ZORAM PUMPUI AH REMNA NI ROPUI TAKA HMAN A NI

POSTED by Saihmingliana Sailo On June 30, 2016

Vawiin khan Remna Ni kum 30-na (Pearl Jubilee) chu Lawngtlaiah hman a ni. Lawngtlaia Remna Ni lawmna hi chawhma dar 11-ah DC Conference Hall-ah hman a ni a. Thupuiah “Peace for Progress and Prosperity” (Hmasawn nan Remna leh Muanna) tih hman niin, Lawngtlai District Bawrhsap Dr A. Muthamma chu Khuallian a ni.Khuallian Bawrhsap chuan Remna Ni kum 30-na champhaphak hman a ni thei chu lawmawm a tih thu sawiin, district mipui zawng zawng ‘remna chibai’ a buk nghal a. Rambuai lai nun harsa tak pal tlang a, Mizoramah remna leh muanna a awm thei hi a lawmawm hle a ni tiin, remna lo awm theih nana tha thawhtu zawng zawng chuan chawimawi an phu hle a ni, a ti. Mizoram chu kum 20 lai rambuai ni mah se, India rama state ralmuang ber nihna a hauh thei leh kum 30 lai mai remna tluantling a awm thei chu thil chhinchhiah tlak tak a ni tiin, remna chu hlut a, chhawm nung zel turin Khuallian chuan district mipuite a sawm a. Remna leh muanna hnuaia hna kan thawh phawt chuan Lawngtlai District hian hma kan sawn zel ang a, ei leh bar leh khawsak phungah pawh dinhmun sang takah kan invawrh thei dawn a ni, a ti.Lawngtlai District Superintendent of Police Pu F.Lalsanglura pawhin thu sawiin, rambuai laiin nun a harsa a, ram a ralmuan chinah chuan kawng tinrengah hmasawnna hmuh tur a awm a ni, a ti a. Mizoram chu a ralmuan avangin Police nih pawh a nuam a, eng kimah mipui nen tang rualin hna a thawh theih a nitiin, Lawngtlai District hmasawn nan boruak ralmuang leh muanawm tak neih reng a tul thu a sawi. Thupui sawitu Additional DC Pu R.Lalsangluaia chuan rambuai lai nun hrehawmzia sawiin, remna thuthlung ziah a ni chu Mizo mipuitetan thil lawmawm tawpkhawk a ni, a ti a. Mizorama remna a lo awm theih nan mi tinin theihtawp kan chhuah theuh va, tu mah inchhuang tur bik kan awm lo tiin, remna chhawm nun zel chu kan mawhphurhna leh ngaih pawimawh tur zawk a ni, a ti.Indian National Congress (INC), Lawngtlai aiawha thu sawitu Pu C.Sangchhunga, Executive Member i/c Agriculture chuan rambuai laia mipuiin harsatna hrang hrang an tawhte a sawi a. Remna hi a hlu a, remna awm lo se, Mizoramin tun dinhmun hi kan phak lo vang tiin, remna nei tur chuan tlawm ngam a ngai a ni, a ti.Vawiina Remna Ni lawmnaah hian Lawngtlai SDO (Sadar) Pu Lallawmawma chuan kal khawmte lawmna thu a sawi a. BCM pastor Rev. F.Lalnunmuana’nhunserh hmangin, DRDA Project Director Pu H.Dolianbuaia chuan lawm thu sawina hun a hmang. He hunah hian mipuiin “Ro min relsak ang che” tih hla an sak ho bakah, zaithiamte zai ngaihthlak a ni bawk.He hunah hian Lawngtlaia sawrkar department hrang hrang officer leh staff te, NGO leh political party ai awh te, chanchinbu mi leh sikul naupang te bakah, remna ngaihlutu mi eng emaw zat an tel.Lawngtlaia Remna Ni lawmna atan hian khawlai dungah banner leh poster eng emaw zat tar niin, sawrkar office hrang hrangte’n an office te an cheimawi bawk a ni. – DIPR

Aside | Posted on by | Tagged , | Leave a comment

JEBET JAIL RUN THIM CHANCHIN TLANGPUI

POSTED by Thlemsama Vuite On

He thu hi ‘Samuel L Zalawta’ ziah atanga a tlangpui lak a ni e.
  • Burma jail rapthlak
  • Thihna jail turu chu
  • Burma jail inenkawl dan rapthlak

‎Je‬-Bet chu burma ram jail chikhat ani a, jail satliah a ni lo a, prison labour concentration camp, rapthlak leh tihbaiawm tak ani zawk. ‘Je’ tih chu sipai/force tihna a ni a, ‘Bet’ tih chu khuahkhirhna/hrem tihna a ni. Jail 1 aia tamah a awm a, Rihdilah pawh a awm. Je-Bet Camp-te chu leirawhchan emaw, thir, thir-hling-nei emaw-in thuah thum in an hung chhuak vek zel a.

TANG ZAT:
Camp tihnah mi 30-650 an tang tlangpui a, 1,000 rual tanna te pawh a awm bawk. Hmeichhe tanna bik pawh engemaw zat a awm a. Kawl, Vai, Chinese, Thai, Mizo hnahthlakte leh hnam hrang hrang an tang teuh a ni.

HNA THAWKA IN HREMNA HMUN A NI:
Leileh, kawng siam, tuikawng sial, in sak, rawra chhut te leh Sawrkar in engpawh hnathawh tur a neihna a piangah Camp-angin an dah thluah a; chutah chuan mitang te chu thi khawp hialin an chhawr thin a ni. Hmunkhata hna an zawh chuan hmun dang ah an sawn kual zel thin bawk.

JAIL PANGAI ATANGA JE-BETA THAWN TE:
Jail panngai atanga he hmuna thawn tur te chu Jail kawt tual ah anmahni hlinna tur thirkhaidiat an lei tir zela, tichuan an ngalrek 2 ah leh an taiah an hling tlat a, laina neivelo te chu a rit thei ang ber an bun tir hmiah zel. Thirkhaidiat kua ah chuan thirzai an rawh chhuak vek a, motor ah nghet tak in an thlunga, motor chhung ah chuan tumah dahchhuah awih a ni lo; kun tlat tur a ni a. Dak atawm chuan talfiak in dimna leh tihna nei map lo chuan zak kau meuh in an hlap thin a, thih leh pawilo, dam leh pawilo tih chu an thupui a ni mai. Engmah sawi ve thei an nilo.

TANG THAR TE CHHIAR DAN MAK:
Je-Bet camp an thlen chuan camp chhungah kun chungin an luh tir hlawm a, a lut hmasa te chu an hnungzangah an talhfiak chuan zakkau meuh in an lo hlap a, pakhat, pahnih, pathum ti in an chhiar mai thin.

TAH TICHHUAK CHAW CHU
Changel kung leh kuangkuah (ram kawlbahra hnah) chhum pawlh fianpui khat leh Dal tui fim relh rulh dal tak no khat zing ah leh tlai ah an dawng vetve a, chu zawng chu an chaw ei tur dawn ve chhun a ni mai. Riltam luat vang in thenkhat phei chu an in tihlum hial thin. Paihte pa tang ve pakhat chuan, “kan riltam lutuk hian kan ek te kan ei a, Laitel, Khau, changpat, Sazu, engpawh a ni mai, anmahni mihringpui sa ngei pawh an poisak loh chang a tam a, thil nung kan man theih apiang chu kan ei tawp a, kan riltam chau lutuk ‘e’ tur pawh in kan peng peih lo. Kan hnathawk kal tur te hi kal pah in kan ‘e’ tawp mai thin, kan in sang khawl peih thlawt lo; kan kua lah chu a thalo reng mai bawk a, khawvela pathau ber te pawh tang ve chiah se chu Hmawlhte ah a chhuak thei hial ang” a ti hial a ni.
“Chhun zan zawma riltam reng renga nun reng ai chuan thi law law ila ka va’n ti tak em!” an ti ngawih ngawih mai a ni. Mipakhat phei chuan lumehna bakcheh a chhuh lawka a hrawk ah a in vit hmiah mai a, a thi thei lawk siloa a kut lawng in a hrawk hrui chu a pawtchat tawp a a thi ta a ni. Vaimim fangkhat lek inchuh in patling 5 vel an in sual luih luih thei hial a ni.

“vawikhat chauh chu puar taka chaw eia, thih tawh mai ka van duh tak em” an ti ngawih ngawih mai thin.

HNATHAWH HUN CHU
RAL RAMAH:
Zing dar 6:00 ah ‘Flag’ chibai an buk a, tichuan vawithum aia tlemlo?, “Ka sual man hi ka thlantui in ka rul ang” tiin ring tak in an au tir a. Tichuan an hnathawh na hmun ‘ral ram’ an tih mai thin lam chu an pan ta a ni. Kawl phaiah te chuan ran te pawh chhunah chuan an chawlh tir thin a, Mahse Je-Bet-a tangho erawh chu chawlh tir an ni ve ngailo. Ran pawh tlukloa thi khawp hiala chhawr an ni. A rap thlak a ni tawp mai a ni.

HNA THAWH HUN:
DAR 6:00am-6:00pm hi an hnathawh dan a nia tlai dar6 ah chuan camp chhungah an lut kim vek tur a ni. Dam loh awih a nilo a, “Je-Bet in dam loh a hre lo” an ti. Mitdel leh thichhawng (unconscious) te chauh hna thawh awl phal an ni.

Damlo kal pawk kal hlei thei lote pawh khur hlawk hlawk in thih thleng thak in hna an thawh tir thin a, Chuvang in hnathawh na ah te leh kalkawng ah te chuan an chauvin an tlu a, an thi nghal thin reng ani.

DÛT BUR CHHIA:
Je-Bet camp thenkhat ah Chuan tang ho te chu dut bur chhia hi a in bikim an pe theuh a, minute 20 dan emaw vel ah mahni bur chu khawng riin, Mahni hming leh number chu chiang tak leh ring taka au ziah tur a ni. Chutiang tilo lo muthlu palh an awm chuan in hremna rapthlak tak mai an hmachhawn a ngai thin, chuvang in mutna hun pawh an nei ngailo a ni.

Leileh hun lai hi an thih tam zual lai a ni thin. An nghawng ah leileh na hal vuah tir in ran ang in lei an leh tir thin a, Damlo leh riltam chau zual kum upa tawh lam te phei chu lei let zawlahte chuan an tlu a tamtak chu tho zui tur awm lo in an thi zui nghal mai thin a, thizui ve lemlo tamtak pawh, “tho thuai rawh, zawmthawpa. Ni hnih daih in ka vua angche; Ni thum daiha vuak emni i duh zawk?” ti in ruh tliak in thlep hnup khawp te hian an in vua a, tichuan Ui thisawn hnuh tak in leilet kotlang ah chuan an hnuk liama, dawmhlum tu pawh nei lem lo in thih thleng in an tuar tlawk tlawk mai thin. Camp chhung ah te chuan an rum chuah chuah a, zing khua an var meuh chuan sawm rual te hi an lo thi khawng leh reng mai thin.

KOPANGAH SAIIP HRUIA KHAI:
Rel kawng leh Motor kawng laih na ah te chuan kopangah saiip hruia in khaiin lei laihtir an ni a, Lung lum leh tla tur te pawh awm mahse, insaseng an phal thin lo. Lung a lo lum chuan a delhhlum mai thin. Tin, saiip hrui te chu chat in, ruh tliak khawp te pawh in an tla a, han enkawl te chu khawilam ah, thenkhat phei chu an thih chian hma-in khup thleng lek thlan laiin an phum mai zel bawk a, Chinghnia leh Ui te chuan an ruang te chu hai chhuak in an ei a, Ui te phei chuan an kutphah leh kethiah te chu an pu vu vu thin bok a, chu vang in Je-Bet lam hnaih a awm te chuan uisa an ei duh ngai lo, “mihringsa a in-ei thau an ni miau a” an ti.
Mak angreng tak mai chu Je-Bet tin ah duty an tlem viau zel a. An ke-ah thir khaidiata hlin an nih bak ah thenkhat phei chu iron rod-in an ngalrek ve ve ah an kap tlata, ” a ngam chu tlan chhuak mai rawh u, mahse kan man leh vaih cheu chuan in hre ve mai ag, “an ti mai thin.

TLANCHHIA MAN LEHTE HREM DAN:
Kut hnung khirh inan ke ah thin khaidiat in an hling a, meichher alh che che -in vawk rawh in an rawh a, an na tuar rak tal kual vel te chu chemte-in inchikhat vela thuk in anlo chiu hmiah hmiah zel mai thin. Tichuan chi tui al tawk in vawk kuang chhungah mit pual vek khawp in an chiah leh a, an na tuar chu an au rawng rawng mai thin. A rapthlak zia hi sawi in a siak lo a ni ber mai,, chutianga an sawisak te chu ni3 vel a thi tawk tur in an nghaisa hrep thin.

THI TURA NGAIH AN NI:
Sawrkar chuan, “thi tur in tumah Je-Bet ah kan tan tir ngailo,” an ti.,” Sawrkar dang te pawh in jail tangte chu hna an thawhtir theuh thin a ni lo’m ni? Keini pawh in hna kan thawhtir ve a ni mai lawm, ” an ti a. Mahse thi tura ngaih an ni tih erawh a chiang.. Je-Bet-a thite chu action lak an ni ngailo a. Mitthi hming ziahna ah ziah luh an ni mai thin. Chu zawng chu a ni mai; Chuvangin Je-Bet police te chu an lal em em a, mi tihhlum theihna thu neihna an nei mai nilovin, Chu thuneihna chu an duh dan hawi zawng zawng in an lek kawh thei tlat.

LEI-DAWH BAN PHUN NAN:
Lui lian deuh lei dawhnaah chuan a nungchung in ban kuaah thlak in ban an phun hnan hmiah mai thin. Hman kum lawkah pawh khan Mizoram chhak lawk Run Luia Var Lei an dawh laiin mi pakhat chu saiip ah an khung tawp a, a hlau lutuk chu au pawh a au tha thei loa khur zawih zawih chung in bankua ah chuan an thlak a, an phunhnan hmiah mai tih mita hmutu ten an ziak hial a ni. A rapthlak tih hian a hrilhfiah zo lo tak meuh a ni.

Nitin in inhremdan chithar a chhuak zel ang a ni a, sawi sen phei poh a ni lo. Hei hi a tlang pui hriat nan chuan tawk ah ngai phawt teh ang.

Aside | Posted on by | Tagged , , , , | Leave a comment

CHALTAUH ROPUI

(Hei hi amah Pu Saithanhranga (Fam), Mizo Pasaltha V-Force, Joseph Ralte Pu, ngeiin Rangamati jail-a an tan laia thil thleng min hrilh a ni a. Word by word erawh chuan a dik thei tawh lo va, Titi Huanga dah ve thain ka hria).
  • Rangamati Jail-ah Inchaltauh Rapthlak!!
  • Mizo nge huai vai

Jail-ah chuan Mizo engemaw zat leh Vai misual tawrawt pui pui kan tang teuh mai a. Engemaw han tih khawm nikhua hian a ram intineitu Vaiho hian lal zawk nih hi an chuh a, kan inhnial a kan buai leh tep mai thin a. Tum khat chu Mizo huaisen zia te kan sawi a, Vaiho lah an lo insawi huaisen ve nasa mai a. Kan thu kalsang laklawh chuan inchaltauh an rawt chhuak ta mai a. Mizo pachak leh Vai pachak pakhat ve ve inthlan chhuah a ngai ta si a. Kei kha thian ten a sa tha leh palian deuh ber tiin min ruat lui tlat mai a, Vai lam lahin pa tawr tha zet, chal kawlh vul mai an rawn thur chhuak bawk a. Kelchal insual chu pumpelh theih a ni ta lo.

Chutah leh, Mizo lam leh Vai lam kan inhawt khawm a, kan haw haw nghal titih mai a. Rum thei ang ber a inmelh chungin kan inchek dak er awr a kan han intauh bur ta maia leh. Na tak a ni..na tak! A vawi khatna ah pawh chuan ka mit sulh mai. Tlawm tum hmel pu zawk lah chu kan awm eih lo. A tum hnih nan a aia uluka pawsi la chungin kan han intauh leh bur mai a. Hmel hi a mawi thei lo reng reng a, nasa thei ang berin kan inseh ruh hi a ni mai. Tukkhum thleng mai hian a trek chhuai mai a, mitmu te hi a pawng chhuak zawk hian a hriat a. Lu hi arbawm tiatin a puk lian ta ni maiin ka hria. Luhaiin ka tlu lo chauh a ni. Chutia thei leh thei lo va din mar leh paha Vaipa ka va en chu,na a ti ve hle tih kha ka va hre mai a, a kut pahnihin a khup tawn tawn a dawm a, a pawl ten an lo chelh ding a, a Lungi (Vaipuan bial) ven pawh a tla hnuang nghe nghe a ni.

A tlawm mai dawn emaw ka tih nak alai chuan a thiante lo rak chelchul mai khan an lo fuihpawrh chu niin, a vawithumna atan a la rawn ding chhuak leh ta mai si. Kei pawh kha Mizo hnam tana tlawm thlaka ka ngaih vanga intipachang leh hram hram chauh kha ka ni a. Ka rilru te tein “Eng pawh ni se tun tum chauh hi theihpatawpa nain ka tauh leh ang a, ka nih nih ka ni tawh mai ang” ka ti a. Thiante lahin I chak dawn, I chak dawn..a tlawm tawh ang, ti tein min lo fuih nasa mai bawk. Kan chal te lah chu a mar sen chho pung tawh mai a. Beng kawrawnglah a tuvu vung vung mai. “Khawinge Mizo tlangval ka ni lawmni” tiin kelchal pawsi chu a hma zawng aia ulukin ka’n la leh a, ka pen sau ten tawn a, van lam hawiin ka’n inchek dak er awr a, kuttum hum ruha insehruh tengtawng chungin a hnarkawn tel thawt khawpa thlang, a mitko ah ka’n va tauh bur ta mai chu leh. Kan let dun hlawl mai a, mit te hi a men ngam loh reng reng, arsi hi a de chuai mai a, lu a hai a, luak a chhuak bawk.

Vaipa kha a chal a chang si a, finrawl chhuah a a hnarkawn tel thawt a ka tauh kha a lo fuh hle a ni ang chu, thianten min bawihsawm zo ka’n inthing harh a, thei leh thei lo va ka va en nak chuan a lo la let reng mai a, a hote lah an lo rak bengchheng nasa mai. Nakin ah chuan a rawn thu chhuak ve ta hram a, thei leh thei lovin, “Surrender surrender..” a rawn ti chhuak ta a. Chutah kei kha ka intihuai thar leh a, pawsi te ka’n lak khum leh vel a, Vaiho zawng zawng hian a mal malin min cho em? te ka ti vel a, a tak ah chuan ka peih tawh bik loh teh lul nen..

Min hlau ta hle mai a. Rangamati Jail Inchaltauh siak ah chuan Mizo hnam aiawhin ka champion ta a ni. Champion hlim viau e ti lovin ka nuam sa zui mai hauh lo; ni thum chhung kha chu jail chhuat kha a su deuh dulh dulh maiin ka hria a, kar khat vel ka khaw hmuh a fiah mang lo bawk. Ka ţhialpawn vel silawng atalangin jail chaw pawh duh angin ka thial chip thlei thei lo tiin.

A va rapthlak eltiang em!!!

Aside | Posted on by | Tagged , , , , , , | Leave a comment

DR.RICARDO-A CHETDAN

  • Juda te suattu doctor nunrawng
  • German Doctor nunrawng chu

Holucaust boruak vanga an khaihlum tak Adolf Eichmamm ten lal an hrawt hunlai 1944 vel a thilthleng a ni. Dr.Ricardo hi Nazi party doctorte zing a Dr.Mengele kut hnuai a inzir a ni a,mahse,1949 khan rawng tak a thah a ni a,a chet dan maksak chanchin zing a tlem han tarlang ila.

Dr.Ricardo hi 1904 khan berlin ah a lo piang a, a naupanlai atang rannung leh a thenrualte chungah rawng tak tak a chet a ching hle a,a chetdan hi engemaw titaka danglamna a nei tlat thin a ni. Holucaust boruak a Jews an suat chiam lai khan ani pawh hian damdawi experiment atan a hun remchang ah ngaiin Jews a tihlum ve nual a, chung zingah chuan hmeichhiate an tel nual bawk a,tin damdawi enchhinna (experiment)a neih reng reng in kahhitna(numb)a hmang ve ngai lemlo a ni. A bik takin mi a zai reng reng in an rak theihloh nan an hmui a Thuiping hmasa zet Thin a, a hnu ah a zai nghal mai thin a, a hmanrua bil zet zet leh tuiek kai tawh china a zai chu tuarlo va, chawpchilh a thi nghal pawh engemawzat an awm a ni.

Dr.Ricardo a thlirdan hi a mak thin khawp mai,(behind the story)nula paruk chu an ke leh kuttang a tansak a, saruak in roomkhat ah a khungkhawm a, hunbi neiin ei in a pe thin a, ui lian tak tak a pawl tir thin a ni. Hei hi a thiltih mak zinga langsar ve tak a ni.

A hmuhchhuah tum hi ui-mihring emaw,ui mihring vun ang a mam leh mihring ui anga hmulphurh dangdai tak siam a tum Ivang a ni. An kut leh ke a tan na chhan hi ui an suallet loh nan ti a, a ruahman a ni bawk. Tin,mihring ten eng chin chiah nge na kan tuar theih, kan thihpui theih, tih vel leh kan sahuatna laiber(point)te hi a zawng nasa thin hle a,dawhkan chung ah te phuarbet in a nungchung ngatin an kawchhung a haisak mai thin a ni. Tuichhia te leh natna hrik te chu mihring taksa ah chiulut in an rawn na/damlo ta maw tih ah enkawl dam tumin a bei leh vak thin a, za ah pakhat a enkawl dam chuan hlawhtlinghle ah a in ngai hmiah mai. A vawikhat zai a thilo hi an awm ve nual bawk a, vawithum zai tuarchhuak erawh an awmlo.

Dr.Ricardo hian mihring kal(kidney) te leh lung,ril leh thisen hnathawh dan hi a buaipui hle a, vawk te, ui leh kel te nen lam a thlak tawn sek thin a, a experiment tam zawk chu ran leh mihring inanna leh mihring kawchhung hnathawhdan a thlur deuh ber thin a ni.

Dr.Ricardo hi Germany a tlawm tak hnu kum 1949 khan ruangthlawm tlak pawh awm mumal lovin chhar a ni a, a nupui fanaute pawh thah chimih vek an ni.

A nihna takah chuan Dr.Ricardo hi mi nunrawng, mihring nunna hlutzia hrethiamlo khawpa ramhuai mizia tilangtu a ni. A in zir â a ni ber in ka hria, tunlai ah pawh, inzir fing an tam lai a, lo inzirmawl an pung zel ang deuh hi a niang chu.

Aside | Posted on by | Tagged , , | Leave a comment

TUICHHUNG RULPUI

  • Rul hlauhawm
  • Tuipuia Rulhlauhawm chu

Khawmuala khawsa ransa lian leh mak pui pui, mit ngeia hmuh tawh pawha awih mai harsa khawpa lian leh mak, rapthlak an awm ang hian, tuifinriat thuk tak hnuai ah pawh mak leh rapthlak(sea monstres)an tih mai thin hi an tam em em mai a, khawmuala khawsa ai a letin an tam zawk a ni. hmansang thawnthu atang pawhin, dawhsan hmunsang an lo chang pha thin a.(monsters can take many forms, including sea dragons, seaserpents, or multi-armed beasts) tih a nih kha. heng rulpui, octopus, shark leh nghapui(whale) tons 2000 ai-a rit pawh tuifinriat hnuai thim mup kar ah khuan an khawsa hlawm a. A chak chak leh a huai huai dinchhuah na khawvel ah hian, chi(type)tam tak boral hlen mah se, damkhawchhuak a mihring leh lawngpuite meuh pawh lo lambun pil hmak hmak khawpa rapthlak leh lian an la in sulpel fua fua reng a, mahse, an chanchin recorded ho hi a dik chiah e, ka tilo va. Dawt a ni pawh ka ti chuanglo, recorded a a landan a ni miau si a ni.

Scotland rama dil lian tak pakhatah chuan, rulfepnei ni lo, thil nung hrawl leh lian em em,ţihbaiawm leh rap-awm tak a awm niin an sawi a, an hming pawh an phuahsak a, Loch Ness Monster an ti a, a hming lemah Nessie an ti bawk a. AD 565 kum khan an hmuh thu an lo sawi tawh a,1802 kum khan an hmuh thu an sawi leh a,1033 kum atang khan khawvel pum huapa hriat a lo hlawh ta a, kumin April thla pawh khan hmuh an nei niin sawi a awm bawk a ni.

Loch Ness hi Scotland ram,Scottish Highlands an tih hmuna awm dil sei tak mel 23 laia sei leh feet 755 laia thuk a ni a, tuifinriat zawl atanga feet 52 leka sanga awm a ni a. 1933 kum khan he dila thawk , water bailiff ( PHE ti ve mai ang) Alex Campbell-a’n a nupui nen dil-ah chuan thil nung lian tak a ka-a thil nung dang seh lai an hmuh thu a sawi chu chanchinbu-ah tihchhuah a niin a ram pum huapin a tlang thang ta chiam a, chanchinbu dang dangah he dil thil nung chanchin hi an chhuah ta chuai chuai mai a, a hming hran hran an vuah a,”monster fish”, “sea serpent”, “dragon’ te an ti a, a tawpah “Loch Ness Monster” an lo ti ta a ni.

Tichuan mipui bengverh zawng tak a ni bawk a, Hugh Gray-a’n a thlalak ni awm tak a lak chu 1933 kum December ni 6 chhuak Daily Express-ah tihchhuah a lo ni leh ta a, Scotland sawrkar thuneitute pawh chuan chaw tak khukin an khukpui ta a, Secretary of State for Scotland chuan he Loch Ness Monster hi tuman tihhlum loh tur tih thupek a chhuah ta hial a, 1934 kuma The Surgeon’s Photograph an tih dinosaur ang deuh thlalak an tihchhuah hnu phei chuan mi beng a verh leh zual ta sauh a. Mi tam takin he monster hmuh tumin an bei ta chiam thin a, Loch Ness Investigation Bureau pawh an din phah hial a, an sawidan in hei hi chuan mihring tibuai lovin dilchhunga cheng ve thilnung dang te bak a khawih lo niin an sawi a ni.

Kum1899 march khan france lawngpui pakhat chu atlantic tuipui chunga thlamuang taka a a kal laiin, hnuai lam atang na taka rawn sawhchho tu awm niin an hria a, lawngpuanzar ngul tamtak chu a phuarna hrui a chat phah nghe nghe a, lawngpu leh lawnga hnathawk hoten an zu bih nak chuan rulpui lian mangkheng an hmu a, lawngpu zinga Charlie Wilson-a phei chuan, a mei hmawr lampang ringawt pawh kan lawng ai hian a lian zawkin ka ring a ti hial a ni.

Kum1895 khan brazil rama ngawpui chhah lutuk tak amazon basin luipui ah khuan rulpui anaconda lian lutuk mai, sai pawh hmawm hmak hmak thei tur khawpa lian hmuh a ni tawh bawka, a hmutute chuan rul zawng zawng chithlahtu ah hial an ngai a ni.

Tin, kum 1992 khan tuichhung a nungchate chanchin zirbing mi, Mark Paul chuan a thil hmuh chanchin tihian a sawi a:
tuichhung nungchate chanchin ka zirna a ka mak tih pakhat chu,sea-eel chi-peng pakhat rul nichiah silo, a sei zat tluk zeta inti fan a, a len tluk zeta in hampuar thei, balloon eel khu a ni a ti. Heng tuifinriat ngharul te hian lawng atanga mihring emaw, lawngpui pil atanga mihring thitate ruang hi an lo ei ve thin a, kum 100-200 thleng an dam thei hial a ni.

Heti zawng hi ni rih phawt se, ka dam that hunah a dang ka rawnchhunzawm leh vat ka beisei.

Aside | Posted on by | Tagged , , , , | Leave a comment

BUDDHIST TEMPLE HRANG

Hotel, Lawngpui, Hostle, Hospital, Cinema Hall leh mipui punkhawmna hmun, hall lian tak tak te hi a hrang duh chawk mai nia! A chhan ni thei awm mithiamte sawi danin, mihringte hian power mak tak mai kan nei a, rilru sawrbing taka kan ngaihtuahna a vakvel thin hian keimahni thawm leh awrawl thlengin a vahkualpui ve thei thin niin an sawi tlat mai. Tam tak chuan Damlai thla kan tih pawh hi kan ngaihtuahna power hnathawh vanga lo awm thin niin an sawi tlat bawk. Entir nan, vawinah Cinema ka lo en a, Cinema Hall-ah chuan ka wallet ka lo theihnghilh tlat mai a, han kir leh turin a tlai tawh bawk si a, ngaihthalo tak leh ka wallet ngaihtuah rauh rauh chungin Ka mitthlaah Cinema Hall chu ka va lut ta a, a lo reh țhuap mai a. Ka wallet bo chu ka zawng ta ruai ruai mai a, mahse keima taksa erawh khumah ka lo mu than si a.

Hetiang thilah hian ka thawm vang emaw, ka aw ri ang tak emaw leh perfume ka lo hman thin rim ang tak kha Cinema hall-a hnathawktu te emaw ni khan a lo hre thin niin mi tam tak chuan an sawi fo mai. Amarawhchu ramhuai hnathawh ang chia inlar leh hrang hrim hrim pawh hi sawitur a tam ngang mai.

Thailand, Burma leh Cambodia ramah te khian Buddhist temple(pagoda) hrang sawitur a tam kher mai. Amarawhchu Sakhuana thil a nih avangin sawilan kher hi a remlohna chin a awm ve tlat thin a. Khawvela Buddhist temple lian ber Indonedia rama Borobudur te, Cambodia rama Buddhist temple Angkor Wat te leh Burma rama Swedagon pagoda te khian chanchin mak deuh deuh sawi tur an nei nual hlawm a ni. Buddhist temple hrang nia an sawi zinga hriat hlawh ve tak pakhat chu Bangkok dai pawn hnaih lama Buddhist temple(pagoda)an nghahna hmun leh a Area chhunga an monk te chenna building khi a ni. He hmun ah hian thil mak tak tak sawi tur a awm nual a,a chanchin ka hriatchhun te te ka rawn thaikual ve duah teh ang.

Kum 1990 khan he lai hmuna țhu, buddhist puithiam (Monk) pakhat chuan black magic leh cat magic hmangin a tisa chakna a hritla thin a. Heng magics hi a zirna chiang fek fawka hriat nilo mah se,tun hma a Thailand lal hmasa Ayuthaiya te hunlai atanga an leklam tawh thin, thiamna chikhat a nih avangin ramdang atanga a zirchhuah chu a nih a rinawm loh hle a ni.(Christiante tan chuan zir chi a ni hauh lo.)

Black magic: hei hi sum ruk nan te, tlereuh leh bank rawk nan te hman thin niin, eiin hmanga in dawi nan te leh mihring pakhat leh pakhat intihchhiat nana hman thin a ni a. Mahni thlarau thlenga in tiamkam ngai leh chhechham ngai chi niin an sawi thin a.

Cat magic: hei erawh hi chu, hmeichhe khawih chingte leh sex lama mikuthlei ten an hman thin a ni. Zanlai mi mutreh tawh lamah tho vin, Zawhte ah te an in tichang thin a,uan intibo thei bawk nia sawi a ni. An nula it zawng emaw, an khawih chak zawng deuhte chu an va khawih a, hmeichhia chu rai hial an rai thei a ni. (hei hi kum 10 hnuailam an nih lai atanga uluk taka train an nih chauh vin an hlawhtling thin niin an sawi a, kum 10 an pelh tawh chuan power an nei thei tawh thin lo a ni. Zuk hmuam leh ruihtheih thil an khawih thiang lo a, thlanmual ah mi mut reh hnuah ramhuai hnenah an inthawi bawk thin niin an sawi. Thil țhalo tak a ni.)

Hetiang magic hi an Monk chuan a lo thiam em em mai hi a lo ni a. Monk chaw pe tura lo kal thin zinga nula pakhat chu an Monk chuan lo thlemin a lo mutpui thin a. Monk te hi a huhoa awm mah nise, peace buddaism ah chuan an tal hrang thei tho bawk a ni. Chu Monk chu zanah te chhuakin nula a mutpui ta fo mai a. Nula a mutpui fo e ti lo chuan a rawngbawlna a intulut, nula an pung phian mai lehnghal a. An Pagoda piah lawka phir-unau nula hmeltha tak awmte chu a mutpui zin ber te an ni. Tin, tlereuh leh sum tam takin a chhawmdawl bawk thin a, a tawpah chuan puithiam sang zawkte beng a lo thleng ta hial a, mihring chuan thudik thup bo thei mahse, thudik chuan mihring diklo a thupbo ve ngailo an tih ang maiin, chu Monk chu a mualpho țan ta der mai a. A tawpah chuan chu nula phir unaute chu, rangkachak leh sumfai thahnem tawk nen a tlanbopui ta daih mai a ni. Mahse a finna lo finkhalhtu Monk lu ber chuan dawi thil hmangin a bawhzui ta a, Thailand ram thingtlang khawte pakhat runani-khua ah man an ni ta a ni.

An man hnuah phir-unaute chu Bangkok Buddhist temple kawmchara hmawngkung lian takah inawkhluma chhar an ni a. (inti hre deuhte chuan Monk ho kut tuara thi ah an ngai a ni). Tichuan Monk an man kir leh tak chu a chungthu rel a nih mek laiin mak tak maiin a room chhungah na taka sawisak a ni a. A serhte pawh zai bun sak niin a hliam tuar lovin a thi ve ta a ni. Chumi zan chuan Monk awmna room chu tuma luh theihloh turin tha tak leh uluk taka ven tlaivar a ni a, chutia hliam nasa tak nena a thi ta mai chu nula unaute thlarau thah niah an puh a ni. (hmiah mai a na).

Mahse, he hmunah hian, kum 1995 a tang khan mak tak maiin thawm mak tak tak an hre ta fo mai a, a kawt lawka Monk dangho mulai chu zanlai ah tu tihhriatloh hmeichhe pahnih hian thisen tharlam in an theh chiam mai thin a, an hlau thin hle ni awm a ni. A rei deuh hnuah phei chuan an temple hmun mai nilo, Temple awmna piah deuh Lamliana zan bike tlan thin te chu chung hmeichhe pahnihte chuan an tibuai ta fo mai a, mi tam takin bike chetsual phah nan leh thih phah nan tak an hmang bawk a. A hmutute sawi danin Lamlian kianga hmawng kung hnuai atangin hmeichhe pahnih riltam hmel tak hian, pum chul vawng vawng chungin bike hmaah an rawn zuang dawrh thin a. Tichuan bike chuangte chu an rawn phih thla dawrh mai thin a ni an ti. Water festival boruak hawklak lawma zan a nula tlangval fawr kual thin ten an hmungun hle thin a ni an ti bawk.

A rei deuh chinah chuan temple a hnathawkte leh Monk-te chu an zan mu lai an keah emaw, an nghawngah te emaw an seh sak vak thin a, an hliam pheng phung mai thin a ni. An tihbuai ngun tak em a vangin chu temple chu an rauhsan ta a, tunah chuan tlawhpawh phallohin an hung phui ta tlat a ni. Chulai hmunah chuan, Thawm mak tak tak; mihring au thawmte leh tap tawmte pawh hriattur a la awm reng thin niin an sawi bawk a ni.

He chanchin hi, The Thailand Post Chanchinbu atanga ka lakchhawn a ni.

Aside | Posted on by | Tagged , , , , , | 2 Comments

JULY NI 31, 2016 ATANGIN LPS LEH ZONET CABLE TV ANALOG SIGNAL OFF TAWH DAWN

POSTED by Vanneihthanga Vanchhawng On June 28, 2016

28th June, 2016 chawhma dar 11 khan I&B Ministry lamin Cable TV chung changa Nodal Officer atana a ruat Aizawl DC aiawh, Addl DC Pu Lalhmunsangachuan Aizawl khawpui chhunga CTV Head-end Operator leh Sub Operator te a ko khawm a, July ni 31, 2016 hnu lamah Cabel TV analog signal pek chhuah tawh loh nise tiin an rel.

July ni 31 hnu lamah chuan Set top box kal tlang chauhin LPS leh Zonet signal te en theih a ni tawh dawn a, smart card a nih ang taka hman hun tur erawh central lam thu ngaihchan tur a ni dawn niin thudawnna chuan a sawi.

Aside | Posted on by | Tagged , , | Leave a comment

THLAWHTHEIHNA-A THLAWH HI A HIM A NI

  • thlawhtheihna siam dan
  • thlawhtheihna him tawk dan

Request a awm vangin kan han ti a ni e. Thlawhna chuan hlau țhinte tan tlêma a thlamuanthlak deuh beiseiin.

Thlalâk hi a rei leh deuh ta, thlawhtheihna tè chi, Aizawla lo thlawk țhin ATR72-500 kan siam zo, passenger nghah paha cargo hold (bungraw dahna) ațanga țhu chunga ka lâk a ni. A chunga khi a kawngkhar hmâwr a lo lang. Lo lang hi Boeing thlawhtheihna a ni a; Airbus leh Boeing-te hi Fly-by-wire computer system hmangte an ni.

Heti hian han țan ila:
mihring thluak fing chho zêl, hmanraw țha, ruhrel (materials) țha ber chi leh computer hmanga thlawhtheihnate tihhmasâwn a nih tâk avangin, a Thla (wings) leh engine derthawng takte ring zo lo chunga țawngtaina nena hlauthawng taka thlawh țhin nite kha a mangțha theih ta a. A technical thila kan kal hmain statistics lamah han lut hmasa ila.

Dr. Arnold Barnett (MIT) leh a hote chuan kum 1994 hma lam khan nasa takin research an bei a, thlawhtheihna vanga thite chu maktaduai khata pakhat ang a ni tih an hmu chhuak a, thihna chance 0.000014% a awm an ti. Natural History Museum of Los Angeles County, Massachusetts Institute of Technology leh University of California at Berkeley-in an chhut dana USA-a thihna thlen chhan te:
• Thin țha lo: 1 in 2
• Mei zuk vang (by/before age 35): 1 in 600
• Car accident: 1 in 14,000
• Train, coast-to-coast:1 in 1,000,000
• Țêk: 1 in 1.9 million
• U.S. commercial jet airline: 1 in 7 million
_________________________________

Engpawhnise, statistics avang hian chuàn a him e tihna a ni lo va, a him tâk chhan tam tak zinga țhenkhat pawimawih nia ka hriatte ka han târ lang ang a:_______
1. THLAWHTHEIHNA RUHRELTE A ȚHA TAWK:
Thlawhtheihna taksa leh ruhrelte hi khawvela hmanraw (materials) țha bera thuam/siam a ni. Aluminium leh thîr dang alloy ațanga siam a nih bakah tunah chuan carbon fibre composite (carbon-fibre-reinforced polymer), zâng leh fei tak hman a ni bawk. Hengte hi boruaka thlawh vanga electric charge insiam leh van boruaka electrical charge awmte lakah a him hle a. Aluminium alloy-te hian electric charge chu boruakah awlsam takin a paih chhuak mai thei a ni. A chhung bungruate pawh hi mei alh laka him thei ang ber thuama siam a ni a, seat fabric leh cushion siam nan thlengin mahnia alh timit thei hmanrua hman a nih bakah thlawhtheihna chhung tam zawk hi a alh pawha mei khu pe chhuak nasa lo chi an ni. Țhutthlengte hian lei hìpna vanga chak taka tlaka insawh (force of gravity) natna lêt 16 a dawl zo a ni.
________________________________________

2. ULUK TAKA TEST NEIH VEK A NI:
Thlawhtheihna thlate hi a taksa pawimawh ber zing ami a ni a, “static test” an pal tlang a, degree sawmkua vela ulh pawha tliak lo va, pangngai awh leh theih khawpa fei a ni. Tin, load a lak theih tura duan aia 1.5 vela sang tuar pawha chhe lo a ni. Țêk den dàwl zawh leh zawh loh en nan pawh Electrical 100,000 amps zeta sâng, khaw tê deuh hlek chawm zo mai thei tur khawpa sanga shock țhin a ni țhin.

A engine-ah hian sava leh thil dang a thlawk lut palh țhin a, chu’ng laka a dinchan theihna test nan chuan “chicken gun”, kum 1950-a de Havilland, UK-a an siam hmangin arsa thi fresh tak tak an kâp țhin a, engine leh windshield (pilot hma darthlalang)-ah te. Ruah leh chhûm kâra thlawh luh țhin pawha a him leh him loh test nan tui chak taka phuh leh vur hmangtea kah a ni țhin bawk. Wind tunnel (Pûk anga siam, kaw tawn, a chhunga engine emaw thlawhtheihna emaw daha thli leh thil dangte chhemtir țhinna) siam a ni bawk a, chutah chuan “hot and high campaign” an tih, boruak sâ leh boruak sânga thlawh huna a tawn anga boruak siam a ni țhin. Boeing chuan Research Aerodynamics Icing Tunnel (Brait) an nei a; thli chak tak, 60 ațanga 250 knots (110km/h to 463km/h) –a chak leh khaw vawt -40C (-40F) vel hmangin thlawhna chu an tuartir țhin. Ultrasound test pawh a thla leh taksa inzawmnaah neih fo a ni. An rem khawm hnuah pawh test flight engineer leh flight test engineer-te chuan “virtual flight campaign” uluk takin an nei dunleh țhin.

Nikum (2015) maia service tura an siam thar Airbus A350 XWB phei kha chu wind tunnel mai duhtawk lovin vur ram Iqaluit, Canada-a Arctic territory capital Nunavut-ah kâr khat an dah a, test hrang hrangin an test a ni. Tin, “Tuboh rit, kg 5 vel (sledgehammer)-in a thla hnung lam hi duh tawkin hlap ila, a rawn sawt let awl ringawt ang a, chhiatna eng mah a thlen lo vang,” tiin engineer pakhat chuan BBC World Service’s Business Daily programme-a hrilh hial. Company lian deuh pawhin khawvela airport sâng ber La Paz, tuipui chunga 13,300ft (4km) leh Cochabamba 8,300ft (2.5km) feet-a sângah te an kalpui a, test an nei țhin.
________________________________________

3. ULUK TAKA ENKAWL A NI:
Khâwl țha kan lo nei ta a, a enkawltu hi an pawimawh leh hle a ni. A hmasa berin thlawhtheihna khalhtu pilot-te hi driver pangngai anga license nei apiang khalhtir maian ni lo va, uluk taka sum tam tak senga khalh zir an nih hnuah darkar eng emaw zat hlen tur an hlen chhuah hnuah co-pilot ah te an țang a, chumi hnuah pawh airlines-te hian an train ve leh chhawng țhin. Thla khatah an hah lutuk loh nan thlawh theih chin darkâr an nei a, a khât tawka license renew ziah a ngai bawk, central ministry hnuaiah. Tin, personality țhate thlan bik an ni tlângpui a airlines lian hovah hi chuan. Hotu chan chang thiam, pâwl anga thawhho thiam leh mahni inringtawk takte an ni châwk.

Keimahni department lam, engineering dept. han sawi ve leh ta ila.
Aircraft Maintenance Engineer tih kan ni a, Directorate General of Civil Aviation hnuaia license neite kan ni. Zir lai pawhin college-ah pass mark a sâng hle a, 70% a nghal a, chutia college exam pass hnuah pawh chuan DGCA license exam te la pass leh a ngai a, chumi hnuah company-a thawh dawnin training min pe leh châwng țhin. AME course hi specialized course a ni a, hei bakah BE/BTech in Aeronautical Engineering pawh a awmleh a, anni hi chuan a design leh research leh a dangte an khawih tlângpui a, AME hna hi thawh an duh ve chuan special training/experience lain an thawk ve thei bawk. A pahniha ka han pass ve ve tâkah chuan BE/BTech hi har kan tih laiin AME hi a lo namai loh leh zual zia ka hre chhuak a, physics leh science bakah by-heart ngai chi a tam a, dàn leh hrai te kan zir tel nasa a ni. Enkawltu pawh uluk taka chher an ni tih kan hriat atan ka experience ațangin ka han sawi a ni.

Inspection kan neih reng rengin uluk a ni hle țhin a, Avionics leh Mechanical-ah kan ințhen a, heng ațang hian mi pahnih ve vein an check țhin.
Entir nan, screw pakhat pawh lo tla palh se, a part nambar ngai ang chiah store-ah ka han zawn a ngai a. A chhan chu thli thaw, boruak sâ leh a dangte inchiah tamna hmuna a awmna azirin a siamna thîr a dang thei a. A awm loh chuan, nghah a, la thlawhtir loh a ni mai, base dang ațanga an lo thawn hma chu. Bangalore-ah chuan Chennai ațangin kan chah ber. Tichuan, a awm hnuah ka herh lut ang a, log book-ah ka sign ang a, chutah pawh a la tight chuang lo, engineer dang pakhatin a rawn herh chhin ang a, a tight e tiha a sign hnuah chiah tight-a pawm a ni. Motor ke te pawh hi kan han pump ve țhin tak na a, kan namnul țhin hle a, thlawhtheihna ke erawh chu zantin kan check a, a nihna tur chiah chiaha thun a ngai. Entir nan, ATR 72 ke hma lamah 64 psi. A average-in Maintenance engineer te hian boruaka thlawhna darkar 1 a awm chhung hen turin darkar 12 check nan hun an seng ziah. Nitin check tur, kâr tin check tur leh kum tin check tur, bakah khawl leh hmanraw tinreng ten darkar engemaw zat an thawh hnua check tur leh thlak hun an nei vek a ni. Sawi dawn chuan a tam a, ngaihnawm takin post dangah a sawi theih awm e.

Tunah chuan main airport ah ka awm tawh lo va, Mixed Martial arts (MMA) te hun awl changa zirtir pahin aviation technical publication hna (ATR leh Airbus-ah) khawihin office lamah kan țhu hrih ta a, AME leh BE te hna Service manual, Flight Manual, Aircraft repair manual te kan khawih a, heng manual te hi ngun thei ang bera khawvel changkanna hmang țangkai zela update an ngai a, heng tlawhna hmangtu airlines te hnenah pek vat an ngai bawk a ni.
_________________________________

4. KHÂWL THA BER CHI HMAN A NI TA:_______

Sawi tawh ang khan, thlawhtheihnaah hian khawl țha ber ber chi dah a ni a. Satellite global positioning, advanced displays leh telecommunication khawlte hian nasa takin duh ang thâla thlawhtheihna control leh dinhmun hriatna kawng a hawng a ni. Fly by wire system kan tih chu Airbus in a rawn hmang hmasa ber a, computer hmangin engkim a in-program sa a ni mai a, thlawhtheihna dang lo thlawk ve, tlâng leh chhûm ruah pai sut tur laka awkâ leh mitmei hmuh theih hmanga warning pek theihna te an nei a ni. Auto pilot leh Instrument landing system te nen phei chuan thlawhna khalh hi a mutthluksan daih theih a; chutiang khawpa rin tlak khawl chu kan nei tawh a ni. Mahnia thluak nei ang deuh thaw a ni, digitalized a nih hnu hi chuan.

Emergency thulha Pilot hamhaih thut châng pawha tih tur hrilh thei a ni. Tin, airport lianah phei chuan Movement-detection monitor-te hman a ni a, motor che vel zawng zawng uluk takin a thlirin a enkawl theih a, a thlawh chhuah leh țum hun lai pawhin him takin a ven theih a ni.Khawl pawimawh zawng zawng hi back-up a awm zel a, hmanrua pawh pahnih a awm deuh tlangpui, a hmaa display chi hrang hrangte pawh hi. Experience ka neihna Airbus bik han sawi ta ila, Boeing pawh a nih tho ka ring a. A engine pakhat a chhiat chuan pakhat hian a tumram a thlenpui zo va, a pahniha a chhe hlauh a nih pawhin Ram Air Turbine (RAT) chu a rawn tla chhuak a, a pumpui ațangin, chu chu dynamo angin thliin a chhem vir a, chumi vir chuan hydraulic pump a herh a, hydraulic system a ti nung a, khawl pawimawh a ti nung ve leh chhawng a ni. A chhe thei lo tluk a ni deuh tawh mai.
___________________________

5. KHUAREL THIL VANGA HARSATNATE A HLAUHAWM HRAN LOH:
A chang chuan thlawhtheihna hi motor kawng chhe deuha kal ang maiin a sawt tuk tuk thin a, amaherawhchu, hengte hi thil hlauhawm a ni hran lo. Sawi tawh ang khan thlawhtheihna ruangâm hi a țha thei ang bera thuama ni a; țêk, vûr leh thlite hian a ti chhe mai mai lo kan tih tawh kha. Tin, a chângin tlâk thlak thut te a awm țhin a, hei hi air pocket-a lut tia sawi a ni țhin a, boruak lum leh vawt intawnna leh thli chak tak leh muang intawnna hmunah tiang hi a awm țhin a, thil hlauhawm a ni lo. A tam berah feet 20-30 te a tla/ kâng châwk a, thlawhna kal vel a tibuai lo. Feet 100 te pawh nasa zualah chuan an tawng tho. Cockpit Confidential lehkhabu ziaktu Patrick Smith-a chuan, “Commercial airline thlawhna thlawk ngun deuhte hi chu average-in kum hnih danah vawi khat țekin a dêng ziah a, chungte chuan thlawhna bangah hotein hnuhma a nei ve a, electrical system tlem azawngin a khawih che ve det bawk. Amaherawhchu, buaipui tham a ni lo va, a chhunga chuang pawhin an hre ngai meuh lo,” a ti a ni.
____________________________

Duhtawk phawt ila. Heti chung pawha kan la hlau fo a nih chuan, Pathian thiltithei kan neih kha mawle. Kan Mizo țawg hian hausakna a nei ve a, double adverb te kan hmang zoh zoh a, theih ang angin kan han ti ve sâwih sâwih a! Amaherawhchu, Technical term te Mizo țawnga han dah koh koh vek dawn chuan a lo harsa kaih kaih khawp mai. Engpawhnise, Zofate hi kan hnathawhna țheuha a ber ni zel turin i țang zêl teh ang u.

Hlau lovin i thlawk zel phawt mai teh ang u hmiang…

Aside | Posted on by | Tagged , , , | Leave a comment

RONALDO-A SAM ZIAH RAN PHENA THURUK ROPUI INTHUP CHU

Author : Joseph Lr Kop Chhangte On June 27, 2016
  • Ronaldoa’n midang a tanpui
  • Ronaldo Sam ziah ran chhan
Khawvela footballer thiam bera mi tam takin an chhal C Ronaldo(CR7) hi khelmual chhung leh pawna a khawsak danah sawisel a hlawh nasa malh malh thei hle a, a khingpuite zahderna a tlachham, a chapo, a awmherh, a uchuak , a lerh adt tih ten a chanchin an ziak kur ngei nguai țhin a, a dikna chen pawh tam tak a awm ang. Mahse phat rual lova thudik awm chu, Ronaldo hi khelmual chhungah player ropui tak a ni a, khelmual pawnah pawh ‘mihring ropui’ (great human being) tak a ni tih hi a ni. Hmangaihna ngah leh mihring ngilnei tak, mirethei chanhai leh țanpui ngaite tan phal taka a malsawmna dawn pechhuaka, luangchhuak țhin mi a ni. Athil țha tih chungchanga ‘comment’ a pe țha duh ngai miahlo te hian a ropuina a ti zual sauh a ni.

Tun Euro 2016 khelh mek a an ram Portugal leh Iceland an inhmachhawn dawn khan Ronaldo chu a tukhum sama line tawite pahnih a chhawnga rin râng in khelmualah a rawn inlan a, mi tam tak chuan a awmherh vangah an lo ngai hman leh peka, mahse Spanish media te’n a thiltih chhan an han chhui chian nak chuan mi tam tak rilru a tikehsawm a ni. Ronaldo-a hian cancer natna tuar mipa naupang pakhat khawngaihthlak tak a zaina(surgery) man a pek sak chu a tuarpui zia lantir na’n a lu-ah an zaina ser ang chiahin line pahnih a siam tir ve a lo ni.

Hei hi a vawikhatna chauh a nilo, 2014 World Cup pawh khan USA nen an inhmachhawn dawnin a bek sam a lo thai zigzag(kikawi) tawh bawk a, hemi țum pawh hian mi tam takin a uchuak vangah leh ‘fashion statement’ siam-ah an lo puh sak hmanhmawh a, mahse a hnua media te’n an han chhui chian chuan mipa naupang pakhat brain cancer vei Eric Ortiz Cruz-a a tuarpui zia lantir na’n a beka an zaina ser ang chiahin a lo ziah ran tir ve tih an hmuchhuak ta a ni. Eric-a thluak ațanga cancer bawk(tumour) zai chhuah na’n hian Euro 83,000 lai mai a pek sak nghe nghe a ni.

Tun hnai-ah reporter pakhat amah zarbuaitu microphone ken lai dila a paihsak avangin a chanchin a nilo zawngin a thang nasa hle a, mahse Ronaldo hi infiammi zinga ‘charity’ a in hmang nasa ber zinga mi tih leh naupang natna khirhkhan tuarte țanpui nana a neih rosum phal taka pechhuak țhin tu a ni tih chu haider theih rual a nilo.

Tun hnai lawk pawh khan Real Madrid tana UCL an champion na-a a sum fai dawn £456,000 lai mai chu charity tan a donate fai nghal vek a, nikum khan Nepal lirnghing tuartute țanpui leh chhawmdawl na’n £5 million lawih mai a thehchhuah avangin Dosomething.org chuan ‘most charitable athlete’ ah a lo thlang tawh bawk a ni.

Portugal rama mi hnuaihnung chenna veng tlaberh, michhe venga rangva leh țin chhia-a khawrpum ina chhungkaw rethei bakberh tak ațanga seilian, a thawhrimna leh a tumruhna avanga khawvela footballer ropui ber leh hausa ber zinga rawn invawrh kai chho ta Ronaldo hian a chawrchhuahna tlawm tak a theihnghilh ngai lova, mirethei chanhai te tanpui leh chhawmdawl na’na inhmang nasa malh malh hle.

2013 kum khan tihian a sawi a, “Ka pa-in mi harsate i țanpui chuan a lêt tam takin Pathianin a rul let ang che tiin min zirtir țhin a, chu chu ka nunah a takin a thleng. Țanpui ngaite ka țanpui apiangin Pathianin a aia tam in min vur let țhin a ni” a ti.

Aside | Posted on by | Tagged , , , , | Leave a comment

A PASALIN KUT ATHLAK VANGIN PI LALMUANPUII CHU A THI NI A HRIAT A NI

POSTED by Slchhunga Gooner On June 27, 2016

Pi Lalmuanpuii Kum 36 D/o Pu Rualzachhinga (Citea) (L) a nu Chhiarkimi (L) Phunchawng chu nizan (27June) Dar 2:30 vel khan a pasal Islaman kut a thlak avangin a thi nia hriat a ni a, Islama hi Sairang Police ten an man nghal a ni.

Pi Muanpuii ruang hi an fate an la tet avang leh Phunchawng ah chhungkhat laina dang an neih lem loh avangin Chaltlang Branch YMA ten a ruang hi lak chhoh an tum a, Chaltlang ah vui tur a ruahman mek a ni.

He thil thleng chungchang ah hian Sairang Police te chu a hmun a kalin thil awm dan an enfiah a, hnu chhui hna an thawk mek bawk a ni.Pi Muanpuii ruang hi Postmortem tur a buaipui mek a ni.

Aside | Posted on by | Tagged , , | Leave a comment