek ni awm tak hi a ni a. Thlam chhungah chuan mi hnungchhawn deuh hian a ding deuh reng a, ui chal lian deuh mai hi a rawn hruai nghe nghe a. Lo lut hmasa nula khan, “In lengte țhutphah pek nachang pawh i hre lo va, han pe ta che maw le,” a ti a. “E, a ni tak maw,” ka ti a, saiip, lukham atana ka thleh ka pe a, ka hmaah chuan mi hnungchhawn zawng bawk chuan a țhu leh ta a. Chumi chu a hmel pawh ka hmu thei hauh lo, ka lam a hawi duh tlat loh avangin.

Ka rilru chuan an ui hruai kha ka hlau deuh va, ka rilru hria ni awm tak chuan nula naupang zawk chuan, “Ui kha kaltir rawh,” a ti a, a upa zawk chuan, “Kal rawh” a ti a, a kal ta mai a. An inthuam dan chu- a tleirawl zawk chuan pawnfen var a feng a, puan țial sin deuh hi a bat bawk a, bengbeh- uai chi ni lo, bet chi, tumbul an tih hi a beh a. A sam chu a tukkhumah hian a țawn a, a arh laih a. A hmel chu ngo deuh ving veng, hmai bial deuh, mit bial kal mai hi a ni a, te deuh hmel fel tak a ni. A upa zawk erawh chu ka lam a hawi duh tlat loh avang chuan a hmel chu ka hmu lo reng reng a, puan țial khat deuh, a dungzawnga țial hi a sin a.

Ka rilruah chuan, ‘Lasi an tih hi an ni ngei ang a, Pathian lam thilte hi an hre ve emaw ka zawt teh reng ang,’ ka ti deuh a ni a; chutiang lam sawi tur chuan ka țawng thei tlat lo mai a, “Chutiang zawng nakinah,” tih lam hi ka rilruah a lo lut leh tlat thin a. Rei fe an țhut hnu chuan, “Haw tawh rawh u, ka mut a chhuak viau asin maw le,” ka ti a. Tleirawl zawk chuan, “Inlengte han hnar chu le,” a ti a, a nui deuh vei seih a. Khua a var hma deuh chuan an haw ta a, kei pawh chu rei lote chu ka han chhing hlek bawk a. An awmdan kha an intihhlauhawm lem loh avangin hlauhna pawh ka nei ta bik lo va, rawn leng leh se ka ti rilru viau mai a.

Hmuh ka chak ang ngei chuan zan leh zanlai velah bawk chuan zan hmasaa ka hmuh ang chiahin an rawn kal a, a ngaiah bawk chuan an țhu leh ta a, chumi zan chuan an ui hruai pawh chu ka hlau ta lem lo va, thlam tlaitlanah chuan an bawhtir ve ta a. An hnenah chuan, “Lo leng tur in nih rau rau chuan engatinge hma deuhah in rawn kal loh, in awmna a hla em ni?” ka ti a, A tleirawl zawk chuan, “Hla vaklo ve,” a ti ringawt a, an awmna hmun phei chu ka zawt ta bik lem lo va. Hetih laia ka rilrua thil lo lang pakhat chu- Lasi an tih hi an ni ngei ang a, sa kah theihna ka dil dawn em maw ni aw, tih hi a ni a; mahse ka rilru pakhatah- He thil hi ka hneh chuan Pathian lamah felna ka hmu ang a, ka hneh loh erawh chuan thiam loh ka chang dawn a ni, tih hi a ni a. Chuvangin engmah ka sawi ta lo.

Hetiang hlir hian zan li an lo kal țhin a, Zirtawp zan chuan tleirawl khan, “naktuk chuan i haw ang maw? I haw a nih chuan ni dangah eng hunah emaw inhmuh lehna hun kan la nei leh dawn nia. Chumi hunah chuan duhthusam kan sawi dun tawh dawn nia,” a ti a, kei chuan, “A, hun dang hun dang a ngai hleinem, tunah sawi nghal mai rawh u,” ka ti a, haw tuma an ding chu han chelh ka tum a, ka han ban a, an bo ta diak mai a.

Thil awmzia chu ka rilru chuan ka ngaihtuah zui ta a, an kalna lam chu thlirin buh an sut nghin leh nghin loh te hmuh ka duh avangin ka en zui deuh va, engmah hmuh ka nei chuang lo.

Chuta chinah chuan hmuh leh chu duh lohna ka neih deuh avangin chhuahvahna leh zin veivahnaah reng reng pawh mahni maia kal chu ka hreh ta deuh tlat mai a. Vawikhat chu Hnahthialah thil hralh tur ka dah a, ka dahnate chhung chuan, “In thil dah kha lei duh an awm a, lo chhuk vat rawh,” tiin min rawn chah a. Mahni chauhva kal chu ka hreh avang chuan țhian ka sawm a, kan kal ta a.

Tuichang kan thlen hma deuhvin van lam ațangin ka hma chiahah rulvankai hi a lo tla thlawrh mai a, leiah chuan a ding âng phiau mai a, ka țhian hnenah chuan, Vawhlum rawh,” ka ti a, a vawhlum ta a. Hnahthiala ka thil dah lei duhtu chuan min lo nghak peih lo va, engmah hralh chuanglo chuan kan hawng leh ta ringawt mai a. Hnahthiala ka thildah ang bawk kha Lungkawlhah pawh ka dah bawk a. Lungkawlha ka thil dah chu lei duh an awm avangin min rawn chah leh a. Hnahthiala ka kalpui bawk kha ka sawm leh a, kan pahnih chuan kan kal leh ta a. Lungkawlh kan thlen dawnin an dai bula phulah sawn Tuichang kama ka thil hmuh ang chiah bawk khan rulvankai bawk kha ka hmaah chuan a lo tla leh ta a, a ding âng leh ta phêt mai a. Ka țhianpa hnenah chuan, “Vaw hlum rawh,” ka ti leh a, a vuak hlum duh tak loh avangin keiman nihliapin ka vaw hlum ta a.

Heng thil awmzia zawng zawng hi mak ka tih deuh avangin Dawn (Burma ram khua) khuaa ka pa a lo zin țumin ka hrilh vek a, ka pa chuan, “A, i thil hmuh, ramhuai chu pahnih an ni a, in inhmuh hnuhnun ber zanah, “In hmuhna hun kan la nei leh ang a, chumi hun chuan kan duhthusam kan la sawi dawn nia,” a tih ang khan kawm leh che an duh a; mahse țhian i neih avangin mihring hmel ang puin an inlan ngam lo a, rulin an rawn inlan a nih chu. I tihhlum ve ve avangin an pahnihin an bo tawh ang, khawiah pawh kal la, hmuh tur an awm tawh lovang, hlau duh tawh suh,” a ti ta a. ‘A ni awm mang tak e,’ ka ti ve ta deuh va.

{ Hemi hmutu Lianurha hi tunah hian kum 55 mi vel niin amah pawh a la dam a, Thingsai ah a la awm a ni. }

Thulakna: RAMHUAI By MUP General Headqarters

Aside | Posted on by | Tagged , , | Leave a comment

ZABULA CHAMPHAI RAMHUAI HMUH DAN.

  • Ramhuaite nula angin an inlar.
  • Ramhuaite rul angin an inlar.

Zabula hi Champhai to Bulfekzawl kawng Pi Khawtini Contract, Sub. Contract a thawktu a ni a, a thianpa Ramfangzauva, Champhai khua chuan Sub. Contract bawkin Pu Lalhmachhuana Saitual hna leh midang hna a thawk ve bawk a.

An hnathawhna hmun hi, Hruaikawn thlang, Tiau kam, Rih dil hnuai vel tak khi a ni. Hnathawktu engemaw zat nen mi thlama riakin hna an thawk a, an kawng laih chu zawh thuai tumin an bei a ni. Zabula leh a hote hi Thlam pakhatah an awm a, Ramfangzauva leh a hote chu Thlam dangah an awm a, inhnaih tein an awmho a ni.

Tuk khat chu Zabula hian bomb pathum emaw a siam a, Tiau mawng lamah sangha man tumin a chhuak a, Tiau phai zawl an awmna thlam bul mai a thlen chuan nula hmeltha tak tak inchei fe fe hian leilaih tur an dil a, an hmel han en mai chuan lei lai awm hmel an pu si lo. Pheikhawk keartui sang an bun a, kawrfual nalh tak tak an ha a. An kutte chu a no hle bawk a. Zabula chuan Sangha man turinlui mawng lama kal tum a nih thu a hrilh chuan Sangha chu manpui tur leh Sangha reng reng thununtu an nih thu an hrilh a. Tichuan lui mawng lamah chuan an chhuk ta a, li pakhat an han ena sangha chu a lo tam hle mai a, a kalpuite chuan, “Bomb chuan vawm rawh le” an ti a. A han vawm a, sangha tam tak a lo lang chhuak a, nulaho chuan awlsam deuh mai chuan an chhar ta zung zung a. Pheikhawk keartui sang nen chuan tui chu an liluh zung zung ta mai a, Sangha chu tam tak an char khawm ta thuai a.

Chumi zawh chuan nulaho chuan, “Kan Lalpa hnenah kan hruai ang che,” an ti a, lui mawng lamah chuan an chhukpui ta a. An Lalpa chu an han au a, pa lianpui hmul deuh mai, hnar er van lam kawk, benghlai, khabehmul lei hnuk a lo chhuak a. Ani chuan, “Henglai hi ka ram vek a ni a, I duh chuan lalna ka pe ang che, kan nula pakhat hi nupuiah I nei dawn nia,” a ti a. Zabula chuan, “Nupui ka nei tawh a, fa pawh ka nei tawh,” tiin a chhang a. Sangha chu han vawm leh turin a hrilh a, an bula li chu a han bomb leh a sangha tam tak an thi a, nula chauh ni lo tlangval engemaw zat nen an han char a, an chhung vum ta rui mai a ni. Zabula chuan a lian tha deuh deuh chauh a ak thei a.

Chumi hnuah chuan, “Kan khuaah kan hruai ang che,” an ti leh a, Tiau ralah an kai a, hmun nuam deuh maiah hian in mawi leh nuam tak tak a lo awm a, Hotel changkang tak takah chuan nula leh tlangval an lo lam luih luih mai a, an musicte chu an tha tawp a ni mai. Pindan pakhatah an hruai a, chutah chuan thingpui leh satui an hlui a. An ei zawh hnu chuan pawnah an hruai leh a, Motor chitin mawi leh thar nuam tak tak a lo awm a, kawng pawh High Way nuam tak tak a lo awm a, Bus nalh tak takah an lo thleng zung zung a, an chhuak reng bawk. An nula zinga mi nupuiah a neih chuan heng zawng zawng hi a ta ni thei nghal tur angina an lal chuan a hrilh a. Tin, Rih luan chhuahna hnuai puk (Rih thlawr) hmunahte hruaiin thinglersang takah an lawnpui a, chuta a hmuh theih ram reng reng chu pek an tiam a, mahse chutiang a neih theihna tur chuan an nula nupuia nei turin an phut tlat thung. Ani lahin nupui a neih tawh avangin a nei thei tawh lo tih chu a ngaihdan a ni ve tlat bawk si. A tawpah chuan an lalpa chu a beidawng ta a ni ang chu, a kalsan ta daih a, nula tlangval te chuan an buk thlengin an va thlah leh ta a ni. Chutianga an thlah chuan thawpik takin an siam a, chutia a mangan lai chuan chunglam a thlir a, ban tha chak tak chuan a rawn thlamuan a, a lo harh ta a, chuti chung pawh chuan ramhuai nulate chuan, “Kan lo la kal leh ang” tiin an thlah hram bawk.

Zinga a chhuak chu an buk a rawn thlen leh chuan chawhnu dar 1:00 PM chiah vel a ni. A hnathawhpui Ramfangzauva hnenah a chanchin chu a hrilh a. Chutianga a sawi laite chuan ramhuai nulate chu a han hmu leh zawk thin bawk a. Buai deuh tak, fing chiah lo hian a awm. Ramfangzauva chuan, “ Sanghate chu I man em?” tia a zawh chuan, “Tam tak kan man a, ka ipte khatin ka rawn ak haw alawm” a ti a. Mahse a ipteah chuan hnahthelro 3 chiah a awm.

Zan thlengin an buaipui a, a tukah chuan Champhaiah an hawpui a, piangtharin a inhria a, inkhawmte pawh a taima hle a, khawlaiahte hial Pathian thu a sawi thin. A rilru buaizia thu sawi engmah a awm lemlo.

A ramhuai hmuh dan hrechiang leh buaipuitu han sawi mai theihte chu : Ramfangzauva, Kahrawt Champhai; Khuanghlira leh Lalsiama, Zote khua ve ve. An vaiin an la dam tha a, Zabula erawh a chawl tawh.


Author : Lra Stipe Miocic

Report tu : C. Laitanga
Aside | Posted on by | Tagged , | Leave a comment

Ramhuai (Darkhupthanga) zawltu te

  • Ramhuai zawl.
  • Ramhuai zawl ten thil an hre dik thei.
  • Darkhupthanga zawltu te.

Tun hmain Mawmrang tlang hnuai Bualpui tlangah khian lal ropui tak Liankhama a awm a. An khua chu an dam mawh em em mai a, chutia an dam mawh chu chhan leh vang awmin an ring tlat a. Pi leh pute hun lai atang rengin an damloh hian chhan leh vang nei leh ti nâtu awm ngeiin an ring thin a, an inthawi fo thin a nih kha.

Tichuan ramhuai zawltu Chêmi hnenah chuan, ” Kan dam theihloh chhan hi i zawlte hian min hriatsak thei mai ang em? min zawhsak ta che,” an ti a. Ani chuan,”Hriat sak thei tuk e, kan zawt ta nge,” a ti a. Tichuan, a zawl Dârkhupthanga (Khawzawl lal (huai)) chu an ko chhuak ta a. An kohchhuah dan chu hetiang hian a ni.

A zawltunu chu chhuat laiah an muttir a, puan dumin an khuh tlat a, zûin an han theh țhet țhet a, a ramhuai hming chuan an han ko ta a. “Darkhupthang lo haw rawh, biak leh rawn che kan duh e,” an han ti a. Chu veleh a zawltunu chhuat laia mu chu a lo khur nghal char char a, a puan sin te chu a hai hlim a. Tichuan ramhuai zawltunu chu a lo țawngchhuak nghal a. A thusawi hmasa ber chu, ” Lung an rual maw?Zawlpala lung an rual na maw e,” a ti a. Chu mi awmzia chu, “Ka pasalin rem a ti emaw,” tih na a ni. A pasal hming chu Khawchhana a ni a. Mahse hetiang zawlneite hian an pasalte chu Zawlpala tiin an ko mai thin a ni. Chutia a pasalin rem a tih leh tihloh a zawhna chu a pasal Khawchhana chuan, “Rual e,”tiin a lo chhang ve vat a. Chuta țang chuan a zawl rawn hrilh ang angin engkim a rawn sawichhuak țan a. Hetiang hian ramhuai chuan a rawn țawngtir ta nghal a.

“In khua in dam theihlohna chhanchu eng dang vang a ni lo, Mawmrang tlang huai hi an lalpa hming chu Sahmula a ni a, he mi hmunah hian naupangin lung an ti lum fo va, chuvang chuan Sahmula chu a thinur thin hle a, kei chuan, “Laisen lungmawl mai an la nih hi ngaidam rawh u,” ka ti thin a. Mahse ka veng reng seng bik si lova. Tuna chinah chuan Kel leh vawk inkarthlakin kum thum danah pe zel ula, tichuan inthlahte thlengin min bia ula, sa leh ralahte ka humhim zel ang che u,” a rawn ti a.

Chutiang chuan a zawltunu hmangin ramhuai chuan thu a rawn sawi thin a ni. Thil rawn duh an neih apingin a zawlneite chu an hmang ta thin a ni. Hmun hran hrana ramhuai zingah pawh a hming lar deuh hi an awm thin a, Darkhupthanga hi natna leh damlohna chi dang danga an biak rawn deuh ber a ni thin a, a lar hle a ni.

Ramhuai Darkhupthanga hian khaw hran hranah zawltu leh hnungzuitu a nei nual hlawm a. Chu mi zinga lar deuh pakhat chu Vanlalchhingi hi a ni. Vanlalchhingi hi artui hmanga aienthiam hming thang a ni a, a hnathawh dan pawh tlemin a dang deuh hret a ni.

Dam lo an awm reng rengin a damlo kha a dam chhuak dawn nge, a damchhuak zo dawn lo tih entu a ni a, an rawnnasa hle hlawm mai. A aien dawn chuan, “Ka lo leng leh e, Vanlalchhingi ka lo leng leh e,” a han ti a. Chu chu a thu rawn sawichhuah hmasa ber a ni thin. Tichuan damlote khan buh țhap fai, hâk kho khat leh artui pum khat an rawn keng a. Chu chu Darkhupthanga zawltu Vanlalchhingi hmaah an hung a. A lo la vat a; artui chu a kutphahah chuan a khamphei zawngin a dah a, a kut chu pharh takin a han dah a. “Ding aw, ding aw, Tuiar aw, Ding aw,” a han ti a, a damlo kha dam leh tur a nih chuan a artui ken kha a rawn ding va va thin a. Tin, a dam dawn lo a nih chuan artui kha a ding thei thin lo a ni. A lo din loh takah chuan zawlnei chu a hrilhhai thin hle a. Tin, dam lo kha a beidawng nghal ang tih a hlau thin si a, a phatmawi nan, “In artui hian chawino a keng a nih hi,” a tih sak hlauh thin a. Artui thar a dang va la leh thin mah se, a beidawng rilruk tawh avangin a lo ngaihsak tha duh tawh thin lo a ni.

Tin, Darkhupthanga lo lanna pakhat dang leh chu Khumzawl tlangah khuan a ni a. Chuta a zawltunu chu Chhawni a ni a. Chutihlai chuan Khumzawl khua chu an dam mawh em em mai a. An dam mawh chhan rawn sawi turin Darkhupthanga chu an sawm ta a.

Tichuan, a zawltunu Chhawni chuan Darkhupthanga a rawn hnu chuan, “Hri-a nâ in ni lo, Khumzawlah ramhuai an awm lo. Ruangthanga (Ramhuai) te nupa chauh an awm a. Ruangthangah lah chuan, “Khumzawltlangah tumah tinatu an awm lo. Tuiphal kama ni sa hnuaiah an zuk feh a, tui te an in vak vak a, an lu te a lo na a, chu mi vanga dam lo chu an ni. An inthawina vawksa leh arsa kan nin tawh teh lul nen,’ a ti a ni,” a ti ta mai a. Mak an ti hle a ni. Ramhuai tihnat nia an inngaih kha an hnathawh nasat luat vanga nâ an nih an hriat phah ta a ni.

He mi hma pawh hian Darkhupthanga hian zawltu pakhat a nei a. Aizawl-a Lalsavunga a awm lai tak a ni a. A zawltunu hming chu Vanhnuaithangi a ni. “Ramhuai ka zawl e,” a ti a, a feh duh thin lo va. Miten a thatchhiat chhuanlam leh suahsual vangah an puh lui tlat thin a. Vawikhat chu a tirhkohnu pakhat chuan, “Ka ni hi ramhuai a zawl a, in awih sak duh lo vei a,” a ti a, Hlimen kham ko sang lai tak maiah mipui feh kal tam vanglai takin a nam thla ta a. A zangthal hian a tla thla ta diai diai a. An en reng a, engmah nâ awm lovin a chhuak leh mai a, mak an ti em em mai a, “Hetiang reng reng ka la hmu ngai lo, a mak mang e,”an ti sup sup mai a ni.

Tin, mi lawn theih lohna hmawngah te hian a lawn a, a zarah te a mu a, tla lovin rei tak takte a awm thin a ni. Chuta țang chuan ramhuai zawl tak tak a ni tih an hre ta chauh a ni.

Hetiang hian zawlnei hrang hrang sawi tur an tam mai. An tih dan tlang pui chu a inhrul deuh vek a, a zawl biak lai kha mipa a nih chuan a zawltu pawh khan mipa aw chiahin a rawn sawi chhuak a; hmeichhia a nih erawh chuan, hmeichhe aw chiahin a rawn sawi chhuak thung a. A zawlnu emaw, pa emaw ngeiin a rawn sawi ang chiah ni hliah hliahin a lang thin a ni.

(Andy K Zarzoliana)

Source : Mizo pi pu te leh an thlahte chanchin By K Zawla


Retold by : Andy K Zarzoliana

Aside | Posted on by | Tagged , , | Leave a comment