BPL CHHUNGKUA TEN FUR LEH THALAH PAWH TUI AN NGHEI LOH NAN TUIZEM PEK AN NI ANG : HAWLA

Chief Minister Pu Lal Thanhawla’n an sawrkar chhung chuan a mamawhte hnenah NLUP an sem zel dawn ati a, BPL chhungkua ten fur leh thalah pawh tui an nghei loh nan tuizem pek an ni ang a ti.

Chief Minister hian he thu hi july 14a Political session Congress Bhavan Golden hall-a neih ah a sawi a, Sorkar ruahmanna thar, New Economic Development Policy kalpui ni mahse a mamawh apiang te tan NLUP chu kalpui reng ala ni a ti. Chief Minister chuan Mizorama cheng te zingah hnam hnuai hnung bik leh hnam tlem bik an awm lo tih sawiin, Mizoram chhunga cheng zawng zawngte chu kan zavaiin inang khat vek kan nih thu a sawi.

Zo Carbon buaina chungchang sawiin, Chief Minister chuan Zo-Carbon thubuai chu ACB ten ngawrh takin an chhui a, officer engemaw zat dik lo hrem turin hma an lak thu a sawi. He hunah hian Chief Minister leh MPCC President ni bawk hian an party ah mi thar a lawmlut bawk a ni.

Author : Slchhunga Gooner    

Aside | Posted on by | Tagged , , | Leave a comment

SPORTS LAMA TAX AWL TUM KA HRIAT VE PAKHAT by Mamuana YZgoal

Infiamna khawvela “Chhiah awl ru/lang?” chungchang a lar khawp mai…ka hriat ve pakhat chu hun kal daih tawh ah a ni. Titihona ah, hre tura ka ngaih thenkhat zinga lo hre mumal lo te, “Eeee, ni tak khaa…” tite an awm nual tlat maia, Tax lam hian kan ngaihtuahna a luah tam lo pawh a ni mahnaaa!??

Chu chu, hman kuma Indian sportsman hmingthang Sachin Tendulkar-a’n “Chhiah awl” a lo dil chungchang kha a nia! Diriamtu pawh a tawn nual kha!! Fiat (Italian automobiles) chuan an “Brand Ambassador” (a free chu sawi loh, sum tam tak senga an rawih) hmingchhiat an hlau teh a nih kha.

SCHUMACHER A’N FERRARI A HLAN
Indian sportsman hmingthang Sachin Tendukar chuan 2002 khan Port of Spain-a West Indies laka Test Century a siam khan, Cricket batsman ropui ber (?) Sir Donald Bradman-a Record (Test Century siam hnember, vawi 29) a tluk chiah a nih kha!! Hei vang hian Fiat chuan ‘an fapa rangkachak’ Tendulkar hnenah, Ferrari 360 Modena car chu an pe (gift) a, sapram car intlansiakna hmunlar Silverstone-ah, (khatihlaia) Khawvel Formula One car Lalpa, Michael Schumacher a’n a hlan a nih kha!!

Nimahsela, India rama ramdang thil lakluhna chhiah (import/custom duty/tax) chu a hautak hle a, an lakluh tur bungrua man atanga Zaa Za-sawmhnih (120%) pek a ngai a ni. Chumi a nih chuan Tendulkar pawh hian a car dawn, Rs.nuai 75 vel man lalut turin Rs.nuai 113 (Rs.Vaibelchhe 1.13) vel a pek/chawi a ngai a. Sorkar-ah chhiah awl a dil vangin kumkhat vel a nghah hnuah, phalna hmuin Air France in Mumbai-ah a rawn phur lut a ni.

CHHIAH-AWL NGAITHIAM LO
Chutah lee, Indian mipui tamtak, kawng tam taka Chhiah chawi/pe nasa te an ngawi thei ta lo… Sawiselna tam tak karah, Delhi High Court pawh a za zak niang; Tendulkar bakah Union Finance Ministry leh Sports Ministry te chu insawifiah turin hriattirna (Notice) a pe nghal chat a…chumi hnuah PIL thehlut an awm bawk.

Tlawmngai pawl (NGO) pakhat, Patit Pawan Sanghathana ho phei chuan, Tendulkar-a thiltih dan chu demawm (thil tihawmloh lutuk) an tih em avangin, an vehbur khawn chhuah Rs. 112 (one hundred and twelve only, zero panga tel lovin) chu money order ngeiin, Tendulkar-a hnenah zuk thawn nia mawle!!

Tendulkar hi India ram tihmingthatu, inel nikhuaa Indian mipui tihlimtu, ngaihsan hlawh ber zing ami a nih bakah, Indian infiammite zinga chhiah (income tax) pe hnember lawrlak a ni.

Nimahsela hetianga chhiah awl a lo dil hi mi tam takin an ngaithiam lova, “Thil kalphung ni lo uchuak”,
“rilru rethei lutuk, bakah Dan zawm duh lo chu God (of Cricket) a ni thei lo”,
“Ram leh hnam tana tih ngei ngei tur (tihmakmawh), ti duh lo luitu anih avangin Khua leh tui (citizen) tha a ni thei lo”,
“Role model anihna angin Dan zawm tha tur ber”…leh adt. sawiselna a tam lutuksss..Google ve mai r’uuu…

HRANGHLUITE’N SAWISEL
Sawiseltu tamtak zingah hranghlui ropui tak tak Kapil Dev, Dilip Vengsarkar etc. an ni nawk a. Kapil Dev chuan Tendulkar-a thilpek dawn chu a lawmpui thu a sawi rualin, hetianga chhiah an awl a nih chuan midangte pawh awl ve law law sela, tiin a duhdan a sawi. Kapil ngei pawh hian ramdanga a thilpek dawn zinga Car pahnih chu chhiah chawi thlapin a lalut a, Tendulkar hi a thik/itsik niin tuman an ngai lem lo. Chuti chung chuan thuneitute chu inenchiang sela, Dan chu rualkhai taka kenkawh nise, a then tihbik nei lo turin a ngen.

Tin, a hma lawk, 2001 a Indian Golfer Amandeep Johl-a thil tawn sawichhuakin a vuipui bawk. Amandeep hian South Korea-a inelnaah Lexus car chu lawmmanah a dawng tel a. Nimahsela (lawmman pawh nise) thuneitu lamin an bengkhawn loh avangin, chhiah a chawi/pek ngei a ngai a, chhiah pek ai chuan Lexus car thar neih loh a duhzawk avangin, Organiser te hnenah a kir (forfeit) leh ta ringawt a nih kha.

Fiat company chuan India rama an Brand Ambassador Tendulkar-a sawiselna a rik tak nuaih nuaihah chuan, a hmingchhiat lutuk chuan an tuar tel ve thei tih hriain, rang taka thawm tireh vat turin Rs.nuai 113 hi an peksak ta ringawt a nih kha (a hnuah Tendulkar hian a thianpa sumdawng hnenah a la hralh zui…gift hralh hian sawizui a hlawh hle bawk).

THILDANG DEUH…

Kapil Dev te vanglai, 1985 World Champions of Cricket Series, Benson & Hedges Cup an tih bawk (khatihlaia WC pate) ah rawlthar Ravi Shastri chu Champion of Champions (Man of the series) niin, lawmmanah Audi 100 Sedan car a dawng a. PM Rajiv Gandhi khan ‘lawmman’ a nih miau avangin, tuna India cricket team Coach thar ni tur Shastri kha ‘chhiah an awl’ a ni. (Lawmman semlaia Ravi a interview laiin mipui au dur dur, Ravi a hawilet, a teammate Gavaskar te ho Car chhung leh chungah an lo thu fur…Ravi a tlan phei, switch on…a thiante a phur… Khatihlai Ravi dinhmun awh-awmzia kha awww…B&W TV ah pawh mit kan la sawn phal hleinem!!!)

Keini chhiar tlem si, sawi zau ve ringawt…mi hawizau lo leh income tax (leh a petute) chungchang lo ngaihven ve ta lo chuan….Tendulkar-a thiltih zinga mawi lo ber zinga ngaih, chhiah awl chungchang atang khan Indian mi pangngai chinin Tax pek an ngaih pawimawhzia hi ka hriat thar phah ve chauh nia mawlee!!

Aside | Posted on by | Tagged , , | Leave a comment

SIALHAWK thlarau changtu te chungchang.

Sialhawk-ah hian harhna a thleng hup hup a ni lem lo. IKK atanga chhuak, Sialhawkah chiah awm, chu kohhrana lawi, tleirawl 4 velin an chang mai a ni. An thuken leh chan nia an sawi ber chu, ” Hun sarih ral huna Thawhlehna hun lo thleng tur,” a ni. Tuna ze khel mekte hian Zoram sual zia an khel mek niin an sawi.

Pic:1. Sialhawk Pastor nen.

He kohhrana an hruaitu ber hi harhna lo chang vak tawh, mi pasal luahlan a, he kohhran hi lo indin chho ta a ni a, tuna harhna chang mek zingah hian a fanu a tel ve mek bawk…tih thu min hrilh bawk.

Harhna chang an tih tleirawl hote nen.

He thil hi thilthleng hup hup pawh ni lo, khualzin ten an thla an lak an vawrh darh tak vel mai mai a ni. Thu thehdarh kawngah hian kan kut a rang mah mah deuh thin a ang?An zingah thu tlem ka sawi a, “Harhna dik chuan Isua a chawimawi a nga, Bible nen a inmil tur a ni,” tih tawite ka sawi a, tawngtaina hun ka hmang a, kan chhuahsan leh ta a ni.

Mi rinawm tak hnen atanga thu kan dawn danin, Kelkang harhna kalzel atang khan Kohhran duhkhawp lohna, Biak In aia hmun thianghlim dang ngaihsanna lo piang zel hian Kohhran atanga chhuak ni lo, Chanchin tha dang a hring chhuak nasa a ni.

PS: Nikum khan kohhran pakhatah rawngbawlna kan nei a, an hmunthianghlim siamah khan Pheikhawk bun chunga luh an remti lo va, ” Kohhran hmun thianghlim ber Biak In-ah pawh Pheikhawk ka phelh ngai lo,” tiin, an hmunthianghlim siamah khan ka tawngtai ve ta lo.

Biak In aia Hmun thianghlim ngaihsanna rilru hi Kohhran mite rilruah a intuh zel ang tih a hlauhawm hle.

Author :    

Aside | Posted on by | Tagged , , , | Leave a comment

KUM 283-A UPA NIA HRIAT THING LIAN SAMPLE A DUH TAN EN THEIH TURIN PHOCHHUAK

13th July, chawhma dar 11.00 khan Environment, Forests & Climate Change department hnuaiaForest Training Institute,Bethlehem Vengthlang, Aizawl ah India rama Ngiau thing (Michelia champaca) lian ber cross-cut sample dah chu Pu Rosiama Vanchhong, PCCF (Wildlife) chuan a duh apiang en theih turin a hawng.

He thing hi India rama Ngiau thinglian ber a nih mai bakah khawvel pumah pawh a aia lian record hi hriat a ni lo. He Ngiau thinglian hi N. Khawlek ram a mi niin, N. Khawlek YMA Branch ten uluk taka an humhalh thin a ni a. Kum 2007 fur laiin thlipui leh leimin avangin a tlu ta hlauh mai a. A tluk atanga kum 9 zet hnuah EF&CC department leh N.Khawlek Branch YMA te hma laknain a sample hi zaithlak a ni a, Aizawlah phurh thlak a ni ta a ni.

EF&CC deparment chuan he Ngiau thing lian hi ngun taka Annual Ring Count hmanga an zirchian atangin kum 283 zet a upa niin an chhut a ni.

He programme hi Pi Margaret Lalramchhani, Principal, FTI in a kaihruai a. Pu Rongura Hrahsel ACF,Aizawl Division in Technical report a pe bawk.

Pu Rosiama Vanchhong, PCCF (Wildlife) chuan he thinglian sample hi zirlai, researchers leh training nei tura ramchhung leh ram pawn atanga lokal te tan a chenfakawm a beisei thu a sawi. Pu Rosiama Vanchhong chuan N Khawlek YMA Branch te inpekna ropui a tih thu a sawi a. Pu Liandawla APCCF pawhin zirmite chuan Annual Ring Count hmanga thing upat zawng chhutchhuah mai bakah annual ring pattern atangin kum tam tak chhunga thil thleng ram kang, khawthal nasa (ruahtui tlem) te leh thildangte pawh an chhut chhuak thin niin a sawi. He thing lian sample pawh hi chutiang zirbingna atana tangkai theih tak tur a nih thu Pu Dawla chuan a sawi bawk.

Author :    

Aside | Posted on by | Tagged , | Leave a comment

NI SARIH ZAWN HNUAH PU SAITLUANGA RUANG HMU LO, VAWIIN KHAN A TLAKNA BULAH THLAHNA HUN HMANG

July ni 7 zing dar 9:30 vel a Tlawnglui G.O.P kaia tla Pu Sailutthanga kum 45 Dinthar (Sairang) chu theihtawp chuaha zawn a nih hnuin 13 july thleng khan a ruang hi hmuh a la ni lo va. 13 july kha a ruang zawn ni 7 -na a nih tak avangin, tlai dar 3:30 khan a nawlpuia zawn tihtawp a ni.

A nawlpuia zawnna hun kharna inkhawm hi a chet sualna hmunah khohhran, khawtlang leh ruang zawnga fehchhuak ten thlahna hunserh te an hmang a ni. Dinthar khawtlang chuan an chhiat tawh chung changah Sairang, Sihhmui, Mualkhang Serzawl, Nazaret, Khamrang, Lengpui model te bakah, Aizawl veng hrang hrang branch 25 te chungah lawmthu an sawi a. Hei bakah, an mamawh engkim tih saktu Central YMA chungah leh Tlangnuam BDO chungah te, Pawl leh mimal thil pek chi hrang hrang pe tute chungah Dinthar sairang khawtlang chuan lawmthu an sawi a ni.

Author : Vanneihthanga Vanchhawng    

Aside | Posted on by | Tagged , , | Leave a comment

MOTOR HNUNGA THIL BEL VANGIN NAKTUK ATANGA SERVICE TAWH LO TURIN HRIATTIR

Mamit to Aizawl Sumo service Vanchhawng Sumo chu Motor hnung a Sticker bel avangin naktuk atrangin service toh lo turin Mamit DTO chuan a hriattir.

Mamit to Aizawl Service Vanchhawng Sumo hian an Motor hnungah “Mamit kawng chhe lutuk hi ka chau” tih leh”Lalpa Eiruk theihna lakah min veng ang che” tih a tar/bel a,heimi avang hian Mamit DTO pu H.Lalhmingliana chuan Motor document laksak in,naktuk atranga thu leh awm hma chu service tawh hrih lo turin a hriattir bawk a ni.

Mamit DTO pu H.Lalhmingliana chuan public carrier ah an motor hming leh an tlanna route bak ziah chu dan phalloh ani a ti a. Vanchhawng Sumo pawh hian dan a bawhchhiat bakah Aizawl lama an hotu lian ten titur a an tih anga hma la a nih thu a sawi a ni.

Hetihlai hian Mamit lam atangin thu mak tak a lo awm bawk

He motor neitu hi Mamit kawngchhia vei em em tu Pu Liana a ni a, Driver fel leh tlawmngai, Chawimawina lo dawng tawh tu a ni.

Hetih lai hian Social media hrang hrangah Sumo permit chu cancel sak anga thuthang chu thu diklo a nih thu leh motor document erawh an hren sak hrih thu a sawi bawk a ni.

sorkar sawiselna a nih vanga mam hrim hrim a a ang ber mai

Aside | Posted on by | Tagged , , | Leave a comment

MOTOR HNUNGA THIL BEL VANGIN NAKTUK ATANGA SERVICE TAWH LO TURIN HRIATTIR

Mamit to Aizawl Sumo service Vanchhawng Sumo chu Motor hnung a Sticker bel avangin naktuk atrangin service toh lo turin Mamit DTO chuan a hriattir.

Mamit to Aizawl Service Vanchhawng Sumo hian an Motor hnungah “Mamit kawng chhe lutuk hi ka chau” tih leh”Lalpa Eiruk theihna lakah min veng ang che” tih a tar/bel a,heimi avang hian Mamit DTO pu H.Lalhmingliana chuan Motor document laksak in,naktuk atranga thu leh awm hma chu service tawh hrih lo turin a hriattir bawk a ni.

Mamit DTO pu H.Lalhmingliana chuan public carrier ah an motor hming leh an tlanna route bak ziah chu dan phalloh ani a ti a. Vanchhawng Sumo pawh hian dan a bawhchhiat bakah Aizawl lama an hotu lian ten titur a an tih anga hma la a nih thu a sawi a ni.

Hetihlai hian Mamit lam atangin thu mak tak a lo awm bawk

He motor neitu hi Mamit kawngchhia vei em em tu Pu Liana a ni a, Driver fel leh tlawmngai, Chawimawina lo dawng tawh tu a ni.

Hetih lai hian Social media hrang hrangah Sumo permit chu cancel sak anga thuthang chu thu diklo a nih thu leh motor document erawh an hren sak hrih thu a sawi bawk a ni.

sorkar sawiselna a nih vanga mam hrim hrim a a ang ber mai

Aside | Posted on by | Tagged , , | Leave a comment

CHAMPHAI ZION VENG MI BO RUANG HMU TA

Champhai Zion Veng a Pi Thanzauvi kum 63, karkalta Zirtawpni atanga a chin hriatloha bo ta chu Champhai Sub-Hqrs kaihhruaina hnuai YMA Branch hrang hrang ten nasa taka an zawn hnuah nimin lam khan amah ni thei awm hmuh thuthang awm chu bawhzui a nih hnuin hetiang hian Pi Thanzauvi chungchangah thuthar puanchhuah a ni ta.

Tiau Lui(Fuan Li) a mi ruang Leisenzo leilet siam ten an chhar, a ruang rimchhiat avanga an lo phum chu SYMA,TUIPUIRAL GROUP YMA, POLICE(SDPO) leh Khawbung BDO te leh Leisenso, Sesih Khawtlang te nen a ruang phawrh a enfiah a ni a, Mibo zawn mek Pi Thanzauvi Kum 63,Zion veng ruang a ni tih finfiah a ni a, an chenna in ah a ruang hi Tukin zing Dar 5:35 khan thlenpui a ni,a ruang hi vui nghal a ni ang.

Mipui te kan in hriattir in Mibo zawng atha leh zung sengtu, sum leh pai thawhtu zawng zawng te hnenah SYMA Champhai chuan lawmthu a sawi mawl mawlh a ni e.

(PC LALRAWNLIANA)
SECRETARY,
SYMA, CHAMPHAI.

Aside | Posted on by | Tagged , , | Leave a comment

Crown Colony kha kan nei thei lo chiah a maw ?

Thu mu hnu kaihthawh tum vang ni hauh lovin thudik zawk hriat tumna vangin Mizoramin Crown Colony kha kan lo nei thei nge nei thei lo tih hi hriatchian a ṭul hlein ka hre ṭhin.
A bik takin Indian History zir zingah Mizoramin Crown Colony kha lo duh pawh ni ila, India khan min pe phal dawn chuang lo niin an zir a.

An ṭanchhan tinghet turin Indian Historian thuziak meuh thur chhuah tur an nei a nih kha. Nimahsela, Indian History hi Sap huatna nena ziah a nih miau avangin an ziak ang ngau ngau hi thudik vek a ni e tih chi erawh a ni lo tih History zirlaite hian an hre ve bawk tur a ni ang.

Mizo Union khan, “Crown Colony-a awm pawh duh mah ila, India-in a phal lovang” tiin mipui an hrilh ṭhin khra a ni a. India pawh Brtitish lak aṭanga Independent ve tho an nih avangin Crown Colony-a awm kha thil har ni theiin a lang lo. Kan duh leh duh loha thu a ni mai zawk, India hnuaia awm kan nih miau loh avangin.

He ṭanchhan tinghet tur hian Pu Lalkunga, Zotlang P/S-II Head thusawi i lo en teh ang. “Kum 1946 nge 1947 kum tir lam ka chiang ta lo.

Chhimbial zirtirtu Conference-ah Rev H.W Carter-a chuan, ‘Kumpinu hian India ram hi a chhuahsan dawn ta a. Nangni hi India mi in ni ngai lo va, tunah hian a lo independent dawn ta a. In duh chuan in zawm thei a, Burma leh Pakistan pawh in zawm thei ang.
In duh chuan independent pawh in thei. Kei chuan in tân Crown Colony-a in awm hi a ṭha berin ka hria. Bristish-in kum 20 a enkawl che u chuan hma in lo sawn tawh ang a. In duh phawt chuan British hnuai aṭanga independent chu a har tawh lovang’ tiin”

He mi bak hi tarlan tur a la awm nual nangin an thusawi hi angkhat vek a nih avangin tarlang lo ta mai ila.

Tichuan, kum 1947 khan Sikulpui, Serkawnah Public Meeting awmin Mizo Union hruaitute pawh an lo tel a. India-a luh a ṭhatzia an rawn sawi ta a.
Pu Carter-a khan, “Engati nge Mizote hi in ât zawh tak vek mai ni? Mizote hi British lo kal hmain tu awp mah in ni ngai hlei nem! In ram chin pawh Chinwin aṭanga Bay of Bengal inkâr a ni a. Chhim lamah Akyab lawng chawlhna a ni a, hmar lamah Imphal aṭanga mel 2 chin a ni. India-a luh hi in tân a ṭha lovang” tiin.

Mizo Union lam hian Pu Carter-a hi khakin, “Engah nge Missionary-in politics i khelh? Kan report ang che, sawi tawh suh, ṭhu rawh” an ti a. Hemi ṭum ang reng renga Zochhawni pa thinrim hmel hi ka la hmu ngai lo, a ṭhu ta hmak mai a ni tiin hemi ṭuma tel ve Pu CS Zawna chuan a sawi a ni. Mahni ṭanghma hai luatna kha kan tuar ta a nih hi.

India rama lut lo va Crown Colony kan neih theihna tichiang bertu chu ni 17, 1947-a Central tirha Advisory Sub Committee lo kal khan a ni ta a ni.
Assam CM Bordoloi-a khan, “Mizoram hian India zawma Assam-a in beh hi a ṭha ber ang” tiin. Assam PD Minister Nicols Roy-a pawhin, “Hmân kum khan Mizoram hian Assam Council-a beh in rawn dil a, eng emaw vangin la ngaihtuah loh a ni. Tun hi in tân Assa Council-a behna hun remchang tak a ni” tiin a sawi bawk.

Tin, AV Thakara, Constituent Assembly Palai pawhin, “Mizote leh India hi englai mahin kan la inhrechiang lo va, kan inkârah chhumpui zing ang maiin kan inhre riai ruai a. Nakin lawkah chuan kan la thawhho ka beisei” tiin a sawi bawk a ni.

BM Rao-a pawhin, “Kei chu member ka ni lo va, in hmnel ka hmuh ve duh avangin lo kal ka ni. Mizote hian hma insawn chak hle mai a, nakin lawkah chuan in vel hnamte hian inhumhim nân an la hmang ang che u. India zawm hi in tân a ṭhat ber ka ring” tiin a sawi bawk a ni.

Heng aṭanga chiang ta êm êm chu India zawm hi kan duh leh duh loh a ni tih a chiang a ni. Tichuan, Mizorama thu ber MacDonald-a khan Vantlang ro inrel dan min zirtir a tum ta kha a ni a.
Lal aiawh 17 leh Hnamchawm aiawh 20 a ruat ta a. Nimahsela, he a thil tum hi a hlawhchham ta a, a hlawhchham chhan pawh a hnuaia mi vang hi a ni.

“Ka pu, he conference hian mipui ai kan awh zawh lohzia tahrik ni 6, Nov 1946-ah khan kan thehlut tawh a. Mizoram aiawh tlak nia kan hriat dan leh duh dan chu, ‘Hnamchawm aiawhte hi Lal aiawh te let hniha tam an ni tur a ni, chumi a nih loh chuan he conference-ah hian nimin ang bawka banphara titlu turin hnamchawm aiawhte hi kan tel thei tawh lovang”
Hnamchawm aiawhte tan
by Saprawnga,
date 8, Nov 1946.

Nov 13, 1946-ah MacDonald-a hian thuchhuah siamin, “………ka chawl ta. Keima tân pawi ka ti hlei nem. Mizo tân pawi ka ti êm êm, Mizo a bo dawn niin ka ring.” tiin.

Tuifinriat ral aṭangin mi ngo an lo chhuak ang a, an thu lo zawm ang che u, tih kha kan awih tak miau loh avangin Zawlnei Saikhuma hrilhlawkna – “In rorelna hmunah seat min klian rawh u, min ken duh loh a, ka inthiarfihlim chuan in hmelchhiatna laiah in in en ang a, ‘Tumah ka ring bik lo’ tiin in inmelh muk reng mai ang” a tih ang chiahin kan lo awm ta a nih hi!

Author : Lalremliana Pachuau    

Aside | Posted on by | Tagged , , | Leave a comment

James Dokhuma ( Biography )

Thu leh hla lama Mizote tan rotling tak tak hnutchhiahtu James Dokhuma hi Kum 1932, June 15 khan Pu Hrangchia fapa ni turin a lo piang a, a pianpui unaute zingah hlaphuah thiam Pi Romani leh Pu Laltanpuia te pawh hi Mizo fate zinga hriat hlawh an ni. Heti khawpa Zofate zinga ziak mi lar nih mah se, zirna lamah chuan a thleng sang lem lova, a pianna khua Sialsukah Pawl 5 thleng chauh a zir a ni.

Changela sawi bel an sawi ang maiin hna hrang hrang a thawk kuala Kum 13 mi a nihin India Sipai- ah a tang a, rei pawh tang lovin 1950 khan a bansan leh a, thil dang dang a thawh kual hnuin kum 1954 khan St.Paul’s School-ah zirtirtu hna a thawk a. Chu pawh chu thawk rei lovin Aizawl C.D Block-ah Sanitary Inspector hna a vuan leh bawk. Rambuai hma deuh kum 1960-ah a hna bansanin Hualtu khuaah zirtirtu hna a thawk leh a ni.
Rambuai a lo nia Mizo fate tan tiin, a rammu ve nghal a, Tlungvel bial Block President a ni a, khatih laia MNF ramhnuai sawrkarah khan M.P a ruat a ni a, chumi hnuah Deputy Speaker-ah atang leh bawk a ni.

Kum 1968 March thlaah vanduai thlak takin vai Sipai lakah hliam a tuar a, India Sipaiten manin Nowgong Special Jial-ah an thawn a, chumi hnuah Gauhati Jail-ah dan sawn a ni leh a. Vairam hla takah Tanin thima khung nimahse a ngaihtuahna chuan Zoram a theihnghilh thei lova, zalenna a neih theih nan tia a nunna hial pawh thapa a beih mek Zaram chanchin chuan a suangtuahna khawvel pawh engdang mahin a chim buai pha lo. Ziakmi Pu Dokhuma chuan ram leh hnam tana a lunglenna chu boruaka tham ral mai phal lovin Zofate lung tileng fo tur leh ngaihnawm tih em em ni fo turin Nowgong Special Jail-a a tan lai hian thawnthu ‘Thla Hleinga Zan’ chu a ziak tana Guwahati Jail-ah sawn a nih hnuin a ziak zo ta a ni..

India ramin vawiin thlenga an ngaihsan leh Hnampa tia an koh Mahatma Gandhi leh Jamaharlal Nehru te iangin lung ina a tan lai hian kut kuangkuaha thu mai mai lovin thangthar lo awm lehzel turte tan thawnthu dang pahnih ‘Rinawmin’ tih leh ‘Khawhar In’ tihte hi a ziak zo bawk a ni.

Kum 1971-ah Jail atanga chhuahtir a ni a, kum 1973-ah E.Lungdarah zirtir hna a thawk leh a, chu pawh rei lo teah bansanin Aizawlah a pem luta a nupui fanaute nen Kulikawn vengah a boral ni thlengin an inbengbel ta a ni.

Mi bik Pu Dokhuma hi zirna lamah pawl nga thleng chauh zir mah se, pianpui finna nei tha mi a ni a, sipai a tan lai pawh a Education Instructor ni pha a ni a a. Ama’n sawi chhuah a duh vak lo nang a Kum 1997 khan University of California (USA) chuan ‘Honarary Doctorate Degree’ a rawn pe hial a ni. High School pawh rap lo ni mah se, a thu ziak thiam avangin kum 1983 khan Mizo Acadaemy of Letters (MAL) chuan ‘Academy Award’ a pe a. India sawrkarin a khua leh tui mi hmingtha leh chawimawi phu a tihte hnena a hlan thin ‘Padma Shree Award’ pawh kum 1985 khan India President hnen atangin a dawng bawk. Zofate zinga a hmasa ber atan ‘Sahitya Academy’ chuan thuziak thiamte hnena chawimawina an pek thin “Basha Samman” chu kim 1997 khan a hlan bawk. Zofate zinga mi dang lam bik a nih lanna pakhat chu a lehkhabu ziak Thla Hleinga Zan tih chu Congress Library, Washington-ah dah a ni ve vang thawh a ni.

Pu James Dokhuma hi engtik lai khannge Zofate hian thuziak mi a nih tih kan hriat tan tih hetiang hian Mizo zinga thil chik mi kan neih Pu B. Lalthangliana chuan a sawi. ‘Tun hma deuh, 1960 vel tawhah khan a titi thiam leh tawnghmang thiamzia miten an hre tan a. Kum 1975-a Adult Education Wing chhuah Meichher thlatin chhuak atangin Thu leh Hla a thiamzia mipuiin an hre lar tan zual ta ti ila, a dik thawkhat awm e” tin.A thu ziah leh thawnthute hi Sikul leh College Zirlaibuah hman a ni nual a, thu lamah chuan ‘Ka thu Hretu’ tih thiam leh ngaihnawm tak maia fountain-penin a nunah awmzia a neih thu leh a hman tangkai thinzia a ziah chhuahna chu Mizo zirlaite tana tunlai tawng taka ‘Creativity’ neihtir tura fuihna tha tak a ni. A thuziak pakhat ‘Irrawady Luikamah’ tih pawh C1-XII zirlaibuah hman a ni. College zirlai lamah ‘Tumpangchal nge Saithangpuii tih leh ‘Thla Hleinga Zan’ tihte seng luh a ni a, Mizo Literature zirlaiten an hlawkpui thin hle a ni. College leh University thleng pawha class la tura sawm a ni fova, tin, Debate, elocution, extempore speech leh thu leh hla lama
intihsiakna hrang hranga lawmman a lakte chu sawisen pawh a ni lo hial zawk a ni.

Pu Dokuma hi sakhua lamah chuan an lawina Kulikawn Salvation Army kohhranah Local officer a ni a, kohhran rawngbawlna hrang hrangah pawh chanvo a chelh nual a ni. Ama pualin JD Press a dina chutah chuan a thu leh hlate chhiar tura chhut chhuah a ni thin a ni. Pa inngaitlawm tak a ni a, mite anga kuttling lova hausak thur thur duh mi chu ni se Mizo fate zingah chuan a ti thei pawl tak ni ve awm a ni a, mahse, khawvel hausakna leh kuttling lova neih ai chuan ti a, retheih leh hrehawm pawh thlang zawk duhmi a ni. An chenna In pawh a lan dan mai chuan a ropui lova, tunlai khawvelah chuan a thing lam tawh a ni mah
zawk, mahse, a chhunga luahtu Pa ber en erawh chuan a ni tluka ropui hi an tam bik lo vang le!

Heti khawpa pa lar leh hmingthang ni si kha hemi thuziaktuin 21.March 2007 (Nilaini) a a tlawh tum chuan khumah damloin a lo mu reng tawh a, mi tlawmngai tak a nih avangin thei leh thei lova lo tho chhuakin inleng a la rawn kawm hram hram a ni.

Khawvel ziak mi hmingthang leh hlaphuah thiam hmingthang tam takte angin Pu Dova pawh hi sum leh paiah chuan hausa a ni lova, a nupui fanauten duat takin an enkawl a, an nuin “Hei a dam hlei thei lo pawisa chu nei ila Doctor hnena entir ka duh mang e” a tih hian mi entawn tlak a nihzia a lantir foin ka ring.

Hriat theih chinah lehkhabu 39, hlahril 40 chuang eassy leh artical 400 chuang a ziak chu mipui chhiar theiha tihchhuah a ni tawh a ni. A thawnthu ziak Christian Novel phei chu English Version pawhin chhiar tur a awm a ni.
A article ziah ‘Gone are the Day’ tih a Sikul lo kai tawhna thin Gov’t M/s-I, Sialsukten a Golden Jubille Souvenir atana a ziah (a hnu lawka Zolife Magazine-ah pawh chhuah a ni) chu mipui vantlang tana a kutchhuak chhiar theih awm hnuhnung pawl a ni.

Mi danglam a nihna pakhat chu khatih hunlaia thil ziak nana an hman thin Fountain-pen tui bur khat khan lehkha phek engzat nge a ziah theih a, thumal eng zat ziah nan nge a daih tih lam a chhutchhuaka chhinchhiah peih khawpa mi taima a ni.

Zofate hian mi ropui leh hnam tana uiawm tak tak kan nei thin, chung zingah chuan Pu James Dokhuma pawh hi hmaih theih a ni lo. Amah Pu B.Lalthangliana’n a la dam laia a sawi dan takah “Tunah pawh hian a kut a la chawl lova, lehkhabu tha tak tak, hnam rotling tur la ziak zawm zel tura beisei zinga tlar hmaa thu a ni” a lo ti hi pawmawm tak a ni.

Hmanah khan “Thla Hleinga Zan” khan a nunah awmzia a nei thin a, ni leh thla reng awm tawh lohna hmunah chuan Pu James Dokhuma chu chawl hahdam tawh sela, hun thim ber lai pawha ‘Rinawmin’ a lo tih kha Zofaten chhunzawm sela, chu ‘Khawhar In’ chu a nupui fanaute tan thlamuannaah lo chang zawk tawh rawh se.

A thu ziak hrang hrang avang hian a chanchin ziaktute chuan – “James Dokhuma chu Poet, Novelist, Historian, Biographer, Essayist, Lexico- grapher, Playwright leh Orator”a ni tiin an ziak a.Tin, a Tawng Un Hrilhfiahna ziak avang hian K.C.Lalvunga (Zikpuii Pa) phei chuan, “Father of Mizo Lexicography tia koh tlak a ni” a ti hial a ni.

A thuziak thiam leh that em avang hia vawi tam tak chawimawina a dawng tawh a.Tarlang vek seng lo mah ila hengte tal hi chu i han tarlang teh ang: Kum 1986,1988, leh 1991-ah Lelte Weekly-in Best Writer atan a thleng tawh a.
Kum 1983 December 3-ah Mizo Academy of Letters-in Academy Award a hlan a.
Kum 1985 March 15-ah India President-in PADMA SHRI Award a hlan bawk.
Mizo zinga Padma Shri dawngtu hmasa ber dawttu a ni.
Tin All Mizo Students’ Union (AMSA) chuan 1991 khan Best Writer Award an hlan bawk.
A thuziak that em leh tam em avangin The International Unibersity , California , USA chuan 1997 April 10 khan Doctor of Philosophy (Ph.D) an hlan a.
Chuta tang chuan Dr.Dames Dokhuma tia koh theih a lo ni ta a ni.
Kum 1998 September 13-ah Sahitya Akademy chuan New Delhi-ah Bhasa Samman 1997 Award a hlan ve bawk. Mizo zinga a dawng awm chhun a la ni.

Dr.James Dokhuma hian nungcha humhalh hi a ngaih pawimawh em avangin, sum tam taka a lei a silai chu hman tawh ngai loh turin Sorkar hnenah a lo tung tawh a. He lam kawnga a tangkai em avangin hian Tuisualral Youth Association chuan 1995 khan “Friend of Animal” title an hlan a; Sorkar pawhin Wild Life Chief Warden atan pawh hun engemaw chen chu an hmang a ni.

Ani tluka zirlai bua seng luh tlak thu ziak tam an awm kher lo vang.
A lehkhabu ziakte i han tlar chhuak reng reng teh ang ;
Rinawmin (1970)
Khawhar In (1970)
Thla Hleinga Zan (1970)
Zoram Kohhran Tualto Chanchin (1975)
Tumna chu a hlawhtling thin (1976)
Khawtlang INzirna (1976)
Ni leh thla kara leng (1978)
Hmasawnna (1979)
Arsi Thawnthu (1979)
Hausak aiin hrisel a hlu zawk (1979)
Finna Hmahruai (1980)
Tawng Un Hrilhfiahna (1981)
Tumpang chal nge Saithangpuii(1981)
Chawngkhum dan tlang huat loh (1981)
Ka Inpuanna (1982)
Chawngkhum dan tlang huat loh Bu 2-na
Hmangaihna Thuchah (1982)
Irrawady Lui Kamah (1982)
Good Bye , Lushai Brigade (183)
Notes on Mizo Idioms & Phrases (1983)
Kimoto Synora (1984)
Nunna Bu-a Hming chuangte (1986)
Gobbatha (1989)
Chhungkua (Sipai Inkhawm Thupui) (1990)
Lonesome Cowboy (1990)
Hmeichhia leh MIpa Indona (1992)
Hmanlai Mizo Kalphung (1992)
Netaji Shubhas Chandra Bose (1993)
Mak leh Mak (1995)
An va hlu em (1995)
Enthlatute (Sex Spy & War Spy) (1995)
Silaimu Ngaihnawm (1995)
Ka Thinlung Luang Liam (1996)
Rilru Far Chhuak (1996)
Zokhaw Nun (1998)
Thla Hleinga Zan Par 2 (1999)
Ch.Chhunga Chanchin (1999)
Thisen leh Mei (Self Denial Thupui ) (2001)
Lamsuaka (2001)
Singapore-a Mizo Saltangte (2002)
Kham Kar Senhri(True Story) (2005)
Mizo Tawng Kalphung (2005)

THU LEH HLA A A KUT CHHUAK NEIH ZAT:
a) Lehkhabu chhuah zat : 42
b) Esay : 450-500
c) Poem : Phuah tawh – 42 Chhut tawh – 36
d) Novels : 13
e) Drama : 4
Pu James Dokhuma hi kum 2005 vel atang khan a hriselna a tla hniam tan ta viau mai a,kum 2007 February 18 (Sunday) zana a inkhawm bang chu a tlun haw tlat mai a. A khawsik a reh that theih loh avangin 23-ah Grace Nursing Home < Lower Zarkawt , Aizawl-ah admit a ni a.

Doctor-ten an hriat dan chuan a zunthlum natna chuan a kal a tichhe tawh a, a mit a tichhe bawk a, a lung leh thin thlengin a khawih tawh a; chu bakah chuan a zunkawngah infection a awm tih a ni.

Chtiang natna khirh tak mai chuan a tuam nasa zual ze a,tichuan March 10, 2007 chhun dar 11:20-ah ropuinna kaisanga turin he khawvela a zin kawng chu a lo zawh tawp ta a ni.
Ziak thiam, sawi thiam, phuah thiam, mi bik, Pathianin Zofate tana kan ro hlu tura min pek James Dokhuma hlutzia hi kan hre dawn chauh niin ka hria.

Nikhua a rei tulh tulh ang a, kan la ngai zual zel ang tih ka ring a.Amah ang hi engtikah nge Zofate hian kan neih leh ang tih pawh hriat phak a ni lo, hetiang mi hian he kan awmna lei hi kum tam tak danah an rawn tlawh zeuh zeuh chauh niin a lang e.

Thulakna; Mizo khawvel

Retold by Lra Stipe Miocic    

Aside | Posted on by | Tagged , | Leave a comment