REMNA LAWM NAN THAWHLAWM THAWH TUTE

POSTED by Dingdi

Remna Ni lawmna tura thawhlawm thawhtute pek zat chu cheng nuai 7, sing 8 lai a tling a, a thawhtute chu:
1. MUP 10,000/- 
2. MHIP 10,000/- 
3. ZDU 10,000/-
4. MJA 10,000/-
5. Central YMA 50,000/-
6. MKHC 20,000/
7. MPCC 1,00,000/
8. MNF 50,000/
9. MSU 10,000/
10. MZP 10,000/
11. Sawrkar 5,00,000/

Total 7,80,000/-

Aside | Posted on by | Tagged , , | Leave a comment

TUIRIAL HYDEL GROUP-A REMNA NI LAWMNA-A A THUSAWI

Remna ni vawi 30na chu hmundang rualin Tuirial Hydel Group (serlui leh tuirial Constituency khua an in pawlh) te pawn Khawkunga Hall Bukpui ah ropui takin an hmang ve a.
He hun ah hian Tuirial Hydel Group President Pu C.Dawngvela chuan thusawiin,

KHUALLIAN- BIAL TU MLA PU‪ ‎HMINGDAILOVA ‬KHINGTE Parl sect (tuirial const) – kan sawmna chhan che chu kum 5 chuang liamta a tender koh tawh, Serkhan leh Bhagha kawngpui thla 24 chhung a zawh tur a tih vawiinni thlenga kutthlak leh siam pawh awm mumal loh, i bial mipui te kan mangan zia leh kawngpui chhiat zia hi mit ngeiin hmu la kan duh vang a ni.

KHUAL ZAHAWM-Dr‪. BEICHHUA‬- Kan sawmna chhan che chu he kawngpui pawimawh tak chhe bawk si, kum 2 a thawhzawh tura tih, kum 5 chuang ah pawh hnathawh hmuh tur awm lo hi, I mit ngeia min hmuh pui a, Assembly house ah te theih tawpa min au chhuahpui turin beiseina sang tak nen kan han sawm tawp mai che a ni.
TIN BIALTU MLA PU‪ ‎LALRINTHANGA‬ MLA (serlui const) hnen ah Remna ni lawmna tur sum min ngaihtuahpui tura kan dilna ah, “keimah atang chuan chengkhat pawh thehchhuahsak tur che u ka neilo” min ti tawl mai kha a beidawn thlak kan ti a, mangan nikhua leh mamawh hun atan heng MLA te hi thlangchhuak (vote ) kan ni a, a bial mipui te min ti beidawng hle a ni” a ti bawk.

Aside | Posted on by | Tagged , , | Leave a comment

BSNL PHONE CABLE RU THINTUTE MAN AN NI

June 22 zan khan Zohnuai khawtlang duty chuan Telephone cable ru thintu Rohmingthanga, Rahsiveng chu an man a, a thurualpui Lalramsanga, Chanmari pawh a tlanbo hnuin vawiin tlai khan man a ni.

Zohnuai leh a piah lam phone leh Broadband a chawmtu cable hi vawi tam tak ruk a ni tawh thin a, BSNL subscribers ten an tuar nasa thin hle. Tun hnai mai pawh khan ruk leh a ni a, BSNL lamchuan June 29 khan cable dang hmangin an siam tha zo chauh a, an siam zan hian ruk tuma beih a ni leh ta nghal a ni.


Pic: Rohmingthanga

Hetih lai hian Zohnuai YMA duty chuan cable ruk tumtute hi nangchingin Phone cable hi mtrs 10 vel an lo sat chat hman a. Rohmingthanga s/o Lalkhuma (L) Rahsiveng chu a hmunah man nghalin a thianpa erawh a tlanbo hman a. Rohmingthanga phone atanga an chhui danin an nupuite nen tang tlanga ru an ni tih a lang a, Zohnuai lam cable bakah hian hmun danga cable pawh ruk an la tum niin a lang.

He case hi Lunglei Police hnena hlan a nih hnuin vawiin khan Rohmingthanga thurualpui hi zawn zui a ni a. Vawiin tlai khan a thurualpui Lalramsanga s/o Laldingliana (L)/Haulawng, tuna Chanmari veng a khawsa mek chu man a ni leh ta a ni. Heng rukru te lakah hian case ziah luh niin naktuk lamah court a hruai an ni ang.

Lungleiah hian BSNL cable ruk a hluar hle a. Hei vang hian subscriber ten harsatna namen lo an tawk chamchi a. BSNL hiancable supply an neih tawh loh avangin an buai ru hle. telephone cable sat chat a, a copper hralh thintu te man an ni hi a lawmawm a, an phu tawka a na thei ang ber a hrem nise cable ruk a tawp theih nan a tha hle ang.

Aside | Posted on by | Tagged , , | Leave a comment

KTP INNEIH DAN THLIRNA TLANGPUI

POSTED by Jackie Chham

Kum 1990 atanga record niin, Kum 2015 thleng a ni rih a, a vai vai lo deuhin rawn tarlang ang e.

Chhinchhiah bul țan kum, kum 1990 ah innei zawng zawng zat 2550 niin, biakin ah 964 a ni a, hmun dangah 1586 a ni thung. Biakin hi 37.8% niin hmun dang hi 62.2% a ni ve thung.
Percent inthlauhna sang ber :Kum 2002 ah
   Innei ~3420.
   Hmun dangah – 2307 (67.46%)
   Biak inah – 1113 (32.54%) hemi kum hi hmun danga innei bik percent san ber țum a ni.

Kum 2015 ah
   3891 innei.
   Biak inah – 1739 (44.69%)
   Hmun dangah – 2152 (55.31%)*hemi kum hi Biak ina innei bik percent san ber țum a ni.

Percent inthlauhna zim ber : Kum 2015 ah
   3891 innei.
   Hmun dangah – 2152 (55.31%)
   Biak inah – 1739 (44.69%)

      Biak ina innei aiin hmun danga innei hi record chinah a țhahnem zawk vek a ni.

Kum khata inneih tam ber :Kum 2012 ah
   4577 innei.
   Hmun dangah – 2649 (57.87%)
   Biak inah – 1928 (42.33%)

Kum khata inneih tlem ber :Kum 1996 ah
   2226 innei.
   Hmun dangah – 1352 (60.74%)
   Biak inah – 874 (39.26%)

Biak ina inneih tam ber :Kum 2012 ah
   4577 innei.
   Biak inah – 1928 (42.33%)
   Hmun dangah – 2649 (57.87%)

Hmun danga inneih tam ber :Kum 2006 ah
   4245 innei.
   Hmun dangah – 2767 (65.19%)
   Biak inah – 1478 (34.81%)

Kum 1990 – 2015 inkar:
   Innei zat : 88044
   Biak inah : 33472
   Hmun dangah : 54572

Biak in aia hmun danga inneih tam zawk (inthlauhna) chu : 24572

Kum ruk kal ta (2010) ațang khan Biak ina innei hi an pung chho țan riau a… 40% huang chhung (40 – 44 %) ah a ding ta ngar ngar a, hmun danga innei chu la pha lo hle mah se, phak ang tawka awareness neih chuan nasa takin nghawng a nei chho țan a tih thei ang chu.

Aside | Posted on by | Tagged , , | Leave a comment

SERCHHIP SAILAM KAWN AŢANGA KM 1 VELA HLAAH TUIHAWK TLING HAI FAI TU CHESUAL: A HMUNAH BORAL NGHAL

POSTED by On

29th June 2016 tlai Dar 2 vel khan Serchhip Sailiam Kawn aţanga Km 1 vela hlaa Kawrte tuihawk tling hai fainaah hnam dang pakhat chesualin a thi.

Kan thudawnnain a sawi danin Serchhip Sailiam Kawn atanga Km 1 vela hla NH- 54 (Serchhip leh Keitum inkar ) a City Light Quarry a thawk Gopal Rai (56) Jarkhand mi chu kawngpui dunga kawngchhak kawrte in Tuihawk leh Lei a hnawh khawm, Hume Pipe a tang chu a chhungah luhchilhin a thiante nen an haifai a, tuihawk leh lei tang hi rawn insah hukin Hume Pipe chhunga hnathawk te chu a thlang Kawrte ah a lenthla a, a thiante 2 chu insaseng hmanin Gopal Rai hi Lei leh Tuihawk inpawlh chuan a thlang Lengkir 100ft vela sangah hnawl thlain ka pawh a chhwn lohin a boral.

Gopal Rai (56) hian a tukhum, a chal ah te hliam a tuar a, a ringruh te a tliak bawk a ni.

.A ruang hi Serchhip Police ten an endik hnuah New Serchhip Venglai-ah lak a ni.

Aside | Posted on by | Tagged , | Leave a comment

NAGA HEL HRUAITU ISAAC CHISHi SWU A THI

POSTED by Lalrinawma

June 28 dar 1pm khan NSCN(I-M) Chairman Eno Isaac Chishi Swu (85) chu Fortis hospital, Vasant Kunj Delhi ah a thi.

Isak hi kum 1931 ah Chishilimi Naga khuaah lo piangin, an khua hi Sema Naga khaw bul Zunheboto Dist, Nagaland ah a ni.

A naupan laiin American Mission School, Chishilimi ah a kal thin a, High school erawh Kohima ah zo vin, St Anthony College, Shillong ah BA (Pol.Sc) a zir zo.

1950’s chhovah Naga zalenna sualtu Naga National Council (NNC) a zawm a, chutah chuan Foreign Secy hna a chelh. He pawl hi 1940-50’s inkarah khan Nagaland ah chuan pawl chak tak a ni. He pawl hi Naga hruaitu lar Angami Zapu Phizo kaihhruai thin a ni a, a hnuah he pawl Vice President ah a awm chho.

Isak Chishi Swu, Thuingaleng Muivah (Thangkhul Naga) leh S.S Khaplang te chuan a hnuah National Socialist Council of Nagaland (NSCN) tih chu Jan 31, 1980 ah an din chhova, he pawl hian Shillong Accord an tih, Naga leh India inremna siam, NCC leh India sorkar ziak chu an duhlo a ni. NSCN chu ngaihdan thuhmun lo vang a hnuah an kehdarh (split) vangin, Th.Muivah leh Isak Swu te hian NSCN chu hruai zelin, NSCN(I-M) tih an ni a; Khaplang hruaite hi NSC(K) tia koh an ni thung. He hel pawl 2 hi an inthat tawn zauh zauh thin.

Isak Swu hi he NSCN (I-M) ah a din tirh atangin Chairman a ni a, a thih thleng he nihna hi a chelh a ni.

Aside | Posted on by | Tagged , , , | Leave a comment

CABINET-IN 7th PAY PAWMPUI TA

Jun 29, 2016, (Nilaini) a Cabinet thukhawm chuan 7th pay commission-in sorkar hnathawk hlawh (overall pay-basic pay+allowances)23.6% a tihsan a rawtna chu a approve ta.

Nimin lam khan Commission lamin a recommend ai hian a tisang zawk dawn ni a sawi thawm a awm na in Commission recommended ang a approve a ni ta a ni.

Pay Commission-in recommend ang chuan hlawh sang hi kumin January 1 atanga hman tan (implement) tur kha a ni.

Basic pay sanna hi 14.27% niin The increase in the basic pay is 14.27% alloawnces te nen a vaiin 23.6% ah tihsan a ni a. He hlawh sang hi central sorkar-a thawk mi 47 lakh leh pensioner 52 lakh ten an chhawr tangkai dawn a ni.

He hlawh thar hman tur avang hian kumtin sorkar-in exchequer-in Rs 1.02 lakh crore additional a sen belh a ngai dawn a, hei hi GDP a 0.7 per cent dawn a ni.

Aside | Posted on by | Tagged , , | Leave a comment

UP CM-IN MIPA NAUPANG CANCER VEI TANPUI

POSTED by Kiddy Vanchhawng On 29 June, 2016

Nimin June 28 lama TOI in mipa naupang kum 11 mi, Ansh Upreti’n PM Narendra Modi leh UP Chief Minister, Yadav te hnena tanpui tura ngenna lehkhathawn a thawn thu a tihchhuah hnu-ah, Uttar Pradesh CM, Akhilesh Yadav chuan state sorkar thuneitute (Agra administration)hnenah a rang thei ang bera he mipa naupang kum 11 mi, thisen cancer vei mek hi super speciality damdawiin lama a enkawlna tur buaipui turin a hriattir.

Hei mai bak a rilru khawih tak mai chu mi tam takin he mipa naupang hi khawngaihin tanpui an duh a, tanpuina sum an pek theih na’n Ansh-a bank account detail hi dil in, “sorkar chet nghah kher a ngai love” an ti a ni.

Ansh hian tun Thawhtanni khan PM leh an state CM hnenah lehkha a thawnin, an chhungkaw dinhmunin a natna enkawl chu a tlin tawhloh thu sawiin an puihna a ngen a, ‘dam a duh thu leh khawvel la hmuh’ a duh ve thu a ziak a ni.

He mipa naupang hi Bhagwan Mahaveer Cancer Hospital & Research Centre, Jaipur-ah enkawl mek a ni a. Gokulpur leh Agra-a an in leh lo zawng zawng te pawh loh theihlohna avangina natna enkawlna atan hian an hralh vek tawh a ni a ti a, an dinhmun chu a chhe hle a ni a ti.

Agra district magistrate Pankaj Kumar chuan CM hian TOI in he mipa naupang chanchin an chhuah hi lo hmu in, thuneitute hnenah he mipa naupang chhung te hi tanpuina awm thei ang ang lo pe turin a hriattir a ni a ti.A sawizel danin Thawhlehni khan senior officials te chuan Ansh hi an tlawh a, Sanjay Gandhi Post Graduate Institute, Lucknow lama sawn turin an buatsaih mek niin a sawi a. CM chuan an chhungkua-in rem an ti a, an duh a nih phawt chuan an duh duhna damdawiin-ah sawn turin a hrilh a ni a ti.

Ansh-a pa, Krishnadutt Upreti chuan, “Thuneitu (the officials) te chuan kan fapa hi damdawiin kan duhna apianga sawn turin duhthlanna min siamsak a ni. Kei hi marble polishing factory-a nitin inhlawhfa ka ni a, amah enkawlna atan hian kan in leh lo leh kan neih zawng zawng te kan hralh a ngai ta hial a ni. Tunah hian Rs 12 lakh kan seng tawh a, tu ber nge han pur tur pawh ka hrethiam tawh lo a ni. Engmah han zawrh leh hralh tur thil hlu engmah pawh ka nei tawh lo. Ka fapa nunna chhan nan hian eng puihna pawh a hlu em em vek a ni,” a ti.

Aside | Posted on by | Tagged , , , | Leave a comment

Kebul chunga Mount Everest ngamtu Arunima Sinha

POSTED by Kimi Colney

Arunima Sinha tih hming hi in hre tawh ngai em? Kan ramah hian he hming hi huaisenna leh ngilneihna entirtu ropui tak a ni asin.

Uttar Pradesh khawpui Lucknow atanga km 200-a hlaa awm, Ambedkar Nagar khuaah chuan Arunima Sinha hi kum 1988-ah a lo piang a; a pa hi army-ah engineer niin a nu chu health department-ah supervisor a ni bawk. Kum thum a nih laiin a pain a thihsan a, a nu leh a unau pahnih dang nen an chengho a ni.

Arunima te chhungkua hi infiamna ngaina tak an ni a, a naupantêt atanga infiamna chi hrang hrang khelin, taksa insawizawina lam hrim hrim hi a ngaina hle. Football leh volleyball a khel nasa zual a, volleyball-ah phei chuan ram aiawhin a lo chhuak tawh nghe nghe.

MA a zir chhuah hnuah dân (law) lampang a zir chho va, hmabak êng tak beiseiin a zir chhuak a, mahse, a rin angin hlawhtlinna chu a hmuh phakah a rawn inchhawp chhuak mai lo. Kum 2011-ah chuan CISF (Central Industrial Security Force)-ah hna dilin a hna dil exam tur chuan Delhi a pan a, a dam chhunga a nun thlak thawktu tur a tawng ta a ni.

April ni 11, 2011 a ni a; Padmavat Express-a general compartment-ah a chuang a, mi an tam em em a, thutna a chang ve thei hram a. A rel chuan lai vel te chuan a hma lam hun suangtuahin a hlim hle. Chutih lai tak chuan suamhmang pali an lo lang a, khawvela a rohlu ber mai, a nu pek ngei rangkachak thi chu chhuhsak tumin an rawn tibuai ta a. Uttar Pradesh state chhungah hian general compartment-a hetiang thil thleng hi thil mak a ni lo, tum dangah pawh a lo thleng fo tawh a ni. Arunima chu hmeichhia amah maia zin a nih avangin an zuam deuh a ni ngei ang. A thi chu pe duh lovin a a theih ang tawkin a lo bei lêta, a pêt a, a lo hnek bawk a. A tawpah suamhmang mi pali tihngaihna hre lo chuan, a kut leh ke-ah vuanin rel atang chuan an paih chhuak ta a.
Rel kawngah tak a tla a, rei lo te hnua rel lo tlan chuan, a insaseng hmain a ke vei lam a rawn chîl a. Chêt pawh che thei tawh lovin na tuar chungin a mu reng a, thi a chhuak nasa hle. Tanpuitu hnaivai an awm si lo, sazu te chuan a hliam an rawn pan thin a, rel tlan ri-ah an tlan darh leh thin. Nâ a ti lutuk chu atê nasa hle a, a hnuah phei chuan nikhawhrelovin a awm leh ta a ni.

A tuk khua a var chuan a bul hnai thingtlangmi veivakte chuan an rawn hmu a, Bareilly District Hospital-ah an hruai a. Sawrkar lamah thil tihfel phawt a ngai si, hnathawkte chuan an lo ngaihsak lo em em zui a, hliam tuar chung pawhin platform-ah darkar tam a awm phah a ni. Hospital an thlen chuan a tana tha zawk tura ngaiin, a khup achin hnuai lam zawng chu paih a lo ngai ta! A hospital hmanraw neihin duhthu a sam lo em em a, an zai laia a nâ lo chhawk tur hnimhlum (anaesthesia) tak ngial pawh an nei lo a ni. Duhthlan tur dang nei hek lo, a harh reng lai chuan a ke an tan ta a nih chu! Chu mai a la ni lo, chutia a mut reng lai chuan, ui pakhat hi lo lutin, a ke an tan tâk chu a rawn khel ta bap bap mai a nih chu!

An buaipui lai chuan a chanchin chu news lamah a lo darh a, chutia mahnia hmeichhe zin rel lai atanga paih a ni chu mi khawngaih a hlawh hle a, sawrkar beng a thleng ta hial a. Sports Minister chuan AIIMS-ah tha zawka enkawl a nih theih nan ruahmanna a siam ta hial a ni. Mi tam takin a chanchin an ngaihven a, zawhna a dawng hnem hle. A chunga thil thlenga tunge mawhphur tiin mipui zawhna a tam hle a, police-te chuan kut sil tumin Arunima Sinha chu a thiam loh an ti tlat mai. A tirah chuan, ticket tel lova a zin avangin ticket khawntu a lo kal laiin a zuang chhuak, an ti phawt a. CCTV-ah a ticket lei lai chiang taka a lo lang ta si a; mahni intihhlum tuma zuangthlaah an puh leh ta zel a.

Ani chu damdawiin a mutna khumah chung thilte chu ngun takin a ngaihtuah a. Dik lo taka amah beitute chu ‘Vawiin hi i ni a ni a, i duhtawkin che rawh. Mahse, engtikah emaw chuan ka chunga thil thleng diktak hi ka la pho chhuak ngei ngei ang’ tiin amah leh amah a infuih nasa hle.

A ke veilam an tan bakah a ke ding lam chu a ruh tinghet turin rod an phum bawk. Chutianga dinhmun khirhkhan taka a awm lai chuan khawvela tlang sang ber, Mount Everest lawn turin thutlukna a siam ta mauh mai! A nunna lak pawh hreh lotu an awm chu a rilru a na em em a, mahse, a tum tihruh nan leh a tuang tihchhah nan a hmang ta sauh sauh va. A thil tum chu a bula awmte leh doctor-te hnena a han sawi chuan a rilru buaiah hial an ngaihsak a ni.

A ke veilam khup chinah chuan a kal theihna turin ke lem, prosthetic limb an tih chu an vuahsak a. Mi tam tak chuan ke lem hmang thiam tur leh, taksain ngaia a neih theih nan hun rei tak tak, kum hial a duh thin a, mahse, a tumruhna avangin Arunima chu ni hnih chhung lekin a ke lem hmangin pangngai takin a kal thei!

Hospital atanga a chhuah veleh Indian hmeichhe zinga Mount Everest lawn chhuak hmasa ber, Bachendri Pal chu phone hmangin a bia a, ani hian thurawn bakah fuihna tam tak a lo pe a. Nehru Institute of Mountaineering-ah basic course a zir a, chumi hnuah thla 18 chhung ngawrh takin training a nei leh a. Mount Everest lawn turin Island Peak-ah 2012 khan a lawn hmasa phawt a ni.

Mount Everest-a lawn hian a ke lem chuan harsatna a siam nasa hle. Tlang lawn chiah hian a ke lem kerek lai leh keartui vel chu a kûl tlat zel a, a ke dinglamah lah thir phum a lo ni bawk nen, a thiante chuan mahni inhremah riak an ngaihsak a. Tlang chhip thleng turin camp pali tan tlang a ngai a, camp palina atanga tlang chhip chu feet 3500 a ni. Hemi inkarah hian tlanglawnmi chesuala thi ta an tam em avangin a hmingah pawh ‘Death Zone’ an vuah hial a. Arunima pawh he hmuna a lawn lai ngei hian a bul velah ruang tam tak a hmu nghe nghe (vur hmun a nih avangin ruangte an tawih lem lo). Chungte chu a hmuhin, hlauhthawnna nei mah se, beiseina leh tumruhna nen May ni 21,2013-ah khawvela tlang sang ber chu ke bul chungin a lawn chhuak ta a ni.

Tlang a lawn lai hian oxygen a tlem avangin harsatna a tawk a, a hruaitu chuan, “I la thâwk theih lai hian let leh la, ni dangah i lawn leh mai dawn nia,” a tih pawhin a duh tlat lo va, a tawpah tlang chhipah India flag leh a pathian lem dahin thla a laa, a lêt leh ta a, Hetih lai hian a oxygen pai a zo têp a; pen sawmnga vel a pên hnuah chuan a oxygen a zo ta a ni. Chutia oxygen nei tawh lova a tlûk lai chuan, vanneih asiamin a bulah oxygen bur a hmu hlauh mai! Chumi hmangin dam takin a lêt leh thei ta hram a ni.

Arunima Sinha hi a lo namailo takzet! Mount Everest bakah Kilimanjaro (Africa) te, Elbrus (Europe) leh Kosciuszko (Australia) tlang te a lawn chhuak tawh. Tunah hian rualbanlo sikul Shahid Chandrashekhar Azad Khel Academy a hawng a, heng naupangte hi training pein theihtawp a chhuah a, a hlimpui thin hle.

Arunima Sinha hi hmeichhe rualbanlo Mount Everest lawn chhuak hmasa ber a ni a, hei vang hian Padma Shri award a dawng tawh a ni. A lehkhabu ziah ‘Born Again on the Mountain’ Prime Minister Narendra Modi chuan December ni 12, 2015 khan a tlangzarh nghe nghe.

Damdawiina a awm lai hian Arunima Sinha chuan Indian Sports Ministry atangin zangnadawmna cheng 25000 (US$380) a dawng a; Ajay Maken, Minister of State for Youth Affairs and Sports chuan inenkawl nan cheng 2,00,000 (US$3,000) a pek belh a; a hna dil CISF-a a luh theihna turin a sawipui bawk. Hei bakah Indian Railways pawhin hna an zawrh bawk a ni.

Police-hovin mahni intihhlum tuma an sawi chu, Arunima Sinha hian a khing let a, Allahabad high court chuan Indian Railways chu thu pein, Sinha hnenah zangnadawmna cheng 5,00,000 (US$7,500) pe turin a ti zui a ni. April ni 18, 2011 khan All India Institute of Medical Sciences-ah inenkawlin a awm a, thla li chhung teh meuh mai a awm. A ke lem hi Delhi-a company pakhatin an tumsak a ni.

Aside | Posted on by | Tagged , , , , | Leave a comment

ZAN-SAVA DANGLAM

Khawvela sava tam tak te hi, chhun lama chaw zawng thin an ni deuh ber a. Zan lama chawng zawng thin savate chu hmun li-a țhen hmun khat pawh an tling mang lo a ni. Keini ram angah ngat phei hi chuan zan-sava, zan lama chaw zawng thin sava chu kutzungțang thliah tham emaw leka tlem an ni mai awm e. Hnam țhenkhat chuan zana sava hram thin, mak tak tak leh mihring awrawl ang maia ri chhuah thiam savate hi sava malsawm lo leh chhiatna hial thlentu ah an ngai a ni. Mi sawi ka hriat thin zan-sava nena inkungkaih thil thenkhat kan thai lang ve teh ang.

Manipura kan laina hnai tak pakhat, Pu Pualhranga chu khawsikpui natnain a boral hlauh mai a, a boral hma ni hian a ramvak a, a ramvahna atangin khawsik hluah hluah chungin in a rawn thleng hlawl mai a. Chumi ni chuan ni dang ang lo takin a țawng mawh hle mai a. A chhungte ngaih pawh a ti țha lo hman viau a. Mak tak maiin a tuk zingah chuan tho tur a awm ta der lo mai a, a lo thi der mai a ni. A thih lai hian ‘Pualhranga’ ti-a a hming an sak chu hria ni ve awm tak hian, ramhnuai atangin Valpual rual 30 zet chu an kawmchara lamkhuang kungah an rawn fu nghuk mai a. Khawhar ina lengho chuan mak tiin an thlir doh doh ringawt mai a ni. Ni lengin an kawmcharah chuan Vapual chu an thlawk noh noh reng a. Pu Pualhranga an phum hnuah chuan chung Vapualho chu ram lamah an țin leh dial mai a ni.

Mi tam tak sawi danin, Pu Pualhranga hian a ramvahna ah Vapual nupa indi lai a kap a ni ngei ang a, chu chuan a chungah vanduaina a thlen ta a ni a nge! tiin an sawi thin. Vapual hi zan lama chaw zawng thin chu a ni hauh lo nangin he thilthleng hi a dangdai ka ti em a, thuhma atan ka rawn tarlang ve a ni e.

Sialhawka ka patea te an awm laiin zan khat chu an kawmchara tawitaw kungah sava chi khat, hram dan danglam tak hi a rawn hram thin a. A hram dan chu, “nutling nauvei țap thawm ang mai a ni” tiin ka patea chuan a sawi thin. October thla tawp lam a ni a. Chu sava a rawn hram ațanga zan hnihnaah chuan, an fapa kum 5mi chu a rawn damlo țan a. A natna em em pawh an hre mai lo va. Zanlai velah chu sava danglam tak chu a rawn kal fo mai a, ring tak takin a hram fo bawk a. An fapa damlo chu a damloh ațanga ni hnih hnuah sava hram ang deuh chuan a rawn au ve ta chiam mai mai a, a thi ta mai a ni.

Pu Darkima chuan ka patea hnenah kha sava kha sava pangngai a nih ka ring hauh lo mai, ramhuai ar kan tih ang chi hi a ni ngei a, kelkanga kan awm laiin kan țhenawmte zawngțah kungah zanah hian a rawn hram thin a. Anni pawh an fanu upa ber kum 10 mi a thi ve ngawt tawh a. Kan tual Upate chuan ramhuai ar a ni e an ti, mihring tan vanduaina thlentu a ni e! An lo ti a. Ka patea pawh chuan mak a ti viau mai a, mahse Christian tan chaw tak khuka han khukpui kha thil dik ber nia a hriat loh avangin a sawi chhuak ngai meuh lo a ni.

Hetiang deuh bawk hi ka pate khua Lungdarah a thleng tawh bawk a. Ka pa sawi danin, “Khang lai kha chuan, E. Lungdar tih angin hmingte an la pe lem lo va, Lungdar tih kha a ni tawp mai a. Kum 1950 vel a niin ka hria. Hlo thloin nitin kan chhuak a, tlai khat chu kan hna kan laklawh deuh avangin kan haw tlai a. Kan khaw luh tawntirh lama chhungkaw khat te inchungah chuan Sava lian tak, kawlhawk tluk zeta lian hi a thu vun mai a.Ka pa chuan, ‘khitiang sava khi thenawm hnaiah awmtir loh tur a sin, upate chuan chhiatna sava an tia , ruang a chhuak duh e an ti,’ a ti a. Khua a thim deuh tawh avangin kan hmuchiang thei lutuk lo va. A tuk khawvar hma deuh chuan an fanu thingphur rual uaih tawh hi nat lawkna pawh nei hauh lovin an kaitho zo ta lo va, a thi der ringawt mai a ni,” tiin min hrilh thin.

Pu Biakhlira sawi pakhat ka hriat reng thin chu, tun hmaa Hmuntha khuaa an awm laiin an kawmchhak lawka lamkhuang kung lian zet maiah hian sava hram danglam tak hi a rawn fu thin a, a hram mak thei hle mai a. Lawngtlaia an makpa rawn zin phei chuan sakei hram emaw a ti hial a. Chu sava chu sairawkherhin vawi tam tak an perh pawhin a thlawk hla duh lo hle a. Reilo teah chuan a fapa chu a mu hlum der mai a ni. An vengho chuan mak an ti khawp mai a, an makpa phei chu a fapa thlannghah niah an khawlamah a hawng daih nghe nghe a.

Chawlhkar thum vel a vei hnuah chu sava bawk chu an kawmthlangte huana thingkungah a fu a, a hram ve ta fo mai a. An kawmthlangpa chuan perh pawh a perh fuh hial niin an sawi. Mahse ani pawh chuan a fa te ber a chan ve ta hlau mai a ni.

Chu sava chu a hmutute sawi danin an sawi lian hle zel a, a dum rawng nia sawi an awm laiin a uk rawng, chhawhchi rawng kai deuh niin a then chuan an sawi ve bawk a ni.

Pu Sapliana chu lo ah a fate pahnih nen an riak a. A fate chu sa kap thei tak an ni nghe nghe a. Tlai khat chu Pu Sapliana thlama eirawng a bawl laiin a thlam bathlarah chuan sava pakhat ar lâ tia zet tur hi a rawn fu a. “Saplianthang, i nupui raichehin a thi a nia, hawng vat rawh,” a rawn ti ta mai a. A nupui chuan nau a nei țep tawh tih chu Pu Sapliana chu a hre kar bawk si a. A fapate chuan,” Hawng duh lovang, kan hna a khaihlak mai mai, sava hram i hresual mai a ni zawk ang,” an ti a, a pa chuan a tur luih tlat avangin an hnial duh ta bik lo va. tlai thim hma deuhah an thlam chu chhuah sanin khua an pan a.
Pumpelh kawng zuia an kal mek lai chuan, sava danglam tak kha a rawn thlawk kual chhen a, mak an ti hle a. Thawklehkhatah an thlang lam atangin savawm hliam kawlh zet hi a rawn chhuak thut a, an silai lah ramah an hnuchhiah daih mai si a, savawm chu an pafa thum chuan an sual rawn a, an hneh ta der lo mai a. Pu Sapliana phei chu a mitmu a kherchhuah sak hial a. Tin in an thlen rual chuan a nupui pawh chu raichehin a lo chatthla fel chiah bawk a. Pu Sapa chuan a ât phah ta hial reng a ni.

Zana khawchhunga sava hram vak vak hi Upate chuan an ngaimawh deuh thin nia sawi a ni bawk. Chingpirinu note chawm lai la ngam chu pa huaisen tak nia sawi an awm bawk. Chingpirinu duh tawka a han phun chuan ngaihbel tur tinga pui a tam thin hle a, dawizep pangngai deuh tan phei chuan mahni sual puanna neih phah hial na tlak niin an sawi bawk.

COMMENTS

Chhunga Hmar
Ngaihbelh tur chuan a lo awmve thei a ni ang,he tiang sava choak ang tiah vel tur hi tun kum 2016.3.30 kan khawhlui ka han zin tum pawhin a loawma,naupang pahnih ngawt an chan phah,karkhat ka awm chhungin.Ka haw hnuah naute pakhat a boral leh bawk.silai leh sairawkherh vela an veh pawh in an kapin an perhthla thei lo,a ngam hle e tilo chuan an that thei der lo zuk nia. thil mak tak zawng a ni,a hnu zelah chuan sawi a awmta lemlo ni in ka hria.

Aside | Posted on by | Tagged , , , | Leave a comment