TUIKUAL SOUTH TLANGVAL TUIAH TLAHLUM

May 8 sunday chawhnu lam khan Reiek kai, Tlawng luiah Tuikual south tleirawl mi 2 tui an tlahlum.

F. Lalchhandama (18) s/o F Lalmalsawma leh C. Lalremkima (16) s/o C. Lalngaihawma sec-4 ve ve te an ni.
C. Lalngaihawma (Mapuia) hi tui ah tla in a thianpa F. Lalchhandama hian chhan a tumna lamah a tla ve ta nghal niin thulakna hian a tarlang a ni.

Tuitla te hi an tlakna ațanga 200mtrs velah an ruang hi hmuh a ni.

Advertisements
Aside | Posted on by | Tagged , , | Leave a comment

MIZO SEX VIDEO&PIC CHUNGCHANG. (Marlon Tetea Chhakchhuak)

Mizo sex video&Pic hi hmuh tur a awm ta nual mai le.. Heng Video&Pic rawn thehdarh fo tu te hi Mizo Mipa te kanni tlangpui thin… Fin a hun a, Harh avan hun em..
.
Kan Mizo nula te hi tumah famkim an awmlo a, Zu duh tak leh Hur herh tak pawh an awm nual ta ve ang chu… Bible pawn “Anmahni ah chuan: hurna an ching a” a tih kha… Tungchho a kal mihring hi Hur lo tak tak kan awm hleinem… Hmeichhia te hi hur ve ta miah lo se a mangang tur chu mipa te hi kanni awm e… Ngaihtuah zawm zel teh le…
.
Hmeichhia te mi awmnem leh chaklo zawk anni a, Mipa te ring ngam in an sex video emaw Picture emaw pawh min thawn ani thei e, Engvangin nge kan lo thehdarh leh fo thin le? Hmeichhia hi Chhia annih na lai ah pawh a mualpho sa hi annia, a aia nasa a tih mualpho duh tu Mipa chu MIHRING a chhiar tlak ani lo ve…
.
Hmeichhia te hian engvangpawh nise, Tisa chakna hi annei ve vek a, chu antisa chakna phuhruk sak thei tu chu mipa anni… An harsatna leh an mamawh Phuhruk tu leh an nihna ang tak a pawm thiam an mamawh ve fo asin…. Engatinge Mihring tlinglo tur khawp a mualpho a kan siam fo thin ni….
.
Mizo mipa ten hei hre thar teh ang u… Kan mizo nula ten hnam dang Vai/Negro an lo kawp anih chuan an tisual chhiava der a… Mahse engatinge an mualpho ti zual tur a, kan thehdarh chiam mai zel ni….. A tihsual man chu aman ala tel khawp ang… Kan hnam rohlu kan hnam darthlalang Kan nula te ah hian mifel hlir hmuh inring lo ila, Mi hur herh pakhat kan hmuh avang a, mizo hmeichhe pumpui Mualpho hi enge a ngaihna? Engvanginnge thehdarh chak a kan zat et et zel mai mi?
.
Tumah famkim kan awm lo tih kan hria e… Famkim lo in Famkimlo bawk tih famkim loh belhchhah hi sim ahun ta e…. engang pawn lo rui sela, lo che over sela… A duhtawk in lo hur sela, a thu alawm… A siamtu in a chunga a rorel sak hun nghak ila, A damchhung kumkhaw chawrlohna tur lo siam sak fo hi sim tawh teh ang u.

Hei hi ram leh hnam humhalhna kawng khat chu ani e.

Aside | Posted on by | Tagged , | 1 Comment

I duh i chiang em

*Hmeichhe Simple deuh ka duh kan ti a – In chei nalh ver vawr chu hmuhnawm kan ti leh hle si*

*Kut hnathawh ka ngaisang kan ti a – Makpa atan chuan kut hnathawklo nge nge chu kan duh leh si a*

*Cement Mistiri hna hi Mizo ten thawk ang u a tha ti tu khan – A fate Cement mistiri nih tumin a train ngai miah lo*

*Hausa ka ngaisanglo kan ti a – Hausak nge nge chu kan chak a, hausak tumin kan phe suau suau a*

*Hmel chu a ni ber lo kan ti a – Hmeltha nge nge erawh kan thlek ngunin, kan thin lai deuh*

*Khawvel lama san kher a ni lo kan ti a – Khawvel thila sanglo erawh kan ngaisang mawh khawp*

*Kan ngaihsan leh kan duh hi kan lo hre tak tak lo nge, a lem hian kan nung mai mai le……*

Aside | Posted on by | Tagged , | Leave a comment

FRANCE PRESIDENT THLANIN EU A TIPHEL ANG EM? EMMANUEL MACRON EMAIL HACK SAK A NI

Naktuk Sunday zing 8am-8pm inkarah French mipuite maktaduai 47 voter te chuan an ram President tur an thlang dawn ta. EU leh Globalization dotu far-right National Front leader Marine Le Pen (48) leh EU tantu, left-centrist En Marche (On the Move) hotu Emmanuel Macron (39) te chu second round vote/finale ah inkhing tur an ni.

Macron a email hi “hack” sak niin tarlan a ni a, Interior Ministry lam chuan an chhui zui leh zui loh an puang zar lo. Russia President Vladimir Putin chuan French Presidential election ah an inrawlh loh tur thu a lo sawi tawh a, he Macron-a email hack tute hi tute nge hriat a ni lo. WikiLeakslam chuan heng email hack atangin thlalak leh message andawng teuh tih an sawi a, heta hack-na hmanrua hi EMLEAKS tih niin an sawi a ni.

Marine Le Pen chuan a final campaign thlalak chu kum 800zet a upa, Middle Ages hun laia France Lal zawng zawngte-mi 25 lai Lallukhum an lo khumtirna hmun Reims Cathedral hmun atangin a thlalak a rawn tarlang a, he lai hi France hmar lama awm ni.

Macron thung chuan kum Zabi-16na hun laia sak Rodez Cathedral atanga a selfie thla a lo tarlang a, he lai hi France chhim thlang lam a ni.

He mite pahnih atangin tling zawk tur hriat an harsa hle a, Barack Obama chuan Macron hi a thlawp tih a puang a, Donald Trump chuan Le Pen hi “French mipui aiawh dik tak” tiin comment a lo pe tawh bawk.

An tling a nih chuan Le Pen chuan tlin lawmna inkhawm chu Chalet du Luc hmuna Napolean III chennah lawm a tum a, Paris chhak lam Bois de Vinnes ah a ni ang. Macron erawh chuan Esplanade du Louvre, central Paris ah lawmna neih a tum thung. Le Pen chuan Macron-a thlawptute’n tharum hmangin an bei a, an tibuai thin tih a sawi a; Macron hian amah thlawptute chu “Le Pen chu aukhum (boo) satliah suh u, bei (fight) rawh u” tiin a lo fuih tawh a ni.

France inthlan hian Mizo thenkhatten “Sakawlh” ang hiala an sawi, European Union (EU) kal zel dan tur bakah, khawvel a nghawng dawn vangin ngaihven a hlawh em em a, “Mizo Special Report” member nuai 1 leh sing 9.3 vel pawhin in hriat ve in phu em a hriat a nih vangin, report kan han ziak hram hram thin a ni e. Obamacare, an lo sawi Sakawlh, erawh chu Trump Admin-ten a vuakhlumna turin House ah 217-213 in an lo paihsak tawh bawk si!

Poll hnuhnung berah chuan Le Pen-61.5%, Macron-62% angin an chhut sak. An boruak hi a inbuk tawk (neck to neck) hle a ni

Author : Ct Lalrinawma

Aside | Posted on by | Tagged , , , | Leave a comment

HNAM PASALTHA MARTAR PANGATE RUHRO MIZO HNAM RUNAH HMUAH A NI.

Vawiin hian Mizo Hnam Run-ah Martar panga (5) te ruhro hmuahna hun hman a ni a, Martar-te hi B Theichangbung khaw ram, North Hlimen bul, Kolasib District ațanga lak a ni. Nizan khan Kolasib Tumpui Veng YMA Hall-ah tlaivarpui a nih hnuin vawiin khan Mizo Hnam Run Aizawl thlenpui a ni a, Martar chhungte leh mipui e’ngmaw zatin Hnam Runah hian lo hmuakin hun hman nghal a ni.

MNF President Pu Zoramthanga chuan thusawiin, Pathian leh ram tana an nunna hlu tak hlantute chu MNF-in thinlung takin a chawimawiin a zah tih a sawi a, Martar-te thihchhan he ram malsawmna kungpui hi Pathianin Martarchhungte leh Zofate zawng zawngte tan a sawi țil dawn. Chu hun Zoram malsawmna lo thleng tur chu Zofate hian beidawng lovin i nghak ang u, a ti.

Pu Rama chuan MNF-in martar-te a ngai pawimawh hle tih sawiin, kum tin September ni 20-ah urhsun takin Martar-te Ni a hmang thin a. Vaibelchhe telin Martar thlanmual siam a ni a, he thlanmual hi Pathian leh mipui zara MNF-a sorkar chuan a let tam takin thuam mawi belh a ni ang, a ti a. Remna a awm hnuah Martar-te lakkhawm hna theih ang anga thawh zel a ni a, lakkhawm loh kan la nei nual a, a țhente erawh chu pangai taka vuiliam an nih avangin lakkhawm ngai lote an awm bawk a. Bangladesh leh hmun hrang hranga la awmte hi theih ang anga lakkhawm a, a hlawm deuha vuina hun urhsun taka hman a ni dawn a ni, a ti.

Ram leh hnam tana nunna hlantu Martar-te hi
1. 2nd Leut. Lalrinliana S/o Aizika, Ngopa
2. Leut. Thanseia S/o Liana Sawleng
3. Pvt Lalhmingliana S/o Zaluta, Kawlkulh
4. Kapzawna, Mizo National Volunteer (MNV) S/o Rosua, Kawlkulh,
5. Romawia MNV S/o Bawihchhuana, Zanlawn
te an ni.

Heng Martar zinga a hmasa palite hi 11 July 1968-a Theichangbung thlawhhmaa India Sipaite kahhlum an ni a. An ruang hi khuaa lakluh sipaiin an phal loh avangin ram pilril-ah hian phum an ni. Martar dang Romawia MNV S/o Bawihchhuana, Zanlawn hi 23.4.1968-a Theichangbung khuaah kahhlum a ni a, a ni hi chu Theichangbung Thlanmual-ah hian phum a ni thung.

He inkhawmah hian Pu C Zama, Ex MNA Vice President-in Martar-te chanchin sawina hun a hmang a, Pu PC Lalrinkima Treasurer, Ex MNA Association-in Martar-te ruhro lakchhuah a nih dan report a pe bawk. He inkhawmah hian Martar-te chhungkaw aiawhin thusawina hun an hmang bawk a, inkhawm hi Pu K Vanlalauva National Core Committee Member-in a kaihruai a ni.

(LALLENMAWIA JONGTE)
Joint Secretary
Mizo National Front
Media & Publicity Deptt
Memo No.MNF/Media/2017/59
Dt.5.05. 2017.

Author : Zuala Hnamte

Aside | Posted on by | Tagged , , , | Leave a comment

FASTEST MOVING CITY-AIZAWL

Aizawl khawpui chuan Swachh Survekshan 2017hnuaia ‘Fastest Moving City In Northeast’ chawimawina a dawng.

May 4 khan National Media Centre, New Delhi-ah Central Sorkar buatsaih City Sanitation ranking Survey’ Swachh Survekshan 2017′ neih a ni a, hetah hian khawpui fai thlan zingah Aizawl khawpui a tel a ni. Central Urban Development Minister Venkaiah Naidu chuan he chawimawina hi semin, Aizawl Municipal Corporation (AMC) aiawhin Addl. Resident Commissioner, Mizoram House, New Delhi Pu David Lalthantluanga chuan he chawimawina hi a dawng a.

AMC Commissioner Dr H.Lalthlangliana chuan Aizawl khawpui in faina kawnga hmasawn chak ber North East-aha dawng thei chu lawmawm a tih thu sawiin, he hlawhtlinna hi SIPMUI, UD&PA, AMC thawhhona rah a nih mai bakah Aizawl khaw mipuite tan lak na rah liau liau a nihthu a sawi a ni.

Tar lan tawh angin India ram khawpui 500 atanga khawpui fai thlanchhuah tak ah hian Madhy Pradesh-a Indore chu khawpui fai ber-a thlan a ni a, Bhopal pahnihna niin Vishakapatnam chu khawpui fai pathumna a ni bawk.

Author : Saihmingliana Sailo

Aside | Posted on by | Tagged , , | Leave a comment

CANCER THLENTUA PUH JOHNSON&JOHNSON-IN THIAMLOH CHANG, $110M CHAWI TURA TIH A NI

Missouri court a roreltute chuan vawiin khan Virginia nu pakhatin Johnson & Johnson talc powder a hman vanga a chi kawng /bawm cancer nia a puhnaah court chuan thiamloh chantirin Johnson&Johnson chu$110 million chuang chawi turin thupek a chhuah.

May 4 khan he thubuai hi J&J leh talc powder supplier Imerys Talc lakah Lois Slemp, Virginia a mi chuan court ah a thehlut a, Lois-i hi kum 2012 atanga chi kawng cancer niin chemotherapy hmanga enkawl ni mahse a cancer vei chu intaidarhin a thin a thleng tawh nia tarlan a ni a, hei hi a chhan chu kum 40 chhung zet heng talc powder J&J siam a hman vang niin a puh a, J&J Baby Powder leh Shower to Shower Powder thlengin a lo hmang thin niin a sawi.

Thubuai remtute chuan J&J dik lohna hi zaa 99 niin supplier Imerys i dik lohna chu zaa 1 a ni thung an ti a, J&J hi $105 million chawi turin an ti a, Imerys hi $50,000 chawitir a ni dawn bawk.

Hetiang chi thubuai J&J laka lungawi lohna hi St Louis chuan 2,400 zet an nei a, J&J product leitute pawh warning an pe hial reng a, Johnson`s Baby Powder pawh hmang lo mai tura hriattir an ni a, St. Louis hian thubuai te hi an pending nasa hle a, tunah hian thubuai ngaihtuah lai mek pali J&J leh supplier ten $197 million an chawi theihna tur an nei a ni.

Lois-i lawyer Ted Meadows chuan J&J hian ‘scientific evidence’ kan nei chung pawhin American hmeichhe ho laka an mawhphurhna leh dik lohna te an la pha a ni a ti.

A lehlamah J&J ve thung chuan hmeichhia chi kawng / bawm cancer te an tawrhpui thu sawiin court thutlukna chu appeal an tum thu an sawi a, kumin chhunga rorelna dang hmachhawn tura inbuatsaih an tum thu leh Johnson`s Baby Powder te humhim an duh thu an sawi bawk.

May 2016 pawh khan hmeichhe pakhat J&J`s talc-powder products hmangtu pawhin a cancer phah tiin thiam a lo chang tawh a, J&J hian $55 million an lo chawi tawh bawk a ni.

Author :

Aside | Posted on by | Tagged , , | Leave a comment

NIRBHAYA PAWNGSUALTUTE KHAIHLUM AN NIH NGEI HMEL

India ram mai pawh nilo, khawvel nghawr dawt khawp pawngsual rawnna rapthlak, kum 2012 a Delhi khawpuia thleng, “Nirbhaya Gangrape” kha kan la hre reng in a rinawm.

Kha thubuai kal zelah khan pawngsualtute kha khaihlum tura an chungthu rel a ni tawh a. May 5, khan heng pawngsualtu zinga 4 te’na an appeal na chu India ram rorelna sangber, Supreme Court ah ngaihtuah a ni a. Supreme Court chuan thi tura an chungthu a lo rel tawh chu tidanglam lovin, heng mite hi khaihlum ngei hmel.

Kum 2013 a Delhi High Court in thiamloh chantir a, thi tura an chungthu a lo rel, March, 2014 a a nemngheh tawh, Nirbhaya pawngsual a rawng taka that zui tu mi 4, Akshay, Pawan, Vinay Sharma leh Mukesh te’n rorelna sang zawka a an appeal chu vawiin khan SC hian a ngaihtuah a ni.

Hetihlai hian Nirbhaya nu, Asha Devi chuan, ” Heng misual ho hian thihna chiah an phu a ni. Hei hi tihdanglam a nilo ang,” a ti.”

Rorelna (judicial system) hi kan ring hmiah a, Supreme Court hian thiamloh chantirna thu leh thi tura tihna hi a puang ngei ang tih kan chiang a ni. Hei hian khawvel tan example a siam ngei bawk ang,” a ti.

December 16, 2012 khan Nirbhaya, kum 23 mi, paramedic zirlai chu Delhi khawpuiah, bus tlan lai chhungah misual 6 in rawng tak a pawngsual rawn in, duhtawka an pawngsualrawn hnu ah a serh ah thir tlawn (iron rod) an hawlh luh saka, chumi hnuah a thianpa nen bus atanga theh chhuah an ni a. India ram a a enkawl a nih hnu-ah Singapore damdawiin lamah phurh chhoh niin, hetah hian a hliam hi a nasat em avangin December 29 khan a boral ta a ni.

Pawngsualtu mi 6 zinga pakhat, Ram Singh chu taninah a inawkhlum a, an zinga kumtlinglo, (juvenile) tel ve chu nikum August thla khan thiamloh chantir niin kum 3 chhung reform home a awm tura tih a ni bawk.

Kum 2014 a heng misual tena an appeal khan Delhi High Court chuan he pawikhawihna phenah hian:
“hurherhna, nunrawnna, pawikhawih chakna, duham luatna, awmngaihna hriatlohna” te a awm a ni, tiin an appeal hi a hnawl sak tawh a. Hei bakah hian rorelna chuan he pawikhawihna hi, “tenawm uchuak hlawmhlak leh phat rualoh, nunrawnna uchuak, ramhuai hnathawh leh pawikhawih chakna hrim hrim”

a ni a ti bawk.

Heti ang a nih avang leh hei hi hmeichhia te dikna leh zalenna atana thil sensitive lutuk a nih avangin Justice Dipak Misra hian hian death sentence pek hi a hreh dawn loh avangin SC hian heng pawikhawihtute hi hremna nep zawk a pek a rinawm loh tih ANI chuan a sawi.

Author :

Aside | Posted on by | Tagged , , , , | Leave a comment

MIZO NULA CHHUANAWM, A TAIMAK LEH TUARCHHEL VANGA IT KHAWVELA FOREIGN THLENGA HRIAT HLAWH CHU!

Mizo zinga kan hriat theih chinah IT lama US a hna thawk 7 vel awm zinga mi Nl. Vanlalveni Ralte, Maveni Ralte, d/o RL Rindika, Bungkawn, Aizawl hi pian phungah dawl kai zet zawt ni mah suh se, a rilru erawh kahpathir ang zeta khauh a ni lawi si!

Ruh lam hrisel lohna a neih vangin kum 4 mi a nih laiin Delhi ah refer a ni a, engtin tin emaw ziaawm chhovin B. Tech a zir laiin transplant an tihsak ta nge nge a, a hrisel lohna hian a ha thleng a a khawih avangin vawi 4 zai a tawk a, education loan a hmuh pawh inzai nan hian a hmang zo vek a ni.

Hetia zai a tawh reng reng hian a chhungte buaipui lohvin a thiante, hnamdang hovin an buaipui mai a, ‘severe hypoglycemia’ nei a nih vang hian office ah pawh han buai deuh changte neiin a thiante leh thawhpuite buaipui ngaiin vawihnih chu a tlu nghe nghe a, he a hrisel lohna vang bawk hian vawi 2 chu US a awm hnuah zai a tawk leh nghe nghe. ‘Hmeichhe awmnem’ tia kan sawi thin zinga mi hi a lova tuarchhel theih ngai em! Heng harsatna hrang hrangin a chim buaina te hi hma lam thlira a tumruh tlatna chuan a lehthal tir hram hram zel a, mi hlawhtling a lo ni thei ta.

Little Flower School ah Kg – Class I a zir a, Class II – VII Holy Mission, Bungkawna a zawh hnuin Class VIII – XII chu St. Paul’s ah a zo leh a. Tichuan, a tum hlenchhuah nan JNTU, Hyderabad atangin B.Tech, EEE (Triple E) a zo leh a, Class X – B. Tech hi First Division-ah vek a pass a, amah chuan zirnaah hian thiam filawr ka ni ngai lo tiin inngaitlawm takina sawi nghe nghe.

A thiamna avang chuan Tata Consultancy Services ah Assistant System Engineer in a lut nghal a, a hnu ah IT Analyst ah a kaisang a, a thawh that em avangin kum 4 hnu, 2013 July atangin Atlanta, Georgia, US ah project kalpui tura tirh niin February thla thleng a thawh hnuah March thla atangin New Jersey a Avis BudgetGroup ah Project Administrator hna tun thlengin a la thawk a, TCS hian New Jersey leh Denver ah hna hi an hmuhsak a, New Jersey ah a kal ta zawk a ni. Kum 2019 thleng Visa a nei a, a project a zawh hunah India ah lo kirin Tata company ah a thawk chhunzawm leh ang.

Author :

Aside | Posted on by | Tagged , | Leave a comment

HEL HOIN AN KAHHLUM MIZO TLANGVAL NAKTUKAH MIZORAM THLENPUI DAWN

Nimina Nagaland hel NSCN ten an kahhlum zinga mi Mizo tlangval Jerusalemthara ruang chuan naktuk hian Mizoram thlenpui beisei a ni a, an khua Vanbawngah vui a ni ang.

Kum 29-a upa Jerusalemthar-ahian a nupui leh a fa te pathum a kalsan a ni. Jerusalemthara hi Kum 2005 khan Assam Rifle-ah lutin 23rd Assam Rifles ah a awm mek a, nimin chawhnu dar 2 vel khan Nagaland leh Myanmar inrina thingtlang khaw pakhat atangin tuichawi turin an kal a, an motor chuanna chuan helho kam chilpuah bomb a chil puak a, helho hian kap zuiin, Assam Rifles 8 an kahhlum zingah Jerusalemthara hi vanduaithlak takin a tel a ni.

Jerusalemthara ruang hi vawiin chhun khan Jorhat panpui a ni a, hetah hian post mortem a nih hnuah, Jorhat atang hian Guwahati panpui lehin naktuk hian Lengpui airport thlenpui hman beisei a ni.

Aside | Posted on by | Tagged , | Leave a comment