Rio Olympic Rugby Champion Fiji

  • Rugby ah Fiji an Champion
  • Ram pumin Gold medal an lawm.
  • Fiji Prime Minister declare National Holiday.

Fiji ram chuan August 11, Thursday khan Rugby ah Olympic gold medal an la a, a lawm nan ram pum an sähawk.

An ram men’s rugby 7s team te chuan 43-7 in Team Great Britain chu Rio Olympic 2016 final ah an hneh a. An Gold medal lak hmasak ber a nih avangin a ram mipui chuan anmahni ramah an lawm a, an ri luih luih reng mai. “An lawm vek a ni, Ni thum chu an lawm der tawh mai” tiin Fiji Prime Minister Frank Bainimarama chuan a sawi a. A hnu lawkah Aug. 22 khi Sorkar chawlh ah a puang nghal a.“ Fijian kan nih hi kan chhuang ve hle a ni,”a ti.

He rugby final hi an ram pumin an en a ni ber a, Company tam takin an hnathawk ten final an en theih nan chawlh an pe hial a. Hun tawp hamrik a ri chiah chu mipui an au dur dur a, kawtthler ah an tlan chhuak a, an ram flag an vai a, an au dual dual mai.


Suva ah Big Screen a thlirtute

Suva khawpui kawtthler ah te chuan mipuite an thum dur dur mai a, an hnathawh an chawl a, final en tur hian school pawh an chawl vek a, “kan ram team te an lo haw hma chu kan lo lawm tluk tluk mai dawn a ni” an ti hem mai.


Fiji 7s captain Osea Kolinisau a chhungte pawh lawm tak an ni.

He South Pacific ram Hausa lo tak ah hian mihring 900,000 an awm a, Rugby hi an sakhaw pakhat a ni tawp mai. Cyclone Winston chuan February thla khan a nuai hrep a, mi 43 thi in, sing tel chu in leh lo nei lovin an awm a, an tan chuan he gold medal hi hlu tak a ni.

An coach hi Ben Ryan niin British mi a ni a. Fiji ram hian an ngaisang bawk a, Tunlai tak hi chuan Ram pum mai hian “Ben hi kan chhung a nia”an ti deuh fur mai a ni.

Prime Minister chuan “A lawmna hun kan duang tawh a, kan lawmna hun hi ni khat chauh a ni kher lovang ” a ti nghe nghe.

Advertisements
Aside | Posted on by | Tagged , , | Leave a comment

NGAIHSAK HLAWH LO THIHNA, MITTHI PHONE RUK SAK

  • Delhi ah rickshaw Pu motor in a su.
  • Delhi ah hliam tuar tanpuitu awm lo

11 Aug. zing lam dar 5:40 khan Delhi khawpuia auto rickshaw pu, zan lama security guard hna thawka khawsa, ‘Matibool’ tia hriat chu truck-in suin kawngsirah a let reng mai a, a sutu truck chuan tlansanin tumah ngaihsak a hlawh lo va. CCTV-a a landan an tarlan danin kea kal mi 45, car 140, rickshaw 82, bike 181 te chuan an kal pel mai mai a, Delhi police emergency van paw’n a tlan pel a ni an ti. A tawpah rickshaw pu pakhatin tanpui tum niawm takin a pan a, mahse; a cell phone leh eng engemaw a iptea mi chu a laksak a, a kalsan leh mai a. Minit 40 chhung zet chutia kawngsira a leh reng lai chuan a thianpa pakhat lokalin police a hriattir nghal a, mahse; damdawiin an panpui laiin kawnglakah a thi ta a ni.

Matibool hi kum 10 kalta khan Delhi-ah hian Bengal atangin a lut a, chhunah rickshaw khalhin zanah security guard angin a thawk leh a, a nupui leh a fapa 2 leh fanu 2 te a kalsan a ni. Tunah hian police te chuan a sutu truck leh rickshaw pu a phone ruksaktute chu an zawng mek a ni. Hei vang hian vawiin khan Delhi sorkar chuan kawnglaia tawhsual tawk thichhawnga let rengte damdawi ina hruai thlengtu hnenah lawmman ruahman a nih tur thu an puang a ni.

Aside | Posted on by | Tagged , , | Leave a comment

KHAWVEL HARSATNA HMACHHAWN TURIN US MILITARY A CHAK TAWK : F-35A JET HMAN THEIH A NI DAWN TA

Aug 13: US Air Force te hman tur fifth-generation Joint Strike Fighter, F-35A chu raldo thei turin a inpeih ta a, kum 2018 ah raldo ven buk (military base) ah chhawp chhuah tan a ni ang. AirForces Gen. Herbert “Hawk” Carlisle, commander Air Combat Command chuan, “Pentagon-in F-35A fighter jet a nei ta hi thu lawmawm tak niin, European leh Pacific operation training pe turin, tun atanga thla 18 ah tirh chhuah theih a ni ang”, a ti.

Gen. Carlisle chuan,”Tha chungchuang niin, he F-35A chuan USnational security pawh a venghim thei hle ang. A ralthuam pai tru maite chuan a kah tum tak a kap fuh chat chat thei a ni,” a ti.US Air Force te chuan, he F-35A hi 1,763 zet lei a tum a, a man hi tun dinhmunah US$ maktaduai 98 a ni a, siam chhuah tam hunah $ maktaduai 85 ang velin kum 2018 khian lei theih rin a ni.

Tunah F-35A hi US Air Force Squadron 12 awmin, 24 operation aircraft angin a hmang mek. Close-air support (CAS) bakah supression and destruction of enemy Aircraft (SEAD/DEAD) a pethei bawk. US Air Force chuan F-35A hi 15 chu 34th Fighter Squadron, Hill Air Force Base, Utah ah a kawl mek.July 28-ah test chikim “air to air kill” tih chu California-ah a paltlang a, a ralthuam tenau pai pakhat AIM-9X sidewinder missile pawhin lei lama fanghming chal dar a kap fuh thei hial ang tih tur a ni! Tha na mailo, theuneulo, mai mai lo, turu buru a ni tawp mai. F-35A hian CAS pai pakhat Small Diameter Bomb-II a pai bawk a, hei hi advance precision guided weapons system niin, 2017 ah vuah fel tum niin, hetiang tho hi F-35 ah pawh kum 2022 ah vuah fel vek tum a ni.

US Military-in khawvel harsatna hmachhawn peih reng:Mi thenkhatin US military chu harsatna hmachhawn turin a inpeih tawklo tih an sawi thin chu Army Gen. David Patreaus chuan, thil awihawm loh lutuk leh thuvauk (myth) mai a ni, a ti. Gen. Patreaus hi Iraq leh Afghanistan a US sipai leh NATO sipai, Multi-National Army te hotu lo ni tawh niin, Army atanga a pension hnuah kum 1 awrh CIA Director-ah ruat niin, ama chanchin ziaktu Paula Broadwell-i nen extra-marital affairs an neih vangin, hmingtha lutuk lohvin CIA director atanga chawlh tir anih kha. Amah hi Ph.D a ni a, Nov 2012 ah CIA director angin a in resign a ni.

A chanchin (biography) hi “All In: The Education of David Petraeus” tih niin, 2012 ah tihchhuah a ni. Hetianga a hming chhiat vangin Four Star General si kha, 3 Star tura anihna dah thlak rin hial a ni a; mahse, military investigation chuan, a nihna dah hniam lam hi Senate Armed Service Comtt ah an recommend lo a ni.

Rtd Gen. David Patreaus chuan, “Engtik lai pawhin, khawi hmunah pawh US military te chuan harsatna hmachhawn turin an inpeih a ni” tiin, Nilaini khan Brookings Insitute sawiin, a thusawi hi Washington Post chanchinah a ziak bawk. Patreaus thusawi hi Michael O’Hanlon pawhin nemnghetin, “US military chu a chak tawk a ni”, a ti.

Tun hnaiah Donald Trump chuan, US military te chu inpeih tawklo tiin, chhiatna (disaster) a thleng palh thei tiin, a campaign ah a sawi chhuak a ni. O’Hanlon leh Patreaus te chuan, sum pawh military chuan a tlachhamlo niin an sawi.

Tun din hmunah US Defense budget hi US$tluklehdingawn 600a ni a, Cold War vang lai aiin a tam zawk a ni. Cold War lai khan $ tluklehdingawn 525 te a ni thin. Kum 2001 ah khan $ tluklehdingawn 400 niin, President Bush a term tawp lam leh President Obama term tir lamah defense budget hi tihtlem a ni chauh a ni. Kum 2013 ah khan Pentagon chuan $ tluklehdingawn 100 zet chu hmanraw lei thar-equipment nan a hmang a ni.US Army Chief of Staff Gen.Mark Milley a chan hnuah, “No.2 a awm lova, inrinrengna (readiness) chu tih tur hmasa ber a ni” a ti.

Kum 2017 ah US Army Brigades 20 zet chu counter-insurgency turin chet tir an tum a; Marine Corps ami 12 Infantry Battalion te pawh training exer neih tir an ni ang. Air Force lam pawhin 80%-98% chu eng lai pawhin training pe in, an inpeih reng a ni, an ti.

Aside | Posted on by | Tagged , , | Leave a comment

A CLUB THAR TAN MATCH HMASABERAH FA IN PAUL POGBA KHELH A PHALSAK LO

Khawvela player man to ber ni tura Manchester in £89m (€105m, $116m) a an lakluh ni a an sawi Paul Pogba chu Premier League 2016-17 season hmasabera naktuk zana Bournemouth nen an inkhelh hunah Football Association in khelh ve a phalsak loh avangin a club thar tan Pogba hi a inlan ve thei dawn lo.

France midfielder hi season liam ta khan Coppa Italia ah Juventus tan a match hnuhnung pahnihah yellow card a hmu zawn a, Internazionale nen semi final an khelh leh Milan nen final a an inkhelhin card a hmu ve ve a, hei vang hian automatic in match khat khel thei lo tur a ni a, he hremna a hmachhawn tur hi a club thar lamah a chhawm lut ta a ni.

Aside | Posted on by | Tagged , , , | Leave a comment

China Kohna Au pui

AUTHOR : Dingdi
  • China a ko e.
  • Elizabeth in Saisihchhuah ah China a au.

Mizo Nula Elizabeth-i Aizawl Venghnuai ami chuan, Pathian in a pawla ti tura a tih nia a hriat angin , Saisihchhuah ah Kan Zawlneite Sawilawk tawh angin China Kohna hlado a va chham ta a ni.
“Khawchhak mi kawlhsen teu, Pitar Putar leh Naupang thlengin Zuah suh u,an chung ah Zahngaihna reng lantir suh u”
ti in Hlado chham in a va ko ta a ni.

Aside | Posted on by | Tagged , , , | Leave a comment

HIV CHUNGCHANGAH HEALTH MINISTER LEH SYNOD PUIPATE AN INKAWM

Mizoram HIV test zat.
Mizoram HIV positive zat – July 2016
Mizoram a HIV awm tan kum

Tunhnaia a hmuhchhuah danah chuan 75% chu drugs ti lo KS pawh ni lo, mipat hmeichhit hman khawloh avanga darh a ni tih hriat a ni a. Thisen test mi 352737 zingah HIV hrik pai 113754 hmuh tawh an ni a, chuvang chuan fimkhura, a dona a tanrual pui turin meeting chuan mitinte an sawm a ni.

12th Aug. khan Health Minister Pu Lal Thanzara leh Synod hotu lian ten CM Conference Hall Mac donald Hill-ah ‘Consortium on HIV Prevention and Drug Abuse’ chungchang an sawiho. He hun hmanpui tur hian MSACS leh Project Sunrise, Fhi 360 lama thawktute pawh an tel a ni.

Synod lam hruaitu pawimawh tak tak ten an sawmna ngaipawimawha inkawmna nei thei tura hun remchang an siam theih ah lawmthu sawiin Pu Lal Thanzara chuan HIV chungchangah kohhran leh Sorkar te tangruala tan lak a tul in, hmalak ho a ngaih dan a sawi a. Tunah hian kan ram dinhmun hi a duhawm lo hle in India ram pumpui ngaihtuah pawhin HIV hluar berna state Nagaland dawttu kan nih tawh avang in hmalakna kal mek chu awmze nei zawka tih changtlun a ngaih thu a sawi a, chutih laiin MSACS leh a thawhpui NGO hrang hrang leh kohhran ten hmala a tan an lo lak tawhna chu fakawma tih thu sawiin MSACS hmalakna kal mek chu thlawp tur leh kohhran mite himna atana tan lak pui turin sawm nghal bawk.

Health Minister chuan HIV+ve in tunah kan ram a suat mek a, a ram anga hma lak a ngaih tawh takzet avangin Sorkar leh Kohhran ten rualkhai zawka hmalak a ngai a ni tiin, tun atanga tan lak a nih loh chuan thangthar lo la awm zel tur ah he natna avanga chimral a awm mai a hlauhawm a, tun tanga hmalak a nih loh chuan kum nga dang lo la awm leh turah chuan khuahkhirh a har tawh dawn a ni a ti a. Chumi ah chuan sawizauna te nei turin Kohhran an pawimawh em em a, Mizo awm chhung chuan Kohhran hi a awm dawn a, tuna sawihona hian rah tha tak a chhuah ngei a beisei thu leh Kohhran dang te pawh hemi chungchang hi tanrual puia sawiho pui zel an tum thu a sawi bawk.

Dr. Lalmalsawmi Sailo, Project Director, MSACS chuan Power Point presentation hmang in Mizoram chhunga HIV chungchangleh tunhnaia HIV hluar thar dan District hrang hrang dinhmun a sawifiah a. Health Department, MSACS leh a thawhpui pawl hrang hrangte hmalakna chu kalpui reng nimahse kan ram dinhmun en in tunhnaiah mipat hmeichhiatna kawngah HIV a darh nasat dan chiang takin a sawi nghal a. Mizote hi thil intihhmuh thuai thin hnam kan nihna laiah zirtirna kalphung kan chheh fuh chuan kan ram dinhmun pawh a ziaawm thuai theih a beisei thu a sawi bawk.

Tunah chuan HIV chungchang hi kan state tan ‘Burning Issue’ a ni tak meuh tawh a. HIV kaina hluar ber sex hman sual hi puanhnuai thuruk a nih avangin hriat leh ven a har a. Office emaw, department pakhat emaw in do zawh theih mai a ni lova, tangrual a Kohhran te nen beihpui thlak a nih loh chuan thlahte kalzel dinhmun a tha lo hle dawn a ni a ti a. Kum naupangte atanga he hatna hi vei an awm a. Kum 25 – 44 hi Mizo zingah chuan a hluarna ber group a ni a. Mizo tawh phawt chuan kan do a ngai a ni, a ti.

Synod puipate zingah hian Synod Moderator Rev. H. Lalrinmawia leh Synod Executive Secretaries pawimawh tak takte programme ah hian an tel a. Synod Moderator chuan Synod leh Kohhran ang pawhin mar patin tanla emaw intih laia inthlah dul chang a lo awm ve leh thin thu leh tih takzeta tanlak thar leh chu a ngai a ni, tiin Kohhran chuan nasa takin hma chu a lak tawh thu a sawi a. “Biakin leh remchang apiangah HIV leh ruihhlo leh mipat hmeichhiatna hmansual chungchang hi sawi a ni tawh thin a. MSACS ho lehkhabu pawh an hman tangkai thin hle thu a sawi a. Health Minister in hemi chungchang min veipui rawh u a tih hi keini zawk hian min vei pui rawh u kan ti zawk a ni” a ti a. Synod rorel leh hunah pawh MSACS ho lehkhabu chu lo sem darh zau sak a, hemi chungchang pawh theih ang ang a lo sawi zauhpui an rem tih thu an sawi bawk.

Mizoramah chuan HIV hi kum 1990 October thla khan hmelhriat tan a ni a. Tunhnaia a hmuhchhuah danah chuan 75% chu drugs ti lo KS pawh ni lo, mipat hmeichhiat hman khawloh avanga darh a ni tih hriat a ni a. Thisen test mi 352737 zingah HIV hrik pai 113754 hmuh tawh an ni a, chuvang chuan fimkhura, a donaa tanrual pui turin meeting chuan mitinte an sawm a ni.

Aside | Posted on by | Tagged , , | Leave a comment

Mavala Vawhlumtu VDP 7 CENTRAL JAIL-AH

AUTHOR :
  • Lungdar VDP te jail ah dah.

13/8/16 : Lalthanmawia thih thubuai vanga police-te’n an man, East Lungdar VDP member te chu Ningani khan Aizawl hruai thlen niin Central Jail-ah dahluh an ni.
Thanmawia hi August ni 8 zana thi a ni a, East Lungdar khaw mi niin, July ni 25 zana an khaw VDP-in thu zawhfiah atana an koh hnua dam lo a ni.

August ni 1 khan Aizawl District Hospital (Civil Hospital thin) hruai thlengin he damdawi inah hian enkawl a ni a, August ni 8-a a thih hian post mortem pawh tih a ni.

Thanmawia thihna chungchangah hian an bialtu North Vanlaiphai Police Station-ah FIR thehluh a ni a, police-te’n mi pasarih hi an la ta a ni. Police-te chuan East Lungdar-ah he vanduaina vanga thil duhawm lo a thlen loh thu leh an vil reng thu an sawi a, an thubuai hi Serchhip dist CJM Lalngaihawma zote in a ngaihtuah dawn a ni.

Aside | Posted on by | Tagged , , , , , | Leave a comment

PREMIER LEAGUE 2016 CHU HEI LE

(Chibai, English Premier League; ni 90 hnuah kan inhmu leh ta hlawl mai.)

Zanin atang hian English Premier League chu khelh tan a ni leh dawn ta a, tlai dar 05:00pm-ah Hull City chuan champion lai Leicester City an lo mikhual dawn a, Star Sports 4-ah live a ni ang.

Hmel thar :
EPL Speaker an tih mai Jose Mourinho chuan Manchester United a enkawl a, United hian Champions League khel dawn lo mahse ‘Khabe Chhepmawia’ hian player a la hip hle. Paris St-Germain striker Zlatan Ibrahimovic lain £89m in Paul Pogba a la lut thei!
An thenawm Manchester City in Barcelona & Bayern Munich boss hlui Pep Guardiola an la bawka, Manchester Derby a pui sawt ang.

Everton chetthatpuitu David Moyes chuan Sunderland a enkawl dawn a, pa thluak fim Antonio Conte chu Stamford Bridge-ah a inpu lut bawk.
Ani bakah hian Ronald Koeman chuan Everton panin a hmunruak hi Claude Puel chuan a hnawhkhat thung a, Walter Mazzarri meuh pawh Watford-ah a lut.

Season liam ta khan manager thar 3 chiah an awm laiin tun season-ah erawh manager thar 8 – Mourinho, Conte, Guardiola, Aitor Karanka, Ronald Koeman, Puel, Moyes leh Mazzarri ten club thar an enkawl a, a lo awm sa an neu lo nen, season dang zawng aiin hei hian boruak a siam lian dawn.

Hull City erawhin manager pangngai an la neihloh avangin Mike Phelan an hmang rih ang. Manager zingah Arsene Wenger chuan Premier League game 752 khelhpui tawhin amah hnaihtu manager 12 ten game 236 an khelhpui tling tawh tawh. Game khelh tam lamah an hlat viau.

Player lampang:
Fapa tlanbo Pogba chu kum 4 a thangbo hnuah Old Trafford-ah a let leh tawh a, Juventus chuan £1.5m leka an lei hralhna atangin £87.5m an hlep.

John Stones chuan £47.5m in Manchester City a pan bawk a, anni bakah hian Ibrahimovic, Switzerland midfielder Granit Xhaka, Belgium forward Michy Batshuayi, Germany winger Leroy Sane, Armenia chhuantawlawl Henrikh Mkhitaryan te ram dang atanga rawn insawn zingah an langsar. Midang lo lut hnai an la awm cheu.

Kumin July thla thlenga player lei na’na EPL club te sum hman hi Deloitte Sports Business Group chhut danin £475m a tling tawh.

Liverpool chuan kum 14 liam taa Arsenal chhuahsantu goalkeeper kum 39 mi Manninger an lalut a, EPL-a a inlan a nih chuan EPL a khelh inkara chawl rei ber (gap zau ber) a ni ang.

Premier League a khel rei ber erawh Stoke keeper Shay Given hi niin December 14, 1996 khan Blackburn tan Wimbledon a hmachhawn tan a, a la nung vet vet hle..

Tute nge champion ang? :

Leicester City champion atangin thla 3 awrh ala liam chauh a, champion ring an vang khawp mai. Season liam ta khan mi 5,000 zela 1 chauhin an champion an ring. Rinhlawh lo champion zingah an hming a lang reng tawh ang. Mahse, an player pawimawh N’Golo Kante a chhuak a, Champions League khelin match an ngah sawt dawn.

Manchester City boss Pep Guardiola chuan team 6 champion thei an awm a ti a, a dik hmel viau. Manchester City bakah UCL khel lo tur Manchester United leh Chelsea rinkai an ni a, Liverpool leh Tottenham hi dah hniam chi an ni lo. Player an lak dan a zirin Arsenal hi an beiseiawmin an beiseiawm lo thei a, Champion lai Leicester City hi khuta dah ngawt chi an la ni lo bawk.

A hawn ni-ah :

Mak ve ang reng deuh chu Premier League champion lai te hi season hawnnaah an tlawm ngai meuh lo va, Leicester pawh hi season 4 chhung chu season opening game-ah an la chak fai vek!
Season liam ta khan an match hmasa berah champion lai Chelsea chuan 2-2 in Swansea an draw a, Jose Mourinho leh an physio Eva Carneiro te boruak a lian viau. Kum 2008 khan a hawnniah Manchester United chuan 1-1 in Newcastle an draw tawh bawk.
Sir Alex Ferguson-a awm lai khan United hi Reading chuan an chelhding tawh a, kum 1999 a treble an nih kum khan Everton nen an lo in draw tawh bawk.

Zirtawp zanah :
Tun season-a thil danglam langsar pakhat chu mumal zawka Zirtawp zana inkhel live a awm tur hi a ni. TV deal hi £5bn zet niin an inremna ang chuan season khatah game 168 zel live tura tih a ni a, match khat tihchhuah man hi £10.2m zet a ni.

Tun season-a Zirtawp zana inkhel hmasa berah August 19 hian Manchester United in Southampton an lo mikhual ang.

Dan thar :
Sponsor-tu awmlohna Premier League tharah hian logo thar a awm dawn thung a, dan thar a awm nual bawk.

Ball an thah a, centre line pel ngei ngei ngai thin kha mahni lama pek phal a ni tawh.

Penalty area-a professional foul neite hrem na’na red card + penalty chu tihtawp niin yellow card an hmu tawh ang.

Chutih rualin match officials zahlo player te chu hnawhchhuah theih an ni dawn thung.

Player man a to :

Kum 1996 khan Newcastle chuan Blackburn atangin £15m in Alan Shearer an la lut a, khawvela footballer man to ber a ni. Kum 20 a liam meuh chuan £15m hi eng teh ual a ni tawh lo. Heti zat sum seng hian Bournemouth chuan Liverpool atangin Jordon Ibe an la a, an club record a ni thung.

Tun nipuia Premier League transfers lian zualte:.
Paul Pogba £89m -Juventus to Man Utd.
John Stones £47.5m – Everton to Man City.
Leroy Sane £37m – Schalke to Man City.
Granit Xhaka £35m – Borussia Monchengladbach to Arsenal.
Henrikh Mkhitaryan £35m -Borussia Dortmund to Man Utd.
Sadio Mane £34m – Southampton to Liverpool.

Player man a to lai hian tlawm tea tha tak tak lei theih an awm ve tho mai. Crystal Palace chuan £1.5m in vawi 4 lai French Ligue 1 goalkeeper of the year ni tawh Marseille legend Steve Mandanda (31) an la lut a, Stoke chuan £5m in Egyptian winger Ramadan Sobhi (19) an la lut thei bawk. West Ham pawhin hetiang vel tho hian Valencia atangin Sofiane Feghouli an la lut thei tlat bawk!

Kai thar leh tlak :
Kumin hian Boro, Burnley leh Hull te an rawn kai a, mahse kaithar te ropui nghal tura beisei chi erawh an nih loh rualin an fei phian zel. Premier League-a rawn kai club thar 71 zinga 31 (44%) te chiah an tla lehnghal. A inhamtangte hi chawhrualin table-ah 15-naah an awm thin.

Premier League kaithar zinga che tha ber Newcastle (1993-94) leh Nottingham Forest (1994-95) te chuan 3-na an hauh a, kaithar zawng zawng an inhamtan vek tum hi vawi 2 chiah la thlengin 2001-02 khan Fulham, Bolton Wanderers leh Blackburn Rovers te an him a, 2011-12 khan QPR, Swansea City leh Norwich City ten tlak an pumpelh vek bawk.

Kum 1997-98 khan EPL kai thar Bolton Wanderers, Barnsley leh Crystal Palace te chu an tla leh vek thung.

Aside | Posted on by | Tagged | Leave a comment

ZEMABAWK AH PITAR KUM 84 INAWKHLUM

AUTHOR : Dingdi

Pi Darkungi – 84 Zemabawk Galily veng chu Tukin 13 August zing khan an inhnuai ah Inawkhlum a hmuh a ni. Amah hi tar chak lo ve tawh tak a ni a, thenawm hnaivaia a kal chângte pawh hian mawng tawlh deuhin a kal thin. Tlawmngaia an thlah haw lâwp làwp chang pawh a awm fo.

Tukin 5.30am vel khan an in hnuaiah inkhaiin an hmu, an hmuhtirh hian la thi chiah loa, chhan hman erawh a ni tawh lo niin an sawi, A chhungte leh Police-ho sawi dan chuan mahni inthat ngei a nih a rinawm a.

Ngaihtuah na ti thui ber zawk chu, khati khawpa pitar chak tawh lo, khua pawh hmu mumal tawh lo khan engtin nge an in hnuaiah khan hrui kha a suih theih tih hi a ni.

Pi Darkungi hi a pasal Pu Lalhmingthanga nen fa pa 2 (pahnih)nei in chhungkua 4(pali) khawsa lai mek an ni a, A fapa te ruihhlo(zu) vanga an fel lutuk loh thu hi an chhungkua khawsak hrechiang tu te chuan an sawi hreh lo hle, Pi Darkungi hi tar char chaklo dinhmun a nih hnu ah pawh hian an inchhung ațanga hnawhchhuah a tawk fo țhin niin sawi a awm tlat mai, hnawtchhuak tu ah hian a pasal a nih an rin loh thu an sawi bawk.

Hetia hnawhchhuah a tawh hnu ah pawh hian a chhungkaw belh te in chhunga a awm hnu pawh a vau zui a tawk fo tih sawi a awm leh zel mai.

Tu kan țawng chhan nilo se, hetiang tar chak tawh lo beidawn vanga mahni intih hlum duhna nei hial khawp lo ni ta se, hetiang khawpa nun beidawna siamtu an awm a nih vaih chuan….Chu ‘Mi’ hmalam hun chu he Khawvela a damlai ngei pawh hian a Êng lo hle ang le.

*KRISTIAN RAM (STATE) A THIL THLENG A MAWILO TAK A NI E*

Aside | Posted on by | Tagged , , | Leave a comment

Sorkar laipuiin Bawng talh khap chungchang ah Thu chhuah

Sawrkar laipui chuan state leh Union Territory-te chu bawng talh duhlo pawla inchhalten anmahni thu-a hma an lo lakna reng rengah zahngaihna lantir lo turin a hriattir.

Home Ministry-in Chief Secretary-te hnena a thuchhuahah chuan mi tupawh anmahni dan lekkawhtute hrechhuaka na taka hrem tura beisei an nih thu Chief Secretary-te chu a hriattir a ni.

Bawng humhalhtua inchhalten tunhnaia pawi an khawih sawi chhuakin, Ministry chuan khatianga chetna kha pawm theih a nih loh thu a sawi a. Bawng talh khapna state a awm a nih chuan chu state-ah chuan bawng talh luih chu dan bawhchhiatna a ni ngei a; mahse, chutiang a awm a nih pawhin mimal emaw pawl emaw pawh nise hremna lo lek ve ngawt thei an awm loh thu sawrkar chuan a sawi a ni.

Aside | Posted on by | Tagged , | Leave a comment