Rul Chuk Hi

Rul hi a zirmi leh tui mite tan chuan ngainatawm tak a ni a. A ngaina lotu tan erawh ţihbaiawm tak leh râpawm tak a ni thung a.
India hi khawvela rul chuk vanga thi tamna ber zinga mi a ni a. Indian cobra, common krait, russel’s viper leh saw scaled viper te hi mi chuk hlum hnem ber leh rul tûr nei hlauhawm bera ngaih a ni a. Rul tûr thahna ‘Polyvalent Anti Snake Venom’ pawh hi heng rul 4 te tûr denchhena siam a ni a.

Rul chuk hi keah a awm tam bera, a dawtah kutah a ni a ngaih a ni a. Rul hi chi hrang hrang a tam hle mai a. Vanneihthlak takin mihring tihlum thei khawp tûr nei hi chu tlem tê chauh a ni a.
Rulin mi a chuk hian a hmasa berah chuan hlauhthâwnna a awm nghal a. Na tak leh hrehawm takin ka thi mai ang tih hlauhna a awm nghal fo ţhin. Rulin mi a chukin hlauhthâwn a chiâi nghal tur a ni lo va. Sawi tawh angin rul tûr nei hi tlem tê a ni a, rul tûr nei lo chuk hi a hlauhawm loh va. Rul tûr neiin mi a chuk pawh hian ţhenkhatah chuan a tûr a tichhuak lo fo va, a tûr taksaah a lut lo va, engtinmah an awm lo fo. Miin, “rul chuk ka haw lo” a tih chuan rul tûr nei lovin a chuk emaw, rul tûr neiin chuk emaw pawh ni se, a tûr a chhuak lo tihna a ni ang. Rul tûr nei chuk a huat loh ngawt theih loh.
Taksaa rul tûr a luh tam leh tam loh a zirin a hlauhawm nasa zualin a hlauhawm nêp mai a ni. Rulin tlanchhe paha mi a chuk aiin thinrim taka mi a chuk hian taksaah a tûr a lût hnem zawk niin an sawi bawk a. Tin, rul chuk reng reng chu, a chuktu rul hriatchian a nih loh chuan rul tûr nei anga ngaih tur a ni.

Rul tûr neiin mi a chukin…
# Tawi tê pawh kea kaltir loh tur a ni a, engti kawng zawng pawhin zâwn ngei ngei tur a ni. Hei hi a bik takin kea a chukin a pawimawh hle a ni.
# A rang thei ang bera damdawi in panpui tur a ni. Muanchân loh tur a ni.
# A chukna hmuamhma ţawn khalh loh tur a ni a, thil dang emaw kut emaw a hmeh beh loh tur a ni a. A chukna hmuamhma leh a bul vel zai thî loh tur a ni.
# Rul chukna hmuamhma chu ruh tliak kan enkawl dân anga enkawl tur a ni. A chukna lai kutke tihchêt loh tum hrâm hrâm tur a ni a. Bandage emaw puan emaw a nghet lutuk lova tuama, ţhem dawh tur a ni; ruh tliaka ţhem kan dawh ang hian. Hei hi a pawimawh hle mai.
# I theih dân dânin rul chuk chu thlamuan ang che. A hlauhthâwnna leh chiâina i tihreh kha a pawimawh a ni.

Rul tûr nei chuk lanchhuah dan:
A hmuamhma awmin, a chukna lai a nâ a, a vûng deuh va, a thî bawk ţhin a.
Luakchhuak leh luak, luhai, lunâ, pumnâ, chaklohna leh nguaina a awm thei a.

BP hniam, lungphu mumal lo, khawhmuh fiah lo leh âwma hnawh a awm thei a.

Nguaina, leia hriatna leh hnara rim hriatna danglam, lei hit mem mem, mit men ţhat theihlohna, kutke zawi leh chaklohna a awm thei a.

A nasat chuan ke aţanga zeng ţanin taksa, kut, nghawng leh hmai tihrawlte a zeng ţhin a. Thil lem a har a, ţawng a har a, nghawng ruh tliak ang maiin nghawng tihchar a har ţhin a.
A hmuamhma aţangin thi a chhuak nasa thei a. Hahni thî leh hnar thî a awm thei a. Zun thî, thî khuh chhuak leh vun aţanga thi chhuak a awm thei a, mit aţangin thisen a hnâm chhuak thei hial a ni.

Rul tûr hi chi hnih, lian deuhin a ţhen theih a. Hriatna thazâm khawih chi (neurotoxin) leh thisen khawih chi (haematoxin) a ni a. Tihrawl khawih chhe thei a awm bawk a. Cobra leh krait rul chi hian hriatna thazâm a khawih chhe tlangpui a, viper lam chi- Russell’s viper leh saw scaled viper te hian thisen a khawih chhe tlangpui thung a. Viper lam chi hian thisen a tikhang thei lova, thi pût vak a siam a ni ber a.

20 minutes whole blood clotting time (20 WBCT):
Mihring pangaiah chuan thisen hi engmah pawlh lova dah tawp hian minute 8 aţanga minute 15 inkarah a khang tur a ni a. Rulin a chuka thisen kha lain, glass bur (test tube) thianghlim takah khawih che lovin minute 20 chhung dah ila. Minute 20 chhunga a khang (coagulate) loh chuan viper rul chuka ngaih a ni tlangpui a. Rul tûr thahna, Anti Snake Venom (ASV) pêk a ngai tlangpui ţhin a ni.

Mizorama mi chuk tam ber chu rultuha hi a ni âwm e. Tin, Mizorama rul chuk vanga thihna thlentu tam ber hi khuavang rul chuk vanga thihna hi a ni maithei bawk a ni.

Rultuha:
Rultuha hi a sap ţawng chuan ‘Bamboo pit viper’ a ni a. A chunga kan tarlan tawh angin viper chi a nih avangin a tûr hi thisen khawih chhe chi a ni a. Rul che muang tak a ni a, hnim, sazu kua leh lungrem karahte a awm duh hle a. A rawng hi a hring a nih avangin hnim zinga a awmin khawih palh leh rah palh hlauhawm tak a ni a, a mei a uk ţhat bawk a. Sazu leh rannung dangte a ei ţhin a, zana chaw zawng chi a ni.

Khuavang rul:
Khuavang rul hi a sap ţawng chuan ‘greater black krait’ a ni a. Krait rul chi a nih avangin a tûr hian hriatna thazâm a khawih chhe ţhin a. Tihrawl a khawih chhe thei bawk a, a tûr hian kal a khawih chhe thei a ni. A rawng hi a dum tle lam niin a dul lam hi a eng emaw a var paw lam emaw a ni tlangpui a ni. Sazu leh rul dang a ei ţhin a, zana chaw zawng chi a ni a. Tihbuai loh chuan mi a chuk zen zen lo va, a chukna hmuamhma hi a tirah a nat lêm loh avangin hriat loh emaw ngaihthah emaw a ni fo ţhin a ni.

Mizorama rul tûr nei dangte chu Chawnglei (banded krait), Chawngkawr (cobra), Rulmuk (mountain pit viper), Rulngan (king cobra), Rul Nghawngsen (red necked kneel back) leh Rul-ţhi-hna (maclands coral snake) te hi a ni a. Heng lo pawh hi rul tûr nei dang a awm thei ang a. Rul tûr nei chuan ngho an nei tlangpui a ni.

Rul hi mihring tan ţangkaina tam tak a awm ve a. Sawi tawh angin rul tûr nei chi hi chu tlem tê a ni a. Rul hian mihring a bei ngawt ngai lo va. Thah emaw khâwi emaw tum vanga kan va khawih emaw rah emaw hian mahni invên nan min lo chuk ta ţhin a. Rah palh emaw khawih palh emawin min chuk ţhin bawk a. Rul chanchin zir mi, mi thiam kan nih loh chuan eng rul mah hi khawih mai mai loh tur a ni a. Rul kan that dawn a nih pawhin hmawlh sei tak hman tur a ni.

Rul hian a tûr hi chaw zawn nan a hmang ber a, a ţul hunah mahni invên nan a hmang ţhin bawk a. Rul hmangaih viau emaw huat viau emaw hi a ţul lo va. A nun dânin lo nung ve mai mai se la, rul hmuh apiang thah tum ringawt zel hi thil ţul lo tak niin ka hria.

Author : Lalkhawngaih Sanga

Advertisements
Aside | Posted on by | Tagged , , | Leave a comment

India Film star te hlawh

Tunlai vai film hit em em, Baahubali 2 chuan April 28 a an release atang khan Rs 10 billion ($156 million) zet a lalutin record a rawn siam nual mai a. India film industry sum chevel hi a turu khawp mai. He film a a changtupa Prabhas pawh hian Rs vaibelchhe 25 zet a hlawh.

Prabhas hian Kum 2018 a chhuak tur Saaho chu a chang leh nghal dawn a. Baahubali 2 ah a chet that em vang hian Rs. vaibelchhe 30 hlawh a phut tawh niin sawi a ni.

Prabhas hian film lamah hma a sawn hle nachungin India top star te a la thlau hle a, india film star te hlawh hi a neplo hlawm hle. Film pakhata an inchhiar dan.↓
Salman Khan – 60 crores (Amah hian a produce fo avangin a sum lakluh a sang.).
Aamir Khan —– — 55-60 crores
Shah Rukh Khan- 40-45 crores
Hrithik Roshan – – 40-45 crores
Akshay Kumar — Rs 35-40 crore ( a release tam hrim hrim a, a hlawh hnem hman thin hle.)
Ajay Devgan – – — 25-35 crores
Ranbir Kapoor- — 20-25 crores
Amitabh Bhachan- 18-20 crores
Ranveer singh – – 15-20 crores
Shahid Kapoor— 15 crores
Saif Ali khan– – — 7-10 crores

Hmeichhe lam hlawh/inchhiar pawh hi neplo tak a ni.
Kangana Ranaut—- Rs 10-12 crores
Deepika Padukone- Rs 8-10 crores
Kareena Kapoor—- 7 crores
Priyanka Chopra – — 6 -7 crore
Anushka Sharma – –5 crores

Aside | Posted on by | Tagged , , | Leave a comment

US MILITARY “SECRET PLANE” HIM TAKIN NI 700 HNUAH LEIAH A LO TUM

US military experimental X-37B space plane chuan ni 700 zet van boruakah thil chi hrang hrang, technolgy lam an han enchhin hnuin, him dam takin Sunday zing 7:47am ET khan Florida state ah a lo tum a, hetianga tum ri hi a bengchheng nasa (sonic boom) hle a, State pum pui deuh thawin an hria a ni awm e! He X-37B hian enge a han tih an sawi duh lova, “secretive programs” enchhin vek niin US military/air forces chuan an puang. X-37B hi Orbital Test Vehicle ti pawhin an sawi bawk thin.


Space Shuttles lo tum thinna hmun, Vandenberg Air Force station, California state ah vawi 3 chu a lo tum tawh a, a vawi 4na chu Cape Canaveral air force station, Florida state ah a tum daih a ni. He X-37B space fleet an tih hi 29ft a sei a ni. Air Force Rapid Capabilities Office chuan enge anhan tih hi a sawi duh lo. He X-37B space plane hian Orbit ah enge a tih hi thuruk a nih vangin, an inrin siak lai laih a ni. Ni 700 zet an han khawsa si a, eng tak han ti ang maw?!

United Launch Alliance an tih US military ralthuam siamtu Lockheed Martin leh Boeing company tang dun siam a ni. A vawikhatna atan April 2010 ah kah chhuah niin, thla 8 zet van boruak thiang leh zau takah khian an awm a, a vawihnihna chu March 2011 ah kahchhuah leh niin, thla 15 an han khawsa a, a vawithumna chu Dec 3,2012 ah khan kah chhuah niin, thla 22 zet an han khawsa a, a vawi 4na erawh chu May 2015 ah kah chhuah niin, Ni 700 zet an han awm a ni. US chu America a lo ni nge nge e!

Author : Ct Lalrinawma

Aside | Posted on by | Tagged , , | Leave a comment

ISUA I TAN THU PUANG RAWH by DL Moody

Rom 10:10 Miten thinlungin an ring a, felna an hmu thin a; kain an tan a, chhandamna an hmu bawk thin a ni.

Ireland rama rawng kan bawl tumin tlangval pakhat hi Pathian nen an intawk hlauh mai a, mahse a pianthar hnu ni thumna thlengin chhandamna kawnga zawhna neite tana buatsaih pindanah chuan ka la hmu ta tho mai a. “Harsatna i nei em ni?” tiin ka zawt chuan, “Hman zan khan hre chiang mang hlei lo va ka inhlan nghal vut vut vang kha a ni ang keimahah hian danglamna engmah a awm thei tlatlo mai.” a ti ta a. Kei chuan, “Khatianga i inhlan nghal kha a chhan a ni lo. Isua i tan thu i la puanchhuah loh vang zawk a ni.” tiin ka lo hrilh a. Chu thu a hriat rual rual chuan mak a tih em avangin a zuang lo chauh a ni.
“Engtin nge chu chu i hriat? Tu nge hrilh che?” tiin min zawt let ta vat a,
“Tumahin min hrilh lo. Min hrilh pawh ka ngai hek lo. Miin Isua a pawm tawh hnu lawka rinhlelhna a neih leh chuan Isua a tan thu a lo la puanchhuah loh vang a ni.” tiin ka lo chhang a.
Chu veleh, “I sawi dik khawp mai. Ringtu tha tak, ka nu nen chauha khawsa kan ni a. Kha mi zan khan in ka thlen veleh Kristianah ka inpek thu ka nu ka hrilh ang tiin ka ngaihtuah zeta mahse ka rilru chuan a ngam ta tlat lo. Tichuan naktukah ka hrilh mai ang tiin ka ngaihtuah leh ta a, mahse ka hrilh leh ta chuang lo. A chhan chu a tuka chauh ka hrilh chuan ‘ngatinge nizanah min hrilh loh’ a tih ka hlauh vang a ni.

Ka rilrua lo awm chu, ‘Pawisa chhar ta ila ka nu hnenah ka hrilh nghal vat dawn a. Tunah Isua nen kan intawk a, chatuan nunna ka nei tawh sia, engvangin nge ka ngawih tlat mai le, hriat sual eng nge maw a awm a ni ang. ‘Kei hi ka piangthar tak tak lo a ni ang, piangthar tak tak chu ni ila Isua ka tan thu ka puang chhuak nghal em emang’ tiin ka ngaihtuah ta a ni.” tiin min hrilh a.
Kei chuan, “Ka thian, tunah hian sualin a thlem lo che a, mahse a lo thlem tawh zawk che a ni. Hmelmapa chuan a game ngai bawk hmangin Pathian thu awih lo turin a bei tan tawh der che a nih hi.” ka ti a.

Tichuan chhandamtu hnenah a tharin a inhlan nawn leh ta a, a nu hnenah Isua nen an intawh thu hrilh turin a haw ta a ni.

A tuk zana kan inhmuh chuan, “Tunah eng nge i an tawh le?” tia ka zawhna chu hlim tak leh nui sang chung hian, “ Ka nu chu ka hrilh tawh e” a ti a.

Author : Melvyn Vanlalhlimpuia

Aside | Posted on by | Tagged , | Leave a comment

‘ZORAM THILSIAM TINRENG HIAN NGHAKHLEL TAKIN CONGRESS SORKAR TLAK HUN AN THLIR : PU RAMA

Pu Zorama thian leh thawhpuite.
Congress zungpui a puak keh.
Sonia in Isua phatsan?
2018 inthlanah mnf tling dawn?

Ni 06.05.2017 khan Hortoki Vengchhaka Pu James Hrangkima tual zawlah Hortoki MNF Group leh MNF Unit-I, II, III leh IV huaihawtin ‘Mi thar lawmluhna programme’ hun hman a ni a, hetah hian Pu Zoramthanga MNF President chuan Congress atangin voters 195, ZNP -10 leh Neutral- 13, Total= 218 chu membership fee pe thlapin MNF-ah a lawmlut.

Khuallian Pu Zoramthanga chuan
” kum 1947 India Independence atangin kum 50 chuang India ramah Congress-in ro an rel tawh a. India ram min awp danah hausa ngai hlir hausa thur thurin rethei an rethei tial tial a, kan retheihna hmanga Vote inleitlin leh ringawt chauh hi an tum ber a ni tih hriain India mipuiin an kham tawh hle a; an hnawl tawh a ni. Chubakah, Congress hotu nu ber Pi Sonia-i’n South India-a, Tirupathi Temple-ah, Hindu puithiam Lord Krishna hmaah a fapa Rahul-a tan malsawmna a dil a. Roman Catholic Kristian nu chuan Isua Krista a phatsan tawh a ni. Chuta tang chuan inthlan awm tawhna apiangah an tla ta zawih zawih a. Kum 2014 MP Inthlanah MP 543 awmah MP 44 chauh an nei ta a. State inthlan apiangah an tla zawih zawih a. Tun atanga kum hnih velah chuan India ram State 29 awmah Punjab State-ah chiah an sorkar ka ring.

Mi tam takin Congress chu tla mahse an lian leh mai thin an ti a, tunhmaa an tlak kha chuan MP 100 atanga 200te an la nei tho thin a. Tunah erawh chuan, a chi kuitiahna tur Nursery thlengin a baw vek tawh a, dinchhuah ngaihna a awm tawh lo a, Congress mawng khal a puak keh zo tawh a ni, a ti.

MNF President chuan, ” Mizoramah pawh an hotuten Chal hnawihsenin Vai Pathian ban sawm nei hmaah an puja a, Kohhran pawi sawiin zu an zuar lui a, Zu avangin Police leh mipui an thi ruih ruih a, development a chawl thuap a, Congress sorkarna hnuai Mizoramah hian thim thuah hnih a thleng a ni ringawt tawh a ni. ”
” Sorkar hnathawk, kohhran, zirlai, sumdawng thleng hian he sorkar hi an kham tawhin an thin a ur zo tawh a, Congress hian sorkar leh tumin hma pawh an la tawh lo. Zoram thilsiam tinreng hian nghakhlel takin Congress sorkar tlak hun an thlir mek tawh a ni ber mai. Pathian leh mipui zarah nakum inthlanah kan tling ngei dawn a ni, a ti.

Pu Rama chuan, lo sorkar ta ula engtinnge in kal pui dan tur tih min zawt thin a. Kan term hmasa kha Aitechhin nan a hmang min ti a, mihring chu dam chhunga in zir tur kan ni. A hma ai khan ka kum pawh a lo upa tawh ang bawkin, finna leh remhriatna thuk zawk Zoram kaihruai tur hian ka nei tawh e. Kan sorkar lai khan kan ep lam Congress Central-ah an sorkar tho nachung khan, khami hun chhung pawh khan sum tam tak kan hailut thei tho a ni. Tunah chuan Central-ah kan thian leh thawhpuite an sorkar tawh a, Zoram development hnathawhna tur hian sum min pek an chak lutuk tih kan hria a ni. Zoram tana malsawmna pe turin an thinlungah Lalpan hna a thawk bawk ang. Kan sorkar ang a, chawa intodelh leh sumchang thlai lamah nasa takin hma kan la dawn a, Link Road-in hmuntin kil- tin kan tlawh pawhtir ang a, kan ram leilung hausakna kan hai chhuah chuan kan ram let thum kan chawm thei. Chhungtinin kum khatah cheng nuai 5 atanga nuai 10 kan lakluh theih nan hma kan la dawn a, Mizoram hi Economic Independence-a hruai kan tum a ni, a ti bawk.

He hun hi Pu Vanlalthanga, Group President MNF Hortoki chuan a kaihruai a, Pu Zoramthanga hi MNF General Headquarters atangin hruaitu engemaw zatin an tawiawm a ni.

Author : Slchhunga Gooner

Aside | Posted on by | Tagged , , , | Leave a comment

Mara Autonomous Dist Council inthlanpuiah rorellai Congress Party chuan MDC Seat 25 ah Seat 17 lain hneh takin an tling

Mara Autonomous Dist Council inthlanpuiah rorellai Congress Party chuan MDC Seat 25 ah Seat 17 lain hneh takin an tling a, Nimim chawhma dar 10:00 atang khan MADC inthlanna a vote tla te chhiar tan a ni a, Dawhkan 8 ah chhiar a ni a. Rorellai Congress chuan MDC bial 25 ah bial 17 lain hneh takin sawrkarna an siam leh ta a ni.

MNF & MDF co-ordination chuan bial 7 lain, MNF hian bial 5 lain MDF in bial 2 an la a. Independent Candidate KL.Bana chuan Tokalo bialah hnehna a chang ve bawk.

Tun tum MADC 11-na inthlannaah hian Tlinglo langsar zual zingah CEM nilai Pu RT. Zachono, Chairman nilai Pu LC. Chakhai, EM nilai leh CEM hlui IP. Junior, MDF President leh CEM hlui Pu M. Laikaw, MNF district President ni lai leh CEM hlui ni bawk Pu N. Viakhu te an tel a ni.

Tun tum Inthlanna vote tla te hi boruak muanawm leh hahdam taka chhiar theih a ni tih kan corr chuan a sawi a ni.

Congress Party atanga thlantlin MDC te hian nimin tlai khan Minister pahnih Pu Zodintluanga, Pu PC. Lalthanliana leh MDCC President Pu S. Hiato te hovin Sawrkar thar din dan tur leh CEM thar tur an ruahman fel nghal a, Congress Legislature party CEM atan N. Zakhai leh Chairman atan Pu H Sohlo te an thlang a ni.

Tun tum Inthlanna a in Hnehna tlem ber chu Siaha North-II bialah niin Congress Candidate Pu V. Vanhupa chuan Coordination Candidate leh Bialtu MDC nilai C. Lawbei chu vote 10 in a hneh a,

Inhnehna sang ber chu Siaha East-II bial niin Pu HC. Biakcheuva Coordination Candidate chuan Vote 505 in Chairman nilai Congress Candidate Pu LC. Chakhai a hneh a ni.

MADC inthlan result hriat kim a nih hnu hian he inthlan chuhtu Congress, MNF leh BJP te chuan tluang taka inthlan vote chhiar zawh a ni ta chu lawmawm an tih thu AIR an hrilh a.

MPCC Vice President, Home Minister Pu R. Lalzirliana chuan an party chu a kal ngaia kal zelin, hma a sawn zel niin a sawi.

MNF Party President Pu Zoramthanga chuan MADC inthlan result-ah an lawm kim lo mah se an phu tawk result an nei nia a hriat thu te, MADC sorkar din tirh ata tawh Congress rorelna hmun, rorel lai leh sum leh pai pawh nei tam zawk an nih vangin Congress chuan hnehna an chang niin a sawi.

BJP Mizoram Pradesh President Dr. JV Hluna pawhin thlantlin tak Congress MDC te a lawmpui thu sawiin, sorkar tha tak an din a duhsak thu a sawi a, an party chu inthlanna hmunah chuan nausen ang chauha tharlam an la nih vangin campaign lai pawhin tlin an inrin vak loh thu a sawi a ni.

Aside | Posted on by | Tagged , , , | Leave a comment

Ranchaw leina thubuai ah Laloo bawk

Ranchaw leina tur sum cheng vaibelchhe tam tak tihchingpen thubuaia Jharkhand High Court-in thiam a chan tir hnuah Supreme Court chuan Bihar Chief Minister hlui, RJD President ni bawk, Lalu Prasad Yadav-a chu thubuai chi hrang 4-ah, a hranpa theuha a chungchang ngaihtuah turin vawiin khan thupek a siam a, heng thubuai hrang hrangte hi thla 9 chhunga ngaihtuah fel turin thupek a chhuah bawk.

Lalu Prasad-a chungchanga CBI-in Jharkhand High Court thu tlukna siam khin letna, Supreme Court-a thehluh chu pawmin Justice Arun Mishra kaihhruai Bench chuan nimin may 8 khan thupek hi a siam a ni.

Lalu Prasad-a Chief Minister nih laia ran chaw leina tur chhuanlama Bihar Dist hrang hranga Animal Husbandry Dept atanga cheng vbch 900, diklo taka la chhuaka tihchingpen thubuaiah hian CBI chuan Lalu Prasad-a leh mithenkhat dang lakah thubuai engemawzat a ziak lut a, kum 2014 khan Jharkhand High Court chuan thubuai chi hrang hrangah thuhretute leh finfiahna inang hmangin mipakhat chungthu a ngaihtuah theih loh tih behchhanin he thubuaia inhnamhnawiha puhte thubuai hrang hrang chu a ti tawp a ni.

Aside | Posted on by | Tagged , , | Leave a comment

Champhai pitar sawisa

May 8 chawhnu dar khat vel khan misual tu a nih la hriat loh chuan Champhai Kanan Venga hmeithai Pi Vanlalneihmawii, kum 62 chu a in chhungah sawisain a pawisa Cheng Sing 3 vel a laksak.

Pi Vanlalneihmawii hi a u, Pu Sangbiakvela te In hnuaiah khawsain Vaihlo zuara eizawng a ni a. A in hnuaia vaihlo a chhut laiin a ina misual thawm hriain a lut chho a. He misual hian dawhkanah pawisa lo chhiarin Pi Vanneihmawii chu vau betin kut a thlak a, a lu-a hliam tam tak a tawrh vangin Champhai Dist.Hospital-ah dah luh a ni.Police hotute hnen a\anga thu dawn danin he hmeithai kut thlaktu hi man tuma zawn mek a ni a, Pi Vanlalneihmawii pawh hian amah kut thlaktu pian hmang leh thawmhnaw inbel te a sawi thei a ni

Aside | Posted on by | Tagged , , | Leave a comment

FRANCE PRESIDENT ATAN “EMMANUEL MACRON” HNEH TAKA THLAN TLIN A NI

Nimin May 7, dar 8am-8pm inkara French Presidential election-ah hneh takin centrist-socialist”En Marche (I kal zel ang)” tih pawl candidate Emmanuel Macron (39) chuan, amah khingtu far-right National Front party candidate leh an hotunu Marine Le Pen (48)chu 66.1% (20,703,694) hmuin a hneh ta, Marine Le Pen hian vote 33.9% (10,637,120) a hmu a ni.

Macron hi Napoleon a hnu lama French mipuiten President atan an thlan naupang ber a ni. Hetih rualin kum 60 kaltaa vote tlakchhiat ber tum niin, 9% zet voter te chuan Le Pen leh Macron hi vote chaklo ve ve in, vote thlakna turah engmah an chhu lo tih a ni. National Front party hian kum 2002 President inthlanah 18% chauh vote an hmuh laiin, tunah 33% chuang an hmuh vangin hma an sawn hlea ngaih a ni. Kum 2002 khan Le Pen-i pa National Front party dintu Jean Le Pen chuan Jacquez Chiraq nen inkhingin, vote maktaduai 11 a lo hmu tawh a, Chiraq a hnehlo a ni.

France inthlan result hi ram dang anglo takin, poll survey a awlsam em em a, polling station 200 thlan bika vote thlaktute an vote thlakna lam kha sawi nghalin, chumi mil chuan ram pum huapa tling zawk tur a hriat ruak thin a ni. Heng thlan bik polling station te hi thingtlang, khawpui leh area bikah ruat thin a ni.

Louvre hmuna chak lawmnaah Emmanuel Macron chu a nupui Brigitte (64) leh a faten tawiawmin, Macron chuan amah thlawptute chu, “In hnehna a ni. Chawimawina ropui leh mawhphurhna lian tak ka kovah innghat a a, French mipui venghim turin theihtawp chhuah ka tum ang. Naktuk atangin hna kan thawk nghal anga; kan chakna te kan siam thar ang. Hlauhna tan hmun kan pe lo anga, kan inthen darh lovang. Thil awlsam erawh a ni dawn lo. Hna thawh chu a hautak hle ang. In huaisenna chuan hma lam min pan tir anga, kan ram leh mipuite chu ka inpumkhat tir ang. Inngaitlawm tak chungin in rawng ka bawl anga. Zalenna (liberty), intluktlanna (equality) leh inpumkhatna (fraternity) thlen tir a ni ang. Hmangaihna nen in tan ka thawk dawn a ni…Vive La Republique, vive la France” tiin, mipuiin kut beng hluah hluahin, Frane flag an vai phe suau suau mai a ni.

Marine Le Pen-i te pawl pawhin Chalet du Lac-Bois de Vincennes ah inhmukhawmin, France hnam hla “La Merseillaise” tih sa in, an ri luih luih bawk a. Le Pen chuan tun tumah chaklo zawk ni mahse, hmalam pan zel turin leh amah thlawptute chu French politic ah Eptu party lian ber ni a an thu leh hla te au chhuah pui theihna hun remchang a inherchhuak mek a ni, tiin June 11-18 a MP thlan tin zawn ranin mipuite a fuih ve bawk.

Macron hi anti-establishment atanga rawn invawrh chho niin, Donald Trump rawn tlin dan nen pawh an inang hle a ni. Khawvel ram hruaitu hrang hrangin lawmpuina an thawn tawh a, Russia President Vladimir Putin erawh a tel ve lo! Donald Trump chuan thlawp zawk lo mahse lawmpuina a thawn nghal a, British PM Theresa May chuan, “President thar nen chuan kan thawkho ang a, France leh Britain chu inthian tha tak a ni reng ang” a ti. Australian PM Macolm Turnbull leh ex-PM Kevin Rudd te pawh lawmpuina an thawn a, German Chancellor Angela Merkel pawhin, “Europe ram chak zawk leh Franco-Germanthawhona tha zawk leh chak zawk a awm ang” tiin, lawmpuina thu thawnin EU Commission President Jean Claude Juncker chuan, “French mipuiten Europe future tur an siam ta, Europe chu a chak zual ang” tiin, EU Council President Donald Tusk pawhin, “Liberty, Equality, Fraternity…” tiin, lawmpuina a hlan bawk.

May 15 ah President nihna chelh tanin, May 14 ah President Francois Hollande chuan thuneihna a kutah a hlan ang a, June 11-18 ah MP inthlang lehin Macron hian Parliament (National Assembly) ah a mi duhzawng French PM tur a ruat ang. Ama pawl din En Marche chuan MP pawh an la nei lo, mi 15 candidate tur hming erawh an puang tawh! Le Pen i pawl National Front erawhin MP 2 chiah an la nei bawk. Heti chunga an invawrh sang thei hi an ngaihsanawm dun hle a ni.

Hetia Macron a chak ve leh hian Euro pawisa hlutna chu thla 6 chhunga a san ber a thlengchho dawrh a ni

Aside | Posted on by | Tagged , , , | Leave a comment

Sex video i siam khan

VANNEIHTLUANGA
🙏🏻🙏🏻🙏🏻✝🙏🏻🙏🏻🙏🏻
I chunga thil thleng ni sela, i beih leta i khin nasat zawh poh leh i ‘channa film’ a lar ang. A lar zawh poh leh i mualpho bawk ang.
Court-a thiam i channa khan mipui computer files a nawhrehtir thei chuang lo. Nawtreh zo vek thei pawh ni la, i kapkar kha ‘public property’ a ni ta tlat a, ‘mipui mitthla’ i nawhrehsak thei tawh chuang lo.

Tin, digital khawvelah kan awm a, digital video clip copy khat a awm hian copy sangkhat a darh nghal angah ngai rawh. I nawtreh zo vek emaw i tih kha a rawn inlar leh thin ang. I zawn nasat zawh poh leh an roh dawn. I hming a thata mi hriat i hlawh rei zawh poh leh ‘i channa film’ chu a dam rei ang.

I piangthar a nih pawhin, testimony i sawi zan inkhawm banah i film testimonial zawk kha an release thar leh thin ang. I kalna apiangah i dam chhungin ‘he chhinchhiahna’ hian a zui tawh dawn che.

I kawppui chuan a iai chuang lo che a, in innei a, fa in nei ta. Ngai teh, a awmzia a hriat thiam hma atangin i fa chu an chhaih dawn. I fa chuan i film siam chu a la en dawn…

A reh tawh emaw i tih hnuah, i fanu pasal neihna Sawmna Card in han sem ang a, “A nu chu maw… hmana zahmawh film lar deuha mi kha…” an la ti dawn chauh.

I sex video minute khat emaw lek hmang hian, nangmah mai ni lovin, i tu leh fate engthawlna tur thlengin i rehhlumsak thei. Inawhhlum pawh a sawt chuang lo.

I thlarauvin vanram a kai pawhin i video chuan rinawm takin lei lamah sual rawng a bawl chhunzawm zel ang. Heti khawpa ruh langa kan inhrilh hnu pawha i siam duh talh a nih chuan.. i thu a ni e.

Aside | Posted on by | Tagged , | Leave a comment