PASALTHA NGHATEBAKA (CHAWNGZIKA Chawngthu)

History lamah hian kan hmuh chhun chu Chhim pasaltha Chawngbawla’n a thah dan chungchang tlemte deuh chauh hi kan hmuh chhun a ni a, a chanchin ka han zawng ngat ngat a, ka hriat chhun ka han ziak lang ve reng reng ang e.

Nghatebaka hi Chawngzika Chawngthu ti-in a hming a chher hman viau a, Biate tlangdung, Sialhawk, Khawhai tih velah chuan a huaisenzia an sawi nasa hle a, a dam rei lo em mai a, huaisenah zawng Pasaltha Khuangchera ai pawhin a duai hauh lo ang tih tur a ni an ti.

Kum 1842 vel khan Lalvunga hmun an tih Sialhmur khua-ah a lo piang a, hetah hian seilianin a lu a nghat a ni.

Vawikhat chu a rawlthar tirh vel thingnawi fawm an awl tep tawh ang tih lai hian an khaw daiah a thiante nen an ramvak a, Uisathiam an hruai a, sava veh leh thangkama an buai em em lai chuan an ui hruai te rawl hi an hre thut mai a, ui te ri awmna lamah chuan tlan vatin an uisathiam lian zet mai chu chinghne lian zet mai panga hian an lo beih rawn a, an lo seh thi hnuang tawh nghe nghe a. Nghatebaka teho an lo hmuh chuan an lo ngur chher chher mai a, chinghnia leh savawm hian mihring zahna an nei lo ber an ti thin a. Mihring seh/khawih mai hi an pawisa lo viau a ni.

Chutia an ui duatlai chinghnia-in an han seh a hmuh chuan ani Nghatebaka naupangte mai chu a ter ta at mai a, a thiante tlanchhia chu um ve duh lo chuan an ui duat lai chhan tum chuan thingtuai a hlam chen vela sei chuan a sat a, chinghnia pakhat chuan rawn beih a tum rirawk ale, ani Nghatebaka chuan dimna nei lêk lo chuan a lu-ah tak mai chuan a han pathlawi buh vuak dawp mai ale, chinghnia chu beleuh vawn vawn chungin a tlanchhe ta chawn chawn a.

Pakhat chuan a rawn zuan a, boruaka a la awm lai chuan a hnungzangah tak mai chuan a han hlap thum leh ta dawp a, a luruh keh sawm buai khawpin a tla thla chu a lu-ah chuan a han ruan leh sak a.
Chinghne pathum an la awm cheu. Nghatebaka chu a zam chuang lo, ramsa hian mi huaisen chu an mitmeng atangin an lo hre khawp mai hi a lo ni a, a mitmeng an hmuh chuan an zam a, an insaseng ta a.

Ui kha an lo seh na hman viau a, mahse thihpui tham tur khawpa na erawh a ni lo. A luvun an seh thler a, a ke hma veilam an seh na bawk a, hmun danga tlanchhe ta a thiante chuan zak angreng takin an rawn fin a, ui chu an zawn hawng a.

In an thlen chuan a thiante chuan Chinghnia nena an inbeih dan chu an sawi darh ta a, a hmingthang ngei mai. Val Upate chuan thingnawi fawm an awltir nghal a, hei hi sawi belh ta lawk ila, thingnawi fawm rualin thangchhuah sa serh an kah emaw sakei mei an sahthlak te hian thingnawi fawm an awl thin a, chinghnia hi thangchhuah sa serh zingah tel lo mahse a huaisen dan chu thingnawi fawm awltir tlak niin an hria a.

Vawikhat chu an aia u daih tawh rawlthar kawlhsen tak Lianchhunga hi a awm a, sual ngam loh a nei lo an ti mai a. Nghatebaka chu a thiante nen thingthupui loin an ramvak a, thingthupui an lo chu an hlawhtling viau a, an iptepui pawh a puar awk thei a. Lianchhunga leh a thianpa luikal hlawhchham haw nen chuan kawngah an in umphak a. Lianchhunga chuan Nghatebaka leh a thiante chu vau-in, “In thingthupui lawh sa kha min pe ula, kan laksak che u tih in sawi vaih chuan ka vel dawn che u,” a ti ta mai a, Nghatebaka thiante chuan mittui tla dawn dawnin Lianchhungan changel hnah a phahah chuan an chhung a, Nghatebaka chuan pek ve a lo tum hnai lo mai a, a ding ngar mai a, Lianchhunga chuan, “Nang kha min rawn pe ve dawn nange?” a han ti a, Nghatebaka chuan, “Hah taka ka lawh sa hi ka pe ngawt bik lo ang che,” a ti a, a thiante chuan, “Pe mai rawh, a vel ang che,” an lo ti nak nak a.
Lianchhunga chuan, “Naupang te te, i va ngeng ve,” tih pah chuan a hnarah a rawn hnek siah mai a, Nghatebaka chu a thal tawp mai a, mahse a tho leh a, a ding leh a, Lianchhunga chuan, “I la duh elo,” tih pah chuan a rawn hnek leh a, Nghatebaka chu a tlu leh hawl hawl a.

Tap miah lo chuan a tho leh a, Lianchhunga chuan a rawn bawh leh a, rawn hnek a tum chu a lo bum zauh a, a pumah chuan a lu chuan a han tauh thuai mai a, Lianchhunga pawh a thaw hawk a, a rawn kun chu a hnarah tak mai chuan a theihtawpa na chuan a han pet thuai mai a, Lianchhunga chu a vir nawk a.
A rawn tho leh a, a thinur lutuk chu a mitmeng pawh a sen rum a, mi butut tih takah mumal a nei thei tawh lo a, Nghatebaka chu a rawn bawh buan buan tawh mai si a, ani chuan fing taka lo bumin a hnarah bawk chuan a aia na a awm leh tawh lovange tih tur khawpa na chuan a lo hnek sawk mai a, Lianchhunga hnar chu a tliak tih hriat takin a ri no chawk a, a tap pur a.
Nghatebaka chuan, “I la duh em?” tih pah chuan kutthlak leh tum chuan a han tin uaih a, “Lianchhunga chuan tumbu ei aw ang tuakin, “Ka tlawm e,” a lo ti tuau a. A thiante nen chuan hlim takin an thingthupui lawh sa chu an hawn ta a.

A thiante chuan Lianchhunga te nen an intihbuai dan chu an sawi a, karlovah khawchhung a khat nghal a, Lianchhunga te’n khua an rawn luh chuan an lo en hrek hrek hlawm a, tumahin an lo be lo, anni Lianchhunga te chuan thil awmzia hai bik hek lo. An zak ngang mai a, mahse an la zak dawn chauh a ni.

Zanah chuan zawlbukah an chhuak khawm a, Lianchhunga te thiandun pawh chu kal loh theih ni hek lo le, phur lo takin an insiam a, hreh tak chungin an chhuak ve ta nge nge a.

Zawlbuk an lut chu an lo en thap a, an lo titi mam mam pawh chu a reh hmiah a, khuavang kal lai ang hmiahin a reh ta tlawk tlawk a.

Val Upa Thangchhinga chuan, “Lianchhung lo kal teh u,” a han ti ram hmak a, hreh tak chungin val upa chu an va pan hnai a.
“Vawiinah Chawngzika te thingthupui lawh sa kha engvanga laksak tum nge in nih?” a han ti a. Lianchhunga te chu an ngawi reng a, Val Upa bawk chuan, “In la ngeng hle mai maw!! Hmanni-ah lah Thangkunga fapa pawisawi lo i lo vel ringawt tawh bawk, tlangvalho khan rawn din hual rawh u,” a ti a, an din hual a, an nem kat ta dawt dawt mai a, he thila inhremna hrehawmzia leh zahthlakzia chu an kumkhaw sawi a tling thin.

Mak tak maiin Lianchhunga leh Nghatebaka te chu thiantha-ah an insiam ta daih mai a, khawtlangin mak an ti a, thenkhat chuan, “Inkawm tak teh se, an huaisen dun bawk a, khawtlang muantu nih an la tling viau ang,” an ti hlawm a, Lianchhunga pawhin a nun chu a sim hmiah mai bawk a ni.

An thiandun chuan an lo tlangval a, sa an la thei dun em em a, thang erawh an la chhuah lem lo a, an tlawmngai dunin pitar putar feh haw thingput lai leh pitar phur han chhawk mai te an ching dun a, an khaw nulate pawhin lo leng se an ti theuh a.

Zankhat pawh thla a eng hle mai a, lenglen ar a khuang chauh tihah chuan khaw hmawra hmeithai inhnuaia vawk chu sakei-in a rawn la ta mai a, sa a tla e tih ri an hriat chuan zawlbuka lawi tlangval rual chu an chhuak huk a, sakei umin an tlan dul dul mai a, sethlah mualah aw an ti sup sup a.

Nghatebaka chu a tlan hmasa nalh a, sakei chu vawk pu chung chuan tlan chak thei hek lo. A va umphak thuai a, sakei-in vawk a put lai chu a pawhthlak sak hmiah mai a, sakei nen chuan thla eng hnuaiah chuan an inen ke kaw a, mi huaisen mitmeng a hmuh chuan sakei pawh chuan a kalsan ve leh ta mai a..A laksak lai leh sakei pawh a han melh zam an han hmuh chuan an khaw tlangvalho chuan an zahin an ngaihsan thar phah leh sauh a.

Vuttaia leh Lalpuithanga te chuan indo an puang a, he indo hi chhim leh hmar indo a ni nghe nghe. Chhim lama tangte chu Lalrivunga thlahte an ni a, hmar lama tangte hi Lallula thlahte an ni. Anni Sialhmur lam hi hmar lam chan an ni a.

Chhim lama mi Seipuia khuate chuan Chawngbawla hovin Lalvunga khua Sialhmur run tur chuan an rawn thawk chhuak a, hemi ni hian Sialhmur khua chuan sangha tlang vuak an lo nei a, ina awm chu Lal leh upate, pitar putar naupangte chauh an lo ni a. An lalpa chu an man a, upate an that a, midang lakah erawh chuan kut an thlak vak lo a, mahse thi leh dar an hmuh ang ang silai nen chuan an la fai phiar a.

An sangha vua chu an hlawhtling zêk a, nghahrangchal sum tia dawn dawn leh sangha hrawl fe fe an man teuh a, an rawn phur haw hnawk mai a ni.
Khua an thlena thil awmzia an han hmuh chuan an thin a ur em em mai a, Nghatebaka chu a thin a ur zual a, a silai tha tak mai an lak chu chhuhsak ngei tum leh an lalpa chhanchhuah tum chuan a um ta a.

A thiante leh tlangval rual chuan an rawn umzui vat a, reiloteah chuan an va umpha a, Nghatebaka chuan a hnung bera mi chu khawhthluk tawp tum chuan a feikibar chuan a han khawh a, mahse a thelh hlauh mai, Nghatebaka chuan, In va dawihzep em em ve a han ti sak a..

Lehlam atang chuan pakhat hian thupe aw tak hian, “Min rawn umzui tawh suh Nghatebak,” a rawn ti a. Ani chuan, “Chawngbawl, Pasaltha i ni lawm ni? Lo ding ta che,” a han ti leh a,” a fei chuan pakhat chu a han khawhthlu a.
An tlan zel a., ramri an thlen dawn chuan silai ri thuntling tih hriat tak mai hi a rawn ri dur mai a, Nghatebaka chu a let tawp a, midang chuan an rawn bawihsawm thuai a..Nghatebaka ka atang chuan thisen a rawn chhuak a, engemaw han sawi a tum a, mahse a tawngchhuak zo lo, a chatthla ta a ni.

An ui em em mai a, ral umzai pawh rel tawh lo chuan, Nghatebaka chu an zawn hawng a, chumi zan chuan ar pawh a khuang lo va, ui pawh a bauh hek lo. Sar a zam ruih mai bawk a.

A tukah chuan Tianhrang thlan an lai a, ui takin an thlah liam ta a ni.

Nghatebaka hi Pasaltha hmingthang Chawngbawla meuh pawhin, “Kei aiin a huaisen zawk; a chhan chu kei aia huai chu mahni lu zuar an ni ka ti thin a, mahse ani zawng mahni khua leh tui tan a nun a hlan a ni,” a ti hial a ni.

Mizo pasalthate zingah hian Khuangchera leh Nghatebaka lo hi chu ral lakah khawtlang tana nun hlan hi sawi tur an awm rih lo niin a lang a, sa lakah erawh chuan sawi tur chu an awm nual awm e.

Advertisements

About Mizo Archive

I'm the one who collect the best writings of Mizos
Aside | This entry was posted in Uncategorized and tagged , , , , , , . Bookmark the permalink.

One Response to PASALTHA NGHATEBAKA (CHAWNGZIKA Chawngthu)

  1. Pingback: Mizo Thawnthu List Directory - All Mizo

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s