CHHIAH AWL RU NI A AN PUHNA RONALDO-A’N A CHHANGLET :

Spanish prosecutor ten Real Madrid footballer Crsitiano Ronaldo an puhna, 2011-2014 a chhiah a chawi tur €14.7 million a awl ru ni a an sawi chu Ronaldo chuan a management company kaltlangin a chhanglet ve leh ta.

“Tax awlruk engmah a awm lo a, football player hian chhiah awl a tum lo bawk tih hi a chiang a ni”, tiin Ronaldo’s Gestifute management company chuan thuchhuah a siam.

Chhiah lama thuneitute lakah emaw, Spain ram lakah hian Ronaldo hian a sum lakluh engmah zep a nei ngai lo a sawi a ni a, engmah thup tur a neih miau loh avangin a hma paw’n chhiah awlruk chungchangah hian Ronaldo hian rilru manganna leh hlauhna a nei ngai lo tih a lo sawi tawh bawk.

Nikum December thla khan documents putru ah Ronaldo hian chhiah a awl ru ni a sawi a lo ni tawh a, chhui a nih lai velin Radio Television Portuguesa journalist in zawhna a zawhah Ronaldo hian “Thil thup ngai/tur nei lo chuan hlauhtur a nei lo (Quien no debe no teme)”, tiin alo chhang tawh bawk a ni.

Author : Francis Da Gunner    

Advertisements
Aside | Posted on by | Tagged , | Leave a comment

TAXATION MINISTER CHUNGAH MIMA AN LAWM

MVAT atanga GST luh tur 1st july, 2017 atanga puan a nih khan, GST danah ILP 2yrs. validity phut a ni si lova, hetianga kalpui a nih chuan Mizoramah hnamdang zalen takin an sumdawng thei dawn a, MIMA chuan a ngaimawh hle a. Ni 19th April, 2017 a MIMA in General Assembly a neih khan RESOLUTION ah a telh bawk a. He Assembly ah hian Pu Lalsawta Taxation Minister chuan, ILP tello chuan GST hi kan pawm dawn lo tiin huaisen takin a sawi a. A sawi ang ngeiin Mizoram Taxation deptt. hnuaiah chuan hnamdang in Register tur reng rengin 2yrs. validity ILP an nei tur a ni, purpose of visit ah pawh business a ni bawk tur a ni tia telh a ni a. Hetianga Minister huaisen leh rintlak kan nei hi a chungah MIMA a lawm tak zet a ni. Heti a nih lai hian Central Sorkar atanga an rawn dah CENTRAL EXCISE AND CUSTOM chuan ILP hi an phut ve lo niin hriat a nia, hemi chungchang hi MIMA chuan a zir chiang mek a, a tul anga hmalak a tum bawk.

Pu Lalsawta, Taxation Minister hian sumdawngte harsatna tam tak min sutkian sak tawh a, Chartered Accountant (CA)in sumdawngte Audit ngai pawh, a lo tibo tawh bawk a ni. Hetianga Mizo hnam tana huaisen taka dinga thilti ngam Minister hi ropui MIMA chuan a tiin, entawn tlak hlein a hria a ni.

Author : Slchhunga Gooner    

Aside | Posted on by | Tagged , , , | Leave a comment

CHANGPUI KHUA PU CHHUANMAWIA-TE CHHUNGKAW CHHIAT TAWH DAN KIMCHANG.

(News thenkhatah hriatsual palh vangin a dik lo hlekin an puang a, hetiang hi thudik chu a ni e.)

Pu Chhuanmawia leh Pi Lalhunmawii te hian fa panga (5) an nei a, chungte chu Lalhmingmuana (11), Hminghlunchhungi (9),Vanlalkima (7), Zion-i (5) leh Vanlalpeka (3) te an ni.Pu Chhuanmawia te chhungkua hi lo nei a eizawng an ni a, NLUP-ah Vawk thlangin, vawk enge maw zah an vulh bawk. Tin, an awmna khua Changpui hi Lunglei Dist a ni a, Lunglei khawthlang lam km70 vel, Thenhlum leh Lungchem, Buarpui bul Bungtlang West khaw in kar a awm a ni a. Thorang AC, Pu Zodintluanga bial a ni.

An in dinna hi khawchhung inkal pawhna kawng, kawngthlang lam, kawng an a awm a ni a, kawngpui pangngai hnuai lawka awm a ni. Kawngpui pangngai kam, kawngthlang lam, kawng an, Pu chhuanmawia in chhakah hian Pu Romawia sailo te in a awm a, an huan, Pu Chhuanmawia te in chhakah hian Rawnal hung lian tak tak pahnih a awm bawk.

An fa u ber Muana hi a pi te inah a awm tam hle a, he an vanduai zan pawh hian a pi te (a nu nu) inah a riah zan a nih vang hian a him phah ta a, an te ber dawttu Zion-i erawh hi chu Lunglei Chanmari-ah, a nu U te inah a awm daih thung. Tin, Pu Chhuanmawia te hi UPC NE Kohhran an ni.

June ni 12 (mon) a lo thleng a, zing atangin han miah lovin ruah a sur a, Pu Chhuanmawia chuan khawchhe hnuaiah vawkchaw a la khawm a, Pi Huni erawh Bialtu MLA Pu Zodintluanga’n Puantah khawl a pek thar chu an thenawmnu hote nen zirin nilengin phur takin antah a, zan alo ni a, ruah lah a sur tam tulh tulh a, thli a tleh vuk vuk reng a, power awm lo bawk nen an chhungkua chuan an mu ta a.

Zan dar 9:30 velah chuan an thenawm pa, Pu Lalhmingthanga sailo chuan lehkhabu a la chhiar a, tlipui tleh leh ruahpui sur buan buan karah chuan ri deuh hulh leh an in rawn nghing lawih chu a hria a, lirnghing emaw tiin a chhiar chhunzawm leh ta mai a.

Pu Chhuanmawia te in piah mualah hian Presbyterian biakin a awm a, hemi thlangah hian teak hmun a awm chhunzawm thla a, metre 100 velah mual hi zuihralin, a piah muala luite nen a infin a, hemi mual, a piah muala in thlang ta ber chu Pu Zalawma in a ni.

Zan dar 10:30 velah chuan Pu Zalawma in chu rawn sawi dawt dawtin, an rawn chum bur bur a, Pu Zalawman a va hawn chuan thli tleh leh ruah sur hnuaiah, chau tak leh berh vekin Pu Chhuanmawia chu kawrthler hnu in a lo ding a, an thenawm pa mai a ni nangin a hai hial a ni !! An in chim leh mite hriat karah hian darkar khat vel lai hun a kal a ni.

Pu Chhuanawia chuan an chanchin chu chianglo ruai a sawiin, a nupui fanaute ngaihsak turin a tir a, Pu Zalawma chu a tlanchhuak ta nghal a.. Pu Zalawma nupui Pi Marovi chuan nachhawkna pein a lo hrufai a, biak tlak lohvin a awm zui ta a, a hliamna angreng viau bawk.

Pu Zalawma chuan an thenawmte kai thovin a hre hmasa mi 5 vel chu leimin karah Pu Chhuanmawia nupui fanaute chhanchhuah tumin in chim bawk rup mai chu an luhchilh thla nghal a, an che tan dawn chauh a a rawn min thla leh ta hum hum mai a.. rang tak a inthiar fihlimin, an in saseng ta rih a. Ruapui sur buan buan leh thipui tleh vuk vuk karah, eng tha lo nen, lei min la chawl lo nen an luhchilh chhunzawm ngam ta rih lo.

Thenawm khawveng te in kaitho zelin, an tam hnu chuan ruah a rawn han ta a, mi tlawmngai ten, thirtiang, bawngtuthlawh leh tuboh nen an luh chilh thla leh ta a. In awm danah leh khum leh puanthuah awm miah loh dante, an bang leh bangrel awm miahloh dante an hmu a.. an kawmthlang kawrte dap tur a rilru siamin an liam ta thung a.

Ruah hi a sur tam leh tawh em em a, luite mai mai a ni chungin dai ngam a ni lova, a ri buan buan thei hial a ni!. fimkhur tak a vaukam a kalin, lui mawng deuh atangin a hnar lam leh mawnglam dap, group hnih a in thenin an kal zela.. a hnar lam zawh chho ho hian Pu Chhuanmawia te inchhak Rawnal hung lian tak tak pahnih tawlh dun inkarah, Puanthuah nen an fate pahnih, Hluni leh Kima te chu inkuah rial a lo thuin an hmu ta a (1:00 Am vel), A u zawk Hluni hian na a nei miah lova, Kima erawh hi chu a taiah hmun ruk vel lai a chilh ngaiin a hliam thung.

A mawng lam a kalte hi thui an kal ngam lo, sakuhtui luiin a rawn finna chinah chuan kal ngamloh khawpin tui a tam a ni. An kalna chinah hian an pawisa te, an thawmhnawte an chhar nual a, an bangrel leh an in hmanrua luikam awm hnuk mai an hmu thla zel bawk.

Chet tak tak theih a nih loh avangin thenawm inah an lut khawm leh rih a, nunna in chhan belh theih ringin luiah an lut thla nawn leh thin a, tui tam lutuk, ruahpui sur buan buan, thlipui tleh vuk vuk leh eng tha lo karah chet hleih theih a ni lo. Khawvar a nghahhlehawm tak zet a ni. Rei tak hnuah chuan khua a rawn var ve ta hram a. Mi engemawzat in luidung an zawhthla nghal a, a thenin inchim luhchhuahin hun an lo hmang bawk. Luiah chuan an bungrua, puanthuah leh insawp tuilian sawisak rapthlak tak bak hmuh tur a awm lo.

In chu thiah darh a ni a, mahse a hnuaiah chirh leh leimin a awm mang tlat lo. An inchhak min hian rawhung pahnih rawn nuaithla in, rawhung lian tak tak pahnih hian in hi a thuai sawp thla vek a, bang a thuai hawnah hian an chhungkua in an baw chhuak vek niin a lang. Tichuan sabereka khuangkaih tuihawk leh chirhdiak inpawlh chuan a len thla ta vawn vawn hlawm mai a nih hmel.

Thawhleh ni chuan nilengin zawn an ni a, leivung chirh leh hnawlhnawk zawng zawng hai a ni a, Changpui khua hi an khaw thenawm Thenhlum leh Lungchem ten rawn puiin luidung pawh Km 3 vel chu dap a ni a. A bak chu lui a chhengchhiat bakah, tui a la tam em vangin kal ngam a ni lo. A kal theih chin leh dap theih chinah hmasawnna a awmlo.

Nilai ni zing a lo thleng a, Pu Chhuanmawia chu a biak theih tan ta a, “Ka harh thut chu chirhdiak nem tui pur hian min len thla nawk nawk a, a changin ka pil a, a changin ka intauh leh sawk thin bawk. Ka ding deuh det a, in man tanna tur ka dap a, ka hmu lova, min len leh ta a, ka thaw te a chham tan a, kan kawmthlang kawrteah leiminin min hnawl tih ka hria a, a chhengchhe chin a hnaih em vangin ka inman tan vat loh chuan ka thi dawn tih ka hre bawk. in man din tumin kut ka vai vak vak a, mau ka vuan fuh ta a, luikamah in kai chhuakin min chim pha ta lova. Kan nu aw ngei tanpuitu au ka hria a, ka ai a thlangah a ni.. lui mawnglam zawng rawh u” tiin min hrilh ta a.

Nilai ni chuan Changpui, Thenhlum leh Lungchemte chuan Lui dung chu an dap ta chiam a, thawhleh chawhnu her atangin khua a tha ta bawk a, a kal theih ta deuh.

Pu Chhuanmawia te kawmthlang kawrte hian Changpui tuikhur lui, SAKUHTUI a fin a, Sakuhtui hian luangpawlui a fin leh a, luangpaw lui hian Tut lui a fin ta a ni.

Chhun dar 12 velah chuan Tut lui thlen hma lawkah nu ber Pi Lalhunmawii ruang chu hmuh a ni ta a. An in atanga ruang hmuhna hi km 5 vel zet a ni. Thingluang inphun, hnawlhnawk bet hnukah a sam sei tak chu bet telin a lo tang a ni. A len thui leh kawr chhengchhiat dante, lengkir sang lutuk 4/5 a paltlang thlak ngaihtuahin thil mak em em chu a hmelhem miahlo hi a ni!!!

A ruang hi lumen mek (wed 10:30 pm) a ni a, a fapa Peka erawh hmuh la ni lo. Bungtlang West leh Dampui ten an khaw zawn Tut luiah zanriak meuhvin an lo chang a, dap zawm reng a la ni bawk. Tin, an pa ber hi a thu peih hram chauh a la ni a, an fapa Kima hi a hliam a la na viau bawk. An khawngaihthlak tak zet a ni.

Author : P.C. Lalmalsawma Cp    

Aside | Posted on by | Tagged , , , | Leave a comment

CHINA RAM A UNIVERSITY HNA THAWK THA TE ZINGAH NL LALHLUPUII SAILO A TEL VE

China rama Mizo nula, zirtirtu chu.
Mizo nulain china zitirtu tha lawmman a dawng.

China rama kum 10 chuang University-a English Teacher hna thawk tawh Nl Lalhlupuii Sailo (MSc), d/o Upa Lalhmangaiha Sailo, Bungkawn Vengthar, Aizawl chu Shaanxi Province a University 60 awm atanga Zirtirtu hna thawk tha, China sorkarin a thlan chhuah zingah telin, June 4, 2017 khan “Execellent Foreign Teachers of University in Shaanxi 2017” tih Award pek a ni. University 60 atangin Teacher tha mi 2 theuh China’s Provincial sorkarin thlang chhuakin, ani hi a thawhna University ah mai ni lovin, an Province (State) pum puia Teacher tha thlan chhuah 20-zingah a tel ve leh ta a ni.


Nl Lalhlupuii Sailo hi mi tum ruh tak niin, Pathian rinchhanin Chinaah a lut a, mahni inchawm chungin Pathian ram tana mi tangkai tak a ni. Chinese tawng character 3,000 chuang awm te pawh chu zir ngat ngatin, Pathian malsawmna nasa tak a dawng hi a ropui a; Mizo te a tihmingtha hle a ni

Author : Ct Lalrinawma    

Aside | Posted on by | Tagged , | Leave a comment

CSS Hindi Teacher-te’n an hna an thawh chhunzawm dawn.

Pu Rajnath Singh-a leh Pu Lal Thanhawla te hian nimin khan Aizawl Raj Bhavan-ah tukthuan kil dunin Chief Minister hian Hindi zirtirna leh tihlarna tihchak a tul thu te, hemi atana Hindi Directorate hrang hial siam a duh thu leh sum indaih lohna avanga la tih theih loh a nih thu te, CSS hnuaia Hindi zirtirtu 1000 chuang te tihtawp tumna awm mek chu Hindi tihchakna kawngah a pawi theih thu te Pu Singh-a hi a hrilh a.

Union Home Minister Pu Rajnath Singh-a chuan Chief Minister-in Hindi a dah pawimawh chu lawmawm a tih thu sawiin Hindi Directorate chu amah pawhin a ngaih pawimawh thil a ni, a ti a. CCS hnuaia Hindi zirtirtu 1000 rualte chuan an hna an chhunzawm ang, tiin Chief Minister hi a hrilh a; theihtawp chhuaha hma lak a tum thu pawh Chief Minister hi a hrilh bawk a ni.

Union Home Minister leh Chief Minister-te hian India politics leh Mizoram politics te chipchiar takin an sawi dun a. Burma nena inlaichinna chungchang te pawh sawi dunin, he thil tihchak nana hmalakna pawimawh nia an hriatte pawh an sawi dun a. Chief Minister hian hmasawnna kawng hrang hrangah Mizoram ngaih pawimawh a tul thu Union Home Minister hi a hrilh tel bawk a ni.

Union Home Minister hian Sunday a Parva tlawh a tum chu khua a chhiat avangin a thulh a, a rawn kal chhan ber ramri chungchang zirtawp ah an sawiho tawh avangin Sunday khan Delhi panin Mizoram a chhuahsan a ni.

Aside | Posted on by | Tagged , | Leave a comment

Ruah surin Mizoram hmun hrang hrangah chhiatna nasa tak a thlen.

Nimin piah atanga ruah tam tham tak sur khan Mizoram hmun hrang hrangah chhiatna a thlen nasa hle a, nunna chan an awm bakah, in leh lo chan chhungkaw thahnem tak an awm a ni.

Hriat theih chinah nizan hmasa atang khan Tlawng lui lianin Sairanga In thahnem tak a chim a, In 15 chu luah theih lohin a chim vek a, tuiin a chim mai hlauhthawnawma awm chhungkaw 52 an inthiar chhuak a ni.

Aizawl Tuithiang vengah chhungkaw 7 luahlai Assam Typein a chim a, zingkar atanga a chet hret hret tawh avangin inluahtute an inthiar chhuak hman a ni. Anni bakah hian chenna in 36 chu hlauhthawn thu-ah an inthiar chhuak a ni.

Behlehem Vengah chhungkaw paruk luahlai In pahnih chu leiminin a hnawl chhia a;
Bawngkawn-ah In pakhat a chhia a,
Durtlang leh Aizawl inkar kawngpui thing tluin a hnawh a,
Tuirial airfield kawngah kawngpui a tlakhniam avangin kawng a ping a,
Zemabawk North-ah chhungkaw pariat luahlai In panga a chhia a, YMA Sec VI bungraw dahna In achhe bawk a,
Zemabawk-a Assam Rifle ramah leiminin PHE tui pipe a tichhia a ni.

Chaltlang-a leiminin Taxi pakhat a chhilh a, Republic Veng leh Salem veng inkalpawhna kawngpui a tlak hniam avangin kal tlang theih loh a, ITI vengah World bank road chu leiminin a hnawh ping a, Chaltlang Lily Veng Bethesda Hospital bula leiminin Car 1 a tichhia a, Hunthar venga leimin pawh a la chet chhunzawm zel a, a bul hnaia chhungkaw eng emawzat chu an insawn chhuak mek a.

Nizan khan Pi B. Sairengpuii building thenkhat a chim leh a. Heng bakah hian hmun hrang hrang Nursery veng, Lawipu, Bawngkawn-ahte lei a min a ni.

Aibawk leh Tachhip inkar kawngpui leiminin a hnawh a, Aizawl leh Reiek inkar kawngpui a ping bawk a, thenfai mek a ni a.

Aizawl leh Tuirial inkar kawngpui chu Beraw quarry thlen hma hret-ah te, Bungherh, Bamboo link road bulah leh Airfield junction-ah te kawngpui a ping a, PWD-in thenfai hna an thawk mek a.

Lunglei Dist.-ah chuan Khawthlangtuipui lianin Tlabung leh a chhehvel khaw hrang hranga chênna in a chîm tan a, report hrang hrangah chuan chenna in 100 chuang a chim anga sawi a nih laiin, sorkar atanga hriat theih chinah chuan Tlabung-ah In 4 tuilianin a la tawh a, tui hian len lam a la pan zel a, Licheng Field a chim a, YMA Run hnuaia Dawr te leh Missonary Kai te a chim tawh a, in pahnih chu luah ngam loin an inthiar chhuak tawh bawk.

Phairuangkaiah mithi in hnawlin mitthi ruang leh mi dang 3 a hnawl a. Lunglei SDRF tirh nghal an ni a, Changpuiah Sabereka khuangkaihin In pakhat a hnawl a, in neitu nu, nausen phir pawm lai chu damdawi in panpui laiin a thi a.

Bunghmun-ah In pakhat chu a tluk mai hlauhthawn avangin thiah a ni a, Bulia-ah In 10 a chhia a, In 20 chu luahngam lohin a awm mek bawk a.

Changpui-ah In pakhat a chhia a, mi pathumin hliam an tuar.

Lunglei leh Lawngtlai inkar kawngpui a ping a.Lunglei khawpui chhung Zotlang-a Tourist Lodge bulah lei a khi nasa hle a, ruah a sur chhunzawm chuan lei khi hi Toursit Lodge leh a hnuaia awm Petrol Pump tan a hlauhawm thei hle dawnin a lang tih kan corr chuan a sawi a.
Zobawk South-ah In 3 luah ngam lohin chhuahsan a ni.

Serchhip Vengchungah In pakhat thiah a ni a, P&E vengah In pakhat thiah ngai a awm bawk a, Chhim vengah In 4 bungrua thiar chhuah a ni a, Sailiamkawn bula NH 54 kawng ping thenfai nghal a ni.

Siaha-ah chenna In pucca building pakhat chu a dinna lei a tlakhniam vangin luah zui ngam a ni lo a, pucca building dang 3 te pawh an chhe vek a, pucca bldg. 1 leh Assam type In 5 a chhe bawk a ni.

Lawngtlai Dist ah chuan Lawngtlai-IV Kanan Veng a Pu Nitawha In sir chu minin, hei hian a thlangkawngpui, Lawngtlai atanga khawthlanglam panna chu a hnawhping a, Pu Nitawha In hi a ban thenkhat a tichhe bawk. Mitlawmngai chhuakkhawmte chuan Pu Nitawha te bungrua hi hmunhim lam ah an suan nghal a ni.

Lawngtlai-III thlanmual chu min mai hlauhthawnawmin a awm mek a, thlan pali vel sawn ngai a awm vangin nimin tlailam khan khawtlang chuan thlan sawn hna hi an thawk nghal tih kan corr chuan a sawi a ni.

Hetihlai hian Lawngtlai Bazar atanga Electric Veng panna, kawngkual lai kawng chhaklam chu nimin zinglam khan min in, hei hian kawngpui a hnawhping bawk a, kawng ping pawh PWD ten sialtlang nghal a ni.

Champhai Dist chhunga Biate leh Khawbung inkar kawngpui leiminin a hnawh bawk

Aside | Posted on by | Tagged , , , | Leave a comment

Mizo chhûngkaw nun chhe ta lutuk hi !

Kohhran ţhalai hruaitute kaltlangin tleirawl rual enkawl leh kaihhruai an ni a. Thil ţha leh pawimawh tinreng zirtirna dawng kumtluan chungin an nunah hmasawnna reng a thleng thei si lo hi a manganthlak rualin thil nihna a tarlang chiang hle thung.

Hman lai kan pipute huna chhûngkaw inenkawlna kha a ţhain pa ber awp lumna hnuaiah faten thu an awih ţhin kha a ni a. Ram a han buai a, kan han zalen tak hnu hian engkim a danglam zo ta vek mai a nih hi! Fate ngam lo leh thunun zo lo reng rengin nu leh paten chhûngkua an enkawl ta.

Kan in leh lo a ropuiin room hran hranah mahniin fate kan tlattirin an awm awmin kan awmtir mawp mawp a. Duh lehmamawh an neihin nu leh pate hnenah an dil leh mawp a. Anni lahin awlsam ang reng takin an lo pe ve mai bawk a. Aia upa zah tur, khawhar ina awmdan tur, mi zinga awmdan tur, ngaihzawng thlan dan tur hrilhin hun an hmang tlem telh telh a, kan heti ta nuaih mai a nih hi.

Naupang ţhang chho mek, tleirawl rual nundan rapthlakzia hi a awihawm loh hial tawh ang. Chutih rualin ruihtheihthila inhmang lem lo lah fel deuh si, duap êm êm lawi siin, no hlur ringawtin an hun an hmang liam ve mek bawk a. Kohhranin Kristian Chhûngkaw Prawkram kalpui mup mup mah se, a hlawhtlinna hmuh tur a lawi a awm chuang si lo.

Chaw ei tura kaihthawh zingtin ngai, mut nachang hre lo zantin, pawn lama chhuah changa thawmhnaw changkang tak tak hmanga an nihna thup leh hmiah si chhûngtin tihtheihin kan kawl ta deuh vek mai hi nu leh pa bak puhmawh tur vâng tak a ni. Mahni fate thunun zo reng reng tawh lo engzat tak nupa awm tawh tak ang maw?

Tih tak zet zeta Lalpa ţih mi enkawlna hnuaia awm chhûngkaw nun nawmzia leh mawizia, biak in tam tak leh Pathian ni zinga inkhawm tam tak zingah hian, a taka tawngtu chhûngkaw tlemzia han hmuh hian Pathian nung bia inti Kristian nupa, kohhran hriatpuina hnuaia Pathian hnena mahni fate hlan a, A duhdan anga enkawl intiam tam zawk hi Parenting kawngah an hlawhchham let der chu a nih tak hi!

Author : Lalremliana Pachuau    

Aside | Posted on by | Tagged , | Leave a comment

Bangladesh khawchhak leimin avanga thi mi 140 an tling tawh.

Bangladesh khawchhak lama tlangram district-ah ruah sur nasa avanga leimin avanga thi zat chu mi 140 an tling tawh a. An zingah hian sipai officer 2 leh sipai dang 2 an tel thu sipai thuchhuah chuan a sawi.

Heng sipai te hian chhanchhuahna hna an thawh laiin leimin avang hian an thi a. Mitthi hi Rangamati-ah tam berin mi 98 an thi a, Babdarban ah 7 thiin, Chittagong-ah mi 32 an thi bawk.

Chhiat tawhna hmun hi hmun kilkhawr tak tak a nih avang leh kawng a chhiat nasat avangin hna thawh a harsa hle a.

Thuneitute chuan mitthi zat hi an pun chho zel an rin thu an sawi a. Hmun hlauhawm laia chengte chu sawnchhuah an ni a, hliam tuarte damdawiin hnai berah dahluh an ni bawk.

Aside | Posted on by | Tagged , | Leave a comment

CHANGPUI KHUAAH LEIMININ IN A HNAWL, CHHUNGKAW NU BER LEH NAUTE RUANG ZAWNG MEK

Leiminin in a hnawl.
Leiminin nu leh a fa la bo.

June ni 12 zan dar 9 vel khan ruahsur vanga leiminin Lunglei District chhung Changpui khuaa Pu Chhuanmawia te chhungkaw luahlai Assam type In chu a hnawl a, he thu buatsaih lai thleng hian an nu ber Lalhunmawii (32) leh an fate ber Vanlalpeka te chu hmuh an la nilo a, ngawrh taka zawn mek an ni.

Thu dawn danin, Chhuanmawia te chhungkua hi mi 6 niin, an fa upa ber mipa chu nizan khan an chhungte Inah a riakchhuak a. Leiminin in a hnawl hnuah chhungkaw pa ber Pu Chhuanmawia chu kawngpuiah a vakchhuak a, hemi hnu hian khawchhung mi tlawmngai ten chhanchhuah hna an thawk chhunzawm nghal a ni. Pu Chhuanmawia te kawmthlang lam raw hung karah an fate pahnih (an milai) mipa naupang leh hmeichha naupangte chu nung damin blanket-a inkhuhin hmuh an ni a, an taksa hmun thenkhatah hliam an tuar nual a, ngaihtuahawm erawh an ni lo tih thudawnna chuan a sawi. An ni pahnih hi khum khat a mu dun an ni.

Hetihlai hian nu ber Lalhunmawii leh an fate ber Vanlalpeka te chu zankhua a zawn an nih hnu ah pawh chanchin buatsaih lai thleng hian hmuh an la ni lo a. An kawmthlang lamah hian luiluang a awm a, lui hian an ruang hi a la a nih an ring a. Lui dung pawh thui tak thleng an dap a ni. An khaw thenawm Thenhlum YMA leh Rangte YMA te chu Changpui tanpuiin tlawmngai thahnem tam tak an thawkchhuak a, he thu ziahlai thleng hian Lalhunmawii te nufa zawn hna hi ngawrh taka thawh mek a ni.

Thudawn danin In neitupa Chhuanmawia leh an fate hi ngaihtuahawm an nilo a, In chhia sak that dan tur hi khawtlang chuan an ngaihtuah dawn ni a thudawn a ni bawk.


Author :
Kiddy Vanchhawng    

Aside | Posted on by | Tagged , , | Leave a comment

Ruahsurin Chhiatna a thlen nasa

# Nizan dar 8: 30 vel khan Tuikual D Mual Pu Zoramnghinga In chhak, kawngpui Sairang road kawng hnuai lam chu nasa takin a min a, Helai hi Tenis Court atanga Dinthar panna kawng pawimawh tak a ni a, mihringtan pawh kal theih lohin tunah hian leimin hian kawng a hnawh ping mek a ni.

Hei leimin hian VC House, Pu V.Zoramnghinga leh Pu R.Chhuanvawra te in zawn kawng te a hnawhphui vek a, tukin zingah a min belh leh a ni.


#Hunthar Veng lei tlahniam chu a chet belh leh a, JCB in kawng hi a thian nghal a ni.



# Tukin zing dar 1 vel khan Bawngkawn East Helipad road kawng chhak lam Pu Rochhuma In chu lei tawlhin a hnawl a, anmahni hi an riah chhuah avangin mihring thi leh hliam an awm lo hlauh.



#Nizan Dt 12.6.2017 a ruah sur chuan Aizawl leh Tuirial Hnawm paihna inkar kawng a ping a, Aizawl lam atangin then nghal a ni. ↑

# Chaltlang Lily veng Seri Street-ah Pu Lalzirliana In thlang lungrem chim chuan Taxi a delh a, Taxi hi a chhe nasa hle. Kawng erawh a tlang thei hram a ni.

# Chawlhhmun Section-III ah leiminin Mauhung pathum a hnawl tawlh a, Hermon veng kal pawhna kawng a hnawh. Govt, Complex Pu Lalduha kawmthlang lungrem a chim bawk a, Pi Ngurliantluangiinhnuai lungrem a chim bawk a, Pu Thanglianchhunga kawmthlang lungrem a chim bawk.




Zemabawk north Dam veng ah pawh feet 50 bial vel lei a che a, chenna in 6 chuang atangin bungrua inthiarchhuah tawh a ni.


# Tukin zing dar 5:00 vel khan Republic veng Field chung kawngpui a tlahniam a, lirthei eng chi mah a kal tlang thei loa, mihring tan pawh kal tlang theih a ni lo. Helai hmun hi tunhma atanga tlahniam tawh thin a ni a, hun rei tak a chet tawh loh hnuah tun tum ruah surah hian a che leh ta a ni.
A bula in pakhat chu a che tel bawk a, chanchin buatsaih lai hian lei tlahniam hi a la che hret hret reng niin thu dawn a ni.




#Tukin 7:40am vel khan Pu Zamana, Saron Bethlehem road in chu a chim a, thi leh hliam an awm lo.↑

# Chawnpui veng thlanmual hlui chu tukin zing dar 4 vel khan a min a, Chawnpui Sports Centre panna step a hnawhkhat vek a, mihring tan pawh kal theih a ni lo.



# Sairang Tlawng lui a lian nasa hle a, in 50 chuang a chîm a, in 3 vel chu a chim pil vek niin thu dawn a ni. Sairang Tlawng lui lian hian Lawngleng engemaw zat a len bo bawk. Hortoki leh Bairabi lam a chhungte nei kan awm chuan Sairang ho lawng lo ngaihven turin an ngen.







# Thenzawlah Lau lui a lian a, kawngpui te chimin in chhungah tui a luang dul dul mai niin thu kan dawng bawk. Chanchin buatsaih lai hian Lau lui lian hian zual lam a la pan zel a, Thenzawl vengpui lam leh Lau ral/ Field veng lam inkalpawh theih a ni lo.

# Aizawl Thenzawl Lunglei Road 32.50 km (Maubuang bul)leh 60.00km, Sialsuk khaw hnuai ah kawng chhaklam min vangin kawng a block a, Kawng hi then mek a ni a, Nizan khan midum kham hnuaiah hmun hnih leitla a awm a, clearve ve tawh a ni.

# Nizan ruahsur nasa avangin tukin zing dar 6 vel khan Tlabung Chawnpui vengah chenna in 2 a hnawla nunna chan an awm lova, in pakhata chhungkaw nu ber hi leiin a hnawl atanga darkar khat hnuah phawrh chhuah niin damdawiin panpui a ni a, damchhuak leh tura beisei a ni. Chawnpui YMA ten a tul ang an buaipui a ni.

# Lunglei leh Lawngtlai inkarah hmun thum velah leimin a awm a. Lirthei a kaltlang theih tura beih nghal a ni.

# Lunglei district Changpui khua Pu Lalchhuanmawia In chu nizan (a dar zat chiah hriat a nilo) ruah sur nasa tak avanga leimin chuan an muthilh laiin a hnawl a, Pu Lalchhuanmawia leh a fate 2 hmuh an ni tawh a, hliam na tak an tuar. Pa ber hi a dinhmun a thalo hle. A nupui Lalhunmawii kum 33 leh an fa te ber Vanlalpeka kum 2 mi te chu chanchin buatsaih lai hian hmuh an la ni lo.

# Tlabung kawng Phairuang khuaah mitthi an nei a, tukin zingah hian mitthi in chu lei min in a hnawl a, chanchin buatsaih lai hian mitthi ruang pawh hi hmuh a la nilo a, midang 3 in nunna an chan phah bawk niin thu lakna chuan a tarlang.

Aside | Posted on by | Tagged , , , , , | Leave a comment