Online a drugs hralh ṭhin Oxymonster tia hriat lar kum 20 tang dawn

Oxymonster tia hriat lar Vallerius chu kum 20 tang turin a chungthu rel a ni.

Vallerius hian cocaine, LSD, methamphetamine, fentanyl leh oxycodone, te chu ebay ang deuha a siam Dream Market website ah May 2015 – August 2017 khan a hralh ṭhin a ni. A laptop an check aṭangin $500,000 hu bitcoins an hmu chhuak a.

Vallerius’ laptop ah hian IP thup nana an hman lar em em Tor browser a hmang ṭhin tih an hre bawk a. A hma lawk hian Europol leh FBI, DEA (Drug Enforcement Agency) leh Dutch National Police website ruk lian pahnih AlphaBay leh Hansa te an lo sawp chhe tawh a. Hei vang hian Dream Market hian dawr a hlawh phah a, 29 August 2017 thleng khan 94,236 list a hmu hman a ni.

Nikum August thla khan United States ah World Beard and Mustache Championship ah tel tumin a kal a, an lo man hmak mai a ni.
Tuesday khan U.S. District Judge Robert N. Scola chuan he 36-mi, French national Gal Vallerius, aka “OxyMonster,” hi kum 20 lungon tang turin a rel ta a ni.

November 2013 aṭanga a lo run tawh Dream Market ah hian drugs chi khat OxyCodone leh Ritalin hralh ṭanin dark web drug marketplace founders te nen inthlunzawmna an nei chṭo a. senior moderator leh website administrator nihna May 2015 – August 2017 khan a chelh chho a. August 31, 2017, khan Atlanta International Airport ah an lo man ta a ni.

Kum 20 lungin tan hi thuneitute a thawhpui ṭhat vanga ngaihthiamna nena an pek a la ni zawk a. Tun thla chhunga an hrem pahnihna a ni bawk. Kar kslta khan Irish mi Gary Davis (aka Libertas), Silk Road site administrators leh forum moderators kum 20 tang turin an lo rel tawh bawk.⁩

Aside | Posted on by | Leave a comment

CADC BULTHUM LEH KA NGAIHDAN

Author; Za Hluna Jahau

Mizoramin UT a hmuh tirh 1972 a Mizoram UT Legislative Assembly a LG a SP Mukherjee a thusawi hian bul tan ila:
” The passing out of the District Council on the date the legislative assembly is duly constituted, and the Constitution of Pawi and Lakher regional council into three regional council first and then inti district council also had to be completed during the short period of Transition”

He thusawia lang thei chu, Mizoram UT a nih rual hian Pawi & Lakher regional council hi council pathuma siam hi an tum hle tih a hriat theih awm e. Tin, tarlang hauh silo vin an target chu CHAKMA regional council siam a, chu regional council chu ADC a siam thuai tih hi a hmuh theih ang. Hetih lai hian Mizoram UT sawrkar, Pu Ch.Chhunga CM na hnuaiah Mizo Union sawrkar kan nei a. Central lamah Congress sawrkar a ni. Congress party ah hian District Congress Committee chu Mizorama congress thuneitu sang ber a la ni awm e, Mizoram Pradesh Congress committee tih vel hi a la awmlo a ni maithei.

UT Session hmasa ber a LG thusawi hi a ril khawp mai, Chakma te tana kawng sah hi an lo tum ruh hle tih a hriat theih. He LG address an sawihona a Pu J.Thanghuama thusawi hi a ropui hle ” Regional Council nei thinte district Council pathuma tih an lo ni ta hi hnam hnufual te chawikan nan tih rilru pu a tih a nih chuan a lawmawm a. Mahse Mizoram chu zau zawk tura suangtuah lai a, a then sawm zawnga thil an tih chuan a la pawi thin dawn vawng vawng mang e’ tiin.

He mi tuma Pu Sangchhuma thusawi vethung hi a ropui tho naa, anmahni pawi leh lakher hmakhaw ngaia thusawi a an deuh avangin Pu J.Thanghuama Speech chu a pha lo deuhin ka hria.

He session a CM Pu Ch.Chhunga thusawi hi lo en leh ila: “Pawi-Lakher Region, regional council pathuma thensawm a nih thuah inpuhmawhna pawh a awmin ka hria a. Delhi kan kalin sawihona kan nei a, chutah chuan, ‘PL region hian district council a hranin nei se tha in ti em min ti chiah a ni (Chakma hi an tarlang duh ngailo niin a lang jh). Heti ang thil awm tawhsa hi thiat leh a har em em a. Village council te pawh kan han siam a, thiat leh mai chu a har em em a ni. Chuvangin anni pawh hi an inngeih silo va, thiat leh mai tur a ni ti dawn ila a theih tawh loh reng reng a (Pawi leh Lakher jh) Pawi leh lakherte chu pi leh pu chena anmahni leilunga awm an ni a, a awm viau a lawm kan tih tlan a ni a, district congress committee te nen chu chu kan tihtlan a ni. District council pathumnaah erawh hi chuan congress ka ringhlel deuh va, hei hi chu pawi ka ti khawp mai. Kei chuan Chakma District Council hi chu awm ka ti lo, chi chu a awmzia a ni” tiin.

Thusawi hrang hrang atanga lang thei leh ni thei awm ta chu:-

CADC hming tak hi chuan Lok Sabha proceedings ah emaw, Cabinet thutlukna emaw a awm lo mai thei a, chu lai tak chu kan proof tur thil pawimawh tak a ni ang. LG thusawi leh House a present ah pawh hian PL region hmun thuma thena, District council pathum siam tih mai a ni a. Mizoram UT nih lai bawr transitional period a finrawl hmanga, CHAKMA hming thupa thiltih, murhilh lai buhchi, hmelma pa lo thwh a ang ta ber a ni. Chu lai tak chu kan point pawimawh a ni theiin a rinawm. He thilah hian Mizote tumah inpuhmawh lo va, vote zawn nan hman loh ni sela. Kan hotu hmasa te, party ding hmasate pawh dem tur an nilo, he thil hi mizo ten kan duh vanga tih a nilo ang, Inbumna tenawm tak hmanga BARH LUIH kan niin a lang tlat a ni.

Pu J.Thanghuama chawimawina ni te hi hman ni sela, zofate thawhlawm hmang ngeiin UKIL rawih ni sela, Dan lova din hi DAN hmangin paihthlak tuma beih ngar ngar tur ni maiah ka ngai.

Tin, chakma Issue sawi tur hian Mizo ten zir tur kan neiin ka hria a. India rilru kan put len tual tual a tulin ka hria a. Anni khawiramah mah khua leh tui nihna neilo te, India khua leh tui nih chak ngawih ngawih an ni si a. Tunlai international politics enin, keini ram te leh Arunachal ramah te Chakma vulh len hi India sawrkarin diplomacy pakhata a ngaih vaih chuan, kan inpuiah khuan kan mikhualte hi kan tluklo fo vang tih a hlauhawm thei ang. Anti-Indian movement chungchangah rinhlelh kailo va kan insiam a pawimawh ang. Thinlung taka ‘Hamara Bharat’ kan tih theih a tul khawp ang.

Aside | Posted on by | Leave a comment

Saisual enkawl dan

Kum 1998-a MNF an Sorkar khan Pu Rualchhina kha Forest Minister a ni a.

Assembly Session-ah Pu H.Rammawi, MLA khan zawhna a zawt a,,.. ” Lawngtlai District, Chamdur khaw ramah Sai sual a awm a.. An buh leh Thlai te a tichhia a. Thunun dan a awm em??” a ti a..

Pu Rualchhina chu a ding a,” Sai sual hi thunun dan a vang khawp a, kah hlum a ni mai..” a ti a…

Opposition MLA Pu Zakhu Hlychho a ding phat,,” Pu Speaker, Forest Minister berin Kah hlum a rawt ngawt kha a diklo khawp mai. Man a, khawi fin dan te a awm lawm ni??” a rawn ti a..

Pu Rualchhina chu a rawn ding leh a….” Ni e, man a, khawi fin chu a ṭha ber ang.. Pu Zakhu-a khan lo va man se la,” a’n tiah.

😂😂😂

Aside | Posted on by | Leave a comment

NATURAL THEOLOGY LEH JOBA

Natural Theology hi mi thiamte zingah pawmtu leh hnawltu an awm nawk mai, he zirtirna hi a dik a ni tia mi a kal nat lutuk chuan Pathian hi mihring lam zawn hmuh theih anga ngaih theihin a in her danglam daih theih avangin tawk chin neih angai a. Chutiang bawkin Natural Theology hi miin a thlauhthlak viau chuan Bible ziak thenkhat hi chu a chuang dawn tihna a ni ang. Natural Theology-in a tum tak chu, thilsiam atanga Pathian chhuichhuahna leh mihring hriatnaa amah hmuhfiahna lam a kawk ber. Thilsiam hmanga Pathian inpuanna hi Bible pawh hian a lo sawi ve nual a. “Vante khian Pathian ropuizia chu a hriattir a; boruak zau tak hian a kut chhuak chu a lantir thin,” (Sam 8:3; 33; 6-8). Paula’n thilsiam hmanga Pathian inpuanna thu hi a sawi ve bawk, “A thil hmuh theih loh (a chatuan thiltihtheihna leh a Pathianzia chu) khawvel siam tirh ata fiah taka hmuhin a awm a, thil siamah chuan a lang a ni; chuvang chuan chhuanlam tur an nei lo,” (Rom 1: 20). Pathian thu zir mi, Thomas Aquinas-a chuan, “Khawvela thilsiamte zawng zawng hi kal phung leh nih phung mumal tak neiin an awm a. Heng thilsiam zawng zawngte hian mumal taka chet dan an nei vek bawk a, hei hian fing leh thiam taka duangtu a awm ngei a ni tih a lantir a ni,” a ti. John Calvina pawhin “Mihring rilruah hian eng emaw ti taka Pathian hriatna a awm a ni,” a ti ve bawk.

Kohhran siamthat hun lai khan siamthatu (reformer)-te khan Natural Theology hi an duh lo hle a, ‘Bawhchhiatnain a fan chhuah hringfate hian Pathian nihna hi eng ti kawng mahin an chhui chhuak zo lo,’ an ti tawp mai. Natural Theology hian chutiang taka duh lohna leh hnawlna chu tawk mah se, Pathian thu zirna huangah hmun thuk tak a la luah ve ngar ngar a, pawimawhna chin pawh a nei ve reng a ni. Tum khat chu Nepoleon-a leh Pathian awm ring lotute an inhial a, Nepoleona chuan van lam kawk pahin “Khing arsi zozaite khi tu siam nge,?” tia a zawh chuan Pathian awm ring lotute chu an ngawi thap e, an tia lawm. Kan sawi tak angin Natural Theolgy hi a dik love tia hnawl ngawt theih loh, tuipui lutuk erawh chuan kawng dik lo zawh theih maina ni bawk si a nih avangin fimkhur taka kalpui erawh angai thung. Pathian nihna leh zepui hi mihring finna atanga chhuichhuah chi a ni lo reng a, thilsiam hmanga a inpuanna (General revelation) atang ngawta hriatfiah theih lah a ni hek lo. Pathian zia dik tak kan hriat theihna kawng awm chhun chu amah a inpuanna atang chauh hian a ni.

Uz khaw pa Joba chanchin tlanglawn hi chu sawi nawn vak ngai lovin kan hre bel hle tawh a, intifing leh hre thuk deuhten Joba dinhmun hi fiah taka sawi an tum fo thin. Joba tuarna leh dinhmun dik tak hi fa pakhat lek chante tan sawifiah mai theih a ni lovang a, a tuarnate sawifiah tur chuan fate zawng zawng chan, neih zawng zawng chan leh hnuah amah anga pan bawm khah nih ve phawt angai ngei ang. Joba hi Israel hnam pate hun laia awm nia ngaih hi a hahdam thlak hle, a ro sum leh paite chhutna pawh ran rual a ngah dan atanga teh a ni a, inthawina a hlan dan hi Mosia dan hnuaia mumal taka an thawi ang kha a ni chiah lo bawk. Tin, Joba pianthar leh thar loh thuah hian inhnialna a tam hle bawk a, thenkhatin sakhaw mi, mahni felna chhuangtu-a an ngaih laiin, thenkhat chuan Pathian tihtu a ni tih an sawi ve bawk. Ama ka ngei atanga a thlarau dinhmun kan hriat chu “Ka tlantu chu a nung tih ka hria,” tia a sawi atang hian Pathian ringtu nghet tak a ni tih a hriat theih. Engpawhnise, Joba hun lai khan piangthar tih awmzia hi an la varpawh phak lo hrim hrim a, a pawimawh zawk chu Pathian ringtu nihna kha a ni. Joba hian Setana thik khawpin lei leh van siamtu Pathian a tih/ring tih hi chu tuma phat rual a ni lovang; chu avanga hrehawm nasa tak tuar pawh a ni reng a. A natna tawrh kha a nep lo hle mai bawk, a thianten an va hmuh khan an lo ral hriat dan aiin a na zawk hle tih chu a hriat theih, a bulah ni thum chhung ngawi rengin an thu ringawt mai a nih kha. Chutianga hrehawm taka na a tuar reng hmuh chu a nupui tan pawh a hrehawm viau aniang, thi daih daih se a duh zawk hial a ni.

Natural Theology leh Joba nun inlaichinnaah lut dawn ta ila; Joba hun hmasa lamah khan eizawnna kawngah malsawmna tam tak a dawng a ni tih kan hria a, ran rual leh chhiahhlawhte pawh a ngahin in leh lo pawh tha tak a nei tih kan hmu bawk a. Tin fanau malsawmna pawh a dawng nasa hle, fa nei lo/ching chu anchhiaa ngaih a nih laiin, Joba chuan fanu leh fapa hmel tha tak tak a nei bawk. Chu chu lei lung dan anga thilthleng pangngai a ni a, leilung malsawmna hi chu Pathian awm ring lotute pawh hian an dawng nasa ve hle tho bawk. Joba malsawm dawnna chuan Pathian zepui leh nihna a hriatfiahtir miah lo, Pathian a ring ta lo tihna pawh a ni chuang lo. A chungah chhiatna a lo thleng leh ta, a tuarah vanpui a chim tak meuh va, a tuarna rapthlakzia kha mihring tawngin a sawi fiah zo kher lovang. Joba khan leilung malsawmna a dawn atanga Pathian zia a hre fiah zo lo ang bawk khan tuarna khur thuk ber atang pawhin Pathian nihna a la hre fiah zo chuang lo. Hei hian Natural Theology hian thlen theih/tawp chin a nei a ni tih a lantir a, leilung dana thil thleng atang ngawt hi chuan Pathian dinhmun leh nihna hi sawifiah theih a ni lo.

Pathian nihna hre fiah tur chuan eng nge pawimawh kan tih kha? ‘Amah ngei a inpuanna’ (Revealed) hi a ni kan tia ni lawm ni! Awle hei hi chatuana thu dik a ni a, a ni reng bawk ang. Thawngaleivir atangin Joba chu Pathianin an counseling ta a le, a var ta sawt sawt mai, a rilrua Pathian rorel dan chungchanga thu har, zawhna tam tak awm thinte chu hnara hlit phawi an sawi ang maiin a bo ta vek a, zawhna reng a nei tawh lo’ a ngawi dawh thut ta hle hle mai a ni. Chutah tuai aw lawi rutin, “Benga hriatna mai zawngin ka hre tawh chia, Mahse, tunah zawng ka hmu ta che; Chuvang tak chuan ka inten a, Vut leh vaivuta thuin ka sim ta e,” a ti chhuak thei hram a. Joba’n PATHIAN a hmuh fiahna atang hian thilmak tak thleng dang a awm nghala, amah a in hmu fiah tel tlat hi a ni. Petera’n Isua thiltihtheihna a hmuh ruala amah a in man nghal chatte pawh kha a ang viau mai. Chutah chuan a la tawp mai lo, Pathian a hmuhfiah hmaa a neih ang let hnih a nei leh vek a nih chu! Joba’n Pathian inpuanna a dawnna kawng hi chepin chhuk chho hle mah se, a tawpah chuan mi awhawm ber a nih leh ta tho a ni.

Keini kum zabi 21-na a mite hian Pathian inpuanna chu engtin nge kan dawn ve ang? Tih chu i rilruah zawhna a lo awm reng tawh mai thei. Pathian inpuanna chu tute emaw mi bikte dawn turah chauh i lo ngai thin em? Chu inpuanna chu engtin nge kan dawn ve tak ang le? Lalpa ka hnenah inpuang rawh tiin kan au vak mai dawn em ni? Ni lo ve, unau duh tak Pathian chu i hnenah a inpuang reng tawh a, inpuan zel pawh a la duh a ni. Johana chuan, “Mihring hriattirna mah kan pawm chuan Pathian hriattirna chu a ropui zawk si a; Pathian hriattirna chu hei hi a ni, “Ka Fapa chanchin ka hriattir tawh,” tih hi a ni si a.,” (1 Jh.5:9) a lo ti daih mai. Paula’n tihian a lo sawi bawk a, “Ka Chanchin Tha leh Krista thu hrilh angin, thuruk puanna ang hian, (chu thuruk chu chatuan ata a inthup thin a, tunah erawh chuan tihlan a ni a, rinna chu an lo awihna turin, chatuan Pathian thupek ang zelin, zawlneite Lehkha Thuin hnam tin hnenah hriattir a ni tawh,) nangni tinghet theitu,” (Rom 16:25-26) tiin. Pathian chu a Fapa hmangin kan hnenah a inpuang tawh a, hei baka inpuanna famkim hi a awm leh thei tawh ngai lovang. Thuthlung Hlui huna mite khan Isua chanchin hriat an chakin a thiltihtheihnate hmuh an duh em em a, kim lo leh chiang lo takin zawlneiten an lo hril thin. Keini erawh kan vannei hle, Pathian inpuanna leh chanchin fiah taka hretu kan ni a, hei aia malsawmna hi a awm thei chuang dawn em ni! Chu inpuanna famkim chu lo ring/awih la, Joba ang hian malsawmna leh hnih i dawng thei reng a ni tih hria ang che.

Aside | Posted on by | Leave a comment

Congress in candidate an puang, an puang zo lo

MLA GENERAL ELECTION—2018
Indian National Congress (INC) Candidates-te:
LH.Hauheng, Nghilhloh Run

  1. AIZAWL EAST I – K. Vanlalrawna
  2. AIZAWL EAST II – Lalsawta

  3. AIZAWL NORTH I- C. Lalhlimpuia

  4. Aizawl North-II- H. Liansailova

  5. AIZAWL NORTH III- Lal Thanzara

  6. AIZAWL WEST I- Pc. Laltlansanga

  7. AIZAWL WEST II- Dr. Malsawma

  8. AIZAWL WEST III – Dr. CT Tluanga

  9. AIZAWL SOUTH I- R. Vanlalvena

  10. AIZAWL SOUTH II- Col. ZS Zuala

  11. AIZAWL SOUTH III- KS Thanga

  12. ȚAWI- Rosiamngheta

  13. CHALFILH- NT. Hrangchal (IPS) Rtd

14.TUIVAWL- R.L. Pianmawia

MAMIT DISTRICT

  1. DAMPA – Lalrobiaka
  • MAMIT- John Rotluangliana

  • 3.Hachhek- Lalrindika Ralte

    KOLASIB DISTRICT

    1. SERLUI – Anggu Lalhmachhuana
  • KOLASIB- Dr. Ngurdingliana

  • 3.Tuirial- Joseph L. Ralte

    SERCHHIP DISTRICT

    1. TUIKUM- Sangzela Tlau
  • Serchhip- Lal Thanhawla

  • HRANGTURZO- Vanlalawmpuii Chawngthu

  • CHAMPHAI DIST

    1. EAST TUIPUI – T. Sangkunga
  • LENGTENG- H. Rohluna

  • TUICHANG- James Thanghmingmawia

  • CHAMPHAI SOUTH- Lal Thanhawla

  • CHAMPHAI NORTH- T.T Zothansanga

  • LUNGLEI DISTRICT

    1. LUNGLEI WEST – Chalrosanga
  • LUNGLEI SOUTH- Lalnunthara

  • LUNGLEI NORTH- PC Lalthanliana

  • SOUTH TUIPUI- John Siamkunga

  • THORANG- Zodintluanga

  • 6.LUNGLEI EAST- Joseph Lalhimpuia

    1. WEST TUIPUI
      ..an la puang thei rih lo..

    SAIHA DISTRICT

    1. SIAHA
      an la puang remchang rih lo..
  • PALAK
    An la puang remchang rih lo…

  • LAWNGTLAI DISTRICT

    1. LAWNGTLAI WEST- C. Ngunlianchunga
  • LAWNGTLAI EAST- H. Zothangliana

  • TUICHAWNG
    ..an la puang thei rih lo.

  • Congress party hian Chakma candidate an siam lova. Hlauh an nei a ni mai thei. Hetihlai hian Chakma zingah candidate siam lo se, BJP in siam si se la, Chakma an hnawk sawt thei bawk.

    Aside | Posted on by | Leave a comment

    Ram hmasawnna hi Leadership ni lovin Policies-a innghat a ni zawk !

    Mizote’n politik kan buaipui tirh phat ata entawn tura kan kiang hnaivaia politik khawvel insingsa mup mup chu ‘Hmachhawp’ aiin ‘Hruaitu’ hmanga hrual vek a ni kha a pawi hle a, tun thlengin kan ram tân phei chuan a la pawi zual zel ta a nih hi. Chik mang lo tân chuan khawvelah hruaitu ţha tam tak lo chhuak ţhin zârah anmahni ramin hma a sawn phah a nih zawk hi tih mai awl tak, buma kan la awm mekna lai ni si hi hmuh fiah har tak tur a ni reng a ni.

    Mahse, chhuan(tuan) leh mang ata tawh ram inrelbawlna kawnga hruaitu thlan kawnga mipuiin duhthlanna an siam tam zawk leh ramin a hlawhtlinpui zawka chu hruaitu ni lovin hruaitu hmachhawp a nih zawkzia hi a zira zir tham a nih avangin hmachhawp ai mahin a tihlawhtlingtuate zawk mihring hi kan chhuangin kan ngaisang zawk fo ţhin reng a ni. Mahse, heng hruaitu kan tih tam takte hi chu ‘Thiltihtheihna’ umtu mai an nihzia a takin kan hre leh si ţhin hian ngaihtuahna fim a umbo ţhin a ni.

    Mizoram kan thlir chuan Party lû ber thlekna lam apiangah party mi leh sa an thle dual dual a. Ram rorelnaah pawh CM hawina lam apiangah Legislation leh ram chu khalh kalin a awm ringawt mai a ni. An party mi leh sa tân chuan hruaitu ţha an ni ang, thlak theih loh ang maia dinhmun nghetah tun thlengin an ding miau a nih hi. Mahse, policy mumal kalpui ta lo chu êngah kan hnianghnar lo va, kawngpui inkalpawhna a ţha bawk hek lo. Loneitute ding chhuak an la awm meuh lo va, mahnia inchawm phei chu hlat tak kan la nih hi!

    Kan ram roreltute policy hriat ber ta zawka chu thuneihna chan chhûng tawi têah pawh sum leh paia mahni inhaivur hi an thupui ber a nih miau avangin an hnuaia roreltute pawhin an pute policy entawnin chu policy-a bawk chu Bureaucrats rualin entawn ve lehin mahni inhaivur hna an thawk suau suau ta a. Hnathawk tura an rawih contractor lah bang bik hek suh! Block leh Unit lama party mi leh sate pawhin chu policy bawka chu hlawhtlinpui an tum lian ber a ni ta a nih hi! Thuneihna kaltlangin sual an vulh lian a, dân an rap hrual ta ţhin a nih hi.

    America rama hruaitu ropui ber ni reng fo tur chu Abraham Lincoln-a kha a ni a. A naupan lai ata tawh a thil tum, ‘Sal Chhuah Zalen’ policy chu thuneihna a chan ve leh America rama mipui inţhen phawk pawh pawisa lovin tihhlawhtlin tumin thisen tam tak luangin a tawpah a champion-pui ta a, mi ropui bera chhiar a ni kumkhua ta mai a nih hi. Mahatma Gandhi pawhin India ram zalenna policy kalpuiin Lincoln-a nen an policy an hlawhtlinpui miau avangin an nunna hial an chân phah tak kha! Mi ram hruaitute hi chuan thil an ti mai mai ngai lo tih kan hmu tawh ţhin reng a ni.

    Tun hnai lehzualah Donald Trump-a chuan ‘Make America Great Again’ policy hmangin thuneihna a chuh a. Thuneihna a chan phat ata tun thlengin chu bak chu thil dang reng reng buaipui a neih loh avangin America chuan kum zabi chhûnga a huntawng ropui ber tih theih tur a tawng mek a nih hi. Bristis PM naupang leh duhawm Tony Blair-a chuan EU aţanga UK inhnuhdawh chu a policy a nih loh avangin inthlanpuiah hnehna chang mah se a bang hmiah a nih kha!

    Singapore kan sawi kan sawi lai hian an ram din chhuahna tura policy, kalphung mumal nena ram dang nena insumdawn tawnna kalpuitu Lee Kuan Yew-a chuan hmathlir mumal tak hlawhtlinpuii Deng Xioping-a vangin tlawhpawh loh China ram chuan a inhungna bang tichimin khawvela economy lian berah China a siam ta a nih hi. Heng zawng zawng bakah hian entirna tam tak tarlan tur a la tam hle a nih hi. Policy hmanga hruaitu ropui lo pian dan chu heti mai hi zuk ni a!

    Tichuan, hruaitu ţha kan tihte hi chuan tum mumal tak, hmachhawp fel tak leh kalphung nghet neiin chumi tihlawhtling tur chuan kawng dangah peng kual peng kual lovin an tum an seh chat reng a, tha an thlah ngai lo va, khua a dur emaw khua a ţhat emaw pawhin an dinna hmun an sawhsawn duh miau loh avang zawk chauhin an policy kaltlangin ‘Hruaitu Hlawhtling’ an lo ni ta mai a ni tih hi zir chhuah hi kan mamawh ber chu a lo ni ta a ni. Mahse, hei tak hi kan mutan laia chu a ni mek lawi si.

    Mahni policy bawhzui loh thlang zawk Pu Laldengate ang khan an policy thlauhthlain thuneihna chang ve bawk mah se, a tira a policy bak kha India chhûnga an lo luh hnuah policy nghet kalpui tur a duan miau loh avang leh tum mumal tak a neih tak miau loh avanga paihthlak a nihziate kha ţhangthar mi thiam zawkte chuan an la rawn zir chhuah tur a la ni dawn a ni. Engvangin nge PC party khan, ‘Five Basic Needs’ thupui ţha lutuk nei si khan a hlawhchham tlat?

    Thuneihna an chan phat aţang khan an policy ai chuan therhlo, hna leh ram inpêksiakah an inel chiam chiam a, an policy pui berte erawh rundalah chauh tak tak tihhlawhtlinpui tuma ram an kaihhruai tak vang khan an tluchhe ta a, an ding chhuak leh tawh meuh lo chu a nih tak hi! Engvangin nge Pu Lalthanhawla hi a fei êm êm bikna lai ni ta? Heti taka chhûngkaw buaina ngah ţhin leh tluchhe sawp nuai tawh a la dinchan tlat?

    Pu Vanneihthanga’n a interview aţang khan Pu Hawla hian a tir phat ata a thiltum bulpui ber, ‘NLUP’ lak aţang hian vawitekhatmah a la peng kawi chhin eih lo tih kan hmu a nih kha. Kum 1993 (?) aţanga a rawn CM leh phat aţang khan rambuai avanga retheihna ata min kaichhuah dan tur kawng dapin rangva sem aţangin bul a lo ţan a. Kum 20 chhûng zawng chu chiah chu a thupui ber a nih vang a ni. A policy hi a tlakpui chian tluk bawkin a thawhpui chiang a, amah ang mi hruaitu kan la nei ta lo reng a ni.

    Nimahsela, chuti taka hmathlir nghet nei mi chu ni mah se, a hmathlir bawhzuina kawnga hmasawnna rahbi mumal tak, kum 5 achinah leh kum 10 hnuah leh kum 20 a ral meuh chuan chu dinhmunah chuan kan ding ngei tur a ni tih chat chatna thinlung nghet a neih loh avang chauh zawkin leh a thupui ber paw chunga a kuta thil dang kaih a ngah luat avang leh a lungawina a hniam lulai êm avang chauhin tun dinhmun hi min thlenpui ţawk nangin ‘Politician Ropui Ber’ tih a la hlawh ta tho tho a nih hi!

    A nih leh Pu Lalduhawma hi engvangin nge mi tam zawkin an rin theih miah loh chhan?

    Congress chhûngkuaah India ram lalber duhsaknain a lut a. India ram lalber duh dan lo angin Zoram lama a unaute’n ram kaihhruai an tumna chu siam ţhat ai chuan tiin mi tam tak duh ber ni chungin Congress aţanga hnawhchhuah theih khawpin a tlawm ta a. MNF lam belin chaw thleng leihbua-a a inpêkna ropui tak leh remna leh muanna atâna thawh hlawk ber a nihna chuan mipui ngaihsan a hlawh chhohtir leh zel a.

    Chutah pawh chuan policy mumal tak a neih, inremna bak policy dang nei ta lo leh tenawm taka politik khel duh lo a nihna chuan party chhûngril siam ţhat ai chuan tiin party hrang hlak din chhoin inthlanpui hnuhnung berah phei chuan thawm lian tak neiin mahnia inthlan hmachhawn policy a nei a. Mahse, a dinna bial tur thlan chungchang tak ngialah pawh policy mumal a neih lohna chuan amah vaw chhiain tling ţhelhin a tlusawp ta nuai a nih hi. Mi nghet lo, tum bulbal nei mang lo hialah ngaih a ni ta.

    Chaw thleng leihbaw meuhin ka lo zuang chhuak a, khawngaih ka dil a ni ti mah se, politik a zuan luh achin inremna a lo pian hnuah ‘Hmathlir Mumal’ pakhatmah a neih miau loh avangin inthlan apiangin a dinhmun a sawhsawn zel a, tunah chuan Pu |henphunga policy kha a rawn aupui leh ta hnuhnawh a nih hi. Mi ţha tawpkhawk, mi thil chik peih leh thusawitu ropui, eirûkna kawnga inhnamhnawih lo tur meuh pawh policy mumal neia a tir ata ke a pen lohna rah chu a seng chho ta mawlh mawlh mai a nih hi.

    Mipui beidawnna tizual tur tingin Pu Zoramthanga lah chu atir phat ata mahnia ‘Hmathlir Mumal’ nei lovin politikah Pu Denga hnungzuitu mai a ni a. Thuneihna a han chan takah chuan sum leh pai pawh sawi chhuak hnem tak a nih vei nen tum mumal tak nei lovin duhthusamin a khat zo a. A taka hmalakna mumal duan ai chuan ţawngkam thiam tak leh Zopa takin mi tin lawmna siam tumin a hmanhlel a. Politik thli chhia lakah erawh a fihlim zo chuang lo va, a hausakna namên lovin a pung thur thur ta zawk a.

    Tunah ngaihdam dilin thupha a chawi zo chauh a, suangtuahna bawkin duhthu min sam khum leh chiam chiam tawh a. Kum 10 chhûng khan tum mumal tak neia step by step-a Zoram mipui hma lam panpui min tum dan sawi tur reng reng nei si lovin inthlan dawnah erawh entawn tura policy puitling kan neih awmchhun ni ta mai NLUP entawnin SEDP an duang chawpchilh ta mai mai a nih tak hi. Party pathum hruaitute zinga mi thatchhe ber hian tum mumal chiangkuang tak a neih miau avangin midangte aia hlawhtlingah ngaih a nih takzia hi chhinchhiah ang khai.

    Mak zawk êm êm mai chu hei hi a ni. Party lû ber kalphung hnialkalh a, a ţhat lohna lai leh a hlawhchhamna lai tarlang chunga ruahmanna tharlam, mumal, kalphung mumal tak neia ruangam nei duang chhuak a, party kalphung thlak danglam tura theihna nena ke pen chhuak pakhatmah an awm ngai lo lai hi a ni mak chungchuang chu! Chu taka chu ‘Party Invohbikna’ leh ‘Party Ruihchilhna’ lo piantirtu hi a ni ta a ni. Chu aia mak lehzual chu chutiang mi lo chhuak chuan do an hlawh ta tlat ţhin hi a ni leh zel!

    Kan ramin hma a sawnna tur hian tuna party awmsa hi an tawk êm êm a. Kalphung thar sawitu tam takin an sawi ţhelh leh hmuhhmaih, ‘Policy Base Party’ hi mi tam zawkin kan ngaihzawn a, kan ram damna awmchhun a nihzia kan sawi tam hunah chauh lo chuan kan ram hian hmasawnna tluantling a nei thei ngai dawn lo a nih tak hi. Party lû ber thuneihna nasa lutuk ţhiaha a awm hunah, party mi leh sa zinga a ngaihna hria leh hmasawnna duh tak tak mi, policy mumal tak zuar tawh zawk tura party mi leh sa hmin chunga enchhin tura hruaitu nih khel kan awm a ngai ta a nih hi.

    Chu chu America rama an kalphung niin chu kalphung chuan khawvela ram ropui berah a siamzia kan hmuh khu. Miin policy mumal tak a neih a, tling tawk leh ţha tawka a inngaih chuan President chuh turin party chhûngah a inzuar mai a. Chung mite zinga party mi leh sain an duh ber, a thil zawrh ţha bera an hriat chu an party aiawh turin an thlang chhuak ta mai a lo ni. Unit leh Block lam mi leh sa tihlawm lam a ni lo va, ram tâna policy ţha kha an thahrui chakna ber a ni zawk a lo ni.

    Party mi leh sate pawhin changkan an châk a, awmze neia politik khelhnaah ram damna a awm a ni tih an hriat a hun ta a nih hi. Pu Ţhena lo chu, Pu Hawla lo zawng, Pu Duha ngei le, Pu Zorama nge nge tia politik khelhna mawlmang lutuk hmanga thluak suk dawn pawha suksak theih rual loh khawpa politik khawvela dak pha tur khawp hian Zoram mipuite hi kan changkang ve tawh dawn nge ni ang a, tun anga hruaitu tihlawm tumna mai, policy mumal reng nei lo va ram sawp chhiat lehzual hi kan thlang zawk dawn?

    Author: Lalremliana pachuau

    Aside | Posted on by | Leave a comment

    CHAWNGBAWLA BATTALION

    CHAWNGBAWLA BATTALION C.Zama phek 96-106

    HMUHTHEIHLOH RAL
    M.N.F. Rammu sawrkar Cabinet thurawn angin Mizo Army battalion hrang hrang leh Police Commissioner a ko khawm a. Mizoram hmun hrang hranga opertion nei tura an hote thlang turin an hrilh a. ‘CH’ Bn. C.O. Joseph Kapkima’n Officer, N.C.O. leh Pte. 14 a thlangchhuak a. Heng thlan chhuah te hi pawl (group) khatah kal vek lovin pawl hran hranah an sem a, an hnathawhna tur bial pawh ruatsak vek an ni a. He operation hi a hmingah Hmuntheih loh Ral tih an vuah a.
    ‘CH’ Bn. atangin pawl thum a hrangin an kal a, chung pawl thum chu Capt. Sanghnuna ho, Lt. Lalthakima ho leh Lt. Rokunga ho an ni a, a dang chu pawl dang zingah an inzep a ni. Ni 30-6-1970 niin Jordan camp atangin an chhuak a.

    Lt. ROKUNGA HO
    Lt. Rokunga ho hian mi 4 amah nen 5 an chhuak a, an hnathawhna bial tur chu Lunglei leh Aizawl inkar motor kalna tlangdung Chhingchhip leh Serchhip inkar a ni. An hming lo tarlang ila:
    (1) Lt. Rokunga Commander
    (2) Sgt. Ramfangzauva Phullen khua, hemi lehkhabu ziak laia Zotlang Aizawl
    (3) Sgt. H.Rodinga Vanbawng khua, hemi lehkhabu ziak laia Zohnuai Aizawl
    4) Pte. Khawtinthanga Chhingchhip khua hemi lehkhabu ziak laia Republic-a awm leh
    (5) Pte. Sangmawia Chhingchhip khua te an ni.

    Ni 30-6-1970-ah E.Pakistan atanga chhuak chho an ni a, anmahni group chauha chhuak lovin Lt. Col. Zamana ho rualin an chhuak a, Phulpui khaw ram atanga inthenin an hnathawhna tur lam Chhingchhip an pan a. Chhingchhip ram an thlen chuan khua pan lovin thlawhlai an pan a. Thlama zan hnih an riah hnuah vauah buk an sa a, bukah chuan an insawn a, buk atang chuan an hnathawh dan tur leh an hnathawhna hmun turte an sawi khawm thin a.

    Ralmuangin hre mahse an buk chhak deuhah ralven buk an siam a, zing khawvar atanga tlai thim thleng ral an inven chhawk thin a. Zing thawh veleh an thawmhnaw rawksaiah beng lut lovin tukthuan ei kham hnuah an beng chauh thin a. Ni 25-7-1970 tuk pawh chuan khawvar ve leh Ramfangzauva ralvengin a kal nghal a. Buka awmte chuan an bomb kam tur an siam mawlh mawlh a. An inthlahdah deuh avangin H.Rodinga phei chuan kekawr ha lovin towel a veng a, pheikhaw pawh a bun lova.

    Vai sipaiin an buk chu an hre ru a niang chu, an buk chhaka ralveng awmna chu an hel a, zing dar 6:30 a pel vel ang tihin ralmuang taka an awm lai chu hnai setsawtah an kap ta thut mai a. Pte. Sangmawia chu a awm bawrah an kapfuh a, buk chhuatah chuan a let nghal tawp a, mi dang zawng chuan an silai pawh chuh hman lovin buk atang chuan an zuang chhuak a, vai sipaite in nasa taka an kap zui chungin tumah an kap fuh lova.

    Engemaw a thlen thut pawha innghahkhawmna tura an ruat an buk atanga chhak lam metres 300 vela hla Changel buk chu an pan a. Ralvenga awm Sgt. Ramfangzauva’n an buka silai ri ta mai leh vai sipai charge tia au ri a han hriat chuan, thil thalo tak a thleng tih a hre mai a. Vai sipai ho chetdan en thlithlai turin buk lam chu a pan a. Buk chhung leh a vela vai sipai awm sup sup chu a hmu a, a kir thuai a, inhmuhkhawmna hmuna an ruat chu a pan nghal a, a thlen chuan a thian te pathum an lo awm tawh a. Buhfai fang khatmah an nei lova, thawmhnaw hakthlak an nei lova. H.Rodinga phei chuan kekawrte chauh a ha a, pheikhawk pawh a bun lova. Silai pakhat ralvengin a ken lai chauh leh a mu tlemte an nei a, chuti chung chuan an pau tikhauhin E.Pakistan an pan ta a, chaw chhuan engemaw zat ngheiin E.Pakistan an thleng thla leh ta a ni.

    Vai sipaite chuan Pte. Sangmawia buk chhuata tlu reng chu an tung tho a, thu an han zawt a, a awm bawra kah a nih avangin a chhang tha thei lova, a tawng zawnga a hliam hmuamhma atangin thi a rawn chhuah zawih zawih zel avangin vai sipaite pawhin thu an zawt ta vak lova. Chhingchhip pa thenkhat leh tlangval hovin Sangmawia chu an zawn haw a, vai sipai camp-ah an dah a. Chhingchhip atang chuan helicopter-in Aizawl an pan pui a, Chhingchhip leh Aizawl inkara an thlawh laiin Chatuan ram a pan ta a ni.

    Lt. C.VANLALRAWNA HO
    Lt. C.Vanlalrawna leh mi 4 Lion Brigade File leh silai, kum 1968 chawhnu lama E.Pakistan-a an chhuk thlak dawna Mawmrang tlang puka an dah that la turin Lion Brigade commander-in a tir a. Hmuhtheihloh Ral operation-a kal thenkhatte chhuah rualin Zoramah an chhuak ve a, an hming lo tarlang ila: (1) Lt. C.Vanlalrawna Muallungthu khua Commander (2) Pte. Thlumruma Hmawngkawn ‘CH’ Bn. (3) Pte. Lalhmingthanga (4) Pte. Zoramnuara (Vala) Sumsuih khua ‘V’ Bn. leh (5) Pte. Lalthuammawia te an ni.

    Lt. C.Vanlalrawna’n a nau hruai te chu an khua Muallungthu a tlawhpui a, Muallungthu rama awm Lt. Col. Zamana hote nen an inhmu a. Ni 13-8-1970 zan chuan Muallungthu ram Theihai luikama an buk hluiah an riak a. He an riahna buk hi Lt. Col. Zamana ho Phulpui ram atanga an luh tirha an sak a ni a. Lt. Col. Zamna ho zinga mi Capt. Chalrikhuma ho leh Capt. Thangrehlova ho te nena an inthenna camp a ni a. An inthendarh dawn hian Lt. Col. Zamana’n, “Tunah hian kan inthendarh tawh dawn a, vanduaina tawka vai sipaiin min man chuan nasa taka nghaisak tur kan ni tih a hriatsa mai a. Camp awmna min zawha kan sawi duh loh vanga kut kan tawrh nasat lutuk loh nan tuna kan awmna camp hi hrilh mai ila a tha ang. Tun atang chuan he camp-ah hian tumah i riak tawh lo ang u,” tiin a sawi nghe nghe a ni. Engemaw mawlhtu a awm a niang chu, ni 13-8-1970 zan hian Lt. Col. Zamana’n he camp-a riah hi a rawt mauh mai a, an riak ta a ni.

    Capt. Thangrehlova pawla mi 2/Lt. Biakmawia Electric Veng Aizawl chu ni 10-8-1970 niin Vaivakawnah vai sipaiin an man a, nasa takin an dawp a, an awmna camp hrilh turin an ti a. ‘Kan inthendarh dawn khan Pu Zamana’n vai sipaiin camp awmna min zawh luih tlat chuan Muallungthu rama kan camp hi in hrilh mai dawn nia, a tih kha maw; tumah an riak chuang lovang’ tiin a ngaihtuah a. (Biakmawia hi Jail atanga ka tan chhuah hnu kum 1978 khan Aizawlah an inah ka kawm) An chhuahsan camp chu a hrilh ta a. A mantute chu an phur hle a, ni 13-8-1970 zanah vai sipaite chuan Biakmawia chu motor-in Muallungthuah an phur phei a, motor chu Muallungthuah an dah (park) a, a zan zanin kein camp panin an kal ta a.

    Khawvar hma deuhin camp awmna bul hnai an thleng a, camp hi luikama awm a ni a, hual a remchan loh avangin camp atanga an tlan darh an kalna tura an rin lai lui dung leh kal khan deuhah an chang a, camp luhchilh tur an insiam bawk a.
    Khua a var fel hma deuhin Capt. Lianhmingthanga Thingsulthliah khua thin Aizawl Electric venga awm, Lt. C.Vanlalrawna leh Pte. Thlumruma an tho tawh a, Thlumruma chu daikalna tura an siam thingtuluang chungah a inthiar mek a. Vai sipai camp luhchhuah tum te chuan an kap ta thut mai a. Thlumruma chu a hnung lam atangin a mawngkaw chung deuhah an kap fuh a, a serh bawr an kap fuh bawk a. A kekawr pawh ha tha hman lovin buk lamah a tlan phei a, buk bul luiah tlan thlain lui mawng lamah a tlan thla zel a. Mi dang pawh rawn thovin lui mawng lamah an tlan thla a. Lui mawng lama vai sipaiin an lo tan khalh avangin a kal hmasa ber Capt. Lianhmingthanga chu an kaphlum a, a hnunga kal Sgt. Laihmingthanga pawh an kap hliam a, an man a, in surrender turin an thlem a, a in surrender chuan an thah loh tur thu an hrilh a. In surrender aia thih a thlan zawk a vangin an kaphlum ta a ni.

    THLUMA LUNGNGAI RENG RENG SUH AW!
    Thlumruma hliam chu Medical Incharge Sgt. Ngurthanga Keifang (Saitual bul) leh L/Cpl. Rosanga Seling khuain an bawihsawm a, A thi lah chu a put reng mai si a. An pahnih chuan an inpuak chhawk a. Lui hnar lama thui vak lo an kir hnuah vaukam an perkai a. Luikam awih hnim karah an kal pui a. Vai sipai hual chhung a la nih vangin a paw lotu zawkin silai kausain hma an hruai a. Awih panga an kal lai chuan hmun rem deuh zimte Zihnghal dinna bul an thleng a. An hah deuh avangin Zihnghal bulah chuan an chawl a.

    Zihnghal bulah chuan bahra laihna khur hlui tak a awm a. Bahra khurah chuan Thlumruma chu an zalh a, an puan neihchhunin an khuk a. Vai sipai hual chhung a la nih vangin awm rengna chi a ni lova. Thluma hnenah chuan, “Ti hian lo mu la, khuaa mi damdawi kan han lam ang e,” an ti a. Thluma chuan, “Min ngaihtuah reng reng suh u, a na lo a nia. Vai sipai kah a na tak tak ngai lo. Ka tui a hal em a, in rawn kir leh hunah chuan khawngaihtakin tui min rawn lak ang che u aw,” tiin fel takin a bia a.

    “Bahra khur bula Zihnghal kung chu thu titihin ka ngheng a, Thluma chu ka han thlir thin a, a hliam a nat em avangin a tuarchhuak zo dawn lo tih a lang chiang si a, ka khawngaih lutuk chu ka mittui a rawn luang a, Thluma’n a hmu ang tih ka hlau si a, lehlam ka hawi a. ‘Thluma, lungngai reng reng suh aw, Mizo tlangval i nih kha’ ka ti a. U Ngura nena kan kalsan dawn chuan ka han hawi kir a, Thluma chuan mu chungin a ban a rawn vai lap lap a, ban ka han vai ve a. Ka hawi kir thuai a, mittui tla chungin kan kalsan ta a ni,” L/Cpl. Rosanga’n a ti.

    Mizo tlangval huaisen leh tuarchel Thlumruma chuan chu lai ram reh takah chuan tumah bawihsawmtu leh thlamuantu pawh nei lovin, thang leh thar la rawn awm zel tur te nun khawnuama an nun ve theihna turin a nunna chu Zoram tan a lo hlan ta a ni.

    Capt. SANGHNUNA HO
    Capt. Sanghnuna ho hi an vaiin Sanghnuna nen panga an ni a, an vaiin ‘CH’ Bn. an ni. Capt. Sanghnuna 2I/C chu Lt. Laldawngliana N.Khawdungsei khua a ni a, an pawlte dang chu Cpl. Kapruma Hmawngkawn khua, Cpl. Tlanglawma Sesawng khua, Cpl. Tlangmawia Vanbawng khua te an ni. An hnathawhna tur bial chu Thenzawl leh Aizawl inkar motor kawng tlangdung a ni.

    E.Pakistan atangin Lt. Col. Zamana ho rualin Zoramah an chhuak a, Zopui atangin an kal hrang a, Samlukhai ram an pan a, Samlukhai ram an kai hnuah khuaah lut lovin Thiak ramah an kai a, Thiak ram atang chuan Maubuang ramah kaiin Maubuang chulah an awm a. An chawlhhahdam hnuin Sumsuih khaw ramah an insawn a. Sumsuih rama an awm laiin Cpl. Kapruma leh Cpl.Tlangmawia chu civil thuam inbelin Aizawlah an phei a. Aizawl leh Seling inkar Tuirial lui leilawn chu bomb-a tihchhiat theih a nih leh nih loh an enthla ru a. Vai sipaiin an ven uluk em avangin bomb-a han tihchhiat chi niin an hre lova, an kir leh ta a. An kir leh hnu chuan Sumsuih chhuah lam Thingsei ram pukah an insawn a.

    Puk sir tawn tawn hi kham a ni a, puk thlang lam atanga luh a ngai a, a luhna tur hian mau leilawn ft. sawm aia sei an siam a, leilawn chu an dawh a, an lut thin a ni. Puka an luh hnu chuan leilawn chu pukah an khai chho a, puk atanga an chhuah duh hunah leilawn chu an dawh a, an chhuak mai thin a ni. Puk thlang lamah chuan thing a ding a, puk kotlang atanga han zuan deuh chuan thing zar chu zuan phak a ni a, thing kung atanga puka zuang lut tur erawh chuan thla nei lo tan chuan tih chi a ni lo.

    Ni 9-9-1970 zan chuan dar 10:00 thleng dawn lai an titi a. A tuk khawvar chu tuk dang ang tho turah an ngai a, mahse tuk dang ang a ni ta hauh lo mai. Ni 9-9-1970 zan chuan Sateeka vai sipai awm te chu motor-in Sumsuihah an kal a, motor chu khuaah an dah a. Mizo sipai puka awm te chu thah chimih vek tumin zan rehah mut hlanin puk an pan a, an thlen hma deuhin an chawl a, puk chu an hual a. Ni 10-9-’70 zing dar 6:30 velah puk sir tawn tawn atangin puk chu an kap ta a, silai chu a puak ta tuk tuk mai a.

    Minute 20 vel an kah hnu chuan vai sipai tanna lai en tuma puk kotlang atanga dak chhuak Capt. Sanghnuna chu a bekah tak an kap fuh a, puk chhungah a let lut tawp a, biak tur awm lovin chatuan ram a pan nghal a. Puka mite chuan a khat tawkin an kap let zauh zauh a. Vai sipaite chuan an zuam tulh tulh a, darkar khat vel an inkah hnu chuan vai sipaiin G.F. Rifle (G.F.Rifle hi granade kahchhuahna a ni) in granade an kap a, granade chu puk kotlang bula awm Cpl. Tlanglawma bulah a tla a, a puak nghal a. Tlanglawma ngum bur velah a per a, a let tawp tawp a, mual a liam chu a ni leh ta mai a. Mi dang chuan a khat tawkin an la kap let zauh zauh a.

    Puka an tan reng chuan an dinhmun a chhe tulh tulh dawn tih an hria a, engtia tih tur nge tih a la dam te chuan an sawi ho a. Puk thlang lama thing ding chu zuan thlak paha man a, rang taka chhuk chu an tih tur awmchhun a ni tih an hria a. Puk thlang lamah vai sipaiin an lo chang ang em? An chan chuan thih a ni mai, an chan loha him taka an zuangthla thei a nih chuan an vannei a ni mai. Chutia an awmdan tur an sawi ho lai chuan vai sipai ho thawm chu a tha tulh tulh a, au zam tumin an aw rawl nen an bei a.

    Silaimu an neih tawh loh avangin an silai chu hnawksak mai a ni dawn a, chu bakah zuanthlaknaa han ken chu tih chi niin an hre lova; silai bolt leh a magazine (a mu dahna) chu an thlawn a, lui mawng lamah an paih a, rawksai an ak a. An thian pahnih ruang chu a bawkkhupin an mut tir a, puanin an khuh a, zah takin chibai an buk a. Chutih lai chuan vai ho silaimu thenkhat puk chhungah a rawn lut a, puka lungah a in la pial zel a, a ving fur fur mai a. A chhe ber tawh huam leh a tha zawk beisei chungin silaimu karah puk atang chuan an zuangthla ta a. Puk thlang lama ding thing zar chu an man a, a zarah chuan banin a kung chu an pumzut thla a, na lutuk lovin lei an thleng thei a. Vanneihthlak takin lui mawng lamah an lo chang lo hlauh a. Thlang deuhah an chawl a, an chawlh hahdam hnu chuan Baktawng ram panin an kal ta a. Baktawng ram an thlen chuan an kal zel a, Baktawng khua tlawh lovin Aizawl leh Lunglei inkar kawngpui an kan a, Hualtu ramah chhoin Hualtu khaw hluiah an lut a.

    Hualtu khaw hlui atang chuan Tawitlangah an chho a, kum 1968 tawp lama E.Pakistan-a an chhuk thlak dawna an ken sen loh silai leh silaimu an thuhrukna pukah an kal a, silaite chu uluk taka greese tah a nih avangin a lo la tuiek lova. Carbine, Sten gun leh Tomy gun an la a, a mu an ah zawh tawk an ak bawk a, an hnu lamah kirin Tuikum lui an pan a. Tuikum lui dai kaiin Chhingchhip ramah an kai a, thlawhlai vauah an riak a.

    A tukah chuan thlawhlai chu an han thlir vel a, mi tumah an hmu lova; Cpl. Kapruma’n biak tur an awm takin tih thuah thlawhlai chu a pan a, vau a thlen chuan thlawhlai chu ngun takin a thlek a, vai sipai awm a hmuh loh avangin thlam hnai ber chu a pan a. Vai sipai buh karah an lo biru reng chu niin thlam a thleng dawn tep tihin an kap ta a, a vir zawk a, buh karah a bawk nghal a, a kerekah an kap fuh reng mai a lo ni a. Vai sipaite chuan an charger nghal a, tan a lak ve hmain an nangchinga an man chu a ni ta reng mai a. An man ni hi ni 18-9-1970 chawhnuher a ni.

    Chhingchipah an hruai phei a, Chhingchhip atangin helicopter-in Aizawlah an phur thla ta a ni. Kapruma an man hnu chuan Lt. Laldawngliana leh Cpl. Tlangmawia’n E.Pakistan an pan a, chaw chhuan sawm an nghei hnuah ni 17-10-1970-ah E.Pakistan an thleng thla leh ta a ni.

    Vid.. Capt Sanghnuna ho tanhmun khawhna Sumsuih chhuah lam Thingsei ram puk Pu Zama ho a tlawh.
    Thla latu .. Dolittle Ralte Bengchheng .. Ka thleng ve zolo… 😀 Motor a pawh theih dan zawn chi. Ram Hmangaih thawnthu a puk pawimawh tak.

    Author: Mamuana mizo

    Video link👇
    https://m.facebook.com/groups/256727861563194?view=permalink&id=353281388574507

    Aside | Posted on by | Leave a comment

    Ballon d ”Or 2018 dawng thei list an puang

    Sports Inpui

    Ballon d ”Or 2018 dawng tur zingah hian khawi player hian nge phu zawk i tih le,

    Heng mi 30 te hi khawvel footballer tha thlan chhuah an ni a, tha vek mahse an in ang vek lo a, an thiamna zawn ah chuan an ropui hlawm hle.

    Player tha tak vek nimahse mipakhat chauh in he (award) hi an dawng dawn a, FIFA in phu ber a an ngaih chu tunge ni ang tih hriat a chakawm hle.

    Ballon d ‘Or 2018 dawng thei tur mi 30 te.
    1. Kylian Mbappe
    2. Luka Modric
    3. Cristiano Ronaldo
    4. Lionel Messi
    5. Antoine Griezmann
    6. Mohamed Salah
    7. Neymar
    8. Eden Hazard
    9. Kevin De Bruyne
    10. N’Golo Kante
    11. Raphael Varane
    12. Harry Kane
    13. Sergio Ramos
    14. Luis Suarez
    15. Ivan Rakitic
    16. Sergio Aguero
    17. Marcelo
    18. Paul Pogba
    19. Thibaut Courtois
    20. Sadio Mane
    21. Diego Godin
    22. Isco
    23. Edinson Cavani
    24. Alisson
    25. Mario Mandzukic
    26. Hugo Lloris
    27. Roberto Firmino
    28. Gareth Bale
    29. Karim Benzema
    30. Jan Oblak

    Aside | Posted on by | Leave a comment

    ZPM in candidate tur an puang.

    KUM 2018 MIZORAM INTHLANPUI LO AWM TUR ATAN A TANGRUAL PAWL(ZPM) CANDIDATE TUR TE

    Kumin 2018 a Mizoram Inthlanpui lo awm tur atana Tangrual Pawl (ZPM) ten a Bial hrang hrang a An Candidate tur te chu heng te hi an ni.

    A/C No – Name of Constituency -Candidate

    1-Hachhek = C.Lianzuala
    2-Dampa = F.Lalrintluangi
    3- Mamit = C.Zothansanga
    4- Tuirial = Andrew H.Thangliana
    5-Kolasib = Lalfamkima
    6-Serlui = Lalmuanpuia Punte
    7-Tuivawl = K.Romawia
    8-Chalfilh = F.Rualhleia
    9-Tawi = R.Lalthatluanga
    10-Aizawl North I – Vanlalhlana
    11-Aizawl North II – Dr.Vanlalthlana
    12-Aizawl North III- C.Lalhmingthanga
    13-Aizawl East I – K.Sapdanga
    14-Aizawl East II- B.Lalchhanzova
    15-Aizawl West I – Lalduhoma
    16-Aizawl West II – Lalhmangaiha Sailo
    17-Aizawl West III – VL Zaithanzama
    18-Aizawl South I – C.Lalsawivunga
    19-Aizawl South II- Lalchhuanthanga
    20-Aizawl South III – RD Lalrammawia
    21-Lengteng – Er. H.Ginzalal
    22-Tuichang – W.Chhuanawma
    23-Champhai North – Dr.Laldinthara
    24-Champhai South – C.Lalremliana
    25-East Tuipui – C.Laltanpuia
    26-Serchhip – Lalduhoma
    27-Tuikum – P.C Vanlalruata
    28-Hrangturzo – Lalthansanga (Chatea)
    29-South Tuipui – Phairothanga
    30-Lunglei North – Malsawmtluanga
    31-Lunglei East – Lalrinpuii
    32-Lunglei West – Lalnuntluanga Sailo
    33-Lunglei South – Rev.Dr. K.Thanzauva
    34-Thorang – Lalrinzuala (Pamama)
    35-West Tuipui –
    36-Tuichawng –
    37-Lawngtlai West –
    38- Lawngtlai East –
    39-Siaha –
    40-Palak –

    Author- SL Chhunga

    Aside | Posted on by | Leave a comment

    CHAKMA HUAT KAWNGZAWH HI

    Ti hian ka lo ngaihtuah ve a. CHAKMA / TAKAM ho hi hmanlai atang tawha tuna kan Mizoram chhunga lo awm ve tawh, MIZORAM CHAKMA tia koh tur engemaw zat chu an awm ve tawh turah ngai ila. Chungte chu keini ZOHNAHTHLAK (Mizo) ni ve lo mahse Mizoram khua leh tui ( Domicile of Mizoram) niin Indian Citizen an nih ve thlap tawh avangin kan pawm ve mai a ngai niin a lang. Chung ho inthlah chhawng zel, Mizoram Chakma te pawh an pung chho ve hret hret turah kan ngai lo thei lova.

    Vawiin nia kan buaipui leh hluai thin zawk hi chu diklo tak a, illegal means a Bangladesh atanga rawn lut ru, Illegal Immigrants kan tih te hi anni ber niin a lang a. Chutah pawh…. NGO angin a mawi tawkin, boruak siam tawk velin kan han buaipui/ haw thar leh hluai zel a ( Chakma hovin issue an rawn neih changin…. emaw NGO hruaitute mood fuh deuh changin). Mahse thil pawi ta em em zawk erawh chu a State sawrkar ang chuan kan Congress leh MNF party te hi chuan tih tak meuhva he Chakma issue hi chinfel tum a hnekin a tu sawrkar pawhin kan inbiak tlawn siak chho char char hrih si avanga tun dinhmun a Chakma ho pawr ta lutuk, keini ho tan pawha zamawm leh si hi ni ta berin a lang. Kan chawm lian a hnawk kan ti leh si hi ani.

    Chutia kan ram zim te ah Chakma ho an lo pun tak hluai hluai siah chuan leh a hming a kan ram chhung a Minority Tribes an nih ve tlat si avangin an tuarchhelin, an tum a ruh nasa zawk mai sia. Minority an nih miau avangin an tangrual lo thei bawk silo. Kan hlawhfa / labour class tura Pathianin min pek te kha tunah chuan nakin lawkah min chimral mai ang emaw an hnuai ah kan la kun mai dawn nia kan hmuh leh si avangin HATE CHAKMA MARCH te kan nei leh hnuhnawh a. Lehlam taka ngaihtuah chuan a va tlawm thlak tak em….

    Tun ah chuan kan State sawrkar hi tu party pawhin lo chalai se…. MIZORAM CHAKMA leh ILLEGAL IMMIGRANT CHAKMA hriat chian vat hi an hna hmasa ber tur chu a va ni em. Kan chet vat chuan kan la dah tight hman ang. Vawiin ni, State sawrkar pawhin eng
    a tih theih tawh loh ( General Election dawn boruak avangin….) bawr vel a CYMA kawng zawh ang ringawt nilovin…. All Party – All NGO combined in kum thar ah Chakma area ah kawng zawhin kan va tal hiar vel ang chu maw le ( Rule of Law phal chinah ngat….)

    A thu hrimah kan Mizo Kristian politician te pawh hian anmahni mimal leh party ham thatna tur hisapin MIZO HNAM pawi khawih zawngin hma la mawlh tawh suh se. Lak leh vaih chuan pawi zawk ang. ZIMTAWT group an tha chho tawh dawn teh mai ania….. Sim hming pu tlakin ram leh hnam hruai hna an thawk thiam ve ngei tur ani.

    Hriata Chhangte

    Aside | Posted on by | Leave a comment