Sawrkum scheme dawng thei tura Aadhaar thehluh hun pawtsei

Sawrkar laipui chuan sawrkar scheme dawng thei tura Aadhaar neih theih hun chhung chu thla thum atan pawtseiin kumin December ni 31 thleng hun a hawng. Aadhaar neih theih hun chhung hi atirin tun thla ni 30 thleng hi hun hawn a ni a.

Ministry of Electronics and Information Technology-in thu a chhuah danin he hun pawhsei hian Aadhaar number la nei lo leh Aadhaar-a la inziaklut lo te chauh a huam dawn a. Scheme 135 chuang a huam dawn a, heng zingah hian mi rethei hmeichhiate tana a thlawna eirawngbawlna gas pekte, khawnvartui leh lei tih thatna damdawi man tlawma lei theihna te, PDS leh MGNREGA -te pawh a tel a ni.

Advertisements
Aside | Posted on by | Tagged , | Leave a comment

Saudi Arabia ah hmeichhe motor khalh phal ta

Saudi Arabia lal King Salman chuan nimin khan a vawikhatna turin hmeichhiate lirthei khalhtir phalna thupek a chhuah. Saudi Press Agency sawidanin sawrkar ministry te chu ni 30 chhunga report buatsaih tura tih an ni a, he thupek hi nakum June thlaah chuan a taka hman a ni tawh ang.

He lal thupekah hian hmeichhia leh mipa tan inang tlanga motor khalh phalna driving liscence pek chhuahna tur pawh telh a ni a.

Khawvel ram zingah Saudi Arabia chiah hi hmeichhe lirthei khalh phallohna ram awmchhun a ni a. Hemi duhlo hian hun rei tak chhung chu hmeichhiate tan an chanvo ngaihsaktuten an lo bei tawh a. Hmeichhe thenkhat chu dan pawisa loa lirthei an khalh luih avangin man an ni tawh a ni.

Aside | Posted on by | Tagged , | Leave a comment

NIZAN (TUKIN) CHAMPIONS LEAGUE Chelsea, United, PSG an chak

* Group A ah Manchester United chuan mual neitu CSKA Moscow chu an bu zawlah 4-1 in an va hneh a, Lukaku-a’n goal hnih khungin Mkhitaryan leh Martial goal khat ve ve nen goal 4- an khung a, tun season inelna hrang hrangah Lukaku hian match 9-ah goal 10- a khung der tawh.

* Manchester United goal lut zawng zawng hi Anthony Martial thawhrah vek ni in goal khat a khung bakah midang goal thun tur pathum hi a siamsak vek a ni bawk. 2015/16 a United a zawm hnuah match 99-ah goal 30- a khung tling tawh bawk. United goal 6- lut hnuhnung ho a 5-ah Martial hi a inrawlh a ni.

* United goal 4-na khungtu Henrikh Mkhitaryan pawn United tan a vawi 50-inlanna goal nen a lawm bawk.

* Group B ah PSG in an mikhual Bayern Munich lakah zahngaihna lantir lo in si thum faiin an lo hneh a, goal khat khunga midang goal thun tur pakhat siamsak bawktu Neymar chuan a career ah Champions League games 42- a khelhah goal 40-ah inrawlhin goal 23- leh midang goal thun tur vawi 17-siamsak a nei tawh. Nizan (tukin) a goal hnih dang hi Dani Alves leh Cavani te thun a ni.

* PSG tan Neymar hian game 7-ah goal 6- thunin midang goal thun tur vawi 6- a siamsak tawh a ni. 2012/13 atangin Champions League ah Neymar hian goal + assist 40- a nei tawh a, Ronaldo (75) leh Messi (45) te chiah phak loh a nei.

* Group C lamah Chelsea chuan an mikhualna mual neitu Atletico Madrid chu 2-1 in an va hneh a, Atletico tan Griezmann-a’n goal thun hmasa zet mahse Morata goal lehminute 90+4 a Michy Batshuayi goal thun chu Blues hian an chakpui ta a ni.

* Morata hian Chelsea tan match 8-ah goal 7-a khung tawha, nizan (tukin) kha Atletico laka a goal khatna a ni a, Atletico Madrid stadium thar, Wanda Metropolitano a mikhual team zinga goal khung hmasa ber a ni nghal bawk.

* Group D lamah Juventus in an mikhual Olympiacos chu 2- 0 in an hneh a, Gonzalo Higuain leh Mario Mandzukic te thun a ni. Higuain hian tatoo thar “Hasta la victoria siempre”, (emaw “until victory, always” tihna) a nei.

Aside | Posted on by | Tagged , , , , , , , , | Leave a comment

KHAWPUI LEH THINGTLANG DAMDAWIIN-AH RULCHUK DAMDAWI KAWL VEK TURA TIH AN NIH RUALIN KAWL LO TAMTAK AN LA AWM NIIN HRIAT A NI

• Mizoram rul chuk hlum tawh zat.
• Rulchuk ralna zat

Mizoramah kum 2014 atanga kumin 2017 thleng hian rul chuk vanga thi mi 14 an awm tawh a, hetihlai hian damdawiin leh sub-centre hrang hrangte chu rul chuk damdawi ‘antivenom’ kawl reng tura hriattir an lo ni tawh a, hemi kawnga tanla tur pwahin department hotute pawh hriattir an lo ni tawh bawk a ni.

Kumin 2017 kum bul atanga September thla thlengin Rul chuk avanga thi mi 2 awm tawh a, April 17, 2017-a rul chukhlum Lalthakima, Mamit District-a Bawngva khua chu a chhungte hnenah Rs. 2,00,000 Mizoram sorkarin zangnadawmna a lo pe tawh.

Lalthakima leh a thiante hi ni 15.4.2017 khan Sabual Luiah inbual turin an kal a, hetah hian Lalthakima hian kawng siralei kua lo awm chu Sava kua emaw tiin a zen a, lei kawrawng chhungah chuan rul a lo awm a, Rul chuan a kutah a lo chuk ta a ni. Hemi zan hian Hospital panpui ta mai lovin anmahni inlamah Mizopa damdawi an hriat ang ang hmangi enkawl a ni a. A tuk 16.4.17-ah Mamit District Hospital panpui niin admit a ni a, rul tur hian a lo hneh tawh em avangin a tuk ni 17.4.17-ah Aizawl lama refer leh a ni a, Aizawl Civil Hospital-ah a boral zui ta a ni.

Kar kalta Nilaini, September ni 20 khan Lalramdina (26) s/o Donchorai, Darlak khua chu rul chuk vang bawkin a boral bawk a, a chuktu hi hmuh ni chiah lo mahse, Mizoten Khuvangrul kan tih Black Krait ni ngeiin hriat a ni.
Lalramdina hi doctor ten a thih thu an sawi chian hnuah a ruang hi an khua Darlak ah phurh thlak a ni a, tun hma lama rul chuk lo enkawl tawh thin nia sawi mi pakhat chu a chhung ten beiseina neiin an koh tir ta a, rulchuk enkawl thiam nia sawi chuan tih dam leh tumin a enkawl zui ta a ni.
Khawtlangin zan thum an tlaivarpui hnuah dam leh thei ziazang a ni lo tih a chian takah chuan Ramdina ruang hi thlanmual lamah an vui liam ta a ni.

Record hmuh theih china a lan danin, kum 2014 khan Mizoramah rul chuk vanga thi mi 4 an awm a. Heng mite hi Mizoram sorkar chuan Rs 1,00,000 theuhin a lo ral tawh a, kum 2015-ah Rul chuk vanga thi mi 2 awm lehin, Rs 2,00,000 ve ve in ral an ni leh bawk. Hemi kum atang hian Rul chuk vanga nunna chante ralna hi Rs 2,00,000-ah tihpun a ni.

Nikum 2016 khan Rul chuk vanga thi mi 6 awmin, kumin a Rul chuk vanga thi mi 2 te nen, hemi hun kum 4 chhunga Rul chuk vanga nunna chan hriat theih chin te hi mi 14 an tling tawh a ni.

Hetianga Rul chuk vanga thi an awm thin avang hian Health Services leh Hospital & Medical Education department hotute chuan damdawi In leh sub-centre hrang hrangah Rul chuk enkawlna damdawi (Antivenom) kawl reng turin hriattirna an pe tawh thin niin hriat a ni a, chutih mek lai chuan thingtlang damdawiin antivenom kawl lo an la awm nual niin hriat a ni. Rul tur thahna Antivenom bakah, rannung seh damdawi pawh kawl reng turin Aizawl Civil Hospital hotute chu hriattir an lo ni tawh bawk. Rul tur thahna (Antivenom) hi Aizawl-ah Rs. 600 man vel a ni.

Author : Vanneihthanga Vanchhawng

Aside | Posted on by | Tagged , | Leave a comment

PSEUDO-EPHEDRINE NUAI 35CHUANG MAN DHOLAI POLICE STATION-A MAN KHA

• (Hemi chungchang hi post a awm tawh a, chiang deuh zawkin..vnt)

Cachar Police te chuan inrinni khan Dholai Police Station huam chhungah Mizorama phurh luh tum nia hriat Pseudo-ephedrine cheng nuai 35 sing 6 sang 7 man hu vel an man.

Vairengte Police Station atanga thudawn danin he damdawi neitu nia hriat Manipur lam mi Lian Chung Mung (kum 36), a nupui Gouvang (kum 30) leh Suangothang te bakah Aizawl Zuangtui a cheng Zoramthanga kum (28), Lalrinmuana (kum 34) a nau Hmachhuana (kum 20) te chu he thilah hian an man a. An chuanna car 2 hma a tlan Silchar Mizoram House a Police Liasion Officer Sub Inspector Dipu Sharma leh Head Constable Umesh Mishra te chu man telin sorkar motor pawh hi Dholai Police te chuan an hreng tel a ni.

Police te thil man Pseudo-ephedrine hi Kg 87 a rit nia sawi a ni a, an phurhna hi Indica Car niin Lian Chung Mung te nupa hian Delhi atanga an rawn ken chhoh, Mizorama phurh luh an tum niin Police te chuan an ring a, Zoramthanga leh midang pahnihte hi a lo tanpuitu nia an rin thu an sawi.

Vairengte Police te sawi dan chuan Zoramthanga te thianho hi Lian Chung Munga te hmuak tura Silchar thleng thla an ni a, Mission Compound-ah an thleng a. Zoramthanga hian a lo hmel hriat sa SI Dipu Sharma hnenah hian pumpelh kawng a hriat chian loh thu sawiin kalpui turin a sawm a. Ani hian Vairengte kal a duh tho avangin an inzui chho ta mai niin an sawi a. Vairengte Police hotute chuan Police motor-ah hian damdawi hi man a nih ve loh thu an sawi a, Dholai Police te hian ringhlelin an hreng ve mai niin an sawi bawk.

Author : Vanneihthanga Vanchhawng

Aside | Posted on by | Tagged , | Leave a comment

EVAN Dr. LALSAWIVELA RAWNGBAWLNAA DAMNA CHANG 954

Bawngkawn Brigade Field kawng UPC NEI Biak Ina Evan. Dr. Lalsawivela tihdam rawngbawlnaa chawp leh chilha damna chang chu nimin tlai thleng khan mi 954 an tling tawh a, dam inbeisei pawh mi 194 lai an awm tawh.

Upa R. Lalhmangaihzuala, Bawngkawn hnen atanga thudawn danin, Nimin chawhnuah khan Patling pakhat pianhlim aţanga bengchhet, ţawngtheilo ni bawk chuan damna a chang a, hnung lam atanga biak te pawh a hre thei tawh. Hetiang hi mi 60 chuang an dam tawh a ni. Damna chang zinga langsar deuh deuhte chu –
Tawngtheilo bengchhet dam 60,
Bengngawng dam 277,
Mitdel dam 3,
Spinal cord chhia dam 18,
Nerve tha lo dam 130,
Cancer dam 26,
Stroke dam 14,
Khawih kher ngai lova Sermon ngaihthlak atanga dam 26 te an ni.

Damna beisei hi ni khatah mi 300 lai te an fuankhawm reng a; a thlengtu kohhran Bawngkawn UPC NEI te chuan nitinin heng mite hi chhun thingpui leh a hmeh an pe ţhin a. Zanlai dar 12 leh a hnu lamte an thlen fo thin avangin zanriah ei tir engemawzat an awm thin bawk a. An zinga engemawzat chu zanriah ei tur hian an sawm kal zo lova, a then azar an sawm kal theih te nen zanriah eitu hi a tlangpuiin mi 40 vel te an ni thin. A thlengtu Kohhran hi kohhran lian leh hausa an ni lova; Bawm dawh tura thurawn petu te pawh an awm na a, bawm dawh chu an tum rih lo. Pathianin hna a thawk a, mamawh tawk tur chu khawi khawi atangin emaw an dawng ve leh mai thin a ni.

Damna mamawhtu hi an pung chak hle a, Burma atanga rawn kal te, state pawn atanga pantute an awm thar zel a, tun thleng hian khaw 143 atangin an pan tawh a ni.

Tihdam rawngbawltu Evan. Dr. Lalsawivela hi a hah hle a, chawhma dar 10 atangin zinglam dar 1 te a thleng fo va. Hah hle mahse mamawhtu an pun zel si avangin, a rawngbawlna hi, Lal Isua chakna ringin, a tul chen chen chhunzawm turin Bawngkawn UPC Kohhran chuan an rel ta rawih mai a. A thei apiangte’n he rawngbawlna hi lo tawngtaipui turin an sawmin an ngen a ni.

(Zonet Zing Daifim : 25.09.2017 Monday)

Aside | Posted on by | Tagged , , , | Leave a comment

HARI OM SINGH by Kima Jongte

Suâmhmang hotupa Hari Om Singh leh a Goonda rual chu an che râwva țhîn hle a. An awmna chhehvêla thingtlang mite chuan, a hming an hriat ngawt pawhin an khûr țhîn! Naupang țap bang duhlo pawh, “Țap suh, Hari Om Singh a lo kal mai tûr ania..” an tih chuan an bang vat țhîn a.

Țumkhat chu a hoten zanah bus an suam a. Passenger ho pawisa fâi bakah an bungrua tam tak an chhuhsak a. An passenger pakhat bag ah chuan Holy Bible hi alo awm a. Hari Om Singh chuan chu lehkhabu chhah tak mai chu eng nge a nih tia a keu vêl lai chuan, maktak maiin a neitu in pen rawng lâr tak hmanga a lo chhinchhiah, Johana 3:16 thu hi a zuk chhiar fuh kher kher a, “Pathianin khawvêl a hmangaih êm êm a; chutichuan, a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zâwk nân.”

He Pathian mak tak mai hi a chanchin hriat a châk ta tlat mai a. Chu Bible keng chuan a hote nên chulai vêlah chuan Christian an zawng ta a; nakin lawkah chuan Missionary Pastor pakhat chu an va hmu ta a. Chu Pastor chuan țawngțaina nên thlarauva khatin Pathian thu a lo hrilh ta mawlh mawlh a. “Tu pawh a ring apiang” tih ah chuan amah Hari Om Singh ngei pawh a tel ve a ni tih te a hrilh a, “Pa in min pêk zawng zawng ka hnênah an lo kal vek ang, tu pawh ka hnêna lo kal chu ka hnâwl chhuak tawp lo vang” (Johana 6:37). tih thu Bible chhung ami ngei mai chu a chhiarsak bawk a.

Lal Isua chuan amah Hari Om Singh pawh chu a ngaihdam duh thu te, a hnâwl loh tûr zia leh Piangthar Baptisma chungchang thu te an sawi zui zêl a. Zan khua a var takngial dâwn, kâwlkil lam pawh a êng țan ta! Hari Om Singh chu a tho vut a, “Pastor, Baptisma ka chang duh. Tûnah!” a ti ta khur khur mai a.

Chumi tûk zing vârțianah chuan Hari Om Singh nun thim pawh chu a lo ral ta a, a nun khua a lo var ta; Zing ni chhuah rualin Missionary Pastor Rev. Vanlalbela kutah chuan Baptisma a chang ta a ni!

(Pu Kima jongte hian fb a hmang ve ngai lova, ama remtihna leh duhdan angin MSR-ah a thuziak tha tak tak te kan rawn post thin a ni. Thuziak ngaihnawm leh tha tak tak min hlui thin tu Pu Kima Jongte chungah kan lawm em em e..vnt)

Retold by Vanneihthanga Vanchhawng on 24th September, 2017.

Aside | Posted on by | Tagged , , | Leave a comment

Chhiah pek ţhat kan ngai e- by Michael Lalmanzuala

Central Sawrkarin nasa taka Corruption do an puan denchhenin kum 1997 khan Mizoram Sawrkar-in chutiang thil sawihona program a siama thusawi turin min rawn sawm a. Vantlang hmaa thusawi ngai lo leh official meeting te pawha thusawi thiam lova ngaih ka nih thu hrilhin ka lo hnar a. Mahse, hetiang huna thusawi tur hian Central Sawrkarin corruption laka fihlim chauh hman tur antih avangin Pu J. Lalsangzuala leh kei lo chu sawm tur an hriat loh thu an sawi chuan ka remti ta a.

Ka thusawi chu mi’n țha an ti a, chanchinbu-ah te an chhuahin Training Class-ah te inzirtir nan an hmang hial a. Chu chu ka tan fuihna țha tak a ni a.

Thusawi ka thiam loh țhinnna chhan kha official thilah chuan thil tih dik lo sawimamna deuh vek a nih țhin avangin kei dawt sawi ngai lo chuan ka thiam loh zawng tak a lo ni tih ka hre chhuak a. Vantlang hma-ah pawh Politics thil lemlo thlengin thu tak aia a langa mawi, a ngaithlatute ngaihsan tur zawnga thusawi a ni tlangpui hi ka thiam loh zawng leh ka duh loh tak a ni a, chuvang chuan chhiatni țhatni-ah pawh chutiang chuan ka sawi thiam lo va, ka sawi ngai bawk hek lo.

Thu dik sawi tur erawh chuan inrintawkna ka nei ve hle thung a. Corruption do chu kan ram leh hnam mamawh tak nia ka hriat avangin leh chutiang ti tura inrintawkna nei ka nih bawk avangin ram leh hnam tana ka tih ve turah ka ngai ta a.

Hetiang thila ka inhman chuan ka thu khel apiangah ka hriat chin chin, țulna leh țangkaina nei apiang chu ka sawiin ka ziak vek tur a ni ang. Thil ti dik lo zinga an tel chuan ka chhungkhat hnai leh țhian țhate pawh ka sawi/ziak hmaih a thiang lo vang. Chutiang taka ka ti ngam dawn a nih chuan, tih ngei tur, sawi/ziak ngam loh chin ka neih dawn erawh chuan tih loh law law tur tiin keimah leh keimah ka inzawt a. Chawp leh chilhin chutiang taka ti ngam tur chuan ka intiam a, bul ka țan nghal ta a ni.

Tun kum 20 chhung hian corruption dona lamah chuan mar pâtin ka kal ta a. Lehkhabu 8 lai ka ziak ve tawh a, article ka ziak zat hi ka chhin chhiah lo nain 1,000 chuang chu a nih ngei tawh ka ring. Seminar, AIR, TV-ah thusawi hun ka nei zing ve viau tawh bawk.

Hetianga ka inhmanna lamah hian țawng mawi lo ni suh se, ‘hmelma’ ka neih phah hnem viau tawh a. Vanduaithlak takin ram leh hnam siamțhat nana ka ‘target’ lian ber, kan ram hruaitu tam takte chuan ka thu chah a nih dan tura dawngsawng lova, mimal insawiselna-a an lâk tlat avangin harsatna min siam phah nan an hmang fo țhin.

Chutiang zinga langsar ber pakhat chu han sawi ila. Mahni kea din duh tlat mi ni a, chawmhlawm kutdawh dinhmuna din te hi ka duh loh ber a nih avangin vai buh ei lova keima thar chhuah ngei buh ei ka tum tlat a. Chuta tan chuan Tuirial hnâr/kama leilet hmun țha tak Darkhuangah sawn leilet ka siam ve a. He hmun hi chhungkaw 50/60 vel inchawm theihna tur leilet ram awmna a ni a. Sawrkarin Minor Irrigation project liantham tak, cheng Nuaih 80 vel senga, tuikawng km 3 leh tuikhuah lian țha tawk tak an siamna a ni.

Țhian țhenkhatte chuan in hriat ngei tawh turin chawmhlawma min awmtirtu kan sawrkar hruaitute hi ram hmelma an ni ti hial tein ka sawiin ka ziak țhin a. Chu chu huatthu-ah an la ni ngeia ngaih theihin leh min hrêk nana ti ni ngeia ngaih theihin chu tuikawng chu kum 2010 ațang khan an enkawlzui duh ta lo va, an hluihlawn ta a ni tawp mai. Tuikhuaha ruahtui tling chu ka leilet châwm nana a la tâwk avangin kan kham khawp buh chu kan la thar ve ta zel thung a ni.

Tui kawng a pin tâk avang leh hlâwk lo an tih vangin leilet enkawl ve țhin te pawhin an enkawlzui ta lo va, tunah chuan mi pahnih chiahin kan enkawl a ni. Chhungkaw 50/60 vel inchawm theihna tur ram țha han hlamchhiah ngawt mai chu Sawrkar ve-a pumpa tan chuan a pamhmai deuh chuan ka hre țhin. Mahse ei leh bar leh thil pawimawh danga intodelh te, ram tihhmasawna tihchangkan te hi kan hruaituye tum leh duh a ni si lo va. An duh leh an tum ang ngeiin mahni hamhai bak chu tuipui an nei thei ngang lo a ni e.

Kawng dang dangah pawh hetianga ka kalna lamah hian harsatna ka tâwk fo va, mahse, chu’ng chuan ka thil tumahmin tibuai lo.

Mimal thilin tu mah ka bei ngai lo va, ram leh hnam khawih thei thila inhmangte chungchang erawh an tlin lohna ni-a ka hriat chu insumkarna leh inthlahrunna nei miah lovin ka sawiin ka ziak pawp pawp țhin. Hetiang ka tihna lamah hian keima mimal tan hlâwkna eng mah ka nei ngai lo va, ram leh hnam tana ka tih theih ve tâwk ti-ah ka inngai mai a ni.

Ka thil tih mimal thila la an tam tawlh tawlha Sawrkara a lian țha țha chungkhat laina leh țhian țhate pawh, ‘a chhang eitute kha doral an chang zo ta..’ tih ang deuha minhlattu-a an țan tâk zelah chuan ka țhianpa leh ka thurawn lakna ber țhin Rev Thansiama hnena, ‘mihring kan nih chhungin hetianga maltlat hi tihdan țha a ni em’ ti-a ka zawh chu, ‘mihring tilawm ila, Krista bawih ka ni lo vang, tiha ni lo’m ni kha?’ a lo tih chuan chakna (inspiration) min pêk belh a, ka kal leh ta zel țhin.

Ram changkanga mite leh kan Pathian thu chuan sual ngawihbopui emaw ngaihhnathiam emaw chu a tih ang thova sual a ni an tih hi kan pawm lo va, ngawihbopui/ngaihhnathiampuitu nih chu mi țha nihnaah kan ngai a, midang thilsual tih sawi chhuaktu chu misualah kan ngai lehling tlat a ni. Hei hi kan rama sual a punlunna leh a ngampat zualna chhan ber pakhat a ni a. He thu pawimawh tak hi Savun Kawrfual bu-ah a ziaktu chuan a chiang thei ang berin a rawn sawi a ni.

Tichuan, ka kalphung pangngai kal zelah chhiah pe lo langsar zualte chu ka han tar lang a. An tam em avangin tar lan vek sên pawh an ni lo va. Cheng Nuai 10 chin chunglam chauh ka har tar lang a ni. A vaia belhkhawm chuan vaibelchhe 50 vel a ni ang. Heti chin pawh hi mipuiin he thil pawimawha AWARENESS kan neih nan a tâwk thawkhatin ka ring a ni.

Chhiah hi ram inrelbawl nana Sawrkar innghahna ber a ni a, a tel lovin eng mah tih theih a ni lo. A pawimawh em avangin khua leh tui țha chuan chhiah a pe tur a ni tih hi khua leh tui țha leh țha lo hriat nana tehfung pawimawh taka ni a. Pathian thu pawhin chhiah pêk hi a phût a ni.

He’ng chhiah pe lote zingah hian ka țhian țha leh chhung khat hnaite pawh an tel ve tho va. Mahse, a chunga ka sawi ang khian anni venthawn vanga he thil pawimawh tak hi ngawihpui thei ka ni lo va, an hmingte tar lan loh bîk chi pawh a ni lo. Chhiah pek țulzia chu mi tinin kan hriat a țul tlat a ni.

He list hi Taxation Department-ina min pek ang anga ka tih chhuah a ni a. Keimahina ka chhut chhawn a nih avangin dik lo palh te a lo awm a nih chuan hriatthiamna ka beisei a ni. Chhiah pe lote hian harsatna riau an nei te pawh a ni thei a. Chutiang neite chu an awm a nih chuan an harsatna te chu rawn sawi ve se, mipui pawhin thlir dan tâwk kan hre thei mahna.

Hengte hi Department-in AUDIT ASSESSMENT COMPLETED an tihhnan vek an ni e.

He thilah pawh hian Sawrkar hian a tih tur a ti em, a tih tur tithei tur chuan a inthuam țha em? tih hi zawhna lian tak niin a lang bawk.

Ram leh hnam insiamțhat nana thil pawimawh tak ni-a ka hriat vanga he’ng hi rawn ti ka nih thu ka sawi nawn leh e.

LIST OF TAX DEFAULTERS AS ON 31.3.2017 UNDER MVAT ACT, 2005.
S/N- Name of Firm & Add- Tax Balance Unpaid
1. Sena(Jaishi) Store/ Țhuampui- Rs. 105,95,384
2. SD Enterprise, Zarkawt- Rs. 116,89,517
3. John Overseas, Zarkawt- Rs 203,37,105
4. Lalhmingthanga&Sons, Zarkawt Rs. 23,59,493
5. E.R.Enterprise, Ramhlun- Rs. 21,68,328
6. Infinite Space, Chanmari Rs. 19,28,090
7. K.M.Agencies, Chanmari Rs. 21,34,396
8. Hrangbana Business House,-do- Rs 18,64,799
9. United Associates, Chanmari Rs 72,18,858
10. Music Home, Chanmari Rs. 19,85,119
11. C.Rosanga & Sons, Chanmari Rs. 62,28,899
12. Vees Communications –do- Rs. 188,06,159
13. Mosia Agencies, Chanmari- Rs. 25,32,263
14. H.B.Motors/Lalmalsawma – Rs 1855,71,072
15. Khiangte Trade Centre, Chaltlang- Rs 648,96,307
16. Shimnit Utsch India Ltd, Chaltlang-Rs 23,08,657
17. LTS Agency Lower, Zarkawt Rs.- 98,85,732
18. LZ Agency Lower, Zarkawt Rs. 55,00,565
19. Bezalel F&F Tiles, Zarkawt Rs. 12,18,659
20. Prahari Canteen, Durtlang Rs.12,40,000
21. Lalmalsawma, Țhuampui Rs 21,49,000
22. Bobby Store, Tuikhuahtlang Rs. 18,57,400
23. Tetea Store, Tuikhuahtlang Rs. 22,19,755
24. K.T.Agency, Bazar Bungkawn Rs. 16,19,695
25. K. Traders, Chawnpui- Rs.46,34,953
26. M/S Zaii Enterprise, Chawlhhmun- Rs.24,48,697
27. Betty Store, Luangmual Vengthlang- Rs.28,73,574
28. Kim Kim, Enterprise, Luangmual – Rs.19,07,798
29. M.S.Store, Ramrikawn Rs. 15,17,041
30. Mimi Enterprise, Ramrikawn- Rs. 55,80,964
31. Hauva&Sons, Zarkawt- Rs 48,63,123
32. RRB&D Enterprise, Vaivakawn- Rs. 62,10,500
33. Valenpa Business, Vaivakawn- Rs. 10,75,535
34. O.P.Store, Saron Veng -Rs. 14,59,481
35. Khaia&Sons, Vaivakawn- Rs. 547,88,570
36. CB Enterprise, Season, Complex- Rs. 66,75,385
37. Mana&Sons, Bara Bazar- Rs. 11,58,606
38. Laltluangi Enterprise, Armed Veng -Rs. 45,78,562
39. L.N.Stores Chhinga Veng- Rs. 13,82,146
40. Mana&Sons,Bara Bazar- Rs. 20,15,845
41. LT Store Dawrpui Rs 11,16,308
42. JH Agency Babutlang- Rs 30,64,869
43. Buangthanga&Sons Bara Bazar- Rs 26,29,624
44. Buangthanga&Sons BaraBazar- Rs 10,46,624
45. RK Store, Armed Veng- Rs 24,00,000
46. Om Om Variety Store, Armed Veng- Rs104,70,000
47. Jenny Cosmetic Zion Street- Rs 61,83,142
48. Muankimi Store Thingsulthliah- Rs 30,42,902
49. Jenny Store, Dawrpui School Bldg- Rs 16,09,500
50. Puii Store, Seling- Rs. 22,99,346
51. Daffodils Zion Street- Rs. 43,04,300
———————-

Aside | Posted on by | Tagged , , | Leave a comment

LALRAMDINA CHU VAWIIN CHHUN DAR 12:00 HIAN VUI LIAM A NI DAWN E

Nizan Khan a zan 4 nan Rul chuk Ramdina kan Tlaivarpui a, Kan Branch Hruaitute leh a menpuitu Nula leh Tlangval ten a rimchhe deuh ni a kan hriat avangin a enkawltu hi kan ko a, ani hian thil nih dan te a en fiah a, Tin, Ramdina chhungte leh Branch YMA O.B awm remchang te leh a enkawltu hian Meeting neih a ni a, Ramdina taksaah hian a țha lam a hmasawnna a awm lo niin hriat tlan a ni a.

A marphu hmu a inhria, Post hmasa lampang pawha ka sawi lan tawh Pu Rotluanga’n a mar dek leh se, ani hian a mar a hmuh chuan enkawl zui ni sela, a mar a hmu lo anih chuan inphum ni mai se tih chu Ramdina chhungte leh a enkawltu Thutlukna chu a ni ta a ni.

Pu Rotluanga kan nghak deuh vang vang a, a lo thlen hian zing dar 6:55 a ni a, uluk takin a mar a dek vang vang a, (Inphum mai leh inenkawl zel Thuthlukna a nih avangin Pu Rotluanga pawh hi a zam ru ve viau maithei ani) Uluk taka Minute 6 lai a mar a enkual hnu-ah ‘A MAR A HMUH LOH THU’ a sawi ta a ni.

Ti hian Darlak khua hi chuan Rul chuk, Doctor-in a boral tawh tia an sawi tawh chu Mihring tihdam theih a ni tawh lo tih hi tawnhriat kan nei tawh a ni.

In țhian
Mikael Lalremruata
Darlak
——-

Hming : Lalramdina
Pahming : Dawntorai
KHUA : Darlak Mamit District
Kum : 27
Nupui : Kimi
Thihchhan : Rulchuk
Kohhran : Salvation Army
Hnamhming : Bru
Vuihun :24/9/2017 ::12:00 noon

20/9/2017 ,11:00Am vel ah Mamit hospital ah a enkawl tu doctor ten boral ni a an confirm hnu in rul chuk enkawl thiam ten ni li lai an enkawl hnu in a chhungte leh a enkawltu ten chhan theih ni a ngai lo in vuiliam mai nise tiin thutlukna an siam ta a ni. A boral hnu ni 4 na thleng hian a hmel leh taksa ah a țha zawng a danglamna a awm loh a vang in hetiang hian thutlukna chu harsa tak a siam a lo țul ta a ni. He thil thleng hi a hria a piang te mak tih a ni … a fa 4 leh a nupui te a kalsan a ni

Aside | Posted on by | Tagged , , , | Leave a comment

Zoramthar kan din dawn, leilung a thar dawn tihna a ni lo, thilthar a tam dawn a ni- Dr Thangtea

Tunkar, Dt. 20-21, September, 2017 chhung khan MNF VicePresident Dr. R. Lalthangliana, Ex-Minister chuan South Tuipui biala khaw hrang hrang a tlawh.

Dr. R. Lalthangliana chuan Hnahthiala thu a sawinaah,”Mizoram kan chhiatna bulpui ber chu sum hi a ni. Sum tlemte tê min tawktarh a, kan mamawh avangin kan la lo thei si lo. Chu chuan tutenge thlan tur țha min ngaihtuahtir thei lo a ni. Vawiinni-ah chuan heng thil zawng zawngte hi i hnawl ngam ang u. Kan hnam martarte kan ram tana an inpekna a sangin a thuk em em a, MNF party rohlu leh a khaiding tak taktute an nih avang pawhin corruption-ah kanfihlim a ngai a ni,” a ti.

Dr. Thangtea chuan Muallianpuiah khuaah thu sawiin, “Kan sawrkar kum 10 chhungin PMGSY hmangin in 250 awmnaah tawh phawt chuan kawng kan lai a. Heng kawngte hi kan sawrkar loh kum 9 chhungin enkawl lohvin a awmzui a. Mizorama sawrkar term hrang hrang ka hriat tawhah tun term tluka kawng chhiat ka la hre lo,” a ti a, Chief Minister-in kawng chhiat chhana MNF sawrkar a puh chungchang chhangletin, “MNF kan sawrkar veleh khan Durtlang kawng Jeep road ang tluk deuh mai chu lungte haldarhin kawngpui țha tak kan siam a. Reiek kawng jeep road chu black top-in țha takin kan siam a, thlai thar hmanga eizawngte tan a țangkai zual hle. Rawpui leh Sabual kawngte laitlangin blacktop a ni a, Lunglei Road, World Bank road kan tih te, tuna Mizorama kawngpui țha deuh lai zawng zawng mai hi MNF sawrkar siam a ni. Hei vang hian MNF sawrkar chu Congress sawrkar nen kan danglam hle a ni, MNF siam kawngpuite chu Congress sawrkarin an enkawlzui loh avangin lirthei tam tak an chesual a, lirthei neitute’n an lirthei siamțhat nan sum tam tak an seng bawk. Lifetime vehicle tax an lakte kha khawiah nge a kalral tak mipuiin kan hre lo. Pathian leh mipuite zara kan sawrkar a nih chuan, kan sawrkar laia kawngpui kan siam, Congress sawrkarin a enkawl zui lohte hi kan chhunzawm nghal dawn a ni,” a ti bawk.

MNF Vice President Dr Thangtea chuan Darzo khuaah thu sawi lehin, “Kan ram hotupa ber Pu Hawla meuhin a hawn Tuipui D lei, kum khat vel lek hnua motor ruak bak tlantir ngam a ni lo hi a vanduaithlak a, Congress sawrkar hi leidawhah ringawt pawh an tifuh hlei thei lo a ni. Heng lai vel hi border area a ni a, he lei hi a pawimawhna a sáng bik hle. Kan sawrkar chuan lei changtlung tak, truck load la pawhin an zawh theih turin kan dawh țha vek dawn a ni. Hemi atan budget-a sum dah pawh a ngai lo va, sum hai chhuahna tur tam tak a awm a ni,” a ti.

Bungtlang khuaah chuan Pu Thangtea’n, “SEDP hmangin Education Policy thar kan siam dawn a, zirna țha leh changtlung zawk kan kalpui dawn a ni,” a ti a. “MNF kan han sawrkar leh chiah ang a, Zoramthar kan din dawn a ni. Kan Zoram leilung a thar dawn tihna a ni lo va, thil thar tam tak a awm dawn tihna a ni,” a ti bawk. “MNF kum 10 kan sawrkar chhunga party mi leh Zoram mipuite chunga tihsual kan neih leh pawisawi kan neihnaah thinlung takin ngaihdam kan dil tak meuh meuh a ni,” a ti bawk a ni.

Heng khaw hrang hrangahte hian Dr. Vanlalțanpuia, Joint Secretary chuan SEDP training a neihpui a, Dr. Thangtea hi MNF Gen. Hqrs hruaitu țhahnem takin an țawiawm a ni.

( R.LALTHANSANGA )
Secretary
Media & Publicity Deptt.
Mizo Ntional Front
Memo No.MNF/Media/2017/126
Dt.21.09.2017.

Aside | Posted on by | Tagged , | Leave a comment