​ZIN MITE TAN A PAWIMAWH KHAW KAR KAWNG HLAT ZAWNG THENKHAT TE​

• Aizawl atanga khaw dang hlat zawng.

👉🏻Aizawl to Vaitin
1.Tuirial(R) 27km
2.Zero Point 41km
3.Sesawng 45km
4.Mualmam 55km
5.Tuirini(R) 66km
6.Khawruhlian 87km
7.Khanpui 90km
8.Pehlawn 100km
9.E.Phaileng 103km
10.Kepran 109km
11.Sawleng 116km
12.Darlawn 123km
13.Sailutar 133km
14.Ratu 140km
15.Lungsum 153km
16.Vervek 158km
17.Sakawrdai 168km
18.Vaitin 170km

👉🏻Aizawl to N.E.Khawdungsei
1.Kawlkulh 122km
2.Hliappui 135km
3.N.E.Bualpui 140km
4.Pawlrang 149km
5.Tuiphal(R) 163km
6.Tuithil(R) 165KM
7.Ngopa 179KM
8.N.E.Khawdungsei 194Km

👉🏻Aizawl to Marpara
1.W.Phaileng 85km
2.Chhippui 116km
3.Lalen 120km
4.Hnahthialzawl 126km
5.Saithah 129km
6.Phuldungsei 147km
7.Phulpui 159km
8.Pukzing Vengthar 175km
9.Hruiduk 182km
10.Marpara 188km

👉🏻Aizawl to Saipum
1.Serkhan 33km
2.Nisapui 40km
3.Lungmuat 48km
4.N.Chaltlang 58km
5.Bukpui 70km
6.Thingthelh 96km
7.N.Hlimen 105km
8.Saipum 133km

👉🏻Aizawl to Khuangthing (Via Champhai)
1.Seling 45km
2.Turini(R) 56Km
3.Keifang 75km
4.Tuivawl(R) 97km
5.Dulte 110km
6.Kawlkulh 122km
7.Tuichang 140km
8.Khawzawl 152km
9.Tuipui(R) 166Km
10.Champhai 194km
11.Mualkawi 205km
12.Kelkang 214km
13.Dilkawn 217km
14.Khuangleng 234km
15.Leithum 249km
16.Dungtlang 258km
17.Khawbung 265km
18.Zawlsei 269km
19.Khuangthing 280km

👉🏻Aizawl to Phullen
1.Keifang 75km
2.Dilkhan 85km
3.PWD Quary 97km
4.Tuivawl(R) 101KM
5.Chhirden 107KM
6.Thanglailung 116KM
7.Phullen 125KM

👉🏻Aizawl to N.khawlek
1.E.Phaileng 103km
2.Tuivawl(R) 122KM
3.Suangpuilawn 149km
4.Lamherh 156km
5.Vanbawng 162km
6.N.Khawlek 172km

👉🏻Aizawl to E.Lungdar
1.Khawzawl 152km
2.Chawngtlai 162km
3.Chalrangpeng 182km
4.Khawhai 184km
5.Sialhawk 201km
6.Biate 211km
7.E.Lungdar 225km

👉🏻Aizawl to Sailulak(Via Keitum
1.Serchhip 112km
2.Keitum 125km
3.Tuichang(R) 134km
4.Khawlailung 141km
5.Chekawn 145km
6.Mualcheng 153km
7.E.Lungdar 166km
8.Leng 176km
9.Sailulak 184km

👉🏻Aizawl to Thingsai (Via keilui)
1.Keitum 125km
2.Khawlailung 141km
3.Chekawn 145km
4.Lungchhuanpeng163km
5.N.Vanlaiphai 175km
6.Lungkawlh 182km
7.Cherhlun 195km
8.Thingsai 206km

👉🏻Aizawl to Tlabung
1.Lunglei 235km
2.Haulawng 255km
3.Pachang 265km
4.Phairuang 275km
5.Rotlang 285km
6.Lungsen 293km
7.Tuichawng 312km
8.Tlabung 332km

👉🏻Aizawl – Chawngte
1.Lunglei 235km
2.Rotlang 285km
3.Rangte 295km
4.Lalnutui 301km
5.S.Lungrang 315km
6.Chawngte 335km

👉🏻Aizawl to Sangau (via Hnahthial)
1.Hnahthial 172km
2.Tuipui peng 179km
3.Tuipui 185km
4.Darzo 206km
5.S.Vanlaiphai 222km
6.Sangau 229km

👉🏻Aizawl to Sangau (Via Saiha)
1.Saiha 368km
2.Tlangpui 388km
3.Lungzarhtum 393km
4.BualpuiNG 398km
5.Lungpher 408km
6.Rawlbuk 433km
7.Cheural 443km
8.Sangau 458km
****************************

Advertisements
Aside | Posted on by | Tagged , | Leave a comment

INDIA IN CHINA A KHAN LO HLE by Czars Khiangte

Tunhnaia India leh China te inkara buaina chu a la zual zel a, Indian Ocean ah pawh China Indo lawngte an tam sawt hle ni a sawi a ni. July 5, 2017 khan Indian Navy official pakhat chuan Indian Navy te hian PLA-Navy indo lawng 12 lai bakah submarine leh indo lawng tenau engemaw zat an hmuh thu a sawi.

IndiaSpend analysis chhut danin China People’s Liberation Army Navy (PLA-N) hian tunah hian indo lawng 283 an nei a, hei hi Indian Navy te lawng neih 66 letli zet a ni. PLA-N hian destroyer ringawt pawh 26 a nei a, India hian 11 chauh a la nei hmang thung. Destroyers te hi an tangkai hle, radar chak tak an neih avangin hmelma sipai te chetdan khawmual leh tuipuiah an hre zung zung thei a, missile defence tha taka thuam an ni bawk, Tuipuiah hla tak tak an kal thei a, surface and antisubmarine warfare an nei tha hle bawk.

Tunhnaiah China in Ton 12,000 a rit Type 55 destroyer a nei thar a, he destroyer hi a hlawl hle. India in destroyer a neih thar mai tur ai pawh hian a hlauhawm zawk dawn niin chanchinbu mite chuan an sawi. China siam Type-55 destroyer missile chi hrang hrang 120 lai a keng tel a, India destroyer neih that ber, commission leh mai tawh tur, Project 15-B ‘Vishakapatnam’ hian missile 50 a keng thei chauh a ni. PLA-N hian frigates 52 neiin India neih(14) letli dawn a ni.

India hian Corvettes leh missile boats 25 vel chauh a nei bawk, China in Corvettes lawng missille phur lawng 106 lai a nei bawk nia sawi a ni. Tunah hian India leh China te hian aircraft carrier pakhat ve ve an nei a, Aircraft carrier a neih hmasa ber Liaoning dawttu ni turin April, 2017 khan China hian aircraft carrier a nei thar leh bawk. Hei phei hi chu China kutchhuak liau liau a ni tawh. Nimahsela, he aircraft carrier hi 2020 ah chauh hman theih a ni ang.

India in a ma kutkawih liau liau va a siam, INS Vikrant aircraft carrier hi 2009 atanga siam tan tawh a ni a, hmasawnna a thuanawp hle, 2023 aia hmain peihfel hman an in ringlo. India hian tun hma zawng kha chuan China Navy(PLA-N) hian engmah sawi tham indo lawng a la neih loh avangin, Naval advantage a lo nei thin a, tunah erawh thil a danglam zo ta a ni ber.

Soviet hunlai a siam Liaoning hi Ukraine sawrkar atanga China 2012 khan a lei lehchhawn a ni a, kum li zet a enchhin hnuah 16 Dec, 2016 khan ‘live fire drills’ hmasa ber tur chu a lo nei tawh a, Jan 3, 2017 ah pawh khan South China sea tuipui a drill a nei leh bawk. Chinese sawrkar chanchinbu, Global Times sawi danin Tunah hian Liaoning hi Indian ocean tuipui ah operation nei mai turin a in ring reng a ni. Aircraft carrier ngah hi ram chak leh thiltithei sawi nan a hman a ni tawh a, National Interest A Dave Majumdar ziah danin Beijing hian aircraft carrier dang paruk neih belh leh tumin hma a la mek a ni.

Indian Navy Pawhin INS Vikrant thlakna tur hian INS Vishal siamna turin specification a peihfel tawh a, Vishal hi nuclear-power hmang tur niin, Ton 65,000 lai a rit a ni dawn a, INS Vikrant leh INS Vikramaditya te aiin thlawhna a keng hnem thei tawh dawn bawk a ni. US nen a tangkawpin “electro-magnetic aircraft launch system” (EMALS) tha tak a nei dawn bawk.

Indian Navy hian maritime force chak tak neih tumin hma a la mek a, Indian Ocean mai bakah Arabian sea, Bay of Bengal, Andaman Sea, South-West Indian Ocean, Persian Gulf, Gulf of Oman, Gulf of Aden, Red Sea leh ‘chokepoints’ an tih mai Strait of Hormuz ah te pawh Indian Navy hian huang zauh belh zel a tum a ni. Hetih lai hian China pawh in a territory chhung ah chhalin South China Sea leh East China Sea ah te indo lawng a dah mek a, hengte hian Khawvel an ti ralmuang lovin India leh a thawhpui ramte tan pawh a hnawksak hle a ni.

Aside | Posted on by | Tagged , , | Leave a comment

PUTIN LEH TRUMP AN INKAWM REI : G-2O SUMMIT-AH AN LAR BER! US-IN HRUAITU NIHNA A HLOH TAN EM NI?

July 7 & 8 chhunga Hamburg, Germany hmuna khawvel ram hausa zual G-20 Summit-inhmuhkhawmna chu US President Donald Trump leh Russsia President Vladimir Putin-te inbiakna boruak chuan a luah (dominate) hneh hle. Trump leh Putin te hmaichhana inkawm hi darkar 2:16min zet a tling! Pindan atangin Trump a nupui Melania chu darkar khat zet an inkawm hnuah lo chhuak hlawlin, a pasal Trumpuia chu schedule dang a neih vanga tlai lo tur leh a hun neih a rawn hrilh a, mahse, chumi hnuah darkar 1 dang Donald Trump leh Vladimir Putin chu an la inkawm char char zui a ni. Hetia an lo inkawm lai hian G-20 Summit chu a thlengtu German Chancellor Angela Metkel-i chuan a lo kaihruai a ni.

Trump leh Putin te inbiak lai hian Secy of State Rex Tillerson leh Russian Foreign Minister Sergey Lavrov leh tawnglettute tih loh midang an awm ve lo a ni.

Trumpa chuan Putin hnenah chuan, “Nang nena hmaichhana kan intawng ta hi ka lawm mai. Thil tam tak, hmalam huna thil tha zawk lo thleng tur leh Russia chungchang a tha lam a nih ka beisei a ni” a ti a. Putin-a pawhin, “Mr President, kei pawhin mimal taka ka hmu thei che hi ka lawm hle a ni. I sawi tawh angin kan inhmuhna hian rah duhawm leh tha zawk a chhuah ngei ang” tiin, a hrilh let bawk.

President Putin chuan President Trump zawhna chhangin,”Russia chu Us election 2016 ah a inrawlh (meddling)lo” tih a hrilh a, he thu hi Trump chuan an inbiak laiin a sawichhuak leh zauh thin a, Putin chuan, “Khawnge Russiainrawlh a ni tih fiahna chu?” tia zawhlet laiin Trump-a chuan thupui dang a sawi zui ta a ni. Trump chuan Putin-a phatna chu a pawm niin, media-hote chuan an sawi.

Hetih lai hian US lam atangin Democratic National Convention (DNC) Committee thupuangtu Andrience Watsan chuan, Trump chu Putin-hnenah US lakah inrawlh lo tura phut leh hriattir turin an beisei a ni, tih a sawi a, Trump chuan he thu hi chhangletin, “Engvangin nge DNC Chairman John Podesta chuan a emails hack vel chungchang chu FBI kutah a pek luh duh loh?” tiin a zawt let a ni. John Podesta leh Hillary Clinton inbiakna emails ah khan Barack Obama mihang (black) nih vanga hmuhsitna tawngkam te pawh awmin an sawi a, mahse, Hillary campaign dinhmun chhiat hlauh vangin leh Black American vote chan an hlauh vangin an thup bo nia sawi a ni

Author : Ct Lalrinawma    

Aside | Posted on by | Tagged , , , | Leave a comment

WELCOME TO HELL”: G-20 SUMMIT AN BUAI NASA : KHAWVELIN A NGAIHVEN HLE

Khawvel ram hausa zual 20 zet intelkhawm inhmukhawmna “G-20 Summit” July 7 &8 chhunga Hamburg, Germany a neih mek chuan ngaihven a hlawhin, ram hausa ho hmalak dan duhlo leh ngai theilo (anti-Capitalist) hoten tihbuai tumin Hamburg khawpui hi an pankhawm hnem hle a ni. He G20 Summit ah hian khawvela thiltithei zual mi 4 te hmaichhanah inkawm tur anni a, mahse, ngaihdan erawh thuhmunlo thiau an ni lawi si!

Protester-te chuan President Trump, President Putin of Russia leh President Recep Tayyip Erdogan te chu an bi tum zual bik a ni. Khawvela hruaitu nihna dinhmun pawimawh luah tur te hi US President Trump, Russia President Putin, China President Xi Jinping leh German Chancellor Angela Merkel te an ni. An thu erawh a inhmu lo thriau vek thung.

He G20 Summit ah hian hengte hi an thupui sawiho leh chaitur zinga pawimawh a ni- Climate change, refugee-migrations, North Korea nuclear & missile programs, world-free trade, Gulf-Syria buaina, etc tih vel a ni. Heng ram US, China, Russia leh Germany zingah hian tunge global leadership role chu play chho ta ang? Donald Trump lahin”climate change”, “free trade” leh “migration” lah a duh der silo. EU hotunu Angela Merkel-i lah Ukraine-Crimea vanga Russia hremna lekkawh zel a duh laiin Trump lahin hlih a duh bawk si. Japan, South Korea leh US-in North Korea beih/bomb an duh tawh laiin China leh Russia-in an duh si lo. West ramten Syria President Bashar al-Assad chu Syria ram civil war chhuah chhanah ngaiin “kal mai teh” ti a a kaikuang berah an puh laiin, Russia-in a hum tlat bawk si. Chinese pa sum ngah tak hian America pheikhawk bunin, global leadership hi a play pha-in, a duh tak tak chiah ang em?

July 6 zanah Hamburg khawpui chu an ri luih luih a ni ber mai. Mi 8,000 vel turte chu Hamburg’s a Redlight area-ah pungkhawmin zan 12 hnu lamah an tindarh. Nimina mipui 12,000 vel kawng zawhtute chuan hmai tuamin police ho chu bottle leh lungin an vawm nasa hle a, police lam pawhin high-tech water cannons te hmangin an bei let a ni. Police te chuan hmai tuam te chu an hmai tuamna la thla turin an ti a, annin an duh bik der si lo. Police 74 zetin hliam tenau an tawrh phah.

G-20 Summit hi “Hamburg Messe und Congress” ah nghah a ni a, security nasa taka kal pui mah nise, Inrinni July 8ah khian mipui 100,000 chuangin anti-capitalistrally neih an tum. Police chief Ralf Meyer chuan, buaina nasa zawk thleng hmachhawn turin kan inbuatsaih a ni, a ti. Protester te hian G-20 ram hruaitute chu “Welcome to Hell” tiin an lo hmuak a ni ! Thenkhat chuan Trump, Xi Jinping, Putin leh Erdogan te chu “democracy” mipui rorelna dik zirtir an ngai,an ti mai. Humburg Messe und Congress atanga 300meter area-ah punkhawm an phal lo a ni.

July 6 zanah Hafentrassed area-ah 40min vel tur chu police leh protesters te innawr tawn nasa hle a, he lai hi 1980’s chhova Left-party te lo pawngtal chiam tawhna hmun kha a ni. British PM Theresa May chuan, G20 Summit ah hian Saudi Arabia thiltih dan chu firfiaka chete do chunga tanpui(funding) tuah puhin, hmai hnih neihna (double standard) a awm a ni, a ti. PM Theresa May hian Donald Trump chu North Korea chungchang a sawi pui ang. Tin, China President Xi Jinping leh Trump pawhin North Korea chungthu khun khan takin an sawi dun anga, Trump a thil phut chu Jinping hian bengdar khawngri khawpin a ngahthlak sak duhlo mai thei. China hian an remtihna la hmasa lovin US-in North Korea hi a beih an ring lo a ni. Japanese PM Shinzo Abe chuan EU-Japan trade chungchangah EU hruaitute a ti ti pui bawk ang.

Author :    

Aside | Posted on by | Tagged | Leave a comment

PEACE TALK NEIH LAIA INDIA NENA KAN THU INCHUHTE- By Lalduhoma

Remna leh Muanna kan neih hnuah kum 31 lai a lo liam ta a, tuna kum 40-a upa leh a hnuai lamte tan chuan thawnthu a ni tan ta der mai. History reng reng hi a hun laia thuneitute leh a ziaktua thuin, dik hlel lai a awm duh khawp mai a, a chhan chu an mimal duhdan an zeh tel thin vang a ni. A bul a bala hretuteho hi kan awm loh hun a la thleng dawn a. Thu dik leh pawm tlak mipuite hrilh hriat hi ka mawhphurhna niin ka hria a ni.

Prime Minister Pi Indira Gandhi-in Remna Palai hna thawk tura min ngenna te, Mizoram Congress hruaituten min sawmnate kha pawmin, 1983 khan India President hnenah banna ka thehlut ta kha a ni a. A hnu lawkah London-ah Pu Denga be tura tirh ka ni nghal a. Pu Denga chuan Inthlan Thuchah leh India sorkar laka a Demand 17 min hawntir a, Prime Minister hnenah ka thehlut a. Heng Demand te hi uluk taka kan duan dun a ni. Inbiakna tawp tawh hnu chhunzawm leh turin Pu Denga chu Delhi-ah koh luh a ni zui ta a.

Hetih lai hian Congress Party President leh Lok Sabha MP ka nih bakah, Party hrang hrang, NGO leh Zirlai (SJAC) ten Peace Committee an dinah, remna sign a nih thleng khan Chairman ka ni a. Remna kan neih dan tur ngaihtuah chu kan hna pui ber a ni.

Demand 17 zinga a pawimawh zual kan buaipui dan han tarlang ila:

1) Chakma District Council thiah:-Chakmate khan MNF lo haw hun tur kha an huphurh hle mai a. Central sorkarah thu an thlen ve reng a. Kan hruaitute zingah sawipuitu an nei reng bawk a. Chuvangin, an District Council thiah kha kan nawr chhuak zo ta lo. Inkah lehna chhan atana hman ai chuan tiin Pu Denga khan a pawm ta a ni.

2) Ramri:- Greater Mizoram chungchang hi Pu Denga khan a nawr nasa hle. Kan thenawm State te a nghawng dawn avangin chinfel mai theih a ni lo va, chingfel tur chuan hun a duh rei hle dawn a. Remna kan nghakhlel tawh si a, India Danpui Art 3 hnuaia la sawi zui zel atan dah a ni ta a ni.

3) Inner Line Regulation (ILR) chungchang:-
ILR hi British hun lai, 1873 ah BEFR hnuaia kan neih a ni a. Chimralna laka min humtu ber a nih avangin, tihdanglam emaw, paih emaw a nih kha kan hlau va. Pu Denga khan Mizoram sorkar remtihna tel lo chuan tihdanglam theih loh ni se tiin nasa takin a nawr a, chu chu India sorkar khan rem an ti thei ngang lo va, tihdanglam emaw, paih emaw a nih dawn chuan, kan rawn hmasa zel ang che u an ti a. Tichuan, MoS para 8 naah, “The Inner Line Regulation, as now in force in Mizoram, will not be amended or repealed without consulting the State Government” tiin min dahsak ta a ni.

‘Rawn’ (Consult) tih awmzia hi han sawi fiah ila. MPSC Chairman tur te, Chief Information Commissioner turte hi ruat an nih hmain, Chief Minister chuan Opposition hruaitute a rawn tur a ni tih a ni a. Opposition hruaitute thurawn chu CM chuan a pawm thei a, a pawm lo thei bawk. Chutiang chuan ILR pawh hi lo tidanglam emaw paih emaw dawn se, Mizoram sorkar chu rawn phawt tur a ni a, mahse chu chu an pawm lo thiang a ni. Chuvangin, kan duhthusam chu a phak ta lo a ni. ‘Rawn (Consult)’ tih hi ‘Remti (Consent)’ anga hrilhfiah tur erawh zawng a ni lo ve.

Amaherawh chu, rawn hmasak phawt kan nih dawn avangin, a hma ai kha chuan a tha ta hrim hrim a, kan hriat lohin engmah an ti thei dawn lo tihna a ni a, kan remtih lohzia tihlanna leh pressure siamna hun remchang kan nei zel dawn a, chu chu politics-ah chuan hmanraw tangkai tak a tling tho tho a ni.

4) Special Provision Art 371 G:
Tunah hian Special Provision nei State 11 kan awm mek a. Hei hi MoS-a a hlu lai ber chu a ni. Khatih lai khan Delhi-ah Press Club-ah Press Conference koin, kan sorkar hotute khan Special Provision kan mamawh loh thu an puang mauh pek a, kha khan harsatna min siam rei hle. Special Provision chungchangah hian thil 2 sawifiah tul tih ka nei a:-

a) Leilung hausakna (Resources) chungchang:-
Nagaland Special Provision Art 371A chuan leilung leh a hausakna chunga thuneihna a keng tel a. Chumi ang chiah chu keini pawhin kan demand a ni. India sorkar chuan chu chu harsa an ti hle mai a, hetiang hian tanhmun an khawh a, “State tinin lei chung hausakna (Overground resources) ah chuan thu an nei sa vek a, chu chu State list 18 na leh 23na leh 50-naah te ziak a ni, lei hnuai hausakna (underground resources) chunga thuneihna erawh chu tu State mahin an nei lo, Nagaland pawhin an nei reng reng lo, Central kuta awm a ni a, Union List 53,54 leh 55-naah te ziak a ni, chuvangin, ‘Resources’ tih hian lei chung hausakna chauh a kawk a, lei hnuai hausakna a kawk tel lo, chu chu thil chiang sa (understood)-a ngaih a ni, chuti chung chuan Naga-ho hian lei hnuai hausakna pawh a huap a ni tiin an hrilhfiah lui tlat a, ONGC-in hna an thawh pawh an tibuai a, nasa takin kan inhnial phah hrep tawh a, Nagaland Special Provision ang hian nangni hi ziak sak ve ta che u ila, “Resources” tih hi in duh danin in hrilhfiah ve leh mai ang tih kan hlau va, kan ek rahpherh hnu rahpherh nawn leh hi kan tum tawh lo, min hrethiam hram teh u” an tia ni ber. Pu Denga khan Constitution lama Expert-te pawh a rawn a, India sorkar tanna chu a dik an tihpui vek a, chuvangin ‘Resources’ tih tel lovin a pawm lo thei ta lo a ni. A bul a bal hre si lo va Nagaland ta tluk lo anga sawi hi thu belhchian dawl lo a ni e.

b) Central Act chungchang:-
Kan Special Provision hian UT kan nih laia Mizorama Central Act lo hman mekte chu a huap lo vang tih a ni a. Mizoramah Central Dan hman mekte chu engtenge tih kan hre si lo va. Pu Denga khan Home Minister Chavana hnenah min tir a, ani chuan Central Dan Mizorama hman laiList chu min lo pe a, “Heng Dan-te hi in tana tangkai tur vek an ni a, in tana hnawksak tur pakhat mah a awm lo” a ti a. Chu List chu Pu Denga hovin ngun takin an zir a, mithiamte an rawn a, kan tana tha lo tur Dan engmah awmin kan hre lo va. Amaherawh chu, Remna sign tawh hnu, State kan la nih hma siin Central Dan dang Mizoramah an dah lut ang tih chu Pu Denga chuan a hlauthawng tlat a, Chavana hnenah zan rei tawhah min tir leh ta a. Chavana chuan, “Tuna in neih sa bak chu eng Dan mah kan dah belh lo vang” tiin min lo tiam a. Kei chuan, “Session lai a ni bawk a, naktukah Parliament-ah Statement siamin i puang thei mai lawm ni ?” ka ti a, Chavana chuan chu chu rem a ti a, Statement chu a siam ta ngei bawk a. Pu Denga pawhin a pawm thei ta a ni.

Hetih lai hian Forest (Conservation) Act 1980 chu Mizoramah hman mek a ni a, hnawksak kan la ti dawn tih ngaihtuah phak tumah kan awm lo va, sawi pawh kan sawiri ta reng reng lo a ni. He Dan hi chu lo telh loh tur kha a ni a.Mihring famkim lohzia leh kan fel tawk lohzia a lang a, a pawi khawp mai.

5) MoS hi a nghet tawk em ?
Memorundum of Settlement bawhzuiin Mizoram State Act chu Parliament-ah kan pass ta a, kei pawh a bialtupa nih manah ka intichangtupa ve hle. BJP khan MP 2 an nei ve a, anni chauh lo kha chuan min pawmpui vek a ni. Special Provision kan neih theih nan Parliament-ah Constitution Amendment Bill kan pass bawk a, Article 371G hi a lo piangta a ni. Constitution-a khung luh chin zawng hi chu a nghet bik a ni. Amaherawh chu, Constitution ngei pawh hi siam danglam theih a nih miau avangin, kan hnam dinhmun kal zel tur hi tuman kan sawi lawk thei lo vang.

Inremna Thuthlungah hian a tam zawk chu Constitution-a seng luh loh an ni a, chung zingah chuan ILR leh kan sum indaih lohna hnawhkhah nana Special Category State angaenkawl zui zel tur kan nih tur chungchangte hi an tel a. Dana sengluh an nih loh avangin Document satliah ang leka sawi theih a nihna lai a awm. Amaherawhchu, Inremna Thuthlunga a englai pawh hi, Dana seng luh an ni emaw ni lo emaw, hun kal zela Politics-a kan tanchhan tur leh hnialfung pawimawh tak vek an ni a, Zofate tan Document hlu tak an tling vek kan ti thei tho vang.

6) Inremna hi a nawra nawr chhuah a ni:-
Inbiakna kan neih lai khan harsatna vawi duai lo kan tawk thin a. Home Ministry lama tang ru tlat tawkte kan awm avangin, Pu Denga kut kha a chak tur angin a chak thei thinlo. Harsatna a lo awm apiang hian Inkahhai a tawp mai angtih hlauin kan thaw dep dep a, MNF lem changa buaina lo siam duh mai kan awm te a hlauhthawnawm hle thin a. Inremna neih ai chuan UT sorkar par hi tlan zel ila tih rilru pu lah, zep nak emaw, an pung tual tual a. Pu Dengan, “Thenkhatin lo kan vah laiin a thenin an lo hal a” a tih khan asawifiah hle. Lem changten buaina an siam theih loh nana theihtawp chhuah thintu, kan Chief Secretary Pu Lalkhama kha a fakawm hle.

A tawpah chuan, sorkar kha bang lo thei lova siam a ngai ta nia hriain, Students Joint Action Committee bultumin, ni 4 chhung Secretariat hualbeh a ni ta a. Sorkar chu hna thawk thei lova siam (paralise) a ni ta a nih kha. Mi 400 zet Central Jail-ah khung an ni chungin, man sen rual kan ni lo. Remna kan neihna tura Kohhran leh Pawl hrang hrangte hnathawh kan hriatreng laiin, a tawpa a nawra nawr chhuaktute chu zirlaite kha an ni.

Chutiang boruak rit tak hnuaia Remna hi siam a nih avangin, kan Inremna Thuthlung hi hei aia thaa siam ngaihna a awm lo tih hi a hre chiangtu ka ni. Chuvangin, a nih ang ang hian hman tangkai i tum phawt mai ang u. Zo hnahthlak zawng zawng zawngte lenna leh zalenna ram kan panna kawnga kan chawlh hahdam lailawkna tura Lal remruat a ni ang e.

Retold by Rama Khawlhring    

Aside | Posted on by | Tagged , , | Leave a comment

Damdawi man tlawm zawrhna dawr hawng

Health Minister Pu Lal Thanzaran vawiin khan Aizawl Dinthar Veng, Health Directorate Office bulah man tlawm zawka damdawi lei theihna dawr Jan Aushadhi Store (Generic Drug Store) a hawng.

Pu Lal Thanzara chuan Mizoram chhung District Hospital tinah Generic Drug Store hawn a nih theih nan hmalak mek a ni, a tia, mipui hrisel nan sawrkarin theihtawp a chhuah a, mamawh zualpui phuhru turin doctor 26 lak belh an ni, a ti a. Heng doctor lak tharte awmna tur transfer and posting niminah tihchhuah a ni, a ti a.

Hriselna kawngah Mizo mipui thanharh a tul tih sawiin taksa insawizawi uar a, ei leh in, zuk leh hmuama insum turin Mizo mipuite a chah a ni.

Jan Aushadhi Store (JAS) ah hian damdawi dawr pangngaiaiin damdawi a let thum let li vela man tlawm zawkin a lei theih a. Damdawi hi a man to dan a zirin category 3 (A,B,C) ah then a ni a. A man to chi chu – A, a laihawl – B, a man tlawm chi – C tia bithliah a ni. Jan Aushadhi dawrah hian Group B thleng phak damdawi a awm mang lo.

Damdawi dang man tona chhan ber chu a tuamna leh a cheimawina te a ni a, a man tlawm avanga quality chhe chuang lo Generic/Jan Aushadhi damdawite hi a man a tlawm theih nan a tuamna man tlawm zawk, him tawk si, a chei mawina tello hman a ni, tih sorkar thuchhuah chuan a sawi a ni.

Jan Aushadhi/Generic damdawite hi National Accreditation Board for Testing and Calibration Laboratories (NABL) pawmpui laboratory ah a that leh that loh uluk taka enfiah vek a ni.

Aside | Posted on by | Tagged , | Leave a comment

3. G-20 Summit neih mekah India-in awmze nei zawk leh chak zawka firfiakte dona tur point 11 a duante a tlangzarh

Nimin khan Germany-a Hamburg khawpuiah G-20 Summit tan a ni a. Tun tum G-20 Summit-ah hian khawvel ram hruaituten an sawi tam ber chu firfiaka chetna tihbo chungchang a ni a. India pawhin awmze nei zawk leh chak zawka firfiakte dona tur point 11 a duante a tlangzarh a. PM Narendra Modi chuan G-20 ram hruaitute chu a rang lama firfiak te do tura chechhuak turin a sawm a ni.

India-in hmalakna tur point a duanah hian G-20 ramten firfiakte chungchanga thil hriat tur leh anmahni lo puitu ramte chungchanga thu pawimawh inhrilh tawn zung zungna tur inremna siamte, Weapons and Explosive Task Force din a firfiakten hmanrua leh bunrua an dawn thin danchah te leh misual man inpek tawn chungchanga dan thlahzalen te a tel a ni.

Prime Minister Narendra Modi chuan Hamburg-a G-20 Summit neih kar lakah hian ram hrang hrang hruaitute a kawm a. Vawiin khan South Korea President Moon Jae-in nen inhmuin South Korea leh India inlaichinnate an sawidun a. Make in India, Digital India leh Startup India programme kaltlanga thawhdun an remti a, President Moon hian PM Modi ngenna angin a hma thei ang bera India tlawh a tum thu a sawi.

PM Modi hian Italy PM Paolo Gentolini kawm bawkin an thawhdunna tih hmasawnna tur an sawi dun a. Ram pahnih eibar zawnna tih hmasawnna tura medium enterprise lama tan lak a pawimawh thu an sawi a.

Khawvel sik leh sa chhe mek siamtha tur leh Africa ram hmasawnna tura hmalakna te an sawidun bawk a ni.Pu Modi hian Norway PM Pi Erna Solberg a hmu bawk a. Eibar zawnna kawnga an thawhdunna tihchak an remti a. National Investment and Infrastructure Fund-a orwegian pension funds-te tel ve turin a sawm bawk a ni.

Aside | Posted on by | Tagged , | Leave a comment

MIZOTEN KHAWVEL HUAPIN “CHANCHIN THA” KAN HRIL ZEL DAWN EM?

• Zoram kohhran hrang hrang zat.
• Mizoram kohhran member zat.
• Kohhran hrang hrang missionary tirhchhuah zat.
• Chanchintha hril a tul.

Ram dangah, Hnam dang kara han awm ve takah chuan mi chi hrang hrang hmel hriat leh thian kan lo nei ve ta. “Mizo” tih lo hre tawh thin tawn fuh erawh chu zing lam Arsi ang pharha vang an ni. India mi ka nih awihlotu hi 99% chuang ka tawng tawh a, Mizo aiin”Naga” lo hre zawkin, “Indian ka ni” tih ruala zawhna ka dawn thin chu “Naga em ni i nih?” tih hi a ni! Naga-ho hi ramka la fan tlem nen, ka kal tawhnaah chuan an lo awm deuh zel a, tin, Pathian rawngbawlna lama in hmang chinte chuan “Mizo” te aiin “Naga & Nagaland” chu an lo hre zel bawkin ka hria.

Mizoram chhuah san tura ka kal dawn hian Directorate of Informations & Public Relations, Gov’t of Mizoram, leh Tourism Dept siam english-a Mizo leh Mizoram Chanchin ziakna (flyer/brochure) hi za chuang fe ken ka ching a; railways station leh airports vela hnam dang thian ka chhar tharte chu “Mizoram fak mawi pahin” ka pe ta thin a! Bangkok-a Irish nupa ka pek tum chuan, “Tourism Dept-ah thawk a mawi i ni e. In ram (state) i sawi mawi thiam em mai!” tiin, nui vur vur chungin min tihkhum tawh. Mizo hnam leh Mizoram sawimawi hi ka la bansan thei meuh lo!

Hnam dangin min hmuh dan te, hnam dang ziak miten Mizo leh Mizoram an hmuh dante chu ka chhiar peihin ka ngaihven thin hle a, “Operation World” tih lehkhabu chhah zet Patrick Johnston & Jason a te siamah chuan, “Mizoramchu khawvela kohhran active na ber zinga mi ni a, rawngbawlna pawh an ngai pawimawh a, mahse, an society chu eirukna (corruption) leh drugs addict tamna a nia; an thalaite zingah ruihhlo ngai an tam hle…” tiin an ziak a ni!

Ram dangmite chuan Mizo chu tute kan nih a, enge eizawn nana kan neih leh economic resources min zawh an ching a, kan thil thawn chhuah (exports) te pawh min zawt duh khawp mai. Third World Countries a cheng, India ram retheiah pawh State rethei ber kan nihzia te hi Google, Wikipedia etc atangin an han en thuai a, hrilhfiah nawn an ngai lovin, Dictionary dang keu belh an mamawh hauh lo. Chutih laiin World Missions-Global Evangelization lama tui mite hahawlh zawng tak leh mak an tih em em thin chu, hnam rethei leh State rethei si, kan tlem ngaihtuaha Missionary-India State pawnah leh Foreign (Overseas) lama kan intir chhuak nasatzia an hriat chuan mak an ti emem a ni. An chek tlawk tlawk a, an meng phawk a, tute nge Mizote chu tiin an ngaihven zui a; Mizoram hial chu hmuh an duhin an chak ta thin a ni! Chanchin Tha vanga Zofate chan hi a ropui tak meuh.

Tun din hmun aiin Mizo te hi hausa hlek phei ila chuan, population wise-a khawvela LALPA Mission vanga mihring leh sum thawn chhuak tam ber “Hnam” kan ni ngeiin ka ringthin a ni.”

Mizo te chuan kum 130 liamtaah Chanchin Tha dawngin, kum 100 kristian hnam kan ni a. India ram mipui tluklehdingawn 1.3 zingah maktaduai 1.5 (1.5 million) awrh chauh kan ni a, kan rethei viau mai, mahse, Isua thupek ropui (Great Commission) chu kan ngai pawimawhin, kan mawhphurhna leh tihturah kan ngai hmiah a; state rethei tak chungin Mizoram pawn leh Foreign ah Missionary 4000-5000 inkar kan tir chhuak mek a ni. Hnam tlem te”Tlang chunga khaw awm ang” mai leh Lal Isuan, “Kei khawvel entu ka ni. Tu pawh mi ringa mi zuitu chu thim hnuaiah a leng tawp lo vang” a tih kha, a takin keini Mizo Hnam chuan kan tawng a, tun hma deuh chuan India ram state 27 zinga lehkha thiam-ziak leh chhiar thiam tamna (2nd highest literacy percentage) kan hauh mek a ni. A boruak lah Air Condition ang a ni…” tih hnu chuan, Krista Chanchin Tha vangin min ngaihsan phahin, min en hniam ngai tawh thin lo!
(A hnuaia mi hi “Mizoram Statistical Handbook, 2016, Gov’t of Mizoram siam chhuah a ni. Mizoram Kohhran te hi an thawk thain, an lo ropui viau mai)

Kum za Kristian ni mek Zofate hian, he kum zabi 21na kan hmekah hian eng kawng nge kan zawh mek le? Kum za dang kristian ni turin kan kalphung hi a in rem fuhin, a dikin kan hria em le?

Author : Ct Lalrinawma    

Aside | Posted on by | Tagged , , | Leave a comment

KHAWVELA IN TO BER PAWL MUKESH AMBANI IN- ANTILLA

Khawvela mihausaber pawl Mukesh Ambani in chu khawvela in to ber pawl a ni bawk. A in hming hi Antilla a ni a, South Mumbai ah Altamount Road ah a awm.

Facts:
1. Antilla hi 4 lakh square feet ani.

2. “Antilla” hi Atlantic ocean ah mythical island a nia, Mukesh Ambani te in hi he island hming atanga phuah a ni.

3. An in hi chhawng 27 a ni. Mahse chhawng thenkhat hi chhawng hnih aia sang an nih avangin, a takah chuan, chhawng 40 ang vel a nia, building pumpui san zawng hi feet 570 a ni.

4. He building ah hian staff 600 an chenga, engtiklai pawhin an enkawl. Staff te tan hian an hahchawlhnan pindan hran siam a ni.

5. An inah hian, swimming pool 3, health spa, salon, ballroom, yoga leh dance studio a awm.

6. An inah hian private theater a awm bawka, he private theater chungah hian garden a awm. He thetaer ah hian mi 50 an thu thei.

7. Chhawng 6 hi an car 168 te park nan chauh dah a ni.

8. An inah hian lift 9 a awm a, Ambani te tan a hranin private lift a awm a, guset leh mikhual te tan a hrang.

9. An inchhungah, motiff pahnih – ni leh lotus par hi lunghlu – crystal, pearl amaw marble ah chhawng tinah vuah a ni.

10. Helipad 3 a awm.

Author : Eunice Chawngthu

Aside | Posted on by | Tagged , , | Leave a comment

BOXER HLAWHTLING MANNY PACQUIAO TESTIMONY -Gilbert Renthlei

Philippines thingtlang khaw pakhat Mindanao-ah rethei bakberh takin a rawn seilian ve a. Retheih nak alaiin a nu leh pa an inthen zui. A nu leh a nau chawm turin harsa takin a inhlawhfa tauh tauh thin a, a nunah chuan awh tur a tam lo khawp mai. Zingah hma takah a tho va, riltam pawh sawi lovin khawlaiah a theih ang angin a inhlawh fa a, a thawh loh chuan an nghei a ni mai.

Retheih nak alaiin sual kawng a rawn zawh chho va, insual a hratin khawlaiah pawisa hlawhin a insual ta fo mai a. Insual lam a tihmi em avangin boxing lamah a lut a, a lo timi phian mai, Boxing khawvelah a hlawhtling em em mai a, khawvel huapin title 10 chuang a la a, sum tam tak a hlawh chhuak a, zu a heh a, nula a lawm bawk a, mahse amah kaltlanga a Chanchin Tha puanchhuah duhtu Krista chuan Pacquiao chu a bo rei a phal lo.

“Pathian hian thil tum a nei a ni,” tia sawiin Boxer ropui Manny pacquiao chuan, “A ropui zia puangchhuak tur leh mi engmah lo atanga mi tangkai taka hlangkai theitu Pathian a ni tih lantir turin a ram zauh nan Pathian chuan a lamah min hnuk let a ni,” tiin Manny pacquiao chuan Pathianin alama a koh nachhan a sawi.

Manny pacquiao hi Roman Catholic chhungkua atanga seilian a ni a, a nu hnen atang pawhin Kristian inkaihhruaina pangngai tak a dawng. Mahse boxing a luhchilh a a hlawhtlin chhoh viau hnuah Pathian a hawisan a, a hming maia Kristian niin Boxing a khelh atanga a pawisa hlawh hmang chuan a nu leh a unaunu te chu a chawm a, khawvel lamah tlanin pawisa a hmang nasa hle bawk. “Pathianni chuan ka inkhawm ve ziah thin a, mahse Thawhtanni atanga Inrinni thlengin bar-ah zu ka in thin,” tia sawiin, “Pawisa ka khel a, mipat hmeichhiatna lamah ka tlan a, ka hmingchhe ve hat nghe nghe, tawngkam bawlhhlawh pui pui ka chhak chhuak a, dawt ka sawi a, chutiang tih chu pawisakna reng reng ka nei lo,” tiin hetih hunlaia a nundan a sawi.

Hetih lai hian tum khat chu a thinlung vit zawrtu lehkha thawn a dawng ta tlat mai. “Ka lehkha dawn chu ka han hawng a, ka nu lehkhathawn a lo ni a. Chu lehkhaah chuan ka nu chuan pawisa ka thawn ngai tawh loh avangin ka nauin lehkha a zir zawm thei tawh lova sikul a bang hial a ni tih min rawn hrilh a. Ka rilru a na hle. Zu leh saa pawisa ka sen nasat em avangin ka nu leh ka nau rethei takin an awm tih ka hriat chuan ka tap lo thei lo a ni,” tiin a sawi.

Hemi hnu lawk hian Juan Manuel marquez nen a vawi thum nan an inhnek a, a chak zo ta lo. An inhnek zan hian Manny Pacquiao chuan inlarna a hmu ta, “Ka mut hmunah chuan ka beng ngei hian Pathian aw ka hre ta tlat mai. Chu aw ka hriat chu khawpui ri ai pawha a let 10 chuanga ring a ni. Aw chuan ‘Ka fapa, ka fapa, engah nge min kalbo san?’ tiin a rawn sawi a ni,” tiin a sawi a. A inlarnaah chuan ramhnuai mawi tak mai, pangpar mawi tak takin a bawm khah luk maiah hian hruaia awmin vantirhkoh pahnihin an hruai niin Pacquiao chuan a sawi a, “Pathian aw ka hriat lai chuan ka thi ta ni hian ka hria a. Ramhnuai mawi tak maiah hian ka lo awm a, ka thingthi a, ka hmai lei siin ka tawngtai a. Chutih lai chuan eng var tak mai hian min rawn chhun a, aw chuan min rawn be ta a. pathian chuan hun hnuhnung a nih tawh zia leh Ama hnena let leh tura min sawmna te, a rawngbawl hna ka thawh dan turte min hrilh a ni” tiin a sawi.

Inlarna a hmuh hnu hian mumang mai mai tiin theihnghilh a tum nasa hle a. A nundan chuan beidawnna a thlen a, chu chuan Pathian mamawh ngawih ngawihin a siam ta a ni. Nikhat chu a inlarna hmuh lam a ngaihtuah tawh mang loh laiin Bible a chhiar a, chutah chuan Pathianin mi pakhat a mumang kaltlanga a biak thu a chhiar a. Chutah chuan a mumanga inlarna a hmuh kha a hnena Pathian inlarna a ni tih a pawm theih ta chauh a ni.

Chutianga inlarna a hmuh a pawm hnu chuan a inlarna hmuha a thil hmuh hrang hrang leh aw a hriatte chu a ngaihtuah chhuak a, chumi hmang chuan Pathianin a thinlungah thu nasa takin a sawi a. A nundan thin bansana Lal Isua Krista tan inpe tawh turin inhlanna a nei ta a ni.

“Ka piangthar a, chhandamna ka chang a, kawngdik ka zawh avangin ka lawm hle a ni,” tia sawiin manny Pacquiao chuan, “Kan zavai hian pianthar hi kan tih makmawh a ni. Krista chuan mihring hi kan pianthar loh chuan Pathian ram kan luh a rem lo tih a sawi a. Chuvangin keima mimal tan tak pawh pianthar hi a pawimawh hle. Isua Krista chuan, ‘Keimah hi kawng leh thutak leh nunna chu ka ni. Keimah kaltlang lovin tumah Pa hnen an thleng lovang’ tia a lo sawi angin Lal Isua kaltlang lo hi chuan Pathian hnen thlen theih a ni lo. Lal Isua hi Lal leh Chhandamtua i pawm chuan chatuan nunna i lo nei dawn a ni,” tiin a sawi.

Pacquiao a pianthar hnu hian a nunah inthlakthleng tam tak a rawn awm nghal a, hun rei tak chhung Boxing zirtirtu (trainer) atana a hman Freddie Roach chuan, “Manny Pacquiao nunah hian danglamna mak tak tak a rawn awm a. Amah a inthunun thei ta em em a, a nightclub (zana in tawl lenna club) a hralh a, zu a nghei a, hmeichhia a ngaihsak tawh lo. A nupui nen an inkara buaina neuh neuh awm chu a reh a, mi tha takah a inthlak danglam nghal a ni,” tiin a sawi.

A pianthar hnu hian a nuna pawimawh ber chu Lal Isua leh ama inkar a ni tih a sawi a, “I nunah Lal Isua i nei a, i nunah Pathian a lal ber a nih chuan he khawvel ropuina te hian awmzia a nei tawh lo va, i nunah chuan Pathian a pawimawh ber tawh a ni,” tiin a sawi.

A pianthar atang hian nitin Bible chhiarin zirchianna (bible study) a nei thin a, hemi chungchngah hian, “He dan bu hi vawng reng la, zirchiang la, a chhunga thu inziak zawm turin i nun uluk hle rawh. Tichuan i nun a tluang ang a, i hlim zel ang,” tia sawiin, “Pathian thu hi i nun kaihhruai nana i hman phawt chuan i nun leh i tawng thlengin a veng che ang a, i nunah thlarau thianghlimin hmun a chang dawn a ni,” tiin a sawi bawk.

Boxing a hlawhtlinna tam tak a chan bakah fanau malsawmna a dawng a, politics lamah lutin inthlanah a hlawhtling chho zel a, vawiinah pawh hian Manny pacquiao hi Philippines roreltu Congressman a ni a, mi thenkhat chuan Philippines President pawh a chuh mai an ring. Malsawmna a dawn tam tak atang hian Pacquiao chuan Biak in a sa tawh a, mi harsa te chenna tur community center a sa bawk. Politics-a a luh chungchangah Pacquiao chuan Congressman a nihna chu Pathian thu puandarhna remchang a ni tih a sawi a, eirukna dova ram tana thawh a tul thu a sawi

“Rinawm taka mipui rawngbawla tanpui ka duh ber. Sorkar hian pawisa a thei a, mipui tana thawk turin thiltihtheihna pawh a nei. Mahse sorkar mi tam tak chuan anmahni inhaivur lam ringawt an buaipui si,” tia sawiin Pacman chuan “Kei chuan Pathian tih chungin mipui rawngbawl hi ka duh ber a ni,” tiin a sawi.

“Pathian hian mal min sawm nasa em em a, politics ah leh boxer ka nih angin hlawhtlinna ka hmu nasa a. heng ka hlawhtlinna te hi tangkai taka a rawngbawl nan ka hman Pathian hian a duh tih ka hria a, keimahah hian Pathianin thil tum ropui tak a nei a ni,” tia sawiin Floyd mayweather a hneh loh hnu lawkah Manny Pacquiao chuan, “Pathian remruat dan hi kan beisei dan leh kan duh danin a rawn kal vek lo va, kan beisei loh dan ang te, kan suangtuah phak bak tein kan hnenah a rawn thleng zawk thin a ni. Eng pawh kan chungah thleng se, lungawi taka a chanchin tha puan darh mai hi kan tih tur a ni a. Vawiinah hian a hming puang darh tur ka ni a, ka hming tih lar ringawt ka ngaihtuah hi a thiang lo,” tiin a sawi.

Aside | Posted on by | Tagged , , , | Leave a comment