Tualthah thubuai avanga Central Jail-a tang Lalrindika (26), West Lungdar khua chu July 9, Inrinni zing dar 8:30 vel khan Central Jail atangin a tlan chhuak a, nimin July 18 Monday thleng khan hmuh a la ni lo.
Thudawn danin, Lalrindika hi Jail hungna bangah lawn liamin a tlan chhuak a, a tlan chhuah lai hian chhum a zin nasat avangin hmuh a harsa niin an sawi. Lalrindika hi a unaupa (cousin) kahhlum thubuai avangin kumin kumtir khan man a nia, a thubuai hi Court-ah ngaihtuah mek a ni.Lalrindika hi ngo lam deuh, feet 5.5 bawr vela sang, a ban vei lama tattoo nei, a mitko veilama ser nei a ni. Hetiang mi lo hmu leh a awmna chin hriate chu an awmna atanga Police Station hnai berah hriattir turin police-te chuan mipuite an ngen.
January 31, 2016 zan dar 10 vel khan Reiek thlang lawk W. Lungdar khuaah tuna Jail atanga tlanchhuak Lalrindika hian tualchher ulhbun silaiin VL Hruaia (35) s/o Lalkailiana chu a kaphlum a. VL Hruaia hi a thiante pahnih nen Rindika inah hian an kal a, Hruaia hian hruiin Samurai a ak a. An inhnial buai dan hriat a ni lova, tapchhak thutthleng hniama a thu lai chu Rindika hian an khum bul atangin a ir-ah a kap a, minute 5 hnu velah Hruaia hi a thi nghal a ni. VL Hruaia leh Rindika te hi an pate unau an ni.
Hemi zan hian Kulikawn Police te chu a hmunah kalin thil awm dan an enfiah a; VL Hruaia ruang hi Reiek damdawiinah post mortem niin, February 1 khan vui a ni. Police te hian Lalrindika hi an man nghal a, a thubuai court a ngaihtuah mek a nih laiin, inrinni zing dar 8:30 vel khan a tanna Central Jail atang hian a tlanchhuak a ni.
Mizo Archive 