A FAPA RUALBANLO IN SSLC EXAM A BEIH THEIH NA’N KUM 3 CHHUNG KM 3 A HLA PAW CHUNGIN A HRUAI ȚHIN- A FAPA IN TI BEIDAWNGLO.

POSTED by Joseph Lr Kop Chhangte On 21 June 2016

Thingtlangpa, rethei bakberh tak Beera Gouda-a chuan a fapa Dinesh-a chu pianphungah ruanbanlo mahse zirna lamah erawh rual a pawl theih na’n theihtawp chhuah-a beiin kum 3 chhung a hnunga pua-in sikulah a hruai ngat ngat mai țhin a, a fapa Dinesh-a chuan atana a pa thlantuiluang chu a thlawna luan ral tir lovin kumin pawl 12 exam-ah(SSLC) khan 93.75% score in distinction-ah a inhlangkai ta rup mai a ni.

Dinesh-a hi a taksa 90% tawp mai a zeng a, mahni insaseng theilo leh kal theilo niin cycle takngial-ah pawh a țhut nghet theih loh avangin a pa zirna lama rualawh tina tak chuan km 3 a hla a zirna sikulah chuan a hnunga paw chungin ke ngatin a kalpui ngat ngat mai țhin a ni.

An chhungkua hi Kumtataluk huamchhunga thingtlang khaw te takte, khaw hnufual tak Harkade hmunah an khawsa a, Beera Gouda-a hi lo lam hnathawka eizawng niin ‘coolie'(puakphur) angin a inhlawhfa țhin bawk a ni. An chhungkaw khawsak chu harsa hle-in an chaw ei khawp ngawr ngawr thawkchhuak mahse zirna lama rualawh tina tak mi a ni a, a fapa pakhat, Dinesh-a u pawhin Kumta hmunah college kalin BA a zir mek nghe nghe a ni.

Beera-a chuan tihian sawiin “Dinesh-a hi a tihrawl a țhatloh avangin a taksa tih chetvel a harsat hle a. A pianchhuah hlimin a ke a ti che theilo tih kan hrechhuak a. A hmalam hun chu thim hle a ka hriat avangin amah ka ngaihtuah apiangin lungchhiaiin ka țap țhin. Kan rethei a,mahse kan harsa chung chung pawhin zirna țha a dawng tur a ni, tih chu ka thu rolum a ni ta a ni” a ti.

Sawi zawmin, “Harsatna namen lovin min bawhbuaina karah, kan khua-a Kannada medium primary school-ah chuan kan in admit ve ta hlawl a. Paw chungin nitin an sikul km 1 vela thui-ah chuan thlah țhinin, an banah ka hruai haw leh ziah țhin a. A hnuah kan khaw țhenawm Divagi khua-a DJVS High School-ah kan suan leh a, km 3 vela hla niin tah chuan ka hruai leh ta ngat ngat țhin a ni.

Thirsakawr(bicycle) ah a țhut theih loh avangin ka paw/pawm mai zel a ni. Dinesh-a a țhanlen chhung hian harsatna ka tawk nasa hle a, a bik takin fur, ruahtui tlak tam laiin ka tawk nasa lehzual. Mahse, a man chu engzat fakau a tam pawh pek ngai se lehkhathiam nih tir chu ka tum ruh tlat a, ama(Dinesh) thawhrimna leh tumruhna nasa tak chuan kan hma-a harsatna zawng zawng chu minsut tlang tir ta a ni” a ti.

Dinesh-a chuan a hlawhtlinna chhan chu a nu leh pa leh an zirtirtute inpekna avang liau liau anih thu sawiin, “Ka nu leh pa leh kan zirtirtu te’n ka taksa ruanban lohna avangin min en hniam phah ngailo. Țhahnemngai taka zir turin min fuih a, ka mamawh kawng engkimah min pui țhin a ni. Ka tana ka pa inpekna leh harsatna kaltlang hi ka hria a, ka taksa chawikang chungin kan in ațanga km 3a hla kan sikulah min kalpui ngat ngat țhin. Kum 3 chhung min hruai a, vawikhat pawh a phunnawi ngai lo. Ka pa tumruhna hian nasa takin min fuih a, chu chuan exam pawh chona(challenge) nasa tak nen min hmachhawn tir ta a ni” a ti.

Dinesh-a hi a taksa 90% zet zeng mahse lehkha ziak leh chhiar erawh puih lovin a ti thei a, mahse a college kalna tur hi bus-a pan vang vang ngai Kumta hmunah daih a nih avangin a tan kal ngaihna a awm dawn lova, a pa Beera-a chuan ‘correspondence’ in, an in lum ațangin a zirna chu a chhunzawm mai dawn niin a sawi.

Aside | Posted on by | Tagged , , , , | Leave a comment

ITALY HNEHTU IRELAND ROUND OF 16 LUT TA

POSTED by Vanneihthanga Vanchhawng On 23 June 2016

Ireland chuan Robbie Brady goal khat hmangin Italy an hneh a, round of 16 an lut. Pierre-Mauroy stadium a inkhelah Ireland hian chak an phu zawk kan ti ngam awm e, Ireland hian Round of 16-ah France an hmachhawn dawn ta a ni.

Group E inkhel dangah Belgium chuan Radja Nainngolan goal khat hmangin Sweden an hneh ve bawk. Zlatan Ibrahimovic chuan Sweden tana a game hnuhnungber a khel ta a, kum 34 a upa Zlatan hian Sweden a chakpui zo lo a ni. Zlatan thlahna inkhelah hian Chelsea forward EdenHazard chu Man of the Match atana thlan a ni.

Stade des Lumières-ah Hungary leh Portugal-te chu 3-3 inan inhnehtawk, Group F match hnuhnung berah hian Portugal hi an chak lo a nih chuan an tla dawn, mahse Ronaldo chuan Portugal tan goal hnih a khung a, last 16 an lut ve ta a ni.

Ronaldo a che ropui hle a, European Championship vawi 4-ah (2004, 2008, 2012 leh 2016) goal a la khung vek a, hetiang ti thei awmchhun a ni. Tin, Euro game khel hnem ber niin game 17 a khel tling ta a, Portugal tana goal khung hnem ber a ni bawk.

Group F match pakhat zawkah Iceland chuan 2-1 in Austria an hneh a, Hungary chu 5 points neiin Group winner an ni a, Iceland chuan dawtin, point 3 hlawhchhuak Portugal chu pathumna zinga ti thaah telin, Last 16 an lut ve ta bawk a, Croatia nen an inhmachhawn dawn a ni.

Group F match pakhat zawkah Iceland chuan 2-1 in Austria an hneh a, Jon Dadi Boedvarsson chuan 18 mins-ah Iceland hma a hruaipui a, he goal hi Alessandro Schoepf chuan second half tan tirah a rul.1-1 in an inhnehtawk tawh mai dawn nia a lan laiin 90 mins-ah Arnor Ingvi Traustason chuan Iceland chakna goal a khung a, last 16 an inpet kai ve ta a, ram tereuhte ni siin, chanchin ngaihnawm tak Euro 2016-ah an rawn siamchho mek zel a, last 16-ah Iceland hian England an hmachhawn dawn a ni.

Aside | Posted on by | Tagged , , | Leave a comment

Middle East Boruak : ISRAEL-IN PALESTINIAN HOTE DAN BEH ZEL A TUM : SHEKELS MAKTADUAI 7O SENG ANG

POSTED by Ct Lalrinawma On 20 June 2016

Israeli right-wing cabinet meeting, PM Benjamin Netanyahu hova neih chuan West Bank hmuna Israeli pemte dahna leh enkawlna (settlement) turin, an ram pawisa-shekels maktaduai 70 senna tur a pawm ta.

Meeting tantirah PM Netanyahu chuan, “Hetianga West Bank a inbenbelna tur hian hun lo kal tur atan security tha, sumdawnna tenau leh khualzin mite hipna a siam phah dawn a ni” a ti.

Haaretz chanchinbu chuan West Bank a sum sen tur zawng zawng hi US$ maktaduai 88 zettling tur angin a ziak.Tun hnaiah Palestinian hoten hmeichhe thah, mi inringlo lai chemte a vih thut, silaia mi kah leh car hmanga mi sut hlum chu nikum Oct atangin an ching thar a ni.

West Bank hi Palestinian chen tamna ram niin, Israel te chuan chu hmunah chuan inbenbelna- settlements siam a tum a, US, EU leh international community chuan nasa taka sawiselin, tilo turin a ngen a ni.Palestinian Authority Gen. Secy Saeb Eraket chuan,”Israelte thiltih dan hi international law bawhchhiatna a nia; international community chu an hmaiah an beng sawk tihna a ni.

Israel hian Palestinian ram lo piang tur chu a theih ang ang tihthuanawpa awmze nei lova chhuah an tum reng a ni” tiin, Israeli Cabinet rorel dan chu a sawisel a ni.

Aside | Posted on by | Tagged , , | Leave a comment

HMEICHHIA DUH ZAWK AN TAM ZEL, TRUMP-A CHU ECONOMY-AH A THAT ZAWK AN RING

POSTED by Saihmingliana Sailo On 22nd June 2016

CNN /ORC poll hi tihchhuah a ni deuh reng a, nimina tihchhuah thar berah chuan Trump-a chu economy lam khawih tura tha zawka ringtu 51% an awm a, Clinton-i chuan 43% a hmu thung. Trump-an economic proposals aruahman dan chuan mite rin a hlawhtir a, a vawrh san phah hle. Mahse, kawng hrang hrangah a hmaa poll tihchhuah hovah te Clinton-i a sang zawk deuh zel a, WhiteHouse luah turin Clinton-i duhtu 47% an awm a, Trump-a duhtu 42% an ni thung.

Clinton-i hi president ni ta se 47% chuan beiseina sang tak an nei a, 46% in an hlau thawng a, 39% chuan ngaihdan an nei lo va, 35% te chuan an ngai ropui hle dawn tih an sawi a, 29% te chuan an hlim dawn hle niin an sawi bawk.

Trump-a hi president ni ta se, 56% te chuan an hlauhthawnthu an sawi a, 56% ten ngaihdan an nei lo va, 44% ten beiseina nasa tak an nei thung a, 24% in an ngai ropui hle dawn a, 27% te chuan an hlim hle tur thu an sawi bawk.(Poll chhangtute hi mi engzat nge an nih tarlan a ni lo va, tihian a khat tawkin poll hi democrat party leh republican party voters zingah an nei deuh reng a ni)

Aside | Posted on by | Tagged , , , , | Leave a comment

LIRTHEI LIFE TIME TAX TIH TAWP A NI A, KUM 5 DANAH CHHIAH PEK TAWH TUR

REPOST On

  • Vehicle lifetime tax titawp
  • Saiha district hming thlak.

June 13 khan Chief Minister Pu Lal Thanhawla hovin Council of Ministers chu Chief Secretary’s Conference Room, New Secretariat-ah an thukhawm a.Council of minister thutkhawmah hian Mizoram Motor Vehicles(Taxation) Act.1996 tihdanglam chu an pawm a, dan siamthatah hian life time tax tihtawp a ni a, lirthei neituten kum 5 atan zel chhiah an pe tawh ang.

An thu ngaihtuah zingah
@ Social Welfare Department hnuaia ICDS Scheme, Mission Mode a kalpuia hemi hnuaia a ruangam her rem (restructuring ) leh a thuam chak (strengthening)nan a, hna (post) 57 siam leh hnawhkhah rawtna;
@ Animal Husbandry leh Veterinary Department hnuaia Contract Assistant Engineer (Mechanic) hna dah ngheh (regularization) rawtna;
@ “The Mizoram Water Supplies (Control) (Amendment) Rules, 2011” tih danglam belh rawtna;
@ Champhai, Kolasib, Serchhip leh Mamit District atan District Urban Development Officer post 4 siam rawtna;
@ The Mizoram Motor Vehicles (Taxation) Act, 1996 (5 of 1996) tih danglam rawtna leh Saiha District hming, Siaha District tia thlakna tur rawtna te chu an sawiho hnuin an pawm a.

Sialkal Range Development Council siamrem (reorganization) rawtna erawh sum indaihlohna avangin thutlukna engmah an siam lo a ni.

Aside | Posted on by | Tagged , , | Leave a comment

TENNIS WORLD NO. 682 THLA THUM CHHUNG HREMNA PEK A NI :

Chilean Andrea Koch-Benvenuto,kum 31- a upa, world no.682 chu infiammi khawsak phung nilo lutuka a khawsak avangin professional tennis tournament atangin thla thum chhung hrem a ni.

Andrea hi Sao Jose Dos Campos, Brazil ah ITF Women’s tournament ah Perez Rojas nen intumlaiin a khup hliam enkawl tura tih a ni a, mahse hei hi Andrea hian duh loin court ah a mobile phone a hmang a, Chair Umpire in titawp tura a hrilh pawn a zawm duh lo a, hei bakah hian official te leh a tumpuite lakah tawngkam hawihhawm lo tak² a chhakchhuak bawk a ni.

Hei mai hi ala nilo, court a chhuahsan hnuah Supervisor office ah kalin an result chu inhnukdawk (retirement) angarecord turin a hrilh a, mahse hei hi Supervisor hian alo pawmsak duh lo a, a thinrimin Supervisor mobile phone a vawmchhiatsak bawk a ni.

Heng a khawsak dan avang hian thla 3- hremna pek anih bakah mobile phone a tihchhiat man $199 chawi tura tih a ni a, thilsual a tih avangin $500 chawi tura tih a ni bawk.

Aside | Posted on by | Tagged , | Leave a comment

MIZORAMAH CEMENT BRAND PARIAT TE AN THA TAWK, BSI STANDARD AN KHUM VEK

font color=”#d00″>POSTED by
Vanneihthanga Vanchhawng on 19th June 2016

Legal Metrology-in Mizorama hralh chhuah Cement brand pariat an test tawhte a quality a tha tawk a, BIS-in cement tehna a siam standard an khum vek.

Nimin khan Sub-Committee on Quality Control of Cement and Iron Rod chuan Mizorama Cement leh Iron Rod hralhchhuah quality test chungchang leh thenawm state te nena Cement man inthlauh dan sawihovin Committee Chairman Pu Franklin Laltinkhuma FCS&CA Secretary pisaah an thukhawm a. He thukhawmah hian Cement Quality control chungchang sawi a ni a, Legal Metrology lamin Cement brand pariat an test tawh atangin a quality a that tawk thu sawi a ni a. India ram puma cement chak zawng tehfung siamtu Bureau of India Standards (BIS)-in cement tehna a siam (standard) an khum vek a ni.

Mipuiin man tlawm zawka cement leh iron-rod quality thaan lei theih nan leh, Sorkar pawhin heng atanga chhiah a hmuh tur zat dik tak a hmuh theih nana hmalak dan tur sawiho a ni a. Silchar leh Aizawla Cement hralhchhuahna man inthlauhna chhan chu C&F Agent ten Dealer-te an pekna rate a inanloh vang anih thu sawi a ni a. Hei hian mipui leh dealer-te tan harsatna a thlen avangin sutkian dan tur ngaihtuaha company/ supplier-te nen meeting neih leh rel a ni.

Iron Rod zuartute leh an bukna hmarua te hi Sorkarin a phut ang zela regular taka endik a nih thin thu tarlan a ni bawk.

Aside | Posted on by | Tagged , , | Leave a comment

NI ZUNG CHAKNA HMANG THLAWHNA KHAWVEL HEL CHHUAKA THLAWH TUMIN THLAWK CHHUAK

POSTED by
Saihmingliana Sailo on 20th June 2016

Ni zung chakna hmang thlawhna ‘Solar Impulse 2’ an tih chu khawvel hel chhuahpui turin Swiss adventurer, Bertrand Piccard chuan JFK airport, New York atangin a thlawhchhuahpui leh ta a, Atlantic tuipui chungah thlawk chhuakin Seville airport, Spain-ah a tum ang. Atlantic tuipui thlawh kan chhung hi chawl lovin darkar 90 chhung a ni dawn a ni.

Hetia khawvel hel chhuahpui tura a thlawh chhuah tanna hi mikum March thla kha a ni a, UAE khawpui Abu Dhabiatanga thlawk chhuakin, Oman, Myanmar, China leh Japan ram te a lo thlawh khum vek tawh a, nikum July thla khan Borschberg chuan amahin darkar 118 chhung hmangin Pacific tuipui a lo hel chhuahpui tawh a, hei hi chawl lova ni zung chakna hmang thlawhna thlawh reipui ber record a ni ta a ni.

Solar Impulse 2 hian solar cell 17,000 a hmang a, chhun lam nisaa battery a charge chu zan lama thlawh chhunzawm zel nan a hman theih a, 55 -100km/h a chakin a thlawk thei a ni. Feet 28,000 a sangah a thlawk thei a, zan lamah chuan a battery renchem nan a thlawk hniam thin a ni.

Aside | Posted on by | Tagged , , | Leave a comment

SOUTH CHINA SEA-AH SILAI A PUAK TA : CHINESE SANGHA MANTU A HLIAM

POSTED by
Ct Lalrinawma on 20th June 2016

Nimin June 19 ah South China Sea tuipui-Indonesia ramin kan ram tia an hauh Natuna Island-ah Chinese sangha mantute um bo nan Indonesian Navy ten silai an hmet puak chiam a, China sorkar “chuan hliam pakhat awmin Hainan province ah enkawl tura lak a ni,” a ti. Indonesia erawh chuan, “China flags tar lawngte um kian nan silai kan hmet puak a, hliam an awm thu hriat a ni lo,” a ti thung.

Natuna Island hi China chuan a ram hauh chinah a puang a; Indonesia lahin kan ram an ti bawk si. Chinese Foreign Ministry thupuangtu Hua Chunying chuan, Indonesia chu fimkhur turin leh hma thar la lo turin a hrilh a, Beijing chuan official takin Jakarta hnenah insawifiahna a phut. Indonesia Navy ten lawng an hren sak tih an sawi lo.

Kuminah ringawt Indonesia hauh chin South China Sea tuipuiah hetiang thil thleng tha lo, a awm vawi 3na a ni. March thla khan Borneo khawtlang tuipui kamah Chinese sangha mantute nen an intithiamlo tawh a; a hnuah Chinese Naval lawngte an hmu a; Indonesia chu China lakah a lungawilo hle a ni.

Kum 2010 leh 2013 ah pawh Indonsesia tuipui hauh chinah Chinese Navy lawngte hmuh niin an sawi a, khatih laia Indonesia President Susi chuan China ram nen boruak thalo neih duh lohna vangin ngawih an lo chuh tawh a ni.

Aside | Posted on by | Tagged , , , , | Leave a comment

RAJASTHAN AH KUM 82 A UPA PUTAR PAKHAT CLASS 10 VAWI TAM TAK PASS TUMA LO EXAM TAWH CHU THLA HMASA KHAN A VAWI 47 NAN A FAIL LEH.

POSTED by
Victor Mabiaka Ct on 20th June 2016

JAIPUR: Shiv Charan kum 82 a upa in vawi tam tak class 10 pass tumin a lo exam tawh a, nimah sela thla hmasa khan Rajasthan board’s class 10th exam result tih chhuah ah khan avawi 47th exam na ah ala hlawh tling ta chuang lo.

Tun class 10th result chhuak ah khan subject tin ah a fail vek a, țhen khat ah phei chuan 0 mark hmuhna te pawh anei hial bawk a ni.–

-A kum a upat tawh em avang hian a mit te a țha tawhlo hle a, a bengte a țhat tawh loh mai bak ah kal te a harsat tawh a, nimahse heti chunga beidawng hauh lo leh phur tak hian class 10th hi pass tum hian ala bei țang2 reng a ni.

Nungdama he khawvela ka la awm chhung chuan class 10th hi ka la exam zel ang tiin vawin Monday khan IANS te chu a hrilh bawk a ni.
Shiv Charan hian kum 1969 khan Class 10th hi a hmasa ber atan a lo exam țan a ni.

Aside | Posted on by | Tagged , , | Leave a comment