ETIHAD STADIUM-AH CITY AN TLAWM

Manchester City 1-2 Lyon
Man : Bernardo Silva 67′
Lyo: Cornet 26′, Fekir 43′

Nizana Champions League group match khelhah Premier League champion lai Manchester City chuan Europe huap inelnaa an chetchhiat chhunzawmin Etihad Stadium-ah French club Lyon hneh lovin 2-1 in an tlawm.

Inkhel tan atanga minute 26-naah Nabil Fekir-a cross ball Fabian Delph-a dnachah theih loh hmangin Maxwel Cornet chuan an goal hmasa zawk a thun a, chawlhlawk hma lawkin Fernandinho ball hlauh hmang tangkaiin Lyon captain Fekir chuan chuan 25 yards zeta hla atangin an goal hnihna hi a thun a ni.

Player an neih that avanga champion tura rinkai Manchester City an tho chhuak thei lo va, second half-ah Bernardo Silva chuan Leroy Sane ball pek hmang tangkaia goal thunin City beiseina siam mahse French club an tangkhawng tluan a, tun season-a a vawikhat na’n City hi an tlawm ta a ni.

Premier League-a team hlauhawm Manchester City hi English club zinga Champions League a a zawna vawi 4 tlawm hmasa ber niin season liam ta khan Round of 16 second leg-ah FC Basel an hneh loh hnuah quarter-final ah a zawnin Liverpool an hneh lo va, tunah Lyon hneh lovin a vawi li na’n an tlawm ta a ni.

Season liam ta Champions League quarter-final a Liverpool an hneh loh tuma a chet mawi loh avanga hrem mek City manager Guardiola chuan a team te tlawm lai hi mual sir atangin a thlir a, Assistant coach Mikel Arteta chuan a ho a ni.

City tan French defender Aymeric Laporte chuan uiawm taka hlahin Ilkay Gundogan-a vawrhluh chu a tauh goal thei lo va, Gabriel Jesus leh Sergio Aguero te pet tha tak chu Lyon goalkeeper Anthony Lopes chuan a dansak bawk a ni.

City hian nikum khan quarter-final thleng mahse Liverpool lakah tlawm zawnin an tla a, semi-final piah lam an la thleng pha ngai lo a ni.

Mancheter City hi English club zinga Champions League-a, mahni muala vawi 3 tlawm zawn pahnihna niin annni hma hian Tottenham chu a zawnin vawi thum ngawt an mualah an lo tlawm tawh a ni.

French club hin tunhnaiah English club an ngam a, English leilunga an ;enluh hnuhnung vawi 9-ah vawi 4 hnehna changin vawi 2 an tlawm a, tunhma vwi 27 an lenluha hnehna an chan zat hnehna an chang tawh.

City tan December 2016 a 3-1 Chelsea an hneh loh hnua Etihad Stadium-a goal 2 a an hnufum leh hmasak ber a ni.

Credit : #ZoFooty

Aside | Posted on by | Leave a comment

Nadal-a Asia lam kal thei dawn lo

World number one Rafael Nadal chuan thla thara khelh tur China Open leh Shanghai Masters -te chu a khup na dam chho mek avangin a khel thei dawn lo.

Nadal hi US Open khelh zawh takah khan semi-final an khelh laiin a khup na avang hian a inkhel zo thei lo va, a chawl kha a ni a. Hemi hnu hian Spain tan pawh Davis Cup a khel thei lo va. Spain hian Davis Cup-ah hian France an hneh ta lo nghe nghe a ni.

Kum 32-a upa Nadal hi Grand Slam-ah vawi 17 champion tawhin a khup hi a na fo tawh a. Tuna a khup na hi kumin October thla tawp lamah chuan damin a inkhelh leh theih tawh beisei a ni.

Nadal chuan, “Ka khup na ninawmzia hi chu thil thar pawh a ni tawh lo va. Ka medical leh technical team-te nen Asian tour lam hi tel loh mai ni se, chumi chhung chuan ka khup na hi lo awm dampui hman tum ni se kan ti ta a ni,” tiin Twitter-ah a post.

China Open hi October ni 1 aṭanga khelh ṭan tur a ni a, Shanghai Masters hi October ni 7 aṭanga khelh ṭan tur niin, heng tournament-te hi Asia khawmual-puia ATP Tour lian leh pawimawh ber ber an ni.

Aside | Posted on by | Leave a comment

MID DAY MEAL SOCIAL AUDIT GRAM SABHA 2018-19 LUNGLEI AH NEIH A NI

Vawiin khan State Institute of Rural Development & Panchayati Raj, Mizoram Leh Mid Day Meal Cell, Lunglei District te thawhhona in Sub Hqrs. YMA Lunglei Conference Hall ah Mid Day Meal Social Audit Gram Sabha 2018-19 Lunglei District tan neih ani.

Gram Sabha inkhawm hi Pu Micky Lalenkawla, DPC, SSA Mission, Lunglei in kaihruaiin Pu K.T. Pakhuangte, Dy.Director, SIRD&PR, Aizawl chuan Mid Day Meal inkaihruaina leh pek dan tur te sawiin, school naupang zawng zawngin health card nei tura tan lak a nghaih thu a sawi a, faina leh thianghlimna kawnga tan la theuh tur in zirtirtu te a chah. September ni 10th-20th 2018 chhungin Lunglei District chhunga school hrang hrang ten Mid Day Meal pekdan leh dawn dan te enfiahna te neiin, school a inthiarna tha, kutsilna, Chaw tha leh chawhmeh naupangte an pek dan dinhmun te sawiin, MDM endikna a fello lai te leh siamthat ngai te a sawi bawk.

Pu Micky Lalenkawla, DPC, SSA chuan lunglei District a Mid Day Meal an dawn dan leh kalpui dan sawiin, hmasawnna tur leh hmalak a ngaihna lai te a sawi bawk.

Gram Sabha hmanna ah hian Lunglei District chhunga school 20 atangin Head Masater, MDM teacher incharge, SMC Chairman, VC leh Parent Teacher Association te telin zawhna leh chhanna hun hman ani bawk.

DIPR

Aside | Posted on by | Leave a comment

NATIONAL AIDS CONTROL ORGANISATION (NACO) HOTUTEN LUNGLEI AN TLAWH

Chawlhkar khat chhung Mizoram District pathum – Aizawl, Lunglei leh Kolasib District-te tlawh kual tura rawn zin National AIDS Control Organisation (NACO) hotute chuan nimin chawhnu khan Lunglei DC Conference Hall-ah official-te, HIV lama thawktute, khawtlang hruaitute leh tlawmngai pawl aiawhte inkawmhona hun an hmanpui. HIV/AIDS chungchanga Mizoram, a bik takin Lunglei District dinhmun te sawiho niin HIV/AIDS donaa hmalak zel dan tur an sawiho.

Meeting kaihruaitu Lunglei DC Dr Ankita Chakravarty, IAS chuan Mizoram chu HIV/AIDS hluarna ber State a ni chu pawi a tih thu sawiin HIV/AIDS dona kawngah mitinten mawhphurna kan nei theuh a ni, a ti a. HIV/AIDS dona kawngah sawrkar emaw tlawmngai pawl emaw chauha innghah a hun tawh lova, mipui zawng zawngte tanrual a hun tawh takzet a ni tiin mipuite a zau thei ang bera HIV/AIDS laka inven dan leh inenkawldan chungchangte hrilhhriat an nih zel theihna turin Lunglei District mipuite thawhho puiah a sawm.

Dr Pradeep Kumar, Programme Officer (Surveillance), NACO chuan ‘HIV Epidemic in Mizoram: An Overview’ tih thupui hmangin kalkhawmte zirtirna a pe a. India ram puma HIV hluar dan (prevalence) report ‘HIV Estimations 2017’ Technical Report ah puitling (15-49 yrs) ah Mizoram (prevalence – 2.04) chu HIV hluarna ber State a ni a. Mizoram dawtah hian Manipur (prevalence – 1.43) chu pahnihna niin Nagaland (prevalence – 1.15) chu pathumna a ni. ‘HIV Estimations 2017’ ah hian HIV hluarna ber State kan nih bakah Mizoram chu HIV kai thar (New Infections Rate) tamna ber State kan ni mek bawk. Lunglei District-ah pawh HIV hrik kai thar hmuhchhuah belh zel niin 2014-15 ah mi 76, 2015-16 ah mi 81, 2016-17 ah mi 90, 2017-18 ah mi 108, 2018-19 (August thleng) mi 108 te hmuhchhuah tawh an ni a. Heng zinga a tam berte chu mipat hmeichiatna leh drugs inchiu atanga HIV hrik kai an ni. Mizoram State AIDS Control Society (MSACS) chhinchhiah danin, Mizorama HIV hrik pai hmuh chhuah ṭan aṭanga August 2018 thleng khan Mizoram pumah HIV hrik pâi 18,007 hmuh chhuah an ni tawh a.

Dr Bhawani Singh, Deputy Director, NACO chuan India rama HIV/AIDS prevalence a tlakhniam tawh mek laia Mizoramin san lam a pan mek zel thu sawiin HIV darh nasa zel veng turin NACO-in theitawp a chhuah zel tur thu a sawi a. Chawlhkar khat chhunga Mizorama an tlawh kulana report chu Sawrkar Laipui Ministry of Health and Family Welfare (H&FW) ah an thehluh thuai tur thu sawiin HIV/AIDS dona chu ngawrh tak leh chak zawka kalpui zel a nih tur thu a tarlang bawk.

Inkawmhona ah hian Lunglei DC, Additional DC, IPRO leh SDPO te bakah H&FW Department a CMO, SMO, Medical Superintendent, District AIDS Control Officer, Blood Bank Officer, ICTC Incharge, ART Incharge, OST Incharge, STI Incharge te, ICTC Christian Hospital Serkawn, Joint VC Chairman, YMA Sub Hqrs President, MHIP Sub Hqrs President, Chiarman WADA, Grace Society, District Project Manager, NHM te an tel a ni.

DIPR

Aside | Posted on by | Leave a comment

DONALD TRUMP : PATHIAN RUAT ANI EM?! By Ricky L. Colney

Kan thu sawi tum hi digest-lo deuh deuh mi engemaw zat an awm leh ngei dawn a,mahse ka phuahchawp nilo, Donald Trump a USA President atan thlantlin anih hma daih a, Pathian thuhril/rawngbawl tu etc..ten an lo sawilawk leh an hmuh lawk te tun thlenga Evidence hmuh tur la awm thlap nisi tlem azawng kan sawi mai dawn ani.

Zawlnei/Pathian thu hril KIM CLEMENT : Kim Clement a hi Pathian rawngbawl tu Ropui, Zawlnei anga an sawi ber ani a..rawng a bawl na ah hian Pathian atanga a thil hmuh te a hun rawn thlen hma daihin a sawi chhuak thin ani.USA inthlanpui 2016 ani a, khami hma daih tawh khan a rawngbawl na,Mipui tamtak hma ah febuary 22th.2014 khan tihian Pathian hnen atanga a thil hmuh a sawi chhuak ani.” USA leh Israel tan Huan ah ka tawngtai lai ani a,chutih lai tak chuan thlarau a rawn kal a,ka hawi let a, ka thil hmuh chuan min thawng hle mai a, Mumang mai anilo VISION-ani tih ka hria ani.Ka hnung ah chuan mipui tamtak an awm ve a,an zinga mi chu Pathian chuan kan Ram hruaitu tur in a dah hrang tih ka hmu a,tichuan tinge he thil hi hriattir ka nih hma em em? thil thleng hnai deuh te min hmuh tir zawk awm tak ania tiin ka sawi a,Pathian thlarau chuan He pa hi mi tlawm tak ani a, mahse mi Fing(Genius) ani.Tichuan Rangkachak ka hre leh a, Pathian thlan tur a hming leh rangkachak chu a in kaihhnawih em ni ang tih ka hrebik lo ani.Mahse Pathian chuan he Ram hausak na hi ka siamtha leh dawn ani, angai angin ka siam hausa leh dawn a ti a, a mi thlan a chu mipui tamtak zingah a awm avangin a hmel ka hmu chiang thei lo a, Pathian chuan he pa hian Israel leh Khawthlang te hmelma chu a thunun dawn ani” a ti a, Election lo awm turah hian he ram Politician te tam tak chungah thil zahthlak em em a thleng dawn a, Inthlan lo awm turah hian Democrats chu sawi nghing ani dawn a,Republican lam pawh an awm a nuam chuang lo ang.Lalpa chuan tinge hetia a tih mai? Ani chuan heng Party 2 te thlenchin/thil tih ah hian ka Lungawi lo ani” ati a,tichuan Ram pakhat min hmuhtir leh a, America ah Indo na thar thlen tir an chak huam huam a, Impeach rawh Impeach rawh tiin an au a,mahse an Impeach lovang.He ram hi a hun a thleng thut dawn ani,mahse President Obama a rorel hun lai chuan a thleng lovang.Mi thar a rawn lan hunah a thleng dawn a,DAVIDA tan ka sel lawk ang ngei khan he ram tan hian ani pawh ka ruat lawk ani.Tawngtai mi ani ang,mi tawngtam tak ani lovang,Impeach Impeach tiin an au ang,mahse chutiang reng a thleng lovang.Chupa chu in zingah khan ka dah ani” a sawi zel a, “he hming leh tawng Rangkachak tih hi lo chhinchhiah rawh u” ati a,(Donald Trump a hi Rangkachak lawm tak leh a Symbol ang hrim ah pawh RANGKACHAK an hmang hial ani tih hre tel zuai ang.US ah hian Gold leh Donald Trump chu thil pakhat ang hrim a sawi ani fo ani.)

Pathian chuan “he mi duhlo a hnar tute chuan Milian te a tuk dawl dan an hmuh in MAK an ti ang.Ram in a bat(Debt) techu a rawn hneh zel ang..ani chuan Lung ho te mai chu a la anga,akut in a hum anga a keng/chawi sang anga, mi te chuan an nuih ang.Mahse a thil tum/Plan chu a ropui in a tha dawn lutuk a Keimah ngeiin ka pek ani dawn ani.Ka mi chawisan tur chu a tawngtai thin ang, a hmelma te chuan dawithiam White House ah a awm theih nen theih tawp an chhuah dawn si a,Tun atang chuan White House ah hlemhlet na Corruption a awm tawh lovang tiin Thlarau chuan a sawi ani” ati.2015 pawh khan Kim a bawk hian tihian a sawi leh a, 2017 ah awm ang maiin ka in hria a, chumi hun ah chuan thil engkim mai hi a buai nasa hle anga, mipui te chu an thil Plan- a hlawhchham avangin an ngaihtuah na a buai dawn ani..mi chak tak pakhat USA ah chuan a rawn ding anga,ani chuan kan ram hnawk kan thian fai tawh ang a rawn ti ang..Sorkar thar ah chuan Remna leh Muanna ka hmu ani” a ti bawk. Pathian chuan “Kami te chu Chhanna nghak in an trap chhuak a,tichuan Nunna Thlarau chuan hei hi Ka thusawi duh chu ani ati. He ram hi Puan in ka khuh a,chu chu keima tih ngei ani.Hun engemaw chhung atan ka Mi ten an ngaihtuah a, an rinna te alo pun theih nan. Thim zingah Rinna hi a pung thin si a, harsatna karah Rinna hi a thang thin ani.Keima tih ani.Tunah erawh ka thinrim na chu a zo ta.Min ngaithla rawh u, tunah chuan ka thinlung pu mi ka hmu ta,ani chu in zingah khan a awm ani.United States President atan hian Unau zing ami ka thlang chhuak ani ” a ti.
Awle sawi tur a la tam mai,kan sawi vek senglo, Kim Clement a hian a hming hmerh in TRUMP -tih hi a sawi bawk a..2007 daih tawh khan “TRUMP will become Trumpet” tiin a sawi a,Pathian hming a lam thin anga, a Tawngtai thin ang..Mi buluk tak(Hot Blood) ani ang a,amaherawhchu Thlarau thianghlim in a chenchilh tlat ang” tiin alo sawi lawk ani.Tin USA chu chumi hun ah chuan OIL ah a hnianghnar em em anga, Middle East te a mamawh tawh bik lovang..tiin a sawi bawk a, thla hmasa lawk khan kan hriat mai mai atan USA chu khawvel a OIL ngah ber leh Produce tam ber a puan anni.Sawi zel tur ala tam khop mai a,mahse Midang tamtak Donald Trump a President anih tur thu leh thil lo thleng tur sawi lawk an awm ve tho a, chutiang zing a pakhat Sadhu Sundar Sevaraj an 2016 a alo hrilh lawk dan sawi leh lawk ang.

“Thawk leh khat ah Thlarau chuan min rawn nangchin a,tichuan ka thlarau chu Council hma ah ding in ka hmu a,an zingah chuan Abraham a pawh ka hmu ani,a kiangah chuan keimah chu ka ding ve a, kan Pindan ah chuan Donald Trump a pawh alo ding ve reng mai tih ka hmuh chuan mak tih na in ka khat a, tichuan he thu hi hriattir kani ta ani..Trump a hi President ani dawn a, mi harsa tak ni mahse he mi atan hian amah hi ka ruahman ani. Lal Cyrus a chu Israel fate discipline tu atan ka hmang a, a hnu ah Israel tungding leh tu atan ka hman ang chiah khan TRUMP a pawh US ah hetiang hian ka Hmang dawn ani.” tiin HINDU ni thin Piangthar ta,Pathian rawngbawltu Sadhu Sevaraj a chuan 2016 khan alo sawi lawk ani.

Retired FireFighter Mark Taylor an 2011 a alo sawi lawk tawh thil te, Chinese Scientist pakhat in Donald Trump a chu Pathian mi ruat anih zia a sawi lawk dan te, leh thil dang dang ala tam hle a, Kim Clement a thusawi tamtak pawh kan la tarlang senglo ani ber a, tun atan chuan duhtawk leh tawh mai ila, Ka thu ziah dan leh thu hman dik tawklo ah minlo hrethiam ula, Pathian in rem atih chuan mi dang sawi dan kan la chhun zawm leh dawn nia.

Aside | Posted on by | Leave a comment

Pu ZIR-A SAITUAL-IN ROPUI TAKIN AN HMUAK

An lo intiam tawh anga Congress sawrkarin Saitual District a pek theih tak loh avanga Home Minister anihna bansanta leh Congress Party Vice President atanga hnawhchhuah tak Pu R.Lalzirliana chuan vawiin khan a bial Saitual a tlawha Lirthei chitin nen Keifang kawnah lo hmuah niin, Mipui sangchuang Hall a lenglo an pungkhawm a ni.

Saitual bialtu Zira chuan thu sawiin “Ka bialte in natna hi ka natna a ni a, in tahna hi ka tahna a ni tih lan tir nan Minister atangin ka bang a ni” a ti a.
Pu Zira chuan”Politics a ka mitmen chhungin Saitual dist kan hmu ngei ang, Dist pe theitu tur sawrkar siam turin mipuite kan tangrual a ngai a ni,” a ti bawk.

Tunhnaia Media a lo lang Mizoram CM in”Dist hi hmui a pek chi a nilo”a tih chu chhang letin Pu R Lalzirliana chuan,”District hi hmuiin, ka inpek a ngai a, thu chu tisa ah a chang tur a ni,” a ti a,.’Central atanga pawisa lo kal hi kan duh duhin kan hmang thei a, Chu chu Finance Minister Lalsawta kutah a awm vek a ni,”a ti bawk.

Congress Vice President atanga hnawhchhuah a nih hnua a bial fan lehna hmasa berah hian Congress Bhavan atangin party hruaitu thahnem takin Pu Zira hi an tawiawm a, chung zingah chuan MPCC Gen Secretary R.Liantluanga, MPYCC General Secy Vanlalpela, MPYCC Secy Saidingliana Sailo, Laldinfela& Lalparmawia E.C MPYCC te bakah Congress Driver Welfare te pawh an tel a ni.

Aside | Posted on by | Leave a comment

Bye Bye Big Daddy

BYE BYE BIG DADDY
.
Mi hriata kan sawi that ngam loh, inhmuh nikhuaa kan nuihpui thin leh kan hun lo hman dun tawhna chanchin thenkhat hi ka thianpa BigDaddy (Pu Hmaa) pual liau liauin, zah pawh dawn loin ka han phawrh chhuak teh ang.
.
Kum 1999 a ni a, Aizawl atang chuan Silchar lam panin kan tlan thla par par a. Rei fe kan tlan hnuah Kolasib leh Kawnpui inkar kawng sirah hian kulh bang sang angreng tak, a gate pui pawh fit 25 vel laia sang, thir phek hlaipui maia siam hi a lo inkulh ruih mai. A hmun chu mawiin kulh bang te chu hmuhnawm tham khawpa sang danglam ni mah se chu hmun chu nileng zankhuaa ka hun hmanna tur, ka khawlai thar, ka mutbu awmna, ka chaw fāk nitin na hmun tur a nih avangin min rap deuh roh a. A chhunga awm turte ka han mitthla a, mi rothap pui pui leh kawlhsen tak tak ni turah ka’n ngai nghal ngawt a. Anni ho chuan kei tleirawl te hi tuisik ang lekah min lo chhuah ang a, min lo piai liam liam ang tih hlauhna nen chu hmunah chuan ka chhungte permission-in security strict hmel deuh deuh chuan min nawr lut ve tak nawk nawk a.
.
Chu kawngka chu an hawng ruah dawn emaw ka tih laiin, kawngka kil lamah chuan kawngka tereuh te alo awm chhawng leh a. Chutah chuan kun ket ket chungin Security/Guard te chuan min hnawh lut ve ta a ni.
.
Kawngka ka han pen lut chiah mai chu ka zām lawk ang ngeiin tlangval phanchang pui pui, patling chak hmel deuh deuh leh tlangval la tleirawl lam, Jail bang zut thang tih hriat tak tak hian minlo au nghal luih luih a. Ka sam lah chu dar chen zeta ka lo zuah ve khanglan avangin chu chuan min ti confi lo zo ta vek a. Thenkhatin, “Chass…” an tih loh leh a thenin, “Va chhe lo ve a….” tih te, hlauhthawn sa tawh nakalaiin ka zawp lut sawt sawt hian ka hria. Chinghne koham riltam ang maiin ka hmu a ni.
.
Min duat leh dimdawi vang leh ka thian tharte kut ka tawrh loh nan pawh ni chuang loin kei chu bawm hran, bar-a hung vek chhungah ni 7 nge ni 8 ka chiang ta lo min khung hrang a. Chu mi hnuah mi dangte fin turin ward-ah min dah ve chauh a ni.
.
KHAWVEL THAR
.
Midangte ka fin ve hnua an zinga chaw ka kil hmasak ber tur ni a ni. Eng mah dan leh hrai hre vek hek lo i. Chaw dawh tur chuan a tlar hmasa lam hretah chuan ka han intlar ve nghal ngawt a. Chaw khawrhna zawn ka thlen nan ka hmaah mi 4/5 lek an awm tawh ang tihah chuan, kei aia riltam leh chaw dawh chak zawk mi 80 chuang zet turin min han din thuah mai chu(h).
.
Chaw dawh chungchangah kher kher chuan kha tluka chawp leh chilha ka dinhmun a thla hniam thut ang kha ka tawng leh ta miah lo. La junior deuhte duhna lai laia intlar khalh chu tang senior tawhte ziah loh dan siam a lo ni reng a.
.
Chaw dawhho zingah chuan Pa valai tak, fit 5’10 bawr vel, tattoo chi hrang hranga țial, sa tha tak, huaisen hmel zet hi chaw dawh ve tur chuan muang changin a hnuhnung berah alo kal chhat chhat. A hmel, a lu meh leh a inchei dan atang chuan “Hei pawh chuan min rawn din thuah leh dawn a ni maw” ka lo ti rilru a.
.
Kan intlarna lai a rawn thlen chuan chaw dawh tura intlar ve mi tang dangte chu an lo țil deuh hak hak a. Hepa pawh chu a hmasa berah a rawn intlar dawn a ni maw ka lo ti rilru hman a. Mahse intlar ve ta lo chuan a kal tlang daih a. Chaw eina dawhkan lamah chuan thuthmun a va rem then mai!
.
Mak ti deuha ka mitmei ruk reng lai chuan a thut atanga rei lo teah hian tleirawl lam deuh, ngo vir ver hian thleng, chaw vum taka khawrh hi a rawn chawi eng va va a. A chawi eng va va ka tih nachhan chu, he hmuna ward leader leh a Lal deuh chin mi tlem te chuan chaw hmeh kanna tel mawm an chawm thin bik a ni. Chutah, an duhsak zawng, an thu awih deuhte leh tlema hmai tlang tha deuh, boss te hnung malis thiamho kha an chaw chawm mawm sa hui hnih khat te an hui thlaksak ve thin. Mawm ei tur vang ta na na na chu, hotute hui hnih khata an chaw a lo eng mawm ve țiam khan butter leh satui chawm tluk zetin an puar phah ve thin.
.
Hemi țum hian iskut kan deuhroh, tui tam tawk leih, dal luap mai, mawmna awm miah lo chu ka chawm ve a. Kan hotute hoin a chunga tel mawm lo lāng zawng kha an chawah an filter vek tawh avangin mawmna reng a nei tawh lo. Sihphir iskut tha ber ai chuan a hmui deuha tih mai a ni. Chi erawh duhtawka liah tur a awm thung a, ei hnem erawh a har tho.
.
INTRODUCTION
.
Chaw eikhamah mahni ward lam theuh kan pan a. Kan ward-ah chuan kei nen midang 12 an lo awm ve a. Introduction te min neihtir a. Ka veng hming, pa hming, nu hming, unau zat leh farnu ka nei em tih te nen.
.
Ka luh zan tak hi friday a ni a, friday hian assembly an lo nei thin a. Hmun dang ka lo awm tawhna te nena khaikhin chuan an kalhmang a dang daih mai. Chutiang zanah chuan solo leh special item eng eng emaw leh mi thar lawmluhna hun an lo hmang thin a lo ni a. Lut thar awmchhun ka nih avangin kei pawh chu fiamthu thawh nan min han hmangzui a. Kan nuam tih zawng ni lo mah se phur hmel taka tihhlawhtlin vek a ngai. Ward leader te an lo awm ve vek a, chu’ngho chuan thuneihna sang tak an nei theuh a. Dan bawhchhiate tan inhrem, invuak, barrel zawng zawng nawh fai, vawk vulh awm miah lo vawkchaw zawn char char. Zanah hotute perhpawng eitur vai, midangte thawmhnaw suk leh ekin commode ung uk lutuk kha lei thar hlim ang sara vara mahni silipara nawh fai leh hremna dang dang hmabak kan nih avangin chu hung chhungah chuan mi thar ka nihna angin smart taka awm kha ka tih tur pawimawh hmasa a ni.
.
MHIP PRESIDENT
.
Ka cher chhe banin ka dang bel si a, ka sam lah ka tisei khanglang nen. Chutia inkhawmna kan neih mek lai chuan dawhsana thu zinga mi, tlai chaw dawhnaa rawn kal tlai deuh, tleirawl pakhatin chaw mawm a rawn chawisak kha lo ding chhuakin, “Kan MHIP President-in min chhuahsan tak avangin tunah kan MHIP thar lawm luhna lo nei I la, amah kha a thut hmunah lo ding se, kut bengin I lo lawm ang u,” a rawn ti deuh hluai a. “He mite ho hi an va mawl em em! Mipa hlir ni si MHIP te an awm hrang a ni maw! Tu tak chu ni ang maw?” tiin kei pawh MHIP President thar hmel hmuh tum chuan ka hawi kual nasa mai. Mahse ka hawina lam apiangin min lo en thup zel a. Ring herh dawn dawna ka hawi kual hnu chuan dawhsan lam ka va hawi leh chu Chairman chawpin an lo then thu a, tattoo ngah deuh pa bawk chuan, ka hriat thiam tur takin, “Nangmah alawm kan MHIP President thar chu, ding rawh le…” a tih veleh mipui chuan kut an beng dur dur a, barrel tam deuh nawh fai ai chuan ti rilru chung zelin ban deuhin ka tho ve ta tual tual a. Ka sam lah a sei, taksa chak lo leh cher khoro lutukna avangin ka ngo var ang vei piat lehnghal a, inhmeh ka inti ru lutuk. Mahse ka zak ru veng veng mai. An thlang thiam ka ti bawk si!
.
KA THIANPA THAR
.
A tukah ka ward awmnate chuan mi thar ka nihna ang leh thil chinchang la hre vak lo a min ngaih avangin hmunphiah leh insuk chu mi han tihtira.
.
Thla khat vel ka awm hnu chuan taksa pawh a lo fit ve ta deuh a, ka tlangnel ve tawh. Ka luh tirha chaw dawhna a ka mi hmuh pa, MHIP President-a min lawm luttu kha hriat chian ka chak riau a. A lan dan te kha rorumin rothap viau mah se ngainat rukna riau ka nei.
.
Intitlangnel takin nikhat chu ward dangte ka chuangkai mai mai a. Chu pa te awmna pawh chu ka leng lut ve ta chhin a. Kawngka hnaih bang chhak lamah hian lehkhabu chhiarin a lo mu awn duai a. A velah chuan lehkhabu eng eng emaw a inchhawp hnawk nuaih mai. Bangah chuan poster tlem a tar a. A thil tih leh a mizia hre miah si lo khan ka ngaisang ru tlat a ni ber ang chu. Chu vang chuan hriat chian lehzual ka chak a ni.
.
A inkhualtelemna zimteah chuan mit ka han len kual vel a. A khum lu-ah tak, “IT’S BETTER TO REIGN IN HELL THAN SERVE IN HEAVEN” tih hi rawng dumin a lo ziak kulh mai. Ka tim deuh sawk.
.
A hmel, a pianhmang leh incheina ka en a, a ban lehlam lehlamah a dar atanga a banrek thlengin thir khaidiat hrawl pui pui lem a inthlung tluan vek a. Chhinchhiahna rawva tak takin a vel a chei hual bawk.
.
Ka bel chiang chak viau na a, han biak erawh ka ngam chiah lo. An ward ka luh atanga rei lo teah a mutna atanga thoin eng emaw ni hi a nawt hauh hauh reng a.
.
“Eng tur nge ni a?” tiin ka han zawt ve tawp a. Ka rinai daihin alo fel phian a; keini ang awm thar tan an ni ang leader zahawm lo va mawl biak ve tawp kha a tlangnelthlak mah mah em ka hre lo. Mahse nelawm deuh mai hian “E! chu mi tur chu nia ……………………” tiin tha tak chuan min lo chhang ve mai a. Min hrilhfiah zui a.
.
A sam meh mak danglam tak mai te chu mawi ka ti ru hle. A lu a met kawlh tal a, a tukkhumah sei tak sin leh pan takin a zauh ngauh a. Red Indian hnam Mohicans ho tih dan te pawh a ang lek lek. A kekawr hak chu ka han en chiang a; Mipa tena an haka an mipa nihna tilang mipa zual em emtu ‘Camouflage’ ngei mai a ha țap a. A kawr hak ka en leh a; mipa inti mipa zual tena mawi kan tih tlangpui ‘Vest’ thui pa zet mai a ha bawk. A tawng tam lem lo nangin nelawm rukna riau a nei khan ka hria.
.
A remchan chuan an ward-ah ka leng fo a. Thil mawlmang leh ho te te ka zawt fo mai. Ka zawhna a mawl emaw, a ā emaw ning hmel pu miah lo hian tawi fel leh min tibengvar tawk lek lek, hriat belh chakawm tawk zelin min chhang peih reng a. Ka ngaihsanna a zual zel.
.
An ward-a lehluh chu ka routine pakhat a ni ta. Amah kawm kher lo pawhin a thil tih leh che vel chuan ka mit a lak tlat avangin a hriat lem lohin ka thlir ru fo a.
.
He ka mihring ngaihsan ruk deuh hian pawisak a nei loh hmel hle hian ka hre thin. A che vel leh tawngkau chheh reng rengah hian mahni inring tawk tak a nihna alang hliah hliah a. A chapo der si lo.
.
Khungkhawmho zinga suahsual rawngbawl chak zualho, pawn chhuah chak si, chhuah dan kawng hre si loho chuan an bawr leh laih laih thin a. Eng nge an rel tih phei chu ka hrelo na a; chu pa mit meng chu ka han chikin thil pangngai lo tak a rawt chhuahpui dawn ni hian ka hria a.
.
BAN RUH VUAK TLIAH
.
Nikhat chu kawhmawhbawlho chu ro tha a rel thlukpui ta ni ngei tur a ni. Hun eng emaw chen an bun khawm lat lat hnu chuan hlim deuh mai hian an rawn tho chhuak ta sap sap a.
.
A tuk a lo ni a, kan ward atanga ka chhuak, field lam ka va hawi khawthawng teh ang ka ti chu, mi pakhat, a ban na tih hmel em ema awrh vu hi ka va hmu a. Eng nge a chhan hre duha midang te ka han zawh kual chuan, “Medical refer-in a chhuak dawn” an ti a.
.
Eng vanga ti na nge ti a ka han zawh leh chuan, “A ban ruh a tliak a” tih zawng a ni. A bak chhanna dawn tur awm lo.
.
Chanchin ka hriat ruk belh ta zel a. An sawi dan chuan ka thianpa thar chuan an ban ruh chu an duh thu ngeiin a lo vuak tliahsak hlawm a ni. Thawktu Security/Guard leh Staff dangte hriat lohin medical refer chhuanlamin ruihlo lak pah nan tiin thingtumin an ban ruh an lo invuak tliahsak lek chu niin. Sual rau rauah pawisak nei tam loa sualte hian a chang chuan an chawm mawm zawk fo a lo nih hi tih chu ka thinlungah a inthum rawn ve ta tluk tluk a. Ka thianpa chu ka ngaisang zual sauh mai.
.
Fing tak si a a chet dan te chu a danglam em avangin pa nih ka chakna chu a lo nasa zual ve sauh a. A hnu ni eng emaw zah hnu chuan a sam meh zulzuiin ka sam sei hnap, dar chen dawna ka zuah chu ka met kawlh ve ta hmak mai. Ka la zo lo. Tatoo ka la nei ve lo tlat.
.
Tichuan, inchhut ran chu ka tum ve ta. A bana khaidiat inthlung duah mitthla chung chuan ka tatoo hmanrua tur te ka buatsaih a. Tatoo chhu thiam kan zinga mi chu ka ban bul langsar laiah tak lian kel kawlin **** lem ka chhut kaitir ve ta. Eh! Ka la zo lo cheu. Beng ka la verh ve lo. Tatoo ka chhut zawh chuan ka beng chu lehlam lehlamah hmun hnih ve veah ka verh ve leh ta. Ka thianpa hi ka va ngaisang tak em!
.
BYE BYE BIG DADDY
.
Ka thianpa chu kawm chian zel ka tum a, chutianga kawm chian zel ka rilruk lai chuan kawhmawh bawl midang 40 rual zette nen chuan gate pui, fit 25-a sang, thir kawngkhar chu hmanrua eng eng emaw nena su chhiain an tlanchhuak ta vek a. Chu pawh chu ka thianpa remruat tho a ni em ka hre lo. Sual rau rauhah pawisak nei lo te chuan mahni in lama chawm mawm turin min chhuahsan ta phiar mai.
.
Keini iskut chhum kan hmeh inhuamte chu kan la awm ta thap a. Kha mi ni atang khan ka thianpa chu ka hmu leh ta ngai lo. A thi nge a dam ka hre zui thei tawh lo. Amah chik deuh e ti lo chuan a veng hming zawh nachang ka lo hre tello hlauh. Ka a ve ngawt mai.
.
Kum 1999 atanga khan 2011 thleng a chanchin hre zui loin ka awm ta reng a. Tichuan, 2011, August thla khan Facebook-a ka vah velna lama group pakhata mi pakhat vengvat hmel deuh mai ina a thil post hi ka hmu fuh ta hlauh a. “Hei chu tunge maw a nih le…?” tiin a profile te ka hai a. Ka Phu deuh zawk mai.
.
Kum 12 liam taa ka IDOL lo ni thin amah BigDaddy Hmahmatea ngei mai ka hmu leh ta. Thianah ka add nghal a, a number ka dil a ka va phone nghal a. A aw erawh tlem chuan a tar deuh tawhin ka hria. “Samsei ka be peih lo asin” tiin min lo fiam a, kan nui dun ta bawk bawk a. Ani pawhin min lo la hria chu ka lawm ngei mai. Tichuan, tunah hian a hnung zui chhun zawmin ‘THU NGAIHNAWM HUANG’-ah “Tir-ah mei kai-ah” kan ti dun ta zel a, a thih ni thlengin.
.
Hmana kan in-bye bye kha chuan min chhuahsanna hmun kha Setana lalna ram, sualin hmun a channa hmuna chawm mawm turin a nih kha. Tunah zawng Van mite nena chawm mawm turin Lalpa ang chhungah I chawl ta! Van mite nena I kianga chawm mawm hun ka va nghakhlel em! Pu Hma, ka va ngai che em!

Aside | Posted on by | Leave a comment

Pu Hawla Lawngleng-ah chuan ngam a nih tawh lo

MNF MLA Pu Lalruatkima chuan “Pu Hawla Lawngleng-ah chuan ngam a nih tawh loh avangin Congress sorkar chu chhungril-ah tihchhiatin a awm mek zel a ni”, a ti.

14ᵗh Sept, khan Mangkhaia Hall, Zotlang, Champhaiah MNF Champhai South Block, Political Training leh mithar lawmluhna inkhawm neih ani a, Pu Lalruatkima, MLA chuan Khuallian niin a hmanpui a, he hun hi Pu Lalhmingliana, Vice President MNF South Block chuan a kaihruaia. Pu Laalruatkima hian mithar 22 MNF ah a lawmlut a, Champhai Zion Venga MNF VC thar lawmna hun hman nghal a ni bawk.

I blog link kha titawi la, pawisa hlawh rawh.

He huna Khuallian Pu Lalruatkima MLA chuan, “Pu Hawla Lawngleng-ah chuan ngam a nih tawh loh avangin Congress sorkar chu chhungril-ah tihchhiatin a awm zel a, chhanhimna lawng MNF-ah Mizo mipuiten chuanna chang i hria ang u,” a ti. “Ni chhuah hun nghaktute tan beisei tur a awm ta lo a, MPC hruaitu Brig. T.Sailo-a’n Mizoram hmasawnna tura ruahmanna a siam Six Basic Need a lo buaipui zawng zawngte chu MNF policy SEDP-ah a awm vek tawh avangin kan MPC unaute pawh Mizoram chhanchhuak tura an thuthmun atanga rawn tho chhuaka Mizote inpui MNF-a rawn haw khawm tawh turin ka sawm che u a ni,” a ti bawk.

Mizoram kawng tam tak chhiat chhan hi Lal Thanhawla-te unauin Mizoram kawngah an chhungkaw tan a sa ti thalai hleh an tum nasat vang a ni a ti a. Mizoram kawngpui hian Lal Thanhawla-te unau ni lo hmangaih taka enkawltu a mamawh a ni,” a ti. “MNF-in sorkarna a chan veleh Mizoram puma Gas harsatna sutkianna turin Gas Bottling plant din nghal tura hmalak a ni ang a, Congress sorkarin a tihtawp ringawt chini pawh ration-ah kan sem leh dawn a ni,” a ti bawk.

He hunah hian MNF General Headquarters’ Secretary leh Champhai South bial enkawl mektu Pu TJ. Lalnuntluanga pawhin thu a sawi bawk.
He hunah hian Mizorama zirna in sang ber, Mizoram University (MZU)-in Best Legislator-a Pu Lalruatkima an thlang chhuak an ngaihhlutzia lantirnan Chawimawina thuziak leh pangpar an hlan a ni.

Aside | Posted on by | Leave a comment

Congress in sport policy an duang thei lo

Mizo National Front
General Headquarters
Mizoram : Aizawl

Press Release

Kum 10 chhungin Congress-in Sport Policy an duang thei lo hi ṭhalaite ngaihthahna a ni: Lalruatkima MLA

Tukin khan Pu Lalruatkima Aizawl West II bialtu MLA, khawtlang hruaitute leh Futsal Association of Mizoram hruaitute chuan Tuikual North-a Futsal khelhna tur khelmual siam dan tur an enfiah.

He hunah hian Lalruatkima MLA Aizawl West II chuan thusawiin, “Kum 10 Congress Sorkar chhungin infiammite tana Sports policy pawh an duang theilo hi a lungchhiatthlak a, infiammite ngaihthahna lian tak a ni,” a ti.

TShirt, menswear, sari, utensils, shoes sold at a discounted price

Pu Ruatkima chuan, “Tuna Tuikual North field atana an hman mek chu, field puitlinga siam theih an nih hmaa Futsal khelh theih nana siam nise, hei hian infiammi thalaite tuihalna engemaw chen a chhawk zangkhai theih ka beisei a ni,” a ti bawk. MNF MLA chuan Pathian leh mipui zarah MNF-in sorkarna a chan chuan Sport Policy mumal tak siam a nih tur thu a sawi a. “A ngaihna hre lovin an enkawl vangin hma kan sawn thei lo a ni,” a ti bawk.

Pu Ruatkima chuan, “Rajiv Gandhi Stadium chu tunge a neitu leh enkawltu ber pawh tun thlengin a chiang lo hle mai a, tunah hian Electric bill hun rei tak an pek theih loh avangin Disconnect a ni a, tunah hian hnathawk tute pawh Mombati chhiin an awm ta ringawt mai hi a vanduaithlak hle a ni a,” ti bawk.

Futsal Association of Mizoram chuan Aizawl West II bialtu MLA Pu Lalruatkima hmalakna a Tuikual North Local Council leh Tuikual North GSA ten Futsal Ground tha tak an siam tur lawmawm an tih thu an sawi a ni.

(THANGKIMA)
Joint Secretary
Media & Publicity Dept
Mizo National Front
Memo No.MNF/Media/2018/01/286
Dt.13.09.2018.

Aside | Posted on by | Leave a comment

MNF PEK ANG NI LO, DISTRICT FUKEKIM KAN PE ANG CHE U A TIHTE CHU BIAL MIPUI LEH KA BENGAH A LA CHAM RENG – Pu R Lalzirliana MPCC Vice President

MPCC Vice President Pu R.Lalzirliana chuan Minister atanga a ban thu vawiin 14ᵗʰ September, zirtawpni a MPCC Political session Cogress Bhawan-a neihah a sawi a, Chief Minister Office panin banna a thehlut nghal.

Vawiin MPCC Political Session Congress Bawan a neih hi Col. Z.S Zuala MLA in a kaihruai a, MPCC Diciplinary Action Committee-in insawifiah tura a tih, vawiin tlai dar thum thleng hun a pek, Home Minister leh Party Vice President in thu a sawi dawn avangin party worker thahnem tak he hunah hian an tel a. Party hotu lawk zual thenkhat, President Pu Lal Thanhawla, Pu Zodintluanga, Pu Lal Thanzara, Pu PC Lal Thanliana te erawh an tel lo. Finance Minister Pu Lalsawta, Transport, Minister Pu John Rotluangliana, Agriculture Minister Pu KS Thanga MLA te Pu Lalrinmawia Ralte, Pu Zoramsangliana, Pu Ngurdingliana, Lalrobiaka, Pu TT Zothansanga leh Dy Speaker Lalrinawma te an tel a, An ni bakah hian AICC atangin party hotu pahnih an tel bawk.

Pu R.Lalzirliana chuan nimin maia MPCC buatsaiha MIMER leh Tuirial HEP lawmna Falkawna neih a ni chu lawmawm a tih thu a sawi a, a thusawi ve hlau an awm nia a hriat avanga kal ve ta lo a nih thu a sawi. Pu Zira chuan vawiina party political session neih meka Home minister tia an kohna chu a tawpna a nih tawh tur thu a sawi a. Ngai tak chungin a nihna a bansan tur thu a sawi.

Pu Zira chuan congress Party erawh chhuahsan a tum loh thu sawiin, “Ka chungah Action lak tum ngar ngarte an awm a nih chuan la mai se. Showcause notice min pek kha chhan ka tum lova, chhan tlakah pawh ka ngai lo a ni” a ti.

MPCC Vice President chuan “Cabinet minister atanga ka ban chhan tak hi, MLA ka ni a, mipuite tana hnathawk tur Saitual bial atanga thlan tlin ka ni a, kum sawmli sawmnga zet district an duhthu an lo au puive tawh a, an aiawhin term 4 MLA-ah thlan tlin ka ni a. Saitual District a puitlin theih nan theihtawp kan chhuah thin a ni. Tuna kan CM ngei pawh Congress chhiat lai bera Saitualin Congress MLA a nei thin chu lawmawm a tih thu a sawi thin a, District pawh pek min tiam nghe nghe a. ‘MNF pek ang ni lo District fukekim kan pe ang che u’ a tih te chu bial mipui teah leh ka bengah hian a la cham reng a ni” a ti.

A sawizelnaah Pu Zira chuan, “Pu Lal Thanhawla chuan a thusawi apiang a tihlawhtling thin kan ti thin kha a ni a. Mahse vawiin Congress sorkar kum 10 tawp lam hmang mek tawhah hi chuan a thusawi chu tisa a chang ta lova, a tak ram a awm tak loh vangin vawiinah hian kei hian dinhmun sang tak Home Minister dinhmun hi chelh tlakah ka inngai tawh lova. Chelh reng chi pawh a ni tawh lo. Ka bial mipuite an zahawm lutuk a, chuvangin Cabinet Minister atang chuan ka bang dawn ta a ni” a ti. Pu Zira chuan Minister a nih chhunga party mi rilru tihnat a lo neih a nih chuan ngaidam tura a ngen thu a sawi bawk.

Pu Zira hian Cogress Bhawana thu a sawi zawhah chawl khawmuang lovin Chief Minister Office lam a pan nghal a ni.

Vawiin MPCC political session-ah hian tualchhuang chanchinbu, electronic media leh phai lam chanchinbu leh News Reporter kal an thahnem hle a. Party worker thenkhat ten Media te khuahkhirh tuma an thlalak an phal sak mumallo chu media thenkhat an lungawilo hle a ni.

Aside | Posted on by | Leave a comment