- Kohhran inkhawm a tam lutuk.
- Inkhawm tlem a tha zawk em.
Mizo Kristiante hi khawvel ram dang Kristianho laka kan filawr lakna awmchhun chu kohhran programme ngah lamah hian aniha rinawm. Kar tluanin kan biak-in in awl ni a nei meuh lo a tih theih awm e. Kohhran pui inkhawm ringawt pawh Sunday Sikul nen chhiar tel chuan kar khatah vawi nga ngawt kan nei hem mai–Pathianni(Sunday sikul, chhun inkhawm leh zan inkhawm), Nilai Zan leh Inrinni Zan inkhawm. He’ng bakah hian a ni kar awl ho lah pawl tesep, țhalai pawl, nu pawl, pa pawl etc hovin anmahni group puala inkhawm nan an lo luah khat ve bawk. Kohhranpui hruaitu leh pawl hruaitu tan ngat phei chuan committee leh meetings tih velah telna tur a la tam êm êm bawk a ni. Salvation camping, inkhawmpui, fehchhuah, beirual etc kan la nei chamchi bawk.
Kan Bible-ah “chawlhkar khatah ni chuti zat chu lo inkhawm țhin rawh u” tih kan hmu lova, ringtute chu intichak tawn turin, infuih tawn turin an inhmukhawm țhin tih erawh kan hmu.
Pathianin chawlhkara a ni sarihna(Inrinni) chu Chawlhni-ah a puang a, chu nî chu a malsawm a, serh turin a phut bawk a, a bâk ni zawng chu hnathawh nana hmang turin min ti a ni. Keini chuan a ni khatna Chawlhni atan kan hmang thung a, Amâ tan kan hlana kan serh a nih phawt chuan rimtuiah min pawmsak a rinawm êm êm a ni.
Ka rawtna ni ta ber chu ramdang kohhran tam zawkte tih dan anga kar khata ni khat inkhawm hi a tawk viau lovem ni? Programme tam lutuk hian kan zirlai-ah, kan hnathawh-ah leh kan chhungkaw enkawlna kawngah a țhalo lamin nghawng a neih phah em? Nu leh pa, pi leh pu, chhungte damlo bawihsawm ngai kalsanin kan inkhawm san a țul fo em? Kan zaikhawm san a țul fo em? Hla kan zir san a țul fo em? Kan committee san a țul fo em? Chhungkaw enkawl țha hman lêk lovin kohhranah kan inhmang buai phili em? Zirnaa inthlahdul nan kan hman phah em? Kan exam result hmuh tur ang kan hmuh loh phah em? Kelkang zirlai pawl 10 board exam ho an fail deuh vek an tih te kha tak tak ni maw? Thutak a nih ngat chuan a zialo hle a ni. Rinawm takin kan hna kan thawh theih loh phah em? Zan inkhawm tlai kan hlauh vangin țhiante aiin kan ban hma bik a țul fo em? Kohhran programme avangin i hnathawh i țhulh phahfo em?
Kan ramah hian inkhawm hi ‘mifel’ leh ‘zahawm’ kan tehna ber pakhat a ni. Mahni hna(duty/profession) rinawm leh dik taka thawk țhin te hi mifel leh zahawm chu anni zawk mai lovem ni? Pathian rawngbawlna hi enge? Biak-in pan tlut tlut lam ai mahin nitina kan nun hman dan zawk hi niin a lang. Kan hnathawh, kan zirlai, kan thiltih nitina rinawm taka kan hlenchhuah hian kan nûnin amah kan chawimawina a lo ni. Inkhawm hi kan hna ti sukuk buaitu atan kan hmang tur a nilo.
ZANLAM PROGRAMME:
Țhailai tana zan chhuahna tur tam lutuk te hi a him ber em aw? “Lei hmun thim laite chu nunrawnaawmna in a khat si a”(Sam74). Thim tham hi Setana(Thim Lalpa) chet thiamna ber a ni a, kan khingpui Diabola chu sakeibaknei rum țhin angin a seh tur zawngin a phi ruai țhin, chuvangin ngaihvena fimkhur turin Petera pawhin min chah mawlh mawlh ani. Kan inveng zo lo fo țhin. Fanu pahnih ka nei ve a, naupang an la ni a, nula puitling mahni invên nachang hre chin, kum 25 tal an tlin hma chu zan inkhawm leh hla zir etc phalsakloh ka titlu bur a ni. Țhalai tam tak tihtakzeta inkhawm țhin an awm laiin, zan thim boruak remchanna atan hmangtu pawh an kat nuk a, ‘a zan inkhawm kal haw tawh lovin a bialpa nen an inru ta daih alawm le’ ti-a sawi tur pawh khaw tin deuh thawh-ah an awm. “Inkhawm” tih thumal chu thil țha-ah mawl takin kan pawm tawp a ni ber.
Kan inkhawm “chhan” hi a pawimawh ber chu a ni. Kan inkhawm chhan chu Krista vang anih loh chuan kan hun leh tha kan khawhral thlawn mai a ni. Tisa leh thlarau-ah hlawkna tel tur pakhat mah a awmlo. Awmze neilo ‘vanity’ mai a ni. Nu leh pa pawhin kan fate inkhawm chhan uluk taka kan zira, a chhan ‘Krista’ nilova kan hriat chuan kan țhulh tir ngam mai tur a ni. A nihna taka sawi râwt râwt chuan, țhalai tan zanlam biakin programme hi a him tawk lo a, thil țul tak a ni lemlo.
CHAWLHNI(SUNDAY) AH HIAN PROGRAMME A KHAT MAH MAH EM?
Hnathawhna leh zirna avangtein kartluanin chhungkua kan buai tlanga, hun kan inpe tawn thei meuh lova, Chawlhni hi chhungkaw bila ‘family time’ kan hman ho theih ni awm chhun chu a ni mai. Vaiho chuan an hlut hle a, chhungkaw inzawmna tihngheh zual na’n, an fate public park ah te hruaiin hlim takin hun an hmang ho țhin a, chhungkaw inhmangaih tawnna tuaithar na’n an hmang țangkai hle.
Mizo erawhin chutiang hun chu kan nei thei meuh lo, zing ațanga zan thlengin, inzawm zatin’kohhran programme’ in a luah khat fai phiar tih theih a ni. Hemi avang hian Mizote hi vaiho angin chhungkua pawh kan in pawh tawn tâwk loh phah niin a lang. ‘Family time’ hmanna hun kan nei ngai meuh lova, kan tlat tlatin kan tla a, chhungkaw kehchhia pawh kan tam reng a ni. Chhungkuaa hun hman ho hi chungkaw insuihngheh zual nan a pawimawh êm êm a, chawlhni programme tihthawl deuh dan ngaihtuah hi a țul takzetin ka hria.
Inkhawm hi kan sawisel a ni lova, amaherawhchu inkhawm tam hi ringtu leh kohhran chak tehfung a nilo tih erawh kan sawi ni teh se. Kar khata Sunday zing leh zan inkhawm programme siam hi a tawk thawkhat viauin ka hria.
Han ti ve ngial ila, Calcutta-a ka zir laiin Carey Baptist Church-ah ka lawi a, Sunday zing lehzan bak inkhawm programme a awmlo. Kan pastor Ashok Andrew-a kha thusawi thiam leh nung tak a ni a, Calcutta-a kohhran chak pawl zinga chhiar erawh a ni thung. Isua pawh khan Sabbath-ah tih loh chuan biak inah a zirtir kan hre lemlo. Thil țha awm taka lang “inkhawm programme tam hleiluak hi” kan nun programme vawchhetu atan kan lo hmang reng em? Ngaihtuah a țul.
Han sawi chhunzawm ve tawh teh u.
Mizo Archive 