THAMNA KHAWPUI-CHAMPHAI by Ruatfela Nu
Champhai khawpui hi hnam dang, a bikin vai sumdawng an tlangnel ngai lo a, vawiin thlengin vai dawrkai an la awm lo a, chuvang chuan Zo khawpui/ Zo khua tia sawi leh vuah a ni a. Burma (Myanmar) ramri hrula awm a nih avangin ram dang thil a tlawm a, bazaar pah leh Champhai khawpui leh a chhehvel ram leilung mawina hmuh chak, khualfâng zin pawh a hip hle țhin a. Tunah chuan Champhai chu-ramri kâna Dân loa sumdawnna hmunpui tia hriat leh sawi a ni a. Mi tam takin Champhai khaw mi an hmuh dan pawh a sir-he tawh hle a. Champhai mi tawh phawt chu smuggling thila inhnamhnawiha kan ngaih hun a thleng lo ang tih pawh a sawi theih ta lo e. District dang miten Champhai khawpui an hriat leh hmuh dan chu “Smuggler khawpui” tih a ni.
Kuhva smuggler-te tute nen nge an inthurual
Kuhva smuggler tam zawk chu Burma mi, Burma rama Zo chi peng an ni a. Mizoram mi pawh an tam tawh. Dan phal loha ramri kal thelha sumdawnna bungraw tawlh lut leh tawlh chhuah hi ‘smuggle’ a ni a, chutianga sumdawngte chu ‘smuggler’ tih an ni a, chutianga sumdawnna chu ‘smuggling’ tih a ni. Kum 5 vel kal ta ațangin kuhva smuggling hi a rawn hlawk thut a. Kuhva smuggling-in a chhe lama a nghawng tawh, a nghawng mek leh a nghawng zel tur ngaihtuahin “Kuhva rah ro tawlh hi thil sual tihna (crime) a ni” tih article vawi-3 ka ziak phah a. A nghawng pawh a te lo hle a ni.
Kuhva rah ro tawlh a hlawk lo
Tun anga kuhva smuggling a hlawk thut hma kum rei tak ata tawh, khawchhak lam bungraw dang ang bawkin kuhva rah hi mi eng emaw zatin sumdawn nan an hmang a. Sumdawnna dang ang bawka a awm tawk hlawh/hlep awm, hlawk bik chuang lo a ni.
Khawvel hmun tina mafia leh smuggler kan hriat te reng reng, anmahni ngawtin an hlawhtling thei lo. Sawrkar mi leh sa, sawrkar milian te nena inthurual an ni țhin. Kuhva smuggling-a Mizoram sawrkar a inrawlh tichiangtu chu nuihzat thlak khawpa tlem GST a la hi a ni a. Ram dang kuhva smuggling-ah hian engti zawng mahin GST a lak theih loh tawp.
Khawvela smuggler te hlawkpui ber chu ralthuam, ruihhlo leh gold tawlh hi a ni a. He laiah chuan an thil sual tih thup nan Awke leh kuhva rah tawlh an hmang a. Chutiang thupna chu smuggling hrulhah hlawk takin a kal a, mi pangngaiin an khawih ta sup sup țhin a. Chu chu smuggler te duhthusam a ni.
Tel ve an tam poh leh an thil sual tih hliahkhuhtu an tam tihna a ni a. An thil sual tih a hlawk em avangin mi dangin hlawkna an lo tel ve chu pawi an ti lo.
Kohhran a nghawng
Mexico leh Columbia ramah drug lord/drug cartel ten Biak Inte an sa a, khawtlang tan thil țha an ti a, mi retheite an țanpui va vak țhin tih ka hria. Chutiang chiah chuan Champhai leh a chhehvela kuhva smuggler te chuan Kohhrana sum an thawh vak vak a. Kohhran thenkhat Upa ka biakte pawhin an kohhrana lawi, kuhva smuggler ten thawhlawm an thawh țeuh țeuh tih min hrilh a. Kuhva smuggling awm hmaa an thawhlawm chu a let khat te, a let hnih leh let thum ten a pung a. Kohhran thawhlawm pung chu lawm a hnekin pawi an ti em em a, an hmel leh an țawngkamah pawi an ti takzet tih a hriat a. Rilru a khawih hle a ni.
Aizawl Kohhran țhenkhat chuan khehpuam leh kuhva smuggler vanga hausa nia an hriat ten an Kohhrana thawhlawm thawh a tum an duh lo a, dan anga zu zuar thawhlawm duh lo Kohhran pawh an awm a. Champhai khawpui leh a chhehvel khan lo entawn ve hram teh u. Sual thiltih ațanga tangka sum kohhranin a dawn hi a felhlel hle si.
Thamna khawpui chu
Burma ram kaltlanga Țiau lui kâna Mizorama kuhva rah rawh tawlh luh hi thamna hlirin Vairengte leh Kanhmun godown a thleng a. Vairam lama an tihdan chu kan hre phak tawh lo. Kuhva rah neitu ram dik tak chu Malaysia, Philippines, Vietnam leh Burma eng ram pawh ni se, heti teh ngawt hian heti anga tam hi India ram a rawn lut thei lo hulhual a. Hei tak hi Dân zawng zawng bawhchhiaa sumdawnna a nihna chu a ni a. Champhai hi a innghahna bulpui a ni avangin thamna khawpui tih loh theih a ni lo.
Dan dika sumdawnna ni se, eng vangin nge kan ram thing leh mau suata hmun tinah kuhva smuggling kawng ruk an laih thlur seng sung ang? Eng vangin nge zanah hlir an load-a an tlan ang? Eng vangin nge Vairengte thlen nan truck trip khat zelah cheng nuai 2\3 an sen ang.
Chu mi bul ințanna chu Champhai leh a chhehvel hi a ni. Kuhva phur ten kawng siam lai an rah chhiah nasat țhin avangin Champhai district Magistrate in thla hnih chhung atana kuhva rah phur kal a khap a. Chutih laiin kuhva rah phur kaltlang duh chuan, chumi khami hnenah Truck trip khat zelah Rs. 2,00,100 (cheng nuai hnih sing khat) pekin a tlang theih an ti a. kuhva rah phur duh ten cheng vaibelchhe-3 vel an chhungkhawm tih chiang takin ka hria a. Chu chuan police te nge an tham dawn tih erawh ka hre lo.
Dual citizenship
Tuna Champhai leh a chhehvela inhmun lo rama nei a, chenna In leh godown sa khir-khawn eih uaih te khian engtin nge ram an neih theih? Engati nge tualchhung miten smuggler te hnenah an in hmun lo ram an hralh phal? Mizoram mi nihna an nei a ni chek ang a. Mizoram mi nihna nei tur chuan Burma ram mi an nihna an surrender a ngai a. Thuneitute hnenah an surrender ngei ang a, mahse Burma ramah cheng sang hnih sang thum lek sengin an siam tir leh thei a. Dual citizen an ni tihna a ni ang? Khawvelah hian mi bik, khawiah pawh awm se mihring tana mi țangkai, ram tinin khua leh tui atana an duhte hi chu khua leh tui nihna an pe țhin. Mizoram hian kan ram leh a chhunga cheng hnamte tana hnawksak em em, Dan pawisakna nei lo, pawisa chiah pathiana, dan phal loha sumdawngte hi awlsam takin khua leh tui nihna pein, In hmun lo ramte an duh tawk tawkin an lei a, an sa mai mai em ni tih hi ngaihtuah chian a ngai takzet a ni.
He thu ka ziak lai hian Champhai veng ṭhenkhat chuan smuggler pawisa ngah lutuk hnenah in hmun leh in ding lai hralh an phal tawh lo tih thawm ka hria a. An tihfuh ang. Aizawl chhuahlam, Thuampui, Zemabawk leh Falkland velah pawh smuggler pawisa ngah hoin in hmun lo ram an lei nasa a. Hmun lo ram man a to chak phah hle a ni. Smuggler pawisa ngahte vanga real estate a nghawng tuartu chu keimahni kan ni si a. Sawrkarin a khuahkhirh loh chuan veng leh khuate talin an khuahkhirh a ngai. Kan tuar nasa lutuk dawn!
District bawrhsap sawn chhuah duh an awm em ni?
Champhaiah hian sawrkar hnathawk țha an awm rei thei ngai lo tih a ni a. Eng nge a chhan? Sawkar hnathawkte hi Dan kengkawhtu an ni a. Dan loa thiltih duh ten hnawksak an ti thuai țhin a ni awm e. Tuna an bawrhsap hian kuhva smuggling nasa takin a do-dal a, Dan hmangin a khap a, chu chu smuggler mi tlemtein an duh lo a, sawn chhuah an duh a, thuneitu sang lamah pawh an nawr a ni mai thei?
Kuhva smuggler emaw, thil dang danga Dan loa thil tih duh emaw hi mi tlemte an ni a. Champhai District Bawrhsap hi Champhai District khua zawng zawngte bawrhsap a ni a. Champhai khawpui chhung leh khua hrang hranga mite an duh hle niin a lang a. Chu chu Mizoram mipui pawhin kan hriat pui a. Champhai district mipui 99.9% te bawrhsap duhlai sawn chhuah duhtute chu smuggler an nih loh chuan tute nge ni ang?
Village council, Tlawmngai pawl, Political Party leh Kohhranah thamna
Khawtin deuh thaw pawh turin kuhva tawlh ruk kawng laih a ni a. V/C ten an khaw ram chhungah engtin nge kawng ruk laih an phal? Thamna an dawng a nih ngei ka ring. Tlawmngai pawl hrang hrang, YMA, Sporting Club leh a dang dangte hnena smuggler ten an mamawh bungrua leh pawisa fai an pek hi thamna a ni a, an lo lak/dawn chuan thamna an la tihna a ni. Smuggler ten “Kan thil sual tih hi min lo pawmpui ula, mipuiin min dodal dawn pawhin nangni ka chu kan hup tawh” an tihna a ni a. An thil pek an lak fo chuan Dan bawhchhiate sawisel a hnekin an hum zel ang. Political Party ah smuggler te an intat lut thuk sawt hle mai. Party pakhat Block hruaitu pawh smuggler tia mite hriat leh sawi a ni. 2023 MLA election-ah hian smuggler an in-candidate fur ang a, Kan ram rorelna inah an la thu ther fuk mai ang tih a hlauhawm hle a ni.
Thamna pe leh la țhinte mi tlemte an ni
Thamna khawpui Champhai tih mah ila, thamna petu leh latu chu mi tlemte an ni a. Champhai khawpuiah khian Baal hmaa țhingțhi ngai lo mi tam tak an awm a. A bikin țhalai hmathlir thui tak tak nei ten he kuhva smuggling-in a nghawng tur an thlirin an rilru a na a, tihtawp an duh em em a ni. Tin, Champhai leilet buh chinna hmuna kuhva rah chhek khawlna godown te pawh țhiah an duh a. Truck za rual driver zun leh ek ringawt pawhin hmunhma a ti țawp a, a tenawm! Hmakhawsang ațanga Champhai leilet buh chawmtu, khawpui mite tuitlan, Tuipui hnar ințanna tuihna thlengin an tichingpen zo a, Buh hmun zahawm leh hlu tak an tisawngkawn nasa hle a. Thil thlir thui ten pawi an ti vawng vawng a ni.
Zo khawpui, a hausakna leh a hmunhma nawm vanga Zoram hmun tina mite hmuh chak, Champhai khawpuia chengte u, in puanven sawi chhingin chhan tlak a la nih lai hian chhan turin țan han la teh u. Khehpuamah in hmingchhe tawh a, Kuhva smuggling-ah in hming chhe leh mek a. Mahse chhan tlak a la awm a nia! Champhai tui liak ngat, lehkhathiam leh infiamna lamah mi hming țha pawh in nei khât ta. Mihring nun hlutna leh himna hi tangka sumah a awm lo a. Sum hian thla a insiam a, a sang zawngin a thlawk zel a, tangka sum duh huam huamte hian sumah duh chintawk an nei ngai lo. Sual tinreng bul, tangka sum ngainatna hi mihring min tichhetu a ni a. Hmasawnna tak tak chu – Education, Environment humhalh leh nungchang dikah a ni a awm. I rilru tuaitharin țan han la teh u khai. In ram neih chhun kha in tu leh fate chenna tlaka siam theitu chu nangmahni chauh in ni si a.
He Order-a a inziah dan chuan Court hian point 2 a ngaihtuah a. Point 1 ah chuan Complainant sawi ang hian Accused hian 2013 MLA inthlan dawn khan False Election Affidavit a lo theh lut reng em tih ani a. Hetah hian Court hian ni 8 November 2013 khan Pu Hawla chuan AI-178, New Town , Kolkata a ni 30 August 2013 a ram a lo neih tawh ( Sale deed executed and registerded on 30/08/2013) chu ziak langlo ( concealed) avangin FALSE AFFIDAVIT a lo theh lut ngei a nih pawhin Point 2 ah chuan Accused hi engtia hrem tur nge , Conviction pek tur anih leh nih loh a ngaihtuah leh a. Accused hi Court hian examination / cross examination te a neih vek tawh hnuah pawh duhsak takin Judgment fair tak a neih theihna turin Section 313 of CrPC angin Accused Statement hi lak leh te te ani bawk a. Uluk taka Court in a ngaihtuah hnu ah Pu Hawla hian False Affidavit chu theh lut ngei mahse a theh luh chhan erawh chu Compalinant lamin Accused chu rilru chhiat vang, thil sual tih duh hrim hrim vanga thil tih ( mens rea) ani e ti zawnga an proved zawh tak loh avangin leh amah Pu Hawla hian a tir atangin ni 30 August 2013 ah HIDCO atangin he ram hi lo nei tawh mahse a Advocate te leh amah thurawn tu te’n Mutation ( New Town Municipal Corporation) tih fel hnuah chauh chu ram chhunga hma la thei tur anih chauh avangin Election Affidavit a ziah lan kher a ngai hrih lo an tih sak tlat avanga ziak lang lo ta mai niin ( concealment ) hi a rilru sual vang emaw thup a tum vang hrim hrim a ni bik lo tia a tan ve tlat avangin Magistrate hian chu mens rea chu proved anih tak loh avangin ‘ benefit of doubt’ chu accused chu pe-in engmah chawi tir lo emaw hrem lovin a chhuah ( ACQUITTED) fel ta der ani.He Court Order chungchang ah hian ‘ A tir atang rengin Pu Hawla hi tan tir emaw sum tam tak chawi tir tum hrim hrim ka ni lova. Keima mimal hlawkna emaw hming thatna atan a buaipui ka ni hek lo. Mizoram leh hnam hruai tum te’n anmahni chanchin ziah chhuahna hmasa ber Election Affidavit an filed atang phat a dawt an sawi duh thin hi ka haw em a, chuvangin Pu Hawla hi kan Serchhip biala incandidate a lo nih ve avangte leh Mizoram a CM hlun ber leh ni mek anih bawk avangin amah hi exemplary case a hman ka duh ta mai zawk ani. He case hi mimal inhuat avanga inbeihna ani lova, mipui awareness tur leh MLA incandidate la tum leh zel turte fimkhur nan a buaipui mai ka nih avangin hetia court in Pu Hawla FALSE AFFIDAVIT case min proved sak hnua hrem lohva an chhuah hi ka lungawi viau a. He case ah kher kher hi chuan engtin emaw tak hrem tum mahse hrem lo hram tura Court dilpui hmasa ber tur ka nih ka ring . Tin , he False Affidavit case hlawhtlin tawh nasat zia chu kum 2013 Election Affidavit te tehkhin chuan kum 2018 Election Affidavit ah hmasawnna nasat tawh zia kan hmuh tawh reng a, chuvangin he case kan hrual mum danah hian ka lungawi e.Kum 2 dawn min lo tuipui a, min lo support tu te chungah ka lawm em em a. SUAL DOVIN THISEN CHHUAK khawp em em kan la intiam lo anih pawhin SUAL HUAT hi Pathian trihna dik chu ani tih hriaiin chulam chu kan tuipui chho dawn nia aw.
The Frontier Despatch in a tarlan pakhat “GM-in ‘thuneitu sang’ te’n phone kaltlangin endik tura an hrilh” tih hi eng nge a awmzia ni ta ang? District Industries Centre General Manager Pu John Saikhuma’n “thuneitu sang” a tih te hi tute nge ni ta ang? Mizo mipui hian hetianga mipui sum tihchingpenna lian tak hi ngaihven zui kan tum angem? Nge hetianga investigative report kan hmu chung pawh hian ngaihvenzui kan tum lo leh zel dawn? MNF sorkar hian eptu lam an nih laia an buaipui hluai hi an ngawihbopui angem?Pu John Saikhuma hian “thuneitu sang” a tih te hi tute nge an nih a la hria angem?Maṭana Pachuau
Mizo Archive 