THE ANDES SURVIVOR ( mizo version)

  • Andes tlang a chetsualna rapthlak.
  • Thiante sa ei ngai khawpa dinhmun chhia chu.
October ni 13, kum 1972 a chhiatna rapthlak tak, thlawhna Fairchild FH-227 in a tawh chungchang hi kimchang lo takin i han tarlang dawn teh ang.

Thlawhtheihna a hming Fairchild an tih chuan Uruguay atangin Rugby union team te leh an chhungte leh thiante nen, rugby football khel a, tawiawm turin Chile ram panin an thlawk chhuak a, passengerte hi an vaiin mi 45 an ni.

Uruguay airport atanga Chile hi darkar 4 vel kal a ni a. An thlawh chhuah tirh chuan khua a thiang tha hle mai. Mahse rei vaklo hnuah an radio report atang chuan khaw awmdan a hlauhawm tih an hre zui ta tlat mai a. An tlàng thlawh khum tur a sang hlawmin feet 20000 dawn laia sang te an ni hlawm a. Chutia khua in a zir miau loh avang chuan Argentina thlawhna ţumhmunah an han chawl lailawk leh zet a.

Tichuan a tukah chuan kal siam lehin pilot chuan darkar khata mel 40 a chakin a han khalh a. Planchon an tih hmunArgentina leh Chile inkar a inbiakpawh nan a an hman thin chu tlai dar 3 vel a thlen hman an inbeisei a ni.

Mahse chulai hmun awm ang vel an han thlen chuan an hnuai lam an han thlir a, chhum dum chhah pui mai hian a lo dap khat mup mai le. Chumi chhùm han sut tlang chu thil huphurhawm tàwp a ni ta. Mahse tihngaihna dang awm ngang chuang si hek lo le, passengerte hnenah chuan inralrinna thu pein seat belt an hren ngheh tir sauh sauh a, thlamuan mawlh mawlh chungin chhumah chuan an bir lut ta a ni.

Chutah Fairchild chu a nghing dawt dawt a, nasa zet a nghawrin a lei ta buk buk mai le. Boruak panna lai an thlengchiah chu thlawhna chu a tla nghal vawn vawn mai a ni.

Chutia an han tla thla chu thlawhna thla lehlam chuan kham pang a hrut ta hlauh mai le, a mei lam a hrut bung ta bawk nen. Chutah mi pathum chu thli nasa lutuk avang chuan boruakah an leng chhuak lawp mai bawk..Chutah le,chu thlawhna Fairchild chu a tla sawp ta rup mai a ni.

Chutah na tuar rum thawm leh thlaphang au rawl chuan chulai hmun chu a khat ta. Ngaihtuahna fim hmang thei deuhte chuan tihdan tur an han ngaihtuah ta a. Harsa taka pilot awmna lamah chuan pheiin radio awmna an va dap ta a. Chutia pilot thutna an han lut chu pilot ber chesawn thei miah lovin na tuarin a lo let hlawm reng mai. Pilot chuan tui in tur a lo lam a, mahse tihngaihna awm si hek lo le, vur te chu an han hmet tui chawp nawk nawk a, a ka-ah chuan an han sawr lut a, dang hnawnna chang chang chauh a ni.

Pilot thutna chep tak karah chuan radio chu han hmu bawk mah se a lo chhe hneh hle mai, bei ti dawng seitu mai a ni. Pilot pawh khawih chet ngamloh a nih avang chuan an chhuahsan ta ringawt bawk a. Khua a lo thim zui a, chu zan rapthlak leh hrehawm zet chu na tuar mangang rum thawmin a khat tlaivar ta zak a ni.

He thlawhna chesualah hian mi 12 an boral nghal a. A damchhunte lahin hliam na tak tak an tuar bawk si nen. Chhanchhuaktu tur an rawn lang mai bawk silo,an mang hia ang ngawih ngawih mai a ni. Kan sawi tak ang khan tluang takin thlawk se chu darkar 4 vel kal bak anih loh avangin eitur an lo pai tlem si a, chocolate, snacks, wine tlemte an ken chu an eitur neihchhun a ni mai a. A che thei deuh ho chuan chungte chu tlemte te in an han sem diat diat, ţamchhawl dawmna chang chang chauh a ni.

Damlo na tuar enkawltu tur doctor leh 2nd year zirlai pakhat chu awm ve bawk mahse, an damdawi ken angte thlipuiin a len bo sak vek avangin Dr.Francisco Nicola tan pawh tihngaihna vak a awm chuang bik lova, silfai sakna tur tui te a awm si lo. Hliamte an tuam sak a, a bak tih theihvak an neilo a ni.

Tuk khat chu chhanchhuaktu pawh an beisei tawh loh laiin thlawhna ri an hre ta thut mai le. An lawm lutuk chu an au vak vak a, a then an mittui a tla bawk a, an ban lo phar vak vakin thawm an siam a, an bul vela thil awmte chu an khawng ri chuah chuah a. Mahse thlawhna chuan a thlawh pelin khawthlang lamah a thlawk liam ta vung vung mai le. An beisei a san ve tawh vei nen, an hmel chu chawplehchilhina ngui nghal nghiai hlawm mai a ni. Chutah ri an hre leh ta tlat mai. Khawthlang lam atang chuan thlawhna pakhat rawn thlawk chho lehin anmahni a rawn zawng ni ngeiin a lang bawk. Anni lahin nasa zual zawkin thawm an lo chhuah leh a. Mahse chu thlawhna pawh chu a thlawk tlang leh ta bawk si. An beidawng lutuk chu an kun tlawk tlawk mai a ni.

Ni e, an rawn zawng ngei a, mahse vur ram a ni si, an thlawhna a var bawk si, ram pathum atanga rawn zawng tute pawh an beidawng titih der tawh mai a ni. An vanneih asiamin an radio transistor chu ngaihthlak theih ţawng ţawngin an han siamtha thei ta hlauh mai a. Chuta an thu hriat chuan an thin a ţhawng chiang khawp mai. Chulai hmuna ni 11 zet an awm tawh hnu a an beiseina awm leh chhun radio thupuan chu Fairchild thlawhna bo zawn chawlhsan a nih tawh tur thu chu a ni. An beidawng lutuk chu an ţap vawng vawng a, a ţhen an chau zual sauh ta bawk. Zan a lo thleng a, an tawmhulna thlawhna chhia ah chuan puan te an han zar a, vur thli lakah chuan an him zel rih phawt chu a ni. Mahse zanlai takah an chunglam chu a rawn ri dup a, enchian an han tum chu a lo chhuah theih ta reng reng loh mai, vur tawlhin an thlawhna chu a lo chim pillo niin. Vur te an han tawn keh a, an chhuah leh theih meuh chuan nunna an chan belh leh ta nual mai, an beidawnna a nasa takzet tawh a ni.

Hetia an beidawn em em lai hian mi pakhat beidawng ve duh miah lo a awm a, a hming chu Parrado a ni. Chu tlang sang leh ţihbaiawm zet a lawn chhoh a, khua chuan theih a inbeisei mauh mai a. Ţhian thenkhat chuan lo thlawpin an nunkhawchhuah theih nan an ţhian thi ta te sa chu hreh leh rapthlak ti zetin an han ei leh te te a, harsa zawng an ti ngang mai, mahse eitur dang an nei miau tawh silo. An ţhian damlo rawn kal ve theilo te pawh an ţhian thi te sa chu an hnutchhiah a, mitthi sa ringa lo nung hram hram turin an inthlah ta a nih chu.
Tichuan an chhuak ta a, hah hnepa tlang sang lai deuh an thlen hnu chuan an han thlir ngial a, beiseina tlem chu an hmu ta. Chu chu ruam thuk taka Y shape anga ram an zuk hmuh chu a ni.

Tichuan chau ngawih ngawih chungin ruam thuk lam an han pan leh ta a. Chutah Y anga an hmuh ram chu an zuk thleng a, luite tui lo luang hi an hmu fuh ta hlauh mai le. An lawm lutuk chu an hliam pawh hre chang lovin an zuang a, an au a, an ţap per pur ta mai a ni. Lui chu pan rawk rawkin tui chu an in khawlh khawlh a, an hlim lutuk chu an na reng an hrechang tawh lo. Chutia an hlim em em lai chuan luikam lehlamah sakawr chungchuang an va hmu ta hlauh mai a. Ring takin an va au a. Mahse lui luang ri avang chuan an ţawng an inhrechiang thei lo. Nakinah chuan chumi te chu an bulah rawn thleng pheiin khaw hnai ber Police stationah Parrado te pahnih chu an hruai a. An chanchinte an han sawi ngial pawh chuan an awihsak meuh lo. A chhan chu Fairchild a bo atangin thla 2 chuang a ni daih tawh tlat mai a, an damkhaw chhuah an ring tawh lo a ni. Tichuan hmunpui lam bia in an thil tawnte an va sawi a, anni pawh chuan a tirah chuan awih enah pawh an lo en meuh lo a ni.

Nunna chan belh zel a hlauhawm avangin hmanhmawh takin helicopter 3 tir chhuak nghalin Parrado te sawina lam zelah chuan an thlawk ta a. An rawn kalkawngte an han hmuhpui phei chuan chhanchhuaktu pawl pawhin mak an ti ngang mai. Tichuan rei tak harsa takin, tlangsangte hel kual zak zak a an thlawh hnu chuan an thiante chau tak tak, a ţhen thi lek lek tawh te chu an zuk hmu ta a. Khati khawpa chau chhe tawh te khan beiseina nung an han hmuh meuh chuan lawmin an au rawih rawih a. Tichuan December ni 23, 1972-ah a la dam mi 16 te chu chhanchhuah an ni ta a. Hei hi an chetsual atanga ni 72 na chiah a ni. Mi 29 an thi a, mi 16 an damchhuak ta a ni.

Advertisements
Aside | Posted on by | Tagged , , | Leave a comment

Minister Pu Lalrinmawia a bang

Labour Employment & Industrial Training Minister Pu Lalrinmawia Ralte chuan tunhnaia NIAS Kolkata zirna in lem nia sawia zirlai tirh an nih chungchang thu kal zelah vawiin khan Chief Minister hnenah a banna a thehlut.

Pu Lalrinawmai Ralte hian Chief Minister chu duhsak taka Minister nihna a pek avanga a lawmthu hrilhin, LE&IT hnuaia Welfare Board sum hman thuah leh approval pek thu-ah sawi neuh neuh a awm avang te leh Chief Minister meuh pawh inhnahnmahnawiha puhna te a lo awm chhohtak avangin thudik hailan a nih theih nan, chhui a nih laia thuneihna hmang thei loa a awm theih nan banna a thehluttih a sawi a, a banna chu pawmsak ngei turinb Chief Minister a ngen a ni.

Aside | Posted on by | Tagged , | Leave a comment

ISRO IN VAWIKHATAH SATELLITE 104 KAPCHHUAKIN HISTORY SIAM

  • India in a ropuina a tarlang zel.
  • Satellite tam tak a kap chhuak
Vawiin Feb 15, 2017 khan India chuan ISRO Polar Launch Vehicl (PSLV) hmanga missiona neih vawikhatah record siamin space exploration chanchinah bung thar a kai.

PSLV-C37 hian vawiin chawhma lam dar 9.28am khan Satish Dhawan Space Centre, Sriharikot -ah satellite 104 tumkhatah a kapchhuak a, tuntum hi PSLV vawi 39 thlawhchhuahna a ni.

Heng satllite 104 zinga 101 hi ram hrang hrang 6 te ta a ni a. Satellite 96 hi US ta niin, Israel, UAE, Netherlands, Switzerland leh Kazakhstan ta pakhat theuh a tel bawk.

June 2014 a Russian Space Agency in tumkhat a satellite 37 kapchhuak a record a lo siam tawh chu India hian a khum ta a ni. Kum 2015 June thla khan India hian tumkhatah satellite 23 a lo kapchhuak tawh bawk.


Author : Kiddy Vanchhawng

Feb. 15, 2017

Aside | Posted on by | Tagged , | Leave a comment

Vanlalpeka (Naupang fel chanchin)

  • Naupang bible tuaktu chu
  • Bible hlut zia
  • Pathian duh zawnga nung naupang chu
Ka fapa Vanlalpeka hi la dam sela chuan vawiin hi a kum 9-na tur chiah a ni. A thiante rualin school te kalin hlim takin a nui ang a, hringnun hahthlak takah hian hlimna, lawmna leh nuihna min pe ngei dawn si a. A hriatrengna thu vawi khat mah ka la ziak loh avangin ziak lo thei ka ni lova, chhiartu ten hlawkna eng emaw tal inchhar ve ngei ka beisei..Ka nupui Lalremruati nena kan fa hmasa ber Peka pian hian Ka Pi chuan, “Hun rei tak fa lova in awm hnua tu ka hmu ve ta hi Pathian min pek liau liau a ni, a hmingah Vanlalpeka i sa ang” a ti a, a ni reng lah taka, kan inneih atanga kum 4 zet chu fa kan nei thei tlat lo a. Chuvang chuan mangan tawpah Pathian min pek a nih miau avangin Vanlalpeka tih hmang a lo pu ta a ni.

A chanchin tam sawi ka tum lo va, midangte angin chanchin ropui sawi tur dang a nei hek lo. Amah hi naupang danglam tak a ni reuh va, kum 6 mi a nih hian khawlbawm siam a ngen mauh mai a, a duh chhan pawh ka suangtuah ngai reng reng loh ama puala Bible neih ve a duh avangin a leina tur khawl a tum a ni. A nu leh pa te hi Pathian lamah kan inhmang em em lo va, ka fapa puala ka ro leisak hmasak ber tur chu Holly Bible a ni tih lam ka ngaihtuah ngai hek lo. Tin, Bible ama puala lei a tum ve mauh mai hi mak kan ti a, tu hnen atanga a hriat nge tih lahkan hre hek lo. Kum 6 mi lek, ziak leh chhiar pawh la thiam chiang mang hlei lovin heti ang thil a ngaihtuah mauh mai hi mihring thlirna atang chuan thil mak tih loh rual a ni lo.

Khawlbawm chu ka siam sak a, a duhdan pawh hi amak khawp a sin! Kan pawisa pek ang te hi a khawlbawmah chuan a khawl tel duh lo va, hei hi i Bible leinan va khawl rawh ka tih changte hian a duh ngai lo va, a thawh chhuah ngei a khawl a tum ve mauh mai a, mak hi kan ti thei khawp mai a. Ama pual Bible leina tur chu an sikul kal loh ni leh an ban hnute hian inhlawhin a khawl ve bek bek a, a pu te ho te, a ni te leh thenawm hote hi an fel em em a, a thiltum an lo hriatin an phur pui bawk a, a thawh theih tur ang chi- chhuat nawh, pheikhawk nawh fai leh sekrek khawih eng iloah an inhlawh tir thin a, nuam atiin nileng leng hian a inhlawh ve fo mai a ni. Mahse, thil mak ve deuh mai chu amah te hian rate hran hi a insiam ve a, a thawh phu tawk aia tam pek an tum chang hi chuan a la duh ngai miah lo va, nikhatah Rs. 10 aia tam hi a hlawh duh meuh lo.

Zan mut dawn hian a khum bulah a khawlbawm hi a hung ran a, coins awm te chu a thing ri raih raih a, a rih belh sawtem tih hriat tumin a chawi chhin vel a, chumi pahin chhun lama a inhlawh dan vel te chu hlim leh inchhuang takin minhrilh siam siam a, a daih dawn tawh ang em? Eng tia rei nge khawl la ngai ang tih te min zawt zan tin a, a thil tum nei tur chuan beih zel a tum tlat a ni. A nu leh pate pawhin kan hrilh leh zirtir ngai loh, apiin a hrilh angin a mut dawnaha tawngtai a, tichuan, tui takin a muhil sek sek thin. Tun hnuah hian Peka kha Pathianin ama kawng kan zawh theihna tura min zirtirtu tura a lo tirh tih leh Peka nuna zir tur kan ngah zia hi ka hre chhuak chauh a ni.

Ni khat chu chhun lamah damsam meuh lovin a inhlawh a, a lo haw chuan a nu nen kan lo lawm a, mahse, nidang angem em chuan a hlim vak lo niin kan hria a, a pang te kan chul sak a, a lo sa var mai reng a. A phur nan tiin a khawlbawm chu hawna Pawisa awm zat chu chhiar ka rawt a, a phur em em mai a, kan hawn laite chuan a nui sensen reng mai a, a hlim a ni. Pawisa chu kan han chhiar a, Bible leina a la daih tlat lo! A hnual raih a, a hlim hmelte chu a chuai zo va. “Apa, engzatin nge a la daih loh? Bible lei ka chak tawh a sin” a ti chuai raih a. A la daih lohna zat te hrilhin a daih tep tawh thute ka hrilh a, amahah chuan phurna pawh a lo lang chhuak ve leh thuai a. Ka pawisa pek belh a, leitir ka tum lahin a duh bik der si lo va, a intuak ve leh rih a ngai dawn a ni.

Sikul kal chunga inhlawh a nih ve miau avangin a inkhawl rei ve ang reng a, a vawikhat hlawh a lo tam bik lo bawk nen. Ni khat chu a pi leh pute nen huanah an kal a, serthlum lawha inhlawh ve leh turin an lo sawm a, nuamsam vak lo mahse ka chhut sak danin vawiinah Rs. 10 a hlawh chuan a Bible leina chu a daih tawh dawn a ni. Chuvanga nuamsam vak lo chung pawha inhlawh ve leh hram kha a ni a. Tin, huan kal hi nuam a tih em avangin nidangah pawh kan dang thei ngai meuh lo thin kha a ni a. Chumi tlai an lo haw chu a khua a lo sik haw hluah mai a, a mit meng pawh a sen-eng deuh ram a. A khawlbawm kan hawn leh laite chuan hlim luih a tum hle tih a mit mengah pawh a hriat theih a, pawisa zat chu kan han chhiar leh a, ama pual Bible leina tur chu a daih ta chiah mai le! Khami tuma Peka lawm hmel kha eng tawng hian nge hrilhfiah zo vang le? A zuang tawr tawr a, a nu nen chuan min kuah chung chung a. Kha kha Peka hlim hmel kan hmuh hnuhnun ber hun a ni dawn tih kan hre lawk bik si lo.

A natna chuan a ching chau ngang a ni ang a hlim rei lo kher mai! A khawsik a san avangin damdawi kan eitir thuai a, “Naktukah i dam ang a, i Bible tur kan lei dawn nia aw” katih pawh chuan a nui lui thei hram chauh a ni. Zan lamah chuan a khawsik chu a kaih tan ta mai a, hmanhmawh takin Damdawi In kan pan chung chung a, mahse, engkim a tlai zo ta si. A natna chu a lo na em a, Malaria PF rang berchi leh mitliam leh thinlian a inpawlh a, a bible lei ni tur atuk khawvar leh a Bible hmel hmu hman lovin Vanlalpeka min petu Pathian chuan ama ta a nih angin min lak sak leh ta a ni. Peka… Kan va ngai tak che em.

Peka nun hian thurochhiah tam tak min pe a, amah avang hian keini chhung chauh ni lo; kan thenawm hote nen hi chuan kan fate tana kan ro chhiah hmasa ber atan Bible kan lei sak vek tawh a ni. Ni e, kan fate hi Pathian min pek a ni a, a hmangaihtu hnena awmtir leh a chanchin bang lova hrilh hi keini an nu leh pate bat a ni. Tin, keimah ang hian, i hmangaih ber a laksak hunah chauh em ni Lalpa rawng i bawl dawn? Pathian rawngbawl tur hian i kut leh ke tih tliahsak hun i nghak kher dawn em ni? I neih hlu ber laksak kher ngai lo hian a rawngbawl turin a nghak reng che a sin.


Author : Jona Fanai Jr.

Aside | Posted on by | Tagged , | Leave a comment

MIZO-ISRAELI MI 102 TEN “RAM TIAM-HOLY LAND” AN THLENG LEH TA : LAWMIN AN AU, KUT AN BENG !

  • Israel hnambo nia inhria te an pem zel.
  • Mizoram leh Manipur atangin Israel an pan.
  • Mi 102 Israel ah an haw.
Thawhlehni leh Nilaithawhtanni hian Mizo-Israeli hnam mi 102 te chuan kum Zabi 27 (kum 2700) chhung zet an vahvaih hnuin, hmakhawsanga an pi pute hnena Jehova ram tiam “Holy Land” Israel ram an thleng tan leh ta. Ben Gurion International Airport ah hlim taka lo hmuah an ni. Heng Mizo-Israeli/Judate hi Bnei Menashe tia koh an ni a, hetianga Israel ram hruai thlen an ni leh ta hi an lawm hle. Tun tuma mi te hi Aizawl leh Churachandpur (Manipur) atanga kal te an ni a, “Israel Hnam Bo” (The Lost Tribes of Israel) zinga “Maneshe-a Thlah kal zel te” tih an ni.

Mizoram atanga kalte hi Bnei Mensahe tih an ni a, hetiangaan ram a kir lehna tura hmalakna hi Israel rama pawl pakhat, Israel Hnam Bo zawngtu-Shavei Israel te hmalakna a ni. Anni hian khawvel hmun hrang hranga Israeli hnambo te an zawng khawm thin a ni.

Tun tum hi kum 3 chhunga Mizoram leh Manipur (India) atanga Bnei Menashea ten Israel ram an kal lehna hmasa ber a ni.

Michael Freund, founder of Shaveli Israel chuan, “Kum zabi27 chhung zet an vahvaih hnuah Israeli hnam bo te chuan Israel an lo kir (coming home) hi a ropui a. India ram chhunga Bnei Menashea awmte chu tha taka an lo kir zel theih nan, theihtawpin hmalak zel a ni ang” a ti. Michael Freund hi tun hmaa PM Benjamin Netanyahu writer leh aide (tha chhangdaltu) niin, Jewish conservative tak a ni.

Bnei Menashea hi 3,000 zet chu Israel ramah hruai kir an lo ni tawh a, tunah 7,000 vel India ram (Mizoram leh Manipur)ah anla awm mek a; heng mite hi tha takin Israel ramah hruai kir tum an ni. Kuminah mi 700 hruai kir hman an tum.

Heng mite hi “Nazareth Illit” ah an hnam (community) puitezingah dah an ni ang.Kum tin Dec thla apiangin Bnei Menashea community te hian Hanukkah lawmin, Churachandpur-ah an inhmu khawm thin a ni.

“Operation China” tih lehkhabu chhah zet mai, Paul Hattaway ziak ka neihah chuan, China ram chhunga Hnamtin chitin awmte zir chiangin, an population zat leh culture leh sakhuate thlengin an chhui dip dep vek a; sumdawngmi Marco Polo ten China ram an han luh, kum zabi 15 chho vel khan China ram chhungah Juda thlah te hmu in, chungho chuan Judate chin thran zawng zawng chu an theihnghilh nual tawh a, mahse, an Sunagogue chhe te erawh an lo la vawng him a, chung hnam tlemte te chuan Khawthlang lamah Himalaya tlangram-leh phaizawl lam panin kum zabi 16-17 vel khan an kal darh ta a ni, tiin a ziak. Chungho chu “Mizo” inti hote hi kan lo ni mai thei ang em?


Author :

Aside | Posted on by | Tagged , , | Leave a comment

VALENTINE’S DAY THISEN PEK RUNPUIAH THISEN UNIT 900 VEL PE

  • Valentines day an hmang ropui
  • Thisen pek runpui an nei.
  • Valentine’s day puala thisen pek tan kum
Association for Voluntary Blood Donation (AVBD) chuan nimin khan Mizoram hmun hrang hrangah Mizoram State AIDS Control Society (MSACS) nen tanghoin Valentine’s Day pualin thisen pek rûnpui an buatsaih a; thisen unit 900 vel pek a ni.

Valentines’s Day puala thisen pek rûnpui hi Aizawlah chuan AVBD, MSACS leh Aizawl Civil Hospital-te nen tanghoin Mizo High School Hall-ah neih a ni a; Aizawl Municipal Corporation mayor PC Lalhmingthanga’n a hmanpui a. Pu PC Lalhmingthanga chuan thisen chu nunna a nih thu leh thisen pek chu nunna pekna a nih thu sawiin, “Thisen pek hi mi dang kan hmangaihna lantirna sang ber a ni ,” a ti a; AVBD-in Valentine’s Day puala thisen pek rûnpui an huaihawt leh thalai tam takin thisen an pe chu lawmawm a tih thu a sawi. Inkhawmah hian AVBD president PC Lalhmingthanga leh MSACS project director Dr Lalmalsawmi Sailo te pawhin thu an sawi.

Thisen pek rûnpuiah hian Aizawla Mizo HS Hall bikah chuan he thu buatsaih lai thleng hian thisen unit 428 pek a ni tawh a, mi 500 chuangin an pek beisei a ni.

Valentine’s Day Blood Donation hi host – TBC Zaithanpuia leh model Nunui ten an kaihruai a; co-host – Ruth CVL Muanpuii, Israel Lalbiakrema, Lalduhsaki leh NSS volunteer category-a national awardee Chawnghlunchhungi ten thisen petute hnenah rose an lo pe zel a ni.

Lungleiah chuan Lunglei Civil Hospital leh JB College-ah thisen pek hun buatsaih a ni a; Lunglei Civil Hospital-ah mipa 80 leh hmeichhia 42-te’n unit 122 pein, JB College-ah chuan mipa 35 leh hmeichhia 20-te’n unit 55 an pe.

Lawngtlaiah chuan District Hospital tan mipa 53 leh hmeichhia 19-te’n unit 72 an pe a; Kolasib District Hospital-ah mipa 42 leh hmeichhia 12-te’n unit 54 an pe bawk.

Kolasib ah chuan AVBD Kolasib Branch leh Kolasib Blood Bank tangkawp Kolasib Blood Bank-ah thisen pek a ni a, Blood Donation camp-ah hian Kolasib thalai ten thisen unit 54 an pe a, thisen petute zinga mi 42 chu mipa niin, hmeichhia 12 in an pe bawk.

Champhaiah chuan LCN Zokhawpui leh Champhai District Hispital Blood Bank-a thawktute huaihawtin neih a ni a. Blood For Valentines atan hian thupui atan Thisen pe la, thlan khura liam mai turte chhanhim rawh tih hman a ni. Champhai District Hospital Blood Bank-a dah turin mi 22 te’n thisen an pe a, thisen petute hi mipa 15 leh hmeichhia pasarih niin Unit 22 pek a ni.

MZP sub-headquarters, Hnahthial pawhin Valentine’s Day pualin Lalnu Ropuiliani Hall-ah blood donation camp an huaihawt a; mipa 79 leh hmeichhia 39-te’n Christian Hospital, Serkawn tan thisen unit 118 an pe a ni.

AVBD joint secretary Lalrinkima’n report a pek danin, Valentine’s Day puala thisen pek rûnpui buatsaih hi kum 2010-ah tih tan a ni a, kum 2014 atangin district dangahte pawh tih tan a ni bawk.


Author : Vanneihthanga Vanchhawng

15 Feb, 2017

Aside | Posted on by | Tagged , | Leave a comment

DICTATOR KIM JUNG-UN CHUAN A UNAUPA A THAH TIR LEH EM NI?

Nimin feb 13 ah Kuala Lumpur International Airport, Malaysia bulah Korean mi pakhat, North Korean Dictator Kim Jung Un a unaupa, pa hmun nu hrang Kim Jong-nam ni ngeia hriat chu hospital-ah a thi. Kim Jong-nam hi North Korean hmeichhe 2 chuan “hriau tur” hmangin an chiu hlum niin an sawi a, he thu hi South Korean Intelligence te chuan finfiah tumin an chhui mek. Korean hmeichhe 2 te hi Taxi hmangin an tlanbo nghal niin an sawi a, Malaysia Police ten an chhui mek. Putrajaya hospital-ah a thi an ti.

Sepang Dist police chief Abdul Aziz Ali chuan, thil awm danchhui chian mek a ni, tiin, Kim hming pu ngei chu hospital ah a thi, a ti.

Kim Jong-nam hi kum 1970 ah piangin an sawi a, Kim Jung Un a unau zinga upa ber niin, a pa Kim Jong-il khan a nu Sung Hae-rim chu South Korea apiang a neih niin, actress a ni a, kum 2002 khan Moscow ah a thi niin an sawi a, Kim Jung-un leh Kim Jung-nam te hi an inhmu ngailo tih a ni.

Kim Jong-nam chuan a unaupa rorelna chu “Khawvel ram dang a mite nuihtizatu” tiin a sawi a, he a thusawi hi Japanese tawng chanchinbu Tokyo Shinbum ah lo chhuakin, a thusawi tak chu Yoji Gomi lehkhabuah a lang a, chu chu Tokyo Shinbum hian a tarlang chhawng a ni. Tokyo hmuna Disneyland hmuh a duh vangin a rukin, fake passport hmangin Japan a lut a, man a lo ni tawh nghe nghe.

South Korean TV Chosun chuan he thil hi a puang uar hle a, mahse, finfiahna mumal tak erawh an la nei lo tih a ni.


Kim Jong-nam hi kum 15 zet China leh Macau ah a khawsa thin a, an thlah kal zel “Kim dynasty” chhawng 3 na in North Korea rama rorelna an chelh tul a ti lova, mahse, “Ka unaupa chuan theihtawp chhuahin North Korean hote ro a relsak ka duh a ni” a ti.

Aside | Posted on by | Tagged , , , | Leave a comment

Supreme Court in eiruk thubuaiah AIADMK general Secretary VK Sasikala chu thiamloh chantirin kum 4 chhung tang turin a rel

Supreme Court chuan AIADMK general Secretary VK Sasikala chu eiruk thubuaiah thiamloh chantirin kum 4 chhung tang turin a chung thu a rel. He eirukna thubuai ngaihtuah a nih chhung hian kum 19 a vei hman a, AIADMK hruaitu, tunhnai lawka thi ta, J. Jayalalitha pawh he thubuaiah hian a tel a. An sum lakluhna leh an thil neih inthlauh lutuk avanga an laka thubuai thehluh a nih hnuah VK Sasikala leh chhung hnai mi 2 chu Prevention of Corruption Act hnuaiah thiamloh chantir an ni ta a ni.

He thubuai ngaihtuahtu Justices PC Ghose leh AK Roy awmna bench chuan Bengaluru-a trial court hmaa inlan tur leh kum li tanina tang turin a hriattir nghal a ni. Hei bakah hian Sasikala hi kum 10 chhung inthlanna chuh thei lo tura hrem a ni a.

Nimin vek khan Sasikala-i lamtang MLA te chuan inhmuhkhawm hmanhmawh koin PWD minister Edappadi Palaniswamy chu Legislature Party hruaitu thar atan an thlang nghal a. Hetihlai hian O Paneerselvam leh hruaitu dang 18 te chu party member an nihna hlihsak an ni nghal bawk.

Pu Palaniswamy hian nimin khan Governor hmuin sawrkar a siam theih thu a hrilh a. He hunah hian hruaitu senior leh minister engemawzatin an tawiawm a ni.

Aside | Posted on by | Tagged , , , | Leave a comment

Indopui Ropui Chu

  • Sairawkherh indona
  • Khelmuala indona rapthlak
  • Motor intlansiak turu
  • Petrol thami

SAIRAWKHERH INDOPUI-I NA : HLIAMPUI KA TUAR (Ka Chal a pawng!!!)

Nimin leka piang mah ni ila, țhialpawn de zawt zawt leh dulhmul khat phuar a chaw han ei tak zelah chuan ‘panlai nun’ sawitur pawh kan lo nei ve ta reng mai.

La naupang viau e tilo chuan Khuangleng khaw kilkhawr a piang leh seilian tih takah sephung laih, inburchhe vawm, vaivut chen, tuihawk khuah etc. pawh kan tawng ve hman vek a nia. Kan nau leh chhawng te chuan an hre ve tawh kher nang (ve khanglang a’n a!) Khawnge tun țum chu naupanlai indopui kan hlui ve leh thawr teh ang che u.

Khawi(khuai)-tlang (kan khaw hualtu tlang a ni a. Tlang panga(5) in dawt zui mai, hmuhnawm tham tak a ni. Sawi in a fiah zo lo; A ropui leh mawina te! A hmun ngei a rawn en chi! I inchhir lovang tih ka tiam a che.) phen ațang zingnichhuak chu a rawn dak du du a. Ka u te pahnih leh kan țhiante chu dan pangaite in kan RV, kan kawmchhak thingpui huanah chuan kan thu pawr leh far hlawm a. Leivung leh bawngek tharlam a awmloh avangin thawhtur kan van ang reng khawp mai. Thawhtur neilo e tilo chuan kan thawm erawh ‘Brus li kha awm se chuan ual tret sentar(WTC) su tu thlawhna kha a ‘khik’ tla hman hrim hrim’ tih bawr velin a chiah hneh kher mai thung a. Chil per sawk sawk a inhnial chungin kan ri teng tung mai.

Kan rik nak naklai chuan ka u chuan rawtna țha eltiang, i he lo a ‘yaasss’ nghal tur a rawn chhawpchhuak ta rup mai le! ‘Sairawkherhin kan indo anga, a mu atan vaimim ni rawh se’ tih thu mai te hi. Tihtur sawi ngailo vin kan hmanrua lam khawm tur chuan kan țil sang sang hlawm a.Keini unau thum pawh chu kan indona mual tur kan kawmchhakah chuan kan sairawkherh perh dik leh dik loh test’chhin’ in kan buai hle a. Mitthla ah misualho in min rawn perh a lo inbum dan tur suangtuah rauh rauh chung aka sairawkherh, lung nen ka pawhfan vang vang kan thlah chiah chu a ri fawk mai le! A enga’mah hma in ka pawlpa tur, ka u tukhum chu vahmim tui tia lawng in a pawng phawt! Umm…tha dawn e, perh dik cha-chaih dawn khawpe. Mahse, pawlte perhfuh chu a dan a dang zar mai. A bul țan nan Indopui țan hma in ka chunnu lungliani sakhming lam in ka țap ta bai bai a. Țhiante an rawn thleng kim ta, pawl leh țan hmun kan siamfel a, Sairawkherh Indopui-I na chu tan a ni zui ta nghal a.

Kanu mimpui chi tur ka ruk chhuah fang lian lel-lawl chu ka kerkawr khup leh mawngpawp lehlam ve ve khat țan chuan thlamuanpui tham lawih in ka ak puar lang mai a. Pa hmeipa ar vulh kham khawp lawih chu a ni ngei ang le. Indopui țan a ni tawh, bengchhen thiang a ni tawhlo. Bruce lee in hmun a changpha tawh heklo. Thawm a reh tlawk tlawk, thlamuang a țhut mai mai chi erawh a ni mawlhlo thung.

Thingpui buk karah chuan țanhmun ka khuar nghet sauh sauh a. Nghah rei a ngailo kher mai. Silaimu (vaimim) chuan ka bihrukna thingpui hnah chu a deng țil ta chur chur mai le. Ar huantla te pawh hlau dawk-daw-lak a tlanphe dawr dawr chungin kan silaimu chu an chuk pah zel bawk a. A va han ralmuanglo tehreng em! ‘ai-ah, ka la hai’ tih leh țap thawm in a zui nghal zat bawk a. Misual lalpa ber mai chu ka tawmbuk kal pel a ka pawlte veh a uluk fahran a kun dan dan lai tak mai chuan a mawngtam ah tak mai ka perh ri ta pawp mai. Chheiraw…a hnungah a pawlten an rawn zui chu ni in. Chak mangkheng a inchhung a tlan luh a ngai tlat. Kawngkhar ka khar fel chiah tih ah chuan silaimu chuan kawngkhar a rawn deng zui nghal tluar tluar bawk a.

Hlau leh thaw dep dep a inchhung a ka tawmhnu chuan thawm pawh aziawm leh ta deuh. Kawngkate a putchhuakin inhnuai kawm lam ațang chuan ralpui hmanchhawn tur chuan commando takin kan che chhuak leh ta țhem țhem mai le. Rilru ava han pasalțha tehreng em!

Inhnuai kawm ah chuan ka bawk vak phei zal zal a. Rilru ah changtupa mal tlat lai a rawn lang leh ta. Ka chet zel dan tur mitthla chung chuan ka bazooka (Sairawkherh) chuka hum nghet sauh sauh bawk a. Kawtchhuah, indopui tual zawl ka thleng țep tih ah chuan misual lalpa, a mawngtam a ka perh hliam ngei mai khan min lo chang ru khiau chu niin! Chheiraw, Vaimim pi-ha-beuh fang hrawl zet nen chuan minlo hmachhawn ran mai le! Ka suangtuahna ram ațang chuan ka harh chhuak zawk, tihtur ka hailo kher mai. Ka mitthla lawk pawh khan awmzia a nei tawhlo. Let leh tum a ka in siamrem lai tak chuan ka chaldar a trek chhuaiii…ka pheichheh a diklo zui nghal. Inhnuai kawmkar lehzual ah chuan ka thumthla zui nghal awk mai a.

Ka pawlte an rawn thleng zui ve nghal, misual lalpa pawn rei a daih ta biklo, a tlawm thu chu a auchhuahpui ta thuai a. Mahse maw, a tlai lua a ni e, a nihtur ang ang chu a thlengfel dim diam tawh. Ka chal chu arla tui tia lawng in a pawng ve ta lawl mai. A țumhnihna atan ka chunnu lungliani hming lam in ka țap leh ta bai bai a. A changtupa ber ka țah tak miau si ah chuan SAIRAWKHERH INDOPUI-Ina pawh chu tiamchim awm lovin a tawp zui ve nghal bawk a.

Chal pawng sen tur sa ut ut chung chuan țhiante nen kan hliam tawrh chu kan in ensak tliar tliar hlawm a. INDOPUI-IIna hmachhawntur kan ni tlat, tumah kan hliam avang a duapzul thiang a ni lo, ai te chhin na lek a la ni.

SAIRAWKHERH INDOPUI-II-NA (ka beng a kiu…)
Khatia INDOPUI-I NA a vawihnih zet mai ka țah tak si ah kha chuan II-na ah erawh chuan chet bonra ka tum ta riap riap khawp mai a. Ka chalpawng min siamsaktu lehlam pawl hotupa chu ka suangtuahna chuan ava han keuh phar kual nasa tehreng em! Suangtuahna ram a silaimu leng nuaih nuaih kara in daibin (dive) zek zek pah a misualpa ka lo suasam lai mek chuan INDOPUI-II NA chu țan a lo hun leh dawn ta reng mai le! Mahse…A rual u deuhte tihloh, zâ-hnih hnuailam ho chuan kan phur tawhlo a ni tih sawikher ngai lovin kan hmelah a hmuh theih vek: Nakinah chuan changtupa vek tur kan la ni tho. Kid ațanga ban kan hlauh avangin peihlo takin kan tho ta țaih țaih hlawm a. Kan silaimu kha vaimim fang a ni na vang vang a, a perh a vual duh em atin ni!

Tuman kan sawisel ngam silo. Mahse, ka thianpa Mapuia, țawngfiah tha manglo, thu laktlak chhakchhuak khat tak mai hian “Kei chu vaimim chu a pelh (perh) a na em mai ka peih tawhlo. Lum (hlum) mang tawh ang u”, a rawn ti chhuak ta hloh mai! A hmel chhawrdawh thleh thluahte chu ka va’n hmu mam ta puak si em! Silaimu saihlum sawk (la) tur chuan ram lam kan pan ta dam dam a.

Bellei hlum, Lalruanga ek rawng ‘hring nghelh nghulh’ ngat mai chu hlamzuih kuang tia lawngin kan hum haw ta far hlawm a.Indopui țan a ni zui leh nghal der tawh, bengchhen thiang a ni tawhlo. Ar note chiap, arpui ‘țuk țuk’ thawm leh kawmthlangnu naupang vin thawm bak thawm dang hriat tur a awm ta lo. Mahse, thla zawng a muang chuang mawlh silo. Ka bihrukna chehrual phenah chuan ka bellei hlum hrual mum, ka silaimu chu sairawkherh phan ah chuan ka hmet thlan dup tawh. Thawm rapthlak lo chhuah ve leh a kahchhuah nghal theih turin ka inring ran mai le.

Thawm a awm, Mapuia a ni! Mangang tlanchhe thawm a ni. Chutah, chak mangkhengin ramhuai sipid hian ka bihrukna chu a rawn tlanpel phei fua. A hnungah lehlam pawl hotupa, ka hmelma chuan sairawkherh kuai fân fan fan chungin a rawn umzui ve bawk. Vanneihthlak takin a hlum pai chu a thlauh hloh mai! Chhar leh tuma a hawilet zawk chhung chuan Mapuia chu hlate khua a thleng tawh ang chu tih nak-a-laiin sahimna zawng a a tlanchhiatna lam a dik ta lo. Bawng ek tharlam hring kawi hlarh mai ah chuan tukhum sawh, ke-van vawr suau in a tlu ta suah mai le! A silipar khing chu a leng nghal lawp bawk a. Misualpa silaimu rawn thlawk phei chuan a hnarah tak a rawn deng ta siah mai. A ke, mawng, hnungzang leh tukhum a bawng ek tharlam kaipherh nuaih chung leh saihlum a hnarkaw pahnih hnawh tut chung chuan a thochhuak ta taih taih a.

Changtupa chet a hun ta. Tun țum chu a tukhum tinzawninka hmelma pa, ka chalpawng min khilai tu ngei mai chu ka bazooka chuan kan perh ta pawp mai le! A tukhum pawngah tak mai chuan saihlum chu a bet ta thlawp mai. Mahse, hlimlaini hi ava’n reilo lua em! ‘iiiiii…’ tihpah in min rawn umlet ve leh ta. A hlum thlauh chhar pahin a rawn ving phei ta vet vet mai a. Rang mangkhengin ka tlanchhe ve ta thung. Ka lehhawi ta kher kher kha a pawi ta ber chu a ni. ‘Leilehna a kut nghat hnunglam en chu. Ka mi ni tlak ani lo ve’, tihziak a nih tak kha maw… Ka hawilet chiah mai chu ka beng a rawn ri nghal țhuai. A kiu nghal vawng vawng bawk. Ka mittui a hnam nghal sawk bawk a. Ka pawlte an rawn lang ve ta. Kan misuala chu an rawn perh rawn ta hrep mai. Sairawkherh theihnghilh țhakin a kawh phei ta ving ving a. Mahse, engkim a nih tur ang a ni vek tawh.

Kan hawikuala, Mapuia chuan a silipar khing hrui dawk chu chil hnawm chat chat chung hian a lo siam mek a. A hnarkaw chhung hlum tang hmawlhte a alo kher chhuak melh melh leh a hnung lampang tluanthla, a tukhum leh hnungzang a bawng ek hring tharlam kai berh nian chuan ka beng kiu nen ka hnuk a ti ulh ta tlat pek anih kha. Mahse, a țah phei zawng ka țap ta bik em lo ve.

Keipawh chu ka eng teh ual biklo khawp. Ka bengkaw chhungah chuan bellei hlum hring pherh, dûm-uih rim nam rum rum kheuh fai pah chuan Mapuia awmna lam chu ka pan phei ta hnak hnak a.

Chutia midang an indo mup mup lai a keini țhian dun in urhsun zet maia hnarkua leh bengkawm kan lo kawm ta mawlh mawlh chu ar huantla leh vawk te meuh pawn mak ti ni awm fahran hian min sir thlir tak hruk hruk kha mawle…Chhun chaw ei a hun tak avangin mahni inlam țheuh pan inkan haw leh ta hlawm a.

INDOPUI III-NA, football, Ch-Sing nen ngei mai, ‘INRUMNUAI LEAQUE’ khel turin rilru peihfel at a ngai leh dawn a ni.

INDOPUI_III-NA: (Rum_nuai league)
Sairawkherh hmanga vaimim leh hlum a Indopui kan beih zawr hnap hnu chuan losul haw hun a lo ni dawn hnai ta reng mai. Kei leh țhianpa Mapuia phei chu thlan rim thang, chirhdiak berh kai lei luai leh bawng ek rim nam rum rum nen chunnu lunglian kan hmachhawn dawn chu a nia leh! Hmabak chakawm zawk zawk chu a ni mawlh lo. ‘Nu enge minlo hawn?’ tiin lawm takin kan pan hnai ang lawm lawm a. Hnungzawng ben rik thlawrh pah in, ‘Chheban, i va han bal em em ve!’ min han ti zui zat a. Hmuah man hi a awmlo țhin teh e.

Zanriah eikham chuan ro ropui rel turin kan bûkte ah kan țhu leh far tawh a. Sairawkherh indopui erawh kan sim tlang ani ange. Inkhelh, Indopui III na tur, ‘RUMNUAI LEAGUE’ hmachhawn tur ‘SUPAR FUTBOL CLUB’ chu a rawn piangchhuak chawpchilh leh nghal ta rup mai le!

A tuk zing dar 4 ah CH-SING nen kan țhianpa hand pump nei te in lam pan in kan tlan ri ta khep khep mai le. Kahpuk a balloon hampuar tum ang vel a ni. Pump puar kan tumna lam ah exer lak hranpa ngai tawhlo in kan thlan zawr hnap phawt a! Rei tawkfang kan beih hnu chuan nuthlawi awmbawr ang vel chuan kan pump ruh ve thei ta hram a. Ball in lung a dum zan lo. Chutah ro ropui tak leh bawk, ‘Minister ball dil’ chu a rawn irh chhuak leh ta phawng mai le!

Remchang takin bialtu MLA (sawilo mai ang) in kan khaw thenawm football tournament a hawng zo hlim rawn let lehni a lo ni leh zel a. Kan captain Pa in ball dilna min ziah sak a. Captain in hming an sign ve thlap bawk a. Zanriah eikham ah beisei phakloh ‘BALL’ chu kan dawng ve ta nawlh mai! A zan a zan in thla eng hnuai ah field ah kan zu pet ta ang lawp lawp anih kha!

A tuk chu vengchhak team nen kan innuai hun tur chu a ni chhunzawm ve leh nghal mai a. Mahni in lam hawi țheuh ah tiin kan in mangțha leh ta tliar tliar phawt a.

Chutichuan inkhelh țan a ni ta: Substitute ah ka awm a ngai tlat, inkhelh hma in pawr sa-teh mah ila, hetiang nikhua hi chuan inthiar fihlim mai hi a finthlak ber fo ‘ve țhin tho’ ania hahaha. Offside phar tu ka ni bawk a. Kan tumpui te captain chu rilru țhansan kan tih ang chi, kai tak ve deuh mai hi a ni a. Bualfai tum in tui in han leih ta ila sephung leih ang mai in a thang huk huk ang tih ang chi vun dumtle nei hi a ni roh pek a. A pa vaihlo chil pheikhawk (nylon pheikhawk var-ung) ngei nen mai hian a rawn thawk chhuak zui leh ta nghal a! Hmmm…zuam ang ngawt chu an ni lo ang.

An țan ta! ‘Bat ah pe rawh, ke chhip pawp ta che’ tih vel chu țawngri kan hriat theih chhun chu a ni ta mai. Chutah le, kan captain chuan ke chhip in lehlam pawl te goal ah chuan an pet ta pawp mai. An goalie chuan a lo safe ‘GOAL’ ta hloh mai le! Keini lam lawmin kan au. Lehlam goalie erawh ‘ka safe goal chiah chiah a nih kha, enge min hnek kher. Papa ka hrilh dawn’ ti chungin, paw phing pheng chung chuan a țap haw ta bai bai a. A mittui hrukna lai erawh a hriat kilh kelh teh e.

Kan midum hang a chu a tharum nuai țan tlat tawh. Fin kherek chhuah a ngai tlat. Kan ‘firi hamtu’ chu inkhelh a ngai ta si a, kei chu ‘firi hamtu’ ka ni chawpchilh zui leh nghal zat bawk a.

Ball rawn phei zel chu kan miduma chuan kan lamah a um phei, ‘awpsait awpsait (offside)’ an tih tak nuaih nuaih ah chuan a ni hmiang tiin kan ham ri ve ta ngawt pek a! Kan miduma chu rawn tlanphei in ‘In lam a nih vang in țan suh aw, awpsait bawklo ka hnek palh ang che’ tih pahin min tin uaih uaih a. Mikado kawm eng ațanga kan siamchawp ngei mai chuan ‘yellow card’ chu kan pe ve zan a. Miduma lung a dam thei mawlhlo. Kuttum min hmuh pahin ‘Banah ka hnek dawn tho tho che’ ala ti hram pek a!

Firi hamtu ber in ham țha ngam tawh hek suh. Chawp leh chilhin ka pum a’n na zui nghal zat a. Chutah kan lamah chuan a goal ve ta nge nge a.

Hmeichhe inkhel ang deuh an ni țan tlat. Ball awmna apiangah an tlan khawm ang dul dul a, a khu rum rum bawk a, pakhat a țah loh leh rawn bai chhuak aih aih chu an awm indawt zut reng a. Hun tawp a hnai, penalty an pet ngei dawn a a lan hnu ah miduma bawk chuan ball chang leh in kan goal veng, țhianpa Mapuia nen an in hmachhawn ta ran mai le. A khu rum rum, a ri pawp pawp a. A khu a reh meuh chuan Mapuia chuan ngal pawr fup chung leh mit nuai chat chat, hnang al al chung chuan a ‘safe goal ve leh ta hram a’. Hun chu a tawp chhunzawm ta a.

Kan inchawi cheng nga note vuai trêt a ka lo hum thlan dap tawh chu phur fahranlo hian midumpa chu ka hlan ta a. Ding leh vei ah ințhen in kan țin darh ta a. Chutah, kawi kan liam dawn chiah an rawn au rual leh kher. Chaklo thinrimin a tuarlo. ‘Pa Duma saw, a ngo ang e bualfai rawh u. Meihawl tui in’ tiin kan han chhawn ve zat bawk a. A rawn dum phei nul nul a, kan țil hak a, mahni in lam pan in kan tlan haw ta nal nal hlawm a. Chawtlang lian tawk teh hmarcha leh saum bawl phawn keng in tui cheng turin khaw hmawr dil lam kan pan leh ta a. Chawhma lam thil thleng in rilru a luah leh tawh meuhlo.

INDOPUI IV-NA: Chem vai
Panlai nun ruamah thilmak, hlimawm, lungngaihthlak leh țahna tam tak tawng indawt zut țhin mah ila a lo ngaihawm ber mai țhin tehzawng a nih hi. Khatiang lungngaihna leh changtupa ber in țahna te kha han tawng țhin mah ila, panlai nun chen erawh kan sim thei chuang der lo nia.Rome hunlai nunphungin min chiah hneh tlang bawk a ni ta ve ang, Robin Hood thawnthu bu tlem a zawng kan lo chhiar ve nil nial ațang te a lakkhawm leh phuahchawp tlem belh in kan kawmchhak thingpui huanah kan in vai lehmiah miah mi dawn chu ania. Mahse…Chu kan tihtur tihlawhtling tur chuan a hmasaber in hmanrua leh thuam famkim awmphaw, hmaiphaw, ngalphaw, ban bun leh ngunhnam kan neih phawt a ngai. Awmphaw leh a dang phaw tur chu awlsam tê in kan hmu thei mai. Ka pa te sikula sem tur ‘biskut’ School time parcel bawm a in tiang ur chuan a tuar deuh dawn a ni mai.

Inah kan tlanlut sang sang a, sap hla phuahchawp nen a riat ‘chika be fe’ nawk nawk chungin chhang bawm chu kan țhiat miah miah a. Parcel bawm kan ruak mai nilo vin, chhang pack ho chu chhuat ah kan paih darh-sarh nuaih bawk a. Kan in chuh a kan in nek velna lamah țhianpa Zoa tlu in ala delh keh nuaih zui leh nghal! Phaw chikim siamna tur hmanrua chu nei tawh mah ila kan hlawh tur tlailam Chûnnu ang buan buan+hnugzang ben!

Kan parcel ruk chuan kan mamawh phaw chi hrang hrang chu rubber nen țangkawpin kan han siam zung zung a. Kan siam mek lai chuan kan ti ti ațang ringawt pawhin chem vai thiam tak, in dai-bin chunga bahlah miahlo va vai char char thei tur awm a mawi vek mai zuk ni hlawm a mawle. Tunah chuan ngunhnam chauh a ni kan mamawh tak ni. Chupawh a hma tlai a Ka pa in huan a hungna mau phel pawh dawk leh a ngai ang chu. Huiz… Ruk khawm hlirin kan inthuam a, kan rilru erawh a Sherwood forest rûih tho mai. Arpui no hruai lai lawmah a tla, an luhna tur kua kan siamsak thleh thluah avangin. Duh leh lut in thaidarh vel mai mai teh se, keini ho pawh hi kan hlim ve chiang em!

Bazooka leh AK-47 mitthla chunga indona mual ni țhin kha Robin Hood leh Hood lo a te ho in in mal beihna mual rapthlakah kan chantir leh der tawh. A hma ang bawkin kei changtupa leh remhre thei pa hian kan phaw te hian engtin teh vak mah min chhanhim dawnlo a ni tih ka hriat chian em avangin thingpui buk bawk chu țanhmun atan ka thlang leh a. Ahma a in dai-bin chunga chem vai fua fua ho kha a țap ring ring an ni ta reng a, ka va han che fuh ve tawh dawn chiang em. Thingkung a țan khawh te hlei hlei a nia che chhia chu ni. Țhianpa Mapuia bawk kha lawm che chhe leh pek a. Tai-taw kungah alo lawn chu niin! Mawng-phaw a lo siam tel silo va, hnuailam ațangin hmelma lam ho chuan an han hawlh rawn ta tak tak mai a le… Mapuia ka ațang chuan nui, țap, tlawm thawm, a…engkim ri a chhuak ri nawk nawk a ni ber mai.

Khawngaih a chhan lam lam chu ka-ha, ka tawmkuk ațang chuan kan nui ta pek anih kha. Chet țhat kan tum tehreng vei nen khan maw… A pawi zo leh ta vek mai!

A sir ațanga Mapuia chhan tuma rawn veh phei ka u chuan thingpui buk kar a lo nui kur kur chu hmelma lam emaw tiin a ngunhnam a rawn vilik hnan ta mai reng a. Ka dem lemlo ve. Kei lah ang hui a lo awm ka ni bawk nen, ka kamsir thler hawk in a rawh vit ta siah mai le! Thih der leh thi lem chhuah hranpa a ngailo, thisen a dir, mittui a dir, chilthli nen lam, kamsir a thler duai mai bawksi. Mahse, țah kha ava han nuam cher cher tehreng si em!

A tu a te mai pawh khan min duat in min ngaihsak vek mai si. Mapuia pawh mawng tuai vat vat chungin a sirah alo dak ve hau bawk. A țhenin ekin tui an lo zu suak, ka min han țhuah tir thul. Phak-bak tak meuh meuhin asin ka țah ni. Min awi munlo chauh a ni ber e. Changtupa hi mi awhawm nilo vin mi awmmawh mai ka ni e.

Chutih lai mek chuan in motor lem thawm a rawn rik leh tak avangin ka ngaihbel nge ni dawn ni, ka țap ri te chu a vuleh hlerh hlerh tawh ni ber in ka hria.

INDOPUI V-NA (Driver ropui Zoa)
Sairawkherh perh thiam ropui ațangin ball pet thiamah, knights turu lutuk ah kan han țang leh bawk a. Tunah erawh driver rothap lah khalh thiam rual țhah kan ni leh der tawh mai…In motor lem nikhua hi chuan Zoa hi kan awt țhin teh asin. A hmuipawrh hi a hmang țangkai thiam țhin khawp a, chilper sur sur khawp a a’n vu hlerh hlerh tawh hi chuan kan sir en ha mai țhin a nia.

Changtupa a ka samurai a min vih thler hawk na pawh rei la nilo mah se, in motor lem kan phur tlang bawk a, kudam a motor ke chhia in tiang er ur chu kan lir chhuak sap sap a. A petrol chu vaivut: Motor ke tyre chhungah vaivut kan daha, han nawr lirh zawng khan a khu chhuak ta țhin a. Reiloteah petrol zuar tur, thingpui dawr neitu tur, mechanic, passenger tur leh a dang dang ni tur chanvo kan insemfel thuai a. Driver rorum leh rothap tak tak te ho chu kan in tlanpel leh ta fua fua mai. Vaivut chu hmun tinah awm mahsela petrol-vaivut zuartu hnen ami lo chu thun thiang a nilo bur! Eng ang a hmun hla ah pawh kan petrol-vaivut khu kha zo ta pawh nise kan awmna hmun hmunah khan kan motor (tyre chhia) kha hnutchhiahin ke in kan tlan let ngar ngar mai țhin. Petrol zawrhna hmun kan va thleng ta cheng a, mi in pangpar khawi na’n leh tawlailir ke atan kan motor kha min lo zai chhiatsak hman ang tih hlau reng renga hmanhmawhin kan awm a. Kan motor hman tum khalhtu khan zu an lo in khawmuang ve leh ta nghal ah…! Khaini bur chhia in, ekin tui lehnghal. In motor lemna mual ațanga ban a, haw daih mai a chakawm țhin teh asin.

Silcharah brick phur tur a kal ka ni a. Vanduaithlak tak in Aizawl thlen hma in ka petrol a zo ta tlat mai. Vaivut khu a tawp tlat tawh, motor a chesawn thei tawh tlat lo. Kawngsir rem laiah ka dah a, petrol lei turin kan kawmchhak lam panin hmanhmawh takin ka tlanlet leh nal nal a.Thingpui dawr ah ka’n chawl khawmuang te te a, lehkhabu hlui ațang pawisa lem siam ngei mai khan ka thil ei man ka pe a. A piah lawk chu petrol zawrhna a ni a, rakzu zawrhna a ni pahfawm bawk a. Ka va thleng a, motor panga lai mai chu alo ding țhup a. Mahse, a tu amah kar chhuah theih an nilo, khaini burchhia rakzu an lo la khiat laklawh tlat. Rilru a hmanhmawh tawh si, ka motor dahna lah a hla rem rem mai bawk si. Ava han manganthlak tehreng em.

A tawp a tawpah chuan a hmui kan awh rawn em em mai, a vu thiam ber Zoa chu ka kar chhuak thei ta hram a. Mechanic in motor ala check leh a ngai tlat. Thing țang kak eng eng emaw hi a wrench a ni mai a, tyre sir vel kha an hawlh nawk nawk a, ala mu leh ta nghal. Rei tawkfang a check hnu chuan Zoa chuan a khaini bur chhin dawm lai chu an tlak pap a, kan tlanchhuak thei ve ta hram a. Petrol pawh chu sarangah kan thun a, ka keng phei ta mai tho a. Ka motor petrol zo thunbelh tur chuan in tir-a-mei-kai chungin kan inzui chhuak ta a.A khalhtu tlan bawk, a chuang a tlan bawk. Chutah le, driver rakzu in kha a rawn thawk țan dawn ta. Driver ber rui miau hek i, kawngchhak leh kawngthlangah kan tlan tawn sek reng a. A chang leh kan han accident leh lailawk thul. Kan accident miau avangin kan motor pawh a tluk ve zel a ngai a. Motor tlukna ah chuan petrol-vaivut a baw phei ve zel bawk a. Driver kha rui eng ang pawh niin ninawm khawp accident țhin pawh nise a tum ram a thlen hma chuan motor kha a nawr lir dawn a ni tawp mai ni. A țul a nih chuan tuikawrah pawh ka mu lawp lawp mai ta lawng.Vawi tam kan accident hnu pawh chuan driver vu thiam chungchuang Zoa meuh pawh chu a harh thei bawk silo. Chutah le, hmeithai thinchhe kawlh zet mai te in zawn kan thlen chuan a vawi tam tak na atan kan accident leh ta tlat mai. Tun țum chu accident satliah kan ni ta hauhlo mai. Motor vu ri chu Zoa hmuipawrh ațanga chhuak a ni a, a motor erawh chuan vanduaithlak lehzualin hmeithaii in chu a zu deng ta dawt mai le. Arpui no hruai lai țuk rik tuarh rual deuh thaw in hmunphiah nen a um kan ni ta… Zoa kha a lo rui awzawng lo mai. Motor petrol zo lam in hmun a chang tawhlo, paw phing pheng in, lulam leh mawnglam pawh hreleklo in ramhuai sipid in kan han ving phei ta a nih kha. Motor nawr lir chunga tlan ai te chuan chak fia fia tak hi kan ni ringawt mai ni. Ngaihdam dil paha motor ke hmuh let tak kha ania huphurhawm chu ni!

Changtupa ber bawk mai ka cheh fuh leh tak loh miau avangin ro dang rel angai leh tlat. Chawhma lam chauh a la ni bawk a, Keifang lo tura chhuah kan rel leh ta a..

Those memories will never die.
Miss You Fellas.
Dedicated to Big Bro, Dingdong
“You shall dwell in the house of the Lord forever.


Author : Samuel Sammy Tuallawt

Aside | Posted on by | Tagged , , | Leave a comment

KUM 2016 CHHUNGIN KUM 2015 AIA 63 % A TAM RUIHHLO, KG NUAI 3.89 MAN A NI.

  • India ramah ruihhlo a hluar
  • Kum 2016 ah ruihhlo man hnem
  • 2016 a ruihhlo man zat
  • 2016 a india ruihhlo halral zat
Kum hmasa nena khaikhina nasa tak, za zela 63 zetin kum 2016 chhunga dan lova ruihhlo tawlhruk a sang.

Central anti-narcotic agencies report in a tarlandanin kum 2015 chhung khan ruihhlo 2,37,973 kg zet man a ni a, hetihlai hian nikum (2016) chhung khan 3,89,742 kg man a ni a, 1,51,769 kg zetin a pung a a, hei hi za zela 63.77 a ni. Hei hian dan lova ruihhlo tawlhruk hi nasa takin a pung a ni tih a lantir a ni.

Punjab state ah chuan ruihhlo hi rampum chawkbuaitu pakhat a ni a, Assembly inthlanpuia eptu pawl te nen, ruihhlo laka an state a fihlim theihna atana thutiam an neih hlawhtlinna a lang a, kum 2014 leh 2016 inkarah khan ruihhlo man zat a tlahniam nasa hle.

Kum 2014 chhung khan ruihhlo (ganja, hashish, heroin leh poppy vai leh kuang) 77,433 kg man a ni a, kum 2015 khan nasa takin a tlahniam a, ruihhlo 38,040 kg man a ni.

Hetihlai hian nikum chhung khan ruihhlo, 29,689 kg man a ni a, kum 2014 aii 44,744 kg dawnin a tlahniam niin official data chuan a tarlang.Centre in a chhut danin kum 2014 leh 2016 inkar khan thuneituten ruihhlo ruihhlo 3,48,933 kg an tichhia a, heng ruihhlo te hi court thupek an hmuh hnu-ah Drug Disposal Committee ten an tiral thin a ni.

Heng ruihhlo zingah hian: acetic anhydride, cocaine, ganja,ephedrine and pseudoephedrine, hashish, heroin, morphine, methaqualone, opium, opium liquid bakah damdawi atana hman tur atana siam leh poppy vai leh kuang te a tel bawk.

Ramchhunga dan lova ruihhlo tawlhruk do tur hian sorkar laipui chuan heti lama thu pawimawh te inhrilh tawna thawkho turin khawvel ram hrang hrang leh sorkar agencies te leh sipai lam thlenga thawhhona kawng tam tak a ruahman a ni.

Record-a a lan danin kum 2016 chhuang khan ram pumah ruihhlo 3,89,742 kg man a ni a, 2,69,453 kg zet tihchhiat a ni bawk.


Author :

Aside | Posted on by | Tagged , | Leave a comment