Compensation fello vangin Kaladan Multi Modal Transit Transport Project hnuaia kawngpui sial mek titawp

Kaladan Multi Modal Transit Transport Project hnuaia kawngpui sial mek a hnathawktu Company pahnihte chu vawiin atang khan Compensation an hmuhtur a an ngaih an la hmuhtheih loh vangin, Lawngtlai District Land Owners Association chuan hna thawh an remti lo.

Lawngtlai atanga Myanmar ram pawhtur kawngpui sial mek a, ramneitu intelkhawm, Lawngtlai District Land Owners’ Association hi tukin khan an President Pu H.Remmawia hovin an thukhawm a, Meeting hmasa lam ah March ni 15 thleng Sorkar hmalakna ngaihchan nise an tih thu hnu ah, March ni 20 khan General Body Meeting nei lehin April 1 thleng Sorkar ngaichan ni leh phawt se an ti a, nimin thleng khan Compensation an hmuhtur a an beisei an hmuh theih nan a Sorkar hmalakna innghahngam an hriat loh vangin, tukin a Executive Meeting chuan kawngpui sialtu Company pahnih, RDS Private Limited leh Atlanta ARSS Infrastructure Limited te chu an hna kallai chawlh hrih tur in an ngen a, tuntum hi kum 2016 atang a, hnathawktute hna thawklo tur a an tih tum thumna a ni.

Lawngtlai District Land Owners’ Association te chuan Compensation hmutur mi 303 te chu District Collector in a tihfel vek tawh ni a sawiin, Sorkar chuan Compensation hi a la pe lo an ti a, helai kawngpui ah hian Duty an indah thu leh, a tuldan angin chhun zan zawm a duty an awmtur thu te, vawiin lam ah pawh Company ten hna kallai an chawlhsan tih Land Owners’ Association hruaitute chuan an sawi a, harsatna an tawh chungchang ah hian Central Young Lai Association leh Lai Students’ Association te nen Joint Meeting neih thuai an tum thu an sawi bawk..

Hetiang a KMMTTP hnuai a kawngpui sialtute hnathawhlai tihkhaihlaik a nih vang a, buaina leh harsatna thlengthei vengin Lawngtlai Police te pawh helai kawngpui hmunpawimawh lai ah hian an Duty a ni.

Advertisements
Aside | Posted on by | Leave a comment

2nd Manipur Rifles ralthuam bo chungchangah IPS Officer pakhat leh police officer dang 3 suspend

Manipur sorkar chuan kum 2014 leh 2018 inkara 2nd Manipur Rifles ralthuam dahna atanga ralthuam thenkhat bo chungchangah IPS officer pakhat leh police officer dang 3 a suspend.

State Chief Minister, N Biren Singh-a’n thuthar lakhawmtute a hrilh danin, 2nd Manipur Rifles Commandant-in dan anga ralthuam dah khawmna hmun a endiknaah automatic 9mm pistol 56 leh magazine 58 a kimlo tih hmuhchhuah a ni a, heng pistol-te hi 2nd Manipur Rifles hnena pek tura kum 2014-a State Police Hqrs-in pistol 570 a dawnte zing a mi a ni.

Chief Minister chuan ralthuam bo chungchangah hian National Investigation Agency (NIA) chu hmalak pui turin a ngen a, he thubuai kaihhnawihah hian 2nd Manipur Rifles mi 2 man an ni tawh bawk.

(Newsonair)

Aside | Posted on by | Leave a comment

Mizoram Legislative Assembly Budget Session tiamchin awm lovin titawp

Mizoram Legislative Assembly Budget Session ni 14 awh chu vawiin khan tiamchin awm lova tihtawp a ni.

Session tawpni vawiin khan Bill pathum pass a ni a, Chief Miniter Pu Lal Thanhawla’n “The Chite Lui (Prevention and Control of Water Pollution) Bill, 2018 a vawiina House-a a putluh chu lungrual takin a pass a.
Minister Pu Lalsawta putluh “The Mizoram Protection of Interests of Depositors (In Financial Establishment) (Secnd Amendment) Bill, 2018” pawh lungrual taka pass a ni a, Minister Pu R. Romawia’n, “The Mizoram Salaries, Allowances and Pension of Members of he Legislative Assembly (Sixth Amendment) Bill, 2018” a putluh pawh pass a ni bawk a ni.

Aside | Posted on by | Leave a comment

Chakma Autonomous Dist Council inthlan neih turah Cong-in an candidate puang.

Chakma Autonomous District Council inthlanpui neih tur atana inbuiatsaihna chu ngawrh taka kalchhohpui mek a ni.

CADC ah hian tun thla ni 20 khian MDC thlanna tur atan mipui ten vote an thlak dawn a, inthlanna muanawm leh falfai a awmtheih nan State Election Commission chuan ruahmanna hrang hrang a kalpui mek a, CADC a MDC bial 20 a inthlanna neihtur ah hian chuhtumte tan April ni 4 thleng hian hming a pekluh theih dawn a, hming pek luhte chu a tuk April 5 ah endik a ni anga, hming pe lut, endikna paltlang zingah inhnukdawk duhte tan April 6 thleng hun hawn a ni dawn a ni. CADC a Vote tlate hi April 24 khian Chawngte ah chhiar a ni ang.

Inthlanna buaipui turin vawiin khan Election Officer Pu Lalrinawma hovin, Lawngtlai DC Office a Election Branch a thawktute chuan inthlanna bungrua pawimawh te nen Chawngte hi an pan a, inthlan zawhfel hma chuan Chawngte hi an thutchilh tawh dawn a ni. Thu kan dawn danin, inthlan kaihhnawih ah pawnlam ah boruak a la awm manglo na a, inthlan chungchang chu CADC huamchhung ah titi leh ngaihven hlawh ber a ni chho mek a.

CADC ah hian Elected Member 20 an awm thei a, an ni bak ah hian Nominated Seat 4 a awm bawk a, inthlan hnuhnung ber ah khan Congress in seat 17 la in, MNF in seat 2 an chang a, BJP Candidate 1 thlantlin a ni bawk. CADC ah Congress kaihhruai sorkar a kalchhoh hnu ah MNF Member pakhat leh BJP Member hian Congress an zawm a, tihian Nominated member te nen MDC 24 ah Congress chuan Member 23 neiin, MNF in pakhat an nei a ni.

Vawiin khan Congress Party chuan he inthlannaa an candidate turte hming an puang a, MPCC President Pu Lal Thanhawla’n candidate te hming hi puangin, seat awm zawng zawng 20 an chuh vek dawn a, candidate langsar zual zingah, CEM hlui Buddha Lila Chakma Vaseitlang a chuh tur leh Kali Kumar Tongchangya Fultuli biala ding tur te an tel a, hmeichhe candidate 1 an nei bawk a ni.

( Lawngtlai PTC)

Aside | Posted on by | Tagged , , | Leave a comment

Mizoram Sorkar leh HPCD-ten Inremna thuthlung an ziak.

Mizoram Sorkar leh Hmar Peoples Convention (Democratic), HPCD chuan vawiin khan State Guest House-ah Inremna thuthlung an ziak a.

Mizoram aiawhin Chief Secretary Arvind Ray an hming a ziak a, HPC(D) aiawhin HPC(D) Chairman Pu H.Zosangbera’n hming a ziak a ni.
An inrem dan chuan Sinlung Hills Development Council tih chu amaha inrelbawla, ram inpek thuah thuneihna a nei anga, sum leh pai ruahmanna budget pawh insiamin state sorkarah a thehlut anga, state sorkar kaltlangin central fund an hai ve remtih sak a ni dawn a ni. Sinlung Hills Council hian member 14 a nei anga, an zinga 12 chu thlan tur a ni a, 2 dang erawh state in SHC rawn chungin a dah thung ang. Chief Executive Member, Chairman leh Dy Chairman te inruatin executive member 4 an awm bawk anga, Sakawrdai emaw hmun dang remchang chu Council thuthmunah hman tur a ni a, Council hi inremna siam anih atanga thla 6 chhunga puitlin tur a ni dawn a ni.

Mizoram sorkar chuan Hmar hel sorkar kuta inpe te chu chhawmdawl zuiin sum leh paia tanpuina awm thei ang te a dapsak dawn a, tun dinhmunah sorkar kuta inpe tur zat hi sawi thei lo mahse 100 chuang an nih rin a ni a, anmahni lo lawmna pawh rokhawlhna dang a awm anih loh chuan karleh ni 12 khian CTI Sesawngah nei tura tinzawn a ni.
Inremna thuthlung ziahnaa tel Chief Minister Political Adviser, HPCD leh sorkar Political Level inbiakna kaihhruaitu Pu Lalrinmawia Ralte chuan he hunah hian thusawiin, Hmar unaute nen inremna tluantling siam a ni chu thil chhinchhiah tlak ta a ni a ti a, unau inkarah chuan inremlohna thleng thei a ni a, amaherawhchu tha taka dawhkan kila sawiho a inrem chu a hlu a ni a ti a, ram hmangaihna avanga ralthuamte dahthaa, political leader ten an hmalakna te dahthaa remna leh muanna a awm theih nana an inpekna chu a ropui takzet a ni a ti.

(Audio) HPCD Chairman Pu H Zosangbera chuan Mizoram sorkar nen remna kawng zawnga inbiakna an neih tluang taka zawhfel anih theih chhan chu inrintawnna leh inhriatthiamna thui tak an neih tawn vang a ni a tia, hetianga intiamkamna chiang tak awm loa sorkar nena inbiakna hi khawi hmunah mah a awm a la hriat loh thu sawiin, inpum duhna tak tak lo chuan inremna hi a hring chhuak lovang tih tihchianna langsar tak a ni a ti.
Tuna tuma HPCD leh Mizoram sorkar aiawhte inbiakna hi kum 2016 August ni 10 khan tan a ni a, tum 6 an inbiak hnuah inremna tluantling hi siam a ni ta a ni.

HPCD Chairman Pu H Zosangbera chuan Mizoram sorkar nen remna kawng zawnga inbiakna an neih tluang taka zawhfel anih theih chhan chu inrintawnna leh inhriatthiamna thui tak an neih tawn vang a ni a tia, hetianga intiamkamna chiang tak awm loa sorkar nena inbiakna hi khawi hmunah mah a awm a la hriat loh thu sawiin, inpumkhatna duhna tak tak lo chuan inremna hi a hring chhuak lovang tih tihchianna langsar tak a ni a ti.

Tuna tuma HPCD leh Mizoram sorkar aiawhte inbiakna hi kum 2016 August ni 10 khan tan a ni a, tum 6 an inbiak hnuah inremna tluantling hi siam a ni ta a ni.

Aside | Posted on by | Tagged , , | Leave a comment

PWD engineer te an insawifiah leh ta e

KAN HNATHAWHAH THA LO LAI A LO AWM THIN HI A PAWI TI BER LEH HREHAWM TITU BERTE CHU A THAWKTUTE HI KAN NI A , PWD CHHUNGKUAAH PAWH KAN INFUIH NASA HLE
by Mizoram PWD Engineers Welfare Association (MIPEWA)

MIZORAM PWD ENGINEERS WELFARE ASSOCIATION chuan thu chhuah siamin, PWD-in Aizawl – Thenzawl – Lunglei Raod theihtawp chhuaha kan thawh mek laia hna tha tawk lo lai a a lo awm hi pawi kan ti tak zet a. Kan hnathawhte hian hetianga thalo lai a lo awm thin hi a pawi ti ber leh hrehawm titu berte chu a thawktute hi kan ni a, PWD chhungkuaah pawh kan infuih nasa hle a ni tih Mizoram mipuiten min lo hriatsak turin kan ngen che u a ni an ti.

MIPEWA chuan, Hetih mek lai hian heng thil thleng kaihhnawiha Aizawl – Thenzawk – Lunglei enkawltu PWD EE, SE leh Minister thlalak Lunglei Thalai Pawl inti te’n an hal mai hi a uchuakin, a Mizo lova, a Kristian lo kan tiin hetiang hi Mizoram khawi hmunah mah tute chungah mah thleng tawh lo se tih hi kan duh dan a ni.

Tin, kan thawhpui Pu R.Laldinliana, MR/Chowkider Pukpui hmuna Hot Mixed Plant enkawltu chu Ni 26th March khan Police Station-ah hruai a. SP Lunglei in, “A tah hma chu vaw rawh u,” a tih angin nasa taka vuak leh nghaisak a ni a, amaha kal theilo leh haw thei lovin a awm a, a chhungten Police Station atanga Motor-a phur hawngin, Christian Hospital, Serkawnah an admit hial a ni.

Mizoram Police-ah Officer leh thawktu dang fel tak tak an awm laia Lunglei District SP leh a hote thenkhatin kan thawhpuite chunga an chet dan hi hriatthiam har kan tiin kan dem takzet a ni an ti bawk.

Ni 29/3/2018-a Mizoram PWD Engineers Welfare Association Emergency Meeting chuan heng a hnuaia mite hi
lungrual takin an pass :-

  1. Dan lo anga mi nghaisa tura a naute thu petu Lunglei District SP Pu Lalthafamkima Jongte chungah hian a phu tawk ang hremna pek ni rawh se.
  2. Print leh Social Media lama thu/thlalak/Video thehdarhte finfiah a nih hmaa sorkar hnathawkte chungah action lak thinhi tih tawh loh nise kan ti.

3. Lim, Thlalak etc. inhalsak hi a Mizo lovin a Kristian lova, tun hnuah thleng tawh lose kan ti.

Author: Slchhunga Gooner

Aside | Posted on by | Tagged , , | Leave a comment

SCIENCE & TECHNOLOGY HMALAKNAIN THENZAWL JOINT YMA LEH ZOTREK TE NEN VANTAWNGKHAWHTHLA SAN ZAWNG TEH DAWN

Mizoram sorkar Science and Technology Department chuan Thenzawl Joint YMA leh Zotrek Youth Adventure Club te nen Vantawngkhawhthla sang zawng dik tak hriat tumin Laser Range Finder hmangin, 2nd April, 2018 hian an teh dawn.

Vantawng khawhthla san zawng teh tha tur hian Zotrek leh Science Technology department te chu an inbuatsaih mek a, ruahman lawk ang chuan Thawhtanni April ni 2 khian kawng hrang hrangin an teh dawn a ni. Hemi atana inbuatna chikhat atan nimin khan Zotrek Youth Adenture Club leh Science and Technology Department hotute chuan Hawla Indoor Stadium Republic Vengthlangah thil tul leh pawimawhte inhrilh hriatna hun an hmang.

Vantawng khawhthla tehnaah hian Zotrek Youth Adventure Club atangin khawvela tlang sang ber lawn chhuak tawh Pu David Zohmangaiha leh Lalrintluangi te pawh an tel dawn a. Vantawng khawhthlaah hian mi 30 bawrvel hrui hmangin an uaithla dawn a ni. A san zawng teh nan hian tunlai khawvela sang zawng teh nana an hman lar ber Laser Range Finder hman a ni ang.

Vantawng khawhthla san zawng tehnaa tul leh pawimawh sum senso tur te hi Science and Technology Department lamin an tum dawn a ni.

Vantawngkhawthla san zawng hi Zotrek Youth Adventure Club leh Mission Veng Youth Adventure Club tangdun te chuan nikum 2017, Febuary ni 4 khan Measuring tape leh Altimeter hmangin an lo teh tawh a, hemi tum hian metre 99 (Feet 324) nia an hriat thu an sawi a, hei hi social media lamah pawh an tlangzarh a ni.

Tunhma lam atang tawhin Vantawng khawthla sangzawng hi metre 229 (feet 750) niin sawi a ni thin a. Naupang zirlaibu thlengin feet 750 nia tarlan a ni thin a, Wikipedia lamah pawh feet 751 nia tarlan a ni.

Zotrek leh Mission veng Youth adventure team ten nikuma an teh-a a san zawng an hmuh dan leh tunhma lam, kum tam tak kal tawh atanga kan lo hriat thin dan nen a san zawng a inthlauh tak lutuk avangin, Mizoram sorkar hnuaia Science & Technology Department chuan a nih dan dik tak hriat tumin hma a dawn ta a ni.

Vantawng khawhthla san zawng tehnaah hian report siamin kal ve kan tum ruh hle a, kan report te hi mipui thlir theih tura rawn chhawp chhuah kan tum dawn a ni.

Author : Vanneihthanga Vanchhawng

Aside | Posted on by | Tagged | Leave a comment

YMA SUB HQRS. LUNGLEI KAIHHRUAINA IN, PWD LEH POLICE DEPT TEN, PUKPUI TO TLAWNG KAWNG SIAM CHUNGCHANG LEH HE KAWNG SIAM MEK AVANGA BORUAK LENG VELTE THLIR HO A NI

Vawiin, Dt. 2.3.2018 Thawhtanni Chhun Dar 12:00 khan, YMA Sub Hqrs Lunglei Office ah, YMA chuan PWD leh Police Department te lengah an sawm a.PWD hi, SE Lunglei Circle hovin, EE Pathum leh SDO Pakhat an rawn kal a. Police lam hi SP leh Addl SP te an lo kal a.

Inkawmhona hi Pu R. Lalnunthara President YMA Sub Hqrs Lunglei in a kaihruaia, PWD leh Police Dept. te YMA sawmna ngaipawimawha an lo kal chu, lawmthu a sawi.

He inkawmhona ah hian Tlawng to Pukpui kawng siam that hna thawh mek chu, PWD te hian theihtawp chhuahin tan hanla leh se.

Tunah hian EE, SDO leh JE te hi a thar vek an ni a,Chuvang chuan Police leh mipui lam te pawhin a theih ang anga an hnathawhna kawnga kan tangkai theihna ah tangkai tum tlang ila kan duh tlang hle kan ti.

Tin,he kawng siam boruak avanga PWD leh Police Dept te inhriatthiam lohna leh Social Media a thu dengkhawng tak taka invawm tawnna awm mek chu, YMA te chuan pawi an ti a.

PWD leh Police Dept te hian an hmalakna leh hmachhawpte leh an rilru natna te an sawi tawn a.Heng an thusawi hrang hrang atanga inhriatthiam ngai awmah te inhriatthiam tlan ni se an ti a, Security chungchangah pawh thil inhriattawn loh avanga Social Media lama thil dik tawk lo va in puhmawh theih thil lo lang leh mai te chu, he inkawmhona a tel te chuan pawi an ti hle.

A in ep zawng emaw boruak sosang thei zawnga thu hla awm thei ah theihtawp chhuaha a ven hna pawh thawh tlan ni se, thawhhona tha zawk hnuaiah, kan mamawh ber kawng siam hna hi tha taka thawh ni se an ti.

YMA President chuan, rilru inpawh taka inkawm hona an nei thei leh Inhriatthiamna thuk tak inkawmhoten an nei tawn thei chu lawmawm a ti hle mai a, chu chu a taka ti hlawhtlingtu ni theuh turin a ngen bawk a ni.YMA ten inkawmhona hun an buatsaih chu, Police leh PWD lam te pawh hian lawmthu an sawi bawk a ni.

Sd/-
K. LALFAKZUALA
Secretary
YMA Sub Hqrs Lunglei.

Aside | Posted on by | Tagged , | Leave a comment

LUNGLEI THALAI TEN SE PWD OFFICE KAL TUR DANGIN AN ZILHHAU

Pukpui to Tlawng inkar kawng siam mek chungchangah Lunglei Thalai Pawlte chuan peaceful demonstration neiin SE, PWD Lunglei Pu C. Lalchhuana pisa kai tur chu gate ah lo hmuakin an zilhhau va, boruak muanawm tak hnuaiah hun hman niin JE pakhat Lunglei Thalaite suttlang tum vangin boruak a sosang thelh.

Lunglei Thalai Pawl Chief Organiser Pu Joseph VL Muanpuia chuan DC hova YMA, ZDU, Police leh Official te nen kan sawiho hnua PWD hna chhe tak chu tha zawka thawk tura an intiam laia hna a tha chuang si lo leh hmasawnna tur awm si lo h avangin kan thinrim hle” tiin a sawi. Pu Josepha chuan, “Lunglei Thalai Pawl hian Lunglei tan liau liau kan bei a, hetih laia PWD Staff thenkhatin min kamkhat a, min tawng min tawng thin hi a pawi kan ti hle a, PWD hi PWD a nih ngawr ngawr vanga thlur bik kan ni lo va, khi kawng siamtu leh enkawltu a nih avangin kan hmachhawn lo thei lo a ni” tiin a sawi bawk.

<

p style=”text-align:center;”>

Lunglei Thalai Pawl te hian dar 9:15 a SE dang tura hriattirna an chhuah laiin SE Office a thawk te dar 9 a Office a thleng vek turin thu an chhuah niin kan thudawnna chuan a sawi a. SE pawh hi Dar 9 rik dawnah Gate hi a thleng a, a kal hma thut avang hian Lunglei Thalai Pawl member te pawh an thleng kim hman lo va, Police lam pawh an thleng hman lo a ni.

Lunglei Thalai Pawlin S.E. an zilhhauna point hrang hrangte chu-

Nang Pu C.Lalchhuana, SE, PWD Lunglei Ṭhalai Pawl in kan lo lawm che a,

Thurawn pek tur che kan nei a, ngaithla la zàwm nghal ang che:

  1. Lunglei in heti khawpa kawng chhia kan manganpui laia a hotu ber leh a mawhphurtu ber i awm bo daih mai hi a zahtheih loh thlak hle mai. Zahna chang hria la sim ang che.
  2. I hnuaia thawk te nawr hmanhmawh na’n a transfer a vau i chîng hi sim rawh.

  3. I hnuaia thawkte i vau leh i inthlahdah avanga KAWNG SIAMNA SUM TAM TAK, awmze nei lo a luangral zawng zawng kha HLAWH TAM I INTI BAWK A, rul turin kan hriattir a che.

  4. Dãwn leh Haulawng inkar kawng, ‘kan siamțha vek tawh’ i tih, la chhe em em si saw rang takin siam țha la, dâwt sawi hi bansan nghal ang che.

  5. Office chhûng ațanga kawng țhat thu sawi zawt zawt ringawt lo in a hmun ah ngei en țhin tawh ang che.

  6. I hnuaia thawk te fuihpawrh a thuchhuah tir hi sim tawh ang che.

  7. Keini Lunglei Fahrin te hian kan LUNGLEI hi kan hmangaih a sin. Lunglei hian min hmangaih lotu officer kan duh lo che a, chuvangin, rang tak in i TIHDUHDAH LUNGLEI HI chhuahsan turin kan hriattir a che

Zoram mipuite’n hei hi min lo hriatsak ula kan duh. Lunglei Țhalai Pawl hian mimal leh pawl huat bik leh duhsak bik a nei lo.

Lunglei țhatna leh hmasawnna tur dãltu apiang erawh a tâwp thlengin kan bei lêt zel ang.

Author : Slchhunga Gooner

Aside | Posted on by | Tagged , , , | Leave a comment

AIZAWL NORTH- III BLOCK CONGRESS COMMITTEE CHUAN KAN LAL ISUA KRISTA ZARA CHHANDAM NA CHANG THEI CHAUH KAN NIH HI HRE RENG TURIN LUNGLEI THALAI PAWL TE AN CHAH

  • Congress ten lim hal an duh lo.
  • Congress in LTP thu an chah

Aizawl North- III Block Congress Committee chuan thu chhuah siamin, Tunlai hian Mizoram PWD te chuan furpui lo thlen hma ngeia zawh hman tumin Zoram dung leh vanga kan ram kawngpui te siamthat hna thawkin, hmanhlel takin an thawkrim hle a; kawng siam mek zingah Aizawl-Thenzawl-Lunglei Road-a Pukpui leh Tlawng inkar kawng siam danah duhthusam lo lai a awm avangin Lunglei Thalai Pawl invuah te’n lungawi loh lantir nan, a hmunthutchilh a, viltu PWD,SE leh EE te lim hal duh tawk mai lova, PWD changtu Minister, Aizawl North- III bialtu MLA , Pu Lal Thanzara lim an hal tel hian kan hma lawka inthlan lo awm tur atana Politics taka inbeihna remchang zawnna a ni tih a tarlang chiang hle a ni” an ti.

Aizawl North- III Block Congress Committee chuan, “Kan ram kawngte hi a tu a te pawh hian a tha thei ang bera siam kan duh vek laiin khawimaw lai laiah a siam dan tha tawk lo lai a lo awm thin hi keini Aizawl North-III Block Congress Committee pawhin pawi kan ti a. Hetianga hnathawh dan tha tawk lo, awm palh thei chungchangah hian, siamtha leh tura kan inkar danah Kristian te tiha mawilo khawpa innawr a, lim inhal sak hial a thleng ta mai hi Zoram mipuite min barakhaih hle a ni. Kan hriat theuh angin, lim inhal sak awmzia chu “Nang hi he khawvelah hian kan mamawh tawh lo che a, dam tlak pawh i ni ve tawh lo, thi mah la pawi kan ti lo” tihna tluk a nih avangin lim inhal sak hi a Mizo lovin, a Kristian lo hle a ni.

Hetiang taka mahni mihring puite zahderna chhete pawh nei lova, a nasa thei ang bera indiriam a, anchhe lawhtu Lunglei Thalai Pawl invuahte thiltih dan hi Aizawl North- III Block Congress Committee chuan a dem tak zet a, an thil tih dan uchuak tak hi lo ennawn a, Zoram mipui hmaah ngaihdam dila, thupha chawi ngei turin Aizawl North- III Block Congress Committee chuan a phut a ni. Tumah hi fel leh tha famkim kan awm lova, kan Lal Isua Krista zara chhandamna chang thei chauh kan nih hi hre reng turin Aizawl North- III Block Congress Committee chuan Lunglei Thalai Pawl te a chah bawk.

Chutihrualin, thahnemngai taka kawng siamtu te lo enpui a, lovil thin tu te chungah Aizawl North – III Block Congress Committee chuan lawmthu a sawi a, kan ram kawngte a tha thei ang bera siam a nih theih nan mahni awmna hmun theuhah kawng siamtu te uluk taka lo vilpui a, lo enpui zel turin Aizawl North- III Block Congress Committee chuan Zoram mipuite a sawm bawk a ni.

A tawp berah chuan kan hma lawka MLA General Election lo awm turah hian, Pathian tih mi, Kohhran leh khawtlang tana mi tangkai, ram tana mi inpe zo leh Aizawl North- III bial hneh taka enkawl mektu Pu Lal Thanzara hi thlan tlin a nih leh ngei theihna turin Aizawl North- III Block Congress Committee chuan theihtawp a chhuah dawn a nih tih Zoram mipuite leh a bik takin Aizawl North – III Bialtu MLA zahawm tak Pu Lal Thanzara lim haltu Lunglei Thalai Pawl inti te kan han hriattir che u a ni” an ti bawk.

Author: Slchhunga Gooner

Aside | Posted on by | Tagged , , , | Leave a comment